Løgmaður: Nú rakk mítt tol ikki longur

Loysti Jenis av Rana úr embætinum. Gav ikki meining meira at hava ein landsstýrismann, sum mótsigur avgerðum løgmans

(Savnsmynd: Sverri Egholm)

SkrivaÐ:

Ingi Samuelsen

Tá landsstýrismaðurin beinleiðis mótsigur løgmanni, so var mítt tol uppi, og tí valdi eg at siga Jenis av Rana, landsstýrismann við uttanríkis- og mentamálum úr starvi.

Soleiðis segði Bárður á Steig Nielsen, týsdagin eftir at hann hevði givið formanninum í Miðflokkinum boð um at rudda landsstýrismannaskrivstovur sínar og fara til hús.

Tað kom sum ein bumba beint fyri klokkan 11, at løgmaður hevur handað Jenisi av Rana uppsøgn.

Orsøkin er tað, sum Jenis av Rana hevur sagt eftir at løgmaður mánadagin boðaði frá, at málsøkið um rættindini hjá sammøðrum, varð tikið frá Jenisi av Rana og flutt til Magnus Rasmussen, landsstýrismál. Hetta tí, at Jenis av Rana hevur bølt oman á málinum at børn hjá samkyndum kvinnum kunnu fáa eftirnavnið hjá sammóðurini.

Jenis av Rana landsstýrismaður segði í samrøðu við FM1 mánadagin, at hann er inniliga í móti – vegna hansara trúgv – at geva sammøðrum hesi rættindi, og at hann eisini vónaði at Magnus Rasmussen heldur ikki fór at líða boðunum frá løgmanni.

Hetta var eftir øllum at døma tað, sum fekk bikarið hjá Bárði á Steig, løgmanni at flóta yvir.

Greinin varð fyrstu ferð løgd út 08. november 2022

- Burtur úr vón og viti at løgmaður kemur við slíkum

Formaðurin í Miðflokkinum og nú fyrrverandi uttanríkis- og mentamálaráðharrin, Jenis av Rana, er klárur til val

Jenis av Rana á gamla Apoteki fyri løtu síðani (Mynd: Sverri Egholm)

SkrivaÐ:

Sverri Egholm

- Floksstjórnin er firtin av viðferðini, sum formaðurin hevur fingið, og hesum eri eg samdur við, segði Jenis av Rana, formaður í Miðflokkinum, um avgerðina hjá flokkinum týsdagin at slíta samgonguna.

- Tað er burtur úr vón og viti at løgmaður kemur við slíkum. Slíka viðgerð væntar man ikki av løgmanni, segði Jenis av Rana.

Grundgevingin hjá løgmanni at loysa Jenis av Rana úr starvi sum landsstýrismaður, var ein samrøða á FM1. Løgmaður vil vera við, at Jenis av Rana alment hevur heitt á Mangus Rasmussen at beinleiðis at ganga í móti boðunum hjá løgmanni.

Hesum er Jenis av Rana púra ósamdur í.

Vistu einki um hetta
Jenis av Rana sigur, at tey í Miðflokkinum ikki vistu um hesa avgerðina áðrenn, og høvdu heldur ikki fingið nakrar frænir um hetta.

Jenis av Rana greiðir frá, at hann í løgtinginum týsmorgunin varð tikin til síðis av løgmanni, og fekk boðini um, at hann varð loystur úr starvi.

Floksstjórnin viðgjørdi seinnapartin sama dag, um flokkurin skal vera verandi í samgonguni og koma við uppskoti um annað landsstýrisfólk, men orsakað av óvirðiligu viðgerðini, valdi Miðflokkurin at slíta samgonguna.

Og klárur til val, tað er Miðflokkurin. Flokkurin fekk eitt gott fólkatingsval við tilsamans 1217 atkvøðum.

- Eg haldi at tá man akkurát hevur verið til eitt fólkatingsval, so er man klárur nú aftur, segði Jenis av Rana.

Greinin varð fyrstu ferð løgd út 08. november 2022

Løgtingsval verður hósdagin 8. desember

Bárður á Steig Nielsen tók orðið til eina serliga fráboðan á tingfundi mikudagin

(Mynd: Sverri Egholm)

SkrivaÐ:

Agnar Prestá

Av tí at parlamentariska grundarlagið undir verandi samgongu er rokið, hevur løgmaður valt at útskriva nýval.

Hetta kunngjørdi Bárður á Steig Nielsen seinnapartin mikudagin. Hann tók orðið á tingfundinum, sum varð tann seinasti undir hesari samgonguni. 

Løgtingsvalið 2022 er sett at verða hósdagin 8. desember. Hetta eru beint undir níggju mánaðir áðrenn, tað í seinasta lagi skuldi verða, um samgongan hevði sitið alt tíðarskeiðið.

Tingarbeiðið er nú niðurlagt - valstríðið er byrjað.

Greinin varð fyrstu ferð løgd út 09. november 2022

Christian Andreasen stillar ikki uppaftur

Formaðurin hevur ikki neyðugu undirtøkuna í tingbólkinum – tí fer hann frá sum formaður og stillar ikki upp til valið 8. desember

Fólkaflokkurin fekk eitt vánaligt fólkatingsval. Men tað er ikki einasta orsøk til at Christian Andreasen leggur frá sær (Mynd: Jens Kr. Vang)

SkrivaÐ:

Ingi Samuelsen

Hósdagin boðaði Christian Andreasen frá, at hann hevur sagt seg frá sum formann í Fólkaflokkinum. Í tíðindaskrivi sigur hann, at orsøkin er vánaliga fólkatingsvalið, bæði hjá flokkinum og honum persónliga. Men orsøkin er eisini, at formaðurin ikki hevur havt neyðugu undirtøku í tingbólkinum.

Eitt nú var avgerð tikin um uppstillingina til fólkatingsvalið í móti tilráðingini hjá formanninum.

Skrivið hjá Christian Andreasen er soljóðandi:

Sum øllum kunnugt, fekk Fólkaflokkurin eitt vánaligt val á seinasta fólkatingsvali.

Orsakirnar til hesa afturgongd er helst fleiri, men serliga var tað uppstillingin hjá flokkinum, sum bleiv gjørd móti míni tilráðing.

Mín persónliga undirtøka millum veljarar floksins á fólkatingsvalinum gjørdist eisini minni, bæði í mun til seinasta fólkatingsval og í mun til seinasta løgtingsval, hóast eg fyri kortum bleiv valdur til formann fyri flokkin.

Aftur at hesum kemur, at eg ikki havi neyðugu breiðu undirtøkuna í tingbóklinum, millum annað til at fremja tær broytingar, sum eg meti vera neyðugar fyri flokkin.

Tá soleiðis er, meti eg ikki, at eg eri tann rætti persónurin at standa á odda fyri flokkinum. At standa á odda fyri flokkinum krevst ein persónur, sum flokkurin og serliga tingmanningin kann savna seg um.

Eg havi tí tikið avgerð um at fara frá sum formaður fyri Fólkaflokkin. Samstundis skal eg boða frá, at eg ikki stilli upp aftur til næsta løgtingsval.

Eg fari sostatt úr politikki og fari aftur at virka sum advokatur fulla tíð.

Eg fari at takka øllum teimum mongu, sum hava veitt mær stuðul seinastu árini.

Eg fari at ynskja flokkinum bestu eydnu í valstríðnum og eitt gott val.

Greinin varð fyrstu ferð løgd út 10. november 2022

- Hava lagt gamlar ósemjur aftur um okkum og líta fram eftir

Floksleiðslan hevur samtykt at tingfólk atkvøða eftir egnari sannføring í etiskum málum

(Mynd: Sverri Egholm)

SkrivaÐ:

Tíðindaskriv

Ein samd floksleiðsla valdi seint hóskvøldið Beinir Johannesen til nýggjan formann í Fólkaflokkinum.

Beinir Johannesen er 25 ára gamal búsitandi í Klaksvík. Beinir bleiv fyrstu ferð valdur inn á Løgting í 2019 við 998 atkvøðum, sum fyrst valdur á fólkaflokslistanum. Beinir hevur seinastu tíðina verið formaður í tingbólki Fólkafloksins.

- Nú snýr tað seg um at halda saman sum flokkur, har vit hava lagt gamlar ósemjur aftur um okkum og líta frameftir, sigur Beinir í stuttari viðmerking.

- Nú fara vit heilhjarta út í valstíið við stevnuskrá flokksins sum grundsúlu", leggur hann afturat.

Av øðrum týðandi málum hevur floksleiðslan samtykt, at tingfólk atkvøða eftir egnari sannføring í etiskum málum.

Harumframt gjørdi floksleiðslan av, at 'sokallaða' málið um Anniku er lagt afturum, og at hon er vælkomin at stilla upp til løgtingsvalið fyri Fólkaflokkin, eins og allir aðrir limir flokksins.

Greinin varð fyrstu ferð løgd út 10. november 2022

Sólvit verður heldur ikki á fólkaflokslistanum

Hann hevur boðað floksleiðsluni frá, at hann ikki stillar upp til løgtingsvalið

Sólvit Nolsø (Mynd: Jóanis Albert Nielsen / Jn.fo)

SkrivaÐ:

Sverri Egholm

Tað er mannfall í Fólkaflokkinum. Christian Andreasen fór í hósmorgunin frá sum formaður, Jógvan á Lakjuni og Heðin Zachariassen stilla ikki upp, og nú hevur Sólvit Nolsø boðað floksleiðsluni frá, at hann ikki stillar upp til løgtingsvalið 8. desember.

Sólvit Nolsø er partur av liberala vonginum av Fólkaflokkinum, sum tykist hava tapt slagið móti tí meira konservativa vonginum.

Boðini frá Sólvit Nolsø komu áðrenn tað hóskvøldið varð greitt, hvør skuldi taka við eftir Chr. Andreasen sum forfólk í flokkinum.

Greinin varð fyrstu ferð løgd út 10. november 2022

Fólkaflokkurin: Nevndin í Havn rýmir eisini

Øll nevndin í Havnar Framburðsfelag hevur lagt frá sær

Helgi Debes Michelsen og Rói B. Poulsen eru nú fyrrverandi ávikavist nevndarlimur og formaður í Havnar Framburðsfelag (Savnsmynd)

SkrivaÐ:

Sverri Egholm

Tað gongur einki serligt hjá Fólkaflokkinum. Fólk rýma í hópatali úr flokkinum, sum hóskvøldið fekk nýggjan formann.

