Søguliga stór Mikines gáva til Listasavnið

17 listaverk hjá kenda listamanninum Sámal Joensen-Mikines verða latin Listasavninum frá Birte Schultz-Lorentzen, privatum eigara í Danmark

Birte Schultz-Lorentzen var gift føroyskum manni, og livdi í næstan 50 ár saman við Joanesi Torkil Mortensen í Nærum norðan fyri Keypmannahavn. Tey vóru hugtikin av verkunum hjá Mikines

SkrivaÐ:

Tíðindaskriv

Tað er við stórari gleði, at Listasavn Føroya kann kunngera, at Listasavnið hevur móttikið eina søguliga gávu við Mikines-verkum. Listasavnið hevur fingið ikki færri enn 17 listaverk eftir føroyska listamannin Sámal Joensen-Mikines (1906-1979).

Verkini telja alt frá størri og smærri oljumálningum, grafikki, skitsum og akvarellum. Har ímillum eru vøkur høvuðsverk. Motivini variera millum føroysk og donsk landslagsmotiv, gransking av havinum, býarmyndir og harafturat kafémyndir.

Í desember 2021 tók Listasavn Føroya ímóti átta Mikines-málningum frá einum privatum eigara í Danmark, sum tá læt gávuna dulnevnt. Talan er um sama eigaran, sum nú gevur enn eina stóra gávu av verkum eftir Mikines. Vit eru fegin um at kunna fortelja, at gávugevarin er Birte Schultz-Lorentzen. 

Birte Schultz-Lorentzen var gift føroyskum manni, og livdi í næstan 50 ár saman við Joanesi Torkil Mortensen í Nærum norðan fyri Keypmannahavn. Torkil var føddur og uppvaksin í Føroyum, men fór til Danmarkar sum 16 ára gamal. Parið hevði tokka til myndlist og tónleik. Serliga var tað list eftir føroyska listamannin Sámal Joensen- Mikines, ið vakti stóran áhuga. Saman keyptu tey fleiri verk til heimið beinleiðis frá listamanninum Mikines. Næstan 40 Mikines-verk keyptu tey yvir árini – til eina listasamling, ið samlað taldi yvir hundrað myndir.

Í 1992 skipaði Birte fyri eini retrospektivari Mikines-framsýning í Den Frie Udstillingsbygningi í Keypmannahavn, og Mikines-verkini eru í fleiri førum lænt út til framsýningar; seinast í 2021 á Mikines-framsýningini á Johannes Larsen Museuminum í Kerteminde. Birte og Torkil vóru haraftrat við, tá Listasavn Føroya bleiv vígt í 1993, og tey høvdu ein virknan leiklut í minningarhaldinum á Mikinesar 100 áradegi í 2006, stutt áðrenn Torkil doyði.

- Listasavn Føroya móttekur hesa stóru og vøkru gávu við stórari eyðmýkt og virðing, og vit ynskja at takka Birte Schultz-Lorentzen fyri hesa sermerktu og ómetaligu gávu, ið nú verður ein partur av tí stóru føroysku listasamlingini á savninum. Hon verður til gagn og gleði fyri øll, ið hava áhuga í list í Føroyum. Gávan fer at verða sýnd á savninum einaferð á sumri 2024. Listasavnið hevur ætlanir um at hava almennar rundvísingar í listagoymsluni í nærmastu framtíð, har gávan verður víst fram til tey áhugaðu, sigur Karina Lykke Grand, stjóri.

Á heimasíðuni hjá Listasavninum eru fotografiskar eftirgerðir av listaverkunum, ið eru latin.

Greinin varð fyrstu ferð løgd út 23. november 2023

Løgmaður hitt indiska uttanríkisráðharran

Á fundinum umrøddu teir, hvussu Føroyar og India kunnu styrkja samstarvið, serliga innan fiskivinnu, alivinnu og KT, og indar vísa stóran áhuga fyri føroyskari fiski- og alivinnu

Løgmaður og indiski uttanríksimálaráðharrin dr. S. Jaishankar

SkrivaÐ:

Tíðindaskriv

Í hesi vikuni hevur løgmaður vitjað í India í sambandi við stóru ráðstevnuna India Nordic Baltic Business Conclave. Harumframt hevur løgmaður havt eina røð av fundum.

Týsdagin hevði løgmaður fund við indiska uttanríksimálaráðharran, dr. S. Jaishankar. Á fundinum umrøddu teir, hvussu Føroyar og India kunnu styrkja samstarvið, serliga innan fiskivinnu, alivinnu og KT. Indar vísa stóran áhuga fyri føroyskari fiski- og alivinnu, sum er millum tær fremstu í heiminum.

Mikudagin skuldi løgmaður hitta indiska handilsráðharran, Piyush Goyal, at umrøða hvussu Føroyar og India kunnu styrkja um handilssambondini. Fundur var eisini avtalaður við stjóran í indiska vinnuhúsinum.

– Ferðin er fyrsta stóra stigið á leiðini at knýta sambond og finna samstarvsmøguleikar saman við India. Hóast risavaksin munur er millum londini, eru greiðar samanrenningar innan økir sum fiskivinnu, alivinnu og KT. Indar vísa stóran áhuga fyri okkara vitan og kunnleika á hesum økjum, Aksel V. Johannesen, løgmaður.

Løgmaður var høvuðsrøðari á ráðstevnuni India Nordic Baltic Business Conclave  mikudagin. Luttakarar á ráðstevnuni eru politikarar, fyritøkur og vinnuumboð úr India, norðurlondum og baltisku londunum.

Samanlagt níggju umboð úr føroysku vinnuni vóru við á ferðini í India

Løgmansskrivstovan og Vinnuhúsið hava í felag lagt til rættis vinnuferðina. Umframt løgmann luttóku samanlagt níggju umboð úr føroysku vinnuni. Endamálið við vinnuferðini var at knýta sambond millum føroyskt og indiskt vinnulív, innan eitt nú fiskivinnu, alivinnu og KT.

Ferðalagið verður aftur í Føroyum í dag.

Greinin varð fyrstu ferð løgd út 21. november 2023

Bjarni Hammer hóttir samgonguna

Javnaðartingmaðurin vil ikki vera partur av samgonguni longur, um ein Suðuroyartunnilin ikki verður gjørdur nú

Bjarni Hammer, tingmaður fyri Javnaðarflokkin (Savnsmynd: Jens Kr. Vang)

SkrivaÐ:

Sverri Egholm

Bjarni Hammer hóttir nú við at fara úr samgonguni, um arbeiðið at gera tunnil til Suðuroyar ikki fer í gongd.

Dimmalætting skrivar, at javnaðartingmaðurin í løgtinginum í løgtinginum hevur gjørt greitt, at kemur Suðuroyartunnilin ikki, fer hann at blokerað øll onnur mál.

Ein nevnd er sett at fyrireika arbeiðið at gera Suðuroyartunnil, og tað ljóðar, at tað fyrireikingararbeiðið hjá nevndini er við at vera liðugt.

– Vit skulu hava Suðuroyartunnilin, ella vera onnur mál ikki framd, soleiðis er tað bara, segði Bjarni Hammer.

Greinin varð fyrstu ferð løgd út 22. november 2023

Løgmaður roynir at slætta sjógv

Ellivu minuttir av sonevndum "damage control"

 

SkrivaÐ:

Sverri Egholm

Tað gongur als ikki so illa hjá Javnaðarflokkinum og samgonguni, sum veljarin heldur. Í øllum førum ikki sambært løgmanni í nýggjari videoupptøku, sum Javnaðarflokkurin hevur lagt út í dag, nú tað skjótt fer at nærkast einum ári síðani val var.

- Kom innar í stovuna í ellivu minuttir og hoyr løgmann, Aksel V. Johannesen, greiða frá, hvat er hent síðani valið. 

Í ellivu minuttir situr løgmaður í einari fjálgari stovu og greiðir frá, hvussu væl tað faktiskt gongur og hvussu gott alt er. Hann siglir millum sker og brotasjógvar.

Evnini sum verða umrødd eru: Støðan í heiminum og støðan her heima, samstarv við Russland, verkfallið, javnari samfelag, skattalætti, lættari gerandisdag, bústaðir, veðurlagsátøk og orkuískoyti, og til síðst  Føroyar fyri øll.

Sí filmin her

Greinin varð fyrstu ferð løgd út 22. november 2023

Ætla at gera faktorhúsini til mentanardepil

Vestmanna bygdarráð hevur samtykt at selja faktorhúsini, pakkhúsið og hjallin til felag undir stovnan hjá Jonhardi Mikkelsen

(Mynd: ZETA arkitektar)

SkrivaÐ:

Sverri Egholm

Vestmanna bygdarráð samtykti einmælt á fundi tann 15. november at selja faktorhúsini, pakkhúsið og hjallin til felag undir stovnan hjá Jonhard Mikkelsen. Freistin at senda inn uppskot var 3. november. Nevnda felag sendi inn útgreinað uppskot.

Málið er at gera Fitjar til ein mentanardepil – ikki bara fyri vestmenningar, men ein, ið eigur megi at draga fólk til sín og savna fólk úr øllum heraðshornum.

Tað verður gjørt við áhugaverdum tiltøkum og góðum stuttfluttum mati í hesum serstakliga vakra og hugnaliga umhvørvi.

Skrivstova, fyrilestrarhøli og kaffistova
Faktorhúsini verða umvæld í samsvari við upprunaliga sniðið.

Í uppskotinum verður lagt upp til nakrar broytingar í innrættingini. Tað er umráðandi fyri ætlaðu nýtsluna og verður gjørt við virðing fyri søguliga virðinum og byggilistini í húsunum. Ætlanin er, at faktorhúsini skulu nýtast til skrivstovu, fyrilestrarhøli og kaffistovu.

