- Tími ikki nakað tvætl við at fara til næstbestu deildarnar í Skandinavia

- Um eg skal fara úr NSÍ aftur, so skal tað vera meira spennandi enn Hjørring ella Norðurnoreg. Tað staðfestir Petur Knudsen, sum eisini heldur seg fáa hjálpt meira á landsliðnum, enn hann fær møguleikan til nú

 -  At fara í næstbestu deildarnar í londunum kring her, tað liggur ikki í kortunum. Tað eru ikki vánaligar deildir ella nakað, men tað havi eg líkasum roynt. Tá tími eg betri at kappast um heiðursmerki og annað við NSÍ, staðfestur Petur Knudsen. Hann hevur sáttmála við barndómsfelagið til og við 2026

SkrivaÐ:

Agnar Prestá

- Eg havi ein sáttmála, sum er galdandi næstu tvey kappingarárini eisini. Eg havi ikki avskrivað at fara uttanlands aftur, men eg tími ikki nakað tvætl við at fara til næstbestu deildarnar í Skandinavia. Hetta havi eg roynt og havi víst, at eg klári tað - havi eisini víst at kann standa meg væl í tí bestu deildini í Skandinavia.

Tað var ein bersøgin Petur Knudsen, sum fyri stuttum úttalaði seg til Portalin um, hvar hann spælir næsta ár - um hann møguliga fer út um landoddarnar aftur at royna seg.

- Tími ikki nakað tvætl í Skandinavia

Petur kom aftur til NSÍ síðsta vetur, og er hann høvuðsorsøkin til, at NSÍ liggur til evropeiskt pláss í løtuni. Tølini tala fyri seg: Sambært bolt.fo hevur kviki og ágangandi vongurin úr Saltangará 32 málstig í løtuni - tað eru 15 mál, næstflest í Betrideildini, og 17 upplegg, flest í Betrideildini. Petur Knudsen fer helst at taka metið.

Hann hevur sáttmála við NSÍ fyri 2025 og 2026, men tað er áhugi fyri 26-ára gamla landsliðsspælaranum aðrastaðni. Tað var í ein mun væntað, at støðgurin í NSÍ ikki fór at vera langur. Evnini í álopskenda spælinum hevur hann avgjørt til meira enn Føroyar. Hetta vísti vongurin millum annað í Lyngby í serliga 2021 (í næstbestu donsku deildini) og í 2023 (Superliguni) - tá hann var heilt til reiðar at spæla.

Petur Knudsen vendi aftur frá skaða og var við at skapa og skora týðandi mál fyri Lyngby, so at liðið helt sær í Superliguni í 2023. Síðani fór hann at royna seg í USA - nakað, ið ikki eydnast so serliga væl

Petur Knudsen ger nú tað púra greitt, at um hann skal fara úr barndómsfelagnum aftur, so skal tað "ikki vera nakað tvætl í Skandinavia":

- At fara í næstbestu deildarnar í londunum kring her, tað liggur ikki í kortunum. Tá tími eg betri at kappast um heiðursmerki og annað við NSÍ - enn at liggja og tvætla í næstbestu deildunum í Skandinavia. Um tað er, so hyggi eg heldur longur. Og um eitt tilboð kemur úr einari heilt góðari deild, so skal eg ikki avskrivað tað, men sum sagt: Eg havi ein trý-ára sáttmála og virði hann, so leingi einki annað meira spennandi liggur á borðinum.

- So tað er antin okkurt heilt spenanndi uttanlands ella barndómsfelagið næstu árini?

- Ja, ja. So skal tað vera okkurt, har eg síggi, at man kann blíva ein betri fótbóltsspælari og okkurt meira spennandi enn at spæla í Hjørring ella onkustaðni í Norðurnoregi; ella sum heild í næstbestu deildunum. So um eg sleppi fram við Skandinavia, so kann tað verða, at eg fari avstað aftur.

Deildunum er einki galið við, og landsliðsspælarin skilur, at hetta kunnu vera góð fet. Tað er bara ikki fyri hann beint nú:

- Tað er ikki tí, at eg haldi, at hasar deildirnar eru vánaligar, ella at spælarar ikk i kunnu flyta seg har. Tað er bara tað, eg havi roynt nakað líknandi, og eg vil nakað annað, um eg fari uttanlands aftur, slær Petur Knudsen fast.

Taka ein dyst í senn í Runavík

Við javnleikinum móti B36 fyri 13 døgum síðani tryggjaði NSÍ, at frástøðan á fimm stig helt. Tað er hon framvegis, nú bæði liðini hava fýra dystir eftir. Tá vit tosaðu við Petur Knudsen eftir javnleikin í Gundadali viðurkendi hann, at tað var ein lætti á degnum at fáa stig - hann vildi tó ikki siga nógv meira um týdningin av 4. plássinum.

- Okkara málsetningur fyri árið var at enda í topp-fimm, og tað klára vit. Nú taka vit bara ein dyst í senn, og so fáa vit at síggja hvussu langt tað røkkir.

- Kann fáa fleiri mál fyri landsliðið

Petur Knudsen var 23-ára gamal, tá hann spældi sín fyrsta A-landsdyst í 2021. Hetta hóast hann hevði verið álopskendur profilur í Betrideildini í nøkur ár og eisini ársins spælari í 2020.

Samanlagt hevur Petur spælt 17 A-landsdystir. Bert einaferð hevur hann spælt frá byrjan í kappingardysti: Tað var sum einsamallur áleypari á Tórsvølli móti Kekkia í EM-undankappingini í fjør. Føroyar fingu einki at hanga saman tann dagin, og taptu 3-0.

Síðani fekk Petur løtur móti Albania (heima tríggjar dagar seinni) og í Noregi, men annars samanlagt fáar landsliðsminuttir restina av árinum - millum annað null minuttir í tveimum dystum eftir at hann varð komin úr USA, har vongurin misti endaspælsdystir afturfyri.

Petur Knudsen til landsliðsvenjing. Hann verður heilt víst í hópinum, sum Håkan Ericson úttekur til lagnudystirnar móti Lettlandi og Armenia í oktober. Spurningurin er so, hvønn leiklutin mest vandamikli spælarin í Betrideildini í ár fær (Savnsmynd: Sverri Egholm)

Ein álvarsamur skaði í 2022 hevur órógvað A-landsliðstíðina, men tað er sum skilst serliga vantandi áræði í verjukenda spælinum og kapping við annað slag av spælarum, sum forðar fyri, at Petur Knudsen fær meira spælitíð á hansara nátúrliga plássi sum vinstri vongur - ella spælitíð sum heild. Hann byrjaði eisini á bonkinum í dystunum móti Norðurmakedonia og Lettlandi í september. Portalurin hevur spurt Petur um hansara støðu á landsliðnum.

- Tú ert komin upp um 30 málstig men byrjar ikki inni á landsliðnum - einum liði ið sum heild hevur trupult við at skapa málmøguleikar og at skora mál. Hvussu hongur tað saman?

- Ja, tú spyrt tann skeiva persónin handan spurningin. Men eg havi so spælt í fimm landsdystum í ár, og føli at í hvørjum dysti havi eg skapt ein stóran málmøguleika ella eri komin til ein stóran málmøguleika. Havi eisini fingið eitt mál (Estland í Baltic Cup, red.) og verið nær við at fingið fleiri...vit hava ikki skorað so nógv mál seinastu tíðina á landsliðnum, og tað haldi eg, at eg kann hjálpa við. Men tað er jú landsliðsvenjarin, sum tekur støðu til hvør spælir.

Petur Knudsen skoraði í venjingardysti í Estlandi fyrr í ár, tá hann byrjaði inni. Hetta var hansara fyrsta A-landsliðsmál. Hann átti eisini havt skorað í Riga herfyri, tá hann kom inn (Mynd: Hans Erik Danielsen/FSF)

Hann kom inn í Lettlandi sum høgri vongur, og kom til størsta føroyska málmøguleikan. Petur kundi og átti havt javnað til 1-1 seint í dystinum eftir hart og gott innlegg frá Adrian Justinussen úr vinstru - ein annar álopskendur profilur, sum ikki hevur spælt serliga nógv á A-landsliðnum. 

- Ja, sjálvandi irði eg meg nógv um handan møguleikan. Eg skuldi bara rakt málið, so hevði tað verið 1-1. Men hatta slagið av innleggi - sjálvt um tey eru góð - so eru tað ofta trupul at halda bóltinum nirði, tá hann kemur fram, tí tey eru so hørð. Eg komi eisini til bóltin við skeiva beininum, og raki hann kanska ov væl. Men jú...handan skal eg skora uppá.

Umframt leiklultin sum innskiftari á vonginum - vinstra og høgra - hevur landsliðsvenjartoymi roynt Petur Knudsen sum einsamallan áleypara. Hetta riggaði fínt í venjingardysti í Oslo í fjør, men heildarmyndin higartil er, at ein av vandamiklastu álopskendu spælarunum í føroyskum fótbólti seinastu árini, sum eisini vísti seg væl fram í donskum fótbólti, tá hann var heilt tøkur, ikki hevur foldað seg út á A-landsliðnum enn.

Greinin varð fyrstu ferð løgd út 28. september 2024

Víkingur skúgvaði allan iva til viks - bíða nú eftir steypinum

Oddaliðið vann 5-0 á niðurflytarunum, sum einki høvdu at bjóða uppá. ÍF fekk eisini beinleiðis reytt kort fyri steðgin, meðan álopsmaskinan hjá Víkingi helt náðisleyst fram

Víkingarnir fingu fimm mál, og nú eitt nærum tryggjað FM (Mynd: Sverri Egholm)

SkrivaÐ:

Agnar Prestá

Tað endaði 5-0 í Sarpugerði í gjárkvøldið, og tað kundi verið mangt slíkt. Eitt vælspælandi Víkinga-lið skapti eitt hav av mámøguleikum móti einum mótleysum niðurfluttum ÍF-liði.

Jákup Johansen setti hol á tíðliga, og tá hann økti í 63. minutti var eingin ivi longur. 

Royndi strandingurin Jákup Johansen var nær við at vinna FM við júst ÍF í 2012 - í gjár sendi hann Víkingi so nær við FM sum møguligt, uttan at tað er avgjørt (Mynd: Sverri Egholm)

Tá spældi ÍF við tíggju monnum, tí Ruben Møller Nielsen fekk reytt kort fyri ógvusliga og fullkomiliga óneyðuga takkling móti vælsspælandi Olafi Bárðarsyni.

Jørgen Nielsen og innskiftu Aron Jarnskor Ellingsgaard og Finnur Justinussen øktu, so tað endaði 5-0. Tað er helst ikki skeivt at siga, at FM-veitslan er byrjað í Sarpugerði - hóast tað ikki heilt endaliga er uppá pláss. 

Fleiri myndir frá dystinum

Mynd: Sverri Egholm

KÍ útsetti FM-veitsluna eitt sindur

NSÍ javnaði til 1-1 fimm fyri steðgin og hevði gyltan møguleika at økja um munin beint fyri steðgin, tá brotsspark varð dømt. Mark F. Jensen bjargaði tó royndini frá Peturi Knudsen, og í 2 hálvleiki avgjørdi KÍ dystin.

Tað vóru "sjálvandi" Árni Frederiksberg og Páll Andrasson Klettskarð, sum stóðu fyri málinum - Árni legði upp til máli hjá Pálli við góðum frísparksinnleggi. Hetta eru teir báðir stóru álopskendu profilarnir, ið hava longt sáttmála seinastu vikuna.

Teir tryggjaðu, at KÍ vann 11. sigurin á rað í Betrideildini. Ein góð røð, og hon heldur Víkingi frá at endaliga verða meistari. Tað er tó greitt nú, at Víkingur verður meistari: Tveir dystir eftir, seks stig og 31 mál á muni. 

Hjá NSÍ var talan um annan ósigurin á rað. Um B36 vinnur í Streymnesi í dag, so er bert eitt stig á muni í topp-fýra stríðnum undan tveimum teimum seinastu umførunum - tey verða spæld eftir landsliðssteðgin.

Illfýsið at spæla á Svangaskarði í gjárkvøldið (Mynd: Sverri Egholm)

Óbroytt støða um 8. plássið

Óguvliga illfýsi og heilt nógv uppá spæl og tað merkir, at tað varð ógvuliga rótut á Svangaskarði í gjárkvøldið.

Nógv fólk vóru til staðar. Fótbóltsspælið var einki at rópa hurrá fyri, men menn løgdu heilt nógv fyri, og tað var inntenst.  Ein ávísur nervi var í dystinum, og liðini høvdu hvør sín stóran møguleika seint eftir dystinum: Báðir vóru eftir at mótsstøðuliðið bóltin í uppspælinum.

