Tunnilin verður latin upp hóast onki telefonsamband er

- Vit hava fingið váttan fyri, at fartelefonsambandið verður klárt skjótast gjørligt, sigur fútin

(Savnsmynd: Sverri Egholm)

SkrivaÐ:

Ingi Samuelsen

Stórt hátíðarhald verður í Havn í morgin í sambandi við at tunnilin undir Húsareyni og innkomuvegurin Havnarvegur verður latin upp fyri almennari ferðslu.

Men tað verður ikki møguligt at tosa í fartelefon í tunnlinum at byrja við.

Tað váttar Michael Boolsen, fúti, fyri Portalinum.

Fútin var sjálvur við til st skriva undir góðkenningina hósdagin saman við umboði fyri Arbeiðs- og brunaeftirlitið.

- Tað eru neyðtelefonir í tunnlinum, og vit hava fingið váttan frá kommununi fyri, at fartelefonsambandið í tunnlinum fer at virka “skjótast gjørligt”, sigur Michael Boolsen.

Undirskriftirnar vórðu settar á góðkenningina á ráðhúsinum hósdagin (Mynd: Ólavur Frederiksen / Faroephoto)

Fútin sigur, hevur fingið játtan fyri, at útgerðin til at kunna samskifta í fartelefon gjøgnum tunnilin er løgd inn, men at tað enn manglar nakað í áðrenn tað kann setast til og brúkast av brúkarunum.

- Tað er við hesum lyfti, at eg havi skrivað undir góðkenningina, sigur hann.

Fyri at ein tunnil kann góðkennast skal ein venjing haldast, har øll trygdarútgerðin í tunnlinum verður roynd. Hendan venjingin var týsdagin 1. juli, tá umleið 20 fólk frá politinum, Tórshavnar Sløkkiliði, Heilsuverki Føroya, Ambulansatænastuni og Tórshavnar kommunu royndu tilbúgvingarætlanina, tøknina, mannagongdir og eftirkannaði samskiftisútgerðina í tunlinum, skrivar heimasíðan hjá Tórshavnar kommunu í dag, og leggur afturat: Politiið, sum er leiðandi samskipari í tilbúgvingini, hevur góðkent tilbúgvingina í Húsareynstunlinum.

Tórshavnar kommuna hevur gjøgnumgingið niðurstøðurnar frá venjingini, og hevur í dag staðfest, at Húsareynstunnilin uppfyllir øll myndugleikakrøv og tískil kann lata upp fyri almennari ferðslu.

Og Arbeiðs- og brunaeftirlitið hevur somuleiðis brunagóðkent Húsareynstunnilin til almenna ferðslu.

Skrivar Tórshavnar kommuna uttan tó at nevna, at onki fartelefonsamband er.

Sum Portalurin hevur skilt, hoyrist útvarp heldur ikki í nýggja 1.700 metra langa Húsareynstunnlinum.

(Mynd: Ólavur Frederiksen / Faroephoto)

Greinin varð fyrstu ferð løgd út 03. juli 2025

Húsareynstunnilin og Havnarvegurin lata upp í morgin

Hátíðarhald verður við tunnilsmunnan við Marknagilsvegin sunnudagin kl. 13.30. Klokkan 15.30 letur tunnilin upp fyri almennari bilaferðslu

 

SkrivaÐ:

Sverri Egholm

Sunnudagin 6. juli klokkan 13.30 verða Havnarvegurin og Húsareynstunnilin alment tikin í nýtslu.

Hátíðarhald verður við tunnilsmunnan við Marknagilsvegin, har Elsa Berg, borgarstjóri í Tórshavnar kommunu, og Jón Sigurðsson, stjóri í Articon, halda røður, og síðani fer Bergur Robert Dam Jensen, formaður í teknisku nevnd í Tórshavnar býráð, at klippa snórin.

Eftir tað verður opið hjá fólki at ganga, renna, trilla ella súkkla gjøgnum Húsareynstunnilin og eftir nýggja Havnarvegnum. Inni í tunlinum verður tónleikur við Jóhan Hentze.

Túrurin, sum er góðar 4 kilometrar, endar í stórhøllini við Tjarnir, har ein drekkamunnur verður at fáa.

Klokkan 15.30 lata Havnarvegurin og Húsareynstunnilin upp fyri almennari bilaferðslu.

Greinin varð fyrstu ferð løgd út 01. juli 2025

Sissal í Vild med Dans

Tá TV2 í heyst sendir Vild Med Dans fyri seinastu ferð, verður tað við havnarkvinnuni á dansigólvinum

Sissal Jóhanna Norðberg Niclasen her á Eurovision-pallinum í Sveis (Mynd: EPA)

SkrivaÐ:

Sverri Egholm

Sissal Norðberg Niclasen verður ein av teimum tíggju dansarunum tá TV2 á seinasta sinni sendir Vild med Dans í heyst.

Tað skilir danski miðilin Se og Hør.

Hon tók danskarar á bóli við lagnum Hallucination í Danska Melodi Grand Prixnum og vann kappingina. Í mai umboðaði hon Danmark í stóra Eurovision, sum var í Sveis, og megnaði at syngja seg víðari til finaluumfarið.

Nú verður tað so eftir øllum at døma á dansigólvinum, at 30 ára gamla havnarkvinnan skal gera um seg.

Greinin varð fyrstu ferð løgd út 01. juli 2025

Løgreglan: Eingin sá hvat hendi

Løgreglan hevur avhoyrt fólk umborð á Norrøna í sambandi við, at ein maður fór fyri borð leygarkvøldið

(Savnsmynd: Kiran Jóanesarson)

SkrivaÐ:

Alda Nielsdóttir

Leygarkvøldið fór ein føroyskur maður fyri borð á Norrønu, og tá Norrøna kom á Havnina sunnukvøldið fór løgreglan umborð at avhoyra møgulig vitni í sambandi við hendingina, men tað ber ikki til at staðfesta, júst hvat er, sum er hent, sigur løgreglan.

Fólk sóu hann fara niður við síðuni, men eingin sá tað, tá hann fara fyri borð, sigur vaktleiðarin á løgreglustøðini í Havn, sum leggur afturat, at málið er skrásett sum ein vanlukka.

Maðurin fór fyri borð á dekki sjey, har hitapottarnir eru. Hetta hendi umleið klokkan 19 leygarkvøldið, tá Norrøna varð stødd 12 fjórðingar suður úr norska býnum Mandal.

Norrøna saman við fleiri skipum, eitt nú frá norsku bjargingartænastuni fóru at leita, men sóðu ongantíð nakað aftur til mannin. Eftir at hava leitað í tríggjar tímar, setti Norrøna kósina víðari móti Føroyum.

Greinin varð fyrstu ferð løgd út 30. juni 2025

7.000 kr. í bót fyri hassjsmugling

Hevði svølgt millum 40 og 50 gramm av hassi, helst ætlað til egna nýtslu

 

SkrivaÐ:

Ingi Samuelsen

Ein maður sum sunnudagin varð afturhildin av tollarunum á flogvøllinum í Vágum undir illgruna fyri at smugla hassj innvortis, hevur fingið eina bót á 7.000 krónur.

Eins og røntenmyndirnar vístu, so var talan um millum 40 og 50 gramm av hassji, vísti tað seg, tá maðurin hevði greitt sínar skyldur, sum vaktleiðarin á løgreglustøðini málber seg.

Løgreglan hevði ongan illgruna um, at endamálið við smuglingini var at selja rúsevnið víðari, og maðurin varð tí skuldsettur sambært veikaru greinini í lógini um euforiserandi evni, og hann fekk sostatt eina bót uttan rættargang. Bótin var áljóðandi 7.000 krónur.

Greinin varð fyrstu ferð løgd út 01. juli 2025

Sea Shepherd við dokumentari frá grind í Leynum

Á sín hátt og við sínum fordómum fylgdi umhvørvisfelagsskapurin drápinum í Leynum herfyri frá byrjan til enda

 

SkrivaÐ:

Sverri Egholm

Tað hoyrist ikki nógv til tey, men tey eru her, umboð fyri umhvørvisfelagsskapir sum Sea Shepherd.

Tey vóru við tá ein stór grind legði beinini í Leynum 12. juni. Talan var um 247 hvalir og grindin varð býtt í drápspartar og heimapartar í Norðstreymoy, Vágum, Kaldbak og Sundi.