(Mynd: ZETA arkitektar)

Fyrilestrarhøli
Eystara lonin er ætlað til kaffistovu og fyrilestrarhøli. Lagt verður upp til at gera nakrar broytingar í hesum partinum á húsunum soleiðis, at eitt stórt avlangt rúm fæst burturúr, sum er rúmligt og opið upp í tróður.

Rúmið verður innrættað við nýggjum sniðgivnum innbúgvi s.s. stólum og lampum, ið greidliga skilja seg frá dáminum á husunum annars.

(Mynd: ZETA arkitektar)

Kaffistova
Miðlonin í faktorhúsunum verður umvæld í samsvari við upprunaliga sniðið og nýggjur køkur og vesi gerast.

Miðlonin er, umframt at vera bindiliður millum lonirnar, eisini móttøka.

(Mynd: ZETA arkitektar)

Skrivstova
Vestara lonin í faktorhúsunum verður umvæld og innrættað sum skrivstova við plássi til 2-4 starvsfólk.

(Mynd: ZETA arkitektar)

Pakkhúsið verður gjørt til fyrilestrar og tiltøk
Pakkhúsið verður umvælt í samsvari við upprunaliga sniðið. Viðurin verður reinsaður, húsini bjálvað uttan, og flag lagt á tekjuna. Við hesum umvælingum fáa húsini bæði ein felags dám, og tá ið túnið er steinsett, og vøksturin kring húsini er komin fyri seg, verður staðið sjónligari sum ein søguligur býlingur í bygdini. Lagt  verður upp til at verandi innveggir og hæddarskilnaðurin verður tikin niður, so opið verður upp í tróður.

Ætlanin er, at pakkhúsið skal nýtast til fyrilestrar, skeiðvirksemi og onnur tiltøk, ið fólk kunnu leiga húsið til. Suðureftir er ætlanin at gera 3 stór vindeygu, sum líkjast opnum neystalúkum.

Á myndini er víst støða við skeiðsvirksemi í bygninginum

(Mynd: ZETA arkitektar)

Uppskotið er treytað av at loyvi fæst til neyðugu broytingarnar.

Greinin varð fyrstu ferð løgd út 18. november 2023

Flogfar hjá Royal Air Force í Vágum

Flogfarið hjá bretska flogvápninum hevur diplomatiskt loyvi at flúgva í føroyskum loftrúmi og at lenda í Føroyum

(Mynd: Jóanes Albert Nielsen, jn.fo)

SkrivaÐ:

Tíðindaskriv

Fyrrapartin leygardagin lendi eitt stórt flogfar hjá Royal Air Force, bretska flogvápninum, í Vágum.

RAF-flogfør hava verið í Føroyum nakrar ferðir seinnu árini.

Talan er um eitt Globemaster C-17A, ið gjørdi innflúgvingarroyndir.

Flogfarið hevur diplomatiskt loyvi at flúgva í føroyskum loftrúmi og at lenda í Føroyum, upplýsti Uttanríkis- og vinnumálaráðið.

Jóanis Albert Nielsen, jn.fo tók myndirnar

Greinin varð fyrstu ferð løgd út 18. november 2023

Hava innflutt fyri 8,7 milliardir krónur

Fyrstu níggju mánaðirnar av 2023 varð innflutt fyri seks prosent minni enn sama tíðarskeið í 2022, skrivar Hagstovan

(Savnsmynd: Hagstovan)

SkrivaÐ:

Alda Nielsdóttir

Fyrstu níggju mánaðirnar av 2023 varð innflutt fyri 8,7 milliardir krónur, ið er seks prosent minni enn sama tíðarskeið í 2022. Um skip og flogfør ikki verða tald við, varð innflutt fyri 7,8 milliardir, ið er trý prosent minni enn sama tíðarskeið í 2022.

Størstu íkastini til minkingina koma frá minkandi innflutningsvirði av brennievni og skipum og flogførum, skrivar Hagstovan.

Oljuprísurin er lækkaður seinasta hálva árið, og hetta sæst eisini aftur í innflutninginum. Innflutningsvirðið av brennievni var 1,4 milliardir krónur fyrstu níggju mánaðirnar av hesum árinum, ið er 301,4 milliónir krónur - ella 17,7 prosent - lægri enn sama tíðarskeið í fjør.

Størsti vøksturin er í bólkinum "rávøra til fiskavirking" - fyri tað mesta feskur toskur og makrelur. Har er innflutt fyri 153,2 milliónir krónur meira, sum er ein vøkstur á 26,8 prosent.

Tað er eisini stórur vøkstur í innflutninginum av tilfari til hav- og landbúnaðin -fyri tað mesta alifóður. Har er innflutningsvirðið vaksið 148 milliónir krónur, ið svarar til 25 prosent.

Greinin varð fyrstu ferð løgd út 18. november 2023

Nýggj leiðsla hjá Leif Mohr

Leif Mohr og LM Electric leggja saman

Nýggja leiðslan hjá Leif Mohr. Frá vinstru Leivur Holm, forstjóri, Hjalmar Sjóvará fíggjarstjóri og Kenneth Johannesen, tekniskur stjóri. Aftanfyri á myndini sæst stovnarin av fyritøkuni Leif Mohr

SkrivaÐ:

Sverri Egholm

Á nevndarfundi hjá Leif Mohr mánadagin 20. november varð samtykt at leggja fyritøkurnar Leif Mohr og LM Electric saman. Samanlagda felagið fer framyvir at eita Leif Mohr.

Á nevndarfundinum varð samtykt at styrkja um leiðsluna hjá Leif Mohr við Hjalmari Sjóvará, sum verður fíggjarstjóri og Kenneth Johannesen, sum verður tekniskur stjóri. Leivur Holm verður framhaldandi forstjóri í fyritøkuni.

Hjalmar Sjóvará er útbúgvin cand. merc. og hevur verið fíggjarleiðari hjá Leif Mohr og LM  Electric í skjótt 30 ár.

Kenneth Johannesen er útbúgvin sum bæði elektrikari og sterkstreymsverkfrøðingur, og hevur verið tekniskur leiðari hjá LM Electric í skjótt 5 ár.

Leif Mohr er stórveitari til føroysku vinnuna við alskyns el-tøkniligum tólum, er størsta el-fyritøkan í landinum og hevur handil við el-lutum til vinnuna og heimið. Seinastu vørurnar, sum eru lagdar afturat eru hitapumpur og sólpanel.

Leif Mohr hevur sett sær fyri at ganga á odda í grønu elektrifiseringini av føroyska samfelagnum.

Harafturat hevur Leif Mohr styrkt um deildina, sum arbeiðir við stýringum og automatikki til vinnu og størri bygningar.

Samanleggingin verður liðugt gjøgnumførd í 2024.

Greinin varð fyrstu ferð løgd út 24. november 2023

BankNordik fær góða meting frá Moody’s

BankNordik hevur fingið uppaftur betri meting frá Moody's samanborið við metingina í 2022. Í fjør var metingin A2, meðan metingin nú er A1

(Savnsmynd)

SkrivaÐ:

Alda Nielsdóttir

Kredittmetingarfyritøkan Moody's daggførdi fyrr í vikuni sína kredittmeting av BankNordik.

Tá ið Moodys ger eina meting, verða ymisk øki í fyritøkuni mett, og í nýggjastu metingini varðveitir BankNordik eina góða meting á øllum økjum, og fær harumframt eina enn betri meting á innlánsøkinum – í 2022 var metingin A2, og nú er metingin A1, skrivar BankNordik í tíðindaskrivi.

Ítøkiliga merkir góða metingin, at BankNordik er ein haldgóður og tryggur peningastovnur við lágum váða og góðum útlitum, sigur bankin.

Tað var á vári í fjør, at Moody's aftur byrjaði at gera regluligar kredittmetingar av BankNordik. Metinginarnar verða gjørdar áleið eina ferð um árið.

Nógvir stórir íleggjarar, t.d. pensjónsfeløg, gera bert íløgur í fyritøkur, ið hava eina kredittmeting, og tí kann metingin frá Moody's vera við til at draga fleiri íleggjarar at BankNordik. Harumframt gevur kredittmetingin BankNordik møguleika fyri at fáa betri treytir, tá ið bankin skal taka lán ella útgeva lánsbrøv.

Greinin varð fyrstu ferð løgd út 20. november 2023

Gongubrúgv yvir høvuðsveg á Glyvrum

Heimistovubrúgvin skal leiða gangandi trygt yvir nýggja vegin

(Mynd: Tórbjørn Jacobsen)

SkrivaÐ:

Ingi Samuelsen

Helst er hetta fyrsta brúgv av sínum slag. Ein brúgv ætlað gangandi og kanska eisini súkklandi fyri at koma trygt yvir veg við nógvari ferðslu.

Brúgvin er sett upp oman á fjørðuvegin úr Rúnavík og inn á Glyvrar, sum verður gjørdur í løtuni.

Tórbjørn Jacobsen, borgarstjóri í Runavíkar kommunu legði hósdagin út myndirnar á Facebook-vanga sínum. Kallar hetta nýbrotið á Glyvrum fyri Heimistovubrúgvin.

