Fríður Pállson Dalsgarð tekniskur stjóri í Tórshavnar kommunu

Fríður, sum er 50 ára gamal og útbúgvin sivilverkfrøðingur, hevur starvast sum býarverkfrøðingur í Tórshavnar kommunu síðan 2021

 

SkrivaÐ:

Tíðindaskriv

Tórshavnar býráð hevur sett Fríð Pállson Dalsgarð í starv sum tekniskan stjóra.

Fríður er 50 ára gamal og er útbúgvin sivilverkfrøðingur. Hann hevur starvast sum býarverkfrøðingur í Tórshavnar kommunu síðani 2021.

Fríður P. Dalsgarð tekur við starvinum beinavegin.

Tekniska fyrisiting er samansett av fimm fyrisitingarligum deildum, umframt sjey rakstrarstovnum. Samanlagt fevnir tekniska fyrisiting um áleið 265 ársverk, harav 46 starvast í fyrisitingini.

Í politiska bygnaðinum hevur tekniska fyrisiting tilvísing til teknisku nevnd, byggi- og býarskipanarnevndina og náttúru- og umhvørvisnevndina.

Átta umsóknir vóru til starvið.

Tórshavnar kommuna

Greinin varð fyrstu ferð løgd út 14. februar 2025

10 tons av frískari frukt og grønmeti við flogfari

Vindur spakuliga uppá seg at innflyta vørur við FarCargo

(Mynd: Rúni Højgaard)

SkrivaÐ:

Sverri Egholm

Í góðveðrinum mikudagin lendi farmaflogfarið Eysturoy hjá FarCargo í Vágum. Við í lastini vóru knapt 10 tons av frukt og grønmeti til føroyska marknaðin.

Síðan desember hava regluligir túrar verið, har frukt hevur verið við í lastini á heimferðini til Føroya, upplýsir Hanus Jacobsen, stjóri í FarCargo.

Hann sigur, at tey hava havt túrar við millum trimum til tíggju tonsum av frukt og grønmeti, og sum heild byrjar gongd at koma á.

- Tað kemur spakuliga. Vit hava sett tvey fólk at taka sær av flutningi og av tí sama klára vit betur at bjóða eina tænastu, um ger tað einfaldar at innflyta við okkum, sigur Hanus Jacobsen.

(Mynd: Rúni Højgaard)

Flogfarið hjá FarCargo flýgur millum seks og sjey ferðir um vikuna til Brússel við laksi, sum síðan fer har frá til aðrar marknaðir, serliga til kinesiska marknaðin.

Greinin varð fyrstu ferð løgd út 13. februar 2025

Poul Andrias Ziska letur egna matstovu upp

Í næstum letur stjørnukokkurin, sum seinastu árini hevur staðið á odda fyri Koks, upp egna matstovu í Havn

(Savnsmynd: Poul Andrias Ziska)

SkrivaÐ:

Sverri Egholm

Í næstum letur nýggj matstova upp í Havn. Stjørnukokkurin Poul Andrias Ziska, sum seinastu nógvu árini hevur verið høvuðskokkur hjá Koks, letur egna matstovu upp.

Hesum boðar hann frá á Instagram.

Heitið á nýggju matstovuni er Paz, og staðsetingin verður í Doktara Jakobsens gøtu, á niðastu hædd í 62n Hotel.

- Tíðin er komin til eitt nýtt kapittul - ein sum førir meg aftur til Havnar, har eg eri føddur og uppvaksin. Eg eri ovurfegin at kunngera, at Paz, mín egna matstova í høvuðsstaðnum, letur upp, skrivar Poul Andrias Ziska millum annað á Instagram.

Seinastu árini hevur Koks hildið til í Grønlandi og áðrenn tað frammi við Gjónna og í Kirkjubø.

Hesi støðini hava givið mær møguleika at kanna ráa vakurleikan í náttúruni og trýsta mørkini hjá kulinarisku siðvenjunum og rávørunum, sum eru serstakar fyri hvørt stað.

- At fara frá Koks og hesum serstøku upplivingunum, er ikki lætt, men tað følist sum tíðin er tann rætta. Eg eri sera takksamur fyri ferðina, fólkunum eg havi hitt, og royndunum eg havi lært av hesum fleiri enn tíggju árini sum høvuðskokkur á Koks, skrivar Poul Andrias Ziska.

Borðbílegging letur upp 1. mars.

Greinin varð fyrstu ferð løgd út 13. februar 2025

Edvard Remberg nú fastur stjóri í Posta

50-ára gamli fyrrverandi KT-leiðarin í fyritøkuni hevur verið fyribils stjóri seinastu mánaðirnar

- Hann hevur sera góðan kunnleika um felagið, flutningsvinnuna eins og um møguleikar og avbjóðingar fyri framman. Eisini hevur hann sum fyribils stjóri víst, at hann er rætta fólkið at mynda felagið og leggja framtíðarkósina til rættis saman við nevndini, sigur Árni Ellefsen um nýggja stjóran (Mynd: Posta)

SkrivaÐ:

Agnar Prestá

- Eg fegnist um, at vit hava sett Edvard sum stjóra. Hann hevur sera góðan kunnleika um felagið, flutningsvinnuna eins og um møguleikar og avbjóðingar fyri framman. Eisini hevur hann sum fyribils stjóri víst, at hann er rætta fólkið at mynda felagið og leggja framtíðarkósina til rættis saman við nevndini.

