Føroyar partur av framtíðar rúmdarvinnu

Hvussu kunnu Føroyar  gagnnýta rúmdina, tá ið tað m.a. ræður um innovatión, framburð og fylgisveinagrundaður tænastur í framtíðini?

Kristian Davidsen, stjóri í Føroya Tele, bjóðar heimskenda danska astronautinum Andreassi Mogensen vælkomnum til Føroya (Myndir: Jan Müller)

SkrivaÐ:

Jan Müller

Hetta varð partur av boðskapinum á áhugaverdum tiltaki, sum Føroya Tele skipaði fyri í høvuðssætinum í Hoyvík mánadagin.  Á skránni vóru fyrilestrar, har Andreas Mogensen, ESA-astronautur, Per Lundahl Thomsen, høvuðsráðgevi á DTU Space, og David Arge Klevang, lektari á DTU Space, varpaðu  ljós á framtíðarmøguleikarnar, sum Føroyar og Arktis hava í rúmdini.

Fv. Heðin Mortensen, borgarstjóri, Kristian Davidsen, stjóri, Andreas Mogensen, astronautur, Bjarni K. Petersen, landsstýrismaður og David Arge Klevang, lektari á DTU Space (Mynd: Jan Müller)

Tað var stjórin í Føroya Tele, Kristian Davidsen, sum beyð vælkomin og greiddi frá, hvussu samstarvið var komið í lag, og hvørjar jaligar avleiðingar tað kann fáa fyri Føroyar og føroyingar.

Kristian Davidsen vísti á, Føroya Tele er ikki beinleiðis ein partur av rúmdarvinnuni og verður tað neyvan heldur í framtíðini. Tó so er tað, sum hendir í rúmdarvinnuni serstakliga viðkomandi fyri Føroya Tele og fjarskiftisbrúkarnar í Føroyum.

- Seinastu 30 árini hava vit vant okkum við, at fartelefonin er ein týðandi partur av dagligdegnum. Soleiðis var tað ikki fyrr, tá telefonirnar vóru fastbundnar í ein leidning. Fartelefonirnar eru knýttar í radiostøðir, sum standa ymsastaðni í landinum, men tað at samskifta yvir fylgisveinar, sum hanga í leysari luft har úti onkustaðni, er ikki so nýtt.

Menningin av fjarskiftis- og samskiftis tænastum yvir fylgisveinar hevur gingið við rúkandi ferð seinastu árini. Føroya Tele fylgir hesi gongdini neyvt soleiðis, at vit altíð kunnu bjóða dygdar fjarskiftis- og samskiftistænastur til verandi og nýggjar kundar. Ein partur av hesari tilgongd er, at Føroya Tele hevur eitt samstarv við DTU Space og ESA um at kanna tørvir og loysnir, sum hava við fylgisveinasamskifti at gera segði Kristian Davidsen. 

Per Lundahl Thomsen tosaði síðani um týdningin, sum fylgisveinar og fylgisveinadátur hava bæði í nútíðarsamfelagnum og í framtíðini, og David Arge Klevang tosaði  um týdningin, sum rúmdin kann hava fyri infraskipan, samskifti og vinnumøguleikar í Føroyum og Arktis.

David Arge Klevang tosaði um l leiklutin hjá fylgisveinum í Norðuratlantshavi og Arktis og um týdningin, sum rúmdin kann hava fyri infraskipan, samskifti og vinnumøguleikar í Føroyum og Arktis, og hvussu hetta kann verða til fyrimunar fyri samfelag, vinnulív og stovnar.

Høvuðsgesturin á tiltakinum var danski astronauturin,  Andreas Mogensen, sum greiddi frá royndum, rúmdarferðum og seinastu Huginn-ferðini, sum vardi í seks mánaðir. Hann tosaði eisini um tøkni og infraskipan, sum gera tað møguligt at gagnnýta rúmdina til frama fyri innovatión og burðardyggari menning.

Fyrilestrarhaldararnir vóru á einum máli um, at Føroyar liggja seg væl fyri til at kunna gerast partur av framtíðar rúmdarvinnu, og tí eggjaðu teir eisini føroyskar ungdómar til at síggja møguleikar fyri at útbúgva seg innan rúmdarvinnuna.

Leikluturin hjá Føroya Tele í tiltakinum og vitjanini av rúmdarfólkunum er, at FT hevur gott samband við DTU, Danmarks Tekniske Universitet og hevur ymiskt samstarv við tey.

Endamálið við vitjanini hjá ferðalagnum hevur verið at promovera STEM fakøkini (Science, Technology, Engineering, and Mathematics) við fokus á rúmdarvinnuna, og har Andreas Mogensen hevur havt framløgu fyri skúlanæmingum og framhaldsnæmingum bæði í Løkshøll í Runavík og á Glasi í Havn.

Johan Mortensen og Andreas Mogensen á Føroya Tele. 

Tað var annars Johan Mortensen, íverkseti og ráðgevi, sum samskipaði ferðina hjá Andreas Mogensen og hinum í ferðalagnum, og hevur fingið í lag vitjaninar við teir viðkomandi partarnar, sum tey hava vitjað.

Føroyar liggja sera væl fyri at kunna vera partur av framtíðar rúmdarvinnu, eitt nú til at taka niður data frá fylgisveinum og annars at kunna fylgja virksemi bæði í luftini og undir sjónum. 

Greinin varð fyrstu ferð løgd út 24. september 2024

Pilou Asbæk skuldsettur fyri at eta livandi hummara í Føroyum

Umboð hjá Sea Shepherd hevur skuldsett danska sjónleikaran og kendan danskan matummælara fyri brot á djóraverndarlógina

Pilou Asbæk her í miðjuni saman við føroysku sjónleikarunum, Sofíu Nolsøe og Egor Venned og leikstjóranum Kasper Kall

SkrivaÐ:

Ingi Samuelsen

Tveir danir, sum herfyri fingu sær eitt øðrvísi matupplivilsi í Føroyum, eru nú meldaðir til løgregluna, eftir øllum at døma fyri brot á djóraverndarlógina.

Talan er um sjónleikaran Pilou Asbæk, sum spælir høvuðsleiklutin í danska filminum “No rest for the Wicked”, sum verður upptikin í Føroyum, og so journalisturin Søren Frank, sum skrivar um mat fyri Berlingske Tidende.

Grundarlagið fyri skuldsetingini er ein reportaga (krevur hald, -red.) hjá Søren Frank, sum fyrr í summar varð boðin til Føroyar av Visit Faroe Islands at royna hvat matstovurnar her á landi hava at bjóða.

Í rúgvusmiklu reportaguni, sum varð prenta í sunnudagsberlingaranum 15. september, lýsir Søren Frank millum annað matupplivingina, sum hann saman við Pilou Asbæk, upplivdu heima hjá hummaraútflytaranum Marna Simonsen á Argjum.

Tað er lýsingin hjá Søren Frank, sum hevur fingið Valentina Crast til at melda teir báðar menninar. Valentina Crast arbeiðir fyri Sea Shepherd og hevur eisini verið uppstillað á valinum til ES-tingið fyri flokkin Alternativet.

Søren Frank, roynir ein snjókrabba á matstovuni Roks (Mynd av Instagram)

Við blaðið BT sigur Valentina Crast, at tað, sum verður lýst í greinini hjá Søren Frank er greitt brot á djóraverndarlógina.

BT hevur eisini fingið váttað frá føroysku løgregluni, at fráboðanin er móttikin.

Søren Frank hevur ikki viðmerkingar til skuldsetingina og sigur seg heldur ikki hava hoyrt nakað frá føroyskum myndugleikum, eftir at grein hansara stóð í blaðnum.

BT skrivar eisini, at sambært fráboðanini til løgregluna, skulu eisini Marni Simonsen og Visit Faroe Islands rokna við at fáa eina skuldseting.

Tað, sum fekk danska umboðið hjá Sea Shepherd at boða løgregluni frá brotinum á djóraverndarlógina, var hetta brotið í greinini hjá Søren Frank:

“Fiskeimportørens specialitet er jomfruhummere, som skal spises så friske som muligt og helst levende. Ifølge fiskehandleren selv er han leverandør til selveste Vladimir Putin, som kun vil spise levende hummere, fordi det er den eneste måde, den russiske præsident kan være sikker på, at de ikke er forgiftede. Marni viser os, hvordan vi skal holde jomfruhummerens hale nede i kogende vand, mens vi tæller til 12. Herefter spiser man halen, mens man holder om kløerne, så de ikke bider en i næsen. Det smager himmelsk rent, ikke mindst med et par dråber citron og lidt salt.” 

Greinin varð fyrstu ferð løgd út 25. september 2024

Kann verða noydd at leggja frá sær

Tað er trýst á landsstýriskvinnuni Ingilín Didriksen Strøm, sum hevur sagt ósatt fyri løgtinginum

(Savnsmynd: Jens Kr. Vang)

SkrivaÐ:

Sverri Egholm

Ingilín Didriksen Strøm, landsstýriskvinna, hevur sambært Degi og viku, sagt ósatt fyri løgtinginum og hevur tí eisini brotið lógina um ábyrg landsstýrismanna.

Tað er niðurstøðan frá landsstýrismálanevndini, sum enn ikki er almenn, men sum Kringvarpið hevur fingið upplýsingar um.

Setningurin, sum kann fella Ingilín Didriksen Strøm er sagdur á tingfundi um Bústaðir 2. mai í ár.

- Eg havi ongar ábendingar um, at trupulleikar eru við langtíðar haldførinum hjá Búðstøðum, segði Ingilín Didriksen Strøm.

Landsstýriskvinnan fekk eina viku at koma við sínum viðmerkingum til niðurstøðuna, men hevur biðið um longda freist 7. oktober.

Løgmaður og formaður Javnaðarfloksins, Aksel V. Johannesen, segði í 2015, at um eitt landsstýrisfólk sigur ósatt við vilja, skal tað hava politiskar avleiðingar.

