Jens venur mentalu styrkina hjá leikarunum

- Við at trúgva upp á seg sjálvar og vita hvat teir kunnu ber til at bjóða stóru hondbóltstjóðunum av, sigur mentali venjarin á liðinum, Jens á Skipagøtu

Jens á Skipagøtu avmyndaður eftir dyst við U21-liðnum (Savnsmynd: Sverri Egholm)

SkrivaÐ:

Ingi Samuelsen

Ein av teimum meira friðarligu persónligheitunum, sum ferðast rundan um føroyska hondbóltslandsliðið, sum partur av venjarahópinum, er 47 ára gamli Jens á Skipagøtu.

Útbúgvin lærari, sum nú roynir seg í privata vinnulívinum, men eisini hevur roynt seg í øðrum vinnugreinum, og sum skúlastjóri í Hoyvíkar skúla eitt stutt skifti. Pápi hansara, Ólavur, hevur í eitt mannaminni verið varastjóri á upprunaliga skúlanum í Hoyvík.

Jens á Skipagøtu fegnast saman við liðinum eftir góða avrikið móti Noregi leygarkvøldið (Mynd: Sverri Egholm) 

- Nei skúlastjórastarvið var ikki nakað fyri meg, ásannar Jens.

Men vit kenna hann best sum mannin, ið eigur ein part av æruni av, at tað gongst so væl í føroyskum hondbólti fyri tíðina. Ikki bara tí, at hann er fedrana upphav til tveir av leikarunum, Róa og Elias, heldur ikki tí at hann hevur verið partur av venjaratoyminum hjá hesum dreingjunum gjøgnum so at siga øll barnaárini sum málmansvenjari. Maðurin er fyrrverandi skansi í málinum hjá H71.

Nei, tað er tann mentala fyrireikingin, Jens hevur leitt menninir ígjøgnum, sum verður tikin fram sum ein orsøk til at tað gongst so væl nú.

Altíð verið aktivur í H71

Vit hittu Jens í Berlin til eitt prát um hansara leiklut í hópinum.

- Eg havi í langa tíð verið aktivur í felagnum H71 sum venjari, og havi eisini verið partur av landsliðsarbeiðinum í longri tíð.

- Tá vit fyri nøkrum árum síðani ásannaðu, at hesin 2002 árgangurin hevði nakað heilt serligt í sær, so settu vit okkum niður – t.e. venjararnir Mark Marcher Laursen og Julian Johansen – fyri at analysera støðuna.

- Vit ásannu, at Føroyar í langa tíð hava átt sera góðar hondbóltsspælarar, sum kundu verið komnir nógv longur enn teir komu. Og vit ásannaðu, at tað ikki vóru hondbóltsevnini, men tann mentala fyrireikingin, sum haltaði. Menninir/dreingirnir vóru ikki til reiðar til tær stóru avbjóðingarnar.

- Tað var tá, at vit fóru til Hondbóltssambandið við ætlanini um at leggja eina menningarætlan, sum í stóran mun snýr seg um tað mentala. Og uttan at hava nakra vitan um hetta tók eg á meg at taka mær av hesi uppgávuni.

Jens noterar sær niður hvat arbeiðast skal við á tí mentala økinum (Savnsmynd: Jn.fo)

Skal vera fastur táttur í landsliðsarbeiðinum

Eg mátti leita mær vitan frá grundini av. Las nógv tilfar, og var til fleiri skeið í ítróttasálarfrøði uttanlands, og harvið havi eg fingið nakað av vitan og nakrar royndir at arbeiða við mentalu síðini hjá leikarunum. Ætlanin er, at hetta arbeiði í framtíðini skal vera partur av øllum árgangunum, tá tað snýr seg um føroysku landsliðini.

Jens greiðir frá, at tað snýr seg um at hava strukturin í ordan og at hava fastar rutinur, so at leikararnir vita hvat teir skulu, hvør teirra uppgáva er upp til eina kapping ella ein avgerandi dyst.

Tað er eisini av týdningi, at allir leikararnir eru involveraðir, at ongin kennir seg uttanfyri, og tað hava hesir dreingirnir duga sera væl, sigur Jens á Skipagøtu.

Eitt nú arbeiða teir við andadrátsvenjingum, fyri ikki at lata kenslurnar fara avstað við teimum. Tað kann liggja eitt stórt trýst á leikarunum, eitt nú frá áskoðarunum. Men hetta trýstið má ikki ávirka spælið hjá teimum einstaku.

Jens á Skipagøtu er giftur við Gunn Ellefsen, ið er forseti í Hondbóltssambandinum. Her í práti við skjótt fráfarandi aðalskrivaran í Hondbóltssambandinum, Hans Jón Thomsen (Mynd: Sverri Egholm)

Ábyrgd – samstarv - hugburður

Sum pápi hjá Eliasi, so veit Jens at føroyski stórspælarin brúkar hetta við andadrátsvenjingum nógv í sínum dystunum. Elias verður taklaður, skumpaður, trýstur og ertaður, men dugir at lata vera við at lata hetta ávirka hansara spæl, og tað er ein stór styrki hjá ikki bara honum, men hjá øllum liðinum.

Vit hoyra ofta spælararnar, tá teir verða spurdir um ymist, serliga upp til stórdyst, at teir brúka orðini ‘ábyrgd’, ‘samstarv’ og ‘hugburður’, og tað er júst hesi trý orðini ella hugtøkini, sum eru tey samtyktu virðini sum landsliðið arbeiðir eftir.

Og tað er eisini serliga hetta, sum Jens arbeiðir við.

Jens er tó ógvuliga varin við at taka sær heiðurin av góðu úrslitunum hjá føroyska landsliðnum.

Synirnir hjá Jens, Elias og Rói, fegnast um úrslitið leygarkvøldið. Teir eru kanska besta dømið um hvat tað gevur at geva børnunum fría atgongd til ítróttahallirnar (Mynd: Jóanis Albert Nielsen / jn.fo)

Lat børnini sleppa inn í høllirnar

Hann vísir ístaðin á, at nógvar styrkir eru komnar inn á liðið við danska venjaranum, Peter Bredsdorf Larsen, sum hevur royndir sum hjálparvenjari hjá danska landsliðnum og tí hevur nógvar royndir á hesum økinum.

