Stakk telefonina niður í veitina og fann lambið

Neyðars tveir daga gamla veðurlambið var fallið í tann vissa deyða í gjárkvøldið

 

SkrivaÐ:

Ingi Samuelsen

Telefonin kann vera hent at hava við hondina. Serliga fototólið í telefonini.

Tað mátti Jens Rói Sørensen mánakvøldið sanna, tá hann var á trøðni hjá sær í Trongisvági fyri at hyggja eftir seyðinum, og serliga teimum nýlembdu lombunum.

Tá varnaðist hann, at eitt tveir daga gamalt veðurlamb undan eini tvílembu var burtur.

Hann leitaði alla trøðna upp og niður uttan at finna lambið aftur.

Jens Rói skrivar soleiðis á Facebook:

“Á veg oman aftur í bilin kom jeg lukkutíð í tankar um nakað, jeg havi sæð onkran gera, tá teir á haruveiðu kannað haruholur, nemliga knipsa eina mynd við telefon inn í holuna fyri at síggja inn á botn.

Á trønni eru nakrar veitir, sum renna undir jørð, og har nøkur fá hol í vøllinum eru niðurí. Hugsaði líka at gera eina seinastu roynd áðrenn myrkrið kom á.

Og mín sann um ikki í tí triða holinum jeg tók mynd niðurí, fann jeg sørinme lambið standandi fast í móru og ein heilan metur inniundir bakkanum.

Fram eftir rommum megnaði jeg við fingraspíssunum at fáa fatur á lambinum og bjargaði tí upp úr holuni og vissa deyðanum. Eftir umstøðunum hevði lambið tað gott, rann beinaveg yvir til mammuna at súgva sær stimbrandi mjólk.

So er bara at vóna at tað kemur fyri seg og klárar lambið seg til í heyst, so skal tað setast við, tað er sikkurt og vist”.

Tá Jens Rói í morgun aftur var á trøðni kundi hann staðfesta, at lambið hevði tað gott.

Í hesum holinum fann hann lambið

Veðurlambið trygt aftur hjá mammuni

Greinin varð fyrstu ferð løgd út 10. mai 2022

Forseti Íslands heiðraði 11 føroyingum við heiðursmerkjum

Talan er um "Riddarakross hinnar íslensku fálkaorðu“, og tað er fyri bjargingavrik teirra í Mykinesi, 26. september 1970, tá TF-FIL flogfarið rendi á Knúk

(Mynd: Ólavur Frederiksen)

SkrivaÐ:

Agnar Prestá

Forseti Íslands, Guðni Th. Jóhannesson vitjaði Føroyar í vikuni, og týsdagin heiðraði hann 11 føroyingum við heiðursmerkinum "Riddarakross hinnar íslensku fálkaorðu“. Hetta fyri bjargingaravrik teirra í Mykinesi, tann 26. september 1970.

Tveir mans, ið ikki kundu verða til staðar í gjár, fáa sítt heiðursmerki seinni

Tað eru nú næstan 52 ár liðin, síðani íslendska flogfarið, TF-FIL, rendi á hægsta tindin á vestastu oynni, á fjallið Knúk. Hetta var undir innflúgvingini til Vágar.

Vanlukkan kravdi átta mannalív. Ein íslendingur og sjey føroyingar doyðu í Mykinesi, og hetta er størsta vanlukka av hesum slagi í Føroyum. 26 fólk sluppu við lívinum

Skrivstovan hjá forseta Íslands boðar í kunningarskrivi frá, at trettan teirra, sum vóru tey fyrstu á staðið, eru enn á lívi og at 11 av teimum vóru við til eina hátíðarløtu týsdagin.

Har bar forsetin teimum, sum í 1970 stríddust fyri at bjarga mannalívum í sera ringum umstøðum, tøkk frá íslendsku tjóðini og handaði teimum heiðursmerki íslendsku fálkaorðu, riddarakross.

Heiðursmerkið íslendska fálkaorðan varð sett á stovn árið 1921, og er hon harvið yvir 100-ára gomul.Fálkaorðan er handað teimum, sum hava givið sítt íkast til íslendska samfelagið og íslendsku tjóðina.

Tey, ið fingu heiðursmerki í gjár:
- Aksel Niclasen, fyrrverandi sjómaður
- Annfinnur á Túvuvølli Jensen, fyrrverandi fiskavirkari
- Bjarni Hansen, bóndi
- Dánjal Danielsen, fyrrverandi maskinmeistari
- Jaspur Joensen, fyrrverandi skipsførari
- Jákup í Løðu, fyrrverandi lærari
- Johan Hendrik Olsen, fyrrverandi sjómaður
- Jóhannes Fredrik Meinhard Summaldur Joensen, fyrrverandi sjómaður
- Karl Mikkelsen, fyrrverandi sjómaður
- Katrin Dahl, fyrrverandi sjúkrarøktarfrøðingur
- Kjartan Simonsen, fyrrverandi snikkari
- Leon Heinesen, fyrrverandi vitavørður
- Reðin Leonsson, fyrrverandi løgreglumaður.

Teir sum ikki vóru við til móttøkuna og tí ikki eru við á myndini eru Aksel Niclasen og Kjartan Simonsen. Teir fáa heiðursmerkið handað seinni

Greinin varð fyrstu ferð løgd út 11. mai 2022

Nú fær H-bygningurin fult nyttuvirði

Landsstýrismaðurin við heilsumálum fegnast, nú eitt samt Løgting hevur gjørt av, at 67 milliónir krónur kunnu brúkast afturat upp á H-bygningin á Landssjúkrahúsinum, millum annað til innrætting av kjallaranum til parkering, goymslu og reingerð og innrætting av einum framkomnum goymslutorni

– Nú fegnist eg fyrst og fremst um, at øll henda stóra byggiverkætlanin verður liðug einaferð um ársskiftið, sigur landsstýrismaðurin við heilsumálum

SkrivaÐ:

Tíðindaskriv

Um átta mánaðir kann nýggi og nógv umtalaði H-bygningurin á Landssjúkrahúsinum lata upp, um løgtingslógin verður samtykt, og onki óvæntað stingur seg upp.

Tað upplýsti Kaj Leo Holm Johannesen fyri Løgtinginum, tá Løgtingið avgreiddi lógina, sum heimilar innrætting av kjallaranum í H-byginginum til parkering, goymslu og reingerð umframt goymslutorn til heilivág og skelting og vegleiðingar í øllum bygninginum.

Nú er uppskotið so einmælt samtykt við triðju viðgerð, og landsstýrismaðurin fegnast um, at útlit sostatt eru fyri, at tað skjótt verður komið á mál við stóru útbyggingini. Ein útbygging, sum er eitt stórt framstig fyri alt tað føroyska heilsuverkið, bæði tá tað snýr seg um betraðar hølisumstøður og ikki minst tøkniliga, tá tað um viðgerð og dagligt virksemi annars ræður.

Sambært lógini kann liðugtgerðin av H-bygninginum í mest lagi kosta 67 milliónir krónur. Tað hevur verið politiskur røringur um prísin, sum er øktur munandi, síðan avgerð fyri nú fleiri árum síðan varð tikin um at grava kjallaran undir nýggja bygninginum út og gagnnýta hann til millum annað parkering og goymslu.

Nú seinast kom tað óvart á politisku skipanina, eisini landsstýrismannin, at goymslutornið – ein serlig lyfta, sum gongur upp ígjøgnum allan bygningin – gerst væl dýrari enn fyrst hildið, tí neyðugt er at innrætta tornið soleiðis, at sterilar og ikki sterilar vørur kunnu haldast atskildar.

– Eg eri fegin um, at Løgtingið hevur tikið undir við uppskotinum uttan at krevja til dømis eina bíligari loysn við goymslutorninum, tí nú fáa vit eina sera framkomna skipan, sum livir upp til tann standard, sum væntast av nýbygging innan fyri Sjúkrahúsverkið bæði hjá okkum og eitt nú í Danmark. Tað harmar meg eins nógv og Løgtingið, at serliga innrættingin og eykakostnaðurin skuldi koma óvart á, og tí verður tað eftirkannað, um serliga ráðgevingin í sambandi við henda partin hevur verið nøktandi.

– Nú fegnist eg tó fyrst og fremst um, at øll henda stóra byggiverkætlanin verður liðug einaferð um ársskiftið, og vit tá í roynd og veru hava eitt spildurnýtt Landssjúkrahús, sum í allar mátar kann javnmetast við øll onnur framkomin sjúkrahús í londunum rundan um okkum, og sum eg eri vísur í fer at verða í fyrsta lagi sjúklingunum, men eisini teimum nógvu starvsfólkunum til gleði. Tað var eisini sera skilagott, at vit gjørdu av at brúka eitt sindur av pengum eyka fyri at fáa nyttu burtur úr teimum nógvu kjallarafermetrunum. Tað haldi eg ikki, at nakar er ósamdur í, tó at kostnaðurin bleiv nakað størri enn upprunaliga hildið, sigur Kaj Leo Holm Johannesen.

Greinin varð fyrstu ferð løgd út 07. mai 2022

Landsbankin: Landskassin eigur at hava meira á kistubotninum

Hóast Føroyar hava havt stóra búskaparliga framgongd seinastu árini, er fíggjarstøða landskassans verri, enn hon var í 2008, tá fíggjarkreppan rakti. Landskassin eigur at tryggja sær meira á kistubotninum tá góðar tíðir eru, so bjálving er móti verri tíðum

(Savnsmynd)

SkrivaÐ:

Tíðindaskriv

Myndin niðanfyri vísir nettoogn/-skuld hjá landskassanum frá 1998 til 2023, árini 2021 – 2023 eru metingar. Uppgerðin vísur bert gjaldføru ognirnar, tað vil siga, hon er uttan útbúnað so sum fastar ognir. Harumframt er ogn og skuld hjá tunnilsfeløgunum við í uppgerðini.

