Magni Mohr hevur vunnið altjóða heiður fyri gransking

Størsti ítróttarmedisinski felagsskapurin American College of Sport Medicine hevur valt vísindaligu greinina hjá Magni Mohr, professari í arbeiðs- og ítróttarfysiolog á Setrinum, og starvsfeløgum hansar sum Ársins grein 2022

Við virðislønini fylgir altjóða miðling av úrslitunum, sum ACSM stendur fyri, umframt ein peningaupphædd og meira fokus (Savnsmynd: Sverri Egholm)

SkrivaÐ:

Agnar Prestá

Vísindaliga greinin hjá Magna Mohr og starvsfløgum hansara eitur “The Role of Muscle Glycogen Content and Localization in High-Intensity Exercise Performance: A Placebo-Controlled Trial”. 

Professarin á Setrinum, ið eisini er fysiskur venjari hjá A-landsliðnum í fótbólti, hevur skrivað greinina saman við donsku Jeppe F Vigh-Larsen, Niels Ørtenblad, Joachim Nielsen, Ole Emil Andersen og Kristian Overgaard, og nú hevur hon vunnið altjóða heiður frá heimsins størsta ítróttarmedisinska felagsskapi.

Greinin varð almannakunngjørd í fjør í viðurkenda vísindaliga tíðarritinum, “Medicine and Science in Sport and Exercise”, og tað er ítróttarmedisinski felagsskapurin, “American College of Sport Medicine” (ACSM), sum umsitur tíðarritið, ið hevur valt hana til Ársins grein (Paper of the Year) í 2022.

- Við virðislønini fylgir altjóða miðling av úrslitunum, sum ACSM stendur fyri, ein peningaupphædd, umframt at Magni Mohr sum høvuðsrithøvundi sleppur at leggja verkætlanina fram á komandi ACSM-ráðstevnu, sum verður í Denver, USA í juni í ár.

Granskingarverkætlanin kannar, hvussu vøddaglykogen (sukurlagur í vøddakyknunum) ávirka kropslig avrik, mýllívfrøðiligar processir í kyknuni og vøddavirkni undir hørðum intervalarbeiði.

Magni Mohr sigur við heimasíðuna hjá Fróðskaparsetrinum, at henda verkætlanin er partur av eini størri verkætlan, har tey royna at vísa, hvussu vøddaglykogen mekanistiskt ávirkar vøddavirkni og serstakar processir í vøddakyknuni.

- Síðan miðskeiðis í 1960´unum hava vit vita, at mongdin av vøddaglykogeni hongur saman við kropsligum avrikum, men sjálv mekanisman er enn ikki prógvað, og slett ikki undir hørðum intervalarbeiði, sum minnir um liðítrótt.

Professarin, ið áður hevur vunnið altjóða heiðrar, sigur eisini, at at fáa greinina valda sum Ársins grein 2022 í hesum høpinum heldur han vera nakað serligt.

- ACSM er, sum sagt, nógv tann størsti vísindaligi ítróttarmedisinski felagsskapurin í heiminum. Felagskapurin varð stovnsettur í USA í 1954 av amerikanskum læknum og fysiologum, sum tá sóu tætta sambandið millum rørslu, heilsustøðu og sjúkuváða. Tað eru tey, sum upprunaliga hava skapt “Exercise as Medicine-hugtakið”, og tað eru tey, sum umsita tilmælini um kropsliga rørslu í USA, sum heilsumynduleikar sum WHO eisini velja at fylgja, og tey menna protokollir til, hvussu sjúklingar kunnu viðgerast við kropsligari venjing. Tí er tað ein serligur heiður, at okkara arbeiði er valt sum ársins vísindaliga grein ella granskingarverkætlan av júst ACSM-felagsskapinum.

Greinin varð fyrstu ferð løgd út 16. mars 2023

Golfvøllurin á Glyvursnesi bjóðaður út í ár

Farna fríggjadag skrivaðu Heðin Mortensen, borgarstjóri í Tórshavnar kommunu, og Edwin Roald, golfvallararkitektur, undir ráðgevarasáttmála um fyrsta byggistig

Frá vinstru Johan Syderbø, leiðari á bygningsdeildini, Edwin Roald, golfvallararkitektur, Heðin Mortensen, borgarstjóri, Bárður Johannesen, verkætlanarleiðari, Rógvi Mikkelsen, formaður í Tórshavnar Golffelag og Jóan Petur Hentze, trivnaðarstjóri (Mynd: Tórshavnar kommuna)

SkrivaÐ:

Tíðindaskriv

Edwin Roald hevur umvegis íslendska felag sítt, Eureka Golf, frammanundan verið knýttur at fyrireikandi verkætlanararbeiðinum. Í Íslandi eru umleið 60 golfvøllir.

Fyrsta byggistig fevnir um golfvøll við 9 holum, sum í dag eisini er góðkent til kappingar. Hetta fram til 1. juli í ár, tá kommunan formliga fær nýtslurættin til lendið ætlað golfvøllinum, verður golfvallarsniðið gjørt liðugt, og byggi- og lendisarbeiðið verður bjóðað út.

Aftrat sjálvum golfvøllinum verða eisini gjørdar lendisgøtur, ið knýta breytirnar saman. Lendisgøturnar verða eisini góðar hjá almenninginum at brúka til gongutúar og at njóta náttúruna á Glyvursnesi.

Í ætlanini er fyrsta byggistig liðugt eftir umleið fýra árum. Arbeiðið verður lagt til rættis soleiðis, at til ber hjá limunum í Tórshavnar Golffelag at íðka golf samstundis.

Ætlan er eisini løgd fyri næsta byggistig, sum er tey næstu 9 holini, so at vøllurin hevur fulla altjóða stødd.

Kelda: torshavn.fo

Greinin varð fyrstu ferð løgd út 11. mars 2023

Heldur eingin fótbóltur hetta vikuskifti

Fótbóltssambandið hevur tikið avgerð um, at allir dystirnir, ið upprunaliga skuldu spælast í dag og sunnudagin, eru útsettir. Óvist er, nær teir ístaðin verða spældir

Vegna veður eru allir dystir 18. og 19. mars fyribils útsettir, eru boðini frá Fótbóltssambandinum (Mynd: FSF)

SkrivaÐ:

Agnar Prestá

Óvissa hevur alla vikuna verið, um tað fer at verða spælt í vikuskiftinum. Nú er greitt, at kappingarnevndin hjá Fótbóltssambandinum metir, at kavin hevur og fer at órógva ov nógv.

Feløgini fingu í gjár boð um, at allur vaksnamannafótbóltur í vikuskftinum er útsettur fyribils. Hetta er vegna veður, stendur í fráboðanini

Harvið er eitt umfar í Betrideildini hjá monnum útsett annað vikuskiftið á rað, og fara spælararnir harvið bert at hava spælt ein dyst, tá mars mánaður er av: Landsliðssteðgur er nú.

Hetta merkir eisini, at kvinnurnar møguliga ikki sleppa í gongd fyrr enn fyrst í apríl. Betrideildin skuldi byrja síðsta vikuskifti. Soleiðis var eisini við 2. deild hjá monnum. Umfarið hjá 1. deild, sum skuldi spælast fríggjakvøldið, er eisini útsett.

Óvist er nær allir hesir dystirnir skulu spælast. Fótbóltssambandið fer at koma við nærri kunning um hetta.

Greinin varð fyrstu ferð løgd út 17. mars 2023

Håkan: - Ein stór uppliving at vera til hondbóltslandsdyst her

Høvuðsvenjarin hjá manslandsliðnum í fótbólti var millum áskoðarnar í Høllini á Hálsi, tá Føroyar vunnu á Rumenia í EM-undankappingardysti í síðstu viku

Håkan Ericson fangar eina løtu í dystinum millum Føroyar og Rumenia. Høvuðsvenjarin var til dystin saman við kropsliga venjaranum, Magna Mohr (Mynd: Sverri Egholm)

SkrivaÐ:

Agnar Prestá

Håkan Ericson byrjaði tíðindafundin mánadagin við at skemta: - Vælkomin til landsliðsúttøkuna í íshokki. 

