Lat aftur Yvirlit list articles in edition

Leygardagur 06. august 2022 | Nr. 32 | Árgangur 3 | Kr. 0,00

1 Leygardagur 06. august 2022

Grímuklæddur norðmaður hevði eitt show av einari aðrari verð

Alan Walker fekk Vágsbø at hoppa og dansa. Ikki fyrr enn hann var á veg av pallinum, tosaði plátuvendarin norskt við fjøldina

(Mynd: Jens Kr. Vang)
SkrivaÐ:

Sverri Egholm

Absolutt tað størsta navnið á Summar Festivalinum í ár endaði sína konsert nakað eftir midnátt hóskvøldið. Tá hevði hann í meira enn ein tíma fingið Vágsbø - alt frá børnum, ungum og vaksin - uppfrá til hittrøðina, sum hann kom við.

[object Object](Mynd: Jens Kr. Vang)

Alan Walker, hvørs fulla navn er “Alan Olav Walker”, er føddur í Englandi í 1997, og hevur bretskan pápa og norska mammu. Hann er uppvaksin í Bergen, og byrjaði veruliga at gera um seg sum DJ ella plátuvendari í 2015 tá stóra hittið "Faded" kom út.

Frá byrjan av konsertini var hann í samband við áhoyrarnar, sum í kvøld vóru nógvir í tali. Byggingin av nýggja mentanarhúsinum tekur nakað av Vágsbøi, so tað er ilt at siga, um áhoyrararnir vóru líka nógvir, sum til høvuðsnøvn onnur ár.

Veðurstovurnar høvdu lovað regn, og tað bleiv eisini soleiðis í stóran mun. Onkra løtu var tó turt, men móti endanum fór at regna illa.

[object Object](Mynd: Jens Kr. Vang)

Alan Walker brúkar masku tá hann framførir. Hetta gjørdi hann langt áðrenn korona kom fram, og tað ger hann framvegis. Tað var eitt sindur trupult at hoyra, hvat hann segði aftanfyri maskuna, men hinvegin vóru tað rættiliga einfaldir boðskapir, hann hevði til fjøldina.

“Hoppið” ella “syngið við” rópti hann fyri tað mesta.

[object Object](Mynd: Jens Kr. Vang)

Showið var av einari aðrari verð. Har var eldur, roykur, konfetti og lasarar fyri allar pengarnar. Øll tey kendu løgini vórðu framførd, og endað varð við stórhittinum Faded í alskyns útgávum.

Tá hann takkaði fyri seg kom tað norska endiliga fram, og hann segði millum annað “Vi sees en annen gang”.

Greinin varð fyrstu ferð løgd út 05. august 2022

  • Blaðið

    Stovnað 2020

    Útgevari: Knassar

    Upplag: 394

    Lisnar síður: 2821

    Dagført 10. hvørt sekund
  • Samband

    tel. 20 80 80

    redaktion@knassar.fo



    Ingi Samuelsen

    Redaktørur

    ingi@knassar.fo

    tel. 22 22 73


  • Borgar Kristiansen

    Lýsingarráðgevi

    borgar@knassar.fo

    tel. 23 66 01

2 Leygardagur 06. august 2022

Finnast at methøgu inntøkunum hjá stóru oljufeløgunum

Politikarar og felagsskapir mótmæla høgu inntøkunum hjá oljufeløgunum, um somu tíð sum methøgir orkuprísir raka fólk flest meint

 
SkrivaÐ:

Jan Müller

Fleiri av teimum størstu oljufeløgunum í Vesturheiminum so sum ExxonMobil, Chevron, Shell, BP, Total og onnur hava metinntøkur í hesum døgum, nú olju- og gassprísurin er hægri enn nakrantíð fyrr. Hetta skriva altjóða miðlar so sum Bloomberg. Ein orsøkin er russiska innrásin í Ukraina, sum hevur fingið orkuprísir at fara til himmals.

[object Object]

Samtíðis raka høgu orkuprísirnir sera meint í londunum í Evropa og USA eins og aðrastaðni í heiminum. Umframt russisku innrásina í Ukraina, sum hevur fingið lond í Evropa at boykotta orku úr Russlandi, so  er eftirspurningurin eftir olju og gassi vaksin, og tað hevur fingið orkuprísirnar at seta eitt met fyri og annað eftir.

Oljurisarnir forvinna so mikið nógvan pening í løtuni, at tað hevur elvt til harða mótstøðu í fleiri londum móti oljufeløgunum. Exxon, Chevron, Shell, BP og TotalEnergies hava seinastu tríggjar mánaðirnar fram til endan av juni forvunnið meira enn 50 mia. dollarar. Somuleiðis hevur eitt nú italska orkufelagið ENI sett inntøkumet seinastu tíðina.

Henda gongdin hevur fingið bæði politikarar og felagsskapir at leggja eftir orkufeløgunum. Tey vilja hava at orkufeløgini at rinda eyka skatt á ovurstóra inntøkuvøkstrinum. Hesin stavar nevniliga ikki frá størri íløgum men frá øktum prísum aleina.

Støðan fekk nú um dagarnar amerikanska forsetan Biden at siga, at eitt nú Exxon forvann meira pening enn Gud og segði seg vilja gera øllum greitt, hvussu nógv Exxon forvinnur uppá olju- og gasssøluna. 

Exxon og  Chevron hava svarað aftur, at tey hava økt um íløgur í nýggja framleiðslur fyri at nøkta vaksandi eftirspurninginum. Kortini verður funnist at feløgunum, tí sagt verður, at tey gera ikki fleiri íløgur enn undan koronakreppuni. Heldur rinda oljufeløgini meira út til sínar partaeigarar verður sagt.

Nú um dagarnar gjørdi demokratiski senatorurin Joe Manchion frá statinum West Virginia greitt, at hann fer at taka undir við veðurlagspakkanum hjá Joe Biden forseta. Hann hevur annars higartil forðað forsetanum í at gjøgnumføra sín verðurlagspolitikk. 

Greinin varð fyrstu ferð løgd út 01. august 2022

3 Leygardagur 06. august 2022

Danska oljuævintýrið 50 ár - nógv olja og gass eftir í undirgrund

Danmark fer framhaldandi at vera týðandi framleiðari av olju og gassi, hóast landið hevur steðgað nýggjari leiting

1. august 1972 skrúvaði Hendrikur prinsur frá fyrstu donsku oljuni umborð á tangaskipinum “Marie Nærsk”, meðan Mærsk Mc-Kinney Møller, stjóri var hjástæddur.
SkrivaÐ:

Jan Müller

1. august vórðu liðin 50 ár, síðani fyrsta danska oljan kom upp úr Norðsjónum. Hesi árini hevur danska staturin forvunnið 500 mia. kr. frá olju- og gassframleiðsluni og hevur landið meginpartin av tíðini verið sjálvveitandi við olju og gassi eins og útflutt stórar nøgdir til útlandið. Olja og gass hava verið ein týðandi grundarsteinur undir danska vælferðarsamfelagnum.

[object Object]

Nú farið er um eitt vegamót verður samtíðis mett, at Danmark í 2027 fer at gerast nettoútflytari av bæði olju og gassi. Síðani fer oljuframleiðslan at falla, meðan framleiðslan av gassi fer at halda fram við at vera størri enn eginnýtslan  fram til 2035.