Tey bæði málini í dystunum komu beint fyri steðgin. Fyrst sló danin Nicolai Dohn til fyri Skála, men í yvirtíðini í 1. hálvleiki javnaði Jóhan Josephsen til 1-1. Hetta var annan dystin á rað, at ungi leigusveinurin úr KÍ skoraði.

Málið kann fáa stóran týdning fyri B68, sum í minsta lagi heldur sambandi til Skála. B68 skal tó helst vinna á EB/Streymi (heima) ella NSÍ (úti) fyri at koma upp á 8. plássi.

Sí myndir frá dystinum

Skála hevur NSÍ (heima) og síðani B36 (úti) eftir. Í løtuni hava uppflytarnir verri málúrttøku.

Tað er ikki vist, at liðið, ið endar á 9. plássi flytir niður. Við núverandi støðu í 1. deild - tveimum næstbestu liðum í topp-trý - verður ein dystur um upp- og niðurflyting.

25. umfar í Betrideildini 
Fríggjadagin 03. oktober

Víkingur - ÍF 5-0 (1-0)
07' 1-0 Jákup Johansen (Sølvi Vatnhamar)
63' 2-0 Jákup Johansen
71' 3-0 Jørgen Nielsen (Jákup Johansen) 
82' 4-0 Aron Jarnskor Ellingsgaard (Olaf Bárðarson)
85' 5-0 Finnur Justinussen (Ari Olsen) 

Reytt kort: 36' Ruben Møller Nielsen (ÍF) - beinleiðis reytt kort

KÍ - NSÍ 3-1 (1-1)
24' 1-0 Sjálvmál
41' 1-1 Steffan Løkin (Petur Knudsen)
60' 2-1 Árni Frederiksberg (Claes Kronberg)
68' 3-1 Páll Andrasson Klettskarð (Árni Frederiksberg)

B68 - Skála 1-1 (1-1)
40' 0-1 Nicolai Møller Dohn (Maxwell Machael Effiom)
45+2' 1-1 Jóhan Josephsen (Ragnar Samuelssen)

Støðan 
1. Víkingur 69 stig (+62)
2. KÍ 63 stig (+31)
3. HB 52 stig*
4. NSÍ 41 stig
5. B36 37 stig*
6. 07 Vestur 27 stig* 
7. EB/Streymur 22 stig*
8. Skála 19 stig
9. B68 18 stig
10. ÍF 7 stig

* Ein dyst færri

Komandi dystir

í dag kl. 16: HB - 07 Vestur
Í dag kl. 17: EB/Sstreymur - B36 

Greinin varð fyrstu ferð løgd út 04. oktober 2024

Eingin slingur í valsinum á Skála

Sannførandi 3-0 sigur til Víking, sum legði upp til at kunna fáa FM í hús í gjárkvøldið

(Mynd: Sverri Egholm)

SkrivaÐ:

Agnar Prestá

Tað gjørdist ikki nakar snávingarsteinur fyri Víking á Skála, tá seinasti dystur í 24. umfari varð spældur mánakvøldið.

KÍ hevur lagt eitt sindur av trýsti á seinastu vikuna, men liðið hjá Jóhan Peturi Poulsen kom aftur á sigurskós við 3-0 sigri.

Tað var strandingurin Jákup Johansen, sum fekk hol á eftir hálvan tíma. Víkingur avgjørdi fyrsta korterið eftir steðgin: Fyrst skoraði Sølvi Vatnhamar brotsspark, og síðani gjørdi Skála sjálvmál eftir gott innlegg frá Olafi Bárðarsyni - annars hevði Finnur Justinussen gjørt arbeiði liðugt.

Trý mál og trý stig: Og Víkingur er nú trý stig frá FM. Vinnur Víkingur á ÍF í Sarpugerði fríggjakvøldið (- í gjárkvøldið, -red.), so kann KÍ við yvir 99 prosent vissu ikki fáa Víking aftur.

Myndir frá dystinum her

Víkingur er seks stig og 29 mál betri enn trýfaldu føroyameistararnir undan trimum teimum seinastu dystunum.

KÍ tepran sigur í Vágum

Trýfaldu føroyameistararnir, KÍ, áttu at komið til Sørvágs við høgum sjálvsáliti eftir 2-1 sigurin í Sarpugerði farna vikuskiftið. Um so var, so sást tað ikki.

KÍ spældi uttan ferð, hugflog og góðsku meginpartin av dystinum, meðan 07 Vestur bjóðaði av. Espen Haug hevði valt eina 3-4-3/5-4-1 leikskipan frá byrjan, men hetta riggaði als ikki.

Skipanin varð broytt til seinna hálvleik, har KÍ avgjørdi dystin. Talan var um eitt vælspælt álop í høgru: Árni Frederiksberg sendi Jóannes Kalsø Danielsen avstað inn í brotsteigin, bakkurin legði hart og flatt innfyri til Páll Klettskarð, sum ótarnaður kundi seta innarusíðu á.

Hetta var so at siga tað einasta, sum KÍ veruliga skapti. 07 Vestur vantaði tó seinasta fyri at veruliga hótta sigurin - liðið hjá Dan Brimsvík sá vælskipað út, men fekk einki burturúr dystinum: Heldur ikki eftir at Odmar Færø fekk beinleiðis reytt.

Hetta var, tá fimm minuttir vóru eftir. Tað var eftir stórt mistak hjá roynda miðverjanum, sum hálaði í neyðbremsuna.  

Emil Grønn Pedersen skeyt beinleiðis frísparkið uppum, og tað endaði 0-1.  Harvið hevur KÍ trý stig og 25 mál upp til Víking - og tíggju sigrar á rað. 

Spældu minuttirnar, ið eftir vóru av dystinum, týskvøldið

Mest umrøddi dysturin hetta vikuskiftið gjørdist botndysturin í Fuglafirði millum ÍF og B68.

Tá umleið tveir minuttir vóru eftir av dystinum varð dysturin blástur av orsaka av at ein áskoðari small um á áskoðara plássinum uppi á berginum í Fløtugerði.

Tá høvdu toftamenn tryggjað sær eina trivaliga 3-1 leiðslu.

Myndir frá dystinum sunnudagin her

Myndir frá seinastu minuttunum týsdag her

At byrja við frættist, at dómari og venjararnir vóru samdir um at blása dystin av.

Seinni kom so fram, at heimildir vóru ikki fyri hesum sambært fótbóltsreglunum, og venjarin hjá ÍF, Ólavur Larsen, var heldur ikki samdur um, at semja var um at laga 3-1 vera úrslitið av dystinum.

Hann vildi hava, at ein nýggjur dystur varð spældur.

Kappingarnevndin hjá fótbóltssambandinum tók hinvegin avgerð um, at teir seinastu minuttirnir av dystinum skuldu spælast, og tað skuldi vera týskvøldið. Liðini møttust aftur, spældu umleið fimm minuttir - hálvan annan minutt, sum ver eftir av dystinum, umframt longda leiktíð.

Onki mál kom í uppafturtiknu minuttunum.

Les eisini: Ikki allar súður syftar viðvíkjandi dystinum í Fuglafirði

Les eisini: Tí varð dysturin í Fuglafirði tikin uppaftur

Betrideildin 24. umfar

Skála - Víkingur 0-3 (0-1)
30' 0-1 Jákup Johansen (Bergur Gregersen)
50' 0-2 Sølvi Vatnhamar (br.)
61' 0-3 Sjálvmál

07 Vestur - KÍ 0-1 (0-1)
66' 0-1 Páll Andrasson Klettskarð (Jóannes Kalsø Danielsen) 0-1

Reytt kort: Odmar Færø (86')

EB/Streymur - NSÍ 4-1 (0-1)
33' 0-1 Betuel Hansen (Petur Knudsen)
48' 1-1 Kristian Svabo Eliasen
50' 2-1 Jóhann Hansson Joensen 
73' 3-1 Filip Djordjevic, br.
87' 4-1 Filip Djordjevic (Boubacar Dabo)

Reytt kort: Mikkjal Hellisá (88') - seinna gula

B36 - HB 2-2 (1-1)
16' 1-0 Marius Kryger Lindh (Jógvan Gullfoss)
37' 1-1 Jákup Thomsen (Ári Jónsson)
45+1' 2-1 Hannes Agnarsson (Marius Kryger Lindh)
54' 2-2 Ári Mohr Jónsson (Jákup Thomsen)

ÍF - B68 1-3 (1-1)
12' 0-1 Brian Jakobsen (Sebastian Lau Nielsen)
21' 1-1 Jákup Andrias Thomsen (Uros Stojanov)
49' 1-2 Jóhan Josephsen (Fríði í Túni Petersen) 
71' 1-3 Bartal Páll Klein (Jóhan Josephsen)

Støðan: 
1. Víkingur 66 stig (+57)
2. KÍ 60 stig (+29)
3. HB 52 stig
4. NSÍ 41 stig
5. B36 37 stig
6. 07 Vestur 27 stig 
7. EB/Streymur 22 stig
8. Skála 18 stig
9. B68 17 stig
10. ÍF 7 stig

Komandi dystir:

Leygardagin kl. 16: HB - 07 Vestur
Leygardagin kl. 17: EB/Streymur - B36

Tríggir dystir vórðu spældir fríggjakvøldið: Víkingur-ÍF, KÍ-NSÍ og B68-Skála ÍF

Greinin varð fyrstu ferð løgd út 30. september 2024

Magnus Powell settur sum KÍ-venjari

Tað verður 49-ára gamli sviin, við fortíð í 07 Vestur, sum tekur við róðrinum í Klaksvík. - Eg trívist væl millum føroyingar og gleði meg at koma til Klaksvíkar sum skjótast, sigur Magnus Powell

 

SkrivaÐ:

Agnar Prestá

- Eftir tað var okkum greitt at Espen Haug endar sítt starv nú í heyst, hava vit leitað eftir avloysa. Valið er fallið á Magnus, sum vit halda hevur royndir og førleikar til at vera høvuðsvenjari hjá besta mansliðnum og vera við í menningini í tí fótbóltsfakliga arbeiðnum í felagnum.

Soleiðis sigur formaðurin hjá KÍ, Tummas Lervig, við heimasíðu felagsins í sambani við venjarasetanina.

Kunngerðin kom týsdagin umleið ein tíma eftir, at Portalurin kundi fortelja, at Magnus Powell mest sannlíkt og eftir øllum at døma fór at taka við í Klaksvík.

49-ára gamli sviin hevur seinastu 16 árini verið venjari í serliga næstbestu deildunum í Svøríki og Noregi.

Á sumri 2021 tók hann við hjá 07 Vestur, og leiddi liðið til trygt sæti í Betrideildini sum uppflytari, umframt at sviin flutti liðið nógv.

Síðani keypti Östersunds FK Magnus Powell leysan úr 07 Vestur. Har hevur hann verið venjari frá januar 2022 fram til 12. sepmteber í ár, tá venjarin sjálvur segði seg úr starvi - møguliga fyri at taka starvið í Klaksvík heldur. Sum okkara keldur vístu á, hava partarnir tosa saman í eina tíð.

- Hetta er ein avbjóðing, sum eg við eldhuga og eyðmýkt fari í holt við. Eg vil takka felagnum fyri góðar samrøður í hesi tilgongdini. Eg trívist væl millum føroyingar og gleði meg at koma til Klaksvíkar sum skjótast at fylgja dysti, hitta leikarar, leiðslutoymi og starvsfólk í felagnum. KÍ er eitt toppfelag, sum eg veit setir høg krøv, bæði í mun til úrslit og góðskuna  á vøllinum. So tíðin fram til januar verður týdningarmikil fyri okkum at fáa í lag eitt sterkt toymi av leikarum og hjálparfólki so vit kunnu halda fram við menningini, felagið higartil hevur havt. Fyri meg persónliga gleði eg meg at fáa eitt innlit í, hvussu felagið verður rikið, málsetingarnar hjá felagnum og virðisgrundarlagið. Og at enda gleði eg meg til at hitta øll í og ​​rundan um felagið.

Soleiðis sigur Magnus Powell sjálvur við ki.fo. Eftir ætlan skuldi hann koma til Klaksvíkar í vikuni og byrjar formliga í starvinum eftir ársskiftið, men sum hann nevnir: Arbeitt verður eisini í tíðini fram til ársskiftið.

Talan er um ein tvey-ára sáttmála, skrivar ki.fo. Powell avloysir Espen Haug, sum byrjaði sum hjálparvenjari í Klaksvík, síðani var norðmaðurin fyribils venjari, áðrenn hann í summar formliga gjørdist høvuðsvenjari. Sáttmáli var millum partarnar fyri 2025 eisini, men mánadagin varð endaliga kunngjørt, at Espen Haug ikki heldur fram í KÍ.

