300.000 krónur til Fuglafjarðar

Eyð Mohr úr Fuglafirði kom í gjøgnum í Gekkinum við fullari plátu

 

SkrivaÐ:

Sverri Egholm

Eyð Mohr úr Fuglafirði gjørdi kuppið fríggjakvøldið, tá hon kom í gjøgnum í Gekkinum við fullari plátu.

Gekkurin var 800.000 krónur, og Eyð valdi at deila vinningin í trý fyri at økja um møguleikan at vinna.

Og hon vann. Í fyrsta snari lendi hon á 10.000 krónum, men valdi at royna eydnuna einaferð afturat. Rætt gjørdi hon, tí í øðrum snari lendi hon á gula leypinum, sum gav henni 300.000 skattafríarkrónur.

- Ja, eg sigi takk fyri, vóru stuttu boðini frá einari glaðari Eyð Mohr.

Næsta fríggjadag er Gekkurin 600.000 krónur.

Greinin varð fyrstu ferð løgd út 13. november 2020

Øll koronatilbúgvingin byggir framvegis á álit til og ábyrgd hjá tí einstaka

Løgmaður ynskir ikki at herða møguleikarnar at seta forboð í gildi við lóg

(Mynd: Sverri Egholm)

SkrivaÐ:

Ingi Samuelsen

Mánadagin kunngjørdi løgmaður, at nýggjar leiðreglur eru galdandi við innferð til Føroya fyri at byrgja upp fyri, at koronasmittan, sum í vaksandi mun herjar londini kring um okkum, eisini fer at økjast ógvusliga í Føroyum.

Men enn eru ongar ætlanir um at herða eitt nú epidemilóggávuna, so at tilmælini kunnu upphevjast til lóg við heimild at revsa tey, sum ikki halda tilmælini.

Einasta undantak er skipanin, sum var í gildi í summar, har landsstýrismaðurin við vinnumálum kundi nokta skeinkistøðum at hava leingi opið um kvøldarnar.

- Tann lóggávan er farin úr gildi aftur, men vit hava lagt uppskotið fyri tingið aftur, so møguleiki verður at steingja skeinkistøð aftur, um tað verður mett neyðugt, segði Bárður á Steig Nielsen, løgmaður, á tíðindafundinum.

Serlig áheitan til útisetarnar
Høvuðsboðskapurin mánamorgunin var ein áheitan til føroyingar – og serliga tey, ið ætlar sær heim til jóla – um at vísa varðsemi og fylgja leiðreglunum um at lata seg kanna tríggjar dagar áðren heimferð, við heimferð og aftur seks dagar eftir heimferð.

Leiðreglurnar, sum vit annars hava liva eftir í nú átta mánaðir – her verður hugsað um spritting, reinføra og frástøðu – vórðu næstan ikki tikin upp á tungu á tíðindafundinum.

Hetta tí at vit føroyingar hava dugað rættiliga væl at liva við smittuvandanum, vístu løgmaður, landsstýrismaðurin og læknafakligi ráðgevin á. Nú ræður um at ‘seta inn’ við markagrindirnar, og tað er ferðafólkini við Atlantsflog og Smyril Line.

Líta á donsku ásetingarnar
Upp á fyrispurning um hvat gjørt verður við serligu, nýggju, hóttanina, ið er uppstaðin í Norðurjútlandi, og nærum hevur stongt allan landslutin av, segði løgmaður, at ongi serlig tiltøk eru sett í verk.

- Vit ansa væl eftir. Tey ferðandi fáa boð um at koyra ígjøgnum Norðurjútland uttan at støðga á, og annars seta vit okkara álit á tey strongu krøvini, sum donsku myndugleikarnir hava sett í verk viðvíkjandi Norðurjútlandi, segði løgmaður.

Viðvíkjandi kanning á sætta degi segði løgmaður, at frá í dag av er ein  serlig skipan sett í gildi hjá flutningsfeløgunum, so at tey ferðandi á fimta degi eftir komu fáa eina áminning um at fara at lata seg kanna á sætta degi.

Gera tey ikki tað, so kanska tey fáa eina áminning afturat, segði løgmaður og vísti á, at flutningsfeløgini ikki fáa upplýsingar um hvør er smittaður.

Byggir á álit og ábyrgd
Viðvíkjandi óvarna atburðin, sum føroyingar í veitslulag hava sýnt hesa seinastu tíðina um vikuskiftini, har løgreglan hevur staðfest, at leiðreglur og áheitanir um tættleika, savningarmongd og upplatingartíðir als ikki hava verið yvirhildnar, segði løgmaður, at hann framvegis ikki hevur ætlanir um at seta lógartiltøk í verk.

- Tað er av týdningi, at tilmælini verða tikin í størsta álvara. Men vit ætla ikki at herða lóggávuna fyri at fáa fólk at halda hesi tilmæli. Tí vit síggja í grannalondum okkara, sum hava stongt náttarlívið við lóg, at smittan kortini spjaðist. Tí er tað betri at byggja skipanina á álit á borgaran og ábyrgd hjá hinum einstaka, segði løgmaður á tíðindafundinum. 

Greinin varð fyrstu ferð løgd út 09. november 2020

Jenis av Rana: Avtala við USA ein av størstu løtunum

Hósdagin undirskrivaðu Føroyar og USA partalagsyvirlýsing um økt samstarv

Jenis av Rana, landsstýrismaður við uttanríkismálum og amerikanski vara-undiruttanríkisráðharrin, Michael J. Murphy, ynskja hvør øðrum tillukku við nýggju partalagsyvirlýsingini millum Føroyar og USA (Mynd Jan Müller)

SkrivaÐ:

Jan Müller

- Hetta man vera ein av mínum størstu løtum í mínum landsstýrisskeiði higartil viðgongur ein fegin men eyðmjúkur Jenis av Rana, nú hann saman við umboði fyri amerikansku stjórnina júst hevur undirskrivað partalagsyvirlýsing millum Føroyar og USA.

Hetta hendi í Norðurlandahúsinum hósdagin, har amerikanska sendikvinnan í Danmark eisini var tilsteðar.

Partalagsyvirlýsingin er við til at seta framtíðar samstarv millum Føroyar og USA á dagskránna í framtíðini. Hon markar byrjanina til styrkt samstarv millum londini á økjum, sum hava felags áhuga.

Í yvirlýsingini viðurkenna londini, at tey hava felags strategisk og búskaparlig áhugamál í Norðuratlantshavi og í Arktis, og eru tilvitandi um sterkt partalag, grundað á felags aðalreglur og virði, sum m.a. fevna um virðing fyri rættartrygd, mannarættindum og virðunum á fríum marknaði.

Undirstrikað verður so eisini, at partarnir vilja halda seg til aðalreglur um javnrættindi, gjøgnumskygni, álit og sínámillum virðing. 

Greinin varð fyrstu ferð løgd út 13. november 2020

USA eins góður Føroya-vinur undir Biden sum Trump

Hósdagin lat upp nýtt kapittul í samstarvinum millum Føroyar og USA, tá partalagsyvirlýsing varð undirskrivað í Norðurlandahúsinum

Jenis av Rana, landsstýrismaður við uttanríkismálum og amerikanski vara-undiruttanríkisráðharrin, Michael J. Murphy, ynskja hvør øðrum tillukku við nýggju partalagsyvirlýsingini millum Føroyar og USA (Mynd Jan Müller)

SkrivaÐ:

Jan Müller

- Eg trúgvi, at Jo Biden, forseti fer at vera eins góður vinur hjá Føroyum, sum Trump forseti hevur verið tað. Hetta sigur amerikanski vara-undiruttanríkisráðharrin, Michael J. Murphy við Portalin, eftir at hava sett sína undirskrift á spildunýggju partalagsyvirlýsingina millum Føroyar og USA.

Hetta hendi í Norðurlandahúsinum hósdagin. Jenis av Rana, landsstýrismaður við uttanríkismálum umboðaði Føroyar á hesum hátíðarkenda degnum, har eisini amerikanska sendikvinnan í Danmark, Carla Sands, luttók. 

Greinin varð fyrstu ferð løgd út 13. november 2020

Verkfallið av og semja gjørd

Fíggjarmálaráðið og Felagið Føroyskir Sjúkrarøktarfrøðingar hava skrivað undir semju

(Savnsmynd: Klara Johannessen)

SkrivaÐ:

Sverri Egholm

Verkfallið hjá Sjúkrarøktarfrøðingunum er av. Semja varð sunnudagin gjørd millum Fíggjarmálaráðið og Felagið Føroyskir Sjúkrarøktarfrøðingar.

Verkfallið vardi sostatt í nærum tríggjar vikur.

- Fyri Fíggjarmálaráðið hevði tað sera stóra týdning, at nýggi sáttmálin kundi haldast innan fyri ásetta lønarkarmin á 5,8 prosent. Longdin á sáttmálanum, trý ár og tríggir mánaðir, vísti seg at vera ein háttur loysa verkfalsstøðuna, segði Fíggjarmálaráðið.

Lønarhækkingarnar í nýggja sáttmalanum eru innan fyri karmin, samstundis sum Felagið Føroyskir Sjúkrarøktarfrøðingar hevur fingu nøkur av sínum krøvum ígjøgnum.

Forkvinnan í Felagnum føroyskir Sjúkrarøktarfrøðingar, Óluva í Gong, segði eftir semjuna, at talan stórt sæð er um sama uppskotið, sum felagið sendi pørtunum eftir at felagið hevði havnað semingsuppskotinum. Treytin fyri at Lønardeildin undir Fíggjarmálaráðnum vildi góðtaka uppskotið, var at leingja sáttmálaskeiðið við trimum mánaðum.

Sáttmálin er fyri tíðarskeiðið frá 1. oktober 2019 til 1. januar 2023.

