Enn eitt endaspæl á skránni í ár

Føroysku hondbóltskvinnurnar skulu síðst í novemeber og desember spæla EM-endaspæl í Eysturríki, Sveis og Ungarn - neyðugt var at bíða eina løtu eftir síðsta bríksl í tapinum í Hafnafirði

Turið Arge Samuelsen og Pernille Brandenborg stórfegnast nakað eftir seinasta bríksl, har tann fyrsta kenslan var vónbrot (Mynd: Sverri Egholm)

SkrivaÐ:

Agnar Prestá

Myndin líktist nógv henni frá Bregenz í Eysturríki í apríl í fjør: Føroysku spælararnir vistu ikki heilt, um teir vóru keyptir ella seldir eftir seinasta bríksl.

Áskoðarar og miðlar hugdu eftir telefonini, og hóast tað ikki hevði sæð gott út, tá hálvleikur var kring Evropa, so varð tað eftir seinasta bríks við Ásvellir rímiliga skjótt greitt, at Føroyar skuldu til EM.

Hetta útloysti ein stóran føroyskan fagna, íseldskan samfagnað og nógvar kenslur.

Mynd: Sverri Egholm

Føroysku umboðini vóru í gleðini sasmtundis greið: Dagins avrik móti Íslandi var ikki nóg gott - serliga ikki í álopsspælinum. Tað eru ting, sum skulu betrast fram ímóti endaspælinum og næstu árini.

Tvey fýra-máls tap vóru í vikuni. Tað móti Svøríki er lættari at svøgja, har føroyska avrikið sum heild var flott.

Tað skal tó meira til framyvir fyri at flyta føroyska liðið uppaftur longri. Føroyar gjørdust nummar 20 í undankappingini - júst 20 lond komu víðari í undankappingini. Samanlagt vera 24 lond við í endaspælinum í vetur.

Undankappingin til EM-endaspælið 2024
Sunnudagin 07. apríl - 6. og síðsta umfar
Ísland - Føroyar 24-20 (8-12)

Føroyskur toppskjútti: Jana Mittún, 8 mál

Støðan eftir 6 umfør 
1. Svøríki 10 stig 
2. Ísland 8 stig
3. Føroyar 4 stig
4. Luksemborg 0 stig

Trý'ara rokniskapurin:

Sí eisini samrøðurnar á Roysni, sum vórðu gjørdar eftir dystin:

(Mynd: Sverri Egholm)

Greinin varð fyrstu ferð løgd út 07. apríl 2024

Jana varð aftur toppskjútti við átta málum

Viborg-bakkurin vísti vegin í álopsspælinum hjá Føroyum, ið annars var merkt av hakkutum spæli, tekniskum villum og brendum skotum

(Mynd: Sverri Egholm)

SkrivaÐ:

Agnar Prestá

Undankappingin til EM-endaspælið 2024
Sunnudagin 07. apríl - 6. og síðsta umfar
Ísland - Føroyar 24-20 (8-12)

Jana Mittun fegnst saman við syni Mark Lausen-Marcher, ítróttarstjóra, og liðfeløgum. Hon gjørdist greiður føroyskur toppskjútti í kappingini (Mynd: Sverri Egholm)

Greinin varð fyrstu ferð løgd út 07. apríl 2024

EM-lutakastið verður hósdagin

18. apríl verður greitt, hvørjum føroysku kvinnurnar vera í bólki við í vetur, og um spælast skal í Eysturríki, Sveis ella Ungarn. Føroyar eru í niðasta styrkisbólki

Mynd: Sverri Egholm

SkrivaÐ:

Agnar Prestá

Síðst í november og fyrst í desember fær føroyska kvinnulandsliðið møguleikan at royna seg á stóra pallinum - at spæla slíkar dystir sum kann flyta unga liðið. EM 2024 er ikki nøkur endastøð. Avrikið móti Svøríki farna mikukvøld vísti týðiliga, at man hevur flutt seg - avrikið í Hafnafirði sunnudagin vísti, at man skal flyta.

Tað vita og vilja tær føroysku kvinnurnar eisini. Nú tá armanir eru komnir niður, skulu tær í nógvar mánaðir hugsavna seg um at vera til reiðar til størstu uppgávuna higartil.

Eysturríki, Sveis og Ungarn eru vertstjóðir. So er bara spurningurin, hvørjum landið okkara enda í, og hvønn bólk talan verður um. Innleiðandi dystirnir verða spældir í Debrecen í Ungarn, Basel í Sveis og Innsbruck í Eysturríki. Høvuðsumfarið og finalurnar verða spældar í Wien í Eysturríki.

Føroyar vóru ein av ovaru trý'arunum í undankappingini, og vera í tí niðasta av teimum fýra styrkisbólkunum. Seks lið eru í hvørjum slíkum - 24 lið tilsamans eru til endaspælið.

Tað er allarhelst greitt, at tað verður ógvuliga tungt at takast við lið úr potti eitt og partvíst eisini potti 2. Úr potti 3 eru tó helst lið, sum Føroyar hava ein rímiliga góðan møguleika at spæla upp við. 

Mánadagin var greitt, hvussu londini eru styrkismett til lutakastið:

Bólkur 1: Noreg, Danmark, Montenegro, Frakland, Svøríki og Niðurlond

Bólkur 2: Týskland, Spania, Rumenia, Ungarn, Sveis og Eysturríki

Bólkur 3: Slovenia, Kroatia, Poland, Serbia, Norðurmakedonia, Ísland

Pottur 4: Kekkia, Ukraina, Turkaland, Føroyar, Portugal, Slovakia

Greinin varð fyrstu ferð løgd út 08. apríl 2024

KÍF knústi VÍF í fyrstu hálvfinaluni

Í hinari hálvfinaluni gjørdu H71 og Torstein Sivertsen bart móti Kyndli

Bárður Dam spældi ógvuliga væl á høgra vongi og skoraði seks mál. Kollfirðingar vóru effektivur í álopinum og stinnur í vejrupartinum (Savnsmynd: Jens Kr. Vang)

SkrivaÐ:

Agnar Prestá

VÍF hevur verið FM-favorittur alt árið. Liðið vann eisini grundspælið, og fór inn til hálvfinaluuppgerðina móti KÍF sum stórfavorittur. KÍF endaði á 5. plássi í grundspælinum, og vestmenningar fingu beint yvir tvífalt so nógv stig sum kollfirðingar. 

Alt hetta kann onkursvegna verða líkamikið, tá endaspælið byrjar, og tá talan er um grannar. KÍF - VÍF er ofta nakað serligt, og tað var ein øðilig leikferð, sum dysturin byrjaði í. Álopini koyrdu á, og eftir 7 minuttir var 6-6. Serliga vóru tað lámu skjúttarnir - Rasmus Søby og Hallur Árason - ið gingu á odda fyrstu løtuna.

Í fleiri førum í 1. hálvleiki skoraði KÍF, har VÍF so gav bóltin ógvuliga skjótt upp og svaraði aftur nøkur sekund seinni. Eina løtu lá tað meira til favorittarnar í bláum og gulum, men so kom verjan hjá KÍF av álvara í gongd. Broddurin varð tikin av spælinum hjá VÍF seinastu minuttirnar fyri stegðin, og Milenko bjargaði fleiri skotum.

