Framsókn setir krøv til valevnini

Sólvit Nolsøe tekur ikki undir við politikki floksins um fosturtøku, og stillar tí ikki upp aftur til komandi val. Hanna Jensen skýggjar fjølmiðlarnar

(Savnsmynd: Sverri Egholm)

SkrivaÐ:

Ingi Samuelsen

Flokkurin Framsókn er, í sambandi við landsfundin, sum var fyri tveimum vikum síðani, farin ígjøgnum eina uppgerð við fólkini, sum eru ímóti fosturtøku.

Tí nú verður lagt upp til, at valevni floksins til komandi løgtingsval skulu ganga við til ætlanina hjá flokkinum um at broyta lóggávuna um fosturtøku.

Tað var ein álvarsligur smeitur fyri flokkin, tá tvey av trimum tingfólkum – Sólvit Nolsøe og Hanna Jensen – atkvøddu ímóti uppskotinum, sum egni landsstýrismaður floksins, Bjarni Kárason Petersen, legði fyri tingið.

Hetta fekk øði í stovnaran av flokkinum, Poul Michelsen, sum segði seg skammast av flokkinum, sum hann var við til at stovna. Hann segði tá við Frihedsbrevet, at “hetta tekur sjálvt grundarlagið undan Framsókn”.

- Um Framsókn ikki verjir persónliga frælsið, so kunnu tingfólk í Framsókn akkurát tað sama melda seg inn í Fólkaflokkin. Hetta er ikki tann flokkurin, sum vit stovnaðu, segði Poul Michelsen tá.

Nú tykist sum um at Framsókn hevur funnið eina bleyta lending. At síggja til skulu veljarar floksins til komandi løgtingsval kunna stóla uppá, at flokkurin er á einum máli í spurninginum um fosturtøku.

Hetta hevur ført til, at Sólvit Nolsøe hevur boðað frá, at hann ikki stillar upp til komandi løgtingsval. Sum avleiðing av hesum hevur hann eisini sagt seg frá sum formaður fyri tingbólkin hjá Framsókn.

Við útvarpið hjá Krinvarpinum segði Sólvit í gjár m.a., at hann annars er samdur við flokkin í 99 av 100 málum, at hann heldur fram við arbeiðinum á løgtingi og at hann ongar ætlanir hevur um at melda seg úr flokkinum. Men sum treytirnar er nú, kann hann ikki stilla upp fyri flokkin til næsta løgtingsval.

Meira ivasamt er tað við Honnu Jensen, sum tykist ikki vera sinnað til at svara almenninginum upp á spurningar um hennara viðurskifti við Framsókn.

Hanna Jensen var annars við til at stovna Framsókn saman við Poul Michelsen í 2011. 

Greinin varð fyrstu ferð løgd út 09. apríl 2025

Gevst í politikki aftaná næsta val

Sólvit E. Nolsø stillar ikki upp aftur aftaná næsta val. Orsøkin er fosturtøkupolitikkurin hjá flokkinum

(Savnsmynd: Jens Kr. Vang)

SkrivaÐ:

Sverri Egholm

Alt bendir á, at Sólvit E. Nolsø er liðugur í politikki aftaná næsta val.

Á tingfundinum týsdagin varð boðað frá, at hann gavst sum tingbólkaformaður í Framsókn, og fyri útvarpinum váttar hann, at hann ikki stillar upp aftur eftir næsta val

- Tað er ósannlíkt í løtuni og helst ómøguligt hjá mær at stilla uppaftur fyri Framsókn. Og eg stillo helst ikki upp aftur til næsta løgtingsval, ikki fyri nakran flokk, segði Sólvit E. Nolsø við útvarpið.

Orsøkin er at Framsókn hevur gjørt greitt, at tey sum stilla upp fyri flokkin, skulu taka undir við fríari fosturtøku til 12. viku.

- Hetta er gjørt til ótøkiligan politikk, sum man skal taka undir við, og tað ger tað ómøguligt. Her eru tveir óvíkiligir partar, sum møtast, har tann eini parturin hevur fingið sína støðu sum politikk hjá flokkinum.

- Tí sigi eg, at eg ikki eri partur av framtíðarætlanunum hjá flokkinum, sigur Sólvit E. Nolsø við útvarpið.

Hann fer kortini ikki úr politikki her og nú. Tingmaðurin heldur fram hetta valskeiðið út.

Sólvit Nolsø fekk 249 atkvøður á løgtingsvalinum í 2022 og gjørdist triðvaldur hjá Framsókn, sum fekk tríggjar tingsessir.

Greinin varð fyrstu ferð løgd út 08. apríl 2025

Nýggj kanning fyri prostatakrabba í Føroyum

Vevnaðarroyndir av prostata hava áður verið gjørdar á universitetssjúkrahúsinum í Aalborg, men nú fer man at sleppa undan at senda fleiri til Danmarkar

Tað er Jóhan Poulsen, ábyrgdarhavandi og visiterandi urologur í Sjúkrahúsverkinum, sum hevur fingið hetta týðandi arbeiði upp at standa

SkrivaÐ:

Agnar Prestá

Týsdagin varð farið undir ein nýggjan hátt at kanna sjúklingar, har ein MR-skanning hevur víst illgruna um prostatakrabba. Sjúkrahúsverkið hevur fingið nýtt tól til vega, ið ger hetta møguligt.

Um 200 menn verða árliga ávístir til MR-skanning, við illgruna um prostatakrabba. Á leið 70 teirra verða sendir víðari til at taka vevnaðarroyndir. Umleið 50 av hesum fáa síðani staðfest krabbamein.

Vevnaðarroyndir av prostata hava áður verið gjørdar á universitetssjúkrahúsinum í Aalborg.

- Við hesum nýggja tólinum, og við upplæring av starvsfólkum, ber nú til at gera hesar kanningar her heima. Myndirnar frá MR-skanningini verða smeltaðar saman við ultraljóðmyndunum frá nýggja tólinum. So kann arbeiðast út frá myndunum, heilt nágreiniliga. Hetta ger at vevnaðarroyndirnar eru meira neyvar og tí eisini færri í tali. Á hendan hátt verða MR-skanningarnar av prostata eisini gagnnýttar til fulnar her í Føroyum.

Hetta ger stóran mun fyri sjúklingin, ið oftast eru eldri menn. Fyri tað fyrsta tí at kanningin verður gjørd í Føroyum, heldur enn í Danmark. Tað er ikki neyðugt at ferðast eins langt, verða burtur í fleiri dagar og hava fylgjara við. Fyri tað næsta, tí at kanningin við hesum nýggja háttinum er minni pínufull, tað bløðir minni og tað er so gott sum ongin vandi fyri bruna. Hetta kemst av, at vevnaðarroyndirnar nú verða tiknar við at farið verður ígjøgnum millumkjøtið og ikki gjøgnum endatarmin.

Hendan kanningin tekur vanliga bara 20-30 minuttir. Sjúklingurin er væl fyri aftaná, tað eru færri hjáárin og ein nógv lagaligari sjúklingagongd.

Mannagongdin eftir kanningirnar er tann sama sum frammanundan, royndirnar verða sendar til útgreinan á universitetssjúkrahúsinum í Aalborg og svarið verður sent til ávísandi lækna.

Týsdagin vóru starvsfólk frá universitetssjúkrahúsinum í Aalborg við til kanningarnar, fyri at vegleiða okkara egnu starvsfólk. Eisini hava starvsfólk frá GE Healthcare verið við, fyri at tryggja at tólið er rætt stillað og sum heild koyrir sum tað skal.

Sjey slíkar kanningar vórðu gjørdar hendan dagin á Klaksvíkar Sjúkrahúsi, og framyvir verða tær gjørdar eftir tørvi.

Tað er Jóhan Poulsen, ábyrgdarhavandi og visiterandi urologur í Sjúkrahúsverkinum, sum hevur fingið hetta týðandi arbeiði upp at standa. Framyvir verður tað urologur, saman við sjúkrarøktarfrøðingum, ið koma at gera hesar kanningar, á urologiska ambulatoriunum.

Greinin varð fyrstu ferð løgd út 09. apríl 2025

Samverk funnið semju við Føroya Arbeiðsgevarafelag

Tvey-ára avtalan varð undirritað týsdagin. Hon inniber eina lønarhækkan á 4,32 prosent nú

 

SkrivaÐ:

Tíðindaskriv

Týsdagin 8. apríl varð skrivað undir nýggjan tvey ára sáttmála millum Føroya Arbeiðsgevarafelag og Samverk.

Nýggi tvey ára sáttmálin er galdandi frá 1. mai 2025 til 1. mai 2027. Semjan hevur við sær, at lønirnar hækka soleiðis:

1. mai 2025 hækkar lønin við 4,32 prosentum
1. mai 2026 hækkar lønin við 3,87 prosentum

Frá 1. januar 2026 verður nýggj áseting galdandi, sum ger at døgurðasteðgurin sambært grein 3, stk. 1 ikki verður frádrigin arbeiðstíðini. Starvsfólk, sum arbeiða fleiri enn 5 tímar um dagin, hava rætt til døgurðasteðg, sum er minst 20 minuttir, og hesin verður við nýggju ásetingini nú løntur døgurðasteðgur.

Eisini eru broytingar í lønartalvunum sum hava við sær at trý lønarstig fella burtur í ávikavist lønarbólki 2 og lønarbólki 4, soleiðis at tað verður skjótari at náa endastignum:

Lønarbólkur 2
Núverandi starvsaldur 5, 7 og 9 fella burtur. Eftir standa 8 lønarstig.

Lønarbólkur 4
Núverandi starvsaldur 3, 6 og 9 fella burtur. Eftir standa 11 lønarstig.

Greinin varð fyrstu ferð løgd út 09. apríl 2025

Miðlafólk latið rættinum stevning móti landsstýrinum

Føroysk Miðlafólk stevnt landsstýrinum, sum ikki vil viðurkenna samráðingarrætt felagsins

Jón Brian Hvidtfeldt, formaður, og Georg L. Petersen, nevndarlimur í Føroyskum Fjølmiðlafólkum uttan fyri rættarhølið saman við advokatinum Jógvan Páll Lassen

SkrivaÐ:

Tíðindaskriv

Í vikuni stóð tað endaliga greitt, at grundleggjandi rætturin hjá miðlafólki at skipa seg við egnum sáttmála í almenna public service stovninum Kringvarpi Føroya skal roynast í rættinum.

