Tað kostar at ikki vera til reiðar frá byrjan

Pólland legði seg á odda longu í 4. minutti á Tórsvølli, og Føroyar fingu reytt kort beint eftir, at gestirnir góvu bóltin upp í seinna hálvleiki. Mótbrekkan varð tyngri, og tað endaði við 0-2 tapi

Pólland legði seg á odda í 4. minutti, eftir at føroyska verjan ikki fekk ruddað burtur (Mynd: Sverri Egholm)

SkrivaÐ:

Agnar Prestá

Tað er tungur burður hjá føroyska A-landsliðnum við monnum. Síðani leiðslumálið hjá Mads Boe Mikkelsen í fyrsta dystinum í ár, sum var í Moldova, hevur tað næstan bert verið mótgongd.

Føroyar hava verið væl við í pørtum av dystum og fingu eisini á ein hátt svarað aftur eftir skjóta leiðslumálið hjá Póllandi hóskvøldið, men sum til dømis í síðsta heimadysti fingu okkara aftur eitt slag og taptu uttan at raka málið. 

Pólland hevði nakað at prógva og legði hart út. Viljormur Davidsen og Hørður Askham fingu ikki ruddað eina sending úr vinstru móti føroyska brotsteignum, og so fekk Sebastian Szymanski úr Fenerbache pláss og kundi senda bóltin í longra málhorn. 

Hetta var eftir bert tríggjar minuttir. Føroyska liðið fekk rist skelkin av sær og hevði løtur í fyrra hálvleiki, har tað eydnaðist væl at halda uppá bóltin og eisini at leggja eitt rímiligt trýst - við og uttan bólt.

Teir í hvítum royndu at stríðast og leggja trýst á, men úrttøkan var tíverri ikki har móti sterkaru póllendingunum (Myndir: Sverri Egholm)

Málmøguleikar vóru kortini so at siga ongir av. Tað tættasta var, tá kroystir póslkir verjuspælari eftir gott hornaspark úr høgru ruddaði í málteignum - annars hevði Hørður Askham ella Jákup Biskopstø Andreasen skorað. Annars vóru støður, har Føroyar komu til baklinjuna og innlegg, men seinasta góðskan manglaði, og liðið hjá Håkani Ericson hevði ikki eitt skot á mál í dystinum.

Fyritreytirnar versnaðu munandi beinanvegin í seinna hálvleiki. Pólland gav bóltin upp, og tað var sum um, at føroysku spælararnir ikki høvdu varnast, at dómarin hevði bríkslað: Tvær alveringar frameftir, og so var Arkadiusz Milik innanfyri føroysku verjuna. Hørður Askham úr Akademisk Boldklub jagstraði, Juventus-áleyparin lat seg detta, áðrenn kontaktin kom, og Hørður beit á og takklaði Milik. Dómarin út at hyggja og eftir VAR varð fríspark og beinleiðis reytt kort dømt fyri at taka upplagdan málmøguleika.

Tað sá meira út sum brotsspark, og so skuldi tað heldur verið gult kort eftir lógini. Men 10 mans í ein hávleik móti Póllandi, ið veruliga tørvaði stig og sum hevur spælarar á høgum stigi á øllum plássum, fór at vera ógvuliga tungt. Føroyingar ressaðust tó og royndi at bjóða av. Eina løtu eydnaðist væl at verja fyri málmøguleikum, men í 65. minutti kom Frankowski heldur lætt framvið René Shaki Joensen í vinstru, og millum føroysku miðverjarnar stóð Adam Buksa fríur og stútaði bóltin framvið Mattiasi Lamhauge.

Stórur fagnaður á mongu pólleningunum í kuldanum á Tórsvølli. Luftin fór í roynd og veru úr dystinum tá, og bæði liðini tyktust at venda eyguni móti sunnudegnum. Tá hevur Pólland lykladyst móti Moldova - Føroyar skulu til Kekkia um vikuskiftið, har tað als ikki verður lættari.

Síðani javnleikin í Moldova hava Føroyar nú tapt seks dystir á rað - har í millum ein venjingardyst. Tað eru sjey hálvleikir síðani, at Føroyar hava skorað eitt mál. Landsliðið er langt aftast í bólkinum við einum stigi, og einki bendir á, at hetta fer at broytast.

