Pisufundur í Viðarlundini

Pisurnar á Glasi høvdu seinnapartin hósdagin pisufund í Viðarlundini

(Mynd: Sverri Egholm)

SkrivaÐ:

Sverri Egholm

Orsakað av koronu, var pisufundurin aftur í ár einans fyri pisunum sjálvum, og avvaraðandi vóru ikki við.

Sí nakrar av myndunum úr Viðarlundini hósdagin. Allar myndirnar síggjast her

Greinin varð fyrstu ferð løgd út 24. juni 2021

Føddar sama dag, pisur sama dag

Ró Holm Magnadóttir og Kristina Bergsdóttir Thomsen eru báðar føddar 26. september 2002. Mikudagin fingu tær eisini húgvuna sama dag

Ró Holm Magnadóttir og Kristina Bergsdóttir Thomsen

SkrivaÐ:

Sverri Egholm

Glasir.fo: Lívsleiðirnar hjá tveimum av ársins pisum á Glasi hava verið meira samantvinnaðar enn hjá teimum flestu.

Tær báðar Ró Holm Magnadóttir og Kristina Bergsdóttir Thomsen eru báðar føddar 26. september 2002. Tvey ára gamlar byrjaðu tær báðar í Snjósóljuni á Dagstovninum viđ Landavegin. Tær hava eisini fylgst fólkaskúlárini og byrjaðu báðar í 1. a í Kommunuskúlanum í Kongagøtu. Í 2018 byrjaðu tær báðar í flokki 18b á hugbreytini á Glasi, og mikudagin 23. juni 2021 fingu báðar húgvuna – og báðar við hægsta próvtali.

Á myndunum omanfyri síggja vit Kristina og Ró í barnagarðinum, har tær eisini gingu Lusiagongd saman. Triðja myndin er tikin fyrsta skúladag.

Og nú fingu Ró og Kristina húgvuna á høvdið sama dag.

Greinin varð fyrstu ferð løgd út 24. juni 2021

– Í løtuni er eingin ætlan um at broyta heimauppihaldið

Tá heimauppihaldið varð tillagað fyri einum mánað síðani, vóru heilsufakligu myndugleikarnir eisini spurdir til ráðs, og er neyðugt at endurskoða galdandi skipanir, verður tað gjørt, sigur løgmaður í svari til fyrispurning hjá Sirið Stenberg

Bárður á Steig Nielsen, løgmaður (Savnsmynd: Sverri Egholm)

SkrivaÐ:

Alda Nielsdóttir

Miðskeiðis í mai mánað vórðu tilmælini til ferðafólk tillagaði, so tey, sum ikki vóru liðugt koppsett ella høvdu havt koronu fingu fríari ræsur fyrstu dagarnar eftir komu. Einasta avmarkingin var, at hesi áttu at halda seg frá størri mannfjøldum sum eitt nú føðingardagar, veitslur, kirkjur og samkomur, og størri ítróttatiløk. Annars kundu tey eitt nú fara á matstovu og annað stutt eftir komu.

Í løtuni er eingin ætlan um at broyta heimauppihaldið aftur, sigur Bárður á Steig Nielsen, løgmaður í svari til fyrispurning hjá Sirið Stenberg.

Sambært Sirið Stenberg merkti tillagingin av heimauppihaldinum, at tilmælið í roynd og veru varð slept, og vildi hon hava at vita, hví so var. Eisini vildi hon hava at vita, um tað var fakkunnleikin, sum hevði mælt til hesa broyting, og um ætlanin var at broyta hetta aftur.

Nakrar dagar eftir, at tilmælið um heimauppihald var broytt, byrjaði korona at gera um seg í Føroyum aftur, og Sirið Stenberg vísti á, at fleiri undraðust yvir, hví tilmælið var broytt.

– Nú koronusmittan hevur tikið seg uppaftur, undrast mong á, hví tilmælið um heimauppihald við komu til Føroyar varð slept. Serliga sæð í ljósinum av, at tilmælini innanlands í Føroyum eru linkað sera nógv. Fakmyndugleikin hevur sagt alment, at tamarhald er ikki á støðuni, segði Sirið Stenberg.

Seinastu vikuna hava tó ikki verið nógvir tilburðir, og fyrradagin var eisini latið meira uppaftur. Løgmaður sigur, at landsstýrið fylgir gongdini, og er neyðugt at endurskoða galdandi skipanir, verður tað gjørt.

Tilmælið er ongantíð slept
Bárður á Steig Nielsen, løgmaður, vísur á, at tilmælið um heimauppihald ongantíð var slept, men at tað var tillagað orsakað av góðu smittugongdini og støðugu framgongdini við at koppseta. Í sama viðfangi varð økt um kanningarmøguleikarnar, so tað bar til at lata seg kanna allar dagar í vikuni.

Eisini upplýsir hann, at heilsufakligu myndugleikarnir eisini vórðu spurdir til ráðs í mun til at tillaga heimauppihaldið.

– Føroyski koronapolitikkurin hevur síðani mars mánað í 2020 hvílt á eina javnvág millum heilsufaklig atlit og samfelagslig atlit. Hvørja ferð landsstýrið hevur tikið stig til at broyta tilmælini, hava heilsufakligu myndugleikarnir eisini sagt sína hugsan, sigur hann.

Greinin varð fyrstu ferð løgd út 19. juni 2021

Meira enn helvtin av føroyingum koppsettir

50,4 prosent av øllum føroyingum hava fingið fyrsta prikið. Ein triðingur av teimum ungu millum 16 og 24 ár er longu koppsettur minst einaferð

Fyrsti føroyingurin varð koppsettur við fyrra prikið í Veitsluhøllini á Landssjúkrahúsinum 30. desember í fjør (Mynd: Sverri Egholm)

SkrivaÐ:

Sverri Egholm

Nú hava 50,4 prosent av øllum føroyingum fingið fyrstu koppsetingina fyri korona. Harafturat hava 34,9 prosent fingið aðru koppsetingina og eru liðugt koppsett.

Covid-19 koppsetingarbólkurin hevur í nýggjastu støðulýsingini, sum er tann fjórða, tikið saman um koppsetingarátakið, síðani farið varð undir at koppseta 30. desember í fjør.

Allir føroyingar sum hava fylt 16 ár hava nú fingið í boðið ókeypis koppseting fyri COVID-19. Higartil eru tilsamans 45.456 koppsetingar framdar. Av hesum hava 26.874 fólk fingið fyrru koppsetingina, tað svarar til 50,4% av fólkatalinum og 18.582 fólk fingið seinnu koppsetingina og eru liðugt koppsett, tað svarar til 34,9% av fólkatalinum.

Í Støðulýsingini sæst, at flestu teirra í eldru aldursbólkunum eru koppsett. Ein góður triðingur av teimum ungu millum 16 og 24 ár er longu koppsettur minst eina ferð. 

Koppsetingarkalendarin er dagførdur. Sambært nýggjastu upplýsingunum verður roknað við, at allir føroyingar, sum ynskja tað, eru liðugt koppsettir í fyrru helvt av september í ár.

Greinin varð fyrstu ferð løgd út 24. juni 2021

137 prógv latin á Fróðskaparsetrinum higartil í ár

Tað er 24 fleiri enn fyrra hálvár í fjør, tá talið var 113

Prógvhandan á Námsvísindadeildini

SkrivaÐ:

Tíðindaskriv

Hósdagin og fríggjadagin hava prógvhandanir verið á Fróðskaparsetri Føroya, og tølini fyri fyrra hálvár vísa vøkstur í talinum á útbúnum.

