So greitt vann Mads Moldt X Factor-finaluna

Kári fekk 40,1 prosent av atkvøðunum í endaumfarinum

(Mynd: Sverri Egholm)

SkrivaÐ:

Ingi Samuelsen

Blaðungi Mads Moldt, sum vann X Faktor finaluna gjørdist ein greiður vinnari í gjárkvøldið.

Portalurin hevur fingið prosentbýtið, og tað vísir, at endaligi vinnarin var sera væl stuðlaður av sjónvarpshyggjarunum.

Til ta fyrru atkvøðugreiðsluna í kvøld fekk Mads Moldt yvir helmingin av atkvøðunum, 51,3 prosent.

Kári Fossdalsá kom víðari við 28,9 prosentum, meðan Tina Mellemgaard ‘bert’ fekk 19,9 prosent, og slapp sostatt ikki við til endaligu uppgerðina, og gjørdist nummar trý.

Til seinnu atkvøðugreiðsluna, sum stóð millum Mads og Kára fall prosentbýtið soleiðis:

Mads Moldt 59,9 prosent

Kári Fossdalsá 40,1 prosent 

Greinin varð fyrstu ferð løgd út 08. apríl 2022

Árni Ellefsen sagt seg úr starvi

Forstjórin í BankNordik-samtakinum verður tó sitandi til nýggjur stjóri er funnin

Árni Ellefsen (Savnsmynd)

SkrivaÐ:

Ingi Samuelsen

Órógvið í BankNordik samtakinum hevur ikki lagt seg enn eftir at øll nevndin í samtakinum varð skift út herfyri.

Mánadagin boðar bankin frá í tíðindaskrivi, at forstjórin, Árni Ellefsen, nú leggur frá sær. Hann heldur tó fram í starvinum, til nýggjur forstjóri er settur.

Síðani á heysti 2015 hevur Árni Ellefsen røkt starvið sum forstjóri í samtakinum. Nú heldur hann tíðina vera búna til at leggja frá sær og royna nýggjar leiðir, skrivar bankin í tíðindaskrivi, og heldur fram:

- Vit í nevndini í BankNordik eru sera hørm um, at Árni hevur valt at siga seg úr starvi. Árni hevur gjørt eitt megnararbeiði fyri samtakið, og tað er ein sera stórur missur, at hann nú velur at fara. Vit virða tó hansara avgerð og fara nú undir eina tilgongd at seta nýggjan forstjóra. Vónandi verður ein loysn funnin í næstum, sigur Birita Sandberg Samuelsen, nevndarforkvinna í BankNordik.

Til nýggjur forstjóri er settur, heldur fráfarandi forstjórin fram í samtakinum.

Sostatt ber til at tryggja, at týðandi vitan ikki fer fyri skeytið, soleiðis at BankNordik kann rekast víðari á hollum grundarlagi.

- Eg havi havt nógv góð og hendingarík ár í BankNordik, síðan eg tók við sum forstjóri. Gjøgnum árini havi eg saman við leiðslu og starvsfólkum verið við til at røkka góðum úrslitum, og eg havi eisini tikið truplar avgerðir fyri at brynja samtakið til framtíðina. Nú er tíðin komin at royna okkurt nýtt, og tað gleði eg meg til, sjálvt um tað eisini er sorgblítt at fara. BankNordik er eitt sunt samtak við sera dugnaligum starvsfólkum og einum góðum og sunnum kundaskara. Samtakið hevur tí góðar fortreytir fyri framhaldandi at mennast og skapa góð úrslit, sigur Árni Ellefsen.

Árni Ellefsen er 56 ár, útbúgvin cand.merc.aud og statsautoriseraður grannskoðari. Hann hevur verið partur av samtaksleiðsluni í 11 ár og forstjóri í sløk 7 ár. Áðrenn hann tók við starvinum sum forstjóri í BankNordik, starvaðist hann m.a. sum grannskoðari og fíggjarstjóri.

Greinin varð fyrstu ferð løgd út 04. apríl 2022

Pf. Wenzel 15,2 milliónir í avlopi í 2021

Søguliga góður roknskapur hjá Wenzel. Eigararnir fáa 10 milliónir krónur útlutaðar í vinningsbýti

(Savnsmynd: Jens Kr. Vang)

SkrivaÐ:

Birgir Nielsen, Nira

Fyrsta bilasølan, sum hevur almannakunngjørt ársroknskapin fyri 2021 er Pf. Wenzel. 

Talan er um ein søguliga góðan roknskap. Ársúrslitið gjørtist eitt avlop á 15,2 milliónir krónur. 

Eigarnir fáa 10 milliónir útlutað í vinningsbýti. 

Roknskapurin 2021 hjá Pf. Wenzel vísir, at brottuvinningurin øktist úr 27,2 milliónum til 36,3 milliónir krónur. Vøksturin í bruttovinninginum var 33,8 prosent. 

Starvsfólkakostnaðirnir vóru 14,9 milliónir í 2021 sammett vuð 12,6 milliónir í 2020. Starvsfólkatalið í 2021 var sambært roknskapinum íalt 42 starvsfólk. 

Úrslitið áðrenn avskrivingar í 2021, eisini nevnt Ebidta, var 21,4 milliónir krónur, sammett við 14,6 milliónir krónur í 2020, sum er ein vøkstur á heili 46,9 prosent. 

Ársúrslitið í 2021 gjørdist eitt avlop á 15,2 milliónir krónur sammett við 9,6 milliónir í 2020. Vøksturin var heili 58,3 prosent. 

Aðalfundurin hevur samtykt at luta 10 milliónir krónur av ársúrslitinum út til eigararnar sum vinningsbýti. 

Fíggjarjavnin hjá Pf. Wenzel er øktur úr 84,9 milliónum krónum í 2020 til 100,5 milliónir krónur í 2021. 

Støðisognirnar eru minkaðar úr 40,8 milliónum í 2020 til 38,2 milliónir krónur í 2021 

Ognir í umferð eru vaksnar úr 44,1 milliónum í 2020 til 62,3 milliónir krónur í 2021. Serliga kann síggjast at vørugoymslurnar eru øktar úr 29,8  í 2020 til 43,7 milliónir krónur í 2021. 

Pf. Wenzel er væl fyri fíggjarliga, har eginognin í 2021 er 43 milliónir. Trygdarevnið er tískil 42,7 prosent, sum verður roknað at verða nøktandi.   

Felagið hevur goldið niður uppá langfreistaðu skuldina, úr 24,4 milliónum krónum í 2020 til 19,9 milliónir krónur í 2021. Stuttfreistaða skuldin er hinvegin økt úr 30,7 í 2020 til 45,7 milliónir krónur í 2021. 

Høvuðspartaeigarar, sum eiga yvir 5 prosent av Pf. Wenzel, eru Sp/f 5.03.12 og Spf. Plys. 

Stjóri í Pf. Wenzel er Rúni Martinsson Djurhuus og nevndarformaður er Jógvan Emil Nielsen.  

Greiningin er gjørd av ráðgevarafyritøkuni Nira Sp/f

Greinin varð fyrstu ferð løgd út 07. apríl 2022

Tak tey við á flot ella í fjøllini

Tað er áheitanin frá løgmanni, sum mælir til at vit øll gera okkara, so flóttafólk koma at kenna tann fjálga føroyska hitan

(Savnsmynd: Jens Kr. Vang)

SkrivaÐ:

Sverri Egholm

Løgmaður nevndi tað í nýggjársrøðuni, og áheitanin er enn tann sama. 

- Bjóða teimum ein drekkamunn, tak tey við á flot ella í fjøllini.

Tað segði Bárður á Steig Nielsen, løgmaður, nú løgtingi í vikuni einmælt samtykti uppskotið frá landsstýrinum um at taka móti flóttafólkum úr Ukraina. 

- Hetta er ein varði á vegnum í føroyskari søgu. Hetta er fyrsta ferðin at Føroya Landsstýrið hevur boðað frá, at Føroyar taka í móti flóttafólkum.

- Russiska álopið á Ukraina hin 24. februar, og teir ræðuleikar vit nú eru vitni til, bera boð um eina nýggja heimsmynd. Tað var ein tíð áðrenn, og ein onnur tíð eftir, hin 24. februar 2022. Heimurin er grundleggjandi broyttur. Eisini her hjá okkum í Føroyum, sigur løgmaður.

- Eg havi áður havi sagt, at vit heldur skuldu hjálpa flóttafólkunum í teirra nærumhvørvi. Ukraina er okkara nærumhvørvi. Hetta eru grannar hjá okkara grannum. Her talan um fólk, sum inntil fyri stuttum livdu frí og fræls í einum demokratiskum samfelagi.

- Sum eitt av heimsins ríkastu samfeløgum er tað ikki annað enn natúrligt, at Føroyar gera sítt, og at vit opna okkara dyr fyri flóttafólkum úr Ukraina. At vit hjálpa okkara evropeisku grannum.

- Vit mugu øll gera okkara, soleiðis at tey koma at kenna tann fjálga føroyska hitan. Tann ábyrgdin hvílir á hvørjum einstøkum av okkum.

Bárður á Steig Nielsen takkar felagsskapum og persónum, sum sjálvboðin hava verið við til at hjálpa og taka í móti flóttafólki úr Ukraina.

- Uttan tykkara hjálp hevði tað ikki borðið til. Eg vil eisini veita ein serliga tøkk til Reyða Kross Føroyar, sum vit í landsstýrinum hava havt eitt tætt og gott samstarv við, sigur Bárður á Steig Nielsen, løgmaður.

Greinin varð fyrstu ferð løgd út 07. apríl 2022

Nýggj krabbameinsætlan: Lógartryggjað viðgerðartrygd fyri krabbamein

Millum nógvu tilmælini í nýggju krabbameinsætlanini eru herd átøk ímóti royking, screening fyri tarmkrabba og víðkað tilboð um screening fyri lívmóðurhálskrabba, endurmenning av krabbameinssjúklingum, endurnýggjan av viðgerðartólum, uppraðfesting av palliasjón og nógv annað. Landsstýrismaðurin við heilsumálum er til reiðar at seta tey fyrstu átøkini í verk beinanvegin

 

SkrivaÐ:

Tíðindaskriv

– Á krabbameinsøkinum eiga vit at miða móti somu gongd sum t.d. á hjartaøkinum. Tað skulu færri doyggja av krabbameini. Fyri at tað skal verða, skulu fyri tað fyrsta færri fáa sjúkuna, og um hon kortini verður staðfest, skulu viðgerðirnar tryggja, at færri doyggja.

