Trump: Tollurin á ES-vørur verður 30 prosent

Frá 1. august verður ein tollur á 30 prosent lagt á vørur úr ES og Meksiko sigur amerikanski forsetin

Amerikanski forsetin, Donald Trump (Mynd: EPA)

SkrivaÐ:

Alda Nielsdóttir

Amerikanski forsetin, Donald Trump boðar frá, at hann ætlar at leggja 30 prosent í tolli á vørur, sum verða innfluttar úr ES frá 1. august.

Eisini ætlar hann at leggja ein líknandi toll á vørur úr Meksiko, skrivar hann í dagføring á Truth Social, har hann hevur viðfest eitt bræv til ES-nevndarforkvinnuna Ursula von der Leyen.

ES hevur annars roynt at fingið eina handilsavtalu við USA, áðrenn hægri tollurin, sum amerikanski forsetin boðaði frá í vár, kemur í gildi. Í løtuni stendur hann til at koma í gildi 1. august.

Hendan fráboðanin kemur stutt eftir, at hann hevur ásett toll á vørur úr fleiri øðrum londum.

Greinin varð fyrstu ferð løgd út 12. juli 2025

Sjóvinnu- og Mentanarhúsið í Sørvági fingið navnið “Messan”

Ian Nolsøe Joensen úr Miðvági vann navnakappingina – 126 uppskot komu inn

Vinningurin er ein málningur eftir Pól Skarðenni. Á myndini sæst Pól handa Iani Nolsøe Joensen málningin. Ian valdi myndaevnið: Jesus saman við mannafjøldini.

SkrivaÐ:

Alda Nielsdóttir

Navn skuldi finnast til nýggja sjóvinnusavninum og mentanarhúsinum í Sørvági, og tí varð navnakapping útskrivað í summar. Áhugin at senda uppskot inn var stórur, og tá freistin var úti 4. juli vóru heili 126 uppskot komin inn.

Vinnarin av navnakappingini var ungi miðvingurin Ian Nolsøe Joensen, sum átti uppskotið "Messan". Hetta uppskotið varð einmælt valt av nevndini, skrivar nevndin í tíðindaskrivi.

Grundgevingin til navnið er:

Sørvágur er gomul fiskivinnubygd. Orðið er gamalt, sum vit binda at sjónum og sjólívi. Messuprát har mannskapið hittist til prát og at skaffa. Í messuni er lív í. Har verða søgur sagdar og sangir sungnir. Messan samlar alla manningina. Høg sum lág. Orðið er lætt at benda. Hugsi um lýsingar til tiltøk í húsinum. Ung kenna ofta ikki til gomlu hugtøkini og orðini. Navnið MESSAN er við til at varðveita orðið millum manna. Húsið skal samla Vágar og Føroyar til tiltøk til álvara og gaman. VIT SAMLAST Í MESSUNI.

Vinningurin er ein málningur eftir Pól Skarðenni. Á myndini omanfyri sæst Pól handa Iani Nolsøe Joensen málningin. Ian valdi myndaevnið: Jesus saman við mannafjøldini.

Tað bleiv eisini trekt lut ímillum øll 126 innkomnu uppskotini, um fimm gávukort frá Vága Kajak. Vinnarnir her vóru Dánial Jacobsen, Eyðun Lamhauge, Páll Poulsen, Jón Johansen, og Mourits Mohr Joensen.

Greinin varð fyrstu ferð løgd út 13. juli 2025

Avtala um at gera Nýkaledónia til stat

Talan er um eina søguliga avtalu millum Frakland og franska oyggjalandið Nýkaledónia, sum tó framvegis skal góðkennast

Franski forsetin, Emmanuel Macron á fundi við fólkavaldum umboðum úr Nýkaledónia í París leygardagin (Mynd: EPA)

SkrivaÐ:

Alda Nielsdóttir

Frakland og franska oyggjalandið Nýkaledónia hava gjørt eina søguliga avtalu, sum inniber, at Nýkalidónia nú verður ein statur, samstundis sum økið verður verandi partur av franska ríkinum.

