FSF og Håkan Ericson hava endað samstarvið

Mikudagin varð avtala gjørd við A-landsliðsvenjaran hjá monnum um at enda samstarvið – FSF hevur gjørt avtalu við Eyðun Klakstein og Atla Gregersen, um at standa á odda fyri manslandsliðnum til UEFA Nations League dystirnar, sum verða á útivølli um ein mánað

Mynd: Sverri Egholm

SkrivaÐ:

Tíðindaskriv

Seinastu fimm árini hevur Håkan Ericson staðið á odda fyri A-landsliðnum hjá monnum. Men nú eitt gott ár er eftir av avtaluni, eru Fótbóltssamband Føroya og Håkan Ericson blivin samd um at enda samstarvið.

Í staðin hevur FSF gjørt avtalu við Eyðun Klakstein og Atla Gregersen, um at standa á odda fyri manslandsliðnum til UEFA Nations League dystirnar, sum verða á útivølli um ein mánað.

– FSF ynskir at takka Håkani Ericson fyri samstarvið hesi fimm árini, hann hevur verið venjari hjá føroyska A-landsliðnum. Síðani tann 3. september í 2020 til dystin sunnukvøldið móti Lettlandi, hevur Håkan staðið á odda fyri landsliðnum í 34 kappingardystum. Í hesum tíðarskeiðnum hevur hann fingið stig í nærum helvtina av dystunum, og er hann sostatt tann venjarin, ið hevur fingið bestu úrslitini við landsliðnum.

– Samstundis sum vit staðfesta, at okkara landslið er sera sterkt, so er samlaða úrtøkan ikki nøktandi. Vit liggja niðast í bólkinum, og hava higartil ikki megnað at vunnið nakran dyst – heldur ikki á heimavølli. Undir hesum umstøðum halda vit tað vera best at fáa nýggjar kreftir at standa á odda fyri okkara A-landsliðið við monnum, sigur Christian Andreasen, forseti í Fótbóltssambandi Føroya.

Greinin varð fyrstu ferð løgd út 16. oktober 2024

Føroyar - Lettland: Mistu enn eina leiðslu

Føroyska landsliðið var betri meginpartin av dystinum, men tað rakk ikki á mál á Tórsvølli sunnukvøldið

Lettland javnaði nærum burturúr ongum (Mynd: Andrei Antal)

SkrivaÐ:

Áron Vest

Føroyar vóru nakað omaná í fyrra hálvleiki í dystinum móti Lettlandi á Tórsvølli sunnukvøldið. Ongin veruligur málmøguleiki kom teir fyrstu 15 minuttirnar. Fyrsta málmøguleikan átti útiliðið.

Áhugavert var at síggja, at uppspælið hjá føroyska landsliðnum bleiv bygt upp við trimum í miðverjuni. Hetta gav føroysku stríðsmonnunum nakað av breidd, hóast nógv av spælinum fór gjøgnum miðjuna.

Tá ið eitt korter var spælt, fingu lettar ein málmøguleika, har áleyparin hjá lettum fekk fría renning, sterkt eltur av Oddmari Færø. Bárður á Reynatrøð í føroyska málinum stjórbjargaði – helst vildi onkur hildið, at talan var um rangstøðu í uppspælinum, men so var ikki.

Meinhard Egilsson hevði eina góða skotroynd, inni í brotsteigarmarkinum, har kviku føturnir komu honum til góðar. Tíverri stóð málverjin í lettiska málinum, Rihard Matrevics, royndina – og bjargaði.

Ein av áleyparunum hjá Lettlandi, Roberts Uldrikis, fekk eina skotroynd, sum lættliga kundi gerast meira vandamikil. Við holi í miðverjuni hjá Føroyum, sá hann skotmøguleika og smekkaði til. Til alla lukku fór skotið einar 5-6 metrar oman fyri málið.

Tá ein góður hálvur tími var eftir, var Meinhard aftur við eini skotroynd. Aftur hesaferð stóð lettiski málverjin royndina – og bjargaði einum góðum málmøguleika hjá glyvramanninum.

Tá fimm minuttir restaðu í hálvleikinum, var aftur vandamál á skrá, í lettiska brotsteigarmarkinum. Brandur Hendriksson fekk ein illa spældan bólt frá lettiska málverjanum, sum hann so spældi aftureftir til Hanus Sørensen. Við framúr uppspælið frá Brandi, smekkaði Hanus bóltin í netið, til 1-0 til Føroyar. Hetta er fyrsta mál hjá Hanusi á føroyska A-landsliðnum.

Føroyiska landsliðið byrjaði seinna hálvleik væl. Hanus Sørensen hevði góða skotroynd, hóast tað ikki var so hart – í 55. Minutti. Málverjin hjá lettiska landsliðnum bjargaði uttan stórvegis trupulleikar.

Tá ein lítil tími var farin, framdi Føroyar ein trýfalda útskifting. Inn komu Jóannes Bjartalíð, Adrian Justinussen og Sølvi Vatnhamar. Ein heldur offensiv útskifting, sum ábendingar eisini vóru um undan dystinum. Út fóru René Shaki, Hannes Agnarsson og Brandur Hendriksson.

Jóannes Bjartalíð fekk eina góða byrjan, tá hann framvið høgru síðu fekk víst, hvør bóltsnillingur hann er. Nakað úti í høgru síðu fekk hann eina góða skotroynd, men tíverri datt bólturin á skeiva beinið og bólturin fór væl omanfyri málið.

Tá tjúgu minuttir restaðu í, so fingu gestirnir hol á. Andrej Ciganiks spældi ein langan deyðbólt úr vinstru síðu, inn til eitt púra óvardan Dario Sits, sum hegnisliga og uttan bivan umsetti eina sera góða avlevering og innlegg til mál.  

Hanus Sørensen fekk enn eina skotroynd í 72. minutti, beint uttan fyri brotsteigarmarkið smekkaði til, men lettiski málverjin stórbjargaði.

Tá 78 minuttir vórðu spældir framdi Håkan Ericson eina defensiva útskifting. Tørvur var á frískum beinum í verjuni. Oddmar Færø bleiv útskiftur og inn kom 07 Vestur leikarin, Sonni Ragnar Nattestad. 

Jóan Símun Edmundsson, sum varð settur á bonkin til dystin í dag, bleiv í 83. minutti innskiftur, meðan avloysari hansara, Meinhard Egilsson, bleiv útskiftur.

Tað var um reppið, at lettar mundu lagt seg á odda 2-1, tá ein bóltur bleiv sendur hart inneftir málstrikuni og beint framvið málinum. Lukkutíð fyri Føroyar var ongin letti í bakrúminum at móttaka bóltin. Nú tóktist sum Føroyar mistu tamarhaldið og tann feril av fokus sum var eftir, móti endanum á dystinum. 

Hetta er fjórðu ferð í ár, at føroyska landsliðið missur eina leiðslu í kappingardysti. Til hús fóru 2.017 áskoðarar, umframt leikarar, við blandaðum kenslum um 1-1 úrslit móti Lettlandi.

Sí myndirnar frá dystinum

Nations League Deild C, bólkur 4
4. umfar - Sunnudagin 13. oktober á Tórsvølli

Føroyar - Lettland 1-1 (1-0)
40' Hanus Sørensen (Brandur Hendriksson) 1-0
69' Dario Sits (Andrej Ciganiks) 1-1

Føroyar (4-5-1): Bárður á Reynatrøð (MV) - Jann Julin Benjaminsen, Odmar Færø (78' Sonni Ragnar Nattestad), Andrias Edmundsson, Viljormur Davidsen (L) - René Shaki Joensen (57' Jóannes Bjartalíð), Hanus Sørensen, Gunnar Vatnhamar, Brandur Hendriksson Olsen (57' Sølvi Vatnhamar), Hannes Agnarsson (57' Adrian Justinussen) - Meinhard Egilsson Olsen (83' Jóan Símun Edmundsson)

Støðan í bólkinum:
1. Norðurmakedónia 10 stig
2. Armenia 4 stig
3. Lettland 4 stig
4. Føroyar 3 stig 

Fýra umfør eru nú spæld. Tað eru seks umfør, sum skulu spælast - niðasta liðið í bólkinum skal spæla play-off dyst um niðurflyting.