Danska fólkatingið samtykti í 2020 eina lóg, sum sigur, at framleiðslan av olju og gassi skal steðga heilt í 2050. Samtykt varð eisini, at nýggj leiting eftir olju og gassi skal steðga frá 2020.

Greinin varð fyrstu ferð løgd út 02. august 2022

4 Leygardagur 06. august 2022

Eitt gott fyrra hálvár

Virksemið hjá BankNordik-samtakinum royndist væl ársins fyrstu seks mánaðir. Vaksandi inflatión og búskaparlig óvissa settu tó eisini sín dám á tíðarskeiðið

 
SkrivaÐ:

Tíðindaskriv

Fyrra hálvár vísti góð úrslit á øllum virkisøkjum, og grundraksturin og lønsemið hjá bankanum eru batnað.

– Vit hava sæð ein vøkstur í bankalánum og realkredittlánum til kundar, ið hava keypt nýggjan bústað ella umvælt eldri hús. Sum heild eru føroysk húski og vinnulív framvegis væl fyri, men tað skerst ikki burtur, at yvirskipaði prísvøksturin og hækkandi rentan ávirka fíggjarliga rásarúmið hjá kundunum, sigur Árni Ellefsen, forstjóri í BankNordik.

Hóast kríggj og inflatión hava elvt til eina ávísa búskaparliga óvissu um allan heim, metir bankin fíggjarligu útlitini fyri restina av árinum vera góð. Leiðslan hevur lagt upp fyri møguligum neiligum avleiðingum fyri innlendska marknaðin og í tí sambandi sett pening av til fíggjarlig tap, ið kunnu fara at vísa seg.

Rentuhækking fyri framman
Í juli hækkaðu evropiski miðbankin (ECB) og danski tjóðbankin rentuna, og í tí sambandi boðaði BankNordik eisini frá, at rentan á innlánum og útlánum við broytiligari rentu fer at hækka. Sostatt verður tað dýrari at læna pening, samstundis sum minni skal gjaldast í negativari rentu av innlánum. Nógv bendir á, at miðbankin og tjóðbankin aftur fara at hækka rentuna eftir rentufundin tann 8. september. Verður henda rentuhækking veruleiki, fer BankNordik eisini at hækka rentuna, og tað merkir, at negativa rentan væntandi verður avtikin í næstum.

Nýggj leiðsla góðkend av Fíggjareftirlitinum
Í juni kunngjørdi bankin, at Turið F. Arge og Heini Thomsen vóru sett sum nýggir stjórar, og í juli fingu tey sonevndu fit and proper-góðkenningina frá Fíggjareftirlitinum, ið er neyðug fyri at kunna røkja stjórastarv í einum peningastovni. Tey bæði manna stjórnina í samtakinum saman við Árna Ellefsen, forstjóra, til hann leggur frá sær, og Turið F. Arge tekur við sum nýggjur forstjóri.

Roknskapurin í stuttum

  • Úrslitið fyri skatt gjørdist 113 mió. kr. samanborið við 192 mió. kr. sama tíðarskeið í 2021, tá ið 90 mió. kr. stavaðu frá søluni av danska virkseminum
  • Rakstrarúrslitið fyri niðurskrivingar gjørdist 96 mió. kr. samanborið við 85 mió. kr. sama tíðarskeið í 2021
  • Niðurskrivingar á útlánum vórðu afturførdar fyri 31 mió. kr. samanborið við 23 mió. kr. í afturførdum niðurskrivingum sama tíðarskeið í 2021
  • Útlánini hækkaðu úr 7,6 mia. kr. sama tíðarskeið í 2021 til 7,7 mia. kr.
  • Realkredittlánini hækkaðu úr 2,5 mia. kr. sama tíðarskeið í 2021 til 2,7 mia. kr.
  • Innlánini hækkaðu úr 7,7 mia. kr. sama tíðarskeið í 2021 til 8,9 mia. kr.
  • Leiðslan væntar, at nettoúrslitið í ár verður millum 160 og 190 mió. kr.

Greinin varð fyrstu ferð løgd út 04. august 2022

5

Størv

Rektari til Fróðskaparsetur Føroya

Meira Umsóknarfreist: 07. oktober 2022

Sølu- og logistikkfólk til Smyril Line Cargo

Meira Umsóknarfreist: 16. oktober 2022

Deildarleiðari til Ellisheimið

Meira Umsóknarfreist: 18. oktober 2022

Námslektarastarv í sernámsfrøði á Setrinum

Meira Umsóknarfreist: 12. oktober 2022

Nordiska ministerrådet i Köpenhamn söker en jurist/seniorrådgivare för upphandlingsfrågor, GDPR och allmän juridisk rådgivning

Meira Umsóknarfreist: 12. oktober 2022

Lærlingur til IDEmøblar

Meira Umsóknarfreist:

Verkætlanarleiðarar til Norðurlandahúsið

Meira Umsóknarfreist: 09. oktober 2022

Trý starvsfólk til sosialpsykiatriina í Suðurstreymi

Meira Umsóknarfreist: 06. oktober 2022

Gigni søkir 2 heilsufrøðingar

Meira Umsóknarfreist: 24. oktober 2022

Starvsfólk til Próvstovuna

Meira Umsóknarfreist: 06. oktober 2022

Hug at selja gólv?

Meira Umsóknarfreist: 10. oktober 2022

Vísindastarv í dagstovnanámsfrøði á Setrinum

Meira Umsóknarfreist: 19. oktober 2022
6 Leygardagur 06. august 2022

Fann dynamitt í gomlum húsi

Í sambandi við umvæling av einum eldri húsum, varð komið fram á gamlar dynamittstengur

(Savnsmynd: Jens Kr. Vang)
SkrivaÐ:

Sverri Egholm

Hóast løgreglan í stóran mun var upptikin av fullum fólki og harðskapsmálum á ólavsøku, var eisini annað at gera.

Ein maður ringdi í ólavsøkudag til løgregluna og boðaði frá, at hann var komin fram á nakrar dynamittstengur. Hetta var í sambandi við, at hann umvældi eini eldri hús.

Upplýsingarnir og myndir eru sendar til Danmarkar, og síðani skulu danskir serfrøðingar í samráð við Arktisk Kommando finna útav hvat víðari skal gerast.

Greinin varð fyrstu ferð løgd út 30. juli 2022

7 Leygardagur 06. august 2022

Tyrlan fór eftir ferðafólki umborð á Norrønu

Í nátt varð boðað frá, at eitt ferðafólk hevði tørv á bráðfeingis læknahjálp

(Savnsmynd: Kiran Jóanesarson)
SkrivaÐ:

Alda Nielsdóttir

Mánanáttina var tyrlan hjá Atlantic Airways boðsend til Norrønu eftir einum persóni, sum hevði tørv á bráðfeingis læknahjálp.

Tað var klokkan umleið trý korter til eitt, at boðað varð frá, at eitt ferðafólk umborð hevði tørv á hjálp.

Sambært heimasíðuni hjá Vørn varð Norrøna stødd 23 fjórðingar eystur úr Skálhøvda.