Soleiðis ljóðar eitt brot í nýggju krabbameinsætlanini hjá Heilsumálaráðnum, “Krabbameinsætlan fyri Føroyar 2022”, sum nú er handað landsstýrismanninum í heilsumálum, og brotið tekur væl saman um aðalmálið við ætlanini – at størri áherðsla á fyribyrging skal minka um títtleikan av krabbasjúkum, og at betri viðgerðartilboð skulu tryggja, at fleiri blíva frísk ella kunnu liva leingi við sjúkuni.

Samanberingin við hjartaøkið er grundað á góðu gongdina á tí økinum. Í 2007 doyðu umleið 150 føroyingar av hjarta- og æðrasjúkum, men í 2019 var tað talið minkað niður um 100. Í hesum tíðarskeiðnum hevur krabbamein yvirhálað hjarta- og æðrasjúkur sum fremsta deyðsorsøk í Føroyum.

69 tilmæli

Fyri at røkka málinum hevur nýggja krabbameinsætlanin ikki færri enn 69 tilmæli, sum eru býtt á hesi øki: Betri hagtalsgrundarlag, fyribyrging av krabbameini, screening, endurmenning, samskipað sjúklingagongd og palliasjón.

Ov drúgt verður at lýsa øll tilmælini, so her verður bert nomið við nøkur teirra.

Í fyribyrgingarpartinum verður stórur dentur lagdur á átøk at tálma royking, eitt nú við at víðka um roykfríu umhvørvini, hækka prísin á tubbaksvørum, taka av toll- og avgjaldsfrítøku á tubbaksvørur og alkohol, og mælt verður til, at Føroyar seta í gildi altjóða tubbakssáttmálan “Framework Convention on Tobacco Control”, sum limalondini í heimsheilsufelagsskapinum WHO hava samtykt. Eisini verður mælt til, at hægri skattur verður settur á ósunnar vørur, samstundis sum at skatturin á heilsugóðum vørum verður lækkaður.

Viðvíkjandi screeningum verður sum nakað nýtt mælt til, at landsfevnandi screening av tarmkrabba nú verður sett í verk í Føroyum.

Eisini verður mælt til, at aldursbólkurin, sum fær boðið bróstscreening, verður víðkaður frá 50-69 ár, ið er galdandi í dag, til 45-74 ár, og aldursbólkurin, sum fær boðið screening fyri lívmóðurhálskrabba, verður víðkaður frá 25-64 ár til 23-64 ár.

Á palliativa økinum verður mælt til, at palliasjón verður skipað sum landsumfatandi tænasta í Sjúkrahúsverkinum. Í tí sambandinum verður eisini mælt til, at ein serlækni við palliasjón verður settur sum skjótast at vera við til at byggja upp eina palliativa deild á Landssjúkrahúsinum.

Lógartryggjað viðgerðartrygd

Ein hornasteinur í nýggju krabbameinsætlanini er lógarfest viðgerðartrygd fyri krabbameinssjúkur. Eftir tilmælinum skal mest loyvda bíðitíðin til bæði útgreining og viðgerð fyri krabbamein ásetast í lóg, og lógin skal eisini tryggja, at sjúklingurin fær tilboð um ávísing til útgreining og viðgerð privat ella uttanlands í tann mun, føroyska sjúkrahúsverkið ikki fær hildið lógarfestu freistirnar.

Kaj Leo Holm Johannesen, landsstýrismaður við heilsumálum, fegnast um nýggju krabbameinsætlanina og ikki minst um lógarfestu viðgerðartrygdina.

– Málið hjá samgonguni er viðgerðartrygd fyri allar sjúkur, og lógarfest útgreiningar- og viðgerðartrygd á krabbameinsøkinum er ein týðandi liður í hesum, sigur Kaj Leo Holm Johannesen, landsstýrismaður.

Fyribyrging røkkur langt

Landsstýrismaðurin ætlar sær eisini beinanvegin undir ítøkilig átøk samsvarandi tilmælunum í krabbameinsætlanini. Hann hevur millum annað fest seg við, at sambært “Den europæiske kræfthandleplan” frá 2021, sum víst verður til í krabbameinsætlanini, kann fyribyrging og broyttur liviháttur – eitt nú tað at leggja av at roykja – skarva heili 40 prosent burtur av øllum krabbameinstilburðunum.

– Tað er jú ikki smávegis, so langt vit kunnu røkka á krabbameinsøkinum bara við fyribyrging. Tí ætli eg eisini beinanvegin at taka stig til at gera eina fólkaheilsuætlan. Skjót sjúkustaðfesting og skjót og røtt viðgerð er eisini avgerandi fyri at bøta um møguleikarnar fyri bæði leking og lívsleingjan. Tí fara vit eisini framhaldandi at stremba eftir at seta fleiri serlæknar at betra um viðgerðargóðskuna, og eg ætli eisini at framskunda ætlanina um at seta screening fyri tarmkrabba í verk í Føroyum, sigur Kaj Leo Holm Johannesen, landsstýrismaður

Eftirmeting

Í nýggju krabbameinsætlanini er eisini ein eftirmeting av krabbameinsætlanini frá 2009. Har verður staðfest, at fleiri av teimum mest týðandi tilmælunum í tí ætlanini eru sett í verk. Eitt nú var bróstscreening sett í verk í 2017, og fyrsti krabbameinslæknin – onkologurin – var settur í starv í 2019. HPV-koppseting fyri bæði gentur og dreingir er eisini sett í verk, og vit hava fingið eina sjúklingatrygging at veita endurgjald fyri skaðar, sum eru íkomnir í sambandi við kanningar ella viðgerð í heilsuverkingum ella av reseptheilivági.

Fleiri medisinskar viðgerðir eru eisini tiknar heim at veita í føroyska Sjúkrahúsverkinum, meðan aðrar, samsvarandi tilmælunum í gomlu krabbameinsætlanini, ikki longur verða gjørdar í Føroyum, men verða ávístar at gera uttanlands.

Eftirmetingin vísir tó eisini á umstøður og viðurskifti á krabbameinsøkinum, sum tað enn liggur á láni at fáa í rættlag, men hond verður í stóran mun tikin um hesi við lógarfestu útgreiningar- og viðgerðartrygdini, ið mælt verður til í nýggju krabbameinsætlanini.

Fleiri tilburðir

Útgangsstøðið fyri at gera nýggju krabbameinsætlanina er vaksandi talið á krabbameinstilburðum í Føroyum, ið eru staðfestir síðan 2007. Tá vóru umleið 200 tilburðir um árið, men í 2019 var hetta talið komið upp ímóti 250. Ein orsøk er helst økingin í sjálvum fólkatalinum, og at tey eldru, sum hagfrøðisliga eisini eru í størri vanda fyri at fáa krabbamein, eru blivin lutfalsliga fleiri.

Hagtølini vísa tó, at sjálvt um árliga talið á krabbameinstilburðum er vaksið við umleið 25 prosentum frá 2007 til 2019, so er talið á teimum, sum doyggja av krabbameini ikki vaksið. Talið á deyðum hevur ligið nøkulunda støðugt á 100 um árið alt tíðarskeiðið.

Talið á føroyskum krabbameinssjúklingum, sum eru á lívi fimm ár eftir, at sjúkan bleiv staðfest, er eisini vaksið støðugt í tíðarskeiðnum 2007-2019, men kortini liggur talið lægri enn tilsvarandi tølini fyri hini Norðurlondini.

Tíðindaskriv frá Heilsumálaráðnum

Greinin varð fyrstu ferð løgd út 08. apríl 2022

JT Electric besta úrslit nakrantíð

Ársúrslitið gjørdist 14,5 milliónir krónur sammett við 12,8 milliónir krónur í fjør. Fyritøkan hevur stórt verksemi uttanlands

(Savnsmynd)

SkrivaÐ:

Birgir Nielsen, Nira

Ársúrslitið í 2021 gjørdist eitt yvirskot á 14,4 milliónir krónur, sum er besta úrslit nakrantíð hjá JT Electric, sum annars eisini ber uppruna navnið Pf. Jóannes Thomsen.

JT Electric er ein innovativ fyritøka, sum mennir, útviklar og selur egnar vørur í Føroyum og uttanlanda, og sum sambært leiðsluni hevur stórar framtíðar møguleikar á alheims marknaðinum.

Fyritøkan, sum Jóannes Thomsen stovnaði í 1972, fyri 50 árum síðani, hevur ment seg munandi síðstu árini. Frá at verða ein el innleggjara fyritøka í Fuglafirði, sum við tíðini flutti út á Kambsdal og menti vørur og tænastur til fiskivinnuna og alivinnuna í Føroyum og uttanlanda. Í dag hevur felagið miðsavnað seg um menna og selja vørur og tænastur til alivinnuna.

Av vørum, sum JT Electric hevur ment síðstu árini kunnu nevnast fóðurskipanir, kameraskipanir, sensor skipanir, undirvatns ljós, undirvatns kamera, fóðurflakar, ilt sensorar, umframt at felagið eisini byggir fóðurskip til alivinnuna í Pólandi.  JT Electric er tí í dag ein heildarveitari av tekniskari útgerð til alivinnuna.

Í 2020 keypti JT Electric skotska felagið Sterner Aquatech UK, sum m.a. arbeiðir innan water treatment og sludge treatment til smoltstøðir. JT Electric hevur í dag munandi virksemi ígjøgnum síni dótturfeløg bæði í Skotlandi og í Pólandi, og er líka so nógv ein altjóða fyritøka í dag, sum kappast við útlendskar veitarar á marknaðinum og har størri parturin av søluni í dag er uttanlands.

Sambært stjóranum í felagnum, Suna Justinussen, er uttanlandsvirksemið hjá JT Electric miðvíst økt, og hevur tað verið ein partur av strategi felagsins. Goður møguleiki er fyri at uttanlandamarknaðurin framyvir kann gerast enn størri og meira týdningarmikil hjá felagnum, umframt at føroysku kundarnir eisini framhaldandi fáa bjóða dygdargóðar vørur og tænastur.

Rakstrarroknskapurin

Roknskapurin hjá JT Electric vísur, at bruttovinningurin fall úr 31,4 milliónum í 2020 til 27,2 milliónir krónur í 2021.

Starvsfólkaútreiðslurnar vóru 14,2 milliónir krónur í 2021, sum er 1,1 milliónir lægri enn í 2020. Í alt 70 fólk starvast í fyritøkuni í Føroyum og uttanlands.

Úrslit áðrenn avskrivingar, Ebidta, fall úr 16,1 milliónum í 2020 til 13,1 milliónir krónur í 2021. Talan er tí um eitt fall í Ebidta á 18,9 prosent.

Felagið hevði tó fíggjarligar inntøkur í 2021 frá sínum dótturfeløgum uttanlands á 5,5 milliónir krónur, sum tí ávirkar úrslitið hjá felagnum munandi í 2021.