Greinin varð fyrstu ferð løgd út 08. november 2020

Veljarakanningin helt sera væl

Spyr.fo-kanningin fyri Tórshavnar kommunu, sum varð kunngjørd í Blaðnum Vikuskifti var rættiliga beinrakin

Fylgt verður við uppteljingini í høllini á Hálsi í gjárkvøldið (Mynd: Sverri Egholm)

SkrivaÐ:

Ingi Samuelsen

Farna vikuskiftið kundi Blaðið Vikuskifti kunngera hvussu samansetingin í Tórshavnar býráð fór at vera eftir valið týsdagin.

Tað vísti seg, at veljarakanningin, sum Spyr.fo gjørdi fyri Blaðið Vikuskifti og Portalin, kom at halda sera væl.

Ikki bara sjálvt úrslitið í býráðssessum, men eisini prosentbýtið vísti seg at verða rættiliga neyvt.

Veljarakanningin var tilsamans 9,4 prosentstig frá endaliga valúrslitinum, sum er sera gott, tá hugsað verður um, at tað er munandi truplari at gera kanningar til kommunuval í mun til eitt nú løgtingsval.

Veljarakanningin vísti ikki, at Listi C fór at fáa eitt so gott val, sum tað endaliga úrslitið vísti. Kanningin segði 39,7 prosent, meðan veruleikin gjørdist 43,9 prosent.

Metingin fyri fyri sambandslistan vísti seg at halda best. 

Veljarakanningin, sum varð gjørd hóskvøldið 5. november, bygdi á svar frá 500 borgarum við bústaði í Tórshavnar kommunu.

Veljarakanningin sæst á síðu 2 í seinastu útgávu av Blaðnum Vikuskifti

Allan Dalsgarð, stjóri fyri Spyr.fo, er væl nøgdur við, at veljarakanningin gjørdist so neyv.

- Javnaðarflokkurin varð undirmettur, og tí lógu vit 4,4 prosentstig undir endaliga úrslitinum, men samanlagt haldi eg, at kanningin má sigast at vera rættiliga beinrakin. Serliga tí tað er munandi truplari at gera eina veljarakanning til kommunuval í mun til løgtingsval, sigur Allan Dalsgarð, sum eisini vísir á, at eitt sindur av hepni skal til fyri at kunna raka so mikið væl, sum gjørt varð í hesum førinum. 

Allan Dalsgarð, Spyr.fo

Greinin varð fyrstu ferð løgd út 11. november 2020

Jenis av Rana um norðurlendska ætlan: Virðiskolonnialisma

Landsstýrisfólk vildu ikki hava Føroyar nevndar í felags norðurlendskari LGBT-strategi

 

SkrivaÐ:

Ingi Samuelsen

Norðurlendska ráðharraráðið hevur kunngjørt eina nýggja strategi viðvíkjandi LGBT-persónum. Endamálið við strategiini er at staðfesta, at LGBT-persónar skulu “kunna liva frítt og opið og hava somu møguleikar í lívinum sum restin av borgarunum í londunum”.

Strategiien varð samtykt á ráðharrafundi í farnu viku, og er nú kunngjørd av danska ráðharranum við javnstøðumálum, Mogens Jensen. Danmark hevur – saman við Føroyum og Grønlandi – formansskapin í norðurlendska ráðharrasamstarvinum í ár.

Men átakið møtti mótstøðu frá føroyskari síðu, skrivar danska avísin Kristeligt Dagblad.

Virðiskolonialisma
- Hetta er ein roynd at reka virðiskolonialismu. Vit eru ikki áhugað í at norrøna ráðharraráðið skal standa fyri okkara virðispolitikki og at lumpa okkum við til eina slíkari strategi, sigur Jenis av Rana við Kristeligt Dagblad og upplýsir, at hann fer at taka málið upp á fyrstkomandi landsstýrisfundi.

- Kristna trúgvin hevur nógv at siga fyri nógv fólk í Føroyum. Og Bíblian hevur, um einum dámar tað ella ei, sína meining um samkyndleika, og tað hevur eisini politiskan týdning, sigur Jenis av Rana við blaðið.

Formaðurin í Miðflokkinum vísir á, at tað eru fleiri “fornuftig ting” í strategiini hjá ráðharraráðnum, men staðfestir, at føroyingar ikki ynskja, at føroyski LGBT-politikkurin skal stýrast av norrøna ráðharraráðnum.

- Hvat verður so tað næsta? Vandi er fyri, at tey eisini vilja stýra okkara fosturtøkupolitikki, sigur Jenis av Rana við Kristeligt Dagblad.

Elsebeth mótmælti fyrst
Norðurlond ynskja at ganga á odda á LGBT-økinum, og tað er orsøkin til at henda strategiin nú verður gjørd.

Kristeligt Dagblad skrivar, at viðgerðin av strategiini var eitt sindur fløkjaslig. Hósdagin, tá hon varð samtykt, sendi Elsebeth Mercedes Gunnleygsdóttur, landsstýriskvinna við javnstøðumálum, starvsfelaga sínum í Danmark, Mogens Jensen, eini boð.

Hon vísti á, at Føroyar ikki vóru tiknar við í viðgerðini av málinum, tí Føroyar ikki eru við í skipaða LGBT-samstarvinum. Hetta førdi, sambært Kristeligt Dagblad, til, at fleiri orðingar í skjalinum vórðu broyttar.

Vanliga orðingin um, at tað vóru “Norðurlond, Føroyar, Grønland og Áland” sum stóðu aftan fyri orðingina, varð broytt til var ráðharraráðið – Nordisk Ministerråd –, sum miðaði eftir at fremja tað, sum framgongur í skjalinum.

Mogens Jensen sigur við danska blaðið, at Føroyar hava fingið somu kunning sum øll hini londini í sambandi við viðgerðina av málinum, men Elsebeth M. Gunnleygsdóttur hevur eina aðra útlegging:

- Føroyar hava onki landsstýrisfólk ella annan myndugleika, sum tekur sær av LGBT-økinum, og Føroyar luttaka tí ikki í hesum samstarvi í norðurlendskum høpi. Tí havi eg ikki luttikið í LGBT-spurningum í norrøna ráðharraráðnum, skrivar føroyska landsstýriskvinnan við javnstøðumálum í telduposti til Kristeligt Dablad.

Hon skrivar, at hon ynskti, at Føroyar ikki vórðu nevndar í tekstinum.

Mogens Jensen vísir aftur, at ráðharraráðið roynir at “virðiskolonialisera” Føroyar.

- Vit ímynda okkum ikki, at vit hvørki kunnu ella skulu trýsta nakað oman yvir føroyingar, sigur hann við Kristeligt Dablad.

Norðurlendska ráðharraráðið fyri javnstøðu hevur saman við strategiini játtað tvær milliónir krónur, sum felagsskapir, fyritøkur og myndugleikar kunnu søkja um.

Greinin varð fyrstu ferð løgd út 10. november 2020

Bústaðarpolitikkurin hevur størstan týdning

Spyr.fo: Annar hvør veljari í høvuðsstaðnum sigur at tað hevur stóran týdning fyri tey, at kommunan útvegar fleiri bústaðir

(Savnsmynd)

SkrivaÐ:

Ingi Samuelsen

Bústaðarpolitikkurin hevur størstan týdning, tá veljarin skuldi taka støðu til, hvør fær krossin á kommunuvalinum.

Tað vísti veljarakanningin, sum Spyr.fo gjørdi fyri Blaðið Vikuskifti og Portalin undan kommunuvalinum týsdagin.

500 fólk í Tórshavnar kommunu vórðu spurd í kanningini. Orsøkin til, at bert fólk í høvuðsstaðarkommununi vórðu spurd er, at tað er einasta kommuna við so mikið nógvum íbúgvum, at tað ber til at gera eina eftirfarandi veljarakanning í kommununi.

Í kanningini vórðu tey spurdu eisni biðin um at velja trý økir, sum høvdu størstan týdning, tá krossurin skal setast.

Og tað var eitt øki, sum fekk undirtøku frá meira enn helminginum av teimum spurdu.

51,2 prosent søgdu at “at kommunan útvegar fleiri bústaðir” hevur týdning fyri teirra val. Næststørst undirtøku hevði “ábøtur innan eldrarøktina” við 46,7 prosentum og síðani “ábøtur á vegir og infrakervi” við 39,5 prosentum.

Fólkafloksveljarar fara eftir ágóðum
Áhugavert er eisini at hyggja eftir, hvussu veljararnir hjá teimum einstaku flokkunum ella listunum velja.

Hjá fólkafloksveljarunum til dømis, verður størstur dentur lagdur á eitt øki, sum bert hevur undirtøku frá gott 27 prosent av samlaðu veljarafjøldini. Men millum fólkafloksveljararnir eru 48 prosent, ið velja út frá “fíggjarligum ágóðum í kommununi sum heild” t.d. skattaprosenti, barnafrádrátti.

Á øðrum plássi hjá fólkafloksveljarunum kom “ábøtur innan eldrarøktina” við 44 prosentum og síðan “bústaðir” við 40 prosentum.

Sambandsveljarar ganga mest upp í “bústaðir” og “ábøtur innan skúla og barnaansing”, sum fær undirtøku av 48 prosentum, meðan “vegir og infrakervi” kemur á eitt triðja pláss við 41 prosentum.

Millum javnaðarveljarar er tað “bústaðir” og “eldrarøkt”, sum hevur størstan týdning, bæði við 51 prosentum, meðan “vegir og infrakervi kemur á triðja plássi við 37 prosentum.

Tjóðveldisveljarar fara eftir grønum tiltøkum
Og hjá tjóðveldisveljarum hava “bústaðir” nógv størstan týdning við 67 prosentum, men her kemur “grøn tiltøk, sum gagna umhvørvinum” á øðrum plássi við 57 prosentum, meðan “átøk innan eldrarøktina” fær undirtøku frá 47 prosentum.

