Føroysku kvinnurnar vísa vegin – spældu ein branddyst

Hóast tapið móti Svøríki í kvøld (27-31), so var føroyski innsatsurin í kvøld avgjørt góðkendur

Føroyska verjan var krútsterk mikukvøldið, og Annika Fríheim Petersen stóð stinn í málinum (Mynd: Sverri Egholm)

SkrivaÐ:

Ingi Samuelsen

Hóast føroysku hondbóltskvinnurnar taptu í kvøld, so vóru tær kanska tær mest nøgdu eftir dystin í kvøld

Svøríki vann 31-27 – altso við fýra málum. Tað var rættiliga nógv minni enn tey flestu høvdu roknað við undan dystinum.

Føroyar hava nú eitt gott útgangsstøði undan spennandi dystinum í Hafnafirði móti Íslandi sunnudagin.

Súna Krossteig Hansen í gjøgnumbroti (Mynd: Sverri Egholm)

Tí tær vístu til tíðir stórt spæl í kvøld. Svensku stjørnurnar vóru stundum ráðaleysar móti teimum meira óroyndu og ókendu føroyingunum.

Nú er at vóna, at dysturin í kvøld ikki hevur tikið ov hart upp á føroysku leikararnar.  Tí tær bestu vóru hart koyrdar.

Jana Mittún, Elsa Egholm, Pernille Brandenburg, Turið Arge Samuelsen og Súna Krossteig Hansen spældu so gott sum allar 60 minuttirnar. Onkur teirra fekk als onga hvíld í dag.

Men tann besti spælarin á vøllinum í dag var ein føroyingur, sum ongantíð kom fram um miðlinjuna, men sat á beinkinum hvørja ferð Føroyar vóru í álopi.

Brynja Høj og Pernille Brandenborg vóru sannir skansar í føroysku miðverjuni (Mynd: Sverri Egholm)

Brynja Høj vísti heimsstøði

Brynja Høj spældi ein stórdyst í verjuni – ja, á heimsstøði. Uttan iva dagsins leikari. Tað var eina og aleina hennara heiður, at sviar hóast alt “bara” fingu 31 mál í kvøld.

Jana Mittún spældi eisini ein frálíkan dyst og gjørdist føroyskur toppskorari við 8 málum.

Mikudagur 3. apríl, Høllin á Hálsi, Tórshavn:
Føroyar - Svøríki 27-31 (11-14)

Dystargongdin:
05 min: 2-2
10 min: 4-5
15 min: 5-6
20 min: 7-9
25 min: 10-11
30 min: 11-14
35 min: 15-16
40 min: 17-19
45 min: 19-22
50 min: 21-23
55 min: 24-29
60 min: 27-23

Jana Mittún (Mynd: Sverri Egholm)

Føroyskir málskjúttar (27-31):
Jana Mittún 8 mál
Elsa Egholm 5 mál
Súna Krossteig Hansen 4 mál
Lív Sveinbjørnsdóttir Poulsen 3 mál
Anna Elisabeth Haldóttir Weyhe 3 mál
Turið Arge Samuelsen 1 mál
Bjørk Franksdóttir Joensen 1 mál
Rannvá Olsen 1 mál
Pernille Brandenborg 1 mál

Skoteffektvitetur: 27/44 = 61 prosent

Føroyskar bjargingar:
Annika Fríðheim Petersen 9
Rakul Wardum 1

Fleiri myndir frá dystinum her

Greinin varð fyrstu ferð løgd út 03. apríl 2024

Flúgvandi Jana var toppskjútti á Hálsi

Viborg-bakkurin gekk á odda í føroyska álopsspartinum, men fleiri bjóðaðu inn í søguliga góða úrslitinum móti Svøríki. Føroyska liðið brendi heldur illa í mun til at fáa stig

Jana Mittún spældi sín kanska besta A-landsdyst higartil. Hoyvíkskvinnan var sterk í verju og álopi og skeyt átta mál (Mynd: Sverri Egholm)

SkrivaÐ:

Agnar Prestá

Avrikið móti Svøríki var ógvuliga flott - um ikki tað besta hjá einum føroyskum kvinnulandsliði nakrantíð.

Svøríki er millum tey heilt sterku í hondbóltsheiminum. Liðið er endað í topp-fimm seinastu trý endaspølini og skal helst til OL í summar. 

Føroyar vilja til EM í desember, og møguleikin fyri at uppnáa eitt slíkt søguligt pláss hækkaði við lutfalsliga tepra tapinum.

Í Uppsala í oktober taptu Føroyar við 17 málum, har byrjanin annars var góð. Í 2017 og 2018 vóru tapini móti Svøríki á ávíkavist 18 og 19 mál. Hóast Svøríki mikukvøldið einki hevði at spæla fyri og manglaði onkrar spælarar, so er føroyska framgongdin til at fáa eyga á.

Ein sat við tí kensluni, at høvdu Føroyar havt uppaftur meira skerpni, so høvdu stig komið burtur úr dystinum. Hagtølini vísa, at Føroyar høvdu eins nógv skot sum Svøríki, men stengur, málverjar og annað vóru fleiri ferðir fyri.

Tað var ikki altíð lætt hjá Súnu Krossteig Hansen og hinum móti stóru sviunum, ið eisini sluppu at takkla hart - og í nøkrum førum ólógligt (Mynd: Sverri Egholm)

Elsa Egholm helt fram við sínum gjøgnumbrotum og skeyt fimm mál (Mynd: Sverri Egholm)

Tað eydnaðist tó sum heild hjá Janu Mittún. 20-ára gamli Viborg-spælarin varð toppskjútti í dystinum við átta málum. Súna Krossteig Hansen, eisini úr bestu donsku deildini, tók eisini heilt nógvar duellir, og góvu tær svium nógv høvuðbrýggj. Tær kunnu seta ferð á og kunnu nógv sjálvar eisini.

Elsa Egholm brendi nøkur skot á rað í 1. hálvleiki, men unga hoyvíkskvinnan helt á at fara ígjøgnum á høgra bakki. Elsa skoraði fimm mál og hevði eitt heilstoypt avrik á Hálsi. Vengurnir Lív Sveinbjørnsdóttir Poulsen og Anna Elisabeth Halsdóttir Weyhe skoraðu hvør síni trý mál - blaðunga Anna Elisabeth við trimum brotskøstum, sum hon kom inn at skjóta.

Tað sæst annars ikki heilt á hagtølunum, men verjuparturin var til tíðir frálíkur, og serliga Brynja Høj og Pernille Brandenborg í miðverjuni gjørdu lívið hart hjá Svøríki. Serliga Brynja skein við styrki og snildni. Neista-spælarin stjól millum annað fýra bóltar frá svium.

Støðan undan síðsta umfari: 
1. Svøríki 8 stig *
2. Ísland 6 stig
3. Føroyar 4 stig
4. Luksemborg 0 stig

Nummar 1 og 2 koma víðari til EM - fýra teir bestu trý'ararnir í undankappingini koma eisini við. Í løtuni eru Føroyar triðbest av teimum átta. 

Seinasti dystur í hesi undankappingini verður móti Íslandi  í morgin, sunnudagin 7. apríl klokkan 17 í Hafnafirði. Samstundis spæla Svøríki og Luksemburg í Umeå.

Tað snýr seg um at vera millum fýra teir bestu 3'ararnar í teimum 8 bólkunum. Hesi longini sleppa við til EM-kappingina í vetur saman við teimum, sum endaðu á 1. og 2. plássi.

Í roknistykkinum verða bert tald tey stigini, sum trýararnir hava fingið móti liðunum, ið enda nummar eitt og tvey. Í verandi løtu er tað bert Turkaland, sum hevur fingið eitt stig, øll hini standa við ongum stigi í løtuni.

