Havnarbáturin avgjørdi alt á heimasjógvi

Hann fór veruliga frá Klaksvíkingi, tá teir komu inn um Molan. Havnarbáturin vann við einari bátslongd, og er harvið FM-vinnari fyri fyrstu ferð síðani 2008

(Mynd: Jens Kr. Vang)

SkrivaÐ:

Agnar Prestá

Eftir róðurin á Vestanstevnu var lagt upp til satt FM-brak millum 10-mannaførini á ólavsøku. 

Tað var eisini tætt eina løtu - Havnarbáturin helt Klaksvíkingi ein hálvan skut til ein skut aftan fyri seg - men tá komið var nakað innum munin, fór báturin við drekastevninum frá.

Heimafjøldin hoyrdist betri og betri, sum tað gjørdist meira og meira greitt, at FM fór at flyta seg úr Klaksvík til Havnar.

Tá drekastevnið kom um málið var umleið ein bátslongd og 2,78 sekundir á muni. Fýrverk hoyrdist, sólir sóust, og fagnaðurin var øðiligur. 

Fýra-ára sigursrøðin hjá Klaksvíkingi er brotin, og Havnarbáturin vann FM fyri fyrstu ferð í 17 ár. Hetta eftir flottan róður í góðveðrinum ólavsøkuaftan.

Sí eisini video frá róðrinum: Ovfarakæti á Tinganesi

Havnarbáturin vann í tíðini 4 minuttir og 02,46 sekund. 2,78 sekund framman fyri Klaksvíking og 5,73 til Norðoying.

Havnarbáturin fekk sostatt 46 FM-stig, Klaksvíkingur 45 og Norðoyingur 35 stig.

Sí allar myndirnar frá ólavsøkukappróðrinum

Hjá 8-mannaførunum var tað enn einaferð Ørvur hjá Havnar Róðrarfelag, sum vann í tíðini 4 minuttir og 15,14 sekund, 4,10 sekund framman fyri Argjabátin og 7,98 sekund framman fyri Risan av Eiði.

Ørvur vann við fullum stigatali, 49 stig, Risin fekk 41 og Argjabáturin 34 stig.

Í størsta bátaslagnum við kvinnum, vann Jarnbardur hjá Knørrafelagnum í Havn eisini allar róðrarnar. Jarnbardur vann í tíðini 4 minuttir og 50,33 sekund og var nógv framman fyri Glyvrabátin, ið gjørdist nummar tvey og Gongurólv hjá Havnar Róðrarfelag, sum gjørdist nummar trý.

Jarnbardur gjørdist føroyameistari við 49 stigum, Glyvrabáturin fekk 29 og Hósvíkingur 28 stig.

Sí øll úrslitini frá ólavsøkuróðrinum og FM-støðurnar her

Sí eisini samrøðu við Rasmus Jónsson: - Hetta verður ikki størri

Greinin varð fyrstu ferð løgd út 28. juli 2025

Kjósin og Kollur róðu sannførandi FM til Kollafjarðar

Kvinnusíðan hjá KÍF kappróðri hevur gjørt bart: Tvey gull komu undir land á ólavsøku. Kvinnurnar endurvunnu føroyameistaraheitið, og gentur 14-16 eru eisini bestar í 2025

Eins og í fjør, kundu tær umborð á Kjósini fegnast um ólavsøkusigur og FM (Savnsmynd: Sverri Egholm)

SkrivaÐ:

Agnar Prestá

Fýrverk var at hoyra stutt eftir róðrarnar fyri at heiðra ólavsøkuvinnararnar og føroyameistararnar úr KÍF kappróðri.

Bæði Kjósin (5 mannafør kvinnur) og Kollur (5 mannafør gentur, 14-16 ár) vóru tvey stig frammanfyri í FM-stríðnum undan dagsins róðrum. Harvið var nóg mikið at enda í topp-tvey, og appelsinlittu bátarnir við knáu kollafjarðakvinnunum lótu als ongan iva um, hvat FM skuld fara.

Kjósin vann dagsins fyrsta FM-róður sannførandi framman fyri tættasta kappingarneytan, Fípuna Føgru. Báturin úr Klaksvík var frammanfyri eftir fyrstu tøkini, men skjótt fór Kjósin frá og vann greitt eftir ein flottan róður.

Uppaftur meira sannførandi var sigurin umborð á Kolli, sum høvdu heili seks niður til silvurvinnaran - eisini úr Klaksvík.

Greinin varð fyrstu ferð løgd út 28. juli 2025

KÍ ger tað enn einaferð: Víðari til triðja umfar

Við 1-0 sigri á heimavølli hóskvøldið á FK Radnicki 1923, er KÍ víðari til triðja umfar í Conference League

Enn einaferð var tað Árni Frederiksbnerg og Páll Klettskarð, sum tryggjaðu KÍ søtan sigur. (Mynd: Sverri Egholm)

SkrivaÐ:

Áron Vest

KÍ legði hart fyri, við fleiri vandamiklum umstillingum. Nakrir støðgir vóru í spælinum, har KÍ gjarna hevði sæð, at teir fingu fríspark, men dagsins dómari, 34 ára gamli Roman Jitari úr Moldova, lat ikki við seg koma.

Fyrstu 10 minuttir vóru ikki uttan álopsspæl, men uttan veruligar málmøguleikar. Eitt horna var til gestirnar í 10. minutti, uttan nakað spurdist burturúr, uttan eitt fríspark til málverjan hjá gestunum úr Serbia. Fáar minuttir seinni fingu gestirnir skot á mál, men til fánýtis. Hornasparkið, ið kom eftirfylgjandi, spurdist heldur onki burturúr.

Longu innkastini frá Árna Frederiksberg vóru av sonnum vápn í arsenalinum hjá KÍ, hóast 7’arin við tí gylta vinstra beininum og longu innkastunum, vildi ynskt at meir kom burturúr. At síggja til vóru FK Radnicki 1923 ikki heilt ófyrireikaðir uppá tað. Teirra uppstillingar til deyðbóltsmøguleikarnir hjá KÍ vóru væl repiteraðar.

Útiliðið hevði nakrar møguleikar við deyðbóltum, millum annað við frísparki í 19. minutti, tá Milos Ristic legði ein djúpan bólt inn í brotsteigin, men enn einaferð til fánýtis.