Nú er tað Havnar Framburðsfelag, sum er farið í sor. Øll nevndin í valfelagnum hjá Fólkaflokkinum í Havn, hevur valt at leggja frá sær.

Tað váttar Rói B. Poulsen, nú fyrrverandi formaður í Havnar Framburðsfelag, fyri útvarpinum.

Hvat nú skal henda er upp til onnur at gera av, sigur hann við útvarpið.

Í nevndini í Havnar Framburðsfelag sótu Rói B. Poulsen, Regin W. Dalsgaard, Helgi D. Michelsen og Birgir Nielsen.

Fyrr fríggjadagin boðaði formaðurin í ungmannafelagnum Huxa, Erling Mørkøre frá, at hann legði frá sær, orsakað av rokinum rundan um flokkin.

Floksleiðslan valdi annars hóskvøldið einmælt at seta Beinir Johannesen sum nýggjan formann í flokkinum.

Greinin varð fyrstu ferð løgd út 11. november 2022

Annika Olsen meldað seg úr Fólkaflokkinum

Hon sigur seg ikki hava neyðuga uppbakningin ímillum ting- og landsstýrismanningina, sum reelt stýrir flokkinum

Annika Olsen (Savnsmynd: Sverri Egholm)

SkrivaÐ:

Sverri Egholm

Annika Olsen boðaði fríggjakvøldið frá, at hon meldar seg úr Fólkaflokkinum.

Nógv rok hevur verið um Anniku Olsen og Fólkaflokkin og á floksleiðslufundi hósdagin varð avgjørt, at Annika Olsen slapp at stilla upp, um hon ynskti tað.

Men tað ynskir hon ikki.

- Áftaná eina langa og sera umstrídda tilgongd innanhýsis í Fólkaflokkinum og aftaná drúgva umhugsunartíð, havi eg í dag valt at fráboða, at eg ikki longur eri limur í Fólkaflokkinum, boðar Annika frá í skrivi.

Øll fráboðanin er soljóðandi:

Takk fyri meg 

Aftaná eina langa og sera umstrídda tilgongd innanhýsis í Fólkaflokkinum og aftan á drúgva umhugsunartíð, havi eg í dag valt at fráboða, at eg ikki longur eri limur í Fólkaflokkinum.  

Seinastu 21 árini hava eg og fleiri við mær, herímillum Christian F. Andreasen, Heðin Zachariasen, Brandur Sandoy og Sólvit Nolsøe umframt saman umboðum í  Havnar Framburðsfelag og nú fyrrv. formanni i Huxa, miðsavnt arbeitt fyri teimum aðalhugsjónum, ið mynda stevnuskrá Fólkafloksins og fyri, at Fólkaflokkurin kann vera ein rúmligur flokkur við pláss fyri ymiskum áskoðanum. Hesir persónar hava, eins og fleiri undan teimum, lagt frá sær. Eg havi ikki neyðuga uppbakningin ímillum ting- og landsstýrismanningina, sum reelt stýrir flokkinum, til at fremja tann politikkin, sum eg og onnur við mær hava ynskt fyri Føroyar. 

Eg vil av øllum mínum hjarta takka teimum, ið hava stuðlað mær í Fólkaflokkinum øll hesi árini og teimum, sum saman við mær í Fólkaflokkinum hava arbeitt miðvíst fram ímóti einum frælsum, framkomnum og sosial liberalum samfelagi. 

Greinin varð fyrstu ferð løgd út 11. november 2022

Hol ígjøgnum til Árnafjarðar

Seinasta skotið varð latið av í Árnafjarðartunlinum týsdagin

(Mynd: Sverri Egholm)

SkrivaÐ:

Sverri Egholm

1.900 metrar langi Árnafjarðartunnilin varð seinnapartin týsdag skotin í gjøgnum. Fitt av fólki var komið saman í Ánunum har hátíðarløta var í sambandi við seinasta skotið.

Í komandi viku verður seinasta skotið latið av í Norðtoftum, har Hvannasundstunnilin kemur út. Tann tunnilin er 2.200 metrar langur.

Greinin varð fyrstu ferð løgd út 08. november 2022

Hvannasundstunnilin skotin ígjøgnum týsdagin

Hátíðarhald verður oman fyri Norðtoftir týsdagin klokkan 14

(Mynd: Landsverk)

SkrivaÐ:

Sverri Egholm

Arbeiðið at gera tunlarnar norð um Fjall gongur við rúkandi ferð. 

Týsdagin í hesari vikuni var 1.900 metrar langi Árnafjarðartunnilin skotin ígjøgnum, og komandi týsdag verður seinasta skotið í 2200 metra langa Hvannasundstunlinum.

Tiltakið verður oman fyri Norðtoftir klokkan 14 týsdagin.

Sigurd L. Lamhauge fer at bjóða vælkomin og sigur nøkur orð. Síðani fara Katrin Næs, borgarstjóri í Hvannasunds kommunu og Marita  Sumberg, borgarstjóri í Viðareiðis at bera fram røður. Eisini verða tónleikainnsløg. 

Til seinast fara Jústines Poulsen og Esmar Justinussen, ið eru elstu borgarar í Hvannasunds kommunu og Árnafirði, at lata síðsta skotið av.  

Hvannasundstunnilin er millum Árnafjørð og Norðtoftir, og Árnafjarðartunnilin er millum Árnafjørð og Ánirnar.

Tunlarnir fara at kosta 522 milliónir krónur og verða væntandi lidnir á heysti í 2024.

Greinin varð fyrstu ferð løgd út 11. november 2022

Tyrlan bjargaði manni

Ein bátur fór farna leygarkvøld á land við Streymnev í Skopunarfirði

(Mynd: Rescue Lív)

SkrivaÐ:

Sverri Egholm

Bjargingarbáturin Lív hevði úr at gera farna leygardag. Tvær ferðir vóru smábátar sum høvdu trupulleikar við róðrinum og maskinuni.

Men klokkan 17:49 komu boð um at ein bátur var farin á land við Streymnev í Skopunarfirði.

Ein maður var umborð, og tyrlan bjargaði honum.

Nakað seinni var báturin eisini bjargaður og Rescue Lív sleipaði hann til Skopunar.

Við í bjargingini vóru eisini Tjaldrið, Sløkkiliðið í Skopun, løgreglan og fólk á staðnum.

(Mynd: Rescue Lív)

Greinin varð fyrstu ferð løgd út 06. november 2022

Fólkatalið hækkaði við 660 seinasta 12 mánaða skeiðið

Talið á deyðum liggur nú á 43 í miðal um mánaðin - talið hevur annars í longri tíð ligið um 30, altso cirka ein um dagin

(Savnsmynd: Sverri Egholm)

SkrivaÐ:

Ingi Samuelsen

1. oktober búðu 54.111 fólk í Føroyum. Hetta eru 42 fólk fleiri enn 1. september, men 63 færri enn 1. august, tá 54.174 fólk vórðu skrásett í Føroyum, sum er tað mesta higartil. Vanligt er, at fólkatalið toppar 1. august á hvørjum ári, og seinastu árini hevur tað tikið tveir mánaðir at heinta tað talið inn aftur áðrenn tað aftur toppar.

Fólkatalið 1. oktober í ár er góð 660 fleiri enn sama mánað í fjør. Vøksturin er 1,2 prosent, sum er minni enn í undanfarna tíðarskeiði, tá hann var 1,4 prosent.

Seinasta árið hevur vøksturin í fólkatalinum verið lakari enn undanfarnu árini. Tað hómast aftur í trendinum, sum lýsir gongdina í fólkatalinum, skrivar Hagstovan á heimasíðuni. 

Íkastið til fólkavøksturin frá burðaravlopinum er minkað nógv seinasta árið. Høvuðsorsøkin er, at deyðatalið hevur verið hægri enn vanligt. Hagstovan vísir á, at deyðatalið nú er komið í eina fasta legu á 43 í miðal um mánaðin. Hetta talið hevur annars ligið um tey 30 í fleiri ár.

Minkaða burðaravlopið verður tó partvíst uppvigað av íkastinum frá nettoflytingini, sum er vaksið nakað hetta árið. Korona hevði við sær, at færri fluttu til og úr Føroyum á sumri 2020, men um ársskiftið í 2020 kom gongd aftur á flytingarnar. Síðani tá er tilflytingin vaksin meira enn fráflytingin, og tað hevur viðført eina lítla øking í nettoflytingini seinasta árið.

Størsti fólkavøksturin er í Tórshavnar kommunu og Eysturkommunum, meðan størsta minkingin var allar sunnast og allar norðast í landinum, nevniliga í Sumbiar og Viðareiðis kommunum.

Tær bygdir/býir, ið vaksa mest í løguni er Tórshavn, Argir, Hoyvík og Strendur, meðan tað minkaði mest í Søldarfirði, Leynum, Árnafirði og á Viðareiði.

Greinin varð fyrstu ferð løgd út 10. november 2022

Landið setir sín part av Pf. Tjaldur til sølu

Fíggjarmálaráðið ynskir boð upp á tær 2,8 milliónirnar, sum landskassin eigur í íløgufelagnum

Pf. Tjaldur eigur hevur høvuðsskrivstovu í hesum bygninginum á Bryggjubakka (Mynd: Google)

SkrivaÐ:

Ingi Samuelsen

Nú er ætlanin at landskassans ogn í íløgufelagnum Pf. Tjaldur skal seljast.

Grannskoðarafyritøkan Januar lýsir nú eftir boðum upp á tey 2,8 prosentini, sum Fíggjarmálaráðið stendur fyri. Hetta svarar til 2,8 milliónir krónur av partapeninginum í Pf. Tjaldur.

Freistin at geva boð upp á henda ognarlutin er sett til 28. nanuar, og í fráboðanini verður eisini sagt, at Fíggjarmálaráðið tilskilar sær rætt til at vraka øll boð, um Fíggjarmálaráðið ikki metir, at tey eru nøktandi.

Pf. Tjaldur er eitt gamalt partafelag – tað elsta í føroysku partafelagsskrásetingini – tí tað er tað triðja, ið er skrásett í Føroyum. Upprunaliga er talan um Skipafelagið Føroyar.

