Fólkaheilsustýrið: Vit viga ov nógv

Í okkara parti av heiminum teljast vit nú millum tey londini, har lutfalsliga flest fólk viga ov nógv

 

SkrivaÐ:

Tíðindaskriv

Tað gongur skeivan veg við vektini hjá føroyingum. Nýggj tøl hjá Fólkaheilsustýrinum vísa, at alt størri partur av fólkinum í Føroyum livir við yvirvekt, og í okkara parti av heiminum teljast vit nú millum tey londini, har lutfalsliga flest fólk viga ov nógv.

Hetta staðfestir stóra fólkaheilsukanningin “Hvussu hevur tú tað?” frá 2023, har góðir 5.000 føroyingar svaraðu spurningum um heilsu, sjúku og trivnað. Út frá upplýsingum í kanningini er BMI, sum er eitt roknað lutfall millum hædd og vekt, ásett fyri luttakararnar. Liggur BMI-talið á 25 ella hægri, verður tað mett sum yvirvekt.

Kanningin vísir, at 66 prosent av føroyingum hava eitt BMI uppá 25 ella hægri. Sostatt viga tveir av trimum føroyingum ov nógv. Í 2015 lá talið á 58 prosent, og í 2019 var tað vaksið til 62 prosent, so gongdin má sigast at vera negativ. Ein størri partur av monnunum (73 prosent) hevur eitt BMI uppá 25 ella hægri samanborið við kvinnur (59 prosent). Hjá báðum kynum eru lutfalsliga flest við yvirvekt í aldursbólkinum 55-64 ár – ávikavist 82 prosent hjá monnum og 65 prosent hjá kvinnum.

Alheims fólkaheilsutrupulleiki

Samanbera vit føroysku BMI-tølini við tey í øðrum londum, er støðan ikki góð. Við teim 66 prosentunum av fólkinum, ið hava BMI uppá 25 ella hægri, liggja Føroyar millum ovastu londini í einum yvirliti hjá OECD, oman fyri øll hini Norðurlondini og á støði við USA og Bretland. Hóast støðan ikki er eins ring allastaðni, so er gongdin hin sama kring allan heim, og alt fleiri fólk liva við yvirvekt.

Yvirvekt er tískil ein stórur alheims fólkaheilsutrupulleiki og ein týðandi vandatáttur fyri nógvar sjúkur, so sum hjartakarsjúkur, typu 2 diabetes, krabbamein, fertilitetstrupulleikar og at doyggja ov tíðliga. Harumframt hevur yvirvekt ofta við sær stigmatisering.

- Avbjóðingin við yvirvekt er vorðin so stór, at vit mugu viðurkenna, at talan er um ein samfelagstrupulleika, sigur Vár Honnudóttir, fólkaheilsufrøðingur og verkætlanarleiðari fyri “Hvussu hevur tú tað?”. Tí eiga vit eisini sum samfelag at taka ábyrgd og vera við til at loysa trupulleikan við at fremja og stuðla undir fyribyrgjandi og heilsufremjandi átøk.

Fyrivarni við BMI

BMI tekur ikki hædd fyri býti av feitti og vøddum í kroppinum, og tí skulu fyrivarni takast fyri at brúka BMI á einstaklingastigi. Mett verður tó, at á samfelagsstigi er BMI eitt einfalt og objektivt mát fyri at meta um vektstøðuna í t.d. einum landi.

Fleiri hagtøl og meira kunning um kanningarúrslitini um vekt úr "Hvussu hevur tú tað?" eru at finna í hesi frágreiðingini.

Greinin varð fyrstu ferð løgd út 22. apríl 2024

Arbeiða víðari við samanlegging í Suðuroy

Bý- og bygdaráðini á Tvøroyri og í Hvalba arbeiða víðari við kommunusamanlegging

Bjarni Hammer, Jónleyg J. Bech, Kristin Michelsen, Martin í Nesi, Thorstein Thomsen, Anita Vibergsdóttir, Ronni Hammer, Poul Laust Christensen, Niels Olaf Eyvindsson, Eyð Eidesgaard, Alvi Mortensen og Janus Thomsen

SkrivaÐ:

Sverri Egholm

Bý- og bygdarráðini á Tvøroyri og í Hvalba høvdu á flaggdegnum fund á kommunuskrivstovuni í Hvalba.

Á fundinum umrøddu limirnir, hvørji mál  eru týdningarmikil fyri báðar kommunur at fáa greiðu á í sambandi við eina kommunusamanlegging. Harumframt varð eisini viðgjørt, hvussu farast skal fram, skal ein fólkaatkvøða avgreiðast áðrenn summarferiuna í ár.

Borgarstjórarnir, Janus Thomsen og Kristin Michelsen, siga, at talan var um ein jaligan fund og at niðurstøðan á fundinum var, at arbeitt verður víðari við eini møguligari samanlegging av Hvalbiar kommunu og Tvøroyrar kommunu.

Greinin varð fyrstu ferð løgd út 26. apríl 2024

Føroyingur byggir marglætis hotel í Íslandi

Sia Hammer byggir 4-stjørnað hotell í tilknýti til baðstovuna Skógarböð í Akureyri

Sigríður María Hammer og maður hennara Finnur Aðalbjörnsson (Mynd: Skapti Hallgrímsson)

SkrivaÐ:

Jákup Bech Jensen

Sigríður María Hammer, vanliga rópt Sia, byggir 4-stjørnað marglætishotel á Akureyri. Hotellið verður partvíst í fýra og fimm hæddum við 120 kømurum, og tað verður klárt at taka ímóti gestum á vári 2026. Kostnaðurin er mettur at verða 250 milliónir føroyskar krónur.

Nýggja hotellið verður staðfest við baðstovuna Skógarböð / Forest Lagoon, sum Sia eigur og er stjóri fyri. Baðstovan lat upp í 2022, og er staðsett í skógvaksnum fjallalendi í sera vøkrum landslagi við útsýni yvir Akureyri.

Umframt 120 tvímanskømur, herav 12 svitur, hevur hotellið matstovu, barr og veitsluhøll, sum rúmar 220 fólkum.

Eisini verður ein svimjihylur bygdur, sum knýtir hotellið at baðilandinum. Sia sigur, at eftirspurningurin hevur verið so mikið stórur, at tey noyðast at útbyggja baðilandið, so tað verður tvífalt støddina í dag.

- Í summarhálvuni vænta vit at fáa útlendsk ferðafólk, og í vetrarhálvuni koma millum annað føroyingar, sum koma til Akureyri at standa á skí, sigur Sia.

Tað eru BASALT arkitektar í Reykjavík, sum hava teknað hotellið.

Sia Hammer er av føroyskari ætt. Les meira um hana og sjáldsomu baðstovu hennara her: Føroyingur eigur flottasta baðilandið í Íslandi 

(Mynd: Skapti Hallgrímsson)

(Tekning: BASALT arkitektar)

Greinin varð fyrstu ferð løgd út 22. apríl 2024

Heilivágur í sjálvtøku

Fyrsta sjálvtøkan til handkeypsheilivág í Føroyum varð tikin í nýtslu í vikuni

(Mynd: Heilsumálaráðið)

SkrivaÐ:

Sverri Egholm

Týsdagin varð skipað fyri tiltaki á Tjaldurs apoteki í sambandi við, at fyrsta sjálvtøkan til handkeypsheilivág í Føroyum varð tikin í nýtslu.

Sjálvtøkan hjá Tjaldurs apoteki er sett á útveggin við ta violettu inngongdina á vestursíðuni á SMS.

Talan er um fyrstu sjálvtøkuna til handkeypsheilivág hjá Apoteksverkinum. Sjálvtøkan, sum er tøk alt samdøgrið, er knýtt at Skjáttuni hjá Talgildu Føroyum, soleiðis at einans persónar, sum eru fyltir 18 ár og eldri, kunnu keypa handkeypsheilivág í sjálvtøkuni.

- Við sjálvtøkuni uttanfyri Tjaldurs apotek fer at bera til at keypa handkeypsheilivág alt samdøgrið í Suðurstreymi, tað vil siga eisini tá ið Tjaldurs apotek og apotekið í Steinatúni hava afturlatið. Tað er mín vón, at hetta fer at virka eftir ætlan, og at tænastan til borgaran gerst betri, sigur Margit Stórá, landsstýriskvinna við heilsumálum.

Greinin varð fyrstu ferð løgd út 23. apríl 2024

Til reiðar at taka móti kjarnorkuriknum kavbátum

Føroyar hava nú fingið tól, ið neyvt kunnu máta øll sløg av geisling á sjógvi og landi

Bjarni K. Petersen, landsstýrismaður og Leivur Persson, stjóri á Arbeiðs- og brunaeftirlitinum

SkrivaÐ:

Ingi Samuelsen

Føroyar hava nú fingið eina kjarnorkutilbúgving, soleiðis, at vit nú eru til reiðar at taka ímóti kjarnorkuriknum kavbátum í Føroyum. Løgmálaráðið skrivaði í vikuni, at Arbeiðs- og brunaeftirlitið hesa seinastu tíðina hevur lagt stóra orku at útvega útgerð og at menna førleikar til at seta á stovn eina virkna kjarnorkutilbúgving í Føroyum.

Higartil hevur kjarnorkutilbúgvingin ikki verið tíðarhóskandi, og neyðugt hevur verið at sent boð eftir fólki og útgerð frá Beredsskabsstyrelsen úr Danmark í sambandi við kavbátavitjanir.

Við nýggju tilbúgvingini verður hetta ikki neyðugt longur.