EM-undankappingarbólkur E
Hósdagin 12. oktober
19:45: Føroyar - Pólland 0-2 (0-1) 

Føroyar (4-1-4-1): Mattias Lamhauge - René Shaki Joensen, Odmar Færø, Hørður Askham, Viljormur Davidsen (L) - Gunnar Vatnhamar - Sølvi Vatnhamar, Brandur Hendriksson Olsen, Jákup Biskopstø Andreasen, Jóannes Bjartalíð - Jóan Símun Edmundsson

Reytt kort: Hørður Askham (47')

Hesir komu inn í 2. hálvleiki: Ári Mohr Jónsson, Pætur Petersen, Andrass Johansen, Jóannes Kalsø Danielsen og Stefan Radosavljevic

Áskoðaratal: 3.220

Greinin varð fyrstu ferð løgd út 12. oktober 2023

Stórtap í Svøríki

Føroysku kvinnurnar stóðu seg tó heilt væl stóran part av fyrra hálvleiki. Svenska liðið var tó ov sterkt, og ov nógvar misnýttir møguleikar vóru

Nógv gott í avrikinum fyri steðginum, men seinni hálvleikur var ein heilt onnur søga (Mynd: Sverri Egholm)

SkrivaÐ:

Agnar Prestá

Føroyska A-landsliðið við kvinnum løgdu út í EM-undankappingini við tí tørførastu møguligu uppgávuni í bólkinum: Á útivølli móti Svøríki. Svensku kvinnurnar eru endaðir í topp-fimm í trimum teimum seinastu endaspølunum, og hóast Føroyar hingu í, í fyrra hálvleiki, so sást stóra svenska góðskan og munurin so líðandi.

Tað var ein góð løta í fyrra hálvleiki, har Føroyar veruliga bjóðaði svensku vertunum av. Svøríki fekk skjótt eina leiðslu á nøkur mál, men tá føroyska álopið kom í gongd, og okkara samstundis fingu støðgað kontraálopinum og kroyst sviar í álopinum til tíðir, so kom munurin nakrar ferðir niður á tvey mál.

Maria Páldóttir Nólsoy kom á vøllin og hevði fleiri góð ting, og serliga eydnaðist innspælið til strikuna væl. Pernille Brandenborg vísti styrki, skoraði nøkur mál og vann brotskøst. Føroyar brendu tó nøkur brotskøst, og í seinna hálvleiki var heilt galið við brendum málmøguleikum. Føroyar skoraðu 13 mál fyri steðgin - næstan fleiri enn í báðum undankappingardystunum móti Svøríki í 2018 - og tað vísir framgond hjá Føroyum.

Evelina Eriksson kom inn í svenska málið, og CSM Bucaresti-málverjin bjargaði ferð eftir ferð føroysku royndunum eftir steðgin. Svøríki hevði økt um munin fyri steðgin og vann seinna hálvleik við ellivu málum.

Harvið gjørdist talan aftur um stórtap fyri Svøríki - næstan eins stórt sum fyri fimm árum síðani. Claus Mogensen og toymi kunnu tó fegnast um nøkur brigdi í spælinum, serliga í álopinum, og eisni avrikið í fyrra hálvleiki. Fleiri viðurskifti skulu tó bøtast. Nú skulu eyguni vendast móti heimadystinum móti Íslandi sunnudagin.  

EM-undankapping, 1. umfar
Uppsala, 12.10
Svøríki - Føroyar 37-20 (19-13)

Dystargongdin: 
5 min: 4-1
10 min: 7-3
15 min: 9-5
20 min: 11-8
25 min: 16-12
30 min: 19-13
35 min: 20-14
40 min: 24-14
45 min: 29-17
50 min: 32-18
55 min: 34-20

Greinin varð fyrstu ferð løgd út 12. oktober 2023

NSÍ koppaði KÍ eftir longda leiktíð

Dania Andrasdóttir Olsen avgjørdi finaluna við brotssparki í longdu leiktíðini, og NSÍ hevði fleiri møguleikar enn føroyameistararnir. Steyp nummar tvey hjá NSÍ seinastu trý árini

(Mynd: Sverri Egholm)

SkrivaÐ:

Agnar Prestá

Kvinnurnar hjá NSÍ eru steypavinnarar fyri aðru ferð. Hetta er greitt eftir dramatiska, spennandi og langa finalu á Tórsvølli í kvøld, har tær í gulum og svørtum at enda vunnu uppiborið.

Tað vóru annars favorittarnir úr KÍ, sum vóru omaná fyrstu løtuna, og í 30. minutti legði Durita Hummeland tær í bláum á odda. Hetta var eftir gott hornaspark frá Tórunn Højgaard Joensen og síðani stútara - eftir líknandi uppskrift sum 1-0 málið í steypafinaluni í fjør.

Eins og tá helt leiðslan ikki leingi, og longu í 32. minutti javnaði NSÍ. Tað eydnaðist at halda fast í álopinum, og eftir góðar dribblingar frá Heidi Sevdal og innlegg úr vinstru endaði bólturin hjá Lenu Olsen. Hon smekkaði til, og so var 1-1.