Úrslit eftir skatt í 2021 gjørdist tí eitt avlop á 14,5 milliónir krónur, sammett við 12,8 milliónir í 2020. Vøksturin í ársúrlitinum var tískil 5,9 prosent.

Fíggjarstøðan 

Fíggjarjavnin hjá JT Electric var í 2021 íalt 105,4 milliónir krónur, sum er sama støði sum í 2020.  

Støðisognin øktist úr 78,3 milliónum í 2020 til 81,3 milliónir krónur í 2021. Ogn í umferð fall hinvegin úr 28,1 milliónum í 2020 til 24,1 milliónir krónur í 2021. Serliga kann nevnast, at vørugoymslurnar í 2021 øktist við 4,6 milliónum til 11,6 milliónir krónur í 2021. Harnæst fall áogn frá skuldarum úr 16,8 milliónum í 2020 til 11,6 milliónir krónur í 2021. 

Eginpeningurin hjá JT Electric var við ársenda 2021 samanlagt 62,9 milliónir krónur sammett við 53,4 milliónir í 2020. Talan er um eina fíggjarliga sterka fyritøku, við einum trygdarevni á 60 prosent, sum má metast at verða gott. 

Felagið hevur goldið 4,4 milliónir niður á langfreistaðu skuldina, sum við ársenda 2021 íalt var 20,1 milliónir krónur Stuttfreistaða skuldin er somuleiðis minkað við 4,5 milliónum til 22,0 milliónir krónur í 2021.  

Gjaldførið hjá JT Elecric var rímuligt í 2021 , tá hugt verður eftir lyklatalinum ”gjaldførislutfall”, sum var 109 prosent samanborið við 106 prosent í 2020. 

Aðalfundurin hevur fyri roknskapin 2021 sett 5 milliónir krónur av sum vinningsbýti til eigararnar. 

Høvuðspartaeigarin av Pf. Jóannes Thomsen (JT Electric) er Spf. Skrínið, sum er dótturfelag hjá Pf. Tjaldur.

Stjóri síðani 2017 hevur verið Suni Justinussen. Nevndarformaður er Árni Tór Rasmussen.  

Greiningin er gjørd av Birgir Nielsen frá ráðgevarafyritøkuni Nira Sp/f.

Greinin varð fyrstu ferð løgd út 04. mars 2022

Skyn: Vaksandi eftirspurningur eftir íbúðum

Hóast føroyingar í stóran mun framvegis keypa og byggja vanlig sethús, so er siðbundna bústaðarmynstrið við at broytast. Alsamt fleiri íbúðir verða bygdar, og eftirspurningurin eftir dýru fermetrunum er í støðugum vøkstri

 

SkrivaÐ:

Tíðindaskriv

Seinastu 10 árini er talið av íbúðum í Føroyum hækkað munandi, og á Streymoynni eru fleiri enn 500 nýggjar íbúðir bygdar í tíðarskeiðinum. Í 2021 vóru heili 144 av 197 nýggjum bústøðum á Streymoynni íbúðir.

– Vit síggja framvegis ein stóran eftirspurning eftir sethúsum kring landið, men serliga eftirspurningurin eftir smærri búeindum er vaksin nógv seinastu árini. Alsamt fleiri føroyingar velja at selja stóru sethúsini, tá ið børnini eru flutt heimanífrá, tí tey ynskja sær ein minni bústað, ið er lættari at halda, sigur Petur Mohr Niclasen, stjóri í Skyn.

Hóast útboðið av íbúðum er størri enn áður, so veksur eftirspurningurin skjótari, og tað er við til at leggja trýst á prísin.

Vegurin inn á bústaðarmarknaðin
Umframt vaksandi eftirspurningin eftir íbúðum hjá eldra ættarliðnum, so standa smærri búeindirnar eisini ovaliga á ynskilistanum hjá teimum ungu, ið skulu fóta sær á bústaðarmarknaðinum.

– Sethúsaprísirnir hava verið støðugt vaksandi seinastu árini, og tað er ein avbjóðing hjá teimum, ið skulu seta búgv. Hóast rentan hevur verið lág, og tað í nógv ár hevur verið lutfalsliga bíligt at læna pening, so gera høgu sethúsaprísirnir tað trupult hjá ungum fólki at keypa eini hús. Tá eru ráðini ofta at byrja við at keypa eina íbúð, ið bæði kostar minni at keypa og halda, sigur Petur Mohr Niclasen.

Fólkavøksturin hevur verið umleið 800 um árið síðani 2018. Av teimum er helvtin í Tórshavnar kommunu, og hetta sæst eisini aftur í eftispurninginum.

Miðalprísurin á íbúðum hækkaði við umleið 170.000 kr. úr 2,50 milliónum í 2020 til 2,67 milliónir í 2021. Tað svarar til ein prísvøkstur á 7 prosent. Í fimm ára tíðarskeiðinum frá 2016 til 2021 hækkaði miðalprísurin á íbúðum við uml. 740.000 krónum úr 1,93 milliónum til 2,67 milliónir krónur. Tað er ein prísvøkstur á umleið 38 prosent.

Fyrstu fermetrarnir teir dýrastu
Broytta bústaðarmynstrið hevur við sær, at eftirspurningurin eftir íbúðum er vaksandi hjá bæði yngra og eldra ættarliðnum. Fleiri hava ráð til at bjóða upp á smærri bústaðirnar, og talan er eisini um lutfalsliga dýrar fermetrar.

Í 2021 var miðal fermetraprísurin á einari íbúð í høvuðsstaðnum undir 60 fermetrar 45.400 krónur, meðan fermetraprísurin fyri stóru íbúðirnar omanfyri 100 fermetrar í miðal var 27.200 krónur.

Í summum førum verða íbúðir eisini seldar fyri ein fermetraprís, ið liggur um 50.000 krónur. Niðanfyri sæst eitt yvirlit yvir miðal fermetraprísir á íbúðum í Tórshavn í 2021.

Óviss framtíðarútlit
Í løtuni eru nógvar íbúðir í gerð, og fleiri byggiverkætlanir eru ávegis.

Kundar rinda ein høgan prís fyri nýggjar íbúðir, ið hava góða staðseting, og lítið bendir á, at tørvurin á smærri búeindum verður nøktaður í næstum. Tó eru tað nú nøkur viðurskifti, ið kunnu væntast at tálma stóra prísvøkstrinum, hevur verið seinastu árini.

Hækkandi rentur, vaksandi inflatión og kríggj í Evropa hava merkt árið 2022 higartil, og útlitini eru tí meira óviss enn áður.

Greinin varð fyrstu ferð løgd út 08. apríl 2022

Landsverk: 42 prosent skotið higartil

Nú eru tilsamans 1.712 metrar skotnir í nýggju tunlunum norður um Fjall

(Mynd: Landsverk)

SkrivaÐ:

Alda Nielsdóttir

Arbeiðið at byggja nýggju tunlarnar norður um Fjall á Borðoynni koyrir eftir ætlan, og í seinastu viku vórðu tilsamans 100 metrar skotnir.

Landsverk skrivar, at nú eru tilsamans 1.712 metrar skotnir, sum svarar til 42 prosent av samlaðu longdini.

Í farnu viku vórðu 52,5 metrar skotnir í Hvannasundstunlinum, og 47,5 metrar skotnir í Árnafjarðartunlinum.

Í Hvannasundstunlinum eru skotnir 993,5 metrar, og eftir eru 1.201,5 metrar. Í Árnafjarðartunlinum eru skotnir 718,5 metrar, og eftir eru 1.171,5 metrar.

Greinin varð fyrstu ferð løgd út 08. apríl 2022

Vandi fyri salmonella í Kinder-eggum

Danska matvørueftirlitið ávarar móti væl umtóktum søtmeti til børn

(Mynd: Visualhunt)

SkrivaÐ:

Ingi Samuelsen

Vanliga eru Kinder Surprise – eisini kend sum Kinderegg – knýtt at óvæntaðum upplivingum.

Men trupulleikar við reinførinum hjá einum útlendskum framleiðara ger nú, at vandi er fyri øðrum upplivingum enn teirri, sum fjalir seg í sjokulátaegginum, skrivar Ritzau.

Danska matvørueftirlitið, Fødevarestyrelsen, ávarar nú móti, at salmonella kann vera í fleiri av vørunum frá Kinder.

Hetta er orsøkin til, at Ferrero Scandinavia, sum eigur Kinder, nú kallar fleiri av vørum sínum aftur.

Talan er um vørurnar Kinder Surprise, Kinder Surprise Maxi, Kinder Schokobons og Kinder Mini Eggs.

Vørurnar, sum nú verða kallaðar aftur av danska marknaðinum, hava ymiskar best-fyri-dagsetingar. Tær eru seldar í matvøruhandlum um alt landið, upplýsir danska matvørueftirlitið.

Eftirlitið mælir brúkarum, sum hava keypt vørurnar um at lata tær aftur haðani tær eru keyptar, ella at beina tær burtur.

Salmonella kann elva til leyst lív, magapínu, fepur, høvuðpínu og kanska vaml og spýggju, alt frá nøkrum fáum døgum til fleiri vikur, skrivar Ritzau.

Greinin varð fyrstu ferð løgd út 07. apríl 2022

Føroyskt-íslendskt samstarv í alivinnuni

Magnus Rasmussen landsstýrismaður og íslendski matvørumálaráðharrin, Svandís Svavarsdóttir, stóðu í vikuni á odda fyri einari vitjan úr Íslandi, um menning og samstarv í alivinnuni. Tað er føroyska sendistovan í Reykjavík, sum hevur tikið stig til vitjanina

Íslendsku gestirnir hava vitjað føroyskar fyritøkur, sum gera loysnir til alivinnuna

SkrivaÐ:

Tíðindaskriv

Magnus Rasmussen landsstýrismaður og íslendski matvørumálaráðharrin, Svandís Svavarsdóttir, hava hesa vikuna staðið á odda fyri einari vitjan úr Íslandi, um menning og samstarv í alivinnuni. Tað er føroyska sendistovan í Reykjavík, sum hevur tikið stig til vitjanina.

Íslendsku gestirnir komu mánadagin, og týsmorgunin bjóðaði Vinnuhúsið til evnisdag um møguleikar í alivinnuni.

Alivinnan er vorðin alsamt størri partur av føroyska búskapinum, og eisini í Íslandi gongur skjótt framá. Hetta skapar ikki einans sterkar alifyritøkur, men hevur eisini ført til stóran vøkstur hjá veitarunum til alivinnuna.

Arbeitt verður við alsamt meiri tøkniliga framkomnum loysnum, fyri at skapa burðardyggan og varandi vøkstur í alivinnuni. Millum annað við at framleiða í lokaðum eindum, og at víðka alingina út á opið hav.

