Tórshavnar Golffelag fær nú felagsshús á Glyvursnesi

Talan er um ein leigusáttmála við kommununa, sum er galdandi næst tíggju árini

Mikudagin skrivaðu Heðin Mortensen, borgarstjóri í Tórshavnar kommunu, og Rógvi Mikkelsen, formaður í Tórshavnar Golffelag, undir leigusáttmála um felagshús til Tórshavnar Golffelag á Glyvursnesi (Myndir: torshavn.fo)

SkrivaÐ:

Agnar Prestá

Í vikuni skrivaðu Heðin Mortensen, borgarstjóri í Tórshavnar kommunu, og Rógvi Mikkelsen, formaður í Tórshavnar Golffelag, undir leigusáttmála um felagshús til Tórshavnar Golffelag á Glyvursnesi.

Tórshavnar kommuna skrivar á heimasíðu sínari, at í sambandi við ætlanina at gera golfvøll á Glyvursnesi hevur kommunan fingið nýtslurætt til alt lendið og bygning á staðnum.

- Tórshavnar Golffelag kann við hesum dagføra bygningin og skipa felagsvirksemið munandi betri, umframt at felagshúsið eisini fer at fevna um innandura venjingarumstøður bæði til roynd og byrjarar, eisini til børn.

Leigusáttmálin millum Tórshavnar kommunu og Tórshavnar Golffelag um felagshús er galdandi í 10 ár.

Fyri kortum bjóðaði kommunan arbeiðið at byggja golfvøll við níggju holum/breytum út, og inn eru komin tvey tilboð. Væntandi verður málið lagt fyri komandi býráðsfund, skrivar torshavn.fo

(Mynd: torshavn.fo)

Greinin varð fyrstu ferð løgd út 06. juni 2024

Oyggjaleikanevndin 27 er mannað

Seks fólk eru í Oyggjaleikanevndini 27, sum skal standa á odda fyri leikunum í Føroyum í 2027 – Teitur Samuelsen, stjóri í Pf. Eystur- og Sandoyartunlar, er formaður í Oyggjaleikanevndini 27 og hevur fíggjarligu og umsitingarligu ábyrgdina av leikunum

Oyggjaleikanevndin 27 hevur havt sín fyrsta fund við ÍSF. Petur Mittún, aðalskrivari í ÍSF, Niels Mortensen, stjóri í SMS, John Kjær, serligur oyggjaleikaráðgevi, Guðrið Højgaard, stjóri í VFI, Doris Bjarkhamar, ráðgevi á Løgmansskrivstovuni, Elin Heðinsdóttir Joensen, forseti í ÍSF, Solby Anna Christiansdóttir, oyggjaleikasamskipari, Teitur Samuelsen, stjóri í p/f Eystur- og sandoyartunlar og p/f Suðuroyartunnlin. Anna Maria Toftegaard, starvsnevndarlimur í ÍSF, vantar á myndini

SkrivaÐ:

Tíðindaskriv

Seks fólk eru í Oyggjaleikanevndini 27, sum skal standa á odda fyri leikunum í Føroyum í 2027. Oyggjaleikanevndin 27 hittist fyri fyrstu ferð 6. juni. Talan er um eina fyrireikingarnevnd við seks limum, sum hvør í sínum lagi hava ábyrgdina av ymsum viðurskiftum á Oyggjaleikum 2027.

Teitur Samuelsen, stjóri í Pf. Eystur- og Sandoyartunlar, er formaður í Oyggjaleikanevndini 27 og hevur fíggjarligu og umsitingarligu ábyrgdina av leikunum, Annleyg Lamhauge úr Visit Faroe Islands fer at hava ábyrgd fyri flutningi, gisting og vistarhaldi, men fyrstu tíðina er Guðrið Højgaard, stjóri í VFI, í nevndini fyri Annleyg. Niels Mortensen, stjóri í Pf. SMS hevur handilsliga og sponsor partin um hendi, meðan Doris Bjarkhamar, ráðgevi á løgmansskrivstovuni, situr við ábyrgdini fyri heilsu- og trygdarmálum.

Tveir limir í Oyggjaleikanevndini 27 eru úr starvsnevndini í Ítróttasambandi Føroya. Limirnir eru Elin Heðinsdóttir Joensen, forseti, og Anna Maria Toftegaard, starvsnevndarlimur. Elin Heðinsdóttir Joensen hevur ábyrgdina av ymiskum tiltøkum á leikunum so sum setan, endahátíð og onnur ítróttalig og mentanarlig tiltøk, meðan Anna Maria Toftegaard fer at hava ábyrgdina av teimum mongu sjálvbodnu, burðardygd, kunning og sosialum miðlum.

Umframt hesi seks fólkini eru John Kjær, serligur oyggjaleikaráðgevi, og Solby Christiansdóttir, oyggjaleikasamskipari, eisini knýtt at nevndini, og væntast kann, at onnur verða knýtt at nevndini, so hvørt sum leikirnir nærkast.

13. juli er árligi aðalfundurin hjá altjóða oyggjaleikanevndini, IIGA, í Orknoyggjunum, sum hýsir leikunum næsta ár. Á hesum aðalfundinum verður endaliga samtykt og staðfest, at Føroyar skulu hýsa Oyggjaleikum 2027. Oyggjaleikanevndin 27 tekur formliga við eftir summarfrítíðina.

Oyggjaleikir eru í Føroyum í døgunum 3. til 9. juli 2027, og kappast verður í 14 ítróttagreinum. Tær 14 eru: Badminton, bogaskjóting, borðtennis, fimleikur, flogbóltur herundir eisini sandflogbóltur, fótbóltur, frælsir ítróttir, judo, kurvabóltur, súkkling, skjóting, svimjing, tennis og triatlon.

Greinin varð fyrstu ferð løgd út 06. juni 2024

Nýggj breiddarpulja til ítróttina

ÍSF letur upp fyri umsóknum til eina nýggja breiddarpulju. Endamálið er at hjálpa feløgum og sambondum at skipa fyri tiltøkum, sum eggja til trivnað, samstarv og felagsskap. Í ár eru 250.000 krónur í puljuni, men komandi ár verður talan um hálva millión

- Vit vita, at feløg og sambond hava nógv góð hugskot, men at tað kann vera tungt fíggjarliga at skipa fyri tiltøkum - serliga hjá smáum feløgum og ítróttagreinum, sigur Elin Heðinsdóttir Joensen, ÍSF-forseti (Savnsmynd)

SkrivaÐ:

Tíðindaskriv

Ætlanin við breiddarpuljuni er at stuðla tiltøkum, sum fáa fleiri við, skapa trivnað og styrkja felagsskapin og sjálvbodnu fjøldina, fremja inklusjón og integratión - og tiltøkum, sum fremja samstarv tvørtur um feløg ella tvørtur um ítróttagreinar.

Treytin fyri at fáa fígging úr puljuni er, at tiltakið, sum skipað verður fyri, ikki snýr seg um kapping á høgum stigi, men at megintátturin er menning, sosial samvera og felagsskapur í breiðasta høpi.

Elin Heðinsdóttir Joensen, forseti í ÍSF sigur, at tørvur er á eini slíkari pulju til breiddina.

- Vit vita, at feløg og sambond hava nógv góð hugskot, men at tað kann vera tungt fíggjarliga at skipa fyri tiltøkum - serliga hjá smáum feløgum og ítróttagreinum.

Allar ítróttagreinar kunnu søkja úr Breiddarpuljuni – og talan kann bæði vera um sambond og feløg. Við hesi skipanini eggja vit eisini til samstarv - bæði millum feløg og millum ítróttagreinar. Ein einstakur fyrireikari kann søkja upp til 30.000 krónur. Men sláa fleiri seg saman um eitt tiltak, ber til at søkja um upp til 50.000 krónur.

Skipanin lat upp fyri umsóknum 3. juni, og ætlanin er, at umsóknir kunnu koma inn leypandi ígjøgnum árið. Svarfreistin er í mesta lagi fimm vikur.

- Tað er avgerandi, at tað skal vera lætt at søkja og at viðgerðin skal ganga skjótt fyri seg. Tað skal bera til at fara frá hugskoti til handling innan stutta tíð, greiðir Elin H. Joensen frá.