137 prógv eru higartil í ár útskrivað, sammett við 113 fyrra hálvár í fjør - ella 24 fleiri.

Prógvhandanir hava verið allan dagin á teimum fimm deildunum á Setrinum, Søgu- og Samfelagsdeildini, Námsvísindadeildini, Føroyamálsdeildini, Náttúruvísindadeildini og Deildini fyri heilsu- og sjúkrarøktarvísindi.

Tilsamans hava 110 bachelorar fingið prógv higartil í ár, 26 hava fingið masterprógv og ein prógv í hjánámi.

65 prógv eru útskrivað á Námsvísindadeildini, har tey lesa til námsfrøðing og lærara. 32 prógv eru latin á Søgu- og samfelagsdeildini, 20 prógv á Deildini fyri heilsu- og sjúkrarøktarvísindi, 10 á Føroyamálsdeildini og onnur 10 á Náttúruvísindadeildini.

Fróðskaparsetur Føroya

Greinin varð fyrstu ferð løgd út 25. juni 2021

Bál á ársins longsta degi

Summarsólstøður í Sandagerði mánakvøldið

(Mynd: Sverri Egholm)

SkrivaÐ:

Sverri Egholm

Summarsólstøður var í Sandagerði mánakvøldið. Skótar skipaðu fyri báli og bjóðaðu kaffi og kaku.

Veðrið var av tí besta, og nógv fólk møttu upp til hásummartiltaki.

Sí myndir nakrar av myndunum niðanfyri. Allar myndirnar síggjast her

Greinin varð fyrstu ferð løgd út 21. juni 2021

Seyðamaðurin á Sondum

Nýggja standmyndin í Sandavági, sum Hans Pauli Olsen hevur gjørt. Sí myndir

(Mynd: Jens Kr. Vang)

SkrivaÐ:

Sverri Egholm

Standmyndin “Seyðamaðurin á Sondum” var farna vikuskiftið avdúkað í Sandavági.

Jens Kristian Vang var ein túr í Sandavági í vikuni og tók myndir av stórslignu standmyndini. Sí myndir niðast í greinini.

Kvæði um Seyðamannin á Sondum er væl kent í Vágum.

Tað vóru vinmenninir Jóannes Michelese í Húsi (1824-1850) og Jógvan Niclasen í Lon (1821-1852), báðir úr Miðvági, sum yrktu kvæðið um seyðamannin á Sondum, eftir søgn sum livað hevur á manna munni í Vágum.

Søgnin sigur:

“Ein seyðamaður var á Sondum í Sandavági áður á sinni, sum er gitin fram um allar seyðamenn í Føroyum. Hann røktaði einsamallur allan Sandavágshagan og átti ein útvaldan hest, reyðan á liti og frálíka dúgligan til at renna. Ein vakran sólskinsmorgun lysti seyðamanninum at ríða norður á fjøll. Við Fjallavatn búðu tvær huldukonur, hvør sínumegin, onnur í Húsagjógv og onnur í Tormansgjógv. Tær áttu stakkar av skarlaksklæði, og henda sama morgunin, ið seyðamaðurin reið norður, legði huldan í Húsagjógv stakk sín út til at sóla.“

Greinin varð fyrstu ferð løgd út 25. juni 2021

Hópfígging skal tryggja at Sirkus verður verandi

Partafelagið sum rekur barrina Sirkus, ynskir at keypa bygningin, har tey hava hildið til síðani byrjanina í 2009. Korona hevur tikið nakað av peningaligu styrkini, og tí sóknast barrin nú eftir hálvari millión við hópfígging

(Mynd: Torbjörn Sjölund / Google Maps)

SkrivaÐ:

Sverri Egholm

Bygningurin har barrin Sirkus heldur til í Vágsbotni í Havn varð settur til sølu her fyri, og tað er eingin loyna, at partafelagið sum rekur barrina, ynskir at keypa bygningin. Barrin hevur hildið til har síðani byrjanina í 2009.

Nú er Sirkus Føroyar sp/f farið á Hópfígging, og leitað verður eftir einari hálvari millión á Hópfíggingar-portalinum, so møguligt er at keypa bygningin.

Til ber at stuðla, men samstundis er møguleiki at gerast ábyrgdarlánsveitari. Tað merkir, at tilsøgnin kann gerast partur av okkara eginpeningi, soleiðis at gjørligt verður at keypa húsini.

- Tykkara ábyrgdarlán fær eina árliga rentu á fimm prosent, og eftir fimm árum fara vit undir at gjalda ábyrgdarlán tykkara aftur, soleiðis at tit eftir, í mesta lagi, 8 árum fáa peningin aftur – við 5 prosent í árligari rentu.

- Tá innskotsrundan er liðug hin 12. juli 2021, verður hvør einstakur tykkara boðin inn á gólvið hjá okkum, har vit skriva undir eitt ábyrgdarlánsskjal.

- Um onkur tykkara ynskir at seta meira enn 50.000 kr. í sum ábyrgdarlán, kunnu vit undirskriva ábyrgdarlánsskjalið, áðrenn peningurin verður goldin.

Korona tikið styrki
Í Sirkus eru tvey skeinkistøð. Sirkus í erva og Bjórkovin í neðra. Hesi gera tað gjørligt at skapa rammurnar rundan um tað, sum Sirkus er, gjalda fyri tónleikin og onnur mentanartiltøk, sum eru í Sirkus, gjalda øllum starvsfólkum løn og so framvegis, verður sagt.

Eigararnir hava ikki tikið vinningsbýti síðani byrjanini og heldur ikki høga løn, men hava lagt peningin aftur í virksemið fyri at víðka tað ella gera tað betri, siga eigararnir.

- Tí hevur Sirkus eisini eitt gott fíggjarligt grundarlag, men korona hevur tó tikið nakað av okkara styrki, so okkum tørvar hjálp, nú bygningurin, sum vit halda til í, er til sølu.

Eigarar av Sirkus Føroyar Sp/f eru Joel Briem og Sunneva Háberg Eysturstein.

Greinin varð fyrstu ferð løgd út 22. juni 2021

Nú sleppa øll ókeypis at leita í tinglýsingarskjølum

Umhvørvisstovan bjóðar í dag fram nýggja tænastu, har mann ómaksleyst kann fara inn á tinglysing.fo at leita eftir skjølum

 

SkrivaÐ:

Tíðindaskriv

Umhvørvisstovan bjóðar nú fram nýggja tænastu á heimasíðuni www.tinglysing.fo. Her kunnu øll sjálvi leita fram tinglýst skjøl, talgilt og uttan kostnað.

Tinglýst skjøl hava altíð verið almenn, men nú ber til ómakaleyst at fara inn á tinglysing.fo at leita eftir skjølum. Her finnur tú skeyti, veðbrøv og týðandi upplýsingar um fastognir og akfør. Hevur tú Samleikan, kanst tú rita inn og fáa fleiri upplýsingar, so sum hvat eini hús seinast eru seld fyri.

Tinglysing.fo er býtt upp í “fastognir” og “akfør.” Velur tú at leita eftir akførum, kanst tú eitt nú síggja, um lánveitari hevur veðhald í bilinum, tú hyggur eftir. Leitingarnar verða ikki skrásettar nakrastaðni.

