Búskapurin framvegis undir trýsti

Neyðugt at politiska skipanin fer undir eitt tíðarskeið við nýskipanum í almenna geiranum, sigur Búskaparráðið

Limir í Búskaparráðnum - Jan Otto Holm, Anja Rein, Johnny í Grótinum, Hans Ellefsen og Marjun Weihe Thomassen (Savnsmynd)

SkrivaÐ:

Tíðindaskriv

Enn er ferð á búskapinum í Føroyum. Vøksturin í bruttotjóðarúrtøkuni, BTÚ, fyri 2023 til 2025 er mettur at verða ávikavist 5,6 prosent í 2023, 4,7 prosent í 2024 og 3,3 prosent í 2025, í leypandi prísum. Arbeiði er til allar hendur, og arbeiðsloysið er framvegis sera lágt. Starvsfólkatalið er høgt og lønargjaldingarnar eru veksandi. Stórt avlop er á handilsjavnanum, og prísirnir veksa ikki longur við somu ferð, sum teir hava gjørt.

Trot á arbeiðsmegi
Lága arbeiðsloysið er positivt fyri húsarhaldini, men búskaparliga kann eitt ov lágt arbeiðsloysi í longri tíð tó fáa ta avleiðing, at framleiðslan í landinum verður minni, enn hvat hon kundi verið. Búskaparráðið metir tað vera neyðugt, at politiska skipanin fremur broytingar og nýskipanir, sum økja um arbeiðsútboðið.

Ein háttur at økja um arbeiðsútboðið, er at avtaka fiskavirkisskipanina.

Fiskavirkisskipanin er skeiklandi fyri arbeiðsmarknaðin, tí hon minkar um tilskundanina hjá arbeiðismegini at flyta seg til tey arbeiðsøki og tær vinnur, ið tørva arbeiðsmegi. Hetta er eisini galdandi fyri útlendsku arbeiðsmegina.

Ein annar háttur at økja um arbeiðsútboðið er at fáa útlendingar til Føroyar at arbeiða, og her hava myndugleikarnar millum annað sett fast track skipanina í verk. Kappingin um útlendska arbeiðsmegina verður størri í framtíðini, tí nógv lond í vesturheiminum hava somu avbjóðingar við broytingum í aldurssamansetingini av búfjøldini sum Føroyar.

Ein triði háttur at økja um arbeiðsútboðið er at hækka pensjónsaldurin, sum eisini betrar um fíggjarpolitiska haldførið.

Politiska skipanin hevur umrøtt ætlanir um at stytta arbeiðsvikuna, ið er eitt átak, sum sannlíkt minkar um arbeiðsútboðið. Hvussu ein stytting av arbeiðsvikuni ávirkar arbeiðsútboðið eigur at verða greinað nærri, áðrenn ein slík broyting verður framd.

Trot á bústøðum
Ein týðandi fløskuhálsur, sum er við til at forða fyri framhaldandi fólka- og búskaparvøkstri í Føroyum er bústaðartrot.

Búskaparráðið metir tað vera umráðandi, at kommunur við stórum fólkavøkstri framskunda útstykkingar av grundstykkjum - serliga til bygging av íbúðum og øðrum smærri bústaðareindum, so bráfeingistørvurin skjótari verður nøktaður.

Hall í bestu tíðum
Bæði land og kommunur hava hall á roknskapunum í bestu tíðum. Landskassans hall er mett at vera væl omanfyri hálva milliard í ár, tá hædd er tikið fyri, at partur av tilfeingisgjøldunum skal í Búskapargrunn.

Eisini kommunali geirin sæð undir einum hevur hall, og hava tær havt hall líka síðani 2018. Hallið hjá kommununum er mett at verða um 240 milliónir krónur í 2024.

Tað er sera neyðugt at politiska skipanini fer undir eitt tíðarskeið við nýskipanum í almenna geiranum. Tað er ikki nokk at pjøssa uppá fíggjarlógina við ónevndum átøkum fyri 35 milliónir krónur um árið, sum ætlanin er sambært kørmunum hjá Fíggjarmálaráðnum. Neyðugt er við nýskipanum, sum veruliga muna, um fíggjarpolitikkurin skal fáast aftur á beint.

Búskaparráðið mælir politisku skipanini til at seta í verk eitt fíggjarpolitisk regluverk. Fíggjarpolitiska regluverkið skal tryggja, at tamarhald fæst á útreiðsluvøkstrinum. Harafturat er umráðandi, at kommunurnar eru fevndar av regluverkinum.

Fígging av eldraøkinum
Neyðugt er at endurskoða fíggingina av eldraøkinum. Ein tann størsta avbjóðingin fyri framman er, at vit verða lutfalsliga fleiri eldri samanborið við tey í arbeiðsførum aldri.

Eldraøkið liggur hjá kommununum, og tí hevði verið skilagott, um landspolitisku myndugleikarnir endurskoðaðu hetta økið.

Kommunurnar eru 29 í tali og sera ymiskar, bæði í aldursamanseting av íbúgvarunum og inntøkugrundarlagi, og ivasamt er, um tær allar megna avbjóðingina.

Greinin varð fyrstu ferð løgd út 02. september 2024

Eidesgaard: Uppgevandi landsstýriskvinna

- Havi sjáldan sæð eitt landsstýrisfólk vera so spert, sum Ruth Vang var mánakvøldið, sigur fyrrverandi løgmaður

Jóannes Eidesgaard (Savnsmynd)

SkrivaÐ:

Sverri Egholm

Ruth Vang hevði einki boð uppá, hvat man kundi gera her og nú fyri at bøta um viðurskiftini á fíggjarlógini. Tað var sum um, at tað var máttloysi yvir henni.

Tað segði Jóannes Eidesgaard í sendingini "Stjørnin - politikkur á skák" á FM1 mikudagin.

Fíggjarstýringin hjá samgonguni og landsstýriskvinnuni við fíggjarmálum fekk ikki mjúka viðferð í sendingini hjá Árna Gregersen, har Jóannes Eidesgaard, Tórbjørn Jacobsen og Heðin Zachariasen umrøða politikk.

Sipað var til Dag og viku mánakvøldið, tá Ruth Vang var gestur.

(Skíggjamynd: Dagur og vika / kvf.fo)

- Hon var til teljing. Eg havi sjáldan sæð eitt landsstýrisfólk vera so spert sum hon var. Ruth Vang hevði tvey ting at bera fram. Tað var tað, at man skuldi hækka pensjónsaldurin, og tað er ein loysn uppá longri sikt, og so at minka um rentustuðulin, sum eisini er ein loysn uppá longri sikt.

- Ruth Vang hevði einki boð uppá hvat man kundi gera her og nú fyri at bøta um viðurskiftini. Ikki annað enn hesar somu 35 milliónirnar sum blivu nevndar umaftur og umaftur, men tað er lítið tá man hevur eitt hall, sum svingar upp ímóti einari hálvari milliard.

Máttloysi
- Eg føldi, at tað var eitt máttloysi yvir henni. At hon sum landsstýrisfólk ikki hevði eitt boð uppá politikk. Heldur hinvegin, at hon segði at krøvini frá tingfólkum vóru so høg, og øll vildu hava meira. Tað boðaði ikki frá góðum, segði Jóannes Eidesgaard.

Hann heldur tað vera ov vánaligt, at eitt ein sum bjóðar seg fram sum landsstýrisfólk við fíggjarmálum, ikki hevur boð uppá hesi tingini.

Greinin varð fyrstu ferð løgd út 05. september 2024

Erla Kongsdóttir sett í Suðuroyarsigling

Ferjan, sum vanliga røkir siglingina út í Hest, varð í gjárkvøldið sett í sigling millum Gomlurætt og Hvalba, tí klassin noktaði Smyrli at sigla í gjár

(Savnsmynd: Bjartur Vest)

SkrivaÐ:

Alda Nielsdóttir

Á middegi í gjár boðaði Strandfaraskip Landsins frá, at teir báðir túrarnir hjá Smyrrli í gjár vóru avlýstir orsakað av átrokandi umvælingum. Í staðin varð Erla Kongsdóttir sett í sigling millum Gomlurætt og Hvalba.

Pláss er fyri 96 ferðandi við Erli Kongsdóttir, sum ikki tók akfør við hesar túrarnar.

Fyrst var upplýst, at Smyril, um umvælingin gekk sum ætlað, kundi fara í sigling aftur í gjárkvøldið, men seinni varð boðað frá.

Ætlandi skuldi Smyril setast í sigling aftur tíðliga í morgun.

Greinin varð fyrstu ferð løgd út 06. september 2024

Falskar lýsingar um SSL-ferðakort á Facebook

Lýst verður til dømis við ókeypis ferðakortum, har ið ein kann fáa ferðakort (travel-kort) fyri einans 18 krónum um mánaðan, men hetta er svik, sigur Strandferðslan, sum hevur meldað málið til løgregluna

 

SkrivaÐ:

Tíðindaskriv

Strandferðslan er gjørd varug við, at falskar lýsingar um Strandferðsluna koyra á Facebook í løtuni. Lýst verður til dømis við ókeypis ferðakortum, har ið ein kann fáa ferðakort (travel-kort) fyri einans 18 krónum um mánaðan.

Strandferðslan heitir við hesum á ferðafólk og kundar um ikki at fylgja hesum leinkjunum ella at deila persónligar upplýsingar á hesum síðunum, tí talan er um svik, har ið roynt verður at lokka pening frá fólki.

Facebook-síðurnar eru meldaðar til løgregluna, og verða vónandi tiknar niður sum skjótast. 