Greinin varð fyrstu ferð løgd út 01. august 2022

8 Leygardagur 06. august 2022

Kvinna fekk skaða í fjøllunum

Tyrlan hjá Atlantsflog kallað til Kunoyar

(Savnsmynd)
SkrivaÐ:

Ingi Samuelsen

Bjargingartyrlan hjá Atlantsflog var mánadagin seinnapartin í Kunoy eftir eini kvinnu, sum var komin til skaða á einum gongutúri í høgu fjøllunum.

Heimasíðan hjá Vørn skrivar, at kvinnan hevði fingið skaða í armin meðan hon var stødd ovarlaga á Kunoynni.

Kvinnan varð flutt til Landssjúkrahúsið.

Greinin varð fyrstu ferð løgd út 02. august 2022

9 Leygardagur 06. august 2022

Herverk við Djúpumýru

Onkur hevur m.a. skorið búmerki av nøkrum setrum – Sambært løgregluni er eingin undir illgruna í málinum

(Savnsmynd)
SkrivaÐ:

Alda Nielsdóttir

Løgreglan hevur fingið fráboðan um, at onkur hevði framt herverk á nøkur setur á fótbóltsvøllinum við Djúpumýru í Klaksvík.

Talan var m.a. um nøkur setur á útskiftingarbonkinum, har onkur hevði skorið búmerkini av, segði vaktleiðarin á løgreglustøðini í Havn hósmorgunin.

Vaktleiðarin legði afturat, at eingin er undir illgruna í málinum enn.

[object Object]
(Mynd: Jákup Ósá/Norðlýsið)

Norðlýsið skrivar, at onkur eisini setti eld á nøkur setur í gamla skýlinum hjá KÍ. Sí fleiri myndir her.

Greinin varð fyrstu ferð løgd út 04. august 2022

10 Leygardagur 06. august 2022

Brúkti harðskap móti vakti

Ein persónur gjørdist óður, tá hann varð koyrdur úr einum skeinkistaði í Klaksvík, og ein bilur fekk skaða, tá eitt stakitt koppaði niður á hann

(Savnsmynd)
SkrivaÐ:

Alda Nielsdóttir

Fríggjanáttina varð eitt harðskapsmál meldað í Klaksvík.

Ein persónur varð koyrdur úr einum skeinkistaði í býnum, og viðkomandi gjørdist óður og brúkti harðskap móti einum vakti, sigur løgreglan.

Hetta var um klokkan eitt fríggjanáttina.

Á Summar Festivalinum hendi eisini eitt óhapp, har eitt stálstakitt, sum stendur rundanum festivaløkið, koppaði niður á ein bil.

Hetta hendi, tá onkur var á veg inn á festivaløkið. Hvønn talan er um vita tey ikki, sigur vaktleiðarin á løgreglustøðini, men Summar Festivalurin er tryggjaður, so helst fær eigarin endurgjald fyri skaðan á bilin harfrá.

Greinin varð fyrstu ferð løgd út 05. august 2022

11 Leygardagur 06. august 2022

Steno miðstøð til viðgerð av diabetes verður á Landssjúkrahúsinum

Á nýggjárinum byrja tær ítøkiligu fyrireikingarnar at seta tað í verk, sum stendur í virkisætlanini um viðgerðartilboð, fyribyrging, gransking og nýggjan bygning - Novo Nordisk grunnurin fíggjar

Nýggja diabetesmiðstøðin skal byggjast upp í bygning C á Landssjúkrahúsinum, sum er hvíti bygningurin til høgru (Mynd: ls.fo)
SkrivaÐ:

Ingi Samuelsen

“Uppskot um løgtingslóg um heimild at taka ímóti peningaupphædd frá Novo Nordisk Fonden”.

Soleiðis eitur fyrsta uppskotið til løgtingslóg í hesum tingárinum, sum varð lagt fyri tingið í gjár. Uppskotið snýr seg um at geva Kaj Leo Holm Johannesen, landsstýrismanni við heilsumálum heimild til at taka ímóti 121 milliónum krónum frá danska grunninum, og at upphæddin hesi komandi 10 árini verður brúkt til at fíggja rakstur og løgur innan viðgerð og gransking av diabetes (sukursjúku) og endokrinologiskum sjúkum annars, stendur at lesa í lógaruppskotinum.

Í tíðindaskrivi frá Heilsumálaráðnum í gjár verður nærri greitt frá, at talan er um eina sokallaða Steno miðstøð, sum verður sett á stovn á nýggjárinum.

Nú er lógaruppskotið lagt fyri Løgtingið, sum skal heimila landsstýrismanninum við heilsumálum at taka ímóti pengunum frá Novo Nordisk Fonden. Ætlanin er, at nevndin fyri Novo Nordisk Fonden á nevndarfundi í september fer at taka støðu til samstarvið og góðkenna játtanina, so farast kann undir Steno Miðstøðina frá 1. januar 2023, verður sagt í tíðindaskrivinum.

[object Object]Kaj Leo Holm Johannesen (mynd: hmr.fo)

Kaj Leo Holm Johannesen, landsstýrismaður, fegnast um tilgongdina higartil og væntar sær nógv av nýggju Steno Miðstøðini og samstarvinum við Novo Nordisk Fonden.

- Við Steno Miðstøðini byrjar ein nýggjur kapittul í føroyskari heilsusøgu. Vit hava frammanundan eina vælvirkandi diabetesviðgerð, men við nýggju miðstøðini verða viðgerðartilboðini til fólk við diabetes og øðrum endokrinologiskum sjúkum lyft upp á eitt enn hægri stig enn í dag. Somuleiðis eri eg glaður fyri, at samstarvið við Novo Nordisk Fonden fer at styrkja granskingina innan diabetes og endokrinologi umframt heilsugransking sum heild í Føroyum, sigur landsstýrismaðurin.

Heilsumálaráðið og Novo Nordisk Fonden hava í eina tíð arbeitt við at gera eina virkisætlan um viðgerðartilboð, fyribyrging og gransking innan diabetes og endokrinologiskar sjúkur annars. Hetta er gjørt við støði í umfatandi fyrireikandi arbeiði saman við viðkomandi pørtum. Fleiri arbeiðsbólkar við heilsustarvsfólkum o.ø. eru settir, sum eru komnir við uppskotum um átøk at seta í verk. Virkisætlanin er orðað við støði í uppskotum hjá arbeiðsbólkunum.

Í virkisætlanini eru ein røð av viðgerðartilboðum innan diabetes og endokrinologiskar sjúkur annars umframt átøk innan fyribyrging. Talan er ikki bara um virksemið á sjálvari Steno Miðstøðini, men á øllum heilsuøkinum, t.d. hjá kommunulæknunum, sum í høvuðsheitum taka sær av sjúklingum við diabetes typu 2.

Stórur dentur verður harumframt lagdur á at menna og stimbra gransking innan diabetes og endokrinologi umframt granskingarundirstøðukervi.

At hýsa nýggju Steno Miðstøðini skal ein uppíbygging gerast á Landssjúkrahúsinum. Talan verður um at byggja upp í verandi bygning C, sum er hvíti bygningurin, ið vendir oman og niðan frá J. C. Svabosgøtu.

Á nýggjárinum byrja tær ítøkiligu fyrireikingarnar at seta tað í verk, sum stendur í virkisætlanini um viðgerðartilboð, fyribyrging, gransking og nýggjan bygning.