Sí samrøðu við Sebastian John: - Hetta er tí eg eri her

Størsti málmøguleiki í fyrra hálvleiki var í 32. minutti, tá Radnick sleppur til innlegsstøðu úr vinstru, men ongin KÍ-verjuspælari avgreiðir støðuna, og Chiendu var nær við at fáa ordiligt skot á. Gjørdi hann tað, var 0-1 til útiliðið úr Serbia.

Tá 39 minuttir vóru spældir, kom forloysingin, sum heimaliðið hevði tørv á. Við hørðum og tekniskt væl útførdum hornasparki, legði Árni Frederiksberg ein góðan bólt til Páll Klettskarð, sum hegnisliga stútaði bóltin í málið. 1-0 til KÍ.

Beinanvegin í seinna hálvleiki tóktist leikgongdini vera tann sama. Leikliga var KÍ greitt omaná, tó uttan at úrslitið avspeglaði tað. Eins og í fyrra hálvleiki, so var heimaliðið øgiliga tilvitað um at gagnnýta longu innkastini frá Árna Frederiksberg, men her tóktist útiliðið hava lisið uppá.

Sí samrøðu við Árna Frederiksberg: - Hesi kvøldini eru bara nakað heilt serligt

Eitt sindur av øking var í intensitetinum og málmøguleikarnir vóru fleiri. Tá einans sjey minuttir vóru eftir av vanligu leiktíðin fingu serbar ein heldur tilvildarligan málmøguleiki, einar 10 metrar frá mállinjuni. KÍ málverjin, Sebastian John, leyp út og stórbjargaði í stórum stíli. Nakrar ferðir eftir hetta, tá serbar løgdu mest trýst á, var Sebastian John aftur í fullari longd og bjargaði bóltinum frá at fara í mál.

Sostatt skal KÍ spæla ímóti Neman Grodo úr Hvítarusslandi í triðja umfari í Conference League. Hetta merkir, at dysturin móti 07 Vestur í Betri deildini, sum skuldi verða spældur leygardagin, verður útsettur.

Fyrri dysturin verður á Tórsvølli týsdagin. Returdysturin verður helst spældur í Ungarn, har Neman Grodo úr Hvítarusslandi hevur sín heimavøll tá talan er um evropeiskar dystir. 

Sí allar myndirnar her

UEFA Europa Conference League
Hósdagin 31. juli
KÍ - FK Radnicki 1923 (1-0) - Samanlagt 1-0
39' 1-0 Páll Klettskarð (Árni Frederiksberg)

KÍ: Sebastian John - Odmar Færø, Deni Pavlovic, Gaston Tellechea, René Shaki Joensen (83' Daniel Johansen), Árni Frederiksberg, Jákup Andreasen (L), Hallur Hansson, Jóanes K. Danielsen (90' Claes Kronborg), Patrik Johannesen (83' Mads Boe Mikkelsen), Páll Klettskarð

Komandi dystur:

Týskvøldið 05. august kl. 19.45: KÍ - FK Neman (Hvítarussland)

Greinin varð fyrstu ferð løgd út 31. juli 2025

Evropeiski dystur nummar 50 hjá Odmari Færø

Sterki KÍ-verjuspælarin, ið aftur spældi ein frálíkan dyst hóskvøldið, er fyrsti føroyski mannligi spælari, ið hevur spælt hálvthundrað dystir í Evropa

Odmar Færø fegnast saman við soninum eftir sigrinum á serbiska Radnicki (Mynd: Sverri Egholm)

SkrivaÐ:

Agnar Prestá

Triðja dystin á rað helt KÍ málið reint. 

Í fýra evropeiskum dystum í summar hevur liðið hjá Magnusi Powell bert latið eitt mál inn. Talan var um langskot í fyrsta dystinum í Finnlandi.

Uppskriftin er ein ógvuliga sterk verja í 5-4-1 leikskipanini; tað eru spælarar, ið arbeiða gróthart og rætt og vita hvat skal til.

Tað byrjar frá fremsta manni, Pálli Kletsskarð, til rennisterkan og royndan miðvøll og til aftasta mann. Síðani Mark Jensen noyddist út við heilaskjálvta í heimadystin móti SJK í 1. umfari.

So er tað verjuketan: Landsliðsspælararnir Jóannes Kalsø Danielsen og René Shaki Joensen sum við snildni, ferð og treiskni eru ein marra fyri vengur - serliga stóð Shaki sterkur í myndini aftur í avgeranddi dystinum í 2. umfari.

Teir tríggir miðverjarnir gera so at siga heldur ikki mistøk. Deni Pavlovic hevur víst tað fyrr, og kom hann fyri so at siga alt mitt fyri móti serbisku mótstøðuni. Argentinski Gaston Telechea hevur verið ein sannur fongur við sannførandi og ágangandi spæli, og Odmar Færø vísir, hví KÍ saknaði hann í fyrru hálvu í fjør.

"Deni eigur Serbia, sungu KÍ-fjepparar" eftir haðrvunna og góða sigurin hóskvøldið. Serbin vísti veruliga styrki móti mótstøðuliðnum úr heimlandinum (Mynd: Sverri Egholm)

Gastón Nicholas Telechea hevur spælt sum tann vinstri av trimum miðverjum í Evropa. Tað tykiskt ikki at vera serliga stuttligt at spæla móti argentinanum, Odmari Færø og hinum (Mynd: Sverri Egholm) 

35-ára gamli miðverjin við 50 evropeiskum dystum

Tá KÍ vann 1-0 samanlagt í 2. umfari stóð Odmar Færø aftur sterkur í myndini. 35-ára gamli miðverjin hevur sum heild havt eitt frálíkt kappingárar; skaðafríur, sterkur og við fáum mistøkum.

Nummar 22 vann nógvar nærdystir móti tRadnicki, og Odmar kundi aftaná fegnast.

- Vit eru øðiliga fokuseraðir og uppsettir. Tað er ikki altíð tað penasta fótbóltsspælið, men vit standa saman og vísa styrki, segði verjuspælarin við FM1 eftir dystin.

Odmar Færø er nær við at skora - í egnum brotsteigi vardi maðurin við reyða skegginum ógvuliga væl fyri saman við liðfeløgunum (Mynd: Sverri Egholm)

Odmar Færø staðfesti eisini, at hann ikki hevði gáað um, at hetta var hansara evropeiski dystur nummar 50.

Hann er fyrsti mannligi spælarin, ið er komin upp á hálvthundrað slíkar dystir. 