- At flyta út á opið hav ber við sær stórar natúrligar og tøkniligar avbjóðingar, og tá er umráðandi, at vit ikki stremba eftir at vinna á, men altíð at arbeiða við náttúruni”, segði Magnus Rasmussen í røðu síni á evnisdegnum. Varandi vøkstur má vera burðardyggur og tað merkir m.a. at vit altíð mugu seta hægstu krøv til djóravælferðina og vistskipanina.

Á vitjanini hava íslendsku gestirnir vitjað nógvar føroyskar fyritøkur, sum gera loysnir til alivinnuna.

- Vit hava nógv at geva hvørjum øðrum, og eg vænti og vóni, at samhandilin millum okkum fer at vaksa komandi árini, men ikki nóg mikið við tí, burðardygg alivinna, bæði av fiski og tara, kann gera stóran mun í heimsins matframleiðslu, og við royndunum frá heimamarknaðinum kunnu vit eisini útflyta ráðgeving og alitøkni til alheims alivinnuna”, sigur Magnus Rasmussen.

Tíðindaskriv frá Umhvørvis- og vinnumálaráðnum

Greinin varð fyrstu ferð løgd út 05. apríl 2022

Íslendingar keypa føroyskt

Mikudagin skrivaðu Björn Hembre, stjóri í Arnarlax, og Ólavur Asafsson Olsen, stjóri í KJ, undir sáttmála, um bygging av nýbygningi nrummar 62. Talan er tvíkilju, ið verður 15 metrar long og 8,5 metrar breið, og tað verður triðja tvíkiljan, sum Arnarlax hevur frá KJ

Björn Hembre, stjóri í Arnarlax, og Ólavur Asafsson Olsen, stjóri í KJ Hyrdaulik, eftir at sáttmáli um nýggja tvíkilju er undirskrivaður

SkrivaÐ:

Tíðindaskriv

Mikudagin skrivaðu Björn Hembre, stjóri í Arnarlax, og Ólavur Asafsson Olsen, stjóri í KJ, undir sáttmála, um bygging av nýbygningi nrummar 62.

Tvíkiljan verður 15 metrar long og 8,5 metrar breið. Tvíkiljan fær tveir framdriftsmotorar, á 500 hk hvør, og ein Himoinsa 115 KVA generator. Av deksútgerð kann nevnast ein radiostýrdur Palfinger 65 tons krani, ein kapstan á 1,5 tons og tveir á 3,0 tons.

Tvíkiljan er útgjørd við messu, vesi, arbeiðs-/klædnarúmi og allari vanligari nautiskari útgerð.

Hetta verður sostatt triðja tvíkiljan, sum Arnarlax hevur frá KJ. Hinar eru Eygló, bygd í 2012, og Jónleyg, bygd í 2007.

Hetta er harafturat triði nýbygningur, ið verður bygdur til Vestfirðirnar í Íslandi, seinastu tvey árini. Fyri stuttum undirskrivaði KJ sáttmála við íslendska felagið Háafell, um bygging av nýggjari tvíkilju, sum verður latin kundanum í heyst. Í januar 2021 bleiv Tannanes latin til Arctic Fish.

Umframt tvíkiljurnar til Íslands, framleiðir KJ eisini aliringar á Ísafjørðinum til Háafell, og seinni í ár fer KJ undir at framleiða aliringar, ið eru 200 metrar í ummáli, til eysturlandið í Íslandi.

Tíðindaskriv frá KJ Hydraulik

Greinin varð fyrstu ferð løgd út 06. apríl 2022

Ternan rendi á land

Hon slapp sjálv leys aftur – kavarar hava staðfest, at ongin skaði kom á botnin

 

SkrivaÐ:

Alda Nielsdóttir

Seinnapartin mánadagin rendi Terjan á land við Malarenda í Nólsoy. Sum skilst var tað eitt menniskjaligt mistak, sum var orsøkin til, at skiparin valdi at seta skipið á sandstrondina heldur enn at sláa ógvusligt bakk.

Tað tók ikki langa tíð at fáa skipið leyst aftur. Við at flyta akførini á bildekkinum aftur í skipið, kundi Ternan sigla avaftur við egnari hjálp.

Meðan skaðin varð kannaður, røktu Rescue Lív Nólsoyarsiglingina. 

Myndirnar hevur Evy Toftegaard Nielsen tikið.

Greinin varð fyrstu ferð løgd út 04. apríl 2022

Ternan á beding eftir páskir

Frá 19. apríl og umleið tríggjar vikur fram verður Ternan á beding, og fer Erla Kongsdóttir at sigla á nólsoyarleiðini

(Savnsmynd: Sverri Egholm)

SkrivaÐ:

Alda Nielsdóttir

Týsdagin 19. apríl fer Ternan á beding.

Tað skrivar Strandferðslan, sum metir, at Ternan verður á beding í umleið tríggjar vikur.

Meðan Ternan er á beding verður Erla Kongsdóttir sett í sigling á nólsoyarleiðini, og verður ferðaætlanin tann sama.

Týsmorgunin 19. apríl siglur Ternan fyrstu túrarnir av Havnini klokkan 06.45 og klokkan 07.45 og úr Nólsoy klokkan 07.15 og 08.15. Síðani tekur Erla Kongsdóttir yvir, og verður fyrsta fráferðin hjá henni av Havnini klokkan 12.30.

Greinin varð fyrstu ferð løgd út 04. apríl 2022

Fyrsta Oy ølin komin á marknaðin

Ein avmarkað nøgd er tappað í kaggar og rennur nú úr kranum á ymiskum matstovum, hotellum og skeinkistøðum kring landið

(Savnsmynd)

SkrivaÐ:

Sverri Egholm

Tvey ár eftir at farið varð undir fyrireikingarnar til eitt nýtt føroyskt bryggjarí, kom fyrsta Oy ølin út í gjár, fríggjadagin.

Hesum boðaði bryggjaríið frá í tíðindaskrivi.

Fólk hava regluliga fregnast um gongdina, og afturvendandi boðini hava verið, at tey gleða seg til at sleppa at bíleggja ”oyna OY”. Fólkið hevur sostatt talað, og hava vit tí valt, at hendan fyrsta ølin sjálvandi bara skal eita OYN OY, sigur bryggjaríið.

Navnið sipar harvið bæði til eina øl og eina oyggj, og kann bert tíðin vísa, hvussu tað fer at ganga, tá fólk brádliga skulu bíleggja tvær av slagnum.

OYN OY er ein rein og frísklig pilsnarøl við einari alkohol styrki á 5,2 prosent. Hon hevur ein góðan maltsmakk og er løtt at drekka. Harafturat hevur hon ein væl javnvigaðan dám av hunangi, hoyggi og humlu.

Ein avmarkað nøgd er tappað í kaggar, og rennur nú úr kranunum á ymiskum matstovum, hotellum og skeinkistøðum í bygd og býi. Bryggjað verður við fullari ferð, so skjótt verður OYN OY at fáast kring alt landið, í bæði krana og í dós.

- Afturmeldingar hava higartil verið sera góðar, og vit eru sera spent at hoyra enn meira frá tykkum, sigur bryggjaríið.

Greinin varð fyrstu ferð løgd út 08. apríl 2022

Nýtt whisky frá Einar's Distillery – Tjaldursútgávan

Hesaferð er talan um eina samanseting av átta ymiskum tunnum – hugskotið til hesa fyrstu útgávuna í nýggjari røð er sprottið úr árstíðini, ið gerst alt ljósari

 

SkrivaÐ:

Alda Nielsdóttir

Fríggjadagin lat Einar's Distillery aftur eina whisky úr hondum.

Hesaferð er talan um eina samanseting av átta ymiskum tunnum. Seks 90 litra Oloroso sherrytunnur, ein 190 litra Bourbon barrel, og ein 50 litra Oloroso sherrytunna. Úrslitið er ein frálík fløska við 52 prosent styrki.

Hugskotið til hesa fyrstu útgávuna í nýggjari røð er sprottið úr árstíðini, ið gerst alt ljósari. Tjaldrið og litirnir á vakra tjóðfulgi okkara, ið er komin heim á klettarnar aftur. Hvíti liturin frá bourbon tunnuni, reyði liturin frá sherry fatinum, og so hendan eina tunnan, ið var sera myrk á liti, næstan svørt. 1.600 fløskur komu burturúr hesi tappingini, skrivar Føroya Bjór í tíðindaskrivi.

Edward Fuglø, listamaður, hevur myndprýtt útgávuna.

Smaksnoturnar í tí whisky, ið nú kemur, eru:

• Color: Auburn
  
• Nose: Lemon custard, forest fruits, chamomile, eucalyptus and red liquorice
  
• Taste: Chocolate milk, honey, key lime pie, tropical fruits and vanilla
  
• Finish: Walnuts, tannins, malt and dark chocolate
  

Einar´s Whisky – Tjaldursútgávan fæst til keyps í Rúsdrekkasølunum kring landið, í Duty Free á Flogvøllinum, og handlinum á Norrönu.

Greinin varð fyrstu ferð løgd út 08. apríl 2022

Børnini í Miðgarði ganga undan á umhvørvisøkinum

Í barnagarðinum í Miðvági eru tey farin undir at arbeiða við einum endurnýtsluverkstaði, har børnini kunnu brúka sín kreativitet at skapa ymiskt úr endurnýtslutilfari, sum annars endar sum burturkast

(Mynd: Vága kommuna)

SkrivaÐ:

Alda Nielsdóttir

Í fjør byrjaði ein nýggj verkætlan í Miðgarði – barnagarðinum hjá Vága kommunu í Miðvági. Har eru tey farin undir at arbeiða við einum endurnýtsluverkstaði, har børnini kunnu brúka sín kreativitet at skapa ymiskt úr endurnýtslu tilfari, sum annars endar sum burturkast.

Tað ganga 100 børn í Miðgarði, í trimum vøggustovum, trimum barnagarðsstovum, einari stovu til tey seks ára gomlu, og eini serstovu. Tað arbeiða 35 starvsfólk á stovninum, harav 16 eru námsfrøðingar.

Tilgongdin til eina burðardygga menning setur krøv til starvsfólkini og børnini, soleiðis at tey m.a. skulu hugsa um nýtslu og lívshátt, og tørvin hjá komandi ættarliðum, náttúruna o.s.fr. Starvsfólkini leggja tí stóran dent á námsfrøðina, og gera sær nógvar námsfrøðiligar hugsanir, tá slíkar verkætlanir verða mentar og settar í verk í Miðgarði, skrivar Vága kommuna.