Nýkaledónia er eitt oyggjaland í Kyrrahavinum, sum liggur umleið 16.000 kilometrar frá franska meginlandinum.

Seinasta árið hevur ófriður verið í Nýkaledónia, har loysingarspurningurin hevur fylt nógv.

Sambært avtaluni skal staturin Nýkaledónia skal skrivast inn í fronsku grundlógina, og onnur lond skulu viðurkenna oyggjalandið sum ein stat, skrivar Ritzau.

Eisini framgongur í avtaluni, at ein nýggjur nýkeldoniskur ríkisborgaraskapur skal setast á stovn, og tað skal vera møguligt hjá borgarum í Nýkaledónia at hava hendan nýggja ríkisborgaraskapin umframt tann franska.

Avtalan skal samtykkjast av franska tjóðartinginum og til fólkaatvkøðu í Nýkaledonia.

Frakland varðveitir fýra málsøki - verja, gjaldoyra, trygd, og rættur. Tó kann Kongressin í Nýkaledónia kann tó avgera at yvirtaka eitt málsøki, um hetta verður samtykt av trimum fimtingum av Kongressini.

Greinin varð fyrstu ferð løgd út 13. juli 2025

Summar á Leynasandi

Vit hava havt framúr veður seinastu vikuna, og sunnudagin var fotografur okkara við myndatólinum á Leynasandi

Mynd: Jens Kr. Vang

SkrivaÐ:

Sverri Egholm

Sí allar myndirnar

(Mynd: Jens Kr. Vang)

(Mynd: Jens Kr. Vang)

(Mynd: Jens Kr. Vang)

Greinin varð fyrstu ferð løgd út 13. juli 2025

Bilur endaði á takinum

Sunnukvøldið var eitt ferðsluóhapp í Søldarfirði – Tvey fólk vórðu flutt á Landssjúkrahúsið, men staðfest varð, at tey ikki høvdu fingið stóran skaða

(Savnsmynd: Sverri Egholm)

SkrivaÐ:

Alda Nielsdóttir

Sunnukvøldið varð boðað frá einum ferðsluóhappi í Søldarfirði, har ein bilur endaði á takinum.

Tíbetur var lítil fólkaskaði, hóast bilurin fekk álvarsligan skaða, sigur vaktleiðarin á løgreglustøðini í Havn.

Tvey fólk vóru í bilinum, og tey vórðu send á Landssjúkrahúsið til kanningar, og tað vísti seg, at tey høvdu bara fingið nakrar snuddir.

Tað er ikki heilt greitt, hví óhappið hendi, men tað verður kannað nærri. Bilurin endaði onkursvegna í mótkoyrandi vegbreytini, rakti ein grótgarð, fór tvørturum eina innkoyring og rakti síðani ein annan grótgarð.

Førarin var edrúur, og hann sá heldur ikki út til at hava koyrt ov skjótt, leggur vaktleiðarin afturat.

Greinin varð fyrstu ferð løgd út 14. juli 2025

– Tollurin hjá Trump fær stórar avleiðingar fyri samhandilin

Tað sigur ES-handilskommisserurin, Maros Sefcovic sum er vónbrotin av ætlanunum hjá Donald Trump um at leggja ein toll á 30 prosent á ES-vørur

Maros Sefcovic, ES-handilskommisserur (Mynd: EPA)

SkrivaÐ:

Alda Nielsdóttir

Hægri tollurin á 30 prosent, sum eftir ætlan verður lagdur á ES-vørur frá 1. august fer at fáa stórar avleiðingar fyri samhandilin millum ES og USA, sigur ES-handilskommisserurin, Maros Sefcovic.

USA og ES samráðast í løtuni um eina handilsavtalu, men amerikanski forsetin, Donald Trump hótti herfyri við at leggja toll á 30 prosent á vørur, sum verða innfluttar til USA úr ES frá 1. august, um eingin avtala er gjørd.