NSÍ hevur her javnað (Mynd: Sverri Egholm)

KÍ hevði havt leikliga yvirvág fyri steðgin, har NSÍ hevði ligið heldur langt afturi og dúga mest uppá umstillingar. Tað var tó liðið hjá Allani Dybzcak, ið kom betri út til seinna hálvleik. Heidi Sevdal fekk fríleypara í 54. minutti, men Óluva Allansdóttir Joensen bjargaði. Tað gjørdi dagsins KÍ-liðskipari aftur nakað seinni, og NSÍ skapti fleiri vandamiklar støður.

Tað lá meira til NSÍ at avgera og KÍ, sum tykiskt at sakna skøddu Sannu Svarvadal, tyktiskt heldur ráðaleyst. Tað gav tó álopsspælinum meira bit, tá Rannvá Biskopstø Andreasen kom á vøllin, og dysturin javnaði seg útaftur.

(Mynd: Sverri Egholm)

Myndir: NSÍ - KÍ

1-1 eftir 90 minuttir, og í 1. hálvleiki í longdu leiktíðini var KÍ vandameiri. Tað eydnaðist tó NSÍ at avgera alt. Í vanligu leiktíðini sá tá út sum brotsspark, tá Heidi Sevdal fór umkoll einaferð, og tíðliga í øðrum hálvleiki í longdu leiktíðini peikaði Høgni Madsen á blettin, tá unga og orkuríka Helga Mikkelsen fór umkoll í KÍ-brotsteignum eftir nærdyst við Duritu Hummeland.

(Mynd: Sverri Egholm)

Dania Andrasdóttir Olsen, ið spældi ein frálíkan dyst, sum ein av trimum miðverjum var ísakøld og sendi bóltin heilt upp í vinstra málhorn. Stórur fagnaður í NSÍ-leguni og eisini eftir seinasta bríksl. KÍ megnaði ikki at svara aftur, og NSÍ vann uppiborið í einari inntensari finalu, har nógvar flottar atgerðir vóru, og liðini vístu góðan stríðsvilja - serliga tær í gulum.

(Mynd: Sverri Egholm)

KÍ hevði ikki tapt á føroyskari jørð í 2023 undan finaluni. NSÍ vann eisini steypakappingina í 2021.

Steypafinalan hjá kvinnum 2023
Tórsvøllur, 07.10
NSÍ - KÍ 2-1 eftir longda leiktíð (1-1)
30' Durita Hummeland 1-0
32' Lena Olsen 1-1
109' Dania Andrasdóttir Olsen, br. 2-1

Greinin varð fyrstu ferð løgd út 07. oktober 2023

Veðrið útsetur seinnu hálvfinaluna enn einaferð

Nýggja dagfestingin er mikudagin 25. oktober. Hetta merkir tríggjar dystir upp á seks dagar og møguliga ávirkan á niðurflytingarstríðið

Í løtuni eru eingi ljós á Svangaskarði - tað verður tó, helst, spælandi har 25. oktober (Mynd: Sverri Egholm)

SkrivaÐ:

Agnar Prestá

Seinastu fýra árini er steypakappingin hjá monnum togað út til seinasta dystin á árinum. Hetta hevur tvær ferðir havt við sær, at finalan um Løgmanssteypið er spæld í desember.

Í ár er tað søgan um seinnu hálvfinaluan millum B68 og EB/Streym, ið bara ikki verður spæld. Fyrst varð hon flutt vegna evropeisku luttøkuna hjá KÍ, síðani legði nógvur vindur meinbogar í vegin, tá liðini vóru møtt upp á Svangaskarði 3. september, og nú er hon flutt fyri triðju ferð.

Fyrst var ivamál um landsliðsvirksemi órógvaði ov nógv, og nú er tað aftur veðrið. Veðrið mikudagin var heldur einki serligt, og tí var avgerð tikin um, at hálvfinalan verður flutt til mikudagin 25. oktober.

Hetta merkir, at bæði B68 og EB/Streymur skulu spæla tríggjar dystir uppá seks dagar eftir landsliðssteðgin. Hálvfinalan er nú løgd inn mitt í millum næstseinasta og seinasta umfar í Betrideildina.

Hetta kann ávirkan heldur smølu hóparnar, og so er tað eisini tað, at B68 hevur AB og ÍF á skránni í síðstu umførini. Hesi liðini hava alt at spæla fyri tá, í mun til at sleppa undan niðurflyting, og tað er helst eingin loyna, at hálvfinalan fer at fylla meira hjá B68 enn landskappingardystirnir.

Toftamenn eru á odda 3-0 eftir fyrru hálvfinaluna, sum var síðst í juni.

Greinin varð fyrstu ferð løgd út 10. oktober 2023

Sama støða í evropeiska stríðnum

Víkingur hevur nú vunnið ellivu dystir á rað, og B36 er ein sigur frá at staðfesta topp-trý. HB skoraði fýra ferðir við Stóra og jagstrar hini bæði

HB'arnir kundu fegnast fýra ferðir í Trongisvági, men B36 og Víkingur vunnu eisini (Mynd: Sverri Egholm)

SkrivaÐ:

Agnar Prestá

Fult umfar var í Betrideildini seinnapartin, tá allir dystirnir í triðseinasta umfari vórðu spældir. Tríggir dystir vóru, sum høvdu týdning fyri evropeiska stríðið, og øll trý liðini, sum kappast, vunnu.