At arbeiða við endurnýtslu, at skapa okkurt úr onkrum, sum annars hevði farið burtur, og at hava eina burðardygga menning, gevur børnunum møguleika fyri djúphugsni, har tey gerast hugbundin, soleiðis at tey fáa stimbrað og ment sítt hugflog og skapandi evni enn meira, samstundis sum tey læra at um umhvørvið.

Fyri at hava eitt stórt og fjølbroytt úrval av tilfari, at arbeiða við á endurnýtslu verkstaðnum, eru børnini, foreldur og vinnan í Vágum tikin við í uppbyggingina av verkstaðnum. Heitt varð á tey um at lata inn tilfar og burturkast, sum annars fer burtur, til endurnýtslu verkstaðið, og hevur hetta eydnast væl, skrivar kommunan.

Úr burturkasti og endurnýtslu, hava børnini millum annað gjørt sær eitt akvarium úti í gongini, har tey kunnu hugsavna seg og læra um lívið undir vatnskorpuni, eins og tey brúka sítt hugflog til at skapa ymisk fiskasløg og annað lív í sjónum.

(Mynd: Vága kommuna)

Greinin varð fyrstu ferð løgd út 02. apríl 2022

Bryggjan eitur nú Silkienni

Bygdarráðið í Vestmanna valdi eitt annað navn til  hølið enn tað, ið vann navnakappingina

(Mynd: Google)

SkrivaÐ:

Ingi Samuelsen

Í februar skrivaði Vestmanna kommuna út navnakapping til hølið á havnaøkinum, sum seinast hevur verið kallað Bryggjan. Vestmanna Kommuna hevur leigað hølið síðan 2017, og hevur nú sett umvælingar í verk til tess at dagføra tey til miðalstór mentanarlig tiltøk.

Í hesum sambandi var eisini bjóðað til navnakapping. Tá ið freistin at senda inn uppskot til navnakappingina var farin, vóru 20 uppskot innkomin. Vestmanna Bygdarráð viðgjørdi uppskotini og fann ein vinnara teirra millum.

Virðisløn á 3.000 krónur varð latin Ditte Mathildu Joensen fyri besta uppskotið.

Men á bygdaráðsfundi í Vestmanna í farnu viku varð samtykt at geva hølinum eitt annað navn, enn vinnandi uppskotið. Navnið á hølunum verður tí Silkienni.

Silkienni er eitt staðarnavn í Teistansskor, norðan fyri Vestmanna.

Silkienni er eisini eitt kent navn innan mentan í Vestmanna. Tá vestmenningurin, Hannis Egilsnes, sum var ein undangongumaður, tá ið talan er um at skipa fyri ymiskum mentanarligum tiltøkum. Hesi vóru millum annað skipað undir navninum “Silkienni”.

“Silkienni er ikki einans eitt vakurt navn, tað er eisini eitt tað vakrasta staðið í Vestmanna Kommunu.” – Hannis

Meirilutin í Vestmanna Bygdarráðið metti, at hetta var eitt hóskandi navn til eitt mentanarhøli, sum eisini er ætlað borgarum í Vestmanna at leiga til ymisk tiltøk, skrivar heimasíðan hjá Vestmanna kommunu. 

Greinin varð fyrstu ferð løgd út 05. apríl 2022

Byggja heilsumiðstøð í gamla FK-bygninginum

Fuglafjarðar kommuna hevur skrivað sáttmála við Heildarverk

Dávur Juul, borgarstjóri, og Tórfinn Nón frá byggifyritøkuni Heildarverk skrivaðu undir sáttmála í dag (Mynd: Fuglafjarðar kommuna)

SkrivaÐ:

Ingi Samuelsen

Meðan byggingin av nýggja snotiliga skúlanum í Fuglafirði er farin fram, hevur stórur partur av næmingunum í Fuglafjarðar skúla havt skúlastovur í reyða bygningin longur ‘norðuri’ í bygdini, sum Føroya Keypsamtøka bygdi í síni tíð.

Nú nýggi skúlin er liðugur, stendur gamli FK-bygningurin, sum kommunan hevur yvirtikið, tómur, men tað verður ikki leingi.

Avgjørt er at innrætta nýggja læknaviðtalu, heilsumiðstøð, í bygninginum.

Fuglafjarðar kommuna skrivar á Facebookvanga sínum, at sáttmáli hósdagin varð undirskrivaður við felagið Heildarverk, sum verður heildarveitari av arbeiðinum at umbyggja og innrætta heilsumiðstøðina í gamla FK-bygninginum

Nú verður hesin bygningurin innrættaður til heilsumiðstøð (Mynd: Google)

Greinin varð fyrstu ferð løgd út 07. apríl 2022

Dugni letur upp sølubúð í býnum

Sølubúðin í hølunum hjá LBF á gongugøtuni í Havn lat upp mánadagin

(Mynd: Dugni)

SkrivaÐ:

Alda Nielsdóttir

Mánadagin 4. apríl lat nýggj sølubúð hjá Dugna upp í hølunum hjá LBF á gongugøtuni í Havn.

Sambært Dugna er tað eina sølubúð við serstøkum lutum – tað er serliga ný- og endurnýtsla, ið setur sín dám á sølubúðina.

– Í vindeygunum sært tú serstakar lampur og stakar í ymiskum skapi og hondgjørd kertuljós samansett við serstøkum brúkslutum. Fuglahús, skamlar og hillar evnað úr plattum standa runt um í hølinum saman við eldri og nýumvældum stólum. Ein rúgva av tógvrestum og bindiútgerð er samlað til høvið, sum skapar hugna í hølinum saman við flættaðu urtapotta-upphangunum.

– Okkurt er tilevnað á verkstøðunum hjá okkum í Suðuroy, okkurt á Kambsdali og ein stórur partur kemur frá Tinghúsinum og verkstøðunum á Hjalla. Tað eru næmingar og arbeiðsfólk á Dugna, sum standa aftanfyri nýggju sølubúðina.

– Dugni stendur við eitt vegamót. LBF hevur rætt út hondina til samstarv, og Dugni kann tí byrja nýtt virksemi við spennandi samstarvsmøguleikum fyri framman. Uppgávan hjá Dugna verður at passa móttøkuna fyri LBF, at taka ímóti vitjandi á LBF og samstundis at hava opið í sølubúðini gerandisdagar kl. 10 – 15, skrivar Dugni.

Greinin varð fyrstu ferð løgd út 02. apríl 2022

Borgarstjórin er farin í barnsburðarfarloyvi

Magnus Skoralíð røkir borgarstjórasessin í Eysturkommunu, til Per Martin Gregersen er aftur

Magnus Skoralíð er fyribils borgarstjóri í Eysturkommunu (Mynd: Eysturkommuna)

SkrivaÐ:

Agnar Prestá

- Í samband við at Per Martin Gregersen, borgarstjóri, gjørdist pápi síðsta sunnudag, er hann í barnsburðarfarloyvi í nakrar vikur. Hesa tíðina er Magnus Skoralíð virkandi borgarstjóri í Eysturkommunu.

Soleiðis skrivar Eysturkommuna á heimasíðuni.

Per Martin Gregersen gjørdist borgarstjóri í kommununi, eftir at hann var fyrstvaldur á Borgaralistanum við kommunuvalið í 2020. 

Magnus Skoralíð var næstvaldur á listanum - og samanlagt - og skal nú fyribils røkja sessin.

Greinin varð fyrstu ferð løgd út 05. apríl 2022

Fríðka um á Tvøroyri

Miðbýurin á Tvøroyri gerst grønari og í vikuni vórðu trø sett niður á parkeringsøkinum millum Strandferðsluna og BetriBanka

(Mynd: Tvøroyrar kommuna)

SkrivaÐ:

Sverri Egholm

Fríðkanin av miðbýnum á Tvøroyri heldur fram, og í vikuni vórðu trø sett niður á p-økinum millum Strandfaraskip Landsins og Betri Banka. 

Tað skrivar Tvøroyrar kommuna á heimasíðuni.

- Trøini eru av slagnum bornholmskt boyniberjatræ og eru keypt úr Hollandi. Trøini eru fimm metrar høg og snøgt sær tað út, nú tey eru sett niður. Vónin er at trøini koma at trívast, so vit innan stutta tíð síggja grønar spírar á greinunum, skrivar kommunan.

Miðskeiðis í býnum, á p-økinum millum Bónus og Býarsavnið, eru vakrir plantupottar settir upp. Ymiskar plantur eru plantaðar í teir, ið blóma ymiskar tíðir av árinum.

Á trøðni við gomlu roykstovuna hjá T.F. Thomsen er eisini nógv arbeiði í gongd. Trøðin verður gjørd til grønt øki við beinkjum, borðum og parkour-øki til ungdómin.

Í næstum verður farið undir at gera eina gøtu gjøgnum trøðna. Gamli hjallurin á trøðni, verður eisini tikin niður komandi tíðina. Trøini eru av fleiri ymiskum sløgum: Japanskt royniberjatræ, fuglakirsiberjatræ, sírenutræ, navr (ahornsslag), kirsuberjablomma, berjamispil og tyrnirunnur. 

Greinin varð fyrstu ferð løgd út 06. apríl 2022

Sáttmáli gjørdur um viðarlund og trivnaðarøki á Argjum

Sáttmáli millum Urtagarðstænastuna og Tórshavnar kommunu varð undirskrivaður hósdagin, og ætlanin er, at arbeiðið er liðugt 1. desember

(Mynd: Tórshavnar kommuna)

SkrivaÐ:

Alda Nielsdóttir

Seinnapartin hósdagin varð sáttmáli undirskrivaður við Urtagarðstænastuna um at gera ætlaðu viðarlundina og trivnaðarøkið á Argjum, sum Tórshavnar býráð samtykti í sambandi við risastóru útstykkingarnar á Argjahamri.

Býráðið samtykti í fjørsummar at søkja Búnaðarstovuna um keyp av lendi til útstykking umframt viðarlund á Argjum.

Talan er um at gera upp til 200 nýggjar bústaðareindir omanfyri Argjahamar við Glyvursvegin. Tað verður tætt og blandað byggjarí við rað- og randarhúsum og møguliga einstøkum sethúsum, skrivar Tórshavnar kommuna.

Heimari endin á Glyvursvegnum omanfyri Argjahamar móti rundkoyringini verður fluttur burturfrá havagørðunum og nakað niðaneftir. Samstundis verður gjørd ein viðarlund niðanfyri Argjahamar og heimeftir undir Glyvursvegnum.

Ein ætlan er gjørd fyri komandi viðarlundina og trivnaðarøkið, soleiðis at tað verður væl skipað við trøum, plantum, lendisgøtum, uppihaldsøkjum vm.

Ætlanin fyri viðarlundina og trivnaðarøkið á Argjum varð boðin út til veitarar innan lendisarkitektur. Fýra veitarar lótu inn tilboð, og eftir samráðingar fall valið á Urtagarðstænastuna.