Nú verður mett, at tríggir møguleikar eru.

Tann fyrsti er, at Ingilín Didriksen Strøm leggur frá sær sum landsstýriskvinna. Annar møguleikin er, at løgmaður loysir hana úr starvi. Triði møguleikin er, at eitt misálitisuppskot verður lagt fyri løgtingið.

Greinin varð fyrstu ferð løgd út 24. september 2024

Klaksvíkar kommuna rakt av netálopi

Fleiri av telduskipanunum hjá kommununi eru óvirknar í løtuni. Hetta er ein trupulleiki, sum í stóran mun rakar fyrisitingina hjá Klaksvíkar kommunu og Norðoya Bú- og Heimatænastu, sigur Klaksvíkar kommuna

 

SkrivaÐ:

Tíðindaskriv

Um vikuskiftið varð Klaksvíkar kommuna rakt av netálopi. Starvsfólk hjá kommununi arbeiða í løtuni saman við avvarðandi myndugleikum fyri at finna útav, júst hvat er hent, og hvør avleiðingin er.

Ítøkiliga merkir hetta, at fleiri av telduskipanunum eru óvirknar í løtuni. Hetta er ein trupulleiki, sum í stóran mun rakar fyrisitingina hjá Klaksvíkar kommunu og Norðoya Bú- og Heimatænastu.

Einstakir stovnar eru eisini raktir og veita eina skerda tænastu, eitt nú hevur barnatannrøktin í løtuni einans opið fyri teimum, sum hava ein bráðfeingis tørv.

Greinin varð fyrstu ferð løgd út 23. september 2024

KT-tilbúgvingin hjá landinum hækkað

Klaksvíkar kommuna er álopin av teldusníkum, og tískil hevur KT-trygdarráðið á Gjaldsstovuni hækkað KT-tilbúgvingina

Leif Abrahamsen er stjóri á Gjaldstovuni (Savnsmynd: Sverri Egholm)

SkrivaÐ:

Sverri Egholm

Í sambandi við netálopið á Klaksvíkar kommunu hevur KT-trygdarráðið á Gjaldstovuni hækkað KT-tilbúgvingina. Gjaldstovan umsitur Landsnet, Skúlanet, Búskaparskipan Landsins og Talgildu Føroyar. Yvirvakingin av hesum KT-kervunum vísir, at einki óvanligt er í umbúna.

Tá ið ein samstarvsfelagi, sum í hesum føri Klaksvíkar kommuna, verður álopin, hava vit sjálvandi eitt vakið eyga við tær av okkara tænastum, sum viðkomandi samstarvsfelagi brúkar.

- Øll kunnu gerast offur fyri netálopum. Hesa ferð er tað Klaksvíkar kommuna. Vit fylgja støðuni og harmast almikið, at henda støðan er íkomin, og vit eru til reiðar at veita ta hjálp, sum vit kunnu, sigur Leif Abrahamsen, stjóri á Gjaldstovuni.

Hann heldur fram, at Gjaldstovan raðfestir KT-trygd høgt, og vit arbeiða støðugt við at tryggja og bøta um trygdina á teimum KT tænastum, ið Gjaldstovan veitir. Vit arbeiða støðugt við trygdartiltøkum, og stórur partur av útreiðslunum hjá Gjaldstovuni fara til trygd. Stórar íløgur verða gjørdar í trygdarloysnir til bæði yvirvaking og fyribyrging.

Hóast einki er 100 prosent trygt, so gera vit tað, sum vit megna fyri at minka um váðarnar og at bera so skjótt at sum gjørligt, tá ið nakað hendir, sigur Gjaldstovan.

Greinin varð fyrstu ferð løgd út 24. september 2024

Klárt at bjóða nýggjar SSL-ferjur út

Strandferðslan hevur lagt fram tekningarnar til komandi ferjurnar

(Mynd: Johan Dahl á Facebook)

SkrivaÐ:

Ingi Samuelsen

Stendur tað til Strandfaraskip Landsins, so er ynskið, at fimm nýggjar ferjur verða bygdar til at avloysa tær gomlu ferjurnar, sum í dag røkja tær smærru oyggjarnar.

Ásannandi at tað ikki fer at henda upp á eingang, so er ynskið at farið sum skjótast verður í gongd við at byggja ta fyrstu.

Tað sigur Niels Juel Arge, stjóri á Strandferðsluni, sum eins og almenningurin er spentur upp á at síggja, hvat er lagt í løgujáttanina hjá Strandferðsluni, tá fíggjarlógin fyri 2025 verður almannakunngjørd mánadagin.

Vónin er, at játtanin er so mikið stór, at farast kann undir at bjóða tað fyrsta skipið út til áhugaðar skipasmiðjur í Føroyum og Norðurlondum.

Lagt fyri løgtingsfólkum í gjár

Mikudagin var strandferðslustjórin í løgtinginum og legði fram nýggju tekningarnar til ætlaðu ferjurnar fyri tingfólkunum.

Tað var í fjør, at projekteringin til ferjurnar varð boðin út. Skipasmiðjan MEST vann útboðið, og í tøttum samstarvi við Strandferðsluna og fylgibólk av staðkendum fólki og skipamanning, hevur skipasmiðjan nú gjørt tekningar til tvær nýggjar ferjur – eina miðalstóra, ætlað til sigling til Nólsoyar og Kalsoynna, og eina minni ferju, ætlað til Svínoyar/Fugloyar og til Skúvoyar.

El-riknar við Voith-skipan

Talan er um ferjur, sum verða elriknar, tó við einum dieselmotori at taka til um neyðugt.

Framdriftin verður ikki við skrúvu, men við eini sokallaðari Voith-skipan, sum er ein víðarimenning av asimutt-skipani, men nógv rakstrartryggari og mannereringarbetri, sambært strandferðslustjóranum.

Miðalstøddin, ætlað til Kalsoyar- og Nólsoyarsiglingina, verður 43 metrar long og 12,4 metrar breið og tekur 20 persónbilar, ella tveir størri bilar og 14 persónbilar. Setur verður til 143 fólk. Motororkan verður 4 megaWatt.

Tann minna støddin, ætla til sigling í Svínoynna, Fugloynna, Skúvoynna og møguliga eisini í Hest, tekur tveir bilar og hevur eina motororku á 3 megaWatt. Skipið kann sigla við 122 ferðafólkum um summarið og 74 um veturin. Skipið hevur rampu afturi í reyv, so møguligt er at rulla bilarnar í land í Svínoy og Fugloy um líkindi eru til tess.

- Tað verður eitt stórt framstig, og eisini tað, at bilarnir kunnu standa inni undir flutningi, sigur strandferðslustjórin.

Strandferðslustjórin her saman við landsstýrismanninum við samferðslumálum (Mynd: ssl.fo)

Politiska skipanin má raðfesta

- Uppskotini vórðu væl móttikin av tingfólkunum, greiðir Niels Juel Arge frá.

- Nú fáa vit at síggja, hvat er politiskt gjørligt, tí tað nú verður upp til politisku skipanina at gera av at veita fígging og eisini at avgera í hvørjari raðfylgju skipini skulu byggjast.

- Stóð tað til okkara, so vildu vit helst farið undir at bygt øll beinanvegin, tí tørvur er á at skifta strandfaraskipini út, sigur strandferðslustjórin væl vitandi, at so verður ikki.

- Tað gongur ikki at sigla við so gomlu skipum, sum vit hava nú, eitt nú á Fugloyar og Kalsoyarleiðini. Umvælingarnar eru dýrar og nógvar, eykalutir eru truplir at fáa fatur á, og tað tynnist við fólkum, sum duga og hava kunnleika til at gera umvælingarnar. Og so lúka tey heldur ikki nútíðar standardir, sigur Niels Juel Arge.

Varðveita Teistan

Í fyrstu atløgu fegnast hann tó um, at tað sær út til, at Strandferðslan sleppur at varðveita Teistan, tí alt bendir á, at landsstýriskvinnan við fígjarmálum tekur inntøkujáttanina á 30 milliónir fyri sølu av Teistanum úr aftur fíggjarlógini, so at skipið kann setast í siglingina til Kalsoynna.

Harvið verður gamli, men ógvuliga álítandi Sam tikin út og kann brúkast sum tiltaksskip og at flyta farm út á tær smáu oyggjarnar.

Greinin varð fyrstu ferð løgd út 26. september 2024

Veljararnir ynskja ópolitiskt kommunuval

Tríggir av fýra føroyskum veljarum halda, at betur hevði verið um politisku flokkarnir blandaðu seg uttan um valið til kommunustýrini

(Savnsmynd)

SkrivaÐ:

Ingi Samuelsen

Stórur partur av føroysku veljarunum halda, at politisku flokkarnir ikki átti at blanda seg upp í kommunuvalið.

Tað sigur ein veljarakanning, sum spyr.fo gjørdi fyri Portalin 11. september.

Tríggir av fýra veljarum – 74,7 prosent – halda, at uppstillingin til kommunuvalið átti at verið óheft av politisku flokkunum.

Einans 15,1 prosent halda at uppstillingin skal vera politisk, meðan 10,2 prosent siga seg ikki hava eina meining upp á spurningin, sum ljóðaði: “Heldur tú at uppstillingin til kommunuval eigur at vera politisk ella ópolitisk í tíni kommunu?”.

Meiriluti í øllum flokkum

Og tað er yvir alt politiska spektrið, at stórur meiriluti er millum veljararnar fyri ópolitiskari uppstilling til kommunuval. Størstu undirtøkuna fyri politiskari uppstilling finna vit í Tjóðveldi og Javnaðarflokkinum, har tað eru ávikavist 30 og 29 prosent, sum halda at uppstillingin skal vera politisk.

Eisini í Tórshavnar kommunu, har býráðsvalið so at siga altíð hevur verið politiskt, halda veljararnir, at politisku flokkarnir ikki áttu at verið partur av valinum.