Samstarvið við Novo Nordisk Fonden verður galdandi í 10 ár og verður fíggjað við tilsamans 123 milliónum krónum. Upphæddin skal brúkast til at fíggja tey átøkini, sum Heilsumálaráðið og Novo Nordisk Fonden eru samd um at samstarva um. Eftir tey fyrstu 10 árini verður møguleiki fyri at leingja samstarvið við Novo Nordisk Fonden í fýra ár í senn.


Greinin varð fyrstu ferð løgd út 03. august 2022

12 Leygardagur 06. august 2022

Etika matstova letur upp á Høgabóli

Talan er um fyrru av tveimum nýggjum sushi-matstovum

 
SkrivaÐ:

Ingi Samuelsen

Fólk á Skálafjarðarleiðini hava nú møguleika at fara út at eta sushi á matstovu í nærumhvørvinum.

Í gjár lat upp onnur Etika-matstovan í Føroyum - á Høgabóli.

Tað er eftirhondini 13 ár síðani, at Gist & Vist lat upp fyrstu Etika sushi-matstovuna upp á Áarvegnum í Havn. Síðan tá er hesin serligi japanski munnbitin, har klistrað rís, turkaður tari og ráir fiskabitar eru høvuðstættir, nærum blivin gerandiskostur – serliga í og rundan um høvuðsstaðin.

Nógv fólk vóru samankomin tá nýggja sushi matstovan á Høgabóli lat upp í gjár.

- Vit fara at brúka dagin í dag til at rigga tað seinasta til, og so gleða vit okkum at taka ímóti tykkum, tá vit lata upp fyri matstovugestum hósdagin, skrivar Etika á sosialu miðlunum.

Matstovan á Høgabóli er ikki einasta nýggja matstovan í Etika-ketuni, sum nú letur upp. Fyrsta dagin letur eisini ein nýggj matstova við Sundsvegin, ið er bygd í tilknýti til Á-handilin við Tórsbreyt. 

[object Object]

Greinin varð fyrstu ferð løgd út 03. august 2022

13 Leygardagur 06. august 2022

Brimverjan í Hvalba liðugt umvæld

Sjálvt grótarbeiðið er liðugt, og nú skal nakað av betongdekkinum gerast sum tað siðsta, áðrenn arbeiðið er endaliga liðugt, sigur Hvalbiar kommuna

(Mynd: Hvalbiar kommuna)
SkrivaÐ:

Alda Nielsdóttir

Tá brimverjan í Hvalba fórst illani av brimi, ið var um mánaðarskiftið februar/mars 2020, bleiv støða tikin til at gera hana aftur.

Hvalbiar kommuna skrivar, at sjálvt grótarbeiðið nú er liðugt.

Tað er RTS, sum hevur gjørt arbeiðið, sum tey í kommununi siga er væl úr hondum greitt, og eru tey sera væl nøgd við tað.

Nú skal nakað av betongdekkinum gerast sum tað siðsta, áðrenn arbeiðið er endaliga liðugt, skrivar kommunan.

Greinin varð fyrstu ferð løgd út 01. august 2022

14
Leygardagur 06. august 2022

Dagurin tá alt er ókeypis

Føroya Sjómannadagur verður aftur í ár eftir ein steðg í tvey ár. Tað verður frá 15. til 20. august

(Mynd: Oliver Joensen)
SkrivaÐ:

Tíðindaskriv

So fara vit aftur at hugna okkum á Føroya Sjómannadegi. Rúsfríi dagurin har alt er ókeypis fyri øll vitjandi.

Sum vituligt er, so hevur korona eisini rakt Føroya Sjómannadag í 2020 og 2021, tá vit avgjørdu ikki at hava tiltakið. Men nú er kósin løgd og byrjað verður mánadagin 15. august. Dagarnar eftir tað verður skipað fyri ymiskum tiltøkum og øðrum.

Fríggjadagin 19. august, verður skipað fyri fiskikapping á Kósabrúnni fyri børnum við foreldrum. Eftir fiskikappingina er vatnkríggj á Vágni, har skip luttaka við børnum og vaksnum umborð. Neyðugt er hjá øllum, ið fara umborð á bátar og skip, at vera í bjargingarvesti.

Leygardagurin byrjar við stórum morgunmatarborði, síðani fer eitthvørt at henda allan dagin. Myndirnar niðanfyri eru frá Føroya Sjómannadegi 2019.

Vit eru ikki enn rættuliga lidnir at seta skránna fyri vikuna, viku 33 saman, men hon verður kunngjørd her á Norðlýsinum, so skjótt hon er tøk, helst fyrst í komandi viku.

Gleði tykkum til eitt stórt ókeypis og rúsfrítt tiltak leygardagin 20. august í ár.

Greinin varð fyrstu ferð løgd út 03. august 2022

15 Leygardagur 06. august 2022

Fyrstu loftmyndirnar av nýggja eldgosinum í Íslandi

Tað spríkir úr íslendsku undirgrundini 40 kilometrar úr høvuðsstaðnum, Reykjavík

(Mynd: Almannavarnadeild ríkislögreglustjóra)
SkrivaÐ:

Sverri Egholm

Seinnapartin fór at spræna úr einari 100 metrar langari sprungu í Meradølum, nærhendis Fagradalsfjall og 40 kilometrar úr íslendska høvuðsstaðnum, Reykjavík.

Jarðsjálvtar hava verið seinastu dagarnar og tað var bara spuriningur um tíð áðrenn groyti fór at spræna úr undirgrundini.

Almannavarnadeildin hevur lagt loftmyndir út av gosopinum í Meradølum.

[object Object](Mynd: Almannavarnadeild ríkislögreglustjóra)

Greinin varð fyrstu ferð løgd út 03. august 2022

16 Leygardagur 06. august 2022

Meradalur kann fyllast eftir einari viku

Millum 15 og 30 rúmmetrar spræna úr eldgosinum um sekundið

(Mynd: Mbl.is)
SkrivaÐ:

Sverri Egholm

Um tað heldur fram at goysa við 30 rúmmetrum um sekundið í Meradali á Reykjanesi, so er dalurin fyltur upp um eina viku, sigur eldgosserfrøðingurin Þor­vald­ur Þórðar­son í samrøðu við mbl.is.

Tað spræna nú millum 15 og 30 rúmmetrar um sekundið úr eldgosinum, og um tað heldur sær á 15 rúmmetrum, tekur tað umleið tríggjar vikur áðrenn grótbræðingin hevur fylt dalin.

Floymir yvir í Meradali, kann vegurin á Suðurstrondini, vera í vanda, skrivar Morgunblaðið.

Eldgosið í Meradali er væl størri enn tað sum var við Fagradalsfjall í 2021. Sprungan sum at byrja við var 300 metrar lang er nú minkað til einar 200 metrar.

[object Object]

Greinin varð fyrstu ferð løgd út 04. august 2022

17 Leygardagur 06. august 2022

Fimm til tíggju ferðir størri enn í fjør

Umleið 20 til 50 rúmmetrar av groyti spríkja úr sprunguni í Meradølum

(Mynd: Mbl.is)
SkrivaÐ:

Sverri Egholm

Eldgosið sum mikudagin byrjaði í Meradølum á Reykjanesi, er fimm til tíggju ferðir størri enn útbrotið í Geldingardali í fjør.