Myndir: Tórbjørn Jacobsen 

Greinin varð fyrstu ferð løgd út 23. november 2023

RFF: Ikki koyra skít - eitt glas er eitt ov nógv

Ábendingar eru um, at tað er eitt sindur vanligari at koyra rúsaður, enn vit hava sæð seinnu árini, sigur Ráðið fyri Ferðslutrygd, sum saman við Trygd og Betri Trygging fer at hava eitt rúsátak, sum skal steðga rúskoyring – átakið heldur fram til nýggjárs, og løgreglan fer at gera rúskanningar, meðan átakið er

 

SkrivaÐ:

Alda Nielsdóttir

November er farin at halla og jólaborðhaldini byrja. Og tá eru tað mong, sum smakka sær á. Tí kemur Ráðið fyri Ferðslutrygd við einari áminning:

– Rúsur og ferðsla hoyra ikki saman. Lat tí bilin standa, um tú skal í jólaborðhald og ætlar at smakka tær á.

Í samstarvi við Trygd og Betri trygging fremur Ráðið fyri Ferðslutrygd rúsátak, sum skal fáa fólk at steðga á, hugsa seg um og steðga rúskoyring. Átakið heldur fram til nýggjárs og løgreglan ger rúskanningar, meðan átakið er.

– Ein skeiv avgerð í ferðsluni kann fáa ógvusligar avleiðingar fyri onnur enn teg. Tíverri eru ábendingar um, at tað er eitt sindur vanligari at koyra rúsaður, enn vit hava sæð seinnu árini. Ein mentan, sum mong hildu var ein farin tíð, tykist vera í vøkstri aftur. Og talið á teimum, sum verða tikin fyri rúskoyring, er vaksið nógv - serliga millum tey ungu.

Ung siga seg koyra hóast tey drekka
Í vár gjørdi Ráðið fyri Ferðslutrygd eina umfatandi spurnarkanning millum ung í Føroyum um teirra hugburð til rúskoyring, og ábendingar eru um, at hugburðurin er broyttur – í øllum førum í hesum aldursbólkinum, sigur Ráðið fyri Ferðslutrygd.

– Meðan vit áður hava sæð ein yvirskipaðan hugburð um, at rúskoyring ikki verður góðtikin í Føroyum, eru tey ungu í hesi kanningini ikki eins avgjørd.

– Orsøkirnar til at koyra rúsað/ur eru ymiskar. Onkur svarar, at tey fingu ikki fart og vildu bara sleppa heim. Onnur, at tey hugsaðu seg ikki um og fóru tí í bilin. Og summi eru farin ov skjótt í bilin aftur dagin eftir. Men tað sum gongur aftur hjá flestu teimum, sum siga at tey drekka og koyra er, at tey drekka eitt sindur, telja eindir, og meta um. Og tað kann skjótt blíva vandamikið.

Eitt glas er eitt ov nógv
– Við útsøgnini ’eitt glas er eitt ov nógv’ er boðskapurin, at tær nýtist ikki at rokna, telja, ella meta um. Antin koyrir tú, ella smakkar tú tær á. Ikki bæði. Og tað eru nógvar góðar loysnir til at taka eina betri og tryggari avgerð í ferðsluni. Avtala hvør koyrir heim, áðrenn tit fara í býin. Ring eftir einum hýruvogni. Gang. Tak bussin, sigur ráðið.

Ráðið fyri ferðslutrygd minnir eisini á, at har finnast uppskriftir til drykkir uttan alkohol, og eru tær at finna á heimasíðuni www.rff.fo.

Greinin varð fyrstu ferð løgd út 21. november 2023

Rættarskipanin í Føroyum verður raðfest hægri

Slakar níggju milliónir verða settar av til rættarskipanina í árunum 2024 til 2027. Danska stjórnin fer eisini at kanna hvussu KT–skipanin í Føroya Rætti verður lyft upp á sama stig sum tann danska

-Tað hevur alstóran stóran týdning, at nóg mikið av starvsfólki eru til arbeiðis í Føroya Rætti, um rættartrygdin skal vera í lagi. Tað sigur Anna Falkenberg millum annað í samband við nýggju semjuna

SkrivaÐ:

Tíðindaskriv

8,7 milliónir verða settar av til rættarskipanina í Føroyum í árunum 2024 til 2027 fyri millum annað at stytta um viðgerðartíðina í Føroya Rætti. Harumframt hevur danska stjórnin bundið seg til at gera eina kanning av, hvussu KT–skipanin í Føroya Rætti verður lyft upp á sama stig sum KT–skipanin, ið verður brúkt í
Danmark. Tað er úrslitið av samráðingunum, sum Anna Falkenberg hevur luttikið í sambandi viðlangtíðarfígging av rættarskipanini.

Talið av málum í Føroya Rætti hava verið vaksandi seinnu árini, og tí eru 3,2 milliónir settar av til setan av starvsfólkum. Eisini skulu pengar brúkast til at stigvíst taka av verandi KT-skipan.

Harumframt verður arbeitt við trygdini í sambandi við digitalum samskifti. Í tí sambandi skulu pengar setast av uttanu m semjuna um langtíðarfígging av rættarskipanini. 

- Tað hevur alstóran stóran týdning, at nóg mikið av starvsfólki eru til arbeiðis í Føroya Rætti, um rættartrygdin skal vera í lagi. Tí fegnist eg um, at Peter Hummelgaard, løgmálaráðharri, hevur lurtað eftir okkara ynskjum og raðfest at seta pengar av til fleiri starvsfólk, sigur Anna Falkenberg, fólkatingskvinna fyri
Sambandsflokkin.

Nýggj KT-skipan
Eitt av aðalmálunum hjá Annu Falkenberg hevur verið, at tænastustigið í rættarskipanini í Føroyum og í Danmark er á sama stigi.

Ein forðing fyri hesum hevur verið KT-skipanin, sum Føroyar Rættur brúkar, tí P-talið verður brúkt í Føroyumog CPR-nummarið í Danmark. Men nú verða ítøkilig stig tikin til at loysa málið, tí danska stjórnin fer kanna, hvat skal til fyri javnseta skipaninar.

- Hetta hevur verið eitt trupult mál. Stjórnin vildi, at ein kanning verður gjørd, áðrenn peningur verður settur av til økið. Tí er tað gott, at gongd er komið á málið. Umframt kanningina, er stjórnin sinnað at loysa málið, tá úrslitið av kanningini er greitt. Sjálvandi má tænastustigið í Føroya Rætti vera tað sama, sum í rættinum í Danmark. Einki annað kann góðtakast, sigur Anna Falkenberg.

Í avtaluni um fígging av dómstólunum næstu trý árini stendur, at danska stjórnin í seinasta lagi í 2025 skal vera liðug við eina kanning, sum fær greiðu á, hvussu KT -skipanin í rættinum í Føroyum og í Grønlandi fáast at virka á sama stigi sum í Danmark, og hvussu minretssag.dk kann setast í verk í Føroyum og í Grønlandi.

Tá kanningin er liðug, verður hon løgd fyri flokkarnar, ið hava gjørt avtaluna um fígging av dómstólunum við tí endamáli, at tænastustigið í Føroyum og í Grønlandi verður lyft uppá sama stig sum í Danmark.

Greinin varð fyrstu ferð løgd út 22. november 2023

Semja millum Fíggjarmálaráðið og Akademikarafelagið

Ein trý ára semja, ið byggir á ein samlaðan lønarvøkstur upp á 12,75 prosent

Páll Nolsøe, formaður, og Ruth Vang, landsstýriskvinna í fíggjarmálum (Mynd: Fmr.fo)

SkrivaÐ:

Sverri Egholm

Fíggjarmálaráðið og Akademikarafelagið skrivaðu í gjár undir semju um nýggjan sáttmála.

Talan er um ein trý ára sáttmála, ið byggir á ein samlaðan lønarvøkstur upp á 12,75 prosent.

Ymiskar nágreiningar og ábøtur eru somuleiðis gjørdar í sáttmálanum, eins og partarnir hava avtalað at arbeiða saman um nøkur viðurskifti í sáttmálaskeiðinum.

Greinin varð fyrstu ferð løgd út 24. november 2023

20 daga treytaða fongsulsrevsing fyri skammfaring av seyði

Hetta hevur Eystara Landsrættur staðfest eftir kæru. Maðurin var ákærdur fyri ikki at hava givið seyðunum nøktandi fóður og vatn. Hetta hevði millum annað við sær, at fýra seyðir vóru deyðir

Niðurstøðan hjá Føroya Rætti var, at maðurin ikki hevði ansað seyðin á nøktandi hátt, men rætturin metti ikki at talen var um skammfaring. Í Landsrættinum varð tó millum annað víst á, at vemburnar vóru tómar á deyðu seyðunum, og at tað var at meta sum skammfaring (Mynd: Sverri Egholm)

SkrivaÐ:

Agnar Prestá

Eystari Landsrættur viðgjørdi í síðstu viku eitt mál um brot á djóravælferðarlógina. Hetta var eftir, at tað hevði verið frammi í Føroya Rætti. Har varð tann, sum nú dømdur sekur í skammfaring, dømdur at rinda 10.000 krónur. Ákæruvaldið kærdi dómin og fekk viðhald: Talan var um tað, sum í djóraverndarlóggáva verður nevnt skammfaring. Hetta er grov vanrøkt, og dómurin er 20 daga treytað fongsulsrevsing.

Føroya Politi skrivar í tíðindaskrivi, at ein maður varð í málinum ákærdur fyri at hava - tilætlað ella við grovum ósketni - vanrøkt seyð undir viðurskiftum, sum vóru at meta sum skammfaring. Hetta hevur gingið fyri seg í Føroyum í einum eitt longri tíðarskeið og fram til 31. januar 2018.

- Maðurin var ákærdur fyri ikki at hava givið seyðunum nøktandi fóður og vatn, av tí at tað í fjósinum vóru funnir 50-60 seyðir, sum allir vóru rak ella kaldarak. Fýra seyðir vóru deyðir, og tveir av hesum høvdu ligið deyðir í fleiri samdøgur.