Framsóknarveljarar ganga hægst upp í "vegir og infrakervi" 51 prosent og "bústaðir" 50 prosent, meðan sjálvstýrisveljarar peika á "sosial átøk í kommununi sum heild", heili 78 prosent.

Verður hugt eftir muninum á kynum, so sæst, at kvinnurnar hava størstan áhuga fyri “eldrarøktini” og “bústøðum” við ávikavist 62 og 54 prosentum meðan menninir peika á “vegir og infrakervi” og "eldrarøkt" við ávikavist 53 og 48 prosentum.

Veljararnir undir 45 ár raðfesta “skúla og barnaansing” og “bústaðir” hægst, 47 prosent, meðan veljararnir yvir 45 ár raðfesta “eldrarøkt” og “bústaðir”, ávikavist 57 og 55 prosent. 

Greinin varð fyrstu ferð løgd út 09. november 2020

Vága Floghavn havt 57 prosent færri ferðafólk í ár

Í oktober í ár var ferðafólkatalið 55,7 prosent minni enn í oktober 2019

(Savnsmynd)

SkrivaÐ:

Alda Nielsdóttir

Síðan í vár, tá covid-19 farsóttin breyt út, er talið á ferðafólkum, ið hava ferðast umvegis Vága Floghavn, nógv minkað.

Higartil í ár eru 161.574 ferðafólk komin til Føroya umvegis Vága Floghavn, og talan er um eina minking á 57 prosent í mun til 2019.

Í oktober var talið á ferðafólkum 15.570 – 55,7 prosent færri í mun til í fjør, sambært hagtølunum hjá floghavnini.

Størsta afturgongdin í ár var í apríl og mai – ávikavíst 93,7 og 91,9 prosent.

Greinin varð fyrstu ferð løgd út 09. november 2020

Sjúrður Skaale: Tað er groteskt

Danska stjórnin ætlar at krevja, at trúðarsamfeløg í Danmark, sum prædika á øðrum máli, skulu umseta sínar prædikur til danskt – Hvørki danski kirkjumálaráðharrin ella forsætisráðharrin vil lova, at føroyskt verður undantikið

Sjúrður Skaale, fólkatingsmaður fyri Javnaðarflokkin

SkrivaÐ:

Alda Nielsdóttir

Danska stjórnin ætlar at gera eina lóg, sum ásetur, at trúðarsamfeløg í Danmark, sum prædika á øðrum máli enn donskum, skulu týða prædikurnar til danskt.

Endamálið við hesum er at forða fyri, at ungir danir verða radikaliseraðir av islamistiskum imamum, eftir at fleiri ungir danir hava verið í Sýria fyri at stríðast fyri IS.

Sjúrður Skaale, fólkatingsmaður fyri Javnaðarflokkin hevur víst á, at hetta eisini ávirkar føroysku samkomurnar og kirkjurnar í Danmark. Hann hevur tí spurt danska kirkjumálaráðharran, Joy Mogensen, um føroyskt mál verður undantikið.

Hetta sigur ráðharrin seg ikki kunna lova, men tað verður kannað, um málini í ríkisfelagsskapinum kunnu fáa serstøðu, sigur hon.

– At føroyskar kirkjur og samkomur á hendan hátt óbeinleiðis verða lagdar undir mistanka og tí skulu týða sínar talur og prædikur, kann als ikki góðtakast, sigur Sjúrður Skaale, sum eisini nýtti høvi at taka málið upp við forsætisráðharran, Mette Frederiksen, í spyrjitíma í Fólkatinginum í vikuni.

– Kann forsætisráðharrin lova, at vit ikki enda í tí fullkomiliga grotesku støðu, at føroyskar samkomur, sum hava verið her í áratíggju skulu umseta sínar prædikur, tí illgruni er um yvirgang?

Svarið hjá Mette Frederiksen var, at hon ikki kundi lova nakað, tí hóast hon hevur virðing fyri, at mann ynskir at prædika á føroyskum í Danmark, og at mann ongantíð áður hevur havt trupulleikar av hesum, er tað komið fyri, at haturstala hevur verið prædikað í moskum í Danmark, og hesum noyðist mann at stríðast ímóti, segði hon.

– Eg haldi tað er groteskt, svaraði Sjúrður Skaale.

Greinin varð fyrstu ferð løgd út 10. november 2020

Nólsoyar Páll má lúta fyri skoytibreyt

Nýggj staðseting skal finnast fyri ikonisku standmyndini hjá Hans Paula Olsen

(Savnsmynd)

SkrivaÐ:

Ingi Samuelsen

Standmyndin av Nólsoyar Páll, sum skoðar út í hav, ella rættari sagt út á gardinbátarnar á Vestaru Vág, skal nú flytast av plássinum har hon stendur miðskeiðir á torginum í Vágsbotni í Havn.

Hann passar ikki inn í framtíðarætlanina fyri hesum torginum. Tað boðar Tórshavnar kommuna frá í sambandi við, at avgerð er tikin um, at skoytibreytin, sum seinastu vetrarnar hevur verið sett upp á p-økinum, eisini kallað kommunuskúlagarðurin, uttan fyri ráðhúsini á Vaglinum, nú skal setast upp í Vágsbotni.

- Tórshavnar kommuna hevur í nøkur ár arbeitt við at umskipa miðbýin, soleiðis at hann verður ein livandi og áhugaverdur býur at liva, vera og virka í. Í tí sambandi var í 2014 skrivað út ein hugskotskapping, sum skuldi leggja lunnar undir eina langtíðar skipaða menningartilgongd fyri miðbýin, skrivar Tórshavnar kommuna.

Og tað uppskotið, sum vann, legði upp fyri møguleikanum at skoyta í Vágsbotni um veturin. Tann ætlanin verður so sett í verk í ár, sum ein royndarverkætlan. Og tí má standmyndin takast burtur.

Sum skilst, so arbeiðir kommunan saman við Hans Paula Olsen, listamanni, við at finna eina nýggja staðseting til standmyndina. 

(Mynd: Sverri Egholm)

(Mynd: Sverri Egholm)

Soleiðis ímynda arkitektarnir seg skoytibreytina í ætlanini fyri Vágsbotn

Greinin varð fyrstu ferð løgd út 12. november 2020

Gerðarættarmálið um Glasir liðugt: Landsverk skal rinda TG-Verk 4,2 milliónir

Í Landsverk verður fegnast um hetta, tí TG-Verk kravdi Landsverk eftir 76 milliónum.

Landsverk sleppur undan einari risarokning fyri málið um Glasir, sum hevur koyrt við TG-Verk síðani 2016 (Mynd: landsverk.fo)

SkrivaÐ:

Agnar Prestá

Í fýra ár hevur sakarmálið millum TG-Verk og Landsverk í Gerðarættinum í Keypmannahavn verið ávegis. Málið er stórt og fløkt, og kemst av ósemjum millum fyritøkurnar  í sambandi við byggingina av Glasir,  sum endaði við at TG-Verk fór av plássinum í september í 2016.

Tað var TG-Verk sum reisti málið í Gerðarættinum og stevndi Landsverk eftir 76 milliónir krónur, meðan Landsverk hinvegin kravdi TG-Verk eftir 80 miliónum krónum.

Nú er hamarin endliga fallin, og úrslitið í Gerðarættinum er, at Landsverk skal rinda TG-Verk 20,2 milliónir krónur, meðan TG-Verk skal rinda Landsverk 16,1 millión krónur. Harvið skal Landsverk rinda beint yvir fýra milliónir til TG Verk, og tað  verður seinasta rokningin, sum verður goldin í hesum málinum. Partarnir rinda í felag fyri dómsviðgerðina, meðan partarnir rinda hvør sær fyri egnar sakførarar, boðar Landsverk frá. 

- Vit fegnast um úrslitið, tí niðurstøðan staðfestir, at vit hava havt eina góða sak í ósemjuni við TG-Verk. Nú kunnu vit sleppa hesi verkætlanini, og lata tey ungu eiga handan fantastiska bygningin, sum kom burturúr, s sigur Sigurd L. Lamhauge, stjóri á Landsverk við heimasíðuna landsverk.fo

Stjórin á Landsverki vísir á, at málið um Glasir hevur havt stórar avleiðingar við sær fyri stovnin og onnur við. Hann fegnast um at Landsverk, við hesum úrslitinum, loksins kann savna seg um aðrar uppgávur enn byggiverkætlanina Glasir.

Greinin varð fyrstu ferð løgd út 12. november 2020

Bakkafrost: 103 milliónir lupu av í triðja ársfjórðingi

Framleiðslan hevur verið óvanliga stór í triðja ársfjórðingi orsaka av øktum eftirspurningi í Evropa og USA. Gongd er eisini komin á søluna til Russlands

(Savnsmynd: Sverri Egholm)

SkrivaÐ:

Tíðindaskriv

Rakstrarúrslitið hjá Bakkafrost samtakinum fyri triðja ársfjórðing 2020 var 102,7 milliónir krónur. Samlaða tøkan var 21.600 tons í kruvdari vekt, harav 11.100 tons vórðu tikin í Føroyum og 10.500 tons í Skotlandi. Aligeirin í Føroyum og liðugvøruframleiðslan høvdu tilsamans eitt rakstrarúrslit á 118,4 milliónir krónur, harav aligeirin í Føroyum hevði eitt rakstrarúrslit á 96,6 milliónir krónur. Aligeirin í Skotlandi hevði eitt rakstrarhall á 28,4 milliónir krónur. Liðugvøruframleiðslan hevði eitt rakstrarúrslit á 21,8 milliónir krónur, og rakstrarúrslitið (EBITDA) av framleiðsluni av fiskamjøli, lýsi og fóðri var 69,5 milliónir krónur.

