Eitt gott kvøld hjá uppflytarunum

Eftir fýra dystir er ÍF nógv nærri evropeiskum plássi enn niðurflytingarplássi. TB fekk sítt fyrsta stig móti HB, sum fyri fyrstu ferð ikki fekk fult. B36 og KÍ kundu eisini fegnast mikukvøldið

Í gjárkvøldið var fagnaður í Fuglafirði - eins og fyri ellivu døgum síðani tá ÍF basti AB. Hesaferð gekk tað útyvir EB/Streym (Mynd: Sverri Egholm)

SkrivaÐ:

Agnar Prestá

Útsetta umfarið, sum skuldi vera verða spælt 11. og 12. mars, varð avgreitt mikukvøldið. Tað var á ongan hátt óáhugavert. Summir dystir vóru heilt málríkir og undirhaldandi og serliga eitt heilt óvæntað úrslit varð.

At einki mál kom í Trongisvági, kundi TB fegnast um. Uppflytararnir byrjaðu kappingarárið illa, og hava sæð út til at vera aftan fyri hini á ymiskum økjum, men betri avrik sunnudagin á Eiði var nær við at geva stig, og hesaferð bar á mál.

HB megnaði ikki at læsa TB-verjuna upp. Gilli Rólantsson er komin á liðið, og hann og liðfelagirnir arbeiddu hart og rætt móti liðnum hjá Dalibor Savic, sum annars spældi ógvuliga væl móti AB leygardagin.

Júst AB tapti aftur fyri oddaliði, men hesaferð hevði liðið hjá Henrik Larsen betri tamarhald á tingunum. Tamarhald á sjálvum dystinum hevði KÍ tó so at siga allan vegin, og tað staðfesti Jóannes Danielsen eisini. Føroyameistararnir hava fult stigatal, uttan at teir síggja út til heilt at hava funnið flogið enn. Sunnudagin er styrkisroynd móti Víkingi - AB er tað einasta liðið uttan nakað stig og uttan nakað mál.

KÍ helt AB frá at gera dystin heilt spennandi...


Og liðið, sum á Argnum spældi í hvítum, heldur fram at vinna - KÍ hevur nú vunnið 29 av sínum seinastu 31 dystum í Betrideildini (Myndir: Sverri Egholm)

Ein rúgva av málum komu á Svangaskarði. Tað fyrsta, ið var margháttiligt, kom longu eftir tíggju sekund. Hesin dysturin var ein av teimum, sum var ávirkaður av vindinum - helst tann ið var mest ávirkaður - og liðini fingu tí lagt eitt ávist trýst í hvør sínum hálvleiki.

Víkingur skoraði tvær ferðir í undanvindinum eftir steðgin men kundi skora okkurt afturat. Hóast liðið hjá Jóhan Peturi Poulsen var aftanfyri tríggjar ferðir og svaraði aftur hvørjaferð, so var úrslitið eitt slag av vónbroti og eitt afturstig í oddastríðnum. B68 hevur framvegis ikki vunnið, men hevur nú spælt sín fyrsta heimadyst og fingið stig móti topp-fýra liði.

07 Vestur bjóðaði B36 av í Gundadali. Útiliðið legði seg á odda eftir ósketni hjá heimaliðnum í samband við deyðbóltsstøðu. Vendin kom í seinna helmingi av seinna hálvleiki.

Uppá tólv minuttir skoraði B36 tríggjar ferðir: Meira ágangandi spæl, gott huglag í B36-húsinum og inskiftarar gjørdu mun, ið Dan Brimsvík eisini setti orð á samrøðu við Portalin eftir 3-2 sigurin. 3-2 endaði tað, tí sørvingurin Oddur Petersen minkaði um munin.

Hóast B36 hevði aðrar møguleikar og rakti yvirleggjaran í yvirtíðini, so kundi heldur skerda 07 Vestur javnað. B36 breyt tó inn í topp-trý aftur (yvirhálaði Víking og nærkaðist HB).

Michal Przybylski kom inn, var við í 2-1 málinum og skoraði til 3-1. Benjamin Heinesen (nr. 11) kom inn, legði B36 á odda 2-1 og legði stutt seinni upp til Michal (Mynd: Sverri Egholm)


Dan Brimsvík kundi fegnast við seinasta bríksl. B36 kom undir trýst aftur. Høvuðsvenjarin metir, at deildin í ár er javnari, og nógvir truplir dystir afturat eru fyri framman. Tó fegnast hann millum annað um breiddina í B36-hópinum (Mynd: Sverri Egholm)

ÍF hevur longu seks stig, og um liðið hevði hildið fast í 6(+) minuttir afturat og 2(+) minuttir afturat móti Víkingi, so høvdu uppflytararnir verið ósigraðir nú. Hetta er ein veruleiki, ið tey flestu helst eru bilsin av, men í Fulgafirði hava Aleksandar Jovevic og hansara menn fyrireikað seg upp á Betrideildarfótbólt leingi.

Hetta gav aftur úrslit, tá EB/Streymur vitjaði. Eitt beinleiðis reytt kort til EB/Streyms-liðformannin Andras Olsen smáar tjúgu minuttir fyri leiklok kostaði dýrt.

ÍF skoraði uppá brotssparkið, og aftur tíggju minuttir seinni. Hetta var ein smeitur hjá EB/Streymi, ið annars var byrjað árið væl - hinvegin var tað størsti sigur hjá ÍF í Betrideildini síðani á B68 í juni 2016.

Betrideildin 2. umfar (umfar nummar 4)
Mikudagin 12. apríl

TB - HB 0-0

AB - KÍ 0-2 (0-2)
9' Jóannes Kalsø Danielsen (Claes Phillip Kronberg) 0-1 
42' Sjálvmál (Sivert Gussiås) 0-2

B68 - Víkingur 3-3 (2-1)
1' Ragnar Samuelsen 1-0
4' Jákup Johansen 1-1
23' Mohammed Samba (Jónas Warner) 2-1
59' Olaf Bárðarson (Martin Klein) 2-2
69' Villiam Emil Klein (Mohammed Samba) 3-2
73' Sølvi Vatnhamar 3-3

B36 - 07 Vestur 3-2 (0-1)
33' Daniel Obbekjær (Teitur Olsen) 0-1
67' Isak Jönsson (Jann Benjaminsen) 1-1
73' Benjamin Heinesen (Bjarki Nielsen) 2-1
79' Michal Przybylski (Benjamin Heinesen) 3-1
90 (+1) Oddur Petersen (Magnus Holm Jacobsen ) 3-2 

ÍF - EB/Streymur 3-0 (1-0)
45' Elias Lervig 1-0
73' Karl Løkin (br.) 2-0
82' Gundur Ellingsgaard Petersen (Dánjal á Lakjuni) 3-0

Reyð kort: Andras Olsen (EB/S) 72' og Jhon Mena (ÍF) 90(+3)'

Støðan í Betrideildini eftir fýra umfør

1. KÍ 12 stig 
2. HB 10 stig 
3. B36 9 stig
4. Víkingur 7 stig
5. ÍF 6 stig
6. EB/Streymur 6 stig
7. 07 Vestur 4 stig
8. B68 2 stig
9. TB 1 stig 
10. AB 0 stig 

Næsta umfar, allir dystirnir spældir í morgin, sunnudagin:

Kl. 15: HB - ÍF
Ll. 15: AB - B36
Kl. 15: KÍ - Víkingur
Kl. 15: TB - 07 Vestur
Kl. 16: B68 - EB/Streymur

Greinin varð fyrstu ferð løgd út 13. apríl 2023

Kapprenningin milum KÍ og HB heldur fram

Eingin slingur var í valsinum hjá arvafíggingunum - KÍ og HB hava 9 stig eftir 3 umfør

(Mynd: Sverri Egholm)

SkrivaÐ:

Agnar Prestá

(Gevið gætur: Henda greinin er um umfarið páskaaftan - síðan er eitt umfar afturat spælt)

Tað eru tvey feløg, ið framvegis hava fult stigatal eftir trý umfør í Betrideildini. Ikki óvæntað eru hesi liðini HB og KÍ. Leygardagin vóru bæði í leikluti sum stórfavorittur. HB heldur størri á heimavølli móti AB enn KÍ í Sørvági, og tað vóru eisini reyð-svørtu, ið vunnu ein størri sigur. 