Og so er tað eitt afturat, sum ikki skal gloymast.

- Tú skalt minnast til, at hesir dreingirnir (..tá sipar hann helst til H71’ararnar, -red) eru slopnir at brúka ítróttahøllina í Hoyvík sum teimum lystir. Teir hava gjøgnum allan sín uppvøkstur havt møguleika fyri bjóðað sær sjálvum av í kynstri við hondbóltinum.

- Tí er tað, at hesir dreingirnir hava so stórt sjálvsálit, so stórt at teir tora at fortelja alment, at teir ætla sær at fáa stig ella at vinna. Teir hava vant ymiskar rørslur og skot út í tað óendaliga, og vita akkurát hvar mørkini fyri teirra spæl er.

- Við slíkum sjálvsáliti kemur ein langt í hondbólti, vísir Jens á Skipagøtu á.

Tað er eisini uttanfyri hondbóltsheimin, at lagt er merki til evnini hjá Jensi. Í nakrar mánaðar farna heyst vóru boð eftir honum í Havnar Bóltfelag fyri at gerast ein partur av hópinum og byggja á sjálvsálitið hjá HB-leikarunum.

Jens vísir á, at tað var ein tíðaravmarkað uppgáva. Hansara virki sum mentalur venjari snýr seg nú aftur einans um hondbólt. 

Greinin varð fyrstu ferð løgd út 14. Jan 2024

Góð avgerð at gerast føroyingur

Samrøða við aðra hetjuna í føroyska málinum leygarkvøldið, um stóru upplivingarnar hann hevur fingið á hondbóltsvøllinum eftir at hann valdi at skifta bretska landsliðið út við tað føroyska

Nicholas Satchwell (Mynd: Sverri Egholm)

SkrivaÐ:

Ingi Samuelsen

Ein av stóru hetjunum í ótrúliga dystunum móti Noregi leygarkvøldið, var málverjin Nicholas Satchwell. Eftir at Pauli Jacobsen, sum vanliga er fysrtvaldi í málinum, hevði staðið nakað undir egnan standard í byrjanini av dystinum, varð bretsk/danski føroyingurin, Nicholas Satchwell, sendur í mál, tá umleið 20 minuttir vóru farnir.

Og Nicholas stóð ein branddyst. Hevði eitt bjargingarprosent á 55 fyri fyrra hálvleik. Og norski landsliðsvenjarin, Jonas Wille, tók júst hetta fram á tíðindafundinum eftir dystin.

“Serliga Skipagøtu gjørdi tað trupult fyri okkum”, segði norski landsliðsvenjarin, tá hann skuldi grundgeva stigamissið, men legði so afturat: “Men tað gjørdi málmaðurin eisini, serliga í endanum av fyrra hálvleiki og byrjanini av seinna. Vit spældu væl tá, men vit fingu ikki bóltin inn”.

Sagosen í skotroynd móti Satchwell (Mynd: Sverri Egholm)

Fantastisk kensla

Nicholas Satchwell ásannar, at hetta var ein av hansara góðu dystum tá tað kemur til bjargingar. Í hvussu so er var tað tann størsti dysturin, sum hann hevur upplivað.

- At hava talsterku áskoðararnar í rygginum var avgjørt við til at seta meg upp. Tað var ein fantastisk kensla, sigur lítillátni bretin á nærum reinum føroyskum. Men hann vil tó ikki taka sær allan heiðurin fyri, at norðmenn einans megnaðu at fáa 26 mál í dystinum.

- Tað, sum Pauli megnaði í endanum av dystinum var eisini eitt fantastiskt avrik. Tað er avgjørt ikki lætt at koma inn í ein so intensan dyst upp eitt tíðspunkt sum hatta, men Pauli megnaði tað.

Spælir í Noregi

Satchwell spælir í til dagligt í bestu norsku hondbóltsdeildini við TIF Viking í Bergen, sum ikki er eitt av toppliðunum. Har hevur hann sáttmála til næsta summar.

Spurdur um hann hevur fyrireikað seg serliga upp á norsku leikararnar, svarar Nicholas:

- Viking hevur spælt ein dyst móti Kolstad, har fleiri av teimum bestu landsliðsleikarunum, t.d. Sagosen, Gullerud, Johannesen og Rød spæla. Tað var ein dystur í steypakappingini, har vit ikki kláraðu okkum serliga væl. Men vit fyrireikaðu okkum væl, og eg havi tikið tær fyrireikingarnar við til henda dystin móti Noregi, so eitt sindur fyrireikaður var mann, sigur Satchwell, sum eftir dystin fekk nógvar heilsanir úr Noregi fyri góða avrikið.

(Mynd: Sverri Egholm)

Var bretskur landsliðsmálverji

Nicholas Satchwell hevur verið partur av føroyska landsliðnum síðan 2018. Hann hevur fyrr umboðað bretska landsliðið í hondbólti Eitt nú til olympisku leikirnar í London 2012, men fekk tó ikki nakran dyst tá.

Satchwell umboðaði eisini Bretland til emerging-kappingina í Kosovo í 2015, tá Føroyar vunnu, og sum kanska var byrjanin til upptúrin hjá føroyska manshondbóltslandsliðnum.

Hetta var sama ár, sum Nicholas Satchwell kom til Føroyar at standa í mál hjá Neistanum.

- Eg varð ikki úttikin til bretska landsliðið eftir kappingina í 2015, so tá hondbóltssambandið í 2018 spurdi seg fyri hjá mær, um eg var áhugaður at umboða føroyska landsliðið, var tað ikki ein so trupul avgerð hjá mær. Eg hevði staðið neyðugu karantenuna, og kundi vera við so at siga beinanvegin.

Tað var lætt at skifta hjá Nicholas, tí hann hevur dupultan dansk/bretskan ríkisborgaraskap.

- Eg spældi fyrsta landsdystin fyri Føroyar tá liðið í september 2018 spældi tveir venjingardystir úti móti Finnlandi.

Nicholas Satchwell er ikki tann á liðnum, sum stillar seg fremst, tá sigrar skulu feirast. Á myndunum her sæst hann fegnast í baggrundini eftir javnleikin móti Noregi (Myndir: Sverri Egholm)

Bonusvinningurin

- Í dag kann eg róliga, at tað var tann rætta avgerðin hjá mær at taka. Eg hevði ikki havt høvi at uppliva nakað, ið líkist hesum her, um eg framvegis hevði umboðað Bretland.