Greinin varð fyrstu ferð løgd út 01. oktober 2024

Magne Hoseth heldur ikki fram í B36

Hetta hevur Portalurin fingið váttað. Hann fer aftur til Noregs, og sum skilst kemur ein annar norðmaður í venjarasessin hjá B36, og verður hetta almannakunngjørt skjótt

Seinasta uppgávan hjá Magna Hoseth verður steypafinalan móti HB 2. november. Ein sigur kann senda B36 í Conference League næsta ár og tryggja felagnum gott fíggjarligt grundarlag (Mynd: Sverri Egholm)

SkrivaÐ:

Agnar Prestá

Magne Hoseth boðaði í gjár sínum spælarum frá, at hann ikki heldur fram í starvinum til næsta kappingarár.

Hetta hevur Portalurin fingið upplýst.

Tað eru millum annað persónligar orsøkir, ið gera, at at 43-ára gamli norðmaðurin eftir steypafinaluna 2. november fer aftur til Noregs.

Har skal hann millum annað halda fram við at taka Pro Licens - hægsta venjaraprógv sum er. Verður tað eitt nýtt venjarastarv skjótt, so verður tað eitt, sum er nærri familju hansara.

Magne Hoseth kom til B36 í juni, eftir at samstarvið millum Dan Brimsvík og B36 endaði. Sáttmálin millum Hoseth og B36 er bert galdandi til kappingarlok, so tað er ikki heilt óvæntað, at norðmaðurin og B36 ikki leingja samstarvið. Tað hevur ljóðað í eina tíð - og sum skilst verið avgjørt fyri eitt sindur av tíð síðani - og nú staðfest.

Ein nýggjur norðmaður

Í síðsta mánaði setti B36 Tummas Erling Djurhuus sum ítróttarstjóra. Hann og nevndin hava verið í gongd við at loyst venjaraspurningin, og nú er ein loysn funnin.

Hetta hevur Portalurin fingið upplýst frá góðum keldum. Sum skilst er aftur talan um ein norðmann, og verður viðkomandi kunngjørdur skjótt.

Royndi Dag-Eilev Fagermo, sum júst hevur avloyst David Nielsen í Lillestrøm, var eitt av evnunum, men eftir øllum at døma verður tað ikki hann, sum skal leiða B36 víðari.

Magne Hoseth hevur fýra dystir eftir í starvinum. Hann skal royna at fáa B36 upp um NSÍ, so liðið endar í Evropa til næsta ár. Allarseinasti dystur er steypafinalan móti grannunum HB 2. november - tá kann B36 bæði tryggja sær steyp og 2. umfar í Conference League næsta ár.

Greinin varð fyrstu ferð løgd út 04. oktober 2024

Hanus Sørensen skiftir til slovenskan fótbólt

Sambært okkara keldum skal landsliðsmiðvallarin til NK Celje, sum er meistari og í Conference League-deildarspælinum. Hanus spælir sum skilst ikki fleiri dystir í barndómsfelagnum á hesum sinni - heldur ikki steypafinaluna

Hanus Sørensen hevur lagt upp til næstflest mál í Betrideildini í ár. Hann og HB enda samstarvið nú, meðan ein nýggj byrjan verður í Slovenia hjá 23-ára gamla hoyvíkinginum (Mynd: Sverri Egholm)

SkrivaÐ:

Agnar Prestá

Hann hevur havt eitt ógvuliga gott kappingarár við HB og er eisini byrjaður inni - og hevur gjørt tað væl - á A-landsliðnum seinastu dystirnar.

Hanus Sørensen hevði bert sáttmála við barndómsfelagið til 31. oktober, og tað hevur ligið í kortunum, at hann fór út um landoddarnar aftur at spæla. 23-ára gamli hoyvíkingurin var í nøkur ár á ungdómsliðum hjá FC Midtjylland og síðani í Middelfart, áðrenn hann endaliga kom heim í 2022.

Sum FM1 eisini hevur skrivað, so hevur Hanus Sørensen nú gjørt sáttmála við útlendskt felag, og spælir hann ikki í steypafinaluni 2. november.

Hetta kemst av tí, at sáttmálin sum nevnt gongur út við mánaðarskifti, og at Hanus nú hevur skrivað undir sáttmála við nýtt felag.

Sum avleiðing av hesum, spælir Hanus Sørensen helst ikki nakran dyst afturat frá HB á hesum sinni. Hann er á veg at skifta felag, kann ikki spæla steypafinaluna og er harvið ikki í ætlanunum hjá Adolfo Sormani og felagnum, sum helst kenna seg heldur svikin. Tað er ikki endað heilt gott millum partarnar. Hetta hevur Portalurin fingið upplýst frá fleiri keldum: HB hevur tríggjar landskappingardystir hendan mánaðin.

Stóran týdning fyri HB í ár men spælarin vildi ikki leingja sáttmálan og heldur royna nakað nýtt. Hanus verður sum skilst ikki partur av HB-hópinum seinasta mánaðinum í ár, hóast hetta upprunaliga var ætlanin (Mynd: Sverri Egholm)

Til Slovenia

Hanus Sørensen verður eftir øllum at døma fyrsti føroyski spælarin, sum fer at royna seg í slovenskum fótbólti.

Sambært fleiri góðum keldum hjá Portalinum flytir tekniskt sterki og kviki miðvallarin, sum eisini kann røkja bakkplássi væl, til Slovenia skjótt.

Nýggja felagið verður sum skilst NK Celje. Eftir tíggju umfør er liðið á 6. plássi í fremstu røð.

Celje vann slovenska meistaraheiti síðsta kappingarár, og er í løtuni í Conference League-deildarspælinum. Liðið spældi fyrsta dystin í ligaspælinum í Portugal hóskvøldið, og tapti 3-1 móti Guimaraes.

Tað er ikki endaliga váttað, at hetta verður nýggja felagið hjá Hanusi, men nógv bendir á tað. 

Hanus Sørensen tók ábyrgd við bóltinum í 2. hálvleiki í Lettlandi. Skjótt skulu hann og landsliðsliðfelagarnir spæla týðandi dyst móti júst Lettand á Tórsvølli - Hanus hevur seinasta stóra árið bitið seg meira fastan á A-landsliðið, har hann hevur samanlagt 11 dystir (Mynd: Sverri Egholm)

Hvørki HB ella Hanus Sørensen sjálvur vildu í vikuni gera útgreina skiftið hjá Hanusi Sørensen.

Hanus vildi bara váttað, at hann hevur sáttmála til 31. oktober og er sinnaður at gera tað, sum er best fyri HB.

Ransin N. Djurhuus, formaður í HB váttaði einans, at Hanus ikki spælir við í steypafinaluni og at hann ikki spælir við HB næsta ár.

Greinin varð fyrstu ferð løgd út 02. oktober 2024

Árni heldur fram í KÍ

Nú er greitt, at 32-ára gamli vongurin við gylta vinstrabeininum og evropeiska málmetinum heldur fram í kongabláum til og við 2026. Fyrsti nýggi "stóri" sáttmálin hjá KÍ er uppá pláss

13 mál, fleiri upplegg og nakrar heilt stórar løtur í Evropa seinastu árini - serliga í 2023. Samanlagt hevur Árni Frederiksberg spælt 359 dystir í Betrideildini síðani 2010. Hann og KÍ vilja meira í Betrideildini í 2025 (Savnsmynd: Sverri Egholm)

SkrivaÐ:

Agnar Prestá

Nakað av iva hevur alment verður sáddur um tað, men nú er greitt, at KÍ hevur longt samstarvið við sín 7'ara. Partarnir hava gjørt ein nýggjan tvey-ára sáttmála.

Árni Frederiksberg hevur í skjótt fýra kappingarár í Klaksvík vunnið trý FM, verið ársins spælari eina ferð og hevur verið við til at seta met í Føroyum - og í Evropa.

Júst í Evropa hevur Árni Frederiksberg tvey tey seinastu árini verið lykilin í álopskenda spælinum, og hevur 32-ára gamli vongurin úr Saltangará skotið KÍ til nógv við sínum gylta vinstra fóti, spælskili og snildni.

Frederiksberg-nanvið gjørdist heilt kent í Evropa í 2023, tá KÍ kom í Conference League bólkaspæl. Her sæst Árni Frederiksberg eftir minniliga 2-1 málið móti Molde í Champions League. Árni skoraði bæði málini á Tórsvølli tá (Myndir: Sverri Egholm)

Árni Frederiksberg og KÍ hava ikki havt tað besta árið í Betrideildini, men í Klaksvík er ætlanin, at vongurin skal vera ein av grundarsteinunum í at koma upp móti tindinum aftur.

- Vit arbeiða hart við at fáa hópin og alt til 2025 upp á pláss. Tit frætta, tá tað er ymiskt at frætta.

Soleiðis segði Tummas Lervig við Portalin fyrr í vikuni um støðuna. Nú er ein nýggjur sáttmáli kunngjørdur.

Greinin varð fyrstu ferð løgd út 29. september 2024

Metmálskjúttin hjá KÍ fer ongan veg

Páll Klettskarð hevur nú skrivað undir nýggjan sáttmála við barndómsfelagið

20 mál í Betrideildini í ár og yvir 200 mál samanlagt: Páll Klettskarð er ein ímynd í Klaksvík, og hevur hann havt stóran týdning fyri felagið leingi (Savnsmynd: Sverri Egholm)

SkrivaÐ:

Agnar Prestá

- Íhaldandi hevur hann stríðst og skorað mál í bláu troyggjuni. Ein sonn ítróttarlig fyrimynd vit í felagnum eru stolt av. Altíð ein siðiligur leiðari í við- og mótgongd. Páll eigur ein stóran leiklut í gyltu ferðini frá botninum til evropiska ævintýrið við liðnum síðstu árini. Og aftur í ár hevur hann verið KÍ ógvulig drúgvur.

Tey halda nógv av Pálli Klettskarð í og kring Klaksvíkar Ítróttarfelag, og tað er heldur ikki løgið. Páll Klettskarð hevur havt liðskiparabandið um armin so at siga alt árið, meðan Jákup Biskopstø Andreasen hevur verið skaddur, og hevur leingi avrikað og stríðst fyri KÍ.

Eingin hevur skorað so nógv mál fyri besta mansliðið hjá KÍ sum stríðsfúsi áleyparin hevur - yvir 200 samanlagt seinastu samanlagt 17 árini. Persónligheitin hjá Pálli hevur eisini nógv at siga fyri felagið, og nú hava partarnir longt samstarvið við einum ári.

Páll Andrasson Klettskarð takkar KÍ-áskoðarum eftir evropeiskan dyst á Tórsvølli. Umframt 203 mál í Betrideildini, hevur Pállskorað tíggju evropeisk mál (Savnsmynd: Sverri Egholm)

Harvið er endaliga greitt, at Páll Andrasson Klettskarð eisini spælir fyri KÍ í 2025. Nakað av ivamáli hevur verið sátt um hetta í seinastuni - serliga í samrøðu við Televarpið eftir sigurin í Sarpugerði mikudagin tá Páll Klettskarð staðfesti, at hann ongan sáttmála hevði, og at allir møguleikar vóru opnir.

Fyriuttan KÍ hevur Páll Klettskarð verið eitt stutt skifti verið í donskum ungdómsfótbólti og tvey ár í Víkingi.

Greinin varð fyrstu ferð løgd út 30. september 2024

Tríggir týðandi sáttmálar á 120-ára degnum

Áki Samuelsen, Mathias Voss og Teitur Matras Gestsson hava longt við HB

HB hevur stríðst fyri at fáa longt sáttmálan við Áka Samuelsen - talan er um eitt-árs sáttmála við evnaríka vongin (Savnsmynd: Sverri Egholm)

SkrivaÐ:

Agnar Prestá

HB hevur seinastu tíðina roynt at longt sáttmálarnar við Áki Samuelsen, Mathias Voss og Teit Matras Gestsson.

Áhugi hevur verið frá feløgum uttanlands fyri Áka og Mathiasi, og fyri landsliðsmálverjanum úr barndósfelagnum KÍ.

Nú er allur ivi skúgvaður til viks, og hesir tríggir spæla eisini fyri HB í 2025. Hesum boðar HB frá í gjárkvøldið. Hjá Voss er talan um tvey-ára sáttmála.

