Koyrandi verður ígjøgnum 21. desember

Sandoyartunnilin letur upp fyri almennari ferðslu um tveir mánaðir

(Savnsmynd)

SkrivaÐ:

Sverri Egholm

Nú er tað greitt. Sandoyartunnilin letur upp fyri almennari ferðslu 21. desember.

Hetta váttar Teitur Samuelsen, stjóri í felagnum Eystur- og Sandoyartunlar.

Arbeiðið at gera knapt 11 kilometra langa Sandoyartunilin byrjaði í 2019. Metta ferðslan í tunlinum er millum 300 og 400 bilar um samdøgrið.

Tað var 3. februar í 2022, at tunnilin varð skotin ígjøgnum.

Greinin varð fyrstu ferð løgd út 18. oktober 2023

Christian prinsur boðin í Stakkin

Almennu Føroyar hava givið unga prinsinum serliga 18 ára føðingardagsgávu

(Mynd: EPA)

SkrivaÐ:

Ingi Samuelsen

Sunnudagin fylti H.K.T. Christian prinsur 18 ár. Í hesum sambandi hava løgmaður og løgtingsforkvinnan sent honum føðingardagsheilsan vegna Føroyar.

Føðingardagsheilsanin til Christian prins innibar eisini eina serstaka føðingardagsgávu. Gávan er ein túrur út í Stakkin í Tjørnuvík, har Christian prinsur fær møguleika at uppliva stórfingnu náttúruna, umframt at síggja Christiansstovu, sum er eitt lítið hús á Stakkinum. Húsið fekk navnið Christiansstova, til heiðurs fyri Christian prinsi, tá ið krúnprinsahjúnini vitjaðu Stakkin í 2018.

Túrurin út í Stakkin verður skipaður saman við kongshúsinum, tá ið umstøðurnar loyva tí, skrivar løgmansskrivstovan.

Christian prinsur, tá hann vitjaði í Føroyum í 2018 (Mynd: Sverri Egholm)

Frá stóra galladøgurðanum á Christiansborg í gjárkvøldið. Føroyski tónleikarin, Andrias Blaasvær sæst niðjast til vinstru á myndini, til háborðs saman við m.o. Margretu drotning, Christian prinsi, og norsku Ingrid Alexandra prinsessu (Mynd: EPA)

Tá krúnprinsafamiljan vitjaði í Føroyum í 2018 var Fredrik krúnprinsur ein túr í Stakkinum, har hann fekk høvi at avdúka navnið á smáttuni harúti. Nú fær elsti sonur hansara høvi at uppliva Christiansstovu eisini (Savnsmynd: Ólavur Frederiksen)

Greinin varð fyrstu ferð løgd út 16. oktober 2023

Varpið vorðið veruleiki 

Loksins hevur tað eydnast Klaksvíkini at fáa sítt egna nútímans mentanarhús, og í gjár nýttu hundraðtals fólk høvið til at síggja og uppliva nýggja mentanardepilin í hjartanum á Klaksvíkini

Serstaki og stásiligi mentanardepilin í Klaksvík tikin í nýtslu (Mynd: Jan Müller)

SkrivaÐ:

Jan Müller

Eftir miðvíst og áhaldandi arbeiði nú í mong ár eydnaðist tað í vikuni at seta krúnuna á valaverkið, og lata dyrnar upp fyri almenninginum fyri fyrstu ferð. Varpið varð vorðið til veruleika.

Stigtakarar og øll tey mongu, ið gjøgnum nógv ár hava stuðlað og lagt sína orku í at gera hesa stóru verkætlan til veruleika, kunnu sanniliga fegnast um úrslitið - ein hábarslig mentanarháborg í føroyska fiskivinnuhøvuðsstaðnum, og tað sannaðu tey eisini so dyggiliga til stóru og hjartaliga móttøkuna av mentanarhúsinum.

Tað mundi eisini kennast fløvandi hjá teimum mongu vitjandi at síggja og hoyra mongu býarbørnini stíga fram og framføra á stóra og stásiliga pallinum. Ein hátíðarlig og kensluborin byrjan, sum so sanniliga lovar væl fyri bæði verandi og komandi ættarlið - í einum parti av Føroyum, sum hevur fostrað so mong skapandi og dugnalig listafólk.

Við nýggja mentanarhúsinum hava hesi fingið ein framúr góðan karm at virka undir og øll onnur eitt mennandi og gevandi stað at fara til.  

Annfinnur Heinesen, stjóri fyri Varpið

Dávur Winther, mentanarstjóri í Klaksvíkar Kommunu, fekk blómur og listaverk hjá Fritz Johannesen fyri sítt stóra arbeiði til frama fyri nýggja mentanarhúsinum.

Jastrid Gullaksen vann kappingina um besta búmerkið til Varpið

Greinin varð fyrstu ferð løgd út 20. oktober 2023

Bryggjarí sleppa nú at bjóða gestum egna vøru

Løgtingið samtykti í vikuni broytingina í rúsdrekkalógini

(Savnsmynd: Ólavur Frederiksen / Faroephoto)

SkrivaÐ:

Sverri Egholm

Vitjandi fara nú at kunna keypa sær øl, whisky ella aðra framleiðslu í sambandi við virkisvitjanir. Løgtingið hevur í dag samtykt broyting í rúsdrekkalógini, sum gera hetta møguligt.

Landsstýrismaðurin við lógarmálum, Bjarni Kárason Petersen, fegnast um, at Løgtingið hevur tikið undir við at nútímansgera rúsdrekkalógina.

- Endamálið at avmarka nýtsluna er óbroytt. Tó haldi eg ikki tað er nútíðarhóskandi, at fólk, sum t.d. koma allan vegin til Føroya at vitja Fair Isles ella Føroya Bjór, ikki kunnu keypa sær eitt tinganest frá staðnum, men mugu fara yvir um ánna eftir vatni í Rúsuna at finna fløskuna, sum tey júst hava sæð á virkinum.

- Broytingin er tí bara ein tillaging til ta útflutningsvinnugrein, sum er við at taka dik á seg í Føroyum, sigur landsstýrismaðurin.

Greinin varð fyrstu ferð løgd út 19. oktober 2023

48,5 prosent vilja einar sjálvstøðugar Føroyar

Tað vísir Spyr.fo-kanning, sum er gjørd 21. september fyri Tjóðveldi

(Savnsmynd: Sverri Egholm)

SkrivaÐ:

Sverri Egholm

Tjóðveldi læt 21. september eina Spyr.fo-kanning gera, har millum annað var spurt, um fólk taka undir við, at Føroyar skulu vera sjálvstøðugt land.

