Kom beint upp um seks milliónir

Krabbameinsfelagið hevur talt saman, og takkar nú fyri stóra stuðulin til innsavningina “Føroyar móti krabba”, sum var síðsta leygardag. Tilsamans 6.084.962 krónur komu inn

(Skíggjamynd: Kvf.fo)

SkrivaÐ:

Sverri Egholm

Tilsamans 6.084.962 krónur komu inn tá Krabbamansfelagið í samstarvi við Norðurlandahúsið og Kringvarp Føroya skipaðu fyri landsinnsavningini “Føroyar móti krabba” síðsta leygarkvøld.

Síðst í sendingini leygarkvøldið varð nevnt, at 5,7 milliónir vórðu komnar inn, men nú boðar Krabbameinsfelagið so frá, at smáar 350.000 krónur komu inn afturat, eftir at myndatólini vórðu sløkt.

- Vit eru sera fegin um góða stuðulin, og takka øllum tónleikarum, listafólkum, feløgum, fyritøkum, sjálvbodnum og einstaklingum, sum við hjálpsemi, tænastum, pengagávum og á annan hátt stuðlaðu okkum. Ein serlig tøkk fer til allar teir mongu skúlaflokkarnar og lærarar teirra, sum við stórum ágrýtni og hugflogi skipaðu fyri innsavningartiltøkum kring landið, og megnaðu at savna størstu upphæddina til felagið, sigur Krabbameinsfelagið.

Greinin varð fyrstu ferð løgd út 30. mars 2021

Fer at síggjast væl á Skálafjørðinum

17 metra høgi krossurin, sum ætlanin er at seta upp á Høgnaesi á Toftum, fer at síggjast væl. Tað vísir mynd sum vit hava fingið frá stigtakarunum

Vegleiðandi uppskot um hvussu krossurin skal síggja út

SkrivaÐ:

Sverri Egholm

Stigtakararnir hava fingið prinsipielt loyvi frá Nes kommunu at seta ein 17 metrar høgan kross upp á Høganesi á Toftum.

- Um vit merkja tað, at fólkið er positivt um hetta, so fara vit víðari við málinum, segði Súni í Hjøllum við útvarpið í síðstu viku.

Men krossurin skilir vøtnini. Nógvar positivar røddir hava verið frammi, men nú eru fólk, sum búgva nærhendis, farin at savna undirskriftir, har mótmælt verður ætlanini um krossin. Hetta verður gjørt á netinum, og í næstu viku verður farið at ganga hús úr húsi við adressuni har til ber at skriva undir.

Á Facebook er eisini nógv kjak um hendan krossin, sum eisini skal lýsa, og fer at síggjast um stóran part av Skálafjørðinum.

Enn hava ikki nógvar myndir verið frammi av krossinum, men vit hava fingið eina mynd frá stigtakarunum og Nes kommunu, sum sæst niðanfyri. Hetta eru vegleiðandi uppskot um hvussu krossurin kundi sæð út.

Tróndur Patursson fer at standa fyri arbeiðinum at gera krossin, sum verður úr glasi.

Greinin varð fyrstu ferð løgd út 29. mars 2021

Triðingurin tekur undir við krossinum

Meira enn helmingurin sigur tó nei til ætlanirnar á Høganesi

 

SkrivaÐ:

Ingi Samuelsen

Ein triðingur – 33 prosent av teimum, sum hava svarað – heldur tað vera eitt gott hugskot at seta upp ein kross á Høganesi, sum kann síggjast yvir allan Skálafjørðin.

Mánakvøldið setti Portalurin lesarunum spurningin “Heldur tú, at krossur skal setast upp á Høganesi?”

Kjakið hevur verið aktuelt eftir at sóknarpresturin á Nesi í farnu viku kunngjørdi ætlanina um at seta eitt 17 metra høgt listaverk hjá Tróndi Patursson upp á høganesi. Talan er um ein kross úr glasi við ljósi innaní, sum kann síggjast langa leið frá.

Ætlanin er umstrídd, og rættiliga stórt kjak hevur síðan verið um ætlanina. Út frá kjakinum, sum hevur verið, er tað kanska ikki so óvæntað, at 54 prosent av teimum, ið hava svara, siga nei til henda krossin.

Eitt sindur meira óvæntað er kanska, at triðji hvør - 33 prosent - taka undir við ætlanini hjá toftafólki. 14 prosent søgdu seg ikki hava tikið støðu til spurningin.

5.124 av lesarunum hjá Portalinum valdu at svara spurninginum, sum lá frammi í 12 tímar.

Greinin varð fyrstu ferð løgd út 30. mars 2021

Lata koppsettum dønum 1.000 einvegis ferðaseðlar til Føroya

Nýtt átak hjá Visit Faroe Islands skal hjálpa ferðavinnuni at fóta sær

(Savnsmynd: Ólavur Frederiksen / Faroephoto)

SkrivaÐ:

Tíðindaskriv

Frá 1. apríl kunnu fólk, ið eru liðug koppsett, ferðast til Føroyar uttan at fara í seks daga sóttarhald. Í tí sambandi bjóðar Visit Faroe Islands túsund ókeypis einvegis ferðaseðlar til danir, ið hava fingið seinna koppsetingarprikið.

Einvegis ferðaseðlarnir, ið Smyril Line og Atlantic Airways lata, verða latnir til tey fyrstu 1.000, ið skráseta seg - treytað av, at tey prógva, at tey eru koppsett.

- Við hesum átakinum vilja vit veita ferðavinnuni, ið hevur verið sera hart rakt seinasta árið, eina hjálpandi hond, sigur Guðrið Højgaard, stjóri í Visit Faroe Islands.

- Nú krøvini fyri, hvør kann vitja uttan at fara í sóttarhald, verða broytt, er hetta eitt gylt høvi at bjóða koppsettum dønum til Føroyar. Gestir úr Danmark umboða næstan helvtina av øllum okkara ferðafólkum, og eru tey einastu, ið kunnu vitja okkum í løtuni.

Átakið er gjørt í samráð við heilsumyndugleikar.

- Tað er av alstórum týdningin fyri okkum, at vit við hesum átakinum ikki seta heilsuna hjá føroyingum í vanda. Tí hava vit ráðført okkum við heilsumyndugleikar, ið hava tryggjað okkum, at tað er sera lítil sannlíkindi fyri, at koppsett smitta onnur, og at tað er ráðiligt at seta eitt slíkt átak í gongd, sigur Guðrið Højgaard.

Hóast fólk eru koppsett, sleppa tey kortini ikki undan at taka eina korona kanning við komu til landið, og skulu framvegis í sóttarhald inntil úrslitið av kanningini er tøkt. Tey, ið ikki eru koppsett, skulu framvegis í seks daga sóttarhald og kannast á sætta degi.

Átakið, ið Visit Faroe Islands hevur tikið stig til, er gjørt saman við Atlantic Airways, Smyril Line og Vága Floghavn.

Greinin varð fyrstu ferð løgd út 31. mars 2021

Nú sleppa summi undan sóttarhaldi

Frá 1. apríl er ikki neyðugt hjá teimum, sum eru liðugt koppsett fyri koronu, at fara í heimauppihald í seks dagar eftir komu til landið

Mynd: Jens Kr. Vang

SkrivaÐ:

Agnar Prestá

Tað hevur verið nakað frammi um, hvørt koppseting fyri koronu hevur við sær, at ein ikki kann bera smittu, men tað er prógvað, at ein koppsettur persónur framvegis kann bera koronusmittuna.

Tað hevur eisini verið tosað og kjakast um tað at býta fólk upp eftir, um ein er koppsettur ella ikki. Í Føroyum verður hetta nú meira og meira gjørt.

Síðani í fjør summar hevur eitt tilmælið um seks daga heimauppihald eftir komu til landið verið galdandi. Hetta fer úr gildi 1. apríl, fyri tey sum kunnu vátta, at tey eru liðugt koppsett. 

- Fyri at verða roknaður sum liðugt koppsettur skal ein persónur, umframt neyðugu prikini, eisini hava fingið seinasta prikið fyri minst átta døgum síðani.

Soleiðis skrivar Heilsumálaráðið á heimasíðu sínari, har til ber at lesa tilmælini, sum hava verið galdandi frá 5. mars. Talan er um tilmæli landstýrins, ið fyri áleið einum mánaði síðani tók avgerð um mannagongdina, sum í dag er komin í gildi.

Síðani 5. mars eru tríggir koronutilburður staðfestur í Føroyum. Allir eru, eins og tað hevur verið síðani síðst í januar, staðfestir við kanning á flogvøllinum. Mannagongdin viðvíkjandi kanning við komu heldur fram í nakrar mánaðir afturat í øllum førum.

Greinin varð fyrstu ferð løgd út 01. apríl 2021

42 ára gamal trý ára fongsulrevsing fyri kynsliga misnýtslu

Dómur er sagdur í málinum um ein 42 ára gamlan mann. Hann skal inn at sita í trý ár, og skal eisini rinda teimum trimum dreingjunum, sum hann er dømdur fyri at misnýta kynsliga 65.000 krónur í endurgjaldi

(Savnsmynd: Jens Kr. Vang)

SkrivaÐ:

Sverri Egholm

Trý ára fongsulsrevsing, og skal rinda endurgjald upp á 65.000 krónur.

Dómur varð týsdagin sagdur í rættarmálinum, sum hevur verið fyri í Føroya rætti seinastu dagarnar, har ein maður skal hava kynsliga misnýtt tríggjar dreingir frá 2017 til desember 2019.

