Føroyar á EM-sigursferð við kós móti Oslo

Tað er ikki hent fyrr, at eitt føroyskt lið hevur vunnið sín bólk í eini stórari undankapping

Ísak Vedelsbøl (Myndir: Sverri Egholm)

SkrivaÐ:

Ingi Samuelsen

Føroyar spældi uttan málmann í álopinum gjøgnum allan dystin móti Ukraina sunnukvøldið. Tað kostaði nøkur løtt mál til Ukraina, men kortini riggaði tað. Tað riggar, tí vit eiga ein leikara, sum eitur Elias Ellefsen á Skipagøtu, og hann er millum nakrar av heimsins bestu at stýra álopinum í júst slíkum spæli.

Aftur og aftur fann hann genialar loysnir fram. Fekk hann ikki sjálvur pláss at gera eina skotroynd, so fann hann sum oftast altíð altíð ein viðspælara, sum stóð fríur.

Í baksýni var føroyski sigurin ongantíð í vanda. Tað tók heldur langa tíð at koma fram um við tryggari leiðslu, men tað lá líka sum í luftini, at tað nokk skuldi koma.

Ikki fyri at siga nakað ringt um ukrainska spælið, men tað var sum um, at teir ikki høvdu sama hugflogið til at finna fram tær snildu loysnirnar.

Tað megnaðu føroyingarnir, og eftir at seinni hálvleikur var hálvrunnin, so gjørdist dysturin ein sigursferð hjá føroyska liðinum.

Vit hava tað við at telja málini og málskorararnar, men dysturin verður ikki vunnin uttan so, at vit eisini standa stinnir í hinum endanum. Og í so máta var dysturin við Tjarnir sunnukvøldið ein frægd at síggja.

Pauli Jacobsen í málinum tók teir bóltarnar hann skuldi og so tað sindri, sum skuldi til afturat. Og miðverjan stóð manniliga. Menn sum Vilhelm Poulsen, Teis Horn Rasmussen, Pætur Mikkjalsson, Ísak Vedelsbøll og Tróndur Mikkelsen stóðu sum risar í verjuni, eisini teir, sum eru høvdið minni enn mótstøðumenninir.

Eftir eina varðisliga leiðslu á 15-13 í hálvleikinum runnu føroyingarnir undan ukreinunum í øðrum hálvleiki.

Og móti endanum av dystinum var leiðslan so trygg, at Peter Bredsdorff Larsen, loyvdi teimum leikarum, sum annars ikki fáa so nógvar minuttir, framat – Allan Norðberg, Bjarni í Selvindi, Rói Ellefsen á Skipagøtu, Pauli Mittún og Rói Berg Hansen. Hugaligt at síggja teir eisini.

Úrslitið av dystinum gjørdist 35-27, ein tryggur átta-máls-sigur. Og generalurin – herovastin – Elias Ellefsen á Skipagøtu varð uppiborið kosin til dagsins besta leikara.

Sí allar myndirnar her

Níggju leikarar vóru við til at tryggja Føroyum tey  35 málini í kvøld:

Elias Ellefsen á Skipagøtu 9 mál
Óli Mittún 6 mál
Hákun West av Teigum 5 mál
Teis Horn Rasmussen 5 mál
Leivur Mortensen 2 mál
Vilhelm Poulsen 2 mál
Ísak Vedelsbøl 2 mál
Rói Ellefsen á Skipagøtu 2 mál
Bjarni í Selvindi 1 mál
Rói Berg Hansen 1 mál

Føroyski málverjin og liðformaðurin gjørdi sítt við 10 bjargingum uppá 33 skot. Pauli Jacobsen bjargaði 30 prosent av skotunum - sumt var stórbjargingar og í undirtali.

Aleksandar “Sasha” Lacok bjargaði eisini einum skoti í dystinum.

Niðurlond vunnu eisini sín dyst á heimavølli sunnudagin. 34-29 móti Kosovo.

Sostatt gjørdist úrslitið av EM undankappingarbólki 6 hetta:

Føroyar 9 stig
Niðurlond 7 stig
Ukraina 4 stig
Kosovo

Tey fýra stigini hjá Ukraina vóru nóg mikið til at teir eisini koma við til EM-kappingina í januar.

Sí videosamrøðurnar eftir dystin:

Føðingardagsbarnið hevur nógv at fegnast um

Metingar við Mittún-brøðrunum í meldrinum

Ísak: - Hetta er stórt og nakað serligt at vera við til 

Greinin varð fyrstu ferð løgd út 11. mai 2025

Elias gandaði við Tjarnir - nógvir vóru ógvuliga kaldir

Nummar 71 varð dagsins spælari, toppskjútti og legði upp til flest mál - samanlagt 16. Yngsta systkinabarn hansara var eisini eyðsýndur, meðan Teis Horn Rasmussen og Hákun West av Teigum vóru 100 prosent í skotum

Elias Ellefsen á Skipagøtu var við at skapa eitt "show" við Tjarnir sunnukvøldið. Hann sjórnaði føroyska spælinum væl - serliga í 2. hálvleiki (Mynd: Sverri Egholm)

SkrivaÐ:

Agnar Prestá

Tað var eitt sterkt liðavrik, sum tryggjaði Føroyum 1. plássið í undankappingarbólkinum.

Í seinastu dystunum er tað týðiligt, at føroyska liðið hevur ment seg nógv á summum økjum - millum annað í verjustøðu og við tí sinnisliga.

Álopsspælið koyrir framhaldandi við góðari góðsku, og í dag gagnnýttu føroyingar beint yvir tríggjar fjórðingar av sínum skotum: 35 mál uppá 46 skot er ógvuliga gott og gevur 76 prosent - hetta eru heili 14 prosent betri enn talið hjá Ukraina.

Eftir steðgin var talan um 80 prosent hjá Føroyum. Liðið hjá Peter Bredsdorff skoraði 20 mál, og tá føru Føroyar eisini ordiliga frá Ukraina.

Elias Elelfsen á Skipagøtu skoraði flest mál (9). Føroyski spælskiparin brendi tvey skot, men tað seinna burdi verið brotskast. Serliga í 2. hálvleiki var Elias framúrskarandi. Kiel-spælarin flutti bóltin so at siga lýtaleyst og skoraði síni mál. Hann legði eisini upp til flest mál - EHF sigur fimm upplegg, men okkara hagtøl siga sjey.

Elias Ellefsen á Skipagøtu buldar ein bólt í netið hjá Ukraina. Hann skoraði uppá øll síni skot eftir steðgin (Mynd: Sverri Egholm)

Mynd: Sverri Egholm

Elias Ellefsen á Skipagøtu varð valdur til dagsins spælara hjá Føroyum. Hansara "tættasti" makkari, Óli Mittún, kom, eftir eina eitt sindur trilvandi byrjan av álvara í gongd. Óli skoraði seks av sjey og legði upp til fýra mál fyri Føroyar. Tað er ógvuliga torført at steðga systkinabørnunum, og tíbetur skulu føroyingar ikki hugsa um tað.

Ukraina stongdi fyri Hákuni West av Teigum í 2. hálvleiki, og tað er ein góð orsøk til tess: Hákun var púra kaldur og lýtaleysur. Füchse Berlin-spælarin skoraði upp á øll síni fimm skot, og tað var líkamikið, hvussu spískt tað var. Hann legði eisini upp til ein flúgvara hjá Eliasi í 2. hálvleiki.

Teis Horn Rasmussen var eitt veruligt beist í verjuni, og ein marra fyri Ukraina í hinum endanum. Tvær ferðir vann nummar 79 eisini bóltin og fór buldrandi allan vegin sjálur - serliga ta seinna málið av hesum var flott. Teis hevði, eins og Hákun, fimm skot og skoraði fimm mál. 

Eitt øðiligt avrik hjá Teis (Mynd: Sverri Egholm)

Hákun West av Teigum slapp ikki at skjóta eftir steðgin, men tað er tí, at nummar 17 skoraði uppá alt í 1. hálvleiki (Mynd: Sverri Egholm)

Aðrir bjóðaðu inn: Millum annað Bjarni í Selvindi við einum flottum máli í 1. hálvleiki, Vilhelm Poulsen brendi fyri steðgin men skoraði uppá síni skot í 2. hálvleiki, og so var ógvuliga stuttligt at síggja Róa Ellefsen á Skipagøtu koma inn á vøllin - fyri fyrstu ferð í undankappingini - og skora tvey goð mál, umframt Róa Berg Hansen seta føroyskt punktum.