Nógvar av upplýsingunum hava bert verið at fingið í pappírsútgávu, men nú er alt skjalasavnið hjá Tinglýsing talgilt. Eisini er ómaksgjaldið á 50 kr burtur, um tú nýtir tinglysing.fo.

Tað eru serliga peningastovnar, advokatar og meklarar, ið brúka tinglýsingarskjølini nógv. Men nú kunnu øll hyggja at tinglýsingarskjølunum.

- Vit fegnast um at kunna lata talgildu dyrnar upp, so øll kunnu leita frítt og ókeypis í almennu skjølunum. Hetta er eitt av stóru úrslitunum av samstarvinum við Talgildu Føroyar, sigur Sigurð Í Jákupsstovu, stjóri á Umhvørvisstovuni.

Talgildu Føroyar og Umhvørvisstovan fóru í 2018 undir at skanna skjalasøvnini hjá tinglýsingini inn. Eitt av aðalmálunum hjá Talgildu Føroyum er, at tílíkar upplýsingar skulu vera tøkar, álítandi og ókeypis hjá øllum føroyingum.

Greinin varð fyrstu ferð løgd út 21. juni 2021

Kringvarpið sendir fólk til hús

Um átøk ikki verða framd, fer KVF at hava hall komandi árini. Starvsfólkahópurin skal nú skerjast við 6,6 ársverkum

(Savnsmynd: Jens Kr. Vang)

SkrivaÐ:

Tíðindaskriv

Leiðslan í Kringvarpi Føroya má undir harmiligu tilgongdina at skerja starvsfólkahópin við 6,6 ársverkum.

Um ikki átøk verða framd, fer KVF at hava hall komandi árini. Minkandi inntøkur og vaksandi útreiðslur hava við sær, at raksturin næsta ár fer at geva eitt undirskot upp á stívliga 6 mió.kr. Undirskotið verður vaksandi næstu árini, um KVF ikki fremur sparingar, sigur kringvarpsstjórin, Ivan Hentze Niclasen. 

Inntøkurnar minka
Framrokningar vísa, at inntøkukarmurin til virksemið minkar úr 79 mió.kr. í 2021 niður í 74 mió.kr. í 2024. Tað eru serliga minkandi inntøkur frá gekkaspælinum, sum gera vart við seg.

Hesi seinastu árini hevur gekkaspælið fíggjað ein vaksandi part av virksemi og íløgum hjá KVF. Hetta hevur verið møguligt, tí Gekkurin onkur einstøk ár hevur givið óvanliga nógvar inntøkur, sum tað hevur verið møguligt at brúka yvir fleiri ár. KVF hevur brúkt tiltakspeningin frá Gekkinum til at raðfesta serligar íløgur, keyp av sendingum o.tíl., men eisini til at rinda fyri vanligar lønar- og príshækkingar, um hesar ikki rúmast í øðrum inntøkum.

Inntøkurnar frá kringvarpsgjaldi hava ikki megnað at fylgja við sáttmálabundna lønarvøkstrinum, og hendan gongdin tykist ikki at broytast, heldur tvørturímóti. Tá ið eyka puljan við gekkapengum samstundis minkar, so ridlar fíggjarliga grundarlagið undir stovninum.

Útreiðslurnar vaksa
Við seinastu lønarsamráðingar fekk Starvsfelagið ein BA-stiga í sáttmálan, sum gav stórar eyka lønarhækkingar í 2020 og 2021. Ein stórur partur av starvsfólkahópinum í KVF varð umflokkaður til nýggja stigan, og hetta hevur hækkað støðið á lønarútreiðslunum varandi.

Við óbroyttum virksemi væntast lønir og aðrar útreiðslur at vaksa úr 79 mió.kr. í 2021 upp í 85 mió.kr. í 2024. Vøksturin kemst av vanligum lønar- og prísvøkstri og avgerðini um, at KVF sjálvt skal fíggja allan tann føroyska partin av Savnsgull-verkætlanini.

Støðan er ikki haldgóð, og KVF má tillaga virksemið fyri at minka rakstrarkostnaðin og fáa javnvág millum inntøkur og útreiðslur. 

Sparingar í rakstri og lønum
Leiðslan hevur verið gjøgnum øll tølini í rakstrinum og tikið avgerð um at fremja sparingar fyri 2,5 mió.kr. Hesar fevna í høvuðsheitum um at skerja framleiðslukostnaðin á ávísum sendingum, at skerja keyp av sendingum, at umleggja lisensir og at drýggja nøkur innkeyp av tøkni.

Harafturat verður neyðugt at spara aðrar 3,5 mió.kr. við at skerja starvsfólkahópin við 6,6 ársverkum.

Sparingarnar raka ikki kjarnuøkir
Leiðslan og kringvarpsstýrið hava sett sær fyri, at sparingarnar ikki skulu raka kjarnuøkir innan tíðindi, mentan og tilfar til børn og ung. Hetta tí, at sparingarnar mugu í minst møguligan mun tarna Kringvarpinum í at virka í einum umleypandi miðlaveruleika, har tað er stórur tørvur á álítandi miðlum og óheftum tíðindum.

Samstundis standa Føroyar framman fyri einari stórari mentanarligari avbjóðing, tí ovurstórar nøgdir av útlendskum films- og sjónvarpstilfari skola inn yvir okkum frá stóru, altjóða stroymingartænastunum. Tað ávirkar málførið og mentanina, og tí er neyðugt at framleiða dygdargott tilfar á føroyskum til børn og ung og at hava neyvar raðfestingar á mentanarøkinum.

Leiðslan hevur kunnað UMMR um støðuna
Umboð fyri leiðsluna og kringvarpsstýrið gjørdu í mai landsstýrismannin og embætisfólk í UMMR varug við, at neyðugt er við átøkum, sum framtíðartryggja KVF, soleiðis at stovnurin í framtíðini megnar at lyfta kjarnuuppgávurnar.

Sum skilst fer landsstýrismaðurin at gera broytingar í kringvarpslógini í heyst. Tó er ikki greitt enn, hvørjar broytingar eru í væntu.

Greinin varð fyrstu ferð løgd út 21. juni 2021

Rúni Rasmussen nýggjur kommunustjóri í Klaksvíkar kommunu

Seinastu tíggju árini hevur hann starvast sum deildarstjóri í Stjórnartænastuni á Løgmansskrivstovuni. 20 umsóknir vóru til starvið sum kommunustjóri

 

SkrivaÐ:

Tíðindaskriv

Klaksvíkar býráð hevur tikið avgerð um at seta Rúna Rasmussen í starvið sum kommunustjóri í Klaksvíkar kommunu. 20 umsóknir vóru til starvið.

Rúni Rasmussen er 42 ára gamal og er stjórnmálafrøðingur. Harumframt er Rúni útbúgvin prosesskonsulent og verkætlanarleiðari.

Rúni hevur seinastu 10 árini starvast sum deildarstjóri í Stjórnartænastuni á Løgmansskrivstovuni, har hann m.a. hevur staðið á odda fyri Stjórnarskúlanum, hvørs endamál er at førleikamenna starvsfólk í stjórnarráðunum.

Áður hevur Rúni starvast sum deildarleiðari á Almannastovuni, umframt at hann eitt skifti var fyribilsstjóri í Søvnum Landsins.

Rúni Rasmussen byrjar í starvinum 1. august 2021.