- Tað er merkisvert, at tað hevur eydnast Arbeiðs- og brunaeftirlitinum at borið so skjótt at við at fáa til vega eina kjarnorkutilbúgving við framkomnari útgerð eftir so stuttari tíð, sigur Bjarni Kárason Petersen, landsstýrismaður við tilbúgvingarmálum.

- Tað sigur seg sjálvt, at vit skulu menna slíkar førleikar í Føroyum, og at vit skulu stremba eftir egnum og haldførum loysnum, leggur landsstýrismaðurin afturat.

Útgerðin, talan er um, er millum annað fýra framkomin gammaspektrometur – sokallaðar “probur” – og telduforrit, sum neyvt kunnu máta øll sløg av geisling á sjógvi og á landi. Tilbúgvingin inniber eisini, at fólk hjá Arbeiðs- og brunaeftirlitinum hava fingið venjing í at brúka útgerðina. 

Greinin varð fyrstu ferð løgd út 23. apríl 2024

Kallaði Dag og viku-vert "kynsvilling": Nú er Beinir ákærdur

At kalla ein persón fyri kynsvilling og at siga, at "kynsvilla er ein sálarsjúka" er at fara ov langt. Ákæruvaldið hevur reist ákæru móti Beini Joensen

(Mynd: Beinir Joensen / Facebook)

SkrivaÐ:

Sverri Egholm

Ákæruvaldið hevur reist ákæru móti Beini Joensen, tí hann 1. desember í 2022 á Facebook kallaði John Johannesen, journalist og vert í Kringvarpi Føroya, fyri kynsvilling og segði at "kynsvilla er ein sálarsjúka".

Hann verður ákærdur fyri brot á grein 266b í sambandi við kynsliga orientering, skrivar Frihedsbrevet.

Orsøkin er, at Beinir Joensen tann 1. desember 2022 í sambandi við eitt Dag og viku innslag um HIV, viðmerkti á Facebook. Seinni sama kvøld legði Beinir Joensen eina aðra mynd av sær á Facebook, sum var tikin í Runavík í sambandi við rekkjukoyring á Pride hjá LGBT í 2021. Tá stendur Beinir Joensen á gøtuni við einum skelti við tekstinum "kynsvilla er sálarsjúka".

“Er tað í lagi, at hesin kynsvillingurin ger innslag um HIV? HIV kemur upprunaliga av kynsvillu og hevur síðani smittað onnur. Í løtuni eru apukoppar aktuellir og smitta eisini við livihátti, sum hesin sjónvarpsverturin hevur og prædikar fyri. KvF stinkar!, skrivaði Beinir Joensen 1. desember.

(Mynd: Beinir Joensen / Facebook)

Tað er løgreglan, sum hevur tikið málið upp, og nú hevur ákæruvaldið altso reist ákæru móti runavíkinginum, skrivar Frihedsbrevet.fo.

Greinin varð fyrstu ferð løgd út 23. apríl 2024

30 nýggjar leiguíbúðir í Klaksvík

Verkætlanin fevnir um 30 leiguíbúðir og eitt vinnuhøli. Íbúðirnar verða væntandi klárar at taka í nýtslu á sumri 2026

(Mynd: LÍV)

SkrivaÐ:

Sverri Egholm

Tryggingarfelagið LÍV og Spf. Kanjon hava gjørt eina avtalu um bygging av 30 leiguíbúðum í miðbýnum í Klaksvík. Verkætlanin, ið er ment saman við Kanjon og SNA, fevnir um 30 leiguíbúðir og eitt vinnuhøli. Avtala er gjørd við Pf. Nema, ið kemur at hava handil og skrivstovu í hølunum.

LÍV hevur leingi havt eitt ynski um at virka á og stuðla uppundir leiguíbúðarmarknaðin, og hevur við hesi avtalu nú gjørt avtalur um í alt 85 leiguíbúðir í Havn og í Klaksvík. Arbeitt verður við at finna eina smidliga loysn til møguligan biðilista og umsiting av leigumálunum. Kunna verður nærri, tá ið íbúðirnar vera klárar at leiga út.

Fyrsta stigi í hesum arbeiði væntast at fara í gongd beinanvegin og verða íbúðirnar væntandi klárar at taka í nýtslu á sumri 2026.

Hetta er eisini eitt neyðugt stig, tí sambært Búskaparráðnum, er mangulin uppá bústaðir ein týðandi fløskuhálsur. Somuleiðis hevur Klaksvíkar Kommuna víst stóran áhuga í at nøkta tann økta bústaðartørvin í kommununi og hevur verið ein týðandi viðspælari í tilgongdini til hesa verkætlan.

- Endamálið hjá LÍV er at tryggja kundum okkara eina munagóða virðisøking av teirra eftirlønaruppsparing og at íløgurnar eisini skulu koma kundum okkara, og føroyska samfelagnum, til góðar. Leiðslan hjá LÍV er sannførd um, at við hesi verkætlan, verða hesi málini nádd, sigur Jan Jakobsen, stjóri.

Les eisini: 33 nýggjar íbúðir á Argjum

Greinin varð fyrstu ferð løgd út 22. apríl 2024

Góða gongdin hjá Elektron heldur fram

Úrslitið í fjør var 13,4 milliónir krónur

(Savnsmynd: Jens Kr. Vang)

SkrivaÐ:

Sverri Egholm

Góða gongdin hjá Elektron seinastu árini heldur fram, og í ársroknskapinum kann fyritøkan vísa á eitt ársúrslit upp á 13,4 milliónir krónur eftir skatt.

Fíggjarstøðan javnvigar við 76,2 milliónum krónum og eginognin er 54,1 milliónir krónur.

Elektron hevur valt at útluta 2,7 milliónir krónur í vinningsbýti til partaeigararnar.

Eftir aðalfundin skipaði nevndin seg. Jean Djurhuus heldur fram sum formaður, og somuleiðis heldur Brian Smedemark fram sum næstformaður. Nývaldur í nevndini er Jan Ziskasen, ið kemur fyri Atla Suna Leo, ið hevur verið í nevndini í sjey ár.

- Nógv virksemi hevur verið innan bæði menningar- og hýsingartænasturnar, og Elektron veitir eisini brúkarahjálp til eitt nú Mínrokning-brúkarar og tey sum brúka Samleikan og Vangan. Við breiðu forrætningsvitanini um KT-infrakervið og KT-trygd veitir Elektron týðandi loysnir til føroyska marknaðin – hetta er alt til gagns fyri føroyska borgarin, sigur Elektron.

Greinin varð fyrstu ferð løgd út 23. apríl 2024

Fjøruvegurin kann snýta

Nýggi, góði og breiði vegurin kann lumpa, men tað er bara loyvt at koyra 50 km/t. Bilførarar fingu klipp, koyriforboð og mistu koyrikortið

(Savnsmynd)

SkrivaÐ:

Sverri Egholm

Tað var ov nógv ferð á hjá trimum bilførarum á Fjøruvegnum í Saltangará og á Glyvrum fríggjanáttina.

Vegurin er nýggjur og breiður, men tað er bara loyvt at koyra 50 km/t eftir vegnum.

Løgreglan tók ein bilførara fyri at koyra 81 km/t á vegastrekkinum. Tað gevur klipp í kortið.

Hinir báðir bilførararnar høvdu so mikið nógva ferð, at teir spældu sær av við koyrikortið. Annar koyrdi 99 km/t, og fekk koyriforboð. Hin koyrdi 110 km/t og hann fær treytaleysa frádøming av koyrikortinum.

Koyriforboð verður vanliga givið bilførarum, sum bróta ferðslulógina við ávísum kilometratali og sum hava havt koyrikortið í minni enn trý ár.

Greinin varð fyrstu ferð løgd út 26. apríl 2024

Kjarnorkurikin kavbátur í Nólsoyarfirði

Hósdagin var amerikanski kavbáturin USS Albany at síggja í Nólsoyarfirði

(Mynd: Birgir Kruse)

SkrivaÐ:

Sverri Egholm

Amerikanski kavbáturin USS Albany var seinnapartin hósdagin at síggja í Nólsoyarfirði.

Uttanríkis- og vinnumálaráðið boðaði frá vitjanini hósmorgunin. USS Albany hevur diplomatiskt loyvi at koma í føroyskt sjóumveldi.

Onki varð upplýst um, hvørji ørindini eru hjá amerikanska kavbátinum í dag.

Hetta er sættu ferð at amerikanskur kavbátur vitjar Nólsoyarfjørð hesi seinastu tvey árini.

Greinin varð fyrstu ferð løgd út 25. apríl 2024

Arbeiðsloysið var 1,1 prosent í mars

402 persónar vóru raktir av arbeiðsloysi í mars, 110 fleiri enn í mars í fjør, tá arbeiðsloysið var 0,8 prosent

(Mynd: Hagstovan)

SkrivaÐ:

Alda Nielsdóttir

Í mars var arbeiðsloysið í Føroyum 1,1 prosent, og tað svaraði til 346 fulltíðararbeiðsleys.

Í persónum vóru 402 rakt av arbeiðsloysi í mars, ið eru 110 fleiri enn í mars í fjør, tá arbeiðsloysið var 0,8 prosent, svarandi til 255 fulltíðararbeiðsleys, skrivar Hagstovan.

Í mars vóru 203 fulltíðararbeiðsleysir menn, ið svarar til 1,2 prosent - 0,3 prosentstig hægri samanborið við sama mánað í fjør.

Hjá kvinnum var arbeiðsloysið 1,0 prosent, ið svarar til 143 fulltíðararbeiðsleysar kvinnur. Tað er 0,2 prosentstig hægri enn sama mánað í fjør.