HB vísti beinanvegin, at AB fór at fáa ein tungan dyst í Gundadali. Dalibor Savic hevði hesaferð valt at spælt 4-4-2 við diamantiskipan á miðvøllinum, og hetta fekk spælið at flóta væl. Adrian Justinussen, Mattias Præst Nielsen og Áki Samuelsen høvdu nógv frælsi, og hetta tyktist at geva AB høvuðbrýggj - tað at Áki eisini kom longur fram á vøllinum tyktiskt at fáa hann at álvara blóma í løtum. Millum annað skoraði hann eitt mál og hevði aðrar atsóknir og ágangandi driblitúrar.

Áki Samuelsen var hesaferð á HB-miðvøllinum. 18-ára gamli havnarmaðurin hevur her skorað til 3-0 (Mynd: Sverri Egholm)

Tað var annars Mikkel Dahl, ið gjørdist stóri maðurin. Danski áleyparin legði HB á odda longu eftir tveir minuttir, og var tað eftir væl gjøgnumspælt álop, sum Adrian Justinussen hevði næstseinasta fótin á. Í 9. minutti var Mikkel Dahl aftur til reiðar: Hesaferð eftir at Bartal Wardum hevði roynt seg í samband við hornaspark, og Antonio Borrelli hevði hálvbjargað.

29-ára gamli málrevurin fullførdi sítt hattrikk tíðliga í seinna hálvleiki. Harvið hevur hann skorað í øllum trimum kappingardystinum í ár. Í teimum hevur Mikkel Dahl fimm mál, og samanlagt hevur hann skorað 46 ferðir í 41 Betrideildardystinum. HB hevur skorað fýra mál í báðum sínum heimadystum.

Páll eisini fimm mál

Páll Andrasson Klettskarð hevur eisini skorað fimm mál í trimum dystum í landskappingini. Hann var ein av teimum trimum KÍ-spælarunum, ið skoraðu í Sørvági leygardagin. Árni Frederiksberg legði KÍ á odda eftir 18 minuttir, og tað var Árni, ið legði upp til Claes Kronberg, tá royndi danin økti til 0-3 í 63. minutt - Páll Klettskarð hevði skorað beint fyri hálvleik.

Jasper van der Heyden fekk pyntað fyri 07 Vestur við góðum beinleiðis frísparki, tá beint yvir eitt korter var eftir at skora. Annars var talan um tryggan sigur til KÍ, sum mikudagin skal til Argir. Kappingarneytin HB skal til Trongisvágs, og lagt er upp til framhaldandi tætta kapping og eisini fult stigatal til bæði, tá tað næsta umfar er av.

Bjarki Nielsen átti seinasta B36-fótin á til 1-0 málið móti B68 (Mynd: Sverri Egholm)

Betrideildin 5. umfar (umfar nr. 3)

Leygardagin 8. apríl

07 Vestur - KÍ 1-3 (0-2)
19' Árni Frederiksberg 0-1
44' Páll Andrasson Klettskarð (René Shaki Joensen) 0-2
63' Claes Phillip Kronberg (Árni Frederiksberg) 0-3
74' Jasper van der Heyden 1-3

HB - AB 4-0 (3-0)
3' Mikkel Dahl (Adrian Rúnason Justinussen) 1-0
8' Mikkel Dahl (Bartal Wardum) 2-0
33' Áki Debes Samuelsen 3-0
58' Mikkel Dahl (Viljormur Davidsen) 4-0

B36 - B68 2-0 (1-0)
8' Bjarki Nielsen (Hannes Agnarsson) 1-0
76' Magnus Egilsson (Símun Sólheim) 2-0

ÍF - Víkingur 0-1 (0-0)
89' Geza David Turi (Andreas Lava Olsen) 0-1

EB/Streymur - TB 2-1 (2-1)
4' Mikkjal Hellisdal (Rógvi Egilstoft) 1-0
20' Samudeen Musah (Poul Ingason) 1-1
40' Rani Hansen (Virgar Jónsson) 2-1

Støðan í Betrideildini eftir trý umfør

1. KÍ 9 stig 
2. HB 9 stig 
3. Víkingur 6 stig
4. B36 6 stig  
5. EB/Streymur 6 stig 
6. 07 Vestur 4 stig 
7. ÍF 3 stig
8. B68 1 stig 
9. AB 0 stig 
10. TB 0 stig 

Geza Turi skoraði sigursmálið í grannauppgerðini móti ÍF (Mynd: Sverri Egholm)

Greinin varð fyrstu ferð løgd út 08. apríl 2023

Fyrsta umfar verður 21. og 22. apríl

Kappingarnevdin hjá FSF hevur avgjørt, at dystirnir í fyrsta umfari í kappingini um Løgmanssteypið verða spældir komandi fríggjadag og leygardag

Víkingur gjørdust steypavinnarar í fjør (Savnsmynd: Sverri Egholm)

SkrivaÐ:

Tíðindaskriv

Í farnu viku var lutakast um, hvussu spælt verður í fyrsta umfari í kappingini um Løgmanssteypið. Eisini var lutakast um, hvussu liðini í steypakappingini hjá kvinnum møtast í innleiðandi umfarinum, og í fjórðingsfinalunum.

Í fyrsta umfari í steypakappingini hjá monnum eru átta dystir á skránni, og fyri at geva áskoðarum og øðrum møguleikan at síggja so nógvar dystir sum tilber, hevur kappingarnevndin hjá FSF avgjørt, at dystirnir verða spældir fríggjadagin 21. apríl, og leygardagin 22. apríl.

Fríggjadagin 21. apríl
Víkingur – HB
FC Hoyvík – EB/Streymur
Skála – B71
NSÍ – MB

Leygardagin 22. apríl
TB – B68
B36 – KÍ
AB – FC Suðuroy
ÍF – 07 Vestur

Tá seinasti dysturin er spældur, og greitt er, hvørji lið hava spælt seg víðari í kappingini, verður lutakastið til fjórðingsfinalurnar, sum eru á skránni týsdagin 9. mai.

Steypakappingin kvinnur
Hjá kvinnunum háttaði lutakastið seg soleiðis, at í innleiðandi umfarinum møtast FC Hoyvík og 07 Vestur, og KÍ og ÍF.

Í fjórðingsfinalunum fær HB vitjan av KÍ ella ÍF, EBS/Skála tekur ímóti B36, FC Hoyvík ella 07 Vestur møtir NSÍ, og fjórði dysturin verður millum Víking og TB/FCS/Royn.

Innleiðandi umfarið í steypakappingini hjá kvinnum verður spælt flaggdagin, týsdagin 25. apríl, meðan fjórðingsfinalurnar vera sunnudagin 7. mai.

Greinin varð fyrstu ferð løgd út 10. apríl 2023

Mistu á stokkinum

Tað stóð á jøvnum heilt inn í tíðina, sum dómarin hevði lagt afturat, og tí var tað eitt vónbrot, tá Luksemborg skoraði sigursmálið til 2-1

(Mynd: Bjarni Enghamar / FSF)

SkrivaÐ:

Tíðindaskriv

– Tað var eitt stórt vónbrot at tapa hendan dystin, tí javnleikurin hevði smakkað so nógv betri nú. Men vit kunnu bert taka tað góða við okkum víðari á leiðini og læra av hesum báðum dystunum, sigur Ásla Johannesen eftir vinardystin móti Luksemborg farna leygarkvøld.

Og har var helst bæði gott og ringt at taka við úr dystinum sum heild. Føroyska avrikið sá meira sannførandi út í fyrra hálvleiki, har okkara kvinnur vóru tendraðar og stinnar í nærdystunum. Bólturin varð ofta vunnin á føroyskar føtur, og fleiri ferðir lógu føroyingar eisini framvið málinum hjá mótstøðuliðnum.

Størsta føroyska løtan var eisini í fyrra hálvleiki. Ein hálvur tími var spældur, tá Heidi Sevdal við einum væleydnaðum langskoti legði Føroyar á odda við sínum 26. máli í landsliðsbúnanum. Støðan helt sær til hálvleiks og lagið var sjálvsagt gott í føroysku leguni.