Kringvarpið skrivar á heimasíðuni, at enn hevur eingin av partunum tikið støðu til, um dómurin skal kærast fyri hægri rætt.

Maðurin situr í varðhaldi til støða er tikin til, um dómurin skal kærast, og har hevur hann sitið síðani desember 2019.

42 ára gamli maðurin er dømdur at rinda sakarmálskostnaðin.

Greinin varð fyrstu ferð løgd út 30. mars 2021

Mótmæltu dóminum í neyðtøkumálinum

Nakað av fólki møtti upp á Vaglinum langa fríggjadag tá skipað varð fyri mótmælistiltaki í tøgn. Lini dómurin í stóra neyðtøkumálinum var orsøkin

(Mynd: Sverri Egholm)

SkrivaÐ:

Sverri Egholm

Eini 150 fólk møttu upp til mótmælistiltak á Vaglinum um eitt tíðina langa fríggjadag fyri at mótmæla dómin í stóra neyðtøkumálinum, har ein 42 ára gamal maður í vikuni fekk ein trý ára dóm. Ein dómur, sum stigtakararnir meta vera ov linan.

Hetta var ein løta í tøgn í dýrdarveðrinum, og heitt var á fólk um at vera friðalig og virðilig sum á einari jarðarferð.

- Endamálið er at vísa samkenslu og virðing fyri øllum børnum í Føroyum sum hava og enn bera uppá eina drepandi tøgn um kynsligan ágang, siga stigtakararnir.

Sagt verður, at hetta er ein brellbiti til onnur mótmælistiltøk og mótmælisgongur sum verða eftir páskir.

Fólk, sum vóru á Vaglinum settu fløgg á Tinghúsvøllin, og tað legðist støðugt afturat.

Myndir: Sverri Egholm

Greinin varð fyrstu ferð løgd út 02. apríl 2021

Heilsumálaráðið longt avtalurnar við Thetis og Smyril Line

Skulu halda fram at taka sær av koronukanningum av ferðandi - avtalurnar eru galdandi restina av árinum

 

SkrivaÐ:

Agnar Prestá

Farsóttarnevndin hevur álagt øllum at lata seg kanna við komu til Føroya fram til 30. juni 2021.

Ivasamt er, um hetta verður longt, men nú er í øllum førum greitt, at avtalurnar hjá Heilsumálráðnum við Spf. Thetis og Smyril Line eru longdar til gamlaárskvøld.

Fyritøkurnar hava tikið sær av koronukanningunum við markið í skjótt eitt ár.

Greinin varð fyrstu ferð løgd út 31. mars 2021

Hava útsett nýggju ferðaætlanina í ein mánað

Strandferðslan fekk 86 hoyringssvar uppá uppskot til tillaging av ferðaætlan á fýra leiðum. Nú skulu broytingar og tillagingar gerast, og ætlanin er at byrja 30 apríl

- Viðgerin av hoyringssvarunum vísir, at tað er meira skynsamt at byrja við nýggju ferðaætlanini 30. apríl heldur enn 1. apríl. Hendan avgerð er grundað á, at ymsar broytingar á ávísum leiðum kunnu gerast og tillagast, áðrenn byrjað verður at koyra eftir nýggju ferðaætlanini (Mynd: Sverri Egholm)

SkrivaÐ:

Agnar Prestá

Tað skuldi verða 1. apríl, at nýggja ferðaætlanin á bussleiðunum 400, 440 og 450, umframt snarleiðini 401, skuldi koma í gildi. 

Nógv kjak hevur verið um hesar bussleiðirnar hjá Strandferðsluni - serliga leið 400 - síðanu Eysturoyartunnilin kom.

Fyrst vóru serliga tey í Sundalagnum ónøgd um millum annað túratal og samband, og eftir tillagingar vóru tað serliga klaksíkingar og eysturoyingar, sum vístu sína ónøgd. Ein høvuðsspurningur hevur verið: Hvussu nógv skal koyrast á "gomlu leiðina" millum Klaksvík og Tórshavn (leið 400). So er eisini spurningurin um, hvussu nógv skal koyrast ígjøgnum Eysturoyartunnilin, og um hvussu sambandi skal vera millum nakrar leiðir.

Samanlagt fekk Strandferðslan 86 hoyringssvar uppá uppskot til tillaging av ferðaætlan á teimum nevndu fýra leiðunum. Freistin at senda inn svar var 17. mars, og síðani hevur Strandferðslan hugt uppá hetta og ásannað, at tað ikki bar til at fara í gongd eftir ætlaðu broytingunum 1. apríl: 

- Viðgerin av hoyringssvarunum vísir, at tað er meira skynsamt at byrja við nýggju ferðaætlanini 30. apríl heldur enn 1. apríl. Hendan avgerð er grundað á, at ymsar broytingar á ávísum leiðum kunnu gerast og tillagast, áðrenn byrjað verður at koyra eftir nýggju ferðaætlanini; men krevur hetta ávísar umsitingarligar, tøkniligar og fíggjarligar umskipanir umframt sáttmálaviðgerð, ið tekur tíð at samskipa og seta í verk

Hetta skrivar ssl.fo, har tað eisini verður víst á, at orsaka av stóru broytingunum, sum vístar er á í hoyringssvarum, so má meira peningur fáast til vega. Í hesum sambandi verður ein møguleiki nevndur, og tað er, at viðkomandi kommunur saman við landinum finna saman at lyfta byrðuna í felag. Umboð fyri Sunda kommunu og Eysturkommunu (borgarstjórarnir) hava verið alment frammi í samband við ferðaætlnina, og eisini umboð fyri millum annað Klaksvíkar kommunu. 

Um sjálva ferðaætlanina skrivar heimasíðan hjá Strandfaraskipum Landsins soleiðis: 

- Leið 450 fer at koyra gjøgnum Eysturoyartunnulin úr Havn til Strendur og Runavík og aftur til Havnar. Fyri tey í norður- og eysturøkinum, ið hava brúk fyri bussi at koma til Havnar, verða nú fleiri møguleikar til taks, til dømis ein “langleið” 400, ein “snarleið” 401 og møguleikin at skifta millum leiðirnar 400, 440 og 450. Túratalið á leiðunum 400 og 401 kann yvir tíð tillagast í mun til vegakervið, brúksmynstur og tørvir, ið mugu taka atlit til kostnaðarstøðið og sáttmálar á økinum.

Sligið verður fast, at fyriliggjandi ferðaætlan til eina og hvørja tíð er ein støðumynd, sum krevur støðugar tillagingar til broytilig ferðslumynstur, tørv og menningina av undirstøðukervinum.

Greinin varð fyrstu ferð løgd út 02. apríl 2021

Ókeypis sálarfrøðihjálp til ung kann fara í gongd

Fíggjarmálaráðið og Føroyskir Sálarfrøðingar hava funnið semju

 

SkrivaÐ:

Tíðindaskriv

Nú fer royndarskipanin við ókeypis sálarfrøðihjálp til ung í aldrinum 15 til 35 ár, sum hava angist ella lætt til moderat tunglyndi loksins at virka.

Eftir ætlan skuldi royndarskipanin fara í gongd longu 1. desember 2020, men hon strandaði tá í ósemju ímillum Felagið Føroyskir Sálarfrøðingar og Fíggjarmálaráðið um gjaldið.

Nú er semja ímillum partarnar í málinum, og Kaj Leo Holm Johannesen, landsstýrismaður í heilsumálum, fegnast um, at skipanin nú kann setast í verk.

Hildið verður, at fleiri føroyingar í aldrinum 15 til 35 ár stríðast við angist og lætt til moderat tunglyndi, og at tað í nógvum førum merkir teirra gerandisdag. Landsstýrismaðurin hevur tí góðar vónir um, at royndarskipanin við ókeypis sálarfrøðiligari viðgerð veruliga kann verða ein hjálp fyri hesi fólk.

Royndarskipanin um ókeypis sálarfrøðiliga viðgerð er galdandi til 31. oktober 2023, tilboðið fevnir um øll økir í landinum, og umfatar upp til 12 ókeypis viðtalur hjá sálarfrøðingi.

Tað er kommunulæknin, sum ávísir til ókeypis sálarfrøðiliga viðgerð, sum annaðhvørt kann vera einstaklingaviðgerð ella bólkaviðgerð.

Greinin varð fyrstu ferð løgd út 30. mars 2021

Nú valdar friður í Sjálvstýri

Á aðalfundinum leygardagin samtykti flokkurin einmælt, hvussu ið farast skal fram komandi tíðina, nú flokkurin skal til at velja nýggjan formann – miðað verður fram ímóti at hetta arbeiði kann verða liðugt í seinasta lagi til heystar

Mynd: Sjálvstýri

SkrivaÐ:

Alda Nielsdóttir

– Tað besta sum er hent her í dag, er, at ein breið semja er komin upp í lag, og at tað nú valdar friður í Sjálvstýri. Nakað soleiðis segði Kristin Michelsen, tingmaður fyri Sjálvstýri, í røðu sínari á aðal- og landsfundinum hjá Sjálvstýri, sum bleiv hildin á Hotel Runavík farna leygard.

Fleiri enn 60 fólk møttu til fundin, og helst var talan um metstóra luttøku, skrivar Sjálvstýri í tíðindaskrivi.

Nakað av rumblið hevur verið í Sjálvstýri farnu árini, men líkindi eru nú fyri, at flokkurin aftur hevur funnið felags stev.

Á aðalfundinum samtykti flokkurin einmælt, hvussu ið farast skal fram komandi tíðina, nú flokkurin skal til at velja nýggjan formann. Tvey uppskot vóru innkomin ið viðgjørdu hvussu farast skuldi fram, og semja bleiv gjørd um ein felags leist.