Niðurstøðan hjá Føroya Rætti var, at maðurin ikki hevði ansað seyðin á nøktandi hátt, men rætturin metti ikki at talen var um skammfaring. Tí varð bert talan um eina bótarsekt, sum var áljóðandi 10.000 krónur.

Ákæruvaldið kærdi tó dómin. Mett varð at maðurin skuldi dømast fyri skammfaring, og harvið við einari fongsulsrevsing.

Í dóminum frá Eystara Landsrætti er niðurstøðan, at í øllum førum fyri teir fýra seyðirnir, sum vóru funnir deyðir, var talan um skammfaring. Landsrætturin leggur dent á, at seyðirnir vóru kannaðir, og at kanningin vísti, at vemburnar vóru tómar. Landsrætturin staðfestir, at hetta er at meta sum skammfaring.

Av tí at landsrætturin broytti dómin soleiðis, at maðurin bleiv dømdur fyri skammfaring, bleiv revsingin broytt til 20 daga treytaða fongsulsrevsing, staðfestir Føroya Politi.

Greinin varð fyrstu ferð løgd út 23. november 2023

Kipsið er alt ov sterkt

Heilsufrøðiliga kallar Hot Chip Challenge aftur

 

SkrivaÐ:

Ingi Samuelsen

Heilsufrøðiliga starvsstovan ávaraði í vikuni móti einum sterkum kipsi, sum er selt í føroyskum handlum.

Vøran eitur Hot Chip Challenge, og verður nú kallað aftur at danska innflytaranum, DanKonfekt ApS. Orsøkin er, at innihaldið av capsaicin er sera høgt, tí tað er kryddað við einari av heimsins sterkastu kili.

Heilsufrøðiliga mælir til at burturbeina vøruna ella lata hana aftur til handilin, har hon er keypt.

“At eta sera sterkt kili ella kilivørur kann viðføra m.a. irritatión av slímhinnum, kvalma, spýggju og sera økt blóðtrýst, sum í ringasta føri kann vera lívshættiligt”, sigur Heilsufrøðiliga starvsstovan, og leggur afturat:

“Um barnið hjá tær hevur etið sterkt kili uttan at vísa tekin um eitran, er ongin orsøk til stúran. Um álvarsom tekin eru stutt eftir, at barnið hevur etið kilivøru sum Hot Chip Challenge, eigur ein at seta seg í samband við lækna.” 

Greinin varð fyrstu ferð løgd út 20. november 2023

Skúlin í Elduvík verður víðkaður

Gamli skúlabygningurin er ov trongur. Verður nú brúktur sum bygdasavn og savningarstað fyri tiltøk í bygdini

(Tekning: Runavíkar kommuna)

SkrivaÐ:

Ingi Samuelsen

Runavíkar kommuna fer nú undir umfatandi um- og útbygging av gamla bygdaskúlanum í Elduvík.

Runavíkar kommuna skrivar á heimasíðuni, at Tórbjørn Jacobsen, borgarstjóri, í vikuni hevur skrivað undir avtalu við felagið Spf. Holm Bygging um at standa fyri arbeiðinum, sum er mett at kosta slakar 1,3 milliónir krónur.

Arbeiðið byrjar sum skjótast, og væntandi stendur skúlin liðugur í mai ella juni mánaði.

Skúlin í Elduvík er frá 1887 og varð brúktur sum skúli “fram til okkara tíð”. Bygningurin hevur síðan, men eisini meðan hann var skúli, virkað sum savningarstaður fyri bygdafólkið og sum fundarstaður í táverandi Elduvíkar kommunu. Eftir at Elduvíkar og Runavíkar kommunur løgdu saman í 2005 hevur eisini onkur býráðsfundur verið hildin í lítla skúlanum.

Tað hevur leingi verið greitt, at ábøtur skulu gerast, um skúlin framhaldandi skal kunna brúkast til alskyns fundarvirksemi, bygdasavn og miðdepil í sambandi við at ferðafólkaskip vitja bygdina.

Peningur er settur av í ár, og ætlandi aftur næsta ár, soleiðis, at skúlin verður nútímansgjørdur innan, meðan útsjóndin uttan verður hin sama. Einar Toftegaard hevur teknað við tí í hyggju, at skúlastovan verður víðkað til ytstu mørk, og at ein tilbygningur í øðrvísi sniði, við gangi ímillum, verður bygdur uppat skúlanum. Neyðugir hentleikar – so sum nátthús og køkur – eru partar av umbótini, og ætlanin er at leggja flag á takið aftur, skrivar runavik.fo. 

(Mynd: Runavíkar kommuna)

Greinin varð fyrstu ferð løgd út 21. november 2023

Tórshavnar býráð samtykt fíggjarætlanina fyri næsta ár

Samlaðu inntøkurnar eru omanfyri 1,3 millardir

(Mynd: Tórshavnar kommuna)

SkrivaÐ:

Sverri Egholm

Skattaprosentið hjá Tórshavnar kommunu komandi ár verður tað sama sum í ár, 19 prosent. Barnafrádrátturin er eisini hin sami, 9.000 krónur.

Fíggjarætlanin hjá Tórshavnar kommunu fyri 2024 varð hósdagin endaliga samtykt á býráðsfundi.

Samlaðu inntøkurnar
Samlaðu inntøkurnar í fíggjarætlanini fyri 2024 eru mettar til 1.316 milliónir krónur í mun til 1.240 milliónir krónur í 2023. Hetta er ein vøkstur á 76 milliónir krónur ella 6,13 prosent.

Kommunuskatturin er mettur til 1.012 milliónir krónur. Tað er ein framskriving á 2,3 prosent í mun til mettu inntøkurnar fyri 2023.

Partafelagsskatturin í 2024 er mettur til 58 milliónir krónur.

Skattur frá eftirlønargjøldum er mettur at verða 209,7 milliónir krónur. Inntøkur í samband við DIS, FAS og frádráttir eru mettar til 35,7 milliónir krónur.

Útreiðslurnar
Rakstrarútreiðslurnar fyri Tórshavnar kommunu, uttan Tórshavnar havn, er 3,96 prosent. Raksturin av Tórshavnar havn er inntøkufíggjaður.

Samlaðu rakstrarútreiðslurnar hjá kommununi í fíggjarætlanini fyri 2024 fara úr 953,3 milliónum krónur uppí 995,8 milliónir krónur. Tað er ein vøkstur á 4,46 prosent í mun til fíggjarætlanina 2023.

Íløgurnar
Millum íløgurnar í Tórshavnar kommunu fyri 2024 eru útbygging av dagstovninum á Hamrinum á Argjum, hádeild í Sankta Frans Skúla, nýtt røktarheim, borgarahús í Kaldbak, útstykking oman fyri Argjahamar, innkoyringarvegurin, stórhøllin, langhylur og íløgur í orkupolitikk.

Samlaðu íløgurnar hjá Tórshavnar kommunu fyri 2024 verða 358,5 milliónir krónur.

Úrslit fyri 2024
Úrslitið hjá Tórshavnar kommunu, áðrenn rentur og avdráttir er 288 milliónir krónur. Úrslitið av rakstrinum er 231 milliónir krónur. Avlopið til skattafíggjaðar íløgur hjá Tórshavnar kommunu er 215 milliónir krónur.

Samtykt er, at innkomuvegurin verður fíggjaður við lántøku. Í fíggjarætlanini 2024 er hædd tikin fyri lántøku til innkomuvegin við 87 milliónum krónum.

Greinin varð fyrstu ferð løgd út 23. november 2023

Nýggjur sóknarprestur í Havn og í Nólsoy

Steintóra Gleðisheygg Joensen verður í morgin skipað í embætið sum nýggjur sóknarprestur í Suðurstreymoyar eystara prestagjaldi

Steintóra Gleðisheygg (Mynd: Jens Kr. Vang)

SkrivaÐ:

Sverri Egholm

Undir gudstænastuni í Havnar kirkju sunnudagin 26. november kl.11 skipar Uni Næs, dómpróstur, Steintóru Gleðisheygg Joensen í embætið sum nýggjur sóknarprestur í Suðurstreymoyar eystara prestagjaldi.

Umframt Havnar kirkju verður Steintóra eisini sóknarprestur í Nólsoyar kirkju.

Steintóra var prestvígd í 2021, tá ið hon gjørdist vikarur í Suðurstreymoyar vestara prestagjaldi í nakrar mánaðir. Síðani tá hevur hon verið virkandi sóknarprestur í Norðstreymoyar vestara prestagjaldi, nú sóknarprestarnir báðar tvær hava verið í hvør sínum barnsburðarfarloyvi.

Steintóra tók við embætinum 1. november.

Greinin varð fyrstu ferð løgd út 24. november 2023

Málningur av Jóhan Christiansen avdúkaður

Herfyri varð málningur hjá Livar Nysted av fyrrverandi borgarstjóranum í Eysturkommunu avdúkaður í býráðshúsinum í Norðragøtu

(Mynd: Eysturkommuna)

SkrivaÐ:

Alda Nielsdóttir

Undanfarna fríggjadag var lítil hátíðarløta í býráðshúsinum í Norðragøtu, tá ið málningur av fyrrverandi borgarstjóranum í Eysturkommunu, Jóhan Christiansen, var avdúkaður.

Tað var núverandi borgarstjóri, Per Martin Gregersen, saman við fyrrverandi borgarstjóranum, sum avdúkaðu málningin, ið nú er komin upp at hanga í býráðssalinum, skrivar Eysturkommuna.

(Mynd: Eysturkommuna)

Málningin hevur listamaðurin Livar Nysted málað.