- Vit vónaðu til tað seinasta, at landsstýrið fór at broyta støðu og viðurkenna rættin at samráðast um egnan sáttmála, ið er so grundleggjandi fyri eitt hvørt yrki. Men landsstýrið letst ikki um vón, og tí er stevningin nú latin rættinum, sigur Jón Brian Hvidtfeldt, formaður í felagnum Føroysk Miðlafólk.

Stevningin varð fráboðað eftir úrslitaleysan fund í Tinganesi mikudagin í síðstu viku, har løgmaður og landsstýriskvinnan við fíggjarmálum vóru við, umframt lønardeildin undir Fíggjarmálaráðnum.

22. mai í fjør bað felagið Føroysk Miðlafólk um samráðingarrættin fyri limirnar á almenna arbeiðsmarknaðinum, herundir serliga í Kringvarpinum, tá táverandi sáttmáli millum Fíggjarmálaráðið og Starvsfelagið fór úr gildi 1. oktober 2024. 

Ynskið bleiv ikki gingið á møti, og víðari samráðingar við landsstýrið endaðu úrslitaleysar 2. apríl 2025.

Kravið í stevningini nú er latin Føroya Rætti, er stutt og greitt, at landsstýrið verður dømt at viðurkenna, at Føroysk Miðlafólk er eitt felag við avtalu- og samráðingarrætti fyri miðlafólk á almenna arbeiðsmarknaðinum í Føroyum.

Grundleggjandi rættindi

Málið er rættulig prinsipielt fyri Føroysk Miðlafólk. Tað snýr seg um heilt grundleggjandi rættindi, at eitt yrki hevur rætt til at verða umboðað av sínum yrkisfelag. Politiska valdið í øllum okkara grannalondum hevur viðurkent rættin hjá miðlafólki í teirra almennu public service-fjølmiðlum at skipa seg við egnum sáttmála. Tí eru tað norðurlendsku fakfeløgini fyri miðlafólk, sum samráðast um sáttmálan fyri miðlafólkini í DR, NRK, SVT/Sveriges Radio, YLE, RUV og KNR.

Grein-11 í evropeisku mannarættindakonventiónini, sum Føroyar eisini hava tikið undir við, sigur beinleiðis, at ”Enhver har ret til frit at deltage i fredelige forsamlinger og til foreningsfrihed, herunder ret til at oprette og slutte sig til fagforeninger for at beskytte sine interesser.”

- Hvussu skal eitt fakfelag verja áhugamálini hjá limunum, um landsins stýri noktar fakfelagnum at samráðast um ein sáttmála, spyr Jón Brian Hvidtfeldt.

Tí er málið prinsipielt. Og tí er tað nú latið Føroya Rætti.

Greinin varð fyrstu ferð løgd út 08. apríl 2025

17 ára gamal drongur doyði av løstunum

Ferðsluvanlukka á Skála í farnu viku kostaði eitt ungt mannalív

 

SkrivaÐ:

Ingi Samuelsen

Ein 17 ára gamal drongur er deyður eftir ein samanstoyt á Skála hósdagin 3. apríl, tá ein bilur og eitt prutl rendu saman.

Drongurin á prutlinum kom illa til skaða í samanstoytinum, og varð fluttur á ríkissjúkrahúsið í Keypmannahavn.

Men lívið stóð ikki til at bjarga, og sunnudagin andaðist drongurin, skrivar familjan á sosialu miðlunum.

Greinin varð fyrstu ferð løgd út 08. apríl 2025

Knapt 54.800 fólk búgva nú í Føroyum

Seinastu tólv mánaðirnar vaks fólkatalið við 334 fólkum, sum svarar til 0,6 prosent

(Mynd: Hagstofan)

SkrivaÐ:

Ingi Samuelsen

1. mars búðu 54.784 fólk í Føroyum. Fólkatalið er sostatt vaksið við 334 fólkum, ella 0,6 prosentum, síðan 1. mars 2024. Vøksturin var minni enn í undanfarnu tólv mánaðunum, tá hann var 0,7 prosent.

Fólkavøksturin, sum tók dik á seg í 2014, náddi toppin á sumri í 2019, tá fólkatalið vaks við umleið 900 fólkum ella 1,8 prosentum uppá eitt ár. Síðan tá er fólkavøksturin støðugt minkaður niður í ein triðing, og seinastu tólv mánaðirnar vaks fólkatalið við 334 fólkum, sum svara til 0,6 prosent. Burðaravlopið og nettoflytingin fyltu á leið hvør sína helvt av vøkstrinum seinasta árið, skrivar Hagstovan. 

Burðaravlopið og nettoflytingin minka

Fólkatalið verður ávirkað av nettoflyting, sum er munurin millum tilflyting og fráflyting, og burðaravlopi, sum er munurin millum fødd og deyð. 

Fólkavøksturin seinasta árið kom av einum burðaravlopi á 159 og eini nettoflyting á 175 fólk. Tá hesi mátini verða sett í mun til fólkatalið, svarar tað til eitt burðaravlop á 2,9 børn fyri hvørji 1.000 fólk, og eitt nettoavlop á 3,2 fólk fyri hvørji 1.000 fólk. Bæði burðaravlopið og nettoflytingin vóru minni enn frá 1. mars 2023 til 1. mars 2024. Tá var burðaravlopið á 3,0 og nettoflytingin á 3,7 fyri hvørji 1.000 fólk.

Trendurin fyri flytingarnar gevur ábending um, at gongdin í tilflytingini ikki minkar eins nógv og áður, meðan minkandi gongdin í fráflytingini heldur fram, skrivar Hagstovan. 

Trendurin fyri føðitalið gevur ábending um, at gongdin í føðitalinum, sum hevur verið spakuliga minkandi síðan 2020, er vend til ein vøkstur, meðan gongdin í deyðatalinum er meira støðug.

Greinin varð fyrstu ferð løgd út 10. apríl 2025

Pensjónirnar gott avkast í 2024

2024 gjørdist tað besta árið síðan Betri Pensjón varð stovnað í 2006 - men tað kann ganga skjótt báðar vegir, órógvið á fíggjarmarknaðinum ger, at avkastið er negativt higartil í ár

(Savnsmynd)

SkrivaÐ:

Tíðindaskriv

Pensjónirnar hjá kundunum hjá Betri Pensjón vuksu nógv í virði í 2024, tá íløgurnar góvu besta avkastið í nógv ár. Tað var í miðal 9,7 prosent, harav kundarnir við lægsta váða fingu eitt avkast á góð 5 prosent, meðan kundarnir við hægsta váða fingu 17,5 prosent.

Sum heild gjørdist árið tað besta, síðani Betri Pensjón varð stovnað í 2006.

Íløgumarknaðurin kláraði seg betur enn útlitini vóru við ársbyrjan, og tjóðbankarnir í Evropa og USA lækkaðu báðir rentuna. Millum annað hetta hevur givið kundunum og eisini pensjónsfelagnum eitt stak gott úrslit. Hartil hevur felagið ongantíð áður fingið so nógvar nýggjar kundar sum í 2024 og inntøkurnar frá tryggingar- og pensjónsgjøldum vuksu 15 prosent íbmun til árið fyri.

- Vit eru sera fegin um, at framdar íløgur í 2024 hava givið kundum okkara so gott úrslit. Sum heild hevur árið eydnast væl. Serliga eru vit fegin um, at kundarnir hava fingið so gott avkast. Tað liggur millum 5 og 17,5 prosent. Miðalavkastið var á 9,7 prosent, sum avspeglar, at føroyingar sum heild velja at hava lutfalsligan lágan váða á sínum pensjónum, sigur Helgi L. Petersen, stjóri í Betri Pensjón.

Stjórin vísir tó eisini á, hvussu skjótt tað kann ganga báðar vegir, tí órógvið á fíggjarmarknaðunum higartil í ár hevur havt við sær, at kundarnir í Betri Pensjón í miðal hava eitt negativt avkast á 2 prosent fyrstu tríggjar mánaðirnar í 2025.

Lyklatøl fyri 2024:

Ársúrslit eftir skatt 9,6 mió.
Tryggingar- og pensjónsinngjøld 228 mió.
Avkast hjá kundum í miðal 9,7%
Eginogn 81,2 mió.
Íløguogn hjá kundunum við árslok 2.274 mió.
Solvensdekningur 255% 

Ársfrágreiðingin kann lesast her

Helgi L. Petersen

Greinin varð fyrstu ferð løgd út 08. apríl 2025

Føroya Banki fær ein kjattbott

Hetta er tann fyrsti av sínum slagi í Føroyum. "Vita" verður tøkur alt samdøgrið - talan er ikki um vitlíki

 

SkrivaÐ:

Tíðindaskriv

Vita er nýggi kjattbotturin hjá Føroya Banka. Føroya Banki leggur seg støðugt eftir at menna talgildu pallarnar, soleiðis at kundar og onnur lætt og einfalt kunnu fáa yvirlit yvir síni fíggjarviðurskifti. Tí hevur bankin ment Vitu, sum er tøk í netbankanum og á heimasíðuni bankin.fo.

Vita er ikki eins og aðrir kjattbottar. Hon er tann fyrsta av sínum slagi í Føroyum, tí hon bæði skrivar og skilir føroyskt. Henda tøknin var ikki tøk í Føroyum til føroyskt mál, men dugnalig starvsfólk í Føroya Banka hava við góðari hjálp frá máltøknideplum í Føroyum og Íslandi ment Vitu. Bankin hevur ment Vitu fyri at gera tað lættari at fáa svar uppá allar spurningar um fíggjarviðurskifti – eisini uttan fyri vanligar upplatingartíðir.

Vita er altíð til arbeiðis
Vita er til arbeiðis alt samdøgrið, og dugir at svara øllum spurningum, sum hava við bankavirksemi at gera. Tað merkir, at ein kann spyrja hana um hjálp, júst sum ivamálið tekur seg upp, heldur enn at bíða til morgunin eftir, tá kundatænastan letur upp. Tað ber til dømis til at spyrja hana um galdandi rentur, ella hvørji gjaldskort eru at velja í, so svarar hon, so væl, sum hon kann ella vísir til rætta stað á heimasíðuni hjá bankanum.

Vita dugir eisini at vegleiða, um ein skal gera eina flyting, finna sína pin-kotu ella líknandi. Svarini hjá Vitu eru góðskutryggjað, men við tíðini verður hon ment til at svara betur og betur.

Bankin heldur tað vera umráðandi fyri føroyska samfelagið og føroyska málið, at fyritøkur, sum hava førleikar og møguleikar, menna loysnir fyri at flyta Føroyar framá.