Grindadráp kann tykjast ógvusligt fyri fólk, sum ikki eru vaksin upp við tí, og tað er sjón fyri søgn í dokumentarfilmi, sum Sea Shepherd hevur framleitt.

Her fylgja tey grindadrápinum frá byrjan til enda. Enntá tá rovini verða burturbeind í einari gjógv norðan fyri Skæling.

Síggj dokumentarin her

Greinin varð fyrstu ferð løgd út 03. juli 2025

Magn og Effo aftur góð úrslit í 2024

Sambært ársfrágreiðingini rinda Magn og Effo sínum partaeigarum ávikavist 50 og 35 milliónir krónur

(Mynd: Sverri Egholm)

SkrivaÐ:

Birgir Nielsen, Nira

Orkufeløgini Pf. Magn og Pf. Effo kunngjørdu herfyri teirra ársroknskapir.

Effo hevði í 2024 eitt ársúrslit upp á 48,9 milliónir krónur, góðar 600.000 krónur lakari enn í 2023.

Magn hinvegin hevði 5,2 milliónir krónur í framgongd í ársúrslitinum í 2024, sum gjørdist 37,2 milliónir krónur.

Stóri munurin á ársúrslitinum hjá Magn og Effo er annars, at Magn hevur tríggjar ferðir so stóra langfreistaða skuld sum Effo. Tískil ávirkar fíggjarkostnaðurin munandi meira raksturin hjá Magn enn hjá Effo. 

Sambært ársfrágreiðingini rinda Magn og Effo sínum partaeigarum ávikavist 50 og 35 milliónir krónur.

Í Føroyum hava vit haft tvey feløg, Magn og Effo, sum selja og veita tænastur innan oljusølu og eisini innan grønu orku. Men frá í ár kemur nýggja orkufelagið Spf. Krafta, sum annars var stovnað i 2023 eisini at selja beinleiðis til serliga skip. 2024 roknskapurin hja Krafta er ikki almannakunngjørdur enn. Men av tí at felagið í størsta mun higartil hevur virka sum oljumeklari, verður ikki mett at hetta í 2024 hevur ávirkað stórvegis marknaðarpartarnar hjá Magn og Effo.

Nettosølan hjá bæði Magn og Effo er minkandi eftir tvey ár við metsølu:

Sølan síðstu mongu árini hevur verið býtt áleið javn millum føroysku oljufeløgini. Síðstu fimm árini hevur Effo tó haft eitt vet hægri marknaðarpart, hóast munurin aftur er minkaður í 2024.

Í ársfrágreiðingini hjá Magn stendur, at sølan í 2024 serliga er merkt av øktari sølu til útlendsk skip og øktum vinningi á Magn støðunum. Nevnt verður eisini at marknaðarparturin i 2024 er umleið tann sami sum undanfarna árið.

Í ársfrágreiðigini hjá Effo, sum greiðir frá gongdini, t.d. at sølan til føroysk skip og útlendsk skip er lækkandi umframt at oljusølan til føroysk sethús eisini er minkandi. Marknaðarstøðan verður tó mett at verða tann sama sum í 2023.

Munurin millum oljufeløgini er sambært leiðslufrágreiðingini, at Magn serliga hevur økt sína sølu til útlendsk skip, sum helst eisini ger, at marknaðarparturin hjá Magn økist frá 42,8 prosent í 2023 til 45,9 prosent í 2024.

Marknaðarpartarnir hjá Magn og Effo út frá nettosøluni eru annars vístir niðanfyri.

Rakstartølini hjá Magn og Effo
Tá hugt verður nærri eftir rakstrarroknskapinum hjá báðum feløgunum, Magn og Effo, kann í fyrstu atløgu tykjast, at feløgini hava haft sera góð ársúrslit síðstu árini.

Ársúrslitini hava í stóran mun verið javnt góð øll árini, sum onki óvanligt er í, tá ið tvey feløg á hendan hátt hava deilt oljumarknaðin í Føroyum. Men í mun til stóru nettosøluna, kann ikki sigast, at ársúrslitið í prosentum hevur verið óvanliga stórt í mun til aðrar vinnur.

Tá hugt verður eftir rakstrarlønseminum, sum er ársúrslit áðrenn avskrivingar og rentur (ebitda) hjá báðum feløgum sæst, at ebitda hjá Magn í 2024 var 83,9 milliónir krónur, sum var 9 prosent av nettoumsetninginum.

Sama talið hjá Effo var 82,1 milliónir krónur, og ebitda marginan var 7,5 prosent. Tískil hevði Magn munin í rakstarlønseminum í 2024 áðrenn fíggjarkostnað.

Orsakað av, at Magn í 2024 hevði fíggjarligar útreiðslur á 17,2 milliónir krónur meðan Effo ”bert” hevði 7,5 milliónir krónur í fíggjarútreiðslum, so ávirkaði hetta ársúrslitið meira neiligt hjá Magn enn hjá Effo í 2024.

Ársúrslitið eftir skatt hjá Effo gjørdist 48,9 milliónir krónur, sum var 4,5 prosent av nettosøluni. Tilsvarandi var ársúrslitið hjá Magn 37,2 milliónir krónur, sum var 4,0 prosent av nettosøluni.

Viðmerkjast skal at Magn hevði størstu framgongdina í ársúrslitinum í 2024, sum var 5,2 milliónir krónur í mun til Effo sum, hevði smáar 600.000 krónur í minni ársúrsliti í 2024.

Fíggjarstøðan hjá Magn og Effo
Munurin á feløgunum Magn og Effo tá talan er um fíggjarstøðuna er stórur.

Samlaðu ognirnar hjá Magn og Effo vóru við árslok 2024 ávikavist 342,8 og 397,8 milliónir krónur.

Men størsti munurin er, tá hugt verður eftir skyldunum og eginognini hjá báðum feløgunum.

Langfreistaða skuldin hjá Magn við árslok 2024 var 180 milliónir krónur meðan Effo hevði langfreistaða skuld á 66,3 milliónir.

Effo hevði við árslok 2024 eina eginogn upp á 182,7 milliónir, sum gevur eitt trygdarevni á 46 prosent, sum er gott.

Magn hevði eina eginogn á 13,6 milliónir, eitt trygdarevni á bert 4 proent, sum verður roknað at vera lágt.

Tískil er Effo eitt munandi fíggjarliga sterkari felag enn Magn, tá hugt verður eftir 2024 roknskapunum.

Vinningsbýti
Bæði Magn og Effo hava rindað sera stór vinningsbýti síðstu 10 árini til sínar eigarar. Samanlagt hava orkufeløgini rinda 505 milliónir krónur út til sínar eigarar í vinningsbýti síðani 2015.

Vinningsbýtið hjá Magn og Effo í 2024 var ávikavist 50 og 35 milliónir krónur.

Lyklatøl
Nøkur útvald lyklatøl hjá Magn og Effo síggjast á tabellini niðanfyri.

Eigari av Pf. Magn er Spf. Orkufelagið, har høvuðspartaeigarin er Spf. Frá 27.juni 2007, umframt aðrar føroyskar og íslendskar eigarar.

Stjóri í Pf. Magn er Suni E. Justinussen. Nevndarformaður er Jan Petersen.

Eigari av Pf. Effo eru Kolan Aps og Pf. Tjaldur, sum er høvuðspartaeigarar, umframt LÍV, Pf. Varðin, Pf. Framinvest og aðrir smærri eigarar. 

Stjóri í Pf. Effo er Gunnar Nielsen. Nevndarformaður er Janus Thomsen.

--

Greiningin er gjørd av Birgir Nielsen og ráðgevarafyritøkuni Nira Sp/f

Greinin varð fyrstu ferð løgd út 04. juli 2025

Sethúsaprísirnir halda áfram at hækka

Miðal sethúsaprísurin í Havn er nú 4,4 milliónir krónur – miðal prísurin fyri landið er komin upp á 3 milliónir

(Tilvildarlig savnsmynd: Sverri Egholm)

SkrivaÐ:

Innsent

Sethúsaprísirnir í Tórshavn hækkaðu 6 prosent fyrsta ársfjórðing í 2025 samanborið við miðalprísin í 2024.