Greinin varð fyrstu ferð løgd út 11. mai 2025

Føroyar fingu eitt fínt EM-lutakast

Skulu spæla móti Slovenia, Sveis og Montenegro í Oslo í døgunum 16. til 20. januar

Elias Ellefsen á Skipagøtu og hinir skulu aftur hitta Slovenia í einum EM-endaspæli. Hesaferð vóru slovenar í ovasta styrkisbólki - í 2024 vann Slovenia 32-29 á Føroyum í Berlin (Mynd: Sverri Egholm)

SkrivaÐ:

Agnar Prestá

Slovenia úr ovasta styrkisbólki, Montenegro úr triðja styrkibólki og Sveis úr niðasta styrkisbólki.

Hetta gjørdist úrslitið av lutakastinum um bólkabýti í EM-endaspælinum 2026 hjá monnum.

Tað var greitt áðrenn, at Føroyar skulu til Oslo at spæla, og at vit harvið sluppu undan fleiri stórum hondbóltstjóðum. Á kvøldinum sluppu vit undan verandi evropameistarunum: Frakland endaði í hinum bólkinum í Oslo, har Noreg, Kekkia og Ukraina eru við.

Ístaðin endaðu Føroyar aftur við Slovenia í sínum EM-bólki. Í 2024 eydnaðist at spæla við móti slovenum; tað endaði 32-29 til Slovenia í Berlin. Hetta var helst frægasti møguleikin úr ovasta styrkisbólkinum.

Teis Horn Rasmussen hevur her lagt Føroyar á odda í Berlin í 2. hálvleiki móti Slovenia (Mynd: Sverri Egholm)

Tá var verri úr niðasta bólkinum. Einki Ukraina, Georgia og ei heldur Italia; men Sveis sum afturat Serbia helst var sterkast av teimum úr potti 4. Hetta ger bólkin á pappírinum uppaftur tættari.

Montengro úr styrkisbólki trý var helst ikki so galið. Føroyar fingu í 2018 javnleik í Montenegro í sínum fyrsta dysti aftur í einari EM-undankapping.

Tvey lið koma víðari úr hvørjum bólki

Greinin varð fyrstu ferð løgd út 15. mai 2025

- Við sterkari áskoðarafjøld í rygginum hava vit møguleikar

Tróndur Mikkelsen er tó greiður yvir, at EM-bólkurin er torførur. - Summi vænta, at Føroyar kunnu spæla seg víðari til meginumfarið, og tað vænti eg eisini, staðfestir viðmerkjarin Julian Johansen

- Slovenia spælir skjótt og hevur ofta góðar leikskipanir. Hetta sóu vit í EM 2024, staðfestir Tróndur Mikkelsen um tað á pappírinum sterkasta mótstøðuliðið hjá Føroyum í EM-bólkaspælinum (Mynd: Sverri Egholm)

SkrivaÐ:

Agnar Prestá

Lutakastið um bólkabýtið til EM-endaspælið í manshondbólti 2026 var hóskvøldið í Herning. Har verður finaluumfarið eisini spælt, og tveir bólkar verða eisini spældar í stóru Jyske Bank Boxen.

Føroyar skulu spæla sínar bólkaspælsdystir í Unity leikhøllini í Bærum, sum er beint uttan fyri Oslo.

Hvat skal man so halda um at hava fingið Slovenia, Montenegro og Sveis í okkara bólk. Vit hava spurt landsliðsspælaran Trónd Mikkelsen og viðmerkjaran Julian Johansen, sum var hjálparvenjari til EM-endaspælið í 2024. 

Slovenia: 
Tróndur Mikkelsen: - Eitt tekniskt sera sterkt lið við nógvum royndum á altjóða pallinum. Hetta sóu vit í EM 24. Slovenia spælir skjótt, og hevur ofta góðar leikskipanir.

Julian Johansen: - Tað frægasta man kundi fáa úr hesum pottinum, men ein ótrúliga trupul uppgáva. Slovenia passar Føroyum illa, tí spælistílurin við skjótt frá verju til álop pressar okkum í at skipa verjuspælið - og skjótleikin hjá teimum báðum passar sum útgangspunkt okkara miðverju illa. Seinast vit møttu teimum, vóru Makuc og Janc ikki við. Eg vænti, at vit kunnu geva Slovenia harða kapping, men tað verður trupult at vinna móti teimum. 

Montenegro:
Tróndur Mikkelsen: - Fysiskt sterkir og aggressivir í verjuni. Teir hava spælt eina góða undankapping, har teir hava leikt javnleik móti Ungarn.

Julian Johansen: - Hetta skulu vit vera fegin um. Montenegro var nokk veikasta liðið í triðja potti. Tá tað er sagt, so spæla teir við hjartanum, og eru øgiliga góðir í viðgongd. Montenegro er ikki kent fyri at hava serliga gott verjuspæl, so eg vænti at okkara 7:6 álopssspæl kemur at geva teimum nokk at hugsa um.

Málverjin, Simic, kann tó vera allar besti málverji í heiminum, so hann skulu vit í øllum førum hava tak á.  Vit kunnu gott vinna móti Montenegro, men vit skulu spæla væl, og syrgja fyri at hava tamarhald á serliga Borozan og Vujovic, sum eru ávíkavist vinstri og høgri bakkur: Teir skjóta báðir heilt óluksáliga væl

Sveis:
Tróndur Mikkelsen: - Eitt land, ið kann skapa trupulleikar fyri tey flestu landsliðini. Sveis hevur víðani víst seg frá tí sterku síðuni síðan Andy Scmidt hevur tikið yvir, og hevur nógv góð urslit í innleiðandi kappingini.

Julian Johansen: - Heldur torført at meta um. Teirra spæl snúði seg um Andy Schmid í nógv ár, men nú er hann ikki longur á vøllinum. Men hann roynur nú sum venjari at fáa sítt snilda álopsspæl inn á vøllin, so vit koma heilt sikkurt at møta einum liði sum spælur álopsspæl í 7:6, umframt eitt álopskent og ágangandi verjuspæli.

Eins og Montenegro, so eru eisini nakrir skjúttar sum vit skulu hava virðing fyri. Stórsta stjørnan hjá Sveis stendur tó í málinum. Nikola Portner, sum til dagliga spælir í Magdeburg, kann steingja málið uppá nærskot. Leikara fyri leikara eru vit annars sterkari enn Sveis, so eg bæði vænti og vóni sigur har.

Sum heild eru spælari og viðmerkjari/venjari greiðir yvir, at lutakastið ikki var so galið, og serliga Julian Johansen torir veruliga seta orð á góðu føroysku møguleikarnar - Tróndur Mikkelsen peikar á áskoðararnar.

- Bólkurin er uttan iva torførur, men við einari sterkari føroyskari áskoðarafjøld í rygginum í Oslo hava vit allar møguleikar at gera vart við okkum. Vit hava sæð tað fyrr – tá stuðulin er har, og liðið trýr uppá tað, so ber væl til.

- Samanumtikið skulu vit vera nøgd við lutakastið. Í potti 1 og 3 fingu vit veikastu liðini og í potti 4 var okkurt lið veikari enn Sveits, men har er ikki stórur munur á.

- Slovenia sum er fyrst seeda í okkara bólki hevur í dag fingið eitt kanón lutakast, so tá teir eru glaðir sum 1’arar, mugu vit eisini vera glaðir sum 2’arsr. Føroyar eru kommar til EM fyri aðru ferð. Summi vænta at Føroyar kunnu spæla seg víðari til millum rundina; tað vænti eg eisini, sigur Julian Johansen at enda.