Áki Samuelsen er stórt álopsvápn, uppvaksin í HB og var eitt skifti í FC Midtjylland í ungdómsárunum. Mathias Voss er orkuríkir danskur høgri bakkur, sum síðani 2022 hevur gjørt vart við seg í Føroyum - fyrst í 07 Vestur og í ár við HB.

Teitur Matras Gestsson er, sum nevnt, uppvaksin í KÍ, fór síðani til OB og hevur spælt síðani 2011 við HB. Liðformaðurin og tann sum hevur spælt longst við HB av núverandi monnunum hevur nú knýtt seg at HB til næsta ár eisini.

Greinin varð fyrstu ferð løgd út 04. oktober 2024

Fleiri broytingar í føroyska hópinum til lagnudystir

Teitur Matras Gestsson og Mattias Lamhauge skulu aftur kappast við Bárð á Reynatrøð, Odmar Færø er tøkur í miðverjuni - Jóannes Bjartalíð og Hannes Agnarsson koma við sereginleikum

Håkan Ericson og Hallur Hansson hava aftur prátað saman, men heldur ikki hesaferð vendir liðformaðurin aftur. Møguliga verður Brandur Hendriksson tøkur til heimadystirnar móti Armenia og Lettlandi (Savnsmynd: Sverri Egholm)

SkrivaÐ:

Agnar Prestá

Føroyska manslandsliðið skal 10. oktober og 13. oktober spæla lykladystir móti ávikavist Armenia og Lettlandi á Tórsvølli. Føroyar skulu helst hava fleiri stig, um góður møguleiki skal vera at halda sær í Deild C, sum er minsta málið hjá Føroyum.

Håkan Ericson kunngjørdi mánadagin teir 23 spælararnir, sum í fyrstu syftu eru úttiknir. Har sæst, at Teitur Matras Gestsson, Mattias Lamhauge, Odmar Færø, Jóannes Bjartalíð og Hannes Agnarsson eru aftur á A-landsliðnum.

Hópurin:

Málverjar:
Bárður á Reynatrøð, Víkingur
Teitur Matras Gestsson, HB
Mattias Lamhauge, FC Fredericia

Verjuspælarar:
Jóannes Kalsø Danielsen, KÍ
Jann Julin Benjaminsen, B36
Viljormur Davidsen, HB
Daniel Johansen, Hillerød Fodbold (Danmark)
Andrias Edmundsson, Wisla Plock (Pólland)
Hørður Askham, FC Roskilde (Danmark)
Samuel Johansen Chukwudi, HB Tórshavn
Odmar Færø, KÍ 
Gunnar Vatnhamar, Víkingur Reykjavík (Ísland)
Arnbjørn Svensson, Víkingur

Miðvallarar:
René Shaki Joensen, KÍ
Hanus Sørensen, HB
Adrian Justinussen, Hillerød Fodbold (Danmark)
Meinhard Egilsson Olsen, Mjøndalen IF (Noreg)
Sølvi Vatnhamar, Víkingur
Jóannes Bjartalíð, Fredrikstad (Noreg)
Hannes Agnarsson, B36

Áleyparar:
Jóan Símun Edmundsson, FC Shkupi (Norðurmakedónia)
Klæmint Andrasson Olsen, NSÍ
Petur Knudsen, NSÍ

Hetta merkir, at í mun til seinastu dystirnir eru Silas Eyðsteinsson, Kristian Joensen, Sonni Ragnar Nattestad, Patrik Johannesen, Pætur Petersen og Mads Boe Mikkelsen ikki við. Teir báðir síðstnevdnu eru skaddir - fleiri av hesum vórðu ikki úttiknir til dystirnar móti Norðurmakedonia og Lettlandi á fyrsta sinni. Tá varð Teitur Matras Gestsson úttikin í fyrstu syftu, men kortini ikki tøkur at spæla.

Håkan Ericson staðfesti á tíðindafundinum, at eitt pláss stendur opið í hópinum. Tað er fyrst og fremst til Brand Hendriksson Olsen, sum er byrjaður at venja við fullari ferð í Fredrikstad.

Jóannes Bjartalíð var á vøllinum aftur fyri Fredrikstad um vikuskiftið. Tað er tó ósannlíkt, at 28-ára gamli miðvallarin fer at spæla heilt nógvar minuttir um 10 dagar og 13 dagar 

Sviin vil ógvuliga gjarna hava skálvíkingin við - tað hevur Brandur ikki verið tvær tær seinastu ferðirnar. Miðvallarin er ikki í dystarvenjing, og tað er Fredrikstad-liðfelagin Jóannes Bjartalíð heldur ikki. Hetta eru tó spælarar við millum annað tekniskum sereginleikum í føroyskum høpi, og eru tað teir føroyingarnir, ið til dagliga eru á hægst stigi.

Jákup Biskopstø Andreasen er framvegis skaddur. Tað er Hallur Hansson ikki. Miðvallarin, sum Håkan Ericson gjørdi til landsliðsliðformann í 2020, hevur eins og seinast sagt, at hann ikki metir tíðin er tann rætt at koma aftur á landsliðið. Hetta hevur landsliðsvenjarin staðfest fyri miðlunum nú. Hallur spælir annars fast í KÍ.

Nations League Deild C, bólkur 4

10. oktober: 
Føroyar - Armenia

13. oktober: 
Føroyar - Lettland

Støðan í bólkinum eftir tvey umfør:
1. Norðurmakedónia 4 stig 
2. Armenia 3 stig 
3. Lettland 3 stig 
4. Føroyar 1 stig

Greinin varð fyrstu ferð løgd út 30. september 2024

Brandur er nóg birgur til landsliðið

Skálvíkingurin hevur ikki spælt dyst síðani 25. august, men dugnaligi bóltspælarin hevur vant í Fredrikstad hesa vikuna og skal helst royna at gera mun sum innskiftari móti Armenia og Lettlandi

Brandur Hendriksson Olsen verður helst aftur at síggja á Tórsvølli í næstu viku (Savnsmynd: Sverri Egholm)

SkrivaÐ:

Agnar Prestá

Mánadagin kunngjørdi  Håkan Ericson hópin til UEFA Nations League dystirnar móti Armenia og Lettlandi, sum verða á Tórsvølli ávikavist hósdagin 10. og sunnudagin 13. oktober.

Í fyrstu atløgu hevði landsliðsvenjarin 23 nøvn á listanum, men samstundis boðaði hann frá, at væntandi fór ein spælari afturat at verða boðsendur seinni í vikuni. Håkan Ericson gjørdi eisini greitt, at hetta eftir ætlan fór at vera Brandur Hendriksson Olsen, sum hevur vant við fullari ferð í Fredrikstad hesa vikuna.

28-ára gamli miðvallarin hevur verið darvaður av skaða seinasta mánaðin, og hevur ikki spælt í bestu norsku deildini síðani 25. august.

Talan er tó um spælara við tekniskum sereginleikum eftir føroyskum mátistokki - og saman við Jóannesi Bjartalíð, sum eisini er aftur á landsliðnum, er Brandur Hendriksson tann føroyingurin, ið er í tí felagnum sum er á hægst stigi.

– Tað er fantastiskt at vera við aftur, og eg gleði meg til fyrstu venjingina, sum verður mánadagin. Eg havi tamarhald á skaðanum, ið hevur darvað, og kann nú venja aftur við fullari fer, so tað sær gott út

Hetta sigur sigur Brandur Hendriksson Olsen við heimasíðuna hjá FSF í kvøld.

Brandur hevur ikki verið við landsliðnum tvær tær seinastu ferðirnar. Føroyska mansliðið hevur nakað á trýsti á sær undan uppgávurnar móti Armenia og Lettlandi -  atgongumerki til dystirnar fáast í Nethandlinum.

Greinin varð fyrstu ferð løgd út 04. oktober 2024

Seinastu uppgávurnar eru á heimavølli - EB/Streymur flest spælarar við

U21: Áki Johannesen, Áki Samuelsen, Samuel Chukwudi og Poul Kallsberg eru ikki tøkir til dystirnar móti Portugal og Hvítarusslandi

Eyðun Klakstein og hansara menn skulu royna at enda væl - tað verður á pappírinum ein væl truplari uppgáva móti Portugal (Savnsmynd: Sverri Egholm)

SkrivaÐ:

Agnar Prestá

U21-landsliðið spælir eisini tveir heimadystir í oktober, og eru tað seinastu undankappingardystirnir á hesum sinni.

Føroyar hava ikki fingið stig í ár, men liggja á 4. plássi í bólkinum við seks stigum. U21-landsliðið hevur 7 stig fyri átta dystir í EM-undankappingini.

Vónirnar eru góðar at gera nakað móti Hvítarusslandi, sum Føroyar í fjør vunnu á (3-2). Fyrri dysturin móti Portugal verður tó ógvuliga harður: Hetta er eitt tað sterkast U21-liðið í Evropa, staðfesti Eyðun Klakstein.

Emil Weihe Joensen og Bergur Poulsen eru millum teir úttiknu (Savnsmynd: Sverri Egholm)

Hann og Atli Gregersen hava ikki spælarar sum Áka Johannesen, Áka Samuelsen, Poul Kallsberg og Samuel Johansen Chukwudi. Sìðstnevndi er á A-landsliðnum  hinir tríggir eru skaddir.

Tó eru nógvir spennandi spælarar tøkir til dystirnar, sum verða spældir 11. oktober og 15. oktober - í ávikavist Klaksvík og á Tórsvølli. 

U21-hópurin 

Málverjar:
Ári í Haraldstovu Petersen, KÍ
Jóannes Davidsen, EB/Streymur

Verjuspælarar
Gullbrandur Øregaard, Sandnes Ulf (Noreg)
Børge Petersen, KÍ
Ási Dam, HB
Elias Rusborg, Hvidovre IF (Danmark)
Martin Agnarsson, Aarhus Fremad (Danmark)
Bergur Poulsen, EB/Streymur
Jákup Vilhelmsen, EB/Streymur

Miðvøllur:
Noah Hans Mneney, HB
Aron Jarnskor Ellingsgaard, Víkingur
Heini Fossdalsá Sørensen, Thisted (Danmark)
Ejvind Restorff Mouritsen, HB
Beinir Nolsøe, NSÍ
Emil Weihe Joensen, EB/Streymur
Jens Erik Bruhn, EB/Streymur

Álop:
Jørgen Nielsen, Víkingur
Olaf Bárðarson, Víkingur
Gutti Dahl-Olsen, B36
Leivur Fossdal Guttesen, HB

Merkisvert er millum annað at flest spælarar (fimm) eru úr EB/Streymi, ið eisini stendur seg væl fyri tíðina. Teir flestu av hesum eru tó uppvaksnir í øðrum føroyskum feløgum

11. oktober
16: Føroyar – Portugal (Djúpumýru)

15. oktober
17: Føroyar – Hvítarussland  (Tórsvølli)

Greinin varð fyrstu ferð løgd út 30. september 2024

NSÍ kann vinna fyri triðju ferð uppá fýra ár

Víkingur er í steypafinaluni hjá kvinnum á fyrsta sinni. Eysturoyarfeløgini bresta saman á Tórsvølli klokkan 18.30 í kvøld

NSÍ lyfti steypið eftir longda leiktíð móti KÍ í fjør. At endurvinna og at vinna greipuna er nú málið í Runavík (Savnsmynd: Sverri Egholm)

SkrivaÐ:

Agnar Prestá

Lagt er upp til eina spennandi finalu í kvøld á Tórsvølli. Talan er um tí seinastu av teimum átta steypafinalunum hesa vikuna.

Steypafinalan hjá kvinnum 2024 
Leygardagin 5. oktober
18.30:  Víkingur – NSÍ 
Dómari: Andras Frederiksberg

Víkingur og NSÍ hava kappast í oddinum í ár. Tey bæði bestu kvinnuliðini í Eysturoynni hava spælt tríggjar innanhýsis dystir - seinast fyri tólv døgum síðani. Tá endaði tað 1-1, tað gjørdi tað eisini í mai, men NSÍ vann 5-2, tá liðini spældi við Løkin 18. august. 

NSÍ liggur eisini til at vinna FM, nú tvey umfør eru eftir í landskappingini, og harvið er greipan framvegis ein góður møguleiki fyri liðið hjá Allani Dybczak, sum hevur profilar sum Heidi Sevdal, Saru Samson Lamhauge, Juliu Naomi Mortensen, Mirjam Huneck, Lenu Olsen og Abigail Mensah. 