Á aðalfundinum hjá ÍSF varð samtykt at royndarkoyra breiddarpuljuna í 2024 og síðani eftirmeta arbeiðið fyrst í komandi ári.

Ætlanin er at seta 500.000 krónur av um árið, men eftirsum árið longu er hálvliðið, verða í ár settar 250.000 krónur av.

Umsóknarblaðið er á heimasíðuni hjá ÍSF.

Greinin varð fyrstu ferð løgd út 03. juni 2024

Magne Hoseth nýggjur B36-venjari

Fyrrverandi KÍ-venjarin tekur við sum høvuðsvenjari í B36 beinanvegin

(Savnsmynd: Sverri Egholm)

SkrivaÐ:

Sverri Egholm

Tað verður eitt kent andlit, sum skal fáa tingini at rigga í B36 tað, sum er eftir av hesum kappingarárinum.

B36 kunnger hóskvøldið, at Magne Hoseth er settur sum nýggjur høvuðsvenjari hjá felagnum, og norðmaðurin tekur við starvinum beinanvegin. B36 hevur sostatt gjørt ógvuliga skjótt av. Tað var týsdagin, at tað gjørdist greitt, at Dan Brimsvík ikki longur skal standa á odda fyri B36 í Betri Deildini orsaka av at úrslitini ikki hava staðið mát vil málsetningarnar, sum venjarin og felagið settu.

43 ára gamli Magne Hoseth var venjari í KÍ í fjør við søguliga góðum úrslitum. Í vetur flutti hann til Lyngby, har samstarvsavbjóðingar elvdu til, at hann bara fekk tveir dystir í donsku superliguni.

Hoseth sigur seg vera takksaman fyri at fáa møguleikan í B36, og samstundis at sleppa aftur til Føroya.

- Tað er eingin ivi um, at hetta er ein gávuríkur spælarahópur við stórum potentiali. Eg havi sum heild eina sera góða fatan av felagnum, ið eisini hevur lagt eina ambitiøsa ætlan fyri framtíðina. Í Føroyum og B36 sleppi eg at arbeiða við trúgvum fólki við teimum røttu virðunum, og tað hevur stóran týdning fyri meg, sigur hann við heimasíðuna hjá B36.

(Mynd: Sverri Egholm)

Sáttmálin galdandi restina av árinum
Marita Debess Magnussen, forkvinna í B36, sigur tað vera umráðandi, at nýggi høvuðsvenjarin, sum tekur yvir so brádliga, kennir umstøðurnar og mentanina í Føroyum.

- Magne hevur góðan kunnleika til føroyskan fótbólt, og hann veit, hvat krevst fyri at fara út í Evropa við einum føroyskum spælarahópi. Hoseth kemur eisini við nógvari orku og fjølbroyttum royndum sum venjari og spælari, sigur hon.

Lukas Enevoldsen, sum hevur verið hjálparvenjari í ár, heldur fram við sínum uppgávum.

Avtalan millum B36 og Magne Hoseth er galdandi fyri hetta kappingarárið. Eftir kappingarenda verður støða tikin til, um partarnir skulu halda fram við samstarvinum.

Fyrsti dysturin við Magne Hoseth á síðulinjuni verður leygardagin 15. juni. Tá fær B36 vitjan av B68 í landskappingini.

Greinin varð fyrstu ferð løgd út 06. juni 2024

Víkingur varpaði KÍ fyribils úr FM-stríðnum

Eitt sterkt avrik av liðnum úr Eysturkommunu meðan trýfaldu føroyameistararnir til tíðir sóu ráðaleysir út og taptu triðja landskappingardystin í ár. Seks stig skilja nú liðini aftur

Poul Kallsberg legði upp til bæði málini hjá Víkingi - tað fyrra til Olad Bárðarson og tað seinna var stútari hjá Arnbirni Svensson (Savnsmynd: Jens Kr. Vang)

SkrivaÐ:

Agnar Prestá

Tríggjar vikur frammanundan vann KÍ 2-1 á Víkingi. Sunnudagin hittust liðini aftur í Klaksvík, og hesaferð var útiliðið omaná. Hetta merkir, at nú eru aftur seks stig millum kappingarneytarnar, og at Víkingur verður verandi í oddasessinum.

KÍ legði hart út, men so tók Víkingur yvir, og hevði nakrar stórar møguleikar fyri steðgin. Millum annað átti Finnur Jusinussen havt skorað upp á stútara eftir gott innlegg. Ein annan møguleika fekk Olaf Bárðarson. Hetta var eftir 35 minuttir, tá Poul Kallsberg fekk bóltin innum verjuna í høgru síðu, teir á heimaliðnum vóru ikki heilt uppá pláss, Olaf var púra frúr við aftaru stong og so var 1-0. 

Páll Klettskarð hevði stútara eftir gott innlegg frá Árna Frederiksberg stutt fyri steðgin, men Bárður á Reynatrøð bjargaði væl. Fleiri ferðir í dystinum var Víkinga-verjan væl fyri, men tað var ikki, fyrrenn tað varð 2-0, at KÍ veruliga fekk skapt vandastøður aftur. 

Víkingur hevði verið nær við at revsa eitt av mongu mistøkunum í KÍ-uppspælinum tíðliga í 2. hálvleiki. Tað var miðskeiðis í 2. hávleiki, at tað eydnaðist at økja: Poul Kallsberg legði fríspark væl innfyri úr høgru, Arnbjørn Svensson rann seg púra frían, meðan nakrir KÍ'arar snorksvóvu, og so stútaði miðverjin bóltin í málið á vakran hátt. Arnbjørn tók aftur stóra ábyrgd, saman við millum annað Atla Gregersen og Geza Turi. Hann er púra uppiborið í landsliðshópinum, sum nú er farin til Baltic Cup. Hví Poul Kallsberg ikki fær møguleikan, er at undrast eitt sindur á.

At Víkingur í løtuni er á betri staði enn KÍ, hóast millum annað Sølvi Vatnhamar vantar, var hesin dysturin gott prógv um. KÍ fall tó ikki í fátt og var ógvuliga nær við at minka um munin - serliga tá Arnbjørn Svensson bjargaði roynd frá Jonn Johannessen á mállinjuni. Tað hekk tó samanlagt ikki nóg væl saman hjá heimaliðnum, har ein rúgva av misskiljingum og skeivum alveringum sást.

Tað endaði 2-0. Fyrrverandi hjálparvenjarin Espen Haug hevur nú høvuðsábyrgdina og skal fáa nógv at sita betri næstu vikurnar, um KÍ skal gera nakað um seg í Evropa og koma veurliga inn í FM-stríðið aftur. Ikki síðani 2020 hevur KÍ tapt tríggjar dystir í Betrideildini - nú hevur liðið tríggjar ósigrar fyrstu 12 umførini  (móti B36, HB og Víkingi)

Víkingarnir vóru hinvegin vælskipaðir. Teir høvdu yvirskot og reistu seg eftir steypatapið í Gundadali fyrr í vikuni. Hetta var 11. sigurin av tólv møguligum í Betrideildini í ár hjá Jóhan Peturi Poulsen og hansara monnum.

Royndi gøtumaðurin, Heðin Hansen, syrgdi fyri, at HB hevur eins nógv stig sum Víkingur eftir tólv umfør (Savnsmynd: Sverri Egholm)

Heðin Hansen avgjørdi fyri HB í dramatiskum dysti

HB vísti eyðkenni og huglag sum eitt meistaralið í Runavík sunnukvøldið. Ikki við at lata tvey mál inn í 83. minutti, men við at svara aftur, og onkursvegna fáa øll stigini við sær til høvuðsstaðnum aftur eftir trupla uppgávu.

Tað er torført at spæla móti NSÍ. Tað hava øll lið fingið at sannað í ár. HB kom á odda longu í 10. minutti í dag, tá Mikkel Dahl sló til. NSÍ hevði heldur torført við at skapa stórar málmøguleikar móti vælskipaða HB-verjupartinum, sum manglaði skadda Bartal Wardum.

