Jan Ziskasen farin úr stjórastarvinum

Jan Ziskasen er farin frá sum samtaksstjóri í Føroya Tele, og William Joensen, fíggjarstjóri, tekur fyribils við stjórastarvinum. Nevndin í Føroya Tele ynskir at seta út í kortið av nýggjum, og tí verður ein menningartilgongd sett í verk í samtakinum

(Savnsmynd: Sverri Egholm)

SkrivaÐ:

Tíðindaskriv

Jan Ziskasen, sum hevur verið samtaksstjóri í Føroya Tele seinastu átta árini, er farin úr stjórasessinum. William Joensen, fíggjarstjóri, fer fyribils at røkja stjórastarvið. Samtaksnevndin hevur samtykt at seta út í kortið av nýggjum, og í hesum sambandi eru partarnir samdir um at fara hvør til sítt.

Jan Ziskasen er tískil eisini farin úr nevndum í dótturfeløgum hjá Føroya Tele, har hann hevur haft sæti. Nevndarlimir í samtaksnevndini røkja fyribils nevndarsessirnar, sum samtaksstjórin hevur havt. 

Nevndin fer at seta nýggja kós fyri samtakið, har dentur m.a. verður lagdur á, at Føroya Tele einhvørja tíð virkar í samsvari við kappingarreglurnar á fjarskiftisøkinum.

- Tað skal eingin ivi vera um, at Føroya Tele í framtíðini bæði er ein frílyntur kappingarneyti á fjarskiftismarknaðinum, samstundis sum netparturin í samtakinum verður skipaður so neutralt sum gjørligt mótvegis øllum leikarum á føroyska fjarskiftismarknaðinum, sigur Bjarni Arnason, nevndarformaður í Føroya Tele.    

Bjarni Arnason, nevndarformaður (Savnsmynd: Sverri Egholm)

Ein menningartilgongd verður sostatt sett í verk í samtakinum, og tá henda tilgongdin er liðug, fer nevndin at søkja eftir nýggjum samtaksstjóra.

- Vit takka Jan Ziskasen fyri trúgva tænastu og stóra arbeiðið, hann hevur gjørt fyri Føroya Tele hesi átta árini, hann hevur verið samtaksstjóri. Vit ynskja honum blíðan byr víðari, sigur Bjarni Arnason.

Føroya Tele er ein týðandi fyritøka í føroyska samfelagnum, og nevndarformaðurin er sannførdur um, at tilgongdin, sum nú fer av bakkastokki, fer at gagna bæði kundunum, starvsfólkunum og samtakinum.

- Føroya Tele hevur dugnalig starvsfólk, og her liggja spennandi avbjóðingar fyri framman. Nú fara vit at hugsavna okkum um menningarmøguleikarnar, staðfestir nevndarformaðurin í Føroya Tele.

Greinin varð fyrstu ferð løgd út 22. september 2023

Samdir um at samstarva um yvirtøku

Høgni Hoydal, landsstýrismaður við uttanríkis- og vinnumálum og danski ferðslumálaráðharrin, Thomas Nolsøe Danielsen, hava fundast í Føroyum

 

SkrivaÐ:

Tíðindaskriv

Á skránni var yvirtøkan av loftrúminum og loftferðsluni, sum verður løgd fyri Løgtingið í næstum.

Ráðharrarnir viðgjørdu ymsu tættirnar í yvirtøkuni, og eru samdir um at samstarva um øll praktisk og formlig viðurskifti, nú ein føroyskur loftferðslumyndugleiki verður bygdur upp.

Teir vitjaðu eisini Vága Floghavn og fingu kunning um uppgávur, ætlanir og avbjóðingar á loftferðsluøkinum frá Regini I. Jakobsen, stjóra, starvsfólkum í torninum og tilbúgvingini.

– Eg fegnist um, at danski ráðharrin og hansara fólk eru so jalig fyri samstarvinum, og vit gleða okkum at fara undir tað týdningarmikla arbeiðið at byggja upp okkara egnu førleikar, tænastur, eftirlit og myndugleika á loftferðsluøkinum, sigur Høgni Hoydal, landsstýrismaður.

Greinin varð fyrstu ferð løgd út 17. september 2023

Margit Stórá: Tørvur er á skipan við ókeypis sálarfrøðihjálp

Heilsutrygd hevur eftirmett skipanina um ókeypis sálarfrøðihjálp til ung, sum varð sett í verk í 2021, men endalig støða er ikki tikin til, hvussu tilboðið skal skipast frameftir, sigur landsstýriskvinnan við heilsumálum

Margit Stórá, landsstýriskvinna í heilsumálum (Savnsmynd: Sverri Egholm)

SkrivaÐ:

Alda Nielsdóttir

Í 2021 varð royndarskipan við ókeypis sálarfrøðiligihjálp til ung sett í verk, og eftirmetingar hava víst, at tørvur er á eini tílíkari skipan.

Tað sigur Margit Stórá, landsstýriskvinna við heilsumálum í svari til fyrispurning frá Kaj Leo Holm Johannesen, tingmanni.

Hann vildi hava at vita, hvussu gongur við skipanini, og hvussu nógv hava fingið hjálp umvegis skipanina. Eisini spurdi hann, um skipanin er eftirmett, og um ætlanin er at víðka tilboðið til aðrar aldursbólkar enn tey 15-35 ára gomlu.

– Heilsutrygd hevur eftirmett skipanina. Eftirmetingin hevur víst, at tørvur er á eini tílíkari skipan, og at fleiri í málbólkinum hava havt eina góða úrtøku av viðgerðini.

Skipanin hevur tó eisini havt avbjóðingar, sigur landsstýriskvinnan.

– T.d. hevur visitasjónin verið ov breið í mun til málbólkin samstundis sum útjaðaraøkini, og serliga Suðuroyggin, liggja lutfalsliga lægri, tá ið hugt verður eftir ávísingum til skipanina. Samstundis hevur royndarskipanin víst seg at vera munandi dýrari enn upprunaliga mett.

Talan er um eina royndarskipan, sum varð sett í verk á vári í 2021 og fer úr gildi 31. oktober, og higartil hava verið uml. 1.770 ávísingar til skipanina, og 12.200 viðtalur eru framdar.

Landsstýriskvinnan sigur, at hon hevur ikki tikið endaliga støðu til, hvussu eitt tílíkt tilboð skal skipast frameftir, men hetta verður fráboðað í næstum.

Greinin varð fyrstu ferð løgd út 18. september 2023

Norðurlandahúsið er minst 200 milliónir vert umframt innbúgv

Og tá er útgerð og innbúgv ikki tald við, upplýsir stjórin fyri húsið

(Savnsmynd)

SkrivaÐ:

Ingi Samuelsen

Tá talan er um virðið av bygninginum, so liggur tað á minst 200 milliónum krónum umframt útgerð on innbúgv. Hetta er ikki galdandi marknaðarvirðið, tá má tryggingarfelagið gera av.

Soleiðis skrivar stjórin í Norðurlandahúsinum, Gunn Hernes, í brævi til mentanarnevndina hjá Løgtinginum.

Uppskotið til samtyktar hjá Miðflokkinum um at yvirtaka Norðurlandahúsið hevur verið til fyrstu viðgerð í Løgrintinum, og verður nú viðgjørt í mentanarnevndini áðrenn tak kemur aftur í løgtingssalin til endaliga avgerð.

Mentanarnevndin hevur havt málið til viðgerðar á tveimum nevndarfundum higartil, og á fundinum hósdagin í farnu viku, vóru fleiri fólk kallað inn til fundar við nevndini.

Teirra millum var Gunn Hernes, sum á fundinum lovaði at senda ymiskar upplýsingar um húsið aftur til nevndina, harímillum eina meting av virðinum av Norðurlandahúsinum.

Greinin varð fyrstu ferð løgd út 21. september 2023

1,7 milliónir komu inn

Reyði Krossur savnaði 1,7 milliónir krónur inn til árligu landsinnsavningina. 750.000 krónur verða beinanvegin sendar at hjálpa neyðstøddum

 

SkrivaÐ:

Sverri Egholm

Hjartans tøkk til øll sjálvboðin, ið hava gingið við bússu til Landsinnsavningina, og ikki minst takk til øll, ið hava stuðlað og sostatt verið við til at savna 1,7 milliónur krónur inn til árligu landsinnsavningina hjá Reyða Krossi.

Takka verið góðu innsavningina senda vit beinanvegin 750.000 kr. til at hjálpa neyðstøddum, sum beint nú eru ávirkað av ræðuligu vanlukkunum í Libya og Marokko.

500.000 krónur verða sendar til hjálpararbeiði í Libya eftir at ein oyðileggjandi vatnflóð hevur skolað heil grannaløg á sjógv, oyðilagt infrastruktur og elvt til, at fleiri túsund hava latið lív. Tey, ið eru komin undan við lívinum, hava átrokandi tørv á neyðhjálp so sum vatni, mati, skjóli og sálarligum stuðli.

250.000 krónur verða sendar til hjálpararbeiði eftir ógvusliga jarðskjálvtan í Marokko. Fleiri av harðast raktu økjunum eru smáar bygdir høgt í Atlasfjøllunum, har nógv hava mist alt. Reyði Krossur á staðnum fór í gongd við bjargingararbeiði beinanvegin, og við hjálp frá øðrum Reyða Kross feløgum verður áhaldandi arbeitt við at veita neyðhjálp, so sum mat og innivist.