Hesin leisturin inniber, at nývalda landsnevndin fer undir at seta eina nevnd, ið bæði skal endurskoða lógirnar og bygnaðin í flokkinum, men eisini at finna eitt uppskot til nýggjan formann fyri flokkin. Miðað verður fram ímóti at hetta arbeiði kann verða liðugt so skjótt sum gjørligt, ella í seinasta lagi til heystar, skrivar flokkurin.

– Ongantíð verið meira brúk fyri flokkinum

Sambært Kára P. Højgaard, ið er virkandi floksformaður í Sjálvstýri, hevur ongantíð verið meira brúk fyri flokkinum á miðjuni í føroyskum politikki.

– Ongantíð meir enn nú er brúk Sjálvstýri á miðjuni í føroyskum politikki. Frá 2011 til 2015 var politiska róðrið lagt á stýriborð, tá høgra samgongan við Fólkaflokkinum sum primus motor tók við. Rumblið um fiskivinnupolitikkin slóðaði í 2015 fyri, at vinstravenda samgongan við Javnaðarflokkinum, Tjóðveldi og Framsókn tók yvir. Enn einaferð róðrið lagt í bakborð og enn størri øsing í samband við fiskivinnupolitikkin, har hægri tilfeingisgjald og uppboðssøla bleiv lyklaorðið.

- Valið 2019 aftur fult róður lagt á stýriborð og Fólkaflokkurin fær sín fiskivinnupolitiska vilja framdan, segði Kári P. Højgaard, sum eisini harmaðist um innanhýsis stríðið, sum hevur verið í flokkinum.

- Eitt sum ofta er kostnaðarmikið í atkvøðum fyri ein politiskan flokk er, um innanhýsis stríð valdar og hetta gerst alment. Vit eiga at læra av mistøkum, stinga hendur í egnan barm, rætta feilir og skeivleikar, og í felag lyfta tær uppgávur, sum liggja fyri framman, og greitt seta kós og framtíðar ætlanir. Hjartans ynski mítt er, at vit frá í dag seta eina striku í sandin, byrja av nýggjum og taka felags lógvatak landi, fólki og Sjálvstýri at gagni.

Ætla at stovna Sjálvstýrisfelag í Suðuroynni

Leygardagin var samstundis fyrstu ferð, at Kristin Michelsen var á aðal- og landsfundi sum tingmaður fyri Sjálvstýri.

Fleiri tóku eisini hendan møguleikan at bjóða honum vælkomnum í felagsskapin, og tað bleiv samstundis boðað frá, at flokkurin í løtuni arbeiðir við ætlanum um at seta Sjálvstýrisfelag á stovn í Suðuroynni.

Kristin Michelsen sjálvur nýtti høvið at takka fyri hjartaligu vælkomuna, og greiddi hann samstundis frá politiska arbeiðnum hjá Sjálvstýrinum í Løgtinginum.

Greinin varð fyrstu ferð løgd út 29. mars 2021

Norðoya Sparikassi 15,5 milliónir í avlopi

Grundraksturin í 2020 var merktur av hægri inntøkum og lægri útreiðslum

Mynd: Norðoya Sparikassi

SkrivaÐ:

Tíðindaskriv

Úrslitið hjá Norðoya Sparikassa áðrenn skatt í 2020 var eitt avlop upp á 15,5 milliónir krónur. Sparikassin er nøgdur við avlopið og at grundraksturin er styrktur.

Grundrakstur styrktur
Grundraksturin í 2020 var merktur av hægri inntøkum og lægri útreiðslum. Inntøkurnar øktust við 4,9 milliónum krónum, meðan útreiðslurnar lækkaðu við 6,2 milliónum. Útreiðslurnar í 2019 vóru ávirkaðar av stakútreiðslum í sambandi við sparikassans 100-ára hátíðarhald. 

Grundraksturin í 2020 hækkaði úr 8 milliónum krónum upp í 19 milliónir, sum er ein øking upp á 11 milliónir krónur.

Hóast árið 2020 varð merkt av covid-19, so hevur ávirkanin á sparikassans kundar higartil verið avmarkað. Sparikassin hevur ikki staðfest beinleiðis tap av covid-19, men hevur avsett 8 milliónir krónur í sambandi við langtíðarárin og møgulig komandi tap.

Økt virksemi
Útlánini øktust úr 1.947 milliónum krónum upp í 1.990 milliónir krónur, sum svarar til ein vøkstur upp á 2,2 prosent. Innlánini øktust úr 2.403 milliónum upp í 2.469 milliónir krónur, sum svarar til ein vøkstur upp á 2,8 prosent.

Áhugin fyri at seta pening í ábyrgdarfæ er framvegis stórur og í 2020 hækkaði samlaða ábyrgdarfæið úr 25,2 upp í 28,5 milliónir krónur. Hetta er ein øking upp á 3,3 milliónir ella 13,1 proent.

Gjaldføri og solvensur
Gjaldførið er gott. Við ársenda 2020 var lyklatalið fyri gjaldførið 277 prosent í mun til lógarkravda gjaldførið á 100 prosent.

Eisini solvensurin er góður. Við ársenda 2020 var solvensurin 22,6 prosent sammett við 21,7 prosent árið fyri.

Árligi umboðsráðsfundur sparikassans verður 15. apríl 2021.

Greinin varð fyrstu ferð løgd út 29. mars 2021

Ben Arabo ikki longur nevndarformaður í BankNordik

Á aðalfundi í farnu viku varð nýggj nevnd vald – Sverre Bjarkeli og Jóhanna Lava Køtlum, sum bæði eru nývald, eru nú ávikavíst formaður og næstforkvinna í nevndini hjá BankNordik

(Savnsmynd)

SkrivaÐ:

Alda Nielsdóttir

Á aðalfundinum hjá BankNordik síðsta fríggjadag, varð nýggj nevnd skipað, og Sverre Bjarkeli hevur nú yvirtikið nevndarformannssessin frá Ben Arabo. Hesum boðaði BankNordik frá eftir aðalfundin í gjár.

John Henrik Holdm Barbara P. Vang, Gunnar Nielsen og Hans Arni Bjarnason Thomsen tóku ikki við afturvali í gjár, meðan Ben Arabo og Jógvan Jespersen tóku við afturvali.

Nýggj aðalfundavald umboð í nevndini eru Sverre Bjarkeli, Michael Ahm, og Jóhanna Lava Køtlum. Alexandur Johansen, Kenneth Samuelsen og Rúna Hentze eru starvsfólkavald umboð í nevndini.

Nývalda nevndin í BankNordik hevur skipað seg soleiðis:

Sverre Bjerkeli, formaður
Jóhanna Lava Køtlum, næstforkvinna
Ben Arabo, aðalfundarvaldur nevndarlimur
Jógvan Jespersen, aðalfundarvaldur nevndarlimur
Michael Ahm, aðalfundarvaldur nevndarlimur
Kenneth M. Samuelsen, starvsfólkaumboð
Rúna Hentze, starvsfólkaumboð
Alexandur Johansen, starvsfólkaumboð

Greinin varð fyrstu ferð løgd út 27. mars 2021

Turið F. Arge heldur fram í bankanum kortini

Rakstrarstjórin í BankNordik hevur tikið uppsøgnina aftur

 

SkrivaÐ:

Ingi Samuelsen

Fyrst í februar mánaði varð boðað frá, at Turið F. Arge skuldi gevast sum rakstrarstjóri í BankNordik. Orsøkin var, at danska virksemið hjá BankNordik var selt, og av tí at hon hevur brúkt tað mesta av tíð síni í bankanum upp á danska partin av virkseminum hjá bankanum, helt hon at tíðin var búgvin til at leita sær eftir øðrum avbjóðingum.

Tað segði Turið F. Arge í samrøðu við Portalin.

Les eisini: - Tíðin búgvin til at leita eftir onkrum øðrum 

Eftir ætlan skuldi Turið F. Arge gevast 1. apríl, men í gjár boðaði bankin frá á heimasíðuni, at hon hevur játtað at halda fram í starvinum sum rakstrarstjóri og í samtaksleiðsluni.

- Eg eri sera fegin um, at Turið F. Arge hevur játtað at halda fram í BankNordik, og at hennara vitan og førleikar framhaldandi fara at koma samtakinum til gagns, sigur Árni Ellefsen, forstjóri við heimasíðuna.

Samtaksleiðslan í BankNordik er mannað av Árna Ellefsen, forstjóra, Rune Nørregaard, kreditt- og fíggjarstjóra og Turið F. Arge, rakstrarstjóra.

Greinin varð fyrstu ferð løgd út 30. mars 2021

Eldur í HB-húsinum

Farna leygarkvøld hevði onkur sett eld á pappír og eina stóra vesirullu. Um ikki ein venjari kom, so kundi verið heilt galið

Havnar Bóltfelag sendir nú eina áheitan út til foreldur um at tosa við børn síni

SkrivaÐ:

Agnar Prestá

Tað er ikki óvanligt, at óbodnar gestir hava verið í HB-húsinum, og mangan hevur verið illa farið um, men leygarkvøldið kundi verið heilt galið.

Hetta skrivar Havnar Bóltfelag á Facebook-síðu sínari.

- Um ikki vakin venjari kom, so er ikki vist at HB húsið stóð í dag. Í fleiri rúmum var eldur settur á papír og í einum rúmi kom venjari á eina av stóru wc rullunum, sum eldur var í. 

Í hesum sambandi sendir felagið eina áheitan á foreldur um at tosa við børn síni, og at greiða teimum frá um øðiligu avleiðingarnar, sum kunnu standast av hesum.