(Myndir: Andrei Antal)

Greinin varð fyrstu ferð løgd út 13. oktober 2024

Håkan Ericson: - Hetta er eitt sinnisligt spæl

Svenski venjarin er ónøgdur við 1-1 málið, men kennir ikki trýst á sær og liðnum. Hann var annars fáorðaður sunnukvøldið, men sigur samanumtakandi: - Hetta er bara fótbóltur

Håkan Ericson peikaði eftir dystin á, at Føroyar stýrdi dystinum meginpartinum av tíðini, men at tað ikki er nóg gott at missa leiðsluna (Mynd: Andrei Antal)

SkrivaÐ:

Áron Vest

Teir vóru allir á einum máli um, at tað var ein serdeilis keðilig verjustøða sum gjørdi, at teir mistu á stokkinum. Hjá venjaranum er ikki støðan ikki øðrvísi. 

- Hvat er tað, sum gongur galið hjá tykkum í kvøld?

- Tað kann vera so nógv, men eg haldi, at vit stýra dystinum soleiðis sum vit ynskja tað. Tá teir so fáa málið til 1-1, fer eitt sindur av styrki úr okkara mentalu lyftu, um eg kann siga tað soleiðis. Vit hava einar 15-20 minuttir, har eru ov vánaligir, men undantikið tí, so haldi eg, at vit eiga hendan dystin, segði Håkan Ericson við Portalin. 

Føroysku stríðsmenninir áttu góðar portiónir av momentum. Tað var sjón fyri søgn, at teir fóru eftir sigrinum, men tað ikki á mál. 

- Vit vildu sjálvandi ynskt, at vit fingu umsett okkara mongu álopsroyndir til mál. Eisini tí, at vit høvdu bóltin nógv meir enn teir, í størsta partinum av dystinum, legði svenski venjarin afturat.

- Kennist tað á liðnum, at tit í longri tíð hava mangla leikarar sum Jóannes Bjartalíð og Brandur H. Olsen?

- Tað er jú klárt, at millum hasir spælararnir sum tú nevnir, eru avgerandi faktorar í okkara spælið. Vit hava manglar teir, men tað er eisini keðiligt, at Brandur og Jóan Símun, ikki fáa so nógva spælitíð, har teir spæla til dagligt, sigur Håkan Ericson. 

Teir á liðnum tvíhalda um, at uppleggið til dystin í dag - dystarætlanin - var gott og at tað var neyðugt, at halda seg til tað. Tó var tørvur á, at áðurnevndu leikararnir spældu í dystinum í dag, sigur venjarin.

- Tað var mín avgerð, at lata teir báðar (Jóannes og Brandur) spæla í dag. Teir spældu eisini væl í seinasta dysti, tí hevur tað nógv at siga fyri okkara ætlanir, at teir eru við í dag, leggur Håkan Ericson afturat.

- Kenna tit nakað trýst á tykkum?

- Nei, tað vildi eg ikki mett. Vit spæla jú væl í dag, hóast vit eru sera frustreraðir yvir at missa leiðsluna, svarar sviin Portalinum.

Hvat sigur ein venjari til sínar leikarar eftir ein dyst sum hendan?
- Eg havi sagt við teir, at eg var væl nøgdur við spælið. Hóast hetta, so má eg vera líka ærligur við fjølmiðlarnar, sum eg eri við mínar spælarar. Eg havi eisini sagt við teir, at eg eri so langt frá nøgdur við støðuna, sum gevur mótstøðuliðnum 1-1 málið, sigur Håkan Ericson.

Tað var eygsæð, at talan var um eitt korter, har leikliga gongdin haltaði hjá føroyska landsliðnum. Hetta ásannar Håkan Ericson eisini.

- Eg havi sagt, at tað at missa leiðsluna, eri eg ikki nøgdur við. Og tað kemur frá hjartanum, men tað er tað, sum eg meini, segði venjarin við Portalin at enda. 

Greinin varð fyrstu ferð løgd út 13. oktober 2024

U21 endaði við góðum sigri

Liðskiparin Noah Mneney skoraði einasta málið á Tórsvølli, har Hvítarussland vitjaði í kvøld. Føroyar enda á 4. plássi við tíggju stigum fyri tíggju dystir

Liðskiparin, Noah Mneney tryggjaði Føroyum sigur í sínum seinasta U21 landsdysti (Mynd: Bjarni Enghamar/FSF)

SkrivaÐ:

Agnar Prestá

Føroyar vunnu útidystin móti Hvítarusslandi, og endurtóku í heimadystinum á Tórsvølli týsdagin. Harvið endaðu Eyðun Klakstein, Atli Gregersen, restina av toyminum og ungu føroysku menninir væl.

Tað var liðformaðurin Noah Mneney, sum tíggju minttuir fyri steðgin stýrdi góða innlegginum úr høgru frá HB-liðfelaganum Ása Dam í netið. Ein góður stútari og ein góður seinastu U21-dystir hjá Noah.

Teir allarflestu hava ikki aldur til næstu kapping, men Børge Petersen, Gullbrandur Øregaard, Ari í Haraldsstovu Petersen hinir hildu nullið. Sum heild eitt føroyskt lið ið stríddist væl og spældi taktiskt væl.

Føroyar skaptu nakrar støður í 2. hálvleiki - serliga í mótálopum. Hvítarussar trýstu í løtum, men tað endaði 1-0.

Samanlagt tíggju stig í tíggju umførum og 4. pláss í bólki við seks liðum varð endaúrslitið. Júst tað sama sum undir Sámal Erik Hentze og Atla Gregersen, og eitt stig aftanfyri metið frá undankappingini 2009-2010, har Bill McLeod Jacobsen og Heðin Askham stjórnaðu liðnum.

Seinasta umfar í EM-undankappingini
Týsdagin 15. oktober

Føroyar - Hvítarussland 1-0 (1-0)
36' 1-0 Noah Mneney (Ási Dam)

Føroyar (5-4-1/3-4-3): Ari í Haraldsstovu Petersen - Ási Dam, Gullbrandur Øregaard, Børge Petersen, Elias Rusborg, Martin Agnarsson - Áki Debes Samuelsen (57' Leivur Guttesen), Emil Weihe Joensen (56' Aron Ellingsgaard), Noah Mneney, Olaf Bárðarson (82' Beinir Nolsøe) - Jørgen Nielsen (89' Gutti Dahl-Olsen)

Úrslitið í bólkinum eftir 10. umfar:
1. Portugal 27 stig
2. Kroatia 22 stig
3. Grikkaland 17 stig
4. Føroyar 10 stig
5. Hvítarussland 6 stig
6. Andorra 3 stig

Fleiri myndir her

(Mynd: Bjarni Enghamar / FSF)

Greinin varð fyrstu ferð løgd út 15. oktober 2024

U21: Endaðu fyri triðju ferð við tvísiffraðum tali

Hesa undankappingina var liðið nær við at taka stigametið frá 2009-2010 (ellivu stig) Tað var aðru ferð á rað, at U21-landsliðið hjá Føroyum fekk 10 stig fyri tíggju dystir

Fagnaður eftir føroyska málið á Tórsvølli týsdagin. Hetta staðfesti aftur, at føroyskur fótbóltur kann (Mynd: Bjarni Enghamar)

SkrivaÐ:

Agnar Prestá

17 ár og ein dag eftir, at eitt føroyskt U21-landsliðið á fyrsta sinni fekk ein sigur - og stig yvirhøvur - í einum undankappingardysti, vunnu Føroyar á Hvítarusslandi.