Og so hevur hann eisini fingið bonusvinning í unnustuni Jenny Kragesten og soninum tey hava saman, sum varð føddur í 2020. Harvið er Nicholas eisini komin inn í eina rætta hondbólts(Neista)familju, har serliga svágrarnir Tróndur og Julian hava gjørt um seg sum fyrrverandi og møguliga komandi landsliðsleikarar.

Hvat sigur hann so um komandi avbjóðingina – móti Polandi?

- Vit eru ikki komnir rættiliga í gongd við at fyrireika okkum upp á Poland enn, tað fara vit í gongd við nú. Vit hava sett okkum mál, sum vit royna at náa. Tað fyrsta var at koma í eitt endaspæl. Tað næsta var at fáa stig til eitt endaspæl. Nú er næsta málið at vinna ein dyst. Og tað fara vit sjálvandi at roynd móti Polandi mánadagin, sigur Nicholas Satchwell at enda. 

Greinin varð fyrstu ferð løgd út 14. Jan 2024

Polendingar í Berlin: Halda við báðum

Sabina Poulsen og Tomek Przybylski hava búð í Føroyum í ávíkavist 18 og 23 ár, og fylgdu føroyska EM-ævintýrinum í Berlin. - Polendingar halda, at føroyingar eru ótrúligir

Sabina Poulsen til dyst hósdagin - við Merkinum, føroyskari blusu og ymiskum flaggi málað á hvønn kjálka (Mynd: Sverri Egholm)

SkrivaÐ:

Agnar Prestá

- Tað er 50-50 í dag. Vit halda við Polandi og Føroyum og fara at syngja við til báðar tjóðsangirnar og skifta blusu ímillum. Ætla eisini at klappa eftir hvørt mál og kunnu tí ikki heilt tapa.

Hetta sigur Sabina Poulsen, sum Portalurin fekk orðið undan avgerandi dystinum mánadagin millum Føroyar og Poland. Hon og Tomek Przybylski hava búð í Føroyum í ávíkavist 18 og 23 ár, hava føroyskt pass og fylgja nú føroyska EM-ævintýrinum í Berlin

- Tað hevur verið fantastiskt. Hetta er nakað serligt at vera partur av, og allir polendingarnir, sum vit hava snakkað við her og sum skriva, halda eisini at føroyingar eru ótrúligir.

Sabina og Tomek á vitjan í posku leguni (Privatmynd)


Her saman við polska hópinum - fyri tey er tað heilt serligt, at Føroyar og Poland vóru í sama EM-bólki (Privatmynd)

Tað er millum annað tað, at talan er um eitt lítið land, ið stendur seg so væl, og at eini 5.000 fólk savnast á hendan hátt og stuðla so ógvuliga. Hetta hava stórir polskir miðlar og fyrrverandi spælarar - so sum Slawomir Szmal - eisini veruliga lagt merki til.

- Tey siga, at man ikki hevur sæð nakað líknandi við áskoðarum til eitt endaspæl leingi - kanska nakrantíð - so tað er ordliga stuttligt.

Fyri Sabinu Poulsen og tey er tað umráðandi, at vera eitt slag av polskum umboði fyri Føroyar í Berlin, og tað er nakað serstakt fyri tey, at londini eru í bólki saman.


Sabina Poulsen til dyst hósdagin - við Merkinum, føroyskari blusu og ymiskum flaggi málað á hvønn kjálka (Mynd: Sverri Egholm)

Sabina viðurkennir annars, at hon ikki veit nakað serligt um hondbólt. Tað ger Tomek hinvegin. Tey hava verið við til føroysku upphitingarnar, verið framvið til venjing hjá polska liðnum og annars upplivað býin og serstaka huglagið.

Greinin varð fyrstu ferð løgd út 15. Jan 2024

Søguligur sigur í Berlin – javnleikur móti norðmonnum

Elias var ísakaldur tá tað galt - skoraði upp á brotskast í seinastu sekundunum av sera spennandi dystinum móti Noregi

 

SkrivaÐ:

Ingi Samuelsen og Agnar Prestá

Elias Ellefsen á Skipagøtu, sum var syftur, sligin og skumpaður av stóru norðmonnunum gjøgnum allan EM-dystin leygardagin, var púra kaldur, tá tað galt.

Við fýra sekundum eftir og støðuni 25-26 til Noreg nápaði hann bóltin frá einum norðmanni, varð feldur ólógligt, og fekk brotskast til Føroyar. Og Elias tók sjálvur brotskastið, og setti bóltin trygt í netið aftan fyri Torbjørn Bergerud í málinum, sum annars hevði spælt ein framúr góðan dyst.

Og so var sensasjónin har. Føroyar fingu stig móti Noregi. Hetta er nakað av tí størsta, ið er hent í føroyskari ítróttasøgu yvirhøvur. Hetta er eitt endaspæl móti teimum allarbestu liðunum í Evropa.

Við hesum úrslitinum vóru vónirnar um at koma víðari ikki heilt mistar.

Norski málverjin, Torbjørn Bergerud, og føroyski stórspælarin, Elias Ellefsen á Skipagøtu, í avgerðandi løtuni (Mynd: Sverri Egholm)

Ongantíð frammanfyri

Føroyar vóru ongantíð frammanfyri í dystinum, men noktaðu at geva seg. Málverjarnir gjørdu mun - serliga Nicholas Satchwell - og Elias Ellefsen á Skipagøtu og Teis Horn Rasmussen gjørdust javnsettir toppskjúttar.

Føroyska avrikið var framúr, og liðið vísti heilt góðan anda í javna og inntensa dystinum við at venda 23-26 til 26-26 uppá tveir minuttir.

Frammanundan hesum høvdu Føroyar ikki skorað í nærum níggju minuttir, men góðar verjustøður og nakrar bjargingar frá Paula Jacobsen hildu okkum inni. Frammanundan hesum hevði Nicholas Satchwell staðið heilt væl. Málverjin, ið til dagliga spælir í Noreg hevði tíggju bjargingar - stóð við 40 prosentum.