Peningurin frá landsinnsavningini verður eisini nýttur til hjálpararbeiði í Føroyum, eitt nú til:

Mat- og Klædnahjálpina, til tey, ið hava ilt við at fáa endarnar at røkka saman,

Vitjanartænastuna, ið er við til at basa einsemi,

Samarittarnar, ið økja um tryggleikan til tiltøk kring landið,

Integratiónsarbeiði, ið stuðlar tilflytarum og flóttafólki at fella til í Føroyum

Greinin varð fyrstu ferð løgd út 21. september 2023

Bilasølurnar 17 milliónir lægri avlop í 2022 enn árið fyri

Ráðgevingarfyritøkan Nira hevur aftur í ár greinað roknskapirnar hjá føroysku bilasølunum

(Savnsmynd: Ólavur Frederiksen / Faroephoto)

SkrivaÐ:

Birgir Nielsen, Nira

Ráðgevingarfyritøkan Nira hevur aftur í ár gjørt eina greining av føroysku bilasølunum, sum byggir á at hesar bilasølur hava egið umboð upp á bilmerkir. Talan er um átta bilasølur har roknskapurin fyri 2022 er samanlíknaður.  

Sambært Akstovuni fall sølan av nýggjum bilum í 2022 við 19,6 prosentum sammett við 2021. Minkingin í søluni var 558 bilar. Talan er tí í veruleikanum um lægstu søluna av nýggjum bilum síðani 2019.

Spurningurin er hvussu nógv ein minking í sølu av nýggjum bilum hevur ávirkað ársúrslitið hjá bilasølunum í 2022.

Tá hugt verður eftir roknskapartølunum sæst, at 2022 var eitt munandi lakari ár enn síðsta ár, hvat ið ársúrlitið hjá bilasølunum viðvíkur.

Í veruleikanum skulu vit heilt aftur til 2014 at finna eitt lægri samlað ársúrslit enn 2022.

Ársúrslitið eftir skatt fyri átta bilasølur í 2022 vísir, at samlaða ársúrslitið eftir skatt var 27 milliónir krónur sammett við 44 milliónir krónur í 2021. Talan er tískil um eina minking í ársúrlsitinum á 17 milliónir krónur ella 39 prosent.

Rakstrarúrslit hjá bilasølunum fyri 2022
Vit hava kannað roknskapirnar hjá átta av bilasølunum í mun til níggju bilasølum í 2021. Roknskapurin hjá Spf. Komfortbilum var ikki tøkur tá kanning var gjørd.

Besta ársúrslitið hevði Pf. Waag, sum hevði eitt ársúrlit upp á 8,6 milliónir krónur, meðan Pf. Wenzel var nummar tvey við 5,6 milliónum krónum og Pf. Reyni-Service nummar trý við 5,2 milliónum.

Tískil er Pf. Waag aftur komið á sigursskammilin eftir nøkur ár, hvat ið ársúrsliti viðvíkur.

Viðmerkjast kann, at Waag eisini er tann bilasølan, sum hevur havt nógv besta samlað úrslit síðstu 10 árini (85,1 milliónir krónur), meðan Wenzel hevur havt besta úrslitið síðstu fimm árini (49,6 milliónir krónur)

Allar bilasølurnar uttan Pf. Reyni-Service høvdu eitt lakari ársúrslit eftir skatt í 2022 sammett við 2021.

Fíggjarstøðan hjá bilasølunum í Føroyum
Tá hugt verður eftir fíggjarstøðuni hjá bilasøluni, sæst at sera stórur munur er á feløgunum.

Tann bilasølan sum hevur størstu bókaðar ognir er Pf. Reyni Service, sum hevði samlaðar ognir á 130 milliónir krónur, býtt á støðisognir á 70 milliónir og ognir í umferð á 60 milliónir krónur. Goymslan av bilum v.m. var 27,6 milliónir krónur og tøkur peningur var 1 millión krónur.

Pf. Waag hevði næststørstu fíggjarstøðuna, við 93,5 milliónum krónum. Her skal tó viðmerkjast at goymslan av bilum v.m. var 46 milliónir krónur, sum er tað mesta hjá nakrari bilasølu í 2022.

Um hugt verður eftir fíggjarligu styrkini hjá bilasølunum, so síggja vit, at Reyni Service hevur størsta eginpeningin við 62,5 milliónum krónum, meðan Pf. Waag er á øðrum plássi við 58,2 millió.  Á triðja plássi er Pf. Auto Service við 48,8 milliónum krónum.

Lyklatølini hjá bilasølunum
Ognaravkast er tað lyklatalið, sum vísir best, hvussu gott rakstrarúrslitið er í mun til tann kapitalin á fíggjarstøðuni, sum bilasølurnar nýta at reka teirra felag.

Pf. Waag liggur í 2022 á fyrsta plássi við 9,2 prosentum í ognaravkasti, Pf. Bilasølan hevði 8,0 prosent og Wenzel P/F hevði 7,8 prosent í ognaravkasti.

Eginpeningsavkastið (rakstrarúrslit í mun til eginpening) vísir hvussu fíggjarliga avkastið hjá eigarunum hevur verið í árinum. 

Besta eginpeningsavkastið hevði Pf. Bilasølan við 51,2 prosentum og næst var Pf. Wenzel við 20,5 prosentum meðan Pf. Waag lá á triðja plássi við 14,7 prosentum.

Samanumtikið mugu vit staðfesta, at sølan av bilum er minkað við umleið 20 prosentum í 2022, og at allar bilasølurnar uttan Reyni Service høvdu eitt lægri ársúrslit. Tær flestu bilasølurnar eru tó framvegis væl fyri og kunnu standa ímóti verri tíðum.

Spurningurin at enda er, hvussu sølan av nýggjum bilum fer at hilnast, tá ið 2023 árið er liðugt.

Higartil vísir sølan av nýggjum bilum fyri januar til august í 2023 eitt fall á 88 bilar ella 5,3 prosent samanborið við 2022. Tískil kann ein varislig meting verða, at ein vend má koma í bilasøluni, um metast skal, at árið fyri 2023 fer at hilsnast betur enn í 2022.

Greiningin er gjørd av Birgir Nielsen frá ráðgevarafyritøkuni Nira Sp/f

Greinin varð fyrstu ferð løgd út 18. september 2023

Størru fyritøkurnar kláraðu seg heilt væl í 2022

Samanumtikið var 2022 eitt serstakliga gott ár hjá størru føroysku fyritøkunum, sigur Januar í greining

(Mynd: Januar)

SkrivaÐ:

Tíðindaskriv

Størru fyritøkurnar í Føroyum høvdu stóran vøkstur í nettosølu og íløgum í 2022. Samtíðis er rakstraravkastið støðugt, eins og nettoskuldin eisini stendur í stað.

Samanumtikið var 2022 eitt serstakliga gott ár hjá størru føroysku fyritøkunum.

Vøksturin í nettosølu er á 28,3 prosent, og vøksturin er serliga frá hægru oljuprísunum, ið hava verið hetta seinasta árið. Hóast oljufeløgini standa fyri størra partinum av vøkstrinum, so er nettosølan vaksin hjá øllum feløgunum við undantikið av einum.

Greiningin vísir eisini, at feløgini hava verið før fyri at halda rakstraravkastið á sama støði sum undanfarna ár. Men tó skal havast við, at um hugt verður eftir fimm teimum seinastu árunum, so er rákið negativt.

Feløgini hava framt íløgur fyri 1,9 milliardir krónur hetta seinasta árið, og er hetta væl tað hægsta, íløgurnar hava verið hesi seinastu fimm árini. Samtíðis, sum íløgurnar eru øktar, so stendur rentuberandi skuldin ístað, og hava feløgini sostatt fíggjað íløgurnar við positivum gjaldføri, heldur enn uttanhýsis skuld.

Um greiningina
Pf. Januar hevur gjørt greiningar av teimum stóru feløgunum í Føroyum síðani 2017.

Øll feløg, ið sambært Skráseting Føroya, lata roknskap inn sum C-stór feløg ella størri, eru tikin við í greiningina. Tó eru íløgufeløg vald frá, eins og peningastovnar og tryggingarfeløg, tí teirra roknskaparuppsetingar kunnu ikki beinleiðis sammetast við vanligu virkisroknskapirnar, sum eru settir upp samsvarandi ársroknskaparlógini.

Eisini er mett, at Pf. Bakkafrost er ein so mikið stór fyritøka í mun til onnur føroysk feløg, at sjálvt smáar broytingar í rakstrarligu gongdini hjá Bakkafrost kunnu órógva samanberingar. Tískil er Pf. Bakkafrost heldur ikki við í greiningini.

Greiningin er á heimasíðuni hjá Pf. JANUAR. Greiningin sæst her.

Greinin varð fyrstu ferð løgd út 21. september 2023

Hjartanemandi brúdleyp í Boysensgarði

Tað er ein long leið úr suðurkinesiska havinum til Føroya. Chloe varð einans tvey ára gomul í 1987 bjargað av føroyska skiparanum Páll Jensen, sála. Í vikuni varð hon vígd sínum amerikanska manni, Mitchell, í Boysensgarði í Havn - av vinmanni Pálls, Heðini Mortensen

(Mynd: Tórshavnar kommuna)

SkrivaÐ:

Sverri Egholm

Tað er ein long leið úr suðurkinesiska havinum til Føroya. Chloe varð einans tvey ára gomul í 1987 bjargað av føroyska skiparanum Páll Jensen, sála. Í dag varð hon vígd sínum amerikanska manni Mitchell í Boysensgarði í Havn - av vinmanni Pálls, Heðini Mortensen.

Sheena Ngoc Nguyen, kallað Chloe, var ein av teimum 212 bátsflóttafólkunum, sum føroyski skiparin, Páll Jensen, bjargaði í suðurkinesiska havinum á veg millum Vietnam og Bangkok á jomfrúferð við fraktskipinum Alice Riis í 1987, tá Chloe bara var tvey ára gomul.

- Føroyar hava eitt serligt pláss í mínum hjarta, tí hiðani kom maðurin, sum kom at broyta mítt lív fyri allar tíðir. Eg var bara tvey ára gomul tá, eg vaks upp sum vietnamesiskt flóttarfólk í USA, og visti ikki um hendingina, fyrrenn eg varð vaksin.

- Mamma mín var so traumatiserað av hesum, og fekk ikki seg sjálva til at greiða mær frá um hendingina, fyrrenn eg var vaksin. Heldur ikki høvdu vit nakran sum helst kunnleika um skiparan, Páll Jensen.