48,5 prosent av teimum spurdu svaraðu ja til spurningin, at tey taka undir við, at Føroyar skulu vera eitt sjálvstøðugt land.

Beint undir ein triðingur, 32,5 prosent, svaraðu nei og halda ikki at Føroyar eiga at vera eitt sjálvstøðugt land.

Nógv ivast í hesum stóra spurningi. Heili 19 prosent svaraðu "Veit ikki" tá tey vóru spurd.

Tølini vísa, at fólk í høvuðsstaðarøkinum eru meira sinnað at loysa enn onnur. 53,5 prosent av teimum spurdu mí høvuðsstaðarøkinum svaraðu ja til einar sjálvstøðugar Føroyar og bara 26 prosent søgdu nei.

800 fólk vórðu spurd í kanningini hjá Spyr.fo, sum er gjørd 21. september.

Greinin varð fyrstu ferð løgd út 20. oktober 2023

Laða “sherpa-trappu” oman í Hvannhaga

Fýra nepalesiskir serfrøðingar eru komnir til Tvøroyrar at útføra serliga arbeiðsuppgávu

 

SkrivaÐ:

Ingi Samuelsen

Í løtuni vitja fýra menn úr Nepal á Tvøroyri, har teir skulu byggja eina gróttrappu í niðurgongdini frá Grindini, oman í Hvannhaga, vestara part.

Tað er norska fyritøkan Stibyggjaren AS, ið stendur fyri arbeiðinum við gerð av Føroya fyrstu sonevndu ”sherpa-trappu”.

Hetta er eitt vælkent fyribrygdi í Noregi, har sherpa-fólk úr Himalaia fjøllunum gjøgnum 20 ár hava bygt meiri enn 200 trappur og náttúrugøtur í brattlendi.

Tvøroyrar Kommuna/Visit Suðuroy eru stigtakarar, og standa fyri verkætlanini, sum hevur fingið játtað stuðul frá Betri, Nordea-fonden og Visit Faroe Islands.

Avtala er gjørd við teir fimm hagarnar, ið eiga í Hvannhaga vestara parti.

Fyri summi kann tað vera ein avbjóðing at koma oman í Hvannhaga. Nú gerast umstøðurnar betri (Savnsmynd: Pól Sundskarð)

Greinin varð fyrstu ferð løgd út 17. oktober 2023

Løvubetong góðar sjey milliónir í avlopi

Tað er 1,5 millión betur enn árið fyri. 3,3 milliónir verða latnar í vinningsbýti

 

SkrivaÐ:

Birgir Nielsen / Nira

Úrslitið hjá Pf. Løvubetong var 1,5 milliónir krónur betri í fjør enn tað var í 2022, og eigarin fekk 3,3 milliónir krónur í vinningsbýti.

Tað er felagið Spf. Arcus Invest við íslendinginum Torvaldi Gissurarson, sum eigur Pf. Løvubetong.

Roknskapurin hjá Løvubetong fyri 2022 vísir, at bruttovinningurin var 17,3 milliónir krónur, sammett við 16,3 milliónir í 2021. 

Úrslit áðrenn avskrivingar, øktist úr 9 milliónum í 2021 til 10,5 milliónir krónur í 2022. Vøksturin er 13,6 prosent.

Ársúrslitið í 2022 gjørdist eitt avlop eftir skatt upp á 7 milliónir krónur samanborið við eitt avlop á 5,6 milliónir í 2021. Felagið rindar harumframt 1,6 milliónir krónur í partafelagsskatti fyri 2022.

Pf. Løvubetong er ein fíggjarliga sterk fyritøka, við einum eginpeningi á 57,6 milliónum krónum, sum gevur eitt trygdarevnið á 67 prosent.

Samlaðu ognirnar hjá felagnum vóru 86,4 milliónir krónur, harav fastar ognir 35,7 milliónir og ognir í umferð 50,7 milliónir. Harav var tøkur peningur 6,1 milliónir krónur. 

Felagið hevði í 2022 langfreistaða skuld upp á 9,2 milliónir og stuttfreistaða skuld á 14,6 milliónir krónur.

Gjaldførið var sera gott. Gjaldførislutfallið, sum er ogn í umferð í mun til stuttfreista skuld, var 347 prosent í 2022 samanborið við 404 prosent í 2021.

Aðalfundur felagsins hevur samtykt at útluta 3,3 milliónir krónur í vinningsbýti til eigaran.

Stjóri í Pf. Løvubetong er Regin Jóannes Johannessen og nevndarformaður er Torvaldur Gissurarson.

Greiningin er gjørd av Birgir Nielsen frá ráðgevarafyritøkuni Nira Sp/f

Greinin varð fyrstu ferð løgd út 18. oktober 2023

Landið selur sín part av Smyril-Line

Svarar til 16,2 prosent av partabrøvunum í flutningsfelagnum

(Savnsmynd: Kiran Jóanessarson)

SkrivaÐ:

Ingi Samuelsen

Føroya landsstýri hevur nú tikið avgerð um at selja allan ognarlutin hjá landinum í partafelagnum Smyril-Line. Talan er um ein ognarlut á 16,238 prosent av samlaða partapeninginum í Pf. Smyril-Line.

Almenni ognarluturin í felagnum stavar frá eini tíð, tá landskassaðin veitti stuðul til flutningsfelagið tá tað var í fíggjarligum trupulleikum.

Sølan skal eftir ætlan verða avgreidd í endanum av november í ár.

Advokatfelagið Faroe Law stendur fyri søluni saman við danska kamaradvokatinum Poul Schmith.

Greinin varð fyrstu ferð løgd út 16. oktober 2023

1.000 krónur í bót fyri at ganga í haganum

Tveir útlendingar, sum farna fríggjadag vórðu meldaðir fyri at ganga í haganum í Kalsoynni uttan loyvi, eru teir fyrstu, sum fáa bót fyri brot á eina gamla lóg frá 1937

(Savnsmynd: Pól Sundskarð)

SkrivaÐ:

Alda Nielsdóttir

Tveir útlendingar, sum undanfarna fríggjadag vórðu meldaðir fyri at ganga í haganum í Kalsoynni uttan loyvi, hava nú fingið 1.000 krónur í bót í part, upplýsir løgreglan.

Tað var um middagsleitið fríggjadagin, at ein bóndi boðaði løgregluni frá, at hann ynskti at melda útlendingarnar, sum vóru farnir ein túr í hagan hjá honum uttan at gjalda fyri hetta.

Teir vórðu skuldsettir fyri brot á grein 41 í “Lov for Færøerne om Hegn og Markfred” frá 1937, og hetta er fyrstu ferð, at nakar hevur fingið bót fyri brot á hesa greinina, sigur vaktleiðarin á løgreglustøðini í Havn.