Greinin varð fyrstu ferð løgd út 02. september 2024

Gera klárt at projektera nýggjan terminal

Vága Floghavn skal byggjast út, og í næstum verður ráðgevingin boðin út

Soleiðis sær ein skitsutekning út fyri útbyggingina á flogvøllinum. Men enn er einki endaligt (Mynd: FAE)

SkrivaÐ:

Sverri Egholm

Í næstum fer Vága Floghavn at bjóða út ráðgevingaruppgávuna til verkætlanina við nýggja terminalbygninginum.

Tað sigur Regin I. Jakobsen, stjóri á Vága Floghavn, við FM1.

Verkætlanin er fyribils mett til umleið 600 milliónir krónur.

Umframt nýggja terminalin umfata útbyggingarnar í Vága Floghavn millum annað nýggjar hangarar og nýtt parkeringspláss.

Útgrevsturin og planering til nýggjar hangarar og fleiri parkeringspláss fyri bilar er longu komin væl áleiðis.

Fíggingin skal finnast í íleggingargrunninum og við láni úr peningastovnum.

Greinin varð fyrstu ferð løgd út 06. september 2024

Háskúlalógin tarnar nú Grøna Háskúlanum

Skúlin á Sandi letur kortini ikki uppaftur - í øllum førum ikki í fyrstu syftu. Tað er serliga lóggávan á økinum viðvíkjandi aldrurskrøvum og øðrum, sum forðar

- Alt ov ofta hevur tað tó víst seg, at næmingarnir ikki sleppa á skúlan, tí tey passa ikki í smala lógbundna málbólkin. Tað hevur ikki eydnast at uppfylla formligu krøvini frá myndugleikunum, og skúlin kann tí ikki lata uppaftur nú (Mynd: Grøni Háskúlin)

SkrivaÐ:

Agnar Prestá

Í vár varð boðað frá, at Grøni Háskúlin á Sandi stóð fyri einari spirandi endurupplating. Ætlanin var, at ung aftur fóru at hava møguleika at læra um tilfeingi og gagnnýtslu av náttúruni, og hvussu man kann liva og virka í samljóð við náttúruna.

Í longri tíð hava miðvísar fyrireikingar verið at menna innihaldið á Grøna Háskúlanum - hetta fyri at bjóða næmingunum viðkomandi og spennandi skeið, og eftir ætlan skuldi skúlin nú verið opin.

Ætlanin er tó fallin til jarðar. Tað er tó sum so ikki vegna heilt lítlan áhuga, vísir Grøni Háskúlin á í skrivi. Millum annað vildu útlendingar luttaka.

- Áhugin hevur verið stórur, tí sjálvsveitning og grøna leiðin er tíðarbær og liggur føroyingum nær at hjarta. Harumframt hevur tað verið áhugi úr útlondum at koma til Føroya at læra, hvussu vit her arbeiða við umhvørvi, innløgumentan og matgerð. Virðini, sum Grøni Háskúlin byggir á, tala til ein breiðan aldursbólk og til bæði leik og lærd.

Trupulleikin er tó, at tað ikki ber til at lata upp innan verandi lóggávu. Hon sigur millum annað, at minst 12 næmingar, sum skulu verða millum 17 og 25 ár og hava lokið 9. floksprógv skulu ganga á skúlanum. Hetta í minst 16 vikur har næmingarnir millum aannað verða undirvístir í føroyskum máli og mentan.

Her hevur tað tað tó ikki heilt rakt - helst millum annað tí at fólk úr øðrum aldri og við øðrum tjóðskapi hava søkt, meðan ov fá, ið eru innan fyri omanfyri nevndu rammurnar, hava søkt.

- Alt ov ofta hevur tað tó víst seg, at næmingarnir ikki sleppa á skúlan, tí tey passa ikki í smæla lógbundna málbólkin. Tað hevur ikki eydnast at uppfylla formligu krøvini frá myndugleikunum, og skúlin kann tí ikki lata uppaftur nú. 

Hetta halda tey, ið standa aftanfyri Grøna Háskúlan er óheppið. Áhugin at nema sær kunnleika innan hetta økið er breiður - men ov breiður til lógina. Tað er tó alsamt størri tørvur á skúlanum á, vísa tey sjálvi á - i av broyttu heimsmyndina, har størri krøv eru til matsjálvbjargni og tørvinum á heilsugóðum umhvørvisvinarligum mati, men eisini av einum fólksligum ynski um dygdarvitan og førleikar um matframleiðslu og tilgerð.

- Áhaldandi hevur verið víst á, at háskúlalógin ikki er hóskandi og má broytast, og tað verður altso aftur staðfest við hesum stendur eisini í skrivinum.

Greinin varð fyrstu ferð løgd út 04. september 2024

Maskinmeistarafelagið: KAF sigur nei til skipað viðurskifti

- Maskinmeistarafelagið slepti at kalla øllum øðrum krøvum fyri at fáa greiðar ásetingar um arbeiðstíðina í sáttmálan, men tað vil Kommunala Arbeiðsgevarafelagið ikki

- Okkurt bendir á, at KAF vil hava kaos á økinum, so tey betur kunnu manirera við fólkinum, sum tey finna tað fyri gott. Eg dugi í hvussu er ikki at síggja nakra skilagóða grundgeving fyri at siga nei til skipað viðurskifti, sigur Arnfinn Bech, formaður í Maskinmeistarafelagnum

SkrivaÐ:

Sverri Egholm

Semingsmaðurin hevur seinnapartin kastað frá sær í royndini at fáa semju millum Maskinmeistarafelagið og Kommunala Arbeiðsgevarafelagið, KAF, um nýggjan sáttmála fyri maskinmeistararnar hjá SEV og IRF.

Í Maskinmeistarafelagnum undrast tey stórliga, at KAF ikki hevur verið til at vika, men bara vent øllum ynskjum í hurðini. Tí knúturin í samráðingunum er ikki krøv um stórar lønarhækkingar, men eitt einfalt krav hjá Maskinmeistarafelagnum um at fáa skipað viðurskifti á sáttmálaøkinum.

Ítøkiliga snýr tað seg um eitt krav um at fáa greiðar arbeiðstíðarreglur ásettar í sáttmálanum. Reglur, sum definera arbeiðstíðina – og harvið eisini frítíðina hjá starvsfólkunum – og áseta karmar fyri eitt nú arbeiði í vaktum.

Sáttmálabrot
Arnfinn Bech, formaður í Maskinmeistarafelagnum, er stórliga bilsin, í felagnum eru tey ikki í iva um, at tað er í stríð við galdandi sáttmála, soleiðis sum vaktararbeiðið hjá SEV verður praktiserað og umsitið í dag.

- Hjá SEV hava tey vaktarskipanir í dag, sum greitt bróta við sáttmálaásetingarnar, og tær eru ongantíð góðkendar av Maskinmeistarafelagnum. Fingu vit semju um arbeiðstíðarreglurnar, høvdu vit kunna gjørt tað lógligt, sum í dag er ólógligt.

- Men okkurt bendir á, at KAF vil hava kaos á økinum, so tey betur kunnu manirera við fólkinum, sum tey finna tað fyri gott. Eg dugi í hvussu er ikki at síggja nakra skilagóða grundgeving fyri at siga nei til skipað viðurskifti, sigur hann.

Sjálvt um semingsroyndin er slitnað, fara maskinmeistararnir hjá SEV og IRF ikki til hús beinanvegin. KAF hevur ikki lýst verkbann, og Maskinmeistarafelagið hevur ikki lýst verkfall.

- Vit hava bíðað síðan 1. oktober 2022, tá verandi sáttmáli gekk út, so vit kunnu saktans bíða eitt sindur afturat. Tað fyrsta, vit gera nú, er í hvussu er at bjóðað okkara limum á hesum sáttmálaøkinum til kunnandi fundir, har vit greiða teimum væl og virðiliga frá støðuni, sigur Arnfinn Bech.

Tíðindaskriv frá Maskinmeistarafelagnum

Les eisini viðmerking frá Kommunala Arbeiðsgevarafelagnum: Semingsroyndin millum Kommunala Arbeiðsgevarafelagið og Maskinmeistarafelagið bar ikki á mál

Greinin varð fyrstu ferð løgd út 03. september 2024

Útlendingastovan tekur nú avgerðir um útlendingamál

Avgerðir um visum, friðskjól, útvísing og ríkisborgararætt liggja framvegis hjá donsku útlendingamyndugleikunum

 

SkrivaÐ:

Ingi Samuelsen

1. september fóru flestu mál innan útlendingaøkið undir føroyskan avgerðarmyndugleika, upplýsir Løgmálaráðið.

Broytingin mekir, at allar umsóknir um varandi og fyribils uppihalds- og arbeiðsloyvi, sum t.d. viðvíkja familjusameining, arbeiði (eisini gjøgnum ítróttaravtalur, fast track-avtalur og ES-lóggávu), sjálvstøðugt vinnurekandi, lesandi, starvsnæmingar, granskarar, trúboðarar, og teirra familjur, umframt au pair-umsóknir, framyvir verða viðgjørdar av Útlendingastovuni.

Um spurningar stinga seg upp í hesum sambandi, er Útlendingastovan til reiðar at ráðgeva. Viðkomandi vegleiðingar, umsóknarbløð, málsviðgerðartíðir og aðrar upplýsingar eru nú eisini at finna á heimasíðuni hjá Útlendingastovuni.

Framvegis verða tó mál um visum, friðskjól, útvísing og ríkisborgararætt ikki avgreidd av føroyskum myndugleikum. Í slíkum førum kunnu danskir útlendingamyndugleikar enn veita neyðuga vegleiðing og ráðgeving. 