Greinin varð fyrstu ferð løgd út 24. juni 2021

Marin Sigvaldsdóttir Bláberg sett sum skúlastjóri í Skúlanum á Argjahamri

Marin Sigvaldsdóttir Bláberg hevur trý tey síðstu skúlaárini verið í starvi sum skúlastjóri í Vestmanna skúla umframt at hava verið fyrstilærari í Hvalvíkar skúla

 

SkrivaÐ:

Tíðindaskriv

Jenis av Rana, landsstýrismaður í uttanríkis- og mentamálum, hevur sett Marina Sigvaldsdóttir Bláberg í starvið sum skúlastjóri í Skúlanum á Argjahamri.

Marin er 47 ára gomul, tók læraraprógv í 2003 og hevur tikið diplomútbúgving innan námsfrøðiliga leiðslu á Fróðskaparsetur Føroya.

Marin hevur drúgvar undirvísingarligar royndir á øllum floksstigum. Hon hevur trý tey síðstu skúlaárini verið í starvi sum skúlastjóri í Vestmanna skúla umframt at hava verið fyrstilærari í Hvalvíkar skúla.

Marin hevur harumframt verið virkin í kommunustýrisarbeiði og innan ítrótt. Hon hevur sitið tvey valskeið í Vága kommunu frá 2009 - 2016, har hon hevur havt ymsar nevndarsessir m.a. sum formaður í mentanarnevndini. Marin hevur verið venjari í boccia og badminton, og hevur í mong ár verið virkin í kappróðri.

Marin tekur við starvinum sum skúlastjóri í Skúlanum á Argjahamri tann 1. august 2021.

Uttanríkis- og mentamálaráðið

Greinin varð fyrstu ferð løgd út 24. juni 2021

Berlys Nordendal sett sum skúlastjóri í Fuglafjarðar skúla

Berlys Nordendal hevur seinasta skúlaárið verið í starvi sum varaskúlastjóri í Fuglafjarðar skúla

 

SkrivaÐ:

Tíðindaskriv

Jenis av Rana, landsstýrismaður í uttanríkis- og mentamálum, hevur sett Berlys Nordendal í starvið sum skúlastjóra í Fuglafjarðar skúla.

Berlys er 40 ára gomul. Hon tók læraraprógv í 2016, prógv sum námsfrøðingur í 2013 og tók í vár prógv sum nýkognitivur sálarterapeutur. Berlys er harumframt í holt við at taka masterútbúgving í leiðslu.

Berlys hevur undirvísingarligar royndir sum lærari og leiðsluroyndir bæði sum varaskúlastjóri og leiðari í Ungdómshúsi. Hetta síðsta skúlaárið hevur hon verið í starvi sum varaskúlastjóri í Fuglafjarðar skúla.

Berlys tekur við starvinum sum skúlastjóri í Fuglafjarðar skúla tann 1. august 2021.

Uttanríkis- og mentamálaráðið

Greinin varð fyrstu ferð løgd út 25. juni 2021

Helgi Abrahamsen tók lógaruppskotið aftur

Eftir at semja var gjørd og verkfallið var avblást leygarkvøldið fyri viku síðani, boðaði landsstýrismaðurin í umhvørvis- og vinnumálum frá, at hann tekur umstrídda lógaruppskotið aftur um at tryggja Almannaverkinum neyðug undantøk

(Mynd: Umhvørvis- og vinnumálaráðið)

SkrivaÐ:

Alda Nielsdóttir

Seint leygarkvøldið varð boðað frá, at semja var gjørd millum Føroya Pedagogfelag, Fíggjarmálaráðið og Kommunala Arbeiðsgevarafelagið, og í hesum sambandi boðaði Pedagogfelagið frá, at verkfallið var avblást.

Helgi Abrahamsen, landsstýrismaður í umhvørvis- og vinnumálum, hevur tikið umstrídda lógaruppskotið aftur um at tryggja Almannaverkinum neyðug undantøk í verkfallinum. Hesum boðaði hann løgtingsmanninum frá eftir at tað var greitt, at semja var funnin millum partarnar

Fakfeløgini høvdu áður heitt á Helga Abrahamsen um at taka uppskotið aftur, tí tað sambært teimum var eitt álop á verkfalsrættin, og fóru tey at boða frá stríðsstigum, um uppskotið ikki var tikið aftur.

Uppskotið snúði seg um at leingja sáttmálarnar hjá ávísum starvsfólkum í Almannaverkinum, sum ikki kunnu fara í arbeiðssteðg, tí tað stendur um lív og heilsu. Sambært uppskotinum skal tað vera Almannaverkið, sum metir hvørji starvsfólk tey ikki kunnu vera fyriuttan.

Greinin varð fyrstu ferð løgd út 20. juni 2021

Óluva R. Eidesgaard vart ph.d. við Københavns Universitet

Óluva hevur kannað møguleikar fyri at brúka tulkingar av wire-line loggum frá boringum í sambandi við kanningar av jarðgoymslueginleikum, í breiðari marking, í føroyska basaltháslættanum – Ritgerðin byggir á tríggjar vísindaligar greinar, harav ein er almannakunngjørd, ein er til fakliga meting, og tann triðja er um at vera klár til meting

(Mynd: Gransking.fo)

SkrivaÐ:

Alda Nielsdóttir

Hósdagin 17. juni vardi Óluva R. Eidesgaard ph.d.-ritgerð sína við Københavns Universitet.

Óluva hevur kannað møguleikar fyri at brúka tulkingar av wire-line loggum frá boringum í sambandi við kanningar av jarðgoymslueginleikum, í breiðari marking, í føroyska basaltháslættanum.

Ritgerðin ber heitið: "Investigation and applicability of interpreted well log data within the Faroe Islands Basalt Group (FIBG)"

Óluva R. Eidesgaard arbeiðir á Jarðfeingi og hevur verið innskrivað til ph.d.-lesturin á Københavns Universitet. Vegleiðarar hava verið Lars Ole Boldreel, lektari á IGN, Københavns Universitet, Niels Hemmingsen Schovsbo, seniorgranskari á GEUS og Jana Ólavsdóttir, granskari á Jarðfeingi, skrivar Granskingarráðið.

Í metingarnevndini vóru Michael Larsen, høvuðsráðgevi hjá Ineos Oil and Gas Denmark, Sverre Planke, professari á CEED, Centre of Excellence, Oslo og Kresten Anderskouv, lektari á IGN, formaður.

Verjan fór fram umvegis netið, og Óluva var á Jarðfeingi saman við starvsfeløgum, meðan metingarnevndin sat í Keypmannahavn og Oslo. Starvsfelagar og familja fylgdu við í verjuni á netinum.

Ritgerðin byggir á tríggjar vísindaligar greinar, harav ein er almannakunngjørd, ein er til fakliga meting, og tann triðja er um at vera klár til meting.

Fyrst greiddi Óluva frá gransking síni, og síðani svaraði hon spurningum og kjakaðist við metingarfólkini. Hon stóð seg væl, men fekk eisini fleiri góð ráð við á vegnum til, hvussu hon kann arbeiða víðari við síni gransking, skrivar Granskingarráðið.

Eftir nærum tríggjar tímar tók metingarnevndin samanum á einum stuttum fund. Formaðurin kunngjørdi síðani, at metingarnevndin var samd um, at talan var um eina góða ritgerð, verju og kjak. Mælt varð tí universitetinum til, at Óluva R. Eidesgaard fær tillutað ph.d.-heitið.