Søðan  er henda:

1. Turkaland (1 stig) -18 mál
2. Portugal -26 mál
3. Føroyar -26 mál
4. Grikkaland -33 mál
5. Slovakia -41 mál
6. Litava -50 mál
7. Kosovo -55 mál
8. Italia -70 mál

Hetta merkir, at stig móti Íslandi í morgin, við ávísum fyrivarni, gevur atgongd til EM í vetur, og møguliga eisini, um Føroyar tapa við fáum málum. Men her eru nógvir faktorar, ið kunnu gera seg galdandi í roknskapinum.

Allir dystirnir í síðsta umfari verða spældir samstundis

Greinin varð fyrstu ferð løgd út 03. apríl 2024

Maria er við í Íslandi

Tað er framvegis ósannlíkt, at ungi bakspælarin spælir í avgerandi dystinum, men hon fekk gipsið av hósdagin og kastaði og loftaði nakað

Maria Pálsdóttir Nólsoy dagin eftir at hon breyt fingurin - í samtalu við Simon Olsen, hjálparvenjara. Hesar dagarnar verður hugt eftir støðuni (Mynd: Sverri Egholm)

SkrivaÐ:

Agnar Prestá

Nógv verður lagt fyri, og ein spælari við brotnum fingri var við í landsliðshópinum, sum fríggjamorgunin settist í flogfarið á veg til Íslands at spæla spennandi landsdyst.

Maria Pálsdóttir Nólsoy var óheppin til venjing 2. páskadag og fingurin varð lagdur í gips.

(Mynd: Sverri Egholm)

Hetta eigur at halda henni úti í fleiri vikur, men nú er greitt, at spælskiparin úr Neistanum í øllum førum er við á túrinum í Íslandi.

Til venjingina hósdagin, hevði 19-ára gamli bakspælarin fingið gipsið av og tape á fingrinum ístaðin. Hon royndi at kasta og lofta, og tað gekk fínt.

Maria Pálsdóttir Nólsoy í dystinum móti Luksemborg í síðsta mánaði. Møguliga verður hon á vøllinum sunnudagin (Savnsmynd: Sverri Egholm)

Tað er tó trupult at siga, um tað er gjørligt og skynsamt, at Maria Nólsoy kemur inn í ein avgerandi landsdyst við brotnum fingri. Til hesar dystirnar var ætlanin, at Maria skuldi hava ein rímiliga stóran leiklut í álopinum serliga.

Læknaliga toymið og øll rundanum hyggja uppá støðuna hesar dagarnar - sum nú er, er Maria við sum 17. spælari. Til ber at hava 16 spælarar á dómaraseðlanum

Natasja Hammer kom inn í hópin til dystin móti Svøríki, og hon verður eisini við í Íslandi.

Natasja Hammer er ein teimum mest skorandu spælarunum í SMS-deildini. Ungi bakkurin hevur áður roynt seg í íslendskum hondbólti, og havt heimavøll júst við Ásvellir - her í dystinum móti Svøríki mikukvøldið (Mynd: Sverri Egholm)

Greinin varð fyrstu ferð løgd út 05. apríl 2024

VÍF vann grundspælið hjá monnum

H71 tapti fyri Kyndli í síðsta umfarinum. Tó sleppa hoyvíkingar undan at spæla fjórðingsfinalur, eins og vestmenningar. Uppgerðirnar næsta vikuskifti eru: Kyndil - StÍF og Neistin - KÍF

VÍF vann á KÍF, meðan Kyndil hjálpti vestmenningum upp á 1. plássið. Kyndilsmenn endaðu nummar trý í grundspælinum og skulu royna at bjóða av um finalupláss (Savnsmynd: Andrei Antal)

SkrivaÐ:

Agnar Prestá

Páskaaftan vóru seinastu dystirnir í grundspælinum í fremstu hondbóltskappingunum á skránni.

Í SMS-deildini fyri var alt greitt áðrenn seinasta umfar, í mun til endaspælið. Kyndil vann grundspælið greitt, meðan Neistin hevði tryggjað sær 2. plássið. Hesi geva beinleiðis hálvfinalupláss.

StÍF tók 3. plássið mikukvøldið og sendi samstundis H71 niður á  4. plássið. VÍF og EB høvdu eisini fingið hvør sítt endaspælspláss. Í síðsta umfarinum vann júst VÍF stórt á EB - hjá StÍF og Neistan gjørdist talan um stórsigrar á ávíkavist Stjørnuni og VB, Kappingarnar hjá hesum báðum síðstnevndu feløgunum er av.

Úrslitið eftir 21 dysstir í grundspælinum gjørdist hetta:

Kyndi 39 stig
Neistin 32
StÍF 28
H71 25
VÍF 24
EB 11
Stjørnan 8
VB 1

Fjórðingsfinalurnar í SMS-deildini:
StÍF - EB
H71 - VÍF

Dystirnir verða spældir eftir landsliðssteðgin, sum hesa vikuni. Bert ein dystur er - Neistin og Kyndil koma inn til hálvfinalurnar, har tað er best av trimum.

Hjá monnum var alt annað enn fyrsta plássið avgjørt. Tað gevur ávísar fyrimunir, og hóast H71 lá á 1. plássinum undan umfarinum, so fór VÍF avstað við tí.

Hetta var tí at Kyndil vann spennandi dyst á H71, meðan VÍF vann meira greitt á KÍF.

Bæði VÍF og H71 fáa frí til fjórðingsfinalurnar hetta vikuskiftið. Her er lagt upp til spennandi dystir á Hálsi. Kyndil skal spæla móti StÍF, ið vann greitt á Team Klaksvík í síðsta umfari. Neistin og KÍF bresta saman í hinari 1/4-finalunum; eins og í steypahálvfinalunum. 

Úrslitið eftir 18 umfør í grundspælinum hjá monnunum gjørdist hetta: 

VÍF 28 stig, H71 26, Kyndil 23, Neistin 17, KÍF 13, StÍF 12, Team Klaksvík 7 stig.

Fjórðingsfinalurnar:

Sunnudagin kl. 15: Kyndil - StÍF í høllini á Hálsi
Sunnukvøldið kl. 19: Neistin - KÍF í høllini á Hálsi

Greinin varð fyrstu ferð løgd út 01. apríl 2024

European League: Óli og Hákun í fjórðingsfinalunum

Sävehof og Óli Mittún eru víðari eftir ógvuliga flottan sigur á Hannover-Burgdorf og skulu møta Jóhan á Plógv og Flensburg-Handewitt. Liðið hjá Hákuni West av Teigum, Fücshe Berlin, fær franska mótstøðu í fjórðingsfinaluni

Óli skoraði tvey mál og legði upp til eina rúgvu - millum annað nakrar flottar fríspælingar. 18-ára gamli hoyvíkingurin setti ferð á og trýst (Mynd: IK Sävehof)

SkrivaÐ:

Agnar Prestá

Tað var stórt kvøld fyri IK Sävehof og svenskan hondbólt, tá Óli Mittún og liðfelagarnir í vikuni sendu Bundesliga-felag heim við stórtapi. Sävehof tapti við fýra málum í Týsklandi, men týskvøldið endaði tað 34-25 til Sävehof.

Óli Mittún hevði stóran leiklut í álopsspælinum hjá Sävehof. Hann skoraði bara tvey mál, men legði upp til eina rúgvu - millum annað nakrar flottar fríspælingar. 18-ára gamli hoyvíkingurin setti ferð á og trýst á týska liðið. Hann dekkaði eisini á bakkinum í løtum.