- Men lagnan vildi tað øðrvísi og legði eina trongd í meg at finna henda mannin, so eg fekk greitt honum frá, hvussu takksom eg var fyri, at hann hevði bjargað mær úr neyðini.

- Eg legði út á eina ferð at finna hann fyri 7 árum síðan. Og við nógvari hjálp og hepni og vegleiðing frá almennum stovnum og maritimum søgufrøðingum, hepnaðist mær at finna rætta samanhangin, sigur Chloe, sum eisini vitjaði í Svendborg, har Alice Riis var skrásett, tíverri vóru 4 av 6 av donsku manningini á Alice Riis deyðir tá.

- Eg fekk so samband við dóttir Páll Jensen, Rannfrí Vang. Frá tí løtu broyttist mítt lív fyri altíð. Hon og hennara tóku ímóti mær við opnum ørmum og gjørdust mín føroyska familja, sigur Chloe, sum kallar Rannfrí “systir”.

- Nú Mitchell og eg fyrireikaðu at giftast, tóku vit avgerð um at verða vígd í Havn. Hetta var ikki bara tí, at vit vildu giftast í einum vøkrum umhvørvi, tað er meira tað at bera mannin inn í føvningin á míni nýfunnu familju, so vit saman eisini kunnu hátíðarhalda tað samband og tann kærleika, sum hevur broytt lív mítt fyri allar tíðir.

- Vit eru æviga takksom fyri eitt ítøkiligt minni um okkara hjúnalagslyfti á hesum heilt serliga staði, sum týðir so ómetaliga nógv fyri okkum, segði Chloe millum annað í einum brævi til borgarstjóran í Havn, Heðin Mortensen, sum vígdi tey bæði í Boysensgarði í morgun.

(Mynd: Tórshavnar kommuna)

Tað, Chloe ikki visti frammanundan var, at Páll Jensen og Heðin Mortensen vóru barna- og ungdómsvinir. Teir búðu báðir við Glaðsheyggj, gingu í sama flokki og vórðu fermdir saman. Og teir “hingu út saman sum ungir”, sum dóttir Páll, Rannfrí, tók til.

Tað hepnaðist ikki Chloe at hitta Páll Jensen. Páll doyði longu í 2013. Men hon setti sær kortini fyri at hitta familjuna og vitjaði í tí sambandi í 2017, tá hon eisini vitjaði á grøvini hjá Pálli. Men hetta gjørdist ikki endin á søguni, tí í dag stóð hon brúður í Boysensgarði og varð vígd sínum Mitchell – av vinmanni Pálls, Heðini Mortensen, borgarstjóra.

- This is the stuff dreams - and movies - are made of, segði ein táravættur útlendskur áskoðari á bókahandilshorninum, tá fólk fóru úraftur Boysensgarði.

Greinin varð fyrstu ferð løgd út 19. september 2023

Søguligt: Nýggj hús reist á Syðradali

Norðsetur reisti í vikuni húsini hjá Andriasi Eliasen. Søguligur dagur, tí ikki síðan beint eftir seinna heimsbardaga eru spildurnýggj hús reist í bygdini

(Mynd: Bjørn Kalsø)

SkrivaÐ:

Sverri Egholm

Ein broytt bygdarmynd sást nú í vikuni á Syðradali á Kalsoynni. Eini hús eru reist, og tað er ikki hent síðan beint eftir seinna heimsbardaga.

Tað skrivar Bjørn Kalsø á sínum Facebookvanga.

(Mynd: Bjørn Kalsø)

- Syðradalur er góð 200 ára gomul bygd. Men spildurnýggj hús hava ikki verið reist í bygdini síðan beint eftir seinna heimsbardaga, skrivar Bjørn Kalsø.

Søguligur dagur má sigast, og hetta eru eisini fyrstu sethúsini heimanfyri Gjónna.

Tað er Andrias Eliasen sum letur nýggju húsini byggja, og Norðsetur byggir.

Húsini standa millum Gjónna og Huldutúgvu (Mynd: Bjørn Kalsø)

Greinin varð fyrstu ferð løgd út 21. september 2023

Hoyvík verður valstaður framyvir

Og tey í Hesti skulu nú atkvøða við valstaðið í Tórshavn. Hetta framgongur í kunngerð frá Løgmálaráðnum

Høllin á Hálsi verður framvegis nógv tað størsta valstaðið í Føroyum, men nakað av "trýstinum" fer nú av (Mynd: Sverri Egholm)

SkrivaÐ:

Agnar Prestá

Tað hevur ofta verið uppi at venda: Hví hevur Hoyvík ikki sín egna valstað? Talan er um eitt øki við stórum fólkavøkstri, og til val eru ofta langar bíðirøðir í og við Høllina á Hálsi.

Fyri einari tíð síðani varð samtykt í býráðnum í landsins størstu kommunu, at áheitan skuldi sendast um at skipa Hoyvík sum egnan valstað. Í dag er greitt, at Løgmálaráðið hevur gingið hesum á møti.

Í undirskrivaðum skjali dagfest 15. september váttar Bjarni Kárason Petersen, landsstýrismaður, at Hoyvík verður valstaður, og at hendan kunngerðin kemur í gildi beinanvegin.

At Hoyvíkin hevur tørv á egnum valstaði er valla nakar ivi um 

Samstundi verður boðað frá, at Tórshavn verður valstaður fyri Hest og Koltur. Hetta var eisini eitt ynski frá kommununi, tí valstaðurin í Hesti er so lítil, at ymiskir fólkaræðisligir trupulleikar stóust av tí.

Tórshavnar býráð bundið seg til at fara út í Hest tvær ferðir undan vali. Harvið ber til at greiða brævatkvøðu heldur enn at fara til Havnar.

Talan verður um eina kollveltandi broyting í høvuðsstaðnum, tá val verður næstu ferð. Tað er ikki endaliga greitt enn, júst hvar í Hoyvík valstaðurin verður.

Greinin varð fyrstu ferð løgd út 21. september 2023

Byrja skjótt marknagilsmegin eisini

Tað gongur væl at gera Húsareynstunnilin. 750 metrar eru boraðir, og væntandi skuldi fyrsta skot latast av marknagilsmegin í hesari vikuni

(Mynd: Articon)

SkrivaÐ:

Sverri Egholm

Arbeiðið upp á Húsareynstunnilin gongur væl. Í mai varð farið at skjóta villingardalsmegin. Komið er 750 metrar við at bora inn í tunnilin. Tunnilin er tilsaman 1.700 metrar. 

Articon sum ger arbeiðið upplýsir, at avgrevsturin oman fyri Marknagil byrjaði í august. Grivið er fyri íbindingarvegnum niðan á Oyggjarvegin og fyri tunnilsmunnanum sjálvum.

Borurin er eisini settur í til fyrsta skot, sum ætlandi verður latið av í hesi vikuni.

Vignast væl, verður liðugt at spreingja tunnilin um mánaðarskiftið januar-februar.

Greinin varð fyrstu ferð løgd út 20. september 2023

Fáa eyka talutíð at umseta til danskt á Fólkatingi

Tað verður ongin tulkingarskipan innførd á danatingi, men grønlendingar og føroyingar fáa eykatíð á talarastólinum til sjálvi at umseta til danskt

Sjúrður Skaale og Anna Falkenberg hava boðað frá, at tey ikki hava ætlanir um at tosa annað enn danskt á fólkatingi (Savnsmynd: Jens Kr. Vang)

SkrivaÐ:

Ingi Samuelsen

Nú verður tað møguligt at tosa føroyskt og grønlendskt frá talarastólinum á fólkatingi. Tað hevur ein meiriluti í formansskapinum á fólkatingi boðað frá í tíðindaskrivi í dag.

Men treytin er, at tingfólkini sjálvi umseta tað, tey hava sagt á føroyskum ella grønlendskum, til danskt, og tey fáa tí eyka talutíð til tað.

Formansskapurin á fólkatingi hevur fyrr boðað frá, at ein tulkingarskipan er á veg. Tað hendi eftir at grønlendska tingkvinnan Aki-Matilda Høegh-Dam úr Siumut fyrr í ár valdi at svara á grønlendskum upp á spurningar úr salinum.

Nú er formansskapurin so komin ásamt um at loysa avbjóðingina við eini loysn, ið ikki umfatar simultantulking, eins og gjørt verður í grønlendska landstinginum, Inatsisartut.

Ein meiriluti av forfólkunum mæla eisini til, at árligar frágreiðingar, sum fevna um grønlendsk og føroysk viðurskifti, framyvir verða týddar.

Hetta er galdandi fyri setanarorðaskifti og árligu frágreiðingarnar um ríkisfelagsskapin og Arktis, upplýsir formansskapurin.

Meirilutin hevur eisini avgjørt, at fólkatingslimir, ið eru valdir í Grønlandi og Føroyum fáa møguleika at seta teirra egna tulk, sum kann vera við til at miðla fólkatingsarbeiðið til almenningin í Grønlandi og Føroyum, verður sagt í tíðindaskrivinum.

Tað er serliga Siumut, sum hevur sett ynski um at fáa simultantulking á Fólkatingi. Føroysku fólkatingslimirnir, Sjúrður Skaale og Anna Falkenberg, hava sambært Danmarks Radio, ongi ynskir um at tosa annað enn danskt á fólkatingi.

Fyri Markus E. Olsen, sum í løtuni røkir fólkatingssessin hjá Siumut, kemur uppskotið frá formansskapinum illa við.

Hann ynskir at kunna tosa á sínum móðurmáli, tá setanarorðaskiftið á fólkatingi verður í næstum, tí so fær hann orðað seg uttan trupulleikar. Hann skilir ikki, at fólkatingið ikki kann hava tina tulkaskipan, tá grønlendska tingið kann, skrivar Danmarks Radio.

Formansskapurin á fólkatingi hevur eisini gjørt av, at tað skulu haldast skeið fyri fólkatingslimir og starvsfólk um søguna, mentinana, politisku støðuna og málið í Grønlandi og Føroyum.