Úrslitið eftir skatt fyri triðja ársfjórðing hjá Bakkafrost samtakinum var 176,8 milliónir krónur í mun til 180,9 milliónir krónur sama ársfjórðing í fjør. Samlaða tøkan í triðja ársfjórðingi fyri aligeiran í Føroyum og Skotlandi var 21.611 tons í kruvdari vekt. Harav vórðu 11.135 tons tikin í Føroyum í mun til 12.938 tons sama ársfjórðing í fjør, og 10.476 tons vórðu tikin í Skotlandi.

Samlaða tøkan fyrstu níggju mánaðirnar í ár var 60.424 tons í kruvdari vekt í mun til 39.254 tons fyrra hálvár í fjør. Harav vórðu 34.734 tons í kruvdari vekt tikin í Føroyum í mun til 39.254 tons fyrstu níggju mánaðirnar í fjør, og 25.681 tons vórðu tikin í Skotlandi.

Tilsamans vórðu 4,8 milliónir smolt sett út í triðja ársfjórðingi 2020. 3,6 milliónir smolt vórðu sett út í Føroyum og 1,3 milliónir smolt í Skotlandi. Til samanberingar vórðu 2,4 milliónir smolt sett út í Føroyum í sama ársfjórðingi í fjør. Tilsamans eru 13,9 milliónir smolt sett út fyrstu nýggju mánaðirnar í ár í mun til 7,7 milliónir smolt fyrstu níggju mánaðirnar í fjør. 8,7 milliónir smolt vórðu sett út í Føroyum og 5,2 milliónir í Skotlandi.

Óvanliga stór framleiðsla
Í viðmerking sigur Regin Jacobsen, stjóri:

- Alheims laksamarknaðurin hevur eisini í hesum ársfjórðinginum verið nógv ávirkaður av koronafarsóttini. Laksavinnan hevur verið undir stórum trýsti, og hetta sæst aftur í fíggjarligu úrslitunum í vinnuni. Hóast hetta hevur Bakkafrost varðveitt støðugu framleiðsluna gjøgnum ársfjórðingin til kundar okkara kring heimin. Framleiðslan av liðugvørum hevur verið óvanliga stór fyri ársfjórðingin, orsakað av øktum eftirspurningi frá kundum okkara í Evropa og USA. Gongd er eisini komin aftur á søluna til Russlands.

- Lívfrøðiliga gongdin í Føroyum hevur verið góð, og laksurin, vit hava tikið í ársfjórðinginum, hevur havt sera góða góðsku. Hetta er millum annað eitt úrslit av stóru íløgunum, vit hava framt seinastu árini í smoltframleiðslu – eitt nú nýggja smoltstøðin á Strond, sum nú ger okkum før fyri at framleiða størri smolt við enn betri góðsku. Hendan gongdin er ikki liðug enn, og tá ið komandi útbyggingarnar av smoltstøðunum á Norðtoftum og í Glyvradali eru lidnar, fara vit at røkka okkara máli fyri 2022, at miðalvektin á útsettu smoltunum skal vera 500 gramm.

- Góðskan og støddin á smoltinum hevur stóran týdning fyri lívfrøðiligu gongdina, og tískil leggja vit stóran dent á hetta. Nærlagni, burðardygd  og góð fiskarøkt eru eisini sera týðandi fyri okkum.

- Í 2013 settu vit okkum sera avbjóðandi málið, at allur laksurin hjá Bakkafrost skuldi verða ASC*-góðkendur í 2020 (*Aquaculture Stewardship Council). Síðan tá hava vit arbeitt miðvíst at náa hesum máli og hava tillagað virksemið og ment okkara førleikar. Eg eri tískil sera errin av avrikinum hjá starvsfólkum okkara, og tað frøir meg at kunna boða frá , at vit hava nátt málinum:

Allur føroyskur laksur hjá Bakkafrost er nú ASC-góðkendur
- Við okkara serstaka laksi í heimsflokki, okkara smidligu virðisketu, vaksandi tøkunøgd og jaligu marknaðarútlitunum fyri 2021, meta vit at Bakkafrost er í einari framúr góðari støðu, sigur Regin Jacobsen. 

Aligeirin í Føroyum hevði eitt rakstrarúrslit á 96,6 milliónir krónur fyri triðja ársfjórðing 2020 samanborið við 231,5 milliónir krónur fyri sama ársfjórðing í fjør. Aligeirin í Skotlandi hevði henda ársfjórðingin eitt rakstrarhall á 28,4 milliónir krónur.

Liðugvøruframleiðslan hevði eitt rakstrarúrslit á 21,8 milliónir krónur fyri triðja ársfjórðing 2020 í mun til 25,9 milliónir krónur sama ársfjórðing í fjør.

Rakstrarúrslitið, EBITDA, av framleiðsluni av fiskamjøli, lýsi og fóðri á Havsbrún í triðja ársfjórðingi 2020 var 69,5 milliónir krónur samanborið við 94,5 milliónir krónur sama ársfjórðing í fjør.

Nettoskuldin hjá Bakkafrost var 1.256,7 milliónir krónur við endan á triðja ársfjórðingi 2020 í mun til 1.018,7 milliónir krónur við árslok 2019. Bakkafrost hevði 2.163 milliónir krónur í ótroyttum kredittum við endan á triðja ársfjórðingi 2020, og solvensurin var 68 prosent.

Greinin varð fyrstu ferð løgd út 10. november 2020

JT electric keypt felag í Skotlandi

JT electric á Kambsdali, sum framleiðir tøkniliga útgerð til alivinnuna kring heimin, hevur keypt felagið Sterner UK

Mynd: JT electric

SkrivaÐ:

Tíðindaskriv

JT electric á Kambsdali, sum framleiðir tøkniliga útgerð til alivinnuna kring heimin, hevur keypt felagið Sterner UK, sum hevur høvuðssæti í Inverness í Skotlandi.
Sterner UK er eitt væl rikið felag og er sterkt á skotska marknaðinum innan tøkniliga tænastu og vørumenning til alivinnuna.

– Vit hava arbeitt miðvíst síðstu tvey árini við at fáa fótin fastan í skotska marknaðinum, og vit fegnast um, at kundarnir hava tikið sera væl í móti okkara vørum og okkara dugnaligu starvsfólkum, sigur Suni Justinussen, stjóri í JT electric.

– Við vøkstrinum, sum vit hava upplivað í Skotlandi síðstu tíðina, so meta vit tað vera neyðugt at taka hetta stigið og vera meira til staðar í skotska marknaðinum.

Sterner UK hevur í longri tíð samstarvað tætt við JT electric í sambandi við sølu og tænastu av føroysku vørunum, sum er seldar til alivinnuna í Skotlandi.

– Keypið av Sterner UK er partur av okkara vakstrarætlan uttanlands. Við hesum keypinum vænta vit, at vit kunnu betra um tænastuna og tøkniligu menningina, bæði í Føroyum og á øðrum marknaðum, sum vit virka á, sigur Suni Justinussen.

– Í samanlagda felagnum koma at arbeiða 70 dugnalig starvsfólk við servitan, sum koma at gera okkum enn meira kappingarfør í Føroyum og á heimsmarknaðinum sum heild, sigur Suni Justinussen.

JT electric er heildar veitari av framkomnari tøkni til alivinnuna í Føroyum og uttanlands. Felagið hevur starvsfólk í Føroyum, Danmark, Pólandi og Skotlandi. Sermerkta fóðurskipanin hjá JT electric verður dagliga brúkt til at fóðra fleiri tíggju tals milliónum laksum í nærum 70 alibrúkum kring heimin.

Greinin varð fyrstu ferð løgd út 10. november 2020

300 laksar av 20.000 komu afturíaftur

Mowi hevur tryggjað sær, at hetta óhappið ikki hendir aftur

(Mynd: Google)

SkrivaÐ:

Sverri Egholm

Tann 29. oktober misti Mowi 20.000 laksar úr einum tøkubúri á Sandi. Beinanvegin var farið í holt við at seta gørn soleiðis at nakað fekst aftur.

Men bara 300 av teimum 20.000 lkasunum komu afturíaftur. Tað upplýsir Hans Jákup Mikkelsen, stjóri í Mowi, fyri Kringvarpinum.

Mowi hevur seks stórar aliringar á Sandsvág, og 100.000 laksar eru í hvørjum. Tøkan verður liðug um tvær vikur, og smolt verða latin aftur í ringarnar næsta vár.

Tað kann ljóða nógv, at 20.000 laksar eru slopnir út í náttúruna, men á Umhvørvisstovuni var eingin panikkur tá óhappið hendi.

- Vit hava ongan villan laksastovn í Føroyum, sum verður ávirkaður. Eg ivist eisini í, hvussu nógvir av hesum laksunum – sum jú eru húsdýr – yvirliva eftir at teir eru slopnir leysir, segði Suni Petersen við Blaðið Vikuskifti tann 31. oktober.

Hans Jákup Mikkelsen, stjóri í Mowi sigur, at fyritøkan hevur tryggjað sær, at eitt óhapp sum hatta ikki hendir aftur.

Greinin varð fyrstu ferð løgd út 12. november 2020

Soleiðis sær avloysaraskipið út

Nýggjasta strandfaraskipið, Erla Kongsdóttir, kom farna vikuskiftið til Føroya

(Mynd: Bjartur Vest)

SkrivaÐ:

Ingi Samuelsen

Nýggja avloysaraskipið hjá Strandfaraskipum Landsins, tríkiljan Erla Kongsdóttir, kom sunnudagin á Tvøroyri eftir túrin vestur í hav frá Gurksøya, har glastrevjaferjan er bygd.