NSÍ vann 3-1 á KÍ í oddabrakinum í Betrideildini - nú skulu tær í gulum og svørtum royna at avgerða meistaraheitið (Mynd: Sverri Egholm)

Allan Dybczak, høvuðsvenjari, í steypafinaluni í fjør (Savnsmynd: Sverri Egholm) 

Í fjør eydnaðist at basa KÍ í steypafinaluni. NSÍ gjørdist fyri fyrstu ferð steypavinnari í 2021, og var í finaluni í 2020. Harvið skal liðið nú spæla fjórðu finaluna uppá fimm ár, og NSÍ kann tryggja sær triðja steypagullið uppá fýra ár.

Víkingur skal royna at forða fyri, at NSÍ endurvinnur og hevur greipumøguleikan. Liðið úr Eysturkommunu skrivar søgu við at vera umboðað í steypafinaluni hjá kvinnum fyri fyrstu ferð nakrantíð.

So er spurningurin, um gull og steyp kemur við aftur. Svenn Olsen hevur Jensu Kannuberg Tórolvsdóttir sum sín heilt stóra profil. Mona Rasmudóttir, unga Rakul Sørensen og Eydna Dalheim Olsen og royndi liðskiparin Maibritt Olsen (mamma Eydnu) eru eisini lykaspælarar. Lea Lisberg og málverjin Eyðgerð Berg (f.Mikkelsen) hava gjørt stóran mun, síðani tær komu til felagið í vetur.

Blaðunga Eydna Dalheim Olsen og Lea Lisberg í dysti móti HB (Mynd: Sverri Egholm)

Jensa Kannuberg Tórolvsdóttir er toppskjútti og stórur partur av at fáa spælið at flóta (Savnsmynd: Sverri Egholm)

Greinin varð fyrstu ferð løgd út 04. oktober 2024

NSÍ á føroyameistarakós

NSÍ-kvinnur vunnu trý týdningarmikil stig, nú bara tvey umfør eru eftir at spæla

(Mynd: Sverri Egholm)

SkrivaÐ:

Sverri Egholm

NSÍ-kvinnurnar í fótbólti eru á meistarakós eftir 3-1 sigurin móti KÍ mánakvøldið.

Undan dystinum lógu bæði liðini á einum deildum fyrsta plássi við 40 stigum, men runavíkskvinnur renna nú undan. Bara tvey umfør eru eftir at spæla.

Tað var annars Sólja Ernstsdóttir, sum við máli í 40. minutti legði KÍ-kvinnur á odda. NSÍ trýsti, og fyri hálvleik eydnaðist at fáa heili tvey mál. Mirjam Huneck skoraði fyrra málið eftir eitt horna, og seinna málið skoraði Julia Naomi Mortensen uppá brotsspark.

Í seinna hálvleiki økti Heidi Sevdal til 3-1, sum eisini gjørdist úrslitið.

Fleiri myndir frá dystinum her

Betri deildin kvinnur, FM-bólkurin
Mánadagin 30. september

NSÍ kv. - KÍ kv. 3-1 (2-1)
40' 0-1 Sólja Ernstsdóttir (Eyðvør Klakkstein)
44' 1-1 Mirjam Huneck (Heidi Sevdal)
45' 2-1 Julia Naomi Mortensen (br.)
61' 3-1 Heidi Sevdal (Sigrid Jacobsen)

HB kv. - Víkingur kv. 0-4 (0-3)
11' 0-1 Mona Rasmusdóttir br.
17' 0-2 Lea Lisberg
30' 0-3 Anna Katrina Mikkelsen (Mona Rasmusdóttir)
72' 0-4 Eydna Dalheim (Jensa Tórolvsdóttir)

Støðan

NSÍ 43 stig
KÍ 40 stig
Víkingur 40 stig
HB 27 stig

Steypafinala í kvøld

Hetta vikuskiftið verða ikki spældir dystir í Betri deildini hjá kvinnunum.

Í staðin verður finalan í steypakappingini spæld. Finaludysturin millum Víking og NSÍ verður á Tórsvølli í kvøld kl. 18.30

Greinin varð fyrstu ferð løgd út 30. september 2024

- Týdningarmikið við føroyskum fótbóltsdómarum úti í Evropa

Orðini eigur Jóhan Hendrik Ellefsen, dómari, ið saman við hjálpardómarum sínum, Dan Højgaard og Marner Forná Olsen í vikuni hevur leitt dyst í Uefa Youth League

Frá vinstru: Dan Højgaard, Jóhan Hendrik Ellefsen, Marner Forná Olsen. (Mynd: Jóhan Hendrik Ellefsen)

SkrivaÐ:

Áron Vest

Herfyri skrivaðu vit eina grein um Heina Z. Viðoy, ið skuldi leiða dyst í kappingini UEFA Youth League, ið er ein altjóða kapping fyri U19-lið. Hetta er júst sama kapping, sum omanfyrinevnda dómaratoymið skal døma.

Dysturin millum Budućnost Podgorica úr Montenegro, og Dinamo Tbilisi úr Georgia varð spældur á Gradski Stadion leikvøllinum mikudagin. Talan er um sama leikvøll, sum KÍ spældi á móti Borac Banja Luka í summar.

Heimaliðið vann dystin 4-1 og vendi sostatt 2-3 tapinum frá fyrra dystinum til samlaðan sigur og víðari luttøku. Jóhan Hendrik Ellefsen dømdi tvey brotsspark í dystinum og gav 8 gul kort harav tvey av teimum útloystu eitt reytt. 

Portalurin hevur tosað við mannin við floytuni, Jóhan Hendrik Ellefsen, undan dystinum.

- Hvør er kenslan, nú tit skulu út til altjóða uppgávu?

- Kenslan er góð, tí tað er altíð spennandi at fáa altjóða uppgávur. Hesaferð í Montenegro, sum hevur eina heilt øðrvísi fótbóltsmentan. Tá er upplivingin altíð tað størri, bæði á og uttanfyri vøllin.

Hetta er ein play-off dystur, og tann seinni í uppgerðini millum liðini bæði. Tað merkir at dysturin skal avgerast, um tað stendur á jøvnum. Fyrri dysturin endaði 3-2 til Dinamo Tbilisi.

- Hetta gevur dystinum nakað eyka, av tí at nógv er uppá spæl, leggur Jóhan Hendrik afturat.

Eitt sindur truplari fyrireiking
Tað er ongin loyna, at tann fótbóltur, ið verður spældur í UEFA Youth League, millum tvey lið úr ávikavist Montenegro og Georgia, er øðrvísi enn tann fótbóltur, vit eru von við, heima í Føroyum. Hetta ásannar Jóhan Hendrik, sum tó er stálsettur upp á góða fyrireiking.

- Vit royna altíð at seta okkum væl inn í tey liðini sum skulu spæla. Vit royna eftir besta førimuni at kanna eftir hvussu teirra fótbóltur er. Harumframt er tað týdningarmikið at venja væl og eta rætt, umframt at hvíla nógv, tá man nú er avstað, staðfestir Jóhan Hendrik.

- Tað snýr seg í størstan mun um at vera mentalt klárur, og umstilla seg til, at nú er tað ein altjóða uppgáva, sigur leggur FIFA dómarin úr Miðvági afturat.

Føroyar og altjóða døming
Føroyar hava tveir altjóða fótbóltsdómarar (eisini nevnt FIFA-dómarar í dagligari talu), umframt fýra altjóða hjálpardómarar. Jóhan Hendrik Ellefsen er ein av teimum báðum dómarunum. Hann gjørdist FIFA-dómari síðsta ár, ikki langt áðrenn Heini Z. Viðoy eisini fekk tiltikna FIFA-merkið á bringuna.

Millum hjálpardómararnar er 43 ára gamli rituvíkingurin, Dan Højgaard, sum hevur verið FIFA-hjálpardómari síðani 2015. Saman við teimum er 39 ára gamli Marner Forná Olsen, eisini úr Rituvík. Hann hevur dømt í fremstu mansdeildini í føroysku fótbólti í sjey ár, og hevur hann eisini fleiri altjóða upplivingar í skjáttuni. 

Vit skifta orð við Jóhan Hendrik um hvat tað hevur at siga, at hava altjóða fótbóltsdómarar í Føroyum.

- Tað er ótrúliga týdningarmikið. Hetta gevur føroyskum dómarum eina eksponering í Evropa, umframt serdeilis virðismiklar royndir. Royndir, sum vit kunnu taka við okkara, tá vit døma her heima.

- Tað man krevja nakað heilt serligt, at vera altjóða dómari, ella hvussu?

- Tað krevur heilt vist nakað eyka, at vera altjóða dómari. Man roynir alt hvat man kann, at vera væl fyri. Bæði fysiskt og mental. Tað vilja vit sjálvsagt gera, fyri at klára tey krøv sum UEFA setir, sigur Jóhan Hendrik við Portalin.

- Tað krevur eisini nakað eyka av okkum tí tá vit eru avstað, umboða vit Føroyar og vit vilja vera eitt so gott umboð fyri Føroyar sum gjørligt, sigur Jóhan Hendrik Ellefsen at enda.

Greinin varð fyrstu ferð løgd út 01. oktober 2024

Heim aftur við 3-0 tapi

Tað eydnaðist ikki ungu HB'arunum at venda uppgerðini móti FC Progrés Niederkorn í Luksemborg. HB er harvið úti av Youth League

(Mynd: HB / RS Media)

SkrivaÐ:

Sverri Egholm

HB er úti av UEFA Youth League á hesum sinni.

Tað er greitt eftir 3-0 tap í seinna dystinum mikukvøldið móti FC Progrés Niederkorn í Luksembrog.

Fyri tveimum vikum síðani taptu HB dreingirnir 2-1, og vónirnar vóru til staðar til at fáa eitt gott úrslit.

Luksemborgska FC Progrés legði seg á odda longu eftir seks minuttir og økti um leiðsluna við brotssparki tá góður hálvur tími var leiktur.

Í tíðini, sum dómarin legði afturat avgjørdi heimaliðið til 3-0 sum gjørdist úrslitið.

Hetta er fyrstu ferð, at føroyskt ungdómslið roynir seg í hesari kappingini.

Greinin varð fyrstu ferð løgd út 02. oktober 2024

U21: B71 sigraði eftir brotssparkskapping

Annað steypagullið á dreingja- og manssíðuni í søgu felagsins gjørdist veruleiki eftir tættan dyst móti ÍF, har nógvir áskoðarar vóru á Tórsvølli. Málverjin Wenningsted Ørvarodd bjargaði einum brotssparki og skoraði sjálvur

Sum vera man ovurhonds stórur fagnaður á teimum í gulum og bláum eftir eina spenanndi, søguliga og minniliga finalu (Mynd: Fótbóltssamband Føroya/Bjarni Enghamar)

SkrivaÐ:

Agnar Prestá

Talan gjørdist um ein góðan, spennandi og væl spældan fótbóltsdyst við nógvum áskoðarum í avbera góðum veðri, tá B71 og ÍF hóskvøldið brustu saman á Tórsvølli í finaluni um Thomas Dam Intersport steypið.

(Myndir: Fótbóltssamband Føroya/Bjarni Enghamar)

Soleiðis lýsir heimasíðan hjá Fótbóltssambandi Føroya steypafinaluna hjá U21, sum tvey av teimum ikki heilt stóru feløgunum í Føroyum spældu.

- Bæði liðini løgdu nógv fyri í strembanini eftir steypinum og gullkrónunum, men tá avtornaði vóru tað sandoyingarnir og B71, ið drógu longra stráið.

Tað vóru tó fulgfirðingarnir, ið komu á odda, tá eitt lítið korter var spælt við frálíkum máli: Vongurin Aron Kensson var staddur við brotsteigarmarkið, nakað til høgru, tá hann smekkaði bóltin upp í handara horn.

Vinstrabeinti vongurin roynir seg...

...og bólturin siglir upp í longra málhornið 

Og sum vera man stórur fagnaður á fuglfirðingum á vøllinum.... (Myndir: Fótbóltssamband Føroya/Bjarni Enghamar)

Sandoyingarnir reistust skjótt aftur, og áðrenn hálvleik javnaði Aron Frankieson Knudsen til 1-1 fyri B71. Hann er ein av spennandi ungu spælarunum, sum hevur spælt heilt fitt í 1. deild í ár.

Aron Frankiesson javnaði tó fyri steðgin... (Myndir: Fótbóltssamband Føroya/Bjarni Enghamar)

Málverjin og liðformaðurin hetjan  - søguligur sigur hjá sandoyingum

Í seinna hálvleiki og í umdystinum leikaði javnt á, men einki mál kom, og tí mátti finalan avgerast við brotsspørkum. Her var tað málverjin hjá B71, Wenningsted Ørvarodd, ið gjørdist stóra hetjan hjá sandoyingunum.