Tað skal styrkja fatanini av teimum viðurskiftum, sum eru galdandi í norðraru londunum í ríkisfelagsskapinum. Eisini er ætlanin at partar av heimasíðuni hjá fólkatingi skal umsetast.

Hvørki grundlóg ella tingskipanin hjá fólkatinginum forðar tinglimum at orða seg á grønlendskum ella føroyskum á fólkatingi, skrivar Danmarks Radio.

Tað er fyrr mett, at tað kostar fólkatinginum 200 milliónir krónur um árið at hava eina tulkingarskipan á sama støði sum í Inatsisartut. 

Greinin varð fyrstu ferð løgd út 21. september 2023

Kvinna dømd seks ára fongsulsrevsing fyri at smugla kokain

Størsta einstaka nøgdin av kokaini, sum er smuglað til Føroya seinastu árini

Mynd av kokaininum, sum kvinnan smuglaði innvortis

SkrivaÐ:

Tíðindaskriv

49 ára gamla kvinnan, sum er úr Dominikanska Lýðveldinum, var tikin av tollvaldinum, tá hon kom til Føroya í juni mánaði. Kanningar vístu, at hon smuglaði rúsevni innvortis, og kvinnan bleiv tí varðhaldsfongslað. Tað vísti seg, at talan var um 63 pakkar av kokaini. Hvør pakki vigaði 9,9 gram, íalt 623,7 gram av kokaini. Hetta er tann størsta einstaka nøgdin av kokaini, sum er smuglað til Føroya tey seinastu árini. 

Í sambandi við kanningararbeiðið hjá politinum kom fram, at kvinnan áður hevði verið í Føroyum ávegis til Íslands. Kanningararbeiðið vísti, at kvinnan í tí førinum hevði smuglað umleið 880 gram av kokaini til Íslands. Kvinnan var tí eisini ákærd í Føroya Rætti fyri at hava smuglað umleið 880 gram av kokaini til Íslands umvegis Føroyar. 

Kokain verður vanliga flokkað sum eitt serliga vandamikið rúsevni. Prísurin á gøtuni í Føroyum er áleið 1.800-2.000 krónur pr. gram. Gongdin í løtuni er tann, at Føroya Politi hevur alsamt fleiri mál, sum snúgva seg um serliga vandamikil rúsevni, serliga kokain. Fleiri av teimum, sum smugla rúsevni til Føroya, eru útlendingar, sum annars ikki hava tilknýti til Føroya.

Av tí, at talan var um oman fyri 1.400 gram av einum serliga vandamiklum rúsevni, legði ákæruvaldið upp til, at kvinnan skuldi revsast við sjey ára fongsulsrevsing, og at kvinnan harumframt skuldi útvísast úr Føroyum fyri alla tíð. 

Ein samdur dómsmansrættur dømdi kvinnuna fyri at havt 1.200 gram av kokaini um hendi, og setti revsingina at vera seks ára treytaleysa fongsulsrevsing. Kvinna bleiv samstundis útvíst fyri alla tíð. Rætturin konfiskseraði kokainið og telefonina hjá kvinnuni. 

Verjin kærdi málið, men góðtók, at kvinnan skal verða varðhaldsfongslað til málið verður viðgjørt í Landsrættinum. 

Ákæruvaldið fer nú at taka støðu til, um ákæruvaldið eisini skal kæra málið við pástandi um, at revsingin skal herðast. 

Greinin varð fyrstu ferð løgd út 22. september 2023

Kanna mál um blúnisbrot í svimjihøllini

Løgreglan kannar mál um blúnisbrot í mannfólkaskiftirúminum í Svimjihøllini í Gundadali. Avhoyringar skulu gerast fyri at lýsa málið nærri

(Savnsmynd)

SkrivaÐ:

Sverri Egholm

Løgreglan fekk um døgurðatíð hósdagin fráboðan um blúnisbrot í Svimjihøllini í Gundadali í Havn.

Vaktleiðarin á løgreglustøðini í Havn fekk ikki sagt so nógv um málið, men talan er um hending sum skal vera farið fram í skiftirúminum hjá monnum.

- Har ganga fólk nakin frammanundan, so nú royna vit at finna útav hvussu tað er farið fram, at onkur hevur kent seg stoyttan, segði vaktleiðarin á løgreglustøðini fríggjamorgunin.

Avhoyringar skuldu gerast í málinum.

Greinin varð fyrstu ferð løgd út 22. september 2023

Royndu at snýta pengar frá fólki

‘Phishing’ er tá svikarar hótta við eitt nú at almanakunngera myndir fyri at fáa fatur á pengum

(Tilvildarlig mynd. visualhunt.com)

SkrivaÐ:

Ingi Samuelsen

Í vikuni fekk løgreglan fráboðan frá einum borgara um, at onkur royndi at trýsta pengar frá viðkomandi.

Talan var um eina kvinnu, sum í telduposti hevði fingið boð í teldubrævi um at rinda 800 dollarar í bitcoins. Í teldubrævinum var upplýst, at tey høvdu fingið atgongd til telduna og telefonina hjá viðkomandi. Og at um pengarnir ikki vórðu fluttir, so fóru tey at almannakunngera myndir, sum tey høvdu funnið fram til.

Kvinnan lat seg ikki ræða av boðunum. Var sannførd um, at ongar avdúkandi myndir av henni vóru at finna á hvørki teldu ella telefon, og hon valdi tí at boða løgregluni frá.

Vaktleiðarin á løgreglustøðini sigur, at her er talan um tað, ið kallast ‘phishing’. Talan er um svikarar, sum royna at lumpa fólk at rinda pening. Onki bendir á, at tey yvirhøvur hava fingið atgongd til myndir í teldu ella telefon.

Ráðini frá løgregluni til tey, ið hava fingið slík boð, er at lata vera við at ganga boðunum á møti. Slettið teldupostin og skiftið loyniorð út fyri at tryggja tykkum, at sníkar ikki fáa atgongd til tólini.

Greinin varð fyrstu ferð løgd út 21. september 2023

Magnus á Stongum fekk ársins herðaklapp

Heiðurin varð latin í sambandi við setanina av mentanardøgum í Sunda kommunu

(Mynd: Sunda kommuna)

SkrivaÐ:

Alda Nielsdóttir

Á hvørjum ári heiðrar Sunda kommuna persóni ella felagsskapi, sum hevur gjørt ólønt ella sjálvboðið arbeiði, sum er til gangs fyri borgararnar í kommununi. Undanfarna hóskvøld varð ársins herðaklapp avdúkað í sambandi við setan av mentanardøgunum, sum hava verið í kommununi í vikuni.

Til setanina varð avdúkað, at Magnus á Stongum fekk heiðurin ”Ársins herðaklapp 2023”.

– Heiðurin fekk hann fyri sítt áhaldandi arbeiði at sameina EB og Streym til EB/Streym, og fyri at vera ein sera virkin og savnandi persónur innan ítróttarliga og tónleikarliga umhvørvið í mong ár, skrivar Sunda kommuna.

Greinin varð fyrstu ferð løgd út 16. september 2023

Heini í Skorini fekk miðlaheiðurslønina

Hann hevur sett føroyska gransking á breddan, eisini uttanlands

Heini í Skorini og Jón Brian Hvidtfeldt

SkrivaÐ:

Sverri Egholm

Heini í Skorini, lektari á Fróðskaparsetrinum, hevur vunnið ársins miðlaheiðursløn frá Granskingarráðnum.

Heiðurslønin varð handað honum á Vísindavøkuni í Sjóvinnuhúsinum fríggjadagin.

- Við gávumildum og kompetentum samskiftishugi hevur Heini sett føroyska gransking á breddan, eisini uttanlands, var ein av mongu grundgevingunum, sum Jón Brian Hvidtfeldt, formaður í dómsnevndini, bar fram.

Greinin varð fyrstu ferð løgd út 22. september 2023

Heimsins mest siteraða grein á sínum øki

Greinin er tjúgu-ára gomul og verður nú umrødd í poddi hjá Københavns Universitet um stórar vísindaligar greinar

- Hetta var ein pioner-grein tá. Av tí at vit vóru teir fyrstu, sum lýstu kropsliga partin av fótbóltsspælinum so neyvt eftir tátíðar standardi, og at vit komu við fleiri heilt nýggjum hugtøkum, so fekk greinin sera stóran ans bæði í vísindaliga umhvørvinum og í úrvalsítróttarheiminum,sigur Magni Mohr (Mynd: Sverri Egholm)

SkrivaÐ:

Agnar Prestá

Københavns Universitet er í gongd við eina poddvarpsrøð um tær mest siteraðu vísindaligu greinarnar, sum eru framleiddar har. Nú er ein poddur gjørdur um eina hjá Magna Mohr, professara á Setrinum, sum eigur heimsins mest siteraðu grein á sínum øki.

Hetta skrivar setur.fo. Magni Mohr er professari í heilsuvísindum á Fróðskaparsetri Føroya. Vágbingurin hevur seinastu 20-25 árini verið roknaður sum ein av fremstu granskarum í kropsliga partinum av liðítrótt og arbeitt hjá stórum fótbóltsfeløgum.  Nú eigur hann eitt heimsmet.

- Vísindaligu greinina, “Match performance of high-standard soccer players with special reference to development of fatigue”, skrivaði Magni Mohr saman við dønunum Peter Krustrup og Jens Bangsbo í 2003, og hon varð almannakunngjørd í vísindaliga tíðarritinum, Journal of Sport Science. Greinin er í dag - 20 ár seinni - heimsins mest siteraða vísindaliga grein um fótbóltsgransking. Síðani eru fleiri enn 20.000 aðrar greinar skrivaðar á sama granskingarøki, so hetta er metið av sonnum nakað serligt.

Magni Mohr hevur arbeitt fyri onnur fótbóltssambond. Seinastu árini hevur hann verið knýttur at FSF og A-landsliðnum hjá monnum sum fysisikur venjari (Mynd: Sverri Egholm)

Sambært Google Scholar hevur greinin nú umleið 3.200 "sitatiónir", sum ivaleyst eisini ger hana til mest endurgivnu grein, sum ein føroyskur granskari hevur skrivað.