Har eru tað 65 prosent, sum mæla til ópolitiska uppstilling móti 23 prosentum, sum halda, at hon skal vera politisk. Uttan fyri Havnina eru tølini ávikavist 83 og 9 prosent.

So at siga ongin munur er tá hugt verður eftir kynunum, meðan tá hugt verður eftir aldrinum, eru tað eitt vet fleiri í eldra aldursbólkinum (45 ár og upp), sum halda, at uppstillingin skal vera ópolitisk.

Meirilutin økist

Fyri fýra árum síðani settu vit sama spurning í eini veljarakanning, sum varð gjørd stutt undan kommunuvalinum.

Eisini tá var stórur meiriluti fyri ópolitiskari uppstilling. Men ein sammeting vísir, at meirilutin er størri nú.

Parturin av veljarum, sum mæla til ópolitiska uppstilling ar farin frá 70,7 til 74,7 prosent, meðan parturin, sum mælir til politiska uppstilling er vaksin eitt lítið vet frá 14,8 til 15,1 prosent – tað vil siga, at tað eru færri, sum eru iva nú.

Føroyska kommunuvalið er 12. november.

Greinin varð fyrstu ferð løgd út 25. september 2024

Alsamt fleiri børn ganga ikki í vanligum skúla

Seinasta skúlaár gingu 360 børn ikki í vanligum skúla, men fingu heima- ella sjúkraundirvísing ella undirvísing í sertilboði. Pætur Zachariasson, sálarfrøðingur, fer nú at kanna støðuna nærri

– Skúlafrávera kann ganga út yvir tað sosiala og tað fakliga og kanska eisini sálarligu heilsuna. Eitt barn, sum ikki gongur í skúla, er í nógv størri vanda fyri at enda í misbrúki ella kriminaliteti, sigur Pætur Zachariasson (Mynd: gransking.fo)

SkrivaÐ:

Agnar Prestá

- Skúlafrávera er ein endurspegling av teimum avbjóðingum, sum børn hava í dag. Tað er ein handlingsmøguleiki, sum børn hava. Tey eru kanska útihýst av felagsskapinum í skúlanum, men hava ein felagsskap á netinum, har tey eru góðtikin og klára seg væl.

Soleiðis sigur Pætur Zachariasson, sálarfrøðingur, ið fer at granska skúlafráveru í einari ph.d. verkætlan.

Alsamt fleiri børn mistrívast í fólkaskúlanum og vilja ikki í skúla. 360 børn gingu seinasta skúlaár ikki í vanligum skúla, men fingu heima- ella sjúkraundirvísing ella undirvísing í sertilboði. Hetta talið er nógv hækkað seinastu árini. 

Tað kann hava álvarsligar avleiðingar fyri børn, um tey ikki ganga í skúla, men tað kann eisini vera ein vinningur.

– Skúlafrávera kann ganga útyvir tað sosiala og tað fakliga og kanska eisini sálarligu heilsuna. Eitt barn, sum ikki gongur í skúla, er í nógv størri vanda fyri at enda í misbrúki ella kriminaliteti.

– Men barnið handlar meiningsfult út frá teimum umstøðum, tað er í, og um tað ikki trívist í skúlanum, so er tað meiningsfult hjá tí at vera fráverandi. Í summum førum kann tað vera gott fyri barnið ikki at fara í skúla, tí mistrivnaðurin í skúlanum hevur eisini álvarsligar avleiðingar. Vit síggja eisini, at nøkur børn blóma, tá tey taka seg úr skúlanum. 

Serskipanir verða í alsamt størri mun nýttar at hjálpa børnum, ið hava trupulleikar í fólkaskúlanum.

– Í nógvum førum er tað ein góð hjálp, tí tá verður undirvísingin skræddaraseymað til barnið. Men vit mugu eisini hugsa um, hvat tað er fyri ein skúla, ið vit vilja hava. Sertilboð kompensera fyri onkrum, ið kann vera trupult hjá barninum, men tey eru eisini tekin um vantandi fleksibilitet í tí vanligu skúlastovuni.

– Krøvini til næmingarnar í vanliga skúlanum vaksa, og tað verða fleiri næmingar, ið pláss ikki er fyri í skúlunum, sum so í staðin mugu í sertilboð. Eg haldi ikki, tað er rætta leiðin at fara. Vit mugu hava ein fólkaskúla, sum rúmar teimum børnum, ið eru borgarar í okkara landi, og ikki smalka normalhugtakið so nógv, at tað bert er pláss fyri teimum, ið klára seg ordiliga væl í tí vanliga skúlanum, sigur Pætur Zachariasson.

Kelda: Granskingarráðið

Greinin varð fyrstu ferð løgd út 26. september 2024

Lættari atgongd til bústaðarmarknaðin

Sambandsflokkurin hevur útarbeitt eina ætlan fyri at lætta um hjá føroyingum at sleppa inn á bústaðarmarknaðin. Uppskotið skal fíggjast við at leggja ein serskatt á peningastovnarnar og tryggingarfeløgini 

Bárður á Steig Nielsen, formaður Sambandsfloksins (Savnsmynd: Sverri Egholm)

SkrivaÐ:

Tíðindaskriv

Sambandsflokkurin hevur gjørt eitt uppskot, sum skal gera tað lættari hjá føroyingum at sleppa á bústaðarmarknaðin. Ætlanin varð løgd fram á tíðindafundi á Svangaskarði á Toftum mánadagin.

Kanningar vísa, at 94 prosent av føroyingum vilja búgva í egnum bústaði, og at tørvur er á fleiri enn túsund bústaðareindum. Alsamt hækkandi sethúsaprísir og krøv frá peningastovnum gera, at tað gerst truplari og truplari hjá serliga barnafamiljum og familjum við lág- og miðalinntøkum at sleppa inn á bústaðarmarknaðin.

Við uppskotinum vil Sambandsflokkurin gera tað lættari hjá fyrstuferð keyparum.

Uppskotið hevur m.a. við sær, at ein familja við tveimum smábørnum, ið skal inn á bústaðarmarknaðin fyrstu ferð, kann fáa góðar 800.000 krónur yvir eitt 10-ára tíðarskeið, ímeðan tey skulu etablera seg og hava brúk fyri pengunum.

Ein bústaðargrunnur skal sambært uppskotinum setast á stovn, har fólk kunnu lána upp til 5 prosent av eginfíggingini, í mesta lagi 200.000 krónur. Stovnfæið skal fíggjast við einum gjaldi álagt peningastovnunum, sum skal gjaldast í grunnin yvir eitt 10-ára tíðarskeið.

Pensjóngjaldið verður umskipað soleiðis, at tað verður møguligt at fáa helmingin av pensjónsgjaldinum útgoldið sum løn í 10 ár.

Harumframt skal barnafrádrátturin hækkast við 1.000 krónum um mánaðin fyri hvørt barn upp til 7 ár, og útgjaldið úr Barsilsskipanini skal hækka úr í mesta lagi 30.000 krónum til at vera í mesta lagi 40.000 krónur um mánaðin.

Fyri at fíggja uppskotið mælir Sambandsflokkurin til, at leggja ein serskatt á 7 prosent á føroysku peningastovnarnar og tryggingarfeløgini.

Fólk, sum fáa eyka løn í eitt tíðarskeið, fíggja hetta sjálvi, tí hetta er teirra egna pensjónsinngjald, sum verður flutt til løn í eitt tíðarskeið upp til 10 ár. Skatturin av hesum partinum av lønini verður 40 prosent, og fer allur til kommunurnar, so tær onki missa. 

Ein inntøkugrundaður býlisstuðul verður skipaður til tey, sum leiga. Býlisstuðulin verður fíggjaður við at umskipa rentustuðulin.

Umsitingin av átøkunum verður latin til verandi stovnar. Bústaðargrunnurin skal umsitast av Bústøðum, pensjóns-/lønarútgjaldið umsitast av Taks, og býlisstuðulin av Almannaverkinum.

Bústaðargrunnurin skal vera partur av landsroknskapinum, men verður ikki á fíggjarlógini.

Fyri at seta hetta í verk krevjast nakrar lógarbroytingar, ið kunnu fremjast skjótt. Tær eru:

• broytingar í ásetingarlógini um hægri barnafrádrátt
• broytingar í skattalógini um serskatting av peningastovnum og tryggingarfeløgum
• broytingar í lógini um barsilsskipan um møguliga javning av inngjaldinum
• broytingar í eftirlønarlógini og rentutryggingarlógini um pensjónsinngjald flutt sum løn

Endamálið við hesum átøkum er, at barnafamiljur og familjur við lág- og miðalinntøkum fáa møguleika at sleppa inn á bústaðarmarknaðin.

Við uppskotinum verður minkað um sosiala ójavnan millum fólk, og ger tað lættari hjá føroyingum at velja at búseta seg í øllum Føroyum. 

Greinin varð fyrstu ferð løgd út 23. september 2024

Ung í Danmark vita lítið um Føroyar og Grønland

Dansk Ungdoms Fællesråd hevur staðið fyri eini umfatandi kanning millum ung ríkisfelagsskapinum. Kanningin verður løgd fram í Keypmannahavn í dag

Felagsskapskenslan millum ung í ríkisfelagsskapinum er ógvuliga avmarkað (Tilvildarlig savnsmynd)

SkrivaÐ:

Ingi Samuelsen

Tað er ógvuliga avmarkað hvat ung í Danmark vita um Grønland og Føroyar, og eisini er felagsskapskenslan fyri Grønlandi og Føroyum ógvuliga lítil. Hinvegin vita ung í Grønlandi og Føroyar nakað um Danmark, men tó er vitanin avmarkað.

Hetta vísir ein frágreiðing, sum Dansk Ungdoms Fællesråd, DUF, almannakunnger í dag.