Jóhan Christiansen var fyrsti borgarstjóri í nýggju samanløgdu kommununi, eftir at Gøtu kommuna og Leirvíkar kommuna vórðu lagdar saman tann 1. januar 2009, og blivu til Eysturkommunu. Hann var borgarstjóri í 12 ár.

Greinin varð fyrstu ferð løgd út 18. november 2023

Anna, Jóna, Jonhard og Sørin vórðu heiðrað

Hátíðarhald hevur verið í Norðragøtu, har Eysturkommuna heiðraði fýra starvsfólkum, sum nú eru farin frá fyri aldur

Mynd: Eysturkommuna

SkrivaÐ:

Agnar Prestá

Týsdagin var hátíðarløta í Víkingahúsinum í Norðragøtu, har Eysturkommuna heiðraði fýra starvsfólkum, sum nú eru farin frá fyri aldur. Tað skrivar eysturkommuna.fo.

Talan er um Onnu Djurhuus, Jónu Jacobsen, Jonhard Joensen og Sørin S. Djuurhus, ið hava havt ymisk størv í kommununi.

Borgarstjóri byrjaði við at siga nøkur orð og takkaði teimum øllum fyri drúgva tænastu, áðrenn Per Martin Gregersen handaði Onnu Djurhuus, Jónu Jacobsen og Jonhardi Joensen hvør sín vakran málning, sum Sámal Toftanes hevði málað av heimbygdunum hjá teimum. 

Myndir: Eysturkommuna

Eysturkommuna skrivar víðari, at Sørin S. Djuurhus fekk handað Dronningens Fortjensmedalje fyri trúfasta tænastu. Sørin hevur starvast innan tilbúgvingina hjá Eysturkommunu (og Gøtu Kommunu) í samfull 43 ár, harav 16 ár sum leiðari. 

Í grundgevingini frá Kongshúsinum varð sagt, at Sørin hevur verið við til at hildið ein høgan standard, bæði fakliga og persónliga. Hetta hevur gjørt sítt til, at arbeiðsumstøðurnar hava verið góðar og at eitt sera gott samanhald er millum starvsfólkini. 

Til ber at síggja fleiri myndir á eysturkommuna.fo

Greinin varð fyrstu ferð løgd út 23. november 2023

Nýtt spæl til føroyingar: Góðskutíð fyri familjuna

Nú kemur seinna spælið av "Góðskutíð" út. Hesaferð fyri familjuna

 

SkrivaÐ:

Sverri Egholm

Tey seinastu árini eru fleiri spøl á føroyskum komin á marknaðin.

Í 2021 kom føroyska spælið “Góðskutíð fyri pør”, sum gjørdist sera vælumtókt, og nú er eftirfylgjarin “Góðskutíð fyri Familjuna” komið í sølubúðirnar.

“Góðskutíð fyri familjuna” miðjar eftir at skapa hugnaløtur fyri alla familjuna, har øll samstundis kunnu læra hini enn betri at kenna.

Har eru spurningar sum knýta seg til her og nú, fortíð og framtíð, tvístøður, ærligir spurningar, sum ganga eitt sindur nær, og eisini hugnaligir og besnissaðir spurningar.

Hesir eru støði undir forvitnisligum, nærverandi og stuttligum løtum, sum binda familjuna saman.

Greinin varð fyrstu ferð løgd út 24. november 2023

Hvíldarheimið – enn ein krimi við Hannis Martinsson

Jógvan Isaksen hevur skrivað enn eina krimiskaldsøgu. Bæði Hannis Martinsson og William Hammer eru við

 

SkrivaÐ:

Tíðindaskriv

Hurðin út á gongina fór stillisliga upp, og hann hómaði umhvarvið av einum fólki. Hann lá uttan kodda á madrassuni og hevði tí ilt við at síggja, hvør ið tað var, sum vitjaði. Skuggin kom nærri og fjaldi samstundis náttlampuna við yvirkroppinum, so tað var ikki fyrr enn viðkomandi var heilt nær, at hann sá, at høvdið var ílatið brølapu. Tað vóru bara eyguni, sum ikki vóru fjald, og hann bar kenslu á tey. Alt í honum boðaði frá, at vandi var á ferð.

Hann ætlaði sær at rópa um hjálp, men keglið millum tenninar forðaði hesum. Tað kom bara veikt græl upp úr hálsinum. Hann rykti í reimarnar, men tær vóru óvikandi. Hann føldi, at hann bleiv stungin í albogaliðin, og stutt eftir gjørdist alt svart.

Hannis Martinsson er eftir skurðvigerð komin á Hvíldarheimið. Hann fær at vita, at ein maður, sum hevði samband við bumbuatsóknina móti løgtingshúsinum í septembur 1945, bleiv myrdur á stovninum stutt aftaná. Ein lívshættisligur leikur fer nú í gongd.

Hannis Martinsson hevur høvuðsleiklutin í Hvíldarheimið, men William Hammer ger eisini vart við seg.

Greinin varð fyrstu ferð løgd út 23. november 2023

Heitt danskt navn aftur á Voxbotn

Tobias Rahim hevði eina rimmar konsert í Vágsbotni í 2022, og nú kemur hann aftur

Tobias Rahim framførdi á Voxbotn í 2022 (Mynd: Jens Kr. Vang)

SkrivaÐ:

Sverri Egholm

Hann var á Voxbotn í 2022, og á Voxbotn í 2024 endurtekur tað seg.

Útseldar konsertir, ein hálv milliard av stroymingum á spotify, útvarpshitt omaná útvarpshitt: Danmark er av álvara fallið fyri Tobias Rahim og hansara forførandi teksti, rúsandi ljóði og fangandi visuella heimi. Tað eru vit í Føroyum eisini.

- Hesin hevur yvirtikið danska pallin á ein heilt serstakan hátt. Hann er sín egin, er óvanliga væl umtóktur í Danmark og tað er gravgangur eftir at fáa hann at spæla konsertir og - fyri fjepparar - at sleppa til hansara konsertir. Tí eru vit sera fegin um, at Tobias Rahim aftur verður við á Voxbotn 2024, skriva fyrireikararnir í tíðindaskrivi.

Háaktuelli og eitt hitt heitasta navnið í donskum popptónleiki hevur millum annað útgivið stórhittið ‘Stor Mand’, ‘Mucki Bar’ og ‘Flyvende Faduma’. 

- Hann er satt listafólk, ið skapar sítt heilt egna rúm, har hann spælir við erligar kenslur og marksøkjandi skaldskap við øsandi, men vøkrum útrykki. Talan er um eitt frírúm har tað er pláss fyri tabu, politiskum boðskapum, veitslu, skemti, sex og ólukkuligum kærleika – alt í einum. Tað vitna hansara sera vælumtóktu sangir eisini um. 

Voxbotn 2024 verður 29. juni.

Greinin varð fyrstu ferð løgd út 22. november 2023

Tvær ferðir Luihn við Havnará

Fyrstu ferð, at Astri og Maria sýna fram saman

Maria og Astri Luihn

SkrivaÐ:

Tíðindaskriv

Møðgurnar Astri og Maria Luihn seta dám á Gallarí Havnará fram til sunnudagin 3. desember.

Hetta er fyrstu ferð, at tær báðar stilla út saman. Meðan móðurin Astri er eitt av virknastu altjóða listafólkum, ið vit eiga, so er dóttirin Maria, eitt meira óskrivað blað.

Maria Luihn gjørdi fyrstu ferð vart við seg á Várframsýningini í Listaskálanum fyrr í ár. Hon teknar surrealistiskar tusjtekningar, akvarell og prent.

Eisini arbeiðir hon við list úr metalli og er útbúgvin gullsmiður.

Astri kenna vit øll fyri sínar eyðkendu málningar og myndprýðingar, men hesin møguleikin at síggja samspælið millum listina hjá Astri og listina hjá Mariu, er nýggjur.

Gallarí Havnará er gallarí í niðastu hædd av gomlu Tórs kafeteria, her kanst tú í leikandi ljóðinum av áartutli støðugt uppliva listaverk við okkara fremstu listafólkum og mest spennandi spírum.

Greinin varð fyrstu ferð løgd út 23. november 2023

Stórt bretskt forlag gevur bók eftir føroyskum granskara út

Elisabeth Holm, ph.d., frá Fróðskaparsetri Føroya, hevur skrivað um tilflyting, føroyskt sum annaðmál og fleirmæli

- Máltøka er altíð samansett og støðutreytað, og íløga í føroyskt sum annaðmál og annaðmálsundirvísing er alneyðug (Mynd: setur.fo)

SkrivaÐ:

Agnar Prestá

- At gera íløgur í føroyskt sum annaðmál er ikki bara umráðandi fyri máltøku hjá tilflytarum og eftirkomarum teirra, men er samstundis stimbrandi íløga í okkara móðurmál, lívsmáttin í tí og er til stórt gagn í víðari høpi samfelagsliga í Føroyum.

Tað sigur bókaaktuella Elisabeth Holm, ph.d. og samskipari á Góðskueindini á Fróðskaparsetri Føroya og útbúgvingarleiðari á parttíðarútbúgving á Føroyamálsdeildini í føroyskum sum øðrummáli.

Í 2021 fekk hon ph.d.-heiti, tá hon á Heriot-Watt University í Edinburgh vardi ph.d.-ritgerð sína, sum í stuttum snýr seg um tilflyting úr útheiminum til Føroya og føroyskt mál. Nú hevur Elisabeth Holm skrivað eina bók um líknandi evni, sum bretska forlagið Routledge gevur út í dag. Tað skrivart setur.fo.