Í 2007, beint fyri fíggjarkreppuna, var nettoskuld landskassans nærum 0. Í sambandi við fíggjarkreppuna hevði landskassin fleiri ár á rað hall á fíggjarlógini, og skuldin hjá landinum vaks við til samans 2,8 milliardum krónum í árinum 2008-2015. Eftir 2015 og nøkur ár fram var yvirskot á fíggjarlógini, og sum myndin vísir, minkaði nettoskuldin tá eitt vet. Síðani 2019 er nettoskuldin tó aftur økt, hóast stóra framgongd í búskapinum. Í 2020 øktist nettoskuldin, tá orsakað av covid-19.

Fyri at minka um nettoskuldina, er neyðugt við yvirskoti á fíggjarlógini. Best er um fíggjarliga rásarúmið í eini komandi afturgongd í búskapinum er so gótt sum gjørligt og tí eigur málið at vera at byggja upp eina positiva nettoogn á umleið 10 prosent av BTÚ, ella á umleið 2 milliardir krrónur, í góðum tíðum.

Greinin varð fyrstu ferð løgd út 09. mai 2022

Næstan 100 íbúgvar løgdust afturat

1. apríl búðu 53.882 fólk í Føroyum - talið 1. mars var 53.789. Trendurin er annars, at fólkatalið veksur framvegis, men við lægri ferð, skrivar Hagstova Føroya. Serliga er tað íkastið frá burðaravlopinum, sum er minkað, um hugt verður eftir seinasta árinum

Tilflytingin er komin aftur á sama stig sum í 2019, ið merkir, at gott 150 flyta til Føroya í miðal mánaðarliga.

SkrivaÐ:

Agnar Prestá

Fólkatalið í Føroyum vaks við næstan 100 fólkum frá 1. mars í ár til 1. apríl, og 687 fólk løgdust aftur at fólkatalinum seinasta árið, so at tað nú er skrásett at vera 53.882 fólk - talan er um ein vøkstur á næsta 100 fólk uppá ein mánaða.

Hetta vísa nýggjastu tølini hjá Hagstovu Føroya.

Sjálvur fólkavøksturin er annars minkaður nakað seinastu mánaðirnar. Í 2020 og 2021 lá árligi fólkavøksturin millum 1,4 og 1,6 prosent fyri hvørt 12-mánaðar-skeið. Seinastu 12 mánaðirnar var hann 1,3 prosent.


Trendurin vísir gongdina í fólkatalinum síðani 1985 

Talan er ikki um ógvusliga minking, men hon sæst, og tað er serliga íkastið frá burðaravlopinum, sum er minkað.

Vøksturin seinasta árið kemur av einum burðaravlopi á 167 fólk og eini nettoflyting á 520 fólk. Tað seinna talið er hægri enn vanligt, men tað fyrra er lágt - í mun til fólkatalið er burðaravlopið tað lægsta síðan 1985, tá byrjað var at gera fólkatølini upp sambært Landsfólkayvirlitinum. Lága burðaravlopið seinasta árið kemur av, at færri børn eru fødd, samstundis sum munandi fleiri eru deyð seinastu mánaðirnar í mun til undanfarin tíðarskeið, skrivar Hagstovan.

Tilflytingin er komin aftur á sama stig sum í 2019, ið merkir, at gott 150 flyta til Føroya í miðal mánaðarliga. Fráflytingin er eisini komin aftur á sama stig sum í 2019 - gott og væl - og nú flyta gott 110 fólk av landinum í miðal mánaðarliga.

Greinin varð fyrstu ferð løgd út 11. mai 2022

– Føroyar skulu framvegis vera besta og tryggasta staðið

Løgmaður sigur seg als ikki kunnu góðtaka, at harðskapur fer fram í býarlívinum, og er rættast at fara í samskifti við avvarðandi myndugleikar fyri at fáa nærri greiðu á støðuna – møguligar loysnir eru, at løgreglan patruljerar til gongu í miðbýnum í vikuskiftinum, og at Náttarravnarnir verða uppraðfestir, sigur hann

– Sum løgmaður vil eg, at Føroyar framvegis skulu vera besta og tryggasta staðið at liva og vaksa upp, sigur Bárður á Steig Nielsen, løgmaður (Savnsmynd)

SkrivaÐ:

Alda Nielsdóttir

Bárður á Steig Nielsen, løgmaður sigur, at tað er týdningarmikið at seta tiltøk í verk at basa trupulleikunum við rusevnum og harðskapi, og heldur hann, at mann eigur at fara í samskifti við avvarðandi myndugleikar fyri at fáa nærri greiðu á, um harðskapurin, sum søgur hava verið frammi um seinastu tíðina, hongur saman við rúsevnismisnýtslu.

Eisini vil hann hava nærri greiðu á, hvussu umfatandi harðskapurin í náttarlívinum er, og um nakað ávíst mynstur er í harðskapinum, sigur hann í svari til fyrispurning hjá Anniku Olsen úr Fólkaflokkinum.

Annika Olsen spurdi løgmann, hvørjar ætlanir eru um at seta í verk tiltøk at basa harðskapi í býarlívinum, og um nakrar ítøkiligar samráðingar eru við kommunurnar um hetta.

Sum møgulig átøk nevnir løgmaður, at løgreglan patruljerar til gongu í miðbýnum í vikuskiftinum, og at Náttarravnarnir verða uppraðfestir. Eisini nevnir hann møguleikan, sum hevur verið frammi, at seta vakmyndatól upp í náttarlívinum.

– Sum løgmaður vil eg at Føroyar framvegis skulu vera besta og tryggasta staðið at liva og vaksa upp, og tí kann eg als ikki góðtaka at harðskapur fer fram í býarlívinum. Hetta var eisini ein av orsøkunum til at eg setti arbeiðið í gongd við einari heildarætlan fyri rúsevnismisnýtslu, sigur hann.L

øgmaður, sigur eisini, at fleiri av átøkunum í heildarætlanini um at fyribyrgja og tálma rúsevnismisnýtslu, sum hann fekk handað í mars, eisini kunnu vera við til at avmarka harðskap.

– Her hugsi eg eg t.d. um nýggja PSP-samstarvið og SSP+ samastarvið, sum ætlanin er at seta í verk, sigur hann.

PSP-samstarvið er eitt samstarv millum psykiatri, sosialar myndugleikar og løgregluna, sum serliga er ætlað borgarum við fjøltáttaðum trupulleikum, sum ikki sjálvir megna at søkja sær hjálp fyri at betra um støðuna. Í Føroyum fer Kriminalforsorgin at verða part av samstarvinum.

SSP+ samstarvið er ætlað ungum millum 18 og 24 ár, sum hava trupulleikar við rúsevnum og óhepnari ella kriminellari atferð, og ætlanin við samstarvinum er at hjálpa og stuðla teimum ungu aftur á beina kós. Samstarvið fevnir millum annað um løgregluna, Almannaverkið, ALS, Dugna, Megna Títt Lív og Kriminalforsorgina.

Bárður á Steig Nielsen sigur, at Løgmansskrivstovan hevur havt eitt gott samskifti við borgarstjóran í Tórshavnar kommunu um støðuna viðvíkjandi átøk móti harðskapi í býarlívinum, men annars eru ongar ítøkiligar samráðingar við kommunurnar um hetta.

Greinin varð fyrstu ferð løgd út 09. mai 2022

Nýggir útbúgvingarmøguleikar á Heilsuskúla Føroya

Ófaklærdir heilsuhjálparar og námsfrøðihjálparfólk, sum eru omanfyri 25 ár, og sum hava minst 3 ára viðkomandi starvsroyndir kunnu søkja um at verða førleikamett, og soleiðis fáa atgongd til eina serskilda undirvísingargongd, sum gevur teimum eina høgligari leið gjøgnum útbúgvingina

Landsstýrismaðurin Jenis av Rana, saman við Vivie Kirke Davidsen, skúlastjóra á Heilsuskúla Føroya (Mynd: Uttanríkis- og mentamálaráðið)

SkrivaÐ:

Tíðindaskriv

Heilsuskúli Føroya og Uttanríkis- og Mentamálaráðið hava latið upp eina nýggja hurð inn til útbúgvingarnar sum heilsuhjálpari og námsfrøðihjálpari.

Ítøkiliga snýr tað seg um eina førleikametingar-tilgongd, fyri ófaklærdar heilsuhjálparar og námsfrøðihjálparfólk, sum eru omanfyri 25 ár, og sum hava minst 3 ára viðkomandi starvsroyndir. Hesi kunnu søkja um at verða førleikamett, og soleiðis fáa atgongd til eina serskilda undirvísingargongd, sum gevur teimum eina høgligari leið gjøgnum útbúgvingina.

– Hetta er sama útbúgvingin, sama fakliga innihaldi og júst sama prógv sum til tær vanligu útbúgvingarnar sum heilsuhjálpari og námsfrøðihjálpari, sigur Vivie Kirke Davidsen, stjóri á Heilsuskúla Føroya, sum fegnast um, at hendan skipanin er fingin í lag:

– Tað nýskapandi við hesum leistinum er, at tey førleikamettu verða frítikin frá vanligu starvsvenjingini, so tey sleppa til arbeiðis í teimum tíðarskeiðum har eingin undirvísing er. Harafturat skipar Heilsuskúlin ein part av frálæruni umvegis fjarundirvísing, so tað verður høgligari hjá hesum næmingabólkunum at taka hesar útbúgvingar.