Við heimkomu fór manningin í sóttarhald eftir uppihaldið í Noregi, og so skulu ymsar tillagingar gerast áðrenn skipið verður sett i sigling. Í fyrstu atløgu er ætlanin at seta Erlu Kongsdóttir í siglingina til Nólsoyar meðan Ternan er til klassinger. 

Men fyrst skulu ávísar ábøtur gerast á havnalagið í Nólsoy.

Bjartur Vest tók myndir av skipinum tá tað kom til Tvøroyrar. Fleiri myndir her

Greinin varð fyrstu ferð løgd út 09. november 2020

Hálva miljón afturat til Havnar Bjargingarfelag

Í eykajáttanini, sum varð samtykt í farnu viku, varð skotið upp at lata eina hálva miljón eyka til Tanum hjá Havnar Bjargingarfelag – Arbeitt hevur verið at dagføra og uppstiga bátin, so at talan verður um ein mest sum nýggjan bát, tá hann er liðugur

Mynd: Tórshavnar kommuna

SkrivaÐ:

Tíðindaskriv

Í eykajáttanini, sum varð samtykt í farnu viku, varð skotið upp at lata eina hálva miljón eyka til Tanum hjá Havnar Bjargingarfelag. Ein hálv miljón varð somuleiðis játtað í fjør.

Havnar Bjaringarelag keypti Tanum í fjør. Hann er rúmligari enn Rescue Lív, og umstøðurnar hjá manningini eru nógv betri. Umstøðurnar til sjúkraflutning verða væl betri, umframt at pláss er fyri fleiri fólkum umborð, gerst tað neyðugt í eini neyðstøðu.

Arbeitt hevur verið at dagføra og uppstiga bátin, so at talan verður um ein mest sum nýggjan bát, tá hann er liðugur. Tá Tanum er dagførdur við nýggjum motorum, fer mesta ferðin at verða á leið 32 fjóðringar um tíman.

Eisini kann hann sleipa størri bátar og skip, og hann hevur stóra brandpumpu umborð, umframt hópin av bjargingarútgerð.

Greinin varð fyrstu ferð løgd út 09. november 2020

Nýggjur partaeigari í Januar

33 ára gamla Christina á Bøgarði hevur staðið próvtøkuna sum statsautoriseraður revisor, og verður nú partaeigari í Januar

Christina á Bøgarði

SkrivaÐ:

Sverri Egholm

Christina á Bøgarði hevur staðið próvtøkuna til statsautoiseraðan revisor.

Hetta ger hana til fyrsta føroyingin í rúma tíð ið hevur megnað at fara allan vegin og blíva statsautoriseraður revisor.

Christina á Bøgarði er 33 ára gomul, býr í Kaldbak og hevur starvast hjá Januar síðani 2008, er útbúgvin HD(R) og Cand.merc.aud.

Hennara starvsøkið fevnir millum annað um fiskivinnu og fíggjargeiran, umframt at Christina er grannskoðari hjá bæði størri og smærri fyritøkum.

Januar boðar frá, at Christina á Bøgarði eisini verður partur av eigarunum av grannskoðanarvirkinum, har fýra aðrir statsautoriseraðir grannskoðarar saman við øðrum eru partaeigarar.

Samstundis skrivar grannskoðanarvirkið, at ein nýggjur KT-grannskoðari er settur í starv.

Januar arbeiðir støðugt við at víðka um virksemið og menna hesa deildina, og hevur nú sett ein KT grannskoðara afturat.

Talan er um Kristian Vágsheyg Kruse, sum er settur í starv sum KT grannskoðari. Kristian er útbúgvin cand.merc.aud. og hann hevur eisini staðið próvtøku sum kt-grannskoðari. Hann hevur áður arbeitt sum KT grannskoðari og Cybersecurity ráðgevi hjá Ernst & Young í Danmark.

Greinin varð fyrstu ferð løgd út 11. november 2020

Tignir er nýggja navnið

Klædnahandilin Hans Joensen á Hálsi hevur fingið nýtt navn

 

SkrivaÐ:

Sverri Egholm

Fríggjadagin varð nýtt navn avdúkað á Hálsi. Klædnahandilin Hans Joensen á Hálsi, sum hevur verið til í eitt mannaminni, fekk nýtt navn, og nýggja navnið er Tignir.

Handilin fekk nýggjar eigarar herfyri, og seinastu tíðina eru handilshølini umvæld, og úrvalið er víðkað.

Eigararnir av Tignir eru Bergur Ryggstein og Pætur Steinhólm.

Sí myndir frá nýumvælda handlinum:

Eigararnir, Bergur Ryggstein og Pætur Steinhólm

Greinin varð fyrstu ferð løgd út 13. november 2020

Liljan Weihe skal standa á odda fyri Visit Tórshavn

Hon tekur við eftir ársskiftið. Liljan Weihe sigur, at eitt ynski hevur leingi verið um at arbeiða innan ferðavinnuna í Føroyum.

 

SkrivaÐ:

Agnar Prestá

Nú er greitt, hvør tekur yvir eftir Barbaru Samuelsen, sum fer aftur í starv í Kringarpinum, sum stjóri í Visti Tórshavn eftir ársskiftið

Tað verður 41-ára gamla Liljan Weihe, sum eisini hevur starvast í Kringvarpinum, har hon millum annað hevur verið deildarleiðari í Kringvarpi Føroya. Nú kemur Liljan úr einum starvi sum ráðgevi á Fólkatingi. Liljan Weihe er útbúgvin samfelagsfrøðingur og journalistur frá lærda háskúlanum í Roskilde

Visit Tóshavn boðar seinnapartin frá hesum og skrivar, at fremsta uppgávan hjá stjóranum og toyminum á Visit Tórshavn er at vekja áhugan fyri býnum og bygdunum í kommununi og soleiðis tæna bæði borgarum, ferðafólki og handilsvinnuni í býnum. Seks fólk starvast hjá Visit Tórshavn, sum húsast í Steinatúni.

 - Tórshavnar kommuna hevur seinastu mongu árini raðfest menning av tilboðum til bæði borgarar og ferðavinnu høgt, og Visit Tórshavn, við Liljuni á odda, skal tryggja at Visit Tórshavn framhaldandi verður ein sentralur partur av hesum arbeiði. Visit Tórshavn hevur eisini ein sentralan leiklut í menningini av tiltøkum og tilboðum til handilslívið, soleiðis at býurin alsamt gerst meira livandi og spennandi at virka og liva í, sigur Henny á Líknargøtu, nevndarforkvinna í Visit Tórshavn.

 - Eg havi leingi ynskt mær at arbeiða innan ferðavinnuna í Føroyum. Ferðavinnan er nógv ment seinastu árini, og eg gleði meg til at vera partur av víðari menningini. Saman við dugnaligu starvsfólkunum á Visit Tórshavn, ynskja vit at skapa bestu karmarnar til handils-, hotel- og matstovuvinnuna og bjóða bæði borgarum og ferðafólki góðar og fjølbroyttar upplivingar í býnum, sigur Liljan Weihe. 

Liljan Weihe tekur við starvinum fyrst í komandi ári.

Greinin varð fyrstu ferð løgd út 12. november 2020

- Tað gevur eina góða kenslu av felagsskapi

Deyvafelag Føroya fegnast um, at øll valsendingin í Kringvarpinum bleiv teknmálstulkað og stroymað beinleiðis á heimasíðuni hjá KVF

Óluva Mohr, teknmálmstulkur, undir einum tíðindafundi um koronu (Savnsmynd - Sverri Egholm)

SkrivaÐ:

Agnar Prestá

Mánadagin gjørdist greitt, at teknmæltir borgarar fóru at verða við sviðusoð valkvøldið tí bert tveir tímar av valsendingini hjá Kringvarpinum fóru at verða tulkaðir.

Men valdagin varð vent í holuni. Ov fáir tulkar eru í stavið, men tað var eydnast kortini.

Deyvafelag Føroya takkaði tá Jenisi av Rana, landstýrismanni við mentamálum, fyri at fáa hetta í lag, og eftir midnátt sendi felagið eina stutta takkarkvøðu út. Har varð fegnast um, at valsendingin í Kringvarpinum bleiv teknmálstulkað og stroymað beinleiðis á heimasíðuni hjá KVF. Tøkk varð send til tulkarnar og KVF, og sligið varð fast, at hetta gevur eina góða kenslu av felagsskapi.

Her er skrivið: 

Deyvafelag Føroya gleðist um at valsendingin í kvøld í Kringvarpinum,  bleiv    teknmálstulkað og stroymað beinleiðis á heimasíðuni hjá KVF.

Tøkk til tulkar og KVF fyri tað.  Serstakliga tí at vandi var fyri,  at at teknmæltu hyggjarar ikki fingu úrslit og kunning samstundis, sum tað var varpað á føroyskum.

Tað gevur eina góða kenslu av felagsskapi

Við kvøðu

Deyvafelag Føroya

Greinin varð fyrstu ferð løgd út 11. november 2020

Føroyskur dansur tikin upp í skránna Livandi mentan

Sláið Ring, landsfelag føroyskum dansi at frama, hevur søkt um at fáa føroyska dansin tiknan upp í skránna yvir livandi siðaarv í Føroyum

Oljumálningur eftir Axel Emil Krause, 1905, í ogn hjá det Nationalhistoriske Museum á Frederiksborg Slot

SkrivaÐ:

Tíðindaskriv

Skráin Livandi mentan er ein skrá, ið savnar og miðlar dømi um siðaarv í Føroyum. Skráin varð sett á stovn í sambandi við, at Føroyar hava tikið undir við UNESCO sáttmálanum um verju av siðaarvi. Endamálið við sáttmálanum er at lata upp fyri, at fólk í øllum heiminum kunnu seta orð á sín egna siðaarv, og á tann hátt tryggja, at siðaarvurin ikki verður gloymdur, men kann verða førdur víðari til komandi ættarlið. Við at taka undir við UNESCO sáttmálanum hava Føroyar bundið seg til at virka fyri, at siðaarvurin kann hava sítt livandi virki í samfelagnum, at vitanin um siðaarvin verður varðveitt, og at útbúgving og gransking verður framd á økinum.