Bókin ber heitið "Migration, Adult Learning and Multilingualism – Critical Sociolinguistics Research with New Speakers of Faroese", og hon byggir á granskingina, sum Elisabeth Holm gjørdi í ph.d.-ritgerðini.

Um bókina skrivar Fróðskaparsetrið, at tað er ein dagførd, tillagað og munandi stytt útgáva av ph.d.-ritgerðini, har tilflytarar av øðrum uppruna enn norðurlendskum, ið eru komnir til Føroya eftir aldarskiftið, eru í miðdepli.

Granskingin  er etnografisk og tí kvalitativ, og høvundurin kemur tætt at ymsum máltakarum, sum arbeiða á fiskavirkjum og í reingerðarstørvum í Føroyum, og fær innlit í bakgrund, lívskor og royndir teirra at navigera og finna seg til rættis í fleirmælta veruleika okkara í dag.

Í bókini verður serligur dentur lagdur á royndirnar hjá tilflytarum við at læra eitt fáment mál sum føroyskt, á ójavnbjóðis atgongd, møguleikar. Víst verður  millum annað á avmarkaðu møguleikarnar at læra mál á ófaklærdum starvsøkjum, og á tær forðingar, sum tilflytarar møta í royndini at finna arbeiði, ið samsvarar við teirra førleikar-

- Ein demokratiskur spurningur

Áhugin hjá Elisabeth Holm fyri hesum granskingarøkinum er - umframt vanligt granskaraforvitni - heftur at spurninginum um demokratiska inklusión av tilflytarum í Føroyum. Og so heldur hon, at granskingargrundað vitan er lykilin til at skapa menning.

- Fyri at skapa eitt samfelag, har allir borgarar í landinum hava somu demokratisku rættindi og atgongd til útbúgving, arbeiði og almennar tænastur, er neyðugt at hava holla vitan um og innlit í umstøður og avbjóðingar hjá borgarum í Føroyum, ið hava annan uppruna enn føroyskan. Tað gevur granskingin hjá mær eina støðulýsing av og eitt íkast til, sigur hon.

Altjóðagerðin og vaksandi tilflytingin til Føroya av fólki, ið kemur úr øllum heiminum, setur krøv til myndugleikar og skipanir í føroyska samfelagnum, herundir fólkaskúlan, málundirvísing fyri vaksnar tilflytarar og viðurskifti, ið kunnu fremja inklusjón á arbeiðsmarknaðinum.

- Máltøka er altíð samansett og støðutreytað, og íløga í føroyskt sum annaðmál og annaðmálsundirvísing er alneyðug. Ikki bert fyri trivnað og inklusjón av nýggjum borgarum, men eisini fyri, at føroyskt skal yvirliva sum mál, sigur Elisabeth Holm.

Greinin varð fyrstu ferð løgd út 23. november 2023

Nýggj bók um Opinberingina

Torbjørn Marstein hevur týtt bókina “Eg komi skjótt!” hjá amerikanaranum, Arno C. Gaebelein

 

SkrivaÐ:

Tíðindaskriv

“Eg komi skjótt!” er heitið á nýggjari bók, ið júst er givin út á forlagnum Leirkerinum. Bókin er um Opinbering Jóhannesar. Tað er amerikanarin, Arno C. Gaebelein, ið skrivaði bókina, og Torbjørn Marstein hevur týtt hana til føroyskt.

Arno C. Gaebelein var eldhugaður evangelistur og bíbliuútleggjari, sum kunngjørdi profetisku sannleikarnar í Bíbliuni og livdi dagliga í teirri vón, at teir fóru at ganga út. Mitt í dynjandi toruveðrinum í fyrra heimsbardaga eggjaði hann trúgvandi við hesi bókini til ikki at fella í fátt, tí royndirnar í hesum heimi fóru ein dag at lúta fyri sigri Kristusar.

Torbjørn Marstein hevur ein serligan tokka til Opinberingina, tí hetta er bókin, sum beinleiðis lovar signing yvir tey, sum hoyra og lesa hana. Torbjørn ímyndar sær ein ungan sum eldri føroying við blýanti í hond og við hesi bókini og opnari Bíbliu framman fyri sær fyri at skilja boðskapin um Jesus Kristus betur og betur, tí Hann sigur jú: „Eg komi skjótt!“

Um Harran afturkomu skrivaði Gaebelein:

„Harrin Jesus Kristus kemur aftur! Hann kann verða her hvørja løtu! Hann kann koma í dag! Hetta er ikki eitt býttisligt uppáhald, at Hann fer at koma í dag. Hetta er heldur ikki ein ásetan av eini ávísari tíð, at Hann skal koma, sum bæði hevði verið tápiligt og skeivt, hóast mong gera tað. Hetta er álvarsami veruleikin at fáa sálir at vakna úr sínum gáloysni og síni líkasælu og peika teimum á greiða vitnisburðin í sanna orði Guds, at Harrin Jesus kemur aftur og kann koma í dag.“

Greinin varð fyrstu ferð løgd út 20. november 2023

ST: Yvir 10.000 sivilfólk dripin í Ukraina

Hvussu nógv herfólk hava latið lív undir krígnum verður tó ikki almannakunngjørt, men mett verður at tað talið er munandi hægri

Gravir hjá ónevndum sivilfólkum í Mariupol (Mynd: EPA)

SkrivaÐ:

Alda Nielsdóttir

Yvir 10.000 sivilfólk eru dripin í Ukraina, síðan Russland gjørdi innrás í februar 2022, vísir ein uppgerð frá mannarættindaskrivstovuni hjá ST.

Veruliga talið verður tó mett at vera munandi hægri, men framvegis eru nógv andlát, sum ikki eru endiliga váttað, sigur ST, sum hevur fólk í Ukraina, ið eygleiða støðuna í fleiri pørtum av landinum.

Teir fyrstu mánaðirnar eftir at kríggið byrjaði, vóru m.a. harðir bardagar í býnum Mariupol, og har varð boðað frá, at nógv sivilfólk høvdu latið lív, men tað hevur tó enn ikki borið til at kanna hetta nærri og fáa talið endaliga váttað, skrivar Ritzau.

Mett verður, at munandi fleiri herfólk enn sivilfólk hava latið lív undir krígnum, men hvørki Russland ella Ukraina almannakunngera hesi tølini.

Í juni 2022 segði ukrainski forsetin, Volodymyr Zelenskyj tó, at Ukraina tá misti millum 60 og 100 herfólk um dagin.

Greinin varð fyrstu ferð løgd út 21. november 2023

“Løvens hule” leverar enn ein ministara

Vinnulívskvinnan Mia Wagner varð í vikuni innlima í donsku stjórnina, umboðandi flokkin Venstre

Mia Wagner (Mynd: DR)

SkrivaÐ:

Ingi Samuelsen

Danski vinstriflokkurin hevur enn einaferð verið ein túr í væl umtóktu sjónvarpssendingini “Løvens Hule” hjá Danmarks Radio fyri at heinta ein nýggjan ministara í stjórnina.

Fyri nøkrum árum síðani – í 2016 – var tað, tá Tommy Ahlers, varð valdur til útbúgvingar- og granskingarmálaráðharra.

Hósdagin var tað Mia Wagner, ið varð vald til nýggja ráðkvinnu fyri talgilding og javnstøðu.

Eftir at Jakob Ellemann herfyri valdi at taka seg aftur, bæði sum verjumálaráðharri og formaður í Venstre, hevur ligið í kortunum, at næstforkvinnan í flokkinum, Stephanie Lose, aftur skuldi gerast partur av donsku stjórnini.

Meðan Jakob Ellemann var sjúkrameldaður við strongd fyrr í ár, røkti hon starvið sum búskaparmálaráðkvinna, meðan Troels Lund Poulsen yvirtók verjumálaráðið.

Nú er formansskapurin í flokkinum komin upp á pláss, og tí var eisini greitt, at Troels Lund Poulsen aftur tekur verjumál og Stephanie Lose búskaparmál.

Men útskiftingin varð størri enn so. Og mest óvæntaða valið var, at Mia Wagner verður nýggj ráðkvinna við ábyrgd av talgilding og javnstøðu. Mia Wagner er kend vinnulívskvinna, og hevur staðið aftan fyri fyritøkurnar Freeway og Nordic Female Founders. Men mest er hon tó kend fyri sína luttøku í sjónvarpssendingini “Løvens hule”.

Hetta merkir eisini, at Marie Bjerre, sum hevur verið ráðkvinna fyri digitalisering og javnrætti, nú ikki longur er limur í donsku stjórnini.

Ein onnur, sum eisini var uppsøgd sum ministari í dag, er Louise Schack Elholm, ráðkvinna við kirkjumálum, útjaðaramenning og norðurlendskum samstarvi. Morten Dahlin avloysir hana.

Venstre er í stórari kreppu í løtuni. Nýggi formaðurin, Troels Lund Poulsen hevur stórar arbjóðingar við at vinna flokkinum álit aftur eftir at veljarakanningarnar hava verið beinleiðis vánaligar. Tí gittu eygleiðarar eisini, at kend fólk, men óroynd í politikki, kanska fóru at verða boðsend í sambandi við útskiftingina í stjórnini hesaferð. 

Greinin varð fyrstu ferð løgd út 23. november 2023

Rosalynn Carter deyð

Fyrrverandi forsetafrúan í USA, Rosalynn Carter andaðist sunnudagin, 96 ára gomul

Jimmy og Rosalynn Carter avmyndað 20. januar 1977 (Mynd: EPA)

SkrivaÐ:

Alda Nielsdóttir

Fyrrverandi forsetafrúan í USA, Rosalynn Carter, andaðist sunnudagin, 96 ára gomul, upplýsir Carter Center, sum hon rak saman við manni sínum, fyrrverandi forsetanum Jimmy Carter.