Greinin, sum snýr seg um kropsliga møði í úrvalsfótbóltsdystum, var tann fyrsta, sum lýsti ymisk sløg av møði í liðítróttum. Og søgan um greinina og metið hjá Magna Mohr er eisini ein søga um at vera rætta staðið til røttu tíð.

- Hetta var ein pioner-grein tá.  Og av tí, at vit vóru teir fyrstu, sum lýstu kropsliga partin av fótbóltsspælinum so neyvt eftir tátíðar standardi, og at vit komu við fleiri heilt nýggjum hugtøkum, so fekk greinin sera stóran ans bæði í vísindaliga umhvørvinum og í úrvalsítróttaheiminum, sigur Magni Mohr við setur.fo.

Granskingin varð gjørd, meðan Magni Mohr arbeiddi á Københavns Universitet og um sama mundið varð knýttur at italska stórfelagnum, Juventus.

- Hetta var ein ómetaliga spennandi tíð, har vit høvdu annan fótin í rannsóknarstovuni og hin í toppfótbólti, og júst henda vísindaliga greinin gjørdist orsøk til eina rúgvu av uppfylgjandi kanningum og kanningum, sum vit enn gera, sigur professarin.

Í løtuni ger Københavns Universitet eina poddrøð um útvald sonevnd "high-performance papers". Talan er um vísindaligar greinar, sum hava fingið fleiri enn 1.000 citatiónir.

Magni Mohr eigur heilar seks slíkar greinar, og hevur tilsamans ognað sær umleið 25.000 citatiónir í altjóða vísindaligu bókmentunum higartil. Í løtuni er Magni Mohr eisini fysisikur venjari hjá føroyska manslandliðnum í fótbólti.

Poddurin við Magna Mohr sæst og hoyrist her

Umrødda greinin frá 2003 kann lesast her

Greinin varð fyrstu ferð løgd út 21. september 2023

Staksdagur í Tjørnuvík við seyði og sølu

Eisini verður tombola og dansur á skránni í bygdarhúsinum í dag. Staksdagurin er sermerktur fyri bygdina, tá heystið av álvara byrjar

Staksdagurin í Tjørnuvík hevur altíð verið ein partur av mentanardøgunum hjá Sunda kommunu og er sermerktur fyri bygdina

SkrivaÐ:

Agnar Prestá

Staksdagurin í Tjørnuvík hevur altíð verið ein partur av mentanardøgunum hjá Sunda kommunu, og soleiðis er eisini í ár.

Í dag, 23. september, verður farið út á Stakkin eftir seyði, og síðani eru ymisk tiltøk á skránni í Tjørnuvík. Hetta er ein sermerktur dagur í bygdini, og samstundis er hetta byrjanin uppá heystfjøllini í Tjørnuvík, greiðir Staksnenvdin frá.

Í ár eru 14 seyðir at taka. Tveir veðrar, seks ær og seks lomb.

Tá komið er aftur til bygdina bjóðar Stakksnevndin døgurða til fjallfólkið. Síðani verða fýra seyðir flettir og  sundurlimaðir. Hesir verða seldir í stykkjum á uppboðssøluni, sum byrjar klokkan 17.

- Um ein ætlar at keypa sær ein livandi seyð, er eisini møguleiki at fáa seyðin flettan, har eru fleiri menn, sum standa klárir at fletta eftir uppboðssøluna.
Bygdarhúsið skipar eisini fyri ymiskum, eitt nú verður tombola aftan á uppboðssøluna.

Dagurin endar við almennum dansi í bygdarhúsinum. 

Greinin varð fyrstu ferð løgd út 20. september 2023

Innflutningurin heldur fram at minka

Hetta vísa nýggjastu tølini hjá Hagstovuni. Innflutt varð fyri slakar 7 milliardir fyrstu sjey mánaðirnar í ár - hetta eru sløk tvey prosent minni enn sama tíðarskeið 2022

Um hugt verður eftir 12 mánaða tíðarskeiðum, er innflutningurin minkaður góðar 800 milliónir krónur síðani februar, tá innflutningsvirðið var í hæddini. Slíka lækking hava vit ikki sæð síðani 2009

SkrivaÐ:

Tíðindaskriv

Innflutningurin fyri fyrstu sjey mánaðirnar av 2023 er gjørdur upp, og innflutt varð fyri 6,9 milliardir krónur. Hetta er sløk tvey prosent minni enn sama tíðarskeið 2022.

Um hugt verður eftir 12 mánaðar tíðarskeiðum, er innflutningurin minkaður góðar 800 milliónir krónur síðani februar, tá innflutningsvirðið var í hæddini. Slíka lækking hava vit ikki sæð síðani 2009. 

Oljuprísurin er lækkaður seinasta hálva árið, og hetta sæst eisini aftur í innflutninginum. Innflutningsvirðið av brennievni var 1.014,2 milliónir krónur fyrstu sjey mánaðirnar av 2023. Hetta eru 317,1 millión krónur, ella 23,8 prosent, lægri enn sama tíðarskeið í 2022.

Størsti vøksturin er í bólkinum "rávøra til fiskavirking" (fyri tað mesta feskur toskur og makrelur). Har er innflutt fyri 187,4 milliónir krónur meira, sum er 45 prosent vøkstur.

Tað er eisini stórur vøkstur í innflutninginum av tilfari til hav- og landbúnaðin (fyri tað mesta alifóður). Innflutningsvirðið er vaksið 110,3 milliónir krónur, ella 26,8 prosent.

Greinin varð fyrstu ferð løgd út 19. september 2023

Heimleys leita sær skjól um náttina

Tað eru fleiri fólk, sum ganga runt í Havnargøtum uttan nakað stað at vera, verður staðfest á løgreglustøðini

 

SkrivaÐ:

Ingi Samuelsen

Tað eru rættiliga nógv fólk, sum ganga runt í Havnargøtum uttan nakra staðni at vera, og sum tí leita sær skjól um náttina fyri at leggja seg at sova.

Hetta staðfesti vaktleiðarin á løgreglustøðini í sambandi við ein tilburð, sum varð fráboðaður í vikuni.

Tað var beint eftir klokkan 3, at ein borgari við bústaði nærhendis miðbýnum í Havn hoyrdi onkran gang beint uttan fyri húsini hjá sær.

Hann fór upp at hyggja, og út gjøgnum gluggan sá hann ein mann, sum stóð og skavaðist við hjallin uttanfyri. Maðurin uttan fyri var ókendur, men hann segði seg vilja finna eitt stað at sova. Viðkomandi fekk boð um at sleppa sær burtur, og tað hendi.

Ongin skaði var á hjallinum og onki varð stolið. Kortini valdi borgarin at boða løgregluni frá hendingini. Ein patrúlja varð send út á staðið, men tey sóu onki illgrunasamt.

- Vit hava upplivað fleiri smáinnbrot í Havn í seinastuni, og hava ein illgruna um, at tað kunnu vera heimleys fólk, sum royna at finna sær eitt stað at sova. Tað ganga fleiri slík heimleys í Havn í løtuni, staðfestir vaktleiðarin hjá løgregluni.

Greinin varð fyrstu ferð løgd út 19. september 2023

Dagstovnurin Hans Andrias Djurhuus handaður

Arbeiðið hevur gingið heilt ómetaliga væl, og byggitíðin man vera nýtt met, segði Heðin Mortensen, borgarstjóri

(Mynd: Tórshavnar kommuna)

SkrivaÐ:

Alda Nielsdóttir

Seinasta fríggjadag var samkoma í sambandi við, at Dagstovnurin Hans Andrias Djurhuus varð handaður Tórshavnar kommunu.

Arbeiðið hevur gingið heilt ómetaliga væl, og byggitíðin man vera nýtt met, hóast mong ikki trúðu tað lat seg gera, segði Heðin Mortensen, borgarstjóri í Tórshavnar kommunu.

– Tað sum fá trúðu lat seg gera, er nú avgreitt uppá seks mánaðir, sum má vera met í at byggja ein tílíkan bygning, segði hann.

Dagstovnin lá upprunaliga við Landavegin men broytti adressu til Hans Andriasargøtu 5, og fekk nýtt navn.

Tørvur var á eini útbygging og býráðið tók, av fleiri orsøkum, avgerð um at biða Articon taka sær av hesum arbeiðnum, skrivar Tórshavnar kommuna.

Tá reisigildi var í juni segði borgarstjórin, at talan var um eina sólskinssøgu. Arbeiðið hevði gingið sera væl og tíðarætlanin helt. Arbeiðið skuldi alt verða avhent kommununi tann 15. september, og tað helt.

- Avtala bleiv gjørd um fastan prís, tíðarætlan og innflytan. Alt hevur hildið, sáttmálin varð undirskrivaður 28. februar í ár og stovnurin leveraður í dag tann 15. september. Stovnurin er handaður kommununi uppá klokkuslettið uttan manglar og øll loyvi fyriliggja til rakstur, segði Heðin Mortensen.

(Mynd: Tórshavnar kommuna)

Greinin varð fyrstu ferð løgd út 16. september 2023

Gull til gullið hjá Føroya Bjór

Á World Beer Awards fekk Føroyar Bjór gull heiðursmerki

 

SkrivaÐ:

Sverri Egholm

Føroya Bjór hevur vunnið Gull heiðursmerki á World Beer Awards, ið er ein altjóða kapping og góðskumeting av øli.

Hetta skrivar bryggjaríið í fráboðan.

Fleiri enn 2.000 ymiskar øl luttóku frá 50 ymiskum londum. Møguleiki var at vinna gull, silvur, bronsu.

- Vit stremba hvønn dag eftir besta smakkinum, og at gera eitt gott góðskuarbeiði. Tískil er eitt Gull heiðursmerki, eitt stórt herðaklapp til starvsfólkið, sigur Føroya Bjór.