Greinin varð fyrstu ferð løgd út 15. mai 2025

HM: Føroyar skulu spæla sínar dystir í Trier í Týsklandi

Heimasíðan hjá IHF skrivaði mánadagin, at týska hondbóltssambandið hevði hetta ynski "fyri at tryggja at nóg mikið av atgongumerkjum eru til føroyskar fjepparar". Føroysku kvinnurnar verða styrkismettar í 3. ella 4. potti

Bjarta Johansen takkar føroysku fjepparunum í Basel til endaspælið í fjør. Í vikuni varð kunngjørt, at Kroatia fær eitt "wild card" til HM, og at Føroyar skulu spæla í Týsklandi - millum annað móti Kroatia (Mynd: Sverri Egholm)

SkrivaÐ:

Agnar Prestá

Til HM endaspøl er tað IHF. Altjóða hondbóltssamgongan kann sigast, at "gera tingini uppá sín máta". Hóast tað er ein mánaði síðani, at tað er greitt, hvørji lond hava spælt seg til HM-endaspælið hjá kvinnum seinni í ár, so er eingin styrkismeting komin út - eiheldur hava hondbóltssambondini fingið kunning um tað.

Tíggju dagar áðrenn lutakastið um bólkabýtið til endaspælið, fór Portalurin at kanna, hvussu sá út á ihf.info hesum viðvíkjandi. Tá rendu vit okum í HESA GREININA

Hon greiðir frá, hvussu Kroatia hevur fingið ta eina "Wild Card-plássið", sum er til slíkt endaspæl. Hetta verður givið til lond, sum ikki spæla seg til HM, men sum "IHF Council" metir burdi verið við.

Føroyar megnaðu at spæla javnleik móti Kroatia í EM-endaspælinum í Sveis og harvið fáa eitt søguligt endaspælsstig.

Tað, at Føroyar endaðu beint frammanfyri Kroatia í okkara EM-bólki í fjør, gjørdi, at Kroatia ikki var styrkismett til HM play-off umfarið. Har tapti Kroatia eisini við samanlagt fimm málum móti sterka spanska liðnum.

Nú er tó greitt, at kroatar kortini eisini skulu til endaspælið, ið verður í Niðurlondum og Týsklandi í november-desember.  

IHF: Føroyar skulu til Trier - føroyskir fjepparar eiga høvuðsleiklutin

Tey áhugaverdu tíðindini, sæð við føroyskum brillum, vóru tey, at føroysku kvinnurnar nú eru staðsettar í ein bólk. Talan er um ein av bólkunum, sum verður í Týsklandi.

- Harafturat setti týska hondbóltssambandið seg í samband við IHF 29. apríl við uppskoti um, at Føroyar skulu setast í bólk D í Trier.

- Hetta er tí, at samskipanarnevndin vil tryggja, at nóg mikið at dystaratgongumerkjum kunnu bjóðast til allar fjepparar úr Føroyum. Hetta tí at atgongumerkjasølan, serliga til dystirnar hjá verstjóðunum í bólkaspælinum, selja ógvuliga væl.

IHF boðar á heimasíðu sínari frá, at umbønin hjá týska hondbóltssambandinum er gingin á møti: Føroyar skulu spæla í bólki D, sum verður í týska býnum Trier.

Føroyskir hondbóltsfjepparar hava sanniliga gjørt vart við seg uttanfyri landoddarnar.

Sí eisini: Føroysku hondbóltsfjeppararnir heiðraðir í Týsklandi

Føroyskir fjepparar gera vart við seg í Sveis- Eini 400-500 føroyingar vóru til søguliga endaspælið hjá kvinnum í november-desember (Mynd: Sverri Egholm)

Her eru føroyingar í Berlin. Teir fingu eina serliga virðisløn frá týska hondbóltssambandinum herfyri (Mynd: Sverri Egholm)

Møta Montenegro - høllin tekur yvir 5.000 fólk

Vertirnir og hægst styrkismettu liðini vóru longu koyrd í bólkar. Montenegro varð ásett til bólk D í Trier. Harvið skulu føroysku kvinnurnar, eins og í næst komandi  EM-undankapping, spæla móti sterka Balkan-landinum til HM-endaspælið.

Tvey onnur lond koma í bólkin. Portalurin hevur fingið upplýst frá Hondbóltssambandi Føroya, at tey ikki eru greið yvir enn, um Føroyar vera í tí triðja ella tí fjórða styrkisbólkinum av teimum fýra til lutakastið 22. mai.

HSF hevur heldur ikki fingið endaligu boðini um staðsetingina nú seinnapartin, men nú hevur IHF alment upplýst, at Føroyar skulu spæla í vestara parti av Týsklandi - beint við markið til Luksemborg. 

Tað búgva beint yvir 112.000 fólk í býnum, og høllin - Trier Arena, tekur umleið 5.400 áskoðarar. Týsku vertirnir og Svøríki eru ásettir til hina leikhøllina í Týsklandi. Hon er í Stuttgart. Fýra bólkar verða spældir í tveimum ymiskum hallum í Niðurlondum.

Føroysku kvinnurnar spældu seg til HM-endaspælið við tryggjum samanløgdum sigri á Litava. Tað verður fyrstu ferð, at Føroyar skulu til eitt vaksnamanna HM í hondbólti. 

Greinin varð fyrstu ferð løgd út 12. mai 2025

Føroyar bodnar til stóra EM-fyrireikingarkapping

Eftir øllum at døma skulu føroysku menninir eisini til Noreg áðrenn EM. Hetta fyri at spæla móti Danmark, Niðurlondum og Noreg í Trondheimi. Golden League-stevnan verður í november

Noreg kann møguliga løna føroyingum javnleikin í Berlin aftur í november - hesaferð skulu liðini hittast á heimavølli hjá Noreg (Mynd: Sverri Egholm)

SkrivaÐ:

Agnar Prestá

Seinastu mongu árini hevur Golden League verið á skránni, tá endaspøl á manssíðuni nærkast. Har hava Danmark, Noreg og Frakland spælt fyrireikingardystir, umframt at eitt fjórða lið hevur verið bjóðað við.

Niðurlond hava avloyst Frakland sum fastur luttakari, og sum skilst verða Føroyar fjórða liðið í kappingini hesaferð.

Sambært okkara upplýsingum kom innbjóðing til HSF fyri einari tíð síðani. Hon var treytað av, at Føroyar spældu seg til EM-endaspælið.

Júst hetta kom uppá pláss í undanfarnu viku. Harvið bendir alt á, at Føroyar miðskeiðis í november fáa spennandi avbjóðingar í venjingardystum - endaliga kunngerðin kemur helst úr Noreg skjótt.

Føroyar spældu tveir ógvuliga tættar dystir móti Niðurlondum í mai (Mynd: Sverri Egholm)

Niðurlond stóðu Føroyar seg heilt væl ímóti í mars, Noreg er tað sterkari, men Føroyar eiga jú ein heldur minniligan javnleik móti norðmonnum. So er tað Danmark: Ferfaldu heimsmeistararnir og OL-vinnararnir verða ein risauppgáva - hóast fleiri spælarar hjá Danmark kanska verða spardir.

Golden League 2025 verður í Trondheim í november.

Føroysku menninir skulu eisini spæla tveir venjingardystir á heimavølli stutt áðrenn endaspælið. Hesir vera sum skilst við Tjarnir móti Italia í vikuni áðrenn endspælið.

Greinin varð fyrstu ferð løgd út 12. mai 2025

Sasha skal nú spæla í Sveis

21-ára gamli landsliðsmálverjin skiftir sum skilst úr Lugi í næstbestu svensku deildini til St. Gallen í fremstu sveisisku deildini

Aleksandar Sasha Lacok og Pauli Jacobsen hava seinastu landsdystirnar verið ein greipa - her hálsfevnast teir eftir sigurin í Kosovo, sum sendi Føroyar til EM 2026 (Mynd: Sverri Egholm)

SkrivaÐ:

Agnar Prestá

Seinasta árið hevur Aleksandar Lacok - vanliga róptur "Sasha" - spælt hondbólt í Svøríki. Hetta fyri Lugi í næstbestu svensku deildini.

Nú tekur ein av landsliðsmálverjunum eitt spenanndi fet upp: Hann skal spæla í bestu sveisisku deildini.

Portalurin hevur frætt frá fleiri álítandi keldum, at Aleksandar Sasha Lacok nú skiftir til TSV St.Otmar Handball St.Gallen.