- Frágreiðingin setir sjóneykuna á viðkomandi trupulleikar og skeivleikar innan fyri ríkisfelagsskapin. Tí er okkara vón, at frágreiðingin fer at skapa kjak og gróðrarbotn fyri umhugsan. Tað eru bert við felags virðum so sum forvitni, javnvirði og opinleika, at við í framtíðini kunnu knýta tættari bond og størri fatan millum ung í ríkisfelagsskapinum, sigur Christine Ravn Lund, forkvinna í DUF.

Serliga tey ungu í Danmark hava lítið í felag við ung í Føroyum og Grønlandi. Heili 71 prosent av donskum ungum halda seg onki ella líti hava í felag við ung í Grønlandi, og 66 prosent halda seg ikki hava nakað í felag við ung í Føroyum.

Ung í Føroyum kenna ein munandi hægri felagsskap við ung í Danmark og Grønlandi, meðan ung í Grønlandi als ikki halda seg hava nakað í felag við ung í Føroyum.

Frágreiðingin hjá DUF verður løgd fram á einum tiltaki á Norðurbryggjuni í Keypmannahavn seinnapartin í dag.

Tøl út kanningini

• 15 % af donskum ungum siga, at tey onga vitan hava um Føroyar, meðan hetta er galdandi fyri 32 % av ungum í Grønlandi. Til sammetingar siga 0 % av ungum í Føroyum og 7 % av ungum í Grønlandi, at tey onga vitan hava um Danmark.
• Ung í Grønlandi (49 %) og í Føroyum (41 %) kenna í onkran ella størri mun ein felagsskap við ung í Danmark, meðan ung í Danmark ikki uppliva sama felagsskap (ávikavist 21 % kenna ein felagsskap við Grønland og 24 % við Føroyar).
• Meirilutin av teimum ungu tvørtur um ríkisfelagsskapin ynskja at styrkja samstarvið (52 % av teimum ungu í Danmark, 51 % í Føroyum og 52 % í Grønlandi svara millum 6 og 10 á einum skala frá 1 til 10, har 5 er, at varðveita støðuna, sum hon er í dag, meðan 1-4 er niðurlaging og 6-10 er ynski um at styrkja samstarvið millum londini)
• Verður parturin tikin við, sum vil varðveita samstarvið, sum tað er í dag, so er talan um góð 70 % av donskum ungum og knapt 65 % av teimum ungu í Føroyum og Grønlandi. 

Sjómaq-verkætlanin hevur gjørt kanningina í samstarvi við Epinion. Helst er hetta fyrstu ferð, at ung verða spurd somu spurningar samstundis um viðurskifti, sum viðvíkja ríkisfelagsskapinum.

Endamálið við Sjómaq verkætlanini er at styrkja bondini og kunnleikan millum londini í ríkisfelagsskapinum. Dansk Ungdoms Fællesrád hevur staðið fyri verkætlanini í samstarvi við AFS og MFS íFøroyum og SORLAK og AFS í Grønlandi.

Greinin varð fyrstu ferð løgd út 26. september 2024

Standmyndin av Andreu Árting avdúkað

Leygardagin var stórt hátíðarhald í Steinatúni í Havn

Eftirkomarar hjá Andreu Árting (Mynd: Ólavur Frederiksen)

SkrivaÐ:

Sverri Egholm

Seinnapartin leygardagin varð standmyndin av Andreu Árting avdúkað. Standmyndin stendur í Steinatúni.

Tað vóru Heðin Mortensen, borgarstjóri, og Gunvør Balle, býráðslimur, ið avdúkaðu standmyndina.

Í røðu sínari vístu Heðin Mortensen, borgarstjóri, á, at Andrea Árting hevur havt týdning fyri allar Føroyar.

Nógv fólk var samankomið, og Havnar Hornorkestur spældi løg hjá Andreu Árting á hátíðarhaldinum.

Ólavur Frederiksen tók myndirnar fyri Tórshavnar kommunu

Nógv fleiri myndir her

Listamaðurin Edward Fuglø hevur evnað standmyndina

Kári Árting, ommusonur Andreu Árting, helt røðu

Greinin varð fyrstu ferð løgd út 22. september 2024

Standmyndin fagnar Andreu Árting og føroyskum kvinnum

Edward Fuglø hevur gjørt serstøku standmyndina í Steinatúni, sum hevur ymiskt myndamál í sær

- Bronsutræið, sum nú er komið at standa í Steinatúni, er ein spegling, ella reflektión, av hesum gomlu trøunum, og tað skal ímynda og vísa okkum á tað verk og tær hugsjónir, sum Andrea Árting, so at kalla, hevur gróðursett í føroyska samfelagnum fyri skjótt mongum árum síðan, og sum vit kunnu gleðast um enn í dag (Mynd: Ólavur Frederiksen)

SkrivaÐ:

Agnar Prestá

Andrea Árting var í áratíggju forkvinna í Havnar Arbeiðskvinnufelag, og slóðaði millum annað fyri, at menn og kvinnur fingu somu løn fyri sama arbeiði.

Tá standmyndin av Andreu Árting varð avdúkað í Steinatúni sunnudagin, helt Edward Fuglø, sum hevur gjørt standmyndina, eisini røðu.

Í røðuni greiddi listamaðurin frá um standmyndina og symbolini í henni - millum annað greiddi frá um tær sjey greinarnar í trænum.

Til avdúkingina. Edward Fuglø sæst millum Heðin Motensen, borgarstjóra og Kára Árting, ommuson Andreu Árting. Gunnvør Balle, stigtakari, sæst uttast til vinstru (Myndir: Ólavur Frederiksen)

Eisini segði listamaðurin, at standmyndin fagnar fyrst og fremst Andreu Árting, men at standmyndin eisini fagnar føroyskum konum, sum heild.

Her her er brot úr røðuni, ið Edward Fuglø, listamaður, helt:

Standmyndin er formað sum eitt træ, - eitt bronsutræ.

Íblásturin, ella konseptið, stavar frá øllum teimum gomlu og vøkru trøunum, sum eyðkenna miðbýin í Havn.

Bronsutræið, sum nú er komið at standa í Steinatúni, er ein spegling, ella reflektión, av hesum gomlu trøunum, og tað skal ímynda og vísa okkum á tað verk og tær hugsjónir, sum Andrea Árting, so at kalla, hevur gróðursett í føroyska samfelagnum fyri skjótt mongum árum síðan, og sum vit kunnu gleðast um enn í dag.

Eg ætlaði at tað skuldi vera eini fýra -fimm metrar høgt.  Men so spurdi onkur meg, er tað veruliga neyðugt at gera træið so høgt? "Eg meini, Andrea var so lítil og nett." - Til tað kundi eg bara svara, at Andrea Árting var og er ein kempa, og tá m.a. Nólsoyar Páll, sjómaðurin uppi í plantasjuni og aðrir garpar, hava fingið stórar og flottar standmyndir, sum eru fleiri metrar høgar,  tá er tað ongin sum viðmerkir tað, ella sigur nakað serligt, - so hví skal ikki eisini Andrea fáa eina høga standmynd?   - bara tí at hon var ein lágvaksin kvinna? -  HEILT ERLIGT ! !

So lidna bronsutræið bleiv, ígjøgnum prosessina, ístaðin næstan seks metrar høgt.

Til ber at lesa meira - eisini um tær sjey greinarnar - á torshavn.fo

Greinin varð fyrstu ferð løgd út 24. september 2024

Dragin sigldi á Flesjarnar

Eingin vandi var á ferð tá skúlaskipið rak á Flesjarnar við næmingum úr frískúlanum Kelduni umborð

(Mynd: Finnur Justinussen)

SkrivaÐ:

Alda Nielsdóttir

Skúlaskipið Dragin sigldi seint fyrrapartin mánadagin á Flesjarnar.

Skipið sigldi við lítlari ferð. Eingin vandi er á ferð, og Dragin lekur ikki, segði vakthavandi á MRCC-støðini við Portalin.

Umborð var ein skúlaflokkur og lærari frá frískúlanum Kelduni umframt manningin, sum telur tríggjar mans.

Skúlabørnini vórðu flutt til lands við øðrum báti, og tá skipið varð leyst aftur, varð tað Dragin sleipaður á Toftir.

Eftir at kavari hevði kannað botnin kundi Dragin sigla við egnari hjálp heimaftur til Klaksvíkar, har hann varð tikin upp á sleipistøðina. Tað vísti seg, at talan bert er um smávegis skaðar, sum skipið hevur fingið.

Greinin varð fyrstu ferð løgd út 23. september 2024

Búskaparráðið: Hallið mett at verða 560 milliónir krónur

Stór hall á fíggjarlógini í 2024 og 2025 er eitt framhald av somu óhepnu gongd í almennu fíggjarstýringini verður aftur sligið fast. - Ikki nokk at pjøssa uppá fíggjarlógina við óítøkiligum átøkum fyri 35 millónum krónum um árið

- Undirskot, ið eru á leið 1 prosent av BTÚ eru stór í ES høpi og fyri 2024 sær undirskotið út til at nærkast 2 prosent av BTÚ, tá flytingarnar til búskapargrunnin verða tiknar við. Landsstýrið hevur eina avbjóðing (Mynd: Jens Kr. Vang)

SkrivaÐ:

Agnar Prestá

- Stór hall á fíggjarlógini í 2024 og 2025 er eitt framhald av somu óhepnu gongd í almennu fíggjarstýringini. Úrslitini á fíggjarlógini eiga ikki at vísa so stór hall, tá hugsað verður um verandi góðu konjunkturstøðu.

Búskaparráðið og Landsbankin leggja ikki fingrarnar millum, tá tað skal gerast upp, hvussu fíggjarstýringin er, og hvussu fíggjarlógin í ár og næsta ár helst fara at síggja út.

Ruth Vang fer í næstu viku at leggja fíggjarlógina fram. Í Degi & Viku fyri stuttum vildi landsstýriskvinnan við fíggjarmálum einki siga um, hvussu stórt hallið verður - og um tað er størri ella minni, enn metingin hjá Bússkaparráðnum er. 