Í dag er Pf. Tjaldur eitt íløgufelag, sum hevur sett pengar í onnur vinnurekandi feløg í Føroyum.

Tað er ikki einfalt at fáa yvirlit yvir tær fyritøkurnar, sum eru knýttar at Pf. Tjaldur, sum er skrásett sum móðurfeløg í hesum íløgu- ella ognarfeløgum, Spf. Skrínið, Spf. Kerið, Spf. Hjallur, Spf. undir Bryggjubakka, Spf. Løkir, Pf. John Dam & Co., Pf. North Nest Capital, Spf, Kolan og Tjaldur Holding AS í Noregi.

Fyritøkur, har Tjaldur er partur av eigaraskarðanum eru eitt nú JT Electric, Nema, Effo og Vindrøkt umframt aðrar.

Á heimasíðu felagsins verður sagt, at Tjaldur hevur sum mál at gera íløgur innan fiskivinnu og orku og so feløg, ið eru atknýtt hesum vinnum.

Rúni M. Hansen er nevndar formaður í Pf. Tjaldur. Hinir nevndarlimirnir eru Líggjas í Bø og Helge Lund.

Janus Thomsen er nýsettur stjóri í felagnum. Hann kemur frá einum sessi sum stjóri í Pf. Effo, og avloysir Árna Tór Rasmussen, ið hevur sitið sum stjóri síðan desember 2012. 

Greinin varð fyrstu ferð løgd út 07. november 2022

Bjarni á Steig stjóri fyri nýggja Fólkaheilsustýrið

64-ára gamli serlæknin, ið áður hevur verið leiðandi yvirlækni á medisinska deplinum, er settur sum fyrsti stjórin fyri sjálvstøðuga stovnin undir Heilsumálaráðnum

 

SkrivaÐ:

Tíðindaskriv

Landsstýrismaðurin við heilsumálum, Kaj Leo Holm Johannesen, hevur gjørt av at seta Bjarna á Steig, yvirlækna, sum stjóra fyri Fólkaheilsustýrið.

Bjarni á Steig er 64 ára gamal, er útbúgvin lækni frá Københavns Universitet í 1991, serlækni í hæmatologi í 2003 og í intern medisin í 2004. Bjarni hevur eisini diplom frá serlæknaskeiði í palliativum medisini í 2013 umframt ymisk viðkomandi skeið.

Bjarni hevur drúgvar leiðsluroyndir frá síni tíð sum leiðandi yvirlækni á medisinska deplinum frá 2009 og fram til 2017. Eisini hevur Bjarni starvsroyndir sum virkandi landslækni í styttri tíðarskeið.

Fólkaheilsustýrið, sum verður sett á stovn á nýggjárinum, er ein sjálvstøðugur stovnur undir Heilsumálaráðnum, har yvirskipaðu heilsufakligu uppgávurnar í Føroyum verða skipaðar.

Fólkaheilsustýrið skal við hollum kunnleika til føroysk heilsuviðurskifti og samfelagsviðurskifti veita heilsufakliga ráðgeving og vegleiðing. Ein týðandi uppgáva verður at menna og styrkja fólkaheilsuarbeiðið og fyribyrging. Harumframt skal Fólkaheilsustýrið veita granskingargrundaða heilsufakliga ráðgeving og menna, viðgera og skipa hagtøl og skráir á heilsuøkinum.

Tíðindaskriv frá Heilsumálaráðnum

Greinin varð fyrstu ferð løgd út 08. november 2022

1 ár og 7 mánaða fongsulsrevsing fyri at smugla hassj

Talan er um størstu nøgd, sum føroyska løgreglan hevur tikið í eini atsókn tey seinastu nógvu árini

(Savnsmynd)

SkrivaÐ:

Tíðindaskriv

Ein 43 ára gamal maður bleiv í Føroya Rætti dømdur 1 ár og 7 mánaða treytaleysa fongsulsrevsing fyri at hava smuglað umleið 15 kilo av hassji til Føroya við tí í hyggju at selja víðari. Maðurin, sum er danskari, játtaði seg sekan.

Maðurin kom til Føroya við Norrønu 10. oktober í ár. Í bilinum, sum maðurin hevði við, fann politiið omanfyri 15 kilo av hassji. Hassjið var goymt í einum loyniligum rúmi undir viðførisrúminum. Bilurin var serliga bygdur til smuglingina, m.a. soleiðis at lúkan til loyniliga rúmið kundi latast upp frá førarasetrinum.

Ákæruvaldið kravdi, at bilurin, sum var nýttur til smuglingina, bleiv inndrigin. Hesum tók Føroya Rættur undir við.

Nøgdin av hassji, sum maðurin hevði við til Føroya, er tann størsta, sum politiið hevur tikið í einari atsókn tey seinastu nógvu árini, og hevur eitt søluvirði á gøtuni millum 3,7  og 4,5 milliónir krónur. Politiið kannar enn málið, og í løtuni eru fleiri onnur, sum eru skuldsett í málinum.

Maðurin móttók dómin.

Føroya Politi hevur higartil í ár lagt hald á omanfyri 40 kilo av hassji, sum er tann størsta samlaða nøgdin, sum politiið hevur tikið uppá eitt ár, samanborið við undanfarin ár.

Tíðindaskriv frá Føroya Politi 

Greinin varð fyrstu ferð løgd út 10. november 2022

Húsarhaldsskúli Føroya: Ein verkætlan fyri yvir 85 milliónir krónur

Landskassin rindar 37 milliónir krónur, og Bústaðir og Klaksvíkar kommuna rinda eisini nógv til verkætlanina. Nýggi skúlin á Biskupstorgi verður áleið 2.100 fermetrar til støddar

Mánadagin var stórt alment tiltak í Klaksvík, tá hakin á fyrsta sinni varð settur í til nýggjan húsarhaldsskúla (Mynd: Sverri Egholm)

SkrivaÐ:

Agnar Prestá

Mánadagin var stórt alment tiltak í Klaksvík, tá hakin varð settur í til nýggjan húsarhaldsskúla.

Tað var Jóhanna á Tjaldrafløtti, skúlastjóri, sum loysti fyrsta flagið. Síðani varð farið í hølini, har Norðoya Kunningarstova hevði sítt virksemi. Karl Johansen, borgarstjóri, flutti fram røðu og arkitekturin Svend Sivertsen frá Fuglark greiddi frá verkætlani.

Svend Sivertsen, arkitektur frá Fuglark (Myndir: Sverri Egholm)

Hendan verkætlanin kostar samanlagt 85,6 milliónir. Klaksvíkar kommuna upplýsir á heimasíðu sínari, at av teimum sum rinda til verkætlanina, eigur Landskassin størsta partin. Hann rindar 37 milliónir fyri nýggja húsarhaldsskúlan. Bústaðir rinda 27,6 milliónir,  Klaksvíkar kommuna hevur játtað 21 milliónir til verkætlanina.

Nýggi skúlin við vistarparti verður áleið 2.100 fermetrar til støddar. Tað er byggifyritøkan í Klaksvík, Kanjon, sum er høvuðsarbeiðstakari. Óvist er, júst nær skúlin mitt í Klaksvíkini fer at standa liðugur.

Borgarstjórin Karl Johansen segði millum annað í gjár, at tað var ein stórur dagur fyri menningina av miðbýnum, men allar mest ein gleðidagur fyri Húsarhaldsskúla Føroya. At menna ein miðbý ella at menna eitt skúlatilboð er ikki nakað, ið verður framt eftir einum degi.

- Tað krevur dirvi, áhaldni, samstarv, tol, arbeiðssemi og ikki minst eina trúgv uppá, at verkætlanin tænir einum hægri endamálið, sum er at skapa trivnað og vøkstur í býnum.

Mynd: Sverri Egholm

Greinin varð fyrstu ferð løgd út 08. november 2022

Ann Fuglø er tekniskur leiðari hjá Eiðis kommunu

Hetta hevur við sær, at broytingar verða gjørdar í umsitingini í kommununi - frá 1. januar 2023 verður borgarstjórastarvið broytt til hálvtíðarstarv. Í løtuni er Rógvi Egilstoft í fulltíðarstarvi sum borgarstjóri

Ann Fuglø er útbúgvin byggifrøðingur og hevur drúgvar royndir; bæði á teknistovu, byggivinnu og í kommunalari umsiting (Mynd: eidi.fo)

SkrivaÐ:

Agnar Prestá

1. november byrjaði Ann Fuglø í starvi sum tekniskur leiðari hjá Eiðis kommunu. Ann bleiv útbúgvin byggifrøðingur í 1996, og hevur drúgvar royndir, bæði á teknistovu, byggivinnu og í kommunalari umsiting.

Hesum boðar Eiðis kommuna frá á heimasíðu sínari. 

- Setanin av tekniskum leiðara hevur við sær, at Eiðis kommuna kann bjóða bæði vinnu og borgarum eina enn betur tænastu, samstundis sum teknisk viðurskiftir í kommununi verða betur skipaði.

Í hesum sambandi er eisini greitt, at broytingar verða gjørdar í umsitingini í Eiðis kommunu. 

Tí samstundis sum tekniska økið er uppraðfest, við tað at tekniskur leiðari er settur í starv, hevur bygdaráðið samtykt, at borgarstjórastarvið verður broytt til hálvtíðarstarv frá 1. januar 2023. Tað skrivar eidi.fo.

Hetta kemst av, at tekniski leiðarin kemur at taka nakrar av teimum uppgávum, sum hava ligið á borgarstjóranum, verður upplýst úr Eiðis kommunu.

Í løtuni er Rógvi Egilstoft í fulltíðarstarvi sum borgarstjóri í Eiðis kommunu. Nú fer tekniski leiðarin at taka nakrar av teimum uppgávum, sum hava ligið á borgarstjóranum, á seg (Mynd: Jens Kr. Vang)

Greinin varð fyrstu ferð løgd út 09. november 2022

Føroyingar gleða 3.586 ukrainsk børn

Í vikuni vóru 3.461 skógvaeskur sendar av landinum til Onglands, haðani tær fara víðari til Ukraina. Umframt hesar eskurnar, høvdu føroyingar keypt 125 eskjur á netinum, og hesar fara eisini til neyðstødd børn

 

SkrivaÐ:

Tíðindaskriv

Aftur í ár hava fleiri føroyingar verið við til at gleða børn úti í heimi við at senda eina jólagávu. Í undanfarnu viku vóru 3.461 skógvaeskjur sendar av landinum til Onglands, haðani tær fara víðari til Ukraina.