Landsstýrismaðurin við skúlamálum, Jenis av Rana, lýsir nýggja leistin hjá Heilsuskúlanum sum eitt spennandi frambrot fyri vælferðarøkið:

– Starvsfólkatrotið er ein avbjóðing sum vit øll mugu taka í størsta álvara, og hendan førleikametingin kann gerast ein týdningarmikil liður, í eini røð av átøkum, sum skulu fáa fleiri vælútbúgvin starvsfólk inn á vælferðaøkið. Fyrsta stigið er heilsuhjálparar og námsfrøðihjálparar. Næsta stigið verður heilsurøktarin. 

Landsstýrismaðurin vónar og væntar, at kommunurnar og fakfeløgini fara at taka væl undir við leistinum, og at allir partar fara at gera sítt til, fyri at fáa kunningina um nýggja tilboðið hjá Heilsuskúlanum út: Tað er ein felags avbjóðing at fáa fleiri hendur og betri fakligar førleikar inn á økið. Um vit nú øll lyfta í felag, so fáa vit eisini sett veruliga gongd á rekrutteringina av teimum røttu starvfólkunum til hendan nýggja leistin, sigur Jenis av Rana, landsstýrismaður.

Heilsuhjálparútbúgvingin og námsfrøðihjálparaútbúgvingin fyri førleikamett byrjar longu eftir summarfrítíðina í ár, og tey, sum hava ábyrgdina av at vegleiða um førleikameting, sita longu klár til at hjálpa umsøkjarunum.

Nærri kunning um nýggju útbúgvingarmøguleikarnar eru at finna á heimasíðuni hjá Vegleiðingarstovuni í Undirvísingarstýrinum, www.vegleiding.fo.

Greinin varð fyrstu ferð løgd út 07. mai 2022

2021: 13 prosent fleiri kommunulæknaviðtalur enn áðrenn korona

Sambært Hagstovuni var talið á kommunulæknaviðtalum nærum 188.000 í 2021, og av teimum vóru góðar 9.000 avgreiddar umvegis telefon

 

SkrivaÐ:

Alda Nielsdóttir

Talið á kommunulæknaviðtalum í 2021 var nærum 188.000. Hetta er 13 prosent fleiri enn í 2019 – áðrenn koronasmittan byrjaði at gera um seg, skrivar Hagstovan.

Av teimum 187.861 viðtalunum vórðu 9.043 avgreiddar umvegis telefon orsakað av koronusmittuvandanum. 

Stívliga 5.000 – ella trý prosent – av viðtalunum vóru hjá fólki við bústaði uttanlands.

Sandoyggin flest viðtalur pr íbúgva

Í miðal vóru 3,4 viðtalur hjá kommunulækna fyri hvønn íbúgva í landinum. Tá útlendingar eru taldir við, er talið tó 3,5. Í 2019 var hetta talið 3,1.

Talið á viðtalum fyri hvønn íbúgva hevur verið áleið tað sama í øllum høvuðsøkjum í landinum.

Í Suðurstreymi, Suðuroy, Norðstreymi og Eysturoy hevur talið verið millum 3,1 og 3,4, í Norðoyggjum og Vágum hevur talið verið  3,7.

Men í Sandoyarøkinum var talið nakað hægri. Har vóru 7,4 viðtalur fyri hvønn íbúgva.

Konufólk vitjaðu kommunulæknan oftari

Sambært tølunum hjá Hagstovuni sæst eisini, at konufólk vitjaðu kommunulæknar oftari enn mannfólk. Konufólk áttu heili 56 prosent av viðtalunum í 2021, meðan mannfólkini áttu hini 44.

Heilt nágreiniliga taldu viðtalurnar hjá konufólki 105.006, meðan viðtalurnar hjá mannfólki taldu 80.695.

Tann aldursbólkurin, sum hevði flest viðtalur, vóru tey millum 70 og 74 ár. Síðani var tað aldursbólkarnir 55-59 ár, og 60-64 ár.

Uppgerðin hjá Hagstovuni fevnir ikki um fyribyrgjandi ella sonevndar profylaktiskar viðgerðir, so sum koppsetingar, upplýsing um gitnaðarfyribyrging, heilsukanningar av barnakonum og læknakanningar av børnum.

Greinin varð fyrstu ferð løgd út 13. mai 2022

Landsbankin: Inflasjónin hækkar

Eftir at inflasjónin í eitt áratíggju hevur verið heilt lág og eisini negativ, hækkar inflasjónin nú aftur. Brúkaraprístalið, sum er eitt mát fyri inflasjónina, er vaksið við 4,4 prosentum frá fyrsta ársfjórðingi 2021 til fyrsta ársfjórðingin 2022

(Savnsmynd)

SkrivaÐ:

Tíðindaskriv

Myndin niðanfyri vísir at brúkaraprístalið, ið er eitt mát fyri inflasjónina, er vaksið við 4,4 prosentum frá fyrsta ársfjórðingi 2021 til fyrsta ársfjórðingin 2022. Eisini sæst í myndini, at inflasjónin hevur verið hækkandi tað seinasta árið.

Tað er ikki einans í Føroyum at inflasjónin nú aftur ger um seg, men í øllum heiminum. Serliga eru prísirnir á orku (olju og gass) hækkaðir nógv, men eisini matvørur, klæðir og samskifti er vorðið dýrari.

Hækkandi prísir (inflasjón) merkir, at borgarin fær minni fyri sína løn, sum aftur ger at vinnan kann koma at merkja ein lækkandi eftirspurning eftir vørum og tænastum. Hetta kann viðvirka til at tálma búskapin, men føroyski búskapurin var frammanundan væl fyri, og flestu føroysku húsarhaldini hava eitt gott fíggjarligt mótstøðuføri til at møta hesum stoyti.

Givið er, at økta prísstøðið rakar øll, men harðast hjá teimum húsarhaldum, ið hava lágar inntøkur.

Greinin varð fyrstu ferð løgd út 09. mai 2022

Fólkasjúkurnar eiga at fyribyrgjast og viðgerast við samansettari kropsligari venjing

Tað vísir nýggj vísindalig metaanalysu-yvirlitsgrein, sum Fróðskaparsetur Føroya er partur av. Magni Mohr hevur saman við granskarum úr fýra øðrum londum úttigvið greinina í amerikanska tíðarritinum Circulation: Cardiovascular Quality and Outcomes.

- Okkara nýggja grein veitir sterka próvførslu fyri, hvørji sløg av kropsligari venjing eru best í mun til mest týðandi váðarnar fyri stóru fólkasjúkunum. Tí eru hesi úrslitini týðandi, tá tað ræður um fyribyrging av t.d. hjartasjúkum og typu 2-diabetes, sigur Magni Mohr (Mynd: Sverri Egholm)

SkrivaÐ:

Tíðindaskriv

- Vit hava leingi vitað, at fleiri av stóru hjartasjúkunum, sum eru tær, sum flest fólk doyggja av í heiminum, hava tætt samband við kropsligt óvirkni og yvirvekt. Vit vita eisini, at grundirnar eru samansettar og fleirtáttaðar sum t.d. ov nógv kropsfeitt, ov høgt blóðtrýst, ov nógv kolesterol og feitt í blóðinum, niðursett tamarhald av blóðsukrinum og vánalig kropslig venjingarstøða. Metaanalysan er tann sterkasta vísindaliga próvførslan, sum er, og vit vísa í okkara kanning greitt, at fólk við ov nógvum kropsfeitti eiga at gera samansetta venjing, har bæði styrkis- og treystisvenjing verða samantvinnað (tvs. gjørdar saman, sum t.d. eina ferð um vikuna styrkisvenjing og tvær ferð treystisvenjing ella øvut, sum m.a. kann gerast á venjingarmiðstøðum, ella gera tað, vit kalla “hybridvenjing”, sum er tann venjing bóltspølini og ketjaraspølini í sjálvum sær eru,

Hetta sigur Magni Mohr, professari á Deildini fyri Heilsu- og sjúkrarøktarvísindi á Fróðskaparsetri Føroya, sum saman við øðrum hevur útgivið eina størri metanalysugrein, sum byggir á netverkshagfrøði í amerikanska tíðarritinum Circulation: Cardiovascular Quality and Outcomes.

Greinin, sum ber heitið “Comparative Efficacy of 5 Exercise Types on Cardiometabolic Health in Overweight and Obese Adults: A Systematic Review and Network MetaAnalysis of 81 Randomized Controlled Trials”, er skrivað saman við fleiri av fremstu granskarunum úr Grikkalandi, Englandi, USA og Danmark.

Greinin er ein sokallað netverks-metaanalysa-yvirlitsgrein, sum greinar altjóða vísindaligu útgávurnar fyri at finna fram tær sterku kanningar av, hvussu ymisk sløg av kropsligari venjing ávirka ymiskar tættir, sum annars hava við sær stóru fólkasjúkurnar hjá teimum við ov nógvum kropsfeitti.

Funnar vórðu 81 vísindaligar greinar, sum luku strongu krøvini fyri vísindaliga dygd og granskingarháttalag. Síðani varð netverks- og metaanalysuhagfrøði nýtt fyri at greina, hvat slag av venjing er munadyggast, tá tað snýr seg um váðar fyri stóru hjartasjúkunum, og hvussu hesir váðar eru samantvinnaðir.

Víst varð, at fleirtáttað venjing (venjing, har bæði treystis- og styrkisvenjing verða gjørd) og sokallað hybridvenjing (samantvinnað venjing, sum vit kenna frá bóltspølunum) var munadyggari enn treystis-, styrkis- og intervalvenjing einsamøll, tá hugt varð eftir størstu váðunum fyri stór fólkasjúkunum.

Intervalvenjing vísir seg eisini at vera góð fyri at betra nakrar tættir, meðan minst munadygg var treystisvenjing og styrkisvenjing, tá tær hesar standa einsamallar.