Liðið úr St. Gallen endaði sum nummar sjey av teimum tíggju í fremstu sveisisku deildini hetta kappingarárið.

Sasha við stórbjarging í júst lidnu EM-undankappingini. Tað er ógvuliga sannlíkt, at hann skal við til endaspælið í januar (Mynd: Sverri Egholm)

Talan er um eitt spennandi stað hjá 21-ára gamla evnaríka málverjanum at spæla. Síðani Nicholas Satchwell fekk álvarsaman knæskaða hevur Sasha verið fast við A-landsliðnum, og hevur hann harvið verið við at fingið Føroyar til EM-endaspælið - sum eittari í bólkinum.

Skiftið hjá Sasha væntast at verða endaliga staðfesti heilt skjótt. Áðrenn hann byrjar tilveruna í Sveis, skal føroyingurin vera fyrsti málverji til eitt U21-endaspæl: Føroyar spæla um ein stóran mánaða í Polandi.

Í Føroyum hevur Aleksandar Lacok umboðað VÍF longst men eisini Neistan eina tíð.

Greinin varð fyrstu ferð løgd út 14. mai 2025

Óli Mittún kosin til ársins spælara í Svøríki

Snarljósið gjørdi systkinabarninum kynstrið eftir, og endaði væl í svenskum hondbólti. - Eg skal avstað við U21-landsliðnum, síðani vera saman við vinum og familju í Føroyum umframt at vera nógv í styrkirúminum áðrenn næsta kapittulin í Danmark

Almenna heitið er MVP (Most Valuable Player), og 19-ára gamli hoyvíkingurin fekk 48 prosent av atkvøðunum. Óli varð eisini toppskjútti og besti spæliskipari í Handbollsligaen (Mynd: IK Savehof)

SkrivaÐ:

Agnar Prestá

Hann kom til Svøríkis sum ein drongur, ið júst varð fyltur 17 ár. Hann fer sum besti spælarin í svenskum hondbólti. 

19-ára gamli Óli Mittún fer til størri avbjóðingar, og tað er ógvuliga hóskandi, nú føroyingurin fer at fylla 20 ár, og hann er kosin til ársins spælara í Handbollsligaen.

Almenna heitið er MVP (Most Valuable Player), og 19-ára gamli hoyvíkingurin fekk 48 prosent av atkvøðunum. Tað eru venjarar í feløgum, umframt landsliðsvenjarin - fyrrverandi venjarin hjá Óli í Sävehof - sum saman við mongum ítróttartíðindafólki atkvøddu.

Talan gjørdist harvið um ein rímiliga greiðan sigur. Óli varð eisini toppskjútti ("skyttekung") og annað árið á rað besti spæliskipari í Handbollsligaen. Sävehof endurvann ikki svenska meistaraheitið, men nummar 78 endaði ógvuliga væl persónliga í Partille og í svensku hallunum.

Dygdirnar hjá Óla Mittún eru komnar landsliðnum og IK Sävehof væl við seinastu árini. Hetta var aðru ferð uppá fýra ár, at ein føroyingur gjørdist ársins spælar hjá monnumi í Svøríki (Mynd: Sverri Egholm)

Í summar skiftir Óli Mittún til danska GOG. Áðrenn tað er tó ymiskt á skránni - hondbóltur og annað.

- Eg havi eitt sindur av tíð, áðrenn eg skal avstað við U21-landsliðnum til HM í Polani. Síðani skal eg vera saman við vinum og familju í Føroyum - møguliga ein túr til eitt heitari land - men so eisini vera nógv í styrkirúminum áðrenn næsta kapittilin í Danmark.

Soleiðis sigur MVP í Handbollsligaen við handbollsligan.se.

Í fjør vann fyrrverandi liðfelagin hjá Óla, málverjin Simon Möller stóra heiðurin. Í 2021/22 var tað sysktinabarnið, Elias Ellefsen á Skipagøtu, sum eisini spældi við Sävehof..

Greinin varð fyrstu ferð løgd út 14. mai 2025

HM: Føroysku kvinnurnar í triðja styrkisbólki

Hetta gevur Føroyum fínar møguleikar at koma víðari, tí trý lið koma víðari úr hvørjum bólki

(Mynd: Sverri Egholm)

SkrivaÐ:

Agnar Prestá

IHF hevur loksins kunngjørt, hvussu styrkisbólkarnar til HM-lutakastið síggja út. Og tað sær fínt út fyri Føroyar.

Hósdagin 22. mai verður greitt, hvørjum føroysku kvinnurnar skulu spæla ímóti í Týsklandi síðst í november.

Ivamál var um, hvørt Føroyar skuldu vera í niðasta ella næstniðasta styrkisbólkinum, og nú er greitt, at vit endaðu í potti 3 heldur enn potti 4.

Hetta kann gerast týðandi. Føroyar eiga at hava góðan møguleika móti øllum úr niðasta pottinum. Av tí at trý lið koma víðari úr hvørjum bólki til HM, styrkir hetta føroysku møguleikarnar.

Angola man vera ynskimótsstøðan úr potti 2 - eitt land sum Eysturríki burdi eisini verið gott at trekt.

Úr potti eitt er longu greitt, at Føroyar fáa Montenegro ella Noreg. Montenegro man vera millim frægari møguleikarnar har. Tað er tó eitt ógvuliga sterkt lið - Noreg er tað sterkasta sum er. Eins og Føroyar, eru Montenegero og Noret longu staðsett í týska býnum Trier. Tveir bólkar verða spældir har.

Lutakastið um bólkabýtið verður um átta dagar.

Styrkismetingin sær soleiðis út:

Pottur 1: Frakland, Noreg, Danmark, Ungarn, Svøríki, Niðurlond, Týskland, Montenegro

Pottur 2: Pólland, Brasil, Serbia, Rumenia, Sveis, Spania, Eysturríki, Angola

Pottur 3: Kekkia, Japan, Senegal, Ísland, Argentina, Føroyar, Suðurkorea, Tunesia

Pottur 4: Egyptaland, Uruguay, Kasakstan, Paraguei, Iran, Kuba, Kina, Kroatia

Um Føroyar gerðast millum trý tey bestu liðini í bólkinum, skulu Føroyar víðari til Dortmund at millumumfarið. Liðið, sum gerts nummar fýra í bólkinum, skal spæla Presidents Cup.

Greinin varð fyrstu ferð løgd út 14. mai 2025

KÍ er aftur komið á steypaslóðina

Eins og í 2022 og 2023, hevur KÍ fult stigatal eftir fyrsta triðingin, og fleiri orsøkir eru til tess. NSÍ kundi fingið koppað oddadysttin sín veg – til ber at fáa javnvág í FM-stríðið aftur seinni í mánaðinum

Bláa Bylgjan og KÍ-liðið bylgja fram í løtuni. FM er málið, og favorittleikluturin hjá KÍ er størri eftir sigurin í Runavík farna fríggjakvøld (Mynd: Jens Kr. Vang)

SkrivaÐ:

Agnar Prestá

Eftir trý ár sum suverent meistaralið hjá monnum, var á ymsan hátt ov nógv óskil og vantandi støðufesti á liðnum og kring tað serliga fyrsta partin av 2024.

Endaspurturin var góður, og í ár er nógv, sum bendir á, at KÍ í minsta lagið vinnur okkurt steyp. Liðið hjá Magnusi Powell hevur verið sannførandi í flestu landskappingardystunum, og skal eisini spæla hálvfinalur í steypakappingini móti AB. KÍ verður stórfavorittur, um liðið sum væntað kemur í steypafinaluna – eisni um mótstøðuliðið verður Víkingur.

Júst Magnus Powell hevur gjørt mun. Svenski venjarin krevur nógv, og stendur fyri ávísum støðufesti og skipan í spælinum. Hann hevur nú, eins og Magne Hoseth í 2023 og Mikkjal Thomassen í 2022, fult stigatal eftir fyrsta triðing í landskappingini. KÍ var eisini ósigrað eftir níggju umfør í 2021, men tá var ein javnleikur ímillum úrsltini.

KÍ vann oddadystin við Løkin seinasta fríggjakvøld við hørðum arbeiði og máli frá René Shaki Joensen seint í dystinum.