Sprungan sum lat seg upp er tríhundrað metrar lang, og umleið 20 til 50 rúmmetrar spríkja úr um sekundið.

Tað er metingin hjá Magnús Tuma Guðmundsson frá íslendska universitetinum. Hann gjøgnumgekk støðuna á tíðindafundi fyri løtu síðani, skrivar Morgunblaðið.

Hann segði tó, at eldgosið ikki var so stórt, at infrakervið í løtuni er í vanda. Útbrotini eru longur vekk frá eldgosunum síðsta ár, men ansast skal kortini eftir.

Tað er trupult at meta um hvussu eldgosið fer at vera næstu dagarnar, men væntast kann, at nógvu jarðsjálvtarnir halda uppat. Hann greiddi eisini frá, at tað ikki er sannlíkt, at eldgos verður í øðrum økjum næstu tíðina.

Greinin varð fyrstu ferð løgd út 03. august 2022

18 Leygardagur 06. august 2022

Næstu 100 til 200 árini verða javnan eldgos á Reykjanesi

Í løtuni bendir ikki á, at tað fer at goysa á Reykjanesi innan teir næstu dagarnar, men tað kann broytast skjótt, sigur gosfjallaserfrøðingur

(Savnsmynd: RUV)
SkrivaÐ:

Sverri Egholm

(Upptøka: Frá útbrotinum í Geldingadali í fjør)

- Vit eru farin inn í eina eldgos-árstíð. Spenningur er í allari Reykjanes-hálvoynni. Um eitt útbrot verður við Fagradalsfjall, Eldvørp ella Krýsuvík er ómøguligt at siga, men tað er heilt sikkurt, at tað fer at goysa á Reykjanesi, sigur gosfjallafrøðingur Ármann Hösk­ulds­son, í samrøðu við heimasíðuna hjá Morgunblaðnum.

Tey næstu 100 til 200 árini fer tað at vera ófriðarligt á Reykjanesi, og serfrøðingurin metir, at tað í hesari tíðini fara at vera millum 10 og 20 eldgos við jøvnum millumbili.

Ristingarnar eru tekin uppá, at vit koma út úr 700 til 800 tíðarskeiðinum, har spenningurin hevur verið bygdur upp. Nú er tíð at sleppa spenninginum.

- Tá fer Jørðin í hetta skifti við jøvnum jarðsjálvtum og regluligum eldgosum næstu 100 til 200 árini, sigur hann.

Ármann Hösk­ulds­son sigur við Morgunblaðið, at tað er ilt at siga um tað fer at goysa í dag ella í september.

- Í løtuni bendir so ikki á, at tað verður innan teir næstu dagarnar, men tað kann broytast uppá eina lítla løtu, sigur Ármann Hösk­ulds­son.

Nógvir jarðsjálvtar hava verið seinastu dagarnar. Tann harðasti var í gjárkvøldið, tá ein jarðsjálvti varð máldur til 5,4 á richter-stiganum. Eingin fólkastaði stóðst av sjálvtanum, men serliga í býnum Grindavík, tríggjar kilometrar frá jarðsjálvtanum, merktiskt tað væl.

(Hendan greinin varð skrivað áðrenn tað fór at goysa í Meradali)

Greinin varð fyrstu ferð løgd út 01. august 2022

19 Leygardagur 06. august 2022

Nýsæland letur landamørkini meira upp

Fyri fyrstu ferð í meira enn tvey ár, sleppa ferðandi úr øllum heiminum aftur at vitja í Nýsælandi

Í dag er ein stór løta, sigur Jacinda Ardern, forsætisráðharri í Nýsælandi (Mynd: EPA)
SkrivaÐ:

Alda Nielsdóttir

Mánadagin lótu nýsælendsku landamørkini heilt uppaftur fyri vitjandi úr øllum heiminum – fyri fyrstu ferð, síðan landið stongdi landamørkini í mars 2020, tá korona var byrjað at gera um seg.

Nýsæland byrjaði eina stigvísa upplating í februar. Fyrst vóru tað bert nýsælendingar, sum kundu sleppa inn í landið, men síðani er latið meira og meira upp.

Frá mánanáttini hevur aftur verið møguligt hjá vitjandi og lesandi við visum at sleppa inn í landið, og latið er eisini uppaftur fyri ferðamannaskipum og stuttleikabátum.

Tað er tó krav fyri tey flestu, ið ynska at vitja í Nýsælandi, at tey skulu vera koppsett fyri koronu, og at tey skulu lata seg kanna fyri koronu tvær ferðir eftir komu til landið. Tó er einki krav um sóttarhald.

Jacinda Ardern, forsætisráðharri í Nýsælandi, sigur, at tað er ein stór løta.

Martin Stuart Nash, ráðharri í ferðavinnumálum sigur tað vera gott fyri lokalu vinnuna, at ferðamannaskip nú aftur sleppa at leggja at í Nýsælandi.

– Flestu vitjanirnar av ferðamannaskipum eru í heitu mánaðunum frá oktober til apríl, og summarið er okkara besta árstíð yvirhøvur. Hetta merkir, at full ferð kemur á vinnuna, sigur hann sambært Ritzau.

Greinin varð fyrstu ferð løgd út 01. august 2022

20 Leygardagur 06. august 2022

Bulgaria: Fjórða tjóðartingsvalið í tvey ár

2. oktober skulu bulgarar á val

Rumen Radev, forseti í Bulgaria á Nato-toppfundi í Madrid í juni (Mynd: EPA)
SkrivaÐ:

Alda Nielsdóttir

Í heyst skulu bulgarar á val.

Talan er um fjórða tjóðartingsvalið í tvey ár, og bulgarski forsetin, Rumen Radev boðar frá, at valið verður 2. oktober.

Í juni koppaði samgongan hjá Kiril Petkov forsætisráðharra, og fyrrverandi ráðharrin í arbeiðaramálum, Galab Donev varð av forsetanum valdur at standa á odda fyri einari skiftisstjórn, sum skal stýra landinum frá 2. august og fram til nýggj stjórn er skipað, skrivar DR.

Bulgaria stríðist í løtuni, eins og onnur ES-lond, við høgari inflasjón, og óvissuni um gassveiting orsakað av krígnum í Ukraina.

Fyrrverandi forsætisráðharrin, Kiril Petkov, sum var í ráðharrasessinum í tíðarskeiðnum 13. desember til í dag, vísti síðst í juni mánað 70 russisk sendifólk, sum vórðu ákærd fyri njósning, úr landinum. Eisini noktaði hann at gjalda fyri gass við rublum. Síðani sleit Russland gassveitingina til landið.

Greinin varð fyrstu ferð løgd út 01. august 2022

21 Leygardagur 06. august 2022

Amerikanarar hava dripið leiðaran í al-Qaeda

Ein amerikansk drona gjørdi av við Ayman al-Zawahiri í Kabul sunnumorgunin, upplýsti amerikanski forsetin

- Rættvísin hevur vunnið frama. Fólk nýtast ikki longur at óttast henda drápsmannin, segði Joe Biden m.a. á tíðindafundi í nátt (Mynd: EPA)
SkrivaÐ:

Ingi Samuelsen

Leiðarin av islamska netverkinum al-Qaeda, Ayman al-Zawahiri, er dripin í einum álopi um vikuskiftið í afghanska høvuðsstaðnum, Kabul.