Greinin varð fyrstu ferð løgd út 22. september 2023

Ókeypis konsert við Enekk í Norðurlandahúsinum í dag

Hetta er í sambandi við, at útnorðurdagurin í ár er sama dag sum nýggi evropeiski fólkatónleikaradagurin

 

SkrivaÐ:

Tíðindaskriv

Í ár er útnorðurdagurin sama dag sum nýggi evropeiski fólkatónleikaradagurin. Í hesum sambandi bjóðar Norðurlandahúsið ókeypis konsert við fólkatónleikarabólkinum Enekk í dag, 23. september kl. 16.

Bólkurin Enekk varð stovnaður í 1991 og hevði lagið "Eru vit til?" við á útgávuni "Amnesty Tónar" sama árið. Frá 1993 til 2004 gav Enekk fýra fløgur út. Hóast aðrar útgávur ikki eru komnar frá bólkinum, hevur hann verið at hoyrt á konsertum í Føroyum og uttanlands við jøvnum millumbilum síðani tá.

Nógvir tónleikarar hava verið partur av bólkinum í longri og styttri tíðarskeið, m.a. bulgarskir fólka- og jazztónleikarar, men bulurin í bólkinum hevur verið Kári Sverrisson, sang og gittar, Agnar Lamhauge, bass, og Óli á Grindafløtti, klaver, synth og harmoniku. Tað eru eisini teir, ið fara at framføra á konsertini í Norðurlandahúsinum í dag.

Umframt tónleik úr Enekk-útgávum eru nýggjari sangir hjá Kára á skránni, m.a. við yrkingum eftir íslendska skaldið Einar Már Guðmundsson.

Um Útnorðurdagin
Føroyar, Grønland og Ísland samdust í 2017 um at halda ein felags "Útnorðurdag" á hvørjum ári í øllum trimum londunum. Avgerð varð tikin um, at hesin dagur skuldi vera samstundis, sum vit vanliga hava heystjavndøgur. Fyri at menna samstarvið og felags stevið landanna millum, skulu øll trý londini markera søguna og mentanina í útnorði.

Evropeiski Fólkatónleikaradagurin (European Folk Day)
Hetta er fyrstu ferð, at evropeisku londini savnast um Evropeiska Fólkatónleikaradagin.

Endamálið við degnum er at leggja vísa á týdningin, sum siðbundin list sum tónleikur, dansur og tað, at siga søgur, hevur.

Í hesum sambandi skipar Fólkatónleikarafelagið saman við TUTL fyri einari framsýning við føroyskum fólkatónleikaútgávum.

Framsýningin er at síggja í Tutl-handlinum, 18. til 25. september. mánadag til fríggjadag kl. 10-17.30 og leygardag kl. 12-16.

Greinin varð fyrstu ferð løgd út 18. september 2023

Føroya Symfoniorkestur hevur heystkonsert um vikuskiftið

Framført verður í Norðurlandahúsinum í kvøld klokkan 19.30 og sunnudagin klokkan 16 í Fuglafirði. Útseting av Norsku Løvu hjá Williami Heinesen verður framførd

Frá Nýggjárskonsert hjá Føroya Symfoniorkestrið. Nú skal orkestrið framføra heystkonsertina tvær ferðir (Mynd: Sverri Egholm)

SkrivaÐ:

Agnar Prestá

Hetta vikuskiftið er stóra heystkonsertin hjá Føroya Symfoniorkestrið á skránni. Sama konsertin er á skránni bæði í kvøld og sunnudagin - í Norðurlandahúsinum fyrst og síðani í Mentanarhúsinum í Fuglafirði. Tað verður fyrstu ferð, at Symfoniorkestrið vitjar í Fuglafirði.

Til heystkonsertina 2023 verður ein útseting av "Norsku Løvu" hjá Williami Heinesen framførd. Tað er Bjarni Restorff, ið hevur útsett.

Í 2021 gav Bjarni Restorff út bók við partituri og nótum til verkið Norsku Løvu. Bjarni skrivaði hesa útseting í 2007-2008. Upprunaliga skrivaði William verkið til klaver, men Bjarni hevur altíð hildið, at verkið hevði verið betur egnað sum orkesturverk.

Bjarni Restorff (Savnsmynd: Ólavur Frederiksen)

Bjarni Restorff er føddur í 1955, og hevur í mong ár starvast sum tónleikalærari á Tórshavnar Musikkskúla . Eisini hevur hann staðið á odda fyri Tórshavnar Manskóri í mong ár. Hann hevur m.a. skrivað tónleik til blandað kór og manskór.

Niklas Kallsoy Mouritsen verður solistur, og hann framførir hornkonsert nr. 3 hjá Mozart. Tað verður í Eb-dur.

Mozart var ein av størstu komponistum innan klassikan tónleik. Hóast eysturríkarin fór av fold bert 35 ára gamal, megnaði hann at avrika eitt stórbart lívsverk innan tónleikin. Hornkonsertirnar hjá Mozart verða spældar um allan heim. Hann skrivaði tær til sín góða vin, Joseph Leutgeb. Hesar konsertir vóru skrivaðar soleiðis, at solisturin veruliga kundi sláa seg leysan og vísa hvussu dugnaligur hann var.

Niklas er 35-ára gamal og fekk bachelor- og masterútbúgving á lærda tónlistaháskúlanum í Keypmannahavn. Eftir loknan lestur fór hann til Schweiz og kom inn á orkesturakademiið hjá Orchestre de la Suisse Romande í Genève. Niklas hevur starvast sum fríyrkistónleikari í Danmark og Svøríki, men í 2021 gjørdist hann limur í Danmarks Underholdningsorkestur, har hann starvast í dag. Niklas er eisini limur í blásikvintettini V Coloris. Kvintettin hevur vunnið virðislønir í altjóða tónleikakappingum, m.a. triðju heiðursløn í Carl Nielsen International Chamber Music Competition 2019 og aðru heiðursløn í Bucharest International Music Competition 2019.

Symfoni 104 – Frantz Joseph Haydn (1732-1809)
Føroya Symfoniorkestur fer eisini at framføra symfoni nr. 104 hjá Haydn, ið upprunaliga varð frumframførd í London 13. apríl 1795.

Eysturríkarin Frantz Joseph Haydn skapti sonatuformin og ta klassisku symfoniina í fýra satsum, sum vit kenna hana í dag. Hann arbeiddi ein stóran part av sínum lívi hjá ríku Eszterházy familjuni, og var avskorin frá øðrum tónleikaumhvørvi og øðrum komponistum ta tíðina. Hann segði sjálvur, at av hesi orsøk varð hann tvungin til at verða originalur og bróta upp úr nýggjum. Haydn legði eisini lunnar undir wienerklassismuna og er hann, saman við Mozart og Beethoven, av týdningarmiklastu persónum handan wienerklassiska tónleikin. Haydn skrivaði yvir 100 symfoniir.

Dirigentur verður Bernhardur Wilkinson.

Greinin varð fyrstu ferð løgd út 20. september 2023

Triðja leikverkið í ár hjá Det Ferösche Compagnie 

Ukreinskur flótti leikstjórnar føroyska leikhópinum í leikinum “Tá kríggið er liðugt”

 

SkrivaÐ:

Innsent

M.A. Jacobsens virðislønti leikbólkurin Det Ferösche Compagnie 

hevur veruliga gjørt vart við seg í ár. Stórverkið “Lear Kongur” elvdi til mikið kjak tí Alzheimer’s rakta sjónleikarakvinnan, Birita Mohr, spældi høvuðsleiklutin sum aldrandi kongurin.

Og leikurin “Lykkenborg” hevur fingið flog undir veingirnar. Undir heitinum “Castle of Joy” var hann sýndur á altjóða palllistafestivalin IETM í ár, og næsta ár verður hann sýndur í mentanardeplinum The Barbican í London. 

Nú eru limir í DFC farin í eitt samstarv við ukrainska leikstjóran, Serhii Ilin, ið er flýddur úr sínum egna heimlandi undan krígnum sum herjar har. 

22 februar 2022 hevði Serhii  frummframførslu í leikhúsi í heimbýnum Odessa av leiki, sum hann hevði leikstjórnað. Tveir dagar seinni gjørdi russiski herurin innrás í Ukraina.  Leikurin var umgangandi niðurlagdur tí leikhúsið skuldi nú brúkast til sjúkrahús. 

Serhii flýggjaði undan einum, í fylgi honum, skilaleysum kríggi, og 16. september kom hann sum flótti til Føroyar.   

Við leikinum "Tá kríggið er liðugt" ynskir hann, saman við Det Ferösche Compagnie, at geva føroyingum eina uppliving av hvat kríggj ger vid menniskju.

Leikurin snýr seg um, ein sovjetskan hermann og eina týska kvinnu, sum hittast á hermótinum í Berlin í síðstu døgunum í 2. verðaldarbardaga. 

Verkætlanin er eitt samstarv við Norðurlandahúsið, Reyða Kross Føroyar og Rød Kross Danmark.

Sýningarnar vera í Norðurlandahúsinum 21., 22. og 24. september. Atgongmerkini eru at fáa á heimasíðuni hjá Norðurlandahúsinum. Leikurin verður eisini at síggja í Løkshøll 25. og 26. novembur.

Greinin varð fyrstu ferð løgd út 19. september 2023

Jógvan Arge fer til Íslands við síni 9. krýniku

Umframt at siga frá fiskivinnu og útfóðri í Føroyum og Íslandi, so tekur 9. krýnikin í aftur húsagangin í 1992

 

SkrivaÐ:

Tíðindaskriv

“Tey fóru til Íslands”, er 9. bókin í røðini - Mín krýnika - eftir Jógvan Arge. Ein fjølbroytt bók, sum mest sigur frá fiskivinnu og útróðri í Føroyum og Íslandi, frá 1870unum og til okkara dagar.

Eisini tekur Jógvan Arge í aftur húsagangin í 1992, ið eisini varð viðgjørdur í Mín krýnika 8. Marita Petersen sigur frá upplivingini at taka við sum løgmaður í einum trotabúgvi, sum danska stjórnin umsat. Eilif Samuelsen, Jógvan I. Olsen og Óli Jacobsen greiða frá sínum royndum í svárastu kreppu, ið hevur rakt Føroyar.