Eins og á Svangaskarði heystardagin í 2007, vunnu Føroyar 1-0. Hesaferð var Noah Mneney málskjútti - í 2007 var tað Magnus Hendriksson Olsen úr B71. Tá helt Gunnar Nielsen málið reint, hesaferð var tað Ari í Haraldsstovu Petersen.

Við sigrinum í vikuni tryggjaði U21-landsliðið, at tað í aðru undankappingini á rað fekk tíggju stig. Tá var Sámal Erik Hentze høvuðsvenjari - hesaferð var tað Eyðun Klakstein. Atli Gregersen hevur verið hjálparvenjari báðar undankappingarnar, og síðani Bagge tók við í 2020. 

Miðaltalið seinastu tríggjar undankappingarnar er beint undir tíggju, tí í 2020 fingu Føroyar níggju stig í seks dystum. Samanlagt hava seinastu árini harvið verið góð, hvat stigum viðvíkur á U21-landsliðnum.

Áki Samuelsen í javnleikinum móti Serbia í 2021. HB-spælarin hevur spælt nógvar dystir - og hevur verið við at fingið nógv stig - síðani á heysti 2020, tá hann gjørdist yngsti U21-spælarin nakrantíð fyri Føroyar (Mynd: Sverri Egholm) 

Stigametið frá 2009-2010 stendur tó enn. Heðin Askham og Bill McLeod Jacobsen vóru venjarar, tá Føroyar vunnu á Lettlandi, Andorra - og Russlandi (Jóan Símun Edmundsson gjørdi sigursmálið). Javnleikir komu eisini til høldar móti Moldova og Andorra. Hetta gav 11 stig í tíggju dystum.

Nøkur eitt sindur lakari ár vóru, har talið av liðum í bólkunum fór niður. U21-landsliðið hevur tó gjøgnumgangandi og javnan hótt væl størri tjóðir í nógvum dystum - og eisini fingið nógv flott stig. Í 2017-2018 vóru millum annað tveir javnleikir móti Póllandi, og liðið við fleiri núverandi A-landsliðsspælarum fekk sjey stig undir Eli Hentze.

Í níggju undankappingum higartil hevur miðaltalið verið gott, tá man hugsar um støðuna hjá Føroyum í altjóða fótbólti. U21-landsliðið hevur givið fótbóltsáhugaðum og føroyingum sum heild nógvar góðar løtur - næsta ár fara Eyðun Klakstein og ein nærum heilt nýggjur bólkur av leikarum undir nýggjar avbjóðingar.

U21-undankappingar:
EM 2025: 10 stig
EM 2023: 10 stig
EM 2021: 9 stig
EM 2019: 7 stig
EM 2017: 1 stig
EM 2015: 4 stig *
EM 2013: 3 stig *
EM 2011: 11 stig
EM 2009: 4 stig

* Spældu bert átta dystir í hesum báðum undankappingunum - í hinum var talan um tíggju dystir

Miðaltal: 7,5 stig

Greinin varð fyrstu ferð løgd út 16. oktober 2024

FC Suðuroy tók stórt fet móti uppflytingini

Útsetti dysturin móti B36 á Eiðinum endaði 2-1. Ein sigur seinastu tvey umførini er í øllum førum nóg mikið at tryggja fyrstu uppflytingina til Betrideildina í tíggju ár

Salmundur Bech í dysti fyri TB/FCS/Royn móti B36 í 2018. Nú er hann við at senda barndómsfelagið nærri Betrideildini aftur (Savnsmynd: Sverri Egholm)

SkrivaÐ:

Agnar Prestá

FC Suðuroy er nú heilt nær við at tryggja uppflyting til Betrideildini eftir at liðið leygardagin basti B36.

Talan var um útsettan dyst, tann triðseinasti hjá báðum. Um B36 hevði vunnið, so hevði tað verið heilt sannlíkt, at bert eitt lið flutti beinleiðis upp, og at FC Suðuroy skuldi stríðst hart við TB og kanska B71 eisini um plássið.

Ístaðin nærum tryggjaði FC Suðuroy sær uppflyting. B36 gjørdi sjálvmál í 25. minutti, og í 39. minutti økti Salmundur Bech til 2-0. Heimaliðið var omaná í 1. hálvleiki men beint fyri steðgin minkaði Mattias Weihe Joensen til 2-1.

Tað endaði eisini 2-1 á Eiðinum. Harvið hevur FC Suðuroy nú fýra stig niður til 3. plássið, sum er minsta mark í mun til beinleiðis uppflyting, og fimm stig niður til TB á 4. plássinum. Um TB ikki yvirhálar grannarnar seinastu tvey umførini, so flytir FC Suðuroy beinleiðis upp - B71 kann so at siga ikki fáa liðið hjá Pól Thorsteinsson aftur.

Støðan í næstbestu mansdeildini, nú tvey umfør eru eftir at spæla:
Víkingur II 48 stig
FC Suðuroy 44 stig
B36 II 40 stig
TB 39 stig
B71 38 stig
AB 36 stig
NSÍ II 31 stig
KÍ II 30 stig
FC Hoyvík 19 stig
HB II 12 stig

FC Suðuroy flutti upp úr 2. deild í fjør, og harvið er talan um flott avrik hjá felagnum, sum ikki - sjálvstøðugt - hevur verið í Betrideildini síðani 2015. Í 2017 og 2018 var tað saman ið TB og Royn.

Ein sigur afturat, so er FC Suðuroy aftur í Betrideildini. Tað er eisini nóg mikið við 44 stigum, um TB, B36 og B71 ikki øll fáa fult seinastu tvey umførini.

Komandi dystir, allir verða spældir í dag, leygardagin, kl. 15.30:
NSÍ II - Víkingur II
B71 - HB II
TB - KÍ II
AB - FC Suðuroy
B36II - FC Hoyvík

Greinin varð fyrstu ferð løgd út 12. oktober 2024

Útskiftingin við Stóra fær ongar ítróttarligar avleiðingar

Talan verður um eina bót á 5.000 krónur, sum TB skal rinda

Í avgerðini hjá Fótbóltssambandi verður millum annað grundgivið fyri, hví ein nýggjur dystur ikki skal spælast

SkrivaÐ:

Agnar Prestá

Eftir hoyringar og nógvar metingar í farnu vikun er Kappingarnevndin komin fram til, at eingin umdystur verður við Stóra: At eingin ítróttarlig avleiðing verður fyri TB vegna fjórðu útskiftingini í fjórða steðginum.

Sí eisini: TB gjørdi ólóliga útskifting í yvirtíðini

Heldur verður talan um eina bót á 5.000 krónur, hevur Portalurin fingið váttað frá fleiri.

Feløgini fingu leygardagin avgerðina. Eftir hetta høvdu feløgini fimm samdøgur at kæra, og tað er á Sandoynni, at størri hugurin er til tess - B71 vildi hava nýggjan dyst vegna útskiftingina.

Sum skilst eru nógvar grundgevingar í úrskurðinum fyri, hví støðan ikki skal hava  nýggjan dyst við sær. Fordømi eru eisini uttanlands.

Í Suðuroynni er man helst lættur um, at støðan - har árvakni hjá dómaratoyminum umframt bonkinum hjá TB ikki var nóg stórt - ikki kostar á stigatalvuni.

Sigurin á B71 merkir, at TB nú er frammanfyri, bert eitt stig frá beinleiðis uppflyting og í løtuni liggur til at spæla upp- og niðurflytingardyst móti nummar 9 í Betrideildini.

Tað var í dystinum millum liðini leygardagin 5. oktober, at TB í 96. minutti skifti út fyri fjórðu ferð - spælarin nart ikki við bóltin teir 2-3 minuttirnar, hann var á vøllinum. Eitt lið hevur loyvi at gera fimm útskiftingar, men tað ber ikki til at nýta fleiri enn tríggjar steðgir - útyvir hálvleikssteðgin. 