- Vit leggja nógva orku í at menna talgildu pallarnar og vera ein virkin viðleikari í talgildu menningini í Føroyum. Teir seinastu nógvu mánaðirnar hava vit tí eisini raðfest Vitu, og vit eru fegin um, at loysnin nú eisini kann koma okkara kundum til góðar. Tøknin kann harumframt brúkast bæði í máltøkniligari gransking og føroysku vinnuni. Kjattbotturin er ein liður í einum størri arbeiði við talgilding, ið skal gera tað lættari at vera kundi – onnur dømi eru at stovna samansparingar, virkja kort o.a. beinleiðis í netbankanum, sum er ókeypis fyri allar kundar, sigur Silja á Borg Færø, privatkundastjóri í Føroya Banka.

Gott samstarv hevur borið Vitu á mál
Grundtøknin er frá Miðeind, máltøknidepli í Íslandi, og síðani eru dátur frá Føroyska Bendingargrunninum, sum Setrið eigur, brúktar fyri at leggja føroyska málið og bendingar í Vitu í samstarvi við ein PhD lesandi.

Hetta eru amboð, sum øll nú kunnu taka niður og brúka sum tilfeingi á heimasíðuni hjá máltøknideplinum. Til dømis til kjattbottar ella onnur endamál, har tørvur er á at læra skipanir at broyta føroysk orð til tekin og at flokka tey.

Greinin varð fyrstu ferð løgd út 08. apríl 2025

Boði Haraldson býarverkfrøðingur hjá Tórshavnar kommunu

Hann hevur roynt tað fyrr - byrjar aftur í starvinum 22. apríl

(Mynd: Tórshavnar kommuna)

SkrivaÐ:

Alda Nielsdóttir

Boði Haraldson er settur sum býarverkfrøðingur í Tórshavnar kommunu, boðar kommunan frá.

Boði er 64 ára gamal og útbúgvin verkfrøðingur. Hann hevur drúgvar royndir innan flestu fakøki á tekniska økinum, skrivar kommunan.

Boði hevur m.a. starvast í tvey ár sum GIS-samskipari hjá Kampsax GeoPlan og fimm ár sum verkfrøðingur og GIS-samskipari hjá Tórshavnar kommunu. Hann hevur eisini áður røkt starvið sum býarverkfrøðingur hjá Tórshavnar kommunu frá 1999 til 2016, og frá 2016-2022 starvaðist hann sum deildarleiðari á Landsverki við ábyrgd fyri Infrakervisdeildini og Virkisdeildini. Seinastu tvey árini hevur Boði starvast hjá MTV Byggivirki sum verkfrøðingur innan umsiting - og projektleiðslu.

Boði byrjar í starvinum 22. apríl.

Greinin varð fyrstu ferð løgd út 11. apríl 2025

Hans Olof Engberg nýggjur deildarleiðari á Land- og sjókort

Hann tók við sum deildarleiðari á deildini Land- og sjókort hj+a Umhvørvisstovuni 1. apríl

Hans Olof Engberg og Stein Fossá (Mynd: Umhvøvisstovan)

SkrivaÐ:

Alda Nielsdóttir

Hans Olof Engberg er settur sum nýggjur leiðari á deildini Land- og sjókort hjá Umhvørvisstovuni.

Hans tók við sum deildarleiðari 1. apríl eftir Stein Fossá, sum hevur verið deildarleiðari, síðani Umhvørvisstovan varð sett á stovn í 2007.

Hans hevur drúgvar royndir innan sjókort frá svenska Sjöfartsverket, og haraftrat hevur hann arbeitt innan landkortøkið seinastu fýra árini við millum annað topografiskum kortum, skrivar Umhvørvisstovan.

Greinin varð fyrstu ferð løgd út 07. apríl 2025

Søguligu skeltini prýða aftur Vág

Skeltini mynda eina útiframsýning, sum gevur eitt innlit í søguligar hendingar í Vági frá síðst í 1800-talinum og fram til 1930’ini.

Sambært kommununi er túrin er umleið 2,5 kilometrar langur og gevur bæði møguleika at røra seg og at fáa eitt dýpri innlit í Vágs søgu og mentanararv (Mynd: vagur.fo)

SkrivaÐ:

Agnar Prestá

Nú ber aftur til at fara ein heilt serligan gongutúr í Vági og leita aftur í tíðina.

Vágs kommuna skrivar, at eins og undanfarin ár eru søguslóðir-skeltini hongd upp kring bygdina. Skeltini mynda eina útiframsýning, sum gevur eitt innlit í søguligar hendingar í Vági frá síðst í 1800-talinum og fram til 1930’ini.

- Søguslóðir fevnir um 12 støð. Á hvørjum staði er eitt skelti við teksti og gomlum myndum, sum lýsa, hvussu staðið sá út fyrr og hvør søga er knýtt at júst hesum staði. Talan er um eitt tiltak, sum Vágs Sóknar Bygdasavn setti í gongd í 2016, sum síðan er endurtikið á hvørjum ári.

Í Miðlatúni ber eisini til at fáa ein ókeypis faldara við yvirliti yvir øll støðini, so ein kann ganga søguslóðirnar – einsamallur ella saman við øðrum.

Sambært kommununi er túrin er umleið 2,5 kilometrar langur og gevur bæði møguleika at røra seg og at fáa eitt dýpri innlit í Vágs søgu og mentanararv.

Greinin varð fyrstu ferð løgd út 10. apríl 2025

Nevndin í Lærarafelagnum heldur óbroytt fram

Eingin stillar upp móti Jacob Eli S. Olsen, sum hevur verið formaður seinastu seks árini

Mynd: skulabladid.fo

SkrivaÐ:

Agnar Prestá

Nevndarval er á skránni á aðalfundinum hjá Føroya Lærarafelag 26. apríl, men longu nú er greitt, at verandi nevndarlimir halda fram.

Hetta skrivar Skúlablaðið. 5. apríl var freist at bjóða seg fram at koma í nevndina hjá Føroya Lærarafelag til næsta skeiðið. 

Tveir limir, umframt formaður skulu veljast, men tað verður einki væl.

Jacob Eli S. Olsen bjóðaði seg aftur fram sum formaður. Hann hevur verið formaður seinastu seks árini og undan tí lærari í Eysturskúlanum í Havn.

Nevndarlimirnir, sum standa fyri vali, eru Jona Højsted, lærari á Skúlatrøð í Klaksvík, og Bergur Samuelsen, lærari í Skúlanum á Fløtum í Havn. Tey hava ávikavist røkt uppgávurnar sum kassameistari og skrivari felagsins.

Tey bjóða seg fram aftur. Eingi onnur valevni eru; sostatt heldur nevndin óbroytt fram.

Greinin varð fyrstu ferð løgd út 10. apríl 2025

Grindamannafelagið fingið nýggjan formann

Esmar Joensen og Tóri Simonsen, sum seinastu árini hava verið ávikavist formaður og næstformaður, valdu ikki at átaka sær hesar sessir komandi árið – nýggjur formaður og næstformaður eru Ragnar Jacobsen og Bogi Hansen

Ragnar Jacobsen er nú formaður í Grindamannafelagnum (Savnsmynd: Grindamannafelagið)

SkrivaÐ:

Alda Nielsdóttir

Leygardagin 5. apríl varð aðalfundur hjá Grindamannafelagnum í Klaksvík, har ein nevndarlimur og tveir varalimir í starvsnevndini hjá felagnum stóðu fyri vali, skrivar Grindamannafelagið í tíðindaskrivi.

Tina Kajsdóttir varð vald í nevndina fyri Eyðstein í Løðu, sum ikki tók við afturvali.

Tina skrivaði søgu herfyri, tá hon varð fyrsta kvinna, sum bleiv vald til grindaformann, og nú skrivar hon aftur søgu, við at verða fyrsta kvinna, sum tekur sæti í starvsnevndini í Grindamannafelagnum, skrivar Grindamannafelagið.

Esmar Joensen, sum hevur sitið sum formaður seinastu tvey árini, valdi orsakað av øktum arbeiðsbyrðum innanfyri annað felagsarbeiði, ikki at átaka sær formanssessin komandi árið. Tað sama gjørdi seg galdandi fyri Tóra Simonsen, sum hevur verði næstformaður/peningarøkil.

Nýggjur formaður og næstformaður eru Ragnar Jacobsen og Bogi Hansen.

Nýggja starvsnevndin í Grindamannafelagnum sær sostatt soleiðis út: Formaður: Ragnar Jacobsen, Miðvágur, næstformaður/peningarøkil: Bogi Hansen, Runavík, og skrivari: Esmar Joensen, Hvítanes. Varalimir: Bjartur Tórhalsson, Vestmanna, Tina Kajsdóttir, Miðvágur, og Tóri Simonsen, Hvannasund.

Greinin varð fyrstu ferð løgd út 06. apríl 2025

Lea Sofía Skaalum nýggj forkvinna í Diabetesfelagnum

Hon avloysir May-Britt Skoradal, sum hevur verið forkvinna í næstan 10 samfull ár

Frá vinstru Grímur Kamban Mortensen, Lea Sofía Skaalum og Allan Skaalum. Mourits Joensen og Terji á Lakjuni eru harafturat partur av nevndini í Diabetesfelagnum (Mynd: Diabetesfelagið)

SkrivaÐ:

Alda Nielsdóttir

Diabetesfelagið hevur fingið nyggja nevnd, og Lea Sofía Skaalum er nú forkvinna í felagnum.

Hon avloysir May-Britt Skoradal, sum hevur verið forkvinna í næstan 10 samfull ár.

– May-Britt hevur við kønari hond staðið á odda fyri felagnum og verið ein dyggur og trúgvur forsprákari fyri bøttum umstøðum fyri fólk í Føroyum við diabetes.
Diabetesfelagið ynskir henni alt tað besta við nýggju avbjóðingunum, skrivar Diabetesfelagið í tíðindaskrivi.

Birita Kristoffursdóttir Samuelsen stillaði heldur ikki upp aftur til nevndina hesaferð.

Á aðalfundi 11. mars varð nýggj nevnd vald, og nevndin skipaði seg á fyrsta nevndarfundi 3. apríl.

Nevndin skipaði seg við Leu Sofíu Skaalum sum forkvinnu, Grími Kamban Mortensen sum næstformanni, Allani Skaalum sum skrivara, Mouritsi Joensen sum kassameistara og Terja á Lakjuni sum nevndarlimi. Brynhild Thomsen og Bára Joensen eru tiltakslimir.