Men steðgurin mundi koma væl við hjá vertunum, og tær komu væl betri út aftur til seinna hálvleik. Føroyska liðið brúkti meira orku í verjustøðu og vertirnir vóru við leikliga yvirvág. Tað gjørdist eisini greitt á máltalvuni longu fimm minuttir inni í seinna hálvleiki. Luksemborg spældi seg ígjøgnum í vinstru síðu, og frammanfyri málið stútaði Amy Thompson bóltin í netið til 1-1.

Tann støðan helt sær restina av vanligu leiktíðini. Tað var langt ímillum føroysku vitjanirnar uppi í brotsteignum hja Luksemborg og tí kundi javnleikurin helst verið eitt góðtikið úrslit havandi leikgongdina í huga. Men so skuldi tíverri ikki vera.

Í tíðini, sum dómarin hevði lagt afturat, kundu vertirnir spæla eitt langt útspark frá málverjanum heilt niðan í føroyska brotsteigin. Har slapp Laura Miller framvið føroysku verjuni, og úr spíksum vinkli skoraði hon sigursmálið fyri Luksemborg.

Tað næsta á skránni hjá kvinnulandsliðnum nú, er Nations League kappingin, sum fer av bakkastokki í heyst. Lutakastið til kappingina verður 2. mai, og tá verður sostatt greitt, hvørjum Føroyar skulu spæla teir seks Nations League-dystirnar ímóti í september, oktober og november.

Greinin varð fyrstu ferð løgd út 08. apríl 2023

Søguligir sigrar

U19 fótbóltslandsliðið við gentum hevur við sigrum móti Malta og Armenia tryggjað Føroyum uppflyting til A-deildina í komandi EM undankapping

Ein fegin føroyskur hópur eftir bólkasigurin í Armenia (Mynd: Turið Láadal Sejersdóttir)

SkrivaÐ:

Tíðindaskriv

Tveir dystir og tveir sigrar. So greið var úrtøkan hjá U19 landsliðnum við gentum í EM undankappingini, har Føroyar í hesum umfarinum vóru í bólki B4 saman við Malta og Armenia. 

Eftir eina seinkaða fráferð úr Føroyum kom landsliðið upp á pláss í Yerevan eitt samdøgur seinni enn ætlað, og fyrireikingartíðin til fyrra dystin var tí avmarkað, men hetta sást avgjørt ikki aftur á føroyska avrikinum móti Malta, og sum heild er Pætur S. Clementsen, landsliðsvenjari avbera væl nøgdur við hugburðin hjá spælarunum til kappingina. 

– Fyrri dysturin móti Malta var eitt megnar avrik av okkara leikarum. Talan var um ein javnan dyst, har vit eru á odda í hálvleikinum, men koma síðani afturum 1-2 í 76. min. Okkara leikarar stríðast tó fyrimyndarliga víðari og megna at fáa nøkur góð mál í 81., 84. og 88. minutti, so vit vinna 4-2. Ein fantastiskur sigur, sum vit øll fegnaðust um, greiðir landsliðsvenjarin frá.

Við sigrinum móti Malta vóru útlitini fyri einum søguligum úrsliti góð, tí frammanundan var greitt, at Malta hevði vunnið stórt móti armensku vertunum, sum Føroyar nú skuldu spæla ímóti. Og føroysku genturnar livdu væl og virðiliga upp til tað, sum varð væntað av teimum.

– Seinni dysturin var heldur ørvísi. Armenia var ikki so gott sum Malta, men tær stríddust sera væl í regninum og váta vøllinum, har okkara leikarar høvdu ilt við at fáa gongd á flótandi spælið. Tíbetur er hugurin at stríðast altíð til staðar hjá okkara leikarum, og fingu vit tvey mál í fyrra hálvleiki, annað eftir beinleiðis fríspark og tað seinna eftir horna. Í seinna hálvleiki royndu vit at fáa fleiri mál, men tað eydnaðist ikki. Vit kunnu tó gleðast um at dysturin ongantíð bleiv spennandi og vit høvdu tamarhald á støðuni, sigur landsliðsvenjarin um seinna dystin.

Sum vinnari av bólki B4 verða Føroyar fluttar upp í A-deildina til næstu undankapping. Hetta er fyrstu ferð eftir nýggja kappingarleistinum, at eitt føroyskt ungdómslandslið flytir upp í A-deildina, og hetta søguliga avrikið er gentunum sera væl unt, sigur ein errin landsliðsvenjari.

– Tað, sum hevur eyðkent hendan bólkin av leikarum, er teirra góði hugburður og viljin at fáa sum frægast burturúr øllum støðum, sum vit koma í. Tær hava arbeitt hart ígjøgnum alt og tað hevur verið ein fragd at sæð tær ment seg hesi árini. Eg unni teimum so hjartaliga at hava framt hetta bragdið av einum úrsliti og skrivað fótbóltssøgu – tað hava tær uppiborið, staðfestir Pætur S. Clementsen. 

Tað er tó eisini við einum veti av sorgblídni, at hópurin nú rundar kappingina av og fleiri av teimum í summar gerast ov gamlar til U19 landsliðið. 

– Tað er eitt sindur sorgblítt at staðfesta, at tíðarskeiðið hjá fleiri av spælarunum á U19 er komið at enda. Men vit gleða okkum til at fylgja teimum víðari á fótbóltsleiðini, umframt at vit gleða okkum til at taka við nýggjum og enn størri avbjóðingum í heyst saman við 05/06 árgangunum, sigur Pætur Smith Clementsen at enda.

Greinin varð fyrstu ferð løgd út 11. apríl 2023

Nýtt graslíki við Stóra í summar

Undirskiftin millum Tvøroyrar kommunu og Føroya Møblasølu kom uppá pláss í dag. Nýggi vøllurin í Trongisvági verður av slagnum DOMO, ið hevur serligt slag av graslíki: Talan er um samansett fipur

André Dalfoss, Birgir Andreasen og Kristin Michelsen á vøllinum við Stóra. Hann varð lagdur á fyri ellivu árum síðani (Mynd: Tvøroyrar kommuna)

SkrivaÐ:

Agnar Prestá

Í vikuni varð sáttmáli undirskrivaður millum Tvøroyrar kommunu og Føroya Møblasølu um at leggja nýtt graslíki á vøllin við Stórá, ið fyri fyrstu ferð skal skiftast.

Vøllurin, ið liggur á nú, er frá 2012. Hann hevur tænt væl seinastu 11 árini, men nú er tíð til at skifta vøllin. Vøllurin hevur sjálvandi verið fyri ávísum sliti, eftir at
hava verið dúgliga brúktur, skrivar Tvøroyar kommuna á heimasíðu sínari í dag

Fara at nýta tundur og samansett fipur

Nýggi vøllurin í Trongisvági verður av slagnum DOMO Vario Slide-S Pro frá belgiska felagnum DOMO, ið hevur heimspatent upp á hetta serliga slagið av graslíki. Birgir Andreasen frá Føroya Møblasølu greiðir frá, at við Stórá verður tað 6 sentimetrar sítt – gamli vøllurin hevði 5 sentimetra síð grasstrá.

- Tað serliga við hesum grasinum, er, at tað er samansett fipur. Eina fiprið er skapt sum ein borur – tá traðkað verður á tað, so leggur tað seg ikki flatt, men rættar seg sjálvt upp aftur. Hitt fiprið leggur seg yvir fylluna, sum er tundur, fyri at fylla skal verða verandi í grasinum.

Gomlu vøllirnir brúka gummigranulat sum fyllu, men hetta verður nú ikki mett sum umhvørvisvinarligt og tí verður við nýggja vøllinum farið yvir til tundur. Nevnast kann, at hetta slagið av fyllu verður so at siga ikki longur brúkt og verður eisini bannað í framtíðini. Sjálvt tá kavi verður ruddaður, verður fyllan liggjandi – hetta sást eitt nú seinast kavi var á vallum av sama slagi norðanfjørðs, skrivar tvk.fo.

Sáttmálin undirskrivaður í TB-húsinum (Mynd: tvk.fo)

Nýggi skal leggjast á einaferð í summar, kunnar Tvøroyar kommuna um. Áðrenn sjálvt teppið kann leggjast á, skal ymiskt forarbeiði gerast og tað stendur Pf. Articon fyri. Tað fer at taka umleið tíggju dagar at leggja serstaka graslíkið á.