Greinin varð fyrstu ferð løgd út 15. oktober 2023

Betri Banki hækkar renturnar

Útlánsrenturnar hjá privatkundum og vinnukundum hækka upp til 0,25 prosentstig

(Mynd: Betri banki)

SkrivaÐ:

Sverri Egholm

Betri Banki boðar nú aftur frá rentuhækkingum.

Fyri privat- og vinnukundar fylgja útlánsrenturnar tillagingini hjá Danska Tjóðbankanum, og hækka sostatt við upp til 0,25 prosentstigum.

Samstundis hækka innlánsrenturnar hjá privat- og vinnukundum upp til 0,50 prosentstigum.

Broytingarnar koma í gildi 1. desember.

Greinin varð fyrstu ferð løgd út 20. oktober 2023

Landsbankin: Innlánsyvirskotið er lækkað

Innlánsyvirskotið í føroysku bankunum var 1,4 milliardir krónur í august 2023 samanborið við 2,1 milliardir í august 2022. Innlánsyvirskotið eru innlán hjá føroysku peningastovnunum íroknað útlendskar deildir, frátrekt útlán hjá somu

(Savnsmynd)

SkrivaÐ:

Tíðindaskriv

Innlánsyvirskotið í føroysku bankunum var í august 2023 700 milliónir krónur lægri, enn í sama mánaði árið fyri.

Kommunurnar og privatu fyritøkurnar hava innlánsundirskot í føroysku bankunum, meðan almennu fyritøkurnar og húsarhaldini hava innlánsyvirskot í føroysku bankunum.

Innlánsundirskotið hjá privatu fyritøkunum er ikki broytt stórvegis í tíðarskeiðinum august 2022 til august 2023, meðan kommunurnar hava gjørt innlánsundirskotið verri við nærum 230 milliónir krónur.

Húsarhaldini eiga meginpartin av innlánsyvirskotinum í føroysku bankunum; tað var 3,1 milliardir krónur í august 2023, men var 450 milliónir krónur størri í august í fjør; tá var tað 3,6 milliardir krónur.

Tá ið skuldin hjá húsarhaldunum í donskum realkredittstovnum verður tald upp í, hava húsarhaldini tó samlað sæð eitt innlánsundirskot á 500 milliónir. krónur (august 2023).

Greinin varð fyrstu ferð løgd út 16. oktober 2023

Hagstovan: Innflutningsvirðið minkað við 586 milliónum krónum

Fyrstu átta mánaðirnar av 2023 innfluttu føroyingar fyri 7,8 milliardir krónur, sum er sjey prosent minni enn sama tíðarskeið í 2022

(Mynd: Hagstovan)

SkrivaÐ:

Alda Nielsdóttir

Fyrstu átta mánaðirnar av 2023 innfluttu føroyingar fyri 7,8 milliardir krónur. Tað er 586 krónur – ella sjey prosent – minni enn sama tíðarskeið í 2022, skrivar Hagstovan.

Størstu íkastini til minkingina koma frá minkandi innflutningsvirði av brennievni og skipum og flogførum. Oljuprísurin er lækkaður seinasta hálva árið, og hetta sæst eisini aftur í innflutninginum.

Innflutningsvirðið av brennievni hetta tíðarskeiðið var 1.228,6 milliónir krónur. Hetta er 344 milliónir krónur – 21,9 prosent – lægri enn sama tíðarskeið í 2022.

Størsti vøksturin er í bólkinum "rávøra til fiskavirking". Har er innflutt fyri 192,2 milliónir krónur meira, sum er ein vøkstur á 38,3 prosent.

Eisini stórur vøkstur í innflutninginum av tilfari til hav- og landbúnaðin (fyri tað mesta alifóður). Har er innflutningsvirðið vaksið 106,4 milliónir krónur, ið er 20,8 prosent.

Greinin varð fyrstu ferð løgd út 18. oktober 2023

Hagstovan: Skattatrýstið minkar

Skattatrýstið í 2022 var 40,6 prosent, tað lægsta síðan 2016

(Savnsmynd)

SkrivaÐ:

Alda Nielsdóttir

Skattatrýstið í Føroyum, ið verður roknað sum skattir og avgjøld tilsamans í prosent av bruttotjóðarúrtøkuni, var 40,6 prosent í fjør.

Skattainntøkurnar hjá tí almenna øktust í 2022 samanborið við undanfarin ár, men bruttotjóðarúrtøkan er økt lutfalsliga meira enn skattainntøkurnar, og tí er skattatrýstið minkað, skrivar Hagstovan.

Skattainntøkurnar hjá tí almenna vóru góðar 10,2 milliardir krónur í 2022. Inntøkurnar øktust við 621 milliónum krónum – ella 6,5 prosentum – sammett við 2021.

Í 2020, tá koronafarsóttin brast á, var skattatrýstið 43,8 prosent. Síðani er tað lækkað bæði í 2021 og 2022 og er nú komið niður á 40,6 prosent - tað lægsta síðan 2016, tá skattatrýstið var 39,5 prosent, skrivar Hagstovan.

Greinin varð fyrstu ferð løgd út 14. oktober 2023

Fjarhitafelagið leggur 200 krónur omaná

Fjarhitin sleppur ikki undan inflatiónini, sigur Fjarhitafelagið. Nevndin hevur tikið avgerð um at hækka prísin, og tað merkir, at eitt miðal húsarhald í 2024 kann rokna við at rinda umleið 200 krónur meira um mánaðin

 

SkrivaÐ:

Sverri Egholm

Nógvir prísir eru hækkaðir seinastu árini, og nú kemur Fjarhitafelagið við einari hækking eisini. Orsøkin skal vera hægri rentustøði og prísstøði sum heild.

Í 2024 kann eitt miðal húsarhald vænta at rinda umleið 200 krónur meira um mánaðin fyri fjarhita, verður sagt.

Fjarhitakundarnir eru býttir í tríggjar prísbólkar. Í Bólki 1 eru íbúðir, raðhús og sethús, í Bólki 2 eru t.d. smá og miðalstór virki, og Bólkur 3 fevnir um stórar bygningar sum eitt nú gistingarhúsini og svimjihylin.

Í Bólki 1 hækkar prísurin 12 oyru – úr 0,68 kr./kWt upp í 0,80 kr./kWt. Prísurin í Bólki 2 økist 13 oyru – úr 0,66 kr./kWt upp í 0,79 kr./kWt. Í Bólki 3 hækkar prísurin 15 oyru – úr 0,60 kr./kWt upp í 0,75 kr./kWt. Prísirnir eru uttan MVG.