Í ár fara føroysku eskjurnar til krígsrakt børn í Ukraina ella til ukrainsk børn, ið eru flýdd til grannalondini. Umframt hesar eskjurnar so hava føroyingar eisini keypt eskjur á netinum. Í undanfarnu viku høvdu føroyingar tilsamans keypt 125 eskjur á netinum. Hesar fara eisini til neyðstødd børn. So samanlagt hava føroyingar higartil í ár latið 3.586 eskjur.

Christmas Child Føroyar takkar øllum, ið hava sett tíð og pening av til at pakka hesar eskjurnar, eins og takkað verður fyri vælvild í samband við at savna eskjur inn runt í landinum og at fáa sent tær víðari.

Greinin varð fyrstu ferð løgd út 06. november 2022

Fleiri løntakarar í oktober

Stívliga 27.900 løntakarar vóru í oktober. Tað eru slakir 500 fleiri enn sama mánað í fjør

(Mynd: Ólavur Frederiksen / Hagstovan)

SkrivaÐ:

Sverri Egholm

Løntakarafjøldin veksur framvegis, men ikki við somu ferð, sum undan koronufarsóttini. Í oktober í ár vaks løntakaratalið 1,7 prosent samanborið við í fjør. Í oktober í 2019 vóru løntakararnir 3,4 prosent fleiri í mun til sama mánað í 2018.

Fallið, sum sæst í grafinum, er í aprílmánaði í 2020, tá landið var farið niður í ferð.

Fleiri menn og kvinnur eru í løntakaraskaranum samanborið við oktober í fjør. Í oktober vóru um 14.400 menn og 13.600 kvinnur løntakararar. Vøksturin er ávikavist 1,8 prosent fyri menn og 1,5 prosent hjá kvinnum í mun til fjør. 

Greinin varð fyrstu ferð løgd út 11. november 2022

Finalan í First Lego league í dag

Skúlin á Argjahamri er í dag karmur um finaluna í First Lego league. 12 lið kappast

 

SkrivaÐ:

Sverri Egholm

Nú er tíðin komin at finna føroyameistaran í First Lego League 2022.

Føroyski First Lego League-endaleikurin verður í dag, leygardagin 12. november frá klokkan 09.30 til klokkan 14.30 í skúlanum á Argjaharmi.

12 lið fara at kappast um at gerast føroyameistarar og møguleikan at umboða Føroyar í donsku finaluni.

Evnið í ár er Super Powered og snýr seg um allar teir ymsu hættirnar vit framleiða, flyta og brúka orku í samfelagnum. 

Til endaleikin fara liðini fyri dómarum at leggja fram nýhugsandi loysnir sínar, at kappast í robott dystum á stóra flotta lego bananum, og at hava básar, har tey kappast um at marknaðarføra loysn sína best.

Sagt verður at øll eru vælkomin í skúlan á Argjahamri at fylgja við.

Greinin varð fyrstu ferð løgd út 11. november 2022

RAN-netið er nú til reiðar til 5G

Fyrsti partur av avbeiðnum at byggja nýtt farnet við 5G er liðugur. Gott og væl 165 sendistøðir eru skiftar út, og fleiri enn 30 nýggjar mastrar eru settar upp. Eftir ætlan stendur nýggja farnetið liðugt í fyrsta ársfjórðingi 2023

- Vit hava lagt dent á at órógva sum minst, men tað hevur verið torført at fyribyrgt svikaligum sambandi í einum ella fleiri økjum. Vit eru so statt sera fegin um, at viðskiftafólk hava sýnt tol og umbæri við okkum, sigur Símun Skaalum, stjóri í FT Samskifti

SkrivaÐ:

Tíðindaskriv

Leygardagin 5. november varð týðandi stig tikið á leiðini at byggja nýtt farnet við 5G. Tá varð síðsta Huawei-sendistøðin skift út, og harvið er arbeiðið at leggja um til Ericsson á RAN-netinum liðugt.  

RAN-netið eru sendistøðirnar, sum veita dekning á landi og sjógvi. Arbeiðið hevur gingið væl, men inntrivið hevur verið stórt, og tað hava viðskiftafólk merkt, ásannar Símun Skaalum, stjóri í FT Samskifti. 

- Vit hava lagt dent á at órógva sum minst, men tað hevur verið torført at fyribyrgt svikaligum sambandi í einum ella fleiri økjum. Vit eru so statt sera fegin um, at viðskiftafólk hava sýnt tol og umbæri við okkum.

Gott og væl 165 sendistøðir eru skiftar út, og fleiri enn 30 nýggjar mastrar eru settar upp. RAN-netið skal nú neyvstillast samtíðis við, at annar partur av verkætlanini, sum er at leggja um til Ericsson í kjarnutøknini, fer av bakkastokki. 

Eftir ætlan stendur nýggja farnetið liðugt í fyrsta ársfjórðingi 2023, og tá verður 5G tendrað til frama viðskiftafólkum hjá bæði Føroya Tele og Nema, sum hava gjørt avtalu um at samstarva um RAN-netið. 

Tíðindaskriv frá Føroya Tele

Greinin varð fyrstu ferð løgd út 08. november 2022

Suðuroyar Sparikassi tillagar renturnar

9. desember hækkar Suðuroyar Sparikassi inn- og útlánsrenturnar við ávikavíst 0,70 og 0,50 prosentstigum

(Savnsmynd)

SkrivaÐ:

Alda Nielsdóttir

Evropeiski miðbanking og danski tjóðbanking hækkaðu renturnar herfyri, og tað sama verður nú gjørt í Føroyum. Nú boðar eisini Suðuroyar Sparikassi frá, at hann fer at hækka renturnar.

Renturnar hjá evropeiska miðbankanum og danska tjóðbankanum hækkaðu við ávikavíst 0,75 og 0,60 prosentstigum, og Suðuroyar Sparikassi boðar frá, at hann hækkar innlánsrenturnar við upp til 0,70 prosentstig og útlánsrenturnar við upp til 0,50 prosentstig.

Rentubroytingin fær gildi 9. desember.

Greinin varð fyrstu ferð løgd út 07. november 2022

Árni Olsen nýggjur formaður í Ferðavinnufelagnum

Henny á Líknargøtu, sum hevur verið forkvinna seinastu árini, er nú næstforkvinna, eftir at nevndin hevur skipað seg

Frá vinstru: Henny á Líknargøtu, Árni Olsen, Jenny í Heiðunum, Sakaris Frederiksen, Mimmy Vágsheyg og Hans Jákup Kollslíð (Mynd: Vinnuhúsið)

SkrivaÐ:

Alda Nielsdóttir

Mikudagin 19. oktober hevði Ferðavinnufelagið aðalfund.

Á aðalfundinum stóðu Henny á Líknargøtu og Árni Olsen fyri vali. Harumframt ynskti Aleth Nielsen at takka fyri seg í nevndini, og nýggjur nevndarlimur skuldi tí veljast í hennara stað. Tiltakslimurin stendur fyri vali á hvørjum ári.

Úrslitið var, at Henny á Líknargøtu og Árni Olsen vóru afturvald, og at Jenny í Heiðunum var vald sum nýggjur nevndarlimur í felagnum. Mimmy Vágsheyg var afturvald sum tiltakslimur, skrivar Vinnuhúsið.

Í farnu viku skipaði nevndin seg, og er hon skipað soleiðis: Árni Olsen, formaður, Henny á Líknargøtu, næstforkvinna, Hans Jákup Kollslíð, Sakaris Frederiksen og Jenny í Heiðunum.

Greinin varð fyrstu ferð løgd út 07. november 2022

Urd verður mentanarsamskipari í Runavík

Byrjar í starvinum fyrst í nýggja árinum

(Savnsmynd: Sverri Egholm)

SkrivaÐ:

Ingi Samuelsen

Runavíkar býráð hevur á fundi tikið avgerð um at seta Urd Johannesen í starv sum mentanarsamskipari hjá Runavíkar kommunu, haðani hon er ættað. 

Við starvinum fylgir høvuðsábyrgd fyri virkseminum í Løkshøll, umframt samskipan av mentanartiltøkum kring um í Runavíkar kommunu, sum telur 15 bygdir, skrivar heimasíðan hjá kommununi.

Urd er útbúgvin cand.mag í enskum og altjóða viðurskiftum og master í Arts Management og hevur drúgvar  og fjølbroyttar royndir innan mentanararbeiði bæði á mentanarstovnum og sum sjálvstøðug.

Urd byrjar í starvinum tíðliga í nýggja árinum. 

Greinin varð fyrstu ferð løgd út 10. november 2022

Elsa Østergaard nýggjur deildarstjóri í Mentamálaráðnum

Hon er 46 ára gomul og útbúgvin cand. jur, umframt at hava tikið grundleggjandi leiðsluskeið og diplomútbúgving í leiðslu og onnur viðkomandi skeið. Elsa tekur við sum stjóri á Útbúgvingardeildini 1. januar

Elsa Østergaard hevur 16 ára royndir innan bæði føroyska og danska fyrisiting, harav 7 ára royndir sum fulltrúi í Innlendismálaráðnum

SkrivaÐ:

Tíðindaskriv

Elsa Østergaard er sett sum deildarstjóri á Útbúgvingardeildini í Uttanríkis- og mentamálaráðnum. Deildin hevur ábyrgdina av tí fakliga og politikkfyrireikandi arbeiðinum í breiðum týdningi innan útbúgvingarøkið og gransking, sum fevnir um alt frá dagstovni, fólkaskúla, miðnámi, hægri útbúgving, gransking v.m.

Elsa Østergaard er 46 ára gomul og útbúgvin cand. jur. í 2005 frá Århus Universitet, umframt at hava tikið grundleggjandi leiðsluskeið og Diplomútbúgving í leiðslu og onnur viðkomandi skeið. Hon hevur 16 ára royndir innan bæði føroyska og danska fyrisiting, harav 7 ára royndir sum fulltrúi í Innlendismálaráðnum, har hon m.a. hevur arbeitt við løgfrøði og ráðgivið leiðsluni.