Veðrið hevur órógvað fótbóltin seinastu tíðina, og spurningurin er so hvussu hetta ávirkar A-landsliðið, sum um tíggju dagar aftur skal í eldin.

Í mun til hondbólt hevur slíkt sum kavi ikki stórvegis ávirkan, og landsliðsvenjarin sat fjálgt í Høllini á Hálsi mikukvøldið, tá Føroyar koppaðu Rumenia í EM-undankappingardysti í manshondbólti. Ein uppliving, ið sviin setti orð á áðrenn hann avdúkaði sín hóp til komandi uppgávurnar.

- Eg var til hondbóltslandsdystin millum Føroyar og Rumenia í síðstu viku, og tað var ein stór uppliving. At merkja tað sum hendi í høllini var ein stórur íblástur


(Mynd: Sverri Egholm)

Håkan Ericson segði, at tað var fantastiskt, at Føroyar skapa slík úrslit, og at hann legði merki til stór einstøk avrik á føroyska liðnum.

Hann kemur frá stórar hondbóltstjóð: Svenska manslandsliðið hevur vunnið EM- gull fimm ferðir og HM fýra ferðir. Eisini hava sviar verið í fýra OL-finalum. At ítróttagreinar kunnu vera til íblástur fyri hvønn annan er nakað jaligt, og tað var flott av Håkani Ericson at taka hetta við.

Næstu tíðina skulu hann og toymi hansara hugsavna seg um at fáa sum mest burturúr við føroyska manslandsliðnum, tá liðið fer á ferð til Moldova (EM-undankappingardystur) og Norðurmakedónia (venjingardystur).

Greinin varð fyrstu ferð løgd út 13. mars 2023

Toppskjúttin er aftur í hitanum

Áleyparin hjá KÍ er tað nýggjasta navnið í føroyska A-landsliðshópinum. Nógvir av føstu monnunum eru ikki við til fyrstu uppgávurnar í ár, meðan fleiri ungir spælarar fáa møguleikan

Royndi áleyparin skoraði fleiri mál í Evropa í fjør og er byrjaður hetta kappingarárið væl (Mynd: Sverri Egholm)

SkrivaÐ:

Agnar Prestá

Håkan Ericson kunngjørdi mánadagin hópin hjá A-landsliðnum til dystirnar í Moldova (EM-undankapping) og Norðurmakedonia (venjingardystir) síðst í mánaðinum. 

Eyðsýnt er millum annað, at spælarar sum hava myndað A-landsliðið seinastu mongu árini ikki eru við; millum annað vegna skaðatrupulleikar. Talan er um Gunnar Nielsen, Sonna Ragnar Nattestad, Hall Hansson, Brand Hendriksson Olsen, Jóan Símun Edmundsson og Jóannes Bjartalíð. 

Teir sum eru við, eru í stóran mun ein blanding av heilt royndum spælarum og ungum spælarum við fáum A-landsdystum. Gilli Rólantsson er ikki bundin til nakað felag í løtuni, men er úttikin sum ein av bakkunum.

Håkan Ericson, landsliðsvenjari (Mynd: Sverri Egholm)

Ungir menn sum Bárður á Reynatrøð, Hanus Sørensen, Andrias Edmundsson, Noah Mneney og Stefan Radosavljevic eru á listanum. Allir hava gjørt vart við seg á millum annað U21-landsliðnum, vóru við til venjingardystir í november, og teir báðir síðstnevndu hava í vetur skift til útlendskt feløg.

Í mun til seinastu hóparnar er nýggja navnið Páll Andrasson Klettskarð. 32-ára gamli áleyparin úr KÍ hevur skorað eina rúgvu av málum í Betrideildini og eisini mál í Evropa men hevur spælt fáar landsdystir. Serliga í fjør var nógv snakkað um, hann burdi verið við, tí Páll gjørdi tað væl og tykist at hóska væl til altjóða dystir við millum annað sínum arbeiðsinnsatsi og innstinktið. Klaksvíkingurin hevur ikki verið við í hópinum síðani 2017.

Hópurin:

Málverjar: 
Teitur Matras Gestsson, HB
Mattias Lamhauge, B36
Bárður á Reynatrøð, Víkingur

Bakkar:
Gilli Rólantsson Sørensen (Einki felag)
Hanus Sørensen, HB
Viljormur Davidsen, HB
Daniel Johansen, FC Fredericia (DK)

Miðverjar:
Odmar Færø, KÍ
Heini Vatnsdal, KÍ
Gunnar Vatnhamar, Víkingur
Andrias Edmundsson, Águilas FC (SPA)
Rógvi Baldvinsson, Bryne BK (Noreg)

Miðvallarar:
Jákup Biskopstø Andreasen, KÍ
René Shaki Joensen, KÍ
Mads Boe Mikkelsen, KI
Stefan Radosavljevic, Sligo Rovers (ÍRL)
Noah Mneney, Bryne FK
Sølvi Vatnhamar, Víkingur
Ári Mohr Jónsson, HB
Meinhard Egilsson Olsen, Mjøndalen (NOR)

Áleyparar:
Páll Andrasson Klettskarð, KÍ
Pætur Petersen, KA Akureyri (ÍSL)
Patrik Johannesen, Breiðablik (ÍSL)
Klæmint Andrasson Olsen, Breiðablik (ÍSL)

Greinin varð fyrstu ferð løgd út 13. mars 2023

Eyðun hevur tikið sín fyrsta hóp út

U21-landsliðið hevur venjingarlegu í høvuðsstaðnum síðsta vikuskifti í mars - undankappingini byrjar í juni. Fleiri spælarar sum fara at fáa týðandi leiklut mangla, og nógv nýggj nøvn eru á listanum

Eyðun Klakstein gleðir seg at koma í gongd saman við toyminum og einum nýggjum, blandaðum hópi (Mynd: Sverri Egholm)

SkrivaÐ:

Agnar Prestá

Áðrenn A-landsliðið til dystirnar síðst í mars varð úttikin, trein Eyðun Klakstein á pallinum í FSF-húsinum og kunngjørdi hópin til venjingarleguna hjá U21-landsliðnum, sum verður 24. - 26. mars.

Klaksvíkingurin hevur tikið við eftir Sámal Erik Hentze, og saman við hjálparvenjaranum Atla Gregersen hevur hann tikið 25 ungar mans út. 

Tríggir spælarar - ein í hvørjari ketu á vøllinum - sum helst fáa týðandi leiklutir í undankappingini mangla vegna skaðatrupulleikar: Samuel Johansen Chukwudi, Heini Fossdalsá Sørensen og Jørgen Nielsen.

Noah Mneney er í elsta U21-árganginum, men nú talan er um venjingarlegu og ikki undankappingardystir, og A-landsliðið manglar fleiri sentralar miðvallarar, er Noah úttikin

Martin Agnarsson var við A-landsliðnum í november - hesaferð er 19-ára gamli vinstri bakkurin úr Viborg á U21-landsliðnum (Mynd: Sverri Egholm)

Fuglfirðingurin gjørdi tað eisini heilt væl fyri Víking í fjør, og hevur nú sáttmála við Bryne í næstbestu norsku deildini. Í tí deildini spælir Gullbrandur Øregaard eisini, og eins og tveir úr Hvidovre og Martin Agnarsson úr Superliga-felagnum Viborg, kemur hann heim til venjingarlegu.

Spælarar umboðandi tey flestu feløgini í Føroyum verða við, og nógvir av teimum eru heilt nýggir í U21-landsliðshøpi, og nakrir hava fyri stuttum fingið koyrikort. 