Simon Möller i málinum var eisini øgiligur. Hannover hótti og tók samanløgdu leiðsluna, tá stórir tíggju minuttir vóru eftir. Teir í gulum og svørtum spældu tó bara ógvuliga flott, og vunnu at enda sannførandi.

Hetta var bert aðru ferð í søguni, at svenskt felag sendi týskt felag út úr evropeiskari kapping. Óli og teir skulu royna at gera tað sama í fjórðingsfinaluni: Har møta teir Flensburg-Handewitt, sum Jóhan á Plógv Hansen spælir fyri.

Fücshe Berlin vann 34-28 á heimavølli móti Kadetten Schaffhausen. Samanlagt var munurin tíggju mál.

Hákun West av Teigum, ið gjørdi fimm mál í Bundesliga-sigrinum um páskirnar, spældi ikki nakran leiklut í hesum dystinum. Í fjórðingsfinaluni skulu hoyvíkingurin og Fücshe spæla móti franska Nantes.

Fjórðngsfinalurnar í European Legue, ið er næststerkasta kappingin fyri lið hjá EHF, eru á skránni seinni í mánaðinum.

Greinin varð fyrstu ferð løgd út 02. apríl 2024

Bjarni á mánaðarliðnum í bestu norsku deildini

Kristiansand skal helst spæla niðurflytingardystir, og bakkurin av Skála verður allarhelst ikki í felagnum næsta ár. Helgi Hildarson Hoydal spælir møguliga eisini aðrastaðni næsta ár

Bjarni í Selvindi fer eftir øllum at døma at skifta felag - hann var ikki við til EM, men var við, seinast A-landsliðið savnaðist (Savnsmynd: Sverri Egholm)

SkrivaÐ:

Agnar Prestá

Mikudagin spældi Kristiansand heimadyst móti Sandnes í næstseinasta umfari í grundspælinum í bestu norsku hondbóltsdeildini.

Tað endaði við 28-28 javnleiki, og harvið er føroyingafelagið eitt stig aftan fyri Fjellhamar og Bækkelaget - sum eisini er føroyingafelag - í løtuni. Kristiansand er nummar 13. Neyðugt er enda nummar 11 fyri at vera heilt vísir í yvirlivingini.

Har er liðið hjá Kjartani Johansen í løtuni - Kjartan skoraði trý mál og legði upp til trý mál í 29-24 tapinum hjá Bækkelaget mikudagin. Bækkelaget kann sjálvt tryggja sær plássið endaligt við at fáa stig móti Bergen komandi mikukvøld. 

Kristiansand skal vinna torføra útidystin móti Drammen, og samstundis hava hjálp úr Bergen og Fjellhammer, har heimaliðini skulu vinna.

Helgi Hildarson Hoydal skoraði fimm mál fyri Kristiansand, og Bjarni í Selvindi fekk trý. Tróndur Mikkelsen er skaddur í løtuni, men verður helst tøkur um ein mánaða, tá Føroyar spæla HM play-off dystir móti Norðurmakedonia.

Heldi Hildarson Hoydal hevur spælt nógv seinastu mánaðirnar. 27-ára gamli strikuspælarin fer helst aðrastaðni at spæla eftir summarsteðgin (Savnsmynd: Sverri Egholm) 

Bjarni stóð seg so væl í mars, at bakkurin var á mánaðarliðnum fyri Rema 1000-deildina, har nógvir frálíkir hondbóltspælarar spæla.

32 mál í fýra dystum og harvið átta mál í miðal. Bjarni skoraði uppá 74 prosent av skotunum, og hevði hann harafturat 18 upplegg. 21-ára gamli skálamaðurin byrjaði mars við at skora 18 mál í einum dysti. 

Maðurin, ið snoddar til føroyska A-landsliðið, var besti vinstri bakkur næstbestu norsku deildini í síðsta mánaði (Mynd:handball.fo)

Bjarni í Selvindi kom til Kristiansand í fjør og hevur hann fingið størri og størri leiklut seinastu tíðina. Tað er tó lítið, ið bendir á, at bakkurin heldur fram - um so felagið heldur sær uppi ella ikki. Tað hevur Portalurin fingið upplýst. Tað er tó ógreitt, hvar Bjarni fer at spæla næsta ár.

Helgi Hildarson Hoydal hevur verið í norskum hondbólti leingi. Tað kann vera, at hoyvíkingurin á strikuni eisini spælir í Rema 1000-deildini næsta kappingarár, men tað verður helst ikki í Kristiansand.

Greinin varð fyrstu ferð løgd út 04. apríl 2024

Mikkel Hansen gevst at spæla hondbólt

Størsta navnið í donskum hondbólti og tríggjar ferðir heimsins besti spælari gevst

(Mynd: EPA)

SkrivaÐ:

Sverri Egholm

Stóri spælarin á danska landsliðnum seinastu nógvu árini, Mikkel Hansen, gevst at spæla hondbólt í summar. Tað kunngjørdi hann á tíðindafundi hjá Aalborg Håndbold mikudagin.

Nú 36 ára gamli Mikkel Hansen kom til Aalborg Håndbold at spæla á sumri 2022 eftir at hann í tíggju ár, frá 2012 til 2022, spældi við franska stórfelagnum, PSG.

Hann er tríggjar ferðir kosin heimsins besti hondbóltsspælari, og er størsta navnið í donskum hondbólti.

Seinasta tíðin hevur verið merkt av skaðum, og eisini hevur hann verið sjúkrameldaður av stress. Sáttmálin við Aalborg Håndbold er annars galdandi til og við næsta summar.

Mikkel Hansen hevur spælt 226 landsdystir fyri Danmark og skorað 1.350 mál í landsliðshøpi.

Mikkel Hansen sigur, at hann fegin vil við danska landsliðnum til OL í Paris í summar, og harvið verður tað endin á hansara yrkisleið sum hondbóltsspælari.

Mikkel Hansen í dysti móti Føroyum í 2018. Føroyski leikarin er Kjartan Johansen (Savnsmynd: Sverri Egholm)

Greinin varð fyrstu ferð løgd út 03. apríl 2024

Føroyameistararnir vendu 0-2 til 3-2

NSÍ gjørdi bart fyrstu tjúgu minuttirnar og burdi helst fingið stig í Klaksvík mánadagin, men Páll Klettskarð og Árni Frederiksberg vístu sín klassa. HB vann greitt á ÍF

Tað stóð nógv á hjá KÍ, men í 2. hálvleiki skoraðu teir í bláum tvær ferðir og tryggjaðu sær trý týdningarmikil stig (Mynd: Sverri Egholm)

SkrivaÐ:

Agnar Prestá

Spenningur var um, hvørt uppflytararnir NSÍ kundi bjóða føroyameistarunum KÍ av ella ikki, og eftir 19 minuttir var longu 0-2. Í 12. minutti beindi franski miðverjin, Cedric Yambere, bóltin í egið mál eftir vandamikið innlegg frá Peturi Knudsen, og sjey minuttir seinni setti Petur sjálvur bóltin í KÍ-málið.

Hetta var, eftir at KÍ misti bóltin í uppspælinum. Sum heild var hesin parturin ikki góður hjá teimum í bláum, og Ari í Haraldsstovu Petersen var ótryggur í málinum.

KÍ var álvarsliga kroyst nú, men Páll Andrasson Klettskarð minkaði um munin í 28. minutti. Áleyparin var á blettinum, eftir at Kristian Joensen hevði bjargað skotroynd væl, og so var 1-2.

Sí myndir frá dystinum

NSÍ átti at økt fyrsta korterið í 2. hálvleiki, tá Klæmint Andrasson Olsen hevði tveir risastórar møguleikar: Fyrst eftir frísparksinnlegg, har hann var púra fríur, og síðani eftir stórt verju- og málvejrumistøk, har skotið fór uppum.