Malena Josephsen og Rannvá Biskopstø Andreasen spældu ávíkavist 54 og 56 Champions League-dystir fyri krútsterka KÍ-liðið frá fyrst í 00'unum. Rannvá er mest skorandi føroyski spælarin í Evropa við 16 málum - hjá monnum er tað Árni Frederiksberg við 14 málum.

Fleiri liðfelagar hjá Odmari hava eisini nógvar evropeiskar dystir. Millum annað hevur Árni Frederiksberg nú 48 dystir, og bæði Deni Pavlovic og Jóannes Kalsø Danielsen hava nú báðir 45 dystir.

Greinin varð fyrstu ferð løgd út 01. august 2025

Serbin á KÍ-liðnum: Havi altíð kent meg sum heima her

- Eg havi stóra virðing fyri okkara fjepparum og fólkinum her, sum geva okkum spælarum so nógv, og her er sum ein familja. Eg royni altíð at geva teimum aftur, sigur Deni Pavlovic, sum er í sínum 8. kappingarárið í KÍ

Deni í føðistaðnum Beograd saman við foreldrum sínum tá KÍ spældi har í síðstu viku. 31-ára gamli serbin var fegin um at síggja tey aftur og um at spæla aftur í Serbia, men hann staðfestir eisini, at Klaksvík er eitt serstakt stað fyri hann, og at hópur og fólk rundanum eisini eru sum ein familja (Mynd: Klaksvíkar ítróttafelag)

SkrivaÐ:

Agnar Prestá

Fyri einari viku síðani spældi Deni Pavlovic sín evropeiska dyst nummar 44 fyri KÍ. Fryntligi serbin kom til KÍ og Klaksvíkar tíðliga í 2018, og hevur síðani verið við at vunnið fýra FM við felagnum. Eisini hava nógvar stórar løtur verið í Evropa, men hansara evropeiski dystur nummar 44, var tann fyrsti í heimlandinum.

Deni er føddur í Beograd, og tá KÍ-hópurin kom til serbiska høvuðsstaðin týsdagin í síðstu viku í sambandi við 2. umfar í Conference League, tóku foreldur hansara ímóti. 


Deni Pavlovic fær klemm frá mammu síni á flogvøllinum í Beograd (Mynd: Klaksvíkar Ítróttarfelag)

- Tað verður ikki so lætt sum teir halda - stóra virðing fyri okkara fjepparum

Eftir málleysa javnleikin millum Radnicki og KÍ hava serbisku miðlarnir skriva og sagt eitt sindur. Teir, og spælararnir á serbiska liðnum, høvdu góðar vónir til dystin í Klaksvík hóskvøldið, men Deni minnir á, at dysturin nú verður í umstøðum, sum hóska betri til KÍ.

- Serbisku miðlarnir rósa KÍ. Teir staðfesta, at vit megnaðu at fáa áleið tað burturúr, sum vit ætlaðu í fyrra dystinum. Teir hjá heimaliðnum vóru ikki nøgdir við 1. hálvleik men betri nøgdir við 2. hálvleik og halda, at um teir spæla soleiðis har, so kemur mann víðari...men tað verður ikki so lætt, sum teir halda. Hetta verður í kendu umstøðunum hjá KÍ, og vit trúgva uppá tað og uppá hvønn annan, segði Deni undan seinna dystin í Klaksvík.

KÍ er javnan komið víðari í Evropa seinastu árini - Radnicki hevur bert tríggjar evropeiskar dystir og onga víðari luttøku á baki.

Deni Pavlovic í Champions League-dysti móti Häcken í 2023. KÍ spældi seg tá víðari móti svenska meistaraliðnum og endaði í einum bólkaspæli - deildarspæl er eitt mál hjá KÍ í ár (Mynd: Sverri Egholm)

Við Portalin sigur verjukendi miðvallarin hjá KÍ, at honum dámdi væl at spæla í Serbia aftur, hóast tað var ógvuliga heitt: - Tað var serstakt, og nógvir lívliigir áskoðarar vóru til dystin. Tað dámar mær at spæla fyri. 

Hóskvøldið skuldi Deni Pavlovic spæla framman fyri fullsettari Djúpumýru: Øll 1.600 plássini vóru farin undan dystinum.

- Eg havi stóra virðing fyri okkara fjepparum, sum geva okkum so nógv. Eg royni altíð at geva teimum aftur - millum annað við at vinna meistaraheitir og her í evropeiskum dystum. Eg fari at geva alt á vøllinum aftur í morgin, og tá vit skora frammanfyri okkara fjøld er tað ein faktastisk kensla...tað er tað besta hjá okkum fótbóltsspælarum at fegnast í hasi sekundini; tað hevði verið ein stór løta, um eg skoraði aftur í Evropa, staðfestir serbin undan dystinum hóskvøldið.

- Eg havi stóra virðing fyri okkara fjepparum, sum geva okkum so nógv. Eg royni altíð at geva teimum aftur 

Til heimadystin móti SJK fyri tveimum vikum síðani (Mynd: Sverri Egholm)

Sí eisini: KÍ-liðformaðurin: - Hetta eru teir dystirnir vit minnast

Kennir seg væl á sterkum KÍ-liði: - Er sum ein familja

Deni Pavlovic hevur spælt á nógvum góðum KÍ-liðum seinastu árini. Hann vil ikki siga, um hetta er tað sterkasta higartil, men ósigraða liðið hjá Magnusi Powell hevur nakað serstakt, staðfestir hann fyri Portalinum.

- Vit hava altíð ein góðan hóp. Vit avrika væl, og her eru nakrir góðir menn. Vit hava stóra virðing fyri hvørjum øðrum og vilja stríðast fyri hvønn annan. Tað er eitt sindur sum ein familja.

Deni er farin at duga betri og betri føroyskt - tó tóku vit hetta prátið á enskum. Men hann nikkaði, tá vit spurdu hann, um hann ikki mátti kenna seg eitt sindur heima nú.

- Jú, eg merki tað sum, at eg hoyri til her. Frá byrjan havi eg verið væl móttikin í felagnum og í býnum, og fólk eru ógvuliga fitt. Tí vil eg eisini geva aftur, segði "serbiski klaksvíkingurin" at enda við Portalin.