Eyðun Klakstein segði, at hetta er ein nýggj byrjan við einum øðrvísi toymi, og at tað er gott at fáa eina venjingarlegu nú, har nógvir sleppa at vísa seg fram - undankappingini byrjar í summar. Seinni í dag ber til at hoyra samrøðu við nýggja U21-landsliðsvenjaran á Portalinum.

Hópurin
Málverjar: 
Ari í Haraldsstovu Petersen, 07 Vestur
Jóannes Davidsen, EB/Streymur
Rasmus Nilsson, Hvidovre IF (Danmark)

Verjuspælarar: 
Eiler Fróðason, 07 Vestur
Áki Johannesen, B68 Toftir
Mikkjal Hellisá, EB/Streymur
Bergur Poulsen, EB/Streymur
Elias Rusborg, Hvidovre IF (Danmark)
Børge Petersen, KÍ Klaksvík
Símun Kalsø, KÍ Klaksvík
Martin Agnarsson, Viborg FF (Danmark)
Signar á Brúnni, Víkingur

Miðvallarar:
Poul Kallsberg, Víkingur
Emil Weihe Joensen, B36 Tórshavn
Jónas Warner, B68 Toftir
Jóhann Højbro, ÍF Fuglafjørður
Jákup Vilhelmsen, KÍ Klaksvík
Beinir Nolsøe, NSÍ Runavík
Gullbrandur Øregaard, Sandnes ULF (Noreg)
Jens Erik Bruhn, TB Tvøroyri
Aron Jarnskor Ellingsgaard, Víkingur

Áleyparar: 
Gutti Dahl-Olsen, EB/Streymur
Áki Samuelsen, HB Tórshavn
Silas Gaard, KÍ Klaksvík
Olaf Bárðarson, Víkingur

Leikskráin
16. juni Føroyar – Andorra
7. sept. Hvítarussland – Føroyar
12. sept. Føroyar – Kroatia
17. okt. Andorra – Føroyar
16. nov. Grikkaland – Føroyar

Greinin varð fyrstu ferð løgd út 13. mars 2023

Gilli skrivað undir við TB

Nú er staðfest, at landsliðsleikarin Gilli Rólantsson Sørensen spælir við barndómsfelagnum, TB, næstu tíðina

André Dalfoss, formaður í TB, og Gilli Rólantsson Sørensen (Mynd: TB)

SkrivaÐ:

Sverri Egholm

Sum Portalurin skrivaði í vikuni, so var TB ein møguleiki hjá Gilla Rólantsson Sørensen, og hevur hann vant við barndómsfelagnum fyri at halda seg í gongd seinastu tíðina. Sjey minuttir áðrenn flytingargluggin lat aftur mikudagin, boðaði Tvøroyrar Bóltfelag, at sáttmáli var undirskrivaður. 

Hetta var uttan iva størsta flytingin í hesum flytingarglugganum.

TB skrivaði soleiðis á heimasíðuni:

"GILLI ER KOMIN HEIM!!! 

Ja, tit hoyrdu rætt, hóast tað líka skal sodna eina løtu! Okkara egni Gilli Rólantsson Sørensen, hevur skrivað undir sáttmála við barndómsfelagið, TB! Tað er ikki hissini royndir Gilli hevur í fótbólti. Hansara fyrsta dyst fyri besta liðið hjá TB, spældi hann í 2009 í einum dysti um Løgmanssteypið. Tann dystin vann TB 6-0, og tann tá bert 17-ára gamli Gilli skoraði síni fyrstu tvey av 12 málum í 22 dystum tað árið. Hamrandi skjóti leikarin er skrásettur fyri 60 dystir og 22 mál fyri TB. Í 2013 spældi hann fyri B36 har hann skoraði 5 mál í 29 dystum.

Yrkisleiðin hjá Gilla, ið framvegis einans er 30 ára gamal og tískil hevur mong góð ár í sær enn, hevur serliga verið í Noregi, hóast yrkisleiðin uttanlands byrjaði í Aberdeen. Úr B36 flutti Gilli til donsku superliguna, til AAB í 2014. Síðan spældi hann fyri Brann Bergen, í bestu norsku deildini, frá 2016-21 og so fyri Odds BK frá 2021-2022. Gilli er harafturat skrásettur fyri 60 A-landsdystir, eins og hann hevur roynt seg á U17, U19 og U21 landsliðunum.

Vit eru ómetaliga glað fyri at hava fingið Gilla heim aftur og gleða okkum til at síggja hann í troyggjuni aftur! Bestu eydnu í 2023 Gilli og hjartaliga vælkomin heim!"

Greinin varð fyrstu ferð løgd út 15. mars 2023

TB styrkir verjuna

Aldursforsetin hevur skrivað undir við polska Chris Jastrzembski, sum í 2021 leikti 23 dystir við B68

Chris Jastrzembski og formaðurin í TB, André Dalfoss (Mynd: TB)

SkrivaÐ:

Sverri Egholm

TB kunngjørdi í vikuni nýggjan verjuleikara. Talan er um Chris Jastrzembski úr Polandi, sum hevur skrviað undir við felagið fyri hetta kappingarárið.

- Vit eru sera fegin um tað, tí Chris hevur drúgvar royndir og hevur víst sera góðar dygdir, nú hann hevur verið og royndarvant, sigur Tvøroyrar Bóltfelag.

Chris Jastrzembski er 26 ára gamal og leikti í 2021 fyri B68. Tað gjørdist til 23 dystir fyri toftamenn.

Eftir B68 fór hann til íslendska Selfoss, men hevur annars spælt mest í lægru týsku deildunum.

Greinin varð fyrstu ferð løgd út 14. mars 2023

KÍ hevur gjørt sáttmála við ungan spælara úr Gana

20-ára gamli Issah Ahmed Latif kann spæla sum vinstri vongur og vinstri bakkur. Hann var í fjør til royndarvenjing hjá norska Viking og skuldi gera sáttmála

 

SkrivaÐ:

Agnar Prestá

Tvey skifti vóru almannakunngjørd á seinasta degi, sum flytingarvindeygað var opið. Annað var bumban úr Trongisvági, at Gilli Rólantsson Sørensen hevur gjørt sáttmála við barndómsfelagið TB, og hitt skiftið kunngjørdu føroyameistararnir í beinleiðis seindingi hjá Televarpinum.

Talan er um 20-ára gamla Issah Ahmed Latif, sum er ein spennandi spælari úr Gana, sambært Magna Hoseth, ið hevur fingið fatur á honum ígjøgnum kontaktir í Noregi.

Norðlýsið skrivar, at hann hevur ikki spælt í Evropa áður, men tó hevur hann royndarvant við Viking Stavanger. 

Sum skilst var ein avtala so at siga komin í lag, men ymist við pappírsarbeiðnum eydnaðist ikki. Áhugi hevur eisini verið fyri Latif úr millum annað Onglandi - onkrar keldur siga Leicester City.

KÍ skrivar, at nýggi spælarin kann spæla á øllum plássum á vinstru síðu, tað verið seg bakkur ella vongur. Felagið boðar samstundis frá, at Issah Ahmed Latif verður tó ikki tøkur beinanveg, tá ið loyvini enn ikki eru komin uppá pláss enn.

Greinin varð fyrstu ferð løgd út 15. mars 2023

van Dijk kann nú verja málið hjá 07 Vestur

Sambært heimasíðuni hjá 07 Vestur skal 26 ára gamli Steven van Dijk vera eykamálmaður á Betri-liðnum. Eisini verður niðurlendingurin fysioterapeutur í felagnum

- Vit frøast um endiliga at hava fingið málmanskabalina at ganga upp, og fegnast um at hava fingið Steven í hópin. Við hesum vænta vit, at venjingarumhvørvið hjá málmonnunum í felagnum gerst enn betri

SkrivaÐ:

Agnar Prestá

- Málmansposturin hevur verið ein avbjóðing í eina tíð og tørvurin á einum eykamálmanni til besta liðið hevur verið eyðsýndur síðani Silas (Eyðsteinsson. red) flutti til B36. Í løtuni eru Ari í Haraldstovu og Sámal á Steig í bruttohópinum hjá Betri-liðnum og vit gleðast um, at Rói Zakarisson, eftir ein steðg, er byrjaður at venja við 2. deild aftur. Tríggir málmenn eru tó nakað lítið til fýra lið, og tí gleðast vit um at kunngera, at 26 ára gamli Steven van Dijk úr Hollandi legst afturat málmanshópinum.