Hon fekk ein friðarligan enda, umgird av familjuni, skriva fleiri miðlar.

Í mai varð boðað frá, at hon hevði fingið staðfest demens, og fríggjadagin varð boðað frá, at hon fekk hospiceviðgerð, eins og maður hennara, 99 ára gamli Jimmy Carter, hevur fingið síðan februar.

Rosalynn og Jimmy Carter, ið bæði vóru fødd úr Plains í statinum Georgia vóru gift í 77 ár. Tey vóru forseti og forsetafrú í árunum 1977 til 1981. Parið stonvaði The Carter Center í 1982.

Greinin varð fyrstu ferð løgd út 20. november 2023

Whisky selt fyri 17,9 milliónir í London

Leygardagin varð ein fløska av Macallan whisky seld á uppboðssølu fyri 2,1 milliónir pund - 17,9 milliónir krónur

(Mynd: Getty Images)

SkrivaÐ:

Alda Nielsdóttir

Leygardagin varð nýtt met sett, tá ein fløska av Macallan whiskey frá 1926 varð seld á uppboðssølu fyri 2,1 milliónir pund ella 17,9 milliónir krónur.

Tað var auktiónshúsið Sotheby's í London, sum stóð fyri uppboðssøluni.

Talan var um eina sjáldsama whiskyfløsku, tí har vórðu bert framleiddar 40 av teimum, og tær vórðu ongantíð settar til sølu. Í staðin vórðu tær m.a. givnar í gávu av brennarínum.

Undan uppboðssøluni varð virðið á fløskuni mett at vera millum 750.00 og 2,1 milliónir pund (6,4 og 10,2 milliónir krónur).

Sambært bretskum miðlum er hetta tann dýrasta whiskyfløskan, sum nakrantíð er seld á uppboðssølu. Í 2019 varð ein fløska av sama slagi seld fyri 1,5 milliónir pund á Sotheby's. Ein upphædd, ið svarar til 12,8 milliónir í okkara krónum.

Greinin varð fyrstu ferð løgd út 20. november 2023

Hitamet í Brasil

Máldu 44,8 hitastig í býnum Araçuaí sunnudagin

Eisini í Rio de Janeiro hevur verið nógvur hiti seinastu dagarnar (Mynd: EPA)

SkrivaÐ:

Ingi Samuelsen

Í Brasil skrásettu tey farna vikuskiftið mesta hita í landinum nakrantíð. Tað hendi sunnudagin tá tey upplivdu 44,8 hitastig í býnum Araçuaí. Harvið var metið tikið, sum frammanundan var 44,7 stig, ið vórðu máld í 2005.

Tað upplýsir Inmet, sum er brasilska veðurstovan, sambært BBC.

Araçuaí er ein lítil býur, sum liggur í statinum Minas Gerais í landsynningspartinum av Brasil.

Partar av Brasil hava verið raktir av hitabylgju. Veðurfyribrigdið El Niño, saman við veðurlagsbroytingum, er orsøkin til óvanliga veðrið, tey uppliva í løtuni, skrivar BBC. 

Greinin varð fyrstu ferð løgd út 21. november 2023

Tennishúsið í Havn tikið í nýtslu

Ovast á breddanum hjá Havnar Tennisfelag seinastu árini hevur verið ynskið um eini felagshús, og herfyri vórðu húsini hjá felagnum tikin í nýtslu

(Mynd: Tórshavnar kommuna)

SkrivaÐ:

Alda Nielsdóttir

Farna fríggjadag vórðu húsini hjá Havnar Tennisfelag tikið í nýtslu.

Tennisfelagið varð upprunaliga stovnað í 1934, og er sostatt næstan 90 ára gamalt, men í longri tíðarskeið var einki virksemi, inntil felagið var endurreist í 1996. Ovast á breddanum seinastu árini hevur verið ynskið um eini felagshús og vøllir, ið hóska til nútíðina.

Í 2019 gjørdu Tórshavnar kommuna og Havnar Tennisfelag samstarvsavtalu um ábøtur, menning og rakstur av tennisanlegginum í Gundadali, og sama ár vórðu tennisbreytirnar endurnýggjaðar. Tvey ár seinni bleiv ein nýmótans ljósskipan sett upp.

Kommunan játtaði í fjør Tennisfelagnum stuðul til felagshúsini. Samlaði stuðulin var 364.000 krónur. Og í gjár vórðu húsini hjá Tennisfelagnum tikin í nýtslu.

(Mynd: Tórshavnar kommuna)

Heðin Mortensen, borgarstjóri, vísti í røðu sínari á, at limir í felagnum hava gjørt meginpartin av arbeiðinum sjálvi.

– Havnar Tennisfelag hevur gjørt eitt stórt sjálvboðið arbeiði við at gera húsið liðugt, og okkara vón er, at hetta fer at stimbra áhugan og gera umstøðurnar so nógv betri, at tað eisini fer at síggjast aftur í úrslitunum, segði hann.

Borgarstjórin takkaði fyri gott arbeiði og ynskti felagnum góða eydnu við húsunum, skrivar Tórshavnar kommuna.

Greinin varð fyrstu ferð løgd út 18. november 2023

Ein skúlasystir er farin

Minningarorð yvir Katina Nolsøe

 

SkrivaÐ:

Minningarorð / Árni Dahl

Týsdagin 21. nov. møtti eg Ingvør Nolsøe í miðbýnum, og hon bar mær tíðindini, at
systir hennara, Katrin, var deyð í Keypmannhavn dagin fyri.

Hetta vakti í mær mong minni.

Í august mánaði í 1953 fóru 91 næmingar í skúla í Klaksvík og vórðu skipaðir í
tríggjar flokkar.

Sjálvur kom eg at ganga í 1. c, har ið pápi var flokslærari.

Nær ið henda floksmyndin av okkum er tikin, veit eg ikki vist, men tað man vera í 2.
ella 3. flokki.

Sjálvur standi eg undir liðini á pápa. Í aftastu røð eru hinir dreingirnir: Hjørleif,
Jákup Petur, Idar, Jógvan Martin, Andrias og Petur Jacob, róptur Piddi.

Í miðraðnum standa genturnar: Birta, Svanna, Oddvør og dreingirnir Magni, Leivur,
Markus, Jógvan og Jógvan Martin (úr Haraldssundi).

Fremstar sita genturnar: Margreta, Sigga, Nicolina, Elinborg, Elsba, Eydna, Margit,
Katrin og Magna.

Skúlaskipanin var soleiðis tá, at eftir 5. flokk varð roynd hildin, og úrslitið av henni
gjørdi av, um vit sluppu í millumskúla. Tey, ið ikki stóðu royndina, fóru í 6. og 7.
flokk og so úr skúlanum. Hini hildu fram fýra ár í millumskúlanum og tóku
millumskúlaprógv. Sekstan av hesum árganginum (úr øllum trimum flokkunum)
hildu fram og tóku realprógv í 1963.

Eg minnist bara alt gott um mínar floksfelagar, og Katrin við sínum lætta lyndi
stendur altíð frammarlaga, tá ið eg minnist aftur á barna- og ungdómsár í Klaksvík.
Hon var elst av teimum níggju so fyrikomandi og skapandi børnunum hjá Lis og Eli
Nolsøe. Kvik og skjóttonkt, smílandi og blíðlynt.

Ja, tá ið eg um fjúrtan ára aldur fann fram á sjómansrímuna hjá Hans Andriasi, sum
byrjar við hesum ørindi:

“Katrin býr á strondini, og Katrin hon er fitt,
sunnukvøld í dansinum, eg havi hana hitt.
Katrin læar hjartaliga – dansar lætt av stað –
Katrin býr á strondini, og hon er altíð glað”.

undraðist eg stórliga á, hvussu skaldið mundi kenna henda floksfelaga mín úr
Víkunum.

Onkuntíð mintust vit aftur á tíðina, tá ið vit gingu til, og lestrarbørnini savnaðust
uppi við Spinnaríið, har ið vit spældu einkjumannamaka og onnur spøl, hesum líkt.

Ella tá ið vit dreingir fingu nýggjar súkklur og fóru í flokki út at reika. Tann, sum tá
fekk Katrina upp á viðførisberan, hann var ikki eingin maður.

Katrin kundi sum einki tikið realprógv, vildi hon tað, men hon gavst, tá ið hon hevði
staðið millumskúlaroyndina og vildi sleppa til Keypmannahavnar at royna seg. Óføra
fitt var hon í hondunum og fekk sær útbúgving sum klædnasniðgevi, giftist og setti
búgv uttarlaga á Eysturbrúgv.

Av tí at elsta systir mín, Tóra, búði ikki so langt frá Katrini, hendi tað seg, at vit
hittust av tilvild, og fyri einum tveimum árum síðani hittust vit i miðbýnum í Havn,
og vit buðu henni og tveimum systrum hennara á BRELL dagin eftir. Har fingu vit
eitt stuttligt prát.

Olivur og Elsa tóku í summar stig til, at vit – nú 70 ár vóru liðin, síðan vit fóru í skúla – skuldu hittast 1. august í ár.

Av teimum 91, sum gingu í hesum trimum flokkunum, eru fleiri farin foldum frá, og
onnur hildu seg ikki til at koma. Vit vóru 25, sum møttu.

Anfinnur Heinesen tók ímóti okkum í Varpinum og vísti okkum nýggja
mentanarhúsið í Klaksvík. Síðan varð farið við bussi niðan um býlingin á Uppsølum.
Har varð steðgað, og Andras Sólstein greiddi frá grevstrinum niðri á Toftum við
Borðoyavík og vísti okkum á allar nýggju útstykkingarnar, sum gjørdar eru, síðani vit gingu í barnaskúla.