Tað vil siga, at miðalprísurin fyri eini sethús í Tórshavn nú er 4,4 milliónir krónur.

Í Føroyum hækkaðu sethúsaprísirnir 9 prosent fyrsta ársfjórðing í 2025, og sostatt er miðalprísurin á sethúsum nú komin upp á 3 milliónir krónur.

Seinastu 10 árini er miðalprísurin fyri sethús í Tórshavn tvífaldaður. Frá at vera góðar 2,1 milliónir krónur í 2015 táttar hann nú, sum nevnt, í 4,4 milliónir krónur. Taka vit alt landið undir einum, eru sethúsaprísirnir tvífaldaðir frá góðum 1,4 milliónum krónum til góðar 3 milliónir krónur.

- Vit síggja eingi tekin um, at prísurin lækkar í næstum. Í stuttum kann sigast, at útboðið er ov lítið í mun til eftirspurningin. Tað mangla búeindir; fleiri sløg og í øllum støddum og príslegum. Vit selja nógvar ognir kring landið og síggja, at prísirnir eru farnir upp nógv tey seinastu árini. Vit síggja eisini, at undirstøðukervið spælir ein stóran leiklut, tá fólk taka avgerð um, hvar tey vilja búseta seg. Tað sóu vit, tá Vágatunnilin kom, tá Eysturoyartunnilin kom, og vit síggja tað aftur nú, Sandoyartunnilin er komin, sigur Kára á Dunga, stjóri í Betri Heimi. 

Greinin varð fyrstu ferð løgd út 01. juli 2025

Metstórar skattarættingar: 82 milliónir afturat í landskassan

Skattarættingar gjørdar fyri stívliga 291 milliónir krónur. Hetta er tað størsta nakrantíð

Eyðun Mørkøre, stjóri í Taks (Savnsmynd: Sverri Egholm)

SkrivaÐ:

Sverri Egholm

Skattaeftirlitið hjá TAKS hevur nú gjørt upp fyri 2024, og úrslitið vísir, at gjørdar eru rættingar fyri stívliga 291 milliónir krónur. Hetta eru størstu rættingar nakrantíð, og tær geva landskassanum eina nettoinntøku á 82 milliónir krónur afturat. Hetta er greið ábending um, at eftirlitið hjá TAKS virkar væl og gevur úrslit.

Flestu rættingarnar vóru knýttar at feløgum

Av teimum 291 milliónunum stavar meginparturin – 272 milliónir – haðani.

• 109 milliónir í inntøkuskatti
• 96 milliónir í kapitalvinningsskatti
• 60 milliónir í veiðirættindaskatti
• 7 milliónir í avgjøldum

Hjá einstaklingum vórðu rættingar gjørdar fyri góðar 19 milliónir krónur.

• 8,7 milliónir í inntøkuskatti
• 8,9 milliónir í kapitalvinningsskatti
• 1,5 milliónir í rentustuðli og ferðastuðli

- 291 milliónir er størsta rætting, vit nakrantíð hava gjørt. Tað vísir, at eftirlitið virkar, og at vit hava dugnalig fólk á uppgávuni – og tað eru vit errin av, sigur Eyðun Mørkøre, stjóri á TAKS.

- Seinastu árini hava vit sæð, at einstøk eftirlit kunnu hava stóra ávirkan, og 2024 var einki undantak. Hetta undirstrikar, hvussu týðandi tað er, at TAKS hevur eitt nútímans og vælvirkandi eftirlit, leggur hann afturat.

Greinin varð fyrstu ferð løgd út 01. juli 2025

Integratiónslógin sett í gildi

Integratiónslógin leggur dent á, at landsmyndugleikar og kommunalir myndugleikar skulu arbeiða saman fyri at lyfta integratiónsøkið í felag

 

SkrivaÐ:

Ingi Samuelsen

1. juli varð integratiónslógin sett í gildi. Lógin skipar tilgongdina fyri integratión í Føroyum og gevur myndugleikum greiðar heimildir at seta í verk og fremja integratiónsfremjandi tiltøk.

Løgtingslógin er galdandi fyri allar útlendingar, sum hava uppihaldsloyvi í Føroyum.

Bæði landi og kommunum verður álagt at veita integratiónsfremjandi tiltøk, samstundis sum ymisk krøv verða sett tilflytarum. Integratiónslógin leggur dent á, at landsmyndugleikar og kommunalir myndugleikar skulu arbeiða saman fyri at lyfta integratiónsøkið í felag.

Løgtingslógin kemur í gildi í stigum, sum eru skipað soleiðis:

1. juli 2025: Kommunurnar skulu skipa fyri kunnandi fundum fyri tilflytarum, sum nýliga eru fluttir til Føroya. Integratiónsmyndugleikin skal skipa fyri integratiónssamrøðum. Kommunur og integratiónsmyndugleikin skulu skipa fyri integratiónsfremjandi tiltøkum og almennari kunning, og integratiónsmyndugleikin skal ráðgeva og vegleiða almennum myndugleikum, kommunum, stovnum, fyritøkum og øðrum um integratión og integratiónsfremjandi tiltøk.

1. januar 2026:Tilflytarar, sum hava børn undir skúlaaldur, fáa tilboð um heimavitjan av heilsufrøðingi, skeið um føroyska mentan og samfelagsviðurskifti, og skeið um integratión hjá børnum.

1. juli 2026:Kommunur skulu hava integratiónssamskipara og skulu veita børnum, sum ikki hava føroyskt sum móðurmál, eina skipaða trivnaðarætlan á dagstovnum.

Kunnandi fundur um integratiónslógina hevur verið í Havn, og kunnandi fundir verða væntandi í Suðuroy og í Norðoyggjum eftir summarfrítíðina.

Løgmálaráðið og integratiónsmyndugleikin, sum er partur av Útlendingastovuni, samstarva við avvarðandi áhugapørtum og myndugleikum um fyrireikingarnar at seta integratiónslógina í verk.

Integratiónslógin leggur dent á tætt samstarv millum land og kommunur, stovnar, almannagagnligar og sjálvbodnar felagsskapir og fyritøkur, samstundis sum tilflytarin skal luttaka mest møguligt.

Besta integratiónin, sum bæði er til frama fyri íbúgvar og samfelagið, er einans møgulig, um øll lyfta í felag. Samstundis sum ávís krøv verða sett tilflytarum, skulu hesi virða ymisleikan hjá tilflytarum. Integratión merkir sínámillum tillaging av ymiskum mentanum, so hesar kunnu liva lið um lið á felags grundstøði. Integratiónstilgongdin skal tí rúma, at tilflytarar varðveita sína mentan, samstundis sum føroyska mentanin gerst partur av gerandisdegnum, og tilgongdin skal víðka føroyska samfelagið at fevna um mentanirnar hjá tilflytarum.

Kelda: Løgmálaráðið

Greinin varð fyrstu ferð løgd út 01. juli 2025

Talgildar viðtalur og nýggj átøk á Suðuroyar Sjúkrahúsi

Nú er ein nýggj royndarverkætlan sett í verk á Suðuroyar Sjúkrahúsi, sum skal betra heilsutænasturnar í Suðuroynni

(Savnsmynd: Sjúkrahúsverkið)

SkrivaÐ:

Tíðindaskriv

Høvuðsparturin av verkætlanini eru talgildar viðtalur, har sjúklingar í Suðuroynni kunnu fáa fakliga viðgerð og ráðgeving frá serlæknum – uttan at fara av oynni.

Talgildu viðtalurnar fara fram á Suðuroyar Sjúkrahúsi, har bæði tøkni og starvsfólk eru til staðar at veita stuðul. Somuleiðis kann sjúklingurin hava avvarðandi við til viðtaluna. Nakrar eindir, eitt nú Familjudepilin og Barna- og ungdómspsykiatriin, eru longu farnar undir skipanina, og eftir ætlan verða fleiri sergreinar lagdar afturat, m.a. innan lungasjúkur, nervasjúkur og diabetes.

Verkætlanin verður skipað í tøttum samstarvi millum serlæknaeindirnar á Landssjúkrahúsinum og Suðuroyar Sjúkrahúsi, við greiðum ábyrgdarbýti og mannagongdum. Endamálið er at skapa eina varandi loysn, sum kann gerast fyrimynd fyri aðrar eindir í heilsuverkinum.