Aftaná verjuna var hugnaløta á Jarðfeingi fyri starvsfeløgum, familju og øðrum.

Meira um ritgerðina kann lesast her.

Greinin varð fyrstu ferð løgd út 20. juni 2021

150 búeindir afturat á Hamrinum

Avtala gjørd um 130.000 fermetrar av byggilendi við Glyvursvegin

Heðin Mortensen og Tróndur Sigurðsson oman fyri Argjahamar, har stykkjað verður út fyri nýggjum búeindum

SkrivaÐ:

Ingi Samuelsen

Farið verður nú undir at gera um 150 nýggjar bústaðareindir omanfyri Argjahamar fram við Glyvursvegin, sum er vegurin út móti Glyvursnesi.

Herfyri varð avtala undirskrivað millum festaran Poul Müller øðrumegin og Heðin Mortensen, borgarstjóra, og Trónd Sigurðsson, formann í byggi- og býarskipanarnevndini. Avtalan inniber, at Glyvursvegur verður fluttur nakað.

Kommunan hevur eisini fingið tilsøgn frá Búnaðarstovuni um keyp av lendi, sum er umleið 130.000 fermetrar til støddar. Sjálvt keypið kemur fyri á býráðsfundi mikukvøldið.

Talan verður um tætt og blandað byggjarí við rað- og randarhúsum og møguliga einstøkum sethúsum. Ein heildarætlan verður nú gjørd og í summar verður økið boðið út, skrivar Tórshavnar kommuna á heimasíðuni.

Heimari endin á Glyvursvegnum omanfyri Argjahamar móti rundkoyringini verður fluttur niðan frá gørðunum oman fyri ovastu húsini á Argjahamri. Samstundis verður gjørd ein viðarlund niðan fyri Argjahamar og heimeftir undir Glyvursvegnum.

Greinin varð fyrstu ferð løgd út 21. juni 2021

Parkeringshús til 150 bilar við Bøkjarabrekku

Íbúðarbygningur við parkering til 150 bilar skal byggjast í miðbýnum. Talan er um eitt parkeringshús í 3 hæddum, parkeringskjallara og 8 íbúðum á ovastu hædd

 

SkrivaÐ:

Sverri Egholm

Torshavn.fo: Býráðið samtykti í mikukvøldið at gera eina serstaka byggisamtykt fyri eitt øki við Bøkjarabrekku, sum loyvir at ein íbúðarbygningur við parkering til 150 bilar verður bygdur í økinum. Fyri at fáa fulla nýtslu av økinum má semja fáast við eigararnar av trimum ymsum matriklum.

Eigarin av nøkrum matriklum í økinum hevur søkt um at fáa gjørt serstaka byggisamtykt fyri økið, soleiðis at parkeringshús við íbúðum ovast, kann loyvast. Í uppskotinum eru pláss fyri 150 parkeringsplássum, umframt 8 íbúðum á ovastu hædd.

Økið liggur millum Bøkjarabrekku sunnanfyri og Kongagøtu norðanfyri. Eystanfyri er Tinghúsvegurin og vestanfyri er Niels Finsens gøta.

Ferðslan í miðbýnum er nógv merkt av manglandi parkeringsplássum, og fleiri ymiskir møguleikar hava seinastu árini verið umrøddir, fyri at loysa hendan trupulleikan. Ein teirra er parkeringshús á nevndu matriklum, men eru hesar ætlanir ongantíð komnar á mál.

Nú hevur eigarin gjørt eitt uppskot, sum tykist kunna loysa ein part av parkeringsavbjóðingunum í miðbýnum. Talan er um eitt parkeringshús í 3 hæddum (6 forskotnar hæddir), parkeringskjallara og 8 íbúðum á ovastu hædd. Innkoyring til bygningin er frá Kongagøtu, við inn- og útkoyring skipað á hvør sínum vegbana.

Um semja ikki fæst við eigararnar, kann umsitingin tillaga uppskotið, so at parkeringshúsið rúmast á ognum umsøkjarans.

Byggi- og býarskipanarnevndin samtykti 22. juni at taka undir við tilmælinum. Málið varð samtykt í býráðnum mikukvøldið.

Greinin varð fyrstu ferð løgd út 23. juni 2021

Yvir 8.500 metrar boraðir av Sandoyartunnlinum

129 metrar vórðu boraðir í farnu viku – Nú mangla beint undir 2.200 metrar

Traðardalur (Savnsmynd: Sverri Egholm)

SkrivaÐ:

Alda Nielsdóttir

Nú eru tilsamans boraðir 8.589 metrar av 10.785 metrum í Sandoyartunlinum, og sostatt manglar beint undir 2.200 metrar.

Í farnu viku vórðu 129 metrar boraðir, sigur felagið handan Sandoyartunnilin. 81 metrar vórðu boraðir í Traðardali, og 48 metrar vórðu boraðir á Gomlurætt.

Í Traðardali eru nú boraðir tilsamans 4.551 metrar, og á Gomlurætt eru boraðir tilsamans 4.038 metrar.

Tunnilin skal eftir ætlan vera liðugur í 2023.

Greinin varð fyrstu ferð løgd út 24. juni 2021

Advokatar kasta saman

Hansen Vinther Advokatfirma og Axia Advokatar fara framyvir at virka sum LEKS advokatfirma

 

SkrivaÐ:

Sverri Egholm

Hansen Vinther Advokatfirma og Axia Advokatar leggja saman og fara framyvir at virka sum LEKS advokatfirma.

Staðsetingin verður framhaldandi Undir Bryggjubakka 21 í Tórshavn.

Tað eru Annfinn V. Hansen, Jens Andrias Vinther, Brandur Ellingsgaard og Janus Rein sum virka í og reka LEKS Advokatfirma.

Samanleggingin er framd í vikuni.

Orðið LEKS er ein einføld føroyskan av latínska orðinum LEX, sum merkir lóg.

Greinin varð fyrstu ferð løgd út 24. juni 2021

Lundin í Mykinesi eigur at fáa frið fyri fólki

Yvirfriðingarnevndin mælir til at friðaða lundalond í Mykinesi og harvið steingja ella avmarka gongdina út í Hólmin

(Savnsmynd)

SkrivaÐ:

Ingi Samuelsen

Yvirfriðingarnevndin heitir nú á Helga Abrahamsen, landsstýrismann við umhvørvismálum, um at seta í verk friðingarkunngerð fyri Lamba og Dalin í Mykinesi.

Nógva gongdin av ferðafólki gjøgnum lundalandið í Lamba og út í Mykineshólm órógvar lundan. Hetta er ein vaksandi avbjóðing, sum neyðugt er at taka í álvara, serliga nú lundin hevur verið fyri munandi afturgongd. Fuglurin eigur at fáa frið í bútíðini, og eigur eingin ella minst møgulig gongd at vera gjøgnum lundalandið hesa tíðina.

Friðingin eigur at hava ásetingar um, hvussu nógv fólk kunnu ganga gjøgnum økið og hvørjar tíðir av samdøgrinum. Harumframt mælir Yvirfriðingarnevndin til at seta í verk eftirlit við ferðsluni gjøgnum økið.

Mykinesfólk hava tikið avgerð um, at í ár verður ongin gongd gjøgnum Lamba, nú Landsverk hevur boðað frá, at nýggj brúgv út í Mykineshólm verður gjørd í summar. Ferðafólk sleppa tí einans út á Rógvu, haðani gott útsýni er yvir lundalandið og Mykineshólm, skrivar Umhvørvisstovan. 