Víkingur vann fyri 11. ferð á rað, tá Jóhan Petur Poulsen og hansara lið vitjaðu á Svangaskarði. Martin Klein Joensen var við í øllum trimum málinum hjá liðnum úr Eysturkommunu, og bæði hann og Sølvi Vatnhamar hava nú 16 mál í Betrideildini. B68 hevur eina seinnu hálvfinaluna í steypakappingina at hugsa um - er á skránni mikudagin. Hóast tapið, so er liðið hjá Jákupi á Borg nú tryggjað pláss í 2023. Hetta tí, at hvørki ÍF ella TB vunnu.

TB spældi uttan millum annað Rógva Joensen, Salmund Bech og Nikolai Johannesen, og tað merktist. HB og TB spældu málleysan javnleik við Stóra tíðliga í ár, men hesaferð var eingin slingur í valsinum hjá favoritttunum úr høvuðsstaðnum. HB setti seg á dystin beinanvegin, og í fyrra hálvleiki skoraði Tróndur Jensen tvær ferðir. Hetta vóru fyrstu málini hjá Tróndi í Betrideildini í 25 mánaðir - tá skoraði miðvallarin eisini móti TB. Í øðrum hálvleiki skoraði Mikkel Dahl síni mál nummar trý og fýra hesa vikuna. Danin hevur 15 mál í Betrideildini, og HB vann 4-1.

Mynd: Sverri Egholm

Hetta var fyrsti sigur í seinastu fimm dystum hjá HB í Betrideildini, og liðið hjá Jákup Martini Joensen hevur tørv á, at Víkingur ella B36 snávar í síðstu umførunum. Eftir sigurin hjá B36 á 07 Vestur í dag er greitt, at liðið hjá Dan Brimsvík núr bert tørvar ein sigur fyri at tryggja topp-trý og harvið evropeiskt pláss. Tað byrjaði væl, men stutt fyri steðgin javnaði ungi og evnaríki Jón í Horni Nielsen fyri gestirnar í Gundadali. Heimaliðið setti tó tingini uppá pláss í seinna helmingi av seinna hálvleiki. Fyrst skoraði Valerijs Sabala til 2-1, og Jann Benjaminsen økti við frálíkum beinleiðis frísparki.

Landsliðssteðgur er, og tvey tey seinastu umførini avgera, hvørji lið fáa tryggjað sær Conference League-plássini. Um tað ikki eydnast hjá HB at koma í topp-trý, so hevur liðið ein eyka møguleika í steypafinaluni. 

Betrideildin hjá monnum, 25. umfar
Sunnudagin 08.10

B68 - Víkingur 0-3 (0-1)
35' Sølvi Vatnhamar (Martin Klein Joensen) 0-1
52' Martin Klein Joensen (Ingi Jonhardsson) 0-2
89' Jákup Johansen (Martin Klein Joensen) 0-3

B36 - 07 Vestur 3-1 (1-1)
12' Michal Przybylski 1-0
45' Jón í Horni Nielsen (Mathias Voss) 1-1
67' Valerijs Sabala 2-1
84' Jann Julin Benjaminsen 3-1

TB - HB 4-1 (2-0)
9' Tróndur Jensen (Viljormur Davidsen) 0-1
22' Tróndur Jensen 0-2
50' Mikkel Dahl (Mathias Præst Nielsen) 0-3
58' Mikkel Dahl (Adrian Justinussen) 0-4
89' John Villi Wøldike Leo 1-4

--------------------------------------------------

AB - KÍ 1-1 (0-0)
46' Filip í Liða (Ragnar Skála) 1-0
54' Hallur Hansson 1-1

ÍF - EB/Streymur 0-0

Sí eisni: AB og ÍF nærri niðurflytingarstrikuni

Støðan eftir 25. umfør:

1. KÍ 66 stig 
2. B36 56 stig 
3. Víkingur 54 stig 
4. HB 52 stig 
5. 07 Vestur 37 stig 
6. EB/Streymur 25 stig 
7. B68 21 stig 
8. TB 16 stig 
9. ÍF 16 stig 
10. AB 14 stig 

Greinin varð fyrstu ferð løgd út 08. oktober 2023

AB og ÍF nærri niðurflytingarstrikuni

ÍF spældi málleysan javnleik móti EB/Streymi, og AB fekk eitt stig móti føroyameistarunum. Tey kunnu tó iðra seg - TB er framvegis frammanfyri. B68 er trygt

ÍF og TB hava nú bæði 16 stig, og bert eitt mál skilir liðini. Tey hittast í Fuglafirði um tvær vikur (Mynd: Jens Kr. Vang)

SkrivaÐ:

Agnar Prestá

Fult umfar var í Betrideildini sunnudagin. Allir dystirnir í triðseinasta umfari byrjaðu klokkan 15, og sjóneykan var millum annað á botnstríðið.