Jónathan Kjærbo hevði lagt B71 á odda í brotssparkskappingini, og síðani bjargaði liðformaðurin í málinum væl fyrsta skotinum hjá ÍF við einum "sterkum armi". Wenningsted fór sjálvur eftir bóltinum, legði hann á blettin og økti trygt.

Wenningsted Ørvarodd gjørdi bart í B71-málinum við hesari góð bjaringini í brotssparkskappingini. Hann skoraði sjálvur beint aftaná 

Pætur Nolsøe skoraði avgerandi brotssparkið (Myndir: fsf.fo/Bjarni Enghamar)

Restina av skotinum fóru sum so trygt í netið. Tað var Pætur Nolsøe, sum slapp at avgerða fyri teir í gulum og bláum, og so var stór frøi á teimum mongu B71 fjepparunum á Tórsvølli. Júst tað at nógvir mælskir fjepparar av bæði Sandoynni og úr Fuglafirði vóru til staðar, settu veruliga dám á finaluna.

Aftan á dystin var Bjarti Højbro, liðformaður hjá ÍF, kosin til besta spælara í finaluni.

Dagsins spælari Bjarti Højbro saman við Christiani Andreasen

Víst verður eisini á ta serstaka við, at júst B71 vann eitt steyp á dreingja- og manssíðuni.

- Stór frøi á teimum mongu B71 fjepparunum, ið samstundis kundu fegnast um annan steypasigurin á dreingja- og manssíðuni í søguni hjá felagnum, ið var sett á stovn tann 1. januar í 1970. Tann fyrri kom í 1993, tá B71 vann Løgmanssteypið. Á gentu- og kvinnusíðuni eiga sandoyingar tríggjar steypasigrar framman undan.

Harvið varð hetta fyrsta ungdómssteypið nakrantíð á manssíðuni hjá B71. Eitt stórt kvøld fyri sandoyingar. Nógv bendir á, at ein greipa kemur suður í ár, tí hetta U21-liðið er eisini oddalið í landskappingini. 

Richard Goffe, høvuðsvenjari - hann stendur eisini á odda fyri besta liðnum hjá B71, ið roynir at koma upp í Betrideildini 

Stórur dagur fyri sandoyingar. Eli Hentze, hjálparvenjari á A-landsliðnum, stórfegnast saman við soninum Boga Hentze, sum var á B71-miðvøllinum (Myndir: fsf.fo/Bjarni Enghamar)

Hósdagin 4.10
U21 (dreingir/menn)
B71 - ÍF 6-4 eftir brotsspørk (1-1 eftir vanliga leiktíð og longda leiktíð)
22' 0-1 Aron Kensson
40' 1-1 Aron Frankiesson

Steypavinnararnir av Sandoynni, sum nú fara eftir greipuni (Mynd: fsf.fo/Bjarni Enghamar)

Fleiri steypafinalur eru á skránni á Tórsvølli hetta vikuskiftið. Í gjárkvøldið vórðu tvær finalur spældar. U13 gentur millum B36 og 07 Vestur/MB og í minnu steypakappingini fyri kvinnur millum FC Hoyvík og Skála

Hinar finalurnar

Leygardagin kl. 10.30: U13 dreingir: B36 – Víkingur 

Leygardagin kl. 12.30: U15 dreingir: Víkingur – B36

Leygardagin kl. 15.15: U17 dreingir: KÍ – Víkingur

Leygardagin kl. 18.30: Kvinnur: Víkingur – NSÍ

Leygardagin 2. november kl. 17: Løgmanssteypið: B36 – HB

Greinin varð fyrstu ferð løgd út 04. oktober 2024

Fyrsta steypið fór til Klaksvíkar eftir brotssparkskapping

Neyðugt varð við longdari leiktíð og brotssparkskapping, tá U16-genturnar hjá KÍ og Skála ÍF byrjðu steypafinalurnar 2024 við einum braki

Skála vann Eilif Arge Steypið í fjør og var á sigurskós aftur eftir tvey mál frá Saru Benjaminsen. Men KÍ javnaði seint í vanligu leiktíðini, og var stinnari í brotssparkskappingini (Mynd: Jakoba Svensdóttir/fsf.fo)

SkrivaÐ:

Agnar Prestá

Tann fyrsta av níggju steypafinalum á Tórsvølli í 2024 varð spæld mikukvøldið tá U16 genturnar hjá KÍ og Skála ÍF dystaðust um Eilif Arge steypið. Talan gjørdist um eitt langt kvøld í góðveðrinum.

Ársins fyrsti fyrsti steypasigur til Klaksvíkar, men tað var eftir tógvið og langt stríð, og tað var heilt nær við, at tær appilsingulu endurvunnu steypakappingina frá í fjør.

Sara Benjaminsen skoraði bæði málini hjá Skála og varð vald dagsins spælari (Myndir: fsf.fo)

Dagsins leikari, Sara Benjaminsen, legði Skála á odda í 12. minutti. Tá lítil hálvur tími var spældur javnaði Rannvá Ryan. Sara var aftur upp á spæl, tá átta minuttir vóru spældir av seinna hálvleiki, tá hon sendi eitt hornaspark beinleiðis í netið.

Men tær kongabláu treiskaðust, og hetta gav úrslit ein minutt fyri leiklok, tá Elisabet Norðoy Vilhelmsen javnaði til 2-2.

Eliasabet Norðoy Vilhelmsen javnaði í síðstu løtu (Myndir: fsf.fo) 

Bæði liðini stríddust hart í tætta dystinum. Í umdystinum kom einki mál, og tí mátti steypafinalan 2024 hjá U16 gentum avgerðast við brotssparkskapping. Har vóru tær hjá KÍ heilt tryggar og vunnu 5-4.

Elisabeth Norðoy Vilhelmsen fór í mál í brotssparkskappingini og gjørdist aftur hetja, tá hon bæði skoraði eitt brotsspark sjálv og síðani bjargaði væl 

(Myndir: fsf.fo / Jakoba Svensdóttir)

Fleiri myndir frá finaluni á fsf.fo

KÍ vann eisini landskappingina hjá Gentur 16, so við sigrinum mikukvøldið kom greipan norð.

Greinin varð fyrstu ferð løgd út 03. oktober 2024

Sannførandi føroyskur sigur í seinna dystinum

Endaði 30-23 til Føroyar í Bratislava, har 13 ymiskir føroyskir málskjúttar vóru. Slovakia skal eisini til EM, ein fín føroysk uppliving, nú endaspælið nærkast

Turið Arge Samuelsen royndi seg í løtum á bakkinum (Mynd: Hondbóltssamband Føroya)

SkrivaÐ:

Agnar Prestá

Tíverri bar ikki til at síggja venjingardystin millum Føroyar og Slovakia leygardagin. Eingin stroyming var, men tað er ein sannroynd, at føroysku kvinnurnar vunnu sannførandi sigur móti einum av hinum liðunum, ið skal til EM í vetur.

Liðini spældu eisini fríggjadagin. Føroyar vóru omaná størsta partin av dystinum í Bratislava, men seinastu løtuna vóru Føroyar alt ov óhvassar og søplaðu sigurin burtur í álopsspælinum. 

Sí eisini: Tepurt tap í fyrra venjingardystinum í Slovakia

Leygardagin var betri samanlagt. Føroyar fingu heili 30 mál og vóru, sum hagtølini vísa, betri at skora upp á sínar møguleikar. Eisini vóru færri tekniskar villur. Slovakia skoraði eitt mál færri enn fríggjadagin, móti føroysku verjuni og Anniku Fríðheim Petersen, og serliga Rakul Wardum í málinum.

Tað leikaði javnt á fyrstu tjúgu minuttirnar, men Føroyar vóru ofta á odda, og fóru av álvara frá seinastu sjey minuttirnar fyri steðgin. Tann løtan endaði 7-2 til Føroyar, og tað stóð 10-15 á máltalvuni í steðginum.

Føroyar høvdu gott tamarhald á dystinum leygardagin (Myndir: HSF)

Slovakia var bert á odda 1-0 og 2-1. Tær føroysku fóru eitt sindur meira frá eftir steðgin, og tað gjørdist ongantíð veruligur spenningur um, hvør fór at vinna venjingardystin.

Sum skilst fekk føroyska liðið eiisni nógv burturúr við at royna ymiskt, og heili 13 ymiskir máslkjúttar vóru. Jana Mittún var aftur lyklaspælari og toppskjútti við fimm málum, umframt fleiri uppleggum.

Harvið ein góður fyririekingardystur til EM. Slovakia er gamaní í niðara endanum í styrki, av liðunum sum verða við har, og heimaliðið skifti eisini eitt sindur út í dag. Tó vísir sjey-máls sigurin á útivølli ávísa styrki og dygd hjá Føroyum.

Seinni venjingardystur og fyrireikingardystur til EM
Bratislava, leygardagin 28. september
Slovakia - Føroyar 23-30 (10-15)

Málskjúttar hjá Føroyum:
Jana Mittún 5
Pernille Brandenborg 4 (2)
Rannvá Olsen 4
Bjarta Osberg Johansen 3
Elsa Egholm 3
Bjørk Franksdóttir Joensen 2
Maria Pálsdóttir Nólsoy 2
Lukka Arge 2 (2)
Brynja Høj 1
Anna Elisabeth Halsdóttir Weyhe 1
Turið Arge Samuelsen 1
Karin Egholm 1
Lív Sveinbjørnsdóttir Poulsen 1

Føroysku kvinnurnar syngja tjóðsang (Mynd: HSF)

Føroyska kvinnulandsliðið savnast aftur seint í oktober. 27. november gongur leiðin til Basel - til EM.

Greinin varð fyrstu ferð løgd út 28. september 2024

Kyndil vann stórsigur á H71

Kyndlakvinnur vóru annars aftanfyri við tveimum málum í steðginum, men vunnu 44-34

Turið Arge Samuelsen var stórspælandi og skoraði 21 mál (Savnsmynd: Sverri Egholm)

SkrivaÐ:

Sverri Egholm

Ein dystur var leiktur í landskappingini hjá kvinnum í hondbólti hóskvøldið. Talan var um oddadyst, har H71 og Kyndil sum undan dystinum bæði høvdu seks stig á deildum fyrsta plássi, brustu saman.

Hoyvíkskvinnur byrjaðu annars væl, og vóru í fleiri førum á odda við tveimum málum í fyrra hálvleiki, eina løtu við trimum.

Støðan í steðginum var 19-17 til H71, men í seinna hálvleiki var tað eitt hamskift kyndilslið, sum kom á vøllin.

Eftir stutta løtu løgdu kyndilskvinnur seg á odda, og komu fram um við sjey málum aftaná bara tíggju minuttir.

Sum seinni hálvleikur leið økti Kyndil um munin, og dysturin endaði 44-34.

Turið Arge Samuelsen gjørdist toppskjútti hjá Kyndli við 21 málum. Maria Halsdóttir Weyhe gjørdist toppskjútti hjá H71 við sjey málum.

Støðan í SMS-deildini:

Kyndil 8 stig
H71 6 stig
StÍF 4 stig
VÍF 4 stig
Neistin 2 stig
EB 2 stig
Stjørnan 0 stig
VB 0 stig

Kyndil, H71 og EB hava spælt 4 dystir, StÍF, Neistin, Stjørnan og VB 3 dystir og VÍF 2 dystir

Komandi dystir

Sunnudagin kl. 14: H71 - StÍF í Hoyvíkshøllini
Sunnudagin kl. 14: Kyndil - Stjørnan í høllini á Hálsi
Sunnudagin kl. 15: VB - Neistin í høllini í Vági

Mikudagin kl. 19.30: EB - VÍF í høllini á Eiði

Støðan í Burn-deildini (menn)

Kyndil 6 stig
Neistin 5 stig
VÍF 4 stig
StÍF 4 stig
H71 4 stig
KÍF 1 stig
Team Klaksvík 0 stig

Kyndil, Neistin og Team Klaksvík hava spælt 4 dystir. Hini liðini hava spælt 3 dystir

Komandi dystir

Í dag kl. 18: KÍF - VÍF í høllini í Kollafirði

Sunnudagin kl. 16: H71 - StÍF í Hoyvíkshøllini
Sunnudagin kl. 16: Kyndil - Team Klaksvík í høllini á Hálsi

Greinin varð fyrstu ferð løgd út 03. oktober 2024

Mjølnir vann á KÍF, men tað var um eitt hár gjørt

Hotel Djurhuus-deildin (kvinnur): KÍF – Mjølnir 0-3, Dráttur – TB 0-3

 

SkrivaÐ:

Innsent

KÍF – Mjølnir 0-3 (24-26, 26-28, 22-25)

Í øllum trimum settunum legði Mjølnir bragdliga fyri og legði seg á odda við nógvum stigum, men hvørja ferð kom KÍF afturíaftur - tó til fánýtis, tí tá settini skuldi avgerast, var Mjølnir kortini omaná.