Greinin varð fyrstu ferð løgd út 03. september 2024

Evy Jacobsen nýggjur nevndarlimur í Føroya Arbeiðsgevarafelag

Árni Ellefsen, fyrrverandi stjóri í Føroya Banka, er farin úr nevndini

 

SkrivaÐ:

Sverri Egholm

Jón Sigurdsson heldur fram sum formaður og Høgni Hansen sum næstformaður í Føroya Arbeiðsgevarafelag.

Á aðalfundinum hjá Føroya Arbeiðsgevarafelag týsdagin vóru Jón Sigurdsson og Høgni Hansen afturvaldir í nevndina. Árni Ellefsen fór úr nevndini og Evy Jacobsen, stjóri í Pf. Betri, varð vald inn sum nýggjur nevndarlimur.

Greinin varð fyrstu ferð løgd út 05. september 2024

Suðuroyar Sparikassi positivt hálvársúrslit

Úrslitið fyri fyrra hálvár 2024 var 3,1 milliónir – og væntaða úrslitið fyri alt árið verður mett til 6 milliónir krónur

 

SkrivaÐ:

Tíðindaskriv

Hálvársúrslitið 2024 hjá Suðuroyar Sparikassa vísir eitt úrslit á 3,1 milliónir krónur sammett við 2,8 milliónir sama tíðarskeið í fjør.

Høvuðsorsøkin til framgongdina er, at nettorentu- og ómaksgjøld eru hægri, niðurskrivingarnar eru lægri umframt at virksemið sum heild er økt.

Økt virksemi

Útlánini hækkaðu úr 587 milliónum krónum upp í 606 milliónir, sum svarar til ein vøkstur á 19 milliónir krónur ella 3,2 prosent. Fyrra hálvár vaks realkredittfíggingin við 9 prosentum.

Innlánini vóru 752 milliónir krónur sammett við 677 milliónir sama tíðarskeið í fjør, sum er ein hækking á 75 milliónir krónur ella 11,1 prosent.

Eginkapitalurin er øktur úr 69,1 upp í 75,4. milliónir krónur sammett við sama tíðarskeið í fjør.

Solvensur og gjaldføri

Solvensurin var 24,2 prosent samanborið við 22,0 prosent í 2023. Lyklatalið fyri gjaldførið var 576 prosent í mun til lógarkravið á 100 prosent.

Søren Lünell Bruhn, stjóri, er vælnøgdur við gongdina higartil í ár:

- Í 2024 eru kundarnir aftur farnir at velja realkredittfígging til bústað, sum er eitt gott val og nakað, ið vit gleðast um. Vit vænta enn størri vøkstur innan realkredittfígging í heyst.

Sparikassastjórin leggur afturat, at væntanin til endaliga ársúrslitið fyri skatt 2024 er 6,0 milliónir krónur.

Úrslitið fyri fyrra hálvár 2024:

Úrslit eftir skatt: 3,1 mió. krónur
Útlán: 606 mió. krónur
Innlán: 752 mió. krónur
Solvensur: 24,2 %
LCR 576 % 

Greinin varð fyrstu ferð løgd út 05. september 2024

Alvalon skal nú útbyggjast

Avtala er gjørd við ArtiCon um at nýggjan bygning til dagstovnin í Sørvági. Hann verður 24 metrar langur, 10 metrar breiður og í tveimum hæddum. Hann skal avhendast um eitt ár

Jón Sigurðsson, stjóri í ArtiCon, saman við Eyð Ellingsgaard, borgarstjóra í Sørvágs kommunu (mynd: sorvag.fo)

SkrivaÐ:

Agnar Prestá

Sørvágs kommuna og ArtiCon hava gjørt sáttmála at útbyggja dagstovnin Alvalon í Sørvági. Hesum hevur Sørvágs kommuna boða frá á heimasíðu sínari.

Nýggi bygningurin, við tveimum hæddum, gevur ymiskar nýggjar møguleikar fyri dagstovnin :

- Nýggi bygningurin verður 24 metrar langur og 10 metrar breiður. Bygningurin verður í tveimum hæddum við lofti. Niðasta hæddin er til umsiting/starvsfólk, har skrivstovur og fundarhøli mynda hæddina. Á miðhæddini eru tvær barnagarðsstovur við umklæðing, bólkarúmi, hvílirúmi, motorikrúmi, sansarúmi og vátrúmun. Á loftinum verður hugsavningarstað til børnini.

Sørvágs kommuna skrivar eisini, at millum verandi og nýggja bygningin verður høvuðsinngongdin, ið virkar sum bindilið til allar stovurnar á stovninum. Niðasta hæddin verður úr betong; bæði veggir og dekk. Ovara hæddin og tekjan verða gjørd sum timburelementir í høllini hjá ArtiCon á Sundi.

Ætlanin er at gera byggiplássið klárt og byrja jørðarbeiðið nú í september. Bygningurin skal avhendast um eitt ár - í september 2025.  

Greinin varð fyrstu ferð løgd út 03. september 2024

Selvík beindur burtur

Sluppungin, sum hevur staðið á Dungasandi í Sørvági í nógv á, er beindur burtur. Tað varð ikki mett ráðiligt at umvæla hann

(Mynd: Sørvágs kommuna)

SkrivaÐ:

Sverri Egholm

Alt hevur sína tíð, og sluppungin Selvík, sum í mong ár hevur staðið niðri á Dungasandi, var nú í so ringum standi, at hann mátti beinast burtur. Hann var blivin til ampa fyri trygdina á økinum, har børn ofta spæla.

Tað skrivar Sørvágs kommuna á heimasíðuni.

Á bygdaráðsfundinum í farnu viku varð endaliga støðan tikin, og avgerðin bleiv, at hann skuldi beinast burtur.

Kommunan sigur, at tað hevði kostað upp ímóti eini millión krónur at umvælt hann, tí næstan alt mátti gerast av nýggjum og tað var ikki mett ráðiligt.

Ein bátur sum stendur úti, krevur nógv viðlíkahald, og hetta er kostnaðarmikið.

- Tað er við sorgblídni at hann varð beindur burtur, tí hann er ein partur av søguni hjá okkara gomlu útróðrarbygd, skrivar Sørvágs kommuna.

Greinin varð fyrstu ferð løgd út 06. september 2024

Elias best umtókta dreingjanavnið í 2023

11 dreingir, sum vórðu føddir í 2023 fingu navnið Elias – onnur vælumtókt nøvn vóru Brandur, Liam og Nóa

(Mynd: Sverri Egholm)

SkrivaÐ:

Alda Nielsdóttir

Elias var best umtókta navnið á dreingjum føddir í 2023, heilir 11 dreingir fingu hetta navnið, vísir uppgerð hjá Hagstovuni.

Elias er blivið eitt navn, vit vanliga síggja ovarlaga á listanum yvir vælumtókt nøvn á dreingjum, og tríggjar ferðir hevur tað verið best umtókta dreingjanavn.

Síðani 1985 hava 90 fingið navnið Elias, og við ársenda í fjør vóru 104 menn við hesum navninum búsitandi í Føroyum.

Beint í hølunum á Elias var navnið Brandur, sum eisini hevur verið væl umtókt seinastu 20 árini. Brandur var næstbest umtókta navn í 2023 og best umtókta navn í 2022. Tíggju fingu navnið í 2023, fimm í 2022, og eisini fimm fingu navnið í 2020.

Tilsamans 124 dreingir hava fingið navnið Brandur síðan 1985.

Onnur vælumtókt nøvn hjá dreingjum vóru Liam, Nóa, Martin og Jákup. Fýra dreingir, føddir í fjør, hava ikki fingið navn enn, skrivar Hagstovan.

Greinin varð fyrstu ferð løgd út 02. september 2024

Jákup og Jógvan framvegis vanligastu mannfólkanøvnini

Jógvan Joensen er vanligasta fulla navn hjá monnum í Føroyum. Tólv menn í Føroyum hava hetta navnið í felag

(Savnsmynd: Hagstovan)

SkrivaÐ:

Alda Nielsdóttir

Nøvnini Jákup og Jógvan eru framvegis vanligastu mannfólkanøvn í Føroyum. Hesi bæði nøvnini hava ligið sum nummar eitt og tvey øll árini síðan 1985, skrivar Hagstovan.

Síðani 2002 hevur Jákup verið mest vanliga navnið, meðan Jógvan var mest vanliga navnið undan tí. Eisini hava nøvnini Rúni, Høgni, Ólavur og Kári verið vanlig mannfólkanøvn í nógv ár.

Samanborið við fyri 30 árum síðani, eru tó onkrar broytingar at síggja. Síðan tá hava nøvnini Martin, Magnus og Jónas tikið plássini frá Jan, Regin og John á listanum yvir tíggju tey vanligastu nøvnini á monnum. Av teimum er Jónas nýggjasta navnið. Tað er best umtókta navn á monnum í einogtjúgundu øld. Tað er klintrað av einum 367. plássi í 1993 til áttanda pláss í 2023, tá teir vóru 170 í tali.

Fleiri nøvn eru eisini løgd afturat hesi 30 árini. Nøkur av teimum, sum í dag eru vanlig nøvn millum menn, eru til dømis Mattias, Nóa, Lukas, Liam, Sámuel, Bragi og Mika.

Jógvan Joensen er vanligasta fulla navn hjá monnum. Tólv menn í Føroyum hava hetta navnið í felag. Hetta hevur verið vanligasta fulla navnið hjá monnum øll árini síðan 1985, tá 20 menn høvdu hetta navnið.

Greinin varð fyrstu ferð løgd út 04. september 2024

Tóra best umtókta gentunavnið í 2023

Fimm gentur, sum vórðu føddar í 2023, fingu navnið Tóra – onnur vælumtókt gentunøvn vóru Lív, Lilja, Olivia, Marta, Bjarta, Sólja og Isabella

(Mynd: Hagstovan)

SkrivaÐ:

Alda Nielsdóttir

Tóra var best umtókta navnið hjá gentum, sum vórðu føddar í fjør, og hetta er fyrstu ferð síðan 1985, at Tóra er ovast á hesum listanum, skrivar Hagstovan.