Greinin varð fyrstu ferð løgd út 13. apríl 2023

Stefan gjørdist sigursharri í evstu løtu

Landsliðsspælarin gjørdist avgerandi, tá Sligo Rovers spældi á útivølli móti Dundalk farna vikuskiftið. Við sínum fyrsta máli fyri felagið lyfti 22-ára gamli miðvallarin Sligo upp á 3. plássið í bestu írsku deildini

Stefan Radosavljevic tók sakina í egnar hendur í 89. minutti, og so var stórur fagnaður á teimum í reyðum (Mynd: Sligo Rovers)

SkrivaÐ:

Agnar Prestá

Sligo Rovers spældi farna vikuskiftið á útivølli móti Dundalk í 8. umfari í fremstu írsku deildini. Tað eydnaðist at koma á odda, tá eitt korter var leikt við máli frá áleyparanum Max Mata. Beint fyri hálvleik fekk heimaliðið brotsspark og javnaði uppá returbóltin.

Stefan Radosavljevic kom á vøllin miðskeiðis í seinna hálvleiki, og hetta skuldi vísa seg at gerast avgerandi. Í 89. minutti tók Dundalk málspark stutt, og Sligo vann bóltin miðskeiðs á mótstøðuhálvuni. Bólturin stakk til Stefan, ið var staddur nakað til høgru. Føroyski miðvallarin setti fulla ferð á, slapp ímillum tveir verjuleikarar og prikaði bóltin framvið málverjanum hjá Dundalk.


(Myndir: Sligo Rovers)

Tá bólturin var rullaður niður í longra málhornið, brast stórfagnaður á hjá Sligo Rovers spælarum, venjaratoymi og áskoðarum, ið vóru komnir við til Dundalk. Stefan Radosavljevic varð eisini fagnaður - fyrsta mál hansara fyri felagið sendi tað upp á 3. pláss í bestu írsku deildini. 

Hetta var fyrsti sigur hjá Sligo í ein mánaða. Eftir landsliðssteðgin er Stefan Radosavljevic skiftur inn í báðum dystunum. Við málinum móti Dundalk hevur 22-ára gamli tvøramaðurin helst í minsta lagið strítt seg nærri einum byrjanarplássi.

Greinin varð fyrstu ferð løgd út 08. apríl 2023

Føroyingarnir í næstbestu norsku deildini fingu góða byrjan

Mikkjal Thomassen og hansara menn vunnu á útivølli, Gullbrandur Øregaard spældi 90 minuttir í tryggum sigri, Bryne við Rógva Baldvinsson vann, og Meinhard Egilsson var við til at halda málið hjá Mjøndalen reint

Frederiksstad var Jóannes Bjartalíð og Brand Hendriksson Olsen fyriuttan, men við Mikkjali Thomassen sum oddamanni vann liðið 1-0 á Kristiansund. Hetta liðið flutti niður úr bestu deildini í fjør (Mynd: Jens Kr. Vang)

SkrivaÐ:

Agnar Prestá

Eftir ein ógvuliga langan uppstart fóru teir endliga at spæla um stig í næstbestu norsku deildini 2. páskadag. Í OBOS-ligaen eru nú fýra lið, sum hava føroyska umboðan, so áhugavert verður at fylgja við. Trý av hesum fýra liðunum vunnu í fyrsta umfari, og eitt spældi málleysan javnleik.

0-0 á heimavølli móti Åsane var ikki tað, sum Mjøndalen setti nøsina upp ímóti. Tó var tað jaligt at síggja Meinhard Egilsson Olsen spæla fullan dyst. Landsliðsspælarin átti eisini sín leiklut í, at Mjøndalen helt málið reint og harvið fekk eitt stig. Eins og í nøkrum dystum í fjør spældi eysturoyingurin, ið fylti 26 ár henda dagin, á høgra bakki. Ymiskar skaðar í hópinum eru orsøk til tess. Føðingardagsbarnið endaði við at fáa gult kort.

Bryne var á heimavølli móti Kongsvinger, og fekk ein heldur óvæntaðan sigur. Rógvi Baldvinsson kom á vøllin í 77.minutti at spæla sum ein av trimum miðverjum. Í yvirtíðini skoraði heimaliðið til 2-1, og harvið ein góð byrjan hjá Rógva og liðfeløgunum. Ein av teimum er Noah Hans Mneney. 20-ára gamli miðvallarin ið Bryne keypti frá Víkingi í vetur, sat á bonkinum allar 90 minuttirnar, og hevur harvið sína almennu debut í Noregi til góðar.


Meinhard Egilsson Olsen í verjustøðu, sum hann hesaferð var í nakað oftari, enn vanligt er (Mynd: Mjøndalen)

Rógvi Baldvinsson í luftnærdyst í venjingardystinum í Norðurmakedonia fyri tveimum vikum síðani. Tá byrjaði royndi miðverjin inni (Mynd: Sverri Egholm) 

Gullbrandur í Horni Øregaard til venjing hjá Sandnes Ulf 

Gullbrandur í Horni Øregaard er uppvaksin í Noregi, og í fjør spældi hann í beint undir helminginum av dystunum hjá Sandnes Ulf. 20-ára gamli miðvallarin, sum eisini kann spæla í miðverjuni, spældi allar 90 minuttir, tá lið hansara vann 4-1 á Skeid. Hetta var dystur nummar 20 hjá Gullbrandi á besta liðnum í felagnum, har Ári Mohr Jónsson eisini hevur spælt. Hann hevur sjey U21-landsdystir á baki.

Fyri fyrstu ferð er ein føroyskur høvuðsvenjari í næstbestu norsku deildini, og í fyrstu royndini eydnaðist Mikkjali Thomassen at vinna. Tað var ikki hissini uppgáva: Á útivølli móti Kristiansund sum í fjør spældi í bestu deildini, og sum er ein av fremstu favorittunum at flyta upp úr OBOS-deildini. Håvard Åsheim skoraði einsamalla málið í dystinum í 49. minutti, og Frederiksstand fær rós fyri eitt sterkt og haldgott avrik.

Brandur Hendriksson Olsen og Jóannes Bjartalíð vóru ikki tøkir, men síðstnevndi er ikki so langt frá at vera tað.

1. umfar í OBOS-ligaen - "føroysku dystirnir"
Mánadagin 10. apríl - 2. páskadag

Kristiansund - Frederikstad 0-1
Mikkjal Thomassen høvuðsvenjari - Brandur Hendriksson Olsen og Jóannes Bjartalíð eru úti við skaðum í løtuni

Sandnes Ulf - Skeid 4-1
U21-landsliðsspælarin Gullbrandur Øregaard spældi allar 90 minuttirnar á miðvøllinum

Bryne FK - Kongsvinger 2-1
Rógvi Baldvinsson kom inn í miðverjuna í 77. minuttir - Noah Mneney var á bonkinum allan dystin

Mjøndalen - Åsane 0-0
Á 26-ára føðingardegi sínum spældi Meinhard Egilsson Olsen allar 90 minuttirnar sum høgri bakkur

Í dag klokkan 14 spæla Sandnes Ulf og Bryne á útivølli moti ávíkavist Sogndal og Ranheim. Í morgin Frederikstad og Mjøndalen í eldin - ávíkavist á heimavølli og útivølli.

Greinin varð fyrstu ferð løgd út 11. apríl 2023

Patrik og Breiðablik vóru fyri skelki í fyrsta umfari

Meistararnir taptu 3-4 fyri grannunum og uppflytarunum í dramtiskum dysti. Gunnar Vatnhamar og Pætur Petersen fingu sínar fyrstu minuttir og sínu fyrstu stig í bestu íslendsku deildini

Patrik Johannesen í landsdysti í Moldova í síðsta mánaði. Tvøramaðurin spældi mánadagin í 88 minuttir (Savnsmynd: Sverri Egholm)

SkrivaÐ:

Agnar Prestá

2. páskadag fór besta íslendska deildin av bakkastokki. Hon er nakað styttri enn føroyska kappingin, men har skulu eisini 27 dystir spælast. 