Greinin varð fyrstu ferð løgd út 05. apríl 2025

Stórur áhugi fyri bók um føroyskan uttanríkispolitikk

“The Grand Old Man” í føroyskum uttanríkisarbeiði, Árni Olafsson, varð heiðraður fyri sítt stóra arbeiði

Herálvur Joensen, aðalstjóri í uttanríkisráðnum, handar Árna Olafssyni heiðursgávu við tøkk fyri hansara stóra arbeiði á uttanríkisøkinum til frama fyri Føroyar (Mynd: Jan Müller)

SkrivaÐ:

Jan Müller

Skulu vit døma eftir stóru uppmøtingini, so er áhugin fyri føroyskum uttanríkispolitikki sera stórur. Hølini hjá Søgu- og samfelagsdeildini á Fróðskaparsetrinum vóru á tremur, tá fyrsta bók av sínum slag varð løgd alment fram í farnu viku.  

Og hóast bókin snýr seg mest um tað farna, so er eisini greitt, at neyvan nakrantíð er uttanríkispolitikkur um okkara leiðir vorðin so aktuellur og týdningarmikil sum júst nú. Og tá tað er greitt, at framtíðin m.a. byggir á tað, sum farið er, so er gott við eini bók, ið gevur okkum vitan um, hvat er farið fram á uttanríkispolitiska økinum seinastu mongu árini.

Herálvur Joensen, aðalstjóri í Uttanríkisráðnum, ber fram kvøðu til Árna Olafsson, sum eigur ein týðandi leiklut í nýggju bókini "Heimsins nalvi" (Mynd: Jan Müller)

Og løtan á Setrinum var eisini heilt serlig, tí sjálvur “The Grand Old Man” í føroyskum uttanríkispolitikki varð hjástæddur, tá bókin varð løgd fram.

Árni Olafsson man vera tann føroyski embætismaðurin, sum hevur tikið tey flestu og eisini tyngstu fetini á uttanríkispolitisku leið Føroya. Saman við fleiri øðrum dugnaligum fólkum, bæði politikarum og embætisfólkum, hevur hann verið við til at rudda slóð á nógvum økjum, sum hava gagnað Føroyum og gjørt Føroyar til tað land tað er í dag.  

Halgir Winther Poulsen stríddist saman við Árna Olafssyni at fáa Føroyum undirgrundina heim. Og tað stóra arbeiðið gav úrslit. Her er hann saman við kendum politikarum, sum vístu nýggju bókini stóran áhuga (Mynd: Jan Müller)

Tí var tað eisini ein serstakur dámur yvir tiltakið at hoyra henda okkara fræga føroyska uttanríkispolitiska mentor greiða frá sínum arbeiði. Hann eigur eisini sín lut í sjálvari bókini saman við fleiri øðrum rithøvundum.

Hugaligt var eisini at síggja mong kend andlit til tiltakið, eitt teirra Halgir Winther Poulsen, sum í mong ár stríddist saman við Árna at fáa Føroyum ræðið yvir egnum landi. Teir gjørdu m.a. sítt til at fáa táverandi danska forsætisráðharran, Poul Schlüter til at enda at “leggja kongin” í undirgrundarmálinum.

Herálvur Joensen, aðalstjóri í Uttanríkisráðnum og í mong ár samstarvsfelagi hjá Árna í eitt nú arbeiðinum hjá oljuráðleggingarnevndum, nýtti undir tiltakinum høvið til at bera Árna eina heilsan og tøkk eins og eina heiðursgávu fyri hansara  dýrmæta arbeiði.

Eisini Høgni Hoydal, fyrrverandi landsstýrismaður við uttanríkismálum og ein av undangongumonnunum at fáa Føroyum størri sjálvræði, ikki minst á uttanríkispolitiska økinum, hevði røðu í sambandi við bókaútgávuna.

Heimsins nalvi

Bókin ber heitið “Heimsins nalvi” og snýr seg um føroyskan uttanríkispolitikk í eina fjóðringsøld og viðger uttanríkispolitisku støðu Føroya úr einum breiðum sjónarhorni.  

Talan er um eitt greinasavn, sum Fróðskapur gevur út. Tað viðger støðu Føroya í heiminum við søguligum og aktuellum brillum. Nøkur av evnunum, ið verða viðgjørd, eru:

- Hvussu hava Føroyar røkt síni áhugamál í altjóða viðurskiftum?

- Hvussu byrjaði føroysk luttøka í altjóða samfelagnum?

- Hvørjir tættir mynda føroyskan uttanríkispolitikk?

- Og hvussu sær framtíðin út? 

Seytjan høvundar við ymiskum bakgrundum lýsa og greina føroysk uttanríkisviðurskifti úr ymsum sjónarhornum. Bókin viðger m.a. vinnuliga og tjóðskaparliga menning í 19. øld, heimskríggj og samráðingar um fiskimørk undir kalda krígnum, fyrstu sendistovurnar um aldarskiftið, yvirtøkur av málsøkjum og hvussu uttanríkispolitiska virksemið áhaldandi er víðkað í 21. øld. Millum høvundarnar eru granskarar, embætisfólk og journalistar, sum allir hava lagt seg eftir at skriva til almenningin.

Árni Olafsson, sum saman við embætismonnum sum Martin Heinesen og Bjørn Kunoy, hevur í sínum arbeiði m.a. lagt dent á at fáa Føroyum rættvís og mannsømilig mørk, og nú stendur "bara" markið í útsuðri eftir at loysa. 

Ritstjórnað hava Regin Winter Poulsen, Jens Christian Svabo Justinussen, Rógvi Olavson og Heini í Skorini.

Hetta er fyrsta bók, sum viðger føroyskan uttanríkispolitikk burturav. Og evnið gerst alsamt meiri átrokandi, nú heimurin er í broyting. Bókin er ætlað øllum, ið forvitnast um støðu Føroya í heiminum, og hvagar leið Føroya gongur.

Greinin varð fyrstu ferð løgd út 07. apríl 2025

Hátíðarhalda 40 ár við Tórshavnar Kamarkóri

Í dag skipar Tórshavnar Kamarkór fyri konsert í Hoyvíkar kirkju í sambandi við, at kórið í ár hevur 40 ár á baki

Tórshavnar Kamarkór (Savnsmynd: Sverri Egholm)

SkrivaÐ:

Tíðindaskriv

Í dag klokkan 16 skipar Tórshavnar Kamarkór fyri stórfingnari konsert í Hoyvíkar  Kirkju, í sambandi við at kórið í ár hevur 40 ár á baki. 

Til høvið hevur kórið samlað nógvar ‘gamlar’ kórsangarar og dirigentar, ið saman fara at  framføra nakrar sangir til konsertina. 

Eisini fer kórið, sum tað er samansett í dag, at frumframføra nýskrivað føroyskt kórverk av Eli Tausen á Lava, bygt á yrking hjá Kalpanu Vijayaverathan. 

Tórshavnar Kamarkór er eitt gott, ambitiøst og væl samansungið kór, sum í løtuni telur 30 sangarar. Kórið varð stovnað í 1985 av Ólavi Jøkladal, og hevur síðani havt skiftandi kórleiðarar. Seinastu 15 árini hevur Bernharður Wilkinsson stjórnað kórinum og við honum á odda, hevur kórið sungið nógvan krevjandi tónleik á høgum støði. 

Kórið hevur seinastu 40 árini sungið nógv í kirkjum, mentanarhúsum og til privat tiltøk kring landið, og hevur soleiðis verið við til at menna føroyska tónleikalívið.

Eisini hevur kórið ígjøgnum árini strembað eftir at bíleggja kórverk frá føroyskum tónaskøldum, og á tann hátt roynt at stuðla føroysku mentanarvinnuni. M.a. skrivaði Teitur Lassen nakrar útsetingar til kórið, sum síðani vórðu givnar út á EP í 2022. Hendan útgávan hjá Teiti kallast ‘Sangir til Kamarkórið’. 

Kórið hevur ígjønum árini útgivið tríggjar heildarútgávur:

• 1996, Blátt (saman við Havnakórinum) 
• 1997, Várlongsil 
• 2015, Kvøldtankar 

Kórið hevur øll árini lagt seg eftir, at framføra kórtónleik í útlondunum. Tað hevur verið, við m.a. at luttaka í útlendskum kórfestivalum, kórkappingum og á egnum kórferðum.

Í juli í ár fer kórið at luttaka í kórkapping í suðurfranska býnum Saint Raphael, har verkið hjá Eli eisini fer at verða framført. Kórið kemur at luttaka í tveimum kategorium, har tey í hvørjum bólki skula vit framføra eina skrá á 15 minuttir. Hetta verða tvær ymiskar  konsertskráir og skulu báðar syngjast uttan nótar. Umframt kappingina fara tey at hava teirra egnu konsert á umleið ein tíma. 

Jubileumskonsertin í Hoyvíkar Kirkju kemur at síggja soleiðis út: 

• Fyrra helvt: Stóra kórið, við núverandi og fyrrverandi kórlimum syngur sangir,  dirigerað av fyrrverandi kórleiðarum og av Bernharði Wilkinson, núverandi  kórleiðara.  
• Steðgur: Kórið bjóðar jubileumskøku, kaffi
• Seinna helvt: Tórshavnar Kamarkór, sum tað sær út í dag, framførir nakrar sangir. M.a. nýskrivaða verkið hjá Eli Tausen á Lava og Kalpanu Vijayavarathan. 

Greinin varð fyrstu ferð løgd út 08. apríl 2025

Framsýning um fuglafleyg á Viðareiði á páskum

Allar páskadagarnar verður ein framsýning um fuglafleyg at síggja á Hotel Norð á Viðareiði. – Hetta er eitt framhald av framsýningini í fjør, sigur Levi Heinesen, sum hevur tikið stig til og sett framsýningina upp

Tað er 23 ára gamli viðingurin Levi Heinesen, ið hevur tikið stig til páskaframsýngina á Hotel Norð, sum vísir stórt sæð alt, sum hevur við fuglafleyg at gera og hvussu arbeitt varð fyrr (Mynd: Dávur Winther)

SkrivaÐ:

Tíðindaskriv

Á páskum í fjør var eisini ein framsýning á Viðareiði um fuglaveiðimentan, sum Levi Heinesen hevði valt at kallað ‟Undir oynni”, og nú tað stundar til páskir, hevur hann ein einaferð gjørt seg kláran við eini nýggjari framsýning, sum við lutum, myndum og teksti sigur frá.

– Hetta er ein páskaframsýning til føroyingin, og lýsir hon á ymsan hátt fuglafleyg. Hóast hetta upp á ein máta er sama framsýning sum í fjør, er einki kortini tað sama. Tað einasta, ið gongur aftur, er sjálvt evnið á framsýningini, sigur Levi, ið hóast sín 23 ára aldur hevur ein brennandi áhuga fyri tí, sum hoyrir fortíðini og søguni til.