Umleið 1800 brúkarar í høvuðsstaðarøkinum eru bundnir í fjarhitaskipanina.

Greinin varð fyrstu ferð løgd út 20. oktober 2023

MEST fer at seta spælhúsið í stand

Arbeiðið á økinum við bedingina í Vestmanna hevur ligið stilt - nú skal tað vera við at økja um trivnaðin í bygdini

Vestmanna kommuna fegnast um avgerðina, og fer í næstum at samráðast við MEST um, hvat økið við bedingina framyvir kann brúkast til (Mynd: vestmanna.fo)

SkrivaÐ:

Tíðindaskriv

MEST fer nú undir at rudda økið við bedingina í Vestmanna - eitt arbeiði sum seinastu mongu árini hevur ligið stilt.

Greinin varð fyrstu ferð løgd út 17. oktober 2023

Intra fekk heiðurin sum ársins íverkseti

Fyritøkan Intra er kosin ársins íverkseti á Íverksetraradegnum, sum var í Fuglafirði fríggjadagin

Jaspur Langgaard og Reimund Langgaard reka og eiga størsta partin av Intra (Mynd: Íverksetahúsið)

SkrivaÐ:

Tíðindaskriv

Fríggjadagin varð avdúkað, at, at fyritøkan Intra, er kosin Ársins íverksetari 2023.

Ársins íverksetaradagur, sum Íverksetarahúsið skipar fyri, varð hildin í einum fullsetum Mentanarhúsi í Fuglafirði. Nógv fólk var komið saman til árliga dagin, har føroysk íverksetan verður heiðrað.

Tað var Djóni N. Joensen, landsstýrismaður við útbúgvingarmálum, ið kunngjørdi at dómsnevndin hevði valt fyritøkuna Intra til Ársins íverkseta 2023.

Landsstýrismaðurin segði millum annað soleiðis um Ársins Íverkseta:

“Ársins Íverkseti hevur ment eina vøru, ið er eitt hent amboð hjá alskyns fyritøkum og stovnum bæði í Føroyum og uttanlands. Fyritøkan er sera skjót at tillaga sína vøru til tað, sum marknaðurin ynskir. Hetta ger vøruna til nakað serligt, og eyðkennir eisini teirra máta at arbeiða uppá. Fyritøkan hevur megnað at gera seg galdandi í kappingini bæði á føroyska og útlendska marknaðinum. Marknaðurin hjá fyritøkuni kann vera allur heimurin, og tí hevur ársins íverkseti eisini týdning fyri føroyska vinnulívið og samfelagið.”

Intra hevur hevur havt góð fíggjarlig úrslit, síðan fyritøkan varð sett á stovn. Tað eru brøðurnir Jaspur Langgaard og Reimund Langgaard, sum reka og eiga størsta partin av fyritøkuni. Umleið sjey fólk eru knýtt at fyritøkuni.

Høvuðstalari á Ársins Íverksetaradegi var Ólavur Gregersen, stjóri og stovnari av Ocean Rainforest. Harumframt vóru eisini fyrilestrar frá Dávid á Rógvi Isaksen, stjóra í fyritøkuni A4 og frá Leif Johannesen, menningarleiðara hjá GroAqua.

Greinin varð fyrstu ferð løgd út 20. oktober 2023

Íbúðirnar á Heiðatrøðini lidnar

Klárt er nú at flyta inn í átta nýggjar íbúðir, sum Bústaðir hava latið byggja á Tvøroyri

(Mynd: Bústaðir)

SkrivaÐ:

Tíðindaskriv

Tær átta íbúðirnar á Heiðatrøðini á Tvøroyri, sum Bústaðir hevur latið bygt, eru nú lidnar, og í næstum verður framvísing fyri limunum hjá Búðstøðum, ið hava fingið tilboð um at leiga.

Tað var 9. november 2020, at Kristin Michelsen, borgarstjóri á Tvøroyri, loysti fyrsta flagið á staðnum. Lokala fyritøkan, MTV-Byggivirki hevur staðið fyri verkætlanini, skrivar Tvøroyrar kommuna.

Íbúðirnar hava adressuna Heiðatrøðin 8A til 8H, og eru í tveimum støddum. Tríggjar eru umleið 65 fermetrar brutto og fimm eru umleið 82 fermetrar.

Tær smærru íbúðirnar hava gongd, køk/stovu í einum, eitt kamar, baðirúm og goymslu. Tær størru hava gongd, køk/stovu í einum, tvey kømur og baðirúm. Til íbúðirnar hoyrir goymslurúm á 3-4 fermetrar. Tann eina íbúðin er væl egnað til fólk við rørslutarni, annars hava allar íbúðirnar suðurvenda terrassu og góð parkeringsviðurskifti.

Íbúðirnar liggja allar sera væl fyri, við Føroya Keypsamtøku sum nærmasta granna, stutt til ítróttarhøll, barnaskúla, dagstovn og vakra náttúru.

Íbúðirnar lúka, sambært Bústøðum, øll nútímans krøv til bústaðarbygging og verða hitaðar við jarðhitaskipan. Inniluftin verður tryggjað við ventilatiónsskipan.

Greinin varð fyrstu ferð løgd út 19. oktober 2023

Slakta kúgv og seyð á Vaglinum

Byrjað verður í dag klokkan 11

Fyrr hevur skaltið verið hildið í Tórsgøtu og Vágsbotni. Í ár er tað flutt niðan á Vaglið (Savnsmynd: Jens Kr. Vang)

SkrivaÐ:

Sverri Egholm

Í dag, leygardagin 21. oktober verður stórt barna- og familjutiltak á Vaglinum, har børn sleppa at síggja, hvussu seyður og ney blíva til kjøt.

Á Slaktinum fáa børnini eina greiða fatan av lívsleiðini hjá kjøtinum - líka frá náttúruni til tallerkin.

Samstundis sum fjøllini verða verða fimm seyðir flettir og ein kúgv flett.

Eisini fara kokkar at gera spennandi smakkiroyndir sum fólk ókeypis fáa.

Byrjað verður klokkan 11 leygarmorgunin tá ein seyður verður flettur, og endað verður við uppboðssølu klokkan 15.

Greinin varð fyrstu ferð løgd út 20. oktober 2023

Standmynd av Grími Kamban verður avdúkað í dag

Hans Pauli Olsen hevur staðið fyri listarverkinum, ið skal ímynda lamdnámið. Sjálvt hátíðarhaldið í Funningi, har Grímur Kamban sigst at hava lent, byrjar klokkan 15

Tað er eitt gamalt hugskot í Funningi, at fáa eina standmynd reista fyri landnáminum og Grími Kamban. Síðani 2020 hevur nevnd arbeitt við málinum, og nú verður standmynd reist innan fyri kirkjugarðin í bygdini

SkrivaÐ:

Agnar Prestá

Um viðrar verður stórt hátíðarhald í Funningi í dag, har standmynd, sum ímyndar landnámið og Grím Kamban, verður avdúkað.