(Savnsmynd: Sverri Egholm)

Greinin varð fyrstu ferð løgd út 31. juli 2025

HB fall við æru á Brøndby Stadion

Føroysku steypavinnararnir hildu uppgerðini á lívi til seinasta sekund, og tað var nær við at eydnaðist at javna móti danska stórfelagnum. Tað endaði tó samanlagt 2-1 til Brøndby í 2. umfari í Conference League

Brøndby slapp ikki av við HB, fyrr enn 94 og ein hálvur minuttir vóru farnir (Mynd: HB / RSMedia)

SkrivaÐ:

Agnar Prestá

HB var kroyst í stórum løtum fyri steðgin hóskvøldið, og tað var uppiborið, at Brøndby var á odda eftir 1. hálvleik.

Sho Fukada prikaði bóltin í málið eftir harðan bólt inn fyri málið frá Clement Bischoff, har HB-spælararnir júst ikki megnaðu at koma fyri. 1-0 á kvøldinum og 2-1 samanlagt.

Hetta varð einsamalla málið á Brøndby Stadion, har mongu heimáskoðarnir ikki kunnu vera serliga nøgdir við 2. hálvleik: Heimaliðið fekk ikki stongt hurðina fyri HB, sum treiskaðist og satsaði meira og meira sum fráleið.

HB skapti støðurnar og helt spenninginum

Liðið hjá André Olsen skapti nakrar støður, sum frá leið: Sammy Skytte hevði ein stútara, Emil Grønn Petersen var tvær ferðir við nær við, og Patrick Pentz var noyddur at veruliga fara til arbeiðis í málinum.

Brøndby hevði 2-3 ógvuliga góðar støður til at økja við, sum HB hugsavnaði seg meira um at trýsta, men Bjarti Vitalis Mørk var tryggur.

HB stakk heilt til tað seinasta: Innskifti Mathias Voss hótti í høgru, og í 94. minutti kom ein bóltur inn í Brøndby-brotsteigin. Hetta var gylti møguleikin, men Emil Grønn rakti ikki bóltin, og júst sum Klavs Kramens, sum var tveittur fram, síðani skuldi smekka til, kom eitt Brøndby-bein fyri.

(Mynd: HB / RSMedia)

Dómarin bríkslaði av, og tað sá út til at vera ein lætti á teimum hjá danska stórfelagnum: Teir høvdu væntað at vunnið greitt samanlagt, men HB vildi tað øðrvísi.

Viljormur Davidsen sat uttanfyri við skaða, og Ári Mohr Jónsson noyddist longu út eftir tólv minuttir við tí, sum líktiskt vøddaskaða. Hinir himpraðust tó ikki, og vístu góðan hugburð.

Fyrsta tapið hjá André Olsen og toymi og HB úti av Evropa, men tað er sanniliga við høgari pannu og stoltleika. HB bjóðaði Brøndby av yvir tveir dystir og til tað seiansta; tað høvdu kanska ikki so nógv sá áðrenn - serliga í Danmark. Flott føroyskt avrik í Evropa

UEFA Europa Conference League
Hósdagin 31. juli
Brøndby - HB 1-0 (1-0) - Samanlagt 2-1
31' 1-0 Sho Fukuda (Clement Bischoff)

(Mynd: HB / RSMedia)

HB: Bjarti Mørk - Lassana Faye, Klavs Kramens, Bartal Wardum (L), Ási Dam, Ári Jónsson (17' Heini Sørensen), Heðin Hansen (71' Jákup Thomsen), Noah Mneney, Emil Grønn Pedersen, Sammy Skytte, Jonas Enkerud (71' Mathias Voss).

Greinin varð fyrstu ferð løgd út 31. juli 2025

Blandaðar kenslur millum Brøndby viðhaldsfólk

Hóast HB viðhaldsfólk iðra seg um at ikki koma longur í evropeiskum fótbólti, so iðra partar í Brøndby-leguni seg um, at tað "einans" endaði 1-0

Fjeppararnir hjá Brøndby á Tórsvølli, til fyrru uppgerðina. (Mynd: Sverri Egholm)

SkrivaÐ:

Áron Vest

Nú er tað upp til KÍ og Víking at halda føroyska evropaævintýrinum koyrandi. Tíverri fyri fótbóltsføroyar, tapti HB 1-0 á danska Brøndby IF. Hetta var eftir málið frá nýggja Brøndby leikaranum, japanska Sho Fukuda. Sami leikari var kosin til dagsins leikara. 

Hóast Brøndby í størsta mun var omaná í fyrra hálvleiki, við bæði skotum á stong og yvirleggjaran, so vísti HB av álvara sína leikligu dygd og sínar taktisku styrkir. HB megnaði við hesum væl at gangnýta verjufeilir hjá Brøndby. 

- Brøndby var tættari við 2-0 sigur, enn HB var við javnleik

Miðilin, sum vit í dag skrivaðu um her, 3.point.dk, leggur eftir dystin eina samanumtøku út, har teir siga, at HB ikki hevði nokk til at skora útjavnandi málið.

- Sjálvt um tað á pappírinum var ein tepur sigur, so vóru vit nærri við 2-0 enn mótstøðuliðið var við 1-1, skrivar miðilin í grein síni. 

Á sosialu miðlunum hjá Brøndby IF viðhaldsfólki kann lesast, at fjepparar als ikki eru nøgdir við 1-0 sigur á "det lille hold fra Tórshavn", sum liðið í hvassorðaðari viðmerking verður kallað. Fleiri viðmerkingar eru so mikið grovar, at tær ikki verða endurgivnar her. 

- Eitt lið, har ongin fær løn og ongin venur meir enn tríggjar ferðir um vikuna, kann ikki spæla so væl móti Brøndby

Helst er hendan viðmerkingin millum tær grovastu. Ein skal ikki kenna fótbólt serliga væl, fyri at vita betur. Tað er alment kent, at leikararnir, umframt venjarar, fáa løn og venja nógv meir enn tríggjar ferðir um vikuna. Í fótbólti, eins og í øðrum ítrótti, er tað ofta so, at tá kenslurnar sita uttaná, tá verður mangt býttisligt sagt. 

Venjarin hjá Brøndby, Frederik Birk, var eiheldur nøgdur við spælið hjá sínum leikarum, hóast hann fegnast um at vera komin víðari til triðja umfar í Conference League. Brøndby skal har spæla móti íslenska Víkingur, har Gunnar Vatnhamar spælir við.