Tað ber sjálvandi ikki til at siga endaliga, men tá ráðið fyrst í septmber legði heystfráfrágreiðingina fram, varð millum annað mett at hallið á fíggjarlógini fer at verða 560 milliónir krónur í 2024 og 480 milliónir krónur í 2025.

Hetta er, tá atlit verður tikið til, at ikki allar inntøkurnar frá veiðigjaldinum og tøkugjaldinum eru tøkar hjá politisku myndugleikunum at ráða yvir í 2024 og 2025 -  tí ein partur skal í Búskapargrunnin. Hetta vísir Landsbanki Føroya á í skrivi á heimasíðu sínari.

Í grafinum niðast verður víst á, hvussu úrslitið sær út árini 2020-2025. Undirskot, ið eru á leið 1 prosent av BTÚ eru stór í ES høpi og fyri 2024 sær undirskotið út til at nærkast 2 prosent av BTÚ, tá flytingarnar til búskapargrunnin verða tiknar við.

- Úrslitið á fíggjarlógini, sum hon er sett upp nú, vísir ikki rætta úrslitið, tí allar tilfeingisinntøkurnar vera inntøkuførdar, soleiðis at tað sær út til, at landsmyndugleikarnir hava meira tiltøkupening enn tey veruliga hava

Nøkur ráð eru eisini givin. Millum annað tað at landsstýrið eigur at gera langtíðarætlanir fyri fíggjarligu gongdina hjá landskassa og kommunum undir einum, tí stórar avbjóðingar eru fyri framman orsakað av demografisku gongdini.

- Tað er ikki nokk at pjøssa uppá fíggjarlógina við óítøkiligum átøkum fyri 35 millónum krónum um árið, sum ætlanin er, sambært kørmunum hjá Fíggjarmálaráðnum. Neyðugt er við nýskipanum, sum veruliga muna, fyri at fáa fíggjarpolitikkin aftur á beint.

Úrslitið á fíggjarlógini

(Mynd: landsbankin.fo)

Øll heystfrágreiðingin hjá búskaparáðnum sæst her.

Greinin varð fyrstu ferð løgd út 26. september 2024

Politistøðirnar í Runavík og á Sandi lata aftur

1. oktober eru bert fýra virknar politistøðir eftir í Føroyum

Politistøðin í Runavík - opin hesa vikuna afturat (Mynd: Google)

SkrivaÐ:

Ingi Samuelsen

Føroya politi boðar nú frá, at tvær av teimum seks politistøðunum í Føroyum lata aftur 1. oktober.

Talan er um politistøðirnar í Runavík og heima á Sandi.

Fráboðanin ljóðar, at tey pass, sum eru bíløgd á hesum støðunum, kunnu heintast hesa vikuna afturat. Hareftir kunnu tey heintast á støðini í Tórshavn.

Tær fýra politistøðirnar, sum enn eru opnar eru á flogvøllinum, í Klaksvík, í Havn og á Tvøroyri.

Greinin varð fyrstu ferð løgd út 24. september 2024

Nýliga fráfarin sýslumaður talar at

Tað er ikki orsaka av at politistaliðið er vaksið, at løgreglan í Føroyum nú má spara og lata politistøðir aftur

Jens Jensen fremst í ólavsøkuskrúðgonguni í 2019 (Savnsmynd: Jens Kr. Vang)

SkrivaÐ:

Ingi Samuelsen

Jens Jensen, nýliga fráfarin sýslumaður, hartar í lesarabrævi í dag harðliga leiðsluna hjá løgregluni í Føroyum fyri at borgarar í Sandoy og Eysturoy nú skulu bøta fyri at umsitingin av politinum í Føroyum nú eftir øllum at døma er vorðin ov dýr.

- Eg haldi, at tað er sera ósmæðið at krevja, at hesi fólkini nú sjálvi skulu koyra til Havnar at avgreiða síni ørindi. Tænastur, sum politiið hevur skyldu at veita øllum borgarum, skrivar hann í lesarabrævi, sum kann lesast her:

Ein áheitan til Føroya Landsstýri

Jens Jensen vísir á, at tað er ikki orsaka av, at politistaliðið í Føroyum er vaksið, at útreiðslurnar nú hækka – heldur er tað øvugt. Men umsitingin er vaksin, staðfestir hann, og heldur tað eisini vera løgið, at Føroya politi skal leiga dýra húsaleigu til ein danskan myndugleika fyri at húsast í nýggju politistøðini á Trapputrøðni í Havn.

- Eg haldi, at tað er nokk so ósmæðið at senda rokningina til tey áleið 1.200 fólkini, sum búgva á Sandoynni og til tey 12.000 fólkini, sum búgva í Eysturoynni, sigur Jens Jensen, og leggur afturat:

- Nú sær út til at leiðslan hjá Føroya Politi er í ferð við at gera sama mistakið í Føroyum (við at steingja politistøðir kring landið, -red.), tó seinkað við nøkrum árum. Tað hevði tænt leiðsluni betur, um teir høvdu lært eitt sindur frá mistøkunum í Danmark.

Greinin varð fyrstu ferð løgd út 24. september 2024

Eftirlønin verður 6.455 krónur um mánaðin í 2025

AMEG hevur hækkað eftirlønina úr grunninum við 130 krónum um mánaðin frá 1. januar

Útgjaldið til eftirløn í 2024 er mett til umleið 714 milliónir - næsta ár verður tað helst beint omanfyri 790 milliónir

SkrivaÐ:

Agnar Prestá

Stýrið fyri Arbeiðsmarknaðareftirlønargrunnin (AMEG) hevur samtykt at hækka eftirlønina úr grunninum.

Frá 1. januar 2025 verður upphæddin 130 krónur hægri um mánaðin, enn hon er nú. Tað svarar til eina hækking á 2,1 prosent, soleiðis at eftirlønin fer frá 6.325 krónur um mánaðin í 2024 til 6.455 krónur um mánaðin í 2025.

Hetta merkir, at samlaða eftirlønin næsta ár verður tí 77.460 krónur.

- Lógin um arbeiðsmarknaðareftirlønargrunnin ásetir, at stýrið fyri grunnin skal áseta útgjaldið í seinasta lagi 1. oktober fyri álmanakkaárið eftir.

Í 2023 vóru 675 millónir krónur í eftirlønum útgoldnar úr AMEG. Útgjaldið til eftirløn í 2024 er mett til umleið 714 milliónir og til 792 milliónir krónur í 2025.

Greinin varð fyrstu ferð løgd út 26. september 2024

Hesi komu inn í umboðsráðið

11 menn og sjey kvinnur komu í umboðsráðið hjá Betri

(Savnsmynd)

SkrivaÐ:

Sverri Egholm

Seinastu vikurnar hevur borið til hjá tryggingartakarum hjá Betri Trygging, at greiða atkvøðu til Umboðsráðsvalið hjá Ognarfelag Tryggingartakaranna.

6.479 tryggingartakarar hava greitt atkvøðu.

Hesi fara at umboða Betri næstu fýra árini:

1. Urd Potts
2. Annita á Fríðriksmørk
3. Jóngerð M. Nielsen
4. Pauli Klakkstein
5. Kim Hansen
6. Olaf í Garði Joensen
7. Benjamin Miné Midjord
8. Rógvi Thomsen
9. Cecilia Nolsøe Sørensen
10. Robert Poulsen
11. Andrass Holm Arge
12. Rúna í Skála
13. Rebekka H. Hansen
14. Frankie Jensen
15. Ingun Háberg
16. Arni Teindal
17. Jóhannes Martin Olsen
18. Hanus Jákup E. Heinesen

Ognarfelagið Tryggingartakaranna eigur samtakið Betri.

Greinin varð fyrstu ferð løgd út 25. september 2024

Silas Olofson fekk miðlaheiðurslønina 2024

Á fyrimyndarligan hátt lýkur hann krøvini til heiðurslønina, verður sagt

Silas Olofson og Jón Brian Hvidtfeldt

SkrivaÐ:

Sverri Egholm

Á miðlafagnaðinum á Vísindavøkuni í gjár varð kunngjørt, at miðlaheiðursløn Granskingarráðsins 2024 verður latin Silas Olofson.

Dómsnevndin metir, at Silas Olofson á fyrimyndarligan hátt lýkur krøvini til heiðurslønina, segði Jón Brian Hvidtfeldt, limur í dómsnevndini.

- Hann dugir sera væl at miðla sína vitan og gransking til almenningin á ein lætt skiljandi hátt. Hann er engageraður og dugir væl at seta sína gransking inn í aktuellar støður og koma við niðurstøðum, sum gera okkum klókari um tað, sum hendir í náttúruni.

Silas Olofson er útbúgvin gudfrøðingur, og hevur altíð havt serligan áhuga í fuglalívi.

- Hann hevur fingist nógv við fuglafrøðiligt arbeiði, bæði professionelt og sum frítíðarvirksemi. Hann brúkar nógva tíð í fjøllum og fjøru at eygleiða og avmynda fugl.

Eisini eru sjónvarpssendingarnar "Sært tú fuglin" og útvarpsinnsløgini "Fuglatátturin" partur av orsøkini.

Hetta er tólvtu ferð, at heiðurslønin varð latin.

Heiðurslønin er áður latin:

2012 – Dorete Bloch
2013 – Pál Weihe
2014 – Kári Sólstein
2015 – Bogi Hansen
2017 – Jens-Kjeld Jensen
2018 – Magni Mohr
2019 – Lis Mortensen
2020 – Debes Christiansen
2021 – Marnar Fríðheim Kristiansen
2022 – Maria Skaalum Petersen
2023 – Heini í Skorini

Greinin varð fyrstu ferð løgd út 27. september 2024

Heita á landsstýrið at taka støðu til vitíki

Níggju stovnar hava sent almenna áheitan um at raðfesta vitlíki. Víst verður á týdningin av, at hetta er á politiska breddanum, nú tað fyllur so nógv og gevur ymiskar møguleikar - og vansar

- Vitlíki hevur seinastu árini av álvara tikið dik á seg. Møguleikar fyri nýskapan, vøkstri og menning av vælferðini eru stórir, men tað eru eisini etiskar og trygdarligar avbjóðingar, ið fylgja við tøknini (Mynd: setur.fo)

SkrivaÐ:

Agnar Prestá

Níggju stovnar eru nú komnir við áheitan á landsstýrið um at raðfesta og taka støðu til vitlíki.