TB stríðist fyri at halda ÍF og AB aftanfyri seg. Aldursforsetin hevur bert fingið eitt stig eftir summarsteðgin, og í dag var HB greitt omaná í Trongisvági. Tað endaði 1-4, og TB hevur nú lagnudyst í Fuglafirði beint eftir landsliðssteðin. 

Eitt nakað skert TB-lið megnaði ikki at forða HB í at skora fýra ferðir (Mynd: Sverri Egholm)

ÍF kom eitt fet nærri. Teir í reyðum kundu tó iðra seg, tí innan fyrstu tjúgu minuttirnar móti EB/Streymi misnýtti ÍF brotsspark og fekk mál kolldømt: Steven Van Dijk bjargaði royndini frá Hans Jákupi Lervig úr ellivu metrum, og løtu seinni var ein spælari í rangstøðu, ið ávirkaði spælið, beint áðrenn bólturin fór í málið hjá EB/Streymi.

ÍF hevði eisini nakrar góður støður eftir steðgin í Fuglafirði, áðrenn EB/Streymur fekk størsta møguleikan í seinna hálvleiki. Tað endaði tó málleyst: ÍF hevur nú eins nógv stig sum TB men er eitt mál verri. 

ÍF og AB stríðast hart fyri at yvirliva. Tey fingu eitt stig hvør í dag (Savnsmynd: Sverri Egholm)

KÍ gjørdist føroyameistari síðsta sunnudag, spældi evropeiskan dyst hóskvøldið og var uttan fleiri fastar spælarar í dag. Kortini var talan um eitt á pappírinum sterkt lið í grønum á Argjum. AB hevði sjálvsagt meira at spæla fyri enn KÍ, og tað sást eisini: Teir á heimaliðnum stríddust ógvuliga væl.

Eftir málleysan og heldur rótutan fyrra hálvleik, legði AB bragdliga fyri eftir steðgin. Í fyrsta minuttinum skoraði Filip í Liða væl eftir kontraálop. Leiðslan helt bert í átta minuttir. So skoraði Hallur Hansson sítt fyrsta mál fyri KÍ. AB'arnir vildu hava fríspark, tí beinið hjá Halli var høgt uppi, tá hann tamdi bóltin, áðrenn hann liggjandi fekk beint bóltin í málið.

Dómararnir vildu ikki lata við seg koma, og restina av dystinum hevði Páll Klettskarð nakrar møguleikar at avgera dystin. AB beit eisini frá sær, og í 90. minutti lyfti Marius Kryger Lindh, ið varð sendur fríur avstað, bóltin uppum.

1-1 varð endaliga úrslitið. Sum heild flott av AB ið tó framvegis hevur nógv eftir at gera seinastu tvey umførini. Uttan so at tað endar við javnleiki millum ÍF og TB í næsta umfari, so skal AB vinna á Toftum fyri at framvegis vera á lívi.

B68 hevur nú sum so einki at spæla fyri í Betrideildini: Tað sum í eina tíð hevur verið greitt, varð endaliga staðfest tí hvørki ÍF ella TB vunnu í dag: Hóast 0-3 tap fyri Víkingi er B68 nú tryggjað enn eitt ár í Betrideildini. 

Betrideildin hjá monnum, 25. umfar
Sunnudagin 08.10

AB - KÍ 1-1 (0-0)
46' Filip í Liða (Ragnar Skála) 1-0
54' Hallur Hansson 1-1

ÍF - EB/Streymur 0-0

TB - HB 4-1 (2-0)
9' Tróndur Jensen (Viljormur Davidsen) 0-1
22' Tróndur Jensen 0-2
50' Mikkel Dahl (Mathias Præst Nielsen) 0-3
58' Mikkel Dahl (Adrian Justinussen) 0-4
89' John Villi Wøldike Leo 1-4

--------------------------------------------------

B68 - Víkingur 0-3 (0-1)
35' Sølvi Vatnhamar (Martin Klein Joensen) 0-1
52' Martin Klein Joensen (Ingi Jonhardsson) 0-2
89' Jákup Johansen (Martin Klein Joensen) 0-3

B36 - 07 Vestur 3-1 (1-1)
12' Michal Przybylski 1-0
45' Jón í Horni Nielsen (Mathias Voss) 1-1
67' Valerijs Sabala 2-1
84' Jann Julin Benjaminsen 3-1

Støðan eftir 25. umfør:

1. KÍ 66 stig 
2. B36 56 stig 
3. Víkingur 54 stig 
4. HB 52 stig 
5. 07 Vestur 37 stig 
6. EB/Streymur 25 stig 
7. B68 21 stig 
8. TB 16 stig 
9. ÍF 16 stig 
10. AB 14 stig 

Greinin varð fyrstu ferð løgd út 08. oktober 2023

Víkingur leingir við høvuðsvenjaran

Jóhan Petur Poulsen er venjari hjá Víkingi næstu trý árini

(Savnsmynd: Sverri Egholm)

SkrivaÐ:

Sverri Egholm

Venjarin hjá besta liðnum hjá Víkingi eitur Jóhan Petur Poulsen í øllum førum trý ár afturat.