– Føroyski dansur er millum tað virðismiklasta vit eiga í føroyskari mentan, og tað er alt um at gera, at føroyskur dansur eisini verður ein livandi partur av lívinum hjá komandi ættarliðum. Gera vit einki, og lata vit standa til, so er stórur vandi fyri, at føroyski dansurin fánar so líðandi burtur, tí tey ungu ættarliðini ikki taka hann til sín, sigur Gunnar Restorff, formaður í Sláið Ring.

Siðaarvur fevnir um eitt nú siðvenjur, ímyndir, vitan, tól, lutir, gripir og mentanarlig rúm. Siðaarvur sum samfeløg, bólkar og einstaklingar viðurkenna sum part av sínum mentanararvi kunnu koma uppí í skránna.

Einans siðaarvur, sum er í tráð við galdandi mannarættindi og ber í sær virðing millum samfeløg, bólkar og einstaklingar, og sum fremur burðardygga menning, kann sambært UNESCO sáttmálanum um verju av siðaarvi verða tikin við skránna.

Fyrsta evnið, ið var tikið upp á skránna, var “Føroyski báturin - siðir og brúk”, og nú verður “føroyski dansurin” tikin upp í skránna. Endamálið við skránni er at breiða út vitan og økja um áhugan fyri siðaarvinum og vísa á tað ríkidømi og margfeldi av siðaarvi, ið er í Føroyum.

– Sláið Ring søkir um at fáa føroyskan dans tiknan upp í skránni, tí vit síggja tað sum eitt høvi til at varpa ljós á føroyskan dans og eitt amboð, ið kann vera við til at tryggja føroyskum dansi livilíkindi, sigur Gunnar Restorff.

– Upptøka í føroysku skránna Livandi mentan er eitt stig á vegnum, men føroyskur dansur er einastandandi, eisini í alheims høpi, og Sláið Ring fer tí at virka fyri, at føroyskur dansur kann verða tikin upp á UNESCO listan yvir siðaarv hjá mannaættini.

Føroyar tóku undir við UNESCO sáttmálanum um verju av siðaarvi 1. oktober 2018.

Á heimasíðuni www.livandimentan.fo er kunning um skránna og oyðublað, har ið søkjast kann um at fáa evni tikið upp í skránna. Uttanríkis- og mentamálaráðið hevur lagt sáttmálan um verju av siðaarvi til Tjóðsavnið at umsita, og arbeitt verður nú við at flyta skránna og heimasíðuna til Tjóðsavnið.

Greinin varð fyrstu ferð løgd út 07. november 2020

Lindhardt & Ringhof gevur út skaldsøgu hjá Katrini Ottarsdóttur

Tað byrjaði við, at ritstjórin á stóra forlagnum gjørdist hugtikin av søgu í skúlabókini hjá dótturini

Katrin Ottarsdóttir

SkrivaÐ:

Innsent

Stóra danska forlagið Lindhardt & Ringhof hevur gjørt avtalu við Katrina Ottarsdóttir um at geva út skaldsøgu hennara "Gentan í verðini" á donskum. Danska útgávan av "Gentan í veðrini" kemur í marts komandi ár.

Forlagið vendi sær til Katrina
Søgan er tann – altso ikki skaldsøgan, men søgan um donsku útgávuna – at bókmentaritstjórin á Lindhardt & Ringhof, Sune de Souza Schmidt-Madsen, í vár skuldi hjálpa dóttur síni við eini studentaskúlauppgávu, har hon skuldi viðgera stuttsøguna "Drengen i toget" eftir Katrina (úr donsku útgávuni av stuttsøgusavninum "Aftanáðrenn" frá 2016).

Hann gjørdist so hugtikin av stuttsøguni, at hann straks skrivaði til Katrina og spurdi, um hon hevði nakað nýtt á beding.

Jú, tað hevði hon, eina skaldsøgu, men hon var upp á allar mátar nakað heilt annað enn stuttsøgan. Tað ger ongang mun, var svarið, send okkum nakrar kapitlar á donskum at lesa.

Eftir teir tveir fyrstu kapitlarnar vildu tey hava meiri, og áðrenn langt um leið, høvdu tey fingið eina ráumseting av øllum handritinum. Og teimum dámdi væl, so væl, at sáttmáli um danska útgávu nú er undirskrivaður.

Lindhardt & Ringhof er næststørsta forlag í Danmark. Av skaldskapi geva tey mest út danskar upprunabøkur, men tó onkrar umsetingar, eitt nú skaldsøgur hjá íslendska høvundinum Einari Mári Guðmundssyni.

Skaldsøgan
Skaldsøgan "Gentan í verðini", sum kom út á Sprotanum í september í ár, er um eina innhugsna havnargentu, sum er og ferðast hjá abbanum og ommuni. Gentan er stillfør og næstan "ósjónlig", men hon fær alt við og roynir sum best at skilja alt tað, sum tey vaksnu siga og gera, og hvat ið kanska er ella ikki er millum abban og gummuna, sum er arbeiðskona í húsinum. Og ikki minst alt tað, sum tann unga mostirin, ið býr heima, fortelur om sjeikar og smart klæðir og mangt annað áhugavert. Ein hugvekjandi og ofta skemtilig bók, har skyldskapur høvundans við Heðin Brú kagar fram av og á.

Útgávur og umsetingar
Katrin hevur áður givið út yrkingsøvnini "Eru koparrør í himmiríki" (2012) og "Messa fyri einum filmi" (2015) og stuttsøgusøvnini "Aftanáðrenn" (2016) og "43 bagatellir" (2018). Fyrsta yrkingasavnið og bæði stuttsøgusøvnini eru útkomin á donskum (á forlagnum Torgard). "Eru koparrør í himmiríki" eru eisini givin út á enskum í USA, umsett av Matthew Landrum, og "43 bagatellir" komu í vár út á islendskum, umsettar av Aðalsteinni Ásbergi Sigurðssyni.

Katrin á bókadøgum
Týsdagin 17. november kl. 17 er Katrin á pallinum í Norðurlandahúsinum, har Theodor Eli Dam Olsen, prestur, hevur samrøðu við Katrina um bókini. Á sama tiltakið samrøður Ivan Niclasen við Jóanes Nielsen um hansara seinasat yringasavn "Rakkaljóð".

Katrin verður eisini við saman við øðrum rithøvundum á upplestrartiltakinum "Orðljós", sum Rithøvundafelagið skipar fyri mánakvøldið 16. november.

Greinin varð fyrstu ferð løgd út 12. november 2020

Bókadagar í eina heila viku

Skráin er spreidd yvir eina heila viku, so gestirnir hava møguleika at halda frástøðu – Bókadagar verða í Norðurlandahúsinum komandi viku

Norðurlandahúsið verður karmur um Bókadagarnar 16. – 22. november (Savnsmynd)

SkrivaÐ:

Alda Nielsdóttir

Aftur í ár vera Bókadagar í Norðurlandahúsinum, men tiltakið í ár verður skipað eitt sindur øðrvísi.

Norðurlandahúsið boðar frá, at skráin í ár er spreidd yvir eina heila viku og ikki bert eitt vikuskifti, so gestirnir hava møguleika at halda frástøðu.

Harumframt verða fleiri av tiltøkunum eisini stroymd, so fólk kunnu fylgja við heimanifrá, um tey ikki hava møguleika fyri at koma í Norðurlandahúsið.

Eisini verður møguligt at keypa nýggju føroysku bøkurnar á heimasíðuni hjá Rit og Rák uttan at gjalda fyri flutning. Rit og Rák og Posta bjóða nevniliga ókeypis útbering alla vikuna.

Á skránni verður samrøða við Katrin Ottarsdóttir og Jóanes Nielsen, yrkingaupplestur við Kalpana Vijayavarathan og videosamrøða við finsku Sofi Oksanen.

Bókadagar verða í Norðurlandahúsinum 16. – 22. november. Øll skráin sæst her.

Greinin varð fyrstu ferð løgd út 13. november 2020

Forsangarin í Shu-bi-dua farin

Michael Bundesen andaðist síðsta sunnukvøld, 71 ára gamal

Michael Bundesen (Mynd: Se & Hør)

SkrivaÐ:

Alda Nielsdóttir

Michael Bundesen, forsangari í danska bólkinum Shu-bi-dua, er deyður.

Í tíðindaskrivi upplýsti familja hansara, at hann andaðist sunnukvøldið av krabbameini, 71 ára gamal.

Sambært TV2 andaðist hann í heimi sínum í Gentofte eftir stuttari sjúkralegu.

Bólkurin Shu-bi-dua, sum varð stovnaður í 1973, er kendur fyri hittløg sum "Hvalborg", "Sexchikane", "Vuffeli-vov", og "Den røde tråd".

Shu-bi-dua gavst í 2011, eftir at Michael Bundesen gjørdist álvarsliga sjúkur, og hinir limirnir í bólkinum ásannaðu, at teir ikki kundu halda fram uttan hann.

Áðrenn Michael Bundesen gjørdist forsangari í Shu-bi-dua, las hann løgfrøði og arbeiddi sum vertur á Danmarks Radio.

Greinin varð fyrstu ferð løgd út 09. november 2020

Svenski sjónleikarin Sven Wollter deyður

Doyði eftir at hava verið sjúkur við covid-19. Sven Wollter gjørdist 86 ár

 

SkrivaÐ:

Ingi Samuelsen

Svenski sjónleikarin Sven Wollter er deyður sum avleiðing av covid-19. Hann gjørdist 86 ára gamal.