Í fyrsta setti legði Mjølnir seg á odda 5-1 og 11-6, men KÍF javnaði til 12-12. Mjølnir tók leibrá, men tað hjálpti ikki, tí KÍF fór framum 16-13. Mjølnir tók aftur leikbrá, men KÍF helt á at vinna og legði seg á odda 22-19. Tá kom vend í, og Mjølnir javnaði til 22-22. Nú tók KÍF so leikbrá, og tað hjálpti í fyrsta umfari, tí KÍF fór framum 23-22. Men gleðin var stokkut, tí Mjølnir javnaði aftur og vann settið 26-24 við sínum øðrum settbólti eftir væl plaserað lobb frá Nicolu Toftegaard, sum fangaði kollfirðingarnar á hælinum.

Annað sett var meinlíkt tí fyrsta. Mjølnir legði seg á odda 10-6 og 19-13, men KÍF javnaði til 23-23 og yvirlivdi eisini tríggjar settbóltar, áðrenn Mjølnir gjørdi sær dælt av tí fjórða og vann settið 28-26. Seinasta duellin var rættiliga long, og tær hjá Mjølni fingu hegnisliga nógvar bóltar uppaftur, sum sóu taptir út, men til síðst vann Mjølnir avgerandi stigið, tá KÍF var dømt fyri at hava verið í netinum.

Í triðja setti tóktisk dysturin avgjørdur, tá Mjølnir streyk framum 12-5 og 16-10, men enn einaferð megnaði KÍF at javna, tá Mjølnir ikki fekk bilbugt við smassjinum frá Elsu Samuelsen, so støðan gjørdist 18-18. KÍF kom í gylta støðu, tá støðan gjørdist, 22-19, men endin gjørdist tó snópisligur fyri kollfirðingar, tí Mjølnir vann næstu seks stigini og settið 25-22.

Dráttur – TB 0-3 (14-25, 12-25, 16-25)
Á Giljanesi hevði TB, sum hevði argentinsku Adrianu Pereyra við aftur, lætt spæl ímóti greipuvinnarunum úr Drátti, sum ikki er sama lið í ár sum seinasta kappingarár. Triðja settið var tað frægasta hjá Drátti, men tað kundi havt endað sum tað ringasta, tá ið TB vann sjey stig á rað og gjørdi tað til 15-6, men seks stig á rað frá Drátti pyntaðu væl um.

Í Hotel Djurhuus-deildini hava SÍ, Fleyr, Mjølnir og TB nú 3 stig, meðan KÍF og Dráttur onki stig hava fingið enn. TB og Dráttur fyri tveir dystir - hini hava bert spælt ein dyst.

Greinin varð fyrstu ferð løgd út 29. september 2024

Fleyr vann á ÍF í fyrsta fimmsettaranum í Polestar-deildini

Polestar-deildin (menn): ÍF - Fleyr 2-3, Ternan - Mjølnir 0-3

(Savnsmynd: Fleyr)

SkrivaÐ:

Innsent

ÍF - Fleyr 2-3 (23-25, 25-19, 22-25, 25-21, 8-15)

Eftir at liðini høvdu skiftst um at verið á odda til 23-23 í fyrsta setti, vann Fleyr teir tveir avgerandi bóltarnar; fyrst smassjaði Rasmus Potts í blokkin og út, og síðani sló ÍF sítt smassj út av vøllinum.

Við seks stigum á rað frá 9-9 til 15-9 legði ÍF grundina fyri sigurin í øðrum setti, men í triðja setti skiftust liðini aftur um at vera á odda. ÍF legði seg framum 22-21, men so vann Fleyr rest og settið 25-22.

Í fjórða setti fekk ÍF fína byrjan og legði seg á odda 11-6, og hóast Fleyr togaði nakað innaftur og minkaði um munin til 21-23 við fimm bóltum á rað, gjørdist tað ikki veruliga spennandi, tí Hákun Nón smassjaði í blokkin og út, so ÍF vann settið 25-21, og so var javnbrótari á skránni.

Í javnbrótaranum lá Fleyr fyrstu løtuna á odda við einum og tveimum, men eftir at ÍF minkaði um munin til 8-9, vann Fleyr tað sum eftir var - seks stig á rað - og javnbrótaran 15-8.

Ternan - Mjølnir 0-3 (11-25, 18-25, 20-25)
Tað fór altíð at vera stórur munur ímillum meistararnar úr Klaksvík - eisini uttan kanadiararnar, sum ikki hava fingið loyvini enn - og unglingarnar í Ternuni, men á Toftum síggja tey hóast alt tað positiva í at javna til 13-13 í triðja setti, og at vera við í settinum til 20-22, tá Mjølnir so vann tey írestandi stigini, sum tryggjaðu settið 25-20. Eisini 18-21 í øðrum setti, áðrenn Mjølnir vann 25-18, er góðtikið á Toftum.

Greinin varð fyrstu ferð løgd út 30. september 2024

U17 gentulandsliðið í flogbólti er úttikið

Skal luttaka í CEV-NEVZA kapping 14. til 16. oktober í Ikast í Danmark

 

SkrivaÐ:

Tíðindaskriv

LandsliðsvenjararnirHelen á Lakjuni og Mateusz Pazgan hava úttikið 12 gentur til U17 gentulandsliðið í flogbólti. Landsliðið fer hin 13. oktober til Ikast í Danmark, har tær skulu luttaka í árligu CEV-NEVZA kappingini.

NEVZA er norðuratlantiska økið í CEV har Ísland, Føroyar, Finnland, Svøríki, Noreg, Danmark og Ongland luttaka. 

Tað er enn ikki heilt greitt, hvat av hesum londunum Føroyar koma í innleiðandi bólk við.

Venjararnir hava úttikið hesar genturnar: Aftarst frá vinstru: Arina Joensen, Maia Jóhansdóttir á Lakjuni, Saranja Mouritsen, Miriam Karlsdóttir Johannesen, Nomi Idarsdóttir Beck og Marie Teresa Vitalis. 

Fremst frá vinstru: Sofía Edvinsdóttir, Osla Johannesen, Eva Kallsberg Jacobsen og Marjum á Mýrini.

Harumframt eru úttiknar Ása Thorkildshøj og Ranja Jóhannesdóttir Magnussen. 

Greinin varð fyrstu ferð løgd út 01. oktober 2024

Flogbóltur: U17 dreingir til NEVZA kappingina

U17 dreingjalandsliðið í flogbólti skal eins og genturnar luttaka í CEV-NEVZA kapping í Danmark í døgunum fra 14. til 16. oktober.

 

SkrivaÐ:

Tíðindaskriv

Venjararnir Vukasin Nedeljkovic og Mattias Nolsøe Isaksen hava úttikið 12 dreingir til kappingina í Ikast í Danmark.

Útriknu leikararnir eru hesir: Aftarst frá vinstru: Hans Jacob Gaard Petersen, Micah Lukama, Óli Kluftá Hvítklett, Hákun Nón og Róar í Haraldstovu

Frammanfyri frá vinstru: Brandur Edvard Olsen, Jóhannes Johansen, Ingolf Olsen og Jóhan Kass Henriksen.

Harafturat eru Lukas Poulsen, Rani Ákason og Matheo Eystberg úttiknir. 

Saman við gentunum fer ferðalagið til Danmark hin 13. oktober og er aftur í Føroyum 17. oktober.

Greinin varð fyrstu ferð løgd út 01. oktober 2024

Nevndin í Róðrarsambandinum er nú fullmannað

Petur Hansen tekur við sum formaður, og sterki rógvarin Vár Guriardóttir Hansen er nýggj næstforkvinna. Frá at vera fýra í nevndini eru nú seks fólk, umframt tveir eykalimir

Tað gekst ógvuliga striltið at fáa fólk at stilla upp til nevndina í Róðrarsambandi Føroya, men eftir eykaaðrlfundin sær heilt gott út (Mynd: rsf.fo)

SkrivaÐ:

Agnar Prestá

Tað gekst ógvuliga striltið at fáa fólk at stilla upp til nevndina í Róðrarsambandi Føroya, men eftir innslag í ítróttarsendingini 3-2 í síðstu viku, brast fyri nev.

Frá tí at ivamál var um nevndin fór at liva upp til viðtøkurnar og frá at vera fýra í nevndini í nøkur ár, eru nú seks fólk, umframt tveir eykalimir, í Róðrarsambandinum.

Eykaaðalfundur varð hildin í vikuni í Róðrarsambandi Føroya, har val av nevndarlimum var einasta evnið á skránni.

Trý av teimum fýra fólkunum, ið vóru í nevndini, stillaðu ikki uppaftur. Annika Dalsgarð hevur verið forkvinna seinastu átta árini, men hon stillaði ikki uppaftur. Tað gjørdi næstforkvinnan Elsa Magnussen og Hugo Skorastein heldur ikki.

Vár Guriardóttir Hansen 

Tað eru nú greitt, at Petur Hansen tekur við formannsessinum. Rituvíkingurin hevur verið í nevndini síðstu tíðina og millum annað havt nógv við inniróður at gera. Har hevur Vár Guriardóttir Hansen veruliga gjørt um seg, og havnarkvinnan er nú næstforkvinna í RSF. 

- Ein verandi nevndarlimur stillaði upp til formanssessin, meðan eitt nýtt valevni stillaði upp til næstformannssessin. Bæði vórðu einmalt vald av teimum 19 feløgunum, sum høvdu valrætt á fundinum.

Umframt Petur og Vár eru Mira Winther Klit, Rebekka Jacobsen, Henrik Rahbek, Unn Eldevig Petersen nú í nevndini. Jógvan S. Midjord og Elias Zachariassen erueykalimir

Við hesum er nevndin aftur fullmannað, og Róðrarsambandið heldur fram við nýggjum kreftum í nevndini.

- Samstundis vilja vit  nýta høvið at takka fráfarandi nevndarlimum fyri teirra frívilliga íkast til tjóðarítróttina. Arbeiðið hjá sambandinum hevur verið í rúkandi menning seinastu árini, og tað sæst aftur í vaksandi áhuganum hjá okkara ungdómi at luttaka í kapp- og inniróðri, skrivar Róðrarsamband Føroya á heimasíðu sínari.

Greinin varð fyrstu ferð løgd út 02. oktober 2024

Rógvi Kárason í stórformi

Var næstskjótastur í HCA marathon í Odense farna vikuskiftið - næstbesta marathontíðin hjá føroyingi nakrantíð

 

SkrivaÐ:

Ingi Samuelsen

Sunnudagin var HCA marathon runnið, og tað gekk fyri seg í føðibýnum hjá mæta, danska skaldinum, H.C. Andersen, Odense.

Marathonrutan verður søgd at vera tann skjótasta rutan í Danmark, møguliga eisini heimsins skjótasta, og fleiri ferðir hava føroyingar luttikið har. Hetta er samstundis kapping um Danmarksmeistaraheitið í marathon.

Ein av bestu rennarunum í Føroyum, Rógvi Kárason, var við í kappingini í ár.

Hann rann væl og javnt allan túrin, og kom á mál sum nummar tvey!

Tíðin hjá Rógva var næstbesta tíðin nakar føroyingur hevur runnið, og er sostatt eisini besta tíð hansara. Hann rann so væl, at ½ marathontíðin var undir Oyggjaleikakravinum, men um tað kann brúkast til Oyl 2025, vita vit í skrivandi stund ikki.

Gamalt met

Tíðin var 2.32.09, og nú er Rógvi nær við føroyska metinum. Tað er bara ein spurningur um tíð, nær tað verður, skrivar ítróttafelagið Bragdið.

Fyri ikki so langari tíð síðani, var Rógvi skurðviðgjørdur í hjartanum og úrslitið í Odense vísir, at hann er komin væl fyri seg.

Føroyska metið í marathon ljóðar upp á 2:27,53, og er eftirhondini 36 ára gamalt, og millum elstu metini, sum eru sett í frælsum ítróttum. Mæti rennarin, Absalon Hansen setti tað í Hamburg í Týsklandi í apríl 1988. 

Greinin varð fyrstu ferð løgd út 01. oktober 2024

Góð veteran úrslit í judo

Búgvi Poulsen vann gull, Petur Sigurð Johannesen bronsu og Jógvan Páll Kristiansen bronsu

Búgvi Poulsen, t.v. og Petur Sigurð Johannesen

SkrivaÐ:

Tíðindaskriv

Búgvi Poulsen og Petur Sigurð Johannesen hava luttikið í European Veterans Cup í Hamburg, og Jógvan Páll Kristiansen hevur luttikið í altjóða senior judokapping í Veendam í Niðurlondum.