Talan er um Almannaverkið, Kommunufelagið, Vinnuhúsið, Fróðskaparsetur Føroya, Undirvísingarstýrið, Sjúkrahúsverkið, TAKS, Gjaldstovuna og Talgildu Føroyar

Í skrivinum verður millum annað víst á, at menningin av vitlíki gongur skjótari, enn vit hava sæð við nakrari aðrari tøkni í søguni, og at man stendur fyri einari kollvelting. Hetta kann bæði vera gott og ringt

- Vitlíki hevur seinastu árini av álvara tikið dik á seg. Møguleikar fyri nýskapan, vøkstri og menning av vælferðini eru stórir, men tað eru eisini etiskar og trygdarligar avbjóðingar, ið fylgja við tøknini.

Broytingarnar verða so umfatandi, at tað er alneyðugt við miðvísum politiskum visjónum og ætlanum, og tí er neyðugt at man sum land er til reiðar verður víst á.

Tey níggju eru heldur ørkymlað av, at tað ikki er á breddanum politiskt: 

- Okkum kunnugt eru ongar yvirskipaðir politiskar visjónir á økinum. Vitlíki varð ikki nevnt í samgonguskjalinum frá 2022, ongar politiskar ætlanir um vitlíki finnast, og einki landsstýrisfólk hevur vitlíki sum málsøki.

Greinin varð fyrstu ferð løgd út 24. september 2024

Vespur gera um seg Úti í Grøv

Tær eru nógvrar í tali, tær eru ágangandi og hava verið til ampa fyri fleiri í seinastuni. Klaksvíkar kommuna staðfestir, at talan er um vespubýlið, sum nú skal týnast

- Hóast heystið er komið, so er vesputíðin ikki av enn. Kommunan hevur fingið fleiri fráboðanir um, at vespur, ið eru Úti í Grøv, eru sera ágangandi hesa tíðina. Vakurt hevur verið á staðnum og skal týna vespubýlið (Mynd: klaksvik.fo)

SkrivaÐ:

Agnar Prestá

Tær eru ikki yndisgestirnir hjá fólki flest, men tað er ikki vanligt, at vespur eru so nógvar í tali og so nógv til ampa, sum tær hava verið Úti í Grøv í seinastuni

Á sosialum miðlum og aðrastaðni hava fólk úr serliga Klaksvík sagt søgur um óvanliga ágangandi vespur. Í summum førum hava kyktini meira ella minni lopið á fólk, sum hava verið til gongu og annað í náttúruøkinum millum Klaksvík og Norðoyri.

Klaksvíkar kommuna hevur nú staðfest trupulleikan, og at talan er um eitt vespubýli.

- Hóast heystið er komið, so er vesputíðin ikki av enn. Kommunan hevur fingið fleiri fráboðanir um, at vespur, ið eru Úti í Grøv, eru sera ágangandi hesa tíðina.

Hetta skrivar Klaksvíkar kommuna á heimasíðuni, har tað víðari verður staðfest, at tiltøk nú er eru sett í verk.

Greinin varð fyrstu ferð løgd út 25. september 2024

Valið til Eldraráðið í Tórshavnar kommunu útsett

Ov fá fólk vilja stilla upp til eldraráðsvalið, sum skuldi vera 11. oktober, so avgjørt er at útseta valið og endurskoða skipanina og viðtøkurnar fyri Eldraráðið

(Savnsmynd)

SkrivaÐ:

Tíðindaskriv

Tórshavnar býráð samtykti á býráðsfundi í farnu viku at útseta valið til Eldraráðið.

Arbeitt hevur verið við at fáa skipað val til Eldraráðið í Tórshavnar kommunu, sum ætlandi skuldi vera tann 11. oktober. Fimm limir skulu veljast í Eldraráðið, og tríggir varalimir.

Tá freistin at stilla upp var farin 12. september, høvdu bert trý fólk boðað frá, at tey ynskja at stilla upp. Til seinasta val í 2020, var eisini trupult at fáa fólk at stilla upp.

Mett verður, at um freistin at stilla upp til Eldraráðið verður longd, kemur eldraráðsvalið at liggja tætt upp at býráðsvalinum í november. Tí er avgjørt at útseta eldraráðsvalið og nýta høvi at endurskoða skipanina og viðtøkurnar fyri Eldraráðið, sum møguliga ikki eru nóg greiðar.

Eldraráðið varð sett á stovn í 2006. Endamálið hjá Eldraráðnum er at ráðgeva býráðnum við eldrapolitikki.

Valskeiðið hjá Eldraráðnum endar 31.desember í ár.

Greinin varð fyrstu ferð løgd út 21. september 2024

Serstakur minnisbonkur komin uppá Eiði

Alzheimerfelagið og Eiðis kommunu hava samstarvað um hann

21. september var altjóða alzheimersdagur og í tí sambandi hevur Eiðis kommuna, í samstarvið við Alzheimerfelagið, sett ein sokallaðan minnisbonk við Gamla Kirkjugarð (Mynd: eidi.fo)

SkrivaÐ:

Agnar Prestá

21. september var altjóða alzheimersdagur og í tí sambandi hevur Eiðis kommuna, í samstarvið við Alzheimerfelagið, sett ein sokallaðan minnisbonk við Gamla Kirkjugarð.

Talan er um ein træbonk, sum hevur violett "hjól". Ein líknandi er settur upp í Grasagarði í høvuðsstaðnum.

Endamálið er at varpa ljós á demenssjúkur millum fólk.

Eiðis kommuna skrivar á heimasíðu sínari, at bonkurin stendur sjónliga fyri almenningin, og skal bjóða fólki at seta seg niður og taka eitt prát og minnast løturnar.

- Við hesum vil Eiðis kommuna seta sjóneykuna á avbjóðingarnar ið standast av demenssjúku, og takka Alzheimerfelagnum fyri sítt avbera góða arbeiði.

Greinin varð fyrstu ferð løgd út 26. september 2024

Kirkjuhúsið, Arnes Minde, verður vígt í morgin

Henda dagin verður eisini løgd fram ein bók um húsið. Lív Arge Simonsen hevur skrivað

Arnes Minde áðrenn umbyggingina (Savnsmynd)

SkrivaÐ:

Ingi Samuelsen

Kirkjuhúsið hjá Havnar kirkju, bygningurin í Bringsnagøtu, kallaður Arnes Minde, og eitt nú hevur verið brúktur sum politistøð, ráðhús og ungdómshús umframt mangt annað, verður tikið í brúk sunnudagin eftir umfatandi umvæling og umbygging.

Kirkjustova, Arnes Minde, verður vígt í sambandi við hátíðargudstænastu í kirkjuni sunnudagin, á mikkjalsmessu, kl. 11.

Jógvan Fríðriksson, biskupur, vígir Kirkjustovu, boðar kirkjuráðið frá.

Eftir vígsluna eru øll boðin til spritubitar og ein drekkamunn í Kirkjustovu, Arnes Minde.

Henda sama dag verður eisini løgd fram ein bók um Kirkjustovu: “Kirkjustova, Arnes Minde – søgan um húsini”. Tað er Lív Arge Simonsen, ið hevur skrivað.

Vígsludagin verður Kirkjustova, Arnes Minde, opin frá klokkan 12 til 15, har høvið verður at síggja húsini.

Greinin varð fyrstu ferð løgd út 24. september 2024

Prát um eina landsdekkandi matarskipan

Eitt samtak undir stovnan arbeiðir við at menna eina sjálvbjargna, burðardygga og føðslurætta matarskipan fyri føroysk børn

 

SkrivaÐ:

Tíðindaskriv

Mikudagin 2. oktober verður eitt serligt tiltak í Norðurlandahúsinum, har prátað verður um eina landsdekkandi matarskipan í Føroyum.

Joan Sørensen skipar fyri tiltakinum saman við samtakinum GAIA FO (sum í løtuni er undir stovnan), ið arbeiðir við at menna eina sjálvbjargna, burðardygga og føðslurætta matarskipan, sum stuðlar undir trivnaði, menning og sosialari javnvág hjá øllum børnum í øllum almennum dagstovnum og skúlum í Føroyum.

Endamálið við tiltakinum er at lýsa, hvussu ein slík matarskipan kann ávirka føroyska samfelagið – bæði í mun til heilsu, trivnað, landbúnað og staðbundna matframleiðslu.

Í kjakinum verður eisini tikið fram, hvussu matarskipanin kann stuðla føroyskum framleiðarum og menna eina føroyska matarmentan.

Vit fara at tosa um, hvussu ein fastur eftirspurningur frá umleið 11.000 børnum dagliga kann stimbra framleiðsluna av føroyskum rávørum, og hvussu vit kunnu tryggja, at børnini fáa javna atgongd til sunnan, burðardyggan og vælsmakkandi mat.

Skráin verður skipað í fýra høvuðsspurningar:

• Frá sjógvi, mold og haga til borðið: Landbúnaðarvørur, fiskivørur og matframleiðsla
• Til hvønn barna maga: Hvussu skal okkara matarskipan smakka?
• Matgleði og læring: Námsfrøðiliga arbeiðið í matarskipanini
• Fleiri hendur í køkinum: Tørvurin á yrkisfólki í føðsluvinnuni

Tiltakið bjóðar nøkur av fremstu fakfólkum innan økini at luttaka, og gestir kunnu síggja fram til eitt livandi prát um, hvussu vit í Føroyum kunnu menna eina matarskipan, sum stuðlar undir burðardygd, føroyskan landbúnað og betri heilsu fyri komandi ættarlið.