René Shaki Joensen og afturvendi Jákup Biskopstø Andreasen í felagskapi í nærdysti við Steffan Løkin

Magnus Powell hevur framvegis bara vunnið í kappingardystum sum KÍ-venjari: 11 av 11. Fyritreytirnar eru góðar, men svenski venjarin og hopurin gera eisini nógvi (Mynd: Sverri Egholm)

Lyklamenn aftur frá skaðum – tveir nýggir spælarar gera veruligan mun

Teir í kongabláum síggja robustir út. Ein av faktorunum til gongdina í serliga fyrru hálvu í fjør vóru nakrir skaðar til lyklaspælarar á meira verjukendu plássunum – nakað sum Víkingur hevur rent seg í, í ár.

Størsti saknurin var helst í liðformanninum og miðvallargeneralinum. Jákup Biskopstø Andreasen spældi so at siga als ikki í 2024, og hetta merktist væl hjá KÍ. Hóast nummar 8 ikki heilt er uppi á sama høga støði, sum áðrenn álvarsama fótskaðan, hevur Jákup gjørt stóran mun í 2025.

Hallur Hansson spældi als ikki í fyrru hálvu í fjør, men nú tykist tað sum um, at knæið er í nóg góðum standi til fastan fótbólt. Hallur tykist at hóska heilt væl saman við Jákupi í maskinrúminum hjá KÍ. 

Sterka miðverjan við Odmari Færø og Heina Vatnsdal var ikki tøk í fyrsta . Nú er síðstnevndi í B36, meðan Odmar, sum kom aftur til evropeisku dystirnar í fjør, sær um nakað sterkari út.

Gaston Nicholas Tellechea hevur víst styrki (Mynd: Jens Kr. Vang)

35-ára gamli miðverjin við eyðkenda skegginum og mongu dygdunum hevur spælt allar minuttirnar, og hevur eisini fingið ein skikkaðn makkara. Argentinski Gaston Tellechea hevur royndir úr næstbestu deildini í heimlandinum, og 25-ára gamli argentinin hevur fyri tað mesta sæð sterkur út, síðani hann vann sær byrjanarpláss hja KÍ.

Nakrir av níggju útlendingum hjá KÍ síggja ikki út til at fara at gera so stóran mun. Men danski málverjin Mark F. Jensen, sum sá heldur ivasamir út í løtum í fjør, stendur stinnur. So er tað eisini gamli kenningurin í álopinum. 

Patrik Johannessen átti sín leiklut í fyrsta FM-heitinum hjá KÍ í hesari øldini - í 2019. Síðani hevur tvørmaðurin spælt í Noregi og í Íslandi. Patrik fekk ein krossbandsskaða í 2023, og eftir eina heldur trilvandi byrjan aftur í kongabláum, hevur orkuríki maðurin verið glóðheitur seinastu vikurnar. Nógv mál og upplegg eru eitt, men Patrik Johannesen arbeiðir eisini gróthart, rennir nógv djúpt og bindur tingini væl saman frammarlaga hjá KÍ.

Patrik Johannesen verjir bóltin. Hann hevur leiklutin sum eitt slag av hangandi - ella meira fríum áleypara - aftanfyri/undir liðuni á Páll Klettskarð (Mynd: Jens Kr. Vang)

Hjá KÍ er tað sjálvandi eisini virðismikið, at "the usual suspects" avrika væl: Páll Klettskarð skorar nógv mál og arbeiðir væl, Jóannes Kalsø Danielsen er ógvuliga støðufastur á høgra bakki, og hóast tað gekk væl hjá KÍ uttan Árna Frederiksberg í trímum dystum í apríl, so er 7'arin javnt og samt við í málum og so týðandi og avgerandi fyri KÍ-spælið.

Afturat hesum eru tey í Klaksvík ógvuliga væl nøgd við, at fleiri lokalir fáa rúmd og gera vart við seg. Hetta hevur verið ein trupulleiki seinastu árini. Jonn Johannesen hevur verið ogvuliga darvaður seinastu árini, men eftir skurðviðgerð í vetur, hevur kviki og vandamikið vongurin vant fult, og er hann nú sum so fastur maður: Júst Jonn legði eisni KÍ á odda móti NSÍ.

Dávid Biskopstø Andrasen hevur fingið alt ov lítið av dystarminuttum sum heild, tí hann hevur svingað ímillum ein hálvleik-60 minuttir á næstbesta liðnum og so ongar ella heilt fáar minuttir á besta liðnum. Nú fær 20-ára gamli bróður liðformansins størri álit, og hevur Dávid eisini tikið av - serliga í steypakappingini. 

NSÍ skal nú svara aftur

Alt hetta samanlagt gevur úrslit og gott fótbóltshuglag í Klaksvík. Bláa Bylgjan er væl við, og áhugin er størri aftur. Tað er helst eisini komin ein svongd eftir steypaleysa 2024. KÍ hevur góðar fyritreytir - serliga á fíggjarlga økinum - og tá hugt verður eftir styrkini í hópinum: Mads Boe Mikkelsen er innskiftari, og Deni Pavlovic var millum teir, sum slett ikki sluppu inn við Løkin.

Kappingarárið er tó langt. Og í NSÍ-leguni var ein kensla av, at teir væl kundu - og kanska áttu at fingið trý stig burturúr fríggjakvøldið. Hetta serliga við spælinum fyri steðgin og tí, at Klæmint Andrasson Olsen hevði ein risamøguleika, sum KÍ-málverjin bjargaði, beint fyri steðgin.

Liðið hjá Jens Wedeborg hevði bert vunnið í Betrideildini undan dystinum - nú skal NSÍ reisa seg eftir inntensa og tætta dystin.

FC Suðuroy og HB eru á skránni undan KÍ á Norðoyastevnu 31. mai. Tað vil siga, at enn eitt oddabrak helst verður tá; tað kann NSÍ ikki tapa, um sambandið veruliga skal haldast til liðið, sum er ein størri FM-favorittur nú.

Greinin varð fyrstu ferð løgd út 10. mai 2025

Micheal Schjønberg kemur aftur til Sørvágs

07 Vestur hevur keypt hann aftur úr AGF. Hann var venjari hjá 07 Vestur í hálvtannað ár, og skal nú royna at venda skútuni. Schjønberg kemur til landið mánadagin

Micheal Schjønberg fekk nøkur góð úrslit við 07 Vestur (Savnsmynd: Sverri Egholm)

SkrivaÐ:

Agnar Prestá

Á summri 2023 fór hann úr 07 Vestur til AGF, hóast Schjønberg og 07 Vestur høvdu sattmála.

Nú hendir tað øvuta. AGF skrivar á heimasíðu sínari, at felagið er vorðið samt við 07 Vestur um treytirnar, og sigur felagið farvæl við Michael eftir tvey góð góð ár.

- Schjønberg hevur hildið sambandið við 07 Vestur við líka síðani hann fór, og hann var til dystin fús beinanvegin, tá vit spurdu okkum fyri, hóast hann hevði sáttmála við AGF fyri 2025/2026 eisini, sigur Jón Nordendal ítróttarstjóri hjá 07.

Harvið hevur 07 Vestur keypt danska venjaran leysan úr danska felagnum, soleiðis at hann kann royna at venda skútuni í Sørvági. 

07 Vestur er í løtuni aftast í Betrideildini við bert einum stigi fyri níggju dystir. Hetta gjørdi, at Dan Brimsvík og 07 Vestur fóru hvør til sítt.

Byrjar í næstu viku

Michael Schjønberg kom til 07 Vestur í januar 2022, stutt eftir at núverandi KÍ-venjarin, Micheal Powell, varð seldur til Svøríkis.

Í 2022 fekk 07 29 stig, endaði nummar sjey, og kom í hávfinaluna. Í mun til úrslit, stóð eisini væl til, tá danin fór í summarsteðginum í 2023.

- Framgongdin hjá felagnum var stór undir hansara leiðslu, og avgerðin hjá nevndini var tí ikki trupul at taka, tá vit fingu høvi at fáa Schjønberg aftur til felagið, sigur Jón Nordendal við síðuna hjá 07 Vestur.