- Sundhedsstyrlsen viðurkennir í eini frágreiðing frá 2018, at 31 kroniskar sjúkur eiga partvíst at viðgerast við kropsligari venjing, men í praksis eru vit tíverri ikki komin har enn, hóast vit í stóran mun hava amboðini og vitanina. Okkara nýggja grein veitir sterka próvførslu fyri, hvørji sløg av kropsligari venjing eru best í mun til mest týðandi váðarnar fyri stóru fólkasjúkunum. Tí eru hesi úrslitini týðandi, tá tað ræður um fyribyrging av t.d. hjartasjúkum og typu 2-diabetes, men kanningin veitir eisini nýggja vitan um, hvørjir sløg av kropsligari venjing hóska seg best til ávísar sjúklingabólkar, sigur Magni Mohr.

Fróðskaparsetur Føroya 

Greinin varð fyrstu ferð løgd út 12. mai 2022

Nýggj játtan til framburð og menning á landbúnaðarøkinum

Nú fer Búnaðarstovan at lýsa eftir umsóknum uppá verkætlanir, sum kunnu skapa menning og framburð á landbúnaðarøkinum

Á fíggjarlógini fyri 2022 er ein millión játtað til menningarætlanir

SkrivaÐ:

Tíðindaskriv

Nú fer at verða lýst eftir verkætlanum, sum kunnu skapa menning og framburð á landbúnaðarøkinum.

Í fíggjarlógini fyri 2022 er ein millión játtað til menningarætlanir.

- Landsstýrið hevur sett sær fyri at slóða fyri menning á landbúnaðarøkinum, og tí er av álvara neyðugt við nýggjum tankum og djørvum verkætlanum. Vit kunnu betra skipanirnar, sum skulu vaksa um verandi framleiðslu, men vit mugu fyrst og fremst eggja til nýskapan í landbúnaðinum, og vit eru sera spent at síggja, hvørjar verkætlanir farið verður undir sigur Magnus Rasmussen, landsstýrismaður.

Í reglugerðini fyri játtanini stendur m.a., at verkætlanirnar, sum verða stuðlaðar av nýggju játtanina til framburð og menning á landbúnaðarøkinum, skulu fremjast í samstarvi við Búnaðarstovuna. Hon skal tryggja at úrslitini gerast atkomilig hjá almenninginum og tøk hjá øðrum at brúka. Játtanin kann eitt nú verða nýtt til kanningar, skjalfesting og til praktiskar royndir.

Umhvørvis- og Vinnumálaráðið

Greinin varð fyrstu ferð løgd út 12. mai 2022

Møt til tíðina - lat ikki arbeiðið bíða og ver reiðiligur

97 ára gamli pápin var við til at geva soninum gott í beinið á sinni og sum nú kundi halda meira enn 40 ára starvsdag hjá Pf. Poul Michelsen

Feðgarnir Heri og Gunnar Mohr saman við Poul Michelsen á 40 ára starvsdegnum hjá Gunnari (Mynd Jan Müller)

SkrivaÐ:

Jan Müller

- Møt til tíðina - lat ikki arbeiðið liggja og bíða og ver reiðiligur. Hetta varð boðskapurin ella ABCið, sum pápi lærdi meg, tá eg skuldi út í arbeiðslívið fyri fyrstu ferð og byrjaði hjá Poul Michelsen einans 17 ára gamal í 1979 segði Gunnar Mohr, stjóri í heilsølufyritøkuni PM, tá hann farna fríggjadag kundi hátíðarhalda sín 40 ára starvsdag í eini av teimum stóru  fyritøkunum í høvuðstaðnum.

Og við sína lið hevði hann júst pápa sín, 97 ára gamla Hera Mohr, sum øll hesi mongu ár hevur verið ein partur av býarmyndini í Havn. 

Gunnar Mohr, stjóri, Poula Michelsen, nevndarforkvinna og Poul Michelsen, fyrrverandi stjóri (Mynd Jan Müller)

Fitt av fólki, bæði kundar, starvsfólk, vinfólk og  kenningar, høvdu leitað sær niðan á Hoyvíksveg 74 at vera partur av løtuni, tá hesin kendi havnarmaðurin, eitt nú frá HB tíðini, kundi fegnast um heili 42 góð arbeiðsár hjá Poul Michelsen.

Ætlanin var at halda dagin fyri tveimum árum síðani, men korona forðaði fyri hesum. So nú skuldi tað vera. 

Hetta var ein rørandi løtu, nú skjótt 100 ára gamli faðirin kundi vera millum gestirnar og eisini hevði nøkur góð orð á vegnum. Vit geva Hera orðið:

- Gunnar fekk realprógv og mól i bynum og gjørdi einki til nyttu. Eg kendi væl eldra beiggja Poul Michelsen, og so hugsaði eg ein dagin, um eg ikki skuldi fara at tosa við hin beiggjan, Poul sjálvan. Og tað bar so á, at eg fekk orð á Poul í Havnar Klubba, og orðini okkara millum fullu nakað soleiðis: -Eg havi ein drong har heima, sum júst er liðugur við skúlan, hevur tú ikki eitt gólv hann kann feiða. Hevur tú ikki brúk fyri einum røskum ungum manni.  Og Poul var skjótur at svara: - Send hann niðan, so eg kann síggja hann. Og har er hann Gud hjálpi meg enn segði Heri og legði aftrat: - Og tað er eitt ótrúligt arbeiði, sum er komið til sjóndar, ikki minst millum tykkum báðar Gunnar og Poul. Tað hava tit klárað til UG og nógv meira enn tað. 

Poul Michelsen mintist eisini væl hesa løtuna  í Havnar Klubba fyri nú 42 árum síðani og helt fyri, at hetta man hetta hava verið tann besta ølin hann nakrantíð hevði fingið.

Gott stjóralag - Gunnar og Poul (Mynd Jan Müller)

Gunnar sjálvur hevði alt gott at bera sínum arbeiðsplássi, sínum starvsfeløgum og ikki minst sínum gamla stjóra. Men hevði fyrst hesi orðini til pápa sín: - Tað var ikki minst tú, sum formaði meg sum persón eins og tú legði stóran dent á meg sum menniskjað, og eg havi ongantíð gloymt tíni góðu ráð, sum tú nevnir fyri ABCið í arbeiðslívinum: Møt altíð til tíðina. Lat ikki arbeiðið liggja og bíða og arbeið skjótt og ver reiðiligur, so gongur tað nokk.

Sólrun, sum tók við sum stjóri, tá maðurin Poul gjørdist borgarstjóri í Tórshavnar kommunu her saman við Gunnari og dóttrini Elin (Mynd Jan Müller) 

Og Gunnar helt eisini, at hetta passaði eisini gott til tíðina hjá Poul. So teir báðir hava  ikki verið so ólíkir.

Gunnar helt fyri, at øll hesi 40 árini hava verið sera spennandi, nú virkið alla tíðina hevur verið í stórari menning, og hann sjálvur er sloppin at vera partur av nærum øllum skipanunum í húsinum. Hesi hepnu gongd kunnu vit eisini takka teimum fýra leiðarum, Kurt, Gert, Villy og Claus, sum komu úr Danmark  til Føroya at leggja okkum lag á.  Teir eins og øll hini starvsfólkini hava havt  alstóran týdning fyri fyritøkuna.

Gunnar saman við abbadóttrini, dóttrini og versoninum (Mynd Jan Müller)

Nógvar broytingar eru hendar í fyritøkuni øll árini. Tá Gunnar byrjaði har vóru tey 11. Í dag eru tey umleið 180. Tá Poul tók við sum borgarstjóri í Havn í 1981, tók konan Sólrun við sum stjóri og sat til 2008.

Gunnar gjørdist hjástjóri í 2004 og stjóri fyri allari fyritøkuni fyri seks árum síðani. Og tað hevur ikki gingið minni gott síðani tá. Fyritøkan veksur og útbyggingar standa fyri framman.  

FK veteranar vælmøttir til móttøkuna hjá Gunnari her saman við Poul Michelsen (Mynd Jan Müller)

Poul Michelsen hevði eisini nøkur góð orð at bera Gunnari: 

- Maðurin er 58 ára gamal og hevur verið her í meira enn 40 ár. Hann  sær so gott út, at man kundi spurt, um hann als ikki hevur slitið í tí. 

- Vit hava roynt at hava lágar gáttir og ikki býta fólk upp í klassar, og tað eigur Gunnar stóran part av æruni av. Tað, sum m.a. eyðkennir Gunnar, er hansara stóra útstráling, góða kontakt til kundar, starvsfólk og innkeyparar uttanlands. 

- Tú hevur ein máta at vera uppá, sum eggjar og gevur íblástur til øll. 40 ár borgar fyri nøkrum. Tað merkir i roynd og veru, at fólk trívast og  hava tað gott her helt Poul fyri og vísti á, hvussu tíðirnar eru broyttar. Tá Gunnar byrjaði vóru meira enn 200 handlar kring landið, og tá hevði persónliga sambandið stóran týdning. Ì dag eru trý samtøk, sum kappast um kundarnar. Støðið er betri, og úrvalið tað sama sum uttanlands, og tað er einki minni enn eitt bragd.  Ein stór broyting hendi, tá partar av søluni vóru liberaliseraðir og hevur tað havt við sær, at vit hava fingið eitt meira opið og alment samfelag, sum líkist tí uttanlands og sum hevur gjørt, at fleiri fólk vilja flyta heimaftur. 