Tað upplýsti amerikanski forsetin, Joe Biden, í týsnáttina.

Álopið fór fram sunnumorgunin stutt eftir klokkan 6, lokala tíð, skrivar dr.dk.

Sambært Joe Biden kom ongin av familjuni hjá Ayman al-Zawahiri ella nakar annar sivilur til skaða undir álopinum.

Ein talsmaður fyri Taliban-rørsluna, sum situr við valdið í Afghanistan, váttar fyri Reuters, at tað um vikuskiftið var eitt dronuálop á eina íbúð í Kabul.

Taliban fordømir álopið og sigur, at talan er um brot á “altjóða grundreglur”.

[object Object]
Ayman al-Zawahiri sæst her saman við Osama bin Laden. Myndin er frá 1998 (Mynd: EPA)

Amerikanski forsetin, Joe Biden, sigur at amerikanarar við hesi gerðini hava gjørt nógvum fólkum eina tænastu.

- Rættvísin hevur vunnið frama. Hesin óndi yvirgangsleiðarin er ikki til meira. Fólk nýtast ikki longur at óttast henda drápsmannin, segði amerikanski forsetin, og helt fram:

- USA heldur fram við at vísa snarræði og evnini til at verja amerikanska fólkið móti teimum, ið ynskja at skaða okkum. Aftur hava vit gjørt greitt, at óansæð hvussu langa tíð tað tekur, og óansæð hvar tú fjalir teg, so vil USA finna teg og avvápna teg, um tú ert ein hóttan móti okkara fólki.

Sambært Joe Biden, spældi Ayman al-Zawahiri ein týðandi leiklut fyri al-Qaeda, tá yvirgangsálopið móti USA 11. september 2001 varð lagt til rættis.

Greinin varð fyrstu ferð løgd út 02. august 2022

22 Leygardagur 06. august 2022

Stórabretland: Størsta rentuhækkingin í 27 ár

Bank of England hækkar leiðandi rentuna við 0,50 prosentstig

(Mynd: EPA)
SkrivaÐ:

Alda Nielsdóttir

Bretski Bank of England hevur hækkað leiðandi rentuna við 0,50 prosentstig, og kemur hon sostatt upp á 1,75 prosentstig.

Sambært DR er hetta størsta rentuhækkingin í Stórabretlandi síðan 1995.

Rentuhækkingin kemur í kjalarvørrinum á høgu inflasjónini.

Bank og England metir, at inflasjónin fer at koma upp á 13 prosent í oktober, men kemur vend í.

Greinin varð fyrstu ferð løgd út 04. august 2022

23 Leygardagur 06. august 2022

USA formliga góðkent Nato-limaskap hjá Svøríki og Finnlandi

Sjey Nato-limalond, m.a. Turkaland og Ungarn, mangla framvegis at góðkenna limaskapin

Karin Ulrika Olofsdotter, svenska sendikvinnan í USA hitti Chuck Schumer, leiðari hjá demokratiska meirilutanum í Senatinum áðrenn atkvøðugreiðsluna mikudagin (Mynd: EPA)
SkrivaÐ:

Alda Nielsdóttir

Í farna mánað skrivaðu tey 30 limalondini í verjusamgonguni Nato undir skjøl um at loyva Finnland og Svøríki uppí felagsskapin, men áðrenn londini gerast ein veruligur partur av Nato, skal limaskapurin góðkennast í einstøku londunum.

Seint seinnapartin mikudagin varð Nato-limaskapurin hjá teimum báðum norðurlendsku londunum formliga góðkendur í USA, tá Senatið við stórum meiriluta atkvøddi fyri.

95 av 100 senatorum atkvøddu fyri, meðan ein atkvøddi ímóti, skrivar Ritzau.

Danmark var eitt av fyrstu londunum at góðkenna Nato-limaskapin hjá Svøríki og Finnlandi fyri einum mánað síðani, og sambært amerikanska miðlinum Washington Post mangla sjey lond framvegis at fáa hetta avgreitt.

Talan er m.a. um Ungarn og Turkland, sum áður hevur funnist at teimum báðum norðurlendsku londunum og m.a. lagt tey undir at stuðla yvirgangsfelagsskapum.

Tað er russiska innrásin í Ukraina, sum er orsøkin til, at Svøríki og Finnland avgjørdu at søkja um Nato-limaskap.

Greinin varð fyrstu ferð løgd út 04. august 2022

24 Leygardagur 06. august 2022

Opec+ hækkar framleiðslu nakað

Talan er um eina øking uppá 100.000 tunnur um dagin

 
SkrivaÐ:

Jan Müller

Tey 23 londini í Opec+ felagsskapinum eru samd um at gera eina minni broyting í framleiðsluni. Tey økja hana við 100.000 tunnum um dagin. Hetta er sambært Bloomberg lægsta hækking nakrantíð í søguni hjá Opec.

Hetta er tó ikki nær námind tí, sum eitt nú amerikanski forsetin Joe Biden hevur ynskt. Tó stendur greitt, at Opec við hesi øking frá september nærkast somu framleiðslu sum undan korona. Ì juli og august er framleiðsluøkingin uppá 600.000 tunnur um dagin.

Hinvegin eru fleiri av londunum ikki før fyri at økja um sína framleiðslu. Tí mugu lond sum Saudi Arabia bera stóran part av vøkstrinum. Russland, sum er partur av Opec+ hevur ongan áhuga í at økja framleiðsluna, um tað hevur við sær lækkandi oljuprís.

Roknað verður ikki við at henda avmarkaða økingin fer at hava ávirkan á oljuprísin, sum eftir at tíðindini bórust hækkaði eitt vet til nærum 101 dollarar fyri tunnuna fyri so stutt eftir at lækka aftur til 96,71 dollarar, tað lægsta síðani kríggiðí Ukraina byrjaði.

Greinin varð fyrstu ferð løgd út 03. august 2022

25 Leygardagur 06. august 2022

Týðandi donsk gassleið seinkað

Tyra gassleiðin verður neyvan klár at taka í brúk fyrr enn um gott og væl eitt ár. Danski ráðharrin Dan Jørgensen heldur tað vera sera óheppið fyri bæði Danmark og Evropa annars

 
SkrivaÐ:

Jan Müller

Tað kemur dátt við hjá teimum, sum hava stóran tørv á gassi, tað verið bæði Danmark og øðrum londum í ES,  at stóra danska gassleiðin, Tyra, verður nógv seinkað.

Hetta hevur fingið danska orku- og veðurlagsráðharran,  Dan Jørgensen til at fýlast at orkufelagnum Total Energies, sum annars hevði boðað frá, at Tyra gassleiðin, fór at lata uppaftur í næstum og harvið verða við til at nøkta part av tí stóra gasstørvinum, sum er kring alt Evropa, serliga eftir russisku innrásina í Ukraina.

Hann heldur tað vera sera óheppið, at Tyra ikki fer undir aftur at framleiða gass sum higartil ætlað, nú eftirspurningurin eftir gassi er methøgur.