Soleiðis sigur nevndarformaðurin í Posta, Árni Ellefsen, eftir at nevndin endaliga hevur sett Edvard S. Remberg sum stjóra.

Hann gjørdist fyribils stjóri í oktober í fjør, eftir at Hans Jákup Langgaard segði seg úr starvi.

Edvard Remberg var ein av teimum tíggju, ið søktu starvið. Hann tekur við starvinum beinanvegin.

Nýggi fast setti stjórin hevur verið KT-leiðari í felagnum síðani 2014 og hevur verið ein týðandi partur av menningini í felagnum seinastu árini. Hann er 50 ár og búsitandi í Hoyvík.

- Uppgávan fyri framman er spennandi. Posta hevur ein týðandi leiklut í samfelagnum og okkara flutningstænastur eru framkomnar og viðkomandi fyri bæði vinnuna og privatkundar. Saman við starvsfólkunum fari eg miðvíst til verka fyri at tryggja, at vit byggja víðari á góða grundarlagið. Í høvuðsheitum snýr tað seg um at styrkja raksturin, menna post-, flutnings- og filateliøkið og framvegis tryggja góðan starvsfólkatrivnað, sigur Edvard Remberg.

Í síðstu viku kunngjørdi Posta, at man fer at gevast at bera lýsingabløð út. Hetta merkir millum annað, at 12 fólk verða søgd úr starvi.

Greinin varð fyrstu ferð løgd út 11. februar 2025

Stórt omanlop norðantil á Svínoynni

Seinnapartin mánadagin var omanlop á norðuri í skorunum

(Mynd: Tórik Ábraham Rouah)

SkrivaÐ:

Sverri Egholm

Einaferð aftaná middag mánadagin var eitt omanlop norðuri í skorunum við Selnes norðantil á Svínoynni.

At síggja til er talan um eitt stórt omanlop.

(Mynd: Tórik Ábraham Rouah)

- Tað hevur verið sera vátt síðstu tíðina, nógv avfall, og tað er einki at ivast í, at tað er vatn sum er komið niður í sprungur og hvørt av sínum, og hevur samlað seg so mikið nógv, at nú var eitt ordiligt omanlop, sigur Regin Meyer Olsen, ein av festarunum, við útvarpið.

(Kort: Føroya kort)

Øgiligt rok var frá omanlopinum, og millum annað Tórik Ábraham Rouah sá hetta úr báti sínum. Sí videobrot á Instagram-vanganum hjá Tórik.

Greinin varð fyrstu ferð løgd út 10. februar 2025

Eitt ár í fongsli fyri átta kilo av hassji

Tað gingu bert nakrir tímar frá handtøkuni við Eystaru Bryggju til útlendska kvinnan hevði fingið dóm í Føroya rætti

Stóra mongdin av hassji varð funnin, tá kvinnan kom til landið við Norrønu. Dómurin er treytaleystur og skal sitast í Danmark (Mynd: FØroya Rættur)

SkrivaÐ:

Agnar Prestá

Javnan gongur fitt av tíð ella heilt long tíð frá handtøku til ein dóm í Føroya Rætti, men týsdagin gekk skjótt.

Hetta hongur millum annað saman við, at handtikni persónurin játtaði seg sekan. 

Kringvarpið skrivar, at talan var um eina útlendska kvinnu í 50'árunum. Illgruni var um hana, tá kvinnan kom við Norrønu.

Viðføri varð kannað, og har funnu tollararnir hassj.

Mongdin var heili átta kilo. Fyri hetta varð tann handtikna dømd í Føroya Rætti seinnapartin týsdagin.

Revsingin var eitt ár - talan er um trytaleysan dóm, og sambært løgregluni skal hon sita dómin í Danmark.

Greinin varð fyrstu ferð løgd út 12. februar 2025

Bert ein persónur í fjórða hvørjum húski

Við ársbyrjan vóru 2.700 fleiri húski enn fyri tíggju árum síðani, og í teimum flestu búgva eingi børn

(Savnsmynd)

SkrivaÐ:

Alda Nielsdóttir

Við ársbyrjan vóru góð 19.600 húski í Føroyum. Tað er 321 fleiri enn fyri einum ári síðani, og umleið 2.700 fleiri enn fyri tíggju árum síðani, skrivar Hagstovan.

Seinastu tíggju árini er fólktalið eisini vaksið við yvir 6.000 fólkum, og av teimum 2.700 húskjunum, sum eru komin afturat í hesum tíðarskeiðnum, eru um 45 prosent støk húski. Við ársbyrjan var talið á støkum húskjum 5.300. Hetta merkir, at tað býr bert ein persónur í umleið fjórða hvørjum húski í Føroyum.