Palliatión – nýggj tænasta í Suðuroynni
Sum liður í royndarverkætlanini er eisini farið undir at menna eina palliativa tænastu í Suðuroynni. Ein sjúkrarøktarfrøðingur er settur at samskipa hetta arbeiðið, umframt at røkja ábyrgdina av talgildu viðtalunum. Tænastan skal veita vegleiðing og ráðgeving til sjúklingar, avvarðandi og heilsustarvsfólk í økinum.

Í royndartíðarskeiðinum verður ein tørvsmeting gjørd, og síðani verður farið undir at fyrireika og menna tænastuna, í tøttum samstarvi við Palliativu eindina á Landssjúkrahúsinum.

Fyrireikingar til viðgerð kunnu fara fram í Suðuroynni
Eftir summarferiuna verður eisini møguligt hjá sjúklingum at koma á Suðuroyar Sjúkrahús at fremja neyðugar fyrireikingar til skurðviðgerðir á Landssjúkrahúsinum. Hetta inniber millum annað at máta blóðtrýsti, taka blóðroyndir og aðrar neyðugar fyrireikingar, sum kunnu gerast á Suðuroyar Sjúkrahúsi. Hetta fer at lætta ferðingina og tryggja, at sjúklingar eru klárir at fara undir viðgerð, tá teir møta á Landssjúkrahúsinum.

Eftirmeting og víðari menning
Royndarskeiðið við talgildum viðtalum og hinum nýggju átøkunum er frá juli til september 2025. Tá skeiðið er av, verður verkætlanin eftirmett, og mett verður um møguleikarnar fyri at halda fram við átøkunum sum varandi partur av tænastutilboðnum á Suðuroyar Sjúkrahúsi.

Verkætlanin verður mett at hava góðar fortreytir fyri at betra heilsutænasturnar í Suðuroynni – við dygd, nærveru og nýhugsan í miðdeplinum.

Hesi átøkini eru liður í yvirskipaðari ætlan um at seta royndarskipanir á heilsuøkinum í Suðuroynni í verk. Endamálið er at royna nýggjar loysnir, sum kunnu gagna, ikki bara í Suðuroynni, men í øllum landinum.

Greinin varð fyrstu ferð løgd út 03. juli 2025

Níggju føroyskar verkætlanir fáa stuðul úr Grunninum Nuuk, Reykjavík, Tórshavn

Hesar verkætlanir fáa tilsamans 300.000 krónur

Frá vinstru: Carina Heinesen á Rógvu, Jákup Simonsen, Jóan Petur Hentze, Heiða Björg Hilmisdóttir (borgarstjóri í Reykjavík), Elsa Berg (borgarstjóri í Tórshavn), Kjartan Magnússon, Nitta Lyberth-Mørch, Lone Rosengreen Pedersen (býráðslimur í Sermersooq kommunu - tað barst borgarstjóranum frá at vera við á fundinum), Alexandra Briem og Pernille Ødegaard (Mynd: Torshavn.fo)

SkrivaÐ:

Alda Nielsdóttir

Grunnurin Nuuk, Reykjavík, Tórshavn hevði í undanfarnu viku sín árliga fund, sum í ár var í Reykjavík.

Á fundinum skuldi millum annað støða takast til stuðulsumsóknir til grunnin, og hesaferð varð gjørt av, at veita níggju føroyskum verkætlanum stuðul upp á tilsamans 300.000 krónur, skrivar Tórshavnar kommuna.

Felagsgrunnurin Nuuk, Reykjavík, Tórshavn hevur sum endamál at veita fíggjarligan styrk til tiltøk innan mentan, undirvísing og ítrótt, sum kunnu fremja og menna samstarvið millum Reykjavíkar, Tórshavnar og Sermersooq kommunu og millum borgararnar í teimum trimum kommununum. Í grunninum eru umboð úr Reykjavík, Nuuk og Tórshavn.

Treytin fyri stuðli er, at verkætlanirnar inndraga minst eina av hinum høvuðsstaðarkommununum.

Tær níggju umsóknirnar, ið fingu stuðul úr Føroyum, fingu millum 10.000 og 65.000 krónur:

• Bogi Andreasen – listaframsýning í Reykjavík
• The Laboratory of Vulnerability in the North og forlagið Eksil – Three Rivers, ein geopolitisk verkætlan í trimum londum við filmi, bókmentum og tónleiki
• Havnar Svimjifelag – Reykjavík International Games 2026
• Osgood/Blak/Poulsen – Konsertir í Tórshavn, Reykjavík og Nuuk
• Norrøna Felagið – Foreningerne Nordens Hovedstadstræf 2026
• Resterne af Rigsfællesskabet v/ Heðin Ziska Davidsen – Summartónar 2025
• The Laboratory of Vulnerability in the North og forlagið Eksil – Litteraturfestivalur um kolonialismu og veðurlag – Føroyar, Ísland, Sami og Grønland
• Kári Sverrisson, Tóta Árnadóttir, Urd Johannesen – Söguhringur
• Eydnudeild Føroyar, Lundapisurnar - Skifti millum Eydnudeildarlið í Føroyum og í Grønlandi

Greinin varð fyrstu ferð løgd út 28. juni 2025

Samráðingarnar um løn undir útbúgving steðgaðar

Samráðingar verða tiknar upp aftur eftir summarfrítíðina

Per Martin Gregersen er formaður í Kommunala Arbeiðsgevarafelagnum (Savnsmynd)

SkrivaÐ:

Sverri Egholm

Enn eru partarnir ikki blivnir samdir um lønina undir útbúgving, sum næmingar á Heilsuskúlanum eftir ætlan skulu hava. Nú eru samráðingarnar steðgaðar, og verða ikki tiknar uppaftur fyrr enn eftir summarfrítíðina.

Kommunala Arbeiðsgevarafelagið og Fíggjarmálaráðið hava havt fimm samráðingar fundir við tey trý fakfeløgini, Føroya Pedagogfelag, Heilsurøktarafelagið og Heilsuhjálparafelag Føroya um løn undir útbúgving.

Samráðingarnar snúgva seg í høvuðsheitum um, hvørja løn starvsfólk, ið hava útbúgvingarsáttmála skulu hava.

Talan er um nýggja skipan, sum skal gera tað møguligt hjá starvsfólkum at fara undir eina heilsufakliga og námsfrøðiliga útbúgving á Heilsuskúlanum, samstundis, sum tey eru í arbeiði. Útbúgvingarnar talan er um eru heilsuhjálparar, heilsurøktarar og námsfrøðiligu hjálparar.

- Arbeiðsgevararnar hava flutt seg fleiri ferðir í samráðingunum uttan, at feløgini hava førkað seg. Sostatt er tað einans arbeiðsgevarin, ið hevur víst veruligan vilja at fáa eina semju. Arbeiðsgevarar halda, at kravið frá feløgunum er ov høgt og tað kann viðføra, at ongin kommuna/eldraøkið fer at brúka útbúgvingarsáttmálar, sigur Per Martin Gregersen, formaður í Kommunala Arbeiðsgevarafelagnum.

Greinin varð fyrstu ferð løgd út 02. juli 2025

Føroyska Tjaldur víðkar um virksemi í Noregi

Astrup-familjan í Noregi, sum m.a. eigur felagið Pactum, hevur saman við nøkrum kendum íleggjarum, teirra millum føroyska Tjaldur, stovnað íløgufelagið Pactum Capital við einari milliard norskum krónum í byrjunarkapitali

Rúni M. Hansen, stjóri í Tjaldur (Mynd: Anders Furuset, Dagens Næringsliv)

SkrivaÐ:

Jan Müller

Millum høvuðsíleggjararnar er føroyska felagið Tjaldur. Rúni M. Hansen, nevndarformaður í Pf. Tjaldur, váttar fyri norska blaðnum Dagens Næringsliv, at Tjaldur er við í felagnum. Hann sigur við blaðið, at Tjaldur heldur hetta verða eina spennandi langtíðaríløgu, sum verður gjørd saman við dugnaligum fólkum.

Ein annar íleggari er Torkell Eide, sum í nógv ár starvaðist hjá íløgufelagnum Ako Capital, har hann varð roknaður sum “høgra hond” hjá Nicolai Tangen, núverandi stjóra fyri norska Oljufondinum.