Hetta gjørdi TB av óvart, og dómaratoymi forðaði tí ikki. Umsitingarliga mistakið ger tó ikki, at stig fara av kontuni hjá TB, og at nýggi dystur skal spælast - ikki uttan so at kæra kemur ini, og at nýggj støða verður tikin útfrá henni.

Greinin varð fyrstu ferð løgd út 12. oktober 2024

KÍ fingið málverjan upp á pláss

KÍ og danski málverjin, Mark Fabricius Jensen, hava skrivað undir tvey ára sáttmála, ið er galdandi til og við kappingarárið 2026

27-ára gamli Mark Jensen hevur verið greitt fyrstaval hjá KÍ so at siga alt kappingarárið - nú hava hann og Ari í Haraldsstovu Petersen sáttmála tvey tey næstu árini (Savnsynd: Sverri Egholm)

SkrivaÐ:

Áron Vest

KÍ hevur fingið teir fyrstu leikararnar til leikaralistan í 2025 upp á pláss. Spælarar sum Odmar Færø, Hallur Hansson, Mads Boe Mikkelsen og René Shaki Joensen hava undanfarnu árini skrivað sáttmála fyri fleiri ár, og seinastu tíðina hava fleiri longt.

Umframt Claes Kronberg, Árna Frederiksberg og toppskjúttan, Páll Andrasson Klettskarð, hevur danski málverjin, Mark Fabricius Jensen, longt sín sáttmála til kappingarendan í 2026. 

Mark kom til KÍ síðsta, eftir at hava spælt við norska felagnum Start. 

Mark F. Jensen til venjing á Tórsvølli undan evropeiskum dysti. Hann tók skjótt yvir hjá Ara í Haraldsstovu Petersen og hevur víst eitt gott stig, sum kappingarárið er liðið (Savnsmynd: Sverri Egholm)

Við heimasíðuna hjá KÍ sigur 27 ára gamli málverjin soleiðis, um hví hann hevur valt at longt avtaluna við KÍ:

- Høvuðsorsøkin til eg havi valt at framleingja avtaluna við KÍ er, at eg haldi meg hava verið í eini góðari gongd og gjørt framstig hetta kappingarárið. Tað gevur mær áræði til at avrika enn betri, so eg kann gera mítt til, at vit í KÍ fáa meir burtur úr næsta ár. Tað skal eisini sigast, at vit sum familja hava kent okkum vælkomin og trívast betri og betri í Klaksvík.

Mark hevur spælt 30 dystir fyri teir kongabláu í Klaksvík. Átta av teimum dystunum eru altjóða dystir. 

U21-landsliðsmálverjin Ari í Haraldsstovu Petersen hevur eisini sáttmála við KÍ í 2025 og 2026.

Greinin varð fyrstu ferð løgd út 18. oktober 2024

Martin Wood nýggjur hjálparvenjari hjá 07 Vestur

29-ára gamli danin, sum skiftir úr B36, fer í fulltíðarstarv og avloysir Tór-Ingar Akselsen

Martin Wood hevur áður arbeitt saman við Dan Brimsvík, og hevur gjørt tvey-ára sáttmála við 07 Vestur (Mynd: 07 Vestur)

SkrivaÐ:

Agnar Prestá

07 Vestur hevur sett 29 ára gamla danan, Martin Wood, í fulltíðarstarv sum hjálparvenjari hjá liðnum í Betrideildini.

- Martin, sum áður hevur staðið á odda fyri at leiða 1. deild hjá B36 upp í toppin, kemur við drúgvum royndum og vitan, ið fer at styrkja okkara hóp munandi.

Martin Wood verður ikki "bert" hjálparvenjari. Felagið skrivar, at hann verður eisini knýttur at teimum yngru leikarunum, har hann skal virka sum eitt slag av transitiónvenjara.

- Hetta merkir, at hann fer at tryggja, at okkara ungu evnaríku leikarar fáa tann stuðul og vegleiðing, teimum tørvar, fyri at taka næsta stigið og gerast partur av Betri-hópinum.

Martin Wood hevur áður arbeitt saman við Dan Brimsvík. 

- Vit vilja hava eitt spennandi og mennandi venjingarumhvørvi, og her passar Martin væl inn. Hann er Martin er nærlagdur, arbeiðssamur og dugir væl við einstaka leikaranum - nakað sum verður vektað høgt, sigur høvuðsvenjarin 

Martin hevur gjørt tvey ára sáttmála við 07 Vestur. Hann avloysir Tór-Ingar Akselsen, sum hevur verið hjálparvenjari síðani 2020.

Greinin varð fyrstu ferð løgd út 14. oktober 2024

NSÍ hevur nærum vunnið FM

Helga Mikkelsen avgjørdi seint í dystinum móti HB. Harvið er fyrsta føroyameistaraheitið hjá NSÍ-kvinnunum við yvir 99 prosent vissu komið í hús. Eitt umfar restar í

NSÍ-kvinnurnar fegnast um steypagullið - helst fáa tær greipuna endaliga í hús hetta vikuskifti (Savnsmynd: Sverri Egholm)

SkrivaÐ:

Agnar Prestá

Undanfarna vikuskiftið var tað steypafinalusigur á Tórsvølli, og sunnudagin so gott sum tryggjaði NSÍ sær føroyameistaraheitið. 

Helga Mikkelsen og Evelin Mastropasqua løgdu NSÍ á odda fyrra hálvleiki, og tað mesta sá út til at rigga hjá heimaliðnum.

Um tað vóru "gummibein", sum sníktu seg ikki, kann ikki staðfestast, men HB skoraði í øllum førum tvey mál upp á átta minuttir.

Talan gjørdist tó ikki um týðandi stigamiss, sum fekk KÍ við í FM-stríðið aftur. Hetta tí at 17-ára gamla Helga Mikkelsen í 87. minutti sló til aftur.

Sigurin kom í Betrideildardysti nummar 200 hjá venjaranum, Allan Dybczak.

3-2 og NSÍ er so gott sum føroyameistari hjá kvinnum á fyrsta sinni. Hetta tí at trý stig eru niður til KÍ, nú eitt umfar er eftir, og at NSÍ er 13 mál betri í málúrttøku.

KÍ vann 3-0 á Víkingi sunnudagin, men skal vinna við helst nakað yvir tíggju málum á HB í dag, samstundis sum NSÍ skal tapa í Sarpugerði. Harvið fer føroyameistaraheitið helst úr Klaksvík til Runavíkar.

Næstseinasta umfar í Betrideildini hjá kvinnum
Sunnudagin 13. oktober

NSÍ - HB 3-2 (2-0)
12' 1-0 Helga Mikkelsen
30' 2-0 Evelin Mastropasque (Julia Naomi Mortensen)
61' 2-1 Rebekka Benbakoura (Lý Djurhuus)
69' 2-2 Fridrikka Clementsen (Sunniva Willemoes)
87' 3-2 Helga Mikkelsen (Mirjam Huneck)

KÍ - Víkingur 3-0 (2-0)
13' 1-0 Eyðvør Klakkstein (Tóra Mohr)
23' 2-0 Malena Olsen (Jórun Patawary)
91+' 3-0 Tóra Mohr (Tórunn Joensen)

Seinasta umfar, báðir dystirnir verða spældir í dag, leygardagin, kl. 12.30:

Víkingur - NSÍ
HB - KÍ

Greinin varð fyrstu ferð løgd út 13. oktober 2024

John Eystberg fingið stóra viðurkenning frá UEFA

John Eystberg brúkar umleið 25 tímar um vikuna - nærum alla sína frítíð - at venja og skipa fyri gentu- og kvinnufótbólti í HB: At betra um venjingarumstøðurnar og at skapa trivna fyri leikararnar

53-ára gamli John venur U11-gentur og U16-gentur, umframt næstbesta kvinnuliðið hjá HB. - Við at vísa engagement í eygnahædd, gleði um fótbóltsspælið, at fara væl fyrireikaður til hvørja venjing, skapar tú karmar, sum fær genturnar at trívast (Mynd: HB/UEFA)

SkrivaÐ:

Agnar Prestá

Tá árliga UEFA Grassroots Week var, vórðu limalondini í UEFA biðin um at skjóta upp eina sonevnda "grasrótarhetju". Ein einstakling, sum hevur givið sítt íkast til fótbóltsumhvørvi í landinum.