Norski stjórnileikarin Sander Sagosen í skotroynd móti Nicholas Satchwell 

Allar myndirnar frá søguliga kvøldinum

Nøkur hagtøl: 
Dystargongdin:
5 min: 2-4
10 min: 4-5
15 min: 7-9
20 min: 9-10
25 min: 11-12
30 min: 12-13

35 min: 14-16
40 min: 17-18
45 min: 20-20
50 min: 23-23
55 min: 23-25
60 min: 26-26

Bjargingar:
Pauli Jacobsen 4/15 
Nicholas Satchwell 10/25

Tekniskar villur:
Føroyar: 9
Noreg: 8

Útvísingar:
Føroyar: 7
Noreg:5

Føroyskir málskjúttar:
Teis Horn Rasmussen 5
Elias Ellefsen á Skipagøtu 5 (2)
Hákun West av Teigum 4
Rói Berg Hansen 3
Óli Mittún 3
Vilhelm Poulsen 3
Kjartan Johansen 1
Leivur Mortensen 1
Pætur Mikkjalsson 1

(Brend skot: 18)

Greinin varð fyrstu ferð løgd út 13. Jan 2024

Bredsdorff: Serliga okkara verjuspæl var heimsklassi

- Við einum toppspælara sum Eliasi á Skipagøtu ber til at spæla 7 móti 6 allan dystin. Okkara spælarar hava sjálvsálitið til at gera tað

(Mynd: Sverri Egholm)

SkrivaÐ:

Ingi Samuelsen

Tað var ein sera fegin og errin Peter Bredsdorf Larsen, sum á middegi dagin eftir Noregsdystin hitti føroysku og altjóða pressuna.

Venjarin brúkti sítt útlegg til at vísa á hagtøl, sum teir høvdu funnið fram, og sum vísa hvør styrkin hjá føroyska liðnum í veruleikanum var leygarkvøldið.

- Vit spældu frálíkan hondbólt. Móti Slovenia vunnu vit í kontraspælinum. Móti Noregi stóð tað 7-7 til hvørt lið í kontraálopum. Tað er eitt óvanliga stórt avrik av okkum. Vit spældu móti eini av heimsins sterkastu hondbóltstjóðum, meðan fleiri á okkara liðið til dømis spæla í næstbestu deildini í Danmark, segði Peder Bredsdorff.

Eisini helt hann tað vera eitt gott avrik, at Føroyar einans høvdu seks ‘playing fouls’, altso mistu bóltin í álopi. Noreg hevði einans 4, sum er tekin um hvussu gott norska liðið er.

Føroyska verjuspælið riggaði framúr væl móti Noregi. Her Peter Krogh (nr. 45) og Vilhelp Poulsen (Mynd: EHF)

Verjuspælið fekk heiðurin

Men Peter Bredsdorff gav serliga føroyska verjuspælinum heiðurin fyri góða úrslitið.

- Vit vardu framúr væl – høvdu 11 bjargingar. Noreg fekk bert 26 mál og bert 37 skot á málið. Tað er ikki vanligt fyri eitt so stórt hondbóltsland móti einum so lítlum.

Tí rósti venjarin serliga sínum verjuleikarum fyri eitt framúr avrik, serliga tá hugsað verður um, at hetta var fyrstu ferð at nógvir av føroysku leikarunum møttu stóru stjørnunum sum Sagosen, Johannessen, Rød og hinum stórspælarunum.

Og so kundi Bredsdorff, sjálvandi, ikki lata vera við at nevna, at stórspælarin og -skjúttin Sander Sagosen einans fekk tvey mál í dystinum. Gøran Johannesen fekk eisini einans tvey í vanligum álopsspæli, hini málini hann fekk var í snarálopum.

Peter Bredsdorff Larsen í gjár (Mynd: Sverri Egholm)

Eru bara djarvir um tað gevur meining

Útlendskir fjølmiðlar undraðu seg yvir, at føroyski venjarin ikki nevndi avgerðina um at spæla 7 móti 6 longu frá fyrsta minutti. Tað var ein djørv avgerð, sum kundi endað heilt galið, helt journalisturin hjá evropeisku hondbóltssamgonguni, EHF.

Bredsdorff svaraði við at vísa aftur, at teir høvdu tikið eina djarva avgerð.

- Vit eru bara djarvir um tað gevur meining, og tað gjørdi tað í gjárkvøldið.

- Eg skal viðganga, at sjálvur eri eg ikki tilhangari av 7 móti 6 spæli, tað verði eg kanska eftirhondini, legði hann afturat læandi, og grundgav:

- Tá vit hava ein heimsklassaspælara sum Elias á Skipagøtu við, so gevur tað meining. Hann er millum teir allarbestu í 7 móti 6 spæli, og tað var eisini Elias sjálvur, sum trýsti á fyri at byrja dystin soleiðis, viðgekk Peter Bredsdorff.

- Hatta var ein liðavgerð. Vit vita, at tað riggar. Og tað riggar tí okkara leikarar hava sjálvsálitið til at kunna gera tað Minst til, at vit gjørdu bert seks feilir í álopinum, hóast við lupu á við ongum málmanni.

- Hvat fingu spælararnir at vita í leikbránum tá einans 12 sekund vóru eftir, vildi EHF-journalisgurin vita.

- Satt at siga veit eg ikki hvussu tað bar til hjá okkum at vinna. Eitt heimsklassalið sum Noreg átti at fingið hasi sekundini at ganga og fingið bóltin út til horna ella okkurt líknandi. Men Elias er klókur og fangar bóltin. Hepni skal til og tað lukkaðist. Men tað var eisini uppiborið, segði Peter Bredsdorff Larsen.

Greinin varð fyrstu ferð løgd út 14. Jan 2024

Norski venjarin: - Serliga Elias gjørdi tað trupult fyri okkum

Bredsdorff ætlar sær at vinna móti Polandi mánadagin, men væntar ikki at Noreg tapir so nógv móti Slovenia, at Føroyar koma víðari

Jonas Wille, norskur landsliðsvenjari (Savnsmynd: EPA)

SkrivaÐ:

Ingi Samuelsen

Tað var ein foyur norskur venjari, sum møtti til tíðindafundin eftir javnleikin móti Føroyum. Kanska heppið fyri hann, at tað ikki vóru so nógvir miðlar til staðar – og ongir úr Noregi.

Jonas Wille var eyðmjúkur í síni fráboðan.