Ferðavinnu- og umhvørvisstovnar samdir um friðing
Yvirfriðingarnevndin fekk í fjør áheitan frá fýra stovnum og myndugleikum um at fara undir at skipa friðing av økinum, Umhvørvisstovuni, Visit Faroe Islands, Tjóðsavninum og Havstovuni.

Yvirfriðingarnevndin er samd, og mælir til at friða økið.

Hon metir tað vera neyðugt at seta tiltøk í verk, ið verja lundan í bútíðini. Nevndin leggur dent á, at verndartiltøk skulu byggja á náttúruvísindaliga vitan, samstundis sum atlit verða tikin at áhuganum fyri at vitja økið, og at friðingartiltøk skulu ásetast í samstarvi við eigararnar av jørðini.

Bólkurin handan áheitanina á Yvirfriðingarnevndina hevur heitt á landsstýrismannin um at fylgja áheitanini frá Yvirfriðingarnevndini og lýsa friðingarkunngerð fyri útnevndu økini í Mykinesi so skjótt sum til ber. 

Í februar 2020 løgdu Umhvørvisstovan, Sørvágs kommuna, Visit Faroe Islands, Tjóðsavnið, Havstovan og Visit Vágar fram tilmæli um náttúruvernd, fuglavernd og ferðavinnu í Mykinesi. Eitt av tilmælunum var at verja lundan betur, og við støði í hesum varð áheitanin til Yvirfriðingarnevndina send, skrivar Umhvørvisstovan.  

Greinin varð fyrstu ferð løgd út 22. juni 2021

Enn eitt ár við rúsfríum summari

Aftur í ár bjóðar Liv Lívið ungum í Føroyum av til at royna eitt rúsfrítt summar

(Mynd: Liv Lívið)

SkrivaÐ:

Alda Nielsdóttir

Aftur í ár bjóðar Liv Lívið, sum er átak hjá Bláa Krossi, ungum í Føroyum av til, at royna eitt rúsfrítt summar.

– Liv Lívið ynskir at vísa ungum á, at rúsur er ikki neyðugur fyri at hava eitt gott summar. Vit ynskja at vísa á, at uttan rúsin kann man uppliva alt, stuttleika sær júst, sum man annars hevði gjørt, ansa eftir einum sjálvum og teimum, mann elskar, og samstundis vera 100% til staðar, skrivar Liv Lívið í tíðindaskrivi.

Liv Lívið arbeiðir fyri, at upplýsa ung um vandarnar í at drekka, og er Rúsfrítt Summar eitt av mongu átøkunum hjá Liv Lívið. Átakið byrjaði í 2017, og síðan tá hava mong tikið av avbjóðingini og valt eitt rúsfrítt summar.

Eitt rúsfrítt summar merkir tó ikki, at mann ikki kann stuttleika sær eins nógv á festivalum og øðrum tiltøkum. Liv Lívið arbeiðir nevniliga alla tíðina við at menna nýggj alternativ til rúsdrekka, m.a. við drykkum, sum fólk sjálvi kunnu gera heima.

– Vit hava fyrr, saman við Gutta Winther og RFF ment drykkirnar 'Heilt appilsinfrían' og 'Sýrutripp', og koma vit aftur í ár út við einum nýggjum frískum drykki. Afturat hesum hevur Liv Lívið eina rúsfría barr, sum verður á øllum føroysku festivalunum í summar, skrivar Liv Lívið.

Ein av mátunum, sum man kann taka av avbjóðingini er, at leggja eina rammu á vangamyndina á Facebook, sum sigur "Eg velji eitt Rúsfrítt Summar" - hendan er at finna á síðuni hjá Liv Lívið. Eisini er møguligt at fara á heimasíðuna hjá Liv Lívið - Livlivid.fo - og tekna seg til rúsfrítt summar, og síggja ymsu rúsfríu drykkirnar hjá Liv Lívið.

Greinin varð fyrstu ferð løgd út 23. juni 2021

Yvir ein milliard koppsetingar gjørdar í Kina

Tað er nærum 40 prosent av øllum koronukoppsetingunum, sum higartil eru gjørdar í heiminum

(Savnsmynd)

SkrivaÐ:

Alda Nielsdóttir

Í Kina er nú fleiri enn ein mia. koppsetingar gjørdar, upplýsa kinesisku myndugleikarnir sambært tíðindastovuni Xinhua.

Heilt nágreiniligt er talan um 1.010.489.000 koppsetingar, ið svarar til næstan 40 prosent av teimum 2,5 mia. koronukoppsetingunum, sum higartil eru gjørdar í heiminum, skrivar CNN.

Myndugleikarnir í Beijing ætla at hava koppsett í minsta lagi 70 prosent av fólkunum, sum kunnu fáa koppsetingina, áðrenn árið er liðið. Í Kina búgva uml. 1,4 mia. fólk.

Sambært miðlinum South China Morning Post, er talið á koppsetingum tvífaldað síðan 23. mai, og seinastu dagarnar eru fleiri enn 20 mió. koppsetingar gjørdar um dagin í Kina.

Greinin varð fyrstu ferð løgd út 20. juni 2021

Knappliga 10.500 gistingar í mai

Talið á gistináttum á føroysku gistingarhúsinum í mai var 260 prosent hægri enn í 2020 – føroyingar áttu helvtina av gistináttunum

Hotel Føroyar (Savnsmynd)

SkrivaÐ:

Alda Nielsdóttir

Tað eru fleiri, sum gista á føroysku gistingarhúsunum. Talið á gistingum í mai var góð 260 prosent hægri enn í mai í gjør. Tó var talið á gistingum í farna mánað 40 prosent lægri enn í mai 2019.

Sambært tølum frá Hagstovuni vóru knappliga 10.500 gistinætur á gistingarhúsunum í mai, ið er nærum 7.600 fleiri samanborið við sama mánað í fjør.

Talið á gistnáttum hjá dønum vaks í mai við sløkum 500 prosent í mun til sama mánað í fjør, meðan talið á gistináttum hjá fólkum úr øðrum londum kundi trífaldast.

Av gistináttunum í mai áttu føroyingar helvtina. Í mai 2020 lá talið hjá føroyingum um 60-70 prosent.

Gistinætur telja, hvussu nógvir og hvussu leingi persónar gista á gistingarhúsum.

Greinin varð fyrstu ferð løgd út 25. juni 2021

Runavíkar kommuna keypt Skipanes

Síðan 1993 hevur kommunan fleiri ferðir roynt at keypt Nesið, men ikki fyrr enn í vár eydnaðist tað – Kommunan hevur keypt Skipanes fyri 780.000 krónur

(Mynd: Runavíkar kommuna)

SkrivaÐ:

Alda Nielsdóttir

Runavíkar kommuna hevur nú keypt Skipanes fyri 780.000 krónur.

Málið um keyp av Skipanesi varð lagt fyri býráðið á almennum fundi á Skála 28. apríl, og herfyri varð keypið endaliga formaliserað, skrivar Runavíkar kommuna.

Frammanundan átti Runavíkar kommuna atløgubryggjuna á Skipanesi men ikki sjálvt Nesið og harvið atkomuna til sjóvarmálan.