Fimm gentur, sum vórðu føddar í 2023, fingu navnið Tóra.

Hóast navnið ikki hevur verið ovast á listanum áður, so hevur tað verið eitt vælumtókt navn, tí nærum hvørt ár er navnið givið einari ella fleiri gentum.

Síðan 1985 hava tilsamans 89 gentur fingið navnið Tóra. Við ársenda í fjør búðu 117 Tórur í Føroyum, skrivar Hagstovan.

Næstbest umtóktu gentunøvnini vóru Lív, Lilja, Olivia, Marta, Bjarta, Sólja og Isabella. Av teimum er Lív tað navnið, sum hevur verið best umtókt gjøgnum árini.  

121 gentur hava fingið navnið Lív síðan 1985. Hinvegin er Isabella eitt av nýggjaru nøvnunum, sum er blivið betri og betri umtókt seinastu 15 árini.

Greinin varð fyrstu ferð løgd út 02. september 2024

Maria framvegis vanligasta navnið hjá kvinnum

Vanligasta fulla navnið hjá kvinnum er navnið Anna Petersen, sum 11 kvinnur hava í felag

(Savnsmynd: Hagstovan)

SkrivaÐ:

Alda Nielsdóttir

Við ársenda í fjør var Maria framvegis vanligasta konufólkanavnið í Føroyum. Síðani koma nøvnini Anna og Annika.

Millum tíggju tey mest vanligu nøvnini hjá kvinnum í Føroyum vóru eisini nøvn sum Katrin, Marjun, Beinta og Rannvá, skrivar Hagstovan.

Maria, Anna og Annika hava verið ovast á listanum yvir nøvn á kvinnum øll árini síðan 1995. Áðrenn 1995 var Marjun millum trý tey mest vanligu nøvnini á kvinnum.

Og Sambært Hagstovuni vóru tíggju tey vanligastu nøvnini í 2023 at kalla tey somu sum fyri 30 árum síðani. Einasti munur er, at navnið Anna Maria er skift út við navnið Lív, sum í 2023 var á tíggjunda plássi.

Seinastu 30 árini eru fleiri onnur nøvn løgd afturat hjá kvinnum. Nøkur av teimum, sum eru nógv brúkt í dag, eru eitt nú Ronja, Ró, Emilia, Ranja, Vón, Brá, Ria og Mira.

Vanligasta fulla navnið hjá kvinnum er navnið Anna Petersen, sum 11 kvinnur hava í felag. Anna Petersen hevur verið vanligasta fulla navn hjá kvinnum øll árini síðan 1985, tá 14 kvinnur høvdu hetta navnið. Nøkur ár hevur Anna petersen tó deilt fyrstaplássið við navnið Anna Hansen.

Greinin varð fyrstu ferð løgd út 04. september 2024

Góð 30.300 starvsfólk í juli

Tað er ein vøkstur á eitt prosent samanborið við juli 2023, skrivar Hagstovan

(Mynd: Hagstovan)

SkrivaÐ:

Alda Nielsdóttir

Í juli vóru 30.323 starvsfólk - løntakarar - í Føroyum. Tað eru 300 fleiri enn í juli 2023, og er talan um ein vøsktur á eitt prosent, skrivar Hagstovan.

Knapt 15.600 menn og 14.800 kvinnur vóru í starvsfólkaskaranum í juli. Eitt býti á 51,3 og 48,7 prosent. Samanborið við juli í fjør er vøksturin 0,5 prosent hjá monnum og 1,5 prosent hjá kvinnum.

Í hagtølunum hjá Hagstovuni sæst, at 43,7 prosent av starvsfólkunum arbeiddu hjá tí almenna, og 56,3 prosent arbeiddu uttanlands og í privata geiranum.

9.150 kvinnur, svarandi til á leið 60 prosent av kvinnuligu starvsfólkunum, arbeiddu hjá arbeiðsgevarum undir almennum ræði. Umleið 70 prosent av mannfólkunum - 11.400 - arbeiddu hjá arbeiðsgevarum undir privatum ræði.

Greinin varð fyrstu ferð løgd út 31. august 2024

Bjóða væl tilgjørdan laks til øll á Bryggjubakka

Tiltakið verður hildið 14. september

 

SkrivaÐ:

Ingi Samuelsen

Leygardagin 14. september verður eitt serligt mattiltak hildið undir Bryggjubakka í Havn, tá høvi verður hjá fólki at koma oman á økið og fáa ókeypis mat. Serliga verður tað laksur, tilgjørdur av ymiskum royndum kokkum, sum verður at fáa. Ókeypis.

Í tíðindaskrivinum um tiltakið, sum er sent frá somu fólkum, sum plaga at skipa fyri Slaktinum í Tórsgøtu, stendur millum annað soleiðis:

Ert tú til reiðar til eina gastronomiska uppliving, sum verður heilt ógloymandi? Tann 14. september verður Bryggjubakki í Havn karmur um eitt serligt matartiltak, har øll eru vælkomin at koma og forkela sínar smakkleykir – ókeypis!

Dugnaligir kokkar á hægsta stigi bjóða brellbitar av føroyskari rávøru, við laksinum sum høvuðspersóni. Henda dagin fært tú møguleikan at royna ymiskar laksarættir – alt frá klassiskum rættum til nýskapandi upplivingar, sum kokkarnir hava sett saman við kreativum snildi. Laksur, sum er bæði sunnur og vælsmakkandi, verður borðreiddur á nógvar ymiskar háttir, sum gevur tær møguleikan at uppliva hvussu fjølbroytt henda rávøran er.

Hvør einstakur laksarættur verður tilgjørdur við serligum íblástri, sum gevur tær møguleika at uppliva laks við einari nýggjari dýpd av smakki. Hvat við at smakka laks við sitrus og kryddi, ella eina nýskapandi laksatartar? Hetta er eitt upplagt høvi at royna okkurt nýtt og fáa íblástur til, hvussu tú sjálv/ur kanst brúka laks heima við hús.

Bryggjubakki verður henda dagin gjørdur til eitt livandi og hugnaligt stað, har tú kanst taka tíni nærmastu við, seta teg niður og njóta góðan mat og løtuna saman. Við góðum veðri (vónandi) og sjótutli, er hetta tann besta staðsetingin fyri ein heilan dag við góðum mati og góðum felagsskapi.

Greinin varð fyrstu ferð løgd út 05. september 2024

Oy bryggjar øl til Grønlands

Bryggjaríið OY hevur gjørt samstarvsavtalu við grønlendsku keypsamtøkuna Brugseni um, at OY skal bryggja ymiskar øl til grønlendska marknaðin. Lagt verður út við trimum nýggjum sløgum

 

SkrivaÐ:

Tíðindaskriv

Við ársskifti varð nýggj pantskipan sett í verk í Grønlandi. Hetta hevur gjørt tað lættari hjá nýggjum framleiðarum at koma inn á marknaðin. Eitt nú, tí at dósir og ymisk sløg av glas- og plastikkfløskum eru vorðnar lógligar. Gamla pantskipanin hevði við sær, at donsku Carlsberg og UniBrew høvdu so gott sum einkarætt á grønlendska øl- og sodavatnsmarknaðinum. Hetta er broytt við nýggju lóggávuni, og verulig kapping er komin á økið.

Í Grønlandi kunnu allir matvøruhandlar selja rúsdrekka, og tí hevur handilsketan Brugseni leitað sær eftir einum hóskandi framleiðara at bryggja nýggjar góðsku øl til grønlendska marknaðin. Valið fall á føroyska OY.

At byrja við vera trý sløg av øli at fáa í teimum 17 handlunum, sum Brugseni hevur í átta teimum størstu býunum í Grønlandi. Við tíðini er ætlanin at framleiða enn fleiri sløg av øli saman við OY til Grønlands.

Hóast samleikin á nýggju grønlendsku ølunum minnir nakað um brand-andan hjá OY, so hava allar ølirnar hjá Brugseni sín heilt egna grønlendska samleika. Og eins og í Føroyum eru nøvnini á ølunum eitt sindur skeiv og spælandi.

Nýggja klassik ølin, sum OY hevur bryggjað til Brugseni, hevur fingið heitið Kilaasitoqaq, ið merkir ”gamli Klaus” á grønlendskum. Danska mannfólkanavnið Klaus er ikki lætt at úttala á grønlendskum, og verður tí ofta úttalað ”Kilaasi”, ið minnir um ljóðið á orðinum klassik. Tí fall valið á hetta navnið til ølina.

Í Føroyum eru ymisk føroysk djór knýtt at ymsu OY ølunum, antin sum eydnudjór ella maskottar. Tað sama er galdandi við grønlendsku ølunum, tó at talan er um onnur djór enn tey føroysku. Á klassik ølini er tað ein roysningur, ið er eydnudjórið.

Nýggi grønlendski pilsnarin eitur Makkulu, og sipar navnið til tað at sussa ella til ein persón, ið snakkar ov hart og ov nógv. Tað verður eisini mett, at tað ljóðar sum suss, tá grønlendska havgásin, sum prýðir pilsnaran, samskiftir við aðrar havgæs. Tí eitur henda ølin soleiðis.

Triðja og síðsta nýggja ølin eitur Siarsuk, og merkir hetta “gamli stavnur” ið ofta verður brúkt um ein persón, sum møtir óvæntað upp til ymiskt. Talan er um eina Hazy IPA øl, og verður hon prýdd við tveimum pólrevum, sum dystast í Pakassumittut, ið er ein aldargamalur inuit ítróttur.