Kollfirðingar skoraðu fimm tey seinastu málini fyri steðgin. 17-13 meðan liðini hvíldu seg, og VÍF kom ongantíð veruliga inn í dystin í 2. hálvleiki. Bert trý mál fyrstu 12 minuttirnar, og so var farið. Tony Hammer Weyhe, Tóki Friðriksson, Eyðbjørn Heini Danielsen og hinir stóðu ógvuliga væl í vejruni - sum ein reyður múrur ið lívligu áskoðarnir eisini eru.

Í álopinum gjørdu serliga Bárður Dam og Hans Eli Sigurbjørnsson, umframt toppskjúttin Søby, um seg. Seinastu langu løtuna var greitt, at KÍF fór at taka fyrsta hálvfinalusigurin, og liðini skiftu fitt út. Munurin var at enda níggju mál.

Flottur sigur hjá KÍF, sum hevur havt eitt misjavnt kappingarár við millum annað nógvum skaðum. Tað glapp akkurat í steypahálvfinalunum, men er liðið hjá Agnari Joensen og Niklasi Selvig nærri at koppa VÍF. Ein sigur sunnudagin í Vestmanna sendir KÍF í FM-finalurnar - tað er best av trimum.

Vestmenningar skulu sláa kalt vatn í blóðið og verða til reiðar at svara aftur. Teir hava meira í sær, enn víst varð hóskvøldið. Mladen kom ongantíð veruliga í gongd í málinum, Dánjal Ragnarsson, Filip Jojic og aðrir heldur ikki í álopinum - Filip skoraði bert uppá síni brotskøst - og úttrykkið hjá KÍF var nógv sterkar enn tað hjá VÍF.

Fyrru hálvfinalurnar í Burn-deildini
Høllin í Kollafirði, 11. apríl
KÍF - VÍF 33-24 (17-13)

Toppskjúttar:
Rasmus Søby 8 mál, Bárður Dam og Hans Eli Sigurbjørnsson 6 mál, Hallur Árason 5 mál

19-ára gamli Torstein Sivertsen gjørdi bart í fyrstu hálvfinaluni (Savnsmynd: Sverri Egholm)

H71 og Torstein gjørdu bart í fyrstu hálvfinaluni

Fyrsta hálvfinalan hjá monnum varð spæld í Høllini á Hálsi mikukvøldið, har Kyndil tók ímóti H71. Liðini endaðu á ávíkavist 3. og 2. plássi í grundspælinum, og høvdu spælt tríggjar tættar dystir har. 

Hóast Kyndil var betri fyrstu minuttirnar, so gjørdist skjótt greitt, at hetta fór at verða tungt hjá teimum grønu. Orsøkin var vælskipaða H71-verjan og málverjin Torstein Sivertsen, ið partvíst tóku pippið frá stórskjúttanum William Skovsager og hinum.

Tað varð 5-3, tá beint undir sjey minuttir vóru spældir, men síðani gingu 10 minutir, til Kyndil aftur skoraði. Tá hevði H71 skorað seks mál afturat. Heimaliðið fekk bert trý mál teir seinastu 23 minuttirnar av 1. hávleiki, og leiðslan hjá H71 var í steðginum níggju mál.

Hetta var ov nógv at innheintað, og dysturin gjørdist ongantíð veruliga spennandi, hóast álopsspælið hjá Kyndli kom væl betri í gongd so líðandi. Tað var effektivt hjá H71, har fleiri fyrrverandi U21-landsliðsspælarar gingu á odda í álopinum.

Dagsins maður má tó vera Torstein Sivertsen, sum sambært teljingini hjá trok.fo hevði heilar 17 bjargingar - summar hjá 19-ára gamla málverjanum vóru heilt stórar.

26-31 og harvið stórur fyrimunur til H71 undan hálvfinalu nummar tvey sunnukvøldið.

Fyrsta hálvfinalan í Burn-deildini
Høllin á Hálsi, 10. apríl
Kyndil - H71 26-31 (8-16)

Hálvfinalur nummar tvey
Í morgin, sunnudagin 14. apríl

Kl. 16: VÍF - KÍF (0-1)
Kl. 19: H71 - Kyndil (1-0)

Spælt verður best av trimum

Greinin varð fyrstu ferð løgd út 11. apríl 2024

Kyndil og KÍF eru í hálvfinalunum

Bastu ávíkavist StÍF og Neistan á Hálsi sunnudagin. Hálvfinalurnar í Burn-deildini eita harvið VÍF-KÍF og H71-Kyndil

Neistin fekk ikki forða kollfirðingum í at taka hálvfinaluplássið í kvøld (Savnsmynd: Sverri Egholm)

SkrivaÐ:

Agnar Prestá

Tær báðar fjórðingsfinalurnar í Burn-deildini vórðu spældar sunnudagin í Høllini á Hálsi.

Tann fyrra var millum Kyndil og StÍF. Talan var um ein javnan dyst, men har Kyndil størsta partin av tíðini hevði yvirtakið. StÍF hevði møguleikan at javna, tá eini tjúgu sekund vóru eftir.

StÍF fekk brotskast, men skotið hjá Pæturi Barclay rakti tvørtrøðið. Ístaðin fór Kyndil fram og avgjørdi við málinum til 31-29. Danin William Skovsager var stóri maðurin. Danski bakkurin hjá Kyndli skoraði 15 mál.

Í hinari fjórðingsfinaluni var KÍF omaná allan vegin móti Neistan, og vann at enda við fimm málum. Harvið fekk KÍF partvíst lønt Neistanum hálvfinaluósigurin í steypakappingini aftur.

Í hálvfinalunum, har spælt verður best av trimum, skulu kollfirðingar spæla móti steypavinnarunum og FM-favorittunum úr Vestmanna. Kyndil skal royna at knógva føroyameistarunum, H71.

Greinin varð fyrstu ferð løgd út 07. apríl 2024

- Fantastiskt at koma í gongd á hendan hátt

Gunnar Vatnhamar skoraði framman fyri fleiri føroyingum í 1. umfari í íslendsku kappingini. 29-ára gamli leirvíkingurin sigur, at fleiri ár í Íslandi eru í huganum

Ein bóltur kemur so beint til føturnar á mær. Eri kanska nakað langt frammi, ið mun til hvat eg eigi, men so er bara at plaserað bóltin trygt í kassan (Mynd: fotbolti.net)

SkrivaÐ:

Agnar Prestá

Reykjavík, Ísland (Portalurin): - Tað er fantastiskt at koma í gongd á hendan hátt. Havi stríðst við skaðar undan kappingarbyrjan, og so er tað deiligt at beinanvegin vísa, at man kann hjálpa til á liðnum - tað er eisini uppaftur stuttligari at skora, tá man kennir fleiri føroyingar, ið eru og hyggja.

Tað var sjálvandi ein fegin Gunnar Vatnhamar, ið Portalurin fekk orð á "við Víkina" í Reykjavík. Gunnar skoraði leygardagin fyrsta málið í bestu íslendsku deildini 2024, tá hann og Víkingur Reykjavík tóku ímóti Stjarnuni. Sterki verjuspælarin og liðfelagarnir vunnu 2-0, og Gunnar varð valdur til dagsins spælara.

Fleiri føroyingar vóru millum tey yvir 1.100 fólkini hetta vakra kalda apríl kvøldið í íslendska høvuðsstaðnum - har ímillum fleiri "føroyskir víkingar" - og tað var fantastiskt at skora frammanfyri teimum og heilsa uppá aftaná, staðfestir føroyski landsliðsspælarin. Men hvussu kom so hetta málið?