KA Akureyri og KR Reykjavík løgdu út. KA hevur í vetur millum annað fingið Pætur Petersen aftur at hópinum, og skálvíkingurin byrjaði inni í álopinum í fyrsta dystinum. Bæði málini í dystinum komu, eftir at 25-ára gamli landsliðsspælarin var skiftur út. Pætur spældi ein tíma - lið hansara bjargaði sær eitt stig við máli í yvirtíðini.

Pætur Petersen í venjingarlandsdystinum í Norðurmaekdonia, har hann stóð seg væl. Nú roynir skálvíkingurin seg í Íslandi (Mynd: Sverri Egholm)

Víkingur var á vitjan í Gardabær. Íslendsku steypavinnararnir skoraðu, tá hálvur tími var spældur og aftur tjúgu minuttir fyri leiklok. Gunnar Vatnhamar kom á vøllin í 85. minutti fyri ein áleypara, sum ein verjukend útskifting. 28-ára gamli leirvíkingurin kom til Reykjavíkar langafríggjadag sum síðsta keypið hjá steypavinnarunum, og nú hevur Gunnar verið við til at fáa fyrstu stigini hjá "sínum nýggja Víkingi" undir land.

Víkingur og Breiðablik fara møguliga at kappast í oddinum. Breiðablik hevur tveir føroyskar landsliðsspælarar knýttar til - Patrik Johannesen spældi í 88 minuttir, og Klæmint Andrasson Olsen var als ikki í 18-mans hópinum.

Patrik fekk ikki nógv burturúr, sum hann annars gjørdi í stórsteypadystinum fyri viku síðani. Talan gjørdist sum heild um ein marrudyst hjá íslendsku meistarunum, ið tóku ímóti grannunum og uppflytarunum, HK.

Longu eftir sjey minuttir var 0-2. Patrik og liðfelagirnir skuldu summa seg, og tá nakrir minuttir vóru eftir av dystinum sá út sum, at tað kortini fór at eydnast: Uppá fimm minuttir (74. - 78.) hevði Breiðablik vent tí til 3-2. Men í 89. minutti gjørdi verjuspælari sjálvmál, Patrik Johannesen varð skiftur út, og í 94. minutti avgjørdi innskifti Atli Jonasson fyri HK.

Marrubyrjan hjá Breiðablik, ið skal reisa seg móti Vali sunnukvøldið. Víkingur Reykjavík hevur heimavølli móti Fylkir stutt áðrenn. Pætur Petersen og KA taka ímóti Keflavík á Akureyri í dag. 

1. umfar í Besta-deild Karla - "føroysku dystirnir"
Mánadagin 10. apríl - 2. páskadag

KA Akureyri - KR Reykjavík 1-1
Pætur Petersen spældi fyrsta tíman. 25-ára gamli álopskendi landsliðsspælarin er í vetur skiftur úr HB

Víkingur Reykjavík - Stjarnan 2-0
Steypavinnararnir keyptu Gunnar Vatnhamar sum avloysara fyri skaddan miðverja í síðstu viku. 28-ára gamli leirvíkingurin náddi ikki at venja ofta - so vara hann í dystarhópi og kom á vøllin.

Breiðablik - HK 3-4
Ógvuliga keðilig byrjan hjá landsliðsáleyparunum. Klæmint Olsen hevur havt ávísar avbjóðingar í uppstartinum og var ikki partur av dystarhópinum - Breiðablik keypti Patrik Johannesen í vetur, og tvøramaðurin hevur skorað og lagt upp í millum annað stórsteypadystinum og sær út til at verða fastur maður. Hesaferð gekk tó ikki.

Greinin varð fyrstu ferð løgd út 11. apríl 2023

Daniel er liðugur í Danmark

Samstarvið við FC Fredericia er støðgað av persónligum orsøkum, skrivar felagið á heimasíðu sínari. Daniel Johansen er fluttur aftur til Føroyar, og sannlíkt er, at hann verður at síggja í Betrideildini seinni í ár

24-ára gamli Daniel Johansen ynskti sjálvur at verða loystur úr sáttmálanum við Fredericia. Spurningurin er so, um landsliðsspælarin verður aftur í HB-búnanum, tá flytingarvindeygað letur uppaftur (Mynd: Sverri Egholm)

SkrivaÐ:

Agnar Prestá

Í vetur flutti Daniel Johansen til Danmarkar, har hann skuldi spæla við FC Fredericia - hetta ístaðin fyri HB, ið vinstra beinti maðurin av Norðskála hevði spælt fyri síðani 2014. 

Steðgurin í Jútlandi gjørdist tó ikki langur. Í vikuni kunngjørdi FC Fredericia, at samstarvið millum partarnar er uppsagt. Tað er Daniel, ið hevur ynskt hetta, og er talan um persónliga orsøkir. Felagið hevur gingið hesum á møti, skrivar fcfredericia.dk. 

Fredericia sigur eisini, at Daniel Johansen er fluttur til Føroyar aftur. Tað er ikki greitt, hvat 24-ára gamli landsliðsspælarin vil við fótbóltsframtíð sínari.

Nú fyrrverandi Fredericia-spælarin kann tó ikki spæla í føroyskari kapping, fyrrenn flytingarvindeygað í Føroyum letur upp aftur 15. juni.

Daniel Johansen spældi tveir skrásettar dystir fyri Fredericia. Hann hevur spælt fimm A-landsdystir.

Greinin varð fyrstu ferð løgd út 11. apríl 2023

Hesir skulu royna at spæla Føroyar til EM-endaspælið

Peter Bredsdorff-Larsen hevur tikið 15 mans út til uppgávurnar móti Ukraina og Eysturríki, sum vera ávíkavist 26. og 30. apríl

Mynd: Sverri Egholm

SkrivaÐ:

Agnar Prestá

Síðst í hesum mánaðinum skal føroyska A-landsliðið í hondbólti við monnum spæla avgerandi dystir í EM-undankappingini. Serliga er tann fyrri, sum verður í Høllini á Hálsi móti Ukraina 26. apríl, sera týdningarmikil.

Landsliðsvenjararnir, Peter Bredsdorff-Larsen og Lars Porskær Møller hava úttikið hópin til uppgávurnar á Hálsi og 30. apríl í Bregenz í Eysturríki.

Hondbóltssamband Føroya skrivar, at føroysku venjararnir kunnu hava 16 leikarar við til dystirnar, men teir hava gjørt av at bíða við at úttaka seinasta mannin, tí greiða skal fáast á skaðaviðurskiftum og føri hjá nøkrum leikarum.

Málverjar:
Nicholas Satchwell, KA Akureyri (ISL)
Pauli Jacobsen, H71

Útileikarar:
Leivur Mortensen, Frederiksberg IF (DEN)
Rói Berg Hansen, HØJ (DEN)
Peter Krogh, H71
Tróndur Mikkelsen, Ryger Stavanger (NOR)
Jónas Gunnarson Djurhuus, Frederiksberg IF (DEN)
Pauli Mittún, Kristiansand (NOR)
Óli Mittún, IK Sävehof (SWE)
Elias Ellefsen á Skipagøtu, IK Sävehof (SWE)
Hákun West av Teigum, Skanderborg-Århus (DEN)
Allan Norðberg, KA Akureyri, (ISL)
Pætur Mikkjalsson, AMO (SWE)
Teis Horn Rasmussen, Follo HK, (NOR)
Helgi Hildarson Hoydal, Kristiansand (NOR)

Føroyska liðið savnast til venjingar í Føroyum sunnudagin 23. apríl, har liðið fer at venja saman áðrenn heimadystin móti Ukraina mikudagin 26. apríl kl. 19 í Høllini á Hálsi. Útselt er til dystin.

Hópurin ferðast til Bregenz í Eysturríki, leygardagin 29. apríl, har dysturin verður sunnudagin 30. apríl kl. 17, føroyska tíð. Portalurin verður við á ferðini

- Eysturríki hevur 8 stig í bólkinum, og hevur harvið tryggjað sær pláss til EM. Stríðið um 2. og 3. pláss er tætt, og hevur Rumenia 4 stig, meðan Føroyar og Ukraina hava hvør síni tvey. Føroyar taptu útidystin móti Ukraina 29-25 og taptu heimadystin móti Eysturríki 30-28.