Tað er lokala listakvinnan, Sacha Malinský, ið er mest kend undir listanavninum Cheeky, sum hevur prýtt allar tær grønlendsku OY dósirnar.

Óli Restorff Hansen, stjóri í OY, fegnast um nýggja samstarvið og sigur, at “tað er ein heiður at sleppa at bryggja góðskugott øl til grønlendingar. Hetta er eitt spennandi samstarv, har vit síggja góðar møguleikar fyri báðar partar, nú grønlendski ølmarknaðurin er latin upp fyri kapping.”

Benny Reffeldt Otte, marknaðar- og samskiftisleiðari hjá Brugseni, leggur afturat: “Vit fegnast um at kunna veita kundum okkara fyrstafloks øl við einum serstøkum grønlendskum samleika við støði í okkara søgu, mentan og máli, men samstundis eisini við einum skálkasmíli. Vónandi er hetta byrjanin til eitt langt og gott samstarv millum Brugseni og OY.”

Greinin varð fyrstu ferð løgd út 04. september 2024

Ósannlíkt at bluetongue disease kemur til Føroya

Smittar einans ávís jóturdýr og mýggjabitar og er ikki vandamikil fyri fólk

(Savnsmynd)

SkrivaÐ:

Ingi Samuelsen

Sannlíkindini fyri, at sjúkan bluetongue disease, ið rakar kleyvdjór, skal gera um seg í Føroyum eru sera smá. Tað staðfestir Heilsufrøðiliga starvsstovan, nú sjúkan hevur breitt seg í Evropa, og eisini er komin til Danmarkar.

Bluetongue disease smittar fyrst og fremst við ávísum smáum mýggjabitum – culicoides – sum skulu koma allan vegin úr smittaðum øki til Føroya fyri at bera smittuna við sær.

Afturat tí, at tað er lítið sannlíkt, at hesir smittaðu mýggjabitar koma so langa leið yvir hav, er smitta á henda hátt mest sannlík tá tað er heitt í luftini, meira enn 15 hitastig.

- Seinastu 15 árini hava vit als ikki loyvt innflutningi av livandi kleyvdjórum, hetta forðar fyri, at t.d. neyt fongd við bluetongue disease koma til Føroya, og at føroyskir mýggjabitar síðani taka sjúkuna víðari í landinum, skrivar Heilsufrøðiliga starvsstovan.

Bluetongue disease virus er eisini at finna í sáð hjá sjúkum djórum. Innflutningur av sáð er í kunngerð álagdur treytir, sum best møguligt tryggjar móti bluetongue disease og øðrum sjúkum.

- Um so er, at seyður, neyt ella geitir hava sjúkutekin, sum minna um bluetongue disease ella aðrar álvarsligar sjúkur, eigur ein at venda sær til praktiserandi djóralækna, sum tekur støðu til, hvørt tað er orsøk til at fráboða landsdjóralæknanum um sjúkuna.

Vanligu sjúkutekinini eru fepur, og serliga seyður hovnar um nøs og munn og tað rennur úr eygum, nøs og munni. Tungan kann hovna og gerast blá. Seyður er rættiliga viðbrekin fyri bluetongue disease, kastar ofta burtur og kann doyggja av sjúkuni.

Sjúkan smittar einans ávís jóturdýr og mýggjabitar og er ikki vandamikil fyri fólk. 

Greinin varð fyrstu ferð løgd út 03. september 2024

Kirvi komið við nýggjum íste við ferskusmakki

Kirvi er komið á marknaðin við enn einari vøru hetta summarið

(Mynd: Kirvi)

SkrivaÐ:

Tíðindaskriv

Felagið Kirvi í Lopra, ið áhaldandi roynir at vaksa um sítt vøruúrval, kom síðst í juni út við eini fløsku við passiónfruktsmakki í Sweet & Sparkling røðini.

Passiónsfruktdrykkurin er ein mildur, eksotiskur og frískligur drykkur, sum kann drekkast alt árið.

Tann nýggja Kirvi-íste’in, sum longu er á flestu handilshillunum, er eitt smakkbland av søtum og saftigum ferskum, natúrligum tebløðum og sitrónsmakki, ið samanblandað gevur eina leskiliga smakkuppliving.

Kirvi strembar altíð eftir at gera vælsmakkandi hágóðskuvørur, ið eru eitt sunnari alternativ. Sum flest øll vita, so er tað tað náttúrureina og mineraliseraða Kirvi-vatnið úr Lopra, ið er grundarsteinurin og bulurin í makaleysu vørunum, sum Kirvi - nærlagt og góðskurtryggja – velur at koyra út á marknaðin. 

Í februrar varð Kirvi-vatnið umrøtt av fleiri vatnsommelierum á skeiði í Týskland, og tá fekk tað bestu skoðsmál; bæði sum still vatn, men eisini sum sera væl hóskandi til smakkbland, ið nýggja Kirvi-íste’in eisini speglar væl. Men smakkurin fyllir lítið, tí omanfyri 99,5 prosent av innihaldinum av øllum Kirvi vørum reint vatn úr Lopra.

- Vit eru ótrúliga spent uppá at presentera okkara seinasta ískoyti til Kirvi familjuna: Kirvi ferskusmakkað íste, sigur Hallur Augustinussen, stjóri á Kirvi.

Víðari sigur Hallur.

- Vit eru einasta virkið í Føroyum, sum hevur eina ávegis góðkenning til natúrligt minreral vatn, ið opnar upp fyri heilt nýggjum møguleikum á altjóða marknaðinum, sum okur eru øgiliga spent uppá. Men fyrst og fremst ynskja okur at framleiða vørur, sum føroyingurin tekur til sín. Okra endamál er at framleiða burðardyggar og heilsugóðar vørur til føroyingar.

Greinin varð fyrstu ferð løgd út 06. september 2024

Heðin Mortensen klárar ikki at lata vera

78 ára gamli borgarstjórin hevur tikið avgerð um, at hann stillar uppaftur á býráðsvalinum 12. november

Heðin Mortensen (Savnsmynd: Sverri Egholm)

SkrivaÐ:

Sverri Egholm

Tað hevur verið ivasamt, men nú er greitt, at Heðin Mortensen stillar uppaftur á býráðsvalinum 12. november.

Hetta váttaði hann fyri in.fo í gjár.

Heðin Mortensen er 78 ára gamal, og hevur verið býráðslimur í 52 ár og borgarstjóri í 16 ár.

Kortini er tað sambært honum nógv eftir at avgreiða.

- Eg havi nógv eftir, sum eg vil avslutta áðrenn eg fari. Vit hava nógv projektir, sum eru í gongd og eisini sum fara í gongd. Eg vil gjarna hava reint borð tá eg fari, sigur Heðin Mortensen við in.fo.

Greinin varð fyrstu ferð løgd út 06. september 2024

Oddbjørg Højgaard verður stjóri í Rúsuni

Tekur við starvinum 1. desember

 

SkrivaÐ:

Ingi Samuelsen

Løgmálaráðið sett Oddbjørg Højgaard í starv sum stjóri í Rúsdrekkasølu Landsins.

Oddbjørg hevur drúgvar royndir innan leiðslu og rakstur og eisini innan lýsingar, sølu og tænastur. Millum annað stovnaði og rak hon Dekostovuna í 15 ár, og var stjóri á Hotel Hafnia í 8 ár. Oddbjørg kemur úr einum starvi sum stjóri á Gjáargarði.

Oddbjørg Højgaard tekur við starvinum 1. desembur.

Greinin varð fyrstu ferð løgd út 03. september 2024

Teitur Christensen nýggjur høvuðskokkur í Hallartúni á Hilton Garden Inn

Hann tekur yvir eftir Svein Patursson, sum hevur verið høvuðskokkur síðan 2022

Teitur Christensen (Mynd: Hilton Garden Inn)

SkrivaÐ:

Sverri Egholm

Tvørámaðurin Teitur Christensen verður nýggjur høvuðskokkur í Hallartúni á Hilton Garden Inn.

- Eg gleði meg at hitta starvsfólkini á hotellinum og toymið handan matstovuna, sigur Teitur, sum byrjar í nýggja starvinum mánadagin.

Teitur er 38 ár og útlærdur kokkur við nógvum royndum úr bæði Keypmannahavn og Føroyum. Teitur hevur millum annað verið souschefur á Cofoco, starvast hjá Madklubben, Nose 2 Tail, Fútastovu og øðrum.

Teitur tekur yvir eftir Svein Patursson, sum hevur verið høvuðskokkur í Hallartúni síðani 1. desember 2022. Svein fer í annað starv í fyritøkuni, og fer at taka sær av at byrja eina nýggja deild.

- Vit gleða okkum ótrúliga nógv til at fáa Teit í gongd og eru spent at síggja og smakka tað, sum Teitur fer at leggja afturat øllum tí góða vit longu hava. Teitur er ein av dugnaligastu kokkunum vit hava í Føroyum, so vit eru stolt av at kunna knýta ein persón við so høgari fakligheit og nógvum royndum afturat toyminum, sigur Rógvi Mikkelsen, stjóri á Hilton Garden Inn.

Greinin varð fyrstu ferð løgd út 03. september 2024

Rósa Heinesen sagt seg úr starvi

Miðnám í Suðuroy skal hava nýggjan rektara

Rósa Heinesen (Savnsmynd: Sverri Egholm)

SkrivaÐ:

Sverri Egholm

Miðnám í Suðuroy skal hava nýggjan rektara, nú Rósa Heinesen, sum síðani 1. februar í ár hevur røkt starvið, hevur sagt starvið frá sær.