– Í fjør snúði framsýningin seg mest um menninar, ið søktu fuglabjørgini, men hesa ferð verður eisini víst, hvat kvinnurnar tókust við. Millum annað royttu tær fuglin fyri ein triðing og gjørdu ymiskt fyri at gagnnýta alt tilfeingið, ið var.

Allar páskadagarnar
Framsýningin í fjør tók støði í bókini ‟Slóðirnar og minnið” eftir viðingin Danial Lydersen, men hesa ferð er íblástur funnin í tveimum øðrum bókum, sum eru ‟Fuglefangsten på Færøerne” eftir Arne Nørrevang og ‟Lundafleyg – ein fleygadagur í Nólsoy” eftir Jens-Kjeld Jensen.

– Tað ber til at siga, at framsýningin hevur flutt seg eitt sindur, samanborið við hana í fjør, tí hesaferð snýr tað seg meira um menniskju heldur enn staðarnøvn og staðbundið tilfar, ið mest var av tá. Tí haldi eg eisini, at henda framsýningin rakar breiðari og kann fortelja øllum nakað, sigur Levi Heinesen.

Framsýningin á Hotel Norð á Viðareiði er opin allar páskadagarnar, frá skírisdegi til annan páskadag. Opið er hvønn dag millum klokkan 16 og 20

Greinin varð fyrstu ferð løgd út 11. apríl 2025

Andrias Blaasvær vunnið altjóða tónleikakapping

Føroyski violinleikarin vann 1. virðisløn í Malta International Composition Competition

(Mynd: Finnur Justinussen)

SkrivaÐ:

Alda Nielsdóttir

Føroyski violinleikarin Andrias Blaasvær vann herfyri 1. virðisløn í kappingini Malta International Composition Competition fyri eitt verk fyri solo violin.

Talan er um eitt verk, sum Andrias skrivaði og framførdi fyri norsku Sonju drotning, tá hon vitjaði í Føroyum á sumri 2023.

Kappingin er hildin av Central Academy í Malta og hevur nógvar ymiskar greinar, sum tónleikarar kappast í, eitt nú í violinspæli, sangi, klaveri, kamartónleiki, violinbygging og kompostión. Kappingin endar við einum hátíðarhaldi í september, har virðislønirnar verða handaðar.

Andrias Blaasvær er í løtuni í gongd við at skriva eina klavertrio, sum verður frumframførd til Summartónar 2025. Eisini er hann í gongd við at innspæla sína stóru sonatu fyri solo violin, sum væntast at verða útgivin í summar.

Greinin varð fyrstu ferð løgd út 07. apríl 2025

Nordic Saxophone Festival byrjar í Havnar kirkju leygardagin

Tað er fyrstu ferð, at festivalurin verður hildin í Føroyum. 45 saksofonleikarar luttaka, og konsertir vera frá 12. til 16. apríl - tær flestu í Hátúni

Festivalurin hevur verið hildin á hvørjum ári síðani 2011, og hevur sum endamál at savna saksofonleikarar úr norðurlondum - gestir vera tó eisini úr øðrum londum

SkrivaÐ:

Tíðindaskriv

Í døgunum 12. til 16. apríl verður Nordic Saxophone Festival hildin í Tórshavn. Hetta er fyrstu ferð, at festivalurin verður hildin í Føroyum. Øll tiltøk eru almenn og við ókeypis atgongd.

Festivalurin hevur verið hildin á hvørjum ári síðani 2011 og hevur sum endamál at savna saksofonleikarar úr norðurlendsku londunum. 

Sermerkt fyri festivalin er fokusið á kamartónleik. Luttakararnir verða settir saman í bólkar, sum í felag arbeiða við tónleiki ígjøgnum vikuna. Úrslitið av arbeiðinum verður framført á ymsu konsertunum í festivalinum.

Í ár verða 45 saksofonleikarar við á festivalinum. Teir koma m.a. úr Danmark, Noregi, Svøríki, Finnlandi, umframt úr Argentina, Spania, Italia og Bretlandi.

Í sambandi við festivalin verður samstarv við Aldubáruna, og harafturat eru trý nýggj verk bíløgd frá føroyskum tónaskøldum. Hesi verða frumframførd á festivalinum. Tónaskøldini eru Teitur, Kristian Blak og Atli K. Petersen.

Konsertir og framløgur verða hildnar í Hátúni, Reinsarínum, Norðurlandahúsinum og Havnar Kirkju.

Skráin fyri festivalin

12. apríl
11.30: Stockholm Saxophone Quartet – Havnar Kirkja
19.30: Music from Home – Hátún

13. apríl
13.30: Framløga um Rascher við Kasper Hemmer Pihl – Tinnan
19.30: Aldubáran x Nordic Saxophone Festival – Hátún
21.30: Late Night Concert – Reinsaríið

14. apríl
13.30: Jutlandia Saxophone Quartet – Hátún
19.30: Faroe Unfolded – Hátún

15. apríl
13: Panelkjak – Hátún
19.30: Nordic with a Twist – Hátún

16. apríl
12: Echoes of the North – Norðurlandahúsið
19.30: Grand Finale – Hátún

Greinin varð fyrstu ferð løgd út 09. apríl 2025

Serframsýning við málningum hjá Bent Restorff

Bent Restorff (1922-1979) var við til at mynda føroyska listalandslagið í eftirkrígstíðini saman við fleiri av okkar kendastu listafólkum

 

SkrivaÐ:

Tíðindaskriv

Í gjár, fríggjadagin, lat upp serframsýning við listamanninum Bent Restorff á Listasavni Føroya.

Bent Restorff, sum livdi frá 1922 til 1979, var virkin listamaður, ið var við til at mynda føroyska listalandslagið í eftirkrígstíðini, saman við fleiri av okkara kendastu listafólkum.

Bent Restorff var sjálvlærdur, men hann fekk íblástur frá teimum mongu føroysku listafólkunum, ið komu aftur til Føroya við nýggjum úttrykkum eftir lokna útbúgving á akademinum í Danmark. Hansara ferðir út í heim síggjast eisini aftur í fleiri av verkum hansara. Bent Restorff andaðist bert 58 ára gamal. 

Seinnu árini fann hann sína listaligu rødd við teimum abstraktu og litríku verkunum. Hansara myndir prýða nógvar stovur kring landið, og serliga tær ekspressivu landslagsmyndirnar og  myndevni úr Tórshavn eyðkenna hansara list.

Framsýningin lýsir hansara leitandi listaleið sum sjálvlærdur listamaður í Føroyum. 

Listaframsýningin við málningum hjá Bent Restorff verður at síggja á Listasavninum fram til 19. oktober. 

Greinin varð fyrstu ferð løgd út 08. apríl 2025

Listaverk í hópatali við Løkin

NSÍ stuðlar tóku í fjør upp aftur gamla táttin hjá Lions við málningaframsýning á páskum

 

SkrivaÐ:

Tíðindaskriv

Eitt stórt tal av listaverkum verða sýnd fram í Skúlanum við Løkin í Runavík báðar páskadagarnar. Aftur í ár skipa NSÍ Stuðlar fyri framsýningini, og eisini hesaferð eru fleiri av okkara fremstu listafólkum við.

Í fjør tóku NSÍ Stuðlar stig til at skipa fyri listaframsýning í Runavík. Tað er ikki nakað nýtt tiltak sum so, tí í mong harrans ár var listaframsýningin í Runavík fastur táttur hvørjar páskir.

Tá var tað Lions Club Eysturoy, sum í meira enn 30 ár skipaði fyri, men seinnu árini hevur eingin framsýning verið – til nú.

NSÍ Stuðlar hava nú tikið táttin uppaftur, og báðar páskadagarnar kann listaframsýningin síggjast í Skúlanum við Løkin frá klokkan 14 til 20.

Í ár verður tað býráðslimurin Petur Hansen, ið fer at seta framsýningina, og tað verður klokkan 14.30 páskadag klokkan 14. Talan er um eina søluframsýning, so her er eitt gott høvi hjá fólki at ogna sær góða list.

Atgongumerkið er samstundis lutaseðil har vinningurin er ein málningur.

Greinin varð fyrstu ferð løgd út 08. apríl 2025

40 danskir biografar vísa filmin hjá Sakaris Stórá

“Seinasta paradís á jørð” er nú frumframførdur í Føroyum. Frá 1. mai kann hann síggjast í 40 donskum biografum

Smal H. Hansen hevur høvuðsleiklutin í nýggjasta føroyska spælifilminum

SkrivaÐ:

Tíðindaskriv

Nýggi føroyski spælifilmurin hjá Sakaris Stórá, “Seinasta paradís á jørð”, varð sýndur í Salt týskvøldið og í Havnar Bio frá hóskvøldinum.

Men danir og útisetar kunnu eisini uppliva føroyska filmin á stóra løriftinum. Áhugin í Danmark hevur verið ómetaliga stórur, og ikki færri enn 40 biografar hava sett hann á skrá, við premieru á arbeiðaradegnum 1. mai.

Jón Hammer, frá Kykmyndum, ið hava framleitt filmin, er tikin á bóli av stóra áhuganum:

- Tað er fantastiskt, at móttøkan hevur verið so góð. At 40 danskir biografar hava sett filmin á skrá, er meira enn vit høvdu torað at droymt um. Filmurin er øgiliga føroyskur, alt uttan tríggjar senur eru filmaðar í Hvalba, tvær aðrastaðni í Suðuroynni og ein umborð á trolara. Men hetta vísir, at søgan um stríðið hjá Kára, er universell. Hvussu fótar tú tær í eini tilveru við øllum væntanum og vónum hjá øðrum.

“Seinasta paradís á jørð” lýsir lívið sum verkafólk í eini lítlari bygd, har flakavirkið, sum er einasta arbeiðspláss, er hótt av at verða stongt.

Filmurin samantvinnar søguna, um lívið sum verkafólk, við persónligu menningarsøguna hjá høvuðspersónunum, tí unga Kára (Sámal H. Hansen) og systrini Silju (Bjørg B. Egholm). Í filminum roynir Kári at finna sítt pláss í eini tilveru, har lívisins umstøður, kærleikin, vinir og samfelagsviðurskifti hála í hann.