Tiltakið er alment ogókeypis og verður hildið í Norðurlandahúsinum mikudagin 2. oktober frá kl. 13 til 15. Vit bjóða søtt og sunt frá Kafé Systrar omaná.

Greinin varð fyrstu ferð løgd út 26. september 2024

Pallborðsfundur um grønmetisvelting

Kjakast verður um kostráð og innlendis grønmetisframleiðslu á Eplafestivalinum heima á Sandi í dag

(Savnsmynd)

SkrivaÐ:

Tíðindaskriv

Klokkan 10 fyrrapartin í dag verður almennur pallborðsfundur um grønmetisvelting í samband við Eplafestivalin heima á Sandi.

Búnaðarstovan, Veltan og Grøni Háskúlin arbeiða saman um eina verkætlan viðvíkjandi menning av grønmetisvelting.

Í hesum sambandi  er stig tikið til at skipa fyri pallborðsfundi við heitinum “Skulu vit hava vinnuliga grønmetisframleiðslu í Føroyum?”

Fundurin er almennur og verður á fjósloftinum í Miðstovuni í Trøðum á Sandi.

Framløgur vera um evnið og pallborðsluttakarar seta skjøtul á kjakið. Orðstýrari verður fjølmiðlakvinnan Óluva Zachariassen, ið eisini er bóndi.

Í sambandi við pallborðsfundin fer kokkurin Gutti Winther at bjóða brellbitar av ymsum grillaðum grønmeti.

Nýggju norðurlendsku kosthaldsráðini mæla til at eta lutfalsliga meira av grønmeti, enn gjørt verður nú, og Heilsustýrið í Føroyum arbeiðir somuleiðis við átøkum á sama bógvi.

Landsstýrismaðurin við landbúnaðarmálum hevur boðað frá nýggjum landbúnaðarpolitikki, har økt sjálvsveitingarstig av føroyskt framleiddum matvørum, eins og økt innlendis grønmetisframleiðsla, eru nevnd og raðfest frammarlaga.

Skal tað eydnast at náa hesum yvirskipaðu málum, eru mangir tættir, ið skulu fáast at samvirka, soleiðis at vit sum samfelag draga eina línu í hesum føri.

Talan er um spurningar viðvíkjandi m.a. vakstrarlíkindum og lendismøguleikum, vitan og førleikum, marknaðarmøguleikum, príslegu og fíggjarligum kørmum, hugburði og brúkaraáhuga, heilsupolitikki og landbúnaðarpolitikki, fyri bert at tríva í nøkur dømi úr rúgvuni.

At matvøruveitingartrygd nú verður tikin í størsta álvara sæst m.a. í tí, at Norrøna ráðharraráðið skipar fyri eini stórari, altjóða ráðstevnu um “krise-simulation” um matvøruveiting í Stokkhólmi 8. - 9. oktober.

Fyriskipararnir av pallborðsfundinum á Eplafestivalinum vóna, at borgarar og tey sum taka avgerðir í samfelagnum taka væl ímóti hesum høvi at hittast á fjósloftinum í Miðstovuni at umrøða dagsaktuella evnið eina løtu og somuleiðis at smakka onkrar av brellbitunum frá kokkinum.

Greinin varð fyrstu ferð løgd út 26. september 2024

Grindadráp forðar Føroyum at veruliga koma í sjóneykuna

Trýst frá djóraverndarfelagsskapum í Onglandi hava fingið festivalin The Great Escape at strika Føroyar sum sjóneykuland næsta ár. Stóri festivalurin fer tó framhaldandi at samstarva við føroysk tónlistafólk

Tey vilja framvegis hava føroyingar at framføra, men neyðugt er taka so mikið av frástøðu, at Føroyar ikki "verða høvuðsnavnið" í 2025

SkrivaÐ:

Agnar Prestá

- Hetta eru einki minni enn stórtíðindi, sum uttan iva fara at lata nógvar hurðar upp fyri føroyskan tónleik í altjóða tónleika- og mentanarheiminum.

Soleiðis segði Glenn Larsen, leiðari í Faroe Music Export, tá tað í síðstu viku gjørdist alment, at Føroyar fóru at vera í sjóneykuni (fokusland) til The Great Escape í Brighton næsta ár.

Les eisini: Sjóneykan á Føroyar á the Great Escape 2025

Stóri tónleikafestivalurin í Suðuronglandi savnar ofta ung og spennandi nøvn. Millum annað hava Adele, Ed Sheeran, Bastille, MØ og Mumford & Sons spælt har tíðliga á sínari yrkisleið.

Festivalurin hevur havt føroysk nøvn sum Joe & The Shitboys, Aggrasoppar, Elinborg og Brimheim á vitjan seinnu árini, og Føroyar vórðu valdar til "Lead Country Partner fyri 2025". Hetta kundi ger heilt nógv fyri føroyskan tónleik og føroysk tónlistafólk - men hetta er nú broytt.

Trýst frá felagskapum

Hetta er ikki fyrstu ferð, at júst føroyska tónleikavinnan hevur upplivað tað: At grindadráp er ein forðing.

Týskvøldið boðaði "The Great Escape" frá, at Føroyar er tikið burtur sum sjóneykuland (Lead Country Partner) fyri 2025. 

Orsøkin er at felagskapir í økinum - millum annað "Sussex Dolphin Project" hevur gjørt vart við sína ónøgd. Tað hevur elvt til stúran yvir siðin við grindadrápi í Føryum - nakað sum The Great Escape helst als ikki hevur veitt einum tanka áðrenn. Men nú er festivalurin - ella móðurfelagið omanfyri - hoknaður undir trýstinum og vil ikki hava ringa umrøðu og møguliga mótmæli. 

Hesin seinasti setningurin stendur ikki í ógvuliga yvirskipaða og varliga skrivinum frá festivalinum, men kann rímiliga týðiliga lesast millum linjurnar.

Vilja framvegis samstarva við føroyskar tónleikarar

The Great Escape tekur sína frástøðu frá grindadrápi - men ikki frá føroyskum tónlistafólki:

- Vit eru errin av at hava arbeitt tætt við føroyskum tónlistafólki seinastu árini, har man hevur sæð tey mongu flottu evni, sum Føroyar hava sett á okkara pallar. Føroyskir tónleikarar hava verið ein íblástur til og umráðandi partur av okkara festivali, og vit vilja framhaldandi stuðla hesum ótrúligu tónlistafólki, meðan tey halda á við at bergtaka áhoyrarafjøldir.

Hesum byrjar skrivið við, og The Great Escape endar við - eftir at hava skrivað um avgerðina at taka Føroyar burtur sum sjóneykuland - at tey framvegis fara at samstarva við føroysk tónlistafólk og tryggja, at fleiri úr Føroyum kunnu traðka á pallin á The Great Escape.

Harvið setur festivalurin seg onkursvegna millum tveir stólar. Tað er eyðsæð, at tey halda av føroyskum tónleiki og føroyskum tónlistafólkum, men tora ikki at Føroyar skulu koma ov nógv í fokus hjá sær í Brighton í mai næsta ár.

Greinin varð fyrstu ferð løgd út 25. september 2024

Rockkonsert í Varpinum við ungum úrmælingum

Tvey næmingaorkestur frá Tónlistaskúlanum í Klaksvík og eitt læraraorkestur spæla

Nóa McLeod (Savnsmynd: Jens Kr. Vang)

SkrivaÐ:

Tíðindaskriv

Hóskvøldið 3. oktober verður ein rimmar rock-konsert í Varpinum, við luttøku frá tveimum næmingaorkestrum frá Tónlistaskúlanum í Klaksvík og einum læraraorkestri.

Við í læraraorkestrinum spælir ungi bass-úrmælingurin Omi Joensen, og gestasangari er Jónas Kallsberg Jacobsen frá Adrenaline.

Konsertin byrjar kl 19, og skráin varir ein tíma. Kostnaður fyri vaksin er 100 krónur, og børn undir 18 sleppa inn fyri hálvan prís. Peningurin stuðlar virkseminum hjá næmingaorkestrunum.

Abbigult spæla sangir hjá m.a. Guns N Roses og Green Day. Teir eru Áron Sigurðson, gittar og sang, Nóa Mcleod, gittar og sang, Rókur Fonn, bass og Uni Sørensen, trummur

Blue North spæla sangir hjá m.a. Pink og ZZ Top. Tey eru Bjarta, bass og sang, David Glerfoss, gittar, Jógvan Lützen, gittar og Maja Lamhauge, trummur

Lærabólkurin spælir tónleik hjá m.a. Foo Fighters og Arctic Monkeys: Omi Joensen, bass, Jónas Kallsberg Jacobsen, sang , Hjalti Støyle, gittar, Jan Rúni Poulsen, trummur, Magni Husgaard, keyboard og Pauli Poulsen, gittar 

Greinin varð fyrstu ferð løgd út 26. september 2024

Granskarar funnið besta evnið móti migrenu

Nýggj gransking vísir, at besti heilivágurin móti eru sokallaðar triptanir

(Savnsmynd)

SkrivaÐ:

Ingi Samuelsen

Heilivágur av slagnum triptanir er tann besti ímóti migrenu. Tað staðfestir nýggj gransking, har altjóða og danskir granskarar hava kannað virknaðin av ymsum sløgum av heilivági móti migrenu, skrivar Ritzau.

Kanningin vísir, at hetta slagið gevur besta linna móti migrenupínum, vísa úrslitini.

- Vit hava sammett fleiri sløg av heilivági. Nú vita vit, at triptanir virka best, sigur Messoud Ashina, professari á nevrologiskari deild á ríkissjúkrahúsinum í Keypmannahavn, sambært Ritzau.

Hesin heilivágurin hevur verið á marknaðinum síðani nítiárini, men óvæntað fáir migrenusjúklingar, fáa henda heilivág útskrivaðan, sigur professarin.