- Tit gjørdu tað trupult fyri okkum. Serliga Skipagøtu gjørdi tað trupult fyri okkum. Men tað gjørdi málmaðurin (Nicholas Satchwell, -red.) eisini, serliga í endanum av fyrra hálvleiki og byrjanini av seinna. Vit spældu væl tá, men vit fingu ikki bóltin inn.

- Vit høvdu fyrimunin gjøgnum tað mesta av dystinum, men ávísar hendingar leiddu til tann serliga endan. Tað var ein smeitur fyri okkum, tí tað varð væntað av okkum, at vit fóru at vinna.

- Føroyingar spældu ein frálíkan dyst, og tað vil eg ynskja Føroyum til lukku við.

Upp á okkara fyrispurning, um hansara leikarar kendu trýstið frá talríku føroysku fjøldini, svaraði Jonas Wille, at tað nokk ikki varð galdandi fyri hansara leikarar.

- Áskoðarafjøldin lyfti teir føroysku leikararnar, tað var týðuligt. Tað, sum okkara leikarar vóru trýstir av, vóru meira væntaninar heimanífrá um at skula vinna við 10-15 málum móti føroyingum.

Flott at halda Noreg á 26 málum

Peter Bredsdorff Larsen var, sum vera mann, meira lættur í sinni á tíðindafundinum, og hann hevði eisini lovorð til áskoðararnar fyri dygga stuðulin, sum lið hansara fekk.

- Hetta var ein harður dystur  móti einum góðum liði. Men vit vistu, at um vit komu upp á sama støði, sum vit høvdu móti Slovenia, so høvdu vit ein møguleika, segði Peter Bredsdorff.

- Vit gagnnýttu møguleikan og fingu stig.

Tað, sum Bredsdorff tó segði seg vera mest ernan av var, at tað eydnaðist Føroyum at halda Noregi niðri á 26 málum. Tað er 'crazy' helt hann, tá hugsað verður um, at bróðurparturin av føroysku spælarunum spæla í donsku 2. deild.

Peter Bredsdorff viðgekk, at føroyingar vóru hepnir við at fáa javnleik.

Greinin varð fyrstu ferð løgd út 13. Jan 2024

Polendingarnir vóru ov sterkir

Okkara málverjar fingu tíverri ikki gongd á sínar bjargingar, og tað var helst høvuðsorsøkin til, at tað ikki eydnaðist okkum at standa polendingum kurl mánakvøldið

(Mynd: Sverri Egholm)

SkrivaÐ:

Ingi Samuelsen & Agnar Prestá

Eins og venjarin, Peter Bredsdorff Larsen ávaraði um frammanundan, so er Poland eitt sterkt lið við stórum og sterkum einstaklingum.

Og tað vísti seg, at tað vóru teir báðir, sum frammanundan vóru útpeikaðir sum lyklaleikarar, ið drupu føroyska spælið.

Vinstri bakkurin, Szymon Sicko, skoraði 10 mál í 11 royndum, og strikuspælarin, Kamil Syprzak, 9 í 11 royndum. Fleiri av málunum vóru upp á brotskast.

Men eisini polski málverjin stóð væl, tók 11 av 35 skotum, ið gevur eitt bjargingarprosent upp á 31,4.

Føroysku málverjarnir hinvegin høvdu ikki tann besta dagin í dag. Pauli Jacobsen tók 3 av 24 og Nicholas Satchwell tók 3 av 13.

Men vit vunnu greitt dystin um áskoðaraplássini, og so varð Elias Ellefsen á Skipagøtu enn einaferð, og væl uppiborið, valdur til dagsins leikara.

Føroysku málverjarnir fingu ikki gongd í bjargingarnar í kvøld, tíverri (Mynd: Sverri Egholm)

Við hesum er spenningurin eisini av í bólki D.

Polski sigurin gjørdi, at Føroyar misti sín møguleika at koma víðari. Poland hevði longu undan dystinum spilt sín kjans.

Harvið vistu bæði liðini, at tey vóru komin víðari, tá dysturin millum Solvenia og Noreg byrjaði seinni á kvøldið. Slovenia vann 28-27, og hevur sostatt betri útgangsstøði í miðumfarinum.

Sí myndirnar: Føroyar fullu við æru

Dagsins leikari, Elias Ellefsen á Skipagøtu (Mynd: Sverri Egholm)

Hagtøl frá dystinum

Dystargongdin:

5 min: 3-3
10 min: 6-5
15 min: 9-8
20 min: 11-10
25 min: 13-13
30 min: 15-15

35 min: 17-18
40 min: 19-20
45 min: 20-20
50 min: 25-26
55 min: 26-28
60 min: 28-32

Bjargingar:
Nicholas Satchwell 3/13 = 23 prosent
Pauli Jacobsen 3/24 = 12,5 prosent

Samanlagt 6 føroyskar bjargingar
(Pólski málverjin hevði 11 bjargingar (31 prosent)

Útvísingar:
Føroyar: 5
Pólland: 6

Føroyskir málskjúttar:
Hákun West av Teigum 10 (8)
Elias Ellefsen á Skipagøtu 9
Vilhelm Poulsen 2
Rói Berg Hansen 2
Óli Mittún 2
Teis Horn Rasmussen 1
Helgi Hildarson Hoydal 1
Leivur Mortensen 1

(Brend skot: 14)

Elias Ellefsen á Skipagøtu hevði flest assist - næstseinastu hond á - og varð kosin til dagsins spælara. 

Greinin varð fyrstu ferð løgd út 15. Jan 2024

Bredsdorff: - Hetta var dreingir móti monnum

- Men tit koma til at síggja meira til okkum í framtíðar kappingum, segði føroyski venjarin á almenna tíðindafundinum eftir dystin móti Polandi

Peter Bredsdorff Larsen leggur leikarunum lag á móti Polandi í kvøld (Mynd: Sverri Egholm)

SkrivaÐ:

Ingi Samuelsen

Føroyski landsliðsvenjarin ásannaði, at tað var ein dystur millum tvey heilt ymisk lið og tveir heilt ymiskar hondbóltsstílar, sum hittust í Berlin mánakvøldið.