Útiliðið flutti eisini bóltin væl í fleiri løtum við Løkin, og tíðliga í 2. hálvleiki økti Sammy Skytte. Sterki miðvallarin fekk gott innlegg frá Hanusi Sørensen úr høgru og var púra fríur, tá hann stútaði bóltin í málið til 2-0. Ikki gott verjuspæl hjá heimaliðnum.

Síðani sá tað leingi trygt út hjá HB. NSÍ byrjaði tó at leggja fleri bóltar inn í HB-brotsteigin, og í 83. minutti sendi Pætur Hentze eitt innlegg úr høgru. Tað endaði tó sum eitt gott skot, ið heilt snýtti Teit Matras Gestsson - málverjin las ikki kósina hjá bóltinum rætt.

HB gav síðani bóltin upp, Heðin Hansen misti bóltin, Búi Egilsson legði inn úr vinstru, Petur Knudsen rakti stongina, men var síðani fyrstur á returbóltinum sum hann stútaði í málið. Ikki bara spenanndi aftur, men 2-2 og alt vent á høvdið.

Man skuldi trúð, at liðið hjá Adolfo Sormani var skelkað. Tað var tað helst eisini, men teir í reyðum og svørtum svaraðu aftur. Beint sum yvirtíðin byrjaði kom bólturin útfrá til Heðin Hansen, sum setti innarusíðuna væl á. Bólturin sníkti seg millum vinir og fíggindar. Kristian Joensen kundi kanska tikið skotið, men málverjin sá tað helst seint, og so var HB-fagnaður aftur við Løkin.

2-3 við Løkin og aftur trý stig til HB. Hetta var tíggjundi landskappingarsigurin á rað og tann 13. samanlagt. HB hevur víst sinnisliga styrki í ár og sanniliga evni til at avgera tættar fótbóltsdystir.

B36 hevur stórar trupulleikar

Fyri aðru ferð í ár endaði tað við javnleiki millum 07 Vestur og B36 í Gundadali. Talan var um ein óruddiligan fótbóltsdyst og eitt úrslit, sum bæði feløgini eru heldur ónøgd við.

Útiliðið vísti nakrar góðar taktir, men kann iðra seg um, at man ikki helt fast í leiðsluni í  fýra royndum móti einum sárbærum mótsstøðuliði. 

Tað er tó ikki oftari enn so, at 07 Vestur fær stig í Gundadali. Tískil er tann parturin góðkendur. Tríggjar ferðir í fyrra hálvleiki skoraði 07 Vestur, har tað sæð við brillunum hjá útiliðnum var væl spælt. Útlendskir spælarar, og í triðja málinum ungi vágamaðurin, Julian Mouritsen, høvdu góðar atgerðir. 

Við B36-brillum var tað ikki pent. Verjan hevur verið ein stórur trupulleiki seinastu tveir mánaðirnar, og tað sigldi í 1. hálvleiki. Í sambandi við 2-3 málið vóru tað landsliðsúttiknu Silas og Jann í felag, sum ikki fingu avgreitt eitt innlegg, har liðformaðurin koyrdi bóltin í egið mál við bringuni.

Fjórða málið átti Silas Eyðsteinsson sjálvur. At sandavágsmaðurin kann standa væl í Betrideildini, og at hann hevur arbeitt fyri sínum møguleika í B36, hevur hann prógvað. Men seinastu tveir dystirnar hevur Silas, ið tók yvir fyri Bjarta Mørk, kostað fleiri mál. Stór spurnartekin kunnu setast við landsliðsúttøku hansara, tí málverjin hevur spælt so lítið í fremstu røð seinastu tvey árini. Í 55. minutti helt hann onkursvegna ikki langskotinum hjá Benjamin Braithwaite, og so var 4-3 Eitt korter seinni tók Dan Brimsvík avleiðingina og skifti málverja.

Tað jaliga í hesum dystinum var, at B36 svaraði aftur fýra ferðir. 

Villiam Emil Klein skoraði tvær ferðir í fyrsta sigrinum hjá B68 í ár (Savnsmynd: Sverri Egholm)

B68 vann sín fyrsta dyst í Betrideildini í ár

Tvær spennandi botnuppgerðir vóru í Betrideildini leygardagin. Tey bæði liðini undir strikuni høvdu undan dystunum ongan sigur, og harðliga tørv á stigum - annað nærkaðist strikuni og hitt kom í væl størri trupulleikar.

Skála tók eitt felt longur burtur frá niðurflytingarstríðnum. Fyri aðru ferð í ár vann liðið hjá Paula Poulsen tepurt á ÍF, og nú eru tíggju stig millum hesi liðini. Skála hevur við sigrinum trý stig fleiri enn í øllum kappingárinum 2022, tá Skála flutti niður.

Tað var 17-ára gamli Markus Isaksen, sum gjørdist stóra hetjan hjá Skála. Innskifti áleyparin kastaði seg fram og beindi innlegg frá Ragnari Skála í málið hjá ÍF í 85. minutti. ÍF hevði annars vent dystinum í 2. hálvleiki, har útiliðið til tíðir hevði stóra yvirvág, og útlendsku áleypararnir slóu til. Skála gjørdi tó nóg mikið at vinna dystin. ÍF spældi enn ein javnan dyst, ónøgd var um lyklaavgerðir hjá dómarunum, men einki stig og liðið hjá Jákup Martini Joensen í stórum trupulleikum.

Eftir níggju mánaðir uttan sigur í Betrideildini bragdaði tað loksins hjá B68. Tað var móti EB/Streymi á Svangaskarði.

Tað leikaði javnt á, men stutt fyri steðgin fekk Villiam Emil Klein beint bóltin í málið, eftir at beiggi hansara, Bartal Páll Klein, hevði roynt seg.

EB/Streymur fekk samanlagt ikki heilt lagt trýstið eftir steðgin, og í kontraálopið  í 79. minutti tók Villiam Emil sakina í egnar hendur. Havnarmaðurin rak langt við bóltinum, og stutt uttanfyri brotsteigin smekkaði 23-ára gamli sterki álopsspælarin til. 2-0, fimta málið samanlagt hjá Villiami Emil Klein í ár og trý stig til B68, sum nú bert er eitt stig frá EB/Streymi.

Betrideildin 12. umfar

KÍ - Víkingur 0-2 (0-1)
26' 0-1 Olaf Bárðarson (Poul Kallsberg)
69' 0-2 Arnbjørn Svensson (Poul Kallsberg)

B36 - 07 Vestur 4-4 (3-3)
14' 0-1 Filip Brattbakk (Maxwell Effiom)
23' 1-1 Jelle van der Heyden (Magnus Egilsson)
28' 1-2 Sjálvmál
34' 2-2 Hannes Agnarsson (Jann Benjaminsen) 
39' 2-3 Sjálvmál
41' 3-3 Anton Søjberg (Jelle van der Heyden)
55' 3-4 Benjamin Smales Braithwaite (Erik Gunnarsson)
72' 4-4 Jann Benjaminsen

NSÍ - HB 2-3 (0-1)
10' 0-1 Mikkel Dahl 0-1
55' 0-2 Sammy Skytte (Mohammed Samba)
83' 1-2 Pætur Hentze
83' 2-2 Petur Knudsen
90+1' 2-3 Heðin Hansen

B68 - EB/Streymur 2-0 (1-0)
38' 1-0 Villiam Emil Klein
79' 2-0 Villiam Emil Klein (Bartal Páll Klein)

Skála - ÍF 3-2 (2-0)
13' 1-0 Sjálvmál
18' 2-0 Carlos Ferreira (Djóni Petersen)
21' 2-1 Jhon Mena Perez (Dánjal á Lakjuni)
71' 2-2 Uros Stojanov (Gundur Petersen)
85' 3-2 Markus Isaksen (Ragnar Skála)

Støðan í Betri deildini hjá monnum
1. Víkingur 33 stig
2. HB 33 stig 
3. KÍ 27 stig 
4. NSÍ 19 stig 
5. B36 16 stig
6. 07 Vestur 15 stig 
7. Skála 13 stig 
8. EB/Streymur 7 stig 
9. B68 6 stig 
10. ÍF 3 stig 

Hetta vikuskiftið er landsliðsstøðgur. Komandi dystirnir í Betri-deildini verða 14.-16. juni.