- Umleið 15 til 20 prosent av øllum við migrenu fáa hetta slagið. Tað er alt ov fá, tá vit nú vita hvussu væl tað riggar, sigur Ashina.

Orsøkin til at heilivágurin ikki er so útbreiddur er, sambært Messoud Ashina, at læknar og sjúklingar um okkara leiðir hava eina skeiva uppfatan av evninum.

- Í Danmark hava vit lyndi til at undirviðgera migrenu. Summi halda, at tað er ógvusligt at brúka ávísingarheilivág móti migrenu, sigur hann.

Í dag verða flestu migrenusjúklingar tí viðgjørdir við vanligum pínustillarum. Summi brúka nýggjari og dýrari migrenuheilivág, sum kanningin vísir, virkar verri enn triptanir.

Granskararnir, sum hava gjørt kanningina vóna, at nýggja vitanin fer at geva fleiri migrenusjúklingum eina betri viðgerð.

- Vit mæla til at skapa størri tilvitan um migrenu sum sjúku. Nógv eru undirviðgjørd og høvdu havt gagn av at skift viðgerð, sigur Ashina.

Triptanir virka við at tálma signalevnum, sum skapa pínurnar og óbehag hjá migrenusjúklingum. Evnið stabiliserar nervakyknurnar og æðrarnar, sum eru ovurávirkaðar undir migrenuherðindunum.

Eins og við øðrum heilivági móti migrenu, kunnu triptanir hava hjáárin so sum møði og vaml. Men tað eru tey fægstu, sum vilja uppliva hetta, sigur Messoud Ashina.

Tað hevur tikið granskarunum trý ár at finna fram til, hvat evni er best móti migrenu, skrivar Ritzau.

Granskingin er gjørd av Dansk Hovedpinecenter á Ríkissjúkrahúsinum saman við Oxford University. Talan er um størstu kanning av sínum slag við umleið 90.000 luttakarum.

Granskingin hevur raðfest 17 ymiskar heilivágir móti migrenu.

Greinin varð fyrstu ferð løgd út 24. september 2024

Heitasta summarið nakrantíð í Poenix

Hitin lá oman fyri 100 stig farhrenheit – 38 stig celsius – í 113 dagar á rað

 

SkrivaÐ:

Ingi Samuelsen

Í amerikanska oyðimarkarbýnum, Phoenix í statinum Arizona, hava tey í ár havt tað heitasta summarið nakrantíð, skrivar Reuters.

Í 113 dagar á rað hevur hitin ligið oman fyri 38 stig celsius. Harvið varð gamla metið frá 1993 sett, tá tey høvdu 76b dagar við hita oman fyri 38 stig,svarandi til 100 stig fahrenheit, ið er hitaskalin, tey brúka har yviri.

Í Maricopa county, har Phoenix liggur, hevur hitin verið orsøk til at 256 fólk hava latið lív. Harumframt er høgi hitin undir illgruna til eisini at hava verið orsøk til 393 andlát afturat.

Greinin varð fyrstu ferð løgd út 24. september 2024

Maggie Smith deyð 89 ára gomul

Seinastu árini er hon blivin kend fyri sínar leiklutir í Downton Abbey og Harry Potter

Maggie Smith (Mynd: EPA)

SkrivaÐ:

Sverri Egholm

Bretska sjónleikarinnan Maggie Smith er deyð, 89 ár.

Tað upplýsir familja hennara sambært BBC.

- Tað er við stórari sorg, at vit boða frá, at Maggie Smith er deyð. Hon andaðist friðarliga á sjúkrahúsinum í morgun, ljóðar í boðunum til BBC.

Upplýst verður ikki, hví Maggie Smith var innløgd. Tó stendur, at hon til tað síðsta var umgird av familju og vinum, og at hon hevði verið innløgd nakrar dagar áðrenn hon andaðist.

Maggie Smith hevur havt eina rúgvu av leiklutin, men seinastu árini er hon serliga kend fyri leiklutin í Downton Abbey sum Violet Crawley, og í væl umtóktu filmunum um Harry Potter, har hon spældi Minerva McGonagall.

(Mynd: Warner Brothers)

Hon fekk sín fyrsta leiklut sum bara 17 ára gomul, og hevur tvær ferðir vunnið Oscar virðisløn.

Greinin varð fyrstu ferð løgd út 27. september 2024

Konfirmantar í Hoyvíkar kirkju sunnudagin

-

 

SkrivaÐ:

Innsent

Konfirmatión verður Hoyvíkar kirkju í morgin, sunnudagin 29. september. Prestur er Theodor Eli Dam Olsen.

Konfirmantarnir eru hesir:

Alith Blaasvær, Mannbrekka 7. Dagurin verður hildin í Kirkjukjallaranum í Hoyvíkar kirkju frá kl. 18.

Annvør Róaldsdóttir, Á Hvítanesi 41, Hvítanes, Dagurin verður hildin heima frá kl. 17.

Bára Thorvaldsdóttir Petersen, við Myllutjørn 16. Dagurin verður hildin heima frá kl. 16.

Dagny Krosstein Askham, Baraldsgøta 9, Tórshavn. Dagurin verður hildin í Bridgehúsinum á Hoydalsvegi 21, Tórshavn, frá kl. 16.

Julia Petersen, Guttormsgøta 8. Dagurin verður hildin í Oasuni, Kirkjustræti 4, Hoyvík, frá kl. 16.30.

Lín Róin, Millum Gilja 9. Dagurin verður hildin í Broncks, Jónas Broncksgøtu 17, Tórshavn, frá kl 15.

Marin Jákupsdóttir Danielsen, Ólivantsgøta 21. Dagurin verður hildin heima frá kl. 16.

Melania Hovgaard Bærentsen, Niðaragøta 78. Dagurin verður hildin á Verkhúsinum Virkni, Berjabrekku 28, Tórshavn, frá kl. 15.

Bjartur Aleksandur Niclasen, Djúpagilsvegur 34. Dagurin verður hildin heima frá kl. 16.

Eivindur Fríði Ísheim Hentze, Gróthúsvegur 10. Dagurin verður hildin á Handilsskúlanum í Marknagili, Janusargøta 2, Tórshavn,  frá kl. 17.

Filip Ngabulo Wardum Ragnarsson, Við Myllutjørn 21. Dagurin verður hildin í Odd Fellow, Grønlandsvegur 56, Tórshavn, frá kl. 17.

Jason Measso Debess Lützen, Hoyvíksvegur 33, Tórshavn. Dagurin verður hildin í B36-húsinum, Tórshavn, frá kl. 16. 

Jákup Rógvason Weyhe, Oman Gil 8. Dagurin verður hildin heima frá kl 15. 

Martin Mørkøre Poulsen, Jørundargøta 54. Dagurin verður hildin á Hilton frá kl. 17. 

Mattias Høgnason Viderø, Millum Gilja 20. Dagurin verður hildin heima frá kl. 17. 

Páll Vilhelm Laksáfoss, Liljugøta 16, Tórshavn. Dagurin verður hildin heima frá kl. 16. 

Petur William Kjartansson Stampe, Karlamagnusarbreyt 16 L. Dagurin verður hildin í hølunum hjá Havnar Handverkarafelag, Stoffalág 60, Tórshavn, frá kl. 15. 

Rói Klein Lamhauge, Oman Hoydalar 10. Dagurin verður hildin heima frá kl. 15. 

Sólfinnur Funding Luid, Móritsarvegur 10, kj. hm. Dagurin verður hildin heima frá kl. 17. 

Sveinur Lamhauge Larsson, Dýrindalsgøta 48. Dagurin verður hildin í Lamba skúla frá kl. 16.

Greinin varð fyrstu ferð løgd út 24. september 2024

Konfirmantar í Kirkjubøar kirkju sunnudagin

-

 

SkrivaÐ:

Innsent

Konfirmatión verður í Kirkjubøar kirkju í morgin, sunnudagin 29. september klokkan 11. Prestur er Bergur Debes Joensen.

Konfirmantarnir eru hesir:

Bragi Bloch Jónasarson, Grásteinsgøta 4, Tórshavn. Dagurin hildin í Bygdarhúsinum Sólarmagn á Velbastað frá kl. 14.

Hugin Høgnason Heinesen, undir Kongavarða 39, Argir. Dagurin hildin í Grím Kambansgøtu 17 frá kl. 14.

Kira Gunnerim Fernandez, Háskúlavegur 15, Tórshavn. Dagurin hildin í AB-húsinum frá kl. 17.

Greinin varð fyrstu ferð løgd út 24. september 2024

Konfirmantar í Leirvíkar kirkju sunnudagin

-

 

SkrivaÐ:

Tíðindaskriv

Konfirmatión verður í Leirvíkar kirkju í morgin, sunnudagin 29. september klokkan 11. Prestur er Gerhard Jónsson Mikkelsen.

Konfirmantarnir eru hesir:

Jóhannus Eli Ánike Lambaa – Opið hús í Lonini, Fuglafjørður, frá kl. 16.

Jónas Martin Erlingsson Joensen – Opið hús heima á Børkugøtu 27, Kambsdalur, frá kl. 16.

Lea Hansen – Opið hús heima á Bøvegi 41, Fuglafjørður, frá kl. 15.

Lív Justinussen – Opið hús í Missiónshúsinum í Leirvík, frá kl.16.

Maia Toftegaard – Opið hús í Thabor, Fuglafjørður, frá kl. 15.

Rókur B. Petersen – Opið hús heima á Garðavegi 8, Fuglafjørður, frá kl.15.

Sesilia í Lambanum – Opið hús heima á Garðavegi 7, Fuglafjørður, frá kl 16.

Unna Billa Toftum Petersen – Opið hús heima á Ennivegi 15 og omanfyri hjá ommu og abba frá kl 17.

Greinin varð fyrstu ferð løgd út 25. september 2024