Føroyskir útisetar í Danmark kunnu uppliva, filmin í hesum biografum: Grand Teatret, Gloria, Vester Vov Vov og Empire Bio í Keypmannahavn, Øst for Paradis í Aarhus, Biffen í Aalborg, Cafe-Biografen í Odense, Valby Kino, Viften í Rødovre, Kino Ros Torv í Roskilde, Bio Silkeborg, Kino Kultur í Ringsted, Klovborg Kino, Scala í Svendborg, Megascope í Horsens, Allerød Bio, Ringe Bio, Skagen Bio, Gilleleje Bio, Reprisen í Holte, Agger Bio, Slotsbio í Hillerød, Lido Biografen í Vejle, Cinema4 í Skive, Kosmorama í Haderslev, Nicolai Bio í Kolding, Kino Hjallerup, Bio Møn í Stege, Ikast Bio, Humlebio í Humlebæk Atlas Biograferne í Rødovre, Kulturbiografen í Holbæk, Parkteatret í Frederikssund, Helios í Faaborg, Værløse Bio, Vordingborg Bio, Apollon í Struer, Trommen í Hørsholm, Byens Bio í Jelling og Hundested Kino.

Greinin varð fyrstu ferð løgd út 09. apríl 2025

Søren Huus kemur kortini ikki á Voxbotn: Byrta í staðin

Tað liggur ikki fyri hjá Saybia-sangaranum at koma til Føroya í summar

(Savnsmynd: Olaf Olsen)

SkrivaÐ:

Sverri Egholm

Voxbotn í summar verður uttan Søren Huus.

Tað varð annars kunngjørt longu í november í fjør, at Søren Huus, sum gjørdist kendur við bólkinum Saybia, skuldi framføra á Voxbotn í summar.

Men nú er greitt, at hann kortini ikki kemur, tí tað vísir, seg at dóttir hansara verður studentur í døgunum tá Voxbotn verður 28. juni, og tí verður konsertin av ongum í ár. Sambært fyriskiparunum verður hon næsta summar heldur.

Fyri Søren Huus hava fyriskipararnir fingið eitt stórt føroyskt navn. Byrta fer nevniliga at framføra á ársins Voxbotn.

Byrta hevði í februarmánað tvær útseldar konsertir í OY eftir at hava verið kvirr í rúma tíð.

Umframt Byrta fara eisini Suspekt, The Minds of 99, Goodboys, RSP, Týr, og Ester Kristiansen at framføra.

Greinin varð fyrstu ferð løgd út 08. apríl 2025

Jarhzé og Ókendir víðari í Sement

Leygarkvøldið var fyrsta umfarið av Sement 2025, har tveir teir fyrstu finalistarnir vórðu funnir

Ókendir á Sement í fjør (Savnsmynd: Gwenäel H. Carré)

SkrivaÐ:

Alda Nielsdóttir

Leygarkvøldið varð fyrsta umfar av ársins Sement-tónleikakapping á skránni, har fyrstu finalistarnir vórðu funnir.

Átta bólkar fóru á pallin á Reinsarínum í Havn. Teir vóru AWL, Gjáir, Karla Hansen, Ókendir, Solstice, Doysin, Jarhzé og Novacaine, og dómsnevndin avgjørdi at senda Jarhzé og Ókendir víðari.

Um Jarhzé segði dómsnevndin m.a. "góða útstráling, góðan stíl, góð og fangandi løg, gott sjálvsálit," og sóu dómararnir risa menningarmøguleikar í honum.

Um Ókendir segði dómsnevndin m.a., at bólkurin hevði eina sterka framførslu, sum fangaði áskoðarafjøldina og fangandi løg. Bólkurin luttók eisini á Sement í fjør, og sóu dómararnir eisini eina stóra framgongd í mun til seinast.

Næsta umfar av Sement verður í kvøld.

Greinin varð fyrstu ferð løgd út 06. apríl 2025

2. umfar av Sement verður í kvøld

Átta nøvn trína á pallin - byrjað verður klokkan 20

Gówa vann Sement 2024 (Mynd: Gwenael Helmsdal Carré)

SkrivaÐ:

Agnar Prestá

Fyrsta umfar av Sement var á skránni síðsta vikuskifti, og í kvøld verður Reinsaríið aftur fylt við nýggjum tónleiki, livandi framførslum og pulserandi stemningi

- Hetta er løtan, har vit uppliva roynd og óroynd, har felagsnevnarin er nýggjur og spennandi tónleikur, ið ikki er útgivin, skriva fyriskipararnir.

Annað umfar av Sement verður skotið í gongd í kvøld klokkan 20. Tað eru átta nøvn, sum syrgja fyri tónleikinum; Magnus King, Bolstad, Ronja, Rúna Vang Kjærbo, Nafro, Julian Slick, SPÓK og Sigmunda.

Sement er ofta ein smakkiroynd av, hvat framtíðin í føroyskum tónleiki hevur at bjóða.

Greinin varð fyrstu ferð løgd út 09. apríl 2025

Herovasti á Pituffik-herstøðini koyrdur frá

Orsøkin er vantandi álit á hennara leiðsluevnir, sigur amerikanski herurin

Pituffik Space Base(Mynd: EPA)

SkrivaÐ:

Alda Nielsdóttir

Susannah Meyers, herovasti á amerikonsku herstøðini Pituffik Space Base í Norðurgrønlandi, er koyrd úr starvi, upplýsir amerikanski herurin.

Orsøkin er vantandi álit á hennara leiðsluevnir.

Amerikanski herurin skrivar, at tað væntast av einum herovasta, at viðkomandi lýuur hægstu treytirnar fyri atburð, serliga tá tað snýr seg um at vera óheftur í sambandi við røkt av teirra uppgávum.

Í mars vitjaði amerikanski varaforsetin, J.D. Vance, herstøðina. Tá fanst hann at Danmark, sum sambært honum ikki hevði gjørt eitt gott arbeiði við at gera íløgur í grønlendska fólkið og trygdina hjá Grønlandi.

Í telduposti til herfólkini á Pituffik-støðini tók Meyers frástøðu frá útsøgnini hjá Vance:

– Eg vil ikki siga, at eg skilji dagsins politikk, men tað, sum eg veit er, at stúranirnar hjá amerikonsku umsitingini, sum J.D. Vance varaforseti umrøddi fríggjadagin, ikki endurspeglar Pituffik Space Base, skrivaði hon m.a.

Sean Parnell, talsfólk hjá amerikanska verjumálaráðnum skrivar á X, at gerðir, sum spilla dagsskránna hjá amerikanska forsetanum, Donald Trump ikki verða góðtiknar hjá verjumálaráðnum.

Greinin varð fyrstu ferð løgd út 11. apríl 2025

Le Pen: Eg gevist ikki

Marine Le Pen, sum hevur fingið forboð móti at røkja almen embæti komandi fimm árini, sigur, at hon ætlar at stríðast á friðarligan og demokratiskan hátt

Marine Le Pen (Mynd: EPA)

SkrivaÐ:

Alda Nielsdóttir

– Eg gevist ikki.

Soleiðis sigur franski høgrapolitikkarin, Marine Le Pen, sum herfyri varð funnin sek í misnýtslu av ES-fígging, og nú hevur fingið forboð móti at røkja almenn embæti í fimm ár.

- Hetta er ein politisk avgerð og ein heksajagstran móti flokki hennara, Rassemblement National, sigur hon.

Les eisini: Dómstólur: Marine Le Pen sleppur ikki at stilla upp komandi fimm árini

Tað at Marine Le Pen ikki kann stilla upp til almenn embæti komandi fimm árini merkir, at hon ikki kann stilla upp á komandi forsetavalinum í 2027, uttan so at hon fær viðhald í kærumálinum, og fær dómin ógildaðan áðrenn valið.

Hon hevur tríggjar ferðir áður stillað upp til franska forsetavalið, og hon hevur áður boðað frá, at næsta valið skuldi vera hennara síðsta.

Mett varð, at hon hevði betri møguleikar á komandi valinum enn nakrantíð, m.a. tí at flokkur hennara, Rassemblement National gjørdist størsti flokkur í franska tjóðartinginum á seinasta vali í 2024, og tí at sitandi forsetin, Emmanuel Macron, ikki kann stilla uppaftur.

Le Pen sigur, at hon ætlar at stríðast á friðarligan og demokratiskan hátt.

– Okkara stríð verður eitt friðarligt stríð, eitt demokratiskt stríð. Vit vilja fylgja Martin Luther King (afroamerikanskur borgararættindastríðsmaður, red.), sum vardi borgararættindi, sum eitt dømi, sigur Le Pen.

Greinin varð fyrstu ferð løgd út 07. apríl 2025

Fyrrverandi skiparin hevur mynstrað av

Minningarorð - Atli á Plógv

 

SkrivaÐ:

Innsent

Hin 9. apríl, hevði svágurin, Atli á Plógv, rundað 74 ár. Men soleiðis bleiv ikki, tí hin 8. feb. 2025 legði fyrrverandi skiparin, árarnar inn, eftir at hava stríðst móti krabbasjúku í nakað meira enn eitt ár.

Atli á Plógv varð føddur og vaks upp í Sandavági. Faðirin var skipari, og ein av undangongumonnunum innan føroyska rækjuvinnu. Harumframt høvdu eisini flestu pápabeiggjarnir hjá Atla sína yrkisleið á sjónum.

Tað sama gjørdi seg galdandi í móðirætt, har flest allir mammubeiggjarnir eisini høvdu sína yrkisleið á sjónum. Verður farið longur aftur í tíðina, so vóru eisini aðrir undangongumenn innan føroyska fiski- og sjóvinnu í móðirætt hjá Atla.

Tann kendi Suðuroyar-Dánjal (1787-1874), sum kom til Sandavágs fyri umleið 200 árum síðani, var við til áhaldandi royndir við skipsfiskiskapi, og var stigtakari til fyrsta, skipaða føroyska navigatiónsskúlan, sum var í Sandavági, har menn, eftir lidna undirvísing, fingu navigatiónsprógv frá fútanum.

Eisini kann nevnast, at mammubeiggin, Petur á Steig, í nógv ár myndaði reiðaríi P/F Samvinnufelagið, har Atli kom at starvast sum skipari stóran part av yrkisleið síni.

Bóklig útbúgving var ikki nakað sum hevði serligan áhuga hjá Atla, og tí var tað ikki óvæntað, at hann longu sum 14 ára gamal fór sín fyrsta túr til skips, eins og søgan nærum varð skrivað frammanudan, at Atli fylgdi í fótasporunum á faðirinum, tá hann nøkur ár seinni tók næsta stigi, og fór á skiparaskúla í Havn.

Tá ein annar úrmælingur innan fjarfiskiskap, vestmenningurin John Dam, í 1969 legði lunnar undir rækjuveiðu á opnum havið í Norðuratlantshavinum, gekk ikki long tíð til at eisini aðrir avgjørdu at royna seg í hesi vinnu.