Føroyar hava møtt Ukraina seks ferðir áður, og hava úrslitini verið hesi:

11.01.18 Ukraina – Føroyar 30-22, HM-undankapping
10.04.19 Ukraina – Føroyar 31-19, EM-undankapping
13.04.19 Føroyar – Ukraina 26-27, EM-undankapping
10.03.21 Ukraina – Føroyar 25-21, EM-undankapping
14.03.21 Føroyar – Ukraina 25-26, EM-undankapping
12.10.22 Ukraina – Føroyar 29-25, EM-undankapping

Føroyar hava møtt Eysturríki tríggjar ferðir áður og hava úrslitini verið hesi:

03.02.80 Føroyar – Eysturríki 18-27, C-HM
08.02.84 Eysturríki – Føroyar 26-19, C-HM
16.10.22 Føroyar – Eysturríki 28-30, EM-undankapping

Greinin varð fyrstu ferð løgd út 11. apríl 2023

Finalupláss hómast hjá Neistanum

Hetta eftir 28-21 sigur á H71 í fyrru hálvfinaluni. Neistin var so at siga omaná allan dystin í Høllini á Hálsi mikukvøldið, og ungi málverjin var ein teirra, ið gjørdi stóran mun

Neistin rann undan H71 seinastu løtuna. Hálvfinala nummar tvey verður í Hoyvík í kvøld - um Neistin vinnur, so er hon avgerandi (Mynd: Sverri Egholm)

SkrivaÐ:

Agnar Prestá

Hoyvíkingar løgdu seg á odda 4-2, beint áðrenn klokkan í Høllini á Hálsi vísti níggju minuttir. Síðani gingu næstan níggju minuttir, til teir skoraðu aftur: Tá minkaði Niklas Hanusarson til 6-5, og H71 var ongantíð á odda aftur.

Tað var serliga Sasha Lacok í málinum og ein sterk verja, ið gjørdu munin. Bert átta mál komu inn fyri steðgin, og ungi málverjin hevði fleiri góðar og umráðandi bjargingar í seinna hálvleiki eisini.

H71 fekk sjálvdan veruliga loyst upp. Tað var líka ein løta miðskeiðis í seinna hálvleiki, har Rói Ellefsen á Skipagøtu gjørdi bart, at H71 kom undir liðuna á Neistanum. Heimaliðið skoraði tó átta útav teimum næstu tíggju málunum, og so var leyst og liðugt.


Torstein Balle vendi í vetur aftur til barndómsfelagið eftir lesnað í Danmark. Lámi vongurin skoraði fýra mál í fyrru hálvfinaluni (Mynd: Sverri Egholm)

Fleiri av Neista-málunum vóru heilt vælspæld, og eins og í fjórðingsfinaluni á Skála skírisdag vístu teir í bláum seg at megna væl at skora ymsastaðni frá. Tróndur Kragesteen var stóri málskjúttin við níggju málum - royndi spælskiparin vísti aftur sítt hegni - og á strikuni var 18-ára gamli Ísak Vedelsbøl aftur framúr: Bæði í álopi og í verju.

H71 skal lyfta sítt spæl, um liðið skal hava møguleika at vinna greipuna. Tað jaliga fyri føroyameistarar er, at málúrttøkan ikki telur: Vinnur H71 í kvøld, skal ein triðja og avgerandi finala spælast í Hoyvík hósdagin 20. apríl. Seinast Neistin var í FM-finalunum var í 2019. Tað var móti júst H71.

FM Hálvfinalur 1
Mikudagin 12. apríl
Neistin – H71 28-21

Toppskjúttar: Tróndur Kragesteen 9 mál, Ísak Vedelsbøl 7 mál - Bogi Hansen 8 mál

Onnur hálvfinalan: 
Leygardagin 15. apríl
Kl. 18: H71 - Neistin

Greinin varð fyrstu ferð løgd út 12. apríl 2023

VÍF tók stórt fet móti finaluplássi

Vestmenningar hava nú tveir dystarbóltar á heimavølli. Team Klaksvík var á odda meginpartin av fyrra hálvleiki, men stríddist fyri at hanga í eftir steðgin. Mladen í málinum og effektivt álopsspæl hjá VÍF gjørdu mun

Team Klaksvík helt Halli Árason frá at skjóta so nógv útifrá - kortini skoraði kvívíkingurin átta mál í Klaksvík (Mynd: Sverri Egholm)

SkrivaÐ:

Agnar Prestá

VÍF hevur nú annað beinið í FM-finalunum. Hetta kann helst staðfestast eftir sigurin hjá vestmenningum í Klaksvík hóskvøldið. Tað var annars heimaliðið, ið hevði leiðsluna meginpartin av fyrra hálvleiki, og Team Klaksvík stíddist eisini væl eftir steðgin: Munurin gjørdist tó ov stórur; samlaða góðskan hjá VÍF og teir røttu marginalarnir vóru partar av muninum.

Tað vóru nógv fólk og nógvur larmur í Klaksvíkar Badmintonhøll hetta kvøldið. Vestmenningar vóru komnir talsterkir, og nógvir norðoyingar vóru komnir at stuðla liðnum, sum annað árið á rað er í FM-hálvfinalunum. Í fjør tapti Team Klaksvík stórt móti H71 í hálvfinalunum – í fyrstu hálvfinaluni hesaferð fekk liðið bjóðað vinnaranum av grundspælinum upp til dans.

Áskoðarar hjá vestmenningum fegnast (Mynd: Sverri Egholm) 

Heimaliðið tók skjótt eina leiðslu við tolnum og klókum álopsspæli, stinnari verju og góðum bjargingum frá David Henigman. Hesi leiðsluni slepti Team Klaksvík sjálvdan fyri steðgin. Hetta hóast spælið til tíðir gjørdist heldur stirvið, og at VÍF ansaði væl eftir Jens Paula Poulsen, ið ikki slapp til nógv. Nikolay Bliznov fekk nógv mál við sínum hamara av einum høgra armi, og Team Klaksvík var á odda við einum í steðginum.

Hjá VÍF haltaði eitt sindur, í mun til fáa spælt stórskjúttarnir Hall Árason og Filip Jojic upp til skot. Team Klaksvík hugsavnaði seg um at steðga hesum, og Filip kom ongantíð av álvara í gongd í dag. Ístaðin megnaði VÍF at brúka vengurnar og til tíðir strikuna væl. Hallur hevði eisini fleiri góð gjøgnumbrot av høgra bakki, og Hanus Christophersen kom eisini inn og bjóðaði verjuni væl av við sínari ferð.


Tað gekk mangan hart fyri seg, og Team Klaksvík-verjan var stinn stóran part av fyrra hálvleiki (Mynd: Sverri Egholm)

Formaðurin í Fólkaflokkinum, Beinir Johannesen, í stórum stíli á strikuni (Mynd: Sverri Egholm)

Skjótt og fjølbroytt álopsspæl hjá útiliðnum syrgdi fyri, at VÍF skjótt tók leiðsluna í seinna hálvleiki, og tað tykiskt ikki eins torført at koma til góðu skotstøðurnar. Leysu bóltarnir, ið heimaliðið javnan fekk væl fatur á í fyrra hálvleiki, endaðu nú heldur hjá vestmenningum. David í Team Klaksvík-málinun fekk ikki fatur á nógvum, og í hinum endanum var Mladen Mjerimacka komin inn. Hann hevur verið skaðadarvaður seinastu tíðina – í kvøld órógvaði beinanvegin Team Klaksvík.

VÍF hevði eina leiðslu á 2-4 mál størsta partin av hálvleikinum, men heimaliðið helt allatíðina eitt sindur fast í spenninginum. Eina løtu gjørdi strikuspælarin Beinir Johannesen lívið veruliga trupult hjá VÍF, ið eisini varð nakað órógvað av útvísingum, og Team Klaksvík kom á minus tvey. VÍF tók leikbrá, fór til eina meira álopskenda 5-1 verju, ið eisini riggaði væl fyrr í dystinum og fekk síðani nøkur týðandi mál, ið punkterðu dystin.

Hjá klaksvíkingum er tað nú tungur burður. Teir skulu vinna tvær ferðir í Vestmanna fyri at koma í finalurnar. VÍF kann avgerða alt sunnukvøldið kl. 19 í Vestmanna.