Í mars vóru 34 persónar ella 8,5 prosent av teimum arbeiðsleysu, langtíðararbeiðsleys. Tað vil siga, at tey hava verið arbeiðsleys í longur enn eitt ár, skrivar Hagstovan.

Greinin varð fyrstu ferð løgd út 24. apríl 2024

Stórur áhugi í New York fyri føroyskari ull og klædnamerkjum

Stórt tiltak við føroyskari sniðgeving, ull og binding var í Scandinavia House í New York um vikuskiftið við filmi, framløgum, pallborði, verkstovum og framsýning

 

SkrivaÐ:

Tíðindaskriv

Karmur um tiltakið var heimildarfilmurin The Wool Islands um føroyskan seyð, ull, ullarvirking og tey klædnamerki, ið arbeiða við at sniðgeva pløgg úr føroyskari ull. Sissal Kristiansen er stigtakari til filmin, og hon hevur eisini samskipað tiltakið í Scandinavia House.

Á tiltakinum hugtóku Shisa Brand, Reka, Durita Thomsen, Einstakt, Steinum og Navia við framløgum um síni merki. Føroysku klædnamerkini høvdu hvør sína framløgu, har tey greiddu frá arbeiðinum við føroysku ullini, um hvussu siðbundu føroysku mynstrini verða sett í nýggjar samanhangir, um snið, um litir og góðsku á føroysku ullini, um binding og um burðardygd í framleiðsluliðunum.

– Móttøkan hevur verið heilt einastandandi her í New York, og áhugin fyri okkara vørum og fyri Føroyum er stórur. Í føroysku ullini hava vit eitt tilfeingi, eina felags søgu og siðvenju, ið er heilt serstøk, og sum er grundarlag undir okkara ymsu vørumerkjum, sigur Sissal Kristiansen, eigari av Shisa Brand.

Eftir framløgurnar var pallborð, ið Isabella Rossellini leiddi. Mong kenna helst Isabellu Rosselini sum sjónleikara og modell, men hon hevur eisini seyð og rekur garðin Mama Farm nakað uttan fyri New York. Áhoyrararnir settu spurningar um føroyska seyðaslagið, um virking av ullini, um burðardygd í framleiðsluni, og fleiri vildu vita, hvar føroyska tógvið kundi keypast. Stórur áhugi var fyri serligu føroysku ullini, ið hevur tvey løg. Tað er ein avbjóðing at skilja broddin úr føroysku ullini, men tað er millum annað eisini hann, ið ger føroysku ullina so serstaka. Arbeitt verður við at finna loysnir, ið kunnu virka størri nøgdir av føroyskari ull.

Isabella Rosselini, sum upprunaliga er útbúgvin sniðgevi, greiddi frá arbeiðinum á garðinum, og um hvussu burðardygd er grundarlagið undir øllum virkseminum. Eisini vísti hon á, at tað er neyðugt at skilja, hvaðani klæðini stava, og hvussu tey verða framleidd. Hon var hugtikin av føroysku tilgongdini, har arbeitt verður við at fáa ein alt størri part av føroysku ullini til høldar og framleidda í Føroyum.

– Vit arbeiða við at menna burðardygga virking av ull og við at skipa okkum her í New York, og har kunnu vit læra nógv av tykkum í Føroyum, tí tit eru komin væl longri enn vit á økinum," segði Isabella Rossellini.

Føroysku fyritøkurnar høvdu eisini eitt úrval av vørum, ið varð sýnt fram, og stórur áhugi var fyri føroysku pløggunum.

Sunnudagin skipaði Navia fyri tveimum verkstovum, har fólk lærdi at binda føroysk bindingarmynstur og skóleistar.

– Tiltakið hevur verið framúr gott. Vit hava fingið sambond við handlar, ið vilja selja okkara vørur, og vit hava eisini selt tógv til felagið Kelbourne Woolens, ið umboðar Navia í Norðuramerika, sigur Óli Kristian á Torkilsheyggi, stjóri í Navia.

Tiltøkini um føroyskt design, ull og binding eru partar av Fog Swept Islands – Faroe Islands Culture Days, sum Uttanríkis- og vinnumálaráðið, Almanna- og mentamálaráðið og Visit Faroe Islands skipa fyri í samstarvi við American-Scandinavian Foundation og Scandinavia House. 

Greinin varð fyrstu ferð løgd út 22. apríl 2024

Føroyskir rithøvundar á palli í New York

Rithøvundarnir Marjun Syderbø Kjelnæs, Kim Simonsen, Rannvá Holm Mortensen og Bárður Oskarsson saman við týðarunum Matthew Landrum og Randi Ward lósu upp og greiddu frá tilgondini til bøkurnar á bókmentatiltaki í Scandinavia House

 

SkrivaÐ:

Tíðindaskriv

Rithøvundar og týðarar hava saman við FarLit og Bókadeild Føroya Lærarafelags borið fram føroyskar bókmentir í New York. Tiltøkini vóru liður í føroysku mentanardøgunum, Fog Swept Islands – Faroe Islands Culture Days.

Á bókmentatiltaki í Scandinavia House mikukvøldið 17. apríl var upplestur og bókaprát á skánni. Rithøvundarnir Marjun Syderbø Kjelnæs, Kim Simonsen, Rannvá Holm Mortensen og Bárður Oskarsson saman við týðarunum Matthew Landrum og Randi Ward lósu upp og greiddu frá tilgondini til bøkurnar. Áhoyrararnir fingu síðani høvi at práta við rithøvundarnar og síggja eitt úrval av bókum.

– Føroysku rithøvundarnir hava fingið sera góða móttøku her í New York – bæði áhoyrarar og forløg eru sera áhugað í tí, vit koma við. Tað er umráðandi, at føroyskir rithøvundar fáa høvi at fáa bøkur sínar út á fleiri marknaðir, og amerikanski marknaðurin er sera áhugaverdur fyri føroyskar rithøvundar og forløg, sigur Jóhanna Wolles, samskipari í FarLit, sum arbeiðir við at fáa føroyskar bókmentir út í heim.

Hósdagin var tiltak fyri forløgum og tíðindafólki við upplestri, framløgum og bókapráti. Fyri amerikanarar er tað hugvekjandi, at tað ber til at geva so stórt tal av bókum út á føroyskum, bæði á upprunamáli og týddar bókur.

– Almenni stuðulin, ið verður latin til bókaútgávu, og serliga til útgávu av barnabókum, er avgerandi fyri, at vit kunnu geva út bøkur á føroyskum til børn í øllum aldri. Tað hevur øll árini verið politisk semja um at veita stuðul til útgávu av bókum til børn og ung, og uttan almenna stuðulin hevði tað ikki borið til, sigur Niels Jákup Thomsen, leiðari á Bókadeild Føroya Lærarafelags.

– Vit hava fingið sambond við fleiri útgevarar, ið eru áhugaðir í at geva bøkur eftir føroyskar rithøvundar út á amerikanska marknaðinum. Vit eru tí sera fegin um at luttaka á einum tiltaki sum hesum, sigur Niels Jákup Thomsen.

Afturat tiltøkunum í Scandinavia House var eitt tiltak í Spectacle Theater í Brooklyn týskvøldið við filmssýning, upplestri og práti við rithøvundarnar. Á skránni var filmurin Skál, ið Cecilie Debell og Maria Tórgarð hava leikstjórnað. Rithøvundarnir Marjun Syderbø Kjelnæs, Kim Simonsen og Rannvá Holm Mortensen lósu upp á føroyskum og Matthew Landrum og Randi Ward á enskum. Síðani var prát um tilgongdina at skriva og spurningar frá áhoyrarunum. Nærum fullsett var til tiltakið í Spectacle, sum er ein lítil biografur í Brooklyn, rikin av sjálvbodnum.

Mentanarátakið í Scandinavia House í New York heldur fram til fyrst í juli. Átakið er fyriskipað av Uttanríkis- og vinnumálaráðnum, Almanna- og mentamálaráðnum og Visit Faroe Islands í samstarvi við American-Scandinavian Foundation og Scandinavia House – the Nordic Center in America.

Greinin varð fyrstu ferð løgd út 20. apríl 2024

Føroysk vørumerki á vágskálina

Brandr: Nú verður møguligt hjá føroyskum fyritøkum at máta styrkina hjá teirra vørumerkjum

 

SkrivaÐ:

Tíðindaskriv

Nú verður fyri fyrstu ferð farið undir miðvíst at máta og samanbera føroysk vørumerki, og geva føroyskum fyritøkum betri vitan og grundarlag til at styrkja sína marknaðarstøðu. Eisini er ætlanin at finna og heiðra sterkastu føroysku vørumerkini.

Eitt vørumerki kann vera so mangt – alt frá gerandisvørum til klædnamerki, bilmerki og fyritøkur.

Okkara ímynd og uppfatan av einum vørumerki er ávirkað av øllum okkara sambandi við vørumerkið, til dømis vørur og tænastur, kundatænasta, fjølmiðlaumrøða, heimasíða, marknaðarføring, sosialir miðlar, búmerki og annað. Hugtakið branding ella vørumerking snýr seg um at skapa røttu upplivingina og ímyndina í huganum hjá móttakaranum.

Tað snýr seg ikki bara um tað einstaka vørumerkið, men eina rúgvu av vørumerkjum, sum kappast um okkara uppmerksemi og um fyrstaplássið í minni okkara. Og uttan at vit gáa um tað, fer dysturin fram alla tíðina, til dømis tá ið vit keypa klæðir, matvørur, telefonhald, bilar ella hundamat.