Gassleiðin hevur ikki verið virkin nú í eina tíð, nú  hon verður útbygd og umvæld. Stórar vónir hava verið til nettupp Tyra leiðina, sum er so mikið stór, at framleiðslan kann gera mun í stóra eftirspurninginum eftir gassi í Evropa. Tyra verður ein av heimsins mest nútímans gassframleiðslum í heiminum, tá hon er klár. Tann nýggjasta tøknin verður tikin í brúk og fer hon at minka munandi um CO2 útláti eins og hava møguleika fyri at goyma CO2. 

Orsøkin til seinkanina er m.a. avleiðingar av Covid-19, har manning og veiting av tilfari til byggingina av einum nýggjum palli í Indonesia hevur verið tarnað.

Danski ráðharrin er tó vónríkur um gassveitingina til bæði Danmark og Svøríki, sum royna at nøkta tørvin aðrar vegir.

Tyra II leiðin fer at kunna framleiða 2,8 mia. kubikmetrar av gassi um árið, tá hon er liðugt útbygd. Danmark brúkti í 2021 2,15 mia. kubikmetrar av gassi. Hetta svarar til 0,4% av samlaðu nýtsluni í ES.

Nú Russland hevur gjørt av at minka um veitingarnar av gassi til Evropa hava gassleiðir sum Tyra stóran týdning fyri veitingartrygdina. Soleingi Tyra ikki framleiðir, er Danmark noytt til at innflyta gass, sum svarar til 75% av árligu nýtsluni. Tá leiðin aftur er virkin í 2023-24, kann Damark útflyta gass.


Greinin varð fyrstu ferð løgd út 04. august 2022

26 Leygardagur 06. august 2022

Svanna og Barbara vunnu á ólavsøku

Tað var júst sum vanligt uppi á ríðibreytini a ólavøku. Nógv fólk, gott lag og nógvir spennandi riðlar

(Mynd: Føroya Ríðingarfelag)
SkrivaÐ:

Tíðindaskriv

Mesti spenningurin var sum altíð um Tvíspor l flokk. Millum reiðfólk verður tað roknaður sum størsti heiður at vinna júst tann flokkin. Hesaferð var tað Svanna við Barbaru Carlsen ið vann, tær hava annars ikki havt eitt so gott kappingarár, sum onkur hevði væntað, men á ólavsøku vóru tær til reiðar og vunnu ein rættiliga greiðan sigur á degnum. Nummar tvey gjørdist Bragi við Jónu Ólavsdóttir og nummar trý Marengo við Halli Hansen á baki. Bragi hevur annars vunnið tvær tær fyrstu kappingarnar í ár, men við sigrinum hjá Svannu á ólavsøku, er nú aftur komin spenningur í stríðið um FM.

Tvíspor ung var eisini sera spennandi. Á degnum var tað Silfa hjá Ásu Bárðardóttir ið vann, men har vóru bara 15 hundrandapartar av einum sekundi aftur til nummar fýra, Sirkill og Ranju H. Durhuus. Millum hasi rossini komu sum nummar tvey Báran við Fíu Nolsøe og Spirit við Hanus Patursson á baki. Báran og Spirit vóru í einum sera tøttum riðli har Báran vann við einum hundrandaparti av einum sekundi. 

Hinar greinarnar vunnu hesi. Tølt - Silja G. Eystberg (Tango) Skeið - Ranja H. Durhuus (Orka) Trav opin flokkur - Marna Anthoniussen (Oscar) Trav - Hallur Hansen (Grettir) og Tvíspor vaksin ll flokkur Sigtór Lútzen (Thor) 

Øll úrslitini síggjast á leinkju her: Úrslit ólavsøka 2022

Greinin varð fyrstu ferð løgd út 30. juli 2022

27 Leygardagur 06. august 2022

Klaksvíkar Róðrarfelag heiðrað

Klaksvíkar Róðrarfelag og Klaksvíkar kommuna skipaðu fyri móttøku og heiðran av Klaksvíkingi, Páll Fanga - menn og Fípuni Føgu - gentur, sum allir vunnu FM í sínum kappingargreinum

(Mynd: Dávur Winther)
SkrivaÐ:

Dávur Winther

Seinnapartin leygardagin skipaði Klaksvíkar Róðrarfelag saman við Klaksvíkar kommunu fyri móttøku og heiðran av Klaksvíkingi, Páll Fanga – menn og Fípuni Føgru – gentur, sum allir vunnu FM í sínum kappingargreinum.

Sonja Ravnsfjall Kjølbro, forkvinna legði fyri við rósandi orðum til sítt felag og allar teir mongu røsku rógvararnar. 

Hon takkaði eisini teimum mongu stuðlunum og foreldrum og hjálparfólki, ið stóðu handa felagið.

Síðani helt Jóhanna C. Christiansen, forkvinna í Mentanarnevnd býráðsins røðu. Hon takkaði fyri spennandi kappráðrarárið, har Klaksvíkar Róðrarfelag sanniliga hevði gjørt kappingarnar meira spennandi við nógvum góðum úrslitum – eisini  hjá teimum ungu spírunum, sum eru væl við. 

Síðani bað hon umboð fyri manningarnar á Klaksvíkingi, Páll Fanga – menn og Fípuni Føgru – gentur um at koma upp at taka ímóti einum kekki frá býráðnum.

Eftir tað varð boðið til kaffi og snotiliga róðrar-lagkaku. Jú, lagið var gott, nógv prát og nógvar myndir tiknar.

Tekstur og myndir: Dávur Winther

[object Object]

[object Object]

Greinin varð fyrstu ferð løgd út 30. juli 2022

28 Leygardagur 06. august 2022

Taptu móti Svøríki í fyrsta dystinum

Føroysku U18-menninir arbeiddu seg inn aftur í dystin í seinna hálvleiki, men útvísingar kostaðu dýrt. Føroyar taptu 32-29

Óli Mittún gjørdist dagsins leikari og skoraði 17 mál (Mynd: EHF)
SkrivaÐ:

Sverri Egholm

EM-endaspælið hjá U18 monnunum er byrjað í Montenegro, og Føroyar løgdu út við einum trýmáls tapi móti Svøiki.

Dysturin leikaði javnt á fyrstu løtuna, men síðani tóku sivar yvir. Ov nógv mistøk kostaðu dýrt, og munurin onkrar løtur var heili fimm mál.

Móti steðginum gekk betri hjá Føroyum og støðan í hálvleikinum var 17-15 til sviar.

Í fyrru helvt av seinna hálvleiki helt støðan sær, og munurin var tvey til trý mál. Tá lítið korter var eftir av dystinum bleiv javnt, 24-24, men útvísingar beint eftir hetta kostaðu dýrt.

Eftir hetta riggaði einki hjá okkara monnum, og sviar fingu eina fimm málsleiðslu 30-25. Móti endanum fingu vit snøggað eitt sindur um støðuna, og úrslitið gjørdist 32-29.

Føroyar eru í truplum bólki saman við Spania, Fraklandi og Svøriki. Spania og Frakland hittust fyrr í dag, og Spania vann 41-33. Í morgin klokkan 13 spæla Føroyar móti nettupp Spania.