Næststørsti húskisbólkur, sum er nærum líka stórur sum tey støku, er húski við tveimum vaksnum og ongum børnum. Við ársbyrjan vóru tey góð 4.900 í tali.

Hagstovan skrivar, at í miðal eru beint undir trý fólk í hvørjum húski, men í umleið tveimum triðingum av teimum eru eingi børn.

Greinin varð fyrstu ferð løgd út 14. februar 2025

Heilsuhjálparafelag Føroya steðgar samráðingunum

- Uppskotið frá Kommunala Arbeiðsgevarafelagnum var ein long røð av krøvum, um at okkara limir skuldu geva frá sær vunnin rættindi uttan at fáa nakað afturfyri, sigur Mary Antonsdóttir

 

SkrivaÐ:

Agnar Prestá

Tað gjørdist sanniliga ikki drúgt hósdagin, tá Kommununala Arbeiðsgevarafelagið legði fram eitt uppskot um sáttmálasemju við Heilsuhjálparafelag Føroya.

Fundurin vardi bert tjúgu minuttir - og ikki tí semja beinanvegin kom uppá pláss.

Eftir at hava hugt eftir uppskotinum sleit Mary Antonsdóttir fundin. Forkvinnan í Heilsuhjálparafelag Føroya greiðir frá, at hon sá eina langa røð av krøvum, um at limir felgsins skuldi geva frá sær vunnin rættindi uttan at fáa nakað afturfyri.

Harvið slitin fundur - og fyribils slitnaðar samráðingar. Eingin nýggjur fundur er á skrá millum partarnar verður staðfest. Samráðingar hava annars verið í fýra mánaðir.

- Okkara limir røkja nakrar av mest viðbreknu uppgávunum í samfelagnum, tí gera vit einki í óðum verki. Men hetta uppskotið, ið kom á borðið í dag, ger seg somikið nógv inn á okkara rættindi, at har var einki grundarlag at samráðast víðari. Nú umhugsa vit næsta leik væl og virðiliga, sigur Mary Antonsdóttir.

Kommunala Arbeiðsgevarafelagið hevur enn ikki meldað nakað út. Sáttmálin millum partarnir eru gingin út.

Greinin varð fyrstu ferð løgd út 13. februar 2025

Huldulitt í Havn

Myndir úr plantasjuni og miðbýnum

(Mynd: Ólavur Frederiksen / Faroephoto)

SkrivaÐ:

Sverri Egholm

Tiltakið Huldulitt varð í Havn í síðstu viku. Partur av tiltakinum vóru ljósuppsetingar í eitt nú miðbýnum og í plantasjuni.

Ólavur Frederiksen, Faroephoto, var ein túr við myndatólinum. Fleiri myndir síggjast her.

Greinin varð fyrstu ferð løgd út 08. februar 2025

Maria Winther Olsen vann ársins Geyta fyri filmin “Halt um meg”

Vinnarin av gyltu standmyndini gjørdist stuttfilmurin “Halt um meg”, sum Maria Winther Olsen hevur leikstjórnað

(Mynd: Finnur Justinussen)

SkrivaÐ:

Sverri Egholm

Sjey stuttfilmar kappaðust um ársins Geyta, sum var í Norðurlandahúsinum leygarkvøldið.

Vinnarin av gyltu standmyndini gjørdist stuttfilmurin “Halt um meg”, sum Maria Winther Olsen hevur leikstjórnað. Maria fekk tíverri ikki verið við til handanina av Geytanum, so filmsliðið tók ímóti virðislønini.

Julia í Kálvalíð (Mynd: Finnur Justinussen)

Tey tilnevndu (Mynd: Finnur Justinussen)

Áskoðaravirðislønina vann stuttfilmurin “Faðir mín Faðir”, sum Julia í Kálvalíð hevur leikstjórnað.

Runavíkar kommuna er stuðul til Geytavirðislønina, ið er 40.000 kr., og Tórshavnar kommuna er stuðul til áskoðaravirðislønina, ið er 30.000 kr.

Stuttfilmskappingin Geytin er eitt samstarv millum Filmshúsið og Norðurlandahúsið.

Greinin varð fyrstu ferð løgd út 09. februar 2025

15.000 útlendingar vilja verða við í ársins Closed for Maintenance

80-100 sjálvboðin verða tilvildarliga vald til tiltakið, sum verður í ár fyri sjeyndu ferð. Tað er á skránni 1.-3. mai, og verður arbeiði gjørt í níggju ymiskum støðum

Teir 48 tímarnar tilmeldingin er opin, plaga um 5.000 fólk at tekna seg, men í ár komu meiri enn 15.000 tilmeldingar uppá tveir dagar, sum er nýtt met

SkrivaÐ:

Tíðindaskriv

Fyri sjeyndu ferð skipar Visit Faroe Islands aftur fyri árliga átakinum, Closed for Maintenance í tøttum samstarvi við kommunur, kunningarstovur og onnur.