Síðani hevur Schjønberg staðið á odda fyri besta kvinnuliðnum hjá AGF. Har hevur hann bæði kappingarárini leitt liðið í ovara endaspælið í bestu donsku deildini.

Greinin varð fyrstu ferð løgd út 15. mai 2025

Dan Brimsvík og 07 Vestur farin hvør til sítt

07 Vestur hevur ongan dyst vunnið í ár og er greitt aftast í Betrideildini - Sigtór Petersen skal fyribils standa við ábygdini. Hetta er triðja árið á rað, at 07 Vestur skiftir venjara mitt í kappingarárinum

- Úrslitini hava ikki verið eftir vild, og tað er eyðsæð at okkurt má gerast, fyri at venda gongdini. Hetta staðfestir formaðurin hjá 07 Vestur, Jens Kristian Haraldsen. Dan Brimsvík er, eftir samanlagt 13 stig í 22 landskappingardystum, ikki longur í felagnum (Mynd: 07 Vestur)

SkrivaÐ:

Agnar Prestá

- Vit eru sera hørm um at verða komin hartil, men úrslitini hava ikki verið eftir vild, og tað er eyðsæð at okkurt má gerast, fyri at venda gongdini.

Soleiðis sigur Jens Kristian Haraldsen, formaður í 07 Vestur, nú felagið hevur tikið avleiðingina av vánaligu byrjanini hjá 07 Vestur. 

Felagið hevur framvegis ongan sigur í 2025: Eitt stig eftir níggju umfør - fyrsta triðing - í Betrideildini og úti av steypakappingini beinanvegin.

Dan Brimsvík tók við eftir Steffan Landro í juni í fjør. Havnarmaðurin fekk 13 stig í 22 landskappingardystum hjá 07 Vestur.

Tapið móti EB/Streymi á heimavølli sunnudagin, sum venjarin ikki beinleiðis kann lastast fyri, varð seinasta uppgávan hjá Dan sum 07 Vestur-venjari. Liðið hevur fimm stig upp til strikuna og uppflytararnar TB og FC Suðuroy

Dan Brimsvík var høvuðsvenjari hjá B36 í umleið trý og eitt hálvt ár. Har vann hann eina styepakapping og kom fýra ferðir víðari í Evropa, men mitt í 2024 endaði samstarvið - heilt stutt eftir tað tók hann við í 07 Vestur (Mynd: Sverri Egholm)

Sigtór tekur aftur við - umráðandi tíðarskeið

Arbeiðið við at finna nýggjan fastan høvuðsvenjara er farið í gongd í Vágum, væntar felagið at hava eina loysn klára innan stutta tíð.

Til tá stendur ein kendur maður í felagnum við róðrið: Sigtór Petersen.  Sørvingurin hevur áður spælt og verið fyribils venjari hjá besta liðnum, og hevur seinastu árini millum annað verið U-landsliðsvenjari á gentusíðuni. Har hevur Sigtór fingið fleiri góð úrslit.

Sigtór Petersen sum fyribils venjari hjá 07 Vestur í 2017 (Mynd: jn.fo)

Hetta er triðja árið á rað, at 07 Vestur skiftir høvuðsvenjara mitt í kappingarárinum. Í fjør reyk Landro - í 2023 var Micheal Schjønberg bert í fyrru hálvu.

Hetta var annað venjaraskifti í fremstu mansedeildini í ár: Sunnudagin 4. mai slitnaði millum HB og Adolfor Sormani.

Greinin varð fyrstu ferð løgd út 12. mai 2025

Teitur og Tróndur hjálpa André í HB

Nýggja føroyska venjaratoymi hevði trý stig við sær eftir uppgerðina við føroyameistarnar í Sarpugerði farna vikuskiftið. Tað er óvist, hvussu leingi hetta verður loysnin í HB

Teitur Matras Gestsson (við hettu á til vinstru) og André Olsen (rópandi til høgru) í Norðragøtu. Teir hava hesa vikuna havt ábyrgd av HB-liðnum saman við Tróndi Jensen - Mynd: Havnar Bóltfelag/RS Media

SkrivaÐ:

Agnar Prestá

Setrið hjá HB gjørdist eisini ov heitt fyri Adolfo Sormani, sum eftir 1-7 dystin móti NSÍ fyri einari viku síðani sjálvur takkaði fyri seg.

Italiumaðurin við toymi fóru av landinum og eitt nýtt venjaratoymi fór í gongd í Gundadali.

André Olsen hevur millum annað verið hjálparvenjari hjá B36, NSÍ og barndómsfelagnum B68. Nú er 34-ára gamli toftamaðurin fyribils høvuðsvenjari hjá HB.

André Olsen í Sarpugerði farna fríggjakvøld (Mynd: Havnar Bóltfelag/RS Media)

Afturat sær hevur André fingið tveir, sum hava roynt nógv í HB. Tróndur Jensen stóð sum hjálparvenjari móti Víkingi og Teitur Matras Gestsson sum málverjuvenjari. 

Síðstnevndi gavst sum spælari í vetur. Hann hevur verið venjari hjá næstbesta liðnum higartil í ár, og er nú annar av hjálparvenjarunum hjá besta liðnum. 

Bóltsnillingurin Tróndur Jensen var við at vinna nøkur FM við bandómsfelagnum HB og gevur hann her nøkur góð ráð undir upphitingini í Syðrugøtu í gjár 

Teitur Matras Gestsson fegnast eftir 1-0 sigurin í Sarpugerði í gjár (Myndir: Havnar Bóltfelag/RS Media)

Harvið eru, aftur í ár, fleiri venjarabroytingar í Havnar Bóltfelag. Fyrsta veruliga royndin hjá føroyska venjaratoyminum eydnaðist væl: Sammy Skytte skoraði einasta málið í Sarpugerði móti skaðadarvaður føroyameistarunum, og HB heldur fyribils væl fast í 3. plássinum í Betrideildini.

So er spurningurin, hvør ætlanin er framyvir. Íslendski venjarin og ítróttarstjórin Arnar Grétarsson hevur verið settur í samband við HB, ivasamt er, um tað verður til nakað. 

Í gjárkvøldi, dýra biðidag, hevði HB á heimavølli vitjan av oddaliðnum KÍ.

Greinin varð fyrstu ferð løgd út 10. mai 2025

Heidi Sevdal var best í apríl

NSÍ hevur fult stigatal, og greiði toppskjúttin varð heiðrað undan trygga sigrinum á Skála týskvøldið

 

SkrivaÐ:

Agnar Prestá

Áðrenn dystin undir Mýruhjalla á Skála týskvøldið varð Heidi Sevdal úr NSÍ heiðrað sum besti í Betrideildini hjá kvinnum í apríl mánað

Fult umfar í fremstu deildini hjá kvinnum varð spælt týskvøldið. Á Hoyvíksvøllinum vann B36 4-1 á FC Hoyvík, KÍ vann 3-0 á Dungasandi móti 07 Vestur, Víkingur vann 3-0 í Gundadali móti HB, og NSÍ vann 5-1 á útivølli móti Skála.

Áðrenn dysturin undir Mýruhjalla á Skála bleiv settur í gongd, bleiv besti spælari í Betrideildini hjá kvinnum í apríl mánað kunngjørdur.

Tað eru venjararnir hjá liðunum í fremstu deildini, ið atkvøða, og hesaferð fór Heidi Sevdal úr NSÍ, sum aftaná fyrstu átta umførini í grundspælinum hevur skorað 20 mál, avstað við heiðurinum.

Nummar 2 í atkvøðugreiðsluni gjørdist Tórunn Højgaard Joensen úr KÍ, og nummar 3 bleiv Sunniva Willemoes úr HB.

Fyri heiðurin fekk Heidi Sevdal eitt gávubræv upp á 1.000 krónur frá Hotel Brandan, og eina glasplátu, ið er latin av FSF. Tað var systur Heidi, Ansy Sevdal Jakobsen, sum vegna Fótbóltssamband Føroya stóð fyri handanini.