Hósdagin varð so sáttmáli undirskrivaður við Urtagarðstænastuna, sum fer í gongd við arbeiðið beinanvegin. Ætlanin er at arbeiðið er liðugt 1. desember í ár.

Greinin varð fyrstu ferð løgd út 08. apríl 2022

Leggja nú fipur í Streymnesi

Øll húsarhald í kommununi skulu hava hetta, og í løtuni er tað í Streymnesi og á Streymnesvegnum, at arbeitt verður. Hetta kann tarna ferðsluni nakað, skrivar sunda.fo

Mynd: Pól Sundskarð

SkrivaÐ:

Agnar Prestá

Í Sunda kommunu er ein verkætlan í gongd, sum snýr seg um, at í hvørt húsarhald í kommununi skal hava fipurnet.

Arbeitt verður í løtuni við at leggja hetta inn, og nú er tað Streymnes, ið eigur tørn. 

Greinin varð fyrstu ferð løgd út 06. apríl 2022

Gunnhild Persson nýggjur aðalskrivari í Sinnisbata

27 ára gamla Gunnhild er útbúgvin innan politikk og umsiting – hon tók við starvinum 1. apríl eftir Lauru Apol, sum hevur røkt starvið seinastu fimm árini

Gunnhild Persson tók við starvinum 1. apríl (Mynd: Sinnisbati)

SkrivaÐ:

Alda Nielsdóttir

Gunnhild Persson er sett í starv sum aðalskrivari í Sinnisbata.

Gunnhild Persson er 27 ára gomul, býr í Havn og er útbúgvin innan politikk og umsiting. Hon hevur gott innlit í føroyskar áhugafelagsskapir og hevur fleiri ára royndir í nevndararbeiði. Hon hevur eitt breitt innlit í føroysk samfelagsviðurskifti og politisku skipanina, skrivar Sinnisbati í tíðindaskrivi.

Gunnhild fer sum aðalskrivari í Sinnisbata at hava ábyrgd av dagligu umsitingini og samskipan av størri verkætlanum og tiltøkum, umframt átøkum og kunningararbeiði. Harafturat fer hon at arbeiða við limarøkt og fundraising.

Gunnhild tók við starvinum sum aðalskrivari 1. apríl eftir Lauru Apol, sum takkaði fyri seg í mars eftir fimm ár í starvinum.

Átta umsóknir komu inn til starvið sum aðalskrivari í Sinnisbata.

Greinin varð fyrstu ferð løgd út 04. apríl 2022

Bilsin Tina fekk rimmar móttøku í Havn í dag

TV2 kom til Føroya við Tinu at gera upptøkur til X Factor finaluna. Skipað varð fyri stórslignari móttøku í City Church, har borgarstjórin tók ímóti

(Mynd: Tórshavnar kommuna)

SkrivaÐ:

Sverri Egholm

Tina og Kári komu víðari til finaluna í X Factor. Og sunnudagin kom TV2 við Tinu til Føroya at gera nakrar upptøkur í sambandi við finaluna.

Tað, ið Tina ikki visti var, at skipað var fyri stórslignari móttøku í City Church, har borgarstjórin tók ímóti henni. Ein bilsin Tina kom inn í salin, har Heðin Mortensen, borgarstjóri, segði nøkur fá orð um tann tónlistarliga og mentanarliga týdning, hennara familja í fleiri ættarlið hevur havt fyri Havnina, nógv av tí sprottið úr Evangelliihúsinum, sum í dag eitur City Church.

Borgarstjórin segði stutt, at øll Havnin og allar Føroyar fylgja við og stuðla uppundir finaluna og ynskti Tinu tillukku við finaluplássinum.

Greinin varð fyrstu ferð løgd út 03. apríl 2022

KvF hevur góð hyggjaratøl

Væl oman fyri 50 prosent hyggja at Degi og Viku um kvøldarnar. Regluliga ítróttasendingin 3-2 er eisini væl umtókt

(Savnsmynd: Jens Kr. Vang)

SkrivaÐ:

Tíðindaskriv

Nýggjastu hyggjarakanningarnar vísa, at hyggjaratølini hjá KvF eru góð. 57,6 prosent hugdu at Degi og Viku mánakvøldið 7. mars, og talið váttar gongdina seinastu mánaðirnar, sigur kringvarpsstjórin.

– Tað vísir seg, at fólk í ringum tíðum – antin tí kríggj, umfarssótt ella okkurt annað ger um seg – leita til public service-rásirnar, tí har vænta tey at fáa álítandi tíðindi. Hetta síggja vit eisini aðrastaðni, sigur Ivan Hentze Niclasen.

Hann leggur afturat, at tølini eru vorðin alsamt betri, síðani Kringvarpið broytti konseptið fyri Dag og Viku fyri fáum árum síðani.

Kringvarpið hevur fingið tølini fyri, hvussu nógv hyggja at ávísum sendingum.

Fríggjakvøldið 25. mars hugdu 55,2 prosent at Degi og Viku. Tølini fyri Dag og Viku liggja væl oman fyri líknandi tøl fyri tíðindasendingar í okkara grannalondum.

Stuðulskonsertin fyri Ukraina fekk góða undirøku
Stóra stuðulskonsertin til frama fyri Ukraina sunnukvøldið 27. mars gav Reyða Krossi 8,3 milliónir krónur at brúka til tey neyðstøddu. Eisini her vóru hyggjaratølini góð. Út við helmingurin – 48 prosent – hugdu eftir konsertini, sum var send úr Lívdini í Hoyvík.

Landsdysturin móti Gibraltar 26. mars savnaði 26,4 prosent framman fyri sjónvarpsskíggjan. Vanliga eru hyggjaratølini fyri landsliðið væl hægri, men mótstøðuliðið og tað, at dysturin var spældur leygardag kl. 17 hava helst gjørt mun, heldur kringvarpsstjórin.

Hann leggur afturat, at hyggjaratølini fyri ítrótt sum oftast eru góð. Eitt nú hyggja yvir 30 prosent eftir 3-2 sendingunum mánakvøld.

Tað er Spyr.fo, sum hevur gjørt hyggjarakanningarnar.

Greinin varð fyrstu ferð løgd út 04. apríl 2022

Glitrandi gimsteinar í Müllers Pakkhúsi

Forkunnuga framsýningin hjá Tórshavnar Kvøldskúla húsaðist fyri fyrstu ferð í tí søguliga og vakra umhvørvinum í Müllers Pakkhúsi

Frá framsýningini hjá Tórshavnar Kvøldskúla í Müllers Pakkhúsi (Myndir Jan Müller)

SkrivaÐ:

Jan Müller

Seinasta vikuskiftið hevði Tórshavnar kvøldskúli sína árligu næmingaframsýning, hesaferð í Müllers Pakkhúsið. Jan Müller skrivaði hesa reportaguna frá síni vitjan á framsýningini:

Dámar tær alskyns litir og fjølbroytt føroyskt handverk alt í einum, so er at skunda sær. Tí framúr flotta framsýningin hjá Kvøldskúlanum í Havn letur aftur í dag kl. 18. Har síggja vit úrslitið av arbeiðinum hjá teimum mongu, sum hava gingið í kvøldskúla hetta seinasta árið. 

At standa uttan fyri henda gimsteinin av einum húsum og so brádliga støkka innar og har verða opinberaður við teimum mongu fjølbroyttu lutunum í alskyns litum á framýningini, er nakað heilt serligt.

Tórshavnar Kvøldskúli má sigast at hava rakt í plett, tá hann fekk allar tær tríggjar hæddirnar í pakkhúsinum at sýna fram alt frá føroyskum klæum til málningar og vovin teppi av alskyns slag.

Áður hava framsýningarnar verið á Eysturskúlanum, og alt gott um tað. Men í hesum sera snotuligu og forkunnugu hølunum koma tey mongu handarbeiðini veruliga til sín rætt. Her er ljóst og sera gott pláss.

Umframt gleðina at síggja mongu lutirnar er tað eisini ein sonn uppliving og kensla bara tað at vera staddur í væl varðveittu og vælhildnu húsunum frá 1890-unum - eini hús, sum siga frá eini merkisverdari søgu og fólki kring hana, ið bert fáum plássum er beskorið. 

Jógvan Sørin Hansen, stjóri í Tórshavnar Kvøldskúla her saman við Óla Jacobsen, rithøvunda 

Í hesum sambandi helt rithøvundin Óli Jacobsen fyrilestur fríggjadagin, har hann greiddi frá húsunum og søgu tess, og her eisini um Müllers familjuna, ið var upprunin til pakkhúsið. Leygardagin vóru tónleikaframførslur í húsinum. 

At eiga slíkan bygning eigur høvuðsstaðurin at vera errin av. Henda fyrsta væleydnaða royndin at lata dyrnar upp fyri Kvøldskúlanum eigur at geva okkara avvarandi myndugleikum íblástur til at seta út í kortið, hvussu hesi húsini kunnu verða brúkt enn meira í framtíðini. 

Greinin varð fyrstu ferð løgd út 02. apríl 2022

Gandafloytan – ein barnaopera

Spennandi verkætlan í gongd á Tjóðpalli Føroya

(Mynd: FaroePhoto / Opera.fo)

SkrivaÐ:

Tíðindaskriv

Hesar dagar er ein spennandi verkætlan í gongd á Tjóðpalli Føroya. Talan er um “Gandafloytuna” eftir Mozart, sum er umskrivað til eina føroyska barnaoperu. Hetta er ein samstarvsverkætlan millum Tórshavnar Kvøldskúla, Tjóðpall Føroya og Opera.fo.

Gandafloytan snýr seg um unga prinsin Tamino, sum er vilstur í einum fremmandum landi. Her hittir hann fuglafangaran Papageno, sum skal hjálpa honum at bjarga dóttur Náttardrotningina, Paminu.

Operan, sum annars er hálvan triðja tíma til longdar, er í hesi útgávuni skorin niður í ein tíma, við einum frásøgufólk, tveimum operasangarum og fjúrtan ungum áhugaleikarum í aldrinum 8-12 ár.

Leikararnir eru næmingar í sjónleikarbólkinum hjá Tórshavnar Kvøldskúla, og tey bæði spæla sjónleik, spæla á ljóðføri, dansa og syngja. 

Operasangararnir eru amerikanski Douglas Yates og Birita Adela Davidsen, sum eisini eigur hugskot og handrit. Frásøgufólk er Annfinnur Heinesen, og Jóhannes Andreasen er konsertmeistari, og hevur klaverfylgispælið til sýningarnar. 