Soleiðis skrivar 07 Vestur á sínari Facebook-síðu í dag, í samband við at felagið hevur gjørt sáttmála við niðurlendska málverjan, sum í fjør spældi í Avstralia og sum annars eisini hevur royndir frá Íslandi og eisini heimlandinum.

Sambært 07 Vestur skal Steven verða eykamálmaður á Betri-liðnum og saman við Róa Zakarisson fer hann eisini at røkja málmanspostin á 2. deild. Sámal á Steig, sum í hópinum hjá besta liðnum, hevur framvegis aldur til at spæla við U17.

- Vit frøast um endiliga at hava fingið málmanskabalina at ganga upp og fegnast um at hava fingið Steven í hópin. Við hesum vænta vit, at venjingarumhvørvið hjá málmonnunum í felagnum gerst enn betri.

Nýggi málverjin, ið 07 Vestur fekk uppá pláss, áðrenn flytingarvindeygað lat aftur,  er eisini útlærdur fysioterapeut. Sum partur av sáttmálanum í Sørvági, skal hann vera fysioterapeutur hjá bæði monnunum og kvinnunum hetta kappingarárið.

Greinin varð fyrstu ferð løgd út 16. mars 2023

Signe nýggur venjari hjá kvinnulandsliðnum

Aftur hevur Fótbóltssambandið sett danskan venjara í starvið. 36-ára gamla Signe Pries hevur viðkomandi starvsroyndir og mensku til føroyskan fótbólt, sigur tekniski stjórin við fsf.fo - nýggi venjarin hevur fingið góða mynd av føroyskum fótbóli

Umframt at vera landsliðsvenjari, fer Signe Pries at hava dagligt arbeiði hjá FSF, har hon fer at samstarva við feløgini um menning av gentu- og kvinnusíðuni sum heild (Mynd: fsf.fo)

SkrivaÐ:

Agnar Prestá

Tíðiliga í ár varð tað kunngjørt, at Lene Terp ikki fór at halda fram í starvinum sum A-landsliðsvenjari hjá kvinnum. Síðani hevur FSF leitað eftir avloysara, og nú er greitt, at talan verður um aftur um eina kvinnu úr Danmark sum hevur nógvar royndir á høgum støði.

Signe Pries Andersen varð kunngjørd í vikuni. Hon er bert 36-ára gomul, og er í løtuni í starvi hjá danska fótbóltssambandinum sum U15 talentvenjari og hjálparvenjari hjá danska U17 gentulandsliðnum. Signe Pries hevur eisini royndir sum venjari á ymiskum ítróttarháskúlum í Danmark og í kvinnufelagnum KoldingQ, skrivar fsf.fo.

Sum spælari hevur Signe Pries Andersen umboðað donsku feløgini Vejle, SønderjyskE, Brøndby og KoldingQ, og hon hevur eitt nú vunnið fimm donsk meistaraheiti og spælt Champions League fjórðings- og hálvfinalur við Brøndby fyrst í 10’unum.

– Vit hava havt samband við fleiri sera áhugaverdar venjarar, bæði úr øðrum norðurlondum og longri úti í Evropa, so vit eru væl nøgd við tilgongdina. Sambandið við Signe hevur verið gott frá byrjan, og at enda vóru vit ivaleys í, at hon er tann rætta til okkum. Signe hevur góðar og viðkomandi starvsroyndir við sær, og so hóskar hennara menska og virðir sera væl til tann vegin, vit ynskja at flyta føroyskan gentu- og kvinnufótbólt.

Soleiðis sigur tekniski stjórin í FSF, Pætur Smith Clementsen, millum annað um starvsetanina. Í sáttmálanum, sum partarnir undirskrivaðu í vikuni, verður eisini tilskilað, at Signe umframt at vera landsliðsvenjari, fer at hava dagligt arbeiði á fótbóltsdeildini hjá FSF, har hon fer at samstarva við feløgini um menning av gentu- og kvinnusíðuni sum heild. Sáttmálin er galdandi í fýra ár.

– Eg eri ómetaliga spent til at byrja í starvinum. Eg havi fingið eina góða mynd av føroyskum fótbólti og síggi nógvar spennandi møguleikar í tí arbeiðnum, sum verður gjørt fyri at lyfta gentu- og kvinnufótbóltin í Føroyum. Samansetingin millum landsliðsarbeiðið og gerandisdagin, har vit skulu royna at menna umhvørvini úti í feløgunum, hóskar eisini sera væl til mín, sigur danin við fsf.fo.

Svenn Olsen heldur fram sum hjálparvenjari og skal hava høvuðsábyrgd til dystirnar móti Luksemborg í apríl (Mynd: Fótbóltssamband Føroya)

Nýggi A-landsliðsvenjarin hevur kandidatútbúgving í ítrótti og heilsu við sergrein í kapping og úrvalsítrótti og tekur í løtuni UEFA Pro-venjaraprógv. Hon skal starvast í Danmark nakrar mánaðir afturat, til uppsagnartíðin har er av, boðar FSF frá. 

Signe Pries Andersen byrjar formelt í starvinum hjá Fótbóltssambandinum 1. juni. Tó verður hon partvíst við til venjingardystirnar móti Luksemborg í næsta mánaði, tá hjálparvenjarin Svenn Olsen fer at hava høvuðsábyrgd. Rúni Klein Joensen er lagdur afturat toyminum sum málmansvenjari. 

– Eg gleði meg til at hitta landsliðshópin og so eisini til lutakastið 2. mai (til Nations League), har vit fara at finna útav, hvørjum vit skulu spæla ímóti í heyst. Harumframt eri eg eisini byrjað at seta meg inn í føroyska fótbóltslandslagið og feløgini, sum eg eisini gleði meg til at samstarva við, sigur Signe Pries Andersen 

Greinin varð fyrstu ferð løgd út 17. mars 2023

Komu niður á jørðina aftur við einum braki

Føroyar skoraðu bert 17 ferðir í Bukarest, og tað var júst størsti trupulleikin: At føroysku spælararnir ikki fingu bilbukt við rumenska málverjan. EM-vónin hongur nú á einum sigri móti Ukraina á heimavølli 26. apríl

Hákun West av Teigum var suverenur toppskjútti seinast og hevði fult tamarhald á rumenska málverjanum: Hesaferð var hann toppskjútti við fýra málum, men skoraði uppá undir helmingin av skotunum, og sum heild gekst tað ógvuliga illa í álopspartinum (Savnsmynd: Sverri Egholm)

SkrivaÐ:

Agnar Prestá

Teir í føroysku leguni vistu, hvussu trupult tað fór at verða í Rumenia, men í mun til at Føroyar vunnu dystin millum liðini síðsta mikudag, og at málið hjá Hondbóltssambandinum og teimum í hópinum er EM 2024, so var dysturin leygardagin eitt vónbrot - eitt er, at rumensku favorittarnir vunnu á heimavølli, men tað gjørdist ongantíð heilt tætt og veruligur spenningur um útfallið. Heldur nærkaðist munurin í løtum einum tvísiffraðum tali.