Nú er fyri fyrstu ferð møguligt hjá føroyskum fyritøkum at máta styrkina hjá teirra vørumerkjum á ein sambærligan og vísindaligan hátt. Hetta verður gjørt við sonevnda brandr vísitalinum, ið mátar alt tað, sum hevur størstan týdning fyri okkara fatan av vørumerkjum, og samanber hetta við kappingarneytar og marknaðin sum heild.

Við brandr vísitalinum fáa fyritøkur sostatt spildurnýggja vitan, sum kann brúkast til at styrkja teirra vørumerki og sambandið við kundar og brúkarar.

Brandr vísitalið er ment av íslendska dr. Fridrik Larsen, ið er altjóða viðkurkendur serfrøðingur í branding við eini bakgrund innan sálarfrøði og búskaparfrøði. Brandr vísitalið verður í dag brúkt av fleiri enn 250 vørumerkjum í Íslandi og Evropa, og í samstarvi við kanningarfyritøkuna spyr.fo er hetta nú eisini ein møguleiki hjá føroyskum vørumerkjum.

Tá ið gongd er komin á mátingarnar verður næsta stigið at finna og heiðra sterkastu vørumerkini í Føroyum.

Tíðindaskriv frá spyr.fo 

Greinin varð fyrstu ferð løgd út 25. apríl 2024

Læknavaktin styrkt við psykiatriskum førleikum

Hetta hevur leingi verið eitt ynski hjá sjúklingum og sjúklingafeløgum, og við hesi broytingini skuldu vit verið nærri málinum at tryggja, at fólk kenna, at tey fáa somu tænastu uttan mun til, um talan er um likamliga ella sálarliga sjúku, sigur Margit Stórá, landsstýriskvinna í heilsumálum

(Savnsmynd)

SkrivaÐ:

Tíðindaskriv

Læknavaktin er styrkt soleiðis, at tey, sum brádliga gerast álvarsliga illa fyri sálarliga, kunnu fáa møguleika at tosa við ella hitta fólk, sum serliga taka sær av slíkum trupulleikum.

Fakfólk og felagsskapir hava í eina tíð víst á, at neyðugt er við einari skipan, sum tryggjar aðra hjálp, tá fólk brádliga gerast sálarliga illa fyri.

Tað er nú veruleiki.

– Eg eri fegin um, at skipanin við styrktari tænastu í læknavaktini er farin at virka. Hetta hevur leingi verið eitt ynski hjá sjúklingum og sjúklingafeløgum, og við hesi broytingini skuldu vit verið nærri málinum at tryggja, at fólk kenna, at tey fáa somu tænastu uttan mun til, um talan er um likamliga ella sálarliga sjúku, sigur Margit Stórá, landsstýriskvinna í heilsumálum.

Tað er Psykiatriski depilin á Landssjúkrahúsinum, sum í samstarvi við Læknavaktina veitir hesa tænastuna. Settir eru sjúkrarøktarfrøðingar við psykiatriskum førleikum at hava telefonviðtalur ella persónliga viðtalur eftir áheitan frá lækna í læknavaktini.

Læknavaktin 1870 svarar eftir kl. 16 gerandisdagar umframt alt samdøgrið í vikuskiftinum og halgidagar, tá fólk ikki kunnu ringja til sín egna kommunulækna. Fólk við psykiatriskum førleikum starvast í kvøldvaktunum allar dagar, og tað er frá kl. 16.00 til 23.00.

At læknavaktin er styrkt við psykiatriskum førleikum, er eisini ein liður í at javnseta sálarligar og likamligar sjúkur. Øll, ið stríðast við brádliga sjúku, kunnu ringja á sama telefonnummar, 1870, tá læknavaktin hevur opið.

Greinin varð fyrstu ferð løgd út 20. apríl 2024

Vágs skúli aftur fingið stórfingna gávu frá íslendskum hjúnum

Hon skal nýtast til ein FIFA fótbóltsvøll. Í 2017-2018 lat sama familja eisini skúlanum gávur, so at farast kundi undir FabLab

Johanna Hjelm og maðurin Gylfi Scheving hava latið Vágs skúla tað sum verður lýst sum ein stórfingin peningagáva. Jóhanna hevur ættarbond til Vágs, og dóttir hennara hevur áður latið gávu til Vágs skúla (Mynd: vagur.fo)

SkrivaÐ:

Agnar Prestá

Jóhanna Hjelm og maðurin Gylfi Scheving hava latið Vágs skúla tað sum verður lýst sum ein stórfingin peningagáva.

Hetta kemur ikki so heilt óvart á tey í Vági, tí familjan hevur latið slúlanum gávur fyrr. Vinalagið millum íslendsku familjuna Hjelm og Vágs skúla stavar í roynd og veru frá einari lagnuhending fyri yvir 100 árum síðani. Sambandið verður lýst á hendan hátt á vagur.fo:

- Jóhanna er dóttur Sivar Hjelm, sum var føddur í Vági 21. dessember 1915. Sivar flutti til Íslands sum 12 ára gamal saman við mammu síni og stórum systkinahópi. Pápi Sivar, Jógvan Hjelm, gekk burtur við báti á útróðri av Vágseiði saman við brøðrum sínum Martin og Jaspur Hjelm og tveimum synum hjá Jaspuri, Anton og Esbern, og Sofus Berg, ættaður úr Hvalba. Eftir at tey fluttu til Íslands, longdist Sivari altíð aftur til Vágs, og flutti hann eisini til Vágs í nøkur ár, eftir at hann var fermdur. Sivar tosaði altíð so hjartaliga um Vág.

Nú eru 50 ár síðani, at Sivar Hjelm andaðist. Í hesum sambandi vil dóttirin minnast pápa sín við at lata Vágs skúla eina gávu.

Upplýst verður ikki, hvussu stór gávan er, men Vágs skúli er sera takksamur fyri gávuna og ætlar at brúka hana til ein FIFA fótbóltsvøll. Vøllurin kemur at liggja partvís á núverandi skúlalagnum. Vøllurin verður eisini uppkallaður: Hann skal nevnast SIVARS vøllur, skrivar Vágs kommuna.

Gávan bleiv handað á móttøku í Vágs Skúla, har John Henrik Holm, skúlastjóri og Magnus Pauli West, trivnaðarleiðari í Vágs kommunu, bjóðaðu vælkomin og takkaðu fyri gávuna.

Vágs skúli møtti íslensku familjuna fyrstu ferð á sumri 2017, tá dóttir Jóhannu, Margrét G. Scheving, og maðurin Ásbjørn Óttarsson lótu skúlanum ein 3D-prentrari og ein 3D-skannari. Seinni í januar 2018 lat íslendska parið Vágs Skúla tøkniliga útgerð og tilfar, soleiðis at FabLab'ið fór í gongd.

Sí eisini: Vágs skúli fær eisini Fab Lab

Vágs Skúli er enn einasti fólkaskúlin í landinum við einum FabLab

Greinin varð fyrstu ferð løgd út 25. apríl 2024

Eiðis skúli vann ársins veðurlagsvirðisløn

Eiðis skúli fær veðurlagsvirðislønina hjá Føroya Lærrafelag fyri stóra arbeiðið, sum tey í undirvísingarhøpi gera fyri at ávirka næmingarnar og geva teimum kunnleika um veðurlags- og umhvørvisavbjóðingar

(Mynd: Skúlablaðið)

SkrivaÐ:

Alda Nielsdóttir

Farna fríggjadag fekk Eiðis skúli handað veðurlagsvirðislønina hjá Føroya Lærarafelag. 

– Eiðis skúli fær virðislønina fyri stóra arbeiðið, sum tey í undirvísingarhøpi gera fyri at ávirka næmingarnar og geva teimum kunnleika um veðurlags- og umhvørvisavbjóðingar. Tey hava í fleiri ár arbeitt miðvíst við burðardyggari menning, har tey serliga arbeiða út frá teimum staðbundnu loysnunum og umhvørvinum, sum næmingarnir kenna. Hetta er sostatt blivin ein inngrógvin partur av skúlaárinum, skrivar Skúlablaðið.

– Tey hava eitt nú arbeitt við endurnýtslu, seymað taskur úr endurnýtslutoyi, gjørt jólaeinglar úr horni, tálg til fuglafóður, endurnýtt træsprek og tunnufjalar til vevar og skilt burturkast. Tey hava sátt grønmeti og velt epli í skúlagarðinum, flett seyð, kúgv, haru og roytt havhestaungar. Skorið upp springarar, fiskað og hagreitt fiskin, umframt verið eftir eggum, sum verða nýtt í matgerð.

– Hvørt ár gera allir næmingarnir døgurða í skúlanum, har eplini, sum teir hava velt, og fiskurin, sum teir hava fiskað, verður etin.

Handanin av veðurlagsvirðislønini fór fram á aðalfundinum hjá Føroya Lærarafelag á Hotel Føroyum.

Greinin varð fyrstu ferð løgd út 21. apríl 2024

Grøni Háskúlin á Sandi letur uppaftur

Spirandi endurupplating. Háskúlin Leggur dent á sjálvbjargni, burðardygd og persónligari menning

 

SkrivaÐ:

Tíðindaskriv

Nú fáa ung aftur møguleika at læra um tilfeingi og gagnnýtslu av náttúruni, og hvussu vit kunnu liva og virka í samljóð við náttúruna. Virðini eru enn sum áður sjálvbjargni, burðardygd og persónlig menning.