- Vit vita ikki, hvør tað er, men vit ynskja so innarliga, at øll eru góð við HB húsið og at øll hava møguleika at brúka húsið. Tí hava vit ikki havt tað stongt. Um ikki broyting kemur í, so føla vit okkum noydd til at stongja, og so hevur ongin vunnið nakað.

Hetta er undirskrivað av Pálli Mohr Joensen, formanni í HB, ið ynskir, at ein góð loysn verður funnin saman.

Greinin varð fyrstu ferð løgd út 30. mars 2021

Skúlin á Giljanesi 60 ár

Í ár eru 60 ár síðani Miðvágs-Sandavágs skúli, skúlin á Giljanesi varð bygdur

Mynd: Vága kommuna

SkrivaÐ:

Alda Nielsdóttir

Hetta vikuskifti fyllir fyrsti felagsskúlin í Føroyum 60 ár

Tað var annan páskadag, 3. apríl í 1961, at næmingar úr Miðvágs skúla og næmingar úr Sandavágs skúla gingu skrúðgongu inn á Giljanes, har nýggi felagsskúlin var bygdur.

Tað var á fundi í skúlanum í Sandavági á vári í 1955, har sóknarstýrini, skúlanevndirnar og lærarar í Miðvági og Sandavági samdust um, at fara undir at byggja ein felagsskúla á Giljanesi, skrivar Vága kommuna.

Á Giljanesi vóru 219 næmingar í yngru flokkunum, og 38 næmingar í framhaldsdeildini í tveimum flokkum. Børnini gingu í sama flokki úr báðum bygdunum.

Í dag ganga um 300 børn og ung á Giljanesi, og vóru tey samlað síðsta fríggjadag  til eitt føðingardagshald áðrenn tey fóru í páskafrí.

Nógv var á skránni, eitt nú myndatøka, tónleikur, dansur, spøl, umframt at borðreitt var við køkum og grillaðum pylsum.

Greinin varð fyrstu ferð løgd út 27. mars 2021

Annfinn Brekkstein: Nólsoyingar skulu hava eitt nýtt avloysaraskip

– Nú mugu myndugleikarnir lurta eftir nólsoyingum og geva teimum tað, sum átti at verið ein sjálvfylgja í 2021: eitt skip til Nólsoyarleiðina sum megnar bæði aldu og harðan streym

Annfinn Brekkstein, varaborgarstjóri í Tórshavnar kommunu (Mynd: Sverri Egholm)

SkrivaÐ:

Alda Nielsdóttir

Farna vikuskifti byrjaði avloysaraskipið Erla Kongsdóttir aftur í sigling á Nólsoyarleiðini. Skipið hevur annars ikki verið í sigling síðan 23. februar, eftir at fleiri rútar brotnaðu.

Annfinn Brekkstein, varaborgarstjóri í Tórshavnar kommunu, heldur, at ein betri loysn má finnast til Nólsoyarleiðina, tí Erla Kongsdóttir hevur prógvað, at hon ikki er egnað til at sigla á leiðini um veturin.

– Fólk eru stúrin og ørkymlað, og tí má ein loysn finnast, sum nólsoyingar kenna seg foreintar við. Loysnin er eitt ordiligt avloysaraskip, sum kann røkja leiðina til lýtar. Eitt skip, sum altíð kann brúkast, og har pláss er fyri fólki, bilum og vanligum farmi, sigur varaborgarstjórin í lesarabrævi, sum er lagt út á heimasíðuna hjá Tórshavnar kommunu.

Nógvu avlýsingarnar við Erlu Kongsdóttir vísa greitt, at skipið ikki er álítandi á Nólsoyarleiðini, sigur Annfinn Brekkstein. Hann heldur reglusemi vera tað minsta kravið, sum mann eigur at kunna seta til hesa farleiðina.

Farleiðin er sjálv lívæðrin hjá nólsoyingum, og fyri bygdina er hetta ein øgiliga harður smeitur, sigur hann.

– Tað hevur verið tosað nógv um útoyggjamenning. Seinastu árini hevur tað gingið skjótt niður á bakka í øllum teimum smærru oyggjunum uttan tí einu – Nólsoy! Tað legst aftrat við fólki í oynni, og tað er ein sólskinssøga fyri eina oyggj uttan fast samband. Tað er eingin ivi um, at gott og støðugt samband er tað, sum veruliga munar. Nólsoyingar hava brúk fyri reglusemi, og teir hava brúk fyri at koma aftur og fram í einum skipi, sum ber seg væl í øllum veðri.

Tórshavnar kommuna vil hava hvønn einstakan av teimum 234 nólsoyingunum, sum búgva í oynni at trívast har, og ynskir kommunan, at allir borgarar hava somu atgongd til tænasturnar hjá kommununi, men tað hava teir ikki, so leingi Erla Kongsdóttir røkir leiðina um Nólsoyarfjørð, sigur Annfinn Brekkstein.

Varaborgarstjórin vísir eisini á, at hóast ein fyribils kanning er komin um skaðarnar á Erlu Kongsdóttir, er endaliga frágreiðingin ikki komin enn, og eru nólsoyingar tí stúrnir um at fara við skipinum, sum støðan er.

– Eg skilji væl, at skelkir standast av tilburðunum, sum hava verið. Og eg skilji eisini væl, at øll ikki eru álvulig við at fara umborð á Erlu Kongsdóttir eftir tað, sum longu er hent í tveimum førum. 

– Nú mugu myndugleikarnir lurta eftir nólsoyingum og geva teimum tað, sum átti at verið ein sjálvfylgja í 2021: eitt skip til Nólsoyarleiðina sum megnar bæði aldu og harðan streym, sigur Annfinn Brekkstein at enda.

Greinin varð fyrstu ferð løgd út 28. mars 2021

Settu nýggja reyðbók niður á Vaglinum

Gamla træið var deytt og tikið niður í undanfarnu viku. Týsdagin var nýtt træ sett niður sama stað

(Mynd: Ólavur Frederiksen / Faroephoto)

SkrivaÐ:

Sverri Egholm

Fyri tveimum vikum síðani varð gamla reyðbókin á Vaglinum tikin niður. Træið var deytt, men nú er nýggj reyðbók sett upp.

Nýggja reyðbókin – Fagus sylvetica Atropunicia - er umleið 4-5 metrar høg við rót. Hon er bíløgd frá plantuskúla við serkunnleika í stórum trøum og øðrum trævøkstri.

Rótin sjálv er umleið 80 cm breið og 50 cm høg. Diameturin er 20-25 cm. Røturnar frá trænum fara so líðandi at røkka væl longri. Vanliga verður sagt, at líka so langt krúnan stendur, líka so langt røkka røturnar.

Henda reyðbókin hevur brún bløð á frá í fjør, sum detta av, tá ið nýggju bløðini koma seinni í vár.

Tað eru nøkur ár síðani, at gamla reyðbókin so líðandi fór at missa øll bløðini. Nøkur átøk vórðu gjørd fyri at bjarga trænum. Eitt nú varð gróður tikin upp, mold skift út og roynt var at fáa meira luft til røturnar. Men træið kom ikki fyri seg aftur.

Trø eru livandi og skulu hava luft og vatn og gott pláss til røturnar. Rótklumpurin á gamla trænum var 80 cm frá róthálsinum og upp til yvirflatuna. Og tey kønu fólkini í trævøkstri siga, at hetta hevur ikki givið trænum tær bestu liviumstøðurnar.

Ein reyðbók kann blíva elligomul. Í natúrligum umhvørvi, í skógi og náttúru, kann hon blíva 300 ára gomul.

Tað er Hjálpirót sum hevur staðið fyri arbeiðinum at seta reyðbókina á Vaglinum niður.

Reyðbókin avmyndað fyri nøkrum árum síðani

Greinin varð fyrstu ferð løgd út 30. mars 2021

Klárt at fara undir at byggja Heimið til børn og ung við autismu

– Eg eri sera glað um, at Løgtingið einmælt hevur tikið undir við, at vit nú kunnu fara undir byggingina av heiminum til børn og ung við autismu, sigur landsstýriskvinnan við almannamálum

Elsebeth Mercedis Gunnleygsdóttur (Savnsmynd)

SkrivaÐ:

Tíðindaskriv

Løgtingið samtykti farna hósdag einmælt, at landsstýriskvinnan við almannamálum, Elsebeth Mercedis Gunnleygsdóttur, kann fara undir at byggja heimið til børn og ung við autismu, sum skal byggjast í Kvíggjartúni á Argjum.

– Eg eri sera glað um, at løgtingið einmælt hevur tikið undir við, at vit nú kunnu fara undir byggingina av heiminum til børn og ung við autismu. Hetta er fyrstu ferð, bygt verður til børn og ung við autismu, so tað verður sera spennandi at síggja úrslitið, sigur Elsebeth Mercedis Gunnleygsdóttur.

Arbeiðið varð upprunaliga boðið út í desember 2019, men av tí at prísurin var nógv hægri enn kostnaðarmetingin, gjørdi landsstýriskvinnan av at havna lisitatiónini. Arbeitt hevur verið við sparingum, sum ikki ganga út yvir funktiónirnar og virksemið í heiminum. Arbeiðið varð boðið út av nýggjum í desember 2020 í sjey arbeiðstøkum. Tá tilboðini vórðu latin upp, vóru tilboðini lægri enn kostnaðarmetingin.

Nú broytingaruppskotið er samtykt, er klárt at gera endaligu avtalurnar við arbeiðstakararnar, og farast kann undir byggingina í næstum.