Í 2013 byrjaði Elsa Østergaard hjá Ríkisumboðnum, har hon enn er, og har hon síðstu árini hevur starvast sum ”høvuðsráðgevi” við leiðsluábyrgd, og har arbeiðið er fjølbroytt og m.a. fevnir um ymiskar løgfrøðiligar uppgávur.

Harumframt røkir Elsa Østergaard ymiskt nevndararbeiði. Eitt nú var hon forkvinna í Kærunevndini fyri Lendismálum í nøkur ár, áðrenn hendan var niðurløgd, og hon er limur í Yvirfriðingarnevndini og ráðgevi fyri Norsk Veritas.

Elsa Østergaard tekur við starvinum tann 1. januar 2023.

Tíðindaskriv frá Uttanríkis- og Mentamálaráðnum

Greinin varð fyrstu ferð løgd út 09. november 2022

ADHD felagið fingið 40.000 krónur í gávu frá Kiwanis

Atjóða felagsskapurin hevði avgjørt at lata felagnum pening til arbeiði til frama fyri børnum og ungum við ADHD/ADD

Fríðbjørn Poulsen frá Kiwanis Tórshavn og Bjørg Dam frá ADHD-felagnum

SkrivaÐ:

Tíðindaskriv

Á limakaféini hjá ADHD felagnum í Reinsaríinum í oktober kom nývaldi forsetin í Kiwanis Tórshavn, Fríðbjørn Poulsen, á gátt og handaði forkvinnuni Bjørg Dam stóra peningagávu á 40.000 krónur.

Altjóða felagsskapurin hevði avgjørt at lata felagnum pening til arbeiði frama fyri børnum og ungum við ADHD/ADD, so sum at gera upplýsandi tilfar og sjálvhjálparbólkar, ið felagið bjóðar ókeypis.

Kiwanis stavar úr indianskum máli og merkir “vit byggja.” – Limir í felagnum savna pening saman hvørji jól, við at selja jólatø og á ólavsøku lutaseðlar, við m.a. tiltikna føroyska bátininum á vinnaraseðlinum. Peningurin verður latin til vælgerandi arbeiði frama fyri børn og ung.

- Sjálvhjálparbólkar er ein av okkara kjarnuppgávum, sum gagna børnum og ungum við ADHD/ADD sera væl. Bólkarnir eru ókeypis fyri luttakarnir, men teir krevja nógva fígging og orku frá felagnum at skaffa. Tí kemur hesin peningurin sera væl við, segði Bjørg Dam, tá hon takkaði Kiwanis fyri stóru gávuna.

Tíðindaskriv frá ADHD-felagnum

Greinin varð fyrstu ferð løgd út 08. november 2022

Býráðið í Klaksvík stegðar fyribils útstykkingini á Fossum

Orsøkin er, at fíggjarligt rásarúm ikki er hjá kommununi at fremja alla verkætlanina, sum verður steðgað 1. desember. Nú skal samráðast við verandi arbeiðstakara um, hvussu serliga fyrsta byggistig, ið fevnir um 21 grundstykki til sethús og øki til 13 randarhús, skal gerast liðugt

Talan er um eina sera stóra verkætlan til slakar 125 milliónir krónur. Allir sáttmálarnir í verkætlanini eru uppsagdir, og verkætlanin verður steðgað (Mynd: klaksvik.fo)

SkrivaÐ:

Agnar Prestá

- Í løtuni er ikki fíggjarligt rásarúm hjá kommununi at fremja alla hesa stóru verkætlan. Tí hevur býráðið einmælt samtykt at steðga verkætlanini. Farið verður nú undir samráðing við verandi arbeiðstakara, RTS Contractors, um at gera neyðuga arbeiði fyri at gera fyrsta byggistig liðugt á ein forsvarligan hátt og fyri kommununa nøktandi kostnað.

Soleiðis skrivar Klaksvíkar kommuna á heimasíðu sínari fyri lítlari løtu síðani.

Útstykkingin á Fossum byrjarði fyri tveimum árum síðani. Talan er um eina sera stóra verkætlan, ið fevnir um 89 grundstykkir, harav 43 stykkir til sethús og 46 til raðhús, umframt eitt stórt grundstykki, sum millum annað kann nýtast til ein barnagarð. Samlaði kostnaðurin er mettur til at vera slakar 125 milliónir krónur.

Nú noyðast tey í Klaksvíkar býráðið at ásanna, at tað í løtuni ikki ber til at fremja hetta, og arbeiðið verður steðgað 1. desember í ár. Tó verður verkætlanin ikki slept: 

- Allir sáttmálarnir í verkætlanini eru uppsagdir, og verkætlanin verður steðgað Umframt samráðingar um at enda fyrsta byggistig, verður eisini samráðst um, hvussu farast skal fram viðvíkjandi restini av verkætlanini (byggistig 2 og 3).

Fyrsta byggistig fevnir um 21 grundstykki til sethús og øki til 13 randarhús. Hetta arbeiðið er komið væl áleiðis, og málið er, at fyrsta byggistig verður liðugt í 2023. Tey, sum hava fingið tillutað grundstykki fáa í næstum nærri kunning um, nær grundstykkini eftir ætlan verða klár.

Greinin varð fyrstu ferð løgd út 10. november 2022

Fyrstu randarhúsini við Høganesvegin reist

Randarhúsini eru partur av nýggja býlinginum á longda Høganesvegnum

(Mynd: Nes kommuna)

SkrivaÐ:

Sverri Egholm

Við Høganesvegin á Toftum eru fyrstu íbúðirnar nú reistar, skrivar Nes kommuna á heimasíðuni.

Hendan verkætlanin hjá KBH hevur seks randarhús. Tey eru staðsett í vøkrum náttúruumhvørvi og góðum útsýni yvir Skálafjørðin. Randarhúsini eru partur av nýggja býlinginum í økinum, har Nes kommuna hevur longt Høganesvegin.

Nýtt setahúsaøki er í niðaru síðu av vegnum, meðan ætlanin er at hava randarhús, íbúðir o.l. í ovaru síðuni.

KBH fer í hesi verkætlanini at byggja tvey ymisk húsasløg tveimum hæddum. Hvørt randarhús hevur yvirdekkað bilskýli, tøknirúm, goysmlsu, inngongd/dur, tvey wc, bryggers, stórt rúm til køk/stovu og ávikavist trý ella fýra kømur.

Haraftuat er ein stór altan/terassa og gott tún bæði í niðaru og ovaru síðu.

(Mynd: Nes kommuna)

Greinin varð fyrstu ferð løgd út 07. november 2022

33 nýggj grundstykki á Sandi

Gongd er sett á nýggju útstykkingina “Skarðsbøur” á Sandi

Kristian Oskar Henriksen, formaður í teknisku nevnd í Sands kommunu loysti fyrsta flagið (Mynd: Sands kommuna)

SkrivaÐ:

Sverri Egholm

Arbeiðið at útstykkja 33 grundstykki á Sandi er byrjað. Fyrsta maskinan hjá J&K Petersen er komin á økið, og Kristian Oskar Henriksen, formaður í teknisku nevnd í Sands kommunu, fekk heiðurin at loysa fyrsta flagið.

- Nú hyggja vit frameftir við trúgv,  áræði og vón um at arbeiðið verður liðugt á heysti 2023. Hettar fer at bøta um hjá øllum teimum sum hava sett sær sum mál at búleikast á Sandi, sigur Sands kommuna.

- Ætlanin er eisini at byggja nýggjan barnagarð beint norðanfyri útstykkingina og skúlin liggur eisini í nærumhvørvinum. Útstykkingin verður heilt vist eitt paradís fyri barnafamiljur og onnur, heldur Sands kommuna.

Greinin varð fyrstu ferð løgd út 11. november 2022

Sørvágs kommuna roynir at selja dansistovuna

Bygningurin hevur ikki verið til nakað prýði fyri bygdina hesi seinastu árini

(Mynd: Sørvágs kommuna)

SkrivaÐ:

Ingi Samuelsen

Sørvágs kommuna ger nú eina roynd at selja gomlu dansistovuna og biohøllina á Dungasandi.

Talan er um ein bygning í sera vánaligum standi og sum treingir til ábøtur, gongur fram av sølulýsingini, sum ein advokatskrivstova hevur gjørt.

Talan er um grundøki við ástandandi bygningi, kallað Dansistovan. Økið er sambært tingbókini 862 fermetrar, harav vegur er 24 fermetrar.

Dansistovan var upprunaliga bygd av privatum, men seinastu árini hevur kommunan átt bygningin, ið má sigast ikki at hava verið nakað prýði fyri bygdina hesi seinastu nógvu árini.

Servituttur er lýstur fyri ognina, har sagt verður, at økið bert er ætlað til at byggja kvikmynda- og dansihøl á. Seinni hevur kommunustýrið víðkað servituttin til eisini at fevna um matstovu- og frítíðarvirksemi, og at skeinkiloyvi kann útvegast.

Sum skilst ynskir kommunan, at bygningurin verður umvældur av tí, ið tekur yvir bygningin. Sagt verður soleiðis í sølulýsingini:

“Í sambandi við søluna setir kommunan sum treyt, at bygningurin uttan verður settur í stand/høvuðsumvældur av keypara innan 2 ár. Verður henda treyt ikki hildin, kann seljari krevja, at ognin skal fella aftur til seljara.”

Áhugaðir boðgevarar skulu lýsa, hvat ætlanin er við bygninginum framgongur. Kommunan tilskilar sær rætt at havna øllum innkomnum tilboðum, framgongur á heimasíðuni hjá Sørvágs kommunu. 

Greinin varð fyrstu ferð løgd út 10. november 2022

Føroyskur mjøður á hillarnar

Jatnagarður er heitið á fyrsta føroyska mjøðinum

 

SkrivaÐ:

Tíðindaskriv

Í gjár gav felagið Galdr út fyrsta føroyska mjøðin. 

Talan er um ein mjøð av slagnum ‘braggott’: ein mjøður bryggjaður við malti og humlu, soleiðis at hann er ein blandingur ímillum mjøð og øl. 

Jatnagarður, sum mjøðurin eitur, hevur aroma av frukt og blómum, og nógvan hunangs- og malt smakk, við einum veti av karamell. Hann hóskar sera væl saman við røstum. 