Tað var serliga álopsspælið, ið ikki livdi upp til vónirnar. Til tíðir var spælið gott, men málverjin, Ionut Iancu, fekk skjótt takið á føroysku skjúttunum. Serliga var tað skotini á vonginum, sum Iancu hevði gott tamarhald á: Føroyar skoraðu bara átta útav 19 harfrá; tá Iancu ikki bjargaðu, raktu vengurnir stongina ella yvirleggjaran í nøkrum førum

Trupulleikar vóru tó eisini alla aðrastaðni. Iancu bjargaði langskotum, av strikuni, føroyingarnir skutu uppum, framvið og millum annað Tróndur Mikkelsen - ið stríddist væl í serliga verjuni - raktu stongina ella yvirleggjaran samanlagt tríggjar ferðir. Samanlagt skoraðu okkara bara upp á beint undir 40 prosent av skotunum, og tá mótstøðumálverjin bjargar 48 prosent av skotunum, ið raktu málið, og man bert skorar 17 ferðir í nýmótans hondbólti, so er ógvuliga trupult at vinna.

Verjan spældi annars ikki nakran vánaligan dyst, hóast ávísar betringar kundu verið, og serliga Nicholas Satchwell helt Føroyum inn i í dystinum við einum bjargingarprosenti á yvir 40.

Rumenar fóru niður í ferð og góðsku seinna helmingin av hálvleikinum. Tá var tó avgjørt, og Rumenia kom á 9+ eina løtu í tí, sum fór at líkjast einum skrædli.

Føroyska liðið skoraði bert fýra mál fyrstu 21 minuttirnar í seinna hálvleiki. Elias Ellefsen á Skipagøtu hevði til tíðir trupult við at finna stevið, og spældi ikki seinastu góðu tjúgu minuttirnar. Ymsar loysnir vóru royndar, men Jónas Gunnarson Djurhuus fekk hol á pannuna eftir harðan samanstoyt í bert sínum næsta álopi - beint fyri hálvleik. 

Tað er kanska at undrast á, at loysnin við Halli Árason ikki varð roynd áðrenn 55. minutt, tá tað var so strivið og óeffektivt í álopinum, har føroyska liðið eisini varð lokkað inn í nakrar fellur. Einasti lámi bakspælarin í hópinum kom inn til seinastu minuttirnar og sín fyrsta landsdyst. Hann hevði eitt upplegg og eitt mál - men eisini tvey brend skot og tað var ein fín mynd uppá dystin, har føroyingar eisini gjørdu alt ov nógvar tekniskar villur.

Føroyska liðið helt ongantíð uppat at stríðast hart og skal taka hendan stríðsviljan við til næsta mánaði, tá fleiri mál eisini skulu skjótast.

Oddaliðið í bólkinum, Eysturríki, vann sama dag 31-28 á Ukraina. Føroyar taka ímóti Ukraina 26. apríl, og um ein sigur kemur í hús, verður tað helst eisini talan um eitt 3. pláss í undankappingarbólkinum, og kann hetta geva atgongd til EM-endaspælið. 

EM-undankapping, 4. umfar
Leygardagin 11. mars
Rumenia - Føroyar 25-17 (14-10)

Føroysku málskjúttarnir/skotini:
Hákun West av Teigum 4/9
Elias Ellefsen á Skipagøtu 2/6
Rói Berg Hansen 2/4
Teis Horn Rasmussen 2/2
Leivur Mortensen 2/4
Tróndur Mikkelsen 2/7 
Óli Mittún: 1/4
Helgi Hildarson Hoydal: 1/2
Hallur Árason: 1/3
Pauli Mittún 0/2
Allan Norðberg 0/1
Samanlagt: 17/43

Støðan í bólki 4 eftir fýra umfør
Eysturríki 8 stig 
Rumenia 4 stig
Ukraina 2 stig
Føroyar 2 stig

Greinin varð fyrstu ferð løgd út 11. mars 2023

Føroyar eru framvegis í góðari støðu

Av liðunum sum liggja á 3. plássi í sínum EM-undankappingarbólki í løtuni, eru tað bert Føroyar og Niðurlond, ið hava fingið stig móti liðunum omanfyri. Tað eru hesi, sum kunnu verða avgerandi - alt verður avgjørt síðst í apríl

Óli Mittún og liðfelagirnir vunnu á Rumenia í heimadystinum í síðstu viku, og tað kann gerast avgerandi fyri Føroyar (Mynd: Sverri Egholm)

SkrivaÐ:

Agnar Prestá

Hóast Føroyar taptu greitt í Rumena leygardagin, so eru framvegis rímiliga góðir møguleikar fyri, at manslandsliðið fer at skriva søgu við at spæla seg til EM 2024. 

Um Føroyar enda nummar tvey í bólkinum, er tað heilt vist, at liðið fær pláss í endaspælinum. Hetta er tó ógvuliga lítið sannlíkt eftir úrslitið í Bukarest, men eitt triðja pláss kann eisini verða nóg mikið.

Í útgangspunktinum er tað 50-50, um hetta røkkur. Átta undankappingarbólkar eru, og fýra teir bestu trýararnir koma til EM-endaspælið. Tað sum telur eru stigini móti teimum báðum liðunum, ið enda nummar eitt og tvey í bólkinum.

Bólkur 4 hevur eftir fýra umfør Eysturríki á fyrsta plássi og Rumenia sum nummar tvey. Eysturríki hevur longu tryggjað sær EM-pláss, og Rumenia hevur bara tapt í Føroyum. Hetta merkir, at Føroyar hava tvey stig, og í mun til seks av hinum sjey liðunum, sum í løtuni eru á 3. plássi í sínum bólki, so telja hesi stigini í "trý'ara-roknistykkinum".


Kelda: EHF ("Pld" stendur fyri dystir spældi móti liðum hægri á stigatalvuni í bólkinum higartil)

Sum talvan vísir, so er tað annars bert í bólki 5, at nummar trý hevur vunnið á liði, sum í løtuni liggur omanfyri. Seks umfør eru, og harvið eru tvey eftir. Hetta merkir, at um Føroyar skulu verða yvirhálaðir, skulu óvæntað úrslit henda síðst í apríl í minst trimum av hinum bólkunum. 

Harvið gevur heimasigurin á Rumenia liðnum hjá Peter Bredsdorff-Larsen ein stóran fyrimun, og Rumenia kann tryggja sær annað plássið við at fáa tvey stig afturat.

Alt hetta er tó líkamikið, um ikki Føroyar vinna á Ukraina, sum vitjar 26. apríl. Hetta eru triðju ferð á rað, at liðini eru í EM-undankapping saman, og í báðum førum hevur Ukraina vunnið við einum máli á útivølli móti føroyingum. Um okkara megna at knógva tað hesuferð, so kann tað verða avgerandi í mun til at røkka stóra málinum.

Stutt sagt: Føroyar hava elt í egnum hondum síðst í apríl, men tað kann eisini gerast talan um eitt heldur fløkt, men spennandi roknistykki, tá síðstu EM-atongumerkini skulu gerast upp.

Tað er longu útselt til dystin móti Ukraina, og júst heimavøllurin kann fáa stóran týdning (Mynd: Sverri Egholm)

Greinin varð fyrstu ferð løgd út 13. mars 2023

Pauli Mittún skrivað undir við danskt felag

Ungi hoyvíkingurin hevur spælt við Kristiansand í eitt ár, men fer nú víðari. Trý ára sáttmáli er undirskrivaður við Team Sydhavsøerne

(Savnsmynd: Sverri Egholm)

SkrivaÐ:

Sverri Egholm

Pauli Mittún hevur skrivað undir við danska hondbóltsfelagið Team Sydhavsøerne, sum spælir í næstbestu donsku hondbóltsdeildini.

20 ára gamli landsliðsleikarin skifti úr H71 fyri einum góðum ári síðani til Kristiansand í fremstu norsku deildini.

(Mynd: Tsho.dk)

- Eg gleði meg til at gerast partur av Team Sydhavsøerne, og tað er eitt spennandi projekt, sum tey arbeiða við. Eftir góðar samrøður við ítróttarstjóran, venjaran og kropsliga venjaran, eri eg sannførdur um, at hetta er rætta staðið at menna meg, sigur hoyvíkingurin við heimasíðuna hjá felagnum.