- Eins og eg hevði óttast frammanundan, so gjørdist Poland okkara størsta forðing. Eg haldi, at tit vóru tað besta liðið, sum vit hava møtt í hesi kappingini, segði Peter Bredsdorff Larsen við polska starvsfelaga sín á tíðindafundinum eftir dystin.

- Vit stríddust við tí, vit høvdu, men hetta var dreingir móti monnum, sum vit sóu á vøllinum í kvøld. Eg skal viðganga, at eg framvegis trúði upp á sigur, tá tað stóð 26-26 seint í dystinum, men so skrædnaði tað fyri okkum.

Polski venjarin, Michal Skórski, var fáorðaður á tíðindafundinum.

- Eftir tveir ósigrar skuldu vit vinna í kvøld, og tíbetur eydnaðist tað fyri okkum uttan at nakar kom til skaða.

- Men eg má rósa Peter Bredsdorff fyri at hava gjørt eitt gott arbeiði. Føroyar eru eitt gott lið, staðfesti polski venjarin.

Hvat nú, vildi ein av útlendsku miðlamonnunum hava at vita, hvat verður tað næsta hjá føroyska landsliðnum?

- Vit komu higar fyri at skapa góð úrslit, og tað er eisini ætlanin hjá okkum framyvir. Hetta er ikki tað seinasta, sum tit hava sæð til hetta liðið. Tit mugu minnast til, at vit eru liðið við lægsta miðalaldri, go hesir dreingirnir hava framtíðina fyri sær, og tað eru eisini nakrir ungir spælarar afturat, sum standa og bíða eftir at sleppa við, segði Peter Bredsdorff.

- Vit hava nú funnið okkara heilt egna stíl, sum byggir upp á kvikleika. Vit spæla eitt slag av hondbólti, sum onnur ikki spæla, spennandi hondbólt, og tað er framvegis okkara ætlan at skapa stór úrslit, segði Peter Bredsdorff Larsen.

Greinin varð fyrstu ferð løgd út 15. Jan 2024

Næstan 90 prosent av føroyingum hugdu eftir EM-hondbólti

Stórur áhugi fyri EM-dystunum hjá Føroyum. 88,6 prosent siga seg hava hugt eftir Føroyar-Noreg leygarkvøldið, vísir kanning

(Mynd: Sverri Egholm)

SkrivaÐ:

Sverri Egholm

Kanning sum Spyr.fo hevur gjørt fyri Kringvarpið vísir at áhugin fyri EM millum føroyingar er sera stórur. Tað skrivar kvf.fo.

Serliga var tað dysturin millum Føroyar og Noreg sum hevði stóran áhuga millum hyggjararnar. 88,6 prosent av teimum spurdu svaraðu, at tey hugdu eftir spennandi dystinum móti Noreg, sum endaði 26-26.

84 prosent sóu dystin millum Føroyar og Pólland mánakvøldið, og 76,2 prosent sóu fyrsta dystin, sum var ímóti Slovenia hóskvøldið 11. januar.

Bara 8,8 prosent søgdu seg ikki hava sæð nakran dyst í sjónvarpinum.

- Vit hava ikki sæð so stór hyggjaratøl áður. Gaman í hava vit ikki hyggjaratøl fyri eitt nú valsendingar ella ólavsøkusendingar, har vit vita, at hyggjaratølini eisini eru høg, men hetta var nakað heilt serligt, sigur Ivan Hentze Niclasen, kringvarpsstjóri.

(Mynd: Sverri Egholm)

Einir 4000-5000 føroyingar vórðu í Berlin til teir tríggjar dystirnar hjá Føroyum.

Greinin varð fyrstu ferð løgd út 18. Jan 2024

H71 dreingirnir gjørdu reint borð

Tvey lið hjá H71, U14-dreingir og U16-dreingir, spældu farna vikuskiftið móti trimum lokalum dreingjaliðum úr Berlin. Teir vunnu allar

Ungur hoyvíkingar í gjøgnumbroti (Mynd: Sverri Egholm)

SkrivaÐ:

Agnar Prestá

Í samband við at nógvir ungir hoyvíkingar vóru í Berlin fyri at hyggja eftir A-landsliðnum, tóku venjarar og foreldur hjá H71 stig til venjingardystir í vikuskiftinum.

Fríggjadagin vunnu U14-dreingirnir flottan sigur, 35-28, á stórfelagnum Fücshe Berlin.

Bæði U14 og U16 dreingjaliðini vóru í dysti leygardagin, tá felagið Pfeffersport var á skránni. U14 dreingirnir vunnu 36-30, og U16 dreingirnir vístu rættiliga berlinarunum hvar skápið skal standa við einum 40-24 sigri.

Sunnudagin spældu D14 dreingirnir triðja dystin, sum var móti móti OSF Berlin. Aftur her vunnu hoyvíkingar greitt 37-26.

Portalurin var til staðar í skúlahøllini OSZ Sportshalli.

Allar myndirnar síggjast her

Greinin varð fyrstu ferð løgd út 13. Jan 2024

Haakon Lunov er nýggjur høvuðsvenjari í Klaksvík

41-ára gamli norðmaðurin hevur ikki nógvar royndir sum høvuðsvenjari men nógvar sum hjálparvenjari og greinari - millum annað í bestu norsku deildini, í Everton og í Celtic

Lunov hevur seinastu árini verið venjari í lægru norsku deildunum - hjá IF Fram. Nú skal hann taka við eftir Magna Hoseth og standa á odda fyri trýfaldu føroyameistarunum, sum hava Champions League-dystir í summar (Mynd: ki.fo)

SkrivaÐ:

Agnar Prestá

KÍ hevur nú funnið avloysaran hjá Magna Hoseth. Lagt varð upp til, at tað gjørdist Eirik Bakke, sum var í Klaksvík farna vikuskiftið, men royndi norðmaðurin bakkaði út av familjuávum.

Tað er ein triði norðmaður, sum nú hevur gjørt ein sáttmála við KÍ. Talan er um ein trý-ára sáttmála millum føroyameistararnar og 41-ára gamla Haakon Lunov. Hesum boðaði KÍ frá hóskvøldið.

- Nevndin í KÍ hevur arbeitt við at finna nýggjan venjara í eina tíð, eftir at Magne Hoseth skifti til Lyngby. Og nú er sáttmáli gjørdur við norska venjaran Haakon Lunov. Talan er um ein venjara við royndum í norskum fótbólti. 