Áhugin at taka lut í átakinum hevur altíð verið stórur og heimasíðan hjá VFI hevur hvørja ferð verið undir stórum trýsti, og onkuntíð “krasjað” tá vit hava latið upp fyri tilmeldingum.

Teir 48 tímarnar tilmeldingin er opin, plaga um 5.000 fólk at tekna seg, men í ár komu meiri enn 15.000 tilmeldingar uppá tveir dagar, sum er nýtt met. Burturúr rúgvuni verða  80-100 útlendsk sjálvboðin tilvildarliga vald at taka lut.

Closed For Maintenance verður brúkt sum fordømi innan ferðavinnuna kring allan heimin og hvørt ár eru fleiri miðlar sum vilja til Føroyar at fortelja søguna, hóast átakið hevur nógv ár á baki.

Orsøkirnar eru fleiri; hetta er eitt fordømi tá tað snýr seg um sonevnda “regenerativa” ferðavinnu, t.e. ferðavinna, sum ikki bara hevur burðardygd ella tað, at varðveita sum endamál, men sum miðar eftir at endurbøta ella menna vitjunarverd støð. Átakið kastar eisini ljós á eitt altjóða rák, sum prógvar, at fólk vilja hava meiningsfullar ferðir, koma í samband við onnur og leggja nakað gott eftir seg. Closed for Maintenance verður eisini javnan brúkt sum dømi, tá tosað verður um ferðavinnumenning sum heild. Tað er eitt ítøkiligt dømi um, hvussu marknaðarføring og menning kunnu ganga hond í hond og hvussu vit við ítøkiligum átøkum kunnu fáa tey “røttu” ferðafólkini á vitjan.

- Átakið er á ein hátt vorðið flaggskipið hjá Visit Faroe Islands í arbeiðinum at menna eina væl skipaða og burðardygga ferðavinnu í Føroyum. Hetta er eitt árligt høvi at tosa við fólk kring landið um ferðavinnuna og hvussu vit saman kunnu fyrireika náttúru og bygdir til vitjandi og hvussu vit taka hond um avbjóðingar, áðrenn tær vaksa seg ov stórar. Átakið hevur stóra savningarmegi og er ein effektivur miðil til at skapa samstørv um átøk, sum geva meining. Tí eru vit serliga fegin um hetta átakið og tí endurtaka vit tað ferð eftir ferð, sigur Guðrið Højgaard, stjóri á Visit Faroe Islands.

Closed for Maintenance verður 1.-3. mai, og verða 9 ymiskar verkætlanir við í ár: Koltur, Nólsoy, Bøur, Tvøroyri, Gøta, Við Gjógv, Leynar, Skopun og Tórshavn.

Tað er týdningarmikið at fáa so nógv føroysk sjálvboðin at taka lut sum gjørligt. Tað gevur átakinum eina nógv betri góðsku, tí føroyingarnir kenna lokalu umstøðurnar og gera arbeiði nógv lættari. Eisini eru føroyingarnir umboðsfólk, sum kunnu greiða frá og geva øllum eina munandi betri uppliving og fáa alt at ganga upp í eina hægri eind.

Tilmeldingin fyri føroyingar letur upp um mánaðarskiftið mars/apríl.

Visit Faroe Islands

Greinin varð fyrstu ferð løgd út 11. februar 2025

Nýggja stýrið fyri Fróðskaparsetur Føroya skipað seg

Ólavur Ellefsen varð afturvaldur sum formaður fyri stýrið, og Niels Winther varð valdur sum næstformaður

 

SkrivaÐ:

Tíðindaskriv

Djóni Nolsøe Joensen, landsstsýrismaður, hevur í vikuni havt sín fyrsta fund við nýggja stýrið fyri Fróðskaparsetur Føroya. Hesin fundur var samstundis fyrsti fundurin ímillum nývaldu limirnar í stýrinum.

Stýrið varð sett tann 1. januar í ár fyri eitt fýra ára skeið, sum er frá 1. januar 2025 til og við 31. desember 2028. Stýrislimirnir eru ein samanseting av nývaldum og endurvaldum limum, við breiðum og hollum fakligum royndum, leiðsluroyndum úr tí privata og almenna sektorinum, og við royndum innan gransking.

Í stýrinum eru:

Ólavur Ellefsen, stjóri í Flowcore (afturval)
Varalimur: Steinbjørn Hardlei, verkætlanarstjóri á Barnaverkætlanini
Niels Winther, stjóri í Vinnuhúsinum
Varalimur: Birita Wardum, býararkitektur í Tórshavnar Kommunu
Anders Bjarklev, rektari á Danmarks Tekniske Universitet (afturval)
Varalimur: Elena D’Amelio, professari í miðlafrøði á universitetinum í San Marino og serfrøðingur í European Higher Education Area
Elaine Munthe, dekanur á Kunnskabssenter for utdanning og professari í pedagogikki á universitetinum í Stavanger (afturval)
Varalimur: Ragnheiður H. Magnúsardóttir, stjóri í Maggar í Íslandi og serfrøðingur í tøkni og íverksetan

Limir og varalimir eftir tilmæli frá Fróðskaparsetri Føroya:

Annika Helgadóttir Davidsen, adjunktur í sálarfrøði, Deildin fyri Heilsu- og Sjúkrarøktarvísindi
Varalimur: Sigurd Christiansen, adjunktur í evnafrøði, Náttúruvísindadeildin
Sonja Olsen, ph.d.-vísindastarvsfólk í námsfrøði, Námsvísindadeildin
Varalimur: Regin Djurhuus Hammer, ph.d.-vísindastarvsfólk í búskaparfrøði, Søgu og samfelagsdeildin.
Harriet Felicia Reistad Dam, lesandi á Náttúruvísindadeildini
Varalimur: Sigmund Zachariassen, lesandi á Søgu- og samfelagsdeildini

Barna- og útbúgvingarmálaráðið

Greinin varð fyrstu ferð løgd út 14. februar 2025

Føroya Symfoniorkestur fer at hava fleiri konsertir í Løkshøll

Avtala er gjørd við Runavíkar kommunu um, at konsertir vera í ár, í 2026 og í 2027

Í vikuskiftinum skrivaðu Tórbjørn Jacobsen og Hans Petur í Brekkunum undir samstarvsavtalu millum Runavíkar kommunu og Føroya Symfoniorkestur

SkrivaÐ:

Agnar Prestá

Síðsta vikuskiftið skrivaðu Tórbjørn Jacobsen og Hans Petur í Brekkunum undir samstarvsavtalu millum Runavíkar kommunu og Føroya Symfoniorkestur.

Avtalan er galdandi fyri tey næstu trý árini og inniber, at orkestrið fer at hava konsert í Runavík í 2025, 2026 og í 2027. Avtalan er galdandi til 31. desember 2027.

Hetta skrivar Runavíkar kommuna á heimasíðu sínari.

Fyri Runavíkar kommunu er høvuðsendamálið við avtaluni, at man regluliga kann bjóða sínum borgarum klassiskan tónleik á hægsta stigi.

Við hesum fær FSO eisini møguleikan at spæla í Løkshøll, sum eisini er ein liður í ætlanini hjá orkestrinum at fara kring um landið at spæla.

Tá Løkshøll varð bygd, varð atlit tikið til, at hon skuldi kunna hýsa symfoniorkestrinum.

Greinin varð fyrstu ferð løgd út 11. februar 2025

Trentemøller kemur á G!

Í tvey áratíggju hevur danski ljómborðsgandakallurin ment seg til eina heimsstjørnu. Hann kemur við bólki til Føroya í summar at spæla á Gøtusandi

 

SkrivaÐ:

Tíðindaskriv

Heimsstjørnan Trentemøller breyt ígjøgnum við útgávuni “The Last Resort”, og serliga lagið “Moan” gjørdist sera kent. 

Ljóðborðsgandakallurin hevur latið úr hondum fleiri útgávur, og boð hava verið eftir honum at endurmiksa tónleik hjá Tricky, Depeche Mode og The Knife, fyri bert at nevna nøkur av teimum fleiri enn hundrað endurmiksunum, hann hevur gjørt.

Í tvey áratíggju hevur hann framhaldandi ment seg, og spælir í dag ótrúligar konsertir alla staðni. Á pallinum fara vit at uppliva Anders Trentemøller við bólki sínum, hvørs limir eita Dísa Jakobs, Silas Tinglef, Brian Batz og Jacob Haubjerg.

G! Festivalurin verður í Syðrugøtu 17. til 19. juli. 

Greinin varð fyrstu ferð løgd út 11. februar 2025

Eivør á Tórsfest

Hon er langtsíðani vorðin ímyndin av føroyskum tónleiki. Hon er helst okkara fremsti ambassadørur, og í ár sleppa vit at hoyra hana á Tórsfest í hjartanum í Havn

 

SkrivaÐ:

Ingi Samuelsen

Tað er nú eydnast fyriskiparunum av Tórsfest, at fáa Eivør at framføra á árligu summarveitsluni beint fyri ólavsøku.

Tórsfest skrivar í tíðindaskrivi í dag, at áhoyrarar í fleiri hava umbiðið hana, og nú bar til. Eivør er uttan iva millum føroya fremstu tónlistafólk. Longu sum blaðung varð tað greitt, at her var ein songkvinna, sum ikki var sum hinar. Hon er so gávað, at hon telist millum tær bestu í heiminum. Rødd hennara er so ófatiliga rein og klár, og hon kann fúka upp í hæddirnar, umframt at dykka niður í ein myrkan klang. Og so er Eivør eisini óvanliga dugnalig at smíða løg. Tónleikur hennara er sera væl dámdur, og risahittið “Trøllabundin” hevur heilar 31 milliónir spælingar á Spotify. 

Í fjør lat Eivør úr hondum útgávuna “Enn”. Útgávan spennur tónleikaliga víða, men í miðdeplinum er sveimandi røddin hjá Eivør. Danski tónleikamiðilin Gaffa skýrdi útgávuna at vera eitt meistaraverk, og Distorted Sound Magazine gav útgávuni 9 av 10 møguligum. Umframt at geva út tónleik í egnum navnið, er Eivør eisini virkin innan filmstónleik og at leggja songrødd til telduspøl.