- Vit byggja væl upp í vinstru síðu. Ein góður bóltur kemur innfyri og dettur so nakað niður til mín. Vit hava ein slíkan struktur, har eg í nøkrum førum skal taka "næstu bóltarnir", sum detta uttan fyri brotsteigin. Ein kemur so beint til føturnar á mær. Eri kanska nakað langt frammi, ið mun til hvat eg eigi, men so er bara at plaserað bóltin trygt í kassan - kanska eitt sindur við ristini sigur Gunnar Vatnhamar flennandi.

- Eg hevði ein uppaftur størri møguleika beint aftaná við høvinum, sum eg burdi skorað uppá, so tíbetur skori eg har: Eitt mál, vinna og so spari eg bara "hitt málið" til eina aðru ferð.

Gunnar Vatnhamar fekk fatur á bóltinum við brotsteigarmarkið og tók av - fyrsti málskjútti í deildini í 2024 var 29-ára gamli føroyingurin (Mynd: fotbolti.net)

Skulu longur í Evropa - stórtrívist og hugsar um nýggjan sáttmála

Tá vit tosaðu við fryntliga føroyingin í felagshúsinum hjá Víkingi kom hann eisini inn á málini hjá felagnum í 2024 og sína framtíð í Íslandi.

Víkingur Reykjavík vann greipuna í fjør, og Gunnar Vatnhamar varð "óalment" skýrdur ársins keyp í íslendskum fótbólti, eftir at hann kom frá føroyska Víkingi. Tað er harvið toført at gera tað betri, men føroyski landsliðsspælarin vísur á, at teir fara eftir øllum aftur, og at tað skal gerast betur í Evropa.

- Vit fara inn fyri at vinna allar dystirnar og vita, hvussu langt tað røkkur. Og so hava vit sjálvandi ein dreym um at koma langt í Evropa. Í fjør kiksaðu vit móti Riga beinanvegin. Vit halda, at vit kunnu meira enn 1. umfar í Evropa, 

Víkingur Reykjavík byrjar í Champions League í summar.

Gunnar Vatnhamar skrivaði undir ein tvey-ára sáttmála, tá hann kom til Reykjavíkar í fjør. 29-ára gamli leirvíkingurin dylur ikki fyri, at hann og familjan hava tað ordlga gott í íslendska høvuðsstaðnum, og at tað er góður møguleiki fyri, at hann verður í felagnum longri enn 2024 afturat. Tó er Gunnar opin fyri øllum.

- Eg royni bara at gera mítt besta, og vónandi sær felagið, at tað er gott nokk. Men sjálvandi um okkurt meira spennandi kemur, so kann man altíð hugsa um tað. Tað er tó heilt víst, at familjan og eg trívast ordliga væl í Íslandi, og eri vónríkur um at ein nýggjur sáttmáli einaferð skjótt liggur á borðinum.

Greinin varð fyrstu ferð løgd út 07. apríl 2024

- Koppaði ikki okkara veg á Kreta

Eitt brotsspark skilti partarnar, tá føroyska kvinnulandsliðið fríggjakvøldið tapti 1-0 fyri Grikkalandi. Signe Pries Andersen er sum heild væl nøgd við avrikið

Okkara kempaðu væl, tær hildu avtalurnar, og tað eydnaðist eisini í fleiri førum at ørkymla griksku leikararnar so mikið, at tær høvdu ilt við at spæla seg ígjøgnum føroysku verjuna, sigur Signe Pries Andersen (Mynd: Maria Vergeti / FSF)

SkrivaÐ:

Agnar Prestá

- Eg eri sum heild væl nøgd við stórar partar av dystinum. Okkara kempaðu væl, tær hildu avtalurnar, og tað eydnaðist eisini í fleiri førum at ørkymla griksku leikararnar so mikið, at tær høvdu ilt við at spæla seg ígjøgnum føroysku verjuna.

Hetta sigur Signe Pries Andersen, høvuðsvenjari hjá A-landsliðnum við kvinnum, sum farna fríggjakvøld spældi fyrsta dystin í undankappingini til EM 2025.

Tað kundi verið eitt heilt flott føroyskt fríggjakvøldið á Kreta. Føroyar hildu Grikkalandi frá stórum møguleikum stóran part av dystinum, men úrslitið gjørdist ein tepur 1-0 sigur til heimakvinnurnar. Einasta málið í dystinum skoraði Veatriki Sarri við brotssparki, tá tíggju minuttir vóru spældir av seinna hálvleiki.

Føroyar høvdu onkran møguleika áðrenn: 

– Vit høvdu møguleikan at leggja okkum á odda, tá Ásla (Ásla Johannesen, skriv.) royndi seg við góðum skoti, sum brast í stongina. Men tað koppaði tíverri ikki okkara veg í dag, sigur Signe Pries Andersen við heimasíðuna hjá FSF.

Heidi Sevdal og hinari stríddust væl (Mynd: Maria Vergeti / FSF)

Fysturin fríggjakvøldið móti Grikkalandi var annars altjóða skrásetti dystur nummar 100 hjá føroyska kvinnulandsliðnum.

1. umfar í EM-undankappingini
Grikkaland - Føroyar 1-0 (0-0)
55’ Veatriki Sarri 1-0 (br.)

Føroyar (3-4-3): Valborg Østerø - Sara Samson Lamhauge, Birita Ryan og Tórunn Højgaard Joensen - Jensa Tórolvsdóttir (83' Lea Lisberg), Sunniva Willemoes, Rúna Jacobsen (83' Sanna Svarvadal) og Ásla Johannesen - Heidi Sevdal (59' Fridrikka Klemmentsen), Rebekka Benbakoura (59' Malena Olsen) og Eyðvør Klakstein.

Greinin varð fyrstu ferð løgd út 06. apríl 2024

Endaði við greiðum tapi í Montenegro

Sunniva Willemoes skoraði framúrskarandi mál í 10. minutti og legði Føroyar á odda. Í steðginum var tó 2-1 til Montenegro, og Føroyar høvdu lítið at bjóða uppá eftir steðgin. Tað endaði 5-1

Føroyar byrjaðu betri, og kundu stórfegnast um 1-0 eftir bert níggju mintturi (Mynd: FSF)

SkrivaÐ:

Agnar Prestá

Føroyar taptu 1. desember í fjør heili 9-0 í Montenegro. Í EM-undankappngardysti har týsdagin byrjaðu føroysku kvinnurnar frálíka væl, men tað skrædnaði tíverri nakað út á dystin.

Føroyar vunnu nakrar ferðir bóltin høgt, og í 10. minutti endaði bólturin hjá Sunnivu Willemoes. HB-miðvallarin skoraði einasta málið hjá Føroyum í Nations League í fjør, og úr umleið 25 metrum í Montenegro smekkaði Sunniva bóltin heilt upp í málhornið.

Málið hjá Sunnivu Willemoes kan síggjast her

Frálíkt mál, og Føroyar hóttu nakrar ferðir afturat í; millum annað við Eyðvør Klakstein, sum hevði naska skotroynd.

Montenegro hevði tó bara eitt stig ella tvey hægri og var á odda 2-1 í steðginum; verjuspælið hjá Føroyum sat ikki heilt í teimum førinum.

Eftir steðgin høvdu Føroyar lítið at bjóða uppá frameftir, og tað snúði seg mest um at verja.

Tað endaði 5-1, ið er eitt mál ella tvey ov nógv, í mun til dystargongdina annars. Tvey mál komu heilt seint í dystinum. Tað eru batar at síggja í fleiri pørtum hjá Føroyum, men fleiri mál vóru "heldur løtt".