Kommunan samskifti longu við eigaran um møguleikan at keypa ognina í 1993, men tá bleiv hetta av ongum. Eisini varð roynt aftur í 2002 og í 2018, men heldur ikki tá eydnaðist tað. Í vár hava partarnir aftur samráðst um málið, og hesaferð varð semja funnin.

Greinin varð fyrstu ferð løgd út 24. juni 2021

Reiggja til børn í koyristóli sett upp í Vági

Reiggjan, sum stendur á spæliplassinum í parkini inni við sandin, er alment tikin í nýtslu

(Mynd: Vágs kommuna)

SkrivaÐ:

Alda Nielsdóttir

Í Vágs kommunu eru trý spælipláss til børn, og hesi spælipláss verða nógv brúkt av børnunum í kommununi og vitjandi. Í arbeiðinum við at betra um umstøðurnar hjá rørslutarnaðum, hevur kommunan sett upp reiggju til børn, sum sita í koyristóli. 

Reiggjan stendur á spæliplássinum í parkini inni við sandin. Síðsta hond varð løgd á arbeiðið, og fríggjadagin í síðstu viku, varð so reiggjan alment tikin í nýtslu, skrivar Vágs kommuna.

– Eg gleðist um, at Vágs Kommuna kann betra um umstøðurnar hjá rørslutarnaðum. Vágs Kommuna hevur gjørt nógv við atkomumøguleikunum hjá teimum sita í koyrustóli, og vit arbeiða víðari við, at betra um umstøðurnar hjá rørslutarnaðum, sigur Bjarni Johansen, borgarstjóri.

Greinin varð fyrstu ferð løgd út 19. juni 2021

Samtaksstjórin hjá Norwegian uppsagdur

Jacob Schram, sum hevur verið stjóri í flogfelagnum síðan januar 2020, er uppsagdur – Geir Karlsen, ið hevur verið fíggjarstjóri í felagnum síðan 2018, verður nýggjur samtaksstjóri

Jacob Schram, sum hevur verið samtaksstjóri í Norwegian síðan januar 2020, er nú uppsagdur (Mynd: EPA)

SkrivaÐ:

Alda Nielsdóttir

Samtaksstjórin hjá Norwegian, Jacob Schram, er uppsagdur og fer úr starvinum umgangandi. Hesum boðar felagið frá í tíðindaskrivi.

Geir Karlsen, ið hevur verið fíggjarstjóri hjá Norwegian síðan 2018, yvirtekur starvið sum samtaksstjóri.

– Karlsen hevur staðið á odda fyri einari fíggjarligari endurreisan av Norwegian, og hevur hann teir førleikar, álitið og áhugan, sum ger hann til tann besta stjóran, sigur Svein Harald Øygard, nevndarformaður í Norwegian, sambært DR.

Norwegian skrivar, at avgerðin um at koyra Schram var tikin í vikuni, og at hann sambært setanaravtalu sínari fær fulla løn í níggju mánaðir í uppsagnartíðini. Hareftir fær hann fráfaringarsamsýning í 15 mánaðir.

Jacob Schram tók við starvinum sum samtaksstjóri í Norwegian í januar í fjør.

Greinin varð fyrstu ferð løgd út 21. juni 2021

Hóttir við at fongsla borgarar ið ikki vilja prikast

Forsetin í Filipsoyggjum argur inn á, at ikki fleiri fólk verða koppsett

(Mynd: EPA)

SkrivaÐ:

Ingi Samuelsen

Fongsul ella koppseting. Tað er valið hjá borgarunum í Filipsoyggjum.

Forsetin í landinum, Rodrigo Duterte, hóttir nú borgarar, ið ikki vilja lata seg koppseta, við fongsli. Tað skrivar Reuters tíðindastovan.

- Valið er títt. Lat teg koppseta ella far í fongsul, segði Duerte í eini sjónvarpaðari røðu í gjár.

Boðini komu eftir tíðindi um, at nógv færri fólk enn væntað, vóru møtt upp á koppsetingarmiðstøðunum í høvuðsstaðnum, Manila.

Útsøgnin hjá Duterte er ikki heilt í samsvar við tað, sum núverandi og fyrrverandi embætisfólk hjá forsetanum hava sagt. Nevniliga at tað er upp til hin einstaka, um tey vilja lata seg koppseta.

- Misskilið meg ikki, tað er kreppa í landinum, segði Duterte, og legði afturat:

- Eg eri bara so argur inn á filipsoyingar, sum ikki filgja boðunum hjá stjórnini.

Fram til 20. juni høvdu 2,1 millión fylgt boðunum um at lata seg koppseta. 110 milliónir búgva í Filipsoyggjum. Stjórnin hevur eitt mál um, at 70 milliónir skulu vera koppsett áðrenn hetta árið er úti. 

Greinin varð fyrstu ferð løgd út 22. juni 2021

Vilja hækka aldursmarkið fyri keyp av e-sigarettum til 25 ár

Í dag er aldursmerkið í Noregi 18 ár, men nú ætlar norska stjórnin at hækka aldursmarkið fyri at verja tey ungu

(Mynd: Visualhunt.com)

SkrivaÐ:

Alda Nielsdóttir

Í Noregi eru e-sigarettir við nikotini bannaðar, men øll, sum eru fylt 18 ár kunnu keypa e-sigarettir uttan nikotin. Nú vil norska stjórnin tó hækka aldursmarkið til 25 ár.

Tað framgongur í einum uppskoti hjá norska heilsumálaráðnum um nýggjar reglur fyri royking í Noregi.

Eisini verður lagt upp til, at tað skal vera ólógligt at roykja í einum bili, um børn eru í honum, og at tað ikki longur skal vera lógligt at roykja á uttanduraspæliplássum og ítróttavøllum.

Orsøkin til, at mann ynskir at hækka aldursmarkið fyri keyp av e-sigarettum er, at tær kunnu vera ein vegur til vanligar sigarettir, sigur norski heilsumálaráðharrin, Bent Høie.

– Uppskotið skal verja børn og ung móti heilsuskaðum og forða nýggjum ættarliðum í at gerast bundin av nikotini, sigur hann sambært Ritzau.

Eitt prosent av norðmonnum millum 16 og 24 ár roykja fast. Fyri aldursbólkin 55 til 64 ár er talan um 17 prosent.

Greinin varð fyrstu ferð løgd út 23. juni 2021

Grikkaland: Prestur handtikin fyri at blaka sýru eftir sjey biskupum

Biskuparnir ætlaðu at blaka hann úr kirkjuni, eftir at hann varð tikin fyri at fjala kokain undir prestakjólanum

(Mynd: Ritzau)

SkrivaÐ:

Alda Nielsdóttir

Ein prestur úr ortodoksu kirkjuni í Grikkalandi varð í mikudagin handtikin fyri at hava blakað sýru eftir tíggju persónum í høvuðsstaðnum Athen.

Teir, sum fingu sýru á seg vóru sjey biskuppar, tveir sakførarar og eitt løgreglufólk.

Orsøkin til, at presturin blakaði sýru eftir biskupunum var, at teir høvdu hildið fund um at fáa hann blakaðan úr kirkjuni orsakað av einum máli um kokain. Tað var í 2018, at presturin varð handtikin fyri at fjala 1,8 gram av kokaini undir prestakjólanum.

Presturin var, sambært griksku tíðindastovuni ANA, undir illgruna fyri at hava samband við rúsevnissmugling. Eftir at biskuparnir høvdu avdúkað revsingina hjá honum mikudagin, leyp hann á. Hvørja revsing hann fekk verður tó ikki upplýst.