Skráin er fjølbroytt og byrjar seinnapartin kl. 15 og endar á miðnátt. Hesum boða Funnings bygdarfelag og Runavíkar kommuna frá, og tey greiða soleiðis frá søguliga, serstaka og stóra tiltakinum:

Søgnin sigur, at írskir munkar vóru teir fyrstu, sum búsettust í Føroyum, men at víkingar úr Noregi róku teir burtur higani. Hetta sigur hin írski munkurin Dicuil í bók síni “De mensura Orbis terrae” (Heimsins vídd).

Bókin er skrivað um ár 825, so roknað verður við, at tað norska landnámið í Føroyum hevur verið um hetta sama mundið. Dicuil skrivar m.a. soleiðis – og hildið verður, at hann her meinar við Føroyar: “Her hava einabúgvar búð fyri hundrað árum síðani, men nú er ongin eftir, tí víkingarnir hava rikið teir burtur – so nú er alt bara fult av seyði og havfugli.”

Soleiðis koma vit til Grím Kamban, sum sigst vera fyrsti landnámsmaðurin, og skal hann vera komin higar umleið ár 825 e.k., og tað hevur verið hildið fram, at hann lendi í Funningi.

Tað er eitt gamalt hugskot í bygdini, at fáa eina standmynd reista fyri landnáminum og Grími Kamban.

Runavíkar kommuna seldi fyri nøkrum árum síðan nakrar ognir hjá gomlu Funnings kommunu, og fæið varð av býráðnum markað óskert til endamálið. Á heysti í 2020 tók Bygdarfelagið í Funningi avgerð um at skipa eina nevnd, til tess at standa fyri verkætlan, ið hevði til endamáls at varpa ljós á Funning sum landnámsbygd og at varðveita søgnina um Grím Kamban.

Í nevndina vóru valdir Jóanis Erik Køtlum, Jóanes Johannesen og Rodmundur Nielsen.

Verkætlanin er nú komin á mál, og úrslitið er ein standmynd úr basalti og bronsu, – staðsett innanfyri kirkjugarðin í Funningi.

Listamaðurin Hans Pauli Olsen hevur staðið fyri listaverkinum og evnað bronsumyndirnar. Grótvirkið í Skopun hevur evnað klettarnar úr basalti, meðan Høgni Kastalag frá FulgArk hevur sniðgivið lendið.

Runavíkar kommuna hevur verið hollur stuðul undir verkætlanini og hevur staðið fyri lendisarbeiðnum.

Skráin fyri haldinum verður hendan:

Kl. 10 Bygdafólkið og fólk við tilknýti til bygdina verða boðin til morgunmat í skúlanum.
Kl. 15 Hátíðarhaldið byrjar við horntónleiki, felagssangi og røðum áðrenn standmyndin verður avdúkað.
Kl. 17  Konsert í kirkjuni við Lyon, Lenu Anderssen & Niclas Johannesen og Kára Sverrissyni & Óla á Grindafløtti.
Kl. 18.30 Í tjaldi í skúlagarðinum verður suppa, felagssangur og hugleiðingar.
Kl. 20.30 Føroyskur dansur í Dansistovuni við luttøku av Eysturoyar dansifelag .
Kl. 22 Enskur dansur við LM-band í tjaldinum í skúlagarðinum.

Greinin varð fyrstu ferð løgd út 17. oktober 2023

Teitur Lassen fekk Mentanarvirðisløn landsins

Sum singer/songwriter hevur Teitur havt hugbindandi og nærverandi konsertir kring heimin í meir enn 20 ár. Teitur er ein lýsandi stjørna á føroyska tónleikapallinum, stendur millum annað í grundgevingini

Teitur Lassen og Sirið Stenberg, landsstýriskvinna (Mynd: Sverri Egholm)

SkrivaÐ:

Sverri Egholm

Sirið Stenberg, landsstýriskvinna við mentamálum, hevur handað Teiti Lassen, tónlistamanni, Mentanarvirðisløn landsins fyri avrik síni.

Í grundgevingini stendur millum annað soleiðis:

Teitur Lassen er fjølgávaður tónlistamaður, tónasmiður, yrkjari, tónleikari, sangari og framleiðari.

Sum singer/songwriter hevur Teitur havt hugbindandi og nærverandi konsertir kring heimin í meir enn 20 ár.

Stóra altjóða gjøgnumbrotið kom við útgávuni Poetry & Aeroplanes í 2003, sum framvegis stendur sum ein tónlistaligur varði.

Teitur er ein lýsandi stjørna á føroyska tónleikapallinum.

Fyri listaligu avrik síni fær Teitur Lassen Mentanarvirðisløn landsins 2023.

Mentanarvirðisløn landsins er 150.000 kr., og hon verður latin fyri at heiðra føroyskt mentafólk sum tøkk fyri útint listaligt avrik.

(Mynd: Sverri Egholm)

(Mynd: Sverri Egholm)

Greinin varð fyrstu ferð løgd út 18. oktober 2023

Birita Mohr fekk Serstøku virðisløn landsins 2023

Sirið Stenberg, landsstýriskvinna við mentamálum, hevur handað Biritu Mohr, sjónleikara, Serstøku virðisløn landsins fyri avrik síni

(Mynd: Sverri Egholm)

SkrivaÐ:

Sverri Egholm

Sirið Stenberg, landsstýriskvinna við mentamálum, handaði mikudagin Biritu Mohr, sjónleikara, Serstøku virðisløn landsins fyri avrik síni.

Í grundgevingini stendur millum annað soleiðis:

Sum sjónleikari megnar Birita Mohr allar genrur; líka frá tí ekspressiva úttrykkinum til psykologiska realismu, har Birita á nemandi hátt lýsir tær heilt niðurtónaðu, inniligu kenslurnar í mannalyndinum.

Birita Mohr hevur havt týðandi leiklutir í eini langari røð av leikum, eitt nú í leikunum Antigone í Norðurlandahúsinum í 1989, Glataðu Spælimenninir í Norðurlandahúsinum í 1993, Kirsuberjagarðurin á Tjóðpalli Føroya í 2010 og Reinsan á Tjóðpalli Føroya í 2011.