- Vit eru errin og fegin av at hava eina slíka eldsál sum John í felagnum, og ynskja honum hjartaliga til lukku við viðurkenningini, skrivar HB á Facobook-síðu sínari.

Greinin varð fyrstu ferð løgd út 18. oktober 2024

Tuchel er nýggjur venjari hjá Onglandi

Heldur óvæntað tekur 51-ára gamli týskarin við eftir Gareth Southgate. Hetta hendir 1. januar og er sáttmálin í fyrstu syftu galdandi til og við HM-endaspælið í 2026

Thomas Tuchel var venjari tá Chelsea vann Champions League í 2021 við finalusigri á Manchester City (Mynd: EPA)

SkrivaÐ:

Agnar Prestá

Tað verður maðurin, sum vann Champions League við Chelsea í 2021, ið skal royna at leiða "Tær tríggjar leyvurnar" til fyrsta stóra steypið síðani HM í 1966.

Fyrrapartin mikudagin kunngjørdi enska fótbóltssambandið, FA, Thomas Tuchel sum nýggjan venjara.

Stutt eftir EM-finaluna í Berlin í summar, steðgaði Gareth Southgate í starvinum. Hann hevði tá staðið á odda í útvið átta ár. Síðani hevur Lee Carsley verið fyribils høvuðsvenjari.

Gareth Southgate leiddi Ongand til tvær EM-finalur - men tapti báðar (Mynd: EPA)

Tað verður Carsley eisini til seinastu Nations League-dystirnar í november. 1. januar tekur Thomas Tuchel, sum fyrr í ár varð uppsagdur í Bayern München, við.

51-ára gamli týskarin hevur áður stjórnað Mainz, Borussia Dortmund, PSG, CHelsea og so Bayern. Hann hevur ongantíð áður verið venjari á landsliðsstøði.

Thomas Tuchel var venjari, tá Chelsea vann Champions League í 2021 við finalusigri á Manchester City.

Hansara setan er úrslit av "drúgvum og gjøgnumførdum arbeiði" hjá einari enskari setanarnevnd. Leiðaraevnini, sum hann millum annað vísti í stjórnarleoysinum hjá Chelsea hava verið týðandi her, halda bretskir miðlar.

Onglendingurin Anthony Barry tekur við sum hjálparvenjari. Hann hevði stórt álit hjá Tuchel í Chelsea, og fór síðani við til Bayern.

Teir byrja í 2025 og uppgávan eitur HM 2026 - í fyrstu syftu í øllum førum. Sáttmálin millum FA og Thomas Tuchel er ikki longur enn 18 mánaðar.

Tuchel verður triði útlendski venjarin, eftir Sven-Göran Eriksson og Fabio Capello, sum skal stjórna enska manslandsliðnum.

Greinin varð fyrstu ferð løgd út 16. oktober 2024

Skjótt byrjar ferðin móti enn einum EM-endaspæli

18 spælarar eru úttiknir til tveir teir fyrstu undankappingardystirnar: Kosovo á Hálsi 6. november og Ukraina í Vilnius 10. november. Aleksandar Lacok er annar av málverjunum - allir í hópinum spæla uttan fyri Føroyar

Tað gekk ikki at røkka HM-endaspælinum, tí Føroyar taptu stórt í Skopje. Pauli Jacobsen er greiður fyrsti málverji, nú Nicholas Satchwell er skaddur (Mynd: Sverri Egholm)

SkrivaÐ:

Agnar Prestá

Í mun til HM play-off dystirnar móti Norðurmakedonia í mai, eru ikki so nógvar broytingar í landsliðshópinum.

Málverjin Nicholas Satchwell er langtíðarskaddur, og ístaðin er 20-ára gamli Aleksandar Lacok - vansliga nevndur Sasha - úttikin sum makkari/kappingarneyti hjá Paula Jacobsen. Sasha spælir nú við Lugi í næstbestu svensku deildini. Hann er valdur frammum Tórð Skorheim Guttesen úr Kyndli, sum var triðji málverji fyrr í ár - tá Satchwell var tøkur.

Aleksandar "Sasha" Lacok spældi eina rúgvu av U-landsdystum fyri Føroyar. Nú tekur málverjin, ið er skiftur úr Neistanum til svenskan hondbólt, stigið upp (Mynd: Egin Tollaksson Kass) 

Á vinstra vongi avloysir Rói Berg Hansen Janus Dam Djurhuus. Fyrrnevndi spælir annars í einari deild lægri enn Janus í Danmark, men Køge er í oddinum, og royndi vongurin úr Havn er komin fyri seg eftir at millum annað strongd rakti tíðliga í ár - tí var Rói ikki tøkur til avgerandi HM-dystirnar.

Sí eisini: - Eg megnaði ikki at koma upp úr songini í trý samdøgur 

Bjarni í Selvindi kann hesaferð fáa ein leiklut. Hann skorar eisini nógv mál fyri Val - í Íslandi og í evropeiskum dystum. Jónas Gunnarson Djurhuus sleppur ikki framat hesaferð heldur.

Helgi Hildarson Hoydal er skaddur í alboganum, og tí er tað púra nátúrligt, at Ísak Vedelsbøl avloysir hann. Harvið spæla allir í hópinum uttanlands til dagliga. Sterki 20-ára gamli strikuspælarin er nú í Sävehof.

Landsliðsvenjararnir, Peter Bredsdorff-Larsen og Hjalti Mohr Jacobsen, hava úttikið niðanfyristandandi 18 spælarar til undankappingardystirnar í november. Seinni verða 16 leikarar endaliga úttiknir til hvønn dyst - Elias Ellefsen á Skipagøtu hevur ikki spælt fyri Kiel hetta kappingarárið, men verður hann eftir at øllum at døma tøkur heilt skjótt.

Í hvørjum standi er Elias Ellefsen á Skipagøtu? Hetta hevur verið ein av høvuðsspurningunum til fleiri landsliðssamlingar, og soleiðis verður tað eftir øllum at døma eisini hesaferð (Mynd: Sverri Egholm)

Greinin varð fyrstu ferð løgd út 14. oktober 2024

H71 trekti mótsstøðu úr Grikkalandi

PAOK fer at geva hovyíkskvinnum nógv meira høvuðbrýggj enn mótstøðuliðið av Kýpros í síðsta umfari. Dystirnir verða spældir í november - tað er ikki greitt enn, um talan verður um heimadyst og útidyst

H71 var greitt omaná móti Latsia - í so stóran mun at dystirnir ikki góvu serliga nógva ítróttarliga meining (Mynd: Jens Kr. Vang)

SkrivaÐ:

Agnar Prestá

Síðsta vikuskifti vann H71 samanlagt 91-35, ja við 56 málum, í 2. umfari í European Cup. 

Kypriotiska meistaraliðið, Latsia, var eingin mótstøða á hesum stignum, men líknandi fær H71 ikki í næsta umfari.

Lutakast hevur verið til 3. umfar. Tað háttaði seg so, at hoyvíksvinnur skulu spæla móti PAOK úr Grikkalandi.

Talan er um eitt lið úr væl sterkari deild enn Latsia - eitt felag sum sendi sveisiska liðið Spono Eagles út í seinasta umfari. Spono Eagles var eitt av liðunum, sum H71 sendi út í 2021. Hoyvíkskvinnur vunnu tá fyrra dystin men taptu tann seinna - báðir vórðu spældir í Føroyum.