Skúlin, sum er ímyndin av grønu leiðini, vendir sær í fyrstu atløgu til ung millum 17 og 25 ár. Á 16 viku langa skeiðnum í heyst fáa næmingar førleikar og íblástur til ein burðardyggan lívsstíl og til at liva grøna lívið. 

Virðing, vitan og nýmenning

Hesi eru høvuðsevnini. Við virknari læring og náttúruni sum skúlastovu, nema næmingarnir sær kunnleika um umhvørvið og tilfeingið kring okkum. 

Málið er at virka fyri, at komandi ættarlið við viðring fara at varðveita og endurbøta náttúruna.

Á Grøna Háskúlanum renna siðbundna og staðbundna vitanin um náttúruna saman við samtíðarrákum og nýggjastu gransking uttan úr heimi. 

Háskúlin er rótfestur í náttúruni og tilfeinginum kring okkum. Frálæran er bæði ástøðilig og verklig, og er skipað í evnum við tí tilfeingi, ið árstíðin hevur at bjóða.

Saman við starvsfólkum á skúlanum, staðkendum fólki og serfrøðingum læra næmingarnir t.d. um plantufrøði, moldmentan og smálívfrøði. Um jarðarbrúk, velting og djórahald. Um umhvørvi, vistskipanir, lendisrøkt og lívfrøðiligt margfeldni umframt um burðardygd, etikk og djóravælferð. 

Í gerandisdegnum verður dentur lagdur á at skapa góðar vanar at taka við á lívsleiðini. Vit seta spurningar, royna at ávirka og gera mun. Hugsað verður um heildina, alt meðan loysnir verða funnar til smáu yvirsæddu virðurskiftini í gerandisdegnum.

Skaffa, góðska og matgera

Innløgumentan, tað at fáa matin til høldar, og praktiskir førleikar í tí samhangi, hevur ein stóran leiklut í undirvísing og gerandisdegnum á skúlanum. Veiðan á opnum havi, á firðum, í fjøruni, á vøtnum og áum, í bønum, í bjørgum og í fjøllunum hoyrir heystinum til, og fer at fylla nógv saman við leskiliga grønmetinum av Sandi.

Alt tilfeingið skal takast upp og handfarast, hagreiðast, goymast, góðskast og gagnnýtast. Lært verur um reinføri og kostfrøði. Um handverk, mannagongdir, niðursjóðing og matgerð. Vit nýta allar sansir og lata okkum kveikjast og tølast, og vit læra at skyna mun á dygd. Íblásturin mennist, og skapanarhugurin birtist. Mentan, list, vælvera og vertskapur renna fagurliga saman í leskiligum heilsugóðum máltíðum, sum vit matgera og eta í felag. 

Sjálvbjargni

Tá lært verður og skapa í felag, víðkast sjónarringurin av okkara felags tankagóðsi, kunnleika og hugsjónum. Næmingar menna áræði, hegni og førleikar at loysa ymiskar gerandisstøður, umframt evnini at breyðføða og lívbjarga sær sjálvnum. 

Hesir førleikar stuðla næmingum í persónligu menningini og tilvitanini um eins egna leiklut í náttúruni, nærumhvørvinum og heimssamfelagnum, og vekja harafturat ans fyri, hvørja ávirkan hvør einstakur kann hava.

Háskúlalívið á vistarskúla

Tað er eitt sindur bygdasligt í Ísansgarði. Tað eru níggju kømur. Í neðra er køkur og hugnalig stova, har øll savnast til morgunmat og nátturða um kvøldið. Heitur pottur er í túninum, sum kann kyndast til felags løtur.

Náttúran er beint uttanfyri, stutt er oman á sand, til ein túr runt vatnið, og oyggin er ein tann besta til ein súkklutúr til grannabygdirnar. Heima á Sandi er bæði lista-, bóka- og fornminnissavn, á Meginskúlanum er svimjihylur, og møguleiki er fyri at royna seg við bæði kajakk og brimfjøl. 

At ganga á Grøna Háskúlanum er ein virkin lívsháttur, har eingin dagur er eins. Trivnaðurin hevur hægstu raðfesting, og tað verður hjúklað um felagsskapin, ið er sjálv rótin, sum skal fáa alt at vaksa og fáa grønu hugsjónina at blóma.  

Greinin varð fyrstu ferð løgd út 23. apríl 2024

Borðini hjá býráðslimum kunnu pakkast burtur

Fyrsti býráðsfundur við nýggjum fundarinnbúgvi varð hildin í býarsalinum í Varpinum hósdagin

(Mynd: Klaksvíkar kommuna)

SkrivaÐ:

Sverri Egholm

Hósdagin var fyrsti býráðsfundur við nýggjum fundarinnbúgvi hildin í býarsalinum í Varpinum.

Tað serstaka er, at innbúgvið er gjørt til at vera lætt at seta upp og at flyta. Innbúgvið verður sett upp til hvønn býráðsfund og tikið burtur eftir fundirnar, tí býarsalurin skal nýtast til fjølbroytt virksemi, heruppií umboðan og ymisk tiltøk hjá Klaksvíkar kommunu.

Innbúgvið verður hongt á veggir í býarsalinum og umboðar nærfólkaræðið í kommununi.  

Tað er Heini Weihe, sniðgevi, sum hevur sniðgivið og útvegað innbúgvið til Klaksvíkar kommunu.

Greinin varð fyrstu ferð løgd út 26. apríl 2024

Lendisgøta verður uppkallað eftir Eliasi

Lendisgøtan, sum í løtuni verður løgd millum Klingruna og nýggju stórhøllina við Tjarnir, verður kallað Skipagøta

(Mynd: Sverri Egholm)

SkrivaÐ:

Ingi Samuelsen

Eitt av málunum, sum var fyri á fundinum hjá Tórshavnar býráð í vikuni, var at samtykkja eitt navnn til lendisgøtuna, sumí løtuni verður løgd millum Klingruna og niðan til nýggju stórhøllina við Tjarnir.

Og navnið verður Skipagøta fyri at heiðra hondbóltinum og serliga hoyvíkinginum Eliasi á Skipagøtu.

“Staðsetingin fyri høllina kennist í dag nakað langt burtur frá bygda umhvørvinum, og hevur kommunan tískil tikið stig til at gera eina gøtu frá Klingruni og niðan gjøgnum vátlendi, fram við Stórutjørn, heilt niðan til Stórhøllina. Eftir hesi gøtu vónar kommunan, at borgarar og vitjandi fara at njóta náttúruna niðan til Stórhøllina at venja og hyggja eftir ítrótti o.ø.

Og tá nú hondbólturin og hondbóltshetjurnar á føroyska manslandsliðnum hava fylt so nógv í hugaheiminum hjá flestu føroyingum eftir flotta úrslitið í Týsklandi í januar 2024, so er politiskt ynski komið fram um at heiðra hondbóltinum og einstaklinginum Elias Ellefsen á Skipagøtu við navngeva lendisgøtuna ... Elias Ellefsen á Skipagøtu hevur saman við sínum liðfeløgum, HSF og hondbóltsfamilju sínari veruliga sett hondbóltin í Føroyum á breddan, og ynskir Tórshavnar kommuna at staðfesta og heiðra hansara persónligu góðu og merkisverdu avrik við at navngeva lendisgøtuna millum Klingruna og Stórhøllina við navninum “Skipagøta”, varð sagt í viðmerkingunum til málið, sum var einmælt samtykt í býráðnum.

Eftirnavnið á Skipagøtu stavar úr Skúvoy. Langabbi Elias, Jens Jensen, keypti sær hetta eftirnavnið í síni tíð.  

Greinin varð fyrstu ferð løgd út 24. apríl 2024

– Eri errin av, at mínir klavertónar kunnu gerast ein partur av upplivingini hjá ferðafólki

Tá tú tendrar ein av søguforteljingunum á Tell Me North appini, kennir tú møguliga tónleikin hjá Eli Tausen á Lava aftur – serliga um tú hevur áhuga í klassiskum, føroyskum tónleiki

 

SkrivaÐ:

Tíðindaskriv

Eins og lítla ferðavinnufyritøkan Tell Me North hava føroyingar seinastu árini av álvara fingið eyguni upp fyri evnaríka, unga tónaskaldinum, Eli Tausen á Lava, sum útgav "Impressions" í 2020 og "In a Field" í 2022, sum báðar eru skrivaðar og framleiddar í Føroyum.

Í 2019 fekk Eli Tausen á Lava heiðurin sum "Ársins Nýggja Navn" á FMA í 2019 sum fyrsta klassiska tónaskaldið nakrantíð, og hevur hann síðani verið tilnevndur í fleiri øðrum kategorium í FMA eisini. Eli er framvegis undir útbúgving sum tónaskald í New York, har hann herfyri var gestatónleikari og hitaði upp fyri Eivør til tiltak, sum Faroe Music Export (FMX) og Uttanríkis- og vinnumálaráðið skipaðu fyri í samband við stóra mentanarátakið “Fog Swept Islands – Faroe Islands Culture Days in New York”.

Men tað ber eisini til hjá ferðafólki at hoyra tónleikin hjá Eli, tá tey vitja í Klaksvík. Klassiski tónleikurin hjá Eli er partur av nýggja ferðavinnutilboðunum hjá Tell Me North, har tú gongur eina ávísa leið, ímeðan tú lurtar eftir søguni, sum er viðkomandi fyri støðini. Hetta verður gjørt gjøgnum app, sum bæði fæst á App Store og Google Play Store, umframt við Mp3 spælarum. Tónleikurin hjá unga tónasmiðinum verður brúktur til at skapa serstøk hugløg, lyftir frásøgnina á eitt hægri støði og ger, at søguforteljingin verður uppaftur sterkari.