Pauli Mittún spælir í Noreg kappingarárið út. Sáttmálin í Danmark er galdandi í trý ár.

Greinin varð fyrstu ferð løgd út 12. mars 2023

Súsanna og Brøndby VK víðari í hálvfinalurnar

Vunnu 3-2 á Team Køge og hava spælt seg í hálvfinalurnar í bestu donsku flogbóltsdeildini fyri kvinnur

Súsanna Sólrunardóttir Ludvig

SkrivaÐ:

Tíðindaskriv

Súsanna Sólrunardóttir Ludvig og lið hennara Brøndby VK spældu seg í vikuni víðari í hálvfinalurnar í bestu donsku flogbóltsdeildini fyri kvinnur.

Súsanna og Brøndby VK vunnu 3-2 á Team Køge við settúrslitunum 20-25, 25-19, 25-21, 15-25 og 15-6. Fyrri dysturin í Køge endaði eisini við 3-2 sigri til Brøndby.

Súsanna spældi ein góðan dyst og vann 9 stig til Brøndby í hesum dystinum. 

Brøndby VK gjørdust meistarar síðsta kappingarár, og eru tí enn við í stríðnum um meistaraheitið, hóast byrjanin av hesum kappingarárinum ikki var av so góð.

Áslakur Holm og lið hansara VK Vestsjælland megnaðu ikki at spæla seg í hálvfinalurnar. VK Vestsjælland tapti fjórðingsfinaluna 3-0 fyri Ikast KFUM.

Greinin varð fyrstu ferð løgd út 16. mars 2023

ASV og Bjørk Nolsøe Isaksen vinna 1. deild í donskum flogbólti

ASV, Aarhus Studenternes Volleyballforening, við Bjørk Nolsøe Isaksen á odda, vann leygardagin greiðan 3-0 heimasigur

 

SkrivaÐ:

Tíðindaskriv

ASV, Aarhus Studenternes Volleyballforening, við føroysku Bjørk Nolsøe Isaksen á odda, vunnu leygardagin greiðan 3-0 heimasigur í Århus Gl. Stadionhal á IF Lyseng í donsku 1. deild. Settúrslitini vóru 25-23, 25-10, 25-12. 

Harvið hevur ASV vunnið 1. deild vestur hóast tríggir dystir eru eftir at leika. Tær hava 42 stig, meðan Fortuna Odense Volley og Aalborg Volleyball liggja ávíkavist nummar 2 og 3 bæði við 31 stigum.

Síðsta ár blivu ASV damurnar nummar 2, nøkur fá stig aftanfyri Ikast, ið vann og rykti upp í bestu deildina.  

Hettar er annað árið at Bjørk Nolsøe Isaksen spælir sum kantáleypari á liðnum. 

Við skørpum hoppservum, hørðum smasjum og stabilum servimóttøkum og verjuspæli, er hon vorðin ein lyklaleikari á liðnum og er fleiri ferðir kosin dagsins leikari.

Fyrra partin av kappingarárinum, spældi Eva Winther Nagata nakrar dystir sum hevari á liðnum.

Í donsku 1. deild hjá kvinnunum eru 20 lið, og hesi eru býtt upp í tvær kappingar, 10 lið í 1. deild vestur og 10 lið í 1. deild eystur.

Greinin varð fyrstu ferð løgd út 11. mars 2023

Úrslit frá seinnu steypakappingini í estetiskum fimleiki

Havnar Fimleikafelag og Støkk fingu tvey gull hvør, og Ljósið eitt

Hulda Meliora hjá Havnar Fimleikafelag (Mynd: Jón K. Joensen)

SkrivaÐ:

Tíðindaskriv

Seinna steypakapping í estetiskum fimleiki var leygardagin 11. mars, í Bylgjuni í Runavík.

Úrslitini frá kappingini gjørdust hesi:

Nora hjá Havnar Fimleikafelag (Mynd: Jón K. Joensen)

Pinkur:
Nr. 1: Nora hjá Havnar Fimleikafelag við 13,65. Tær gjørdust eisini steypavinnarar við samanlagt 27,80.
Nr. 2: Aura hjá Klaksvíkar Fimleikafelag við 12,80. Samanlagt fingu tær 25,90.
Nr. 3: Nava hjá Støkk við 12,50. Samanlagt fingu tær 25,40.
Nr. 4: Vega hjá Ljósinum við 10,00. Samanlagt fingu tær 20,68.
Nr. 5: Liva hjá Støkk við 8,90. Samanlagt fingu tær 17,60. 
Nr. 6: Alda hjá Havnar Fimleikafelag við 8,30. Samanlagt fingu tær 16,78.

Norma hjá Ljósinum (Mynd: Jón K. Joensen)

Smágentur:
Nr. 1: Norma hjá Ljósinum við 15,55. Tær gjørdust eisini steypavinnarar við samanlagt 30,37.
Nr. 2: Nala hjá Havnar Fimleikafelag við 14,45. Samanlagt fingu tær 29,05.
Nr. 3: Luna hjá Støkk við 13,40. Samanlagt fingu tær 27,82.
Nr. 4: Urða hjá Støkk við 13,30. Samanlagt fingu tær 26,52.
Nr. 5: Astra hjá Klaksvíkar Fimleikafelag við 11,90. Samanlagt fingu tær 24,25.
Nr. 6: Nita hjá Havnar Fimleikafelag við 11,40. Samanlagt fingu tær 24,23.

Svalan hjá Støkk (Mynd: Jón K. Joensen)

Gentur:
Nr. 1: Svalan hjá Støkk við 16,80. Tær gjørdust eisini steypavinnarar við samanlagt 33,25.
Nr. 2: Mira hjá Havnar Fimleikafelag við 16,43. Samanlagt fingu tær 32,70.
Nr. 3: Ara hjá Ljósinum við 14,55. Samanlagt fingu tær 29,78.

Rósan hjá Støkk (Mynd: Jón K. Joensen)

Unglingar:
Nr. 1: Rósan hjá Støkk við 21,47. Tær gjørdust eisini steypavinnarar við samanlagt 43,00.
Nr. 2: Bjalla hjá Havnar Fimleikafelag við 21,08. Samanlagt fingu tær 42,36

Hulda Meliora hjá Havnar Fimleikafelag (Mynd: Jón K. Joensen)

Kvinnur:
Nr. 1: Hulda Meliora hjá Havnar Fimleikafelag við 21,97. Tær gjørdust eisini steypavinnarar við samanlagt 44,35.
Nr. 2: Lyra hjá Ljósinum við 21,33. Samanlagt fingu tær 43,90.
Nr. 3: Hulda hjá Havnar Fimleikafelag við 20,50. Samanlagt fingu tær 40,97.

Greinin varð fyrstu ferð løgd út 11. mars 2023

Kappingarnar í inniróðri av á hesum sinni

Síðan oktober 2022 hevur Róðrarsambandið, saman við lokalfeløgum, skipað fyri fýra grand prix kappingum í inniróðri, og tann seinasta var í høllini við Streymin leygardagin

 

SkrivaÐ:

Tíðindaskriv

Síðan oktober 2022 hevur Róðrarsambandið, saman við lokalfeløgum, skipað fyri fýra Grand Prix kappingum í inniróðri. 

Fyrsta kappingin var á Eiði, onnur við Løkin í Runavík, triðja í høllini í Kollafirði og fjórða og seinasta umfarið var í høllini við Streymin, leygardagin 11. mars.

Til kappingina leygardagin varð samstundis kappast um føroyameistaraheitið fyri einstaklingar og lið.

Íalt 143 einstaklingar hava luttikið í einari ella fleiri kappingum í vetur, harav luttóku beint undir 100 einstaklingar í FM kappingini og 22 lið á 4 luttakarar í staffettkappingini.

31 føroyameistarar og 26 grand prix vinnarar, í aldrinum 12 til 60 ár, vóru funnir til kappingina leygardagin. Luttakararnir vóru úr øllum landinum, og flestu róðrarfeløg vóru umboðað í kappingini.