Torkell Eide arbeiddi í London í nógv ár hjá Ako Capital, men skifti lívsleið, eftir nøkur framúr góð ár í London. Hann flutti til Dale í Rogaland, og keypti ein bóndagarð, sum hann nú sjálvur rekur. Har arbeiðir hann við avli av wagyu-oksum.

Hann hevur sagt í øðrum viðtalum við Dagens Næringsliv, at hann ynskti at skifta lívsleið, tí hann vildi hava meira tíð til familjuna, flyta til eitt minni stað, og gera okkurt heilt annað. Hann er eisini kendur sum rithøvundur av bókini “Quality Investment - Owning the Best Company for The Long Term”.

Espen Marcussen, stjóri í Pactum Capital, sigur, at strategiin hjá felagnum er langtíðarhugsan, og at fokusera á norðurlendsk feløg, sum hava førleikan at skapa gott avkast yvir tíð.

Í nevndini í Pactum Capital eru Kine Burøy-Olsen, Rúni M. Hansen og Torkell Eide.

Greinin varð fyrstu ferð løgd út 30. juni 2025

Laksatorgið verður í dag

Hetta verður ein spennandi dagur á Glyvrum við upplivingum fyri bæði børn og vaksin

(Mynd: Visit Runavík)

SkrivaÐ:

Alda Nielsdóttir

Í dag, leygardagin 5. juli frá klokkan 10 til 16, verður Laksatorgið aftur Niðri á Støð á Glyvrum.

Hetta verður ein spennandi dagur við upplivingum fyri bæði børn og vaksin. Laksatorgið er ein lívligur marknaður og eitt stórt familjutiltak, skrivar Visit Runavík í tíðindaskrivi.

Á Laksatorginum verður m.a. ókeypis smakkiroyndir frá Etika og Bakkafrost, ponyríðing og kajakkir, dreyibenkur, fiskakør og onnur handverk, umframt tónleik, barnaundirhald og eina fulla pallskrá við spennandi innsløgum.

Eisini verður eitt sølutorg við fjølbroyttum vørum umframt matvognar og smáttur við mati og drykkjuvørum.

– Vit viðmæla, at fólk hava reiðan pening við, tí ikki øll sølustøðini taka kort, skrivar Visit Runavík.

Greinin varð fyrstu ferð løgd út 30. juni 2025

Súkkla í egnum landi

Visit Faroe Islands roynir nú at raðfesta súkkling í arbeiðinum at menna ferðavinnuna her á landi

 

SkrivaÐ:

Tíðindaskriv

Í fjør framleiddi Landsverk temabløð um ábæra ferðslu og um ferðafólkaferðslu. Hetta er partur av nýggju samferðsluætlanini, har Landsverk hevur gjørt av at raðfesta átøk, sum gera tað lættari at vera til gongu og á súkklu.

Visit Faroe Islands hevur verið verið partur av hesum arbeiði og tekur fult undir við, at vit hava tørv á at raðfesta burðardyggari flutningshættir og gera tað lættari at velja bussin, súkkluna ella gonguleiðina, tá ein ferðast kring landið. Hetta er ikki bara grønari og sunnari, tað gevur eisini eina øðrvísi og meiri hugdýpandi ferðauppliving har tú sært og upplivir oyggjarnar á annan hátt og so er tað harafturat eisini ein av lyklunum til at loysa avbjóðingarnar við nógvu bilaferðsluni.

Visit Faroe Islands hevur tí eisini gjørt av at raðfesta súkkling í arbeiðinum at menna ferðavinnuna her á landi. Ein nýggj heimasíða er gjørd við átta útvaldum súkkluleiðum, ið geva íblástur til súkklutúrar ymsastaðni í Føroyum. Harafturat er ein filmur framleiddur ið lýsir súkkling og ferðslutrygd, tá ein súkklar úti í ferðsluni. Filmurin er gjørdur í einum samstarvi millum Ráðið fyri Ferðslutrygd, Visit Faroe Islands og Visit Tórshavn. 

Greinin varð fyrstu ferð løgd út 02. juli 2025

- Lønin er nógv meira enn pengar

Súsanna Hendriksdóttir Olsen, ið er sjúkrasystir, er júst afturkomin av sínum næsta túri við sjúkrahússkipinum Global Mercy, har hon hevur arbeitt sum sjálvboðin umborð

 

SkrivaÐ:

Innsent

- At síggja umbroyttar sjúklingar er ein stór løn í sær sjálvum.

Tað sigur Súsanna Hendriksdóttir Olsen, sjúkrarøktarfrøðingur úr Lamba, sum júst er afturkomin av sínum næsta túri við sjúkrahússkipinum Global Mercy hjá felagsskapinum Mercy Ships. Skipið hevur ligið í Sierra Leone. Súsanna hevur arbeitt sum sjálvboðin sjúkrarøktarfrøðingur umborð, og danska blaðið Udfordringen hevur gjørt eina samrøðu við hana.

- Eg havi fingið nógvar lívsjáttandi søgur við mær í viðførið. Lønin er nógv meira enn pengar. Arbeiðið sum Mercy Ships ger gevur góða meining, og eg eri takksom fyri at vera partur av tí, “ sigur Susanna Olsen við Udfordringen.

Súsanna er 30 ára gomul og býr í Keypmannahavn, har hon dagliga arbeiðir á eini hjartadeild á Ríkissjúkrahúsinum.

Tá hon hyggur aftur á tær báðu ferðirnar, hon hevur verið við heimsins størsta sivila sjúkrahússkipi, eru tað serliga tveir sjúklingar, sum hon minnist:

- 26 ára gamli Albert hevði skatt sær nøsina í einum bardaga fyri nøkrum árum síðani. Tá hann kom til okkara, var næstan helvtin av nøsini burtur. Nakrar dagar eftir skurðviðgerðina spurdi hann meg, nær hann kundi taka umbindingina av. Eg segði, at tað kundi hann um fimm dagar. Hann segði, at tað var í lagi; hann vildi vera tolin, tí vinir hansara høvdu happað hann í langa tíð, men nú fór hann skjótt at verða vakur aftur. Og tann dagin, tá umbindingin varð tikin av, og nøsin var grødd, kundi hann ikki lata vera við at hyggja seg sjálvan í spegilin allan tíðina. Tað var ein ómetaliga góð uppliving.

- Ein annar sjúklingur, Ishaka, hevði bara eitt hol ístaðin fyri eina nøs, og tí hevði hann krógvað seg alt lívið. Men nú hann hevði fingið eina nøs segði hann: “Hygg at mær nú!” meðan hann gekk runt á deildini, glaður og fullur av lívsmóti. Hann krógvaði seg ikki longur.

Frá seinna túrinum var tað ein miðaldrandi kvinna sum æt Miata, sum Súsanna serliga legði merki til.

- Hon var innløgd við einum sera stórum struma. Tá hon eftir skurðviðgerðina hevði ein “vanligan háls” segði ein annar sjúklingur, at Miata var ikki longur ein heks. Eg og ein annar sjúkrarøktarfrøðingur vóru skelkaðar av hesi viðmerkingini og greiddu frá, at vit hava øll virði í Jesusi og eru skapað í Guds mynd og ikki sum heksir. Eg fekk tá at vita, at fólk við stórum struma vórðu kallað heksir.

- Hetta vísir, hvussu stóran týdning henda skurðviðgerðin hevur fyri fólk sum Miatu. Hon fer ikki longur at verða kallað heks. Henni nýtist ikki at krógva seg. Hon kann verða vird um eittmenniskja.

Út úr skammikrókinum

At krógva seg er heilt vanligt í hesum londunum, tá fólk eru vanskapt.

- Ein av lokalu samstarvsfelagunum hevur sagt mær, at hann beinleiðis skalv, tá hann fyri fyrstu ferð sá ein sjúkling við einum knykli, tí hann hevði ongantíð sæð nakað líknandi fyrr. Hann segði mær, at hann visti ikki, at tílík menniskju vóru til. Tey fjala seg alt lívið, so tey við vanligari útsjónd vita ikki, at hesi fólkini eru til. Henda søgan ávirkaði meg nógv. Eg síggi sjúklingar, tá teir verða útskrivaðir eftir viðgerðina, og teir eru so glaðir og stoltir og krógva seg ikki longur. Tað er stórt at uppliva.