Ístaðin javnaði KÍ. Páll var aftur til reiðar í 62 minuttir eftir frálíkt innlegg frá Patric Da Silva. Stútari og sætta málið hjá 33-ára gamla klaksvíkinginum í ár.

Fýra minuttir seinni var tað gamli NSÍ'arin, Árni Frederiksberg, ið snilt og væl sendi bóltin í málhornið eftir KÍ-spæl í høgru. 3-2, ið eisini gjørdist endaliga úrslitið, hóast KÍ heldur ikki var sannførandi seinna partin av 2. hálvleiki. Teir í bláum vóru tó sum heild meira hvassir, og fingu trý kærkomin stig.

KÍ - NSÍ 3-2 (1-2)
12' 0-1 Sjálvmál
19' 0-2 Petur Knudsen (Konrad Gustafsson)
28' 1-2 Páll A. Klettskarð (Dan í Soylu)
62' 2-2 Páll A. Klettskarð (Árni Frederiksberg)
66' 3-2 Árni Frederiksberg (Mads Boe Mikkelsen)

ÍF helt nullið í 40 minuttir í Gundadali. HB fekk tó hol á eftir gjøgnumbrot hjá Áka Samuelsen og fyrsta málinum hjá Mohammed Samba fyri felagið, og dysturin varð avgjørdur stutt eftir steðgin.

Hanus Sørensen, Sammy Skytte (fyrsta málið fyri HB) og Áki komu á máltalvuna, og HB aftur á sigurskós eftir tapið í Sarpugerði fyri landsliðssteðgin. HB hevur seks stig - ÍF hevur framvegis einki stig og einki mál.

HB - ÍF 4-0 (1-0)
42' 1-0 Mohamed Samba (Áki D. Samuelsen)
51' 2-0 Hanus Sørensen (Mohamed Samba)
57' 3-0 Sammy S. S. Skytte
62' 4-0 Áki D. Samuelsen (Hanus Sørensen)

Poul Kallsberg skoraði í Sarpugerði (Mynd: Sverri Egholm)

Víkingur og B36 avgreiddu uppgávurnar væl

B68 bjóðaði av í Sarpugerði í fyrra hálvleiki, har serliga ein møguleiki hjá Ragnari Samuelsen var stórur. Víkingur kundi tó eisini verið á odda - liðið hjá Jóhan Peturi Poulsen lá javnan framvið, men málleyst var í steðginum.

Víkingur koyrdi á frá byrjan av í 2. hálvleiki, og eftir ein stóran brendan málmøguleika beint frammanundan brast fyri nev hjá Finni Justinussen í 53. minutti. Royndi áleyparin var til reiðar, tá innskifti Bergur Gregersen legði væl innfyri úr vinstru.

Heimaliðið spældi ógvuliga væl, og í 67. minutti legði eyðsýndi Aron Jarnskor Ellingsgaard eina frálíka sending inn í B68-brotsteigin. Har var Poul Kallsberg komin upp á pláss, og ungi strandingurin sendi bóltin framvið Tórði Thomsen. 

2-0 og ov tung mótbrekka hjá Jákupi á Borg og hansara monnum. Fleiri ungir fingu víst seg væl fram í reyðum og svørtum, men veruligur spenningur kom ikki í dystin í Sarpugerði aftur. Ein uppiborin sigur til víkingarnar, sum hava skorað tvey mál í øllum trimum dystunum.

Sí myndir frá dystinum

Víkingur - B68 2-0 (0-0)
53' 1-0 Finnur Justinussen (Bergur Gregersen)
67' 2-0 Poul Kallsberg (Aron J. Ellingsgaard)

B36 greiddi sína skyldu á Skála. Bjarki Nielsen legði útiliðið á odda í 28. minutti, og beint fyri og beint eftir steðgin avgjørdi útiliðið so at siga uppgerðina - danirnir Zean Dalügge og Marius Kryger Lindh skoraðu hvør sítt mál: 3-0.

Norski miðverjin, Thomas Lillo, fekk tó sítt seinna gula kort stutt seinni. Harvið var Skála í yvirtali leingi. Portugisiski áleyparin Carlos Ferreira fekk eisini sítt fyrsta mál í Betrideildini í 79. minutti, men í yvirtíðini fekk Skála reytt kort, og Gutti Dahl-Olsen sítt fyrsta mál fyri B36.

Harvið endaði tað 1-4, og B36 er oddalið í Betrideildini eftir trý umfør.

Skála ÍF - B36 1-4 (0-2)
28' 0-1 Bjarki Nielsen (Marius K. Lindh)
44' 0-2 Zean P. Dalügge
47' 0-3 Marius K. Lindh
79' 1-3 Carlos de Sousa Ferreira
90+7' 1-4 Gutti Dahl-Olsen
Útvístir: Thomas Lillo (B36) Teitur Poulsen (Skála)

(Mynd: Sverri Egholm)

Dramatikkur á Dungasandi

Tá fimm minuttir vóru eftir í Sørvági týskvøldið, var 2-2 og tað kendist sum tað kundi koppa báðar vegir. Í roynd og veru sá EB/Streymur út til at hava eitt slag av yvirtakið í løtuni áðrenn - hóast 07 Vestur samanlagt hevði leikliga yvirvág.

So kom ein langur bóltur fram, ið heldur tilvildarliga varð snittaður móti EB/Streyma-málinum. Kevin Egell Johansen sá møguleikan, rann djúpt, tamdi bóltin og hann setti trygt bóltin framvið Jóannesi Davidsen til 3-2. Hetta var seinna málið hjá norska vongbakkinum í dystinum.

Kevin hevði javnað í 59. minutti, tá hann møtti einum hornasparki úr vinstru perfekt við høvdinum. Hetta var málið til 2-2. Fimm minuttir áðrenn hevði ungi høgri bakkurin hjá EB/Streymi, Bergur Poulsen, fyri aðru ferð í dystinum prikað ein leysan bólt í málið í samband við hornaspark.

EB/Streymur hevði flott vent dystinum, har 07 Vestur annars hevði verið omaná tað mesta av 1. hálvleiki. Sum seinni hálvleikur leið, lá tað kanska meira til gestirnar eisini, og um miðjan 2. hálvleik kom risa tvífaldur málmøguleiki. Sebastian John hevði tó frálíka duppultbjarging.

Útiliðið misti Filip Djordjevic beint eftir 2-1 málið, og fekk einki íktøkiligt burturúr dystinum. Nógv varð blakað fram í samband við fríspark í 89. minutti, men Boubacar Dabo blakaði bóltin burtur, og so fór 07 Vestur avstað. Danski áleyparin Emil Pedersen fekk bóltin til høgru á egnari hálvu, sá at málverjin var langt úti og royndi seg úr eini 55 metrum. Tað eydnaðist við snøggum skoti: Hann fekk hol á málskjótingina við framúr langskoti og tryggjaði endaliga 07 Vestur trý týðandi stig.

EB/Streymur hevur hinvegin bert eitt stig fyri tríggjar dystir.