Greinin varð fyrstu ferð løgd út 31. juli 2025

NSÍ tapti 4-1 í fyrstu Champions League-royndini

Rebekka Benbakoura gjørdi bart tíðliga, og legði NSÍ á odda, men vertirnir reistust í hitanum. Harvið kann NSÍ ikki koma víðari, men ein dystur afturat skal spælast í dag

Rebekka Benbakoura skrivaði søgu í Skopje, men tað var ikki nóg mikið hjá NSÍ (Savnsmynd: Sverri Egholm)

SkrivaÐ:

Agnar Prestá

NSÍ var í dreymalandi eina løtu í Norðurmakedonia. 

Tá bert ellivu minuttir vóru spældir av dystinum í Skopje - tí fyrsta Champions League dystinum hjá NSÍ-kvinnunum higartil - legði Rebekka Benabakoura tær gulkløddu á odda.

Áleyparin las eina støðu væl, og revsaði eitt mistak í makedonsku verjuni, tá hon fangaði bóltin og sendi bóltin millum beinini á málverjanum.

Harvið skoraði Rebekka fyrsta málið í evropeiskari kapping higartil hjá NSÍ-kvinnunum, og sendi hon gestirnar á sigurskós. 

Megnaðu ikki at standa ímoti

Leiðslan hjá føroyameistarunum helt tó ikki leingi í Skopje. Ljuboten javnaði við langskoti tríggjar minuttir seinni, og beint undan vatnsteðginum skoraði heimaliðið við heldur tilvildarligum máli.

Beint fyri steðgin spældi Ljuboten seg úr høgum trýsti, bólturin varð sendur innum verjuna hjá NSÍ, og so var 3-1.

Tað gjørdist ov tungt hjá NSÍ at venda tí í nógva hitanum í Skopje, hóast liðið hjá Allani Dybczak spældi seg til nakrar fínar støður.

Heimaliðið skoraði til 4-1 í 58. minutti, og Ljuboten skal sunnudagin spæla um víðari luttøku.

NSÍ spæla móti bulgarska NSA Sofia í dag klokkan 10. Har er tó ikki pláss í 2. umfari uppá spæl - tað spæla Ljuboten og Pyunik um í morgin.

NSÍ-liðið. Tær fyrstu kvinnurnar, sum hava umboðað felagið í Champions League - frammanundan hava EBS/Skála - tvær ferðir og KÍ - yvir tjúgu ferð - spælt í kappingini (Mynd: NSÍ)

Uefa Woman's Champions League 1. undanumfar
Mikudagin 30. juni
Ljuboten - NSÍ 4-1 (3-1)
12' 0-1 Rebekka Benbakoura
15' 1-1 Aleksandra Markovska
24' 2-1 Hava Mustafa
45' 3-1 Ulza Maskuti
63' 4-1 Marian O. Ohadiwe

Greinin varð fyrstu ferð løgd út 30. juli 2025

Víkingur fær vitjan av Linfield hóskvøldið

Norðurírsk mótstøða hjá føroyameistarunum í 3. umfari í Conference League. Fyrri dysturin millum liðini verður spældur á Tórsvølli hóskvøldið 7. august klokkan 19

 

SkrivaÐ:

Agnar Prestá

Eftir at Víkingur varð sligið út úr Champions League 15. juli, hevur liðið úr Eysturkommunu ikki spælt.

Næsta uppgáva verður í Sørvági í kvøld í Betrideildini, og so er tað evropeiskur fótbóltur aftur.

Sum Champions League-lið í 1. umfari fær liðið altíð í minsta lagi ein eyka møguleika, og Víkingur varð varpað yvir í Conference League eftir ósigurin í fyrsta undanumfari í Champions League.

Har hendi tað, at Víkingur gjørdist eitt av liðunum, sum trekti fríumfar í 2. umfari, og tí hava teir í ljósabláum ikki spælt í hesari vikuni ella í síðstu viku.

7. august verður tað aftur. Fyrri dysturin í 3. umfari er á skránni á heimavølli. Hetta verður av Tórsvølli av tí at í "Q3"  - 3. umfari í evropeisku undankappingunum - er tað bert Tórsvøllur av føroysku leikvallunum, sum er góðkendur.

Talan er um eitt mótstøðulið, sum fleiri ferðir hevur verið í Føroyum: Linfield. 

Norðurírska meistaraliðið sendi litaviska Zalgiris út við 2-0 sigri í Belfast hóskvøldið. 

Víkingur skal spæla seinna dystin í 3. umfari í norðurírska høvuðsstaðnum 14. august. Fyrri dysturin verður spældur á Tórsvølli hóskvøldið klokkan 19.

Greinin varð fyrstu ferð løgd út 31. juli 2025

TB ognartók Gundadal á ólavsøku

Seinna hálva í fremstu mansdeildini byrjaði við einum veruligum skelki. Spælarar og viðhaldfólk hjá TB vóru omaná í dýrdarveðrinum ólavsøkuaftan, og 2-0 sigurin á B36 merkir, at liðið nú er oman fyri niðurflytingarstrikuna

Nikolei Johannesen og TB gjørdu bart móti B36 ólavsøkuaftan (Savnsmynd: Sverri Egholm)

SkrivaÐ:

Agnar Prestá

- Kom so TB, TB vinna skal! Okur, okur eiga Gundadal.

Soleiðis ljóðaði ofta í høvuðsstaðnum fyrra ólavsøkukvøld, har mangir ovfarakætir TB'arar av álvara komu í betri ólavsøkuhýr. Júst áskoðararnir hjá TB settu veruliga dám á og gjørdu stóran mun í ólavsøkudystinum.

B36 var á pappírinum stórfavorittur undan dystinum, men tað var TB, sum tók øll stigini og ólavsøkusteypið í fyrsta dystinum í fremstu mansdeildini eftir summarsteðgin.

B36 hevði bóltin meira, men TB-liðið var vælskipað og spældi á so mangan hátt dystin rætt.

TB tók veruliga yvir eftir steðgin

Tað var málleyst í steðginum, og tað var serliga í 2. hálvleiki, at TB var omaná.

Leiðslumálið kom seks minuttir eftir hvíldina: Torkil Holm fór til stroks í høgru, legði innfyri, og umvegis ein B36'ara stakk bólturin til Joel Sundström. Svenski miðvallarin kom til TB beint fyri summarsteðgin, og hann skoraði sítt fyrsta mál; til stóran fagnað fyri stóru TB-fjøldina.

Tey díktu á bygdaskýlinum og kring har, og inni á vøllinum gjørdu teir svørtkløddu sítt. Liðið hjá Thomas Thinggaard syrgdi fyri, at heimaliðið ikki skapti serliga nógv, og TB hótti eisini við mótálopum.