Tað vóru teir í gulum og bláum - og áskoðarar teirra - ið kundu fegnast eftir síðsta bríksl (Mynd: Sverri Egholm)

FM Hálvfinalur 1
Hósdagin 13. apríl
Team Klaksvík – VÍF 25-31 (14-13)
Toppskjútti: Hallur Árason 8 mál 

Seinna hálvfinalurnar 
Leygardagin 15. apríl
18: H71 - Neistin

Sunnudagin 16. apríl
19: VÍF - Team Klaksvík

Greinin varð fyrstu ferð løgd út 13. apríl 2023

Team Klaksvík vann eftir sannan hondbóltsgysara í Kollafirði

Eitt dundurskot hjá Jens Paula Poulsen og síðani stór tvíføld bjarging frá Davidi Hennigman tryggjaði Team Klaksvík sigurin og harvið hálvfinalupláss

KÍF helt ikki høvdið nóg kalt, og so tóku gestirnar av. Teir skulu spæla hálvfinalur móti VÍF í næstu viku (Mynd: Sverri Egholm)

SkrivaÐ:

Agnar Prestá

Seinna fjórðingsfinalan í Burn-deildini var á skránni í Kollafirði farna leygarkvøld, har Team Klaksvík vitjaði.

Tað var útiliðið, sum hevði leiðsluna allarstørsta partin av fyrra hálvleiki. David Henigman í málinum hevði fýra bjargingar, áðrenn fýra minuttir vóru spældir, og KÍF hevði heldur trupult við at finna rútmuna. Hóast onkra góða løtu hjá teimum reyðkløddu, var Team Klaksvík á odda við tveimum, tá steðgur var - kollfirðingar høvdu bara skora tíggju ferðir.

Tað kom skjótt vend í eftir steðgin. Tríggjar útvísingar innan eina lítla løtu kostaðu hjá klaksvíkingum, Milenko so at siga stongdi málið hjá kollfirðingum fyrru hálvu av seinna hálvleiki, og hol kom á málskjótingina í hinum endanum. KÍF spældi skilagott og tók eina leiðslu á fýra mál - men so komu teknisku mistøkini: Tvey sentringsmistøk, bóltar vórðu kastaðir burtur, og David bjargaði aftur fleiri skotum.

Toppskjúttin í Burn-deildini, Brian Slyne, hevði fleiri góð gjøgnumbrot (Mynd: Sverri Egholm)


Milenko Jelkan stóð framúr væl í KÍF-málinum í seinna hálvleiki, men hetta var ikki nóg mikið (Mynd: Sverri Egholm)

Toppskjúttin Jens Pauli Poulsen, ið eisini hevði umráðandi leiklut í miðverjuni (Mynd: Sverri Egholm)

Munurin lá ímillum null og eitt mál seinastu tíggju minuttirnar. Samanlagt helt KÍF ikki høvdið nóg kalt og tyktust teir onkursvegna raktir á sjálvsálitið seinna heilmingin av hálvleikinum. Gamaní misnýtti Team Klaksvík eisini fríar møguleikar - Milenko bjargaði tveimum fríleyparum - men tá beint yvir ein minuttir var eftir, misti KÍF bóltin í álopi. Útiliðið nýtti alla tíðina, sum til bar, og tá ein alvering var eftir - og beint eftri fríkast - fór toppskjúttin í dystinum uppfrá. Jens Pauli Poulsen knallaði til, og bólturin fór umvegis yvirleggjaran í málið.

KÍF tók leikbrá, spældi sjey ímóti seks, men David Henigman gjørdist aftur hetjan: Fyrst bjargaði kroatin royndir frá Hans Eli Sigurbjørnsson og síðani returskotið hjá Karl Martini Olsen.

So var tað teir úr Klaksvík, ið kundi brøla og fevnast: Teir skulu spæla minst tvær hálvfinalur móti VÍF í næstum. Tað merkir eisini, at Neistin og H71 skulu dystast um hálvfinaluplássið. Kappingarárið hjá KÍF er av eftir eitt stórt vónbrot.


Stórur fagnaður sum vera man í Team Klaksvík-leguni

FM-fjórðingsfinalur
Leygardagin 8. apríl í Kollafirði 
KÍF - Team Klaksvík 21-22 (10-12)
Toppkjútti: Jens Pauli Poulsen 7 mál

Skírisdag, 6. apríl
StÍF - Neistin 30-31 (14-17)

Hálvfinalur: 
VÍF (1) - Team Klaksvík (6)
H71 (2) - Neistin (5)

Greinin varð fyrstu ferð løgd út 08. apríl 2023

- Føli at eg kann menna meg saman við HØJ

Í vikuni gjørdist greitt, at landsliðsmálverjin skal spæla í næstbestu donsku deildini. Tað er eitt lið, sum satsar, sigur hoyvíkingurin - tann sosiali parturin hevur eisini sín leiklut

HØJ kappast í oddinum í donskum hondbólti, og Pauli Jacobsen kann fáa stóran leiklut á liðnum (Mynd: Sverri Egholm)

SkrivaÐ:

Agnar Prestá

Tað var ein vónbrotin Pauli Jacobsen, ið Portalurin fekk orðið á eftir 28-21 ósigurin fyri Neistanum í fyrstu hálvfinaluni í Høllini á Háls mikukvøldið.

Tó kom smílið á hjá 20-ára gamla hoyvíkinginum, tá vit spurdu um HØJ. Fyrr henda sama dagin varð kunngjørt, at Pauli Jacobsen skal spæla fyri danska felagið, har Rói Berg Hansen er partur av hópinum.

Pauli sigur millum annað við Portalin, at HØJ er eitt felag, sum satsar eitt sindur. Fyri hann var tað umráðandi at koma til eitt felag, ið veruliga vil nakað - fleiri feløg ymsastaðni frá hava verið í myndini.

Í franska felagnum, har Pauli Jacobsen var, riggaði tað millum annað ikki uttan fyri vøllin. Hetta hevði eisini týdning í avgerðini at flyta til HØJ og Keypmannahavnar-økið. Venjarin hjá HØJ sigur við heimasíðu felagsins, at har eru risa menningarmøguleikar í Paula Jacobsen.


Pauli Jacobsen stórbjargar í U20-landsdysti móti Danmark - frá í summar skal Pauli búgva í Keypmannhavn (Savnsmynd: Harald Bjørgvin) 

HØJ var júst ov stutt til at røkka at spæla avgerandi dystir um uppflyting til fremstu donsku deildina. Liðið endaði á 4. plássið. 

Greinin varð fyrstu ferð løgd út 12. apríl 2023

Óli og Elias avgerandi leiklut í fjórðingsfinaluni

Óli Mittún avgjørdi dystin í síðstu sekundunum

Óli Mittún og liðfelagarnir fegnast (Mynd: Sävehof)

SkrivaÐ:

Sverri Egholm

Sävehof vann seg hósdagin í hálvfinaluna í endaspælinum í bestu svensku hondbóltsdeildini.

Hetta var triðja fjórðingsfinala móti Guif, og hóast teir gulu við Elias Ellefsen á Skipagøtu og Óla Mittún vunu stórsigrar í báðum teimum fyrstu dystunum, bleiv tað javnt í hóskvøldið.

Guif var á odda við tveimum málum, 28-26, tá fimm minuttir vóru eftir, men hoyvíkingarnir vildu tað øðrvísi.

Nógv mál rullaðu inn síðstu løtuna, men við trimum málum frá Óla Mittún og einum frá Eliasi á Skipagøtu eydnaðist at vinna 30-29.

Síðsta málið fekk Óli tá hann bleiv spældur fríur av Eliasi, og tryggjaði Sävehof hálvfinalupláss.

Hálvfinalurnar í svenska endaspælinum verða leiktar í mai.

Greinin varð fyrstu ferð løgd út 14. apríl 2023

FM í borðtennis: Fleiri eru um boðið

Í dag er stóri felags FM-finaludagurin hjá borðtennis, badminton og judo

 

SkrivaÐ:

Tíðindaskriv

Nú nærkast av álvara, til at ársins FM-kapping í borðtennis fer av bakkastokki. Í gjár vórðu innleiðandi umførini spæld, og í dag verða finalurnar spældar á stóra felags FM-finaludegnum hjá borðtennis, badminton og judo.