Føroyar hava null stig fyri tveir dystir. 31. mai taka okkara ímóti Andorra, ið er lægst styrkismetta liðið í bólkinum.

EM undankapping - bólkur C3
2. umfar, týsdagin 09. apríl
Montenegro - Føroyar 5-1 (2-1)
10' 0-1 Sunniva Willemoes Dal Christiansen (Eyðvør Klakstein) 
17' 1-1 Masa Tomasevic
41' 2-1 Armisa Kuc
58' 3-1 Armisa Kuc
84' 4-1 Jasna Ðokovic
90+' 5-1 Medina Desic 

Føroyar: 5-4-1 (3-4-3): Eyðgerð Rúnadóttir Mikkelsen - Jensa Kannuberg Tórolvsdóttir (55' Sanna Svarvadal), Sara Samson Lamhauge, Birita Ryan, Durita Hummeland (46' Tórunn Højgaard Joensen) og Ásla Johannesen (L) - Eyðvør Klakstein, Rúna Jacobsen, Sunniva Willemoes og Heidi Sevdal (46' Fridrikka Clementsen) - Malena Olsen (55' Mona Rasmusdóttir)

Støðan í bólkinum eftir tvey umfør:
1. Montenegro 6 stig (+9)
2. Grikkaland 6 stig (+4)
3. Føroyar 0 stig (-5)
4. Andorra 0 stig (-8)

3. umfar, 31. mai:
Føroyar - Andorra
Grikkaland - Montenegro

Greinin varð fyrstu ferð løgd út 09. apríl 2024

U19: Føroyar flyta upp í deild A

Við fýra stigum gjørdust Føroyar besti 2’arin í deild B í EM-undankappingini. Harvið gjørdu U19-kvinnurnar U17-kvinnunum kynstrið eftir, og Føroyar vera millum tey fremstu í heyst

 

SkrivaÐ:

Agnar Prestá

Ungdómslandsliðini á kvinnusíðuni hava higartil í ár staðið seg rættiliga væl. U17-genturnar taptu gamaní fyrsta dystin í EM-undankappingini á heimavølli í síðsta mánaði (1-2 fyri Litava), men síðani hevur bert gingið ein vegin.

Við fyrst at spæla javnleik 1-1 móti Turkalandi og síðani at vinna 3-1 á Armenia, eydnaðist tað føroyska U19-landsliðnum við gentum at fáa 4 stig í EM-undankappingarbólkinum í Turkalandi.

- Og nú allir bólkarnir í deild B í undankappingini eru taldir upp, er greitt, at Føroyar gerast besti 2’ari í kappingini samanlagt. Hetta hevur við sær, at Føroyar flyta upp, og skulu spæla í deild A í næstu EM-undankapping, sum verður í heyst

Í undankappingum hja ungdómsliðunum er tað nú á tann hátt, at liðini eru í deildum eftir styrki og úrslitum. So at siga bert lið úr deild á A kunnu spæla seg til endaspølini. Vegna góðu úrslitini í Turkalandi skulu Føroyar spæla millum tey stóru í heyst, tá næsta umfar er.

Føroyski hópurin í Turkalandi (Mynd: FSF)

Pætur Smith Clementsen hevur verið venjari hjá U19-gentunum seinastu árini. Til næstu kapping verður tað Sigtór Petersen (Mynd: FSF)

Eisini U17-genturnar verða at finna í deild A seinni í ár. Føroyar gjørdu ikki mætari enn at vinna bólkin í Føroyum í mars. Sigrar á Georgia og Rumenia (2-0 og 3-1) sendu Føroyar víðari. Harvið kan tað væl og virðiliga staðfestast, at føroyskur ungdómslandsliðsfótbóltur hjá kvinnum er í ávísum blóma.

Stórur fagnaður á U17-gentunum á Tórsvølli 23. apríl, tá flotti sigurin á Rumenia og samlaði bólkasigurin kom í hús (Mynd: Sverri Egholm)

Greinin varð fyrstu ferð løgd út 10. apríl 2024

Søguligur føroyskur sigur í Noregi

Sunnudagin vann liðið hjá Mikkjali Thomasen á útivølli í Bergen

Liðið hjá Mikkjali Thomassen helt málið reint, og Stian Molde skoraði tvær ferðir. Eingin føroyingur hevði leiklut á vøllinum hesaferð (Savnsmynd: Jens Kr. Vang)

SkrivaÐ:

Agnar Prestá

Fredrikstad flutti í fjør upp úr næstbestu norsku deildini, og sunnudagin 7. apríl, vann søguríka felagið sín fyrsta sigur í Eliteseriuni í 12 ár.

Tað var í 2012, at Frederikstad seinast var í fremstu norsku deildini. Nú er Mikkjal Thomassen venjari sum fyrsti føroyski høvuðsvenjari í einari fremstu deild í Skandinavia.

Mikkjal og hansara menn taptu 2-0 í heimadystinum fyri Bodø/Glimt í 1. umfari, men í øðrum umfari vann Frederikstad 2-0. Hetta var á útivølli móti Brann. 

Við føroyskum eygum er tað eitt pluss, at tað var ein 48-ára gamal føroyskur venjari, ið stóð á odda. Føroysku landsliðsspælararnir spældu tó ikki nakran leiklut.

Brandur Hendriksson Olsen sat á bonkinum allar 90 minuttirnar, meðan Jóannes Bjartalíð ikki var í hópinum vegna skaða.

Tað var vongbakkurin Stian Stray Molde, sum skoraði bæði málini fyri Fredrikstad í Bergen.

Greinin varð fyrstu ferð løgd út 08. apríl 2024

Meinhard spældi fyrsta kappingardystin í ellivu mánaðir

26-ára gamli føroyski vongurin er nú komin fyri seg eftir drúgva krossbandsskaðan. Meinhard Egilsson Olsen spældi tjúgu minuttir fyri Mjøndalen farna vikuskiftið

Savnsmynd: Sverri Egholm

SkrivaÐ:

Agnar Prestá

Fyrst í mai 2023 var Meinhard Egilsson Olsen fyri dyggum smeiti. Eftir eitt skump í einum nærdysti lendi hann illa, og skjótt var greitt, at krossbandið í øðrum knænum var farið.

Hetta er ein av tyngstu ítróttarskaðunum, og vanliga eru millum 9 og 12 mánaðir frá hendingini, til ein spælari aftur kann spæla í kappingardysti.

Hjá Meinhardi gjørdist talan um næstan júst 11 mánaðir. Í viðtalu við Portalin í februar, segði hann seg vóna, at hann fór at vera heilt tøkur fyrst í apríl, tá kappingngarnar í Noreg byrjaðu aftur.

Eftir nærdystin í dysti hjá Mjøndalen fyrst í mai í fjør. Skjótt stóð greitt at eitt krossband var farið

Meinhard var ikki í dystarhópinum hjá Mjøndalen í 1. umfari 1. apríl, men sunnudagin 7. apríl var hann á bonkinum og kom inn, tá tjúgu minuttir vóru eftir.

Tá var støðan 3-1 til Sogndal, og soleiðis endaði tað eisini. Dystartíðin er tó eitt slag av sigri fyri Meinhard Egilsson Olsen. Vongurin, sum fyti 27 ár í vikuni, er aftur á vøllinum og skal brúka næstu tíðina til at koma heilt fyri seg.