Sjálvur sigur Eli:

– Tónleikur er ikki bara ein partur av tónleikaútgávum, konsertum, filmum og telduspølum. Hann er eisini ein partur av upplivingini av, at vera til handils, at eta á matstovu, at gera joga á venjingarmiðstøðini, at vera í bíðirøð, tá mann ringir til læknan, o.s.fr. Sum føroyskur tónleikari kann tað vera trupult at kappast við risastóru tónleikafyritøkurnar, ið ráða yvir seinna bólkinum. Tí eri eg ómetaliga glaður fyri, at Jóhanna og Dávid handan Tell Me North hava valt at brúka tónleik úr mínum útgávum í Tell Me North appini. Eg eri errin av, at mínir klavertónar kunnu gerast ein partur av upplivingini hjá ferðafólki — bæði føroyskum og útlendskum — ið leggja sínar leiðir framvið Klaksvík.

Dávid Fossdalsá, ið saman við Jóhonnu Magnusardóttir rekur Tell Me North leggur afturat:

– Vit kundu sjálvandi brúkt onkran útlendskan stemningstónleik, sum vit funnu á netinum, men tað hevur eisin týdning fyri okkum at brúka føroyskan tónleik í okkara túrum – bæði fyri at stuðla føroyskum tónasmiðjum og seta rætta huglagið til okkara søgur.  

– Og her passaði tónleikurin hjá Eli sum fótur í hostu, leggur Jóhanna afturat.

Sigast kann tí, at Eli Tausen á Lava saman við Tell Me North heldur fram við at bróta burtur úr nýggjum og slóðar fyri, at klassiskur tónleikur eisini kann gerðast partur av vinnuligum ferðatilboðnum.

Tíðindaskriv frá Mahogni Music Publishing

Greinin varð fyrstu ferð løgd út 22. apríl 2024

Frá Red Rocks Amphitheater til Royal Albert Hall

Eivør hevur stórar uppgávur fyri tíðina. Í vikuni framførdi hon fyri umleið 9.000 fólkum í fjallalendi í Denver í USA. 10. mai skal songkvinnan á pall í víðagitnu konserthøllini í London

Konsertin á Red Rocks Amphiteathre var partur av konsertferð í USA. Skjótt verður Eivør í høvuðsstaðnum í Onglandi - seinni í ár hevur hon konsertir í Føroyum

SkrivaÐ:

Agnar Prestá

Hesar vikurnar hevur Eivør fleiri spenanndi tiltøk á skránni.

Eitt slíkt var týskvøldið, tá Eivør framførdi á Red Rocks Amphitheatrinum í Denver. Talan er um serstakt spælistað í tónleikaheiminum. Tað hevur 11 ferðir hevur vunnið Pollstar virðislønina fyri at verða besta uttandura spælistað.

Eivør og bólkur hennara stóðu frammanfyri eini 9.000 fólkum uppi á stórslidna reyðlitta fjallalendinum í amerikanska statinum Colorado.

Konsertin var partur av konsertferð í USA, sum sjálvandi er ein stórur og áhugaverdur marknaður. Har hevur songkvinnan, sangskrivarin og tónleikarin úr Syðrugøtu eisini vunnið seg meira fram seinnu árini. 

Eivør og viðleikarin Mikael Blak avmyndað í sermerkta pallinum í Red Rocks undan konsertini

Greinin varð fyrstu ferð løgd út 24. apríl 2024

Teitur Lassen nýggjan sáttmála við Edition Wilhelm Hansen

Talan er um Edition Wilhelm Hansen, ið hevur virkað sum útgávufelag síðan 1857

Teitur Lassen (Foto: Finnur Justinussen)

SkrivaÐ:

Ingi Samuelsen

Teitur hevur gjøgnum felag sítt, Arlo and Betty Music, gjørt sáttmála við danska útgávufelagið, Edition Wilhelm Hansen, ið er partur av altjóða forlagnum Wise Music Group. Talan er um størsta forlag í norðurlondum, ið varð stovnað í 1857, og sum tónaskaldini Sibelius, Grieg og Carl Nielsen hava lagt lunnar undir.

Sáttmálin fevnir um alt tónleikaverkið hjá Teiti, ið fevnir yvir 500 sangir og útgávur. Edition Wilhelm Hansen skal fáast við fyrisiting, útbreiðslu og eftirlit av gomlum verkum umframt at festa nýggj verk á nótar. 

- Eg gleði meg at hava fleiri á mínum liði og vera ein partur av einum forlagi, ið bæði er dygdarliga og søguliga rótfest, men samstundis er samtíðarligt og ikki gongur so høgt upp í tónleikagreinar, men heldur setur skapanarhugan fremst, sigur Teitur í tíðindaskrivi.

Teitur undirskrivaði sáttmálan saman við umboðsmanni sínum gjøgnum skjótt 25 ár, Christian Ulf Hansen, og forstjóranum í Edition Wilhelm Hansen, Loui Törnqvist. 

Greinin varð fyrstu ferð løgd út 24. apríl 2024

Rakul, Birgit og Hjørdis vunnu skrivikappingina

Aftur í ár varð skipað fyri skrivikapping í sambandi við Mentanarvikuna í Runavíkar kommunu – uppgávan í ár var at skriva eitt ummæli av einum heildarverki

(Mynd: Runavíkar kommuna)

SkrivaÐ:

Alda Nielsdóttir

Fyri fjórðu ferð var skipað fyri stórari skrivikapping í sambandi við Mentanarvikuna í Runavíkar kommunu, sum í ár er 21.-28. apríl, og vinnararnir av ársins skrivikapping eru nú funnir.

Uppgávan í ár var at skriva eitt ummæli av einum heildarverki, útgivið í 2020 ella seinni. Tríggjar virðislønir vórðu latnar, fyrsta og onnur virðisløn, umframt virðisløn til ungt fólk sum vísir serliga góð evnir, skrivar Runavíkar kommuna.

Fyrsta virðisløn varð latin til Rakul í Gerðinum fyri ummælið "Sniðfundiga samansett orð". Ummælið snýr seg um tvey yrkingasøvn eftir Arnbjørn Ólavsson Dalsgarð, "Tykisljóð" og "Setorð", og um ummælið skrivar dómsnevndin:

– Ummælið brúkar egið myndamál og hevur bæði rís og rós til verkini. Tað greinar og setir í frásjón, og lesarin fær tekstabrot at síggja, so at ummælið er sum ein sýnisgluggi, har verkið verður presenterað, og lesarin fær gjørt sær sínar egnu metingar. Ummælið er humoristiskt, og skrivarans upplivingar eru lýstar, uttan tó at seta skrivaran í sentrum. Tað er væl skrivað og atfinningarsamt, men við virðing ásannandi, at tað er trupult at finnast at.

Onnur virðisløn varð latin Birgit Remmel fyri ummælið "Tann seinasta gandakellingin?", sum er um bókina Sára Malena eftir Sólrun Michelsen.

Um ummælið skrivar dómsnevndin:

– Eitt sera víðskygt ummæli við tilsipingum til aðrar bókmentir og rák. Áhugaverdar viðmerkingar til dr. Jakobsens brigdið av søgnini um Beintu. Viðgerðin umfatar sjónarhorn søgunnar og lesarauppliving og hevur sera áhugaverdar hugleiðingar um, hvørja funktión hugleiðingar Sólrunar við hvørt kapittul hava. Niðurstøðan setur søguna í nútíðar frásjón á áhugaverdan hátt.

Virðislønin til ungt fólk sum vísir serliga góð evnir fór til Hjørdis Rannváardóttir Reistrup, sum hevði skrivað ummæli um "Dreymsótt" eftir Rakel Helmsdal.

Dómsnevndin skrivar:

– Ummælið byrjar á spennandi hátt og fangar lesaran, áðrenn bókin verður nevnd. Skrivarin førir okkum við endurtøkum inn í universið í bókini, á sama hátt sum røðarar í bókini gera til tess at sannføra fólkið. Ummælið er greinandi og perspektiverandi og vísir á, hvussu fámannaveldið virkar. Faklig hugtøk verða brúkt og ummælið sipar til annan ungdómsskaldskap. Ummælið nevnir eisini, at ikki nógvar slíkar bøkur eru á føroyskum, og evni, sum verða viðgjørd, eru vanliga sett í samband við heilt onnur samfeløg enn okkara. Ummælið endar við at seta sera viðkomandi samfelagsligar spurningar.

Greinin varð fyrstu ferð løgd út 22. apríl 2024

Felagskonsert í Fríðrikskirkjuni í dag

Kirkjukórini í Fríðrikskirkjuni, Kristiliga Sangkórið og Sandskórið luttaka - Susanne Brattaberg er kórleiðari hjá øllum trimum kórunum. Byrjað verður klokkan 17

Næmingar úr Nes Sóknar Musikkskúla, sum fara at spæla saman við kórinum og einsamalllir, luttaka eisini

SkrivaÐ:

Tíðindaskriv

Klokkan 17 í dag verður felagskonsert í Fríðrikskirkjuni við Kirkjukórinum í Fríðrikskirkjuni, Kristiliga Sangkórinum og Sandskórinum.

Susanne Brattaberg er kórleiðari hjá øllum trimum kórunum.

Eisini luttaka musikskúlanæmingar frá Nes Sóknar Musikkskúla, sum fara at spæla saman við kórinum og einsamalllir.

Føroysk og útlendsk løg verða framførd. Millum annað eftir H. J. Højgaard, Knút Olsen og J. S. Bach.

Konsertin er partur av skránni hjá Várdøgum í Nes kommunu.