Rósa Heinesen sigur við útvarpið, at hon tekur við nýggjum starvi, og avsannar eisini, at uppsøgnin skal hava nakað við rokið í juni við borgarstjóran á Tvøroyri, Kristin Michelsen, at gera.

Orsøkin til rokið tá var eitt lesarabræv við yvirskriftini "Kommunusamanlegging: Ein fallos og annar".

Greinin varð fyrstu ferð løgd út 03. september 2024

Nýggjur dekanur á Náttúruvísindadeildini

Peter Freere, ph.d. í sterkstreymsverkfrøði, verður nýggjur dekanur á Fróðskaparsetri Føroya

Peter Freere

SkrivaÐ:

Tíðindaskriv

Ein samd setanarnevnd hevur valt at seta Peter Freere í starv at standa á odda fyri leiðslu og menning av Náttúruvísindadeildini á Setrinum.

Peter Freere er 64-ára gamal, og stóð sína ph.d. í sterkstreymsverkfrøði á University of Newcastle upon Tyne í Bretlandi í 1994. Hann hevur drúgvar starvsroyndir frá Monash University í Avstralia, Kathmandu University í Nepal og í seinastuni á Nelson Mandela Metropolitan University í Suðurafrika.

Somuleiðis hevur Peter Freere drúgvar leiðsluroyndir, sum eru avgerandi fyri starvið sum dekanur á Fróðskaparsetrinum. Hann hevur eisini familjubond til Føroya.

Á Náttúruvísindadeildini eru umleið hálvtannaðhundrað lesandi, sum lesa lívfrøði, mýlalívsvísindi, verkfrøði, KT-verkfrøði, webmenning og dátuvísindi. Starvsfólkini á deildini takast harumframt við nógva fjølbroytta náttúruvísindaliga gransking.

Peter Freere tekur við starvinum 1. desember.

Greinin varð fyrstu ferð løgd út 02. september 2024

Hátíðarhalda 100 ára dagin í viðarlundini

Ymist verður á skránni fyri at hátíðarhalda 100 ára dagin hjá viðarlundini í Trongisvági

(Savnsmynd)

SkrivaÐ:

Tíðindaskriv

Í dag kl. 11 verður hátíðarhald í viðurlundini í Trongisvági. Viðarlundin, ella plantasjan, verður 100 ár og tí verður tað gjørt okkurt burturúr.

Borgarstjórin í Tvøroyrar kommunu, Kristin Michelsen, bjóðar vælkomin og Jóhann Mortensen, formaður í Skógfriðingarnevndini, fer at halda røðu.

Skipað verður fyri rundferð í viðarlundini, saman við Rakul Arnfríð Dam, landsskógarvørði. Samstundis er framsýning um viðarvøkstur og ymiskt barnaítriv á skránni. Møguleiki verður eisini at seta eitt træ niður.

Aftur at øllum verður felagssangur og harmonikutónleikur og pylsur verða grillaðar. Afturvið verður okkurt drekkandi til børnini og kaffi.

Øll eru hjartaliga vælkomin at vitja í viðarlundini, nú 100 ár eru liðin, síðan fyrsta træið varð plantað á staðnum.

Greinin varð fyrstu ferð løgd út 05. september 2024

Lea Kampmann útgávukonsert í Norðurlandahúsinum 21. september

Songkvinnan og sangskrivarin framførir á Fiskastykkinum í Sandavági kvøldið fyri og í Vestmanna 19. september. Lea hevur ikki givið út á føroyskum áður - løgini eru skrivað saman við Teiti Lassen

At tora at lata múrarnar, eg hevði bygt kring meg fella, og at tora at vera eg, á málinum, eg segði, eg elski teg á fyrstu ferð (Savnsmynd: Jens Kr. Vang)

SkrivaÐ:

Tíðindaskriv

Tann 13. september gevur Lea Kampmann út fyrstu útgávu sína á føroyskum: Seinferð.

Í hesum sambandi fer Lea at hava útgávukonsert í Norðurlandahúsinum leygarkvøldið 21. september. Um útgávuna sigur Lea sjálv soleiðis:

- Tað var nakrar dagar fyri jólaaftan í 2022. Kavin lá sum ein tung dýna yvir
Hoydalar. Teitur og eg sótu í upptøkuhølinum, í Hjallinum á gamla Sanatoriinum, og hugdu út á kavaflykrurnar, sum løgdu seg á sprossar, tøk og greinar kring okkum. Eg var sjúkrameldað við strongd frá konservatoriinum í Keypmannahavn, og eg var svimbul og pøst allatíðina, eisini tá eg lá í songini.

- Men hendan desemberdagin settu Teitur og eg okkum fyri at skapa eina útgávu, ið var ein uppreistur ímóti tí skjótleikanum, sum ræður í dag. Ein innari uppreistur móti at halda, at ein skal renna eins skjótt sum hini, hóast tað ikki kennist rætt. Eg visti, at tað einasta, sum fór at gera meg fríska, var at loyva mær sjálvari at liva, skriva og syngja í seinferð. At tora at lata múrarnar, eg hevði bygt kring meg fella, og at tora at vera eg, á málinum, eg segði, eg elski teg á fyrstu ferð.

Teitur Lassen og Lea Kammpmann hava arbeitt saman um útgávuna

Flestu løgini á útgávuni snúgva seg um kærleika. Um mistan kærleika, vaksandi kærleika og minnir um ein kærleika, ið einaferð var. Løgini eru skrivað saman við Teiti Lassen, ið eisini hevur framleitt útgávuna.

- Alt á útgávuni er spælt og sungið teskandi á akustiskar gittarar, strúkarar og træblásarar. At innspæla og at skapa hesa útgávuna, var sum at liggja inni í einum sponskum gittara, langt vekk frá skermum og larmi.

Á útgávukonsertini bjóðar Lea tónleikarunum Saru, Lukasi og Aske - bólki sínum - við heim til Føroya at spæla við sær. Eisini bjóðar Lea einari strúkaratrio við á pall. Lea tekur pallsetingina hjá pallstjóranum, Ellen Ahnefeldt, við heim at prýða pallin í  Norðurlandahúsinum.

Afturat útgávukonsertini í Norðurlandahúsinum, spælur Lea Kampmann við bólki tvær aðrar konsertir. Hesar verða í Vestmanna kirkja hóskvøldið 19. september, á  Fiskastykkinum Úti á Gjógv fríggjakvøldið 20. september. Báðar byrja klokkan 20 - eins og útgávukonsertin í Norðurlandahúsinum leygarkvøldið 21. september klokkan 20

Greinin varð fyrstu ferð løgd út 05. september 2024

Fimm nýggjar barnabøkur á føroyskum

Bókadeild Føroya Lærarafelags gevur fimm bøkur út í ársins fimta bókaumfari

 

SkrivaÐ:

Innsent

Upprunaføroysk bók: Svansi-Bob

Bob er ein grísur. Bob elskar at eta. Bob hevur hoyrt, at lekkur matur er at fáa í býnum ...

Hevur tú nakrantíð hugsað, hvar orðið svansibob kemur frá? Nei?

Tað hevur Bob heldur ikki, og hann skilir ikki, hví øll kalla hann soleiðis, og hví øll eru so ill.

Bob er jú bara svangur. Hetta er ein herlig og svansut søga við stuttligum myndum um svanga grísin Bob, sum fer sín fyrsta túr inn í býin at fáa sær okkurt lekkurt at eta.

Joan Waag Høgnesen hevur skrivað, og Hans Jacob Østerø hevur myndprýtt. Bókin er innbundin, 42 blaðsíður og til børn, sum eru umleið 3 til 6 ár.

Náttarmeldurbók

Nú er ein nýggj meldurbók komin! Rotraut Susanne Berner brúkar myndir og eingi orð at vísa nógvar smáar søgur, sum fara fram í Meldurbýnum. Tað er nátt; fólk og djór sova friðarliga – í øllum førum summi. Onnur eru akkurát nú á veg onkrastaðni og uppliva alt møguligt spennandi á lesináttini á bókasavninum, á tjóvaveiðu ella í garðveitsluni.

Tær vælumtóktu Vár-, Summar-, Heyst- og Veturmeldurbøkurnar eru eisini uppafturprentaðar og aftur at fáa.

Rotraut Susanne Berner hevur skrivað og myndprýtt. Bókin er ein pappbók, 14 blaðsíður og til børn, sum eru umleið 0 til 2 ár.

Høgni verður ein T-Rex

Høgni við Tutlá hevur ein nýggjan trupulleika ... Ikki bara tað, at hann enn broytist til okkurt hissini dýr, men tað at fyritøkan hjá pápanum er í trupulleikum.

Familjan verður kanska noydd at selja húsini og flyta inn til Britu fastur og hennara seytjan kettur (og eitt træbein).

Alt hetta trýstið ger, at tað er trupult hjá Høgna at hava tamarhald á, nær hann broytist til dýr – og enn verri at broytast aftur aftur. Megnar hann at temja megina eina ferð fyri allar, ella fer hann at enda sínar dagar sum ein dúgva ...?

Sam Copeland hevur skrivað bókina, Sarah Horne myndprýddi, og Tórarinn Niclasen á Rípuni hevur týtt úr enskum. Bókin er heft, 288 blaðsíður og til børn, sum eru umleið 7 til 9 ár.

Suðureftir

Ina skal einki í summarferiuni. Allíkavæl fortelur hon øllum flokkinum, at hon skal Suðureftir.

Men Suðureftir er ikki á kortinum. Kanska fer summarferian, sum Ina helt fór at vera tann ringasta, at vera tann besta?

Marianne Kaurin hevur skrivað, og Elsa Birgitta P. Petersen týddi úr norskum. Bókin er heft, 226 blaðsíður og til børn, sum eru umleið 10 til 12 ár.