Gandafloytan hevur nógvan vakran, kendan tónleik, og eru útvald brot úr hesum við í sýningini. Náttardrotningin syngur m.a. kendu ariuna “Der Hölle Rache” og høvuðspresturin í Vísdómstemplinum, Sarastro syngur “O Isis und Osiris”.  Hesar báðar ariurnar verða sungnar á týskum, meðan frásagnir, replikkir og allir aðrir sangir eru á føroyskum. 

Tvær sýningar hava verið í vikuni. Triðja sýningin er í dag kl. 16. 

Myndir: FaroePhoto / Opera.fo

Greinin varð fyrstu ferð løgd út 07. apríl 2022

Beatles-kvøld við Brouci Band og Deiggj

Ein av bestu Beatles Tribute-bólkunum vitjar í Føroyum á øðrum sinni

Brouchi Band

SkrivaÐ:

Tíðindaskriv

Í sambandi við, at ein av bestu Beatles-fagnaðarbólkunum aftur vitja í Føroyum, verður dansur í Dansifrøi í Havn í kvøld við Beatles tónleiki, og eisini fara Deiggj at spæla góðan 70’ára tónleik.

Brouci Band – The Beatles Tribute er ein sera vælumtóktur bólkur og eru nógv eftirspurdir. Orsøkin til henda stóra popularitetin er fyrst og fremst, teir spæla og syngja sera væl og teir leggja dent á, at gera eitt show har teir lýsa ymisk tíðarskeið hjá Beatlunum. Á skránni eru øll tey kendu hittini, m.a. “A hard days night”, “I feel fine”, “Michelle”, “Yesterday”, “All my loving”, “With a little help from my friend”, “Help”, “Hey jude” o.s.fr.

Áhugin er, eins og í 2019, sera stórur fyri Beatles kvøldinum og fólk møta tíðliga.

Brouci Band leggja dent á at skapa røttu Beatles ljóðmyndina við at nýta somu ljóðføri sum Beatlarnir nýttu, eitt nú Höfner violinbassin, gráa Ludvig trummusettið, sum kemur úr Klaksvík, Rickenbacker guitarar og eyðkendu VOX forsterkararnar. Hartil hava teir fingið seymað eyðkendu Beatles búnarnar og skifta klæðir so tey passa til tey ymsu tíðarskeiðini hjá beatlunum.

Deiggj

Deiggj, sum enn halda sín 40 ára føðingardag, hava seinastu seinastu tíðina verið í upptøkuhølunum og arbeitt við einari nýggjari LP, sum kemur at eita “Tíð”. Tvey av løgunum koma í næstum út sum stakløg.

Deiggj eru seinastu árini vorðnir kendir fyri at spæla nógvan 70’ara tónleik, og tí fara sjálvandi at spæla nøkur løg frá hesum tíðarskeiðnum, men høvuðstemaið fyri kvøldið er Beatles, sum Brouci Band stendur fyri og eru meistarar til at framføru.

Greinin varð fyrstu ferð løgd út 05. apríl 2022

Føroyskir filmar í London

Heili seks ymiskir føroyskir filmar hava hesa vikuna verið sýndir fyri fyrstu ferð í London

"Trøllabeiggi" eftir Gudmund Helmsdal er ein av filmunum, sum verður vístur í London (Savnsmynd)

SkrivaÐ:

Tíðindaskriv

Nógv er í løtuni á skránni innan føroyska filmsøkið, eisini í Bretlandi í hesum døgum.

Heili seks ymiskir føroyskir filmar hava í døgunum 2.-9. apríl verið sýndir fyri fyrstu ferð í London. Filmarnir eru vístir á tveimum ymiskum festivalum, ið hava sum felags mál at seta fokus á norðurlond og norðurlendska mentan.

"Trøllabeiggi" og "Skál" vórðu vístir á South Social Film Festival 2 apríl á Riverside Studios í Hammersmith. Við til sýningarnar var Gudmund Helmsdal, ið hevur gjørt filmin "Trøllabeiggi", umframt Dania O. Tausen og Trygvi Danielsen, sum eru høvuðspersónirnir í filminum "Skál". Dania og Trygvi framførdu eisini til tiltakið.

Filmshúsið hevur stuðlað luttøku teirra í London, og Sendstova Føroya er við til at stuðla samskipan av tiltakinum.

Hetta vikuskiftið verða "111 góðir dagar", "Sum einglar vit falla", "Julian’s Ladder" og tveir partar av nýggju sjónvarpssendingini, "Seks spurningar um at vera menniskja", vístir á Nordic Exposure Festival hjá Jackson’s Lane í Highgate.

Marita Dalsgaard, sjónleikari og leiklistaframleiðari, hevur valt filmarnar til skránna, og verður sjálv við at presentera teir. Føroysku filmskvøldini á Jackson’s Lane eru føroyska íkastið til Nordic Exposure festivalin, ið varir frá mars til mai við fjølbroyttari skrá, ið eisini fevnir um sjónleik, sirkus og annað.

Festivalurin hevur fingið stuðul úr Norðurlanda Ráðharraráðnum (Nordisk Kultur Kontakt). Sendstova Føroya er eisini við til at stuðla festivalinum.

Tíðindaskriv frá Uttanríkis- og mentamálaráðnum

Greinin varð fyrstu ferð løgd út 02. apríl 2022

Janus Wiberg hitar upp fyri James Arthur í summar

Havnarmaðurin fer í summar at hita upp fyri heimsstjørnuna, sum fer at framføra á Nordstrand

 

SkrivaÐ:

Sverri Egholm

Janus Wiberg fer í summar at hava sína størstu framførslu higartil. Tað verður tá hann á Nordstrand festival tann 21. juli fer at hita upp fyri heimsstjørnuna James Arthur.

Stóra hittið hjá James Arthur er “Say You Won’t Let Go”, sum hevur næstan tvær milliardir avspælingar á Spotify.

- Eg gleði meg øgiliga nógv. 30.000 atgongumerkir verða nú sett til sølu, so tað er fyri ikki at siga for nógv, at hetta er tað størsta eg havi roynt, sigur Janus Wiberg, sum í næstum kemur út við nýggjum sangum.

- Tað hevur verði sera hart hesa corona tíð, men nú sær tað øgiliga spennandi út. Eg elski at gera musik og dreymurin er at fólkini eisini fara at dáma tað eg geri.

Tað eru nøkur ár síðani, at vit á fyrsta sinni hoyrdu um Janus Wiberg. Í 2017 hittaði hann við løgunum “Mítt vakra Føroya land” og “Liva her og nú”. 

Janus Wiberg hevur seinastu trý árini arbeitt saman við framleiðaranum Søren Balsner, sum eisini er kendur frá Carpark North. 

Greinin varð fyrstu ferð løgd út 03. apríl 2022

Tatt Fest verður í Norðurlandahúsinum í ár

Tattoveringsráðstevnan verður ein sorgblíð fagnaðarveitsla til minnis um stigtakaran Fjølnir Geir Bragason, sum doyði í vetur

 

SkrivaÐ:

Tíðindaskriv

Eftir tvey koronarakt ár við nógvum tilmælum og avmarkingum, verður nú aftur skipað fyri Føroya Tatt Fest! – har møguleiki eisini verður at koma og prika seg!

Føroya Tatt Fest er einasta føroyska tattoverings ráðstevna, ið er serstøk við sínum festivalkenda dámi. Ársins Tatt Fest verður hildið í Norðurlandahúsinum í døgunum 20. til 22. mai.

Til tiltakið koma 23 tattoveringslistafólk, sum kunnu teljast millum heimsins bestu innan sítt yrki. Meginparturin av hesum listafólkunum koma uttanlands frá, og tjóðskapir teirra eru sera fjølbroyttir.

Aftur at tattovørunum verður eisini annað at uppliva. Á skránni er m.a. ein stuðulskonsert, myndlistaframsýning, fyrilestrar, handan av virðislønum til tattovørar fyri framúr avrik, og at enda frumframsýning av einum dokumentarfilmi.

Í desember 2021 andaðist stigtakarin og stovnarin av felagnum og FO Tatt Fest, íslendingurin Fjølnir Geir Bragason, betri kendur sum Fjølnir Tattoo. Ársins tatt fest verður av tí sama sera merkt av at hesin megnar maður ikki er í millum okkum longur.

Fjølnir tók stig til FO Tatt Fest saman við Palla Sch. Thorsteinsson í 2011. Í ár fyllir Tatt Fest eisini 10 ár.

- Ársins Tatt Fest verður sostatt ein sorgarblíð fagnaðarveitsla. Vit ynskja at hátíðarhalda Fjølnir og alt tað, sum hann var fyri tattoo heimin, umframt at hátíðarhalda 10 ár av Tatt Fest í Føroyum, siga fyrireikararnir.

Burtur úr umfatandi skránni kann nevnast, at fríggjadagin 20. mai kl. 17 heldur Maya Sialuk fyrilestur um inuit tattoveringar og tilhoyrandi siðaarv. Leygardagin verður fyrilestur um sjómannatattoveringar. Um kvøldið verður stuðulskonsert til frama fyri avvarandi hjá Fjølni.

Sunnudagin endar ein uppboðssøla av málningum hjá Livari Nysted, har peningurin fer óskerdur til Sinnisbata.

Afturat skránni er myndlistaframsýning í dansistovuni, og spontan innsløg kunnu eisini væntast.

Greinin varð fyrstu ferð løgd út 05. apríl 2022

Tríggjar Grammy-virðislønir til Foo Fighters

Foo Fighters áttu bestu rockútgávuna, bestu rockframførsluna og besta rocksangin

Her framføra Foo Fighters á festivali í Stórabretlandi (Mynd: EPA)

SkrivaÐ:

Alda Nielsdóttir

Mánanáttina okkara tíð vann amerikanski rockbólkurin Foo Fighters tríggjar Grammy-virðislønir.

Talan var um virðislønina fyri besta rockútgávu fyri útgávuna "Medicine at Midnight", besta rockframførslu fyri "Making a Fire" og besta rocksang, sum var "Waiting on a War".

Góða viku frammanundan andaðist trummusláarin í bólkinum, 50 ára gamli Taylor Hawkins. Hann varð funnin deyður á hotelkamari sínum í Bogotá í Kolumbia, har bólkurin skuldi framføra sama dagin á lokala festivalinum Estéreo Picnic.

Kanningar hjá rættarlæknum hava funnið fleiri rúsevni og heilivág í kroppinum hjá honum, harímillum marijuana og heilivág fyri tunglyndi. Tað er ógreitt, um hesi evni eru orsøk til, at hann doyði.

Í kjalarvørrinum á hesum avlýsti Foo Fighters allar tær konsertirnar, sum bólkurin skuldi spæla í USA og Evropa í ár.