- Tað er við markleysari sorg, at familjan hjá Sven Wollter kunnger, at hann í dag, 10. november, fleyg inn í ljósið, skrivaði dóttirin, Stina Wollter á Instagram týsdagin.

Sven Wollter hevur havt covid-19, men hevði eisini aðrar heilsutrupulleikar, eitt nú KOL.

Sven Wollter hevur í nógv ár verið virkin á sjónleikapallunum, men er helst mest kendur fyri sínar leiklutir í sjónvarpsrøðum.

Hann spældi eisini fleiri leiklutir á stóra filmsløryftinum, eitt nú Änglagård frá 1992, Alfred frá 1995 og En sång for Martin í 2001.

Wollter hevur eisini skrivað tríggjar skaldsøgur og givið út tvær plátur.

Hann var á konsertferð við orkestri sínum í heyst, men mátti avlýsa, tá tað var staðfest, at hann hevði fingið koronasmittuna.

Greinin varð fyrstu ferð løgd út 10. november 2020

Skjótt avgreitt: Samgonga skipað við Heðini Mortensen á odda

Klokkan 4.30 kom avtalan uppá pláss - Framókn er ikki við. Annfinn Brekkstein úr Sambandsflokkinum gjørdist tungan á vágskálini er varaborgarstjóri.

Heðin Mortensen fekk 2,288 atkvøður, Javnaðarflokkurin fekk seks býráðslimir, og hann verður nú aftur borgarstjóri (Mynd: Sverri Egholm)

SkrivaÐ:

Agnar Prestá

Í 2016 fekk Heðin Mortensen nógv flestar persónligar atkvøður, og valkvøldið sá út til, at samgonga fór at verða skipað millum  Javnaðarflokkin og Fólkaflokkin. Men so skuldi ikki verða, Annika Olsen endaði sum borgarstjóri og Heðin Mortensen í andstøðu í býráðnum í Tórshavn.

Hesaferð var eingin slingur í valsinum hjá Heðini, sum tíðliga mikumorgunin sendi út skriv við boðunum um, at samgonga varð skipað millum Javnaðarflokkin og Sambandsflokkin í Tórshavnar býráð klokkan 4:30.

Annfinn Brekkstein gjørdi greitt, at hann stuðlaði Heðini Mortensen og Javnaðarflokkinum, og stutt eftir at valúrsltið varð greitt, varð farið undir samráðingar á Gamla apoteki.

Tá var Framsókn eisini við, men Ruth Vang tók seg seinni burtur úr samstarvinum.

Heðin og Annfinn - níggju punktir
Í skjalinum, sum varð sent miðlunum, varð gjørt greitt, at Javnaðarflokkurin fær borgarstjóran og Sambandsflokkurin fær varaborgarstjóran. Annfinn Brekkstein varð einasti persónurin frá Lista B, sum varð valdur, og tað at hann er við ger, at ein meiriluti er tryggjaður, og Annfinn verður 1. januar varaborgarstjóri í Tórshavnar kommunu.

At Heðin Mortensen verður borgarstjóri er eingin ivi um. Javnaðarflokkurin fekk seks fólk inn.

Hósdagin skipaði nýggja býráðssamgongan seg á fyrsta fundinum hjá nývalda býráðnum, sum tekur við á nýggjárinum.

Myndirnar frá fundinum hevur Sverri Egholm tikið. Fleiri myndir her

Greinin varð fyrstu ferð løgd út 11. november 2020

- Fólkaflokkurin valdi nakað annað

Klaksvík: Jógvan Skorheim takkar fyri seg sum borgarstjóri, og staðfestir at Sjálvstýri ikki verður í samgongu

 

SkrivaÐ:

Agnar Prestá

Tað gjørdist dramatiskt í Árnafirði, tá Sjálvstýri varð avloyst av Sambandsflokkinum í samgongusamráðingunum í Klaksvíkar býráðið.

Fólkaflokkurin, við fimm býráðslimum, kundi ikki finna eina semju við Sjálvstýrisflokkin, við tveimum limum, og so varð Karl Johansen, sýslumaður, og nývaldur fyri Sambandsflokkin boðin inn og fekk bjóða borgarstjórastarvið.

Jógvan Skorheim hevur nú lagt kongin eftir átta ár sum borgarstjóra. Í uppslagið á Facebook skrivar hann, at tey høvdu droymt um at verandi framburður skuldi halda fram, har fokus var á spennandi verkætlanir, miðbý, visionerar ætlanir og fólkavøkstur, men at Fólkaflokkurin valdi nakað annað. Tí slitnaðu samráðingarnar. 

Fráfarandi borgarstjórin sendur eina tøkk til øll tey, sum hava stuðla honum og flokkinum, og til valevni og tey sum hava samstarvavið hann seinastu árini.

Til seinast slær Jógvan Skorheim fast, at hann ongantíð fekk vissu fyri nøkrum øðrum møguleika fyri samgongu, hóast hetta hevur verið ført fram í miðlunum. Tað skuldi so verið við Sambandsflokkin, Javnaðarflokkin og Tjóðveldi, og tað hevði tilsamans givið ein meiriluta. 

Karl Johansen verður nýggjur borgarstjóri í Klaksvík (Savnsmynd)

Greinin varð fyrstu ferð løgd út 11. november 2020

Veruligi toppskorarin situr í Famjin

Jóanis Lisberg var tað valevni, sum fekk flestar atkvøður í mun til greiddar atkvøður

Jóanis Lisberg, Famjin (Mynd av Facebook)

SkrivaÐ:

Ingi Samuelsen

Nógv varð tosað um toppskorarar, atkvøðutal og undirtøku á bý- og bygdarráðsvalunum í týsvøldið. At Heðin Mortensen var toppskorari í Havn og at Tórbjørn Jacobsen tók metið í Runavík.

Men tann borgarstjórin, sum fekk lutfalsliga besta valið í gjár, var borgarstjórin í Famjin, Jóanis Lisberg, sum fekk 35 atkvøður.

Við tað, at tað vóru 73 greiddar atkvøður í Famjins kommunu í gjár, so svarar undirtøkan fyri sitandi borgarstjóra til næstan helmingin av øllum atkvøðunum, ella 47,9 prosent. Og Jóanis Lisberg er sostatt toppskorarin í prosentum í mun til givnar atkvøður.

Yvirhøvur er tað – og tað er eisini heilt nátúrligt – valevnini í teimum smæstu kommununum, sum hava størst lutfalsliga undirtøku.

Vit hava gjørt eina uppgerð yvir, hvussu nógv prosent toppskorararnir í teimum einstøku kommununum fingu í mun til samlaða atkvøðutalið, og úrslitið gjørdist hetta:

Jóanis Lisberg, Famjin, 47,9
Delmar Tausen, Hov, 43,1
Poul O. Tórarenni, Skúvoy, 41,2
Símun Gullaksen, Fugloy, 38,2
Pauli T. Petersen, 32,9
Linjohn Christiansen, Skálavík, 32,4
Halltóra Joensen, Sumba, 28,6
Símun H. Johannessen, Húsavík, 27,5
Rógvi Egilstoft, Eiði, 24,4
Kristin Michelsen, Tvøroyri, 23,4
Janus Thomsen, Hvalba, 23,4
Ingrid Petersen, Hvannasund, 22,1
Marita Sumberg, Viðareiði, 20,9
Gerhard Lognberg, Skopun, 20,5
Poul J. Poulsen, Kunoy, 19,4
Hans J. Sørensen, Kvívík, 18,7
Heini S. Kristiansen, Nes, 18,3
Dennis Holm, Vágur, 18,0
Tórbjørn Jacobsen, Runavík, 17,8
Andreas Berg, Porkeri, 17,8
Heðin Mortensen, 17,4
Eyð Ellingsgaard, Sørvágur, 16,3
Artur Johansen, Sjóvar, 14,8
Heri Sverrason, Sandur, 12,6
Jógvan Skorheim, Klaksvík, 11,5
Jógvan Kruse, Sunda, 9,1
Per Martin Gregersen, Eysturkommuna, 8,9
Dávur Juul, Fuglafjørður 7,4
Bjarni Prior, Vága, 7,2 

Greinin varð fyrstu ferð løgd út 11. november 2020

Tórbjørn Jacobsen heldur fram sum borgarstjóri

Hann fekk metnógvar atkvøður á valinum, og hóskvøldið varð tað einmælt samtykt, at Tórbjørn Jacobsen heldur fram sum borgarstjóri. Kaja Joensen verður varaborgarstjóri

Torbjørn Jacobsen (Mynd: Sverri Egholm)

SkrivaÐ:

Sverri Egholm

Tað verður aftur Tórbjørn Jacobsen sum fer at røkja borgarstjórasessin í Runavíkar kommunu  næstu fýra árini.

Hetta samtykti eitt einmælt býráð í hóskvøldið.

Kaja Joensen, sum var næstvald, er vald sum varaborgarstjóri.

Tórbjørn Jacobsen fekk 461 atkvøður og Kaja Joensen fekk 132 atkvøður á valinum týsdagin.

Lagt verður upp til breitt samstarv millum allar tríggjar listarnar í triðstørstu kommunu í landinum.

- Tað er eitt kollektivt stýri við ellivu býráðslimum, sum nú fer undir at røkja kommununa hjá borgarunum okkara næstu fýra árini, segði hann við útvarpið.

Greinin varð fyrstu ferð løgd út 12. november 2020

Súni í Hjøllum verður borgarstjóri á Toftum

Toppskorarin á valinum, Heini Súnason Kristiansen, verður varaborgarstjóri og formaður í umhvørvisnevndini í Nes kommunu

Súni í Hjøllum

SkrivaÐ:

Ingi Samuelsen

Nývalda bygdaráðið í Nes kommunu skipaði seg í mikukvøldið við Súna í Hjøllum sum borgarstjóra.