Fyri fyrstu ferð síðani 2012 spældi Sonni Ragnar Nattestad aftur fyri 07 Vestur (Mynd: Sverri Egholm)

Fleiri myndir her

07Vestur - EB/Streymur 4-2 (1-1)
19' 1-0 Benjamin S. Braithwaite (Janus S. Samuelsen)
45+3' 1-1 Bergur Poulsen
54' 1-2 Bergur Poulsen
59' 2-2 Kevin E. Johnsen (Benjamin S. Braithwaite)
86' 3-2 Kevin E. Johnsen (Emil Pedersen)
89' 4-2 Emil Pedersen

Støðan eftir trý umfør
B36 9 stig
Víkingur 9 stig
KÍ 6 stig
HB 6 stig
07 Vestur 6 stig
NSÍ 3 stig
Skála 3 stig
EB/Streymur 1 stig
B68 1 stig
ÍF 0 stig

Komandi dystir:
Leygardagin kl. 17: Skála ÍF - KÍ
Sunnudagin kl. 15: B36 - 07Vestur
Sunnudagin kl. 15: ÍF - Víkingur
Sunnudagin kl. 15: NSÍ - EB/Streymur
Sunnudagin kl. 17: B68 - HB

Greinin varð fyrstu ferð løgd út 01. apríl 2024

Páll: - Landsliðið er farið fyri mítt viðkomandi

- Tað hugsi eg slett ikki um longur, sigur toppskjúttin í Betrideildini. Páll Klettskarð staðfestir, at avrikið móti NSÍ mánadagin als ikki var nakað signal til landsliðsvenjaratoymið, tí hann sær seg ikki sum tøkan

Páll Klettskarð var aftur avgerandi fyri KÍ 2. páskadag - áleyparin skoraði tvey mál móti NSÍ, og hevur nú sjey mál í fýra skrásettum dystum í ár (Mynd: Sverri Egholm)

SkrivaÐ:

Agnar Prestá

Eitt lítið smíl og nikk við høvdinum tá landsliðið verður nevnt og síðani ein greið og stutt staðfesting. Tað er ikki yndisevnið at tosa um hjá Pálli Klettskarð, men nú slær hann fast, at hetta er farið í verandi støðu.

Høvuðsvenjarin á A-landsliðnum, Håkan Ericson, segði eisini í samband við A-landsliðsúttøkuna í farna mánaði - har Páll Andrasson Klettskarð ikki var á listanum - at hann kendi seg sum ein papageyk, tá hann varð spurdur um tað. Tað var ein endurtøka, tí teir kenna dygdirnar hjá KÍ-áleyparanum, men bert ein veruligur boksspælari (9'ari) skal takast út, og har er Klæmint Andrasson Olsen, enn sum áður, frammanfyri í køini.

Stutt videobrot við Páll Klettskarð sæst her

Klæmint hevur eisini skorað metnógv mál á A-landsliðnum - saman við Rógva Jacobsen (10 mál). Tað er tó ikki so løgið, at spurningurin aftur og aftur stingur seg upp í samband við landsliðsúttøkur: Hví er Páll Klettskarð ikki við?

Tí hví kunnu Føroyar ikki hava tveir boksspælarar við - í øllum førum onkuntíð. Liðið hevur millum annað spælt við tveimum áleyparum nakrar ferðir bert seinasta árið, og tá Klæmint Olsen og Jóan Símun Edmundsson vórðu skiftir út í heimadystinum móti Moldova, og Føroyar manglaðu eitt mál, ja so vantaði okkurt í brotsteignum.

Avrikini hjá Pálli í Betrideildini og í fleiri evropeisku dystum vísa eisini, at hann kann gera nógv mál, vera avgerandi og arbeiða hart. Klaksvíkingurin hevur verið sterkur í nógv ár og hevur nú 189 landskappingarmál í Føroyum, og hevur millum annað eitt evropeiskt hattrik og eitt bólkaspælsmál á CV'num.

Tá so Páll Klettskarð mánadagin skoraði tvey rættilig áleyparamál móti NSÍ - tá KÍ veruliga tørvaði tað - tosaðu vit við KÍ-liðformannin á degnum. Hann er ikki nógv fyri at tosa um egið avrik, men meira um liðið, og í mun til landsliðið, var Páll Klettskarð greiður, tá Portalurin til seinast spurdi, um málini - nummar fimm og seks í Betrideildini 2024 - eisini vóru eitt signal til landsliðsvenjaratoymið. 

- Landsliðið er farið fyri mítt viðkomandi. Hetta hugsi eg als ikki um.

Tað hevur ikki verið nakað endaligt nei til landsliðið enn, men nú Páll Andrasson Klettskarð nærkast sínum 34-ára føðingardegi lýsir hann seg sum so ikki tøkan í verandi støðu.

Páll Andrasson Klettskarð til landsliðsvenjing í Moldova í fjør. Hetta er einastu ferð seinastu árini, at áleyparin er úttikin (Mynd: Sverri Egholm)

(Mynd: Sverri Egholm)

Hann tykist eisini at vera aftarliga í "álopskendu bíðrøðini" í hópinum, og hevur vegna støðuna ikki sjálvur landsliðið í hugaheiminum longur.

Tað er tí helst ógvuliga ósannlíkt, at toppskjúttin í Betrideildini verður aftur í landsliðstroyggjuni.

Páll Klettskarð varð tikin út í mars í fjør - fyri fyrstu ferð undir verandi landsliðstoymi. Tá fekk hann seinastu tólv minuttirnar, umframt yvirtíð, í Moldova. Tá vóru Føroyar undir stórum trýsti, og eru hetta einastu minuttirnir hjá Pálli á landsliðnum síðani mars 2017. Hann hevur 13 skrásettar A-landsdystir og einki mál.

Greinin varð fyrstu ferð løgd út 02. apríl 2024

Tvey pláss fram á styrkilistanum

Føroyska manslandsliðið í fótbólti er nummar 133 í heiminum – 47 í Evropa

Føroyska liðið, sum spældi 0-0 í Albania í november (Mynd: Sverri Egholm)

SkrivaÐ:

Ingi Samuelsen

Føroyar eru farnar tvey pláss upp á nýggjasta styrkilistanum hjá Fifa, sum varð kunngjørdur í dag.

Føroyska manslandsliðið liggur nú á einum plássi sum nummar 133 í heiminum. Á seinasta styrkilistanum frá februar lógu Føroyar á 135. plássi.

Føroyar liggja beint aftan fyri Gambia, Rwanda og Solomonoyggjar, men framman fyri Indonesia, Nikaragua og Lettland.

Føroyar eru nummar 47 av teimum 55 londunum, sum eru limir í evropeisku fótbóltssamgonguni, Uefa – sum sagt, beint omanfyri Lettlandi, men aftan fyri Kypros.

Seinastu úrslitini hjá føroyska landsliðnum er 0-0 javnleikurin á útivølli móti Albania í seinasta umfari av EM-undankappingini, og so tveir venjingardystir, 4-0 situr á Liktinstein og 0-2 tap móti Danmark.

Argentina er heimsins besta fótbóltstjóð í løtuni, framman fyri Frakland, Belgia og Ongland.

Danmark er besta Norðurland á einum 21. plássi, Svøríki er nummar 27, Noreg nr. 47, Finnland nr. 61 og Ísland nummar 72. 

Greinin varð fyrstu ferð løgd út 04. apríl 2024

Løgmanssteypið Soleiðis verður spælt í 1. umfari

Sjey dystir eru á skránni í fyrsta umfari í kappingini um Løgmanssteypið. Fýra dystir verða spældir mikudagin 24. apríl, meðan hinir tríggir eru á skránni flaggdagin, hósdagin 25. apríl

Heðin Arge og Albert Ellefsen stóðu fyri lutakastinum til 1. umfar í kappingini um Løgmanssteypið (Mynd: Hans Erik Danielsen)

SkrivaÐ:

Sverri Egholm

Týsdagin gjørdist greitt, hvussu spælast skal í fyrsta umfari í steypakappingini hjá monnum, sum er á skránni mikudagin 24. og hósdagin 25. apríl.

Tað var Albert Ellefsen, ið stóð fyri lutakastinum í Televarpinum, og fyrsta lið, sum kom úr bollanum var NSÍ, ið harvið fer beinleiðis víðari til fjórðingsfinalurnar.