Svøríki - Føroyar 32-29 (17-15)

[object Object](Mynd: EHF)

[object Object](Mynd: EHF)

[object Object](Mynd: EHF)

Greinin varð fyrstu ferð løgd út 04. august 2022

29 Leygardagur 06. august 2022

Fínt útgangsstøði hjá KÍ

Klaksvíkingar taptu 3-2 í Kosovo, og alt er tí opið til seinna dystin á Tórsvølli um eina viku

(Skíggjamynd: Televarpið)
SkrivaÐ:

Sverri Egholm

Tað gjørdist ein trupul dagur á skrivstovuni hjá KÍ-leikarunum, sum hóskvøldið vóru á vitjan hjá meistarunum í Kosovo, FC Ballkani.

Í fyrra hálvleiki riggaði nærum einki hjá klaksvíkingum, sum so at siga einki skaptu. Hinvegin setti heimaliðið seg á dystin, og var á odda 2-0 í hálvleikinum.

Tá heimaliðið so tíðliga í seinna hálvleiki økti til 3-0 gjørdist uppgávan ógvuliga tung hjá KÍ.

Spakuliga komu teir kongablaú inn aftur í dystin, og eftir frísparksinnlegg frá Jóannes Bjartalíð í 69. minutti eydnaðist tað Páll Andrassyni Klettskarð at seta bóltin í netið til 3-1.

Stutt fyri leiklok var Páll Klettskarð aftur seinastur á bóltinum, og minkaði um munuin til 3-2, sum eisini gjørdist úrslitið.

Í tíðini sum dómarin hevði lagt afturat feldi Odmar Færø ein mótstøðumann og fekk reytt kort.

Hóast tað verður uttan Odmar Færø, so má 3-2 sigast at vera eitt fínt útgangsstøði til returdystin á Tórsvølli hósdagin í næstu viku.

FC Ballkani - KÍ 2-3 (2-0)
30' Nazmi Gripshi 1-0
41' Meriton Korenica 2-0
50' Albion Rrahmani 3-0
69' Páll Andrasson Klettskarð 3-1
88' Páll Andrasson Klettskarð 3-2

Greinin varð fyrstu ferð løgd út 04. august 2022

30 Leygardagur 06. august 2022

Trupult hjá B36 í Viborg

Heimaliðið vann 3-0, og tað verður trupult at koma aftur í seinna dystinum, sum verður týsdagin

(Savnsmynd: Sverri Egholm)
SkrivaÐ:

Sverri Egholm

“Ren opvisning” var ein av yvirskriftunum hjá Ekstrablaðnum meðan dysturin var í gongd.

Men uppvísning ella ikki, so vann Viborg “bara” 3-0 móti B36, og hóast tað verður trupult at koma aftur, so er tað ikki ómøguligt tá liðini næsta týsdag bresta saman í Havn í avgerðandi dystinum.

B36 hevði ikki nógv at bjóða uppá í álopinum, og tað var fyr tað mesta Viborg sum hevði spælið í hesum Conference League dystinum í triðja umfari.

Viborg førdi 1-0 í hálvleikinum eftir brotsspark tá 21 minuttir vóru farnir. Í seinna hálvleiki økti heimaliðið upp á tríggjar minuttir. Fyrst við máli í 49. minutti og síðani í 52. minutti.

Fleiri mál komu ikki í dystinum. 3-0 verður trupult, men einki er ómøguligt. Serliga ikki hjá B36-liðnum sum áður í Evropa hava spælt bæði longda leiktíð og avgjørt dystir við brotssparkskapping.

Seinni dysturin verður leiktur týsdagin 9. august klokkan 19 á Tórsvølli.

Greinin varð fyrstu ferð løgd út 03. august 2022

31 Leygardagur 06. august 2022

HB sløkti FM-vónina hjá Víkingi

Víkingur legði seg annars á odda í øðrum minutti, men HB vann dystin 2-1. Níggju stig eru upp til KÍ á fyrsta plássið, og tí tykiskt FM at vera avgjørt

(Savnsmynd: Sverri Egholm)
SkrivaÐ:

Sverri Egholm

Víkingur var mikukvøldið á vitjan hjá HB í Gundadali. Leingi bendi alt á, at Víkingur fór at vinna, men síðst í dystinum fall avgerðin til fyrimuns fyri heimaliðið.

Bara hálvur annar minuttur var farin tá Martin Klein Joensen setti bóltin í HB-málið. Síðani setti HB seg á spælið, men fekk lítið burturúr. Í seinna hálvleiki helt gongdin fram, og HB spældi seg fram til fleiri møguleikar.

Í 78. minutti bragdaði eftir hornaspark, tá Pætur Petersen stóð leysur og skallaði bóltin í netið. 1-1 og heimaliðið fór eftir øllum.

Í tíðini, sum dómarin legði afturat stóð Pætur Petersen aftur klárur eftir horna, og tryggjaði HB sigurin 2-1.

Víkingur missir nú í FM-stríðnum, og er nú níggju stig aftanfyri KÍ, sum hevur 46 stig á fyrsta plássið. HB er komið upp á 31 stig og seks stig eru upp til Víking við 37 stigum á øðrum plássið.

HB - Víkingur 2-1 (0-1)
2’ Martin Klein Joensen 0-1
78’ Pætur Petersen 1-1
90’ Pætur Petersen 2-1

Støðan í Betri deildini

1. KÍ 46 stig (16 dystir)
2. Víkingur 37 stig (16 dystir)
3. HB 31 stig (16 dystir)
4. B36 22 stig (15 dystir)
5. EB/Streymur 21 stig (16 dystir)
6. 07 Vestur 18 stig (16 dystir)
7. AB 17 stig (16 dystir)
8. NSÍ 15 stig (16 dystir)
9. B68 11 stig (16 dystir)
10. Skála 8 stig (15 dystir)

Greinin varð fyrstu ferð løgd út 02. august 2022

32 Leygardagur 06. august 2022

215 á fótbóltsskúla á Svangaskarði

Mánadagin og týsdagin varð skipað fyri Fótbóltsskúla á Svangaskarði á Toftum. 215 børn og ung luttóku

(Mynd: Hans Erik Danielsen / FSF)
SkrivaÐ:

Sverri Egholm

FSF: Sjálvt um tað regnaði eitt sindur onkra løtuna, so vóru líkindini til fótbólt avbera góð, tá B68, í samstarvi við FSF, mánadagin og týsdagin skipaði fyri fótbóltsskúla á Svangaskarði á Toftum.

Báðar dagarnar varð vant frá klokkan 10 til 14, við einum stuttum matarsteðgi á middegi. Og sum heild hugnaðu tey 215 børnini og ungu sær óført, við stuttligum spølum og venjingum, sum Betri Deildar-spælararnir hjá B68, saman við øðrum, skipaðu fyri á ovara vølli og á niðara vølli á Svangaskarði.

Hetta var samstundis annar av fýra fótbóltsskúlum, sum eru á skránni í summar. Hósdagin og fríggjadagin, 4. og 5. august, verður skipað fyri Fótbóltsskúla á Argjum, og fríggjadagin og leygardagin í næstu viku, sum er 12. og 13. august verður Fótbóltsskúli í Sørvági.

Fyrsti fótbóltsskúlin í ár var í Gundadali í Havn síðst í juni mánað, har HB var vertur fyri umleið 260 luttakarum.

Greinin varð fyrstu ferð løgd út 03. august 2022