Greinin varð fyrstu ferð løgd út 02. juni 2024

Geza heldur høga stigið

Annan mánaðin á rað er Géza Dávid Turi úr Víkingi kosin til besta spælara í Betrideildini hjá monnum

Feðgar á Djúpurmýru sunnudagin. Géza Támas Turi (t.v.) saman við soninum, Géza Dávid Turi (Mynd: Hans Erik Danielsen)

SkrivaÐ:

Sverri Egholm

Við smidligum bóltnertingum, róligum rørslum og elegantum vendingum, hevur hann heilt greitt verið ein av lyklaleikarunum í góðu gongdini hjá Víkingi higartil í ár.

Og tað er ikki bara á vøllinum, at hetta sæst aftur, men eisini í atkvøðugreiðsluni, tá besti spælari farna mánað skal veljast.

Tað eru landsliðsvenjarar, miðlafólk og viðmerkjarar, ið atkvøða, og annan mánaðin á rað hevur Géza Dávid Turi úr Víkingi vunnið heiðurin. Hesaferð sum besti spælari í mai 2024.

– Ja, eg veit ikki heilt hvat eg skal siga. Eg eri errin og ótrúliga glaður fyri hendan heiðurin. Men tað ræður eisini um at hava bæði beinini á jørðini, og halda fram við tí harða arbeiði, sum vit allir í Víkingi leggja í fótbóltin. Einki kemur av sær sjálvum, sigur Géza Dávid Turi við heimasíðuna hjá FSF.

Aðrir, ið eisini fingu væl av atkvøðum hesaferð, vóru Samuel Chukwudi úr HB, Poul Kallsberg úr Víkingi, og toppskjúttin í Betrideildini hjá monnum, Páll Klettskarð úr KÍ.

Fyri heiðurin fekk Géza Dávid Turi handað eitt gávubræv upp á 1.000 krónur, ið kann brúkast á Hotel Brandan, Hotel Hafnia ella hjá Katrinu Christiansen í Havn, umframt eina glasstandmynd, ið er latin av FSF.

Tað var pápi Géza, Géza Támas Turi, ið vegna Fótbóltssamband Føroya handaði soninum heiðurin sum besti spælari í mai mánaði.

Géza Támas kom til Føroya í 2006, og fyrstu tvey árini vardi hann málið hjá GÍ, sum síðani bleiv til Víking, eftir samanleggingina við LÍF. Fram til 2018 var eldri Géza ein av berandi kreftunum hjá Víkingi, og saman við gøtumonnum og leirvíkingum hevur hann vunnið tvey FM og fimm ferðir Løgmanssteypið.

Í løtuni er Géza Támas Turi málmansvenjari hjá KÍ og hjá A-landsliðnum hjá monnum.

Greinin varð fyrstu ferð løgd út 02. juni 2024

Bartal, Andrias og Mattias góvu avboð til landsliðið

Ragnar Samuelsen, Noah Mneney og Ari Petersen vórðu boðsendir áðrenn farið varð til Baltic Cup

Ragnar Samuelsen (Savnsmynd: Sverri Egholm)

SkrivaÐ:

Sverri Egholm

Týsdagin gjørdist greitt, at Ragnar Samuelsen, Noah Hans Mneney og Ari Petersen vera í føroyska ferðalagnum, sum mikumorgunin setti kós ímóti Estlandi.

Í dag spælir A-landsliðið við monnum fyrra dystin í Baltic Cup 2024, tá Estland tekur ímóti á Le Coq Arena í Tallinn.

Men til landsliðsuppgávurnar hesaferð verður venjarin, Håkan Ericson, noyddur at síggja burtur frá Bartali Wardum úr HB, Andriasi Edmundsson, ið spælir fyri MKS Chojniczanka í Polandi, og málverjanum, Mattiasi Lamhauge, sum spælir fyri FC Fredericia í Danmark.

Skaðar eru orsøkin til at Bartal og Mattias bóru ikki fóru við til Estlands. Hjá Andriasi Edmundsson er støðan tann, at hann er í týðandi samráðingum við nýtt størri felag í Polandi, og hann ynskir tí ikki at seta seg í vanda fyri at koma til skaða í hesi venjingarkappingini hjá landsliðnum.

Í staðin sendi landsliðsvenjarin boð eftir Ragnari Samuelsen úr B68, og Noah Hans Mneney, sum spælir fyri norska felagið Bryne FK, og Ari í Haraldstovu Petersen úr KÍ.

Seinni dysturin í Baltic Cup verður týsdagin 11. juni, og tá verður mótstøðuliðið annaðhvørt Lettlandi ella Litava.

Hópurin
Bárður á Reynatrøð, Víkingur
Silas Eyðsteinsson, B36
Ari í Haraldstovu Petersen, KÍ 
Jóannes Kalsø Danielsen, KÍ
Jann Julin Benjaminsen, B36
Viljormur Davidsen, HB 
Daniel Johansen, Thisted FC (Danmark)
Ragnar Samuelsen, B68
Noah Hans Mneney, Bryne FK (Noreg)
Gunnar Vatnhamar, Víkingur Reykjavík (Ísland)
Samuel Chukwudi, HB 
Gullbrandur Øregaard, Sandnes ULF (Noreg)
Aron Jarnskor Ellingsgaard, Víkingur
René Shaki Joensen, KÍ 
Arnbjørn Svensson, Víkingur
Hanus Sørensen, HB 
Adrian Justinussen, Hillerød Fodbold (Danmark)
Meinhard Egilsson Olsen, Mjøndal IF (Noreg)
Stefan Radosavljevic, Sligo Rovers FC (Írland)
Pætur Petersen, KÍ 
Klæmint Andrasson Olsen, NSÍ 
Petur Knudsen, NSÍ 
Jóan Símun Edmundsson, FC Shkupi (Norðurmakedonia)
Patrik Johannesen, Breiðablik (Ísland)

Greinin varð fyrstu ferð løgd út 04. juni 2024

KÍ fær nýggjan miðvallara

31 ára gamal svii kemur til Klaksvíkar í næstum

 

SkrivaÐ:

Sverri Egholm

Besta mansliðið hjá KÍ styrkir seg í summar við einum svia, 31 ára gamla Albert Ejupi.

Hetta er ein royndur maður, sum skal styrkja um miðvøllin. Albert Ejupi hevur verið við til at vinna Superettan í Svøríki við Varberg Bois, og hevur spælt meir enn hundrað dystir í toppfótbólti og hevur altjóða royndir í eysturríkskum, ísraelskum og donskum fótbólti.

- Albert er ein kropsliga sterkur miðvallari, sum kemur at geva liðnum eyka megi bæði á vølli og í luftspælinum. Í sær hevur Albert tað, sum KÍ stendur fyri, hann er ein heilhjartaður og framrættaður leikari, sigur høvuðsvenjarin hjá KÍ, Espen Haug.

Síðsta felagið Albert spældi við var AC Horsens. Sambært KÍ skiltust partarnir í sátt og semju fyrr í vár, tá leiðslan valdi at hálsa um og heinta fleiri ungar afrikanarar í hópin.

Eftir ætlan kemur Albert í Djúpmýrar fyrst í komandi viku, so hann er tøkur tá  flytingargluggin letur upp. Fyribils er sáttmálin millum Albert Ejupi og KÍ galdandi fyri inniverandi kappingarár.

Greinin varð fyrstu ferð løgd út 01. juni 2024

Liðskiparin hjá B36 givin

Eftir dystin sunnudagin boðaði Andrias Eriksen frá, at hann gevst at spæla fótbólt. Orsøkin er afturvendandi skaðar

(Mynd: Sverri Egholm)

SkrivaÐ:

Sverri Egholm

- Eftir fleiri longri prát við familju, Dan, læknatoymi og fyrrverandi leikarar í felagnum, so er tíðin komin, at eg takki fyri meg.

Tað skrivaði Andrias Eriksen í heilsan til felagið og til áskoðarar mánadagin, nú hann hevur tikið avgerð um at gevst.