Síðani varð trekt til dystirnar í fyrsta umfari, og nú er greitt, hvørjir dystir verða spældir 24. apríl, og hvørjir dystir verða spældir 25. apríl, sum er flaggdagin.

Mikudagin 24. apríl
FC Suðuroy – TB
KÍ – HB
B71 – AB
FC Hoyvík – Víkingur

Flaggdagin 25. apríl
EB/Streymur – 07 Vestur
B36 – Skála
B68 – ÍF

Hetta hevur samstundis við sær, at tillagingar eru gjørdar í landskappingini í bæði 1. deild og í Betrideildini.

Í 1. deild er dysturin millum FC Suðuroy og B71, sum skuldi vera sunnudagin 21. apríl, framskundaður til leygardagin 20. apríl.

Í Betrideldini verða dystirnir í 7. umfari 07 Vestur - HB, og Skála - B68, sum skuldu vera sunnudagin 28. apríl, fluttir til mánadagin 29. apríl, meðan dysturin millum EB/Streym og KÍ er fluttur til týsdagin 30. apríl.

Greinin varð fyrstu ferð løgd út 03. apríl 2024

Adrian og Mattias á vikuliðnum

Heilt gott umfar hjá føroyingunum í næstbestu donsku fótbóltsdeildini

Áðrenn landsliðssteðgin skoraði hann fimm mál í fýra dystum, og nú NordicBet deildin er tikin upp aftur, heldur Adrian Rúnason Justinussen fram at skora fyri Hillerød Fodbold

SkrivaÐ:

Agnar Prestá

2. páskadag skoraði Adrian Rúnason Justinussen tvey mál og legði upp til eitt í 4-0 sigri hjá Hillerød Fodbold á B93. Hann hevur nú sjey mál í fimm dystum í næstbestu donsku deildini. Hillerød er ovast í niðara endaspælinum

Mattias Lamhauge og Fredericia spæla í ovaru hálvu av endaspælinum, og týsdagin eydnaðist at fáa uppreisn eftir stóra steypatapið fyri Silkeborg. Sønderjyske legði seg á odda í Fredericia, men heimaliðið skoraði síðani trý mál og er nú á 3. plássi.

Føroyski landsliðsmálverjin hevði nakrar bjargingar og umráðandi atgerðir - millum annað var ein risastór bjarging frá Mattiasi.

Avrikini hava fingið føroyingarnir á vikuliðið, ið sæst niðanfyri.

Mattias er málverjin og Adrian vinstri vongur (Mynd: TV3 Sport)

Greinin varð fyrstu ferð løgd út 03. apríl 2024

Flott føroyskt avrik í fyrstu royndini

Kvinnulandsliðið tapti í gjárkvøldið 1-0 á útivølli móti besta liðnum í bólkinum, og Grikkaland skoraði við brotssparki

(Mynd: Maria Vergeti / FSF)

SkrivaÐ:

Agnar Prestá

Taptu 1-0 á útivølli móti besta liðnum í bólkinum, og Grikkaland skoraði við brotssparki.

Fyrsti dystur hjá føroysku fótbóltskvinnunum í C2 bólkinum í EM-undankappingini varð spældur á Kreta í gjárkvøldið.

Har tók Grikkaland ímóti - hægst styrkismetta liðið í bólkinum. Føroyar stríddust væl ímóti, men fingu tó ikki stig burturúr.

Heimaliðið hevði heldur torført við at skapa fyri steðgin móti vælskipaða føroyska liðnum, ið eisini hóttu nakrar ferðir hinvegin.

Grikkaland var tó omaná og avgjørdi dystin við brotssparki í 55. minutti. Hetta var einasta málið, ið fór inn hjá Valborg Østerø, sum fekk møguleikan í føroyska málinum. Samstundis eisini einasta málið í dystinum.

Føroyar royndu at bjóða av, men skulu so eftir stigum í Montenegro týsdagin 9. apríl kl. 15.30 í staðin.

1. umfar í EM-undankappingini
Grikkaland - Føroyar 1-0 (0-0)
55’ 1-0 Veatriki Sarri (br.)

Føroyar (3-4-3): Valborg Østerø - Sara Samson Lamhauge, Birita Ryan og Tórunn Højgaard Joensen - Jensa Tórolvsdóttir (83' Lea Lisberg), Sunniva Willemoes, Rúna Jacobsen (83' Sanna Svarvadal) og Ásla Johannesen (L) - Heidi Sevdal (59' Fridrikka Clementsen), Rebekka Benbakoura (59' Malena Olsen) og Eyðvør Klakstein.

Venjari: Signe Pries Andersen

(Mynd: Maria Vergeti / FSF)

(Mynd: Maria Vergeti / FSF)

Greinin varð fyrstu ferð løgd út 05. apríl 2024

U19: Fingu flottan javnleik móti vertunum í fyrra dystinum

Anna Carolina Brændstrup skoraði føroyska málið í 1-1 dystinum móti Turkalandi. Í dag spæla Føroyar móti Armenia

Anna Brændstrup gjørdi bart við góðum dribblingum og skoti. Hetta tryggjaði Føroyum eitt stig móti Turkalandi (Mynd: Fótbóltssamband Føroya)

SkrivaÐ:

Agnar Prestá

Føroysku U19-genturnar eru eitt av trimum liðum í EM-undankappingarbólki, sum er í Turkalandi í hesum døgum. Mikudagin spældu Føroyar fyrra dystin, sum var ímóti vertunum og favorittunum Turkalandi. 

Heimaliðið hevði eina leikliga yvirvág, og legði seg eisini á odda í 28. minutti. Hetta var eftir hornaspark. Føroyska liðið stríddist tó fyrimyndarliga væl og javnaði eisini fyri steðgin.

Tað var Anna Carolina Brændstrup úr danska HB Køge, sum skoraði 1-1 málið, og var hetta ógvuliga væl avgreitt frá henni.

Føroyar vunnu eftir høgt trýst eitt innkast á turkisku hálvuni, Astrid Mittfoss kastaði skjótt til Annu Brændstrup, sum við snildni og tøttum dribblingum gjørdist frí í brotsteignum. Tveir mótsspælarar vórðu settir av, áðrenn Anna kaldliga setti vinstra fótin á. Bólturin fór niður í longra málhornið.

1-1 gjørdist eisini úrslitið. Føroyar hildu fast og hóttu eisini eftir steðgin. 

Í dag spæla Føroyar seinna dystin í Antalya. Tað verður móti Armenia, klokkan 14 føroyska tíð.

U19-kvinnur, mikudagin 3. mars á Arsian Zeki Demirci Spor Kompleksi:
Turkaland - Føroyar 1-1 (1-1)

28' 1-0 Nihal Rarac
45' 1-1 Anna Brændstrup (Astrid Mittfoss)

Føroyar: 1. Gunnvá Lützen (L) - 2. Teresa Jacobsen, 4. Vár Johannesen, 5.Fríða Jakobsen, 6. Anna Katrina Mikkelsen (72' 9. Jórun Patawary), 7. Sólja Ernstsdóttir (72' 11. Lisa Haraldsen), 8. Rakul Sørensen (85' 14. Jonnhild á Sondum), 10. Anna Brændstrup, 15. Astrid Mittfoss (46' 13. Súsanna Godtfred), 16. Petra Hydal, 17. Jancy Mohr (63' 19. Natalia Olsen)

(Mynd: FSF)

Greinin varð fyrstu ferð løgd út 04. apríl 2024

- Hetta var heilt framúr

Venjarin hjá U19-landsliðnum við gentum, Pætur Smith Clementsen er sum vera man sera væl nøgdur við 1-1 javnleikin ímóti Turkalandi í EM-undankappingini

- Vit vistu, at mótstøðan fór at vera sterk, og soleiðis var eisini. Men vit høvdu fyrireikað okkum væl, og enn einaferð vístu okkara gentur, hvørjar fótbóltsdygdir búgva í teimum (Mynd: Fótbóltssamband Føroya)

SkrivaÐ:

Agnar Prestá

- Vit vistu, at mótstøðan fór at vera sterk, og soleiðis var eisini. Men vit høvdu fyrireikað okkum væl, og enn eina ferð vístu okkara gentur, hvørjar fótbóltsdygdir búgva í teimum. So hetta var ein heilt framúr byrjan upp á kappingina.