Mynd: Jens Kr. Vang

Tað er ikki greitt enn, um talan verður um heimadyst og útidyst. Í teimum fyrstu umførunum í European Cup avráða feløgini odta, at spæla báðar dystirnar á einum staði eitt vikuskifti. Í slíkum støðum rindar heimaliðið til dømis fyri gisting. Nú fara føroyska og grikska felagið helst skjótt at umrøðða støðuna, og um dystirnir skulu spælast 9 og 10. november ella eina viku seinni.

Greinin varð fyrstu ferð løgd út 16. oktober 2024

H71 lat 40 mál inn í Italia og tapti greitt

Ógvuliga ring útlit fyri víðari luttøku eftir fyrra dystin móti SSV Brixen. Liðini spæla aftur í kvøld

(Savnsmynd)

SkrivaÐ:

Agnar Prestá

Við einum ógvuliga ungum liði og báðum dystunum á útivølli, var ikki so nógv sum bendi á, at H71 fór at spæla seg víðari móti SSV Brixen. 

Italska felagið hevur veruliga profilar - serliga í álopsspælinum - og koppaði VÍF í tveimum dystum í Føroyum í fjør.

Tað eydnaðist heldur ikki hoyvíkingum at veruliga bjóða av í Brixen hóskvøld:ið Tað endaði 40-33.

Í steðginum var 20-14, og H71 fekk ikki justerað verjuna nóg væl ella neyðugu bjargingarnar til, at dysturin skuldi gerast spennandi. Heimaliðið skeyt eisini 40 mál í 2. hálvleiki og er stórfavorittur at spæla seg víðari.

Álopsparturin var meira jaligur hjá H71, hóast man ikki var heilt nóg effektivur. Blaðungi Jákup Egholm á vinstra vongi, ið eisini skýtur brotskøst, var toppskjútti hjá útiliðnum. Jón Rói Mohr Høgnesen á hinum vonginum og Rókur Ziskason skoraðu seks mál hvør.

H71 og SSV Brixen spæla aftur - í somu høll - í kvøld, leygarkvøldið klokkan 18 føroyska tíð.

European Cup 2. umfar -fyrru dystirnir hjá føroysku liðunum

Hósdagin 17. oktober
SSV Brixen - H71 40-33 (20-14)

Greinin varð fyrstu ferð løgd út 17. oktober 2024

Verður tungt hjá VÍF at venda tí

Heimaliðið gjørdi eitt hál seint í 1. hálvleiki, men fyrsta løtan í 2. hálvleiki kostaði helst víðari luttøkuna. Westwien vann 29-22 í Vestmanna - liðini spæla aftur í somu høll í kvøld

Filip Jojic hevur næstan ikki spælt higartil í ár. Nú er hann aftur, og Filip gjørdist toppskjútti í gjárkvøldið við seks málum (Savnsmynd: Jens Kr. Vang)

SkrivaÐ:

Agnar Prestá

Tað gekk striltið hjá báðum liðunum at skora fyrstu løtuna. Talan var um ein dyst, har ein málverji hjá hvørjum liði hevði 14 bjargingar. Tað at Mladen Mjeimacka stóð væl, bjargaði tó ikki VÍF, tí teirra skoteffektivitetur var væl minni - skoraðu uppá undir helmingin av sínum skotum.

VÍF skoraði annars trý tey seinastu málini fyri steðgin. 13-13 í hálvleikinum og gott hondbóltshuglag á mongu heimaáskoðarunum.

Dánjal Ragnarsson skoraði fyrsta málið eftir steðgin, og Mladen og verjan stóðu væl fyrstu minuttirnar. Men so komu steypavinnararnir úr Eysturríki av álvara í gongd: Handball Westwien skoraði sjey mál uppá seks minuttir, 14-20, og so varð tað tungt hjá VÍF.

Samanlagt skoraði VÍF bert níggju mál eftir steðgin. Munurin var sjey mál, tá samanum kom, og harvið skal liðið hjá Inga Olsen gera heilt nógv rætt í morgin, um tað skal gerast spennandi aftur.

Talan er um eitt mótstøðulið úr góðari deild við nógvum streingjum at spæla uppá, góðum fysikki og harvið sterkari verju, umframt málverja. VÍF fekk tað ikki í nóg stóran mun at hanga saman yvir ein heilan dyst - serliga í álopinum.

Liðini spæla seinna dystin í kvøld, leygardagin 19. oktober, klokkan 19. Spælt verður aftur í Høllini í Vestmanna. VÍF skal vinna við minst sjey málum fyri at hava møguleika fyri at koma víðari.

European Cup 2. umfar - fyrru dystirnir hjá føroysku liðunum
Fríggjadagin 18. oktober
VÍF - Handball West Wien 22-29 (13-13)

Greinin varð fyrstu ferð løgd út 18. oktober 2024

Bronsan glapp, men Svøríki fekk dygga mótstøðu

NEVZA U17 bonsudystur, dreingir, Føroyar - Svøríki 0-3 (22-25, 26-28, 22-25)

 

SkrivaÐ:

Tíðindaskriv

Tað eydnaðist ikki føroysku U17 dreingjunum í flogbólti at vinna bronsuna, men Svørík fekk tó skarpan gang, og í triðja setti vóru Føroyar á odda við sjey stigum, 11-4.

Svøríki javnaði tó til 14-14, og fór framum 20-16. Føroyar vunnu tá fýra bóltar á rað og javnaðu til 20-20. Svøríki gjørdi so tað sama - vann fýra stig á rað - og legði seg á odda 24-20 og vann settið 25-22 við triðja settbóltinum - og harvið gjørdist bronsan svensk.

Men eisini í hinum báðum settunum høvdu Føroyar staðið seg væl - serliga í øðrum setti, sum skuldi út í umbóltar, áðrenn Svøríki vann 28-26.

Í fyrsta setti var javnt til 9-9, áðrenn tað fór at dragna millum liðini, og Svøríki fór framum 16-10 og 19-12. Men við seks stigum á rað minkaðu Føroyar um munin til 18-19. Svøríki helt seg tó frammanfyri og vann 25-22 við triðja settbóltinum.

Sostatt vann Svøríki bronsu, og Føroyar gjørdust nummar fýra í kappingini, Ongland nr. 5 og tey bæði donsku liðini nr. seks og sjey.

Leiðin hjá føroysku U17 dreingjunum í bronsufinaluna:

Føroyar - Ongland 3-2 (18-25, 25-21, 25-21, 21-25, 15-12)
Svøríki - Føroyar 3-0 (25-23, 26-24, 25-15)
Føroyar - DanmarkHvítt 3-0 (27-25, 29-27, 25-18)

Greinin varð fyrstu ferð løgd út 16. oktober 2024

Challenge Cup-luttøkan hjá Mjølni av

Føroyameistararnir vunnu fyrsta setti í fyrra dystinum men taptu hósdagin 3-0 fyri Reshetylika

Mynd: Mjølnir

SkrivaÐ:

Agnar Prestá

Ukrainska mótstøðuliðið var, sum væntað, ov sterkt til at tað gjørdist heilt spennandi samanlagt í Klaksvík.

Samanlagdi vann Reshetylika 6-1 yvir tveir dystir móti føroyameistarunum í mansflogbólti, Mjølni.

Mjølnir byrjaði annars røðina við at vinna fyrsta setti 25-22 og bjóðaði væl av eina løtu í 2. setti.

Útiliðið vann tó fyrsta dystin 3-1, og í seinna dystinum hósdagin gekst verri hjá Mjølni fyrstu løtuna. Heimaliðið tapti fyrsta setti stórt (13-25), áðrenn tvey tey næstu settini vóru tættari.

Heimaliðið royndi, men ukrainar vóru omaná (Myndir: Mjølnir)

Reshetylika vann tó 25-20 og 25-21 og harvið 3-0. Ukrainska liðið heldur fram í Challenge Cup - Mjølnir skal aftur hugsavna seg um føroysku kappingina.