Tað var eitt slíkt, sum avgjørdi dystin í 84. minutti - stutt seinni hevði TB eisini verið nær við. Mattias Weihe Joensen spældi bóltin mitt til Mohammed Samba, sum av miðum vølli streyk avstað. Kviki vongurin setti tríggjar B36'arar av á veg inn í brotsteigin, har Samba setti bóltin flott í málið til 2-0.

Nú kókaði í bygdaskýlinum, meðan tað byrjaði at tømast í B36-skýlinum. Heimaliðið skapti nakrar støður, har serliga Bogi Reinert-Petersen, ið varð blakaður fram, var nær við. Tað var tó eisini nær við, at tað varð 0-3. Serliga eyðsýndi Nikolei Johannesen var nær við.

Týðandi TB-sigur - stúran hjá B36

Tað endaði tó við trimum stigum, steypið og stórum fagnaði á TB-spælarum og viðhaldsfólki, sum veruliga setti seg á Gundadal henda vakra ólavsøkuaftan. 

Talan var um eitt sterkt liðavrik hjá yngru sum eldru tvøramonnum saman við nøkrum útlendingum, men serliga Amidou Diop úr Senegal stóð sterkur í myndini.

Annar sigurin hjá aldursforsetanum í ár, og tann fyrsti á útivølli. Við hesum er TB nú omanfyri niðurflytingarstrikuna og leggur trýst á FC Suðuroy og serliga 07 Vestur. Tey spæla móti ávikavist HB og Víkingi í umfarinum. TB og FC Suðuroy bresta saman 10. august.

Við B36-brillum varð ólavsøkudysturin eitt stórt vónbrot. Fyriuttan áskoðarainntøkurnar kann hann ikki nýtast sum nógv annað enn ein lærupeningini; kanska eisini ein áminning um at B36 megnar ov illa at avgreiða hesar uppgávurnar móti liðum úr niðaru hálvu.

Seinasti dystur undan summarsteðginum endaði 2-2 eftir 2-0 leiðslu og við 11 móti 10 í grannauppgerðini. Pætur Petersen og Ragnar Samuelsen høvdu leikbann í hesum dystinum, men hetta skal ikki vera ein umbering hjá liðnum, sum liggur á evropeiskum plássi, og sum nú tapti á heimavølli móti liðnum, sum frammanundan var niðast.

Betrideildin 17. umfar
Ólavsøkuaftan, 28. juli
B36 - TB 0-2 (0-0)
52' 0-1 Joel Sundström
84' 0-2 Mohamed Samba

Hinir dystirnir í 17. umfari verða spældir soleiðis:

Leygardagin 2. august kl. 18.30: 07 Vestur - Víkingur

Sunnudagin 3. august kl. 15: EB/Streymur - KÍ (Útsettur til 24. september vegna Conference League luttøku)
Sunnudagin 3. august kl. 17.15: B68 - NSÍ

Mánadagin 4. august kl. 16: FC Suðuroy - HB

Greinin varð fyrstu ferð løgd út 28. juli 2025

Celje leigar sín føroying út

Hanus Sørensen skal hava nógva spælitíð í næstbestu slovensku deildini í 2025-2026 - helst verður tað í stóran mun sum høgri bakkur

Vantandi spælitíð í slovenska stórfelagnum ger, at Hanus Sørensen verður sendur eitt stig niður í fyrstu syftu (Mynd: Trigav Kranj)

SkrivaÐ:

Agnar Prestá

Føroyski landsliðsleikarin, Hanus Sørensen, sum hevur sáttmála við slovakiska liðið NK Celje, verður nú leigaður til NK Triglav Kranj, sum spælir í næstbestu slovakisku deildini.

- Hanus Sørensen hevur ymiskar altjóðar royndir, og hevur hann millum annað spælt í Danmark. Hann leiga vit alt hetta kappingarárið.

Nakað soleiðis skrivaði Triglav á sosialum miðlum sínum, í sambandi við at 24-ára gamli føroyski landsliðsspælarin var komin undir land.

Sleppur ikki framat í stórfelagnum - skal hava spælitíð

Hanus Sørensen skifti úr HB síðsta vetur, men eftir nógva spælitíð fyrstu tíðina í Slovenia, var tað ógvuliga soltið síðstu tíðina undan summarsteðgin.

Millum annað spældi føroyingurin als ongan leiklut í steypakappingini, sum NK Celje vann, og tað gjørdist greitt, at Hanus ikki heilt var í ætlanunum fyri kappingarárið 2025/2026.

Hørð kapping á høgra bakki, sum slovenska liðið heintaði hann inn til, og útlitini fyri spælitíðini gera, at Hanus Sørensen nú verður sendur til Triglav Kranj.

Talan er um lið, sum var eitt mál frá at flyta upp síðsta kappingarár. Nú fer liðið úr býnum, sum ikki er langt frá Celje, eftir tí aftur: Við Hanusi Sørensen á liðnum.

Tað er eitt fet niður hjá føroyska landsliðsspælaranum, men leigusáttmálin gevur orkuríka spælaranum møguleika fyri nógvari spælitíð, og verður tað helst ein sýnisgluggi. 

Triglav hevur vunnið venjingardystir móti ukrainska stórfelagnum Shakhtar Donetsk og HNK Gorica úr bestu kroatisku deildini. Hanus Sørensen hevur spælt í hesum. Landskappingin byrjar 9. august.

24-ára gamli føroyingurin hevur sáttmála við Celje til og við summarið 2027.

Greinin varð fyrstu ferð løgd út 31. juli 2025

Ongland endurvann EM

Chloe Kelly skoraði avgerandi brotssparkið, og Hannah Hampton bjargaði tveimum sponskum skotum úr ellivu metrum í EM-finaluni í Basel. Ensku kvinnurnar løntu harvið Spania HM-finalutapið aftur

Chloe Kelly úr Arsenal avgjørdi bæði hálvfinaluna og finaluna. Her lyftir áleyparin EM-steypið í Sveis (Mynd: EPA)

SkrivaÐ:

Agnar Prestá

Eins og tvey tey undanfarnu stóru endaspølini hjá kvinnum, var Ongland í finaluni.

Eins og til HM-endaspælið fyri tveimum árum síðani, vóru tað Ongland og Spania, ið hittust í seinasta dystinum. Tá vann Spania. 

Soleiðis var eisini tá EM hjá monnum var í fjør. Men nú lønti ensku kvinnurnar Spania tað aftur á stóra pallinum.