Tað er tó málið hjá ES at fáa eina avtalu í lag, og hevur sambandið millum USA og ES uppiborið eina loysn, sigur Sefcovic.

– Eg fari at tosa við mínar amerikonsku samstarvsfelagar seinni í dag. Tí eg kann ikki ímynda mær at fara úr samráðingunum uttan at hava gjørt eina veruliga roynd.

Hann leggur afturat, at hann er vónbrotin av fráboðanini hjá amerikanska forsetanum um, at hann ætlar at leggja 30 prosent á ES-vørur.

– Eg hevði varhugan av, at vit vóru nær við at fáa eitt gott úrslit fyri báðar partar. Eg eri sjálvandi vónbrotin um fráboðanina, tí hon skapar ein nýggjan dynamikk.

Hann sigur, at ES skal vera fyrireikað til allar støður - eisini til at umhugsa hóskandi aftursvar, um hetta verður neyðugt.

Greinin varð fyrstu ferð løgd út 14. juli 2025

Trump á vitjan hjá Charles kongi 17. til 19. september

Trump vitjaði Elizabeth drotning í 2019, og í september vitjar hann Charles kong á Windsor-borgini

Charles kongur (tá prinsur), Elizabeth drotning, amerikanski forsetin Donald Trump, og amerikanska forsetafrúan Melania Trump í 2019 (Mynd: EPA)

SkrivaÐ:

Alda Nielsdóttir

Í døgunum 17. til 19. september vitjar amerikanski forsetin, Donald Trump í Stórabretlandi, har hann skal hitta Charles kong, upplýsir Buckingham Palace sambært fleiri tíðindastovum.

Bretsku kongshjúnini Charles kongur og Camilla drotning, taka ímóti amerikonsku forsetahjúnunum, Donald og Melaniu Trump á Windsor-borgini.

Tað var longu í februar, at Trump varð boðin at vitja kongin í Stórabretlandi. Hann fekk innbjóðingina í sambandi við vitjan hjá bretska forsætisráðharranum, Keir Starmer í Washington D.C.

Um innbjóðingina segði Trump, at tað var ein heiður at verða boðin á vitjan hjá kongi, sum hann segði seg hava gott samband við.

Undir sínum fyrra valskeiði sum forseti - í 2019 - vitjaði Trump mammu Charles kong, Elizabeth drotning. Tað er siðvenja, at amerikanskir forsetar, sum longu hava verið á statsvitjan hjá bretum undir teirra seinna valskeiði verða bodnir til ein meira óformellan miðmála á Windsor-borgini. Soleiðis var m.a. eisini við undanmonnunum hjá Trump, Barack Obama og George Bush.

Donald trump hevur eitt tætt samband við Stórabretland, av tí at mamma hansara er fødd í Skotlandi, har Trump eisini eigur eitt golffrítíðarstað.

Greinin varð fyrstu ferð løgd út 14. juli 2025

RSP endar summarið við einum braki

Norð festivalurin kunnger í dag RSP, sum veruliga skal seta lív í fjøldina

(Mynd: Sverri Egholm)

SkrivaÐ:

Sverri Egholm

Norð festivalurin kunnger eitt av stóru føroysku nøvnunum seinastu árini. Nevniliga RSP.

Teir tríggir rappararnir eru kendir fyri at festa lív í fjøldina, og tað fara teir at gera á Norð festivalinum leygardagin 30. august.

Fyriskipararnir boða frá í sama skrivi, at arbeitt verður í løtuni við møguleikanum at skaffa fleiri kampingpláss, sum annars øll hava verið útseld í rúma tíð.

(Savnsmynd: Jens Kr. Vang)

Greinin varð fyrstu ferð løgd út 14. juli 2025

Upptøkurnar til stóra Harry Potter-røð byrjaðar

HBO hevur lagt mynd av nýggja høvuðsleikaranum

(Mynd: HBO)

SkrivaÐ:

Sverri Egholm

Stroymingartænastan HBO hevur lagt mynd av nýggja Harry Potter - 11 ára gamla Dominic McLaughlin - í høvuðsleiklutinum í røðini, sum eftir ætlan skal verða frumsýnd í 2027.