Høgni Hansen frá kappingarneytanum, Pf. Poul Hansen, millum tey fyrstu at ynskja Gunnari tillukku (Mynd: Jan Müller)

Greinin varð fyrstu ferð løgd út 07. mai 2022

Serhandil til gastrovinnuna

Heilsølan Poul Hansen latið upp handil serliga ætlað til kokkar og matstovuleiðarar

Nýggi handilin verður í bygninginum, sum einaferð hýsti timburhandli á Hálsi (Mynd: Google)

SkrivaÐ:

Ingi Samuelsen

Pf. Poul Hansen lat hósdagin nýggjan handil til catering-vinnuna. Navnið á handlinum er gastro!, sum verður í bygninginum á Heykavegi 4 á Hálsi í Havn.

Talan er um bygningin, sum Havnar Timburhandil lat byggja í síni tíð, og sum nú er yvirtikin av Pf. Poul Hansen.

Nýggja bryggjaríið OY heldur til í øðrum endanum av bygninginum, sum nú eisini fer at húsa Føroya fyrsta handli til catering-vinnuna.

Poul Hansen gastro er til føroyskar kokkar og matstovuleiðarar. Eitt heildarkonsept, sum ger tað lætt fyri øll, sum servera mat – á hotelli, matstovu, kantinu ella umborð á skipi – at skaffa sær sínar rávørur, skrivar Poul Hansen í tíðindaskrivi.

- Her verður møguligt at síggja, lukta, nema og kanska nippa til ymsu rávørurnar. Her fáa teir gastronomisku sansirnir frítt spæl. Vit leggja ikki bara dent á rávøruna, men eisini vitanina. Tí hava vit serfrøðingar, sum ráðgeva og vegleiða. Sostatt er hetta staðið, har øll frá pitsusyftarum til feinschmeckarar koma at lata seg inspirera. 

Greinin varð fyrstu ferð løgd út 10. mai 2022

Arbeiðið at gera innkomuvegin byrjar í komandi viku

Tórshavnar býráð samtykti hósdagin við aðru viðgerð at játta 24,4 milliónir krónur til innkomuvegin til Havnar

(Mynd: Google)

SkrivaÐ:

Alda Nielsdóttir

Á eyka býráðsfundi hóasdagin samtykti Tórshavnar Býráð einmælt við aðru viðgerð at játta góðar 24,4 milliónir krónur til arbeiðið at gera innkomuvegin til Havnar.

Við aðru viðgerð vórðu neyðugar tillagingar gjørdar, soleiðis at endalig avtala kann fáast í lag við festaran, og tí, at hædd ikki varð tikin fyri útreiðslunum av at burturbeina avlopsgrevstur í upprunaliga uppskotinum, skrivar Tórshavnar kommuna.

Arbeiðið fer í gongd í komandi viku, tá seinastu avtalurnar eru undirskrivaðar ímillum kommununa og byggifelagið Articon, og ímillum festaran og kommununa

Í fyrstu syftu verður ein arbeiðsvegur gjørdur, sum skal verða liðugur í heyst. Samlaða verkætlanin verður eftir ætlan boðin út í juli í ár.

Greinin varð fyrstu ferð løgd út 13. mai 2022

Barnagarðurin á Norðoyri tikin alment í nýtslu

Baldursbrá er nýggjasti barnagarðurin í Klaksvíkar kommunu. Fyrstu stovurnar tiknar í nýtslu í heyst, og fyri stuttum varð uttanumøkið eisini endaliga gjørt liðugt

Fitt av fólki var komið saman til hátíðarhaldið, og á skránni var hoppiborg, kaffi, smákøkur, pylsur og sunkist til børnini. Harafturat framførdi Steintór Rasmussen nøkur løg (Mynd: klaksvik.fo)

SkrivaÐ:

Agnar Prestá

Mikudagin varð nýggi barnagarðurin í Klaksvíkar kommunu, Baldursbrá, alment tikin í nýtslu. 

Talan er um dagstovn úti á Norðoyri. Har vórðu fyrstu stovurnar tiknar í nýtslu í heyst, og herfyri varð uttanumøkið eisini endaliga gjørt liðugt.

Fitt av fólki var komið saman til hátíðarhaldið, og á skránni var hoppiborg, kaffi, smákøkur, pylsur og sunkist til børnini. Harafturat framførdi Steintór Rasmussen nøkur løg og Eyðstein Poulsen, formaður fyri Børn og Ung, førdi fram røðu.

Bygningurin er líkur nýggjasta partinum av Fjallafípuni, sum Norðhús somuleiðis var við at byggja. Eitt sum er sermerkt við nýggja stovninum, er stóra og innbjóðandi spæliplássið, har kommunan millum annað hevur endurnýtt flísar, sum eru tiknir upp av økinum við Biskuptorg.

Somuleiðis er spæliplássið grønt við nógvum trøðum, runnum og grillsmáttu. Tað er fyritøkan Varkurt, sum hevur staðið fyri stórum parti av uttandura arbeiðinum.

Greinin varð fyrstu ferð løgd út 12. mai 2022

Útbúgvin flogteknikari

Bjørn Sjúrður Patursson liðugur við útbúgvingina

 

SkrivaÐ:

Innsent

Týsdagin 10. mai varð móttøka í hangarinum hjá Atlantic Airways í sambandi við at Bjørn Sjúrður Patursson hevur lokið útbúgving sum flogteknikari.

Bjørn Sjúrður byrjaði tann 7. august 2017, og varð liðugur tann 8. apríl 2022.

Greinin varð fyrstu ferð løgd út 11. mai 2022

Enn eitt væleydnað Closed For Maintenance farið afturum

Hundrað útlendingar úr 35 ymiskum londum umframt 40 føroyingar løgdu sína arbeiðsmegi í tiltakið í ár

 

SkrivaÐ:

Innsent

Hetta er fjórðu ferð Visit Faroe Islands, kunningarstovur og kommunur hava skipað fyri átakinum “Closed For maintenance.” Hesaferð vóru tað 140 sjálvboðin, 40 føroysk og 100 útlendsk frá 35 ymiskum londum sum luttóku.

Talan var um 11 ymiskar verkætlanir kring landið: Skarð, Norðagøta, Kambsdalur, Oyndarfjørður, Rituvík, Fossá, Nólsoy, Norðadalur, Vágar, Sandoy og Suðuroy.

Kunningarstovur og kommunur hava fyriskipað hvør sína verkætlan við góðari hjálp, vistveiting og gisting frá teimum lokalu. Til samans hava um 200 fólk verið til arbeiðis í síðstu viku.

Verkætlanirnar snúðu seg um at umvæla og uppmerkja gonguleiðir úti í haga, at laða varðar, gera útsýnisstøð, at skelta v.m. Yvirskipaða endamálið við øllum verkætlanum er at gera farleiðirnar tryggari og betri at ganga eftir, og á tann hátt virka fyri eini væl skipaðari ferðavinnu kring landið.

- Aftur hesaferð er tað ein fragd at síggja, hvussu nógv kann koma burturúr uppá bara tveir arbeiðsdagar, tá arbeiði er lagt væl til rættis og tá fúsar hendur eru til taks at fremja arbeiði í verki. Tað eiga lokalu fyriskipararnir allan heiður fyri.” Sigur Jóhan Pauli Helgason, leiðari á menningardeildini hjá Visit Faroe Islands.

- Closed for Maintenance er vorðið ein afturvendandi snúðningsdepil í arbeiðinum at skipa ferðavinnuna í Føroyum betri. Ábøtur úti í náttúruni kunnu gera stóran mun og átakið er vorðið eitt upplagt høvi, at fáa slíkar ábøtur gjørdar. Umframt ítøkiligu ágóðarnar fyri okkara náttúru, so er átakið eitt fantastiskt sosialt tiltak, ið knýtir tøtt bond millum føroyingar og fólk úr øllum heimi.

Closed For Maintenance verður aftur um somu tíð komandi ár.

Tíðindaskriv frá Visit Faroe Islands

Herundir eru myndir frá arbeiðunum í Elduvíkslíð, á bygdagøtuni millum Norðragøtu og Leirvík, millum Norðradal og Tórshavn og við Fossá. Myndatakarar: Klara Johansen, Bárður Eklund:

Fossá

Norðagøta-Leirvík

Elduvíkslíð

Greinin varð fyrstu ferð løgd út 11. mai 2022

Jóanis Erik Køtlum kommunustjóri í Fuglafjarðar kommunu

56 ára gamli Jóanis Erik Køtlum byrjar í starvinum 1. juni

Jóanis Erik Køtlum (Savnsmynd: Ólavur Frederiksen)

SkrivaÐ:

Alda Nielsdóttir

Fuglafjarðar býráð hevur tikið avgerð um at seta Jóanis Erik Køtlum í starvið sum kommunustjóri í Fuglafjarðar kommunu. Tað boðar kommunan frá í tíðindaskrivi.

Jóanis Erik Køtlum er 56 ára gamal og útbúgvin búskaparfrøðingur. Hann hevur drúgvar leiðsluroyndir frá ymiskum størvum í føroyska og grønlendska heilsuverkinum. Millum annað hevur hann verið sjúkrahússtjóri og heilsuverksstjóri.

Jóanis Erik Køtlum byrjar í starvinum sum kommunustjóri 1. juni.

Greinin varð fyrstu ferð løgd út 13. mai 2022

Lærararnir fingið nýggjan næstformann

Nevndin í Føroya Lærarafelag hevur skipað seg eftir aðalfundin fyri góðari viku síðani. Nógv er at tríva í og nevndin er spent at fara til verka

Bergur Samuelsen, Jacob Eli S. Olsen, Jona Højsted, Tórhallur við Gil og Eyðbjartur Sólheyg Skaalum (Mynd: Føroya Lærarafelag)

SkrivaÐ:

Tíðindaskriv

Fyri góðari viku síðan var aðalfundur í Føroya Lærarafelag. Nevndarval var á skránni, har fimm valevni bjóðaðu seg fram til tveir nevndarsessir.