Greinin varð fyrstu ferð løgd út 24. apríl 2024

Konsert í gjónni sunnudagin

Skanderborg Brass Band er á konsertferð í Føroyum og hevði eitt ynski um at framføra í gjónni við Gjógv. Konsertin verður sunnudagin klokkan 14

Skanderborg Brass Band hevur verið til í yvir 40 ár, og er nú komið á konsertferð í Føroyum. Sunnudagin verður ein heilt serstøk og ókeypis konsert við Gjógv

SkrivaÐ:

Agnar Prestá

Danska hornorkestrið Skanderborg Brass Band hevur hesa vikuna verið á konsertferð í Føroyum. Orkestri spældi saman við Havnar Hornorkestri á Vaglinum Flaggdagin, og dýra biðidag vóru tey við á árligu Musikkstevnuni, sum í ár varð hildin í Mentanarhúsinum í Fuglafirði.

Sunda kommuna skrivar á heimasíðu sínari, at Skanderborg Brass Band hevði eitt serligt ynski um at framføra í gjónni við Gjógv.

Mynd: Pól Sundskarð

Hetta varð játtað, og í morgin, sunnudagin 28. apríl, verður konsert í gjónni. Hon byrjar klokkan 14 og er ókeypis.

Bólkurin er frá 1983. Limirnir eru í nógvum ymiskum aldursbólkum og eru von at spæla til ymiskt tiltøk í Danmark.

Greinin varð fyrstu ferð løgd út 26. apríl 2024

Sement: Allir finalistar funnir

Ókendir, Jákup Eli, Ragnar Finsson, gówa, Ester Skála og Ása Brynjardóttir verða í finaluni á Reinsarínum í kvøld

 

SkrivaÐ:

Alda Nielsdóttir

Farna leygarkvøld var seinna undanumfar av árins Sement-tónleikakapping á Reinsarínum, har síðstu finalistarnir vórðu funnir, og nú er greitt, hvørji seks nøvn verða at hoyra í finaluni í kvøld.

14. apríl var fyrsta umfar, har bólkurin Ókendir og einstaklingurin Jákup Eli komu víðari, og farna leygarkvøld vórðu heilir fýra finalistar afturat funnir.

Tey, sum framførdu vóru Ester Skála, Volapuck, Ragnar Finsson, gówa, og Ása Brynjardóttir, og dómsnevndin valdi at senda Ragnar Finsson og bólkin gówa víðari.

Um Ragnar Finsson segði dómsnevndin m.a., at hann var nærverandi, fangaði fjøldina beinanvegin, og framførslan var gjøgnumførd.

Um gówa varð m.a. sagt, at framførslan var varierað og heilstoypt. Oddakvinnan fekk bólkin at blomstra, sumstundis sum hon sjálv bergtók øll.

Umframt hesi bæði nøvnini, varð avgjørt at hava tvey wildcards, og tí hevði ein dómsnevnd valt tveir afturat millum allar ársins luttakarar at senda víðari. Teir báðir síðstu finalistarnir gjørdust Ester Skála og Ása Brynjardóttir.

Greinin varð fyrstu ferð løgd út 21. apríl 2024

Ásgeir Trausti í Tøting, NLH og Listastovuni

Væl umtókti íslendski sangarin ynskti sjálvur at koma aftur til Føroya at upptraðka 

Ásgeir Tarusti á G! Festivalinum 2022 (Mynd: Jens Kr. Vang)

SkrivaÐ:

Tíðindaskriv

Væl umtókti íslendski sangarin Ásgeir Trausti verður aftur at hoyra í Føroyum ío næstum. Talan er um ein hin mest týðandi tónlistarmaðurin í Norðanlondum seinastu 12 árini, sum kemur á vitjan.

Tað er Ásgeir Trausti sjálvur, sum hevur ynskt at vitja aftur í Føroyum. Hann hevur tvær ferðir áður upptraðkað á G! Festivalinum í Gøtu.

Hesintúrurin er skipaður í felag av Tónleikasamtakinum Grót, Norðurlandahúsinum og Listastovuni í Miðvági.

Fyrsta plátan frá Ásgeiri Trausta “Dýrð í dauðaþögn” er hin mest selda plátan í Íslandi nakrantíð. 

Konsertirnar verða í Tøtint í Syðrugøtu 31. mai, í Norðurlandahúsinum 1. juni og í Listastovuni í Miðvági 2. juni.

Atgongumerkini fara til sølu í dag, flaggdagin 25. apríl kl. 12. Atgongumerkir til konsertirnar í Tøting og í Listastovuni fáast á atgongumerki.fo, meðan atgongumerkir til konsertina í Norðurlandahúsinum, fáast umvegis heimasíðuna hjá Norðurlandahúsinum.  

Greinin varð fyrstu ferð løgd út 25. apríl 2024

Burhan G kemur aftur á Voxbotn

Hann hevur fleiri ferðir áður framført í Føroyum, og í summar kemur hann aftur

Burhan G á Tórsfest í 2018 (Savnsmynd: Jens Kr. Vang)

SkrivaÐ:

Sverri Egholm

Burhan G kemur á Voxbotn í summar. Væl umtókti danski tónleikarin sló sítt navn fast í 2010 tá hann útgav sjálvnevna útgávu, sum innihelt løg, ið toppaðu hittlistar í fleiri vikur.

Síðani tá hevur hann verið fastur gestur á hitlistunum í Danmark, og hann hevur vunnið hópin av viðurkenningum fyri sítt tónlistarliga virksemi. Hann er ein framúr sangari og lagsmiðjur, og telist millum allar fremstu R&B tónleikararnar í norðurlondum. 

Á sumri í 2008 útgav hann sítt fyrsta staklag ‘Kun Dig’ sum snýr seg kærleikan til tí einastu einu. Júst ein mánaða eftir fyrsta staklagið, gav hann út annað staklagið ‘Jeg vil ha’ dig for mig selv’ sum er skrivað saman við Rasmus Seebach, og bleiv hetta eitt ógvuliga væl dámt lag. Triðja staklagi ‘Mest ondt’ kom út í 2010 og verður sungið saman við donsku Medina. Hetta lagið var fyrsta lagið hjá Burhan, ið lá sum nummar eitt á hittlistunum í Danmark, og  bleiv tað verandi har í fleiri vikur. Burhan G hevði nú av álvara sligið í gjøgnum sum solo sangari.

Hann hevur áður verið í Føroyum, millum annað á Tórsfest í 2018 og á Voxbotn 2021.

Millum nøvnini á plakatuni hjá Voxbotn í summar eru Tessa, Nick Carter, Gobs og Tobias Rahim.

Greinin varð fyrstu ferð løgd út 24. apríl 2024

Gróa – ein bólkur vit máttu hava á G!

Íslendskur kvinnubólkur við egnum leisti innan punk og listarligan gang

 

SkrivaÐ:

Tíðindaskriv

Fleiri umboð frá G! hoyrdu íslendska bólkin, Gróa, í Washington, USA, farna heyst, og vóru øll samd um, at Gróa er ein bólkur vit máttu hava á G! 2024. Nú koma tær.

Gróa kom brestandi á pall í 2018. Líka síðani hevur bólkurin tikið øll á bóli við sínum óskikkiliga lyndi. Hesar fýra kvinnurnar úr Reykjavík eru garrvillar.

Til eina vanliga punk konsert fært tú ofta nokkso nógv av tí sama – alt gott um tað, soleiðis er hesin estetikkurin nú einaferð.  Men Gróa hevur funnið sín egna leist innan punk og listarligan gang.

Í sínum ørskapi er alt tó lagt óvanliga væl til rættis.

Trummurnar byggja tónleikin upp á púra egnan hátt, og konsertin er nógv fjølbroyttari enn tann vanliga punkframførslan.

Tað er nú greitt, at Of Monsters and Men (IS), Highasakite (NO), Eivør (FO), The Longest Johns (UK), Alice Boman (SE), Aggrasoppar (FO), Hamferð (FO), Alias Morera (FO/DK), Specktors (DK), Dania O. Tausen(FO), Einangran (FO), Knút (FO), Elinborg (FO), Konsørn (FO), Aiming for Enrike (NO), Ash Olsen (NO) Jógvan (FO) Agat (IL) Nelly Moar (NO) Sound of the Damned (GL) Das Body (NO) Plúmm (FO) og GRÓA (IS) spæla á G! 2024. 

Greinin varð fyrstu ferð løgd út 23. apríl 2024

Adrenaline á Summar Festivalin

Væl umtókti rockbólkurin skal spæla á Summar Festivalinum í august

 

SkrivaÐ:

Tíðindaskriv

Teir eru ungir og lívligir, teir spæla melodiøsan og fangandi rocktónleik, og í august skulu teir framføra á landsins størsta tónleikatiltaki.

Adrenaline er rockbólkur úr Klaksvík, og teir vera tí á heimavølli, tá ið teir skulu hava konsert á Summar Festivalinum.

Adrenaline hevur útgivið fleiri væl umtóktar sangir – eitt nú "Bjarta", "Spillikassin" og "DNA". Teir hava eisini havt framførslur kring landið og hava seinasta árið fingið alt størri undirtøku. Sangirnir fanga, og framførslurnar eru framfýsnar og undirhaldandi.

Teir, sum spæla í Adrenaline, eru Jónas Jacobsen (sang og gittar), Tórður Sóleyarson (sang og gittar), Niclas Høgnesen (bass) og Høgni Sørensen (trummur).

Summar Festivalurin verður hildin dagarnar 8. til 10. august.