Í stuttari viðmerking sigur Meinhard, at hann kennir seg at vera væl fyri, og hevur ikki merkt nakað til knæðið seinastu tíðini; ei heldur hevur nakar fylgiskaði víst seg. Tað ganga helst nakrar vikur, til hann er í toppformi.

Meinhard var fastur partur av A-landsliðnum fram til, tá álvarsami skaðin kom. Tað eru helst rímiliga góð sannlíkindi fyri, at hann verður við til Baltic Cup-dystirnar hjá Føroyum fyrst í juni.

Í Íslandi er Patrik Johannesen eisini komin fyri seg. Hann sat á bonkinum uttan at koma inn, tá Breiðablik vann 2-0 í 1. umfari í íslendsku kappingini.

Greinin varð fyrstu ferð løgd út 09. apríl 2024

Nú er B36 eisini samstarvsfelag hjá FCK

- FCK kann koma við stórari fakligari vitan um teir yngstu barnaárgangirnar, har vit gjarna vilja menna okkum allatíðina, sigur Lasse Egelund úr B36

Mynd: B36/fck.dk

SkrivaÐ:

Agnar Prestá

Í januar var tað AB, og nú er aftur eitt føroyskt felag kunngjørt sum samstarvsfelag hjá danska fótbóltselagnum FC København.

Talan er um B36, ið serliga vil nýta samstarvið við danska stórfelagið til at flyta barnafótbóltin í felagnum:

- Vit hava valt hetta samstarvið, tí FCK kann koma við stórari fakligari vitan um teir yngstu barnaárgangirnar, har vit gjarna vilja menna okkum allatíðina og "byggja uppá".

Hetta sigur Lasse Egelund, ið hevur høvuðsábyrgdina av barnafótbóltinum í B36, við fck.dk. 

Hann leggur afturat, at B36 gjarna vil hava amboð, ið kunnu nýtast á vøllinum, umframt nógva spenning. Venjingarumhvørvi í B36 skal vera gott og sunt, og her kann FCK hjálpa, metir man.

Anders Hall Toft, ið stendur á odda fyri samstarvinum við feløg hjá FCK, fegnast um samstarvið. Hetta verður nakað øðrvísi enn við feløgini í Danmark, men tað fer at sambinda fótbóltin í ymiskum londum, og FCK vil gjarna geva vitan, royndir og styrki víðari.

Greinin varð fyrstu ferð løgd út 11. apríl 2024

TB tapti tepurt fyri oddaliðnum Drátti

Føroya Tele-deildin, kvinnur: TB – Dráttur 2-3 (24-26, 23-25, 25-22, 27-25, 9-15)

(Mynd: Dráttur)

SkrivaÐ:

Innsent

TB, sum undan hesum dystinum hevði fingið stig í seinastu fýra dystunum, vísti aftur vøddar sunnudagin ímóti oddaliðnum Drátti, sum tó at enda vann spennandi fimmsettaran.

TB hevði settbólt í fyrsta settinum, men Dráttur tók leikbrá, og vann tríggjar teir næstu bóltarnar og settið 26-24. Í øðrum setti hevði Dráttur greiða yvirvág og var á odda 20-15, men TB kom afturíaftur og minkaði um munin til 23-24, men við seinna settbóltinum eydnaðist Drátti at vinna 25-23.

TB hevði fimm settbóltar í triðja setti, og við tí fjórða eydnaðist loksins at vinna settið 25-22, eftir at venjarin, Arthur D. Poulsen, hevði tikið leikbrá fyri at steðga stimanum hjá Drátti, sum nærkaðist alsamt.

Á odda 20-14 og 21-16 var líka við at TB lorkaði sær settið av hondum, tí Dráttur javnaði til 21-21 og legði seg á odda 22-21 og fekk eisini settbólt við støðuna 24-23, men TB yvirlivdi og vann settið 27-25.

Í javnbrótaranum fekk Dráttur tíðliga yvirtakið. TB legði seg á odda 3-2, men so vann Dráttur sjey av teimum næstu átta stigunum, og fór framum 9-4. Tann munurin helt sær restina av settinum, sum Dráttur vann 15-9.

Fyri Drátt hevur úrslitið í sær sjálvum ikki tann stóra týdningin, tí liðið hevur langt síðani vunnið sær sæti í FM-finalunum, har liðið hevur heimavøll i fyrru finaluni, tí tað liggur nr. 1 á stigatalvuni - og kann ikki takast.

Við bara einum stigi fyri dystin fór teoretiski møguleikin hjá TB at røkka finalunum, men tað hevði kravt at bæði Fleyr og SÍ taptu allar sínar dystir, sum eru eftir. TB liggur sum nú er á tryggum fjórðaplássi, trý stig frammanfyri Mjølnir, sum hevur truplar dystir eftir; harímillum tveir ímóti SÍ, sum jagstrar finalupláss.

KÍF – Ternan 3-0 (25-11, 25-18, 25-23)
Kollfirðingar vunnu lættliga á Ternuni sunnudagin, og tey trý stigini merkja, at KÍF nú hevur fínan møguleika at taka Mjølnir á 5. plássinum aftur. Júst tey bæði møtast í Klaksvík sunnudagin.

Greinin varð fyrstu ferð løgd út 08. apríl 2024

SÍ á finaluplássi eftir hvøkk frá Mjølni

Sørvágskvinnur tóku finaluplássið frá Fleyr, nú bert tvey umfør eru eftir at leika

SÍ

SkrivaÐ:

Innsent

Føroya Tele-deildin, kvinnur:
SÍ-Mjølnir 3-1 (28-30, 25-17, 25-17, 25-21)

Við 3-1 sigri á Mjølni lyfti SÍ seg eitt stig upp um Fleyr, sum frammanundan lá á øðrum plássi, og harvið er tað, sum støðan er nú, SÍ sum skal møta Drátti í FM-finalunum.

Men SÍ fekk ein rættiligan hvøkk mánakvøldið, tá Mjølnir vann fyrsta settið og eisini hótti í fjórða.

Mjølnir fekk eina flúgvandi byrjan upp á fyrsta sett, og legði seg á odda 6-1 og 10-6, áðrenn SÍ javnaði til 11-11. Síðan skiftust liðini um at at vera á odda, og ikki fyrr enn við sínum fjórða settbólti eydnaðist loksins Mjølni at vinna settið 30-28. Tá hevði SÍ havt tveir settbóltar.

Men í øðrum setti vísti heimaliðið, hví tað hóast alt er tað, sum liggur á finaluplássinum. Skjótt gjørdist munurin bæði fimm og tíggju, og endaði á átta: 25-17. Hetta gjørdist eisini munurin í triðja setti, har Mjølnir annars hevði lagt seg á odda 5-0, men alt fór fyri mutur og skutur, tá SÍ vann 11 tey næstu stigini og legði seg á odda 11-5!

Fjórða sett var leingi javnt og klaksvíkskvinnur fylgdu við heilt til 20-19 til SÍ, tá sørvingar vunnu avgerandi stigini og settið 25-21.

Hetta vikuskiftið verður rættiliga avgerandi fyri, hvør av teimum báðum, SÍ og Fleyr, kemur í finaluna.

Í gjárkvøldi skuldi SÍ spæla móti TB í Trongisvági. Dregur SÍ svart í Trongisvági, so eru dyrnar gloppaðar fyri Fleyr, sum í dag skal spæla ímóti Drátti á Giljanesi.