Hesum boðar felagið frá.

Jóhan petur Poulsen tók við starvinum 1. september 2020, og hevði seinastu seks árini undan hesum, staðið á odda fyri næstbesta liðnum í Eysturkommunu.

- Vit hava m.a. framt eitt flott ættarliðsskifti við egnum leikarum, framleitt fleiri landsliðsleikarar, selt fleiri leikarar til útlondini og spælt okkum til evropeiskan fótbólt aftur. Mest umráðandi av øllum, so blomstrar felagsskapurin, og vit eiga eitt felag við góðum støðufesti og stuðli úr nærumhvørvinum, skrivar Víkingur.

- Hóast umstøðurnar í byrjanini av hesum kappingarárinum sóu avbjóðandi út, so hava vit enn einaferð víst, at hart arbeiði gevur úrslit.

Greinin varð fyrstu ferð løgd út 09. oktober 2023

Føroyingar stóran leiklut í uppflytingini hjá Fredrikstad

Brandur Hendriksson og Jóannes Bjartalíð skoraðu í 4-0 sigrinum. Tá Kongsvinger samstundis tapti, er sannførandi uppflyting til bestu deildina veruleiki hjá Mikkjali Thomassen og liði hansara

Jóannes Bjartalíð er toppskjútti í uppflytingarárinum hjá Fredrikstad. Klaksvíkignurin skal spæla í bestu norsku deildini í 2024 - seinasta felagið var har var í 2012 (Mynd: Fredrikstad)

SkrivaÐ:

Agnar Prestá

Í øllum førum tríggir føroyingar verða í bestu norsku fótbóltsdeildini í 2024 - tveir á vølli og ein á venjarabonkinum. Hetta er greitt, eftir at Fredrikstad í dag vann greiðan sigur í Bergen, og kappingarneyti tapti. Fýra umfør resta í, í næstbestu norsku deildini, so sigast má, at talan er um sannførandi og flotta uppflyting hjá Fredrikstad.

Fyrsta málið í dystinum var sjálvmál hjá Åsane, men Jóannes Bjartalíð átti stóran leiklut í tí. Hetta var í 12. minutti, og eftir 25 minuttir var 2-0 til Fredrikstad. Talan var um stóra verjuvillu, og Brandur Hendriksson takkaði fyri. Hetta var annað málið hjá skálvíkinginum fyri norska felagið.

Fredrikstad fekk tvey mál afturat eftir steðgin. Jóannes Bjartalíð skoraði beinleiðis fríspark í 83. minutti - hann spældi fullan dyst, og Brandur varð skiftur út í 64. minutti. Tað gjørdist eisini 4-0, og tá Kongsvinger á triðja plássinum samstundis tapti 2-1 fyri Start, er uppflytingin endaliga veruleiki.

Mynd: Fredrikstad Fotballklub

Síðst Fredrikstad var í fremstu norsku deildini var í 2012, so sigast má, at talan var um ógvuliga flott avrik hjá Mikkjali Thomassen og liði hansara. Stórur føroyskur leiklutur í uppflytingini, og Fredrikstad fer helst at vinna deildina eisini. 

Bryne - við Rógva Baldvinsson í miðverjuni í 90 minuttir og Noah Mneney á bonkinum í 90 minuttir - tapti 1-0 fyri KFUM Oslo, ið allarhelst flytir upp saman við Fredrikstad.

Greinin varð fyrstu ferð løgd út 08. oktober 2023

Elias dagsins maður í Champions League-braki

Elias Ellefsen á Skipagøtu gjørdist javnsettur toppskjútti hjá Kiel, sum í kvøld basti Kielce. Pólska felagið hevur verið í Champions League-finaluni tvey ár á rað

Flúgvandi á hægsta evropeiska stigi: Føroyski spælskiparin Elias Ellefsen á Skipagøtu (Savnsmynd: Sverri Egholm)

SkrivaÐ:

Agnar Prestá

Eftir avrikið móti Hamburg sunnudagin kom hann á vikuliðið í Bundesliguni. Í vikuni vísti Elias Ellefsen á Skipagøtu síni kynstur í Champions League.