Heimið fer, eins og upprunaliga ætlað, at hava seks búpláss, seks umlætingarpláss og eitt virknistilboð til 16 børn og ung. Samanlagt kostar tað 39 milliónir krónur at byggja heimið.

Greinin varð fyrstu ferð løgd út 29. mars 2021

Yvirtaka pakkhúsið hjá Faroe Ship á Eystaru bryggju

Nýggja havnarlagið á Eystaru bryggju verður væntandi tikið í brúk í heyst, og tí er ætlanin, at Faroe Ship, sum hevur leigað pakkhúsið síðan 1990, byggir nýtt pakkhús úti á Skansabryggjuni, sigur Tórshavnar kommuna

Mynd: Tórshavnar kommuna

SkrivaÐ:

Alda Nielsdóttir

Síðani Tórshavnar havn lat pakkhúsið á Eystaru bryggju byggja í 1990, hevur tað verið leigað av Faroe Ship. Faroe Ship eigur eisini ein part av pakkhúsinum, sum teir hava umbygt til frystigoymslu.

Upp gjøgnum árini, hevur Faroe Ship gjørt stórar íløgur í pakkhúsið, fyri at tað skuldi lúka krøvini til effektivan flutningshátt.

Nýggja havnarlagið á Eystaru bryggju verður væntandi tikið í brúk komandi heyst, og tí er ætlanin, at Faroe Ship byggir nýtt pakkhús úti á Skansabryggjuni.

Áðrenn Faroe Ship byggir nýtt pakkhús, má greiða fáast á viðurskiftunum í verandi pakkhúsi, skrivar Tórshavnar kommuna. Aftan á samráðingar eru Tórshavnar havn og Faroe Ship samdir um, at eitt hóskandi endurgjald er slakar 4,9 milliónir krónur.

Tilmælið frá havnameistaranum var at rinda hesa upphædd, og upphæddin fellur til gjaldingar, tá Faroe Ship eru fluttir í nýggja pakkhúsið á Skansabryggjuni.

Málið varð einmælt samtykt í býráðnum undanfarna hóskvøld.

Greinin varð fyrstu ferð løgd út 29. mars 2021

Tvøroyrar kommuna heiðraði 13 starvsfólk fyri trúgva tænastu

Síðsta fríggjadag var hátíðarløta í býráðssalinum á Tvøroyri, har borgarstjórin takkaði teimum fyri trúgva tænastu – øll hava tey tænt í meira enn 15 ár

Mynd: Tvøroyrar kommuna

SkrivaÐ:

Alda Nielsdóttir

Fríggjadagin varð hátíðarløta hildin fyri 13 starvsfólkum hjá Tvøroyrar kommunu, sum vórðu heiðrað fyri at hava tænt starv í meira enn 15 ár.

Á samkomuni í býráðssalinum luttók Kristin Michelsen, borgarstjóri. Hann takkaði teimum øllum fyri trúgva tænastu og handaði teimum gávukort og dygdar konfekt fremleitt av lokalum veitara, skrivar Tvøroyrar kommuna á heimasíðuna.

Átta av starvsfólkunum hava tænt í 15 ár, trý í 20 ár, og hini bæði í ávikavíst 30 og 35 ár.

Hesi vórðu heiðrað:

• Anita Farstad, 15 ár sum vaskifólk
  
• Beinta Nielsen, 15 ár í barnaansingini
  
• Helena Hammer, 15 ár í barnatannrøktini
  
• Kari Petersen, 15 ár í barnaansingini
  
• Kim Thomasen, 15 ár sum hallarvørður
  
• Lasse Jensen, 15 ár í umsitingini
  
• Majken Josveinsdóttir, 15 ár í barnaansingini
  
• Nicolina Puntabyrgi, 15 ár í barnaansingini
  
• Chris Jan Michelsen, 20 ár í teknisku deild
  
• Jonhild Johannesen, 20 ár í barnaansingini
  
• Rutt Jensen, 20 ár sum barnatannlækni
  
• Gitte Jacobsen, 30 ár í barnaasingini
  
• John Hammer, 35 ár í tilbúgvingini
  

Greinin varð fyrstu ferð løgd út 28. mars 2021

Norðlýsið sum gistingarskip

Closed for Maintainance-luttakararnir, ið skulu arbeiða í Nólsoy, skulu búgva umborð á nýumvældu skonnartini

Norðlýsið í Nólsoy (Mynd: Frank D. Jakobsen)

SkrivaÐ:

Ingi Samuelsen

Í samstarv við Visit Nólsoy fer Norðlýsið at virka sum innivist fyri teimum, íð skulu arbeiða í Nólsoy í sambandi við tiltakið Closed for Maintainance.

- Vit vilja fegin gerða okkara í sambandi við hettar frálíka tiltakið og tí settu vit okkum í samband við Visit Faroe Islands um at fáa ein leiklut, skrivar Norðlýsið á heimasíðuni tn24.fo.

Norðlýsið fer út við luttakarum hóskvøldið 22. apríl og kemur aftur til Havnar við teimum leygardagin 24. apríl.

Greinin varð fyrstu ferð løgd út 30. mars 2021

Stór føroysk nøvn í Løkshøll á Mentanarvikuni

Tað byrjar við Jasmin og Joe & The Shitboys. Síðani verður Musikkstevnan, og í døgunum eftir tað: Eivør og Kári P

Eivør Pálsdóttir verður høvuðsnavnið í Løkshøll leygarkvøldið 1. mai (Mynd: Jens Kr. Vang)

SkrivaÐ:

Agnar Prestá

Mentanarvikan í Runavíkar kommunu byrjar flaggdagin og heldur á eina viku við eini ørgrynnu av tiltøkum, har tónleikur fyllur nógv, við konsertum og framførslum kring alla kommununa.

Tey størru konserttiltøkini verða savnað í Løkshøll, og byrjað verður við einari dupultkonsert hóskvøldið 29. apríl, har Jasmin Joe & The Shitboys fara at syngja og spæla. 

Dagin eftir, fríggjadagin 30. apríl, verður árliga Musikkstevnan - ein konsert við teimum 8 horn- og harmoniorkestrunum kring landið. Leygardagin verður høvuðsnavnið føroyskt í mun til danskt, sum tað hevur verið seinastu árini

- Í eini roynd at hava eitt høvuðsnavn, hava vit undanfarin ár kunna bjóða konsertir við Bubbi Morthens (2018) og TV·2 (2019), og í ár hava vit leitað innan egin landamørk, og hava funnið nakað av tí besta, vit eiga til leygadagin 1. mai. Við sínum serstaka og ektaða stíli hevur Eivør staðið á palli kring allan heim og bergtikið fjøld oman á fjøld, og er í løtuni fløguaktuell við útgávuni Segl. Nakrar konsertir vóru í Norðurlandahúsinum, har ummælari skrivaði:

"Eivør-konsertin er meira enn flottur sangur og tónar framførdir av landsins dugnaligastu tónleikarum. Eivør er so nógv meira enn tað. Tað eru litirnir, flotta ljósseting, perfekta ljóðið og vinsæla aura Eivarar, ið skapa eina heilstoypta uppliving"

Soleiðis skrivar Løkshøll og Runavíkar kommuna. Eivør hevur eina konsertferð fyri framman við omanfyri 30 framførslum, men áðrenn tað ber til at upplivað Eivør á palli í Løkshøll við sterkum bólki, mannaður av Mikael Blak, Per Ingvaldi Højgaard Petersen og Mattiasi Kapnas.

Sunnudagin 2. mai verður møguleiki at uppliva troubadurin Kára P,  saman við bólki

- Sum yrkjari, sangsskrivari, týðari og sangari hevur Kári P verið millum okkara fremstu til at lýsa samtíðina, samstundis sum útgávur hansara hava ein tíðarleysan dám. Kári P er eisini útgávuaktuellur, tí hóast nógv vatn er runnið í ánni síðan Vælferðarvísur kom út í 1978, kom LP-plátan á marknaðin t. 5. mars 2021. Á plátuni luttaka, umframt áleið 40 aðrir tónleikarar og sangarar, Finnur Hansen flygil og Edvard Nyholm Debess bass, og á Mentanarvikuni hoyra vit teir sum trio.

Boðað verður frá, at fyribils er talið av atgongumerkjum avmarkað sambært almennu tilmælunum. 

Greinin varð fyrstu ferð løgd út 31. mars 2021

Havnar Bio fingið nýggjar eigarar

Annar av eigarunum er borgarstjórin í Sunda kommunu

Mourits Clementsen (Mynd: Birgir Kruse)

SkrivaÐ:

Ingi Samuelsen

Mourits Clementsen og Jógvan Kruse hava keypt Havnar Bio, einasta biograf í Havn, frá Jákup Eli Jacobsen, sum hevur staðið fyri Havnar Bio í skjótt 28 ár

Tað er bloggurin hjá Birgiri Kruse, Birkblokk, sum visti hesi tíðindini at siga.

Mourits Clementsen og Jógvan Kruse hava seinastu fýra árini rikið fyritøkuna terminal.fo, sum leigar kortterminalar út. Teir síggja fyrimunir í keypinum, sigur Mourits Clementsen í samrøðu við Birkblog.

- Eitt tað fyrsta er at stytta um bíðirøðirnar í kioskini, og so fara vit at royna at finna nýggjar møguleikar fyri bæði barnabio og eldrabio, sigur Mourits, sum eisini er spentur at halda fram við tí góða samstarvi, sum biografurin í mong ár hevur havt við Filmsfelagið. 