Ein stórur dreymur gjørdist veruleiki

Súsanna Olsen hevur altíð havt ein dreym um at arbeiða við mennsikjum:

- Eg droymdi um at gerast sjúkrarøktarfrøðingur ella lækni, fyri at brúka mína útbúgving bæði heima og í øðrum londum, har tey hava brúk fyri hjálp. Ein stórur dreymur hjá mær var at koma umborð á eitt av skipunum hjá Mercy Ships. Sjúkrarøktarfrøði er eitt meiningarfult arbeiði, og eg elski tað, líkamikið hvar í heiminum eg eri. Eg brenni fyri at hjálpa teimum, sum hava brúk fyri hjálpini. Eg ynski at gera mun fyri tey, sum veruliga hava brúk fyri tí. Eg havi altíð droymt um at arbeiða á einum staði, har neyðin er stór, og tí havi eg droymt um at verða send út og at brúka mína útbúgving bæði lokalt og altjóða,” sigður Súsanna við Udfordringen.

Súsanna Olsen er somikið hugtikin av sjálvbodna arbeiðinum hjá Mercy Ships, at hon fegin mælir øðrum til at royna tað.

- Tað er gott at koma burtur frá tí vælkenda umhvørvinum og uppliva eina heita mentan hóast stórt materielt fátækradømi. Tað lærir ein at síggja tilveruna øðrvísi. Harumframt haldi eg, at vit sum eru vælsignað við útbúgving og løn kunnu saktans geva eitt sindur til okkara brøður og systrar í øðrum londum, ið hava tørv á vón og heilsuhjálp. 

Greinin varð fyrstu ferð løgd út 30. juni 2025

Ein dýrabar løta við mentan, mati og samveru

Floksmannadagur varð hildin í Hattarvík leygardagin

 

SkrivaÐ:

Innsent

Leygardagin varð Floksmannadagurin hildin fyri tíggjundu ferð – ein heilt serstøk hending, ið savnaði gestir í Hattarvík.

Hóast veðrið frammanundan sá nakað vánaligt út, stóð útsynningurin við – og tað gjørdi góða lagið eisini. Øll komu í land við Trøllagjónna í øllum góðum og løgdu leiðina niðan á Bakkahjallin, har dagurin byrjaði av álvara við niðurgrevstri av kjøti úr Eystfelli.

Tað er ikki smálutir, sum skulu upp á pláss til ein slíkan dag – alt frá fjallgongu og sálmasangi til roykt síl og langtíðarstokt lambskjøt. Alt verður gjørt við hond og hjarta, og hóast veðrið av og á leggur fótonglar fyri, vísti aftur í ár, at við samhaldi, vilja og einum sterkum toymi ber alt til.

Ein uppliving fyri allar sansir

Dagurin byrjaði við morgunmati við føroyskum viðskera, áðrenn farið varð á fjall niðan á Fríða Eystfelli. Heimkomin fingu gestirnir heita fiskasúpan og skinkurnar, ið hava hingið í serstaka hjallinum í 18 mánaðir, vórðu tiknar niður og royndar.

Seinni varð borðreitt við føroyskum whisky, hvannsnapsi, øli og rótabryggi. Seyðahúsið varð gjørt um, og tær um 120 ærnar, sum vanliga verða fóðraðar har, lótu plássið fyri gestunum.

Her vóru 18 smakkroyndir bornar fram – ein sannur matarhátíðardagur við rættum úr føroysku náttúruni: lodna, sild, lundi, lomvigi, turkaður svartkjaftur, tvøst, spik og sjálvandi alt av seyði og mangt annað. Alt tilgjørt við virðing fyri siðaarvi og við einum nútímans gastronomiskum snildi.

Mentanarligar løtur og tónleikur beint í hjarta

Á skránni vóru eisini sterkar mentanarligar løtur – sálmasangur í kirkjuni við Hamradun, søgulig frásøgn við Andrasi Sólstein og fyrilestur við Sjúrði Skaale um Sigert í Kirkjubø.

Tá kvøldið tók at líða, bjóðaði Hamradun aftur á pall – beinleiðis úr Hamburg til Hattarvíkar – og skaptu eina ómetaliga sterka løtu, sum fór beint í hjarta.

Ársins niðurgravaða kjøt var av tí allarbesta og tilgjørt við tí sum hoyrur til. Omaná vóru tað rabarbur frá Jastrid.

Samhaldið ber tað fram

Tá farast skuldi heimaftur, varð farið av Kirkju vegna veðrið. Men við eyðkenda hugburðinum “tað gongur nokk” og við hjálp frá oynni og Strandferðsluni kom alt fólkið trygt avstað – og í góðum lag.

Floksmannadagurin er nógv meira enn ein dagur. Tað er ein uppliving – ein løta við føroyskum siði, mentan, mati og felagsskapi – og ikki minst eitt prógv um, hvat ber til á útoyggj, tá fólk koma saman við eldhuga og vilja.

Floksmannadagurin 2026 verður hildin leygardagin 27. juni.

Greinin varð fyrstu ferð løgd út 01. juli 2025

Lata væl at Voxbotn við Tjarnir

Orsakað av ringum veðri farna vikuskiftið varð Voxbotn flutt niðan í høllina við Tjarnir, og tað riggaði sum heild væl, siga fyriskipararnir

(Mynd: Jens Kr. Vang)

SkrivaÐ:

Sverri Egholm

Eftir umstøðunum gekk tað væl, sigur Rúni Djurhuus, fyriskipari av Voxbotn, tá hann á FM1 varð spurdur um, hvussu Voxbotn, sum hesaferð var í óvandum umstøðum í Hoyvíkshaganum, hilnaðist.

Fyriskipararnir valdu nevniliga mikukvøldið í síðstu viku at flyta festivalin úr Vágsbotni og niðan í stórhøllina við Tjarnir. Veðrið skuldi blíva so mikið ringt, at tað ikki var mett ráðiligt at savna so nógv fólk í Vágsbotni.

- Man hevði sjálvandi ynskt at tað var í Vágsbotni, men veðrið var sum tað var. Og móttøkan var eisini góð og fólk vóru sum heild væl nøgd, sigur Rúni Djurhuus.

Upprunaliga skráin helt, og tveir pallar vórðu settir upp í høllini - ein í hvørjum enda.

Umleið sama tal av fólki, sum plagar at vera stúgvað saman í Vágsbotni, var í stóru høllini, sum tilsamans er eitt størri øki enn vanliga festivaløkið. Tískil var nakað væl betri pláss hesaferð.

Rúni Djurhuus dylir ikki fyri, at hetta við at flyta festivalin niðan við Tjarnir hevur eyka útreiðslur við sær. Umleið eina hálva millión, greiddi hann FM1 frá. Hetta fyri gjald av høllini, busskoyring og annað. Hinvegin hevði tað kostað nógv at avlýst.

Hetta gevur royndir og eisini blóð upp á tonna at skipa fyri størri tiltøkum við Tjarnir um veturin, sigur Rúni Djurhuus, ein av fyriskiparunum av Voxbotn.

Sí allar myndirnar, sum Jens Kr. Vang tók við Tjarnir hetta kvøldið:

Voxbotn við Tjarnir skotið í gongd

The Minds of 99 og RSP á Voxbotn

Byrta, Týr og Suspekt við Tjarnir

Endabresturin á Voxbotn

Greinin varð fyrstu ferð løgd út 30. juni 2025

Lyon Hansen við bólki á Listasavninum

Við sær hevur hann Karl Andrias Stóra á bassi og Kristian Paula Ellefsen á tangentum

(Savnsmynd: Jens Kr. Vang)

SkrivaÐ:

Tíðindaskriv

Nú sunnudagin, 6. juli kl. 16, fer Lyon Hansen at spæla konsert á Listasavni Føroya í samstarvi við Økistónar.

Lyon Hansen hevur fyri stuttum givið út nýggju plátuna “Skull-sized Kingdom”.

Á konsertini á Listasavninum fer Lyon at spæla eina góða blanding av nýggjum og gomlum sangum hjá sær, umframt nakrar gamlar blúsarar.

Við sær hevur hann Karl Andrias Stóra á bassi og Kristian Paula Ellefsen á tangentum.