Pólska stórfelagið hevur verið í finaluni seinastu tvey árini og hevur nógvar heimsstjørnur, men 21-ára gamli føroyingurin gjørdist javnsettur toppskjútti í dystinum, sum Kiel vann 35-31.

Elias skoraði sjey ferðir og legði upp til fleiri mál afturat. Nummar 71 var umráðandi partur av spælinum í øðrum hálvleiki, tá Kiel skoraði tjúgu ferðir. Kielce var annars á odda við einum máli í steðginum, men heimaliðið, við hoyvíkingingum sum spælskipara, vendi tí.

Mynd: THW Kiel 

Enn eitt flott avrik hjá føroyinginum, ið tikist at hava funnið seg til rættis í týska stórfelagnum. THW Kiel hevur fult stigatal eftir fýra umfør í Champions League-bólkaspælinum.

Greinin varð fyrstu ferð løgd út 11. oktober 2023

Steypakappingin fer nú í gongd

Sum nakað nýtt verður bólkaspælið avgreitt fyri jól. Fyrstu dystirnir hjá monnunum verða spældir leygardagin - hjá kvinnum er landsliðssteðgur

KÍF var í steypafinaluni í fjør og tapti tepurt fyri H71. Hesi liðini eru í sama bólki: Kollfirðingar leggja út á heimavølli móti Kyndli leygardagin - steypavinnararnir taka ímóti Team Klaksvík mitt í næstu viku (Mynd: Jens Kr. Vang)

SkrivaÐ:

Agnar Prestá

- Umframt kvinnulandsdystir og European Cup dystir, eru eisini steypadystir hjá monnum á skránni í hesari vikuni. Fyrstu dystirnir í Faxe Kondi steypakappingini hjá monnum verða leygardagin, meðan ein eisini verður mikudagin í næstu viku.

Soleiðis skrivar Hondbóltssambandið á heimasíðu sínari seinnapartin. Tað hevur verið fast í langa tíð, at steypakappingin hjá bæði monnum og kvinnum hevur verið spæld øll sum hon í januar og februar, meðan landskappingarnar hava ligið stillar

Soleiðis er ikki hetta kappingarárið. Leisturin fyri Faxe Kondi kappingina varð broyttur eitt sindur í fjør og verður innleiðandi bólkaspælið nú leikt fyri jól, meðan hálvfinalur og finalur skulu spælast í februar. Stóra finaluvikuskiftið liggur 16. – 18. februar í 2024, skrivar hsf.fo.

Hondbóltssambandið upplýsir eisini, at sjálv skipanin er eins og undanfarnu ár:

- Liðini eru bólkaði í tveir bólkar eftir støðuni í landskappingini eftir grundspælið seinasta kappingarár, soleiðis at lið nr. 1, 4, 5 og 8 fara í ein bólk, meðan lið nr. 2, 3, 6 og 7 fara í ein bólk. Eftir bólkaspølini verða hálvfinalur millum nr. 1 í øðrum bólkinum og 2 í hinum bólkinum við einum úti- og heimadysti til liðini.

Hjá monnum verður lagt út leygardagin við lykladysti í bólki 1. Har eru bert trý lið, og tað fer helst at snúgva seg um, hvør fer at fylgja favorittunum VÍF víðari í hálvfinalurnar. StÍF tekur móti Neistanum - liðini spældu javnleik á Hálsi í Burn-deildini sunnudagin.

Hin bólkurin sær ógvuliga opin út. Har eru bæði steypafinaluliðini frá síðsta kappingarárið í. 1. umfar verður avgreitt leygardagin og næsta mikudag aftur (18. oktober).

Menn

Greinin varð fyrstu ferð løgd út 10. oktober 2023

Jesper nýggjur venjari hjá StÍF

38 ára gamli danin hevur drúgvar og fjølbroyttar royndir sum venjari hjá bæði børnum og vaksnum – Hann verður høvuðsvenjari hjá bestama mansliðnum og hjá øllum dreingjaliðum, og fer til verka beinanvegin

Jesper Bak (t.v.), nýggjur høvuðsvenjari, og Egi Gothard Danielsen (t.h.), formaður í StÍF (Mynd: StÍF)

SkrivaÐ:

Alda Nielsdóttir

Jesper Bak verður nýggjur høvuðsvenjari hjá besta mansliðnum hjá StÍF.

– StÍF og Jesper Bak hava nú gjørt avtalu um samstarv hetta kappingarárárið. Hann fer til verka beinanvegin, boðar felagið frá í tíðindaskrivi.

Jesper verður eisini høvuðsvenjari hjá øllum dreingjaliðunum, og Mads Lindkvist heldur fram sum hjálparvenjari hjá mansliðnum.