8. umfar í Betri deildini, kvinnur:
Týsdagin 13. mai

07 Vestur - KÍ 0-3 (0-2)
03' 0-1 Durita Hummeland (Eyðvør Klakkstein)
39' 0-2 Tóra Mohr (Eyðvør Klakkstein)
63' 0-3 Sólja Ernstsdóttir (Eyðvør Klakkstein)

HB - Víkingur 0-3 (0-2)
05' 0-1 Eydna Dalheim (Jensa Tórolvsdóttir)
16' 0-2 Mona Rasmusdóttir (Hanna Højgaard)
71' 0-3Eydna Dalheim (Jensa Tórolvsdóttir)

FC Hoyvík - B36 1-4 (1-1)
36' 1-0 Nomi Hansen, brotsspark
45' 1-1 Ása Lea Næss (Sára Skaalum)
53' 1-2 Ester Ellingsgaard (Bára Magnussen)
67' 1-3 Jasmin Darvishi (Ester Ellingsgaard)
73' 1-4 Bára Magnussen (Ester Ellingsgaard)

Skála ÍF - NSÍ 1-5 (1-1)
28' 0-1 Miriam Huneck
43' 1-1 Sara Benjaminsen (Alda Petersen)
57' 1-2 Heidi Sevdal (Rúna Olsen)
62' 1-3 Julia Naomi Mortensen (Rúna Olsen)
86 1-4 Heidi Sevdal (Rúna Olsen)
90+1' 1-5 Rúna Olsen

Støðan
NSÍ - 24 stig
KÍ - 18 stig
HB - 16 stig
Víkingur - 16 stig
B36 - 12 stig
07 Vestur - 6 stig
Skála ÍF - 3 stig
FC Hoyvík - 0 stig

Komandi dystir
Sunnudagin 18. mai
Kl. 12.30: HB - NSÍ
Kl. 14.30: 07 Vestur - Víkingur
Kl. 15: KÍ - B36
Kl. 16: Skála ÍF - FC Hoyvík

Greinin varð fyrstu ferð løgd út 14. mai 2025

Teresa Jacobsen og Sólja Ernstdóttir á A-landsliðið á fyrsta sinni

Pætur Smith Clementsen hevur kunngjørt tær 20, ið eru úttiknar til UEFA Nations League dystirnar móti Moldova og Slovakia - talan er um seinastu dystirnar í hesi kappingini, har Føroyar eru á 2. plássi í bólkinum

Sólja Ernstdóttir hevur higartil í ár skorað fimm mál fyri KÍ í landskappingini (Savnsmynd: Sverri Egholm)

SkrivaÐ:

Agnar Prestá

Seinni í mánaðinum skal kvinnulandsliðið á vøllin aftur. Fríggjadagin 30. mai
spæla tær í Moldova, og fýra dagar seinni,  týsdagin 3. juni, endar hesin Nations League-bólkurin, tá Føroyar og Slovakia spæla á Tórsvølli.

Eftir fýra umfør hava Føroyar níggju stig: Liðið evur vunnið tvær ferðir á Gibraltar og einaferð á Moldova. Einasta tapið kom í Slovakia í 1. umfari, sum var í februar. Har endaði tað 3-0.

Slovakia er ósigrað oddalið í bólkinum, so talan verður um eina stóra og spennandi uppgávu 3. juni. Tað verður eisini ein long ferð til og frá Moldova áðrenn.

Í mun til fyrr í ár, tá fyrst Vaborg Østerø og síðani Eyðgerð Berg vóru við sum eykamálverjar, verður tað nú unga Gunnvá Lützen. Síðani eru eisini tvær 18-ára gamlar uttiknar, sum ikki hava verið partur av A-landsliðnum áður.

Talan er um Teresu Jacobsen úr HB og Sólju Ernstdóttir úr KÍ. Tær hava gjørt vart við seg í Betrideildini og á ungdómslandsliðnum seinastu árini. Báðar vóru við U19 í Moldova herfyri, tá Føroyar vunnu sín undankappingarbólk og komu upp í A-undankappingina.

Verjuspælarin Teresa Jacobsen í tvídysti móti NSÍ (Mynd: Sverri Egholm)

Hópurin:
Sunniva Willemoes Dal Christiansen, HB
Teresa Jacobsen, HB
Fridrikka Maria Klementsen, HB
Gunnvá Lutzen, HB
Óluva Allansdóttir Joensen, KÍ
Birita Ryan, KÍ
Durita Hummeland, KÍ
Eyðvør Klakstein, KÍ
Sólja Ernstsdóttir, KÍ
Tórunn Højgaard Joensen, KÍ
Sanna Judith Frida Svarvadal, KÍ
Jancy Mohr, KÍ
Julia Naomi Mortensen, NSÍ
Sara Samson Lamhauge, NSÍ
Heidi Sevdal, NSÍ
Jensa Kannuberg Tórolvsdóttir, Víkingur
Rakul Sørensen, Víkingur
Ásla Johannesen, Piteå IF (Svøríki)
Anna Caroline Brændstrup, HB Køge (Danmark)
Petra Sigvør Snedker Hoydal, AaB (Danmark)

Greinin varð fyrstu ferð løgd út 15. mai 2025

- Vit mennast eisini sum fótbóltssamband av hesum

- Tað er nógv øðrvísi enn tað, su mvit eru von við, og UEFA setur nógv krøv, men higartil hevur gingið væl at fyriskipa EM. Maria Ziskason setur eisini orð á føroyska stríðsviljan, og hvat EM gevur

 

SkrivaÐ:

Agnar Prestá

Undanfarna vikuskiftið byrjaði fyrsta EM-endaspælið í fótbólti á føroyskari jørð. Hetta vikuskiftið verður avgjørt hvør fer heimaftur við heiðursmerkjum frá Evopameistarakappingini fyri U17-gentur.

Eftir seinasta dystin hjá føroysku gentunum, sum var á Tórsvølli móti Niðurlondum, tók Maria Ziskason úr FSF samanum gongdina higartil.

Tað var mest yvirskipað um, hvussu dagarnar ganga, og tað at UEFA er nógv á og krevur nógv av fyriskipanini.

- Tað eru fleiri ting, sum vit ikki eru von við, men higartil hevur gingist væl.

Maria Ziskason hevur í nógv ár arbeitt við fótbólti og serliga kvinnufótbólti. Hon heldur, at har var okkurt ítróttarligt at heinta hjá føroysku U17-gentunum, hóast munurin á maltalvunum var stórur. Eisini er gularótin har fyri skipanina sum heild.

- Eg haldi, at sum Fótbóltssamband mennast vit nógv av hesum. Vit skulu gera ymiskt øðrvísi, og nógv fólk eru í gongd allatíðina og arbeiða fyri at fáa alt at hanga saman.

Til stóru uppgávuna móti Niðurlondum í gjár (Myndir: Sverri Egholm)

Maria heldur, at tað veðrur spennandi, nú kappingin fer inn í seinna og avgerandi partin: Nógvir góður fótbóltur er at bjóða hjá føroyingunum, og nú eru tey í FSF og rundanum meira vand við tað ymiska. 

Tórsvøllur og Djúpumýra eru karmir um dystirnar í EM-endaspælinum hjá U17 gentum. EM finalan verður á Tórsvøllu í morgin, sunnudagin 18. mai.

Hoyr alla samrøðuna við Mariu Ziskason her

Dystirnir hesa seinastu vikuna hava verið hesir:

Leygardagin 10. mai:
Niðurlond - Føroyar 9-0
Noreg - Eysturríki 0-0

Sunnudagin 11. mai:
Italia - Spania 2-1
Frakland - Poland 3-1

Mikudagin 14. mai
Hálvfinalur
Niðurlond - Frakland 1-1 - 4-3 eftir brotssparkskapping
Italia - Noreg 1-3

Dysturin um 5. pláss:
Eysturríki - Spania 1-6

Finalan millum Niðurlond og Spania verður spæld á Tórsvølli í dag, leygardagin 17. mai klokkan 18.