Sambært Ritzau er støðan álvarsom hjá trimum av biskupunum.

Greinin varð fyrstu ferð løgd út 24. juni 2021

Eystara skýlið reist

Fríggjadagin var reisigildi hildið á vøllinum við Djúpumýru. Eftir ætlan skal skýlið takast í nýtslu 15. juli

(Mynd: Klaksvíkar kommuna)

SkrivaÐ:

Alda Nielsdóttir

Í góðveðrinum fríggjadagin varð reisigildi hildið á vøllinum við Djúpumýru, har Jóhanna Christiansen, forkvinna í mentanarnevndini hjá Klaksvíkar býráð, og Tummas Lervig, formaður í KÍ, søgdu nøkur orð. Síðan varð bjóðað til døgurða á loftinum í KÍ høllini, skrivar Klaksvíkar kommuna á heimasíðuna.

Í røðunum nýttu bæði Jóhanna og Tummas høvið, at rósa býráðnum, sum hevur hildið fram at gera íløgur í víðari menning av leikvøllinum við Djúpumýru, umframt at tey róstu arbeiðsfólkunum, sum av øllum alvið arbeiða móti málinum, ið er at skýlið skal takast í nýtslu 15. juli. Tá skal KÍ nevniliga leika teirra fyrsta heimadyst á Djúpumýru í evropiskum samanhangi.

Jóhanna Christiansen fegnast um, at tað hevur gingið somikið væl og skjótt við hesum partinum av skýlinum. Tí avtalan við Norðhús bleiv undirskrivað 11. mars og fevnir um heili 600 sitipláss á eystaru síðu.

– Í fyrsta umfari verður ikki møguligt at sita undir taki á eystaru síðu, men vónandi fáa vit sett pening til av til hendan partin komandi ár, sigur Jóhanna Christiansen.

Verkætlanin kostar góðar 7 mió. krónur og hevur FSF harav stuðlað við tveimum mió., umframt at FSF hevur víst áhuga í at hýsa dystum hjá kvinnulandsliðnum og ungdómslandsliðum í Klaksvík, nú leikvøllurin fær UEFA góðkenning.

Greinin varð fyrstu ferð løgd út 25. juni 2021

Eiga framvegis ikki at koppseta við AstraZeneca og Johnson & Johnson

Koppingarevnini vórðu tikin úr donsku koppsetingarætlanini fyrr í ár, og eftir at hava eftirmett støðuna, heldur danska heilsustýrið framvegis, at hesi ikki skulu vera partur av koppsetingarætlanini

(Savnsmynd)

SkrivaÐ:

Alda Nielsdóttir

Í mars mælti danska heilsustýrið til at taka koppingarevnið hjá AstraZeneca úr donsku koppsetingarætlanini, eftir at fleiri koppsettir persónar høvdu fingið blóðtøpp. Orsakað av fráboðanum um álvarsom hjáárin kom koppingarevnið hjá Johnson & Johnson ongantíð inn í koppsetingarætlanina, og danska heilsustýrið hevur ikki broytt støðu.

Eftir at hava eftirmett støðuna, heldur danska heilsustýrið framvegis, at hesi koppingarevnini ikki skulu vera partur av donsku koppsetingarætlanini.

Tað skrivar stýrið í tíðindaskrivi.

Seinastu tíðina hevur tó verið møguligt at verða koppsettur við koppingarevninum hjá AstraZeneca ella Johnson & Johnson, um mann sjalvur ynskir tað í staðin fyri at bíða at sleppa framat hinum koppingarevnunum.

Greinin varð fyrstu ferð løgd út 25. juni 2021

Kamarslonin í Nesvík tikin í nýtslu

Varabrogarstjórin í Sunda kommunu var ein túr framvið og ynskti teimum í leguhúsinum til lukku

(Mynd: Sunda kommuna)

SkrivaÐ:

Alda Nielsdóttir

Í dag byrjar ársins fyrsta ungdómslega í Nesvík, og væntandi vera uml. 200 luttakandi til hesa leguna.

Í tí sambandinum var Eyðstein Zachariasen, varaborgarstjóri og formaður í trivnaðarnevndini í Sunda kommunu, ein túr framvið í Nesvík.

Eyðstein Zachariasen ynskti teimum í leguhúsinum til lukku, nú ovara hæddin í nýggju kamarslonini stendur klár at taka í nýtslu.

Greinin varð fyrstu ferð løgd út 25. juni 2021

– Kendi meg illa viðfarnan og reageraði eitt sindur ógvusligt

Eina viku eftir, at føroyski realityluttakarin Teitur Skoubo varð blakaður úr Reality Awards, greiðir hann frá sínari síðu av søguni

– Eg reageri eitt sindur ógvusligt, tí eg kenni meg illa viðfarnan, og eg vil ikki hava, at fólk skulu taka í meg, tá eg ikki føli, at eg havi gjørt nakað galið, sigur Teitur Skoubo (Savnsmynd)

SkrivaÐ:

Alda Nielsdóttir

Herfyri stjól føroyski realityluttakarin, Teitur Skoubo yvirskriftirnar hjá fleiri donskum tíðindasíðum, eftir at hann kom í rok við vaktirnar í sambandi við Reality Awards í Keypmannahavn, sum løgreglan mátti leggja seg uppí.

Teitur varð tó ikki handtikin men koyrdur av staðnum í hýruvogni, og fyriskiparar av Reality Awards siga við B.T., at teir hava ikki meldað hann fyri harðskap, og at hann er vælkomin aftur næsta ár, um hann kann skikka sær væl. Teitur fekk tó eina bót fyri at skapa ófrið.

Teitur Skoubo sigur sjálvir, at tað var ein sera óheppin støða, og hevur hann seinastu vikuna havt brúk fyri at vera burtur frá sosialu miðlunum, men nú er hann klárur at siga frá sínari síðu av søguni.

– Vit sita og hugna okkum, vit fáa drukkið eina rúgvu, og vit hava tað sera suttligt við borðið. Hvørja ferð ein virðisløn verður handað, reisi eg meg upp at fagnast. Um mann ikki veit tað, eri eg eitt stórt ADHD-barn, sum ikki kann sita stillur ov leingi, og so fái eg at vita frá vaktunum, at um eg reisi meg upp aftur, verði eg blakaður út, sigur hann í einari "story" á Instagram.

Seinni reisir Teitur seg tó upp aftur fyri at fara á vesi, men á veg hittir hann ein annan realityluttakara, Asbjørn Nielsen, sum eins og Teitur, hevur verið í parlagi við fyrrverandi Paradise Hotel-luttakarunum Christel Trubka, og hetta er nakað, sum vekir ans.

Meðan Teitur stendur og tosar við Asbjørn Nielsen, koma tveir vaktir, og annar tekur í hann og sigur, at hetta var seinasta ávaring, og at hann skal út umgangandi.

Teitur greiðir frá, at hann segði við vaktirnar, at teir ikki nýtast at taka í hann, tí hann sjálvur er førur fyri at fara út, og tá hin vakturin eisini tekur í hann, endar tað galið.

– Eg reageri eitt sindur ógvusligt, tí eg kenni meg illa viðfarnan, og eg vil ikki hava, at fólk skulu taka í meg, tá eg ikki føli, at eg havi gjørt nakað galið, sigur Teitur sambært B.T.

Greinin varð fyrstu ferð løgd út 23. juni 2021