Jesper Bak er 38 ára gamal og úr Danmark. Hann hevur drúgvar og fjølbroyttar royndir sum venjari hjá bæði børnum og vaksnum. Hann var venjari hjá børnum og vaksnum í 11 ár í felagnum Ajax København. Jesper hevur síðan 2022 til fyri stuttari tíð síðan verið høvuðsvenjari hjá mansliðnum og dreingjaliðunum hjá VÍF. Ein týðandi partur av arbeiðinum hjá Jesper hjá StÍF er at menna og kveikja verandi og nýggjar venjarar, skrivar StÍF, sum vegnast um nýggja samstarvið.

– Eg gleði meg at byrja sum venjari í StÍF. Tað eru rættiliga stórir møguleikar og tilfeingi í felganum, og eg gleði meg at vera við til at gera møguleikar til veruleika og at vera við í menningini, sum er í felagnum, sigur Jesper.

– Hjá mansliðnum ræður nú um, eftir turbulenta byrjan, at skapa ró um liðið, og at finna trúnna á, at tingini kunnu eydnast. So skulu vit nokk venda skútuni.

Greinin varð fyrstu ferð løgd út 13. oktober 2023

Tryggur sigur til Mahfoud

Tað eydnaðist Sarah Mahfoud at vinna á argentinsku Marcela Eliana Acuña

(Skíggjamynd: Pluto.tv)

SkrivaÐ:

Sverri Egholm

Tað bleiv ein tryggur sigur til donsku-føroysku Sarah Mahfoud, sum leygarkvøldið skuldi verja sítt heiti í Silver Championship í fjøðurvekt hjá WBC-boksisamgonguni.

Hetta var á Danish Fight Night, sum var í Royal Arena á Amager leygarkvøldið, og Sarah Mahfoud boksaði móti argentinsku Marcela Eliana Acuña.

Dómararnir vóru ikki í iva tá tað samanumkom, og 33 ára gamli boksarin vann dystin trygt.

Sarah Mahfoud skal boksa aftur 13. januar, men enn er ikki greitt hvør mótstøðukvinnan verður.

Greinin varð fyrstu ferð løgd út 08. oktober 2023

Páll Heri Nolsøe vann Haldor Holm Cup

Ungi tvøramaðurin vísti aftur og aftur framúrskarandi spæl í Klaksvík leygardagin. Nr. 2 gjørdist Kristian Sune Høgnesen og nr. 3 Urbanus Olsen

Páll Heri Nolsøe úr Tvøroyrar Billardfelag var fullkomiliga suverenur, tá hann leygadagin vann Haldor Holm Cup. Mynd Jan Müller

SkrivaÐ:

Jan Müller

Leygardagin varð Klaksvík karmur um stóru landsumfevnandi billardkappingina “Haldor Holm Cup”. 16 spælarar úr Havn, Tvøroyri, Runavík og Klaksvík vóru við.

Páll Heri Nolsøe vinnari av Haldor Holm Cup 2023, hm. Kristian Sune Høgensen, sum vann silvur og síðani Urbanus Olsen, sum vann bronsuna. Mynd Jan Müller

Tað var ongantið nakar ivi um, hvør fór at vinna, tí heilt frá byrjan til enda var ungi tvøramaðurin Páll Heri Nolsøe fullkomiliga suverenur. Róliga og trygt feldi hann eina keylu fyri og aðra eftir og vann allar sínar dystir fyri til seinast at enda í finaluni.

Har møtti hann mest vinnandi spælaranum í Haldor Holm Cup øll árini, Kristian Suna Høgnesen úr Klaksvíkar Billardfelag og vann tryggan sigur uppá 4-1. Í hálvfinaluni vann hann á Jógvan Jørgensen úr Havnar Billardfelag við 4-0.  Hina hálvfinaluna vann Kristian Sune Høgnesen á Urbanus Olsen eisini úr Klaksvíkar Billardfelag við 4-1. Urbanus vann kappingina í fjør. Í dystinum um triðjaplássið vann Urbanus á Jógvani við 2-1. 

Haldor Holm Cup er upphiting til føroyameistakappingina fyri lið, sum byrjar komandi vikuskiftið. 

Kristian Sune Høgensen "is still going strong" hóast mongu árini í føroyskum billard og megnaði at vinna silvur. 

Ólavur Kjølbro, verandi Føroyameistari hevði ikki sín besta dag í Haldor Holm Cup hesaferð. 

Flemming Isaksen úr Klaksvíkar Billardfelag var nærum flúgvandi, tá hann í fyrstu uppgerðini mundi vunnið á stórspælaranum Kristian Suna Høgnesen. 

Umstøðurnar til bæði billardspælarar og hyggjarar eru framúr góðar í Klaksvík

Ein av "the grand old men" í Klaksvíkar Billardfelag (fyrr Klubba) Karl Martin Samuelsen handar vinnarunum steyp. 

Greinin varð fyrstu ferð løgd út 09. oktober 2023