Aftaná var hugnaligt borðhald í Gamla seglhúsi.

So sjúk Katrin var, vildi hon koma til hesa samkomuløtuna, og eins og vit øll hugnaði
hon sær væl.

Tá ið eg beyð Katrini farvæl, kysti eg hana á ennið.

Nú er hon farin, og vit minnast við takksemi eitt vakurt vinalag.

Árni Dahl

Greinin varð fyrstu ferð løgd út 22. november 2023

Peturi Baldvinsson til minnis

Farna vikuskiftið andaðist Petur Baldvinsson. Var nakar havnarmaður við stóra H, so var tað Petur

 

SkrivaÐ:

Minningarorð / Heðin Mortensen

Farna vikuskiftið andaðist Petur Baldvinsson. Var nakar havnarmaður við stóra H, so var tað Petur. Vit hava kenst at kalla alt lívið – serliga høvdu vit eftir skúlatíð í Kommunuskúlanum tætt tilknýti til B36-umhvørvið. Eg kom at kenna teir báðar Petur og Baldvin sera væl.

Petur var sonur Emely hjá Rasmus í Funningsstovu og Sigmund Baldvinsson úr Klaksvík, ið varð róptur Simbe. Petur lærdi til bakara hjá Andriasi í Køkubúðini og fekk seinni útbugving sum kondittari í Íslandi. Tað var øgiliga stuttligt at koma inn í Køkubúðina, har vit vinmennirnir ofta fingu “smagsprøvar” av wienarbreyðum og øðrum góðum.

Hann sigldi eina tíð og arbeiddi síðan bæði á bakarínum hjá Frans og seinni hjá Gunnleivi. Hóast vit lærdu og arbeiddu innan hvør sítt fak, so hittust vit regluliga, serliga innan ítrótt. Mann visti altíð, hvar Petur var, og vit hjálptist altíð at. Seinni arbeiddi hann í mong ár á vegadeildini hjá Tórshavnar kommunu. Har hava vit so havt regluligt samskifti.

Petur var framum alt ein fittur fýrur. Vit vóru nógv saman í ungdómslívinum í Havn. Hann var sera musikalskur og hevði ótrúliga góða sangrødd, dugdi eisini at herma eftir kendum sangarum. Tað var t.d. ein smáting at taka mikrofonina og syngja ein góðan hjá Elvis á pallinum í Tórshøll.

Petur var framúr fótbóltsleikari. Øgiliga kvikur. Hann spældi í álopinum hjá B36 líka frá dreingjaliðnum upp í fyrstu deild. Hann spældi fótbólt líka til ein knæskaði gjørdi, at hann ikki kundi spæla meir. Men tað forðaði honum ikki at stuðla B36, sum hann gekk uppí við lív og sál. Hann var við liðnum til allar dystir kring landið og hevði tað best, tá bæði B36 og Manchester United vunnu.

Petur var hendinga stuttligur, hevði sjáldsama góðan humoristiskan sans og dugdi væl at seta lív í. Hetta eru serliga góð evni at hava í einum stuðulsfelag, hetta at halda vilja og áræði uppi, hóast tað ikki altíð gongst so væl. Her hevði hann heilt serlig evni at vinda stuðlarnar uppá kók, nakað sum bæði fjepparar og leikarar settu prís uppá.

Onkur kallaði hann Føroya elsta tannáring, so nógvur futtur var í honum til dystirnar hjá B36. Hetta helt fram, líka til hann nýliga byrjaði at vikna. Petur átti trý børn, eina dóttir í Keypmannahavn og ein son og eina dóttir í Havn. Gud signið tykkum øll, ið syrgja. Vit lýsa frið yvir minnið um okkara góða vin, Petur Baldvinsson.

Heðin Mortensen
borgarstjóri

Greinin varð fyrstu ferð løgd út 23. november 2023

Elsbeth Mariu Petersen til minnis

Í vikuni andaðist góða vinkona og starvsfelagi okkara. Elsamaria var eitt lívsstykki

 

SkrivaÐ:

Minningarorð / Heðin Mortensen

Í vikuni andaðist góða vinkona og starvsfelagi okkara, Elsamaria Petersen. Elsamaria var eitt lívsstykki. Hon var stuttlig og hon var ein av teimum drúgvu í starvi hjá Tórshavnar kommunu – fekk heiðursløn frá drottningini fyri 40 ára trúgva tænastu og var í starvinum til hon var 70.

Hon kom upprunaliga av Økrum til Havnar sum 16 ára gomul í 1968. Hon búði hjá beiggjanum Jens Dimon í Sornhúsgøtu og fór so beint til arbeiðis á Bacalao at arbeiða saltfisk. Á Bacalao arbeiddi hon á tí strævnu turkivaktini, sum kundi skifta millum morgunvakt, kvøldvakt og náttarvakt. Arbeiðið var sera strævið og snúði seg mest um at stakka fisk á tremmur til turkingar.

Av Bacalao fór Elsamaria heim á Hafnia at arbeiða hjá Christian Restorff. Har gekk hon til handa, stákaðist í køkinum fyri tað mesta, men tók eisini eina hond í á gongini og við at servera. Hafnia var eitt av góðu matstøðunum tá sum nú. Næsta arbeiðsplássið var í Kiosk Centrum á Tinghúsvegnum. Har gekk øgiliga nógv fólk inn og út, nógv prát og gott høvi at práta við og at koma at kenna fólk.

Eina tíð arbeiddi hon í bókhaldinum hjá Valdemar Lützen, og haðani fór hon at arbeiða hjá Ólavi Mikkelsen sum setari á Fjúrtanda. Tað var, meðan hon arbeiddi har, at Tórshavnar Kommuna søkti eftir einum avloysara fyri Mildrid Dam sum skrivara hjá býarverkfrøðinginum. Poul Guttesen var býarverkfrøðingur og Karter Niclasen var skrivstovustjóri.

Elsamaria kom at arbeiða á Glade Hjørn. Hetta var eitt herligt stað við nógvum lívi. Øll ferðslan í býnum gekk um Glade Hjørn. Á horninum vóru Hansemann, Haasen og Hondarbeiðsbúðin - og beint yvir av var Kondittaríið. Skrivstovan var á aðru hædd og í erva var íbúð.

Hetta var alt fullkomiliga fremmant umhvørvi fyri Elsumariu. Men tað vóru nøkur ting sum gjørdu, at hon skjótt kendi seg heima. Til dømis arbeiddi Mattias Lassen úr Vági á skrivstovuni. Fyrsta morgunin, Elsamaria var til arbeiðis, stóð hon og gjørdi kaffi, tá Mattias gekk framvið henni, gløddi at hesi fremmandu gentuni og spurdi á klingandi suðriarmáli, hvør ert tú? Elsamaria helt hann ljóðaði so suðriskur, at hon kendi seg heima við brestin!

Elsamaria arbeidd millum nógvar menn. Millum teirra vóru Gunnar Hoydal, Vagnar Olsen, Leivur Johannesen, Jákup Joensen og Jákup Lutt. Serliga mintist Elsamaria, at Leivur - sum dugdi sera væl at herma og siga frá - mangan kundi bjarga degnum við góðum skemti. Jólafrokostarnir vóru tiltiknir stuttligir.

Uppgávan hjá Elsumariu var tá at skriva brøv, avgreiða og journalisera. Elsamaria skuldi bara vera avloysari í eitt ár. Tá dagurin nærkaðist, at hon skuldi pakka saman, kom Líggjas Joensen, sum var leiðari á roknskapardeildini, at spyrja, um hon kundi koma at arbeiða hjá honum. So Elsamaria fór ongantíð úr starvinum og tað eina árið bleiv skjótt til hálva øld.

At Elsamaria tókst við akkurát hetta arbeiðið í so mong ár er als ikki av tilvild kortini. Hon gjørdi nógv við at førleikamenna seg og tók nógv skeið á Kvøldskúlanum innan bókhald, roknskap, stenografi og føroyskt.

Eitt tað besta ítrivið var bindiklubburin. Børn og ommubørn átti hon, sum eru fødd og uppvaksin í Danmark, so tey sá hon oftast í feriutíð. Hon búði sum sagt fyrst í Sornhúsgøtu, flutti haðani í kjallaran hjá Dáva Samuelsen á Gripsvegnum, og búði seinni í Vallaratúni.

Hon flutti í Ranagøtu á Norðasta Horni, elskaði at búgva so nær náttúruni. At man ikki sá út á sjógv á Norðasta Horni gjørdi einki, tí sum hon tók til, so hevði hon sæð ovmikið av sjógvi á Økrum.

Elsamaria starvaðist hjá Tórshavnar kommunu frá 15. november 1973. Tað er hálv øld síðan. Hon var avbera fjølbroytt og røkti nógvar ymiskar uppgávur, var skrivari á teknisku deild, protokolførari, hevði roknskap, lønarflytingar, rættlestur, journalisering og so framvegis. Hon hevði altíð eitt opið sinni og var løtt at samstarva við.

Elsamaria var eitt avbera ábyrgdarfult, sera álítandi, vællýtt og stuttligt starvsfólk, sum altíð tordi at siga sína hugsan. Vit fara at minnast hana við sakni og drýpa høvur í sorg og samkenslu við tykkum, ið mist hava. Máttu tit funnið onkran ugga í, at vit øll inniliga syrgja við tykkum. 

Heðin Mortensen
borgarstjóri

Greinin varð fyrstu ferð løgd út 24. november 2023