Um nýggja venjarin skrivar Klaksvíkar Ítróttarfelag, at hann hevur UEFA Pro Licence venjara útbúgving, og hevur verið venjari og hjálparvenjari í bestu deildini í Noregi, umframt teimum lægru. Eisini hevur Haakon Lunov arbeitt við spælaramenning í bæði Celtic og í akademinum hjá Everton FC, og hann er útbúgvin bachelor í vísindum og fótbólti. 

Haakon Lunov hevur staðið á odda fyri IF Fram síðstu trý árini. Liðið flutti í fjør niður úr triðbestu norsku deildini

Greinin varð fyrstu ferð løgd út 18. Jan 2024

B36 hevur fingið norskan miðverja í hópin

26-ára gamli Thomas Rømo Lillo kemur úr Hødd í næstbestu norsku deildini, har hann spældi 24 dystir í 2023

- Hann er 1,86 metrar høgur sterkur á bóltinum, góður í ein ímóti einum støðum og annars ein sera professionellur leikari bæði á og uttanfyri vøllin

SkrivaÐ:

Agnar Prestá

B36 hevur skrivað undir við nýggjan miðverja. Talan er um 26-ára gamla Thomas Rømo Lillo úr Noregi. Hann hevur spælt fyri Hødd IL síðani 2022. Fyrsta árið var tað í triðbestu deildini, har hann, Jann Benjaminsen og hinir fluttu upp.

Lillo hevði tá spælt beint yvir 70 dystir í triðbestu deildini. Í fjør spældi miðverjin 24 dystir og skoraði tvey mál í OBOS-deildini. Nú flytir hann til føroyska høvuðsstaðin og B36, har Thomas Lillo verður liðfelagið við Jann Benjaminsen aftur. Nýggi spælarin veðrur lýstur á hendan hátt.

- Thomas er ein sera stinnur miðverji. Hann er 1,86 metrar høgur, sterkur á bóltinum, góður í ein ímóti einum støðum og annars ein sera professionellur leikari bæði á og uttan fyri vøllin.

Thomas er ein spælari vit hava verið eftir síðan kappingin endaði. Skjótleikin og tær dygdirnar hann hevur á bóltinum passa sera væl til spælistílin hjá okkum, og eru vit sera glaðir fyri at hann hevur skriva undir her, sigur Dan Brimsvík.

Greinin varð fyrstu ferð løgd út 15. Jan 2024

Mikkel Dahl heldur fram í HB

30-ára gamli danski áleyparin hevur higartil skorað 59 mál í 81 dystum fyri HB og skal aftur í ár fáa mál og stig í hús fyri felagið

Mikkel Dahl hevur skorað eina rúgvu av málum fyri HB - millum annað sum her í hálvfinaluni í kappingini um Løgmanssteypið í fjør, tá hann skeyt bæði málini hjá liðnum. HB vann steypakappingina (Mynd: Sverri Egholm)

SkrivaÐ:

Agnar Prestá

HB skal framvegis hava fleiri sáttmálar afturat uppá pláss til 2023, og í gjárkvøldið var ein umráðandi undirskrift kunngjørd.

Mikkel Dahl kom til felagið á summri 2020 og var við at skjóta HB til FM við 14 málum í 13 Betrideildardystum. HB vann greipuna hetta árið, og í fjør skoraði Mikkel Dahl bæði málini fyri HB í seinnu hálvfinaluni móti 07 Vestur, ið teir reyð-svørtu vunnu 2-1. Sigursvanda felagið vann eisini finaluna um Løgmanssteypið.

Nú 30-ára gamli danin hevur harvið vunnið trý steyp fyri felagið. Mikkel Dahl hevur spælt fyri HB í tvey og eitt hálvt ár - í 2021 setti Mikkel føroyskt met við 27 málum í 25 Betrideildardystum, og skoraði hann eisini móti Maccabi Haifa í Conference League.

Um hugt verður eftir tølunum á FaroeSoccer, so hevur áleyparin skorað 59 mál í 81 dystum fyri HB. Eftir eitt ár í Íslandi í 2022 vendi Mikkel Dahl aftur til Føroyar og HB í fjør, og skoraði hann í miðal í umleið øðrum hvørjum dysti. Í 2024 verður Dahl, ið eisini er arbeiðssamur og umráðandi í fyrsta trýstinum, aftur ein lykil.

Greinin varð fyrstu ferð løgd út 18. Jan 2024

Heðin Askham legst afturat venjarartoyminum í Hoyvík

FC Hoyvík hevur sett Heðin Askham sum hjálparvenjara afturat Bill McLeod Jacobsen, sum er høvuðsvenjari

(Savnsmynd: Sverri Egholm)

SkrivaÐ:

Sverri Egholm

FC Hoyvík hevur gjørt avtalu við roynda venjaran Heðin Askham, sum nú legst afturat venjaratoyminum hjá 1. deild monnum sum hjálparvenjari saman við Bill McLeod Jacobsen, høvuðsvenjara.

Árini 2006-2014 arbeiddu teir báðir saman á føroysku U19 og U21 landsliðunum hjá dreingjum, har teir fingu nógv góð úrslit. Millum annað bestu stigaúrtøku nakrantíð.

- Drúgvu royndir teirra við bæði ungdómi og vaksnum hava stóran týdning í Hoyvík, her ein av stóru uppgávunum er at byggja brýr millum ungdóms- og vaksnamannafótbóltin í felagnum, skrivar FC Hoyvík.

Sum høvuðsvenjari hjá EB/Streymi vann Heðin Askham føroyameistaraheitið í 2012 og var steypavinnari í 2010 og 2011. Umframt hetta hevur hann vant fleiri feløg í bestu deildini.

Greinin varð fyrstu ferð løgd út 17. Jan 2024

TB vann á KÍF í Bónus-kappingini

Bónus-kappingin, kvinnur: KÍF – TB 1-3 (22-25, 26-24, 17-25, 22-25)

 

SkrivaÐ:

Innsent

KÍF hevur givið øllum liðum mótstøðu í ár, men samstundis hava avrikini gjøgnum heilar dystir verið ov óstøðug til at vinna teir, og tað sást aftur í steypakappingini farna vikuskiftið, tá TB vitjaði í Kollafirði og vann 3-1.