Greinin varð fyrstu ferð løgd út 18. oktober 2024

U19 NEVZA kappingin í flogbólti verður í Føroyum

Soleiðis verður næstu trý árini, boðar Flogbóltssamband Føroya frá. Ársins kapping verður Í døgunum 25. oktober til 27. oktober í høllini á Hálsi

NEVZA er norðuratlantiska økið undir CEV. Ellivu lið eru við í ár (Mynd: Flogbóltssamband Føroya)

SkrivaÐ:

Agnar Prestá

Næstu trý árini verður Flogbóltssamband Føroya vertur fyri árligu U19 NEVZA kappingini fyri gentur og dreingir. 

Greinin varð fyrstu ferð løgd út 15. oktober 2024

Karstin Ljósstein kom heim við silvurheiðursmerki

Tapti finaluna í Hillerød móti íslendingi, men eins og undanfarin ár kom Tórshavn Boksing aftur av stevnuni við heiðursmerki. David Kunoy og Teitur Annand Berg vóru eisini í nevaleiki í stóru altjóða kappingini

David Kunoy, Karstin Ljósstein og Teitur Annand Berg (Mynd: Tórshavn Boksing)

SkrivaÐ:

Agnar Prestá

Tríggir av bestu nevaleikarunum hjá Tórshavn Boksing kappaðust farna vikuskiftið í Hillerød. Talan var um stóru altjóða boksikappingini HSK Cup

520 boksarar úr 14 ymiskum londum luttóku - David Kunoy, Teitur Annand Berg og Karstin Ljósstein vóru umboðini hjá Føroyum og Tórshavn Boksing.

David boksar í weltervekt-flokkinum millum 63,5 og 67 kilo. Teitur boksar í lættvekt millum 57 og 60 kilo og Karstin boksar í lætt veltervekt, sum er 60 til 63,5 kilo.

David, Karstin og Teitur (Mynd: Tórshavn Boksing)

David og Teitur eru elitu-boksarar. Báðir taptu sínar dystir leygardagin og komu harvið ikki til finaluumfarið.

Teitur Annand Berg hevði ein ógvuliga tættan dyst móti donskum mótsstøðumanni, har havnarmaðurin boksaði ein av sínum allar bestu dystum. Danin vann tó upp á stig - við einari "split decision" sum merkir, at dómararnir vóru ósamdir. Tórshavn Boksing helt eisini, at Teitur átti at vunnið, og eftir dystin samdust partarnir um, at teir áttu tikið ein umdyst í Føroyum, tí tað var so tætt og gott fyri báðar partar.

David Kunoy vann í fjør gull í kappingini við sigri á einum belgiskum boksara. Farna vikuskifti hitti hann ein niðurlending, sum tó var í so sterkur, hóast David bjóðaði av í 2. og 3. umfari. Tørvur er helst at kappast meira uttanlands fyri millum annað at fáa røttu sparringina, staðfestir Tórshavn Boksing.

Karstin Ljósstein boksar í U19 við hjálmi. Hann stríddi seg leygardagin í finaluna við sigri á stríðsmanni úr Malmö. Sunnudagin noyddust Karstin og hinir føroyingarnir tó at sanna, at íslendski mótsstøðumaðurin var ov sterkur á degnum. Talt var yvir Karstin nakrar ferðir, tí dómarin metti, at hann fekk so hart slag. Karstrin var tó standandi á beinunum, men beint áðrenn tíðin rann út, støðgaði dómarin dystinum, og íslendingurin varð útróptur sum vinnari.

Íslendskt umboð og føroyskt umboð í U19-finalu á Norðursælandi (Mynd: Tórshavn Boksing)

Nøgdsemi er í venjaratoyminum hjá nevaleiksfelagnum í Havn við avrikið hjá Karstini, sum ikki hevur so nógvar altjóða royndir sum hinir.

Hetta var triðju ferð, at Tórshavn Boksing luttók til stóru altjóða stevnuna í Hillerød - og og triðju ferð at teir komu heim við heiðursmerki.

Greinin varð fyrstu ferð løgd út 15. oktober 2024

Ólavur Kjølbro vann Haldor Holm Cup

Hóast harða mótstøðu frá einum av føroysku billardveteranunum, Sonhard Johannesen, eydnaðist tað Ólavi Kjølbro at vinna Haldor Holm Cup í Klaksvík leygardagin. Seinast Ólavur vann kappingina var í 2002

Ólavur Kjølbro fær sítt navn í risastóra Haldor Holm steypið fyri aðru ferð (Mynd: Heri Signar Nolsøe)

SkrivaÐ:

Jan Müller

Stórur spenningur var undan hesi 34. Haldor Holm Cup kappingini í Klaksvík, nú fleiri av landsins bestu spælarum høvdu bjóðað seg fram, teirra millum fleiri fyrrverandi vinnararar eins og føroyameistarar í billard. Ilt var tí eisini at fáa eygað á ein tryggan vinnara, nú fimm ymsir spælarar hava vunnið kappingina seinastu árini.

Kortini vóru fleiri boð uppá ein vinnara, eitt nú Páll Heri Nolsøe, sum vann kappingina í fjør eins og at vinna FM heitið fyri einstaklingar eisini. Eisini vóru fleiri aðrir sterkir spælarar við so sum Kristian Suni Høgnesen, Jógvan Jørgensen, Sonhard Johannesen og Urbanus Olsen.

Sonhard Johannesen gjørdist nummar tvey (Mynd: Heri Signar Nolsøe) 

Veruligur spenningur kom í kappingina, tá ein av teimum gomlu og royndu billardspælarunum í Klaksvík, Sonhard Johannesen, tók øll á bóli við at vinna á tveimum av billardrisunum, Páll Hera Nolsøe og Kristian Suna Høgnesen. 

Kappingin er eitt slag av cup-skipan, har tapari frá byrjan sleppur ikki at halda fram, í mun til gomlu skipanina, har vunnin stig gera av, hvør sleppur víðari. Sostætt vóru skjótt fleiri góðir spælarar sorteraðir frá, meðan aðrir sluppu víðari  gjøgnum nálareygað.  Ein teirra var Sonhard Johannesen, sum ongantíð áður hevur vunnið júst hesa kappingina, tó at hann hevur verið føroyameistari bæði fyri lið og einstaklingar áður.

Sonhard tók øll á bóli, tá hann vann á seinasta vinnaranum av Haldor Holm Cup, Páll Hera Nolsøe av Tvøroyri. Og ikki nokk við tað. Sonhard megnaði eisini at syfta sjeyfalda vinnaranum av Haldor Holm Cup, Kristian Suna Høgnesen, og beindi sær harvið pláss í finaluna, har hann møtti eina tí besta føroyska  billardspælaranum í løtuni, Ólavi Kjølbro. Ólavur setti beina kós móti finaluni, tá hann vann greitt á Urbanus Olsen.

Hóast Ólavur sjáldan letur nakran koma nær námind sínum trygga og neyva spæli, helt Sonhard fram við sínum góða spæli, og feldi keylur aftur og aftur stóran part av finaluumfarinum, men tá avtornaði var Ólavur tann betri av teimum báðum, og kundi harvið tryggja sær sítt annað Haldor Holm Cup heitið. Tað skuldu tó ganga 22 ár síðani hann vann hetta heitið fyri fyrstu ferð.

Ólavur gjørdi vart við seg í 2002, tá hann vann Haldor Holm Cup. Síðani hevur hann verið í Danmark, men eftir at hann kom heimaftur fyri nøkrum árum síðani, hevur hann vunnið tað mesta, sum vinnast kann. Hann hevur verið  við til at vinna FM fyri lið, FM fyri einstaklingar og nú Haldor Holm kappingina.