Galdr varð stovnað í 2021 av brøðrunum Andrasi og Høgna á Lofti, og vinmanni teirra Peturi Eliasi Ellefsen. Í teirra egnu orðum er endamál teirra at ‘gera heimsins elsta drykk til heimsins nýggja yndisdrykk.’

Jatnagarður varð settur til sølu í Rúsunum kring landið í gjár.

Greinin varð fyrstu ferð løgd út 11. november 2022

Jens Pauli Heinesen heiðraður á 90 ára føðingardegnum

Jens Pauli Heinesen heiðraður á 90 ára føðingardegnum í kvøld við stórslignum, fjøltáttaðum tiltaki í Norðurlandahúsinum

Á pallinum hetta kvøldið eru Føroya Symfoniorkestur

SkrivaÐ:

Tíðindaskriv

Stórfingin tónleikaverk eru sett út til seks yrkingar hjá Jens Paula Heinesen. Fimm av teimum seks verkunum verða frumframførd við Føroya Symfoniorkestri o.ø., harímillum lagið "Sóleyan", sum kom út í fjør. Konsertin endar við kenda lagnum "Eitt dýpi av dýrari tíð".

Harumframt er upplestur og prát við ymisk kend fólk millum tónleikaframførslurnar.  Suni Merkisstein er vertur og leiðir áskoðararnar gjøgnum kvøldið.

Jens Pauli Heinesen telist millum Føroya mætastu rithøvundar. í dag, 12. november 2022, hevði hann fylt 90 ár.

Jens Pauli fór um sýn 19. juli 2011, men rúgvismikla skaldaverkið, hann legði eftir seg, livir og er enn til gleði og gagns fyri Føroya fólk. Høvundurin hevur uppiborið heiður fyri sítt stóra íkast til føroyskt mál og mentan, og verður tí fagnaður á 90 ára føðingardegnum við stórum hátíðarhaldi í Norðurlandahúsinum í kvøld.

Sjóneykan á seks yrkingar hjá Jens Paula
Hóast tær eru fáar, so eru yrkingarnar, sum Jens Pauli Heinesen skrivaði í lívi sínum, merkisverdar. Til heiðurs fyri høvundin og skaldaverk hansara, verður sjóneykan nú sett á seks av yrkingum hansara, sum dóttirin, Elin Brimheim Heinesen, hevur gjørt løg til.

Stórfingin symfoniskur tónleikur er settur út til løgini, og hesin verður framførdur á fagnaðarkonsertini. Fimm av seks verkum verða frumframførd. Fortíð og nútíð verða á henda hátt flættað saman og framtíðarinnar mentanararvur skaptur.

Hvør verður á palli?
Á pallinum vera Føroya Symfoniorkestur stjórnað av Bernharði Wilkinson, italski tónasmiðurin og konsertpianisturin Enzo De Rosa, sum hevur sett tónleikin út fyri symfoniorkestur og kór, kórini Tarira og Tórshavnar Manskór og Elin Brimheim Heinesen, sum verður sangsolistur.

Millum framførslurnar prátar Suni Merkisstein við Elina, Hanus Kamban, Anniku Hoydal, Sonna Smith, Bárð Persson, Unn Paturson, Enzo De Rosa og Gullu Øregaard.

Bergur Rasmussen ber fram kvøðu vegna Rithøvundafelag Føroya og Páll Danielsen lesur brot úr skaldskapi Jens Paula Heinesens.

Tónleikaverkini útgivin í næstum
Plátufelagið Tutl gevur tey seks tónleikaverkini út um stutta tíð.

Fýra av innspælingunum eru gjørdar við navnframa symfoniorkestrinum The Czech National Symphony Orchestra og kórinum Tarira, og tvær innspælingar eru gjørdar við The City of Prague Philharmonic Orchestra og Tórshavnar Manskóri.

Elin Brimheim Heinesen er sangsolistur í øllum seks innspælingunum.

Greinin varð fyrstu ferð løgd út 07. november 2022

Føroyingar væl móttiknir á Iceland Airwaves

Janus Rasmussen, Brimheim, Marius DC, Guðrið Hansdóttir, og Kóboykex framførdu á íslendska festivalinum farna vikuskiftið, og móttøkan var betri, enn tey høvdu væntað, sigur Glenn Larsen, leiðari fyri Faroe Music Export

Guðrið Hansdóttir á Iceland Airwaves (Mynd: Odysseas Chloridis)

SkrivaÐ:

Alda Nielsdóttir

Farna vikuskiftið framførdu fimm føroysk nøvn á íslendska tónleikafestivalinum Iceland Airwaves, og fingu tey av álvara sett síni fingramerki á ársins festival, bæði hvør sær og sum ein føroysk eind, skrivar Faroe Music Export, FMX í tíðindaskrivi.

Tey føroysku nøvnini, sum framførdu á festivalinum vóru Janus Rasmussen, Brimheim, Marius DC, Guðrið Hansdóttir, og Kóboykex.

Brimheim (Mynd: Odysseas Chloridis)

Festivalurin gekk fyri seg í døgunum 3. til 5. november, og fyriuttan at hava øll fimm nøvnini á sama palli fríggjadagin, spældu øll eisini eina eyka konsert annaðhvørt hósdagin ella leygardagin.

Eisini varð skipað fyri móttøku í samstarvi við G! Festivalin, fyri miðlum og øðrum í tónleikavinnuni, og var uppmøtingin sera góð. Tað var eisini meira ella minni fult hús, tá føroysku framførslurnar vóru á skránni.

Janus Rasmussen (Mynd: Odysseas Chloridis)

Um upplivingina siga tey í Kóboykex m.a. soleiðis:

– Tað var fantastiskt! Vit í Kóboykex væntaðu ikki, at tað kundi ganga so mikið væl. Longu áðrenn konsertirnar høvdu BrooklynVegan og Paste Magazine skrivað um bólkin. Tveir risamiðlar í tónleikaíðnaðinum. Ein lítil fuglur nevndi eisini, at Clash Magazine, Dork Magazine, Rolling Stone, og NME vóru til staðar til konsertina.

Kóboykex (Mynd: Odysseas Chloridis)

Eisini Marius DC hugtók áskoðarafjøldina, og varð hann av fleiri nevndur eitt jaligt yvirraskilsi.

Sjálvur sigur Marius soleiðis:

– Fríggjakvøldið í Iðnó var lætt tann besta konsertin eg nakrantíð havi havt. Iceland Airwaves hevur veri ómetaliga spennandi fyri meg og mín bólk, við tveimun fantastiskum konsertum, og einari rúgvu av nýggjum sambondum. Luturin, ið FMX tók í at fáa hendan túrin í lag, var ómetaligur. Framtíðin sær spennandi út fyri Marius DC aftan á Iceland Airwaves.

Marius DC (Mynd: Odysseas Chloridis)

Leiðarin fyri FMX, Glenn Larsen, sigur seg ikki ivast í, at føroysku framførlsurnar á Iceland Airwaves fer at hava týdning fyri føroyskan tónleik.

– Tey fimm listafólkini kláraðu seg ómetaliga val, og áhugin frá altjóða sendinevndum, miðlum og áskoðarunum var betri, enn vit høvdu torað at vóna.

Greinin varð fyrstu ferð løgd út 07. november 2022

- Føroyskur tónleikur til reiðar at leggja seg fyri heimin

Kovboykex og Marius DC fáa góð skoðsmál í tónleikaritinum Rolling Stone

Marius DC á Iceland Airwaves (Mynd: Odysseas Chloridis)

SkrivaÐ:

Ingi Samuelsen

Føroyskur nýmótans tónleikur fær góða umrøðu í altjóða tónleikamiðlum. Tað er bretska útgávan hjá stóra tónleikaritinum Solling Stone, sum hevur erið í Íslandi og gjørt ummæli av tónleikafestivalinum Iceland Airwaves, sum var herfyri.

Og lagt er merki til føroysku íkastini. Serliga er tað upptraðkanin hjá Kovboykex og Marius DC, sum fær rósandi umrøðu.

Greinin á Rolling Stone sæst her

Um countrybólkin Kovboykex hjá Heiðrik á Heygum og Sigmund Zachariassen skrivar Rolling Stones:

“Annar dagurin byrjaði við tí mest forkunnuga – elektrorokkur úr Føroyum við western íblástri. Framførslan hjá Kovboykex vísti seg at gerast ein óvæntað frægd í IÐNÓ mentanarhúsinum í Reykjavík. Nýggja staklagið “Night Out” er hugtakandi, har hárfínu elektropopp rútmurnar berjast móti Morricone líknandi bríkslingini og instrumenteringini”.

Um rapparan Marius DC verður skrivað soleiðis:

“Síðsti dagur á Iceland Airwaves byrjaði á høvuðspallinum, har føroyskt rapp – mest vanliga útflutningsvøran – gjørdi um seg. Taað var Marius DC, ein orkumikil 18 ára gamal, ið viljafastur vil prógva, at ljóð hansara er størri enn hansara heimland. Hansara undrunarverda pallframførsla fær hann til at leypa inn í mongdina fyri at píska áskoðaraskarðan upp, meðan sangir sum ‘Gasoline’ nærkast klassiskum West Coast rappi. Saman við fyrrnevndu Kovboykex er hetta prógv um, at føroyski tónleikapallurin spakuliga er við at leggja seg fyri heimin”.  

Greinin varð fyrstu ferð løgd út 09. november 2022

TikTok stjørnan Nathan Evans kemur á Voxbotn

27 ára gamli skotski postmaðurin hevur givið sjómansvísum nýtt lív. Í summar kemur hann at framføra í Vágsbotni

 

SkrivaÐ:

Tíðindaskriv

TikTok stjørnan Nathan Evans kemur á Voxbotn 2023.

Sjómansvísur, ella á enskum 'shanties', fingu av álvara nýtt lív, tá 27 ára gamli skotski postmaðurin Nathan Evans legði eitt video á sosiala miðilin TikTok, har hann sat og sang eina gamla sjómansvísu. Vísan var fangandi og løtt at syngja, og TikTok brúkarar um allan heim foru á gera sokallað 'sea shanties', og sangurin bleiv eitt viralt hitt.