Men høvuðsdenturin í nýggjastu bókini er samstarvið millum Føroyar og Ísland. Eitt samstarv, ið báðir partar hava fingið nógv burturúr, og lært nógv av. 

Føroyski fiskiskapurin í Íslandi tók seg upp, stutt eftir at einahandilin var niðurlagdur í 1856. Bókin lýsir tíðarskeiðið, við frásagnum frá bæði kvinnum og monnum. 

Umstøðurnar broyttust hjá føroyska fiskiskapinum, tá Ísland fekk fullveldi í 1944. Íslendski flotin varð endurnýggjaður, og fleiri føroyingar fóru at sigla við íslendskum skipum, tey vánaligu árini í Føroyum í 1950unum.

Nógv var lagt fyri, og bókin gevur innlit í ræðandi vandaferðir orsakað av illveðri, frosti og kavaroki. Teir flestu vunnu heim, men ikki allir. 

Við spennandi frásagnum gevur bókin innlit í livikor í einum tíðarskeiði, har lívsvandi ongantíð var meira enn eina armslongd burturi.

Bókin fast í bókasølunum kring landið og kostar 299 krónur. 

Greinin varð fyrstu ferð løgd út 18. september 2023

Roger Whittaker deyður

Kendi bretski tónleikarin Roger Whittaker er deyður, 87 ára gamal

(Mynd: EPA / 2006)

SkrivaÐ:

Sverri Egholm

Bretski tónleikarin Roger Whittaker er deyður, 87 ára gamal. Tað upplýsti familja hansara í einari fráboðan í vikuni.

Roger Whittaker varð kendur um allan heimin við sínum tónleiki og sínum evnum at bríksla.

Kendi tónleikarin varð føddur í 1936 í Nairobi, høvuðsstaðnum í Kenja. Hann spældi millum annað til gullbrúdleypið hjá fyrrverandi amerikanska forsetanum, George H.W Bush.

Roger Whittaker gavst við konsertferðum fyri tíggju árum síðani.

Greinin varð fyrstu ferð løgd út 18. september 2023

Ímyndin av Miklagarði farin

Johnny Priess doyði eftir stutta sjúkralegu, 58 ára gamal

 

SkrivaÐ:

Minningarorð / Miklagarður

Arbeiðssamur og blíður. Stillførur og hjálpsamur. Trúðfastur og álítandi.

Soleiðis kenna vit Johnny Priess, sum seinastu 34 árini hevur verið drívmegin í Miklagarði.

Hann var altíð í gongd. Hevur myndað og staðið á odda. Kortini var hann ongantíð ov stórur til at fylla vøru upp, tá tað var neyðugt. Hann hevur skipað og leitt arbeiðið. Samstundis var hann altíð klárur at hjálpa ivandi kundum. Hann hevur bygt upp og havt visjónir. Kortini var tað hvønn dag hann, sum stongdi handilin eftir dagsins gerning.

Fyrsti maður til arbeiðis og síðsti maður heim. Soleiðis var Johnny.

Tí kom tað óvart á tey flestu, tá ið Johnny so brádliga bleiv sjúkur. Og nú deyðsboðini bórust eftir stutta sjúkralegu, tykist tað mestsum óveruligt. 

Tað er við tungum huga, at vit í dag senda tykkum avvarðandi okkara djúpastu samkenslu og minnast okkara góða vin og starvsfelaga, Johnny Priess.

Saknur verður í tær, góði Johnny.

Greinin varð fyrstu ferð løgd út 20. september 2023

Onnu Larsen til minnis!

-

 

SkrivaÐ:

Minningarorð: ÍF / Petur Simonsen

Tað er gott at kenna seg takksaman og hepnan, eftir at hava kent eina menniskju í gjøgnum eitt langt lív.

Hetta var kenslan eg sat eftir við, nú boðini bórust um, at Anna Larsen var farin. – Ein kensla av takksemi og hepni hóast sorg og sakn!

Havi vita um Annu Larsen frá barni av. Men tað var ikki minst ígjøgnum okkara felags hjartabarn, ÍF, at okkara vegir krossaðust mest.

Var so heppin at sita í nevnd saman við Annu. Altíð fús og nærløgd til at taka tung tøk, felagnum at frama – eitt nú at skipa fyri eydnuhjóli og lutaseðlasølu, at hjálpa til við innkrevjingini og at taka sær av klæðum.

Men hetta nærlagni og ídni røkk eisini út um tíðina, hon hevði sum nevndarlimur. Tað hevur felagið merkt øll árini, og tað kundi eg so mangan sanna eisini. Bæði sum leikari og sum venjari – í fótbólti, í flogbólti og í hondbólti.

Nú, eg havi skavast eitt sindur við søguna hjá ÍF, og tí hugt fundarbøkurnar ígjøgnum, havi eg rent meg í nøkur nøvn, sum aftur og aftur verða nevnd. Nøvn á fólkum, sum eftir bestu sannføring hava lagt nógva orku í og sett nógva tíð av til felagsins besta í meir enn hálva øld.

Eitt av hesum nøvnum er Anna Larsen!

Men Anna var ikki einsamøll um sítt nærlagni! Petur, maðurin, var eisini altíð stuðlandi í hesum arbeiðinum – bæði praktiskt og fíggjarliga. Tey bæði vóru ein fyrimynd fyri okkum øll! Men ikki minst vóru tey ein fyrimynd fyri teirra børn, sum eisini hava verið ÍF og arbeiðinum innan ítróttina í bygdini ein trúgvur og hollur stuðul.

Fyri júst fimm árum síðani eydnaðist tað mær at hava eitt prát við Annu, sum eg festi á band. Eitt prát um ÍF og ítróttina í hennara barna- og ungdómsárum. Ein sera góð og gevandi løta í hugnaliga heiminum á Trøðni. Ein samrøða, sum er eitt sera virðismikið íkast til søguna um ÍF.

Góðu tit, Jákup Frants, Atli, Gunnvá, Randi og Rógvi við familjum! Árini vóru har, men kortini er saknurin svárur. Máttu tit kent styrki og troyst í Honum, sum øllum valdar!

Friður veri við minninum um Annu Larsen!

Tórshavn, 21. september 2023
Petur Simonsen

ÍF nevndin 1979-80 saman við venjaranum, Ronny Gunnarsson. Myndin er tikin í oktober 1980. Frá vinstru: Petur Simonsen, Sonni Jensen, Símin Abrahamsen, Jóhan Heri Joensen, Ronny Gunnarsson og Anna Larsen

Greinin varð fyrstu ferð løgd út 22. september 2023

Eyðun Johannessen til minnis

Eyðun Johannessen, sjónleikari og leikstjóri men fyrst og fremst stóri íbirtarin innan føroyska leiklist, er nú farin um sýn, og vit drýpa høvur við virðing fyri tí, hesin undangongumaður hevur gjørt fyri og givið okkum

 

SkrivaÐ:

Minningarorð / Jenny C. Petersen

Eyðun Johannessen, sjónleikari og leikstjóri men fyrst og fremst stóri íbirtarin innan føroyska leiklist, er nú farin um sýn, og vit drýpa høvur við virðing fyri tí, hesin undangongumaður hevur gjørt fyri og givið okkum.

Eg fari at loyva mær at taka seinasta brotið úr Prologinum hjá Eyðuni úr endurminningum hansara 
“Míni leikapetti”:

Tann dagin, eg av álvara flutti til Danmarkar í 1979,
stóð eg afturi í hekkuni á ferðaskipinum
og sá oyggjarnar søkka í havsbrúnna.
Tá rak eitt tokutám fyri og fjaldi tær – oyggjarnar.
So eg sá tær ikki søkka í havið.
Tað, eg upplivdi, var, at tær –

inni í mjørkanum – fóru,
eins og mjørkin – spakuliga rekandi
við táminum, og festu búgv
í sinninum á mær.
Og har eru tær enn.
Síðan havi eg ikki havt farran av heimlongsli.
Oyggjarnar festu búgv innan í mær!

Nú hevur Eyðun verið á síni seinastu ferð heim til oyggjarnar, ið høvdu so stórt pláss í hjarta hansara, og sunnudagin fylgdu vit honum á hansara seinastu ferð hiðani.

-

Longu sum smádrongur hevði Eyðun evnini at eygleiða og síðani sjálvur at siga søgur út frá tí, hann hevði sæð, og á henda hátt at ogna sær søguna og frásøgnina. Eyðun segði javnan frá søgum, hann upplivdi sum smádrongur, og hvussu hann gjørdist varugur við reaktiónirnar hjá teim vaksnu, tá hann segði frá hesum søgum. Hetta hevur fylgt honum síðani. Hetta og tað, at Eyðun vaks upp í Havn í Rabarbukvarterinum - í grannalagnum hjá Reyða húsinum sum hann kallaði Sjónleikarhúsið - kom at ávirka hansara lívsleið. Eyðun tók eina avgerð um, hvat hann ætlaði sær við sínum lívi, og var hetta eitt val ið ikki var tað lættasta - hvørki tá hugsað var um framtíðar starvsmøguleikar ella at skula greiða øðrum frá hesi serstøku lívsleið síni innan leiklistina.

Tá Eyðun kom heim aftur til Føroya við nýggjari útbúgving innan leiklist, vóru tað ikki øll ið mettu hetta, at vera sjónleikari, sum eitt virðiligt arbeiði. Hetta lýsir Eyðun sera væl bæði í “Míni leikapetti” og ikki minni í pallsettu einrøðufrásøgn síni: “Eitt lív sum apukattur”. Hóast mótgang, mangt særandi orð, og snævurskygni ið neit, so var brennandi málið ongantíð slept; at menna føroyska leiklist til ein vinnuveg, so at onnur eisini fóru at nema sær útbúgvingar innan sjónleikarayrkið.