Súni í Hjøllum, sum hevur sitið í kommunustýrinum á Toftum í upp móti einum mannaminni, fekk 142 atkvøður á valinum týsdagin. Við borgarstjórasessinum fylgir eisini formansskapurin í fíggjarnevndini.

Toppskorarin á valinum, nývaldi Heini Súnason Kristiansen, sum fekk 150 atkvøður, tók sostatt ikki við borgarstjóraembætinum, men verður í staðin varaborgarstjóri og formaður í umhvørvisnevndini, sum er ein nýggj nevnd í Nes kommunu.

Dakko Petersen verður formaður í teknisku nevnd, Elin á Torkilsheyggi forkvinna í mentanarnevndini og Høgni Hansen formaður í trivnaðarnevndini.

Nývalda bygdarráðið fer at skipa seg á almennum fundi í næstu viku, skrivar heimasíðan hjá Nes kommunu.

Greinin varð fyrstu ferð løgd út 12. november 2020

Bjarni Prior nýggjur borgarstjóri í Vága kommunu

Nýggja býráðið í Vága kommunu skipaði seg hóskvøldið, Bjarni Prior yvirtekur sessin hjá Eyðdis Hartmann Niclasen, sum ikki stillaði uppaftur í ár

Nýggja býráðið í Vága kommunu (Mynd: Vága kommuna)

SkrivaÐ:

Alda Nielsdóttir

Á kommunuvalinum týsdagin var tað Bjarni Prior, sum fekk flestar atkvøður (92) í Vága kommunu, og varð sostatt hann, ið kallaði nývalda býráðið inn til fund.

Tá býráðið skipaði seg varð tað eisini toppskorarin, sum varð valdur til borgarstjóra.

Seinastu fýra árini hevur Eyðdis Hartmann Niclasen sitið í borgarstjórasessinum í kommununi, men hon stillaði ikki upp aftur í ár.

Listi A fekk seks umboð, og Listi F fekk fimm. Tey 11, sum vórðu vald í býráðið í Vága kommunu, hava skipað seg soleiðis:

Borgarstjóri: Bjarni Prior

Varaborgarstjóri: Albert Ellefsen

Fíggjarnevnd: Bjarni Prior, Albert Ellefsen, Tórdis D. Johannesen, Ásla Leila B. Johansen og Herborg H. Gaardlykke.

Tekniskanevnd: Dagbjørn Hansen, Jóanis Albert Nielsen, Tórdis D. Johannesen, Sólfríð Fjallsbak og Jens Gaardlykke.

Mentarnar- og trivnaðarnevnd: Rósa Samuelsen, Tórdis D. Johannesen, Ásla Leila B. Johansen, Jónhard Selfoss og Herborg H. Gaardlykke.

Vinnu- og havnanevnd: Jóanis Albert Nielsen, Dagbjørn Hansen, Jens Gaardlykke, Jónhard Selfoss og Sólfríð Fjallsbak.

IRF: Jóanis Albert Nielsen

Greinin varð fyrstu ferð løgd út 13. november 2020

Nýggjur borgarstjóri í Fuglafirði

Talan er um Dávur Juul, sum fekk flest atkvøður, men sum í løtuni er til skips. Sonni á Horni og listin sum hann var á eru ikki í valbólkinum

Dávur Juul (Privat foto)

SkrivaÐ:

Agnar Prestá

Nú er endaliga greitt, hvussu tey valdu hava skipað seg í Fuglafjarðar kommunu. Allir tríggir listarnir fingu trý inn, og tað eru Listi F og Listi B sum eru farin í valbólk.

Hvør limur fer at standa á odda fyri einari nevnd: 

Fíggjarnevnd: Dávur Juul (F)
Havna & Vinnunevnd: Magni Herason Jøkladal (B)
Tekniska Nevnd: Eivin Sigurð Breiðaskarð (F)
Sosiala Nevnd: Edva Jacobsen (B)
Orku & Umhvørvisnevnd: David Andreasen (F) *
Mentanarnevnd: Eyðun á Lakjuni (B)

* Nýggj nevnd - hinar eru fastar

Tað verður Dávur Juul, sum varð fyrstvaldur á Lista F, sum skal røkja sessin sum borgarstjóri. Hann er í løtuni til skips, men skal avloysa Sonna í Horni sum hevur verið borgarstjóri seinastu seturnar. 

Eyðun á Lakjuni var fyrstvaldur á Lista B. Hann verður varaborgarstjóri. 

Greinin varð fyrstu ferð løgd út 12. november 2020

Pauli Trond Petersen heldur fram sum borgarstjóri

Nývalda bygdaráðið í Vestmanna hevur skipað seg. Bjørg á Rógvi verður varaborgarstjóri

Pauli Trond Petersen (Savnsmynd: Sverri Egholm)

SkrivaÐ:

Ingi Samuelsen

Pauli Trond Petersen tekur eitt tørn afturat sum borgarstjóri í Vestmanna. Tað skrivar heimasíðan hjá kommununi.

Varaborgarstjóri verður Bjørg á Rógvi.

Pauli var fyrstu ferð valdur í bygdarráðið í 2005, og hevur hann sostatt sitið í bygdaráðnum í 16 ár, seinastu átta árini sum borgarstjóri. Á kommunuvalinum týsdagin var Pauli Trond Petersen toppskorari við 248 atkvøðum.

Nøvn eru eisini sett á hvør er í ymsu nevndunum, men nevndirnar hava ikki skipað seg enn.

Nevndarsessirnir eru býttir soleiðis:

Fíggjarnevndin: Pauli Trond Petersen, Laila Haldansen og Ingi Olsen.

Tekniska nevnd: Bjørg á Rógvi, Sára Jógvansdóttir og Eyðun Hansen.

Mentanarnevndin: Bjørg á Rógvi, Laila Haldansen og Anja Haldansen.

Trivnaðar- og Umhvørvisnevndin: Bjørg á Rógvi, Sára Jógvansdóttir og Anja Haldansen.

Havnarnevndin: Eyðun Hansen, Ingi Olsen og Sára Jógvansdóttir.

Skúlastýrið: Laila Haldansen (varaumboð: Ingi Olsen) og
Anja Haldansen (varaumboð: Eyðun Hansen).

Heimatænastuna í VEKS: Pauli T. Petersen og Bjørg á Rógvi.
Tilbúgvingarnevndin: Pauli T. Petersen, Jóhan Müller og Ingi Olsen.

Greinin varð fyrstu ferð løgd út 12. november 2020

Eyð Ellingsgaard verður borgarstjóri í Sørvágs kommunu

Hon yvirtekur sessin frá Aimé Jacobsen, sum ikki stillaði uppaftur – Nýggi borgarstjórin fekk flestar atkvøður av valevnunum í kommununi

Eyð Ellingsgaard stillaði upp á Lista B (Savnsmynd)

SkrivaÐ:

Alda Nielsdóttir

Nú er greitt, at tað verður 56 ára gamla Eyð Ellingsgaard, sum verður borgarstjóri í Sørvágs kommunu í nýggja árinum.

Tá nýggja bygdaráðið skipaði seg hóskvøldið, varð hon einmælt vald til borgarstjóra. Varaborgarstjóri verður Elsebeth Davidsen

Eyð Ellingsgaard var toppskorarin á kommunuvalinum í Sørvágs kommunu við 126 persónligum atkvøðum. Hon fer at avloysa Aimé Jacobsen, sum ikki stillaði upp aftur til bygdaráðið.

Nývalda bygdaráðið hevur skipað seg soleiðis:

Fíggjarnevndin: Eyð Ellingsgaard, forkv., Hugin Skaalum, og Jóhan á Ørg

Tekniska nevnd: Jóhan Mikkelsen, Hugin Skaalum, og Jón Joensen

Trivnaðarnevndin: Jóhan Mikkelsen, Elsebeth Davidsen, og Jón Joensen

Vinnunevndin: Jón Joensen, Hugin Skaalum, Jóhan á Ørg

Havnarnevndin: Elsebeth Davidsen, Jóhan á Ørg, og Jóhan Mikkelsen

Greinin varð fyrstu ferð løgd út 13. november 2020

Hans Jóhann Sørensen borgarstjóri í Kvívík

Nývalda bygdarráðið skipaði seg í mikukvøldið

Hans Jóhann Sørensen

SkrivaÐ:

Ingi Samuelsen

Toppskorarin á valinum í Kvívíkar kommunu, Hans Jóhann Sørensen úr Leynum, verður borgarstjóri komandi fýra árini.

Tað skrivar heimasíðan hjá Kvívíkar kommunu eftir at nývalda bygdarráðið skipaði seg í gjárkvøldið.

Varaborgarstjóri verður Frank Müller. Teir eru báðir nývaldir.

Greinin varð fyrstu ferð løgd út 12. november 2020

Katrin Næs borgarstjóri í Hvannasundi

Sanna Akurstein verður varaborgarstjóri

Katrin Næs

SkrivaÐ:

Ingi Samuelsen

Málfrøðingurin Katrin Næs tekur við leiðsluni í Hvannasunds kommunu eftir nýggjár. Sanna Akurstein verður varaborgarstjóri.

Ingrid Petersen, sum hevur røkt borgarstjórastarvi eftir at Irdi Jacobsen legði frá sær, og gjørdist toppskorari á valinum týsdagin, heldur sostatt ikki fram. Ingrid Petersen verður í staðin umboðið hjá Hvannasunds kommunu í Sev-stýrinum og eisini í stýrinum fyri IRF.

Katrin Næs var nývald í bygdaráðið, men hevur sitið í kommunustýrinum fyrr, og eisini verið borgarstjóri. 

Greinin varð fyrstu ferð løgd út 12. november 2020