Fyri vali stóðu Tórhallur við Gil, ið varð afturvaldur og Andrea á Rípuni, sum hevur sitið í nevndini í fleiri skeið, seinastu trý árini sum næstforkvinna, ið ikki stillaði uppaftur. Fyri hana varð Eyðbjartur Sólheyg Skaalum valdur.

Nevndin hevur nú skipað seg soleiðis:

Jacob Eli S. Olsen er formaður, Tórhallur við Gil er næstformaður, Jona Højsted er kassameistari, Bergur Samuelsen er skrivari, og Eyðbjartur Sólheyg Skaalum er nevndarlimur.

Á fyrsta fundinum orðaði nevndin uppskot til evni at arbeiða við komandi nevndarárið, tá m.a. sáttmálasamráðingar standa fyri framman. Nógv er at tríva í og nevndin er spent at fara til verka.

Greinin varð fyrstu ferð løgd út 12. mai 2022

Christina Krzyrosiak Hansen gestarøðari á landsfundinum hjá Javnaðarflokkinum

Í 2017 gjørdist sosialdemokraturin yngsti borgarstjórin í Danmark nakrantíð. Hon er framvegis borgarstjóri í Holbæk, og verður saman við Mary Antonsdóttir, forkvinnu í Heilsuhjálparafelagnum, gestarøðari í Hovi komandi vikuskifti

 

SkrivaÐ:

Agnar Prestá

Leygardagin 21. mai verður landsfundur hjá Javnaðarflokkinum. Í ár verður hann í Suðuroynni.

Byrjað verður við morgunmati í Miðnámsskúlanum í Hovi klokkan níggju, og klokkan tíggju verður landsfundurin settur.

Aksel V. Johannesen skal sum vant halda formansrøðu, og síðani vera tveir gestarøðarar eisini. Talan er um Mary Antonsdóttir, forkvinnu í Heilsuhjálparafelagnum, og Christinu Krzyrosiak Hansen. 

Um gestin úr Danmark skrivar Javnaðarflokkurin, at hon í 2017, sum 25 ára gomul, gjørdist yngsti borgarstjóri í Danmark nakrantíð. Á kommunuvalinum í 2021 í fjør varð Christina Krzyrosiak Hansen endurvald við heili 46 prosent av atkvøðunum í Holbæk, ið er met har, og spátt verður, at Christina Krzyrosiak Hansen hevur eina bjarta framtíð í bæði kommunu- og landspolitikki í Danmark.

Greinin varð fyrstu ferð løgd út 10. mai 2022

Rimmar dagur á grynnuni i Vágsbotni

Havnarborgarar, fólk úr øllum landinum og eisini ferðafólk høvdu leygardagin høvi til at smakka alskyns fisk og aðrar vørur á sera forkunnuga tiltakinum “Ein dagur á grynnuni” - einki minni enn eitt plettskot

Glað børn og foreldur, abbar og ommur - havnarborgarar upplivdu og fingu smakk av føroyska sjótilfeinginum á tiltakinum "Ein dagur á grynnuni" í Tórsgøtu leygardagin (Mynd Jan Müller)

SkrivaÐ:

Jan Müller

Tú skal leita leingi at finna so mong glað og smílandi andlit sum leygardagin, tá skilafólk skipaðu fyri tiltakinum “Ein dagur á grynnuni” í Tórsgøtu og Vágsbotni í Havn.

Hundraðtals foreldur við børnum og ommu- og abbabørnum høvdu leitað sær í miðbýin henda óvanliga sólskinsdag. Fyri mongu fyrireikararnar mundi hetta eisini koma ómetaliga væl við, nú veðrið ikki hevur verið nakað serligt leingi. Góða veðrið gjørdi sítt til at gera løtuna so væleydnaða. 

Greinin varð fyrstu ferð løgd út 08. mai 2022

Unn Patursson tilnevnd stóra virðisløn

Útgávan “1902” við Kata er føroyska uppskotið til Tónleikavirðisløn Norðurlandaráðsins

(Savnsmynd: Sverri Egholm)

SkrivaÐ:

Ingi Samuelsen

Unn Patursson, sum hevur lagt tónleikin á útgávuni “1902” hjá sangbólkinum Kata til rættis, er tilnevnd Tónleikavirðisløn Norðurlandaráðsins í ár.

Talan er somu virðisløn, sum Eivør Pálsdóttir vann í fjør. Tónleikavirðislønin verður á øðrum hvørjum ári latin einum listafólki og annað hvørt ár til eitt tónleikaverk.

Tilsamans 12 tilnevningar eru.

Grundgevingin fyri at tilnevna “1902” hjá Kata ljóðar nakað soleiðis:

“Við útgávuni “1902” hevur tónasmiðurin Unn Paturson megnað at endurtulkað tann siðbundna føroyska tónleikin á ein hátt, sum bæði er spennandi og fangandi fyri modernaða lurtaran. Uppruna føroysku løgini eru løgd til rættis fyri kvinnuliga sangkvintett (Kata), sum Unn Patursson eisini er við í. Hóast Kata-samstarvið upprunaliga spratt úr bergtøkuni hjá kvinnunum av bulgarskum fólkatónleiki, eru ikki so nógvur av upprunaliga íblástrinum við í nýggju útgávuni. Heitið á útgávuni sipar til árið, tá siðbundin føroyskur tónleikur varð tikin upp á fonograf á fyrsta sinni. Tey flestu løgini eru sera gomul – nøkur av teimum úr miðøld. Lýrisku og spirituellu dygdirnar styrkast við einum varðligum brúki av elektronikki, slagverki og øðrum ljóðførum, og úrslitið er eitt hugtakandi musikalskt úttrykk, ið virkar bæði modernað og elligamalt um eina leið”.

Kata (Savnsmynd) 

Hini tilnevndu til tónleikavirðislønina eru:

Danmark:
“enTmenschT”, eitt verk fyri kvinnukór eftir Line Tjørnehøj og elektroniska EP-útgávan “Whyt 30” eftir Søs Gunver Ryberg.

Finnland:
Operan “Alma!” eftir Minna Leinonen og útgávan “Uni johon herään” ("Dreymurin eg vanki upp til") eftir Yona

Grønland:
Útgávan “Visual Happiness” eftir Andachan

Ísland:
Verkið “Víddir” fyri 9 floytur eftir Báru Gísladóttir og útgávan “Mother Melancholica” eftir Sóley Stefánsdóttir

Útgávan “The Exotica Album” eftir Øyvind Torvund og verkið “Hybrid Spetakkel” fyri sello, orkestur og elektronikk eftir Knut Vaage

Svøríki:
Útgávan “Diversity” eftir Ebo Krdum og verkið “Silent Earth” fyri kór og orkestur eftir Karin Rehnqvist 

Greinin varð fyrstu ferð løgd út 11. mai 2022

Málpolitikkur gjørdur fyri Kringvarpið

Endamálið við politikkinum er at tryggja dygdargott mál á øllum miðlapallum, og at økja um málsliga tilvitið hjá starvsfólkum. Tað er ein arbeiðsbólkur, ið varð samansettur í fjør, sum hevur orðað málpolitikkin

Mynd: Jens Kr. Vang

SkrivaÐ:

Tíðindaskriv

Í heyst fór Kringvarp Føroya undir at orða ein málpolitikk fyri stovnin, soleiðis at stovnurin lýkur síni lógarásettu, málsligu krøv. Sum einasti miðil av sínum slagi framleiðir Kringvarpið tilfar á føroyskum, og tí er málið eitt av størstu ábyrgdarøkjunum hjá stovninum, og eigur stovnurin at ganga á odda, bæði tá ið tað kemur til at varðveita og at endurnýggja málið.

Endamálið við málpolitikkinum er at tryggja dygdargott mál á øllum miðlapallum, at javnseta málið við onnur fak í Kringvarpinum og at økja um málsliga tilvitið hjá starvsfólkunum.
 
Arbeiðsbólkur gjørt politikkin
Í oktober 2021 varð ein arbeiðsbólkur settur at snikka saman málpolitikk fyri stovnin. Í arbeiðsbólkinum vóru Óluva Klettskarð, umboð fyri Føroyamál, Sólva Jónsdóttir, umboð fyri Nám, Ragnar Sigrunarson, umboð fyri Málstovuna, Jón Brian Hvidtfeldt, umboð fyri Felagið Føroysk Miðlafólk, og Solby Christiansdóttir, umboð fyri Kringvarpið.

Arbeiðsbólkurin hittist umleið eina ferð um mánaðin og skrivaði politikkin í felag. Síðani var politikkurin sendur starvsfólkunum í Kringvarpinum til hoyringar og at enda lagdur fyri kringvarpsstýrið í mai í ár.

Málpolitikkurin er skipaður við yvirskipaðum reglum fyri tilfar á øllum miðlapallum hjá KVF, reglum um tekst, teksting og týðing, og síðani eru leiðreglur og tilmæli.

Málpolitikkurin er ætlaður sum grundskjal, og tí skulu serskild undirskjøl gerast fyri at útgreina, hvussu málpolitikkurin skal fremjast í verki. Hetta arbeiðið verður gjørt innanhýsis á stovninum.

Greinin varð fyrstu ferð løgd út 10. mai 2022

Minnismerki um fyrsta bilin avdúkað á Kongabrúnni

Fitt av fólki høvdu leitað sær á Kongabrúnna leygardagin, tá minnismerki um fyrsta bilin í Føroyum varð avdúkað

 

SkrivaÐ:

Sverri Egholm

Fitt av fólki høvdu leitað sær á Kongabrúnna leygardagin, tá minnismerki um fyrsta bilin, sum kom á land í Føroyum fyri 100 árum síðani, varð avdúkað av borgarstjóranum Heðini Mortensen.