Greinin varð fyrstu ferð løgd út 13. oktober 2024

NM 2024: Bestu norðurlendsku vektlyftararnir kappast í Runavík

Sjey føroyingar eru millum teir 75 lyftararnar í NM kappingini - hetta er fyrstu ferð, at NM í vektlyfting er í Føroyum

Jenny Persson er ein av føroyingunum, sum skulu kappast

SkrivaÐ:

Tíðindaskriv

Bylgjan við Løkin í Runavík og Føroya Styrkisamband bjóða hetta vikuskiftið til spennandi og forkunnuga kapping í olympiskari vektlyfting. Norðurlendska meistarastevnan verður tá fyri fyrstu ferð hildin í Føroyum.

Føroyingarnir smæðast ikki burtur ímilum teir 75 úr øllum norðurlondum.

Jenny Persson, Maibrit Reynheim Petersen, Julia Tormansdóttir Jacobsen, Pól Hendrikur Andreasen, Niels Áki Mørk, Leif á Bøgarði og Sofus Bech fara øll at gera sítt ítarsta og vóna, at nógvir áskoðarar koma at stuðla. Ókeypis atgongd er til kappingina

Olympisk vektlyfting er spenningur í hásæti
Kappingar í vektlyfting eru altíð spennandi, har ið tann sera konsentreraði lyftararin gongur fram ímóti vektstongini og upp á eitt splittsekund miðsavnar allan sín smidleika, skjótleika, snildir, megi og royndir fyri at fáa stongina í strektar armar yvir høvd. Og halda javnvágina.

Fleiri av norðurlendsku luttakarunum hava longu gjørt um seg á altjóða pallinum og hava vunnið heiðursmerki við bæði EM og HM.

Føroyar luttóku fyri fyrstu ferð í NM í 2022. Nú verður tað á heimavølli, og stuðulin frá áskoðaraplássunum kann verða síðsta skumpið og eggjanin, ið skal til fyri at tryggja eitt føroyskt pláss á heiðursmerkjapallinum.

Hvat er olympisk vektlyfting?
Olympisk vektyfting er tvey ymisk lyft: Trekk (snatch) og stoyt (clean and jerk). Lyftarin hevur tríggjar royndir í hvørjum lyfti: Seks lyft íalt. Tann, ið lyftir mest samanlagt (tveykampur), er vinnari. Lyftini krevja neyvleika og tamarhald, og ofta eru millimetrar avgerandi.

Greinin varð fyrstu ferð løgd út 16. oktober 2024

Talv: Skarvslop eftir gott OL

18 ára gamli føroyameistarin, Luitjen Akselsson Apol úr Havnar Telvingarfelag, hevur nú yvirhálað bæði John Rødgaard og Rógva Egilstoft á føroyska landsliðnum, og hevur otað seg fram á triðja plássið á føroyska styrkilistanum.

Lagið var gott á føroyska talvlandsliðnum eftir góða OL-úrslitið í Budapest í september. Nú FIDE hevur kunngjørt oktober-listan sæst, at føroyameistarin Luitjen Akselsson Apol - ytst høgrumegin á myndini - gongur 111 stig fram á styrkilistanum. Hinir á myndini eru f.v.: Helgi Dam Ziska, Rógvi Egilstoft, Høgni Egilstoft Nielsen og John Rødgaard

SkrivaÐ:

Innsent

Fyri frálíka OL-úrslitið, ið eisini tryggjaði honum ein IM-norm, forvinnur Luitjen Akselsson Apol í alt 111 ratingstig. Brøðurnir Høgni og Rógvi Egilstoft ganga eisini fram við ávíkavist tíggju og tólv stigum. Høgni tryggjaði sær sum kunnugt heitið sum altjóða meistari (IM) á OL.

Stórmeistarin, Helgi Dam Ziska, gongur tíggju stig aftur, og John Rødgaard gongur fimtan stig aftur.

Føroyar standa nummar 76 av teimum 203 londunum, ið skrásett eru á yvirlitinum hjá altjóða talvsambandinum FIDE. Útrokningin er grundað á miðaltalið hjá fremstu tíggju telvarunum í hvørjum landi. Í OL-kappingini í Ungarn herfyri endaðu Føroyar nummar 52 av 188 londum.

Snópisliga tapið hjá Helga Dam Ziska í fyrsta umfari, tá hann gloymdi klokkuna í vunnari støðu í dystinum móti Santa Lucia, kostaði honum tey tíggju stigini, ið hann nú gekk aftur. Hann er kortini stavnin undan sterkasta íslendinginum, Vignir Vatnar Stefansson, sum við styrkitalinum 2541 er hálvthundrað ratingstig fremri enn hin næstbesti av íslendsku stórmeistarunum.

Niðanfyri sæst hvørjir okkara fremstu tíggju telvarar eru. Nevnast kann, at John Arni Nilssen, sum er altjóða meistari, er gliðin av listanum, sama er Olaf Berg. Hevur tú einki kappingartalv telvað í eitt ár, glíður tú av listanum. Soleiðis eru FIDE-reglurnar. Talið stendur kortini, og so títt og knapt, at tú aftur er virkin, ert tú aftur á listanum.

Nakrir á føroyska topp 10 listanum búgva og telva í Danmark. John Rødgaard situr á 1. borði hjá Esbjerg Skakklub í næstbestu donsku deildini, Jóan Hendrik Andreasen telvar við Brønshøj Skakforening, stundum í bestu deildini, Skakligaen. Hartil er Flóvin Tór Næs álitið hjá Haslev Skakklub, sum telvar í lægri deild.

Í styrkilistunum, sum tey tíggju virknu talvfeløgini í Føroyum hava latið Talvsambandinum, nú landskappingin er byrjað, sæst, at í alt 358 telvarar eru virknir í Føroyum í løtuni. Tá eru ikki øll børnini, sum telva, íroknað.

10 teir bestu (oktober 2024)

1. GM Helgi Dam Ziska, HT 2543
2. IM Høgni Egilstoft Nielsen, ST 2389
3. Luitjen Akselsson Apol, HT 2330
4. Rógvi Egilstoft, ST 2290
5. IM John Rødgaard, VT 2258
6. Martin Poulsen, HT 2258
7. Ólavur Simonsen, KTF 2195
8. Jóan Hendrik Andreasen, HT 2189
9. Flóvin Tór Næs, HT 2186
10. Carl Eli N. Samuelsen, HT 2184

Landskappingin byrjað

Farna vikuskiftið vóru dystirnir í fyrsta umfari í liðkappingini telvaðir í 1.- 2.- og 3 deild. Kappingin í 4 deild byrjar seinni.

1 deild:
HT (1) - HT (2) 4-0
KTF (1) - KTF (2) 3½-½
KT - ST 1-3

Hvørgin av OL-telvarunum hjá Havnar Telvingarfelag, Helgi Dam Ziska og Luitjen Akselsson Apol, vóru við. A-liðið hjá Havnini gjørdi bart móti B-liðnum. Á liðnum vóru Carl Eli Samuelsen, Sjúrður Thorsteinsson, Hjalti Toftum Jógvansson og Herluf Hansen.

A-liðið hjá klaksvíkingum gjørdi eisini bart í innanhýsis dystinum móti Klaksvík B. Manningin á A-liðnum var Ólavur Simonsen, Rani Baldursson, Heðin Gregersen og Terji Petersen.

Sandavágsmenn vunnu greiðan sigur á uppflytaranum úr Kollafjarðar Talvfelagi. Rógvi Egilstoft var ikki við. Høgni Egilstoft Nielsen, Silas Eyðsteinsson og Jón í Horni Nielsen vunnu, men á 4 borði hjá Kollafirði vann unglingin Markus Jacobsen á fleirfalda føroyameistaranum Torkil Nielsen.

Telvað verður aftur í landskappingini 27. Oktober. Dystirnir í 1 deild í 2 umfari eru hesir:

Sandavágur - Havnin (2)
Klaksvík (2) - Havnin (1)
Kollafjørður - Klaksvík (1)

Greinin varð fyrstu ferð løgd út 15. oktober 2024