Eftir stuttari tíð var Nathan Evans miðpunktið í einari nýggjari mentanarligari rørslu við 'Sea Shanties', sum eftir stuttari tíð hevði yvir 20 milliónir av vísingum og eisini megnaði hann at koma ovast á hittlistarnar kring heimin.

Í Føroyum hava sjómansvísur ofta verið nýttar í veitslulagi, men uttanlands hevur hendan sjangran so at siga verið útdeyð; men við løgum sum "Wellerman", "The Last Shanty", "Told you So" og "Ring Ding" hevur Nathan av álvara vakt gleðini hjá unga ættarliðnum fyri fólksligu tónleikasjangruni.

Tit kunnu gleða tykkum, tí hetta liggur til føroyska høgrabeinið, og Nathan Evans fer so avgjørt at seta lív í fjøldina í Vágsbotni.

Greinin varð fyrstu ferð løgd út 11. november 2022

Fýra norðurlendskir rithøvundar vitja Bókadagarnar

Talan er um Gyrðir Elíasson, Iben Mondrup, Anne Holt og Marry Ailonieida Sombán Mari. Hesi fara á ymsan hátt at vera við til tiltakið, ið byrjar um eina viku

 

SkrivaÐ:

Tíðindaskriv

Í samstarvi við útgávufeløg, felagsskapir og rithøvundar bjóðar Norðurlandahúsið aftur í ár til Bókadagar, soleiðis at tey, ið kanska hava ein serligan tokka til bókmentir í Føroyum, fáa høvi at savnast. Á skránni er m.a. rithøvundasamrøður, upplestur, bókaframløgur, skriviverkstaður, bókasøla og mangt annað.

Norðurlandahúsið hevur hesuferð bjóðað fýra sera ymiskum rithøvundum til Bókadagarnar, sum í ár verða 16. til 20.november.

Sjangrurnar, sum hesir rithøvundarnar virka innanfyri, eru serstakliga ymiskar, og tí kann ein altíð finna okkurt tiltak, sum er áhugavert fyri júst tey. Sjangrurnar flyta seg frá sterkum lýriskum yrkingum til spennandi krimi bókum – frá skaldsøgum um skapanartrongd til skaldsøgur um familju og kærleika.  

Gyrðir Elíasson (ÍS) hevur skrivað skaldsøgur, stuttsøgur og yrkingar, men ongantíð er nakað útgivið á Føroyskum – inntil nú. Sprotin hevur tvey tey seinastu árini givið tríggjar skaldsøgur út eftir íslendinginum; Sandábókin (2021), Suðurgluggin (2021) og Sorgarmarsjurin (2022). Páll Danielsen fer at lesa upp, og síðani verður samrøða við rithøvundan.  

Iben Mondrup (DK) er uppvaksin í Grønlandi, og tað hevur ávirkað hennara lív og hennara ritverk. Hennara nýggjastu bøkur Tabita (2020) og Vittu (2022) vera høvuðstema í tiltakinum til Bókadagar. Rithøvundurin fer sjálv at hava eina framløgu, og síðani verður ein samrøða millum hana og Bergljót av Skarði.  

Ein tann kendasti krimi-rithøvundurin í norðurlondum, Anne Holt (NOR), kemur eisini til Bókadagar. Flest kenna Vik/Stubø-røðina, sum skapar grundarlagið á tí væl umtóktu svensku sjónvarpsrøðini, Modus. Tað verður eisini ein møguleiki at fáa Anne Holt at signera eina bók.  

Rithøvundurin, yrkarin, leikrithøvundurin og myndlistakvinnan Marry Ailonieida Sombán Mari (Sápmi) var í uppskoti til bókmentavirðisløn Norðurlandaráðsins í ár við yrkingasavninum "Beaivváš mánat / Leve blant reptiler". Rúni Weihe fer at hava eina samrøðu við hana.  

Greinin varð fyrstu ferð løgd út 09. november 2022

Nýggj ungdómsskaldsøga frá Daniali Viðoy

"Rangstøða" er framhald av "Tvístøðu", sum kom út fyri tveimum árum síðani, men kann eisini lesast sum sjálvstøðug skaldsøga

Høvuðspersónurin er tann sami, men nú býr hann í Keypmannahavn, har ymiskar avbjóðingar og freistingar bíða

SkrivaÐ:

Agnar Prestá

Mikudagin verður bókaframløga í Skálanum í Norðurlandahúsinum. Bókin er nummar tvey í røðini um Bartal og hansara ymisku avbjóðingar, og hetta er ungdómsskaldsøga nummar tvey hjá 31-ára gamla Daniali Viðoy av Viðareiði, sum nú býr á Tvøroyri.

Tilverugrundarlagið hjá høvuðspersóninum Bartali er nú broytt. Hann er fluttur niður til Keypmannahavn og roynir at finna seg til rættis í forvitnisligu tilveruni.

- Møguleikarnir eru nógvir og freistingarnar stórar. Men júst sum gerandisdagurin er byrjaður, verður Bartal knýttur í eitt stríð, hann heldur vildi verið fyriuttan. Óveruleikakendar avdúkingar broyta lívsáskoðanina. Lívið bankar aftur uppá. Silja letur eina ófrættakenda og óhugnaliga verð upp fyri Bartali.

"Rangstøða" er framhald av "Tvístøðu", men kann eisini lesast sum sjálvstøðug skaldsøga, ger rithøvdundurin greitt.

Tað eru Ungu Føroyar, ið geva skaldsøguna út.

Greinin varð fyrstu ferð løgd út 09. november 2022

120 menn á palli samstundis

Tórshavnar Manskór og Karlakór Reykjavíkur skipa fyri jólakonsertum fyrst í desember

Tórshavnar Manskór (Savnsmynd: Ólavur Frederiksen / Faroephoto)

SkrivaÐ:

Tíðindaskriv

Seinastu nógvu árini hevur Tórshavnar Manskór skipað fyri einari stórari jólakonsert í Vesturkirkjuni fyrst í desember. Jólakonsertin hevur verið annað av tveimum stórum tiltøkum hjá manskórinum, og tí hevur vanliga verið gjørt nógv burtur úr júst hesari konsertini, sum hevur verið hildin saman við ymiskum gestakórum og solistum.

Í ár verður einki undantak í so máta. Heldur tvørturímóti, tí hesaferð verður skipað fyri einari heilari konsertrøð saman við einum av allarbestu manskórunum í Íslandi, kanska tí allarbesta av teimum øllum, nevniliga Karlakóri Reykjavíkur. 

Í alt fara kórini at hava seks konsertir, tríggjar í Føroyum og tríggjar í Íslandi. Konsertrøðin byrjar í Føroyum, har tann fyrsta verður í Lívdini í Hoyvík leygardagin 3. desember klokkan 17, tann næsta verður í Fríðrikskirkjuni á Toftum sunnudagin 4. desember klokkan 16 og tann triðja verður í Vesturkirkjuni til “vanliga tíð” sunnukvøldið 4. desember klokkan 19.30. Vikuskiftið eftir hava kórini tríggjar konsertir í Hallgrímskirkuni í Reykjavík.

Karlakór Reykjavíkur

Vinabandið millum kórini gongur langt aftur. Fyrstu ferð kórini sungu saman var, tá Tórshavnar Manskór var á ferð í Íslandi í 1993, og síðan hava kórini sungið saman í Føroyum í 1995, í Íslandi í 2005, í Føroyum í 2007 og í 2012 og so aftur nú, tíggju ár seinni, í 2022.

Tað eru tvey sera góð kór, sum í ár hava gjørt av at halda jólakonsertirnar saman. Karlakór Reykjavíkur er ógvuliga vælumtókt og hevur havt nógvar konsertir og givið nógvar fløgur út, og í 2026 kann kórið hátíðarhalda 100 ára stovningardagin. Tórshavnar Manskór, sum eisini er ógvuliga vælumtókt, varð stovnað í 1986 og er tí 60 ár yngri enn vitjandi kórið, men er í dag eitt av teimum heilt stóru kórunum í landinum. Tilgongdin hevur verið sera stór í seinastuni og til hesar konsertirnar telur kórið millum 50 og 60 mans. Karlakór Reykjavíkur telur eisini umleið 60 mans til hesar konsertirnar og tað vil siga, at tá kórini syngja saman sleppa áhoyrararnir at hoyra 120 mans á palli samstundis.

Skráin, sum er fjølbroytt, er skrúvað soleiðis saman, at kórini byrja hvør sær og enda síðan konsertina saman. Kórleiðarar vera Bjarni Restorff, sum stjórnar Tórshavnar Manskóri, og Friðrik S. Kristinsson, sum stjórnar Karlakóri Reykjavíkur.

Atgongumerki til konsertina í Lívdini leygardagin 3. desember vera at fáa á atgongumerki.fo í næstum.

Greinin varð fyrstu ferð løgd út 11. november 2022

Runda 8 milliardir í komandi viku

Fólkatalið á jørðini er tvífaldað úr 4 upp í 8 milliardir síðan 1974

Natalia Kanem, leiðari fyri UNFPA (Mynd: EPA)

SkrivaÐ:

Ingi Samuelsen

Um komandi viku, meira nágreiniliga 15. november, runda vit 8 milliardir íbúgvar á jørðini.

Tað er grunnurin fyri fólkavøkstri undir ST, UNFPA, sum hevur roknað seg fram til hetta.

Fólkatalið á jørðini er tvífaldað síðan 1974, og fýrfaldað síðan 1927 og í 2050 verða vit væntandi 9,7 milliardir á jørðini, skrivar dr.dk.

- Átta milliardir er ein týðandi merkishending fyri mannaættina, sigur leiðarin fyri UNFPA, Natalia Kanem.

Hon fegnast um, at alsamt færri børn doyggja í sambandi við, ella stutt eftir føðing, og at miðal livialdurin í heiminum eisini er hækkandi.

- Eg veit væl, at tað eru ikki øll, sum fegnast um hesa hending. Nøkur óttast fyri, at at vit gerast ov nógv fólk, men tað er ikki talið av fólkum, sum gevur orsøk til at óttast, sigur Natalia Kanem, sambært NTB.