Spania legði seg annars á odda í 25. minutti, tá Mariona Caldentey sló til. Heimsmeistararnir høvdu eisini leikliga yvirvág, men málið hja Alessia Russo í 57. minutti og enskt stríð stríð syrgdi fyri, at dysturin fór í longda leiktíð.

Har hevði Spania størsta møguleikan, men eins og í fjórðingsfinaluni millum Ongland og Svøríki skuldi alt avgerast úr ellivu metrum. Og eins og tá vóru ensku kvinnurnar tær stinnaru.

Hannah Hampton úr Chelsea bjargaði tveimum brotsspørkum í fjórðingsfinaluni, og tað gjørdi hon eisini í finaluni. Hampton var harvið ein av stóru ensku hetjunum; tað var Luzy Bronze, sum spældi við einum broti í beininum (langlegginum/skinnabeininum) eisini.

Avgerandi skotið í Sveis...

Og so kundu Kelly og hinar stórfegnast - onnur EM-finala á rað, sum hon avgjørdi 

Hannah Hampton og Chloe Kelly (Myndir: EPA)

At enda var tað Chloe Kelly, sum eisini kom inn og avgjørdi hálvfinaluna í longdari leiktíð, ið avgjørdi alt við tryggum brotssparki. Kelly spælir til dagliga fyri Arsenal: Hon avgjørdi eisini EM-finaluna seinast.  

Ongland vann ikki nakran av "knock-out" dystunum eftir 90 minuttir, men liðið hjá Sarina Wiegman hevur víst megi og stóra sinnisliga styrki við at megna at halda høvdið kalt. 

EM-finala, kvinnur 2025
St. Jakobs-Park, 27. juli
Ongland - Spania 1-1 (0-1) 4-2 eftir brotsspørk
25' 0-1 Mariona Caldentey
57' 1-1 Alessia Russo

Eftir finaluna varð Atiana Bonmati hjá Spania kosin besti spælari í kappingini, og Michelle Agyemang varð kosin besti ungi spælari

Samanlagt var áskoðaratalið í Sveis 657.291 (21.203 í miðal). Hetta er tað hægsta til eitt EM hjá kvinnum higartil.

Greinin varð fyrstu ferð løgd út 27. juli 2025

U17 EM: Føroyar taptu eisini greitt í aðru royndini

Tó var avrikið í 1. hálvleiki móti sterku sveisisku gentunum gott. Seinasti dysturin í bólkaspælinum verður spældur sunnudagin

Hóast aftanfyri í hálvleikinum, so spældu Føroyar leingi ein fínan fyrra hálvleik móti einum av favorittunum í EM-endaspælinum (Mynd: MatchLens.me/HSF)

SkrivaÐ:

Agnar Prestá

Føroyar vóru væl við í løtum, serliga fyrstu 20 minuttirnar, móti sterku sveisisku U17-kvinnunum. Tað var tó eyðsýndur munur á liðunum í seinna hálvleiki, og Sveis vann 31-20, eftir hálvleiksstøðuna 16-12.

Hóast aftanfyri í hálvleikinum, so spældu Føroyar leingi ein fínan fyrra hálvleik móti einum av favorittunum í EM-endaspælinum. Okkara tóktust tendraðar eftir heldur stóra tapið fyri Íslandi mikudagin.

Tað var nógvur føroyskur fagnaður í løtum móti Sveits (Myndir: MatchLens.me)

Verjuspælið var ágangandi frá byrjan og stóð Femja Sámalsdóttir Soll væl í málinum. Álopsspælið var tolið, og vóru okkara vandamiklar bæði við langskotum og spæli út á vengurnar og strikuna. Føroyar vóru omaná fyrstu 20 minuttirnar, men blivu heldur nógvar teknsikar villur seinastu løtuna av fyrra hálvleiki og Sveis kom fram um, og fóru til hálvleiks frammanfyri 16-12.

Føroyar skuldu stríðast meira enn Sveis fyri málini í seinna hálvleiki, og leiðslan øktist so líðandi til endaliga úrslitið 31-20. Hóast málmunin, so kunnu Føroyar taka nógv jaligt við frá dystinum í mun til dystin í gjár. Skoringsprosentini vóru hægri, brotskøstini fóru í mál og vóru eisini fleiri bjargingar.

Eftir dystin var Halla Haldansen kosin besti leikari hjá Føroyum í dystinum. Halla stýrdi føroyska álopsspælinum væl og var eisini toppskjútti hjá Føroyum við 5 málum.

Halla Haldansen fær heiðurin (Mynd: MatchLens.me)

Føroyar skulu spæla aftur í dag, leygardagin kl. 11, tá eitur mótstøðuliðið Niðurlond. Allir dystir kunnu stroymast á ehftv.com.

Greinin varð fyrstu ferð løgd út 31. juli 2025

Søguligt silvur hjá Jóannesi Poulsen í Niðurlondum

Ongantíð áður er ein føroyskur bogaskjútti rokkin so langt í einari so tignarligari altjóða kapping, sum evropeisku Grand Prix-kappingarnar eru

Jóannes fegnast um finaluplássiðm men ásannar, at tað var ikki sørt ræðandi knappliga at skula vera í miðdeplinum í einari so tignarligari kapping, og at tað tí kanska serliga var fjálturin, ið gjørdi munin í hólmgonguni ímóti slovakiska Jozep Bosansky (Mynd: bskf.fo)

SkrivaÐ:

Innsent

Jóannes Poulsen er ovurfegin um silvurheiðursmerkið í European Grand Prix-kappingini í Niðurlondum.

Fleiri slíkar finalur skulu til fyri at læra seg at stýra nervunum, sigur hann. Martin Damsbo, høvuðsvenjari er ovfarin av framúr góða úrslitinum hjá Jóannesi:

- Tað er eyðsæð, at hann er ávegis til okkurt størri, sigur hann

Flottasta føroyska avrikið í Grand Prix

Greinin varð fyrstu ferð løgd út 27. juli 2025

Marius Joensen er nummar 35 í Evropa

Hetta er greitt eftir EM í OL skeet í Fraklandi. Altjóða luttøkan hjá skeet-skjúttunum í ár er nú av, men um fáar dagar fara feðgarnir Johnhard og Bartal Klettheyggj og Esmar Joensen til EM í trap á somu breyt

- Marius rakti 118 av 125 dúgvum, og við tí úrslitinum kunnu vit errin kunngerða, at Føroyar í løtuni hava 35. besta OL skeet íðkara í Evropa. Nakað sum vit ikki høvdu møguleikan fyri stutt síðani, tá vit ikki høvdu nakran altjóða limaskap, staðfestir Skjótisambandi (Mynd: skot.fo)

SkrivaÐ:

Agnar Prestá

Altjóða luttøkan hjá skeet íðkaranum í ár er nú av. Hesum boðar Skjótisamband Føroya frá á heimasíðu sínari. 