Nr. 1 og 2 leika tvær finalur um føroyameistaraheitið. Fyrra finalan verður leikt á heimavøllinum hjá liðnum sum er nr. 1 í sjálvari landskappingini. Seinna finalan verður leikt í hølli á Hálsi leygardagin 27. apríl. Vinna liðini hvør sína finalu – sama hvat settmunurin er – so verður føroyameistaraheitið avgjørt við einum gullsetti upp í 15 beint eftir seinnu finaluna.  

Støðan í Føroya-teledildini fyri kvinnur er nú tann, at Dráttur hevur 42 stig, SÍ 32, Fleyr 31, TB 22, Mjølnir 19, KÍF 18 og Ternan hevur 1 stig. TB og Ternan fyri 15 dystir – hini liðini hava leikt 16 dystir.

Írestandi dystirnir í Føroya Tele-deildini hjá kvinnum:
Fríggjadagin 12. apríl: TB – SÍ
Leygardagin 13. apríl kl. 13: Dráttur – Fleyr á Giljanesi

Sunnudagin 14. apríl kl. 13: Mjølnir – KÍF í Badmintonhøllini í Klaksvík
Sunnudagin 14. apríl kl. 14.30: TB – Ternan í Trongisvági

Mikudagin 17. apríl 19: Dráttur – Ternan á Giljanesi

Leygardagin 20. apríl kl. 13: KÍF – TB í Kollafirði
Leygardagin 20. apríl kl. 15: Mjølnir - SÍ í Badmintonhøllini í Klaksvík
Leygardagin 20. apríl kl. 16:: Ternan - Fleyr í skúlanum á Toftum 

Greinin varð fyrstu ferð løgd út 09. apríl 2024

SÍ í FM-finalunum eftir sigur á Mjølni

ÍF hevur gott tak á bronsuni eftir sigur á Fleyr

SÍ

SkrivaÐ:

Innsent

Føroya Tele-deildin, menn:
SÍ – Mjølnir 3-1 (25-17, 22-25, 25-19, 25-18)

Leingi hevur tað verið greitt, at SÍ fór at møta Mjølni í FM-finalunum, men ikki fyrr enn mánakvøldið varð tað formliga staðfest, eftir at SÍ hevði vunnið 3-1 á oddaliðnum Mjølni.

Mjølnir vann annað sett, eftir at hava vunnið avgerandi bóltarnar frá 22-22, men annars var SÍ at kalla einaráðandi og vann lættliga hini trý settini.

Tey trý stigini til SÍ merkja, at nú kann SÍ eisini taka fyrstaplássið frá Mjølni, og harvið fáa heimavallarfyrimunin í fyrru FM-finaluni.

Hetta kann alt verða avgjørt í seinasta dystinum teirra millum, sum eisini er síðsti dystur í landskappingini áðrenn finalurnar.

Nógvir teoretiskir møguleikar eru, men um SÍ vinnur 3-0 í sínum báðum dystum ímóti Ternuni og Fleyr, og um Mjølnir vinnur sín dyst ímóti ÍF 3-0, so krevur tað ein 3-0 sigur til SÍ í Klaksvík á síðsta leikdegnum fyri at taka fyrstaplássið frá Mjølni.

Fleyr – ÍF  1-3 (19-25, 25-20, 22-25, 21-25)
Við 3-1 sigri á Fleyr fekk ÍF gott tak um bronsuna, og vinnur ÍF trý stig ímóti stigaleysu Ternuni, so skal Fleyr vinna sær trý stig í hvørjum av sínum írestandi dystum, sum eru ímóti SÍ og ÍF, skal Fleyr hava bronsumerkini.

Greinin varð fyrstu ferð løgd út 09. apríl 2024

Sarah Mahfoud tapti boksidystin í Las Vegas

Australska Skye Nicolson var ov sterk til føroyska boksaran

(Savnsmynd: EPA)

SkrivaÐ:

Sverri Egholm

Sarah Mahfoud tapti sunnunáttina WBC heimsmeistaraheitið í fjøðurvekt til australsku Skye Nicolson. Tað gjørdi hon eftir eitt tap upp á stig í tíggju umførum.

Boksidysturin var í amerikanska býnum Las Vegas í Nevada.

Skye Nicolson var undan dystinum spádd at vera greiður favorittur, men Sarah Mahfoud hevði kortini góðar vónir.

Hálvi vestmenningurin hevur einaferð áður tapt ein boksidyst. Tað var móti Amanda Serrano úr Purerto Rico, tá tær brustu saman í Manchester.

Skye Nicolson í bláum, her í dysti í fjør móti Tania Alvarez úr Spania (Savnsmynd: EPA)

Greinin varð fyrstu ferð løgd út 07. apríl 2024

Aron D. Jacobsen norðurlendskur meistari í beinsveiggi

Besta úrslit, sum nakar føroyskur amboðsfimleikari nakrantíð hevur fingið til eina altjóða kapping

(Mynd: Hjálmar A. Dalsgarð)

SkrivaÐ:

Sverri Egholm

Aron D. Jacobsen vann farna vikuskiftið gull í beinsveiggj í kappingini Nordic Championship í Oslo.

Hetta er besta úrslitið, sum nakar føroyskur amboðsfimleikari nakrantíð hevur fingið til eina altjóða kapping.

Innleiðandi kappingin var leygardagin, og tá fekk Aron ein karakter áljóðandi 13.600 stig, og harvið kvalifiseraði hann seg sum nummar 1 til finaluna.

Úrsliti av kappingini varð tað sama sum til innleiðandi, og fekk Aron 13.600 stig, Marcus Pietarinen úr Finlandi bleiv nummar 2 við 13.533 stigum og David Rumbutis úr Svørríki bleiv nummar 3 við somuleiðis 13.533 stigum.

Greinin varð fyrstu ferð løgd út 08. apríl 2024

Teitur og David til harða kapping í Danmark

Báðir skulu teir boksa tveir dystir í altjóða kappingini Tuff Nuff

 

SkrivaÐ:

Ingi Samuelsen

Føroysku nevaleikararnir Teitur Annand og David Kunoy skulu aftur um vikuskiftið uttanlands fyri at royna sína styrki í kapping í Danmark.

Talan er um altjóða kappingina Tuff Nuff, sum gongur fyri seg í Vordingborg. Boksarar úr 12 londum eru við til hesa kappingina, og ikki færri enn 300 boksarar hava boðað frá luttøku.

Talan verður helst um harðastu kapping, sum føroysku boksararnir higartil hava roynt, tí í hesi kappingini skulu teir boksa tveir dystir, líka mikið hvat úrslitið av fyrra dystinum er, og tað er ikki vanligt.

Enn einaferð eru vónir um, at føroysku boksararnir koma heimaftur við gyltum málmi um hálsin, skrivar Tórshavn Boksing á Facebooksíðu síni. 

Greinin varð fyrstu ferð løgd út 08. apríl 2024

Árligu framsýningarnar hjá Havnar Fimleikafelag

Tríggjar framsýningar verða leygardagin í høllini á Hálsi í dag

 

SkrivaÐ:

Tíðindaskriv

Havnar Fimleikafelag endar komandi vikuskifti eitt væleydnað fimleikaár. Fimleikarárið verður rundað av við forvitnisligum framsýningum, har flestu íðkandi limirnir í felagnum, fara at vísa hvat teir hava vant í vetur.

Av tí at talan er um so nógv lið, er neyðugt at skipa fyri ikki færri enn trimum framsýningum í høllini á Hálsi í dag. Framsýningarnar verða skipaðar soleiðis, at íðkararnir verða býttir upp eftir aldri.