Upptøkurnar eru byrjaðar í upptøkuhølum hjá Warner Bros í Leavesden norðanfyri London.

Umframt Dominic McLaughlin, verða Arabella Stanton og Alastair Stout í leiklutunum sum Hermione og Ron. Hetta varð kunngjørt í maimánað.

32.000 børn vóru til upptøkuroynd.

Ætlanin er at tær sjey Harry Potter-bøkurnar skulu vera ein sesong hvør. Hetta fer væntandi at taka 10 ár at framleiða.

(Mynd: HBO)

Greinin varð fyrstu ferð løgd út 14. juli 2025

Sirið Stenberg hitt Zelenskyj í Kyiv

Stríðið hjá Ukraina fyri rættinum at vera til er avgerandi fyri trygdina og støðufestið í Evropa. Tí fara vit í Føroyum enn meira miðvíst at raðfesta stuðul til Ukraina, sigur landsstýriskvinnan í uttanríkis- og vinnumálum

Ukrainski forsetin, Volodymyr Zelenskyj og Sirið Stenberg, landsstýriskvinna í uttanríkis- og vinnumálum (Mynd: Uttanríkis- og vinnumálaráðið)

SkrivaÐ:

Alda Nielsdóttir

Mánadagin frættist, at landsstýriskvinnan í uttanríkis- og vinnumálum, Sirið Stenberg hevði verið í Ukraina og hitt ukrainska forsetan, Volodymyr Zelenskyj saman við danska verjumálaráðharranum Troels Lund Poulsen, og Uttanríkis- og vinnumálaráðið hevur nú lagt myndir út frá vitjanini saman við einum tíðindaskrivi.

Uttanríkis- og vinnumálaráðið skrivar, at landsstýriskvinnan á ferðini hevði høvi at greiða Zelenskyj og ukrainska verjumálaráðharranum, Rusten Umerov, frá, at landsstýrið fer at fáa til vega játtan at lata Ukraina føroyskt framleiddar skjóttgangandi bátar og somuleiðis, at landsstýrið er sinnað at finna onnur samstarvsøki, har Føroyar kunnu hjálpa Ukraina við at verja seg móti støðugum álopum.

Sirið Stenberg sigur, sambært tíðindaskrivinum hjá Uttanríkis- og vinnumálaráðnum, at stríðið hjá Ukraina fyri rættinum at vera til avgerandi fyri trygdina og støðufestið í Evropa, og fara Føroyar tí enn meira miðvíst at raðfesta stuðul til Ukraina.

– Eftir at hava hitt umboð fyri stjórnina, vitjað vinnufyritøkur og heilsað upp ukrainskar hermenn, eri eg sannførd um, at føroysk fígging og førleikar hjá føroyskum fyritøkum kunnu gera veruligan mun, sigur hon.

Undir vitjanini í Kyiv hitti landsstýriskvinnan eisini Hermann Smetanin, ráðharra fyri strategiskan ídnað, og Oleksandr Kamyshin, forsetaráðgeva. Eisini varð steðgað á Frælsistorginum, har Sirið Stenberg vegna landsstýrið legði eitt silkiband í føroysku flagglitunum til minnis um tey falnu í krígnum, skrivar Uttanríkis- og vinnimálaráðið.

Niðanfyri eru nakrar myndir frá vitjanini hjá landsstýriskvinnuni, sum Uttanríkis- og vinnumálaráðið hevur lagt út:

Greinin varð fyrstu ferð løgd út 15. juli 2025

Fýra íbúðir byggjast í Klaksvík

Malltek fer at byggja íbúðir niðan Horn

Havast skal í huga, at talan er um skitsuuppskot, og tí koma møguligar reguleringar, tá ið myndugleikasettið verður framleitt og seinni góðkent

SkrivaÐ:

Sverri Egholm

Fýra nýggjar íbúðir verða bygdar niðan Horn. Klaksvíkar kommuna lýsti lendi til sølu í mai, og inn komu trý uppskot. Á seinasta býráðsfundi, sum var síðst í juni, samtykti eitt einmælt býráð at taka av tilboðnum frá Malltek.