Hin nýggi eigarin, Jógvan Kruse, er í løtuni borgarstjóri í Sunda kommuni.

Havnar Bio varð bygt í 1963 og er helst einasti bygningur í Føroyum, ið er gjørdur til endamálið.

Jógvan Kruse, tók við borgarstjórastarvinum í Sunda kommunu á nýggjárinum (Savnsmynd)

Mourits Clementsen uttan fyri Havnar Bio (Mynd: Birgir Kruse)

Greinin varð fyrstu ferð løgd út 29. mars 2021

50 lærlingar fingu prógv á Glasi

Próvhandan var á Glasi farna fríggjadag. 50 lærlingar hava staðið sveinaroynd innan el, háfríðkan, maskinsmíð, rørsmíð, plátu- og konstruktiónssmíð og húsamíð

(Mynd: Glasir)

SkrivaÐ:

Sverri Egholm

Fríggjadagin 26. mars var stór hátíðarløta á Glasi, tá 50 lærlingar fingu handað prógv. Teir 50 lærlingarnir hava staðið sveinaroynd innan yrkini: El, hárfríðkan, maskinsmíð, rørsmíð, plátu- og konstruktiónssmíð og húsasmíð.

Elektrikarar 
frá vinstru: Ivan Ásbjørn Johannesen, LM Electric, Jónsvein Bærentsen, El Net, Oddur Norðberg, LM Electric, Pauli Sømark, LM Electric og Torbjørn Reinert Simonsen, Elektrikarin.

Hárfríðkarar
frá vinstru:Emilia Marnadóttir Zachariassen, Vera Klipt, Eyðhild S. Holm, Salong Júniik, Maria Sørensen, Salong Una, Rebekka Ósá Petersen, Køtlum Hárfríðkan, Rósa Erlingsdóttir Petersen, Euphoria Salong og  Sóley Witt Falkvard, Salong Annika.

Maskinsmiðir
aftast frá vinstru: Agnar Hammer, Bærendsen Teknik, Bjarni Falkvard Joensen, J. K. Joensen og Sonur, Evald Vang, NomaTek, Fríði Weihe Frímundsson, MEST og Hávar Joensen, Bærendsen Teknik. 

fremst frá vinstru: Jørmann Niclasen, Vestmek, Kenneth Thomassen, Vestmek, Pauli Egilsson, MEST, Ragnar Fróði Borðoy, MEST, Torkil E. Ternustein, MEST og Uni Vitalis, MEST.

Rørsmiðir og Plátu- og Konstruktiónssmiðir
frá vinstru Bergur Hammer, Vatn og Hiti, Hergeir Kjærbo, Blikksmiðjan, Jákup Fríði Jákupsson, Símun Muller, Rock Trawldoors, Tórur Ryggshamar Nysted, Rock Trawldoors. Teir báðir seinast nevndu eru útlærdir Plátu- og konstruktiónssmiðir.

Húsasmiðir 1
aftast frá visntru: Allan Jónsson Jacobsen, SH-Bygg, Dennis Christensen, Bulur og Hans Kristjan R. Sjúrðarson, Húsavarðatænastan.

fremst frá vinstru: Høgni Weihe, Jóan Petur Vang, Jaturong Suma, Timbur-Snikkaratænastan, Jens Guttesen, Eysturlon og Ragnar Gaard, JEP Smið.

Húsasmiðir 2
aftast frá vinstru: Allan Bjarnason, Støðla, Atli Lamhauge Hammer, Bulur, Dánjal Petur Jensen, Fabrikk og Djóni Poulsen, Búsetur.

í miðjuni frá vinstru: Eyðfinn Joensen, SH-Bygg, Eyðun Joensen, Valaverk, Høgni Joensen, Articon og Jóhan Hansen, Búsetur.

fremst frá vinstru: Johan L. Poulsen, Timbur-Snikkaratænastan, Kári Hvannastein, ÁTS, Mikkjal J. Johannesen, Argja Smíð og Niels Kristian Nielsen, M. B. Overgaard.

Greinin varð fyrstu ferð løgd út 31. mars 2021

Nú hitar jarðhiti Ráðhúsið í Havn

Sambært Tórshavnar kommunu er metta elnýtslan við jarðhitanum 40-50.000 kWt/ár, og CO2 útlátið fer at minka við áleið 50-75 prosentum – jarðhitin á ráðhúsinum varð tendraður mikudagin

Heðin Mortensen, borgarstjóri í Tórshavnar kommunu, fær eina frágreiðing um, hvussu skipanin virkar (Mynd: Tórshavnar kommuna)

SkrivaÐ:

Alda Nielsdóttir

Mikumorgunin tendraðu umboð fyri Mariu Poulsen fyri jarðhitanum á ráðhúsinum í Havn, og nú hitar ein jarðhitapumpa allan tann stóra bygningin og brúksvatnið.

Sambært heimasíðuni hjá Tórshavnar kommunu er metta elnýtslan við jarðhitanum 40-50.000 kWt/ár, og CO2 útlátið fer at minka við áleið 50-75 prosentum.

Tað eru bara nakrir dagar síðan, at Spf. Bora vóru lidnir at bora tey trý 300 metra djúpu holini uttanfyri Ráðhúsið, og longu nú koyrir skipanin.

Elorka drívur hitapumpuna, sum framleiðir hita til hitaskipanina í bygninginum. Hitapumpan fær hita úr jørðini gjøgnum slangur, sum eru boraðar niður í jørðina, skrivar Tórshavnar kommuna.

Jarðhitin á ráðhúsinum er partur av einum orkuátaki hjá kommununi, sum hevur til endamáls at leggja kommunalar bygningar um til grønar orkukeldur.

Maria Poulsen hevur staðið fyri arbeiðnum. Felagið er tað elsta av sínum slagi í landinum, upprunaligi stovnarin byrjaði virksemið longu í 1848. Í dag umboðar felagið m.a. hitaskipanir frá CTC.

Greinin varð fyrstu ferð løgd út 01. apríl 2021

Føroyski "marsmaðurin" í Kongshøll

Granskarin, David Arge Klevand Pedersen frá DTU Space, fer at halda almennan fyrilestur í Kongshøll um sítt slóðbrótandi arbeiði við rúmdartøkni

David Arge Klevang Pedersen

SkrivaÐ:

Tíðindaskriv

Føroyski serfrøðingurin í rúmdartøkni, David Arge Klevang Pedersen frá DTU Space, hevur av álvara verið í miðdeplinum í alheims miðlum, síðani NASA setti Perseverance Rover á Mars. Og nú kemur hann á Fróðskaparsetrið at halda fyrilestur.

Saman við Føroya Tele skipar Fróðskaparsetrið fyri almennum tiltaki um rúmdartøkni 7. apríl klokkan 16 í Kongshøll á Vestaru bryggju í Havn.

Vegna koronuleiðreglurnar er neyðugt at melda seg til tiltakið. Tað kann gerast her.

David Arge Klevang Pedersen fer hendan dagin at halda fyrilestur um sítt slóðbrótandi arbeiði undir heitinum, "PIXL onboard Perseverance - Searching for past life on Mars".

Hann fer at røða um PIXL-myndatólið, sum filmar á Mars, og sum hann stóð fyri at menna og er við til at stýra av jørðini.

Myndatólið er eitt lyklatól á akfarinum hjá NASA, Perseverance Rover, sum nú leitar eftir lívi, sum kanska var, á reyðu gongustjørnini.

David Arge Klevang Pedersen tók ph.d.-prógv í 2016 við ritgerð síni, "High Accuracy Tracking of Space Borne Non-Cooperative Targets", og hann hevur eisini arbeitt saman við NASA í sambandi við rúmdarfarið Juno, sum varð sent til Jupiter.

Fyrilesturin hjá Davidi verður hildin á enskum, men spurningar og svar eru á føroyskum.

Greinin varð fyrstu ferð løgd út 27. mars 2021

Árni Johan Petersen vart ph.d. á CBS

Ritgerðin hjá Árna Johan Petersen lýsir hvussu dreymurin um tað stóra oljuævintýrið í Føroyum fekk ítøkiligar ávirkanir í samfelagnum, hóast eingi haldgóð prógv vóru fyri, at tað fór at blíva til annað enn ynskidreym

Mynd: Setrið

SkrivaÐ:

Tíðindaskriv

Hósdagin 25, mars vardi Árni Johan Petersen, adjunktur í virkisbúskapi á Søgu- og samfelagsdeildini, ph.d.-ritgerð sína við CBS. Verjan fór fram umvegis netið.

Ritgerðin lýsir á sera forvitnisligan hátt, hvussu dreymurin um tað stóra oljuævintýrið í Føroyum fekk ítøkiligar ávirkanir í samfelagnum, hóast eingi haldgóð prógv vóru fyri, at tað fór at blíva til annað enn ynskidreym.

Vegleiðarar vóru Dan Kärreman og Dennis Schoeneborn, báðir professarar á CBS.

Andmælingar vóru Mikkel Flyverbom, professari á CBS, Yiannis Gabriel, professari á Lunds Universitet, og Jane Lé, professari á Otto Beisheim School of Management.

Ritgerðin ber heitið "Collective Imaginary as (Residual) Fantasy", og fer hon at vera tøk her.

Greinin varð fyrstu ferð løgd út 29. mars 2021

Ingi Heinesen Højsted vart ph.d. við DPU

24. mars vardi Ingi Heinesen Højsted, adjunktur á námsvísindadeildini á Setrinum, ph.d.-ritgerð í støddfrøði – evnið var møguleikar og vansar við dynamiskum geometriforritum í undirvísing í støddfrøði

 

SkrivaÐ:

Tíðindaskriv

Mikudagin 24. mars vardi Ingi Heinesen Højsted, adjunktur á Námsvísindadeildini, ph.d.-ritgerð í støddfrøði. Verjan fór fram umvegis netið.