Aftur í ár verður tað ein stinnur hópur av leikarum, sum fer at spæla við um FM-heitið. Tað er greitt, nú flest allir útisetarnir hava boðað frá, at teir koma til Føroya at luttaka í FM.

Hjá monnum eru nógvir um boðið. Verandi føroyameistarin, Albert Weihe Wolfsberg, sum spælir við danska felagnum Hillerød GI, kemur heim, og 16 ára gamla talentið má – sum verandi føroyameistarin – helst átaka sær ein leiklut sum lítil FM-favorittur.

Tað verður tó ikki uttan mótstøðu frá fimmfalda føroyameistaranum, Fróða Fríðason Jensen, og eisini Hallur Thorsteinsson er støðugur á hesum høga støðinum, og kann bjóða teimum báðum av. Hann hevur verið darvaður av skaða, men vónar at fáa spælt.

Ein nýggjur ungur harri, sum kann trína fram á FM-pallin í ár, er 18 ára gamli Ári Fríðason Jensen, sum fyrr í ár hevur megnað at vunnið á stórabeiggja sínum, Fróða. Hann er eisini nýliga úttikin til oyggjaleikalandsliðið, og er sum heild í góðum formi og í rívandi menning.

Hjá kvinnunum kemur verandi føroyameistarin, Henrietta Nørr, ikki heim. Hon hevur annars vunnið FM fimm ferðir, og spælir við týska felagnum, Kiel TTK. Tíverri lá ikki fyri hjá henni at luttaka hesaferð.

Tað eru serliga tríggjar, sum eru um boðið hjá kvinnum. Tann eina er Durita Fríðadóttir Jensen, sum hevur verið føroyameistari tríggjar ferðir, og sum spælir og venur við danska felagnum, Amager BTK, har fleiri føroyingar áður hava spælt við.

Anja Wongwai og Britt Michelsen fara eisini at liggja framvið. Tær hava síðsta hálvaannað árið spælt í næstbestu donsku deildini við Horsens KFUM, og hetta hevur verið við til at lyft tær upp á eitt nýtt støði, sum spennandi verður at síggja nú í FM og á oyggjaleikunum í summar.

Greinin varð fyrstu ferð løgd út 14. apríl 2023

Árant og Miriam eru aftur í FM-finalunum í einmansleiki

Føroyameistararnir í badminton verða funnir á Kontrast FM í dag

Miriam í Grótinum, HBF, skal í finaluni verja føroyameistaraheitið í einmansleiki fyri kvinnur (Mynd: Haldur Suni Johansen)

SkrivaÐ:

Sverri Egholm

Føroyameistararnir í badminton skulu finnast í dag har finalurnar í Kontrast FM blíva leiktar í Høllini á Hálsi í Havn. Hósdagin blivu innleiðandi umførini í einmansleiki spæld, har føroyameistararnir frá í fjør aftur vunnu sær sæti í finalunum. Í 2022 vóru tað Árant á Mýruni úr MBF og Miriam í Grótinum úr HBF, sum gjørdust føroyameistarar í einmansleiki í badminton hjá teimum vaksnu.

Hjá vaksnu kvinnunum vann Miriam í Grótinum úr Havnar Badmintonfelag hóskvøldið hálvfinaluna á Lenu Mariu Joensen úr Klaksvíkar Badmintonfelag. Í finaluni leygardagin møtir føroyameistarin frá í fjør Miu Thorkildshøj, HBF, sum fyri fyrstu ferð vann sær tað eina finaluplássið í einmansleiki við at vinna á Bjarnhild í Buð Justinussen í eini spennandi hálvfinalu í trimum settum.

Árant á Mýruni úr MBF vann eina tætta og spennandi hálvfinalu ímóti Magnus Dal-Christiansen úr HBF. Føroyameistarin hjá monnum frá í fjør skal í ár aftur spæla finalu ímóti Jónas Djurhuus, HBF. Jónas endurvann sær sæti í finaluni við at vinna hálvfinaluna í tveimum settum ímóti Ára Isfeldt úr HBF, sum á fyrsta sinni luttók í eini hálvfinalu til FM.

Fríggjadagin vóru innleiðandi umførini í tvímansleiki hjá kvinnum og monnum umframt í blandaðum tvímansleiki.

Finalurnar í Høllini í Hálsi í dag byrja klokkan 10, har Badmintonsamband Føroya saman við Judosambandinum og Borðtennissambandinum skipar fyri Kontrast FM. Kringvarp Føroya sendir beinleiðis frá finalunum seinnapartin.

Greinin varð fyrstu ferð løgd út 14. apríl 2023

Lyra hjá Ljósinum vann gull

Ljósið stóð seg væl í Eastercup

 

SkrivaÐ:

Jan Müller

Fimleikafelagið Ljósið stóð seg væl  til kappingina í estetiskum fimleiki, Eastercup. Tey høvdu tey lið við og vunnu tvey heiðursmerki í harðari kapping við sera góð lið frá útlandinum.

Ljósið kvinnur Lyra gjørdust nr. 1  í teirra bólki, smágentur Norma gjørdust nr. 2  í teirra bólki. 

Greinin varð fyrstu ferð løgd út 09. apríl 2023

Nora vann Eastercup 2023

Pinkuliðið Nora hjá Havnar Fimleikafelag gjørdist farna vikuskiftið nummar eitt í kappingini hjá pinkum til altjóða kappingina Eastercup í estetiskum fimleiki, sum varð hildin í Greve

 

SkrivaÐ:

Jan Müller

Eftir innleiðandi kappingina fríggjadagin lá Nora trygt á fyrstaplássinum við 13,300 stigum. Í dag fingu tær 14,050 stig, sum gav teimum samanlagt 27,350 stig, og tær vunnu sannførandi fyrstaplássið.

Soleiðis sá út á stigatalvuni:

1. Team Nora (FRO) 13.300 - 14.050 - 27.350
2. Team Mynthe (DEN) 12.100 - 11.600 - 23.700
3. Team Daisy (DEN) 9.400 - 10.400 - 19.800

Fleiri onnur lið og aðrir aldursbólkar luttóku eisini úr Føroyum.

Greinin varð fyrstu ferð løgd út 09. apríl 2023

Fara at boksa í SMS

Tórshavn Boksing skipar fyri boksitiltaki við sýningardystum í dag

(Savnsmynd)

SkrivaÐ:

Ingi Samuelsen

Boksifelagið Tórshavn Boksing, sum heldur til í leigaðum hølum á Hjalla, flytir í dag ein av boksiringunum oman á Torgið í SMS, har skipað verður fyri sýningardystum fyri tey vitjandi í keypsskálanum.

Tórshavn Boksing er eitt felag, sum støðugt má út at finna pening til at fíggja nógv vaksandi virksemið í felagnum. Serliga eru tað leiguútreiðslurnar fyri felagshølini, sum tyngja.

Tí skipar felagið leygardagin fyri tombola í SMS, og eisini verður søla av t-troygjum og hettutroyggjum við búmerkinum hjá felagnum á.

Men tað týdningarmesta er at at vísa ítróttina fram og greiða frá um boksing, og eisini geva føroyingum møguleika at heilsa upp á dreingirnar, sum júst hava vunnið heiðursmerki í donsku sælandsmeistarakappingini, David Kunoy og Hera Ziskason.

Fýra sýningardystir eru á skránni. Tveir verður millum lokalar boksarar. Jonathan móti Teiti Annand og David Kunoy móti Magna Vang. Tveir dystir vera millum Tórshavn og Klaksvík: Karstin Ljósstein móti Leivi Fonn og Heri Ziskason móti Róki Fonn.

Tiltakið í SMS er leygardagin millum klokkan 10 og 16.  

Greinin varð fyrstu ferð løgd út 14. apríl 2023

Billardkempur dystast í Havnar Klubba

Ikki færri enn 6 fyrrverandi Føroyameistarar í billard luttaka, tá FM fyri einstaklingar verður spælt í Havnar Klubba komandi tvey vikuskiftini

Verða tað hesar báðar billardkempurnar, sum skulu dystast í finaluni í FM kappingini fyri einstaklingar í ár? Hallur Joensen vm. gjørdist FM meistari í 2021, og Páll Heri Nolsøe í 2022 (Mynd: Jan Müller)

SkrivaÐ:

Jan Müller

Greinin varð fyrstu ferð løgd út 09. apríl 2023