Havnar hornorkestur setti sín serliga dám á løtuni, og fólk fingu møguleika at síggja teir nógvu snotiligu veteranbilarnar.

Í sambandi við avdúkingina, var eisini elsti bilur í Føroyum, komin til Havnar úr Vágum.

Eirikur Lindenskov, sum hevur serligan áhuga fyri bilum, greiddi í røðu síni frá søguni um fyrsta bilin og hugleiddi um, hvussu stóran týdning bilurin hevur havt í menningini av føroyska samfelagnum.

Stjórin á Ford Danmark, Frank Skjærbæk Pedersen bar fram eina heilsu, har hann takkaði føroyingum og Wenzel fyri gott og gevandi samstarv.

Áðrenn minnismerkið varð avdúkað, segði borgarstjórin eisini nøkur orð.

Minnismerkið stendur á sjálvum bryggjukantinum á Kongabrúnni. Á minnismerkinum verður á føroyskum og enskum greitt frá, at tað var her, fyrsti bilurin í Føroyum kom á land tann 6. mai í 1922.

Eirikur Lindenskov og Magnus Gunnarson, sum hava serligan áhuga, og ikki minst holla vitan um bilar og bilasøgu, hava veitt ráðgeving í sambandi við, at minnismerkið er framleitt.   

Myndir: Tórshavnar kommuna

Greinin varð fyrstu ferð løgd út 07. mai 2022

Nýggja Bíbliutýðingin um at vera liðug

Nú er møguligt hjá øllum føroyingum at lesa 1. Mósebók í nýggju tíðingini og gera viðmerkingar til hana

(Savnsmynd)

SkrivaÐ:

Alda Nielsdóttir

Nú er møguleiki hjá øllum føroyingum, at lesa og gera viðmerkingar til nýggju føroysku bíbliuumsetingina.

Leingi hevur hon verið ávegis, og nú er komið so langt, at til ber at lata øllum Føroya fólki, úti sum heima, lesa 1. Mósebók í nýggju týðingini av Bíbliuni, skrivar Bíbliufelagið í tíðindaskrivi.

Tilfarið er lagt út á heimasíðuna hjá Føroyska Bíbliufelagnum www.biblia.fo, har til ber at taka PDF útgávu av 1. Mósebók niður. Viðmerkingar til tilfarið kunna sendast á teldupostin [email protected].

Tað var í 2016, at Hans Jacob Joensen, fyrrverandi biskupur, sum andaðist beint fyri jól í fjør, var liðugur at umseta alla Bíbliuna, uttan Sálmarnar, til føroyskt. David Johannesen, prestur, hevur síðani týtt Sálmarnar.

Tað er stórarbeiði at týða úr hebraiskum máli, sum Gamla Testamentið er skrivað á og úr grikskum, sum Nýggja Testamenti er skrivað á. Arbeitt verður við at lesa alla Bíbliuna ígjøgnum við atliti til gudfrøðiliga trúvirðið, góðan málburð og orð, áðrenn útgávan verður løggild og útgivin.

Nógv fólk í og uttan fyri Føroyar úr ymsum kirkjum og samkomum taka lut í arbeiðinum, skrivar Bíbliufelagið.

Greinin varð fyrstu ferð løgd út 13. mai 2022

Marilyn seld fyri 195 milliónir dollarar

Ikoniski málningurin hjá Andy Warhol varð seldur á uppboði í nátt

(Mynd: EPA)

SkrivaÐ:

Ingi Samuelsen

Ikoniska andlitsmyndin av amerikansku filmsstjørnuni Marlilyn Monroe á bláari bakgrund, varð týsnáttina seld fyri risaupphædd í New York.

Málningurin hjá Andy Warhol fór fyri ikki minni enn 195 milliónir dollarar, skrivar upphoðssøluhúsið Christie’s.

Hetta svarar til 1,37 milliardir í okkara krónum. Sostatt er hesin málningurin tann dýrasti frá 20. øld, ið er seldur á uppboði.

Andlitsmyndin av Marilyn Monroe varð málað í 1964 – tvey ár eftir at sjónleikarin doyði, helst av eini yvirdosis, skrivar dr.dk.

(Mynd: EPA)

Amerikanski listamaðurin Andy Warhol gjørdi fimm slíkar málningar í ymsum litum. Málningarnir eru nevndir eftir bakgrundslitunum.

Sambært miðlinum antiquestradegazette.com yvirhálar Warhol-málningurin fyrsta pláss frá Pablo Picasso og hansara málningi “Kvinnur úr Algier” frá 1955, sum í 2015 varð seldur fyri 179,4 milliónir dollarar.

Málningurin av Marilyn eitur 'Shot Sage Blue Marilyn'. Í 2013 varð hann seldur fyri 105 milliónir dollarar, sum við dagsins kursi svarar til 740 milliónir krónur.

Málningurin av Marilyn Monroe var ein partur av einum savni frá listasavnarunum Doris og Thomas Ammann, sum varð selt hjá Christie’s í New York.

Sveitsisku Doris og Thomas Ammann vóru systkin, og í áttati- og nítiárunum gjørdust tey gitin sum heimsins fremstu listasavnarar.

Thomas Ammann doyði í 1993, meðan Doris Amman doyði í fjør.

Eftir deyða Doris varð grunnurin 'Thomas and Doris Amman Foundation' settur á stovn, og tað er hesin, ið stendur sum seljari av ikoniska málninginum.

Sambært Bloomberg er keyparin amerikanski listasavnarin Larry Gagosian. Hann eigur eina røð av listahandlum, og keypir og selur nýmótans list.

Greinin varð fyrstu ferð løgd út 10. mai 2022

Kastrup: Hægsta talið av ferðandi í tvey ár

Yvir 1,8 milliónir ferðafólk nýttu Københavns Lufthavn í apríl, og tað er hægsta talið fyri ein mánaða síðani tíðliga í 2020. Ferðafólkatalið byrjar at nærkast tí, sum tað var, áðrenn koronufarsóttin kom - tó er framvegis nakað av muni, um samanborið veðrur við 2019

Tað er aftur nógv ferð á í Københavns Lufthavn (Mynd: EPA)

SkrivaÐ:

Agnar Prestá

Um ein ferðasist umvegis Kastrup fyri áleið tveimum árum síðani, var ógvuliga lítið av ferð á og heilt lítið av ferðafólki, í mun til hvat vanligt er - til tíðir var so at siga manntómt. Talan er um ein av teimum flogvallunum við mest ferðslu í norðara parti av Evropa, men Københavns Lufthavn var ávirkaður av koronustøðuni, sum av álvara setti flogferðsluna niður í ferð kring heimin.

Í síðstu viku kundi staðfestast, at ferðafólkatalið á flogvøllinum í Vágum byrjar at nærkast tí, sum tað var, áðrenn koronafarsóttin breyt út, tí útvið 37.000 ferðafólk fóru um flogvøllin í apríl. Og tað er líknandi støða á tí væl størri flogvøllinum á Amager. Hetta vísa nýggjastu tølini úr Danmark.

Í hesi vikuni varð ferðafólaktalið fyri apríl kunngjørt, og talan er um hægsta skrásetta talið í tvey ár.  Tað skrivar millum annað dr.dk. 

Greinin varð fyrstu ferð løgd út 11. mai 2022

Macron: Nýggja valskeiðið verður øðrvísi

Tað er tørvur á at skapa nýggjar mannagongdir, segði franski forsetin m.a. í røðu, eftir at hann varð tikin í eið sum forseti fyri aðru ferð

Farna vikuskiftið varð Emmanuel Macron tikin í eið sum forseti fyri aðru ferð (Mynd: EPA)

SkrivaÐ:

Alda Nielsdóttir

Sunnudagin 24. apríl varð Emmanuel Macron afturvaldur sum forseti í Fraklandi, og tá hann nú í holt við sítt næsta valskeið, verður tað við einari aðrari tilgongd til forsetaembætið.

Tað segði hann í røðu leygardagin, tá hann varð tikin í eið sum forseti fyri aðru ferð.

– Tað er tørvur á at skapa nýggjar mannagongdir – langt burtur frá gomlu siðvenjunum, segði hann m.a.

Hann segði eisini, at næsta valskeið hansara verður eitt nýtt valskeið og ikki bert eitt framhald av tí undanfarna.

Macron vísti m.a. á kríggið í Ukraina og veðurlagsbroytingar sum nakrar av størstu avbjóðingunum komandi tíðina.

Í seinna umfarinum av forsetavalinum 24. apríl eydnaðist tað Macron at verða afturvaldur við 58,5 prosent at atkvøðunum.

Tað er sera sjáldsamt, at ein franskur forseti megnar at verða afturvaldur. Emmanuel Macron er fyrsti franski forsetin síðan 1958, sum, uttan at vera partur av einari samgongu, megnar at verða afturvaldur.

Greinin varð fyrstu ferð løgd út 08. mai 2022

Korona er nú staðfest í Norðurkorea

Afturlatna landið er sloppið undan smittuni í yvir tvey ár, sambært almennum upplýsingum

Evsta nevndin í Norðurkorea við Kim Jong-un við borðendan savnað at viðgera álvarsstøðuna (Mynd: EPA)

SkrivaÐ:

Ingi Samuelsen

Meira enn tvey ár eftir at koronafarsóttin tók seg upp, váttar Norðurkorea nú fyri fyrstu ferð, at smittutilburðir er staðfestir í landinum. Tað skrivar AFP tíðindastovan.

Almennir miðlar kalla tað eina “álvarsliga tjóðarkreppustøðu” eftir at landið eftir øllum at døma er sloppið undan virussinum í yvir tvey ár.