Andrias Eriksen spældi í alt 256 skrásettir dystir fyri besta mansliðið hjá B36. Hann vann tvey føroyameistaraheiti, tvær steypakappingar, umframt nógvar upplivingar í Evropa. Fyrsta dystin spældi hann fyri tíggju árum síðan, 11. apríl 2014 ímóti HB. Hann hevur eisini spælt tveir landsdystir fyri Føroyar, og sum ungdómsspælari var hann við á fleiri ungdómslandsliðum.

(Mynd: Jens Kr. Vang)

Greinin varð fyrstu ferð løgd út 03. juni 2024

Grikkaland hevði munin

Hóast innsatsurin hjá føroyska liðnum var góður, so hevði Grikkaland munin, og vann uppiborið 2-0 á Tórsvølli týsdagin

(Mynd: Sverri Egholm)

SkrivaÐ:

Sverri Egholm

Við einum máli í hvørjum hálvleiki, fór Grikkaland av Tórsvølli týsdagin við einum 2-0 sigri í viðførinum. Fyrra málið kom eftir 13 minuttir, og tá góðir tíggju minuttir vóru eftir at spæla, varð sigurin staðfestur.

Grikkar sótu á tí mesta, og tær komu eisini fram til fleiri góðar støður. Hinvegin høvdu okkara trupult við at skapa teir heilt stóru málkjansirnar, og sigurin hjá Grikkalandi má tí sigast at vera uppiborin.

(Mynd: Sverri Egholm)

Eftir fýra umfør í bólki C3 í undankappingini til EM 2025, eru Grikkaland og Montenegro fremst við 10 stigum í part. Føroyar hava 3 stig, meðan Andorra er aftast við ongum stigi.

(Mynd: Sverri Egholm)

Fríggjadagin 12. juli fara liðini á vøllin aftur. Á Tórsvølli taka Føroyar ímóti Montenegro, meðan Grikkaland fær vitjan av Andorra. Síðsta umfar í bólkinum verður spælt týsdagin 16. juli. Tá spæla Montenegro og Grikkaland, og Andorra og Føroyar.

Sí eisini: Myndir: 2-0 tap fyri Grikkalandi

Týsdagin 4. juni 2024 - A-landsdystur, kvinnur, á Tórsvølli

Føroyar - Grikkaland 0-2 (0-1)

13' 0-1 Veatriki Sarri
78' 0-2 Sophia Koggouli

Føroyska liðið: Eyðgerð Mikkelsen - Birita Ryan, Sunniva Willemoes, Heidi Sevdal (60'Petra Hoydal), Ásla Johannesen (L), Eyðvør Klakkstein (83' Lea Lisberg), Jensa Tórolvsdóttir, Tórunn Joensen, Sara Lamhauge, Rúna Jacobsen (46' Sanna Svarvadal), Durita Hummeland (60' Fridrikka Clementsen)

Greinin varð fyrstu ferð løgd út 04. juni 2024

Royndirnar bóru Real Madrid enn einaferð

Borussia Dortmund var betri í 1. hálvleiki, men 2. hálvleik átti liðið hjá Carlo Ancelotti. Carvajal og Vinicius skoraðu, har tann fráfarandi Toni Kroos og nýggja stjørnan, Bellingham, løgdu upp

Toni Kroos takkaði fyri seg sum Real Madrid-spælari í stórum stíli. Týskarin stýrdi spælinum í 2. hálvleiki og skapti fleiri málmøguleikar við sínum frálíka høgra fóti (Mynd: EPA)

SkrivaÐ:

Agnar Prestá

Í nógv ár í hesari øldini jagstraði Real Madrid "La Decima". Tað tíggjunda Champions League/Evropa Cup fyri meistaralið kom í hús í 2014, og tíggju ár seinni hevur felagið vunnið kappingina samanlagt 15 ferðir.

Real Madrid vann sum væntað í finaluni á Wembley farna leygarkvøld. Borussia Dortmund avrikaði tó betri í fyrra hálvleiki og hevði fleiri vandamiklar støður. Týska liðið átti at verið á odda í steðginum men tók tó ikki av, og so gjørdi Real Madrid tað, sum felagið megnar so væl: At avgerða finalur.

Dani Carvajal hevði verið nær við eftir horna úr vinstru frá Toni Kroos rímiliga tíðliga í 2. hálvleiki, og í 74. minutti royndu teir royndu spælararnir uppskriftina aftur. Týskarin skeyt væl innfyri, høgri bakkurin søkti ímóti fremsta økið og stýrdi bóltinum flott í málið við høvdinum. Hetta var sætta finalan hjá Carvajal, og við hesum málinum stýrdi spaniólin felagnum móti sætta heitinum í ellivu ár.

Lágvaksni høgri bakkurin gjørdi bart - Carvajal var sera vandamikil í samband við hornaspørk (Mynd: EPA)

Carvajal hevði frammanundan bert eitt mál í 88 Champions League-dystum. Leiðslumálið hevði hingið í luftuni eina løtu, har eisini Jude Bellingham var nær við. Fyrrverandi Dortmund-miðvallarin fekk eitt upplegg í finaluni í heimlandi sínum, tá hann í 83. minutt fekk eina gávu frá Dortmnund-verjuni. Bellingham fann síðani Vinicius Junior í vinstru, og vandamikli vongurin gjørdi sum í finaluni móti Liverpool fyri tveimum árum síðani, tá brasilumaðurin avgjørdi: Skerpni, royndir,  evni til at revsa og samanlagt tamarhald eyðkennir Real Madrid.

Vinicius Jr. kundi fegnast, meðan luftin fór úr ballónini hjá Dortmund (Mynd: EPA)

Teir flestu hjá Real Madrid hava fleiri Champions League-gull heiðursmerki, men hetta var tað fysta hjá Jude Bellingham, sum var kensluborin eftir síðsta bríksl (Mynd: EPA)

Ungi onglendingurin troystaði eisini onkrar av gomlu liðfeløgunum (Mynd: EPA)

So var eingin ivi um, hvar steypið fór. Spanska felagið staðfesti aftur, at man situr á stóru kappingini. Carlo Ancelotti hevur vunnið tað seks ferðir nú: Fýra ferðir sum venjari og tvær ferðir sum spælari (Trý við AC Milan og tríggjar ferðir við Real Madrid).

Toni Kroos endaði sína felagsyrkisleið á toppinum, og Nacho endaði sína Real Madrid-tíð við at lyfta stóra steypið sum tann fyrsti.

Champions League-finalan 2024
Leygardagin 01. juni á Wembley
Real Madrid - Borussia Dortmund 2-0 (0-0)
74' 1-0 Dani Carvajal (Toni Kroos) 
83' 2-0 Vinicius Junior (Jude Bellingham) 

Greinin varð fyrstu ferð løgd út 01. juni 2024

Kiel skal spæla móti Barcelona um finalupláss

Tað verður ein stór uppgáva hjá føroyska spælskiparanum og liðfeløgunum í Köln leygardagin. Elias Ellefsen á Skipagøtu er fyrsti føroyingurin í Final Four í Champions League

Elias Ellefsen Skipagøtu til fyrsta A-endaspælið við føroyskari luttøku, sum var í Berlin í januar. Um vikuskiftið verður føroysk hondbóltssøga skrivað í Köln (Savnsmynd: Sverri Egholm)

SkrivaÐ:

Agnar Prestá

Eftir eitt tap við níggju málum í Fraklandi í fyrru fjórðingsfinaluni sá tað ógvuliga tungt út hjá THW Kiel, men týska stórfelagið rakk tó málinum um Final Four í fremstu kappingini í Evropa. Hetta við 31-21 sigri í heimadystinum.

Tá var Elias Ellefsen á Skipagøtu so mikið plágaður av knænum til fyrra dystin, og tað gekk so væl í seinna dystinum hjá hinum, at hann ikki hevði nakran leiklut í fjórðingsfinalunum. 

Annars hevur hoyvíkingurin havt stóran leiklut fyri Kiel í fleiri Champions League-dystum hetta kappingárarið, har nummar 71 nakrar ferðir hevur verið toppskjútti og/ella fingið heiðurin sum dagsins spælari.