Ritgerðin snýr seg um møguleikar og vansar við dynamiskum geometri-forritum í undirvísing í støddfrøði. Hetta hevur hann kannað í sambandi við at stimbra førleikamenning hjá næmingum, tá tað ræður um skilvísa hugsan, argumentatión og próvførslu.

Ingi Heinesen Højsted hevur verið innskrivaður á DPU við Uffe Jankvist, professara, sum høvuðsvegleiðara. Hjávegleiðarar hava verið Charlotte Krog Skott, dosentur á Københavns Professionshøjskole, og Morten Misfeldt, professari á Institut for Naturfagenes Didaktik Københavns Universitet.

Í metingarnevndini vóru:
Jana Trgalova, lektari á Ecole Supérieure du Professorat et de l’Education, Claude Bernard University Lyon
Anna Baccaglini-Frank, lektari á Department of Mathematics, University of Pisa
Morten Blomhøj, professari og leiðari á Nationalt Center for Udvikling af Matematikundervisning , Aarhus Universitet, formaður

Um ritgerðina
Ritgerðin eitur, "Toward marvels in dynamic geometry teaching and learning: Developing guidelines for the design of didactic sequences that exploit potentials of dynamic geometry to foster students’ development of mathematical reasoning competency".

Í ritgerðini verður dentur lagdur á fýra møguleikar við dynamiskum geometriforritum (so sum GeoGebra), sum ikki eru, tá blýantur og pappír eru amboðini:
1. Draging - hetta er møguleikin at draga í og broyta geometrisk skap, meðan ávísir eginleikar varðveitast.
2. Afturboðan - at forritið mótmælir, tá okkurt verður gjørt, sum ikki samsvarar við geometriskt ástøði.
3. Máting - hetta er møguleikin at máta skap og broyta tey, meðan mátingarnar alt fyri eitt verða dagførdar.
4. Slóða - at síggja slóðina, ið geometrisk skap gera, tá tey verða drigin.

Ingi Heinesen Højsted vísir á ein vansa, sum kann vera. Hetta er, tá dynamisk geometri-forrit kunnu gerast ein myndugleiki, og at næmingar hava trupult við at skilja týdningin av at skula prógva teir geometrisku samanhangirnar, sum tey hava upplivað við forritinum.

Ph.d. ritgerðin lýsir, við støði í einari spurnakanning, hvussu og um møguleikarnir við dynamiskum geometri-forritum verða nýttir í fólkaskúlanum í Danmark nú.

Víst verður á, at forritini verða nógv brúkt, serliga GeoGebra, men at teir nýggju møguleikarnir verða lítið brúktir. Tað eru tær somu uppgávurnar, sum fyrr vórðu loystar við blýanti og pappíri, sum nú verða loystar í GeoGebra.

Leiðreglur vórðu mentar, ið lýsa, hvussu undirvísing kann skipast, soleiðis at møguleikarnir, ið dynamisk geometri-forrit hava, verða gagnnýttir, og bilbukt kann fáast við vansarnar. Hesar leiðureglur vórðu fyrst mentar ástøðiliga, og síðani við støði í dáta, ið var savnað inn í ymiskum donskum fólkaskúlum.

Greinin varð fyrstu ferð løgd út 28. mars 2021

9.562 harur skotnar í 2020

Níggjunda frágreiðingin um haruveiðu í Føroyum eftir Eyðfinn Magnussen, lektara á Náttúruvísindadeildini á Setrinum, er nú komin – kanningin byggir á tøl frá 1.044 harutúrum

(Savnsmynd: Pól Sundskarð)

SkrivaÐ:

Alda Nielsdóttir

Sambært nýggju frágreiðingini um haruveiðu í Føroyum eftir Eyðfinn Magnussen, lektara á Náttúruvísindadeildini á Setrinum, vórðu 9.562 harur skrásettar at vera skotnar í fjør.

Kanningin byggir á tøl frá tilsamans 1.044 harutúrum í 391 hagapørtum kring landið.

Teir raskastu at skjóta haru í 2020 vóru teir, sum skutu í "Dalhaga - Eystariparti" í Vestmanna, har fongurin var tilsamans 190 harur á trimum túrum, skrivar Fróðskaparsetrið.

Teimum á baki vóru teir, ið skutu í í Kvíggjarhamarshaga í Saksun, har teir fingu 180 harur á 10 túrum.

Á triðja plássi vóru teir í haganum "Botnar" í Funningi. Har taldi veiðan 175 harur á átta túrum.

Greinin varð fyrstu ferð løgd út 28. mars 2021

Ung í Norðurlondum velja enskt framum

Enskt er fyrsta val, tá ung skulu samskifta. Ung í Føroyum og Noregi eru tey, ið siga seg hava lættast við at skilja skandinaviskt

 

SkrivaÐ:

Ingi Samuelsen

Málsliga landslagið í Norðurlondum sær øðrvísi út í dag enn fyri 70 árum síðani, tá norðurlendska samstarvið formliga byrjaði. Tey ungu í dag vaksa upp í einum globaliseraðum heimi, har enska málið er allastaðni, og norðurlendsku málini tí tykjast meira fjar.

Tað er niðurstøðan í eini nýggjari frágreiðing sum Norðurlendska Ráðharraráðið hevur gjørt til tess at lýsa støðuna hjá norrøna málfelagsskapinum millum ung fólk í dag.

Í Norðurlondum hava vit leingi hildið, at mál og mentan bindir okkum saman. Norðurlond hava søguliga sæð verið knýtt saman bæði mentanarliga, málsliga og politiskt.

Ráðharraráðið hevur spurt 2.000 ungar norðbúgvar í aldrinum 16 til 25 ár um teirra áskoðan á mál og mentan, og hvussu væl tey halda, at tey skilja tey skandinavisku málini.

Andrea Skjold Frøshaug og Truls Stende hava skrivað frágreiðingina, ið varð kunngjørd í farnu viku. Hetta fór fram á netinum – á enskum.

Ikki so lætt at skilja danskt, norskt og svenskt
Sambært Truls Stende eru niðurstøðurnar í frágreiðingini ikki óvæntað, hóast tey vísa at tað eru nógv ung, ið halda tað vera trupult at skilja skandinavisku málini.

- Tað eru stórir munir á londunum, tá vit hyggja eftir, hvussu nógv ung, ið halda, at tey hava lætt við at skilja grannamálini. Og í fleiri londum er ein stórur partur, sum eru ósamd í, at tað er lætt at skilja danskt, norskt og svenskt, sigur Truls Stende við heimasíðuna hjá ráðharraráðnum, norden.org.

Nøkur av úrslitunum frá kanningini:

• Í øllum Norðurlondum halda 62 prosent av teimum ungu, at norskt og svenskt er lætt at skiljs.
• Einans 26 prosent halda, at danskt er lætta at skilja.
• Størsta talið av teimum, ið halda at skandinavisku málini eru løtt at skilja, eru í Føroyum og í Noregi.
• Serliga í Finnlandi, Grønlandi og Íslandi eru tað lutfalsliga nógv, sum eru ósamd í at tað er lætt at skilja eitt ella fleiri av teimum skandinavisku málunum.
• Næstan øll ung í Norðurlondum (95 prosent) halda, at enskt er lætt at skilja. Í høvuðsheitum er enska ávirkanin sterk. Heili 65 prosent svara, at tey ofta hava tað lættari við at orða seg á enskum enn á teirra egna móðurmáli, og 62 prosent svara, at enskt hevur stóra ávirkan á teirra egna mál.
• Samstundis eru tveir triðingar sammdir í, at tað er ein týðandi partur av norðurlendska felagsskapinum at skilja skandinavisku málini.

Duga enskt betri enn teirra egna móðurmál
Niðurstøðan í frágreiðingini "Har Norden et språkfellesskap?" er tann sama, sum aðrar frágreiðingar í hesi øldini eru komnar fram til. Tær vísa, at tey ungu ikki skilja so væl skandinaviskt longur, men duga hinvegin nógv betur at málbera seg á enskum, enn ættarliðini undanteimum.

Orsøkin til hesa gongdina er enska ávirkanin, og at nýggj tøkni og sosialir miðlar hava broytt mátan, sum tey ungu samskifta, málbera seg og brúka mentanartilboð.

Ikki ein málkreppa kortini
Tá 60 prosent av teimum ungu siga, at tey heldur velja at tosa enskt, tá tey hitta aðrar norðbúgvar, so kann ein halda, at norðurlendska samanhaldið er við at fara fyri bakka. Men hesum er norski málfrøðingurin ikki samdur í.

- Tá hugt verður eftir hesum úrslitunum, so kann ein fáa tann tankan, at norðurlendska samanhaldið er í trupulleikum. Men møguliga er málfatanin ikki so týdningarmikil fyri norðurlendska samanhaldið, sum vit hava hildið. Í eini kanning frá 2017 svaraðu tey flestu, at tað eru samanfallandi samfelagsmodell og felags virðir, sum eru størstu orsøkirnar til, at norðurlond skulu samstarva – og ikki í so stóran mun felags málfatanin, sigur Truls Stende við norden.org.

Hóast tey ungu halda, at mál ikki er tað mest týðandi at samstarva um fyri norðurlond, so bendir kanningin eisini á, at tey halda, at mál er av týdningi, tá tað ræður um at skilja hvønn annan í persónligum samskifti. Tí er samlaða myndin ikki eitt antin-ella, men heldur eitt bæði-og.