Seinasta kappingin varð EM í franska býnum Châteauroux. Har hava tríggir føroyskir skjúttar seinastu dagarnir verið og kappast.

Talan er um Marius F. Joensen og Tórur Fløtt úr Sunda Byrsufelag og Jógvan Egholm úr Vestmanna Byrsufelag.

Besta úrslitið stóð Marius fyri:

- Hann rakti 118 av 125 dúgvum, og við tí úrslitinum kunnu vit errin kunngerða, at Føroyar í løtuni hava 35. besta OL skeet íðkara í Evropa. Nakað sum vit ikki høvdu møguleikan fyri stutt síðani, tá vit ikki høvdu nakran altjóða limaskap, staðfestir Skjótisambandi

Um nakrar fáar dagar fara OL trap íðkararnir til EM á somu breyt. Tá fara feðgarnir Johnhard og Bartal Klettheyggj og Esmar Joensen at umboða Føroyar.

Greinin varð fyrstu ferð løgd út 28. juli 2025

HM: Líggjas og Ísak svumu kravtíðina

Líggjas Joensen og Isak D. Brisenfeldt vóru í hylinum í Singapore í týsnáttina

Trýfaldi oyggjaleikagullvinnarin svam 800 metrar frí við úrslitinum 8:21,60 - Hetta er ruddiliga undir kravið til at verða á stigi 2 í Úrvalsskipan ÍSF, skrivar ssf.fo. Hetta var málið (Mynd: Honest Media/Svimjisamband Føroya)

SkrivaÐ:

Agnar Prestá

- Vit fara at royna at betra bestu tíðirnar. Eisini fara vit at royna eftir topp-32 plássum, hetta fyri at staðfesta stig 2 í úrvalsætlanini hjá ÍSF.

Soleiðis segði Rúni Gaardbo, venjari hjá føroyska HM-hópinum, við Portalin um vikuskifti.

Hetta var áðrenn føroyska luttøkan til HM í Singapore fór í gongd.

Nú øll fýra hava verið í hylinum einaferð er greitt, at í øllum førum Líggjas Joensen og Isak D. Brisenfeldt hava megnað kravtíðirnar, sum staðfesta stig 2 í úrvalsætlanini hjá ÍSF.

Svimjisamband Føroya skrivar, at Líggjas Joensen úr Ægir, sum tó hevur somið í Danmark seinasta árið, týsnáttina svam seg til úrslitið 8:21,60 og eitt 24. plásss av teimum 26 í 800 metrar frí.

- Hetta er ruddiliga undir kravið til at verða á stigi 2 í Úrvalsskipan ÍSF.

Tað var ikki bara trýfaldi oyggjaleika-gullvinnarin, sum framdi hetta. Isak Brisenfeldt bardi seg eisini undir kravtíðini. Ella í roynd veru svam havnarmaðurin júst neyðugu tíðina:

- Isak D. Brisenfeldt (2006, HS) megnaði at svimja seg til úrslitið 2:04,17 og eina plasering sum nr 32 av 37 í 200 firvald, nú á HM 2025 í Singapore. Hetta er eksakta kravið til at verða á stigi 2, skrivar SSF.

(Mynd: Honest Media/Svimjisamband Føroya)

At koma á stig 2 í úrvalsskipanini gevur svimjarunum væl betri fyritreytir at betra seg.

Greinin varð fyrstu ferð løgd út 29. juli 2025

Føroyska HM-stafettin rakk málsetninginum

Mikunáttina svam liðið seg til 29. pláss í Singapore við tíðini 4:12,80 í 4x100 metrar blandað. Topp 32 var kravið til stig 2 í Úrvalsskipanini hjá ÍSF, og tískil var talan um flott og umráðandi føroyskt avrik

- Mix-liðið hjá okkum megnaði at svimja seg til úrslitið 4:12,80 og eina plasering sum nummar 29 av 38 í 4×100 blandað í HM 2025 í Singapore (Mynd: Svimjisamband Føroya)

SkrivaÐ:

Agnar Prestá

Meðan nógvir føroyingar hildu ólavsøku til langt út á náttina, stríddust fýra av fremstu svimjarum føroyinga í HM-hylinum í Singapore.

Bjarta í Lágabø og Isak D. Brisenfeldt kappaðust í einstaklingasvimjing - í ávikavist  50 metrar rygg og 200 blandað. Tey vóru nakað frá teirra bestu tíðum í hesum greinum.

Bjarta og Isak kunnu tó, saman við Líggjasi Joensen og Leu Osbherg Højsted, vera vælnøgd við avrikið í stafett-svimjingini.

- Mix-liðið hjá okkum megnaði at svimja seg til úrslitið 4:12,80 og eina plasering sum nummar 29 av 38 í 4×100 blandað í HM 2025 í Singapore. Harvið rukku tey málsetningin hjá okkum til hesa stevnu, at klára kravið til stig 2 í Úrvalsskipan ÍSF, sum er topp-32 á HM, EM ella OL, skrivar Svimjisamband Føroya.

Greinin varð fyrstu ferð løgd út 30. juli 2025

Seyðahundalandsliðið klárt til NM og EM

Tríggir hundaførarar og fýra hundar fara til norðurlandameistarakapping í Noregi og evropameistarakapping í Kekkia

(Savnsmynd)

SkrivaÐ:

Tíðindaskriv

Fýra hundar og tríggir hundaførarar eru úttiknir at umboða Føroyar í tveimum altjóða seyðahundakappingum uttanlands í næstum.

Tey skulu umboða Føroyar til norðurlandameistarakappingina, sum verður í Noregi 29. til 31 august, og seinni til evropameistarakappingina í Kekkia 18. til 21. september.

Liðið, ið skal umboða Føroyar eru hesi:
• Tummas Jacobsen við Moss
• Anna Sofía Fjallheim við Midge
• Jónstein Petersen við Gripur
• Tummas Jacobsen við Linn

Greinin varð fyrstu ferð løgd út 29. juli 2025