Róðrarsambandið hevur, umframt heimligu kappingarnar, luttikið í DM í Gladsaxe, har 11 ungir rógvarar undir 17 ár kappaðust við góðum úrslitum. Sjey vaksnir rógvarar vóru til EM í Paris og seks rógvarar luttóku í HM, sum var í Toronto í februar.

Íalt hava føroysku rógvararnir vunnið seg til 17 gull, 10 silvur, og 7 bronsu heiðursmerkir í uttanlandskappingum, umframt nakrir rógvarar sum luttóku í Open Nordic, ið varð skipað netborið í februar, eisini við góðum úrslitum.

Róðrarsambandið fegnast um góðu undirtøkuna og luttøkuna í inniróðri, bæði í Føroyum og uttanlands, har føroysku rógvararnir hava gott umdømi í róðrarheiminum.

FM-kappingarnar í summar

Aðalfundurin hjá RSF verður 18. mars, og eftir tað verður farið í gongd við at fyriskipa FM-kappingarnar í kappróðri í summar. Endalig avgerð er ikki tikin um nakað Ódnartak enn, men væntandi verður ein ella tvey í mai.

Fyrsti FM-róðurin verður á norðoyastevnu 3. juni, sundalagsstevna í Hósvík 17. juni, Jóansøka á Tvøroyri 24. juni, Varmakelda 1. juli, fjarðastevna á Strondum 8. juli, vestanstevna í Miðvági 15. juli og til seinast Ólavsøkan 28. juli.

Tvey nýggj róðrarfeløg eru stovnað seinastu árini - eitt á Eiði og eitt í Hvalba. Íalt eru nú 26 róðrarfeløg undir Róðrarsambandi Føroya, summi meir virkin enn onnur.

Kappróðurin hevur seinastu árini haft vaksandi luttakandi bátar og manningar.
Til samanlíkning kann nevnast, at í:

• 2022 luttóku 110 manningar á einari ella fleiri FM-stevnum, harav 87 á Ólavsøku.
  
• 2021 luttóku 132 manningar, harav 106 í Ólavsøkuróðrinum.
  
• 2020 luttóku 120 manningar, harav 84 á Ólavsøku
  
• 2019 luttóku 68 manningar á Ólavsøku, 65 í 2018 og 79 í 2017

Umframt inniróður og kappróður, luttekur Róðrarsambandið eisini í Skúlaleikum og Føroyaleikum í samstarvið við Ítróttarsambandið.

Greinin varð fyrstu ferð løgd út 13. mars 2023

Regnaði við heiðursmerkjum

Trý DM-heiti, eitt dansk met, og hópin av heiðursmerkjum. Tað var flotta úrtøkan, tá føroyskir vektlyftarar kappaðust í DM um vikuskiftið

Niels Áki Mørk

SkrivaÐ:

Tíðindaskriv

Frank Petersen, sum er venjari hjá flestu av føroysku lyftarunum, var ikki bangin fyri at geva stór lyftir, tá seks føroyskarar lyftarar um vikuskiftið tóku lut í DM-kappingini.

Fleiri heiðursmerki vóru ávegis, og okkurt av teimum heilt víst úr gulli, helt Frank fyri, og tað skuldi so eisini vísa seg, at hann fekk rætt. Úrslitini í kappingini undirstrikaðu nevnliga væl og virðiliga menningina, sum er innan olympiska vektlyfting í Føroyum. Ein ítrótt, sum hevur verið í dvala í nøkur ár, men sum seinastu fýra árini veruliga er komin fyri seg aftur.

Tríggir danskir meistarar
Í tvídystinum, sum er samlaða úrtøkan fyri lyftini í trek og vend & stoyt, vóru DM-gullini tvey í tali.

Niels Áki Mørk var favorittur í vektflokkinum undir 61 kg hjá monnum. Niels Áki hevur annars tikið lut í flokkinum undir 67, men hann er lætnaðu fimm kilo, so hann kundi kappast í lægra flokkinum, og tað skuldi loysa seg.

Við 96 kilo í trekk og 110 í vend & stoyt lat hann ongan iva vera um, at hann var besti lyftarin í flokkinum. Eisini hevði hann 115 yvir høvdinum í triðju royndini, men dómararnir kolldømdu lyftið.

Tey 96 kg í trekk vóru hartil danskt met.

Maibrit Reynheim Petersen varð ikki roknað sum favorittur undan kappingini. Tann leiklutin átti Line Gude, sum telist millum allarfremstu kvinnurnar í ríkinum, meðan Maibrit og hinar so skuldu stríðast um silvur.

Men tað gekk ikki eftir vild hjá Line. Í trekk kiksaði hon allar tríggjar royndirnar, og so var Maibrit til reiðar at taka av. Maibrit vann gull í trekk við 81 kilo, og hon vann silvur í vend & stoyt við 99 kg. Tá lyfti Line 120 kg, men tað munaði lítið í tvídystinum, har Maibrit fór avstað við gullinum.

Eitt kilo frá samlaða gullinum
Og vildi heilt væl til, høvdu Føroyar eisini fingið eitt triðja gullmerki í tvídystinum.
Undan kappingini var Pól Hendrikur Andreasen farin ein vektflokk niður, og eftir trekk, var hann á odda í samlaðu kappingini.

Í vend & stoyt partinum gekk tað tó akkurát ikki. Alexander Nyberg lyfti tá 114 kg, og tí endaði hann samanlagt eitt kg framman fyri Pól Hendrik. Pól Hendrikur fekk sostatt eitt gull og tvey silvurmerki.

Eisini Leif á Bøgarði stríddi seg til silvur aftan fyri Tim Kring, sum hevur dominerað danska vektlyfting seinastu nógvu árini. Fyri einum ár síðani gjørdist Leif nummar trý, men hann hevur støðugt lagt fleiri kilo afturat sínum lyftum, soleiðis at hetta í ár rakk til silvur.

Og hjá Sofus Bech rukku royndirnar eisini til heiðursmerki, tá hann vann bronsu í vektflokkinum undir 102 kg. Sofus var til hesa kappingina farin ein vektflokk upp, og tí var ivasamt, um hann fór at røkka heiðursmerkjum. Men tað gjørdi hann so ruddiliga. Eftir trekk-lyftið var Sofu enntá nummar tvey, soleiðis at hann fekk eitt silvur- og tvey bronsumerki.

Sætti føroyskir luttakarin var Asta Egilstoft Nielsen. Asta er framvegis juniorur, men hon lýkur longu úttøkukrøvini til DM fyri vaksin, og serliga gekst henni væl í trekk, har hon setti nýtt føroyskt met við 59 kg. Í vend & stoyt eydnaðist henni ikki at lyfta 74 kg upp um høvd í seinastu royndini. Hevði tað eydnast, hevði hon samstundis lokið treytirnar fyri luttøku til NJM. Eitt mál, sum hon tó framvegis hevur góða tíð til at røkka.

Stórt vikuskifti
Frank Petersen, sum frá byrjan hevur verið ein stórur stuðul hjá føroyskari vektlyfting, var venjari hjá fimm av føroysku lyftarunum í DM-kappingini. Hartil er Pól Hendrikur Andreasen venjari hjá Astu Egilstoft Nielsen.

Frank var framúr væl nøgdur við tað, sum hann sá í Valby, og hann heldur, at talan var um eitt stórt vikuskifti fyri føroyska vektlyfting.

- Hetta hevur verið eitt stórt vikuskifti, og úrslitini hava verið framúr. Eg havi úttikið Niels Áka og Maibrit til norðurlendsku meistarakappingina, sum verður í Landskrona seinni í ár, og eg vænti eisini, at tað eru fleiri onnur, sum fara at røkka úttøkukrøvunum í ár.