Frágreiðingin kann lesast her 

Greinin varð fyrstu ferð løgd út 23. mars 2021

SSC sleppur ikki at ala norðast á Arran í Skotlandi

Myndugleikin í North Ayrshire hevur sýtt at geva felagnum hjá Bakkafrost aliloyvi á einum nátturuvøkrum øki

Frá einum mótmælistiltaki móti aliætlanunum hjá SCC (Mynd: The Arran Banner)

SkrivaÐ:

Ingi Samuelsen

Skotska felagið hjá Bakkafrost, SSC, sleppur ikki at leggja eitt alibrúk  einum øki út fyri Millstone Point norðast á oynni Arran í Clyde-fjørðinum í Vesturskotlandi.

Lokali myndugleikin, lendisskipanarnevndin í North Ayrshire Council, tók farna mikudag avgerð um ikki at ganga eini umsókn hjá Scottish Salmon Company á møti.

Ein talsmaður fyri ráðið sigur:

- Umsóknin varð afturvíst orsaka av, at alibrúkið ikki hóskar inn í ætlanirnar fyri hvussu økið skal taka seg út í framtíðini. Tað hóskar ikki til hetta serliga náttúruvakra økið, sigur talsmaðurin við heimasíðuna hjá North Ayrshire Council.

- Ætlanin er heldur ikki í tráð við skotsku ætlanirnar fyri sjóøkið og heldur ikki við ætlanini fyri Clyde-fjørðin. Búskaparligar grundgevingar kunnu ikki seta til viks ta neiligu ávirkanina, sum ætlanin hevði havt fyri økið, sigur talsmaðurin.

Lendisskipanarnevndin hjá ráðnum hevði fingið 436 hoyringssvar, sum vóru ímóti ætlanini og bert 19, ið stuðlaðu ætlanini.

Les eisini: Skotsk mótmæli móti ætlaðari alistøð 

Upprunaliga hevði SSC ætlanir um at leggja 20 aliringar á hesum økinum, men skar verkætlanina niður á 12 ringar.

Sambært Fishfarmingexpert hevur Scottish Salmon Company enn ikki tikið støðu til, hvussu víðari skal fara fram eftir at henda umsóknin er havnað.

Greinin varð fyrstu ferð løgd út 29. mars 2021

Russisk njósnaraflogfør vóru ov nær breskum øki

Royal Airforce sendi tvey jettjagaraflogfør út at ávara

Tu-142 hjá russiska flogvápninum (Mynd: Ministery of Defence / BBC)

SkrivaÐ:

Ingi Samuelsen

Typhoon jetjagaraflogfør frá bretsku hernaðarflogstøðini í Lossiemouth í Skotlandi vórðu mánadagin send avstað fyri at forða tveimum russiskum Tu-142 Bear-F hernaðarflogførum, sum vóru komin ov nær bretskum øki, skrivar BBC

Tað var norska flogverjan, sum umvegis Nato, ávaraði um russisku flogførini. Bretsku jagaraflogførini komu fram á russisku flogførini yvir Norðsjónum. Meðan tey vóru í luftini fingu tey brennievni frá flogførum á støðini hjá Royal Airforce í Brize Norton í Onglandi.

Russisk flogfør av slagnum Tu-142 verða brúkt í sambandi við kanning ella njósning og í sambandi við at finna og stríðast móti kavbátum, skrivar BBC.

Ein av flogskiparunum, sum var við á uppgávuni sigur við BBC, at jagaraflogførini í Lossiemouth standa klár at fara avstað alt samdøgrið.

- Í hesum føri vóru vit ávarað av Nato um tvey illgrunasom russisk flogfør, sum nærkaðust okkara áhugaøki. Vit fóru avstað og staðfestu at tvey Tu-142 Bear-F vóru komin ov nær bretskum øki, og ráddu teimum frá at koma nærri. Okkara uppgáva er at verja loftrúmi hjá Nato og bretska kongsríkinum hvønn minutt hvønn einasta dag, sigur flogskiparin við BBC.

Eitt av Typhoon jagaraflogførunum hjá RAF (Mynd: EPA)

Greinin varð fyrstu ferð løgd út 30. mars 2021

Ever Given er leyst aftur

Nú kann aftur siglast gjøgnum Suez-veitina

(Mynd: EPA)

SkrivaÐ:

Ingi Samuelsen

Risastóra bingjuskipið Ever Given fleyt mánadagin aftur frítt í Suez veitini, og nú kann skipaferðslan aftur sigla gjøgnum hesa fyri skipaferðsluna sera týdningarmiklu farleið.

Egypgiskar sjónvarpsstøðir kundu mánadagin  vísa, at bingjuskipið spakuliga hevði kós norður eftir Suez veitini.

- Osama Rabie, admiralur, ovasti fyri Suez-veitini hevur boðað frá, at skipaferðslan kann takast uppaftur, boðaðu myndugleikarnir frá, sambært AFP-tíðindastovuni.

Ever Given hevði staðið fast í Suez veitini í næstan eina viku og forðaði fyri, at onnur skip kunnu koma gjøgnum hesa sera týdningamiklu farleið.

Yvir 300 skip bíðaðu eftir tørni at sleppa ígjøgnum veitina.

Suez-veitin knýtir Reyðahav og Miðjarðarhav saman, og er stytsti vegur millum Asia og Evropa. Veitin er 190 kilometrar long, 24 metrar djúp og 205 metrar breið.

Umleið 12 prosent av øllum heimsins farmi ferðast gjøgnum kanalina. Í 2020 svaraði hetta til meira enn ein milliard tons av farmi.

Ever Given er skrásett í Panama, og var á veg úr Kina til Rotterdam í Niðurlondum, tá skipið rendi seg fast í veitini. 

Greinin varð fyrstu ferð løgd út 29. mars 2021

Voxbotn 2020 aftur útsett

Fyriskiparnir boða frá, at festivalurin vónandi verður í mai, men at tað skal vera í tráð við tilmælini frá myndugleikunum

Um til ber at savna eina rúgvu av fólki í Vágsbotni í mai til eitt tónleikatiltak er framvegis óvist (Mynd: Jens Kr. Vang)

SkrivaÐ:

Agnar Prestá

Fyrst varð festivalurin fluttur frá síðst í juni 2020 til 5. september - síðani frá september til 10. apríl 2021. Alt sjálvandi orsakað av koronustøðuni.

Eingin smitta er í landinum, men framvegis eru tilmæli millum annað um, hvussu nógv fólk kunnu savnast, og tað er harvið greitt, at ikki er ráðiligt sambært tilmælunum, at avgreiða Voxbotn 10.april, sum upprunaliga skuldi haldast 2020.

Hesum hava fyriskiparnir júst nú boðað frá í skrivi. Í fyrstu syftu verður Voxbotn 2020 útsett nakrar vikur.

- Vit vóna øll, at henda keðiliga korona-støðan fer at síggja ljósari út komandi vikurnar. Men fyriskiparnir vilja sjálvandi fylgja tilmæunum frá myndugleikunum, og gera sítt til, at Føroyar fáa ein lívligan og tryggan ársins konsertdag. Vit vóna, longu í næsta mánað.

Nærri kunning kemur um eina til tvær vikur verður boðað frá. Óvist er, hvussu verður við Voxbotn 2021. Fyriskiparnir hugsavna seg fyrst um at festivalin, sum upprunaliga skuldi verið í fjør. 

Øll atgongumerki til Voxbotn 2020 eru enn galdandi.

Greinin varð fyrstu ferð løgd út 01. apríl 2021

Listaframsýning í Gøtu á páskum

Afturvendandi páskaframsýningin í Eysturkommunu verður aftur á skránni í skúlanum við Gøtugjógv frá páskaaftan til og við 2. páskadag

 

SkrivaÐ:

Alda Nielsdóttir

Aftur í ár verður fimleikahøllin í skúlanum við Gøtugjógv karmur um árligu páskaframsýningina. Fernisering verður páskaaftan klokkan 15, og framsýningin verður opin til og við 2. páskadag.

Tað eru borgarar og onnur, sum hava sínar røtur ella bústað í Eysturkommunu, sum sýna fram.

– Bólkurin av listafólki er støðugur, og tað er gleðiligt at síggja, at ung leggjast afturat, skrivar áhugabólkurin 'Myndlistafólk í Eysturkommunu' í tíðindaskrivi.

Talan er í flestu førum um listafólk, sum hava sýnt fram áður, bæði í nærumhvørvinum men eisini kring landið og uttanlands. Framsýningin spennir sera vítt frá náttúru- og djóramyndum í ymiskum stílum, stilleben, keiputekningum heilt til mixed-media og sci-fi kenda list.

Sum áður nevnt, verður framsýningin sett leygardagin klokkan 15, og Høgni Lisberg kemur í hesum sambandi at framføra nøkur løg. Ókeypis atgongd er til framsýningina.

Tey, sum sýna fram eru Annika Zacharia Beell, LUDVIG – Dagmar L. Mouritsen, Jens Klæmint Jacobsen, Bjørg í Djónastovu, Erla Jarnskor Ellingsgaard, Tummas Jákup Thomsen, Lise-Lotte B. Vindelbo, Joy Ann Simonsen, Emely Marnersdóttir, og Oluffa Klæmintsdóttir.

Upplatingartíðirnar eru hesar:

3. apríl – páskaaftan 15-20 Fernisering
4. apríl – páskadagur 15-20
5. apríl – 2. páskadagur 14-18

Greinin varð fyrstu ferð løgd út 01. apríl 2021