Tað sigur Pætur Smith Clementsen við heimasíðuna hjá FSF. Hann er tekniskur stjóri hjá FSF og venjari hjá U19-landsliðnum við gentum. Liðið megnaði mikudagin at spæla javnleik 1-1 í fyrsta dystinum í EM-undankappingini.

Kappingin er í Turkalandi, og tað var móti vertunum, at Føroyar fingu stigið

Turkaland kom á odda tá lítil hálvur tími var spældur, men beint fyri steðgin javnaði Anna Carolina Brændstrup fyri Føroyar. Fleiri mál komu ikki

– Sum heild eydnaðist tað mesta, ið vit høvdu avtalað framman undan, samstundis sum avrikið var heilt framúr gott. Nú ræður um at taka hetta við okkum til næsta dyst, tí tað er aftur ein stór uppgáva, sigur Pætur Smith Clementsen.

Annar dysturin í EM-undankappingina verður í dag kl. 14, tá føroyska liðið skal møta Armenia.

Hópurin (Mynd: FSF)

Greinin varð fyrstu ferð løgd út 04. apríl 2024

Eyðgerð avloysir Óluvu á landsliðnum

Signe Pries Andersen, venjari hjá kvinnulandsliðnum, hevur fingið tvey avboð til komandi EM-undankappingardystir á útivølli ímóti Grikkalandi og Montenegro

Eyðgerð Mikkelsen úr Víkingi her í dysti í gjár móti HB (Mynd: Sverri Egholm)

SkrivaÐ:

Sverri Egholm

Í gjár, 5. apríl, fór kvinnulandsliðið í fótbólti undir eina nýggja EM-undankapping. Føroyar eru í bólki C3, saman við Grikkalandi, Montenegro og Andorra.

Fyrsti dysturin í kappingini var í gjár á útivølli móti Grikkalandi, og týsdagin 9. apríl verður spælt úti móti Montenegro.

Tá føroyska ferðalagið fór av landinum, var tað uttan málverjan, Óluvu Allansdóttir Joensen og Margunn Lindholm úr KÍ. Báðar hava smávegis skaðar at dragast við, og eru tískil ikki tøkar til landsliðsfótbólt í næstum.

Í staðin hevur landsliðsvenjarin, Signe Pries Andersen sent boð eftir málverjanum úr Víkingi, Eyðgerð Mikkelsen, ið higartil er skrásett fyri ein A-landsdyst fyri Føroyar.

Hópurin
Valborg Østerø, B36 Tórshavn
Eyðgerð Mikkelsen, Víkingur
Ásla Johannesen, Piteå IF (Svøríki)
Rebekka Fjallsá Benbakoura, GPO Kastorias (Grikkaland)
Rúna Jacobsen, HB Tórshavn
Sunniva Willemoes, HB Tórshavn
Fridrikka Klementsen, HB Tórshavn
Malena Olsen, KÍ Klaksvík
Durita Hummeland, KÍ Klaksvík
Birita Ryan, KÍ Klaksvík
Tóra Mohr, KÍ Klaksvík
Tórunn Højgaard Joensen, KÍ Klaksvík
Eyðvør Klakstein, KÍ Klaksvík
Sanna Svarvadal, KÍ Klaksvík
Sara Samson Laumhauge, NSÍ Runavík
Heidi Sevdal, NSÍ Runavík
Lea Símunardóttir Lisberg, Víkingur
Mona Rasmusdóttir, Víkingur
Jensa Kannuberg Tórolvsdóttir, Víkingur

Dystaskráin
5. apríl Grikkaland – Føroyar
9. apríl Montenegro – Føroyar
31. mai Føroyar – Andorra
4. juni Føroyar – Grikkaland
12. juli Føroyar – Montenegro
16. juli Andorra – Føroyar

Komandi EM-undankapping fyri kvinnur verður spæld eftir einum kappingarleisti, ið ikki er royndur áður. Bara londini í deild A kunnu spæla seg beinleiðis í sjálvt endaspælið, meðan londini í deild B og C kunnu spæla seg til endaspælið umvegis tvey play-off umfør, sum verða í heyst.

Bólkavinnararnir og tríggir teir bestu 2’ararnir í deild C skulu tá spæla ímóti londunum, sum enda nummar trý og fýra í sínum bólkum í A-deildini. Vinnararnir fara víðari til 2. play-off umfar, har lið úr B-deildini bíða. Samanlagt sjey lond spæla seg í endaspælið umvegis play-off.

Sjálvt EM-endaspælið fyri kvinnur verður í Sveis frá 2. til 27. juli í 2025.

Greinin varð fyrstu ferð løgd út 31. mars 2024

Hoyvíkskvinnur vunnu fyrsta dystin í Betri deildini

FC Hoyvík vann 3-0 í fyrsta dystinum bestu deildini. Tað gjørdu hoyvíkskvinnur móti felagsliðnum í Suðuroynni

 

SkrivaÐ:

Sverri Egholm

Trý mál og trý stig. Tað er tað, sum kvinnurnar í FC Hoyvík høvdu við í skjáttuni aftur til Hoyvíkar við Smyrli mánakvøldið.

FC Hoyvík roynir seg á fyrsta sinni í bestu deildini við kvinnuliði, og fyrsti dysturin var móti TB/FCS/Royn annan páskadag. FC Hoyvík vann 3-0. Margreta Olsen skjeyt øll málini.

TB/FCS/Royn - FC Hoyvík 0-3 (0-2)
16' Margreta Lív Olsen (Mona Poulsen)
37' Margreta Lív Olsen (Tanja Andreasen
61' Margreta Lív Olsen (Sesilia Olssen)

Stórur rómur var í skiftirúminum eftir sigurin í Trongisvági  (Mynd: FC Hoyvík)

Filmur frá túrinum hjá hoyvíkskvinnum til Suðuroyar sæst her

Mikudagin 27. mars:
NSÍ - Skála ÍF 7-0 (3-0)
07' 1-0 Helga Mikkelsen (Jonnhild á Sondum)
24' 2-0 Heidi Sevdal (Sara Lamhauge)
35' 3-0 Heidi Sevdal
49' 4-0 Sjarlotta Joensen (Lena Olssen)
53' 5-0 Lena Olsen (Rúna Olsen)
59' 6-0 Lena Olsen (Sara Lamhauge)
93+' 7-0 Heidi Sevdal

Leygardagin 30. mars:
HB - Víkingur 0-2 (0-0)
71' 0-1 Kára Jarnskor
84' 0-2 Hanna Højgaard (Jensa Tórolvsdóttir)

(Mynd: Sverri Egholm)

Sí myndir frá dystinum her

B36 - KÍ 1-2 (1-1)
17' 0-1 Malena Olsen (Tórunn Joensen)
35' 1-1 Brá Zakariasardóttir
56' 1-2 Malena Olsen (Sólja Ernstsdóttir)

(Mynd: Sverri Egholm)

Fleiri myndir her

Nú er landsliðsstøðgur til 13. apríl

Greinin varð fyrstu ferð løgd út 01. apríl 2024

Luitjen er føroyameistari

Fyri fyrstu ferð síðani 2013 eitur føroyameistarin í talvi annað enn Høgni, Rógvi ella Helgi

Juitjen Akselsson Apol (Mynd: Jóanis Albert Nielsen / jn.fo)

SkrivaÐ:

Sverri Egholm

Nú eitur føroyameistarin í talvi - júst sum miðskeiðis í 70-unum - Luitjen Apol. Men nú er tað ein annar Luitjen. 18 ára gamli abbasonur gamla føroyameistaran - sonur Katrina og Aksel V. Johannesen - ber nú arvin víðari.