Elias Ellefsen á Skipagøtu í øðrum dystinum móti Kielce í harða bólkaspælinum - í dystinum móti pólska stórfelagnum stóð spælskiparin seg væl (Mynd: EHF)

Leygarkvøldið verður Elias Ellefsen á Skipagøtu fyrsi føroyingurin nakrantíð, sum fer at spæla í Final Four í Champions League.

Annika Fríðheim Petersen var við Final Four i European League (EHF Finals) hjá kvinnum í fjør, og Hákun West av Teigum og Jóhan Plógv Hansen spældu hjá monnum í ár. Allan Norðberg var í síðsta mánaða við at vinna European Cup, sum er skipað við tveimum finalum. Hetta er triðsterkasta evropeiska kappingin.

Heilt nógv hondbóltseygu verða vend móti Köln hetta vikuskiftið, har tað besta liðið skal finnast. Magdeburg er favorittur at vinna heitið aftur. Týsku meistararnir spæla hálvfinalu móti Aalborg klokkan 14 leygardagin. 

Tríggjar tímar seinni byrjar dysturin millum Kiel og Barcelona. Liðið hjá Eliasi hevur ikki havt eitt gott ár í Bundesliguni - nú skal man royna at basa favorittunum úr Katalonia fyri framhaldandi at hava ein møguleika at bjarga kappingarárinum.

Greinin varð fyrstu ferð løgd út 06. juni 2024

Elias: - Havi droymt um hetta leingi

- Síðani eg var til Final Four sum drongur, hevur hetta verið eitt av mínum málum, sigur 22-ára gamli hoyvíkingurin. Hann fær ein leiklut móti Barcelona í Köln í kvøld

Elias á Ellefsen á Skipagøtu í sigrinum á Spania til U21 HM í Magdeburg. Nú er møguleiki at hitta Magdeburg í Champions League-finalu. Fyrsta krav er at basa Barcelona: - Barcelona hevur eina sterka verju og rennur skjótt kontra. Vit skulu spæla klókt og ikki gera mistøk í álopinum, sum loyvir teimum í kontraálop (Savsmynd: Sverri Egholm)

SkrivaÐ:

Agnar Prestá

Í dag, leygardagin 8. juni, skrivar Elias Ellefsen á Skipagøtu føroyska hondbóltssøgu, tá hann við THW Kiel spælir Champions League hálvfinalu. Dysturin verður í stóru Laxness høllini í Köln, og føroyski spælskiparin vissar um, at hann verður á hallargólvinum, har hann og liðfelagarnir skulu royna at basa Barcelona. 

- Eg veit so, at eg fari at spæla. Um eg byrji inni, havi eg ikki ordliga kunning um enn.

Hetta sigur hann hálvgum flennandi, tá Portalurin fekk orðið á hann hósdagin. Hetta var, meðan Elias á Skipagøtu sat í bussinum hjá THW Kiel, sum var á veg til Köln.

Elias í Köln - spælskiparin hevur sín størsta dyst í felagshondbólti fyri framman (Mynd: THW Kiel)

Fyrsta kappingarárið hjá 22-ára gamla føroyinginum í týska stórfelagnum endar við einum braki. Tað er ikki hilnast væl í Bundesliguni, har Kiel annars søguliga er mest vinnandi felagið. Elias Ellefsen á Skipagøtu viðurkennir eisini, at man seinastu vikurnar hevur havt eitt eyga á Final Four vikuskiftinum, har Barcelona er á skránni í hálvfinaluni.

- Hava vitað í nakrar vikur, at vit fóru at enda á 3. ella 4. plássi í Budesliguni. Vit vildu sjálvandi gjarna enda á 3. plássi og vinna teir seinastu dystirnar. Bæði plássini geva tó pláss í European League, og tað er eingin loyna, at vit hava fyrireikað okkum nógv til Final Four. Vit hava bæði hugt eftir okkara spæli, og eftir hvussu Barcelona spælir.

- Hvat fyri dyst væntar tú móti Barcelona, og hvat skal til fyri at koma í finaluna ?

- Vit skulu fyrst og fremst spæla ein øgiligan góðan dyst. Teir eru nokk favorittar - tað siga tey flestu í hvussu so er. Barcelona hevur eina sterka verju og rennur skjótt kontra. Vit skulu spæla klókt og ikki gera mistøk í álopinum, sum loyvir teimum í mótálop. 

Elias Ellefsen á Skipagøtu takkar føroyskum áskoðarum eftir sigur á Spania í U21 HM í fjør. Nakrir føroyskir áskoðarar vera í Köln um vikuskiftið - Elias fegnast um sín leiklut higartil í kappingini (Savnsmynd: Sverri Egholm)

Fyri Elias merkja hesir dystirnir nakað serligt - hesum dylir hondbóltsglaði hoyvíkingurin ikki fyri. Júst í Champions League hevur nummar 71 skinið fleiri ferðir í ár:

- Tað er sjálvandi ordliga stuttligt at fáa slíkar dystir. Eg havi droymt at spælt Final Four, síðani eg var til tað sum drongur saman við familjuni, og tað hevur verið eitt mál. Tað er eisini so, at eg havi fingið eitt sindur longri snór í júst Champions League. Havi spælt nógv í kappingini og staðið meg væl. Tískil kenni eg veruliga, at eigi ein part av, at vit eru her.

Eins og Elias Ellefsen á Skipagøtu var til finaluvikuskifti í fremstu evropeisku kappingini sum yngri, verða fleiri áskoðarar til dystrnar. Sjálvur fekk føroyski spælskiparin eini 20 atgongumerki, ið familja og onnur fingu. Eisini vita vit og Elias um fleiri aðrar føroyingar, ið vera til staðar í Lanxess leikhøllini í dag og sunnudagin. Hon tekur eini 19.000 áskoðarar.

Portalurin verður til staðar í Köln.

Greinin varð fyrstu ferð løgd út 07. juni 2024

- Sera stórt fyri føroyskan hondbólt at hava umboð í Köln

Julian Johansen hevur leingi veirð venjari hjá Eliasi Ellefsen á Skipagøtu og sigur, at spælskiparin er í heimsklassa á ávísum økjum. Leikhátturin hjá Kiel og møguleikarnir hjá liðnum, heldur hann ikki nógv um

 

SkrivaÐ:

Agnar Prestá

- Tað er sera stórt fyri føroyskan hondbólt, at vit hava eitt umboð til stórfingna hondboltsvikuskifti í Köln. Tað eru har bestu leikarar í heiminum møtast fyri at finna útav, hvat lið er heimsins sterkast. Elias er tann fyrsti, men eg vænti at tað fara at koma fleiri.

Soleiðis sigur Julian Johansen við Portalin. Havnarmaðurin hevur í nógv ár verið hondbóltsvenjari og viðmerkjari, og eins og nógv onnur hondbóltsáhugaði gleðir hann seg til Final Four-vikuskifti. Tað er serligt við føroyskum brillum, tí Elias Ellefsen á Skipagøtu verður tann fyrsti føroyingurin, sum fer at spæla um Champions League-heiðursmerki.

Julian var venjari hjá Eliasi á øllum ungdómslandsliðunum, og var eisini hjálparvenjari á A-landsliðnum frá mai í fjør til mai í ár. Hann kennir tískil væl nú 22-ára gamla hoyvíkinginum, og Julian Johansen setur Kiel-spælaran í heimsflokk á summum økjum:

- Elias er í mínum eygum tað tættasta vit koma uppá ein komplettan hondboltsleikara. Tað eru øgiliga fá ting, sum Elias ikki dugur á vøllinum. Hansara eyga fyri spælinum, og styrkin í hansara timing er í heimsklassa.