Í lýsingini stóð, at tað var upp til tey bjóðandi at koma við skitsuuppskoti um, hvussu byggingin bleiv skipað, men við kravi um, at byggingin skuldi skipast sum íbúðabygging við 4 búeindum sambært byggisamtyktini.

Skitsuuppskotið frá Malltek varð væl lýst, og varð í einari heildarmeting mett best.

Byggingin er uppdeild í tveir bygningar, ið eru knýttir saman av eini trappugongd, sum gevur lívd og eitt rúm sum íbúgvarnar eru felags um.

Økið er umleið 630 m2 til støddar, og kostnaðurin fyri økið, sum verður selt til Malltek, er kr. 1.150 kr/m2, t.v.s. kr. 724.500,-. 

Væntandi verður matrikuleringin komin uppá pláss aftaná summarfrítíðina, so Malltek endaliga kann keypa lendið og fara undir verkætlanina.

Greinin varð fyrstu ferð løgd út 15. juli 2025

Trump: Vápn ávegis til Ukraina

Tað segði amerikanski forsetin eftir at hann mánadagin boðaði frá, at Nato fór at keypa amerikonsk vápn at lata Ukraina

Amerikanski forsetin, Donald Trump (Savnsmynd)

SkrivaÐ:

Alda Nielsdóttir

Vápn úr USA eru longu ávegis til Ukraina.

Tað segði amerikanski forsetin, Donald Trump við journalistar mikunáttina sambært Ritzau.

Tað var mánadagin, at Trump boðaði frá, at USA fór at senda vápn til verjusamgonguna Nato, sum keypir tey frá USA og síðani letur tey víðari til Ukraina at brúka í krígnum móti Russlandi.

Les eisini: USA letur vápn til Ukraina og hóttir Russland við tolli og revsitiltøkum

Avtalan snýr seg m.a. um amerikanskt framleiddar loftverjurakettir, men Trump greiddi í nátt ikki nærri frá, hvørji vápn talan var um, ella nær tey væmtaðust at koma til Ukraina.

Trump greiddi í nátt eisini frá, at hann ikki hevur tosað við russiska forsetan, Vladimir Putin, síðan hann á tíðindafundi mánadagin hótti Russland við at seta toll á russiskar vørur og seta fleiri revsitiltøk í verk, um Russland ikki gjørdi eina avtalu um vápnahvíld innan 50 dagar.

Trump segði, eftir at hava tosað við russiska forsetan fyrr í hesum mánaðinum, at hann var vónbrotin av samrøðuni.

Les eisini: Russiskt talsfólk: Hetta er álvarsamt

Greinin varð fyrstu ferð løgd út 16. juli 2025

Lena Anderssen á Summar Festivalin

Væl umtókta songkvinnan framførir á Summar Festivalinum í august

 

SkrivaÐ:

Tíðindaskriv

Lena Anderssen hevur konsert á Summar Festivalin í ár.

Dugnaliga songkvinnan hevur í meira enn 25 ár myndað føroyska tónleikapallin við framúr sangum og framførslum. Lena Anderssen hevur nakað upp á hjartað í sínum sangum, og hon torir at seta nakað persónligt upp á spæl, tá ið hon skrivar tekstir. Saman við manninum Niclasi Johannesen ger hon sangir, sum hann stendur fyri at framleiða, og meistarliga samstarvið hevur givið okkum fleiri poppútgávur á altjóða stigi – bæði tá ið tað kemur til sangskriving og framleiðslu.

Í fjør kom sætta útgávan hjá Lenu Anderssen, State of the Land, og talan var um stórverk, sum fekk bestu skoðsmál frá ummælarum. Eitt nú lat Sosialurin í ummæli seks av seks stjørnum.

Seinasta árið hevur Lena Anderssen – sum nakað nýtt – útgivið tveir sangir á føroyskum máli. "Dugir tú at tosa føroyskt" hevur verið stórt hitt, og herfyri kom sangurin "Við hetta borðið".