Stjørnuslatur

Sjeikurin hjá Karolinu er í ferð við at gerast størsta poppstjørnan í landinum, og hon roynir at fylgja við eftir besta førimuni. Men tað er ikki so lætt at vita, hvussu hon skal bera seg at við nýggja lívinum hjá Mattiasi.

Serliga tá slatur hoyrist um hann allastaðni, og bæði fjepparar og fyriskiparin hjá honum helst høvdu vilja, at hann var stakur. Ber framvegis til at hava álit á Mattiasi, ella hevur lívið sum superstjørna broytt hann?

Stjørnuslatur er triðja og síðsta bókin í stjørnusjeikarøðini.

Kirsti Kristoffersen hevur skrivað, og Vagnur Streymoy týddi úr norskum. Bókin er heft, 218 blaðsíður og til ung.

Greinin varð fyrstu ferð løgd út 05. september 2024

Stór heystkonsert í Hátúni

Leygarkvøldið 21. september klokkan 19 hava Tórshavnar Manskór og Den norske Studentersangforening stóra felags konsert í Hátúni í Musikkskúlanum við Landavegin í Havn

Tórshavnar Manskór

SkrivaÐ:

Tíðindaskriv

Á konsertini fara kórini hvørt í sínum lagi at syngja nakrar sangir, og eisini fara tey at syngja nakrar sangir saman.

Den norske Studentersangforening er eitt sera gott og viðurkent manskór. Kórið varð stovnað í 1845, og hevur tí 180 ár á baki næsta ár. Talan er samstundis um elsta kór í Noregi, sum eisini er almenna kórið hjá universitetinum í Oslo. Kórleiðari er Marit Tøndel Bodsberg Weyde, sum hevur stjórnað kórinum síðan 2016. Hon er ein av fremstu dirigentunum í Noregi, og hevur vunnið fleiri virðislønir sum kórleiðari, eisini altjóða virðislønir.

Den norske Studentersangforening

Seinastu árini hevur Tórshavnar Manskór havt vitjan av og vitjað fleiri stór manskór úr ymiskum londum. Millum annað hava Männerstimmen Basel úr Sveis, Karlakór Reykjavíkur, Studenter-Sangforeningen úr Keypmannahavn og Orphei Drängar úr Uppsala vitjað Manskórið. Hvør í sínum lagi teljast hesi kórini millum tey heilt stinnu kórini í sínum øki og onkur teirra eisini millum tey allarbestu manskórini í heiminum.

Manskórið hevur eisini verið á ferð fleiri ferðir, seinast í summar, tá kórið var á konsertferð í Keypmannahavn, Oslo, Stokkholmi og í Uppsala, ein konsertferð, sum eydnaðist framúr val.

Eitt av kórunum, sum manskórið vitjaði og hevði konsert saman við í summar, var Den norske Studentersangforening (DnS), sum nú kemur at vitja Tórshavnar Manskór.

Tórshavnar Manskór varð stovnað í 1986, og nærkast tí 40 árum, og kórið hevur tónleikaliga ongantíð verið betur fyri enn tað er nú. Nú heysthálvan byrjar hevur Tórshavnar Manskór fingið nýggjan leiðara eftir at Bjarni Restorff, sum var annar av stovnarunum av manskórinum, andaðist fyrr í summar. Nýggjur kórleiðari er Jón Festirstein, sum er útbúgvin violinleikari frá musikkkonservatoriinum í Keypmannahavn. Jón hevur sungið við í kórinum í fleiri ár, og hevur eisini stjórnað kórinum við jøvnum millumbilum.

Áhoyrararnir til konsertina við Den norske Studentersangforening kunnu gleða seg til eina breiða og spennandi sangskrá, har eisini nógv nýtt verður at hoyra.

Atgongumerki til konsertina kunnu keypast á atgongumerki.fo.

Greinin varð fyrstu ferð løgd út 01. september 2024

Træðrir: Nýggj serframsýning á Listasavninum

"Træðrir" er ein framsýning við fimm installatiónum hjá fimm føroyskum listafólkum - Randi Samsonsen, Jóhan Martin Christiansen, Maibritt Marjunardóttir, Ragnhild Hjalmarsdóttir Højgaard og Alda Mohr Eyðunardóttir

(Mynd: Listasavn Føroya)

SkrivaÐ:

Alda Nielsdóttir

Í gjár, fríggjadagin 6. september, llat nýggja serframsýningin "Træðrir" upp á Listasavni Føroya.

Talan er eum eina framsýning við fimm installatiónum, sum fimm føroysk samtíðarlistafólk hava gjørt, skrivar Listasavnið.

Listafólkini eru Randi Samsonsen, Jóhan Martin Christiansen, Maibritt Marjunardóttir, Ragnhild Hjalmarsdóttir Højgaard og Alda Mohr Eyðunardóttir.

Í hvør sínum rúmi og við hvør sínari tilgongd sýna tey fram listaverk, ið viðgera tráðin - evnisliga og tilfarsliga. Úrslitið er ein framsýning við fjølbroyttum úttrykki og við verkum, ið viðgera ymisk sosialpolitisk evni.

Hví er tað upplagt at tosa um samfelagsligevni ígjøgnum knútar, flættur og fjøkjur? Hví er eitt klæði serliga viðkomandi, tá ið tosað verður um persónligar søgur? Og hvussu kann ein tráður leggja upp til kjak, ið hjálpir okkum at skilja samtíðina? Hetta eru nakrir av spurningunum, ið hendan framsýninginin setir á breddan.

Greinin varð fyrstu ferð løgd út 31. august 2024

Bókmentaúrmælingur vitjar Bókadagar

Heimskendi rithøvundurin Jon Fosse, sum fekk Nobelvirðislønina í bómentum í fjør, verður við, tá Norðurlandahúsið bjóðar til Bókadagar 16. og 17. november

 

SkrivaÐ:

Tíðindaskriv

Bókadagar 2024 hava sum vant altíð nógv at bjóða øllum, ið elska bókmentir - tiltøk við bæði føroyskum og við norðurlendskum rithøvundum. Á skrá verður m.a. rithøvundasamrøður, verkstovur, kjak og nógv annað. Fyrsta navnið, sum Norðurlandahúsið kunnger, er norski rithøvundurin, dramatikarin og bókmentaligúrmælingurin, Jon Fosse.

Fosse er kendur fyri m.a. 'Morgen og aften' (sum er týdd til føroyskt í 2013), 'Hvidhed' og skaldsøgutríverkið 'Andvake'. Hann hevur skrivað bæði skaldsøgur, leikir og yrkingasøvn.

Sum rithøvundur er Jon Fosse heimskendur, og hevur vunnið fleiri heiðurslønir, t.d. Bókmentavirðisløn Norðurlandaráðsins í 2015 og ikki minst Nobelvirðislønina í bókmentum í 2023.

Skráin fyri Bókadagar verður kunngjørd fyrst í oktober. Sum vant eru Bókadagar eitt samstarv millum Norðurlandahúsið, rithøvundar, forløg, bókahandlar og onnur í bókmentaheiminum. Nógv verður á skrá til bæði vaksin og børn. Tiltøkini eru ókeypis við tilmelding til onkur tiltøk.

Fosse fyri tornom
Sum upphiting til Bókadagar og Jon Fosse, bjóðar Norðurlandahúsið til skemtisýningina 'Fosse for dumskallar' (Fosse fyri tornom) longu í oktober.

Í sýningini, sum norski NRK-journalisturin, Linda Eide, framførir, eru frásøgur, anekdotur og undirhaldandi greiningar av Jon Fosse. Við skemtiligum lýsingum gevur hon eina mynd av Jon Fosse, sum bæði fangar og undirheldur tey, ið vita, hvør Fosse er, og tey, ið eru áhugað at vita, hvør hann er.

Sýningin verður 21. oktober, kl. 18. Atgongumerkjasølan er byrjað á nlh.fo.

Greinin varð fyrstu ferð løgd út 02. september 2024

- Besta fongsul, eg havi verið í

Paul Watson hevur sitið í varðhaldi í Nuuk síðan 21. juli, og sum skilst er tað ikki tað ringasta

(Mynd: Sermitsiaq.ag)

SkrivaÐ:

Sverri Egholm

Paul Watson letur væl at fongsulsumstøðunum í Grønlandi.

- Tað kennist sum at vera á einum skipsdekki, sigur Paul Watson við AFP tíðindastovuna, sambært Ritzau.

Eisini kallar hann tað fyri besta fongsul hann hevur verið í, sigur Paul Watson.

Úr fongsulsklivanum sær hann út á sjógv, og har eru hvalar og ísfjøll at síggja.

Fongslið, har Paul Watson hevur sitið í varðhaldi síðani 21. juli, er Anstalten for Domsfældte í Nuuk. Nýggja fongslið hjá grønlendingum stóð liðugt í 2019 og kostaði danska statinum 400 milliónir krónur.

73 ára gamli hvalaaktivisturin hevur síðan 21. juli verið varðhaldsfongslaður í Grønlandi meðan danska løgmálaráðið kannar um grundarlag er fyri at útflýggja Paul Watson til Japan. Mikudagin verður aftur rættarfundur í málinum, og tá fyriliggur møguliga ein avgerð. Um ikki, kann varðhaldsfongslingin verða longd enn einaferð.

Mikudagin varð varðhaldsfongslingin longd til 2. oktober.