Hetta er endin av fyrsta kappingarárinum hjá Eliasi á Skipagøtu. Tað hevur verið eitt sindur "blandað bomm", staðfestir Julian Johansen, sum ikki er heilt álvuligur við, hvussu spælskiparin spælir og hóskar inn í leikháttin hjá Kiel, sum FIlip Jicha stjórnar:

- Elias hevur í ár spælt til tíðir øgiliga væl, og so eisini undir evnir. Tað sum kanska órógvar hann mest er, at hann fyri fyrstu ferð spælir á einum liði sum ikki er skræddarseymað til handara spælistíl. Venjarin hjá Eliasi ynskir, at Kiel spælir tann leikháttin, sum Jicha sjálvur spældi, tá hann var á toppinum. Hetta hóskar ikki altíð til leikháttin, sum Elias spælir uppá og hóskar best til. Mín vón er, at hetta broytist komandi kappingarár.

- Tíverri vænti eg ikki at Kiel hevur nakran møguleika móti Barcelona í løtuni. Barcelona kemur til Final4 sum eitt úthvílt lið sum nærum ikki hevur spælt ein dyst av týdningi í ár. Støðan hjá Kiel er beint øvugt; og tá hevur tað eisini gingið illa hjá Kiel seinastu vikurnar.

Julian Johansen væntar tó, at Kiel fer at vinna bronsuna - eftir dyst móti Aalborg. 

Greinin varð fyrstu ferð løgd út 06. juni 2024

Starvsnevndin í Hondbóltssambandinum heldur fram

Hondbóltssambandið hevði aðalfund á Giljanesi leygardagin

Gunn Ellefsen, forkvinna í starvsnevndini hjá HSF (Savnsmynd: Sverri Egholm)

SkrivaÐ:

Alda Nielsdóttir

Starvsnevndin í Hondbóltssambandinum heldur fram. Tað er greitt, eftir at Hondbóltssambandið hevði aðalfund leygardagin.

Aðalfundurin var hildin í Skúlanum á Giljanesi í samstarvi við SÍF/Søljuna, sum er heimahoyrandi har.

Fyri vali á aðalfundinum stóðu Gunn Ellefsen, forkvinna, Durita Thomsen, nevndarlimur og varalimirnir Birgir Kass og Høgni Vilhelmsen, og tey vóru øll afturvald, skrivar Hondbóltssambandið í tíðindaskrivi.

Sitandi starvsnevnd telur sostatt hesar limir:
Gunn Ellefsen, forkvinna
Jógvan Emil Nielsen, næstformaður
Durita Thomsen, nevndarlimur
Heini Ellingsgaard, nevndarlimur
Kristian Østergaard, nevndarlimur
Birgir Kass, varalimur
Høgni Vilhelmsen, varalimur

Greinin varð fyrstu ferð løgd út 06. juni 2024

100.000 krónur til Eydnudeildina

– Vit eru ovurfegin og droyma um allar teir møguleikarnar, sum hendan stóra upphæddin gevur okkum í okkara arbeiði, sigur Morten Hust, formaður hjá Eydnudeildini

 

SkrivaÐ:

Tíðindaskriv

Í sambandi við EM-endaspælið í Berlin tóku stuðlarnir hjá Eydnudeildini stig til at selja fjepparablusur, har 50 krónur fyri hvørja blusu fóru óskerdar til Eydnudeildina. Samlaða upphæddin bleiv 100.000 krónur, sum nú er latin Eydnudeildini.

Stuðlarnir til átakið eru Føroya Banki, Wenzel, Atlantic Airways, Effo og Smyril Line.

– Vit eru ovurfegin og droyma um allar teir møguleikarnar, sum hendan stóra upphæddin gevur okkum í okkara arbeiði at heiðra fjølbroytni og somuleiðis geva øllum okkara stjørnum nakrar fantastiskar upplivingar og møguleika fyri at vera partur av einum felagsskapi, sigur Morten Hust, sum er formaður hjá Eydnudeildini.

Eydnudeildin er ein felagsskapur fyri børn og ung við serligum tørvi. Hvørja viku hittast tey til eina stuttliga og stimbrandi ítróttarvenjing. Hjá fleiri teirra er venjingin hæddarpunktið í vikuni, og saman skapa tey ógloymandi løtur.

Føroya Banki høvuðsstuðul hjá Eydnudeildini
Síðani 2022 hevur Føroya Banki verið høvuðsstuðul hjá Eydnudeildini, og í farnu viku skrivaðu Eydnudeildin og Føroya Banki undir nýggja samstarvsavtalu.

Endamálið við samstarvinum er at geva Eydnudeildini møguleika fyri framhaldandi at skapa menning og góðar upplivingar fyri børn og ung við avbjóðingum og familjum teirra.

– Vit eru errin av at stuðla einum so einanstandandi arbeiði, sum tað, ið Eydnudeildin ger fyri so nógv børn og ung í Føroyum. Vit vóna, at vit sum høvuðsstuðul kunnu vera við til at betra um umstøðurnar hjá Eydnudeildini og somuleiðis kunnu vera við til at gera dreymar teirra til veruleika, sigur Turið F. Arge, forstjóri.

Eydnudeildin er partur av donsku Lykkeliga, og hevur virkað í Føroyum í seks ár.

Greinin varð fyrstu ferð løgd út 06. juni 2024

Klaksvíkingur vann á norðoyastevnu

Sigursvandi Jarnbardur vann tryggan sigur í 6-mannaførum við kvinnum

(Mynd: Signar Højgaard)

SkrivaÐ:

Sverri Egholm

Tríggjar manningar vóru við í 10-mannafarðsróðrinum á Norðoyarstevnu farna vikuskiftið.

Allir úr Norðoyggjum. Klaksvíkingur og Nólsoyar Páll frá Klaksvíkar Róðrarfelag og Norðingur hjá Sunda Róðrarfelag.

Klaksvíkingur vann ein spennandi róður 13 hundraðpartar av einum sekundi framman fyri Nólsoyar Páll, sum annars førdi tað mesta av róðrinum.

Norðingur kom á mál góð trý sekund eftir Klaksvíking.

Í størstu bátastøddini við kvinnum, 6-mannaførum, vóru seks bátar við.

Sigursvandi Jarnbardur hjá Róðrarfelagnum Knørri vann ein sannførandi sigur framman fyri Páll Fanga úr Klaksvík og Hósvíking.

Signar Højgaard tók myndirnar frá kapproðrinum á norðoyastevnu leygardagin. Fleiri myndir eru at síggja her

Øll úrslitini frá kappróðrinum á norðoyastevnu 

Næsti róður verður á Sundalagsstevnuni í Kollafirði 15. juni

Greinin varð fyrstu ferð løgd út 02. juni 2024

Sandflogbóltur fyri landslið á skrá í summar

Tvey U18 landslið eru úttikin til tvær altjóða kappingar. Osla Johannesen, Mariu Teresu Vitalis, Rani Ákason og Hákun Nón skulu umboða Føroyar í Onglandi og í Georgia

 

SkrivaÐ:

Tíðindaskriv

Flogbóltssamband Føroya sendir tvey U18 landslið til tvær altjóða sandflogbóltskappingar í summar.

Talan er um NEVZA U18 meistaraheitið og um CEV U18 evropiska meistarakappingin. Landsliðini fata um eitt gentulið og um eitt dreingjalið - gentur og dreingir, sum eru fødd 1. januar 2007 ella seinni.

Greinin varð fyrstu ferð løgd út 06. juni 2024

Wong nýggjur landsliðsvenjari í badminton

– Wong er ein dugnaligur badmintonleikari við altjóða royndum sum landsliðsleikari fyri Malaysia í Topp 50 í heiminum, og síðstu fimm árini hevur hann eisini víst sínar avgjørdu dygdir sum venjari í føroyskum høpi, sigur Katrin Jacobsen, forkvinna í BSF

Katrin Jacobsen, forkvinna í BSF, ynskir Wong til lukku við nýggja sáttmálanum (Mynd: Badmintonsamband Føroya)

SkrivaÐ:

Alda Nielsdóttir

Seinastu fimm árini hevur 30 ára gamli Fai Yin Wong verið við til at menna føroyskt badminton, og næstu trý árini fær Wong høvi at lyfta støðið enn meira, nú sum landsliðsvenjari, skrivar Badmintonsamband Føroya.

Badmintonsambandið fekk fleiri enn 10 umsóknir til landsliðsvenjarastarvið, sum bleiv lýst leyst í vár, tá sáttmálin við verandi landsliðsvenjari Sune Gavnholt var galdandi til í summar, og Sune ynskti ikki at leingja sáttmálan. Wong byrjar í starvinum eftir summarsteðgin.