Foo Fighters varð stovnað í 1994, og síðan 1997 hevur Taylor Hawkins verið trummusláari. Eingin av núverandi limunum í bólkinum møttu upp til Grammy-handanina, skrivar Ritzau.

Greinin varð fyrstu ferð løgd út 04. apríl 2022

Will Smith farin úr Oscar akademinum

Eftir tað, sum fór fram undir Oscar-handanini undanfarna vikuskifti, hevur hann sjálvur tikið avgerð um at fara frá, sigur hann

Will gav skemtaranum Chris Rock ein lúsing á pallinum (Mynd: EPA)

SkrivaÐ:

Alda Nielsdóttir

Will Smith er farin úr Oscar-akademinum.

Hann upplýsir fyri amerikanska miðlinum Variety, at hann sjálvur hevur tikið avgerð um at fara frá, eftir hann gav skemtaranum Chris Rock ein lúsing á pallinum undir Oscar-handanini síðsta vikuskifti.

Orsøkin var, at Chris Rock skemtaði við konu Will Smith, Jada Pinkett Smith.

53 ára gamli Will Smith sigur sjálvur, at gerð hansara var ófyrigevilig, og ætlar hann at góðtaka ta revsing, hann fær frá Oscar akademinum.

Í Oscar akademinum sita fólk úr filmsvinnuni. Mann kann m.a. gerast limur, um mann hevur verið í uppskoti til ein Oscar. Tað er eisini Oscar akademiið, sum avger, hvør skal tilnevnast ein Oscar.

Málið um Will Smith verður í løtuni kannað, og hevur tað verið nevnt, at hann møguliga kundi verið blakaður úr akademinum. Um Will Smith kann enda við at missa ta virðislønina, hann vann undanfarna vikuskifti, verður ikki upplýst, skrivar Ritzau.

Eitt av framleiðslufólkunum frá Oscar-handanini hevur seinni upplýst, at løgreglan var til reiðar at handtaka Will Smith og skuldseta hann fyri harðskap, men tað vildi Chris Rock ikki.

Oscar akademiið hevur eisini upplýst, at fyriskiparar heittu á Will Smith um at fara av staðnum, men at hann noktaði. Hetta hava aðrar keldur tó víst aftur.

Greinin varð fyrstu ferð løgd út 02. apríl 2022

Nýggjur Netflix-filmur við Will Smith má bíða

Áðrenn Oscar-handanina skuldi Netflix longu leita eftir nýggjum leikstjóra til filmin "Fast and Loose", men nú tykist ógreitt, um filmurin yvirhøvur verður til nakað

Will Smith helt takkarrøðu eftir at hava vunnið ein Oscar fyri "besti sjónleikari" í filminum "King Richard" (Mynd: EPA)

SkrivaÐ:

Alda Nielsdóttir

Í kjalarvørrinum á Oscar-handanini undanfarna vikuskifti, har sjónleikarin Will Smith gav skemtaranum Chris Rock ein lúsing á pallinum, hevur Netflix sett ein nýggjan film við Will Smith í høvuðsleiklutinum til viks.

Filmurin, "Fast and Loose" snýr seg um ein brotsmann, sum eftir at verða álopin gloymir, hvør hann er.

Í farnu viku fór leikstjórin, David Leitch eisini frá verkætlanini fyri at arbeiða við einum øðrum filmi hjá Universal, og tað er nú ógreitt, um Netflix fer at royna at gera "Fast and Loose" við nýggjum leikstjóra og høvuðsleikara, skrivar Hollywood Reporter.

Will Smith spælir við í thrillerfilminum hjá Apple TV+, "Emancipation", sum eftir ætlan skuldi koma út í ár. Eisini skuldi hann spæla við í "Bad Boys 4" hjá Sony Pictures, sum sambært keldu hjá Hollywood Reporter, nú eisini er settur til viks.

Greinin varð fyrstu ferð løgd út 03. apríl 2022

Nýggj samgonga skipað í Grønlandi

Naleraq er ikki longur í samgongu við IA, sum nú hevur skipað samgongu við Siumut

Múte B. Egede, landsstýrisformaðurin í Grønlandi sigur, at IA og Naleraq vóru farin ov langt burtur frá hvørjum øðrum politiskt (Savnsmynd)

SkrivaÐ:

Alda Nielsdóttir

Naleraq er ikki longur partur av grønlendsku landsstýrissamgonguni. Inuit Ataqatigiit við landsstýrisformanninum Múte B. Egede á odda, hevur skipað nýggja samgongu við Siumut í staðin.

Á tíðindafundi mánadagin løgdu samgonguflokkarnir fram nýggja samgonguavtalu.

IA og Naleraq fóru longur og longur burtur frá hvørjumøðrum reint politiskt, segði Múte B. Egede, sum takkaði Naleraq fyri samstarvið.

Nýggja samgongan hevur nú greiðan meiriluta í grønlendska landstinginum, Inatsisartut. Tilsamans hava IA og Siumut 22 av 31 sessum í tinginum.

Nýggja samgonguavtalan hevur fingið heitið "Fyri landið og fólkið", og inniber hon m.a., at arbeiðast skal fyri meira frælsi til fólkið, færri arbeiðsleys og betri kor fyri pensjónistar. Ein ferðavinnulóg skal gerast, og arbeiðið fram móti sjálvsræði heldur fram, skrivar Sermitsiaq.

Greinin varð fyrstu ferð løgd út 04. apríl 2022

Ræðuligar myndir úr Butja prógva, at Russland fremur krígsbrotsverk

Linligi forstaðurin til Kyiv, Butja, er vorðin ímyndin av ukrainsku mótstøðuni, men eisini av ræðuleikunum frá krígnum

(Mynd: EPA)

SkrivaÐ:

Ingi Samuelsen

Ukrainska uttanríkisráðið ákærir nú Russland fyri at hava avrættað sivilfólk í býnum Butja.

Deyðir mannakroppir liggja spjaddir í gøtunum í býnum, sum liggur nakrar og tjúgu kilometrar frá høvuðsstaðnum, Kiev.

AFP tíðindastovan hevur verið í býnum, og skrivar, at lík í sivilum klæðum liggja í gøtunum eftir at russisku herdeildirnar í skundi eru rýmdar úr býnum.

Fólkini eru nakkaskotin, sigur Anatolij Fedoruk, borgarstjóri í Butja, sambært AFP.

280 fólk eru grivin í hópgravir, sambært borgarstjóranum. Eisini boðar hann frá, at heilar familjur eru dripin í bilum sínum.

Áðrenn russisku innrásina var Butja ein linligur lítil forstaður til Kyiv. Nú er býurin og grannabýurin Irpin ímyndin av ukreinsku sjálvverjuni, sum forðaði russum í at kringseta høuðsstaðin, Kyiv.

Býurin er stórt sagt lagdur í oyði av krígnum, skrivar AFP. Spreingingar hava oyðilagt stórar bygningar og handlar, matstovur og heim eru brend niður. Einans skundmatstovan McDonald’s tykist ikki at hava fingið skaða, skrivar AFP.

Í gøtunum sóust lík, og serliga í einari gøtu tykjast líkini at liggja í eini skipan á einum stuttum strekki.

Tey flestu í bólkum, meðan onnur eru deyð einsamøll. Eitt nú ein maður, sum er skotin á súkklu síni.

Ukrainska verjimálaráðið ákærir nú russisku herdeildirnar fyri at hava avrættað sivilfólk í Butja.

Á Twitter sammetir verjumálaráðið hendingarnar í Butja við hendingarnar í Sebrenica í Bosnia í nítiárunum, tá 7.000 muslimskir menn og dreingir vórðu dripnir í hópdrápinum har.

Ukrainski uttanríkisráðharrin, Dmytro Kuleba, skrivar, at tey eru farin í samstarv við altjóða krígsdómstólin ICC, um at kanna drápini í Butja.

Úr Kreml verða skuldsetingarnar afturvístar sum falstíðindi.

Russiska uttanríkisráðið sigur, at upptøkurnar av líkum á gøtunum er bílagt arbeiði frá amerikanskari síðu, sum liður í eini ætlan at geva Russlandi skuldina fyri drápini.

- Tað er USA og Nato, sum eru meistarar í at provokera, sigur Maria Zakharova, talskvinna, í eini samrøðu við russiska statssjónvarpið, skrivar Reuters.

Hon undrast yvir, at vestanlond sótu klár at gera viðmerkingar við ræðuligu myndirnar frá Butja.

Sambært The Guardian er Russland ikki komin við prógvum fyri sínum uppáhaldum.

Greinin varð fyrstu ferð løgd út 04. apríl 2022

Ketanji Brown Jackson góðkend sum nýggjur dómari í hægstarættinum

Ketanji Brown Jackson, sum verður 116. hægstarættardómarin í USA og fyrsta afroamerikanska kvinnan í hægstarættinum, tekur við eftir Stephen Breyer, sum í summar fer frá vegna aldur

51 ára gamla Ketanji Brown Jackson varð hósdagin formliga góðkend sum 116. hægstarættardómarin í USA (Mynd: EPA)

SkrivaÐ:

Alda Nielsdóttir

Hósdagin varð 51 ára gamla Ketanji Brown Jackson formliga vald til hægstarættardómara, tá ein meiriluti í amerikanska Senatinum atkvøddi fyri valevninum hjá Joe Biden forseta.

Sambært Ritzau er talan um eina søguliga hending. Kentaji Brown Jackson, sum verður 116. hægstarættardómarin í amerikanska hægstarættinum er eisini fyrsta afroamerikanska kvinnan, sum verður vald í hægstarættin.

Í Senatinum hava bæði demokratar og republikanarar 50 umboð í part, og tríggir republikanskir senatorar atkvøddu fyri saman við demokratunum.

Her síggjast amerikanski forsetin, Joe Biden og Ketanji Brown Jackson, sum saman hugdu eftir atkvøðugreiðsluni (Mynd: EPA)

Ketanji Brown Jackson tekur við eftir Stephen Breyer, sum síðst í juni fer frá vegna aldur.

Stephen Breyer er, eins og Ketanji Brown Jackson, liberalur, og kemur hetta sostatt ikki at ávirka býtið millum liberalar og konservativar dómarar í hægstarættinum. Í løtuni eru seks av níggju dómarum konservativir.

Síðan 2021 hevur Ketanji Brown Jackson verið dómari í einum kærudómstóli í D.C. Áðrenn hetta var hon umdømisdómari í átta ár. Eisini hevur hon arbeitt fyri Stephen Breyer, sum hon fer at avloysa í summar.

Ein dómari í amerikanska hægstarættinum kann sita fyri lívið, ella inntil hann velur at leggja frá sær.

Greinin varð fyrstu ferð løgd út 08. apríl 2022