Greinin varð fyrstu ferð løgd út 02. september 2024

Tey høgravíðgongdu vunnu í Thüringen og Sachsen

Sosialdemokratarnir ivast nú í um Olaf Scholz er tann rætti at standa á odda fyri flokkinum til komandi ríkisdagsval

Björn Höcke, leiðari fyri AfD í Thüringen, vann valið, men sleppur væntandi ikki at skipa stjórn (Mynd: EPA)

SkrivaÐ:

Ingi Samuelsen

Víðgongdi høgraflokkurin, AfD, er nú størsti flokkurin í týska statinum Thüringen, og næststørsti flokkurin í Sachsen. Hetta er fyrstu ferð síðan annan heimsbardaga, at ein víðgongdur høgraflokkur vinnur eitt lokalval í Týsklandi.

AfD, Alternative für Deutschland, vann 32,8 prosent av atkvøðunum í Thüringen, sammett við 23,4 á valinum í 2019. CDU gjørdist næststørstur við 23,6 prosentum av atkvøðunum.

Tað var val til landspartatingini í statunum Thüringen og Sachsen í fyrrverandi Eysturtýsklandi sunnudagin. Hóast valsigurin, sær tað ikki út til, at AfD tó fær stjórnarvaldið í hesum landslutunum.

Í Sachsen fekk CDU 31,9 prosent av atkvøðunum, meðan AfD fekk 30,6 prosent.

Samgongan kring vinstrapolitikaran, Sahra Wagenknecht, BSW, sær út til at gerast triðstørst bæði í Thüringen og Sachsen.

Vinstrapopulistiski BSW krevur, eins og AfD, strangari eftirlit við tilflytingini til landið, og heldur, at Týskland skal gevast við at hjálpa Ukraina við vápnum.

Roknað verður nú við, at tað verða kristdemokratarnir, sum fáa til uppgávu at skipa landspartastjórnir í statunum, og at teir helst fara í samgongu við BSW

Allir flokkar, eisini BSW, hava sagt, at teir ikki eru sinnaðir í at fara í samgongu við AfD.

Fyri stjórnina í Berlin og fyri Olaf Scholz, samveldiskanslara, gjørdist úrslitið sunnudagin syndarligt. Sosialdemokratiski flokkur hansara megnaði júst at koma upp um tinggáttina á fimm prosent, men tað megnaði liberali FDP ikki.

Tey grønu fáa eftir øllum at døma umboðan í Sachsen, men ikki í Thüringen.

Sambært eini veljarakanning hjá útvarpsstøðini ARD, svaraðu yvir helmingurin av veljaranum, at tey ynsktu at revsa stjórnina í Berlin á valinum sunnudagin. Bert 17 prosent av veljarunum siga seg vera nøgd við Scholz sum samveldiskanslara.

Nú byrja sosialdemokratar at ivast í, um tað er ráðiligt at stilla upp við Scholz sum kanslaravalevni, tá veljast skal til samveldisdagin um eitt ár. Avgerandi fyri hetta verður landspartavalið í Brandenburg, sum verður hildið um nakrar vikur, skrivar finska kringvarpið Yle við Reuters sum keldu.

Greinin varð fyrstu ferð løgd út 03. september 2024

Gaza: Yvir 250.000 børn koppsett fyri polio

Málið er at koppseta 640.000 børn undir tíggju ár – higartil er smittan staðfest hjá trimum børnum, og myndugleikarnir stúra fyri, at smittan fer at breiða seg

Barn koppsett á sjúkrahúsi í Khan Yunis (Mynd: EPA)

SkrivaÐ:

Alda Nielsdóttir

Í løtuni eru hjálparfelagsskapir í ferð við at koppseta børn í Gaza fyri sjúkuna polio, eisini nevnd barnalamningur. Byrjað varð um vikuskiftið, og eftir tríggjar dagar eru umleið 255.000 børn koppsett, upplýsti ST-barnafelagsskapurin Unicef í gjárkvøldið sambært Ritzau.

Málið er at koppseta 90 prosent av øllum børnum undir tíggju ár í Gaza, tvs. 640.000 børn.

Í august varð polio staðfest í Gaza fyri fyrstu ferð í 25 ár, og myndugleikarnir stúra fyri, at smittan fer at breiða seg.

Smittan er higartil staðfest hjá trimum børnum, og eisini er hon funnin í spillvatni í økinum.

Sunnudagin varð byrjað at koppseta mitt í Gaza, og síðani verður koppsett í sunnara parti og norðara parti av Gazageiranum. Koppsettingarátakið varir í níggju dagar - tríggjar dagar í hvørjum øki.

Øll børn skulu koppsetast tvær ferðir, og har skulu ganga fýra vikur ímillum hvørja koppseting. Ísrael og Hamas hava avtalu um at leggja vápnini, so leingi átakið er í gongd.

Greinin varð fyrstu ferð løgd út 04. september 2024

Føroya vakrasta hálvmaraton í dag

– Veðrið sær út til at fara at vera við okkum aftur í ár, siga fyriskiparar – fyri trygdina hjá teimum, sum luttaka, verður Gásadalstunnilin stongdur frá kl. 9.45 til kl. 11.30 og Vatnavegurin frá kl. 11.30 til kl. 13

 

SkrivaÐ:

Alda Nielsdóttir

Í dag verður árliga tiltakið hjá Ítróttarfelagum Frælsi, Føroya vakrasta hálvmaraton.

Hetta er 11. ferðin, at skipað verður fyri Føroya vakrasta hálvmaraton, har runnið verður í Gásadali til Sandavágs, og í ár fara nærum 700 luttakarar at ganga ella renna teinin á 21,0975 km.

- FVHM er eitt heildagstiltak. Tað er veitsludámur her vesturi, rutan er einastandandi vøkur og á túrinum er livandi tónleikur við legendunum Sámal og Jóan Jakku uttan fyri Magn, og Betri hevur fingið DJ Antony Charles at diska uttan fyri bankan, umframt at tey bjóða kaffi og kaku. Tá komið verður á mál við kirkjuna í Sandavági, er tað DJ Haraldsen, sum fer at diska og seta dám á stemningin á málinum. Aðrastaðni seta ymiskir Frælsi vinir playlistar frá ymsastaðni á rutuni.

Fjølbroytt luttakarafjøld
Luttakarafjøldin er fjølbroytt, heilt frá ídnastu rennaranum, til tey, sum njóta ein gongutúr og allar variatiónir har ímillum.

Eitt ávíst luttakaratal eru útlendingar, og hetta setir sín dám, tá tú kemur móti málinum við flaggrøðini Vága kommuna setur upp á hvørjum ári. Higartil eru luttakarar frá 12 ymiskum londum sum koma at renna úr Gásadali til Sandavágs, skriva fyriskiparar í tíðindaskrivi.

Tú stuðlar, tá tú luttekur
Eins og undanfarin ár fara 100 krónur av luttøkugjaldinum hjá gangarum til Krabbameinsfelagið og rennarar kunnu velja at stuðla eisini, tá tey teir tekna luttøku. Fyriskiparar kunnu longu við vissu siga at 40.000 krónur verða lætnar til Krabbameinsfelagið fyri tiltakið í ár.

Ítróttarfelagið Frælsi letur eisini altíð stuðul til Beran í sambandi við #FVHM. Berin er sorgarbólkur fyri børn, ið hava mist ein av sínum nærmastu.

Gásadalstunnilin og Vatnavegurin stongdir
Fyri trygdina hjá teimum, sum luttaka, verður Gásadalstunnilin stongdur frá kl. 9.45 til kl. 11.30 og Vatnavegurin frá kl. 11.30 til kl. 13. Frá kl. 13 til 14 verður skipað fyri konvoykoyring frá rundkoyringini við FK í Miðvági til flogvøllin.

Øll, sum hava teknað seg til FVHM2024 møta í ítróttarhøllini á Giljanesi, har startnummar verður heintað, og síðan verða luttakararnir førdir við bussum frá Giljanesi til Gásadals. Tey, sum luttaka við at ganga túrin fara kl. 9, ímeðan tey, sum skulu renna, fara frá Giljanesi kl. 10. Skotið verður í gongd kl. 10 hjá gangarum og kl. 11 hjá rennarum í Gásadali.

Tá komið verður á mál við Sandavágs kirkju, fáa øll tey sum hava gjøgnumført teir 21.0975 kilometrarnar eitt heiðursmerki fyri luttøku skapað sum Vágar, har rutan runnið ella gingið hevur verið eisini er markerað.

Aftaná verður boðið til ein miðmála á Giljanesi, við laksi frá Hiddenfjord, og heimabakstur afturvið kaffi, sum ein hópur av sjálvbodnum hava staðið fyri.

Greinin varð fyrstu ferð løgd út 06. september 2024

Onki finalupláss á hesum sinni

Seyðahundakappingin í Eysturríki hevur sum heild eydnast væl, sigur Seyðahundasambandið. Føroyar gjørdust nummar 12 av 18 londum

Jónstein og Gripur (Mynd: Seyðahundasamband Føroya)

SkrivaÐ:

Sverri Egholm

Tað gekk illa hjá Tummasi Jacobsen og Linn leygardagin.

Linn fann ikki seyðin, og fór út av vøllinum. Og so vóru Føroyar úti av Continental Sheepdog Championship 2024 í Eysturríki. Enn eitt dømi um at seyðahundakappingar eru harðar og kontantar.

Taka vit saman um, hevur kappingin eydnast væl. Hóast hvørgin av okkara royndastu hundum fekk stig, so smæddust nýggju landsliðsluttakarar okkara als ikki burtur. Føroyar endaðu á 12. plássi av 18 londum.

Føroya luttóku við fýra hundum. 

Tummas Jacobsen við tíkini Linn og hundinum Moss. Jónstein Petersen við hundinum Gripur. Ketty A. H. Winther við tíkini Ragna.

Greinin varð fyrstu ferð løgd út 01. september 2024