Klokkan 10, eru tað børn undir skúlaaldur, sum sýna fram, klokkan 13.30 eru tað børn úr 1. til 4. flokk, sum fara á gólvið. Seinasta sýningin leygardagin verður klokkan 17, og tá eru tað ung úr 5. flokki og eldri, ið fara at royna seg. 

Greinin varð fyrstu ferð løgd út 08. apríl 2024

Føroyameistarar í badminton

Rúni Øster vann finaluna í einmansleiki hjá monnum, í einmansleiki hjá kvinnum vann Miriam í Grótinum

(Mynd: Haldur Suni Johannesen)

SkrivaÐ:

Tíðindaskriv

Hóast streymslit órógvaði nakað stóra finaludagin í Kontrast FM, so at finalurnar leygardag seinnapart blivu nakað seinkaðar, vórðu allir føroyameistarar í badminton funnir eftir nakrar spennandi finalur í Høllini á Hálsi.

Sum siðvenja hevur verið í nógv ár, vórðu FM finalurnar samskipaðar við judo og borðtennis.

Síðsta finalan var í einmansleiki hjá monnum, har Rúni Øster vann á Fai Yin Wong í tveimum tøttum settum 21-19, 21-18. Bronsuna vunnu Magnus Dal-Christiansen og Christian Berg Pedersen, allir úr HBF.

Rúni Øster, her í tvímansleiki saman við Magnus Dal-Christiansen (Mynd: Jens Kr. Vang)

Rúni hevur áður vunnið FM í tvímansleiki og blandaðum tvímansleiki, men hetta er fyrstu ferð hann er føroyameistari í einmansleiki.

Miriam í Grótinum (Mynd: Jens Kr. Vang)

Finalan í einmansleiki hjá kvinnum var millum Sannu Thorkildshøj og verandi føroyameistaran Miriam í Grótinum, sum vann í tveimum settum 22-20, 21-15. Í fyrsta settið førdi Sanna allan vegin til 20-20, tá Miriam fór framum og vann. Hetta er triðja árið á rað, at Miriam vinnur FM í einmansleiki.

Í blandaðum tvímansleiki vunnu Brynhild Høgnadóttir og Fai Yin Wong á Miriam í Grótinum og Magnus Dal-Christiansen í spennandi trý-settara 21-12, 15-21 og 21-15.

Í tvímansleiki hjá kvinnum vunnu Mia og Sanna Thorkildshøj úr HBF í trimum settum á verandi føroyameistarunum Lena Maria Joensen og Bjarnhild í Buð Justinussen úr KBF.

Hjá monnum vunnu Rúni Øster og Magnus Dal-Christiansen úr HBF í tveimum settum á Jónas Djurhuus (HBF) og Árant á Mýruni (MBF).

(Mynd: Haldur Suni Johannesen)

(Mynd: Haldur Suni Johannesen)

(Mynd: Haldur Suni Johannesen)

(Mynd: Haldur Suni Johannesen)

Greinin varð fyrstu ferð løgd út 08. apríl 2024

Sanna Thorkildshøj og Fai Yin Wong ársins spælarar

Og Birna Jacobsen og Tóki Yngvason Guttesen vórðu kosin ársins stjørnuskot innan badminton fyri 2023/2024

Katrin Jacobsen, forkvinna í BSF, Birna Jacobsen, ársins stjørnuskot hjá kvinnum og Sanna Thorkildshøj, ársins leikari hjá kvinnum (Mynd: BSF)

SkrivaÐ:

Tíðindaskriv

Á árligu gallaveitsluni fyri badminton, borðtennis og judo í B36-húsinum vóru ársins leikarar og ársins stjørnuskot heiðrað.

Í badminton vóru Sanna Thorkildshøj og Fai Yin Wong kosin ársins leikarar. Bæði vóru partur av oyggjaleikahópinum, sum vann gull í liðkappingini, og vóru við til, at badminton fekk besta úrslit nakrantíð.

Katrin Jacobsen, forkvinna í BSF, og Fai Yin Wong, ársins leikari hjá monnum

Ársins stjørnuskot vóru Birna Jacobsen og Tóki Yngvason Guttesen. Tey bæði hava í ár havt framúr úrslit - bæði heima og uttanlands. Og gleða vit okkum at fylgja teimum fram á leið.

Katrin Jacobsen, forkvinna í BSF, og Toki Yngvason Guttesen, ársins stjørnuskot hjá monnum, og Birna Jacobsen, ársins stjørnuskot hjá kvinnum.

Greinin varð fyrstu ferð løgd út 11. apríl 2024

Maibrit og Niels Áki aftur føroyameistarar í vektlyfting

Metnógvir vektlyftarar kappaðust, 22 í alt, 11 kvinnur og 11 menn

Maibrit Reynheim Petersen (Mynd: Føroya Styrkisamband)

SkrivaÐ:

Innsent

Maibrit Reynheim Petersen og Niels Áki Mørk endurvunnu síni FM-heitir í vektlyfting síðsta vikuskiftið. Metnógvir vektlyftarar kappaðust, 22 í alt, 11 kvinnur og 11 menn, full javnstøða.

Í alt 36 met blivu sett í trekk, stoyt, tvídysti og í sinclair-stigum. Samlaði vinnarin varð funnin út frá sinclair, sum er lyftivekt í mun til kropsvekt.

Maibrit er besti føroyski kvinnuligi vektlyftarin, og var tað tí væntandi, at hon fór at vinna gull. Maibrit trekti 86 kilo og stoytti 104, íalt 190 kilo. Hetta rakk til íalt fýra føroysk met: Í trekk, stoyt, tvídysti og sinclair-stigum við 232,93.

Jenny Persson vann silvur við 73+88=161 kilo og 197,82 sinclair. Bronsan fór til Juliu Tormansdóttir Jacobsen við 70+87=157 kilo og 188,55 sinclair.

Hjá monnunum kappaðust Niels Áki Mørk og Pól Hendrikur Andreasen um gullið. Niels Áki lyftir serliga nógv í trekk og Pól Hendrikur hinvegin serliga í stoyt.

Niels Áki fekk tvey tey fyrstu lyftini í stoyt kolldømd, men tíbetur fyri hann bleiv tað triðja góðkent. Annars hevði gullið farið til Pól Hendrik. Niels Áki fekk 325,84 sinclair, ið er føroyskt senior-met fyri menn.

Niels Áki Mørk (Mynd: Føroya Styrkisamband)

Gullið fór til Niels Áka við tvídystinum 102+113=215 kilo og 325,84 sinclair. Trekk-lyftið á 102 kilo er føroyskt met í 67 kg vektflokkinum eins og tvídýsturin á 215 kilo. Silvurið tók Pól Hendrikur við 96+114=210 kilo og 302,22 sinclair. Á bronsuplássið kom Jónas Kristiansson við 93+110=203 kilo og 246,26 sinclair.

Til hesa kappingina dømdi ein altjóða A-dómari úr Danmark, Laura Muratov, so at lyftarar skuldu kunna kvalifisera seg til ávikavist DM, NM-junior og EM-masters.

19 ára gamla Julia T Jacobsen megnaði júst tey kravdu 157 kilo í tvídysti, og luttekur tí undir Merkinum í NM-junior í Keypmannahavn seinni í ár.

58 ára gamli Niels Juel Arge kvalifiseraði seg til EM-masters í Haugesund í Noregi um miðjan juni í ár. Ungu lyftararnir, ið royndu eftir DM-luttøku, vóru nær við.