Í 1975 keyptu Atli á Plógv saman við faðirinum, Jóhan á Plógv, og svágri hansara, Godtfred Joensen í Miðvági, stóra trolaran sum fekk navnið V. U. Hammershaimb, og var útgjørdur til rækjuveiðu. Atli var tá bert 24 ára gamal, og hann og faðirin skiftust at føra skipið í tey 5 árini, til tað varð selt. Tíverri hepnaðist ikki so væl við hesum annars stóra og stásiliga skipið, sum ikki færri enn tvær ferðir varð herjað av eldsbruna. Men hetta tíðarskeiði var tó tað sum nógv minnast sum tað veruliga rækjuævintýri í føroyskari fiskivinnusøgu.

Í fleiri ár førdi Atli eisini ísfiskatrolarar hjá P/F Samvinnufelagnum. Nøkur ár eftir at felagið í 1984 tók sítt størsta tak nakrantíð, og lat byggja tann størsta og mest framkomna rækjutrolaran tá á døgum, fór Atli umborð – fyrst sum stýrimaður, og seinni sum skipari.

Tað var ikki so sjáldan, at Atli vísti sítt hegni sum skipari. At fiska í ísi og illveðrið við Eysturgrønland ella við Svalbard kravdi dugnasemi og góðan sjómannsskap. Tað kom meira enn so fyri, at Atli fór við stóra og vælbygda skipið sínum at hjálpa øðrum skipum leys, sum vóru blivin føst í ísinum, ella at sleipa skip við maskinbreki í fleiri dagar til nærmastu havn.

Í 1993 byrjaði eitt nýtt kapitull í føroyskari rækjusøgu, tá rækjuveiða tók seg upp á Flemish Cap. Ein dagin ringdi Atli av skipinum, har teir vóru staddur við Eysturgrønland. Hann hevði fingið frænir av, at íslendsk skip gjørdu royndir á Flemish Cap og fingu nógvar rækjur har. Tað var sera lítið at fáa við Eysturgrønland tá, og Atli setti tí kós móti Flemish Cap, har hann nakrar dagar seinni gjørdi sítt fyrsta kast, sum tað fyrsta fyrsta føroyska rækjuskipi.

Ágrýtnið og dirvi hjá Atla bar ávøkstur, tí Flemish Cap gjørdist høvuðsleiðin hjá øllum føroyska rækjuflotanum í mong ár eftir hetta, og tey skip, skiparar og manningar sum troyttu hesar leiðir, hava tryggjað Føroyum stór søgulig rækjurættindi á Flemish Cap.

Men Atli var altíð ágrýtin og altíð til reiðar at royna nakað nýtt. Tað gekk tí ikki long tíð til hann sum tann fyrsti, fór á royndarveiðu eftir rækjum í altjóða sjógvi á Grand Bank eisini. Og hesin hugurin at royna at nakað nýtt kom eisini til sjóndar, tá Atli fór
undir at rigga skip sítt og fiskireiðskapin til, so skipið kundi fiska rækjur við dupulttrolið. Nógvir høvdu til fánýtis roynt at fáa hetta at rigga áður, men eftir stuttari tíð hevði Atli og manning hansara funnið fram til eina loysn sum riggaði.

Hetta var eitt stórt frambrot, og bæði føroysk og útlendsk rækjuskip gjørdu seg seinni út á sama hátt. Í dag er tað púra vanligt at fiskiskip hava bæði 2 og 3 trol.
Hendan tíðin á Flemish Cap og Grand Bank var áhugaverd, men eisini ein avbjóðandi tíð fyri føroyskar rækjuskiparar og reiðarí, tí Canada royndi av øllum alvi at leggja forðingar fyri føroysku royndarveiðuni serliga á Grand Bank, men eisini at avmarka rækjuveiðuna á Flemish Cap. At enda fór Canada so langt sum at steingja sínar havnir fyri føroyskum skipum.

Tíðliga í 90'unum flutti Atli til Hirtshals har hann í 1993 giftist við føroysku Hallu Bang, fødd Johansen, ið sum ung genta flutti saman við foreldrum og systkjum sínum til Hirtshals. Sama árið fingu tey sonin Jóhan.

Atli átti 4 børn frammanundan, Jenny, Barbaru, Arnfinn og Janny - og Halla, ið gjørdist einkja ung, tá fyrri maðurin doyði av sjúku, átti børnini Gitte, Lone og Kenneth.

Atli hevði ikki búð leingi í Hirtshals, tá hann keypti sær ein útróðarbát har, sum hann fiskaði við tá hann var heima millum rækjutúrarnar. Í 2005 gavst Atli at sigla við langfaraskipi, og tá brúkti hann eitthvørt høvi at fara út við gørnunum í baldruta farvatninum við Norðurjylland. Donsku útróðrarmenninir í Hirtshals høvdu stóra virðing fyri dugnaseminum, veiðievnunum og dirvinum hjá Atla, tí tá teir hildu at tað var ikki ”havvejr”, so fór Atli út sum einsamallur bátur. Fyri hann var tað næstan altíð ”havvejr”.

Tá Atli varð jarðaður í Emmersbæk kirkju hevði presturin eina sera beinrakna lýsing av Atla. Atli var á mangan hátt sín egin og fylgdi síni egnu kós. Hann ballaði ikki nakað inn, men segði tað hann hevði upp á hjarta uttan uttanumtos, men oftast við einum skálkaligum smíli. Hann gekk aloftast í sínum eyðkendu, bláu smekkbuksum og tuflum, og hann koyrdi fleiri ferðir um dagin við sínum skutara oman á kaina at hyggja at bátinum. Hann hevði við sínum vinarliga og serliga lyndi eitt serligt pláss í hjartanum á nógvu abba- og ommubørnunum hjá sær og Hallu, og honum dámdi sera væl at fáa vitjan av sínum nærmastu.

Atli hevur á mangan hátt verið ein slóðari, og hevur havt ein týðandi leiklut í nýggjari føroyskari fiskivinnusøgu. Tá Atli gjørdist sjúkur av krabbameini, lat hann hvørki seg sjálvan ella onnur á nakran hátt merkjast av hesum, hóast hann var fullvæl vitandi um álvarsligu sjúkuna. Hann ynskti ikki at tosað um støðuna hjá sær, tí so koma prátið at snúgva seg um hann, og hann ynskti ongantíð at verða í miðdeplinum, hvørki í sínum arbeiðslívið, ella privat. Hóast livdi við støðuni sum hon var, og gjørdi onki hóvasták burturúr, men tók sær av sínum nærmastu og av sínum báti, og róði út so leingi orkan var til tað.

Hin 8. feb. 2025 var seinastu sjógvurin tó rógvin, og Atli legði árarnar inn, umgyrdur av sínum nærmastu.

Við hesum orðum lýsið eg frið yvir minni á svágrinum og dugnaliga úrmælinginum, Atla á Plógv.

09. apríl 2025
JEH

Greinin varð fyrstu ferð løgd út 09. apríl 2025

Konfirmantar í Vesturkirkjuni sunnudagin

-

 

SkrivaÐ:

Innsent

Pálmasunnudag, 13. apríl kl. 11 verður konfirmatión í Vesturkirkjuni í Havn við Bergi D. Joensen, presti.

Konfirmantarnir eru hesir:

Eva á Rógvi, Hagagøta 3, Argir. Dagurin verður hildin á Tórsvølli, inngongd J, við Niðaravølli, frá kl. 17.

Lea Victoria Andreasardóttir, Suðurstíggjur 11, Argir. Dagurin verður hildin í Starvsfelagshúsinum, J. H. Schrøtersgøta 9, frá kl. 16.

Christian Dal Christiansen, Mattalágarvegur 12. Dagurin verður hildin frá kl. 17.

Ingrún Hentze Danielsen, Skemmingsgøta 19. Dagurin verður hildin í Skúlaheiminum í Marknagili, Marknagilsvegur, frá kl. 15.

Janita Sveinbjørnsdóttir Heinesen, Suðurstíggjur 13, Argir. Dagurin verður hildin á Hotel Brandan frá kl. 15.

Bjarti Leth Høgnason, Grønalíð 1. Dagurin verður hildin í Djóna í Geilsgøtu 51, frá kl. 17.

Durita Elisa í Dali, Livulág 5. Dagurin verður hildin á Føroya Handilsskúla, Marknagilsvegur 77, frá kl. 15.

Jóhannis í Stórustovu, Grønalíð 13. Dagurin verður hildin frá kl. 16.

Maria Vatnhamar Jensen, við Klingurstjørn 34, Argir. Dagurin verður hildin í AB-húsinum á Argjum frá kl. 15.

Teresa Vatnhamar Jensen, við Klingurstjørn 34, Argir.  Dagurin verður hildin í AB-húsinum á Argjum frá kl. 15.

Jóna Reinert Joensen, Heygsvegur 16. Dagurin verður hildin á Jøkulstræti 6 frá kl. 17.

Bára Káradóttir, Argjavegur 51 b, Argir. Dagurin verður hildin í Posthúskjallaranum, Tórsgøta 8, frá kl. 15.

Marta Weihe Markling, Leitisgøta 2, Argir. Dagurin verður hildin frá kl. 17.

Eyðun Ellindsson Olsen, Suðurrás 5. Dagurin verður hildin í Tórshavnar Bátafelag, Undir Bryggjubakka 20, frá kl. 17.

Kári Horn Petersen, Torsteinsgøta 3. Dagurin verður hildin frá kl. 16.

Teitur Miné Róason, Heiðastubbi 4. Dagurin verður hildin í Skúlanum á Fløtum frá kl. 15.

Theodor Niels Mariuson Salter, Traðargøta 2B, Argir. Dagurin verður hildin í Kiwanishúsinum, Jøkulstræti 4, Tórshavn, frá kl. 17.

Hákun Djurhuus Samuelsen, Bóndaheygur 4b. Dagurin verður hildin frá kl. 17.

Nóa Róason Stakksund, Bjarnoyarvegur 18. Dagurin verður hildin frá kl. 16.

Stefan Eysturtún Svensson, Villingardalsvegur 15B. Dagurin verður hildin á Pernassinum á Hotel Hafnia frá kl. 15.

Rosa Gjoveraa Sødergren, Varðagøta 25,. Dagurin verður hildin á Handilsskúlanum, Marknagilsvegurr 77, frá kl. 15.

Ragnar Sverri Viderø, Hvannasundsgøta 8. Dagurin verður hildin í Silo, Vestara Bryggja 15, frá kl. 16.

Ingvard Rakularson Ziska, Jákups Dahls gøta 9. Dagurin verður hildin á Restaurant Paz, Dr. Jakobsens gøta 14-16, frá kl. 16.