Har Eivør framførir, har hugtekur hon. Í fjør leiddi tónleikur hennara hana allan vegin til Avstralia, og í skrivandi løtu er hon á turné í Amerika og Kanada. 

Tórsfest verður risastórt í ár. Frammanundan er longu greitt, at Gavin DeGraw eisini fer at framføra á Tórsfest, og fleiri stór nøvn verða kunngjørd í næstum.

Greinin varð fyrstu ferð løgd út 10. februar 2025

Føroyar ikki í sama vanda fyri russisku krígshóttanum

Russland fer at halda Føroyar og Grønland uttan fyri fyri ikki at øsa amerikanarar, metir FET

(Savnsmynd: jn.fo)

SkrivaÐ:

Ingi Samuelsen

Føroyar og Grønland eru ikki í eins stórum vanda at enda í kríggi móti Russlandi, sum Danmark og onnur lond á evropeiska meginlandinum eru.

Hetta er ein av niðurstøðuni hjá Forsvarets Efterretningstjeneste, FE, sum týsdagin kunngjørdi eina hóttanarmeting, sum sigur at vandi er fyri at Russland fer at gera seg hernaðarliga inn á onnur lond í Evropa.

FE tekur útgangsstøði í einum scenario, har kríggið í Ukraina støðgar, ella at núverandi støða í Ukraina verður fastfryst.

So fær Russland møguleika til at leysgeva hernaðarmegi til at fara undir hernaðarligar atgerðir í øðrum grannalondum. Innan fyri eitt styttri áramál verður mett, at vandi er fyri, at okkurt grannaland hjá Russlandi, sum er limur í Nato, kann verða útsett fyri einum russiskum álopi, og seinni eisini onnur lond í Vesturevropa.

Fortreytirnar fyri hesi metingini hjá Forsvarets Efterretningstjeneste er, at Nato-londini ikki dubba seg hernaðarliga á sama støði, sum Russland ger, og at USA í komandi árum ikki fer at blanda seg upp í krígshóttanir í Evropa.

Men váðametingin fyri Grønland og Føroyar eru øðrvísi.

Vandin fyri hernaðarligum russiskum atgerðum her er nógv minni, tí Russland er ikki sinnað at øsa USA, skrivar dr.dk.

Metingin viðvíkjandi Grønlandi og Føroyum ljóðar orðarætt soleiðis á upprunamálinum:

“Truslen om et regulært militært angreb mod Grønland og Færøerne adskiller sig fra truslen mod Danmark, da Rusland med stor sandsynlighed ser Grønland og Færøerne i en nordamerikansk kontekst. Det betyder, at Rusland ikke nødvendigvis vil inddrage Grønland og Færøerne i en europæisk konflikt, og at landets strategiske interesse i området er mere knyttet til dets forhold til USA end til Europa. Rusland vil sandsynligvis være opmærksom på, at en konflikt med USA ville have langt større konsekvenser end en konflikt med et enkelt eller flere europæiske lande.”

Greinin varð fyrstu ferð løgd út 11. februar 2025

Rannvá og Vár fingið gávugóðs

Ungu samtíðardansararnir fingu gávugóðs úr Grunni Thorvalds Poulsen av Steinum

Rannvá Guðrunardóttir Niclasen og Vár Bech Árting, samtíðardansarar, framman fyri mynd av Thorvaldi Poulsen av Steinum, sum testamenteraði sínar ognir til at stuðla ungum listafólki til at mennast og útbúgvast (Mynd: Brynhild Thomsen)

SkrivaÐ:

Sverri Egholm

Seinnapartin leygardagin var hátíðarhald á Fróðskaparsetri Føroya, tá ungu samtíðardansararnir, Rannvá Guðrunardóttir Niclasen og Vár Bech Árting, fingu gávugóðs úr Grunni Thorvalds Poulsen av Steinum.

Tær fingu 30.000 krónur í part.

8. februar er føðingardagur Thorvald Poulsens av Steinum, og á hesum degi á hvørjum ári verður peningagáva úr grunni hansara latin ungum listafólki fyri stuðla teirra listaligu menning og útbúgving.

Í ár varð gávugóðsið latið samtíðardansarunum, Vár Bech Árting og Rannvá Guðrunardóttir Niclasen, sum longu hava víst framúrskarandi listalig evni og framtakshug.

Blaðungar fóru tær at dansa og vísa áhuga fyri samtíðardansi sum listagrein. Síðani 2021 hevur RIVA, dansibólkurin við teimum báðum á odda, staðið fyri seks verkætlanum.

Í 2024 tóku tær tikið stig til “bydans”, ið er fyrsti føroyski samtíðardansifestivalurin, við verkum úr fleiri Norðurlondum.

Vár og Rannvá hava víst áhuga fyri útbúgving í dansi og tikið útbúgving á BA-stigi og diplomstigi, ávikavist í 2019 og 2021.