Lena Anderssen spælir saman við bólki á Summar Festivalinum, ið verður hildin dagarnar frá 7. til 9. august.

Summar Festivalurin

Greinin varð fyrstu ferð løgd út 17. juli 2025

Koronulonirnar settar til sølu

Lonirnar, sum tá vórðu róptar Koronudeildin, eru nú settar til sølu. Tær eru tíggju í tali

(Savnsmynd: Sverri Egholm)

SkrivaÐ:

Sverri Egholm

Vegna Landssjúkrahúsið verða tær tíggju lonirnar, ella barakkirnar, sum vóru settar upp í 2020.

Hetta varð kallað koronadeildin.

Tað er Landsverk, sum stendur fyri søluni.

Talan er um tíggju lonir við samanbindandi gongd. Allar átta songjarstovurnar fingu gjørt WC og gongd/slusu. Ein lon bleiv innrættað til starvsfólkahøli og ein til skolirúm.

(Mynd: Sverri Egholm)

Keyparin hevur sjálvur ábyrgd av at taka lonirnar burtur. Tær verða seldar samlaðaðar.

(Mynd: KvF)

Greinin varð fyrstu ferð løgd út 17. juli 2025

Julija Svyrydenko nýggjur forsætisráðharri í Ukraina

Ein meiriluti í ukrainska tjóðartinginum hevur tikið undir við, at hon avloysir Denys Sjmyhal sum forsætisráðharri í Ukraina

Julija Svyrydenko, nýggi forsætisráðharrin í Ukraina (Mynd: EPA)

SkrivaÐ:

Alda Nielsdóttir

Julija Svyrydenko er nú nýggjur forsætisráðharri í Ukraina, eftir at ein meiriluti í ukrainska tjóðartinginum hevur tikið undir við, at hon kann avloysa Denys Sjmyhal, sum herfyri legði frá sær eftir at hava sitið í sessinum síðan mars 2020.

Sambært ukrainskum tjóðartingslimum vóru 262 av 450 atkvøðum fyri, skrivar Ritzau.

Svyrydenko hevur eisini fingið stuðul frá forsetanum, Volodymyr Zelenskyj, sum herfyri boðaði frá, at hann ynskti nakrar útskiftingar í umsitingini.

Zelenskyj segði m.a., at hann saman við Svyrydenko hevur umrøtt ítøkilig tiltøk, sum skulu styrkja búskapin, víðka um stuðulstiltøk og økja um vápnaframleiðsluna í Ukraina.

Julija Svyrydenko er 39 ár og hevur síðan 2021 verið ráðharri í búskaparmálum, umframt at hon hevur verið ein av varaforsætisráðharrunum.

Greinin varð fyrstu ferð løgd út 17. juli 2025

Gandakent í Syðrugøtu

Hesar myndirnar vórðu tiknar áðrenn Beinir læt stóra pallin upp og setti gongd á hósdagin á G!

(Mynd: Sverri Egholm)

SkrivaÐ:

Sverri Egholm

Greinin varð fyrstu ferð løgd út 17. juli 2025

Seinasta paradís á jørð í 22 biografum í Avstralia

Føroyski filmurin fær góð ummæli. Spælifilmurin hjá Sakarisi Stóra verður eisini sýndur fríggjadagin klokkan 13 á G! festivalinum

 

SkrivaÐ:

Tíðindaskriv

Spælifilmurin hjá Sakarisi Stóra "Seinasta paradís á jørð" (The Last Paradise On Earth) er í løtuni at síggja í 22 biografum í Avstralia.

Filmurin er partur av Scandinavian Film Festival, sum sýnir norðurlendskar filmar í 22 biografum kring stóra landið “Down Under”. Higartil er filmurin í topp fimm av best umtóktu filmum og hevur fingið góða umrøðu í lokalu fjølmiðlunum.