Greinin varð fyrstu ferð løgd út 09. apríl 2025

Konfirmantar í Sjóvar kirkju pálmasunnudag

-

 

SkrivaÐ:

Innsent

Sunnudagin, pálmasunnudag 13. apríl, klokkan 11 verður konfirmatión í Sjóvar kirkju við Símuin Persson Jacobsen, sóknarpresti.

Konfirmantarnir eru hesir:

Barbara í Selvindi – Gerðavegur 18, Strendur. Opið hús frá kl. 17.30

Maria Kristianna Doctor Ljósá – á Byrgi 23, Strendur. Opið hús frá kl. 16

Alisa Fagradal Johansen – Undir Torvbrekku 24, Strendur. Opið hús frá kl. 17

Markus Lómstein Djurhuus – Geilin 14, Innan Glyvur. Opið hús frá kl. 16

Eyðun Rógvason Rasmussen – Gerðisbrekka 8, Skála. Opið hús í Bygdasalinum í høllini á Skála frá kl. 16

Andreas Paulason – Hórheiðar 58, Skála. Opið hús í Skála skúla frá kl. 16

Adrian Hávardsson – Eyrgøta 22, Strendur. Opið hús í Stranda skúla frá kl. 16

Dion Ingason Hansen – Gerðavegur 16, Skálafjørður. Opið hús í Oyndarfjarðar skúla frá kl. 16

Andrias Lamhauge – úti á Fløtum 15, Skála. Opið hús frá kl. 16

Filip Hjalmarsson – Strandatún 8, Strendur. Opið hús í Pensionistahúsinum á Strondum frá kl. 15

Uffe Christensen – Skálavegur 187, Skála. Opið hús í Meinigheitshúsinum á Skála frá kl. 15.30

Simon Djurhuus – Lágarvegur 18, Strendur. Opið hús í Bygdahúsinum á Strondum frá kl. 17

Greinin varð fyrstu ferð løgd út 10. apríl 2025

Konfirmatión í Húsavíkar kirkju sunnudagin

-

(Mynd: Havstein Klein)

SkrivaÐ:

Innsent

Sunnudagin, pálmasunnudag, kl. 11 verður konfirmatión í Húsavíkar kirkju við Havsteini Klein, sóknarpresti

Konfirmantarnir eru hesir:

Súsanna á Sondum Henriksen, Áarbøur 1, Sandur, opið hús frá kl. 15.

Viktoria Hentze, Ognarvegur 12, Skopun, opið hús frá kl. 17.

Arnbjørn Randrup Sjúrðarson, Skúlavegur 16, Skopun, opið hús frá kl. 17.

Bogi Høgnason í Stovuni, Missiónshúsið í Skálavík, opið hús frá kl. 16.

Kristian Høgni Petersen, Fram við Anni 32, Húsavík, opið hús frá kl. 17.

Rúnar Filip Friðfinsson Nicolajsen, Missiónshúsið í Skopun, opið hús frá kl. 15.

Greinin varð fyrstu ferð løgd út 10. apríl 2025

Konfirmatión í Vestmanna kirkju sunnudagin

-

 

SkrivaÐ:

Innsent

Pálmasunnudag 13. apríl kl. 11 verður konfirmatión í Vestmanna kirkju við Mariu Summers Nolsøe, presti.

Sjey konfirmantar verða fermdir, allar gentur:

Bjarta Matras-Olsen, dagurin verður hildin heima á Rógvuvegi 33. Opið hús frá kl. 15

Gunda Høgnadóttir, dagurin verður hildin í Missiónshúsinum í Vestmanna. Opið hús frá kl. 15

Jóhanna Maria Bay Lodahl, dagurin verður hildin á Rógvuvegi 5. Opið hús frá kl. 15

Sára Bjarkadóttir Joensen, dagurin verður hildin heima í Reynslíð 3. Opið hús frá kl. 17

Hanna Negru, dagurin verður hildin í Miðnám í Vestmanna. Opið hús frá kl. 16

Elsa Petersen, dagurin verður hildin í Frøishøllini, Frammi í Gerði 2, Kvívík. Opið hús frá kl. 17

Ida Joensen, dagurin verður hildin á Hornavegi 11. Opið hús frá kl. 16

Greinin varð fyrstu ferð løgd út 10. apríl 2025

Konfirmantar í Argja kirkju sunnudagin

-

 

SkrivaÐ:

Innsent

Pálmasunnudag 13. apríl kl. 11 verður konvirmatión í Argja kirkju Derhardi Jógvanssyni.

Konfirmantarnir eru hesir:

Elias Símunarson Kerá, Viðargøta 19. Dagurin verður hildin frá klokkan 15.

Filip Lava Bárðarson, Rygsgøta 6. Dagurin verður hildin í Grønlendingahúsinum frá klokkan 17.

Jóhan Páll Bogason, Kirkjustræti 39, Hoyvík. Dagurin verður hildin í hølunum hjá Havnar Handverkarafelag á Stoffalág 60 frá klokkan 17.

Jónas Stefansson Skarðberg, Argjavegur 10. Dagurin verður hildin í hølinum hjá Argja Róðrafelag frá klokkan 14.

Kaj Árnmar Andreasen, Viðargøta 2. Dagurin verður hildin frá klokkan 16.

Markus Carlsson, Garðsgøta 4. Dagurin verður hildin frá klokkan 16.

Rani Eyðfinsson Saxov, Reynsgøta 4. Dagurin verður hildin á Hotel Brandan frá klokkan 17.

Greinin varð fyrstu ferð løgd út 09. apríl 2025

Konfirmantar í Hoyvíkar kirkju sunnudagin

-

 

SkrivaÐ:

Innsent

Pálmasunnudag 13. apríl kl. 11 verður konfirmatión í Hoyvíkar kirkju. Prestur er Bergtórur Hjelm Bjarkhamar.

Konfirmantarnir eru hesir:

Amalia Dam Iversen, Dýrindalsgøta 33. Opið hús verður á Skúlanum á Fløtum, Tórshavn, frá kl. 16. 

Birita Áradóttir á Borg, Karlamagnusarbreyt 54. Dagurin verður hildin heima frá kl.17.

Fríða Kelduberg Hellisdal, Millum Gilja 18. Konfirmatiónin verður hildin heima frá kl. 17.

Hjørdis Sjóvará Bendtsen, Oman Gil 3. Dagurin verður hildin frá kl. 16.30.

Jenny Lóa Nolsøe Poulsdóttir, Jørundargøta 53. Opið hús verður í Skeiva Pakkhúsi, Tórshavn,  frá kl 16.

Katla Bjarkhamar Hjalmarsdóttir, Dýrindalsgøta 27. Dagurin verður hildin í Kirkjukjallaranum í Hoyvíkar kirkju frá kl. 16. 

Maria Høgnesen, Sivjugøta 5. Dagurin verður hildin frá kl.16.

Marianna Skipanes, Óðinshædd 67, Tórshavn. Dagurin verður hildin í Fríkirkjuni Oasan, Kirkjustræti 4, Hoyvík, frá kl 15,

Mary Simona Fjallstein, Millum Gilja 16. Dagurin verður hildin í hølunum hjá KFUM, Hoydalsvegur 6, Tórshavn, frá kl 15.

Sára Johansen, Smærugøta 5, Tórshavn. Dagurin verður hildin í kantinuni á Posta, Óðinshædd 2, frá kl 16.

Álvur Fróðason Mortensen, Við Myllutjørn 11. Dagurin verður hildin heima kl 17.

Eiri Apol, Við Myllutjørn 44. Opið hús verður á Glasi, Janusargøta 3, Tórshavn, frá kl 17.

Bjarki Nóel Jensen, Bertugøta 4. Opið hús verður í Føgrulíð 15, Tórshavn, frá kl. 16.

Gunnar Johannesen, Smærugøta 5, Tórshavn. Dagurin verður hildin í kantinuni á Posta, Óðinshædd 2, frá kl 16.

Jósef Etinosa Erharuyi, Torkilsgøta 1. Dagurin verður hildin á Vegnum Langa 23, Hoyvík, frá kl. 16.

Løðar Gillason Djurhuus, Kirkjustræti 5. Opið hús verður í Broncks, Jónas Broncksgøta 17, Tórshavn, frá kl. 17.

Niklas Brøðraberg, Jørundargøta 56. Dagurin verður hildin í Skúlanum við Løgmannabreyt frá kl. 16. 

Noah Apostolos Moraitis, Karlamagnusarbreyt 14 A, 2tv. Dagurin verður hildin heima í Mannbrekku 14, frá kl 17.

Greinin varð fyrstu ferð løgd út 09. apríl 2025

Konfirmantar í Hvalvíkur kirkju

-

 

SkrivaÐ:

-

Í morgin, pálmasunnudag, kl. 11 verður konfirmatión í Hvalvíkar kirkju. Prestur er Jákup E. Petersen.

Konfirmantarnir eru hesir:

Adrian Kjeld Joensen. Dagurin verður hildin í Róðraneystinum í Streymnesi frá kl. 16

Elias Hammer Hansen. Brekkugerði 12, Hósvík. Dagurin verður hildin heima frá kl. 16.

Gilli Haraldsson. Traðavegur 41, Streymnes. Dagurin verður hildin heima frá kl. 16

Hans Karl Hellisá. Heinagerði 9, Streymnes. Dagurin verður hildin heima frá kl. 15

Henry Fuglø. Hvalvík. Dagurin verður hildin á Traðavegi 26, Streymnes frá kl. 16

Jacob Slættalíð. Streymnes. Dagurin verður hildin í skúlanum á Langasandi frá kl. 15

Joan Bjarnadóttir Clausen. Hvalvík. Dagurin verður hildin í Sundalags Bátafelag, á keiini í Hvalvík frá kl. 15

Jónas Arnbjørnsson Láadal. Traðavegur 47, Streymnes. Dagurin verður hildin heima frá kl. 16

Oddvør Alberta Kimsdóttir. Traðavegur 16, Streymnes. Dagurin verður hildin heima frá kl. 16

Rói Sørenarson. Brekkugerði 14, Hósvík. Dagurin verður hildin heima frá kl. 16

Rókur Magnusarson. Streymnes. Dagurin verður hildin í Hvalvíkar Missiónshúsi frá kl. 15

Samson Gunleifsson Hansen. Hvalvík. Dagurin verður hildin í Heinagerði 9, Streymnes frá kl. 15

Sesilia Frederiksen. Brekkugerði 6, Hósvík. Dagurin verður hildin í Bygdarhúsinum frá kl. 15

Greinin varð fyrstu ferð løgd út 12. apríl 2025