Luitjen var flúgvandi í umdystinum páskaaftan. Hann vann bæði talvini móti Høgna Egilstoft Nielsen, og móti Rógva Egilstoft vann hann annað og telvaði hitt javnt. Bæði í avgerandi talvinum móti Høgna langa fríggjadag og aftur í umdystinum dagin eftir telvaði Luitjen sum ein brandur. Aftrat góða álopstevinum og evnunum at síggja og rokna væl í fløktum støðum, sást nú eisini ein fastleiki og tryggleiki í spælinum hjá honum, sum gjørdi munin. 

Frá vinstru: Høgni Egilstoft Nielsen, Luitjen Akselsson Apol og Rógvi Egilstoft

Tað hevur verið bíðað eftir hesum í nøkur ár. Longu í 2020 var Luitjen í FM-umdysti - bara 14 ára gamal - men tapti. Evnini vóru sjónlig, og neyvan hevur nakar annar føroyskur telvari verið so íðin og miðvísur seinnu árini sum Luitjen. Ungum telvarum so líkt hava sveiggini stundum verið í størra lagi, men nú bragdaði av álvara. Hesin sigurin er honum væl untur og væl uppiborin. 

FM-umdysturin 2024 - kviktalv
Rógvi Egilstoft - Luitjen Akselsson Apol ½ - ½
Høgni Egilstoft Nielsen - Rógvi Egilstoft ½ - ½
Luitjen Akselsson Apol - Høgni Egilstoft Nielsen 1 - 0
Luitjen Akselsson Apol - Rógvi Egilstoft 1 - 0
Rógvi Egilstoft - Høgni Egilstoft Nielsen 0 - 1
Høgni Egilstoft Nielsen - Luitjen Akselsson Apol 0 - 1

Úrslitið av FM-umdystinum:
1. Luitjen Akselsson Apol, Havnar Telvingarfelag, 3½ stig
2. Høgni Egilstoft Nielsen, Sandavágs Talvfelag 1½
3. Rógvi Egilstoft, Sandavágs Talvfelag 1 stig

Føroyameistarar seinastu 25 árini
2000 Flóvin Tór Næs, HT
2001 John Rødgaard, VT
2002 Hans Kristian Simonsen, KT
2003 Martin Poulsen, HT
2004 Martin Poulsen, HT
2005 Carl Eli N. Samuelsen, VT
2006 Martin Poulsen, HT
2007 John Rødgaard, VT
2008 Helgi Dam Ziska, HT
2009 Martin Poulsen, HT
2010 Olaf Berg, ST
2011 Helgi Dam Ziska, HT
2012 Rógvi Egilstoft Nielsen, ST
2013 Olaf Berg, HT
2014 Høgni Egilstoft Nielsen, ST
2015 Rógvi Egilstoft Nielsen, ST
2016 Rógvi Egilstoft Nielsen, ST
2017 Helgi Dam Ziska, HT
2018 Helgi Dam Ziska, HT
2019 Helgi Dam Ziska, HT
2020 Høgni Egilstoft Nielsen, ST
2021 Høgni Egilstoft Nielsen, ST
2022 Høgni Egilstoft Nielsen, ST
2023 Helgi Dam Ziska, HT
2024 Luitjen Akselsson Apol, HT

Greinin varð fyrstu ferð løgd út 31. mars 2024

Kontrast: FM-finalurnar byrja leygarmorgunin

Byrjað verður við tvímansleiki hjá kvinnum í bæði borðtennis og badminton klokkan 10. Judo byrjar klokkan 13 - samanlagt eru 16 finalur í teimum trimum ítróttagreinunum á Hálsi

Britt Michelsen úr Tvøroyrar Borðtennisfelag gjørdist føroyameistari í einmansleiki hjá kvinnum í 2023.

SkrivaÐ:

Agnar Prestá

Stóri FM-finaludagurin hjá borðtennis, badminton og judo er á skránni í dag, 6. apríl, í Høllini á Hálsi.

Seinastu mongu árini hevur "Kontrast FM" verið karmur um nógvar spennandi dystir: Við ketjsarum, battum og kropsstyrki.

Badmintonssamband Føroya skrivar á Facebook-síðu sínari, at finaluskráin nú er løgd. Hesa vikuna hevur badmintonsambandið skipað fyri úttøkukappingum fyri at finna fram til finalistarnar blandaðum tvímansleiki, tvímansleiki og einmansleiki.

Savnsmynd: Ólavur Frederiksen

Sum skráin niðanfyri vísir, verður byrjað við tvímansleiki hjá kvinnum í bæði borðtennis og badminton klokkan 10.

Judo byrjar klokkan 13 - samanlagt eru 16 finalur á skránni í teimum trimum ítróttagreinunum. Seinasta finalan stendur at byrja 15.35. Talan er um einmansleik í borðtennis hjá monnum.

Tíðirnir kunnu tó broytast nakað; millum annað eftir hvussu langar ymisku finalurnar verða.

Greinin varð fyrstu ferð løgd út 04. apríl 2024

Føroysk vektlyfting fingið atlimaskap í IWF

International Weightlifting Federation játtaði umsóknini frá Føroya Styrkisambandi farna vikuskiftið

(Savnsmynd)

SkrivaÐ:

Tíðindaskriv

Føroya Styrkisamband (FSS) gjørdi eitt rimmarlyft farna vikuskiftið, tá ið aðalfundurin hjá International Weightlifting Federation (IWF) játtaði umsóknini frá FSS um limaskap.

IWF er heimssamgongan fyri olympiska vektlyfting, og aðalfundurin, sum varð hildin í Phuket í Teilandi, játtaði Føroyum atlima- ella assosieraðan limaskap.

Føroyskir vektlyftarar kunnu nú kappast í heimsmeistarakappingum undir føroyskum flaggi.

Atkvøðurættur er tó ikki á aðalfundinum.

Umsóknin um limaskap varð latin IWF fyri tveimum árum síðani. Drúgt arbeiði hevur síðani verið at útvega tilfar um formlig viðurskifti, mál og avrik við góðari hjálp frá ÍSF.

Fyri hálvum triðja ári síðani søkti FSS eisini um limaskap í European Weightlifting Federation (EWF), europeisku vektlyftingssamgonguni.

Formligar ásetingarnar hjá EWF siga tó, at eitt land fyrst skal hava limaskap í IWF. Nú er tað upp á pláss, og farið verður nú beinanvegin undir at samráðast víðari við EWF um limaskap.

FSS fekk fyri tveimum árum síðani limaskap í norðurlendsku vektlyftingssamgonguni, Nordic Weightlifting Federation, NWF.

Um ikki so langa tíð verða væntandi allir tríggir altjóða limaskapirnir upp á pláss. Tá kunnu føroyskir vektlyftarar lyfta undir Merkinum um allan heim.

Føroya Styrkisamband varð stovnað í 2019 sum menningarsamband undir ÍSF og fevnir um fýra styrkigreinar: Vektlyfting, styrkilyfting, kúlulyfting og rørslumegi.

Greinin varð fyrstu ferð løgd út 02. apríl 2024