Konsertin er ókeypis, og verður í forhøllini á Listasavninum.

Nýggja summarkaféin á Listasavninum, Rosa Villosa, er opin og til ber at keypa m.a. kaffi, vín, øl, køkur og eina lætta máltíð.

Greinin varð fyrstu ferð løgd út 02. juli 2025

Tekno á Tórsfest

Sum nakað nýtt, fær Tórsfest enn fleiri pallar á konsertdegnum – umframt teir báðar stóru pallarnar á Vágsbotni, verður Perlan m.a. karmur um eina risa teknoveitslu

Perlan (Savnsmynd)

SkrivaÐ:

Alda Nielsdóttir

Sum nakað nýtt, fær Tórsfest enn fleiri pallar til konsertdagin. Umframt teir báðar stóru pallarnar á Vágsbotni, verða hølir kring økið eisini tikin í nýtslu, og verður Perlan karmur um eina risa teknoveitslu.

Tað boða fyriskiparar av Tórsfest frá.

– Seinastu tvey árini hava tekno tiltøk stungið seg upp her og har í djúpu, bassutu undirgrundini. Teknohøvd koma saman, seta upp, leggja lag á, og dansa ígjøgnum náttina. Fríggjakvøldið 25. juli verður eitt TEKNO í Perluni, sum partur av ársins Tórsfest.

– Skráin bjóðar fimm nøvn, sum telja seks persónar: tríggjar damur og tríggjar harrar.

Tú kemur at uppliva duoina 2xSlay við sínum tokka til melodiskt tekno, deep house og house. Trygva, sum elskar allar elektroniskar krókar. Tað djúpa huglagið frá HNTZ við myrkum elementum og tungum stevi, sum dansar á linjuni við Psy-heimin. Eitt rátt og hypnotiskt dansigólv frá donsku Holtz. Og at enda EI.VN við sínum tætta, groovy og beistaktiga Tekno.

Skrá
22.00: 2xSLAY
23.00: TRYGVI
00.00: HNTZ
01.15: HOLTZ (DK)
02.30: EI.VN

Um nøvnini:

2XSLAY - melodiskt tekno við deep og house
Tær eru sum dagur og nátt, men renna saman við áhuganum í at levera ljóðmyndir, sum fara undir húðina á tær. Seinasta árið hava tær verið virknar upp á nógvar ymsar mátar, frá pultinum í Sirkus til privatar veitslur og eru eisini bókaðar á G! Festivalin í summar.

Tær spæla nógvan ymsan tónleik, sum ger fjøldina glaða, og so hava tær eisini ein serligan tokka til elektroniskan tónleik - sum er tað, vit koma at hoyra frá teimum til Tekno í Perluni. Hjartað liggur mest til Melodic Tekno við góðum íkasti av Deep & House. 2xSlay opna pallin í Perluni og spæla kl 22.00

TRYGVI – elskar allar elektroniskar krókar
Trygvi er etableraður í náttarlívinum; er tað til skitin heimaball, elegant tiltøk ella sum DJ á barr, so hevur hann roynt tað. Hann er kendur fyri síni føroysku bootleg remix, ið altíð fáa fólk upp í gear. Í samrøðu við net-miðilin Darr hevur Trygvi sagt, at hann kann diska allar stílar, men hjartað liggur í tí elektroniska:

- Eg havi ongantíð kunnað hildið meg til bara eitt tónleikaslag, tí har er alt ov nógv at velja ímillum. Eg elski allar krókar av elektroniskum tónleiki og eg seti nógv ymiskt saman. Eitt nú úr UK garage, Psychadelica úrTrance og ráu orkuna úr Tekno.

HNTZ – rullandi og myrkt við tungum stevi
HNTZ er DJ og Tekno framleiðari við fleiri árum á baki. Hann ger tað slagið av tekno, ið flokkast undir ”Peak time / drive”. Ein rullandi, djúpur Tekno stílur við myrkum elementum og tungum stevi, sum typiskt liggur millum 126-135 bpm, og sum dansar á linjuni við Psy-heimin.

Síðani 2023 hevur hann givið fleiri EPir, stakløg og remiks út á fimm ymsum labels (í DK, LA og CA), og fleiri av útgávunum hjá honum eru endaðar á top 100 listum á Beatport.

Tá HNTZ diskar, spælir hann bæði sítt egna og tónleik hjá øðrum – alt í trúfasta Tekno andanum, sum hann sjálvur dámar og smíðar. HNTZ er miðlingurin á skránni í Perluni og spælir á midátt.

Holtz (DK) - rátt og hypnotiskt dansigólv
Holtz kemur úr undirgrunds senuni í Keypmannahavn. Hon er m.a onnur helvt av nýggja DJ kollektivinum Eros Haven, sum kuraterar tiltøk saman við føroyska EI.VN, og tey koma bæði til Føroyar at kóka náttina í Perluni upp 25. juli.

Holtz er vaksin upp í Næstved og hevur diskað, síðani hon var 13 ár. Seinastu árini hevur hon útviklað sær eitt persónligt ljóð av hørðum sløgum og djúpum, rullandi groove. Settini hjá henni hava bæði styrki og dýpd, og hon skapar eitt rátt og hypnotiskt dansigólv, sum fær tínar teknoveingir á flog frá fyrsta stevi.

EI.VN - tætt, groovy og beistaktugt
EI.VN er onkusvegna farin frá at ganga á fjall á Nesi í Vági, har hann er uppvaksin, til at spæla á mest viðurkendu Tekno-klubbunum í Keypmannhavn. Hann hevur búð í Danmark seinastu árini, har hann hevur spælt seg inn í undirgrundina, og tekur hana nú við á Tórsfest við 150 sløgum um minuttin.

Tónleikaliga baklandið hjá EI.VN er í klassiskum og jazzi, men hann hevur funnið sítt kall í tøttum, groovy og beistaktigum Tekno. Hann er eisini onnur helvt av nýggja DJ kollektivinum Eros Haven, har hann kuraterar tiltøk í Keypmannahavn saman við donsku Holtz - sum eisini kemur til Føroyar at diska í Perluni 25. juli.

Greinin varð fyrstu ferð løgd út 03. juli 2025

Systrarnar á Lakjuni á Summar Festivalin

Evy, Victoria og Paula á Lakjuni hava konsert á Summar Festivalinum í august

 

SkrivaÐ:

Alda Nielsdóttir

Evy, Victoria og Paula á Lakjuni hava allar roynt seg við tónleiki – bæði á útgávum og á palli – og nú sameinast systrarnar til framførslu á Summar Festivalinum í august, boða fyriskiparar frá í tíðindaskrivi.

Victoriu kenna mong frá útgávuni av sanginum "Mary Did You Know", sum kom í 2017. Paula gav í fjør út sangin "Noel", og hon var eisini ein av sangarunum á kenda sanginum "Tað kundi verið eg". Evy hevur spælt klaver á útgivnum sangum og til framførslur hjá systrunum.

Saman við bólki fara systrarnar at hava konsert á Summar Festivalinum, sum verður hildin í døgunum frá 7. til 9. august, har tær fara at spæla eitt úrval av føroyskum og útlendskum sangum.

Onnur nøvn, sum Summarfestivalurin hevur kunngjørt hesa vikuna eru Signar í Homrum, Eyðun Nolsøe og Kular Røtur við Jógvani Hansen, Rannvá og Arnfríð Lützen, Rakul Ró Steintórsdóttir, sum saman við tónleikarum, dansarum,  kórsangarum og sangskrivarunum Steintóri Rasmussen og Inga Isaksen fara at hava eitt 25 ára show á Vágsbøi.

Greinin varð fyrstu ferð løgd út 28. juni 2025

Zelensky á vitjan hjá kongi

ES-toppfundur var í Århus hósdagin í sambandi við at Danmark tekur yvir formansskapin í ES

Zelensky, Fríðrik kongur og Mette Frederiksen á Marselisborg (Mynd: EPA)

SkrivaÐ:

Ingi Samuelsen

Nógv hóvasták varð gjørt burturúr í Århus hósdagin í sambandi við, at Danmark yvirtekur formansskapin í ES.

Millum gestirnar var ukrainski forsetin, Volodymyr Zelensky, sum var við á toppfundinum. Hetta í sambandi við, at ES-londini skulu tosa um møguliga at taka Ukraina við í ES-samstarvið.