Greinin varð fyrstu ferð løgd út 11. mai 2025

KÍ leingir tíðliga við lyklaspælarar

Hallur Hansson, Odmar Færø og Páll Klettskarð hava sett undirskriftina á. Landsliðsliðformaðurin og verjuskansin hava longt við tveimum árum, meðan mest skorandi KÍ-spælarin eisini spælir í kongabláum í 2026

Páll Andrasson Klettskarð og Odmar Færø saman við Magnusi Powell, venjara. Royndu menninir hava sagt ja til at halda fram í KÍ - Páll í 2026 eisini og Odmar í 2026 og 2027 (Mynd: ki.fo)

SkrivaÐ:

Agnar Prestá

KÍ sendir sterk tekin úteftir fyri tíðina. Hetta er galdandi á vøllinum - har liðið er ósigrað oddalið og í hálvfinaluni  í steypakappingini - og uttanfyri vøllin, har KÍ nú hevur longt við fýra ógvuliga týðandi spælarar. Ítøkiligar ætlanir fyri næstu árini eisini verða lagdar væl fyrr enn í fjør í Klaksvík.

Í seinastu viku var tað René Shaki Joensen, sum skrivaði undir nýggjan sáttmála. Fjølbroytti landsliðsspælarin avgjørdi síðani oddadystin í Runavík fríggjakvøldið.

Í vikuni legði KÍ grein út á heimasíðuni undir heitinum "Tvær legendur undirskrivað í dag". Annar er uppruna KÍ'ari og skýtur nógv mál - eingin hevur skorað fleiri fyri besta mansliðð felagsins - meðan hin er uppvaksin í høvuðsstaðnum og skal í størri mun skal royna at verja fyri.

Heimasíðan hjá KÍ skrivar, at 35 ára gamli Odmar Færø og skjótt 35 ára gamli Páll Andrasson Klettskarð og Odmar Færø hava skrivað undir ávikavist tvey-ára og eitt-árs sáttmála.

- Tað var ongantíð nakar ivi um hvar eg skuldi spæla fótbólt, sigur Páll Klettskarð við ki.fo.

- Ja, tað vóru fleiri onnur lið, ið ryktu í meg, men eg trúgvi fult og fast upp á hetta prosjektið og KÍ, sigur Odmar Færø, ið vil røkka enn longri.


Páll Andrasson Klettskarð hevur skorað tíggju mál fyrsta triðingin, og KÍ er einsamalt oddalið við fullum stigatali (Savnsmynd: Sverri Egholm)

Hallur var nær við at gevast

Eins og Odmar Færø, hevur Hallur Hansson skrivað undir sáttmála við KÍ, sum er galdandi til og við 2027.

- Hallur hevur sera stóran týdning fyri KÍ. Hann er ein, sum vísir vegin, ikki bert undir dysti, men sanniliga eisini undir venjing, í skiftingarrúminum og uttan fyri vøllin. Hann gongur á odda, og er eisini ein av bestu leikarum í føroysku kappingini, sigur høvuðsvenjarin Magnus Powell.

Hallur hevur verið nógv darvaður av skaðum seinastu árini - millum annað í fjør - og fyri KÍ-heimasíðuni dylur miðvallarin ikki fyri, at hann umhugsaði at gevast við fótbóltinum.

-  Tað sá rættiliga svart út í fjør, og eg hugsaði eisini, um løtan var komin at gevast. Tíbetur bleiv tað ikki niðurstøðan, tí í ár føli eg meg væl, og tað er sera stuttligt at spæla við fullari orku aftur. Eg føli lítið og onki til pínu, og hugsi fyrst og fremst um at vinna næsta dystin, sigur landsliðsliðformaðurin.

Hallur Hansson saman við Magnusi Powell, sum eisini hevur sáttmála fyri næsta ár ár (Mynd: ki.fo)

Greinin varð fyrstu ferð løgd út 14. mai 2025

HB veteranar væl móttiknir í Íslandi

Gongufelagið fekk góða móttøku á ráðhúsinum í Reykjavík og hjá ítróttafelagnum ÍA á Akranesi

Heiða Björg Hilmirsdóttir, borgarstjóri í Reykjavík, saman við føroyska ferðalagnum (Mynd: reykjavik.is)

SkrivaÐ:

Ingi Samuelsen

Í farnu viku var eitt feralag av tilkomnum HB’arum á ferð í Íslandi í eina viku. Talan er um sokallaða gongufelagið, mannað við eldri fótbóltsleikarum, sum hvønn leygardag hittast at ganga gongutúrar runt um í Havnini og aðrastani við.

Teir hava eisini verið úti í heimi og ferðast saman fleiri ferðir, eitt nú í USA, Turkalandi, Ísrael og London.

Í farnu viku var eitt ferðalag á 12 mans í Íslandi í nakrar dagar.

Eitt nú vitjaðu teir í ráðhúsinum í Reykjavík, har teir vóru væl móttiknir.

Heimasíðan hjá Reykjavíkarborg ger heilt fitt burtur úr vitjanini, og har verður sjálvandi eisini gjørt vart við, at ferðaleiðarin á ferðini er fyrrverandi borgarstjórin í Tórshavn, Poul Michelsen.

Eitt nú verður gjørt vart við, at Poul Michelsen var millum røðararnar, tá hábærsliga ráðhúsið í Reykjavík varð tikið í nýtslu í 1992. Umframt táverandi borgarstjóran í Havn, hildu eisini Davíð Oddsson, forsætisráðharri, Vigdís Finnbogadóttir, forseti, og Markus Örn Antonsson, táverandi borgarstjóri í Reykjavík røðu.

Núverandi borgarstjórin í Reykjavík, Heiða Björg Hilmirsdóttir, tók hjartaliga ímóti føroyska ferðalagnum, sum takkaði fyri blíðskapin við at tríva í at syngja vældámda føroyska vallarasangin “Eins og áarstreymur rennur”, skrivar reykjavik.is.

Sí greinina her

HB’ararnir vitjaðu eisini á Akranesi hjá fótbóltsfelagnum har ÍA, har tøtt vinarbond eru knýtt millum eldri ÍA’arar og HB’arar.

- Vit hildu eina rimmar veitslu í felagshølinum hjá ÍA. Vit vóru eini 20 fólk í tali, bæði havnarmenn og skagamenn, greiðir Poul Michelsen frá.

Sum sæt á myndini herundir, høvdu føroyingarnir tey-svørtu HB-troyggjurnar við sær á veitsluna, sum eisini fekk umrøðu í Morgunblaðnum. 

HB-ferðaliðið saman við íslendskum vinfólkum á Akranesi (Mynd: Morgunblaðið)

Greinin varð fyrstu ferð løgd út 13. mai 2025

Flogbóltskvinnurnar leika venjingardystir ímóti Íslandi

Hetta vikuskifti leikar kvinnulandsliðið í flogbólti tríggjar venjingardystir ímóti íslendska kvinnulandslilðnum. Íslendsku kvinnurnar komu til Føroyar í gjár, og fara aftur til Íslands mánadagin

 

SkrivaÐ:

Tíðindaskriv

Fyri bæði føroysku og íslendsku kvinnurnar, eru dystirnir liður í fyrireikingunum til CEV Silver League, sum byrjar 30. mai og heldur fram til 15. juni.

Síðani finalurnar í Bónus kappingini vóru leiktar og kappingin harvið endaði, hava føroysku kvinnurnar verið ígjøgnum eina rættuliga harða venjingarætlan.

Ciro Zoratti, høvuðsvenjari hjá føroysku kvinnunum sigur, at dystirnir ímóti Íslandi eru eitt gott høvi at royna leikætlanir í einum veruligum dysti, har leikararnir verður settur undir trýst av einum sterkurm íslendskum liði. Hartil eru dystirnir ein partur av tilgongdini at finna fram til teir 14 leikararnar, sum skulu mynda føroyska liðið til Silver League kappingina.

Yvir teir tríggjar dystirnar, fer venjarin at royna íalt 23 leikarar - tó við 14 leikarum til hvønn dystin.

Dystirnir, sum allir verða í ítróttarhøllini í Kollafirði. Fyrsti dystur varð leiktur í gjárkvøldið, siðan verða dystir í dag og sunnudagin, báðar dagarnar klokkan 14.

Fyrsti dysturin hjá føroyska kvinnulandsliðnum í Silver League kappingini verður í Jelgava í Lettlandi hin 30. mai. Tann dysturin verður ímóti Lettlandi. Dagin eftir leika kvinnurnar ímóti Ísrael.

Greinin varð fyrstu ferð løgd út 12. mai 2025