- Tað er tríggir av okkara lyftarum fáa gull, og at vit hartil hava bæði silvur og bronsu, var eitt sindur meira, enn eg hevði roknað við. Men tað vísir eisini, at vit eru til reiðar at taka av, tá møguleikin er har.

- Nú taka vit eina viku við hvíld, og so ræður aftur um at arbeiða fram móti nýggjum málum, sigur Frank Petersen.

Nýggj met

Asta Egilstoft Nielsen: Trekk 56 kg føroyskir junior , U23 og senior-met. Tvídystur 123 kg føroyskir junior , U23 og senior-met

Niels Áki Mørk: Trekk 96 føroyskt og danskt senior og U23-met. Tvídystur 206 føroyar senior og U23-met

Leif á Bøgarði: Trekk 107 kg føroyskt met í masters 35-39 ár. Vend & Stoyt132 kg føroyskt met í masters 35-39 ár. Tvídystur 239 kg føroyskt met í masters 35-39 ár

Sofus Bech :Trekk 113 kg Føroyskt senior-met, Vend & Stoyt135 kg Føroyskt senior-met, Tvídystur 248 kg Føroyskt senior-met

Føroysku úrslitini

Greinin varð fyrstu ferð løgd út 13. mars 2023

Billardgullið aftur til Havnar

Eftir 18 ára oyðimarkargongd kemur billardgullið nú aftur til høvuðsstaðin

Skjótt verða hesir báðir kosnir spildurnýggir føroyameistarar í billard fyri lið, tv. Ólavur Kjølbro og Jógvan Jørgensen úr Havnar Billardfelag (Mynd: Jan Müller)

SkrivaÐ:

Jan Müller

Hóast eitt umfar er eftir spæla í FM kappingini í billard fyri lið, so er greitt, at Havnar Billardfelag nú ber FM heitið aftur í Havnar Klubba. Í nærum tvey ártíggju er FM heitið í billard fyri lið, og harvið gullið, endað hjá feløgum uttan fyri Havnina. Tað veri seg í Fuglafirði, í Klaksvík og á Tvøroyri.

Men leygardagin kundu bæði oddaliðini hjá Havnar Billardfelag sanna danska orðatakið, at “Øvelse gør mester”. Miðvís og áhaldandi venjing blandað saman við hegni og talenti hava latið porturini upp til ovastu trónuna í føroyska billardheiminum. 

Eftir at Habi2 liðið við Nils Nielsen og Per Hansen fyrst megnaði at spæla javnt móti Tvøroyrar Billardfelag og harvið ruddaði slóð fyri besta liðnum hjá felagnum, tóku Ólavur Kjølbro og Jógvan Jørgensen á Habi1 sakina í egnar hendur, ruddaðu borðini í Havnar Klubba og vunnu 6-2 á Tvøroyrar Billardfelag. Eitt úrslit, sum nú hevur lagt havnaliðið einsamalt á odda í FM kappingini, og harvið fingið aðra hondina um gullstreypið. 

Hóast góð úrslit í kappingini, so gjørdust Páll Heri Nolsøe og Max Rasmussen ov stuttir til at røkka einum finaluplássi, tá teir vitjaðu Havnar Billardfelag leygardagin. Teir hava kortini enn møguleikan at vinna silvur, tó at tað krevur, at teir standa seg betur enn Habi2 í seinasta umfarinum um knappar tvær vikur.

Hóast lítil ivi nú er um, at hetta liðið fer at gerast føroyameistari, tá seinasta umfarið verður spælt í Klaksvík um tvær vikur, so kann tað koma hartil, at bæði liðini hjá Havnar Billardfelag koma at standa á jøvnum í stigum eftir seinasta umfarið. Tað er tó lítið sannlíkt. 

Men Habi1 við Kjølbro og Jørgensen liggur longu fleiri borðlongdir á odda, tá talan er um samlaða talið av eygum. Tá javnt er í stigum, telja eyguni. Tí kunnu vit sjálvandi við fyrivarni longu nú siga, at Havnar Billardfelag fer við gullinum og um heilt væl vil til so møguliga  eisini við silvurinum men tá skal seinna havnaliðið taka fleiri stig heim í seinasta dystinum. Hinvegin kann TVBF røkka silvurinum, um teir taka nøkur stig í Fuglafirði. 

Eftir kappingina hetta vikuskiftið stendur púra greitt, at hvørki tvørámenn, klaksvíkingar ella fuglfirðingar hava møguleika at gerast føroyameistarar. Tvøramenn hava sum sagt enn møguleikan at fara við silvurinum, um teir klára seg væl í Fuglafirði, og Habi2 klárar seg minni væl í Klaksvík. 

Støðan í stigum undan seinasta umfarinum er henda:

HABI1 55
HABI2 47
TVBF1 43
KLBF1 37
KLBF2 13
BFF1 13

Øll liðini hava spælt 9 dystir uttan KLBF2 og BFF1, sum hava spælt 8 og mangla dyst móti hvørjum øðrum. 

Í seinasta umfari um tvær vikur spæla:

KLBF1 - HABI1

KLBF2 - HABI2

BFF1 - TVBF1

Um kappingina leygardagin kann sigast, at tvøramenn komu ongantíð rættiliga fyri seg, hóast Páll Heri lætt og hegnisliga feldi manga keyluna og vísti framúr gott spæl, sum tó ikki rakk til ein oddasess. At lata frá sær 4 stig til Habi2 fyrrapartin, ruddaði tó slóð fyri Habi1 liðinum, sum longu tá var nærum tryggjað FM heitið, og tað gjørdi eisini sigursgongdina uppaftur lættari.  

Hóast Tvøroyrar Billardfelag átti sjálvan føroyameistaran fyri einstaklingar og besta spælaran í landinum gjøgnum hetta kappingarárið, so megnaði Páll Heri Nolsøe saman við Max Rasmussen ikki at syfta frægu Habi1 spælararnar Ólavi Kjølbro og Jógvan Jørgensen. 

Ólavur var dagsins maður. Hann skaraði heilt framúr, og var suverenur við einum meðaltali uppá 38,46 eygu í øðrum dystinum. Hann hevur sum fáur eygað fyri at raka kúlur og keylur við millimetra beinrakni. Róligur og stillførur sum ein tikari, ið fer eftir sínum offuri. Samanlagt hevði hann 30 eygu í meðal. Hann hevði eisini eitt umfar uppá 234 eygu. Næstur honum varð Páll Heri Nolsøe við einum meðaltali uppá 30,25 eygu í øðrum dystinum.

Nils Nielsen hevði besta umfarið í kappingini leygardagin uppá 264 eygu. Hann og Per Hansen megnaðu at spæla javnt móti Tvøroyrar Billardfelag og vóru harvið nærum við til at tryggja spælibrøðrunum í Havnar Billardfelag FM heitið 

Nils Nielsen, sum spældi á Habi2 liðnum, vísti eisini framúr gott spæl móti Páll Hera Nolsøe, tó at hann ikki vann tann dystin. Hann hevði eitt umfar uppá 264, sum var tað besta í kappingini  leygardagin. Og helst tað besta í hesum kappingarárinum. Í tí dystinum hevði hann  29,73 eygu í meðal. Saman við makkaranum Per Hansen megnaðu teir javnleik móti Tvøroyri og góvu harvið spælibrøðrunum á Habi1 bilettina til endaliga FM pallin.

Hóast spenningurin nú er rokin í oddinum, so er kortini stórur spenningur um, hvat lið í 1. deild flytur niður í 2. deild næsta kappingarár. Sum støðan er í løtuni standa botnliðini úr Klaksvík og Fuglafirði á jøvnum við 13 stigum hvør. Kortini er longu avgjørt, at Skálafjarðar Billardfelag flytur upp í bestu deildina.

Einki minni enn eitt bragd, nú teir eru so nýggir í føroyskum billardspæli - at byrja í 3. deild og síðani flyta upp í 2. deild og loksins í 1. deild. 

Greinin varð fyrstu ferð løgd út 14. mars 2023