Tað var serstakt at uppliva Biritu Mohr í høvuðsleiklutinum í sjónleikinum Lear kongur eftir William Shakespeare, sum leikbólkurin Det Ferösche Compagnie setti á pall í Sjónleikarhúsinum í Havn á sumri 2023.

Birita Mohr hevur sett varðar eftir seg á føroyska leiklistapallinum og fær fyri avrikini Serstøku virðisløn landsins 2023.

Serstaka virðisløn landsins er 50.000 krónur, og hon verður latin listafólki, mentafólki ella felagsskapi eftir landsstýrisfólksins egnu avgerð.

Birita Mohr og maðurin Egi Dam, bæði virkin í sjónleikarar í leikbólkinum Grímu og á Tjóðpallinum (Mynd: Sverri Egholm)

Greinin varð fyrstu ferð løgd út 18. oktober 2023

Heiðursgáva landsins til Eilif Samuelsen

Fyri mentanarligu avrikini fær Eilif Samuelsen Heiðursgávu landsins 2023. Heiðursgávan varð handað í Vestmanna mikukvøldið

Eilif Samuelsen og Sirið Stenberg, landsstýriskvinna (Mynd: Sverri Egholm)

SkrivaÐ:

Sverri Egholm

Sirið Stenberg, landsstýriskvinna, handaði mikukvøldi Eilifi Samuelsen, týðara, Heiðursgávu landsins 2023.

Í grundgevingini stendur millum annað soleiðis:

Eilif Samuelsen er útbúgvin lærari, og virksemi hansara sum týðari tók dik á seg í 2004, tá forlagið Hemlið gav út Játtanir Augustinusar eftir Aurelius Augustinus í føroyskari týðing.

At kunna lesa Platon og Aristoteles á føroyskum er ikki nøkur sjálvfylgja. Tað er ein gáva til okkum øll, og er at takka eldsálini og kappanum Eilifi Samuelsen fyri.

Fyri mentanarligu avrikini fær Eilif Samuelsen Heiðursgávu landsins 2023.

Heiðursgáva landsins er 75.000 krónur, og hon verður latin fyri at hava virkað til frama fyri mentanarlig virði, sum hava týdning fyri føroyska mentan, list og mentanararv.

(Mynd: Sverri Egholm)

Greinin varð fyrstu ferð løgd út 18. oktober 2023

Ole Wich fekk sømdargávu

Eygleiðingin hjá Ole Wich av føroyska samfelagnum er áhaldandi og beinrakin, og hon sæst aftur í einum týðandi íkasti á føroyska mentanarpallinum

(Mynd: Sverri Egholm)

SkrivaÐ:

Sverri Egholm

Sirið Stenberg, landsstýriskvinna, kunngjørdi á hátíðarhaldi í Vestmanna mikukvøldið, at Ole Wich, myndlistamaður, fær Sømdargávu landsins fyri útint listalig avrik.

Í grundgevingini stendur millum annað soleiðis:

Listaliga virksemið hjá Ole Wich er rúgvismikið og fjølbroytt og fevnir um alt frá standmyndum, installatiónum, video, foto, list í almenna rúminum til plátuhúsar og frímerki.

Eygleiðingin hjá Ole Wich av føroyska samfelagnum er áhaldandi og beinrakin, og hon sæst aftur í einum týðandi íkasti á føroyska mentanarpallinum.

Fyri útint listaligt avrik fær Ole Wich Sømdargávu landsins.

Sømdargáva landsins er 20.000 kr. um árið, og hon verður latin listafólki, ið hava útint listaligt avrik, ið verður mett at hava týdning fyri samtíð og framtíð.

Ole Wich her saman við konu síni, Sanne Storm (Mynd: Sverri Egholm)

Greinin varð fyrstu ferð løgd út 18. oktober 2023

Rasmus Seebach á Tórsfest í summar

"Olivia", "Lidt i fem", "Natteravn", "I mine øje" og "Øde ø" eru bara nøkur av stóru hittunum hjá Rasmusi Seebach. Í summar fer hann at hava konsert á Vaglinum

Rasmus Seebach spældi á Summarfestivalinum í 2019 (Mynd: Jens Kr. Vang)

SkrivaÐ:

Sverri Egholm

Rasmus Seebach framførdi fyrstu ferð í Føroyum í 2010, tá somu fyriskiparir sum eru handan Tórsfest, fingu hann til Føroya í náttklubbin Rex. Ongantíð áður hevur bíðirøðin í Rex verið so long sum júst tá, og vórðu atgongumerkini rivin vekk innan fimm minuttir.

Nú hava teir aftur fingið hann til Føroya og hesaferð til Tórsfest.

Sangarin, sangskrivarin og framleiðarin Rasmus Seebach er ein av størstu stjørnunum í Danmark, og hevur við sínum seks plátum uppbygt sær ein stóran fjepparaskarða. Síðan 2009, tá hann útgav sítt fyrsta lag "Engel", hevur Rasmus vunnið fleiri virðislønir og hava sangir hansara óteljandi ferðir verið ovast á hittlistunum í Danmark.

Mest kendur er hann fyri sínar serligu live framførslur, har hann leggur nógv fyri, at hava eitt gott samband við áskoðarafjøldina. Vanligt er eisini, at áskoðarafjøldin kennir sangir hansara og kunnu vit nevna løg sum "Olivia", "Lidt i fem", "Natteravn", "I mine øjne" og ikki minst "Øde Ø", ið øll hava verið risastór hitt og væntandi fara at runga í Havnar gøtum 26. juli tá konsertdagurin verður á skrá.

Greinin varð fyrstu ferð løgd út 20. oktober 2023

Ana vann stuttsøgukapping við søguni Home

Vinnarin varð avdúkaður, tá Fjølmentanarvikan varð sett í Norðurlandahúsinum í gjár

Ana Holden-Peters (Mynd: Tórshavnar kommuna)

SkrivaÐ:

Sverri Egholm

Í sambandi við Fjølmentanarvikuna varð skipað fyri stuttsøgukapping við evninum "Heim". Áhugin fyri kappingini var sera stórur, og 74 rithøvundar sendu søgur inn

Vinnarin varð avdúkaður, tá Fjølmentanarvikan varð sett í Norðurlandahúsinum í fríggjadagin.

Søgan "Home" hjá Anu Holden Peters vann kappingina. Um Home sigur dómsnevndin: "Á ein einfaldan og beinraknan hátt lýsir søgan Home ófrættakenslur, ið kunnu fylgja við, tá ein flytur til eitt annað land - men eisini, at alt ikki altíð er soleiðis, sum fyrsta inntrykkið vil vera við. Søgan er mentanarliga inneftir lítandi (sjálvreflekterandi ) og gevur eina fatan av, hvussu tann føroyska mentanin kann upplivast av fólki, ið flytur hendaveg."