-

Eyðun nam sær sjónleikaraútbúgving á Kongaliga Teatrinum og Odense Teater í 1960. Hóast Eyðun nú ferðaðist í ríkum leiklistaumhvørvum uttanlands, brendi hann fyri føroyskari leiklist, og kom hann eisini aftur til Føroya eftir lokna útbúgving. Eyðun leikstjórnaði í Sjónleikarhúsinum, umframt at hann í 1961 eisini fór undir at skipa fyri trý ára sjónleikaraskeiðum hjá Havnar Sjónleikarfelag, har luttakararnir fingu prógv við skeiðslok. Eisini skipaði hann fyri smærri skeiðum hjá sjónleikarafeløgum kring landið, og høvdu hesi skeið alstóran týdning fyri menningina av sjónleiki í Føroyum.

Eftir at Eyðun hevði starvast sum fastur sjónleikari og leikstjóri á Aarhus Teater í 1970-’73, kom hann aftur til Føroya. Hesa ferð starvaðist hann sum sjónleikaráðgevi hjá leikbólkum kring landið, umframt at hann eisini leikstjórnaði, gjørdi pallmyndir og annað.

Í 1977 var hann ein av stovnarunum av yrkisleikbólkinum Grímu.

Í 1979 vóru aftur boð eftir Eyðuni úr Aarhus; hesaferð sum rektari á Sjónleikaraskúlanum við Aarhus Teater, har hann starvaðist til 1986.

Í 1997 heiðraði Statens Kunstfond Eyðuni við lívsvarðandi veiting, og í 2001 fekk hann Mentanarvirðisløn Landsins.

Í 2000 gekk leiðin aftur heim til Føroya. Hesa ferð var tað Leikpallur Føroya ið sendi boð eftir Eyðuni at taka við sum listarligur leiðari fyri Leikhúsið Grímu við tí endamáli at seta Tjóðpall Føroya á stovn.

Seinastu árini hevur Eyðun búðleikast niðri, men hevur hann tó verið fúsur at átaka sær arbeiðsuppgávur í Føroyum, tá boð hava verið eftir honum.

-

Øll árini hevur Eyðun - sum leikstjóri bæði í Føroyum og uttanlands - ríkað okkum og onnur við stórum og minniligum leikverkum; barnaleikum, klassikarum, nútímans leikverkum og ikki at gloyma tey nýskrivaðu føroysku leikverkini. Hesum seinastu brendi Eyðun serliga fyri, og legði hann nógva orku í at menna og seta tey á pall, tí: ongin tjóð uttan egin samtíðar leikverk.

Við øllum tí, Eyðun arbeiddi við, vóru vit tikin inn í annan heim við millum øðrum Glataðu spælimonnunum, Meðan vit bíða eftir Godot, Eitur nakað land Week-end, Per Gúnt, Havfrúnni, Lykke Per, Tóm rúm, Kravravnum, På sporet af den tabte tid og vit kundi hildið fram millum tey fleiri enn 120 leikverkini, Eyðun hevur leikstjórnað.

Í dag kunnu vit tó einans fegnast um tað tá serstøku avgerðina; at velja leiklistina til sína lívsleið, tí tað er einki at taka seg aftur í, at tað er Eyðun, ið hevur ment føroyska leiklist. Hann hevur ríkað okkum innan leiklistina og hevur ríkað alt Føroya fólk við upplivingum frá pallinum og útvarpstólinum. Har umframt hevði Eyðun ein týdningarmiklan leiklut í arbeiðinum at seta Tjóðpall Føroya á stovn við tí endamáli at byggja føroyingum eitt Tjóðleikhús.

Hóast Eyðun fór aftur til Danmarkar so var leiklistamenninigin í Føroyum altíð ein partur av honum, og tá vit fara at trína inn í nýggja Tjóðleikhúsið, eiga vit hava Eyðun við okkum í huganum, tí hetta er ikki minst honum at takka.

-

Sjálv minnist eg, at eg sum smágenta sat í Sjónleikarhúsinum og hugdi at leiki, ið Eyðun hevði sett á pall. Eg minnist hvussu trøllabundin eg var av tí, eg sá og hoyrdi, og løtan kendist ongantíð ov long - heldur ov stutt. Seinni var eg so heppin, at eg kom at arbeiða saman við Eyðuni, tá «Glataðu Spælimenninir» blivu settir á pall í Norðurlandahúsinum í 1993. Hetta var eitt gevandi samstarv ið var læruríkt á so mangan hátt. Tá Eyðun var biðin um at koma heim til Føroya at arbeiða hjá Leikpalli Føroya og Grímu við tí endamálið at vísa, at tað bar til at seta ein føroyskan Tjóðpall á stovn, var eg sera fegin og ikki minst errin av, at Eyðun ynskti at fáa meg við til tað arbeiðið.

Hesi árini, ið vit arbeiddu tætt saman, góvu mær sera nógv, ið eg komi at hava við mær restina av mínum lívi.

Takk fyri samstarvið, takk fyri vinalagið, takk fyri søgurnar, takk fyri løturnar og takk fyri tey hondskrivaðu brøvini - sum oftast við eini lítlari tekning.

Eyðun tók mangan til: Tað grør um gangandi fót

Nú eru fetini steðgað, men vit kunnu í dag - og vónandi í nógv ár framyvir - heysta av tí gróðri, hann sáddi.

Við takksemi
Tjóðpallur Føroya
Jenny C. Petersen

Greinin varð fyrstu ferð løgd út 19. september 2023

Konfirmantar í Hoyvíkar kirkju í morgin

--

(Savnsmynd)

SkrivaÐ:

Innsent

Konfirmantar í Hoyvíkar kirkju, 16. sunnudagur eftir trinitatis 24. september, kl. 11

Prestur: Bergtórur Hjelm Bjarkhamar

Bjørt Kruse Johannesen, Millum Gilja 149. Konfirmatiónin verður hildin í KFUK, Varðagøta 9, frá kl. 17

Durita Sára Dahl Egilsnes, Djúpagilsvegur 36. Dagurin verður hildin í Kirkjukjallaranum í Hoyvíkar kirkju frá kl. 16

Hansina Eysturtún Mouritsen, Kristiansgøta 4. Opið hús frá kl. 17.

Hildur Tróndheim Johansen, Gortrugøta 5. Konfirmatiónin verður hildin í skúlaheiminum í Marknagili frá kl. 18.

Käthe Maria Dam, Karlamagnusarbreyt 37D. Konfirmatiónin verður hildin á maskinskúlanum, undir Krákugjóv 15, frá kl 17

Lilja Lenvig Harrysdóttir, Hákunargøta 16. Dagurin verður hildin heima frá kl 16

Lilja Skaalum Vilhelm, Niðaragøta 5. Opið hús frá kl. 17

Lív Berg á Lag, Hvítanesvegur 15. Konfirmatiónin verður hildin í Stoffalág 17 frá kl. 17

Tórunn Højgaard Weihe, Einarsgøta 6. Dagurin verður hildin heima frá kl. 16

Unnur Tróndheim Johansen, Gortrugøta 5. Konfirmatiónin verður hildin í skúlaheiminum í Marknagili frá kl. 18

Boas Ellefsen á Skipagøtu, Skraddaragøta 24. Opið hús frá kl. 17

Edvard Falkenberg, Maritugøta 93. Dagurin verður hildin í HB-húsinum frá kl. 16

Janus Arnold Ferjá Foged, Maritugøta 42. Konfirmatiónin verður hildin í Handverksdeplinum í Stoffalág 60 frá kl. 17

Jónas Rói Fossádal, Ægishædd 3, Tórshavn. Dagurin verður hildin saman við familju.

Liam David Welby, við Myllutjørn 45. Opið hús frá kl. 17

Lucas Philip Winther Johnsen, Hákunargøta 3. Dagurin verður hildin á Hotel Hafnia, Panorama, frá kl. 15

Mannbjørn Eysturtún Mouritsen, Kristiansgøta 4. Opið hús frá kl. 17

Poul Erik Svabo Fjallsbak, Huginsgøta 6. Dagurin verður hildin í Starvsfelagnum, J.H. Schrøtersgøta 9, frá kl. 16

Rókur Jacobsen, Jørundargøta 39. Dagurin verður hildin í kantinuni í Hoyvíkshøllini. Inngongdin er oman móti Vegnum langa.

Ørvur Mortensen, Faksagøta 12, Tórshavn. Opið hús verður í Odd Fellow húsinum frá kl. 17

Greinin varð fyrstu ferð løgd út 18. september 2023

Konfirmantar í Leirvíkar kirkju í morgin

-

 

SkrivaÐ:

Innsent

Sunnudagin verða hesi konfirmerað í Leirvíkar kirkju:

Búgvi Lervig, opið hús frá kl.14 í Víkingarhúsinum í Leirvík –  uppi á Brekkum, við vøllin.

Joan Petursdóttir, opið hús heima, Eggjarvegur 17, Leirvík, frá kl 16.

Kaja Poulsdóttir Toftegaard, opið hús heima á Bjarnavegi 24, Fuglafjørður, frá kl.16.

Lea Petersen, opið hús heima á Nýggjagerði 2, Leirvík, frá kl.15.30.

Lenny Ábraham Diedhiou Gaardbo, opið hús í Leirvíkar missiónshús frá kl.17.

Noomi Hammer Abrahamsen, opið hús heima á Bjarnavegi 20 frá kl.17.

Sissal Bjarnadóttir Kallsgarð, veitslan verður hildin fyri innbodnum.

Greinin varð fyrstu ferð løgd út 19. september 2023

Konfirmatión í Kirkjubøar kirkju

-

 

SkrivaÐ:

Innsent

Ein konfirmantur verður konfirmeraður undir gudstænastuni í Kirkjubøar kirkju í morgin, sunnudagin 24. september klokkan 11. Prestur er Derhard Jógvansson: 

Yrsa Halsdóttir Djurhuus, undir Borgarhálsi 34, Velbastað.

Greinin varð fyrstu ferð løgd út 18. september 2023