Greinin varð fyrstu ferð løgd út 22. apríl 2024

Hetlendingar gera klárt til rakettútskjóting í august

SaxaVord Space Center á Unst í Hetlandi hevur fingið enn eitt týðandi loyvi upp á pláss

Nú er skjótt klárt at skjóta rakettir út í rúmdina frá Lamba Ness á Unst í Hetlandi (Mynd: ShetNews)

SkrivaÐ:

Ingi Samuelsen

Enn nøkur týðandi loyvi eru fingin upp á pláss, sum skulu gera tað møguligt at senda fyrstu rakettina frá rakettútskjótingarstøðini SaxaVord í Hetlandi í august mánaði í ár.

Hósdagin kundi rakettstøðin kunngera, at hon sum tann fyrsta í Vesturevropa hevur fingið fult loyvi til at skjóta rakettir upp. Hetta tí at hon hevur fingið sokallað ‘range control licence’ frá CAA, UK Civil Aviation Authority.

Hetta er eitt neyðugt loyvi fyri tað virksemi, sum skal ganga fyri seg á Lamba Ness norðast í Hetlandi. Men sum skilst er tað endaliga útskjótingarloyvið ikki komið upp á pláss enn.

ShetNews skrivar, at SaxaVord nú hevur heimild til at ávara fólk um at halda seg burtur frá vandamiklum økjum, fremja eftiransing av hesum økjum og vaka yvir økinum í sambandi við rakettferðirnar.

Arbeiði við at fyrireika komandi rakettútskjótingarnar heldur fram, og eisini við at tilbúgva rakettútskjótingarstøðina, so at týska rúmdarfelagið RFA, Rocket Factory Ausburg, sum ætlað, kann skjóta ta fyrstu rakettina út í ringrás um jørðina í august í ár, skrivar ShetNews.

Stjórin fyri SaxaVord Space Center, Frank Strang fegnast:

- Hetta er ein sera týðandi liður í okkara fyrireikingum. Sum einasta rakettútskjótingarstøð í Vesturevropa við neyðugum loyvum, fyrireika vit okkum nú at skriva framhald av rúmdarsøguni við fyrstu rakettútskjótingini í triðja ársfjórðingi í ár, sigur Frank Strang.

Ovastin fyri UK Space Regulation hjá CAA, Colin Macleod sigur, at hetta seinasta loyvi var neyðugt fyri at tryggja almennu trygdina í sambandi við rúmdarvirksemi.

Greinin varð fyrstu ferð løgd út 25. apríl 2024

Skal arbeiða minni framyvir

Mánadagin fór 87 ára gamli Harald kongur farin aftur til arbeiðis eftir at hava verið sjúkrameldaður í nærum tveir mánaðir

(Mynd: EPA)

SkrivaÐ:

Alda Nielsdóttir

Mánadagin fór norski Harald kongur aftur til arbeiðis eftir at hava verið sjúkrameldaður í nærum tveir mánaðir, og framyvir fer hann eisini at hava færri arbeiðsuppgávur, upplýsir norska kongshúsið.

Tað er við atliti til aldur hansara, at avgerð er tikin um, at 87 ára gamli kongurin framyvir skal arbeiða minni.

Tað var síðst í februar, at Harald kongur gjørdist sjúkur, meðan hann ferðaðist í Malaysia og mátti flytast heim til Noregs, har hann varð innlagdur á ríkissjúkrahúsinum í Oslo. Kongurin fekk ein fyribilskvikil insettan í Malaysia, sum skuldi tryggja eina støðufasta hjartarútmu og gera heimferðina tryggari, og í Oslo fekk hann ein fastan kvikil.

Meðan kongurin hevur verið sjúkrameldaður, hevur Haakon krúnprinsur tikið sær av uppgávum hansara.

Greinin varð fyrstu ferð løgd út 22. apríl 2024

Konfirmantar í Miðvágs kirkju sunnudagin

-

(Savnsmynd)

SkrivaÐ:

Innsent

Konfirmantar í Miðvágs kirkju sunnudagin. Prestur er Marjun í Kálvalíð

Trygvi Várheim, Miðvágur. Dagurin verður hildin á Tvørgarðsgøtu 13 frá kl. 16.

Gunnar Lukas Jóhansson, í Gerðinum 7, Sørvágur. Opið hús frá kl. 16.

Hjalti Williamsson, á Sondum 2, Sandavágur. Opið hús frá kl. 16.

Hans Christian Gade Strømsten, Sørvágur. Dagurin verður hildin í Húsmóðrafelagshúsinum, Ovarivegur 8, frá kl. 16.

Alexander Eyðolvur Magnusson á Stongunum, undir Fobbakletti 18, Sandavágur. Opið hús frá kl. 16.

Rani Reginsson, Smæruteigur 15, Sandavágur. Opið hús frá kl. 16.

Liam Samuel Eystberg, Sandavágur. Dagurin verður hildin fyri innbodnum á Marknagilsvegi 82, Tórshavn.

Niklas Jóhannus Hammer Anda, Sandavágur. Opið hús í Meinigheitshúsinum Saron, frá kl. 16.

Nóa Eysteinsson í Løðu, Smiðjuvegur 14, Bøur. Opið hús frá kl. 16.

Elias Jansson, Ovarivegur 33, Sørvágur. Opið hús frá kl. 17.

Hjalti Hentze-Grønnebæk, Sørvágur. Dagurin verður hildin í Kirkjuhúsinum í Sørvági frá kl. 17.

Ári Hattarstein Mittún, Miðvágur. Dagurin verður hildin í Bygdarhúsinum í Miðvági frá kl. 16.

Bára Magnussen, Traðarvegur 11, Sørvágur. Opið hús frá kl. 16.

Eva Falkvard Joensen, Svabosvegur 29, Miðvágur. Opið hús frá kl. 16.

Lovisa Caabay Nattestad, Mikkjalsgøta 10, Miðvágur. Opið hús frá kl. 16.

Guðrið Høgnadóttir Joensen, Sandavágur. Dagurin verður hildin í Vakstrarhúsinum frá kl 16.

Hjørdis Vang Joensen, í Fornanum 6, Sørvágur. Opið hús frá kl. 17.

Nicolina Aud í Soylu Selfoss, Sondum 3, Sandavágur. Opið hús frá kl. 17.

Annika Ravnsfjall, Smæruteigur 12, Sandavágur. Opið hús frá kl. 16.

Rebekka av Trøð Trondesen, Traðarvegur 29, Sørvágur. Opið hús frá kl. 17.

Ella Reinert á Plógvi, Sóljuteigur 10, Sandavágur. Opið hús frá kl. 16.30.

Natasja Emilia Reynskor, Hagagerði 21, Sørvágur. Opið hús frá kl. 15.

Greinin varð fyrstu ferð løgd út 23. apríl 2024

Konfirmantar í Kollafirði sunnudagin

-

 

SkrivaÐ:

Innsent

Sunnudagin 28. apríl kl. 11 verður konfirmatión í Kollafjarðar kirkju. Prestur er Maria Jørðdal Niclasen. Konfirmantarnir eru hesir

Ronja Elea Reginsdóttir Hansen. Dagurin verður hildin í Missiónshúsinum í Kollafirði frá kl. 14.

Poula Christiansen. Dagurin verður hildin í barnagarðinum millum Bóla, í Líðini 20 frá kl. 16. 

Jóhan Silas Juliansson, í Líðini 107. Vælkomst verður heima frá kl. 16.

Ari Schiller Jóannisson, á Oyrareingjum 102, Oyrareingir. Vælkomst heima frá kl. 16.

Hans Meinhard á Høgabóli, Norðuri í Sundum 45. Opið hús verður í ovaru hædd í bygdarhúsinum frá kl. 16.

Sirið Borum Davidsen. Dagurin verður hildin í niðaru hædd í bygdarhúsinum frá kl. 15.

Vár Dánjalsdóttir í Húsinum, Steinsgøta 11. Vælkomst verðurheima frá kl. 17.

Jastrid Johansen. Dagurin verður hildin í niðaru hæddini í bygdarhúsinum í Hósvík frá kl 16.

Ísakur Petursson Olsen, á Lygnnesi 6. Opið hús verður heima frá kl. 16.

Sóleyð Jørmundsdóttir Haraldsen, Norðuri í Sundum 65. Opið hús verður í Starvsfelagnum, J. H. Schrøtersgøta 9, Tórshavn frá kl. 17.

Jóhannis Ákason Hellisdal. Dagurin verður hildin á Skúlaheiminum við Marknagil frá kl. 15.

Rakul Madsen, Norðuri í Sundum 8. Dagurin verður hildin heima frá kl.15.

Maria Kristensa av Steinum, Steinsgøta 17. Dagurin verður hildin heima frá kl. 16.

Rebekka Hammer, Líðin 45. Opið hús er frá kl. 17.

Erika Dimon við Neyst, Norðuri í Sundum 33. Vælkomst verður heima frá kl. 15.

Jonn Bjarni Petersen. Dagurin verður hildin saman við innbodnum/teimum nærmastu. Opið hús verður í mai/juni - Foreldrini kunna nærri um tað á sosialu miðlunum tá

Ørvar á Reynatúgvu. Dagurin verður hildin á Stoffalág 17, í húsunum hjá Føroya Arbeiðarafelag frá kl. 16.

Fríða á Dul, Signabøur. Dagurin verður hildin í Avhaldshúsinum í Vík frá kl 17.

Siri Sigmundsdóttir Tjaldrastein, Signabøur. Vælkomst verður í Frøishøllini í Kvívík frá kl 16.

Greinin varð fyrstu ferð løgd út 24. apríl 2024