Búgvi luttók í bólkinum M5 (menn 50-55 ár) í vetktbólkinum -81 kilo, og tað gekk so mikið væl, at hann vann gull, so ”Tú alfagra land mítt” rungaði í stóur judohøllini.

Petur Sigurð luttók í bólkinum M3 (menn 40-45 ár) í vektbólkinum -100 kilo. Eisini hann kom í finaluna, men har gjørdist hann ov stuttur móti einum Georgia, sum plagar at vinna sínar kappingar, og harvið endaði Petur Sigurð á einum 2. plássi við silvurheiðursmerkinum.

Jógvan Páll Kristiansen luttók í sínari kapping í bólkinum í vektbólkinum -73. Hetta var eisini ein sterk kapping, har tað eydnaðist Jógvani Páll at vinna bronsumerkið.

Næsta altjóða kapping hjá veteranum er HM, sum verður í Las Vegas um ein mánað, har Búgvi Poulsen (M5 – 81 kg.), Jógvan Páll Kristiansen (M2 -73 kg.) og Jóhannes við Streym Hansen (M2 -73 kg.) fara at luttaka. 

Jógvan Páll Kristiansen

Greinin varð fyrstu ferð løgd út 01. oktober 2024

Fleiri føroyingar vunnu gull í Valby

Fleiri føroyskir landsliðsspælarar í badminton, sum eru búsitandi í Danmark, gjørdu bart í stórari kapping um vikuskiftið

Føroyingar fóru avstað við gullheiðursmerkjunum í øllum finalunum í A-bólkinum (Mynd: Badmintonssamband Føroya)

SkrivaÐ:

Agnar Prestá

Um vikuskiftið luttóku fleiri av føroysku landsliðsleikarunum í badminton í kapping í tvímansleiki í Valby. 

Felags fyri Miriam í Grótinum, Rúna Øster, Magnus Dal-Christiansen, Jónasi Djurhuus og Árant á Mýruni er, at tey eru búsitandi í Danmark.

Badmintonssambandið skrivar, at hetta gekst bara heilt væl, tí føroyingar fóru avstað við gullheiðursmerkjunum í øllum finalunum í A-bólkinum.

Í blandaðum tvímansleiki vunnu Miriam í Grótinum og Rúni Øster. Miriam í Grótinum vann eisini finaluna í tvímansleiki hjá kvinnum - hetta saman við donsku Thea Sisse Rink.

Magnus Dal-Christiansen og Rúni Øster vunnu í tvímansleiki hjá monnum vunnu. Í hálvfinaluni har møttu Magnus og Rúni sínum landsliðsfeløgum Jónas Djurhuus og Árant á Mýruni, har dystarmyndin niðanfyri er frá.

Greinin varð fyrstu ferð løgd út 02. oktober 2024

Skulu boksa altjóða kapping í Hillerød

Teitur Annand Berg, David Kunoy og Karstin Ljósstein umboða Torshavn Boksing í HSK Cup 11 til 13. oktober

 

SkrivaÐ:

Tíðindaskriv

Tríggir av bestu nevaleikarunum hjá Tórshavn Boksing, fara í næstum til Danmarkar at vera við í stóru altjóða boksikappingini HSK Cup í Hillerød, sum verður hildin í døgunum 11. til 13. oktober.

Við á hesi stevnuni eru boksarar úr ikki færri enn 520 boksarar meldaðir til úr 14 ymiskum londum.

Við úr Føroyum verða David Kunoy, Teitur Annand Berg og Karstin Ljósstein.

David boksar í weltervekt-flokkinum millum 63,5 og 67 kilo. Teitur boksar í lættvekt millum 57 og 60 kilo og Karstin boksar í lætt veltervekt, sum er 60 til 63,5 kilo.

David og Teitur eru elitu-boksarar og boksa tí uttan hjálm, meðan Karstin boksar U19 við hjálmi.

Allir tríggir eru teir í góðari venjing og menning í løtuni, og tað eru væntanir um at teir kunnu fáa góð úrslit í kappingini. Um tað verður til heiðursmerki, kann bara tíðin vísa.

Í fjør vóru tveir av boksarunum hjá Tórshavn Boksing við í hesi kappingini, og teir komu báðir heim við heiðursmerkjum. David Kunoy fekk gull við at vinna finaluna móti einum belgiara, meðan Andreas Dam Poulsen tapti sína finalu móti einum úr Niðurlondum, og kom sostatt heim við silvurheiðursmerki. 

Greinin varð fyrstu ferð løgd út 01. oktober 2024

EM í dart: Allir fýra komu í topp 64

Hetta var góðkent úrslit, tí einans Skotland og Niðurlond megnaðu hetta, skrivar Dartsamband Føroya

Jan Erik Fjallstein, Remy Gaardlykke, Jan MacIntosh, og Uni Árting luttóku í EM í dart. Jens Albert Simonsen er venjari (Mynd: Dartsamband Føroya)

SkrivaÐ:

Tíðindaskriv

Farna fríggjadag var síðsti leikdagurinl í EM-kappingini í Dart í Slovakia, og her var kappast í einmansleiki.

Hvørt av teimum 40 londunum hevur fýra leikarar, so 160 mans vóru við í kappingini.

Einmansleikur verður spældur sum cup frá byrjan. Bara Jan Erik Fjallstein skuldi spæla í fyrsta umfari, hinir tríggir komu beinleiðis inn í annað umfar.

Jan Erik spældi móti sponskum leikara, og kom afturum 0-1, men hevði síðan munin og vann fýra sett á rað og dystin 4-1.

Í øðrum umfari hitti Jan Erik leikara úr Sveis. Teir fylgdust til 2-2, men síðan setti Jan Erik eitt gear upp, og vann síðstu tvey settini trygt og dystin 4-2.

Remy Gaardlykke hevði í sínum fyrsta dysti mótstøðumann úr Luksemborg. Remy hevði eina øgiliga trilvandi byrjan, og kom skjótt aftur um 0-2. Fekk við tógvið stríð minkað um munin til 1-2, áðrenn maðurin úr Luksemborg aftur økti til 1-3. Men við trimum góðum settum gjørdi Remy eitt comeback og vann 4-3.

Jan MacIntosh skuldi spæla sín fyrsta dyst á pallinum har tað bleiv stroymt. Jan tyktiskt meira ávirkaður av umstøðunum enn rumenski mótstøðumaðurin, tí rumenin var mest sum øll settini fyrr niður á steinging. Men tá rumenin ikki rakti doublarnar, so var Jan eirindaleysur við sínum steingingarnar og tí vann Jan 4-1.

Uni Árting var síðsti føroyingurin at sleppa í gongd. Hetta var í dysti móti leikara av Jersey. Teir skiftust um at vinna settini, har teir høvdu útlegg inntil 3-3. Í síðsta setti átti Jersey-leikarin útlegg, og var nógv fyrr niður á steinging, men so komu nervar uppí og Uni tók av, tá hann fekk møguleikan og vann 4-3.

Nú vóru allir fýra føroysku leikararnir komnir í topp 64 og lagið á monnum var gott, tí umframt Føroyar høvdu einans Skotland og Niðurlond megnað at fingið allar fýra leikararnar so langt.

Men jú longri mann kemur, jú harðari verður mótstøðan. Jan Erik og Remy fingu báðir írskan mótstøðumann. Hvørki Remy ella Jan Erik funnu tað góða spælið fram, og írarnir vunnu greiðar sigrar í báðum dystunum.

Løtu seinni vóru tað Jan og Uni, ið skuldu royna seg, báðir móti leikara úr Grikkalandi. Á pappírinum eitt sindur veikari mótstøðumenn ein teir írsku. Uni kom beinanvegin afturum 0-2, megnaði við tógvið stríð at hanga í koma uppá 2-3, men so var aftur galið og grikkin vann 4-2.

Jan megnaði at vinna fyrsta sett, men síðan bar alt til hjá grikkanum og við settum uppá 15, 17, 13 legði hann seg á odda 3-1. Jan minkaði um munin við góðum setti, men enn eitt sett uppá 15 pílar frá grikkanum gjørdi, at Jan tapti 2-4, og harvið vóru allir føroysku leikararnir slignir út í sama umfari.

Heildarkenslan fyri henda dagin var góð, tí at fáa allar leikararnir í topp 64 var sum sagt nakað, ið øgiliga fá lond megnaðu. Og tá hugsað verður um, at lond sum Spania, Ongland, Danmark og Týskland bert megnaðu at fáa ein leikara so langt, sum allir okkara menn komu, so má dagurin í einmansleiki metast sum góðkent avrik.

Samanlagt endað Føroyar á einum 24. plássi. Hetta kundi verið betri og tað var serliga dagurin í tvímansleiki, har vit einki stig fingu til samlaða roknskapin, sum kostaði. Eisini vóru møguleikar at hála nøkur eyka stig inn í liðkappingini, men í dart eru marginalarnir smáir, og teir vóru ikki við okkum allar dagarnar.

Greinin varð fyrstu ferð løgd út 28. september 2024

Bjarni rullaði billardárið í gongd

Billardveteranurin av Tvøroyri, Bjarni Thomsen, setti bæði Tvøroyri og føroyskt billard í fokus, tá hann vann fyrstu millumfelags kappingina, Lions Cup Suðuroy, í nýggja billardárinum

Bjarni Thomsen av Tvøroyri feldi flest keylur á fyrstu stóru billardkappingini í ár (Myndir: Jan Müller)

SkrivaÐ:

Jan Müller

Tað varð mikil rómur í snotuligu og rúmligu hølunum hjá Tvøroyrar Billardfelag farna vikuskiftið, tá tað eydnaðist spælarum av Tvøroyri at vinna bæði gull og silvur í hesi fyrstu millumfelags kappingini í nýggja kappingarárinum.

Bjarni Thomsen, sum má sigast at vera ein av gomlu veteranunum í føroyskum billard yvirhøvur, tók øll á bóli, tá hann ruddaði borðini eitt fyri og annað eftir og setti beina kós í finaluna í kappingini. Har vann hann á Hugin Albinus, sum er ein av teimum  komandi stjørnunum  í føroyskum billlard.

Í kappingini um triðja plássið eydnaðist tað enn einum veterani í føroyskum billard, Jan Müller at vinna á Óskari Eiríkssyni. Tað eydnaðist eisini Jan at fáa besta einstaka umfarið í kappingini uppá 98 eygu.

Hetta var fimtu ferð, at spælt varð um Lions steypið. Fyrsta árið vann Óskar Eiríksson, síðani Bjarni Thomsen og Jákup Molsøe, og seinasta ár vann Jan Müller hesa vanligu fyrstu kappingina í billardárinum millum spælarar úr øllum landinum.

Hesaferð noyddist Jan so at handa steypið víðari til suðringin, sum enn einaferð hevur tryggjað heimstaðnum stóra steypið. Eftir dystarlok handaði formaðurin í Tvøroyrar Billardfelag og verandi FM meistari, Páll Heri Noløse, vinnarunum steyp.

Lions Cup Suðuroy kappingin er millum teir spælarar í landinum, sum hava eitt meðal uppá í mesta lagi 15 eygu. Tvs. at hetta eru fyri tað mesta spælarar i 2. og 3 deild. Hesaferð vóru 10 spælarar av Tvøroryri og Havn við.

Nú henda kappingin er lokin verður so av álvara lagt upp til ta heilt stóru upphitingina til sjálva FM kappingina. Talan er um Haldor Holm Cup, ið verður leikt á hvørjum ári í Klaksvík og har landsins fremstu spælarar dystast um at fáa sítt navn á tað risastóra steypið til minnis um ein av eldsálunum aftanfyri føroyskt billard, Haldor Holm, sála.

Tá fara vit helst at síggja bestu spælararnar í landinum við verandi og farnum FM meistarunum so sum Páll Hera Nolsøe, Ólavi Kjølbro, Kristian Suna Høgnesen, Halli Joensen og øðrum á odda. Tann kappingin verður 12. oktober, og stutt eftir hana byrjar so FM kappingin fyri lið

Hugaligt var at síggja enn ein av gomlu veteranunum í billard, Tórða Holm við sínum sera neyva og framúr góða kúlueygað aftur við borðið. Hann hevur latið køina standa seinastu nærum 30 árini. Nú er líkt til, at hann verður aftur at síggja við billardborðini kring landið. Ein styrkur fyri føroyskt billard (Myndir: Jan Müller)

Greinin varð fyrstu ferð løgd út 30. september 2024