Badmintonsambandið hevur framfýsnar ætlanir um framhaldandi menning av føroyskum badminton og at styrkja altjóða luttøkuna hjá bestu føroysku badmintonleikarunum. Wong hevur í tíð síni í Føroyum tikið tvey altjóða góðkend venjaraskeið og skal sambært nýggja sáttmálanum eisini taka triðja stig í altjóða góðkendu venjaraútbúgvingini. Sum hjálparlandsliðsvenjari árini 2019-2023 hevur Wong fingið gott innlit í førleikarnar hjá føroyskum badmintonleikarum og møguleikunum fyri at standa seg í altjóða kappingum

– Vit eru heilt sannførd um, at vit við Wong hava fingið rætta persónin at útinna ætlanir okkara í verki, staðfestir Katrin Jacobsen, forkvinna.

– Wong er ein dugnaligur badmintonleikari við altjóða royndum sum landsliðsleikari fyri Malaysia í Topp 50 í heiminum, og síðstu fimm árini hevur hann eisini víst sínar avgjørdu dygdir sum venjari í føroyskum høpi. Harumframt dugir Wong so sera væl at knýta persónlig bond til leikarar, at geva teimum afturljóð og fáa leikarar at seta sær høg mál og røkka teimum.

Við einum trý ára sáttmála við Wong hevur BSF nú skapt tryggar karmar fyri eini menning av badmintonhópinum fram ímóti Oyggjaleikum á Orknoyggjum næsta summar og í Føroyum í 2027, skrivar Badmintonsambandið.

Greinin varð fyrstu ferð løgd út 03. juni 2024

Framúr úrslit hjá Sámuel í Slovenia

Í finaluskjótingini í Veronica’s Cup leygardagin, skeyt Sámuel T. Petersen seg í fjórðingsfinaluna og bleiv samanlagt nummar sjey av 43. Jóannes Poulsen hevði trupulleikar við stillingini av siktinum, men endaði kortini saman við nógvum øðrum sum nummar 17

Sámuel T. Petersen (Mynd: Freya foto)

SkrivaÐ:

Tíðindaskriv

Leygardagurin bleiv ein góður dagur fyri føroyska bogaskjóting í altjóða høpi, tá ungi compoundskjúttin Sámuel T. Petersen úr bogaskjótifelagnum Ørvi í Eysturoynni gjørdi bart og vann seg heilt í fjórðingsfinaluna í altjóða kappingini Veronica’s Cup í Kamnik í Slovenia.

Fjórðingsfinaluna tapti hann ímóti heimselituskjúttanum Matus Durny Jr úr Slovakia. Hesin vann síðan eisini sína semifinalu og skuldi sunnudagin skjóta um gullið í finaluhólmgonguni ímóti Shamai Yamron úr Ísrael, ið eisini telist ímillum teir bestu og bleiv nummar tvey í EM í Týsklandi fyrst í mai.

Nýtt kappingarmet
Endastøðan hjá Sámuel bleiv eitt sjeyndapláss, sum hann og italiumaðurin Manuel Sartorello býtast um, og Sámuel var, sum vera man, ógvuliga fegin um sítt góða úrslit.

- Eg kann ikki annað enn vera væl nøgdur við mítt avrik, tí eg skeyt væl – so væl, at eg setti persónligt kappingarmet, tí eg fekk 146 stig í tveimum duellum, og áðrenn tað er 145 stig tað mesta, eg havi skotið í kappingum, greiðir Sámuel frá.

Fyrra hólmgongan, har hann fekk 146 stig, var í fyrsta dystinum, har tað galt um at vinna sær pláss í sekstandapartsfinalunum. Men tað var tó um reppið, at tað ikki var nóg mikið, tí mótstøðumaðurin Arnaud Hocevar úr Luxembourg fekk eisini 146 stig. Sámuel hevði tó tamarhald á nervunum og rakti 10-aran í shoot-off, meðan hin rakti 9-aran.

Illur tapari
Dysturin, ið veruliga fekk øll at geva unga føroyinginum ans, var sekstandapartsfinalan, sum var ímóti tí vanliga krútsterka Tim Jevsnik úr Slovenia. Í innleiðandi kappingini – kvalifikasjónskappingini – mikudagin bleiv hann nummar fýra.

Men hvørki tað ella fyrimunurin av heimavølli nyttaði nakað hjá slovenanum, tá hann tapti duellina ímóti Sámuel, sum aftur hesaferð fekk 146 stig.

Tim Jevsnik fekk 144 stig, og var sjónliga misnøgdur eftir tapið.

- Hann var illur, og eg fekk ikki møguleika at taka í hondina á honum, áðrenn hann streyk avstað og út av skjótiøkinum. Eg vænti tó sjálvandi, at hann bara var illur inn á seg sjálvan, tí alt gekk rætt fyri seg, og eg rakti bara betri enn hann, sigur Sámuel.

Síðan vann hann áttandapartsfinaluna 143-139 ímóti Marko Juranic úr Kroatia, ið bleiv nummar 13 í innleiðandi kappingini mikudagin, áðrenn Matus Durny Jr steðgaði honum í fjórðingsfianluni.

Boðar frá góðum
Sámuel er ungur í bogaskjótihøpi – hann fylti 21 3. juni – so góða úrslitið í Veronica’s Cup kann boða frá góðum. Hann hevur í hvussu er víst, at hann skjótt kann vinda seg upp úr lítlum og loypa hvøkk á. Tí tað er minni enn ein mánaði síðan, at hann var við í EM uttandura í Essen í Týsklandi, og tá vóru úrslitini í lakara endanum – nummar 64 í innleiðandi kappingini og 138 stig í tí einasta dystinum, hann fekk afturat tá.

Til tað er tó at siga, at Sámuel kom við í EM-hópin í seinastu løtu vegna avboð, og tískil var rættiliga ófyrireikaður.

Leygardagin vísti hann, at tað er langt frá botnstøðinum og uppeftir – hvussu langt, kann bara tíðin vísa. Uppskriftin hjá Sámuel var einføld:

- Eg segði við Jóannes, tá vit fylgdust inn á økið, áðrenn vit skuldu skjóta, at eg ætlaði bara at skjóta tad besta, eg kundi, og meira enn tað ber ikki til at gera – sama um eg sleppi longur ella má steðga eftir fyrsta dystin, so kann eg bara orðna mítt.

Jóannes ætlaði sær meira
Jóannes Poulsen var ikki nøgdur við sítt avrik leygardagin. Hann kláraði seg annars avbera væl í innleiðandi kappingini mikudagin, tá hann bleiv nummar 10.

Tískil slapp hann beinleiðis í sekstandapartsfinalurnar og ætlaði avgjørt ikki, at tað skuldi steðga har. Men tað gjørdi tað tíverri, tá hann tapti duellina ímóti italiumanninum Paolo Pockaj 140-144.

- Eg fekk tað bara ikki at rigga í dag, og tað eri eg sjálvandi ikki nøgdur við. Men eg haldi, eg havi okkurt at arbeiða við, tí eg hevði trupulleikar við uppsetingini í dag. Eg broytti stillingina av siktinum eitt sindur til innleiðandi kappingina, tí tað var so nógvur vindur tann dagin. Í gjár fingu vit als ikki vant, tí veðrið var so ringt, og tí hevði eg ikki fingið stillað siktið aftur, áðrenn dagsins kapping. Tað ørkymlaði meg undir skjótingini í dag, men nú má eg so royna at fáa alt sett rætt upp til Grand Prix-kappingina í Kroatia.

Samanlagt endaði hann í stóra bólkinum, sum býtti 17. plássið í Veronica’s Cup.
Jóannes og Sámuel, sum báðir fingu játtað úrvalsstuðul frá ÍSF í ár, fóru eftir kappingina víðari til Poreč í Kroatia, har teir verða við í evropeisku Grand Prix-kappingini. 

Jóannes Poulsen (Mynd: Freya foto)

Greinin varð fyrstu ferð løgd út 02. juni 2024