Við gávugóðsinum vil Grunnur Thorvalds Poulsen av Steinum eggja teimum til at halda fram við at útbúgva seg og menna samtíðardans sum listagrein í Føroyum.

Greinin varð fyrstu ferð løgd út 08. februar 2025

- Ekstremt skuffaður

Tað eydnaðist ikki Karli at vinna heiðurin sum Mr. Paradise

(Mynd: Viaplay)

SkrivaÐ:

Sverri Egholm

- Eg eri ekstremt skuffaður. Eg standi og smíli og haldi maskuni, og man kann jú ikki reagera, sum eg havi hug til at reagera, men eg eri súrur.

Tað segði Karl Weihe tá tað varð greitt, at Theis Horndrup vann heiðurin sum Mr. Paradise frammanfyri nøsini á sandavágsmanninum.

Myndin av Karli Weihe, sum er tikin í sambandi við kappingina um Mr. Paradise (Mynd: Viaplay)

Avgerðin fall í partinum, sum varð vístur hósdagin, sum innihelt eitt sonevnt catwalk og eina framførslu.

Fyrrverandi unnustan hjá Karli, Christel Trubka, fekk heiðurin sum Miss Paradise.

Tær tríggjar sum luttóku í kappingini um Miss Paradise. Christel Trubka til høgru vann (Mynd: Viaplay)

At vera við í kappingini um hendan heiðurin er nakað, sum 25 ára gamli Karl Weihe hevur droymt um.

- Eg kenni meg so hepnan at eg sleppi at vera við í Mr. Paradise. Hetta er sum ein dreymur fyri meg, so eg skuldi vera við, sigur Karl Weihe, sum var ein av teimum trimum dreingjunum á hotellinum, sum slapp at luttaka hesaferð.

Karl Weihe fekk harða mótstøðu frá Theis Horndrup til vinstru og Lucas Bucardi í miðjuni (Mynd: Viaplay)

Spælið og dramartikkurin heldur fram, og við sigrinum hjá teimum báðum Theis og Christel, fylgir ein fyrimunur av onkrum slag.

Paradise Hotel sæst á Viaplay. Nýggir partar koma út týsdag, mikudag og hósdag.

Greinin varð fyrstu ferð løgd út 14. februar 2025

Drykkur til børn afturkallaður

Vandi er fyri, at hýggj kemur í vøruna orsakað av einum feili í pakninginum, sigur Heilsufrøðiliga Starvsstovan

 

SkrivaÐ:

Alda Nielsdóttir

Eitt slag av vistfrøðiligum fruktsopa - ella smoothie - til børn, sum er selt í føroyskum handlum, verður nú afturkallað.

Orsøki til afturkallingina er vandin fyri, at hýggj kemur í vøruna orsakað av einum feili í pakninginum, skrivar Heilsufrøðiliga Starvsstovan.

– Tað er ein feilur við munnstykkinum á vøruni, sum ger at luft kann koma inn í vørupakningin. Hetta viðførir at drykkurin yvir tíð kann modna. Vøra sum ótilætlað er moðin er ikki egna sum matvøra.

Tað er fyritøkan Gaia Food A/S, sum afturkallar vøruna:

Rema1000 økologisk banan, hindbær & æble smoothie med havre
Nettovekt: 90 g
Framleitt: 24.01.2025
Best fyri: 24.01.2026
Lot nr.: M025
EAN-strikukota 5 705 830 011404

Greinin varð fyrstu ferð løgd út 08. februar 2025

Kristersson: Alt Svøríki syrgir saman við tykkum

Svenski forsætisráðharrin helt sunnukvøldið røðu fyri tjóðini, har hann umrøddi skottilburðin týsdagin

Svenski forsætisrisráðharrin helt sunnukvøldið røðu fyri svensku tjóðini (Mynd: EPA)

SkrivaÐ:

Alda Nielsdóttir

Sviar hava eina felags ábyrgd av at ansa eftir Svøríki.

Tað segði svenski forsætisráðharrin, Ulf Kristersson, tá hann sunnukvøldið helt røðu fyri tjóðini í kjalarvørrinum á skottilburðinum á einum skúla í Örebro týsdagin, har 11 fólk vórðu dripin

– Vit kunnu vera ymisk og hava ymiskar áskoðanir, men tað er okkara felags ábyrgd at byggja hetta landið og ansa eftir tí. Serliga tá alt tykist dapurt, segði Kristersson.

– Har er bara eitt Svøríki. Ikki eitt vit og tey. Ikki ung ella gomul. Ikki fødd her ella fødd uttanalnds. Ikki frá bygd ella býi. Ikki høgra ella vinstra.

Svenski forsætisráðharrin umrøddi skottilburðin sum tann ringasta í svensku søguni.

– Alt Svøriki syrgir saman við tykkum, segði hann, tá hann vendi sær beinleiðis til avvarðandi hjá teimum, sum lótu lív týsdagin.