Listin yvir biografar sum sýna filmin er her:

Greinin varð fyrstu ferð løgd út 17. juli 2025

Kvívíkar kommuna selur grundøki til bústaðarbygging í Leynum

Talan er um nýggju grundstykki, sum eru tilsamans 4.805 fermetrar, og sum verða seld undir einum

(Mynd: Kvívíkar kommuna)

SkrivaÐ:

Alda Nielsdóttir

Kvívíkar kommuna hevur sett níggju grundstykki í Leynum til sølu til bústaðarbygging.

Grundstykkini, sum eru tilsamans 4.805 fermetrar, eru í Ovara Gerði sum er bústaðarøki B í byggisamtyktini hjá kommununi, ætlað til sethús við í mesta lagi tveimum íbúðum, og – eftir serloyvi frá byggivaldinum – tvíhús, raðhús, ketuhús ella aðrar líknandi bústaðir fyri eitt húski, skrivar Kvívíkar kommuna.

Ognirnar verða seldar undir einum, og áhugaðir keyparar verða bidnir um at koma við uppskoti um, hvussu byggingin verður skipað, og nær bygging kann verða framd.

Tað er ein fyrimunur, um byggingin er fjølbroytt við ymiskum bústaðarstøddum, har atlit verður tikið til umhvørvið og góða útsýnið. Kommunan tilskilar sær rætt til at velja tað boðið, sum verður mett hóska best til tørvin og ætlanina fyri økið, skrivar kommunan.

Freistin at bjóða uppá grundstykkini er 22. september klokkan 12.

Greinin varð fyrstu ferð løgd út 17. juli 2025

Parkeringsóskil og pulvursløkkjari á G

Fleiri hava sett bilin keðiliga fyri, og nógv fólk ringja inn, tí tey ikki sleppa út, sigur løgreglan. Eitt mál um brot á skilhaldsreglur var eisini í sambandi við festivalin í gjár

(Mynd: Sverri Egholm)

SkrivaÐ:

Agnar Prestá

Sum heild var hósdagurin á G! friðarligur, og lagið var gott í Syðrugøtu og í økinum kring har. 

Løgreglan hevði tó tvey ting niðurskrivað í sambandi við stóra festivalin.

Vatktleiðarin á løgreglustøðini í Havn segði fríggjamorgunin, at eitt mál um brot á skilhaldsreglur var. Talan var tó sum so ikki um nakað álvarsligt.

Heldur var tað ein ungur maður, sum í ovfarakæti gekk runt við einum pulvursløkkjara.

- Hann varð tømdur á millum annað bilar. Tað skal man sjálvandi ikki gera, og viðkomandi fær eina bót fyri hetta.

- Fleiri sleppa ikki avstað aftur við bilinum

Júst bilar kunnu vera ein trupulleiki í sambandi við G!, um fólk ikki hugsa seg um. Vaktleiðarin staðfestir, at tað er heldur trongligt tætt við økið, og at nógvar fráboðnir eru komnar.

Nógv hava sett bilin keðiliga fyri - fólk ringja inn til løgregluna, tí tey sleppa ikki avstað aftur. Hetta er tí, at onkur annar hevur parkerað fyri tey.

- Fyri tað um tað er ein festivalur, noyðast fólk at hugsa seg um er áheitanin av løgreglustøðini í Havn.

Greinin varð fyrstu ferð løgd út 18. juli 2025

Helma á Sýnini nýggjur leiðari fyri Eldratilhaldið í Runavíkar kommunu

Hon byrjar í starvinum 1. august

 

SkrivaÐ:

Agnar Prestá

Runavíkar kommuna boðar frá, at nýggjur leiðari er settur fyri Eldratilhaldið í kommuni.

Talan er Helmu á Sýnini, sum er 57 ára gomul.

Helma hevur síðani 2018 havt egna fyritøku sum fótterapeut í Saltangará. Hon hevur harumframt drúgvar royndir innan bæði privata og almenna arbeiðsmarknaðin, skrivar Runavíkar kommuna á heimasíðuni.

Greinin varð fyrstu ferð løgd út 18. juli 2025