Seinnapartin tók Fríðrikur X kongur í móti ukrainska forsetanum á kongsborgini í Århus, Marselisborg.

Sjálvur ES-toppfundurin varð hildin í sermerkta ráðhúsinum í Århus, sum víðagitni danski arkitekturin Arne Jacobsen, var við til at tekna, og sum varð tikið í nýtslu í 1941.

Fyrr á degnum var ES-nevndarforkvinnan Ursula von der Leyen á vitjan í havnini í Århus har tey vitjaðu umborð á bingjuskipinum Laura Mærsk, sum er heimsins fyrsta bingjuskip, ið verður rikið við metanol. ES-nevndarforkvinnan var eisini til staðar, tá Laura Mærsk var doypt í 2023.

ES-toppfundurin varð hildin í býráðssalinum í Århus (Mynd: EPA)

Kongshjúnini vóru við, tá ES-nevndarforkvinnan og danski statsministarin vitjaðu á Aros listasavninum (Mynd: EPA)

Greinin varð fyrstu ferð løgd út 03. juli 2025

SAS keypir 55 brasilsk flogfør

Talan er um størstu íløguna í nýggj flogfør hjá felagnum síðan 1996

SAS-stjórin Anko van der Werff kunnaði um ætlanirnar á tíðindafundi fyrrapartin (Mynd: EPA)

SkrivaÐ:

Ingi Samuelsen

Skandinaviska flogfelagið SAS kunngjørdi í vikuni eina ætlan, sum ber í sær, at felagið tey komandi árini fer at keypa flogfør fyri meira enn 25 milliardir krónur.

Talan er um eina risastóra uppstiging av flotanum hjá SAS.

Ætlanin er at keypa 55 nýggj flog frá brasilsku flogverksmiðnuni Embrear. Tey fyrstu flogførini verða latin SAS í 2027, skrivar dr.dk.

Í fyrst umfari verða 45 flogfør keypt við keypsrætti til 10 afturat.

Talan er um størstu íløguna í nýggj flogfør hjá felagnum síðan 1996.

- Vit hava skrivað undir sáttmála um 55 Embraer E195-E2 flogfør, upplýsti stjórin í SAS, Anko van der Werff, á tíðindafundi fyrrapartin.

SAS hevur valt hesi flogførini av fleiri orsøkum, millum annað brennievninýtslu og ljóðminking, upplýsti SAS-stjórin. 

Greinin varð fyrstu ferð løgd út 01. juli 2025

Air France-KLM vil hava meirilutan av SAS

Franska og niðurlendska felagið ætlar at keypa upp í 60,5 prosent av norðurlendska flogfelagnum

(Mynd: EPA / Mads Claus Rasmussen)

SkrivaÐ:

Sverri Egholm

Meira enn helmingurin av partapeninginum í flogfelagnum SAS skal í framtíðini vera á fronskum og niðurlendskum hondum.

Air France-KLM sum frammanundan eigur smá 20 prosent í SAS, vil nú eiga upp í 60,5 prosent av norðurlendska felagnum.

Hetta skal gerast við at keypa partabrøv frá Castlelake og Lind Invest, varð sagt í børsfráboðan í gjár.

Ætlanin er at keypið skal vera avgreitt í seinnu helvt av 2026.

Týsdagin kunngjørdi SAS størstu íløguna í flogfør síðan 1996. Felagið keypir 55 nýggj flogfør frá brasilska Embraer fyri 25 milliardir krónur. 

Greinin varð fyrstu ferð løgd út 04. juli 2025

Aleqa Hammond aftur forkvinna í Siumut

Aleqa Hammond, sum fór frá sum forkvinna í 2014 orsakað av einum máli um misnýtslu av almennum pengum, varð farna vikuskiftið aftur vald til forkvinnu

Aleqa Hammond varð við 23 atkvøðum vald til forkvinnu í Siumut farna vikuskiftið (Savnsmynd)

SkrivaÐ:

Alda Nielsdóttir

Á landsfundi um vikuskiftið varð 59 ára gamla Aleqa Hammond vald til nýtt forfólk fyri grønlendska stjórnarflokkin Siumut.

Valið stóð millum hana og Vivian Motzfeldt, sum hevur verið virkandi forkvinna, síðan Erik Jensen legði frá sær orsakað av søguliga vánaliga valúrslitinum á valinum í mars.

Aleqa Hammond fekk 23 atkvøður, meðan Vivian Motzfeldt fekk 19, skrivar Ritzau.

Aleqa Hammond var eisini forkvinna í Siumut í árunum 2009 til 2014, og var forkvinna í grønlendska landstinginum frá 2013 til 2014, inntil hon mátti leggja frá sær orsakað av einum máli um misnýtslu av almennum pengum.

Í 2015 stillaði hon upp fyri Siumut á fólkatingsvalinum, og var vald inn í fólkatingið. Hon var útihýst úr Siumut í 2016 orsakað av einum nýggjum máli um peningamisnýtslu. Á fólkatingsvalinum í 2019 varð hon ikki afturvald, og í 2021 gjørdist hon aftur limur í Siumut.

Ineqi Kielsen varð valdur til næstforfólk.

Greinin varð fyrstu ferð løgd út 30. juni 2025

“Alligator-Alcatraz” latið upp – alligatorar verða brúktir sum trygdarvørðar

5.000 tiflytarar verða settir í eina stóra tjóðarlund umgyrd av vandamilkum skriðdýrum

 

SkrivaÐ:

Ingi Samuelsen

Á einum niðurlagdur flogvølli í Everglades tjóðarlundini hevur guvernørurin í Florida, Ron DeSantis upp á heilt stutta tíð megnað at bygt eina nýggja fyribils legu, ætlað tilflytarum til USA.

Týsdagin var Donald Trump forseti við til at lata staðið upp. Staðið hevur fingið heitið “Alligator-Alcatraz”, sum verður eitt amboð í stríðnum hjá forsetanum at støðga ólógligari tilflyting, skrivar NRK.

Tjóðarlundin er eitt vátlendisøki fult av skriðtjórum so sum pytonslangum, krokodillum og 200.000 alligatorum.

- Navnið er hóskandi. Hetta er ikki eitt stað, eg vildi farið ein gongutúr, segði Trump, tá hann lat móttøkustøðina upp.

Donald Trump hevur sett sær fyri at økja um burturvísingarnar úr landinum, og ein liður í hesi ætlan er at fáa til vega fleiri varðhaldsstøðir fyri tilflytarar.

“Alligator-Alcatraz” er bygt upp á átta dagar. Kostnaðurin hevur verið 450 milliónir dollarar, skrivar AFP.

Myndir frá staðnum vísa tjøld ið búrum úr jarni, har koyggjusengurnar standa tættar.

Mótstøðufólk vísa sína ónøgd yvir ætlanina

Fólk, sum eru ímóti ætlanini hava kallað hugskotið ómenniskjaligt, og sammett leguna við KZ-legurnar hjá nasistunum. Umhvørvisfólkum dáma ikki, at henda legan er løgd í eini tjóðarlund. Og upprunafólkið sigur, at talan er um eitt heilagt økið, ið nú verður vanvirt.

Legan verður sammet við illa gitna fongslið Alcatraz, sum hýsti vandamiklum brotsfólkum frá 1933 til 1963. Við tað, at fongslið var á eini oyggj í ísakøldum sjógvi, var tað so at siga ógjørligt at rýma haðani.

Umsitingin hjá Trump hevur víst á tað jaliga við júst staðsetingini.

- Tað er einans ein vegur, ið førir inn, og einasti vegur út er ein einvegis flogferð. Legan er umgyrd av vandamiklum dýrum og óframkomandi lendi, segði talskvinna forsetans, Karoline Leavitt, í Hvítu húsunum mánadagin.

Bæði hon og DeSantis vísa á, at umhvørvið ger tað ógjørligt at flýggja.

- Tá tú hevur drápsmenn, neyðtøkumenn og ræðuligar brotsmenn í einum varðhaldi, kringsett av alligatorum – ja so haldi eg, at tað forðar teimum at sleppa til rýmingar, sigur Leavitt.

Greinin varð fyrstu ferð løgd út 02. juli 2025