Hildið verður, at drápsmaðurin var ein 35 ára gamal maður, sum var fyrrverandi næmingur á Rigsbergska-skúlanum. Hann varð funnin deyður av løgregluni á skúlanum. Frammanundan vórðu 10 onnur fólk dripin, skrivar Ritzau.

Greinin varð fyrstu ferð løgd út 10. februar 2025

Trump loyvir plast súgvirørum aftur

Bannið móti at brúka plastsúgvirør er láturligt heldur amerikanski forsetin

(Mynd: EPA)

SkrivaÐ:

Ingi Samuelsen

Nýggi amerikanski forsetin, Donald Trump, hevur sett sína undirskrift undir enn eina løgskipan.

Hann ynskir nevniliga at fáa súgvirørini úr plastikki aftur.

- Vit fara aftur til plastsúgvirør. Papprørini rigga ikki. Um okkurt er heitt, halda tey ikki. Bert minuttir. Viðhvørt í sekund. Tað er láturligt, segði hann, tá hann setti undirskrift sína undir løgskipanina, sum avlýsir boðini frá Joe Biden um at banna súgvirør úr plasti á almennum skrivstovum.

Samstundis ivast Trump í, um nýtslan av plastsúgvirørum hevur nakra ávirkan á havumhvørvið.

Í 2018 vísti ein kanning, at helmingurin av øllum skjaldbøkum í Miðjarðarhavinum høvdu plast í kroppinum. ES metir, at tað er meira enn 150 milliónir tons av plasti í heimsins høvum, og at hetta er til stóran ampa fyri djóralívið, skrivar dr.dk.

Greinin varð fyrstu ferð løgd út 11. februar 2025

Danmark framvegis heimsins minst korrupta land

Tað gekk afturá í 47 londum í mun til árið fyri

(Savnsmynd: EPA)

SkrivaÐ:

Ingi Samuelsen

Danmark er framvegis heimsins minst korrupta samfelag. Nýggjasta uppgerðin hjá Transparency International gevur aftur í ár Danmark 90 av 100 møguligum stigum, og tað er tað besta sum nakað land fær í uppgerðini fyri 2024, og Danmark kann sostatt breggja sær av at vera heimsins minst mutraða, siðspilta ella korrupta land. Danmark hevur nú liggið ovast á hesum listanum í sjey ár á rað.

Finnland liggur aftur í ár á øðrum plássi við 88 stigum, sum er eitt stig betri enn árið frammanundan.

Síðan kemur Singapore við 84 stigum, Ný Sæland við 83 stigum, Luksemburg, Noreg og Sveis við 81 stigum, Svøríki við 80 stigum, Niðurlond við 78 stigum og Avstralia, Ísland og Írland við 77 stigum.

Finnland, Singapore, Luksemburg og Ísland eru farin fram í Stigum, meðan Ný Sæland, Sveis, Svøríki, Niðurlond og Avstralia eru farin nakað aftur.

Ikki færri enn 47 lond hava verri meting í 2024 í mun til árið fyri. Teirra millum eru Týskland (75), Frakland (67), USA (65), Ungarn (41) og Russland (22).

Miðal stigatalið fyri øll 180 londini, sum eru við í kanningini, liggur um 43 stig.

Niðjast á listanum liggur Suðursudan, sum sambært Transparency International er heimsins mest korrupta land við 8 stigum. 

Greinin varð fyrstu ferð løgd út 11. februar 2025

12-ára gamal fekk tjóv at flýggja

Drongurin sló óbodna gestin tvær ferðir við einum hamara. Løgreglan í danska býnum Herning sigur, at talan var um neyðverju í "Home Alone líknandi málinum"

 

SkrivaÐ:

Agnar Prestá

Ein heldur margháttiligt hending fór fram í Midtjyllandi mánadagin seinnapartin. Ein sum minnir nakað um Home Alone.

Ein innbrotstjóvur breyt inn í eini sethús í Hammerum, sum er í eystara parti av Herning. 

Tey vaksnu vóru til arbeiðis, men tað sum tjóvurin helst ikki hevði hugsað um er, at tað er vetrarfrí hesa vikuna í Danmark.

Ein 12-ára gamal drongur var inni. Hann sá, tá tann óbodni slapp inn gjøgnum terassuhurðina. Tann vaksni sá tó ikki tann unga, sum so gjørdi bart.

Hann hevði fingið fatur á einum hamara, og við fyribils vápninum smekkaði hann 12-ára gamli til.

Hamarin rakti, har sum mannfólk sum heild fyri alt ikki vilja verða raktir: Millum beinini. Tjóvurin eymkaði seg nógv, og varð síðani sligin aftur - hesaferð á økilin.

Umboð fyri løgregluna í Herning sigur, at tann vaksni síðan nýtti ein eið og slapp sær til rýmingar.

Harvið megnaði drongurin at standa væl ímóti í einari støðu, ið var ógvuliga trupul, og sum merkti hann nakað aftaná. At sláa onnur við hamar er sjálvandi ikki vanliga í lagi, men her var talan um neyðverju, staðfestir Erik Kristensen fyri TV MIDTVEST.

Greinin varð fyrstu ferð løgd út 11. februar 2025