Av tí at áhugin fyri kappingini var sera stórur, og nógvar áhugaverdar og góðar søgur komu inn, hevur dómsnevndin gjørt av at býta annað og triðja pláss millum fýra rithøvundar.

Søgan "Heim" hjá Riu Tórgarð og søgan "Tvístertur" hjá Rannvá Næs Hoydal gjørdust nummar tvey. "Return" hjá Noemi Garðshorn og "Home" hjá Luné Heimistovu gjørdust nummar trý.

Vinnarin fær 10.000 krónur. Søgurnar á øðrum plássi fáa f2.500 krónur, og søgurnar á triðaplássi fáa 1.000 krónur.

Fyrireikararnir siga, at nógvar góðar søgur komu inn til kappingina, og vóna tí, at tað fer at bera til at geva søgurnar út.

Í dómsnevndini vóru umboð fyri Tórshavnar kommunu, Tórshavnar býarbókasavn og Rithøvundafelagið.

Greinin varð fyrstu ferð løgd út 20. oktober 2023

Serligur siðaarvur í Sumba á lista hjá Tjóðsavninum

Tjóðsavnið skrásetir og granskar nú í hvussu sumbingar halsa føstulávint

(Savnsmynd: Bjartur Vest)

SkrivaÐ:

Ingi Samuelsen

Føstulávintshaldið í Sumba er so serstakt, at henda siðvenjan nú er komin á skránna Livandi Mentan, sum Tjóðsavnið umsitur.

Henda skráin er liður í arbeiðinum við Unesco sáttmálanum um verju av serligum siðaarvi. Skráin er ein fagnaður av fjølbroytta siðaarvinum í Føroyum, og verður ment við tí fyri eyga at verja, skráseta, miðla og granska í siðaarvinum.

Tað stendur øllum felagsskapum, bólkum og einstaklingum í boði at senda uppskot inn um siðaarv, ið átti at komi við í skránna.

Sí grein hjá Tjóðsavninum um Føstulávintshald í Sumba 

Greinin varð fyrstu ferð løgd út 18. oktober 2023

Altjóða heiður til Daniu O. Tausen

Vann fyrstu virðisløn á altjóða festivali í Italia fyri smá máløkir

 

SkrivaÐ:

Ingi Samuelsen

Bæði áhoyrarar og dómsnevnd vóru samd um, at føroyska Dania O. Tausen og orkestur hennara skuldu vinna fyrstu virðisløn á listafestivalinum Suns Europe, sum júst hevur verið í italska býnum Udine.

Suns Europe er ein listafestivalur fyri smá máløkir, sum Informazione Friulana skipar fyri. Friuli er landsluturin í Italia, sum liggur heilt eystur móti markinum til Slovenia og har Udine er høvuðsbýur og ein annar kendur býur er Trieste, sum liggur htild yvir móti Slovenia.

Listafestivalurin hevur verið hildin gjøgnum summarmánaðirnar, og endabrakið var ein konsert í Teatro Nuovo Giovanni da Udine leygarkvøldið, tá Dania og bólkur hennara upptraðkaðu.

Grundgevingin fyri at lata ungu føroysku sangarinnuni og yrkjaranum fyrstu virðisløn ljóðaði nakað soleiðis.

“Fyri vøkru rødd hennara og mátan, ið hon tulkar sítt heimland. Fyri at megna at miðla gandakendu Føroyar. Eisini fyri høgt støðu hjá tónleikarunum, ið góvu hennara framførslu virði og styrki”.

Suns merkir “ljóð” á friulianskum. Festivalurin byrjaði sum ein tónleikakapping fyri minnilutamál í Alpunum og Suðurevropa, men er nú vaksin til at vera galdandi fyri smámál í øllum Evropa. Fyrsti Suns festivalurin varð hildin í 2009.

Greinin varð fyrstu ferð løgd út 16. oktober 2023

Sverri Steinhólm skipaður í embætið sum diakonprestur

Sunnudagin skipaði Uni Næs, dómpróstur Sverra Steinhólm í embætið sum fyrsti diakonprestur í Føroyum

(Mynd: Fólkakirkjan)

SkrivaÐ:

Alda Nielsdóttir

Sunnudagin 15. oktober skipaði Uni Næs, dómpróstur, Sverra Steinhólm í embætið sum diakonprestur. Tað var gjørt undir gudstænastuni í Fríðrikskirjuni á Toftum.

Sverri Steinhólm, ið áður hevur røkt embætið sum sjúkrahús- og fongsulsprestur, er fyrsti diakonprestur í Føroyum.

Uppgáva hansara er at virka millum teirra, sum hava avbjóðingar í gerandisdegnum og gerast sosialt viðbrekin, eitt nú í mun til arbeiðsloysi, bundinskap ella heimloysi, og skal hann virka í samspælinum millum tað einstaka menniskjað og samfelagið.

Fólkakirkjan hevur seinnu árini verið í eini tilgongd at seta fleiri funktiónsprestar at virka við meiri bundnum uppgávum, og setanin av diakonpresti er ein liður í hesum, skrivar fólkakirjan.

Greinin varð fyrstu ferð løgd út 18. oktober 2023

Lívssøgan hjá Robert McBirnie kemur út í bók

Hilmar Jan Hansen hevur skrivað bókina "Robert", og teir báðir vera á útgávutiltaki í Miðlatúni í Vági mánadagin 30. oktober klokkan 15

Tað er miðlamaðurin Hilmar Jan Hansen, sum hevur skrivað bókina "Robert". Hetta hevur hann gjørt í tøttum samstarvi við høvuðspersónin sjálvan (Mynd: sudurras.fo)

SkrivaÐ:

Agnar Prestá

Robert McBirnie hevur leingi verið ein almennur persónur í føroyska samfelagnum, og nú fer lívvsøga hansara at koma út í bólk.

Tað er miðlamaðurin Hilmar Jan Hansen, sum hevur skrivað bókina "Robert". Hetta hevur hann gjørt í tøttum samstarvi við høvuðspersónin sjálvan.

Robert er vágbingur, og mánadagin 30. oktobur verður útgávutiltak í Miðlatúni í Vági. Har verður bókin løgd fram, og høvuðspersónur og høvundur vera at hitta.

Greinin varð fyrstu ferð løgd út 19. oktober 2023

Martti Ahtisaari er deyður

Fyrrverandi finski forsetin andaðist mánamorgunin, 86 ára gamal

Martti Ahtisaari fekk friðarheiðursløn Nobels í 2008 (Mynd: Reuters)

SkrivaÐ:

Alda Nielsdóttir

Fyrrverandi finski forsetin Martti Ahtisaari er deyður.