Eftir at KÍF hevði lagt seg framum 8-5 í fyrsta setti, vann TB fimm stig á rað og fór framum 10-8, áðrenn KÍF javnaði til 10-10 eftir smasjj og serviess frá Elsu Samuelsen, sum sum sló nógv og hart gjøgnum allan dystin og var eisini stinn í blokkinum. Tað sá út til, at tað fór at kosta KÍF settið, tá tær taptu seks av teimum næstu sjey bóltunum, og støðan gjørdist 11-16 og síðani 15-20, men eftir leikbrá bardi KÍF seg inn aftur í settið og javnaði til 20-20. Gleðin gjørdist tó stokkut, tí TB vann tríggjar teir næstu bóltarnar, og síðani settið 25-22.

Í øðrum setti rann KÍF fyri tað mesta aftaná, tó at TB hevði trupult við veruliga at slíta seg leyst. Men settið tóktist at verða komið undir land, tá TB legði seg á odda 24-21, men fimm bóltar seinni hevði KÍF vent øllum á høvdið og vunnið settið 26-24.

Eftir hetta gekk av skriðuni hjá KÍF, sum eftir javnleik 7-7 í fjórða setti misti alt á gólvið. Sharon Haynes servaði TB frá 12-9 til 18-9, áðrenn TB vann 25-17 – hesaferð við smassji mitt fyri frá Sharon.

KÍF kom tó fyri seg aftur og legði seg á odda 6-1 í fjórða setti, men leiðslan var alt fyri eitt spilt burtur, og TB javnaði til 6-6 eftir leikbrá, har venjarin hevði havt stóru stavirnar frammi. KÍF endurvann sær kortini leiðsluna og kom upp á 11-6, men aftur javnaði TB til 12-12. KÍF togaði seg framumaftur 16-15, men fýra stig á rað til TB gjørdust avgerandi, og hesa ferð megnaði TB at halda fast og vinna settið 25-22, eftir at liðskiparin Johanna Christiansdóttir langaði bóltin í postkassan hjá KÍF.

Støðan í bólki 2 eftir eitt umfar í Bónus-kappingini er tann, at Dráttur og TB hava 3 stig, meðan KÍF og Fleyr hava onki stig. 

Tvey tey bestu liðini í hvørjum bólki spæla hálvfinalur í Klaksvík leygardagin 10. februar. Sjálv steypafinalan verður í Havn tvær vikur seinni, 24. februar.

Greinin varð fyrstu ferð løgd út 13. Jan 2024

Flogbóltur: Oddaliðið Dráttur misti stig ímóti KÍF

Finaluvónin hjá TB svann eftir ósigur fyri Fleyr

Dráttur

SkrivaÐ:

Innsent

Føroya Tele-deildin, kvinnur
KÍF – Dráttur 2-3 (25-15, 20-25, 25-20, 15-25 8-15)

Dráttur er framvegis ósigrað í kappingini, men fyri triðju ferð var oddaliðið kroyst út í fimm sett, tá KÍF sunnudagin vann sítt fyrsta stig síðani 22. oktober, tá kollfirðingar høvdu vunnið báðar sínar fyrstu dystir í kappingini.

KÍF legði grundina í fyrsta setti, tá tær fóru frá 5-6 upp á 12-6 og 15-7. Dráttur megnaði ikki at svara aftur, og so vann KÍF 25-15. Aftursvarið kom tó í øðrum setti, tá Dráttur legði seg á odda 12-6 og megnaði at halda munin, tað sum eftir var av settinum, sum Dráttur vann 25-20.  

Í triðja setti gekk javnt á til 11-11, tá KÍF sleit seg leyst við seks stigum í einum háli, og legði seg á odda 17-11. Eftir hetta var settið ongantíð í vanda, og KÍF vann 25-20.

Sostatt hevði KÍF tryggjað sær sítt fyrsta stig í Føroya Tele-kappingini síðani annað umfar. Spurningurin var nú, um tað skuldi gerast til trý, tvey ella eitt stig. Men skjótt sást, at tað fór í øllum førum ikki at gerast til trý stig, tá ið Dráttur leyp avstað í fjórða setti og legði seg á odda 8-0 og 11-1, áðrenn settið varð vunnið 25-15.

Í javnbrótaranum gjørdi Dráttur enn eitt skarvslop og fór framum 5-1, men KÍF svaraði aftur og javnaði til 5-5. Gleðin var tó stuttlívað, tí Dráttur vann seg framumaftur 8-5, og hesaferð megnaði KÍF ikki at svara aftur, og so vann Dráttur 15-8. 

TB – Fleyr 0-3 (22-25, 23-25, 8-25)
Eftir tap fyri Fleyr sunnudagin tykist vónin hjá TB at røkka finaluplássinum at vera fokin nú tey sjey stigini, sum vóru á muni millum liðini, øktust upp í tíggju, tó at TB hevur leikt ein dyst færri.  

Fleyr tók fyrsta settið 25-22, eftir at TB hevði barst seg upp á javnleik 19-19, eftir at hava verið aftanfyri 14-19. Fýra á rað frá 20-20 til 24-20 til Fleyr gjørdust tó avgerandi. 

Í øðrum setti dró Fleyr so líðandi frá, og legði seg á odda 19-12, men tað var um reppið, at TB ikki  javnaði, tá tær yvirlivdu fýra settbóltar og komu upp á 23-24. Men við tí fimta settbóltinum eydnaðist Fleyr at vinna.

Eftir hetta fór TB í svart – í fluttari merking – og Fleyr legði seg á odda 6-0 og 12-1, og so var bara spurningur um hvussu nógv, Fleyr skuldi vinna. Tað gjørdist til 25-8.

Støðan í Føroya Tele-deildini, kvinnur, er tann, at Dráttur hevur 27 stig, Fleyr 20, SÍ 15, Mjølnir 11, TB 10, KÍF 7 og Ternan 0 stig. Mjølniran og Tern fyri 7 dystir, TB fyri 8, Fleyr og SÍ fyri 9 og Dráttur og KÍF fyri 10 dystir.

Næstu tvær vikurnar verða eingir dystir í landskappingini, tí spælt verður í bólkaspælinum í steypakappingini.

Greinin varð fyrstu ferð løgd út 15. Jan 2024