Greinin varð fyrstu ferð løgd út 08. november 2022

Spania: Løgreglan lagt hald á 32 tons av marijuana

Hetta er størsta nøgdin av marijuana, sum nakrantíð er funnin, og hevur hon eitt søluvirði á 476 millióir krónur, upplýsir spanska løgreglan

(Mynd: Guardia Civil/Reuters)

SkrivaÐ:

Alda Nielsdóttir

Farna leygardag upplýsti spanska løgreglan, at hon hevði lagt hald á 32 tons av marihuana.

Hetta er størsta nøgdin, sum nakrantíð er funnin, og hevur hon eitt søluvirði á 64 milliónir evrur, ið svarar til 476 milliónir í okkara krónum.

Rúsevnini vórðu funnin, tá løgreglan kannaði fleiri garðar og verksmiðjur ymsastaðni í landinum. Undir átakinum handtók løgreglan eisini níggju menn og 11 kvinnur. Tey eru millum 20 og 59 ár.

Handtøkurnar vórðu framdar í Toledo, Ciudad Real, Valencia og Asturias í oktober, men ikki fyrr enn nú almannakunngjørdi løgreglan upplýsingar um málið, skrivar Ritzau.

Greinin varð fyrstu ferð løgd út 06. november 2022

Snar- og kviktelva um FM á Eiði um vikuskiftið

Um vikuskiftið verður telvað av øllum lívsins kreftum, tá kappast verður um føroyameistaraheitið í bæði snartalvi og kviktalvi

Helgi Dam Ziska

SkrivaÐ:

Innsent

"Teir telva títt, teir telva dátt"! Soleiðis verður kvøðið í Skrímslu.

Telvað verður í Hólmahúsinum á Eiði leygardagin og sunnudagin 12. og 13. november. 

Talv er komið afturíaftur á Eiði eftir drúgvan svøvn. Talvfelag varð stovnað í bygdini longu í 1956, og var umboðað á stovnandi aðalfundinum hjá Talvsambandi Føroya í 1970.

Í dag telva eiðismenn í Róki, sum er felagslið fyri telvarar í Sundalagnum. FM-kappingin í einstaklingstalvi á páskum var í ár á Eiði, og nú verða snar- og kvikkappingarnar eisini avgreiddar á sama stað. 

Helgi Dam Ziska - favorittur at endurvinna FM í bæði snartalvi og kviktalvi um vikuskiftið

Toppurin við
Áhugin tykist stórur fyri kappingini. Týskvøldið høvdu útivið tretivu telvarar boðað frá luttøku í snarkappingini, og heldur færri til kvikkappingina. Roknast kann við, at telvarar fara at leggjast aftrat so hvørt, sum vikuskiftið nærkast. Áhugaðir kunnu teknað seg á heimasíðu Talvsambandsins, faroechess.com.

Fleiri av okkara bestu telvarum eru við - eitt nú bæði Helgi Dam Ziska og Høgni Egilstoft Nielsen, sum í nøkur ár hava verið okkara sterkastu telvarar.

Byrjað verður leygardagin kl. 13.30 við FM-kappingini í snartalvi. Sunnudagin er kviktelvingin á skránni. Byrjað verður eisini klokkan 13:30. Talvsambandið sigur, at øll eru vælkomin, roynd sum óroynd. Tað er ikki krav, at telvast skal í báðum kappingunum.

Í snarkappingini eru reglurnar tær, at telvari fær 3 minuttir + 2 sekund fyri leikin. Í alt ellivu umfør eru. Í kvikkappingini eru 10 minuttir + 5 sekund fyri leikin. Og tá eru umførini níggju í alt.

Vinnarin fær 2.500 krónur, nummar tvey fær 1.500 kr. og nummar trý fær 1.000 krónur.

Sum skilst ætlar Talvsambandið eftir førimuni at varpa beinleiðis frá kappingini á heimasíðuni. 

Kongsrøðin
Skipaðar FM-kappingar í snartalvi hava verið í Føroyum á hvørjum ári síðani 1980.  Reglurnar vóru í nógv ár tær, at telvarar høvdu fimm minuttir hvør til talvið.

Ikki fyrr enn fyri fáum árum síðani var FM-telvingin býtt sundur í tvinnanda sløg eftir altjóða fyrimynd, snartelving (blitz) og kviktelving (rapid).

Vinnararnir hava verið hesir:

FM í snartalvi 1980 - 2021
1980 Bjarki Ziska, HT
1981 Súni Ziska, HT
1982 Bjarki Ziska, HT
1983 Andrias Ziska, HT
1984 Jens Chr. Hansen, TT
1985 Bogi Ziska, STF
1986 Torkil Nielsen, ST
1987 Leif Kristensen, GT
1988 Heini Olsen, KTF
1989 Heini Olsen, KTF
1990 Steintór Rasmussen, KTF
1991 Heini Olsen, KTF
1992 Heini Olsen, KTF
1993 Heini Danielsen, HT
1994 Ólavur Simonsen, KTF
1995 Martin Brekká, TFS
1996 Torbjørn Thomsen, KT
1997 Carl Eli N. Samuelsen, VT
1998 John Rødgård, VT
1999 Eyðun Nolsøe, KTF
2000 Finnbjørn Vang, KTF
2001 John Rødgaard, VT
2002 John Rødgaard, VT
2003 John Rødgaard, VT
2004 Helgi Dam Ziska, HT
2005 Helgi Dam Ziska, HT
2006 Helgi Dam Ziska, HT
2007 Helgi Dam Ziska, HT
2008 Helgi Dam Ziska, HT
2009 Helgi Dam Ziska, HT
2010 Helgi Dam Ziska, HT
2011 Helgi Dam Ziska, HT
2012 John Rødgård, VT
2013 Helgi Dam Ziska, HT
2014 Helgi Dam Ziska, HT
2015 Helgi Dam Ziska, HT
2016 Helgi Dam Ziska, HT
2017 Helgi Dam Ziska, HT
2018 Rógvi Egilstoft Nielsen, ST
2019 Helgi Dam Ziska, HT
2020 Helgi Dam Ziska, HT
2021 Helgi Dam Ziska, HT

FM í kviktalvi 2019 - 2021
2019 Høgni Egilstoft Nielsen, ST
2020 Helgi Dam Ziska, HT
2021 Helgi Dam Ziska, HT

(Innsent av Talvsambandi Føroya)

Greinin varð fyrstu ferð løgd út 08. november 2022

Minningarorð um Hans Joensen

Í farnu viku frættist at Hans Joensen, formaður í Havnar Arbeiðarafelag, var andaður eftir longri sjúkralegu

(Mynd: Kvf.fo)

SkrivaÐ:

Minningarorð / Føroya Arbeiðsgevarafelag

Í farnu viku frættist at Hans Joensen, formaður í Havnar Arbeiðarafelag, var andaður eftir longri sjúkralegu. Føroya Arbeiðsgevarafelag samstarvaði nógv við Hans, árini hann var formaður í Havnar Arbeiðarafelag.

Greinin varð fyrstu ferð løgd út 07. november 2022

Ein klassikari er farin - minningarorð um Hans

Hitt óttaleysa eygnabráið segði okkum, at vit vóru komin í takholt við mann, ið visti, hvat hann gjørdi. Hann var komin at leggja okkum lag á, nú vit fóru at rógva kapp

 

SkrivaÐ:

Minningarorð / Róðrarfelagið Knørrur

Men tað mundi vera styrkin, sum gjørdi fyrsta inntrykkið. Tí tað bæði sást og kendist, at maðurin var komin av góðum haga. Herðarnar sum Urðarfjall og armar sum eikitrø. Tað skapti respekt hjá okkum knektum og stulkum. Legg hartil sjálvsagan og skálkabrosið, og vit vóru seld. Tað sigur seg sjálvt.

Tú vart við okkum frá fyrsta degi, og tíbetur tað. Tí vit vóru bara kátir kálvar, men tú sást neistan í eygum okkara, og við tínum formati birti tú hann til bálareld og gjørdi okkum til menn. Og nú, næstan fjøruti ár seinni, brennur hin eldur enn, eins og gera munnu aðrir eldar, tú kveikti á fold.

Farin ert tú nú seggur um sýn.

Tú eigur eitt VIP-pláss í hjørtum okkara. Tað manst tú eiga í so mongum hjarta, sum tú hitti. Og sum hitti teg.

Tí summum menniskjum fellur man fyri automatiskt. Tey hava nakrar grundleggjandi eginleikar, sum orð ikki setast á, men man følir teir, tá ið man møtir hesum menniskjum. Sum eru tey stillar vibratiónir frá løtuni, tá ið Gud fekk hugskotið til Adam og Evu.

Tú vart eitt sovorðið menniskja, Hans. Uttaná ein skopunargarpur, innaní ein summarsleiktur softice. Tak nú dagin, tá ið tú sum piltur fekst tín fyrsta kalva, seldi fiskin og bart mammu tíni eitt koppastell fyri pengarnar. Longu tá leikti samlyndið í tær.

At tú seinni bleivst eitt bragdamenni, legði líkasum tær seinastu strikurnar aftur at ímyndini av tær. Av birtinginum, ið stríðsmenn vilja hava við sína lið. Av abbanum, ið barnahendur vilja leiða. Av manninum, ið aldri sveik. Av Hans Sigurd Borgar Joensen.

Vit vóru svínaheldig at møta tær. Sama helst onnur, tú vart saman við. Útróðrarmenninir, arbeiðarafelagið, bacalaosjakkið, bátsfelagarnir, kammeratarnir, familjan, samfelagið.

Og farin ert tú nú seggur um sýn.

Uppi í himmalsins vestibulum skal nú forhandlast um, hvørt tú skalt akslast í glimmur og einglaveingir, ella um tú sleppur í pulshosurnar, gummiskógvarnar, liverpoolblusuna, dýnujakkan og keppin. Tú riggar nokk best í tí, og heilsa teimum frá okkum øllum, at eingil ert tú allíkavæl. So ruddiligani.

Og líka vist sum at kalvin enn svimur í Skopunarfirði er tað, at við tær hevur hin einglanna herur fingið eitt trútt og heitt felagshjarta, ið bankar fyri teimum, sum hjálp treingja til. Og sum hevur máttin og megina til at gera nakað við tað.

Hvíl í friði, kæri Hans, og takk fyri alt. Harrin veri hjá tær, og hann signi og styrki tykkum, sum eftir sita.

Róðrarfelagið Knørrur

Greinin varð fyrstu ferð løgd út 11. november 2022