Hann andaðist tíðliga mánamorgunin, 86 ára gamal.

Ahtisaari varð føddur 23. juni 1937 í býnum Vyborg, sum tá var partur av Finnlandi, men sum nú er partur av Russlandi.

Hann hevði eina langa politiska yrkisleið. Hann var forseti í Finnlandi frá 1994 til 2000, og seinni varð hann eisini sendifólk hjá ST í Kosovo. Í 2008 fekk hann friðarheiðursløn Nobels fyri sítt diplomatiska arbeiði.

Í september 2021 varð boðað frá, at Ahtisaari hevði fingið staðfest demens.

Greinin varð fyrstu ferð løgd út 16. oktober 2023

Noreg fær nýggjan uttanríkisráðharra

Útskifting var í norsku stjórnini mánadagin. Esben Barth Eide verður nýggjur uttanríkisráðharri fyri Anniken Huitfeldt

Espen Barth Eide hevur fyrr verið norskur uttanríkisráðharri. Her saman við Jonas Gahr Støre, forsætisráðharra, í dag (Mynd: EPA)

SkrivaÐ:

Ingi Samuelsen

Norski forsætisráðharrin, Jonas Gahr Støre, frá sosialdemokratiska Arbeiderpartiet, framdi mánadagin útskiftingar í norsku stjórnini.

Hetta merkir millum annað, at royndi politikarin Anniken Huitfeldt úr Arbeiderpartiet ikki longur er norsk uttanríkisráðkvinna.

Ein partur av orsøkini er málið um mannin hjá ráðkvinnuni og hansara keyp og søla av partabrøvum, sum hevur verið ein byrða fyri Anniken Huitfeldt.

- Málið um keyp og sølu av partabrøvum er ein partur av orsøkini, men ikki øll orsøkin, til at Anniken verður skift út, segði Jonas Gahr Støre sambært norskum miðlum.

Anniken Huitfeldt (Savnsmynd)

Huitfeldt boðaði sjálv frá í summar, at maður hennara, Ola Flem, hevði framt nakrar partabrævahandlar meðan hon var ráðkvinna. Hetta hevði gjørt hana ógegniga í nøkrum málum, skrivar NTB.

Málið hjá Huitfeldt og mann hennara líkist nógv málinum hjá fyrrverandi norsku forsætisráðkvinnuni, Ernu Solberg. Maður hennara, Sindre Finnes, keypti og seldi eisini fleiri partabrøv meðan hon sat sum stjórnarleiðari.

- Málið hjá Ernu Solberg hevur verið við til at skaða enn meira um umdømið hjá politikarum. Og tað hevur eisini órógvað málið um Anniken. Og hóast málið hjá Solberg er meira umfatandi, so minna tey um hvørt annað í fleiri førum, segði Støre mánadagin.

53 ára gamla Anniken Huitfeldt verður avloyst av 59 ára gamla Esben Barth Eide, sum fyrr hevur verið uttanríkisráðharri, tað var frá 2013 til 2017 meðan Jens Stoltenberg var forsætisráðharri. Eide hevur eisini verið verjumálaráðharri, og hevur sitið sum veðurlags- og umhvørvisráðharri higartil í núverandi stjórnini.

Seks ráðharrar og -kvinnur vórðu skift út. Eisini fekk Noreg eitt nýtt ministerium, nevniliga ráðið fyri talgilding og fyrisiting. 

Greinin varð fyrstu ferð løgd út 16. oktober 2023

Til minnis um Hákun Thorkildshøj

11. september 1938 - 17. august 2023

 

SkrivaÐ:

Minningarorð / Kiwanis Tórshavn

Vit fara hervið at minnast Hákun Thorkildshøj við takksemi fyri tað stóra arbeiðið hann gjørdi fyri Kiwanis Tórshavn tey nógvu árini, hann var limur.

Hóast kropsliga darvarður, so møtti Hákun altíð væl upp til tey tiltøk, vit høvdu. Hann var ógvuliga stillisligur og høviskur og ikki ein maður av nógvum orðum, men tá hann tók orðið, varð lurtað væl, tí tá hevði hann veruliga nakað upp á hjartað.

Hákun vaks upp á Borðini, tí abbi hansara fyrst gjørdist vitapassari har og síðani pápin, Niklái. Abbin á Nesi fekk sum uppgávu at passa vitan á Garðsenda á Toftum, sum varð tendraður sama dag sum vitin á Borðini í 1893. Í 1924 var starvið sum vitapassari á Borðini tøkt, og abbin søkti og fekk tað starvið, meðan sonurin, Niklái, pápi Hákum fekk starvið at passa vitan á Garðsenda.

Í 1939 fór abbin frá sum vitapassari á Borðini, og Niklái – pápi Hákun – tók yvir eftir hann. Hákun var tá bara ársgamal, tá familjan flutti út á Borðina. Tey vóru seks systkin, tríggjar systrar og tríggir beiggjar, har Hákun var tann fjórði í systkinaflokkinum.

Uppvøksturin á Borðini var góður, og stóra tíðsfordrívið var at fara í bát, tá veðrið var gott. Hetta greiddi hann millum annað frá í eini sending við Tóri á túri saman við tveimum systrum. Tey høvdu ein góðan uppvøkstur á Borðini, har tey trivust væl.

Hákun var eisini musikalskur og spældi harmoniku. Hetta var ein fín harmonika, tí einaferð var hon send heilt til Italiu at verða umvæld frá grundini av.

Í sínum sivila arbeiði var Hákun nærum alt sítt arbeiðslív starvsettur innan tað almenna. Í nógv ár var hann tað, sum rópt varð pantifúti, men tey seinnu árini áðrenn hann gjørdist pensjónistur, var hann deildarleiðari á Gjaldstovuni.

Hákun var giftur og átti fýra børn, sum minnast gott aftur á pápa sín, tí hann var so róligur og fittur pápi. Nýttist ikki at heva røddina fyri, at tey skuldu lurta eftir og gera, sum hann ynskti.

Hann misti konuna, sum var ættað úr Sandavági, fyri nøkrum árum síðani, og eftir hetta flutti hann í eina av íbúðunum á Boðaneshamri, men tey síðstu árini búði hann á Boðanesheiminum.

Kiwanis vil hervið lýsa frið yvir minnið um Hákun Thorkildshøj og takka honum fyri tað stóra og góða arbeiði, hann gjørdi fyri felagsskapin.

Kiwanis Tórshavn

Greinin varð fyrstu ferð løgd út 16. oktober 2023