Fleiri nýggj andlit vóru at síggja, millum annað úr ítróttagreinunum rørslumegi og kappróðri. Eitt ávíst samanfall er serliga ímillum rørslumegi og vektlyfing, og nógvir av bestu vektlyftarunum í dag eru byrjað við rørslumegi (krossfitt). Yngsti kvinnuligi lyftarin við FM var 11 ár, Mona Lea á Bøgarði, og hjá monnunum 14 ára gamli Leon Dam.

FM-kappingin varð hildin í nýggju stásiligu hølunum hjá Burn Klassik í Berjabrekku. Av teim 22 luttakarunum vóru 20 úr Styrkifelagnum Stoyt og tveir úr Burn Íðkarum. Kappingin skuldi havt verið 23. mars, men eftir eina skjóta upptøku í ESNT, European Small Nations Tournament, varð gjørt av at luttaka í hesi kappingini, sum var í Monaco 23. mars. FM varð tí úsett eina viku.

Seinni í ár skipar Føroya Styrkisamband fyri Norðurlendsku Meistarastevnuni í  vektlfyting, NM senior. Stórt tal av luttakarum er væntandi til landið hesar dagarnar umframt venjarar, dómarar, hjálparfólk, áskoðarar og onnur áhugaði. Kunngjørt verður í næstum, hvar ið landinum NM verður hildið.

Greinin varð fyrstu ferð løgd út 07. apríl 2024

Julia skal kappast um norðurlendska meistaraheitið fyri juniorar

Kravið fyri at Julia Jacobsen skuldi koma við, var ein tveykampur á 157 kilo. Tað megnaði hon til FM tá hon trekti 70 kilo og stoytti 87 kilo

(Mynd: Stoyt)

SkrivaÐ:

Tíðindaskriv

Til tað føroyska meistaraheitið tann 30. mars, kláraði Julia Jacobsen kravið til tey norðurlendska meistaraheitið fyri juniorar.

Kravið fyri at Julia skuldi koma við var ein tveykampur á 157 kilo. Hetta megnaði Julia, tá ið hon til til FM trekti 70 kilo og stoytti 87 kilo.

Julia Jacobsen hevur vant vektlyfting hjá Stoyt, við Pól Hendriki Andreasen sum venjara síðan februar í 2022. Hon hevur síðan fyrsta dagin lagt nógva orku í hennara venjing og hevur kempa seg fram til hetta flotta úrsliti, sigur Stoyt.

Julia venur til dagligt í Suðuroy, men fer javnan til Havnar at venja um vikuskiftini við venjara og øðrum lyftarum hjá Stoyt.

Norðurlendska meistaraheitið fyri juniorar verður hildið í Keypmannahavn 15-16 november. Tó, áðrenn Julia fer avstað, so hevur hon aðrar kappingar hon skal luttaka í áðrenn. Seinni í mánaðinum skal hon luttaka í tí danska meistaraheitinum fyri seniorar. Her er málið hjá Juliu at lyfta seg fram á eitt bronsu heiðursmerki.

Afturat Danmark-meistaraheitinum skal Julia eisini luttaka í International Women Weightlifting Grand Prix í Baden í Eysturríki 22. august.

Greinin varð fyrstu ferð løgd út 12. apríl 2024

Hesi eru føroyameistarar í borðtennis

Stóri felags Kontrast FM-finaludagurin hjá borðtennis, badminton og judo var í høllini á Hálsi í Havn leygardagin, har borðtennis-finalur hava verið í einmansleiki, tvímansleiki og blandaðum tvímansleiki

 

SkrivaÐ:

Tíðindaskriv

Í FM-kappingini hjá monnum hevði tvífaldi føroyameistarin, Albert Weihe Wolfsberg, aftur í ár spælt seg í finaluna - hesaferð ímóti Halli Thorsteinsson, sum hevur verið sannførandi í Grand Prix-kappingini hetta kappingarárið.

Finalan gjørdist júst so spennandi, sum ein kundi hugsað sær, og hon var stundum frálíka væl spæld. Hallur legði sannførandi frá landi og kom eisini á odda 3-1 í settum, men júst sum tað sá truplast út, ressaðist Albert og fullførdi eitt fralíkt comeback - og vann finaluna 4-3.

Albert Weihe Wolfsberg (Mynd: Jens Kr. Vang)

Albert fullførdi harvið sítt FM-hattrikk og hevur ikki tapt ein dyst í einmansleiki síðani hann á fyrsta sinni luttók í FM fyri trimum árum síðani. Hallur hevði møguleikan at vinna sítt annað FM, eftir at hann vann sítt fyrsta og higartil einasta í 2016, men soleiðis sum hann spælir, so skuldu verið góð líkindi fyri, at hann kann tryggja sær fleiri FM-heiti í framtíðini.

Anja Wongwai (Mynd: Jens Kr. Vang)

Hjá kvinnum er Anja Wongwai føroyameistari á fyrsta sinni. Talan var um endurtøku av FM-finaluni í fjør, har tær báðar TBF-kvinnurnar, Anja Wongwai og Britt Michelsen, hittust.

Í fjør vann Britt, men hesaferð var Anja omaná, og er nýggj á ovastu rók í føroyskum kvinnuborðtennis.

Britt legði annars best fyri í finaluni og var á odda bæði 1-0 og 2-1, men Anja var trúgv ímóti síni álopskendu spæliætlan, og soleiðis sum spælið bara gekst betur og betur, var tað hon, sum vann ein 4-3-sigur í einari væl leiktari finalu, og kann Anja Wongwai nú - í minsta lagi næsta árið - kalla seg føroyameistara.

Føroyameistarar í borðtennis 2023/24

Menn - einmansleikur
1. Albert Weihe Wolfsberg (Hillerød GI)
2. Hallur Thorsteinsson (Tór)
3. Fróði Fríðason Jensen (Tór)
3. Ári Fríðason Jensen (Tór)

Kvinnur - einmansleikur
1. Anja Wongwai (TBF)
2. Britt Michelsen (TBF)
3. Elsa Kathrina Gisladóttir (Tór)
3. Marin Elisabet Poulsen (TBF)

Menn - tvímansleikur
1. Hallur Thorsteinsson (Tór) / Fróði Fríðason Jensen (Tór)
2. Ári Fríðason Jensen (Tór) / Albert Weihe Wolfsberg (Hillerød GI)
3. Peter H. Niclasen (Tór) / Sveinur M. Nolsøe (Tór)
3. Ólavur Hammer (TBF) / Poul Knút Poulsen (TBF)

Kvinnur - tvímansleikur
1. Britt Michelsen (TBF) / Anja Wongwai (TBF)
2. Marin Elisabet Poulsen (TBF) / Elinborg C. Mortensen (TBF)
3. Elsa Kathrina Gisladóttir (Tór) / Hadassa S. Christiansen (Tór)

Blandaður tvímansleikur
1. Albert Weihe Wolfsberg (Hillerød GI) / Britt Michelsen (TBF)
2. Ári Fríðason Jensen (Tór) / Anja Wongwai (TBF)
3. Sveinur M. Nolsøe (Tór) / Elinborg C. Mortensen (TBF)
3. Poul Knút Poulsen (TBF) / Marin Elisabet Poulsen (TBF)

Myndir frá Kontrast FM síggjast her

Greinin varð fyrstu ferð løgd út 08. apríl 2024