Norðurkoreanski statsmiðilin KCNA sigur, at royndir frá sjúklingum, ið høvdu fepur í høvuðsstaðnum Pyongyang sunnudagin vísa, at talan kann vera um korona virus av omikron frábrigdinum.

Politisku leiðararnir í landinum, herundir Kim Jong-un, hava hildið kreppufund fyri at viðgera støðuna og hava boðað frá, at tey fara at seta eina eftirlitsskipan í verk. Talan er um neyðstøðu av álvarsligasta slag.

Sambært miðlinum ynskir Kim Jong-un at seta í verk eftirlit við landamørkini og niðursteingingar.

Hann hevur biðið borgarar um at “støðga spjaðingini av hesum óndsinnaða virus við at steingja økir í býum og landspartar kring alt landið”.

Frammanundan hevur ongin fráboðan verið frá almennari síðu um koronatilburðir í Norðurkorea.

Sambært heimsheilsustovninum WHO, framdi Norðurkorea seinast í 2020 13.259 koronakanningar. Ongin teirra vísti smittu.

Eygleiðarar halda, at norðurkoreanska heilsuverkið hevði fingið trupulleikar við at handfara eina umfatandi koronasmittu. Serfrøðingar halda heldur ikki, at landið hevur koppsett nakran av teimum 25 milliónum íbúgvunum í landinum, tí Norðurkorea hevur víst aftur tilboðum um koppsetingarevni frá WHO, Kina og USA.

Reuters skrivar, at Suðurkorea hevur boðið seg til at veita Norðurkorea hjálp við at basa smittuni.  

Greinin varð fyrstu ferð løgd út 12. mai 2022

Talið á deyðum í USA orsaka av korona farið upp um milliónina

Hetta svarar til at ein er deyður fyri hvørjar 327 amerikanarar

(Savnsmynd: EPA)

SkrivaÐ:

Ingi Samuelsen

Yvir 1 millión fólk eru nú deyð í USA orsaka av covid-19. Tað vísir ein uppgerð, sum Reuters hevur gjørt av smittuni, sum tók seg upp fyri góðum tveimum árum síðani.

Hetta svarar til, at ein persónur er deyður fyri hvørjar 327 amerikanarar. Talið av deyðstilburðum svarar til fólkatalið i San Fransisco ella Seattle.

Tá heimsheilsustovnurin WHO 11. mars 2020 boðaði frá, at talan var um eina heimsumfatandi farsótt, vóru 36 fólk deyð í USA við korona. Síðan spjaddi smittan seg sum steppueldur um landið, og fann gróðrarlíkindi í tættfólkaðum økjum, so sum New York, og leitaði sær síðan til allar krókar í landinum.

Í juni 2020 kom talið upp á tað sama, sum USA misti undir fyrra heimskríggi og í januar 2021 yvirhálaði talið amerikanska missin undir øðrum heimskríggi.

Í heimshøpi hevur smittan nú kravt 6,7 milliónir mannalív vísa almennu tølini. Veruligu tølini liggja helst nærri teimum 15 milliónunum, metir WHO, sambært Reuters. 

Greinin varð fyrstu ferð løgd út 12. mai 2022

Kríggið í Ukraina fer at raka heimsins fátækastu

Tað er ein vandamikl samanseting, at tvær av heimsins mest týðandi landbúnaðartjóðum eru í kríggi, samstundis sum prísirnir á matvørum hækka, sigur ST

Egyptaland er tað landið, sum í 2020 innflutti mest hveiti úr Ukraina – 3,08 milliónir tons (Mynd: EPA)

SkrivaÐ:

Alda Nielsdóttir

Umframt at kríggið í Ukraina ávirkar tey, sum eru nær við, metir ST, at 47 milliónir fólk afturat kunnu enda við at svølta, um kríggið heldur fram.

Umframt at kríggið ávirkar londini, sum eru tætt at krígnum, kemur tað nevniliga eisini at ávirka tey fátækastu í heiminum.

Tað at prísirnir á matvørur hækka og tvær av heimsins mest týðandi landbúnaðartjóðum eru í kríggi, er ein vandamikil samanseting, sigur Anne Poulsen, stjóri fyri norðurlendsku deildina hjá Matvøru- og Landbúnaðarfelagsskapinum hjá ST við DR.

– Har er eingin ivi um, at tað at fólk ikki hava ráð til mat, fer at elva til størri stríð, sigur hon.

Ukraina er m.a. ein týðandi útflytari av korn, og metir ST, at Ukraina undir vanligum umstøðum framleiðir mat til 400 milliónir fólk. Tí hevur kríggið í Ukraina stóra ávirkan á tey lond, sum eru von við at fáa korn úr Ukraina.

Sambært DR er uml. ein triðingur av øllum hveitinum, sum varð framleitt í Ukraina í fjør, ikki farin úr landinum. Orsøkin er, at Ukraina orsakað av krígnum ikki kann flyta vøruna umvegis Svartahavið til lond í Miðeystri og Norðurafrika.

Tey londini, sum í 2020 keyptu mest hveiti úr Ukraina, vóru Egyptaland, Indonesia og Bangladesj.

Mett verður, at 30 prosent av øllum hveitinum, sum verður útflutt í heiminum, kemur úr Ukraina og Russlandi. Í fjør vóru Russland, Ukraina ella bæði londini saman eisini størstu útflytarar av hveiti, mais, repju- og sólblómuolju.

Greinin varð fyrstu ferð løgd út 13. mai 2022

Minningarorð um Arnold Suna Fjallstein

-

 

SkrivaÐ:

Minningarorð / Ivan Skorheim

Arnhold Suni Fjallstein, sum var ein av stovnarunum av felagnum Camping.fo, er nú farin foldum frá, og er hann nú farin heim í Himmalin, heim í tann æviga búðstaðin, sum Guð hevði gjørt honum og okkum øllum, sum trúgva, tilreiðar.

Eg kom at kenna Arhold um heystið í 2005. Og kom hetta av, at vit báðir høvdu stóran áhuga í kamping í Føroyum og ynsktu vit at vita, um áhugi var millum føroyingar, at stovna eitt kampingfelag. Hetta bleiv gjørt, og eitur felagið í dag Camping.fo.

Tey fyrstu, sum vóru vald í nevndina, vóru Arnhold Fjalstein, Katrin Haraldsen og eg sjálvur, umframt tveir varalimir.

Tá eitt nýtt felag verður stovað, eru ofta nógvar meiningar um, hvussu og hvat eitt tílíkt felag skal gera, og har var Arnhold Fjallstein heilt einastandandi at taka samanum og finna semju millum allar limirnar.

Arnhold og eg hava arbeitt nógv saman, serliga vóru tað tey fyrstu fýra árini eftir at felagið var stovnað, til hann takkaði fyri seg í nevndini. Men hóast hann ikki var limur í nevndini tey seinnu árini, so var hann altíð klárur, saman við konunu, at rætta eina hjálpandi hond og hevur hann eisini mangan hjálpt okkum við góðum ráðum. Konan Henrid hevur eisini verið kassameistari í felagnum í fleiri ár.

Arnhold helt tað vera nokkso stuttligt, at eg búði í Leirvík, tí har sleit hann sínar barnaskógvar. Báðir vóru vit bakaralærdir og so høvdu vit tað til felags eisini, at vit høvdu áhuga í kamping, hann við húsbili og eg við húsvogni.

Tey seinastu árini hava vit tosa av og á í telefon og annars tá vit møttust, so var altíð tíð til eitt gott prát.

Arnhold Fjalstein skammaðist ikki við at fortelja, at hann var ein trúgvandi maður, og hevði sett sítt álit á tann livandi Gud, og nú er hann farin heim til sín frelsara at verða

Saknur verður í Arnhold í felagnum, men størstur verður saknurin hjá tær Henrid og øllum tykkara. Má Harrin, sum er alra troystari, troysta tykkum í sakninum.

Æra verið minni um Arnhold Suna Fjalstein

Ivan Skorheim,
Camping.fo 

Greinin varð fyrstu ferð løgd út 09. mai 2022

Konfirmantar í Kollafjarðar kirkju sunnudagin

-

 

SkrivaÐ:

Innsent

Sunnudagin 15. mai kl. 11 verður konfirmatión í Kollafjarðar kirkju. Prestur er Derhard Jógvansson.

Konfirmantarnir eru hesir:

Andrea Jóhansdóttir Fagraklett. Jóan Paula gøta 5, Kollafjørður.

Ása Weihe. við Sjógv 25, Kollafjørður. Dagurin verður hildin í Caféini við Sjógv (hjá Børga) frá frá klokkan 15.

Eyan Marcelino Joensen. Jóan Paulagøta 4, Kollafjørður.

Fríði Gullaksen. Bøgøta 25, Kollafjørður. Dagurin verður hildin í missiónshúsinum frá klokkan 15..

Fríður Dam Johannesen. Jóan Paulagøta 3, Kollafjørður. Dagurin verður hildin frá klokkan 17.

Gisleyg Guðrun Johansen. Flatnabrekka 8, Signabøur.

Lív Kjærbæk. Traðavegur 13, Kollafjørður. Dagurin verður hildin frá klokkan 15.

Nanna Schiller Jóannisdóttir. á Oyrareingjum 102, Oyrareingir. Dagurin verður hildin frá klokkan 16.

Ove Reinert Ólavsson. í Líðini 77, Kollafjørður.

Rannvá Rodmundsdóttir. Flatnavegur 3, Signabøur. Dagurin verður hildin frá klokkan 16.

Regin Petur Petersen. Traðavegur 5B, Kollafjørður.

Greinin varð fyrstu ferð løgd út 11. mai 2022